catuḥṣaṣṭyupacārātmakād dvisaptatiślokātmakāt stotrāt prasiddhopacārapratipādakāḥ ślokā atra saṅgṛhītāḥ|
suprabhātam
uṣasi māgadhamaṅgalagāyanaiḥ jhaṭiti jāgṛhi jāgṛhi jāgṛhi|
atikṛpārdrakaṭākṣanirīkṣaṇaiḥ jagadidaṃ jagadamba sukhīkuru || 1 ||
āvāhanam
kanakamayavitardiśobhamānaṃ diśi diśi pūrṇasuvarṇakumbhayuktam|
maṇimayamaṇṭapamadhyamehi mātaḥ mayi kṛpayāśu samarcanaṃ grahītum ||
āsanam
kanakamayavitardisthāpite tūlikāḍhye vividhakusumakīrṇe koṭibālārkavarṇe|
bhagavati ramaṇīye ratnasiṃhāsane'smin upaviśa padayugmaṃ ratnapīṭhe nidhāya || 3 ||
pādyam
dūrvayā sarasijānvitaviṣṇukrāntayā ca sahitaṃ kusumāḍhyam|
padmayugmasadṛśe padayugme pādyametadurarīkuru mātaḥ || 4 ||
arghyam
gandhapuṣpayavasarṣapadūrvāsaṃyutaṃ tilakuśākṣatamiśram|
hemapātranihitaṃ saha ratnaiḥ arghyametadurarīkuru mātaḥ || 5 ||
ācamanīyam
jalajadyutinā kareṇa jātīphalatakkolalavaṅgagandhayuktaiḥ|
amṛtairamṛtairivātiśītaiḥ bhagavatyācamanaṃ vidhīyatām || 6 ||
madhuparkaḥ
nihitaṃ kanakasya saṃpuṭe pihitaṃ ratnapidhānakena yat|
tadidaṃ jagadamba te'rpitaṃ madhuparkaṃ janani pragṛhyatām || 7 ||
snānam
etaccampakatailamamba vividhaiḥ puṣpairmuhurvāsitaṃ nyastaṃ ratnamaye suvarṇacaṣake bhṛṅgairbhramadbhirvṛtam|
sānandaṃ surasundarībhirabhito hastairdhṛtaṃ te mayā keśeṣu bhramarabhrameṣu sakaleṣvaṅgeṣu cālipyate || 8 ||
mātaḥ kuṅkumapaṅkanirmitamidaṃ dehe tavodvartanaṃ bhaktyāhaṃ kalayāmi hemarajasā saṃmiśritaṃ kesaraiḥ|
keśānāmalakairviśodhya viśadānkastūrikodañcitaiḥ snānaṃ te navaratnakumbhasahitaiḥ saṃvāsitoṣṇodakaiḥ || 9 ||
vastram
bālārkadyuti dāḍimīyakusumapraspardhi sarvottamaṃ mātastvaṃ paridhehi divyavasanaṃ bhaktyā mayā kalpitam|
muktābhirgrathitaṃ sukañcukamidaṃ svīkṛtya pītaprabhaṃ taptasvarṇasamānavarṇamatulaṃ prāvarṇamaṅgīkuru || 10 ||
alaṅkārāḥ
bahubhiragarudhūpaiḥ sādaraṃ dhūpayitvā bhagavati tava keśān kaṅkatairmārjayitvā|
surabhibhiraravindaiścampakaiścārcayitvā jhaṭiti kanakasūtrairjūṭayan veṣṭayāmi || 11 ||
mañjīre padayornidhāya rucirāṃ vinyasya kāñcīṃ kaṭau muktāhāramurojayoranupamāṃ nakṣatramālāṃ gale|
keyūrāṇi bhujeṣu ratnavalayaśreṇīṃ kareṣu kramāt tāṭaṅke tava karṇayorvinidadhe śīrṣe ca cūḍāmaṇim || 12 ||
dhammille tava devi hemakusumānyādhāya phālasthale muktārājivirājamānatilakaṃ nāsāpuṭe mauktikam|
mātarmauktikajālikāṃ ca kucayoḥ sarvāṅgulīṣūrmikāḥ kaṭyāṃ kāñcanakiṅkiṇīrvinidadhe ratnāvataṃsaṃ śrutau || 13 ||
candanakuṅkumadhāraṇam
mātaḥ phālatale tavātivimale kāśmīrakastūrikā- karpūrāgarubhiḥ karomi tilakaṃ dehe'ṅgarāgaṃ tataḥ|
vakṣojādiṣu yakṣakardamarasaṃ siktvā ca puṣpadravaṃ pādau candanalepanādibhirahaṃ saṃpūjayāmi kramāt || 14 ||
akṣatasamarpaṇam
ratnākṣataistvāṃ paripūjayāmi muktāphalairvā rucirairaviddhaiḥ|
akhaṇḍitairdevi yavādibhirvā kāśmīrapaṅkāṅkitataṇḍulairvā || 15 ||
sindūram
sīmante te bhagavati mayā sādaraṃ nyastametat sindūraṃ me hṛdayakamale harṣavarṣaṃ tanoti|
bālādityadyutiriva sadā lohitā yasya kāntiḥ antardhvāntaṃ harati sakalaṃ cetasā cintayaiva || 16 ||
puṣpārcanam
pārijātaśatapatrapāṭalairmallikāvakulacampakādibhiḥ|
ambujaiḥ sukusumaiśca sādaraṃ pūjayāmi jagadamba te vapuḥ || 17 ||
dhūpaḥ
lākṣāsaṃmilitaiḥ sitābhrasahitaiḥ śrīvāsasaṃmiśritaiḥ karpūrākalitaiḥ śirairmadhuyutaiḥ gosarpiṣā loḍitaiḥ|
śrīkhaṇḍāgarugugguluprabhṛtibhiḥ nānāvidhairvastubhiḥ dhūpaṃ te parikalpayāmi janani snehāt tvamaṅgīkuru ||
alaṅkāradīpaḥ
ratnālaṅkṛtahemapātranihitaiḥ gosarpiṣā loḍitaiḥ dīpairdīrghatarāndhakārabhiduraiḥ bālārkakoṭiprabhaiḥ|
ātāmrajvaladujjvalapravilasadratnapradīpaistathā mātastvāmahamādarādanudinaṃ nīrājayāmyuccakaiḥ || 19 ||
naivedyam
mātastvāṃ dadhidugdhapāyasamahāśālyannasantānikāḥ sūpāpūpasitāghṛtaiḥ savaṭakaiḥ sakṣaudrarambhāphalaiḥ|
elājīrakahiṅgunāgaraniśākustumbharīsaṃskṛtaiḥ śākaiḥ sākamahaṃ sudhādhikarasaiḥ santarpayāmyarcayan || 20 ||
uṣṇodakaiḥ pāṇiyugaṃ mukhaṃ ca prakṣālya mātaḥ kaladhautapātre|
karpūramiśreṇa sakuṅkumena hastau samudvartaya candanena || 21 ||
atiśītamuśīravāsitaṃ tapanīye kalaśe niveśitam|
paṭapūtamidaṃ jitāmṛtaṃ śuci gaṅgājalamamba pīyatām || 22 ||
jambvāmrarambhāphalasaṃyutāni drākṣāphalakṣaudrasamanvitāni|
sanārikelāni sadāḍimāni phalāni te devi samarpayāmi || 23 ||
tāmbūlam
elālavaṅgādisamanvitāni takkolakarpūravimiśritāni|
tāmbūlavallīdalasaṃyutāni pūgāni te devi samarpayāmi || 24 ||
nīrājanam
mahati kanakapātre sthāpayitvā viśālān ḍamarusadṛśarūpānbaddhagodhūmadīpān|
bahughṛtamatha teṣu nyasya dīpānprakṛṣṭān bhuvanajanani kurve nityamārārtikaṃ te || 25 ||
savinayamatha dattvā jānuyugmaṃ dharaṇyāṃ sapadi śirasi dhṛtvā pātramārārtikaṃ te|
mukhakamalasamīpe te'mba sārdhaṃ trivāraṃ bhramayati mayi bhūyātte kṛpārdraḥ kaṭākṣaḥ || 26 ||
svarṇapuṣpāñjaliḥ — dakṣiṇā
atha bahumaṇimiśrairmauktikaistvāṃ vikīrya tribhuvanakamanīyaiḥ pūjayitvā ca vastraiḥ|
militavividhamuktāṃ divyamāṇikyayuktāṃ janani kanakavṛṣṭiṃ dakṣiṇāṃ te'rpayāmi || 27 ||
chatram
mātaḥ kāñcanadaṇḍamaṇḍitamidaṃ pūrṇendubimbaprabhaṃ nānāratnaviśobhihemakalaśaṃ lokatrayāhlādakam|
bhāsvanmauktikajālikāparivṛtaṃ prītyātmahaste dhṛtaṃ chatraṃ te parikalpayāmi śirasi tvaṣṭrā svayaṃ nirmitam || 28 ||
cāmaram
śaradindumarīcigauravarṇaiḥ maṇimuktāvilasatsuvarṇadaṇḍaiḥ|
jagadamba vicitracāmaraistvām ahamānandabhareṇa vījayāmi ||
darpaṇam
mārtāṇḍamaṇḍalanibho jagadamba yo'yaṃ bhaktyā mayā maṇimayo mukuro'rpitaste|
pūrṇendubimbaruciraṃ vadanaṃ svakīyam asmin vilokaya vilolavilocane tvam || 30 ||
gītam
vipañcīṣu saptasvarānvādayantyaḥ tava dvāri gāyanti gandharvakanyāḥ|
kṣaṇaṃ sāvadhānena cittena mātaḥ samākarṇaya tvaṃ mayā prārthitāsi ||
stotram
tava devi guṇānuvarṇane caturā no caturānanādayaḥ|
tadihaikamukheṣu jantuṣu stavanaṃ kastava kartumīśvaraḥ || 32 ||
pradakṣiṇam
pade pade yatparipūjakebhyaḥ sadyo'śvamedhādiphalaṃ dadāti|
tatsarvapāpakṣayahetubhūtaṃ pradakṣiṇaṃ te paritaḥ karomi || 33 ||
namaskāraḥ
raktotpalāraktalatāprabhābhyāṃ dhvajordhvarekhākuliśāṅkitābhyām|
aśeṣavṛndārakavanditābhyāṃ namo bhavānīpadapaṅkajābhyām || 34 ||
puṣpāñjaliḥ
caraṇanalinayugmaṃ paṅkajaiḥ pūjayitvā kanakakamalamālāṃ kaṇṭhadeśe'rpayitvā|
śirasi vinihito'yaṃ ratnapuṣpāñjaliste hṛdayakamalamadhye devi harṣaṃ tanotu || 35 ||
śayanam
kṣaṇamatha jagadamba mañcake'smin mṛdutaratūlikayā virājamāne|
atirahasi mudā śivena sārdhaṃ sukhaśayanaṃ kuru tatra māṃ smarantī ||
dhyānam
muktākundendugaurāṃ maṇimayamakuṭāṃ ratnatāṭaṅkayuktām akṣasrakpuṣpahastāmabhayavarakarāṃ candracūḍāṃ triṇetrām|
nānālaṅkārayuktāṃ suramakuṭamaṇidyotitasvarṇapīṭhāṃ sānandāṃ suprasannāṃ tribhuvanajananīṃ cetasā cintayāmi ||
aparādhakṣamāpaṇam
eṣā bhaktyā tava viracitā yā mayā devi pūjā svīkṛtyaināṃ sapadi sakalānme'parādhān kṣamasva|
nyūnaṃ yattattava karuṇayā pūrṇatāmetu sadyaḥ sānandaṃ me hṛdayakamale te'stu nityaṃ nivāsaḥ ||
sāyaṃ dīpaprārthanā
sāyaṃ dīpaṃ prajvālya|
śubhaṃ karotu kalyāṇamārogyaṃ sukhasaṃpadam|
mama buddhiprakāśaṃ ca dīpajyotirnamo'stu te ||