śravaṇavidhikathanam
śrīmadbhāgavatamāhātmyam - ṣaṣṭho'dhyāyaḥ śrīmadbhāgavata saptāhapārāyaṇavidhiḥ kumārā ūcuḥ .
(anuṣṭup) atha te saṃpravakṣyāmaḥ saptāhaśravaṇe vidhim .
sahāyairvasubhiścaiva prāyaḥ sādhyo vidhiḥ smṛtaḥ
||1||श्रीमद्भागवतमाहात्म्यम् - षष्ठोऽध्यायः श्रीमद्भागवत सप्ताहपारायणविधिः कुमारा ऊचुः ।
(अनुष्टुप्) अथ ते संप्रवक्ष्यामः सप्ताहश्रवणे विधिम् ।
सहायैर्वसुभिश्चैव प्रायः साध्यो विधिः स्मृतः
daivajñaṃ tu samāhūya muhūrtaṃ pṛcchya yatnataḥ .
vivāhe yādṛśaṃ vittaṃ tādṛśaṃ parikalpayet
||2||दैवज्ञं तु समाहूय मुहूर्तं पृच्छ्य यत्नतः ।
विवाहे यादृशं वित्तं तादृशं परिकल्पयेत्
nabhasya āśvinorjau ca mārgaśīrṣaḥ śucirnabhāḥ .
ete māsāḥ kathārambhe śrotṝṇāṃ mokṣasūcakāḥ
||3||नभस्य आश्विनोर्जौ च मार्गशीर्षः शुचिर्नभाः ।
एते मासाः कथारम्भे श्रोतॄणां मोक्षसूचकाः
māsānāṃ vipra heyāni tāni tyājyāni sarvathā .
sahāyāścetare tatra kartavyāḥ sodyamāśca ye
||4||मासानां विप्र हेयानि तानि त्याज्यानि सर्वथा ।
सहायाश्चेतरे तत्र कर्तव्याः सोद्यमाश्च ये
deśe deśe tathā seyaṃ vārtā preṣyā prayatnataḥ .
bhaviṣyati kathā cātra āgantavyaṃ kuṭumbibhiḥ
||5||देशे देशे तथा सेयं वार्ता प्रेष्या प्रयत्नतः ।
भविष्यति कथा चात्र आगन्तव्यं कुटुम्बिभिः
dūre harikathāḥ kecit dūre cācyutakīrtanāḥ .
striyaḥ śūdrādayo ye ca teṣāṃ bodho yato bhavet
||6||दूरे हरिकथाः केचित् दूरे चाच्युतकीर्तनाः ।
स्त्रियः शूद्रादयो ये च तेषां बोधो यतो भवेत्
deśe deśe viraktā ye vaiṣṇavāḥ kīrtanotsukāḥ .
teṣveva patraṃ preṣyaṃ ca tallekhanaṃ itīritam
||7||देशे देशे विरक्ता ये वैष्णवाः कीर्तनोत्सुकाः ।
तेष्वेव पत्रं प्रेष्यं च तल्लेखनं इतीरितम्
satāṃ samājo bhavitā saptarātraṃ sudurlabhaḥ .
apūrvarasarūpaiva kathā cātra bhaviṣyati
||8||सतां समाजो भविता सप्तरात्रं सुदुर्लभः ।
अपूर्वरसरूपैव कथा चात्र भविष्यति
śrīmadbhāgavata pīyuṣa pānāya rasalampaṭāḥ .
bhavantaśca tathā śīghraṃ āyāta prematatparāḥ
||9||श्रीमद्भागवत पीयुष पानाय रसलम्पटाः ।
भवन्तश्च तथा शीघ्रं आयात प्रेमतत्पराः
nāvakāśaḥ kadācit cet dinamātraṃ tathāpi tu .
sarvathā''gamanaṃ kāryaṃ kṣaṇo'traiva sudurlabhaḥ
||10||नावकाशः कदाचित् चेत् दिनमात्रं तथापि तु ।
सर्वथाऽऽगमनं कार्यं क्षणोऽत्रैव सुदुर्लभः
evamākāraṇaṃ teṣāṃ kartavyaṃ vinayena ca .
āgantukānāṃ sarveṣāṃ vāsasthānāni kalpayet
||11||एवमाकारणं तेषां कर्तव्यं विनयेन च ।
आगन्तुकानां सर्वेषां वासस्थानानि कल्पयेत्
tīrthe vāpi vane vāpi gṛhe vā śravaṇaṃ matam .
viśālā vasudhā yatra kartavyaṃ tatkathāsthalam
||12||तीर्थे वापि वने वापि गृहे वा श्रवणं मतम् ।
विशाला वसुधा यत्र कर्तव्यं तत्कथास्थलम्
śodhanaṃ mārjanaṃ bhūmeḥ lepanaṃ dhātumaṇḍanam .
gṛhopaskaramuddhrutya gṛhakoṇe niveśayet
||13||शोधनं मार्जनं भूमेः लेपनं धातुमण्डनम् ।
गृहोपस्करमुद्ध्रुत्य गृहकोणे निवेशयेत्
arvāk paṃcāhato yatnāt āstīrṇāni pramelayet .
kartavyo maṇḍapaḥ proccaiḥ kadalīkhaṇḍamaṇḍitaḥ
||14||अर्वाक् पंचाहतो यत्नात् आस्तीर्णानि प्रमेलयेत् ।
कर्तव्यो मण्डपः प्रोच्चैः कदलीखण्डमण्डितः
phalapuṣpadalairviṣvak vitānena virājitaḥ .
caturdikṣu dhvajāropo bahusampadvirājitaḥ
||15||फलपुष्पदलैर्विष्वक् वितानेन विराजितः ।
चतुर्दिक्षु ध्वजारोपो बहुसम्पद्विराजितः
ūrdhvaṃ saptaiva lokāśca kalpanīyāḥ savistaram .
teṣu viprā viraktāśca sthāpanīyāḥ prabodhya ca
||16||ऊर्ध्वं सप्तैव लोकाश्च कल्पनीयाः सविस्तरम् ।
तेषु विप्रा विरक्ताश्च स्थापनीयाः प्रबोध्य च
pūrvaṃ teṣāṃ āsanāni kartavyāni yathottaram .
vaktuścāpi tadā divyaṃ āsanaṃ parikalpayet
||17||पूर्वं तेषां आसनानि कर्तव्यानि यथोत्तरम् ।
वक्तुश्चापि तदा दिव्यं आसनं परिकल्पयेत्
udaṅmukho bhavedvaktā śrotā vai prāṅmukhastadā .
prāṅmukhaścet bhavedvaktā śrotā ca udaṅmukhastadā
||18||उदङ्मुखो भवेद्वक्ता श्रोता वै प्राङ्मुखस्तदा ।
प्राङ्मुखश्चेत् भवेद्वक्ता श्रोता च उदङ्मुखस्तदा
athavā pūrvadigjñeyā pūjyapūjakamadhyataḥ .
śrotṝṇāṃ āgame proktā deśakālādikovidaiḥ
||19||अथवा पूर्वदिग्ज्ञेया पूज्यपूजकमध्यतः ।
श्रोतॄणां आगमे प्रोक्ता देशकालादिकोविदैः
virakto vaiṣṇavo vipro vedaśāstraviśuddhikṛt .
dṛṣṭāntakuśalo dhīro vaktā kāryo'ti niḥspṛha
||20||विरक्तो वैष्णवो विप्रो वेदशास्त्रविशुद्धिकृत् ।
दृष्टान्तकुशलो धीरो वक्ता कार्योऽति निःस्पृह
anekadharmanibhrāntāḥ straiṇāḥ pākhaṇḍavādinaḥ .
śukaśāstrakathoccāre tyājyāste yadi paṇḍitāḥ
||21||अनेकधर्मनिभ्रान्ताः स्त्रैणाः पाखण्डवादिनः ।
शुकशास्त्रकथोच्चारे त्याज्यास्ते यदि पण्डिताः
vaktuḥ pārśve sahāyārthaṃ anyaḥ sthāpyastathāvidhaḥ .
paṇḍitaḥ saṃśayacchettā lokabodhanatatparaḥ
||22||वक्तुः पार्श्वे सहायार्थं अन्यः स्थाप्यस्तथाविधः ।
पण्डितः संशयच्छेत्ता लोकबोधनतत्परः
vaktrā kṣauraṃ prakartavyaṃ dinād arvāk vratāptaye .
aruṇodaye'sau nirvartya śaucaṃ snānaṃ samācaret
||23||वक्त्रा क्षौरं प्रकर्तव्यं दिनाद् अर्वाक् व्रताप्तये ।
अरुणोदयेऽसौ निर्वर्त्य शौचं स्नानं समाचरेत्
nityaṃ saṃkṣepataḥ kṛtvā saṃdhyādyaṃ svaṃ prayatnataḥ .
kathāvighnavighātāya gaṇanāthaṃ prapūjayet
||24||नित्यं संक्षेपतः कृत्वा संध्याद्यं स्वं प्रयत्नतः ।
कथाविघ्नविघाताय गणनाथं प्रपूजयेत्
pitṝn saṃtarpya śuddhyarthaṃ prāyaścittaṃ samācaret .
maṇḍalaṃ ca prakartavyaṃ tatra sthāpyo haristathā
||25||पितॄन् संतर्प्य शुद्ध्यर्थं प्रायश्चित्तं समाचरेत् ।
मण्डलं च प्रकर्तव्यं तत्र स्थाप्यो हरिस्तथा
kṛṣṇamuddiśya maṃtreṇa caret pūjāvidhiṃ kramāt .
pradakṣiṇa namaskārān pūjānte stutimācaret
||26||कृष्णमुद्दिश्य मंत्रेण चरेत् पूजाविधिं क्रमात् ।
प्रदक्षिण नमस्कारान् पूजान्ते स्तुतिमाचरेत्
saṃsārasāgare magnaṃ dīnaṃ māṃ karuṇānidhe .
karmamohagṛhītāṅgaṃ māmuddhara bhavārṇavāt
||27||संसारसागरे मग्नं दीनं मां करुणानिधे ।
कर्ममोहगृहीताङ्गं मामुद्धर भवार्णवात्
śrīmadbhāgavatasyāpi tataḥ pūjā prayatnataḥ .
kartavyā vidhinā prītyā dhūpadīpasamanvitā
||28||श्रीमद्भागवतस्यापि ततः पूजा प्रयत्नतः ।
कर्तव्या विधिना प्रीत्या धूपदीपसमन्विता
tatastu śrīphalaṃ dhṛtvā namaskāraṃ samācaret .
stutiḥ prasannacittena kartavyā kevalaṃ tadā
||29||ततस्तु श्रीफलं धृत्वा नमस्कारं समाचरेत् ।
स्तुतिः प्रसन्नचित्तेन कर्तव्या केवलं तदा
śrīmadbhāgavatākhyo'yaṃ pratyakṣaḥ kṛṣṇa eva hi .
svīkṛto'si mayā nātha muktyarthaṃ bhavasāgare
||30||श्रीमद्भागवताख्योऽयं प्रत्यक्षः कृष्ण एव हि ।
स्वीकृतोऽसि मया नाथ मुक्त्यर्थं भवसागरे
manoratho madīyo'yaṃ saphalaḥ sarvathā tvayā .
nirvighnenaiva kartavya dāso'haṃ tava keśava
||31||मनोरथो मदीयोऽयं सफलः सर्वथा त्वया ।
निर्विघ्नेनैव कर्तव्य दासोऽहं तव केशव
evaṃ dīnavacaḥ procya vaktāraṃ cātha pūjayet .
sambhūṣya vastrabhūṣābhiḥ pūjānte taṃ ca saṃstavet
||32||एवं दीनवचः प्रोच्य वक्तारं चाथ पूजयेत् ।
सम्भूष्य वस्त्रभूषाभिः पूजान्ते तं च संस्तवेत्
śukarūpa prabodhajña sarvaśāstraviśārada .
etatkathāprakāśena madajñānaṃ vināśaya
||33||शुकरूप प्रबोधज्ञ सर्वशास्त्रविशारद ।
एतत्कथाप्रकाशेन मदज्ञानं विनाशय
tadagre niyamaḥ paścāt kartavyaḥ śreyase mudā .
saptarātraṃ yathāśaktyā dhāraṇīyaḥ sa eva hi
||34||तदग्रे नियमः पश्चात् कर्तव्यः श्रेयसे मुदा ।
सप्तरात्रं यथाशक्त्या धारणीयः स एव हि
varaṇaṃ paṃcaviprāṇāṃ kathābhaṅganivṛttaye .
kartavyaṃ taiḥ harerjāpyaṃ dvādaśākṣaravidyayā
||35||वरणं पंचविप्राणां कथाभङ्गनिवृत्तये ।
कर्तव्यं तैः हरेर्जाप्यं द्वादशाक्षरविद्यया
brāhmaṇān vaiṣṇavān cānyān tathā kīrtanakāriṇaḥ .
natvā saṃpūjya dattājñaḥ svayaṃ āsanamāviśet
||36||ब्राह्मणान् वैष्णवान् चान्यान् तथा कीर्तनकारिणः ।
नत्वा संपूज्य दत्ताज्ञः स्वयं आसनमाविशेत्
lokavittadhanāgāra putracintāṃ vyudasya ca .
kathācittaḥ śuddhamatiḥ sa labhetphalamuttamam
||37||लोकवित्तधनागार पुत्रचिन्तां व्युदस्य च ।
कथाचित्तः शुद्धमतिः स लभेत्फलमुत्तमम्
āsūryodayamārabhya sārdhatripraharāntakam .
vācanīyā kathā samyak dhīrakaṇṭhaṃ sudhīmatā
||38||आसूर्योदयमारभ्य सार्धत्रिप्रहरान्तकम् ।
वाचनीया कथा सम्यक् धीरकण्ठं सुधीमता
kathāvirāmaḥ kartavyo madhyāhne ghaṭikādvayaṃ .
tatkathāmanu kāryaṃ vai kīrtanaṃ vaiṣṇavaistadā
||39||कथाविरामः कर्तव्यो मध्याह्ने घटिकाद्वयं ।
तत्कथामनु कार्यं वै कीर्तनं वैष्णवैस्तदा
malamūtrajayārthaṃ hi laghvāhāraḥ sukhāvahaḥ .
haviṣyānnena kartavyo hi, ekavāraṃ kathārthinā
||40||मलमूत्रजयार्थं हि लघ्वाहारः सुखावहः ।
हविष्यान्नेन कर्तव्यो हि, एकवारं कथार्थिना
upoṣya saptarātraṃ vai śaktiścet śruṇuyāt tadā .
ghṛtapānaṃ payaḥpānaṃ kṛtvā vai śrṛṇuyāt sukham
||41||उपोष्य सप्तरात्रं वै शक्तिश्चेत् श्रुणुयात् तदा ।
घृतपानं पयःपानं कृत्वा वै श्रृणुयात् सुखम्
phalāhāreṇa vā bhāvyaṃ ekabhuktena vā punaḥ .
sukhasādhyaṃ bhaved yattu kartavyaṃ śravaṇāya tat
||42||फलाहारेण वा भाव्यं एकभुक्तेन वा पुनः ।
सुखसाध्यं भवेद् यत्तु कर्तव्यं श्रवणाय तत्
bhojanaṃ tu varaṃ manye kathāśravaṇakārakam .
nopavāso varaḥ proktaḥ kathāvighnakaro yadi
||43||भोजनं तु वरं मन्ये कथाश्रवणकारकम् ।
नोपवासो वरः प्रोक्तः कथाविघ्नकरो यदि
saptāhavratināṃ puṃsāṃ niyamān śruṇu nārada .
viṣṇudīkṣāvihīnānāṃ nādhikāraḥ kathāśrave
||44||सप्ताहव्रतिनां पुंसां नियमान् श्रुणु नारद ।
विष्णुदीक्षाविहीनानां नाधिकारः कथाश्रवे
brahmacaryamadhaḥ suptiḥ patrāvalyāṃ ca bhojanam .
kathāsamāptau bhuktiṃ ca kuryāt nityaṃ kathāvratī
||45||ब्रह्मचर्यमधः सुप्तिः पत्रावल्यां च भोजनम् ।
कथासमाप्तौ भुक्तिं च कुर्यात् नित्यं कथाव्रती
dvidalaṃ madhu tailaṃ ca gariṣṭhānnaṃ tathaiva ca .
bhāvaduṣṭaṃ paryuṣitaṃ jahyāt nityaṃ kathāvratī
||46||द्विदलं मधु तैलं च गरिष्ठान्नं तथैव च ।
भावदुष्टं पर्युषितं जह्यात् नित्यं कथाव्रती
kāmaṃ krodhaṃ madaṃ mānaṃ matsaraṃ lobhameva ca .
dambha mohaṃ tathā dveṣaṃ dūrayecca kathāvratī
||47||कामं क्रोधं मदं मानं मत्सरं लोभमेव च ।
दम्भ मोहं तथा द्वेषं दूरयेच्च कथाव्रती
vedavaiṣṇavaviprāṇāṃ gurugovratināṃ tathā .
strīrājamahatāṃ nindāṃ varjayet yaḥ kathāvratī
||48||वेदवैष्णवविप्राणां गुरुगोव्रतिनां तथा ।
स्त्रीराजमहतां निन्दां वर्जयेत् यः कथाव्रती
rajasvalā antyaja mleccha patita vrātyakaistathā .
dvijadviḍ vedabāhyaiśca na vadet yaḥ kathāvratī
||49||रजस्वला अन्त्यज म्लेच्छ पतित व्रात्यकैस्तथा ।
द्विजद्विड् वेदबाह्यैश्च न वदेत् यः कथाव्रती
satyaṃ śaucaṃ dayāṃ maunaṃ ārjavaṃ vinayaṃ tathā .
udāramānasaṃ tadvat evaṃ kuryāt kathāvratī
||50||सत्यं शौचं दयां मौनं आर्जवं विनयं तथा ।
उदारमानसं तद्वत् एवं कुर्यात् कथाव्रती
daridraśca kṣayī rogī nirbhāgyaḥ pāpakarmavān .
anapatyo mokṣakāmaḥ śruṇuyācca kathāmimām
||51||दरिद्रश्च क्षयी रोगी निर्भाग्यः पापकर्मवान् ।
अनपत्यो मोक्षकामः श्रुणुयाच्च कथामिमाम्
apuṣpā kākavandhyā ca vandhyā yā ca mṛtārbhakā .
sravat garbhā ca yā nārī tayā śrāvyā prayatnataḥ
||52||अपुष्पा काकवन्ध्या च वन्ध्या या च मृतार्भका ।
स्रवत् गर्भा च या नारी तया श्राव्या प्रयत्नतः
eteṣu vidhinā śrāve tadakṣayataraṃ bhavet .
atyuttamā kathā divyā koṭiyajñaphalapradā
||53||एतेषु विधिना श्रावे तदक्षयतरं भवेत् ।
अत्युत्तमा कथा दिव्या कोटियज्ञफलप्रदा
evaṃ kṛtvā vratavidhiṃ udyāpanaṃ athācaret .
janmāṣṭamī vratamiva kartavyaṃ phalakāṃkṣibhiḥ
||54||एवं कृत्वा व्रतविधिं उद्यापनं अथाचरेत् ।
जन्माष्टमी व्रतमिव कर्तव्यं फलकांक्षिभिः
akiṃcaneṣu bhakteṣu prāyo nodyāpanāgrahaḥ .
śravaṇenaiva pūtāste niṣkāmā vaiṣṇavā yataḥ
||55||अकिंचनेषु भक्तेषु प्रायो नोद्यापनाग्रहः ।
श्रवणेनैव पूतास्ते निष्कामा वैष्णवा यतः
evaṃ nagāhayajñe'smin samāpte śrotṛbhistadā .
pustakasya ca vaktuśca pūjā kāryātibhaktitaḥ
||56||एवं नगाहयज्ञेऽस्मिन् समाप्ते श्रोतृभिस्तदा ।
पुस्तकस्य च वक्तुश्च पूजा कार्यातिभक्तितः
prasādatulasīmālā śrotṛbhyaścātha dīyatām .
mṛdaṃgatālalalitaṃ kartavyaṃ kīrtanaṃ tataḥ
||57||प्रसादतुलसीमाला श्रोतृभ्यश्चाथ दीयताम् ।
मृदंगतालललितं कर्तव्यं कीर्तनं ततः
jayaśabdaṃ namaḥśabdaṃ śaṃkhaśabdaṃ ca kārayet .
viprebhyo yācakebhyaśca vittaṃ annaṃ ca dīyatām
||58||जयशब्दं नमःशब्दं शंखशब्दं च कारयेत् ।
विप्रेभ्यो याचकेभ्यश्च वित्तं अन्नं च दीयताम्
viraktaścet bhavet śrotā gītā vādyā pare'hani .
gṛhasthaścet tadā homaḥ kartavyaḥ karmaśāntaye
||59||विरक्तश्चेत् भवेत् श्रोता गीता वाद्या परेऽहनि ।
गृहस्थश्चेत् तदा होमः कर्तव्यः कर्मशान्तये
pratiślokaṃ tu juhuyāt vidhinā daśamasya ca .
pāyasaṃ madhu sarpiśca tilān ādikasaṃyutam
||60||प्रतिश्लोकं तु जुहुयात् विधिना दशमस्य च ।
पायसं मधु सर्पिश्च तिलान् आदिकसंयुतम्
athavā havanaṃ kuryād gāyatryā susamāhitaḥ .
tanmayatvāt purāṇasya paramasya ca tattvataḥ
||61||अथवा हवनं कुर्याद् गायत्र्या सुसमाहितः ।
तन्मयत्वात् पुराणस्य परमस्य च तत्त्वतः
homāśaktau budho haumyaṃ dadyāt tatphala siddhaye .
nānācchidranirodhārthaṃ nyūnatādhikatānayoḥ
||62||होमाशक्तौ बुधो हौम्यं दद्यात् तत्फल सिद्धये ।
नानाच्छिद्रनिरोधार्थं न्यूनताधिकतानयोः
doṣayoḥ praśamārthaṃ ca paṭhet nāmasahasrakam .
tena syāt saphalaṃ sarvaṃ nāstyasmādadhikaṃ yataḥ
||63||दोषयोः प्रशमार्थं च पठेत् नामसहस्रकम् ।
तेन स्यात् सफलं सर्वं नास्त्यस्मादधिकं यतः
dvādaśa brāhmaṇān paścāt bhojayet madhupāyasaiḥ .
dadyāt suvarṇaṃ dhenuṃ ca vratapūrṇatvahetave
||64||द्वादश ब्राह्मणान् पश्चात् भोजयेत् मधुपायसैः ।
दद्यात् सुवर्णं धेनुं च व्रतपूर्णत्वहेतवे
śaktau palatrayamitaṃ svarṇasiṃhaṃ vidhāya ca .
tatrāsya pustakaṃ sthāpyaṃ likhitaṃ lalitākṣaram
||65||शक्तौ पलत्रयमितं स्वर्णसिंहं विधाय च ।
तत्रास्य पुस्तकं स्थाप्यं लिखितं ललिताक्षरम्
saṃpūjya āvāhanādyaiḥ tad upacāraiḥ sadakṣiṇam .
vastrabhūṣaṇa gandhādyaiḥ pūjitāya yatātmane
||66||संपूज्य आवाहनाद्यैः तद् उपचारैः सदक्षिणम् ।
वस्त्रभूषण गन्धाद्यैः पूजिताय यतात्मने
ācāryāya sudhīrdattvā muktaḥ syād bhavabaṃdhanaiḥ .
evaṃ kṛte vidhāne ca sarvapāpanivāraṇe
||67||आचार्याय सुधीर्दत्त्वा मुक्तः स्याद् भवबंधनैः ।
एवं कृते विधाने च सर्वपापनिवारणे
phaladaṃ syāt purāṇaṃ tu śrīmadbhāgavataṃ śubham .
dharmakāmārthamokṣāṇāṃ sādhanaṃ syāt na saṃśayaḥ
||68||फलदं स्यात् पुराणं तु श्रीमद्भागवतं शुभम् ।
धर्मकामार्थमोक्षाणां साधनं स्यात् न संशयः
kumārā ūcuḥ
iti te kathitaṃ sarvaṃ kiṃ bhūyaḥ śrotumicchasi .
śrīmadbhāgavatenaiva bhuktimukti kare sthite
||69||इति ते कथितं सर्वं किं भूयः श्रोतुमिच्छसि ।
श्रीमद्भागवतेनैव भुक्तिमुक्ति करे स्थिते
sūta uvāca
ityuktvā te mahātmānaḥ procurbhāgavatīṃ kathām .
sarvapāpaharāṃ puṇyāṃ bhuktimuktipradāyinīm
||70||इत्युक्त्वा ते महात्मानः प्रोचुर्भागवतीं कथाम् ।
सर्वपापहरां पुण्यां भुक्तिमुक्तिप्रदायिनीम्
śrṛṇvatāṃ sarvabhūtānāṃ saptāhaṃ niyatātmanām .
yathāvidhi tato devaṃ tuṣṭuvuḥ puruṣottamam
||71||श्रृण्वतां सर्वभूतानां सप्ताहं नियतात्मनाम् ।
यथाविधि ततो देवं तुष्टुवुः पुरुषोत्तमम्
tadante jñānavairāgya-bhaktīnāṃ puṣṭatā parā .
tāruṇyaṃ paramaṃ cābhūt sarvabhūtamanoharam
||72||तदन्ते ज्ञानवैराग्य-भक्तीनां पुष्टता परा ।
तारुण्यं परमं चाभूत् सर्वभूतमनोहरम्
nāradaśca kṛtārtho'bhūt siddhe svīye manorathe .
pulakīkṛtasarvāṅga paramānandasambhṛtaḥ
||73||नारदश्च कृतार्थोऽभूत् सिद्धे स्वीये मनोरथे ।
पुलकीकृतसर्वाङ्ग परमानन्दसम्भृतः
evaṃ kathāṃ samākarṇya nārado bhagavatpriyaḥ .
premagadgadayā vācā tānuvāca kṛtāñaliḥ
||74||एवं कथां समाकर्ण्य नारदो भगवत्प्रियः ।
प्रेमगद्गदया वाचा तानुवाच कृताञलिः
nārada uvāca
dhanyosmi anugṛhito'smi bhavadbhiḥ karuṇāparaiḥ .
adya me bhagavān labdhaḥ sarvapāpaharo hariḥ
||75||धन्योस्मि अनुगृहितोऽस्मि भवद्भिः करुणापरैः ।
अद्य मे भगवान् लब्धः सर्वपापहरो हरिः
śravaṇaṃ sarvadharmebhyo varaṃ manye tapodhanāḥ .
vaikuṇṭhastho yataḥ kṛṣṇaḥ śravaṇād yasya labhyate
||76||श्रवणं सर्वधर्मेभ्यो वरं मन्ये तपोधनाः ।
वैकुण्ठस्थो यतः कृष्णः श्रवणाद् यस्य लभ्यते
sūta uvāca
evaṃ bruvati vai tatra nārade vaiṣṇavottame .
paribhraman samāyātaḥ śuko yogeśvarāstadā
||77||एवं ब्रुवति वै तत्र नारदे वैष्णवोत्तमे ।
परिभ्रमन् समायातः शुको योगेश्वरास्तदा
(vaṃśastha) tatrāyayau ṣoḍaśavārṣikastadā vyāsātmajo jñānamahābdhicandramāḥ .
kathāvasāne nijalābhapūrṇaḥ premṇā paṭhan bhāgavataṃ śanaiḥ śanaiḥ
||78||(वंशस्थ) तत्राययौ षोडशवार्षिकस्तदा व्यासात्मजो ज्ञानमहाब्धिचन्द्रमाः ।
कथावसाने निजलाभपूर्णः प्रेम्णा पठन् भागवतं शनैः शनैः
(iṃdravaṃśā) dṛṣṭvā sadasyāḥ paramorutejasaṃ sadyaḥ samutthāya dadurmahāsanam .
prītyā surarṣistamapūjayat sukhaṃ sthito'vadat saṃśrṛṇutāmalāṃ giram
||79||(इंद्रवंशा) दृष्ट्वा सदस्याः परमोरुतेजसं सद्यः समुत्थाय ददुर्महासनम् ।
प्रीत्या सुरर्षिस्तमपूजयत् सुखं स्थितोऽवदत् संश्रृणुतामलां गिरम्
śrīśuka uvāca
(drutavilaṃbita) nigamakalpatarorgalitaṃ phalaṃ śukamukhāt amṛtadravasaṃyutam .
pibata bhāgavataṃ rasamālayaṃ muhurako rasikā bhuvi bhāvukāḥ
||80||(द्रुतविलंबित) निगमकल्पतरोर्गलितं फलं शुकमुखात् अमृतद्रवसंयुतम् ।
पिबत भागवतं रसमालयं मुहुरको रसिका भुवि भावुकाः
(śārdūlavikrīḍita) dharmaprojjhitakaitavo'tra paramo nirmatsarāṇāṃ satāṃ vedyaṃ vāstavamatra vastu śivadaṃ tāpatrayonmūlanam .
śrīmadbhāgavate mahāmunikṛte kiṃ vā parairīśvaraḥ sadyo hṛdyavarudhyate'tra kṛtibhiḥ śuśrūṣubhistatkṣaṇāt
||81||(शार्दूलविक्रीडित) धर्मप्रोज्झितकैतवोऽत्र परमो निर्मत्सराणां सतां वेद्यं वास्तवमत्र वस्तु शिवदं तापत्रयोन्मूलनम् ।
श्रीमद्भागवते महामुनिकृते किं वा परैरीश्वरः सद्यो हृद्यवरुध्यतेऽत्र कृतिभिः शुश्रूषुभिस्तत्क्षणात्
śrīmadbhāgavataṃ purāṇatilakaṃ yadvaiṣṇavānāṃ dhanaṃ yasmin pāramahaṃsyamevamamalaṃ jñānaṃ paraṃ gīyate .
yatra jñānavirāgabhaktisahitaṃ naiṣkarmyamāviṣkṛtaṃ tat śruṇvan prapaṭhan vicāraṇaparo bhaktyā vimucyennaraḥ
||82||श्रीमद्भागवतं पुराणतिलकं यद्वैष्णवानां धनं यस्मिन् पारमहंस्यमेवममलं ज्ञानं परं गीयते ।
यत्र ज्ञानविरागभक्तिसहितं नैष्कर्म्यमाविष्कृतं तत् श्रुण्वन् प्रपठन् विचारणपरो भक्त्या विमुच्येन्नरः
(anuṣṭup) svarge satye ca kailāse vaikuṇṭhe nāstyayaṃ rasaḥ .
ataḥ pibantu sadbhāgyā mā mā muñcata karhicit
||83||(अनुष्टुप्) स्वर्गे सत्ये च कैलासे वैकुण्ठे नास्त्ययं रसः ।
अतः पिबन्तु सद्भाग्या मा मा मुञ्चत कर्हिचित्
sūta uvāca
(iṃdravaṃśā) evaṃ bruvāṇe sati bādarāyaṇau madhye sabhāyāṃ harirāvirāsīt .
prahrādabalyuddhavaphālgunādibhiḥ vṛttaṃ surarṣistamapūjayacca tān
||84||(इंद्रवंशा) एवं ब्रुवाणे सति बादरायणौ मध्ये सभायां हरिराविरासीत् ।
प्रह्रादबल्युद्धवफाल्गुनादिभिः वृत्तं सुरर्षिस्तमपूजयच्च तान्
dṛṣṭvā prasannaṃ mahadāsane hariṃ te cakrire kīrtanamagratastadā .
bhavo bhavānyā kamalāsanastu tatrāgamat kīrtanadarśanāya
||85||दृष्ट्वा प्रसन्नं महदासने हरिं ते चक्रिरे कीर्तनमग्रतस्तदा ।
भवो भवान्या कमलासनस्तु तत्रागमत् कीर्तनदर्शनाय
(sragdharā) prahrādastāladhārī taralagatitayā coddhavaḥ kāṃsyadhārī vīṇādhārī surarṣi svarakuśalatayā rāgakartārjuno'bhūt .
indro'vādīnmṛdaṅgaṃ jaya jaya sukarāḥ kīrtane te kumārā yatrāgre bhavavaktā sarasaracanayā vyāsaputro babhūva
||86||(स्रग्धरा) प्रह्रादस्तालधारी तरलगतितया चोद्धवः कांस्यधारी वीणाधारी सुरर्षि स्वरकुशलतया रागकर्तार्जुनोऽभूत् ।
इन्द्रोऽवादीन्मृदङ्गं जय जय सुकराः कीर्तने ते कुमारा यत्राग्रे भववक्ता सरसरचनया व्यासपुत्रो बभूव
(upeṃdravajrā) nanarta madhye trikameva tatra bhaktyādikānāṃ naṭavatsutejasām .
alaulikaṃ kīrtanametadīkṣya hariḥ prasanno'pi vaco'bravīt tat
||87||(उपेंद्रवज्रा) ननर्त मध्ये त्रिकमेव तत्र भक्त्यादिकानां नटवत्सुतेजसाम् ।
अलौलिकं कीर्तनमेतदीक्ष्य हरिः प्रसन्नोऽपि वचोऽब्रवीत् तत्
(iṃdravajrā) matto varaṃ bhāvavṛtādvṛṇudhvaṃ prītaḥ kathākīrtanato'smi sāmpratam .
śrutveti tadvākyamatiprasannāḥ premārdracittā harimūcire te
||88||(इंद्रवज्रा) मत्तो वरं भाववृताद्वृणुध्वं प्रीतः कथाकीर्तनतोऽस्मि साम्प्रतम् ।
श्रुत्वेति तद्वाक्यमतिप्रसन्नाः प्रेमार्द्रचित्ता हरिमूचिरे ते
(upeṃdravajrā) nagāhagāthāsu ca sarvabhaktaiḥ ebhistvayā bhāvyamiti prayatnāt .
manoratho'yaṃ paripūranīyaḥ tatheti coktvāntaradhīyatācyutaḥ
||89||(उपेंद्रवज्रा) नगाहगाथासु च सर्वभक्तैः एभिस्त्वया भाव्यमिति प्रयत्नात् ।
मनोरथोऽयं परिपूरनीयः तथेति चोक्त्वान्तरधीयताच्युतः
(vaṃśastha) tato'namattat caraṇeṣu nāradaḥ tathā śukādīnapi tāpasāṃśca .
atha prahṛṣṭāḥ parinaṣṭamohāḥ sarva yayuḥ pītakathāmṛtāste
||90||(वंशस्थ) ततोऽनमत्तत् चरणेषु नारदः तथा शुकादीनपि तापसांश्च ।
अथ प्रहृष्टाः परिनष्टमोहाः सर्व ययुः पीतकथामृतास्ते
(iṃdravajrā) bhaktiḥ sutābhyāṃ saha rakṣitā sā śāstre svakīye'pi tadā śukena .
ato harirbhāgavatasya sevanāt cittaṃ samāyāti hi vaiṣṇavānām
||91||(इंद्रवज्रा) भक्तिः सुताभ्यां सह रक्षिता सा शास्त्रे स्वकीयेऽपि तदा शुकेन ।
अतो हरिर्भागवतस्य सेवनात् चित्तं समायाति हि वैष्णवानाम्
dāridryaduḥkhajvaradāhitānāṃ māyāpiśācīparimarditānām saṃsārasindhau paripātitānāṃ kṣemāya vai bhāgavataṃ pragarjati
||92||दारिद्र्यदुःखज्वरदाहितानां मायापिशाचीपरिमर्दितानाम् संसारसिन्धौ परिपातितानां क्षेमाय वै भागवतं प्रगर्जति
śaunaka uvāca
(anuṣṭup) śukenoktaṃ kadā rājñe gokarṇena kadā punaḥ .
surarṣaye kadā brāhmaiḥ chindhi me saṃśayaṃ tvimam
||93||(अनुष्टुप्) शुकेनोक्तं कदा राज्ञे गोकर्णेन कदा पुनः ।
सुरर्षये कदा ब्राह्मैः छिन्धि मे संशयं त्विमम्
sūta uvāca
ākṛṣṇanirgamāt triṃśat varṣādhikagate kalau .
navamīto nabhasye ca kathāraṃbhaṃ śuko'karot
||94||आकृष्णनिर्गमात् त्रिंशत् वर्षाधिकगते कलौ ।
नवमीतो नभस्ये च कथारंभं शुकोऽकरोत्
parīkṣit śravaṇānte ca kalau varṣaśatadvaye .
śuddhe śucau navamyāṃ ca dhenujo'kathayatkathām
||95||परीक्षित् श्रवणान्ते च कलौ वर्षशतद्वये ।
शुद्धे शुचौ नवम्यां च धेनुजोऽकथयत्कथाम्
tasmādapi kalau prāpte triṃśat varṣagate sati .
ūcurūrje site pakṣe navamyāṃ brahmaṇaḥ sutāḥ
||96||तस्मादपि कलौ प्राप्ते त्रिंशत् वर्षगते सति ।
ऊचुरूर्जे सिते पक्षे नवम्यां ब्रह्मणः सुताः
ityettate samākhyātaṃ yatpṛṣṭo'haṃ tvayānagha .
kalau bhāgavatī vārtā bhavarogavināśinī
||97||इत्येत्तते समाख्यातं यत्पृष्टोऽहं त्वयानघ ।
कलौ भागवती वार्ता भवरोगविनाशिनी
(vasaṃtatilakā) kṛṣṇapriyaṃ sakalakalmaṣanāśanaṃ ca muktyekahetumiha bhaktivilāsakāri santaḥ kathānakamidaṃ pibatādareṇa loke hi tīrthapariśīlanasevayā kim
||98||(वसंततिलका) कृष्णप्रियं सकलकल्मषनाशनं च मुक्त्येकहेतुमिह भक्तिविलासकारि सन्तः कथानकमिदं पिबतादरेण लोके हि तीर्थपरिशीलनसेवया किम्
(aparavaktra) svapuruṣamapi vīkṣya pāśahastaṃ vadati yamaḥ kila tasya karṇamūle .
parihara bhagavatkathāsu mattān prabhurahamanyunṛṇāṃ na vaiṣṇavānām
||99||(अपरवक्त्र) स्वपुरुषमपि वीक्ष्य पाशहस्तं वदति यमः किल तस्य कर्णमूले ।
परिहर भगवत्कथासु मत्तान् प्रभुरहमन्युनृणां न वैष्णवानाम्
(śikhariṇī) asāre saṃsāre viṣayaviṣasaṅgākuladhiyaḥ kṣaṇārdhaṃ kṣemārthaṃ pibata śukagāthātulasudhām .
kimarthaṃ vyarthaṃ bho vrajatha kupathe kutsitakathe parīkṣitsākṣī yat śravaṇagatamuktyuktikathane
||100||(शिखरिणी) असारे संसारे विषयविषसङ्गाकुलधियः क्षणार्धं क्षेमार्थं पिबत शुकगाथातुलसुधाम् ।
किमर्थं व्यर्थं भो व्रजथ कुपथे कुत्सितकथे परीक्षित्साक्षी यत् श्रवणगतमुक्त्युक्तिकथने
(anuṣṭup) rasapravāhasaṃsthena śrīśukeneritā kathā .
kaṇṭhe saṃbadhyate yena sa vaikuṇṭhaprabhurbhavet
||101||(अनुष्टुप्) रसप्रवाहसंस्थेन श्रीशुकेनेरिता कथा ।
कण्ठे संबध्यते येन स वैकुण्ठप्रभुर्भवेत्
(mālinī) iti ca paramaguhyaṃ sarvasiddhāntasiddhaṃ sapadi nigaditaṃ te śāstrapuñjaṃ vilokya .
jagati śukakathāto nirmalaṃ nāsti kiñcit piba parasukhahetordvādaśaskandhasāram
||102||(मालिनी) इति च परमगुह्यं सर्वसिद्धान्तसिद्धं सपदि निगदितं ते शास्त्रपुञ्जं विलोक्य ।
जगति शुककथातो निर्मलं नास्ति किञ्चित् पिब परसुखहेतोर्द्वादशस्कन्धसारम्
(praharṣiṇī) etāṃ yo niyatatayā śrṛṇoti bhaktyā yaścaināṃ kathayati śuddhavaiṣṇavāgre .
tau samyak vidhikaraṇātphalaṃ labhete yāthārthyānna hi bhuvane kimapyasādhyam
||103||(प्रहर्षिणी) एतां यो नियततया श्रृणोति भक्त्या यश्चैनां कथयति शुद्धवैष्णवाग्रे ।
तौ सम्यक् विधिकरणात्फलं लभेते याथार्थ्यान्न हि भुवने किमप्यसाध्यम्
iti śrīpadmapurāṇe uttarakhaṇḍe śrīmadbhāgavatamāhātmye śravaṇavidhikathanaṃ nāma ṣaṣṭo'dhyāyaḥ .. 6 ..
hariḥ oṃ tatsat śrīkṛṣṇārpaṇamastu