yo'ntyaḥ purañjayo nāma bhāvyo bārhadratho nṛpa tasyāmātyastu śunaka…
atha prathamo'dhyāyaḥ 12.1 rājovāca .
(anuṣṭup) svadhāmānugate kṛṣṇa yaduvaṃśavibhūṣaṇe .
kasya vaṃśo'bhavat pṛthvyāṃ etad ācakṣva me mune śrīśuka uvāca .
yo'ntyaḥ purañjayo nāma bhāvyo bārhadratho nṛpa tasyāmātyastu śunako hatvā svāminamātmajam
||1||अथ प्रथमोऽध्यायः 12.1 राजोवाच ।
(अनुष्टुप्) स्वधामानुगते कृष्ण यदुवंशविभूषणे ।
कस्य वंशोऽभवत् पृथ्व्यां एतद् आचक्ष्व मे मुने श्रीशुक उवाच ।
योऽन्त्यः पुरञ्जयो नाम भाव्यो बार्हद्रथो नृप तस्यामात्यस्तु शुनको हत्वा स्वामिनमात्मजम्
pradyotasaṃjñaṃ rājānaṃ kartā yatpālakaḥ sutaḥ viśākhayūpastatputro bhavitā rājakastataḥ
||2||प्रद्योतसंज्ञं राजानं कर्ता यत्पालकः सुतः विशाखयूपस्तत्पुत्रो भविता राजकस्ततः
nandivardhanastatputraḥ pañca pradyotanā ime aṣṭatriṃśottaraśataṃ bhokṣyanti pṛthivīṃ nṛpāḥ
||3||नन्दिवर्धनस्तत्पुत्रः पञ्च प्रद्योतना इमे अष्टत्रिंशोत्तरशतं भोक्ष्यन्ति पृथिवीं नृपाः
śiśunāgastato bhāvyaḥ kākavarṇastu tatsutaḥ kṣemadharmā tasya sutaḥ kṣetrajñaḥ kṣemadharmajaḥ
||4||शिशुनागस्ततो भाव्यः काकवर्णस्तु तत्सुतः क्षेमधर्मा तस्य सुतः क्षेत्रज्ञः क्षेमधर्मजः
vidhisāraḥ sutastasyā jātaśatrurbhaviṣyati darbhakastatsuto bhāvī darbhakasyājayaḥ smṛtaḥ
||5||विधिसारः सुतस्तस्या जातशत्रुर्भविष्यति दर्भकस्तत्सुतो भावी दर्भकस्याजयः स्मृतः
nandivardhana ājeyo mahānandiḥ sutastataḥ śiśunāgā daśaivaite saṣṭyuttaraśatatrayam
||6||नन्दिवर्धन आजेयो महानन्दिः सुतस्ततः शिशुनागा दशैवैते सष्ट्युत्तरशतत्रयम्
samā bhokṣyanti pṛthivīṃ kuruśreṣṭha kalau nṛpāḥ mahānandisuto rājanśūdrā garbhodbhavo balī
||7||समा भोक्ष्यन्ति पृथिवीं कुरुश्रेष्ठ कलौ नृपाः महानन्दिसुतो राजन्शूद्रा गर्भोद्भवो बली
mahāpadmapatiḥ kaścinnandaḥ kṣatravināśakṛt tato nṛpā bhaviṣyanti śūdra prāyāstvadhārmikāḥ
||8||महापद्मपतिः कश्चिन्नन्दः क्षत्रविनाशकृत् ततो नृपा भविष्यन्ति शूद्र प्रायास्त्वधार्मिकाः
sa ekacchatrāṃ pṛthivīmanullaṅghitaśāsanaḥ śāsiṣyati mahāpadmo dvitīya iva bhārgavaḥ
||9||स एकच्छत्रां पृथिवीमनुल्लङ्घितशासनः शासिष्यति महापद्मो द्वितीय इव भार्गवः
tasya cāṣṭau bhaviṣyanti sumālyapramukhāḥ sutāḥ ya imāṃ bhokṣyanti mahīṃ rājānaśca śataṃ samāḥ
||10||तस्य चाष्टौ भविष्यन्ति सुमाल्यप्रमुखाः सुताः य इमां भोक्ष्यन्ति महीं राजानश्च शतं समाः
nava nandāndvijaḥ kaścitprapannānuddhariṣyati teṣāṃ abhāve jagatīṃ mauryā bhokṣyanti vai kalau
||11||नव नन्दान्द्विजः कश्चित्प्रपन्नानुद्धरिष्यति तेषां अभावे जगतीं मौर्या भोक्ष्यन्ति वै कलौ
sa eva candra guptaṃ vai dvijo rājye'bhiṣekṣyati tatsuto vārisārastu tataścāśokavardhanaḥ
||12||स एव चन्द्र गुप्तं वै द्विजो राज्येऽभिषेक्ष्यति तत्सुतो वारिसारस्तु ततश्चाशोकवर्धनः
suyaśā bhavitā tasya saṅgataḥ suyaśaḥsutaḥ śāliśūkastatastasya somaśarmā bhaviṣyati śatadhanvā tatastasya bhavitā tadbṛhadrathaḥ
||13||सुयशा भविता तस्य सङ्गतः सुयशःसुतः शालिशूकस्ततस्तस्य सोमशर्मा भविष्यति शतधन्वा ततस्तस्य भविता तद्बृहद्रथः
mauryā hyete daśa nṛpāḥ saptatriṃśacchatottaram samā bhokṣyanti pṛthivīṃ kalau kurukulodvaha
||14||मौर्या ह्येते दश नृपाः सप्तत्रिंशच्छतोत्तरम् समा भोक्ष्यन्ति पृथिवीं कलौ कुरुकुलोद्वह
agnimitrastatastasmātsujyeṣṭho bhavitā tataḥ vasumitro bhadrakaśca pulindo bhavitā sutaḥ
||15||अग्निमित्रस्ततस्तस्मात्सुज्येष्ठो भविता ततः वसुमित्रो भद्रकश्च पुलिन्दो भविता सुतः
tato ghoṣaḥ sutastasmādvajramitro bhaviṣyati tato bhāgavatastasmāddevabhūtiḥ kurūdvaha
||16||ततो घोषः सुतस्तस्माद्वज्रमित्रो भविष्यति ततो भागवतस्तस्माद्देवभूतिः कुरूद्वह
śuṅgā daśaite bhokṣyanti bhūmiṃ varṣaśatādhikam tataḥ kāṇvāniyaṃ bhūmiryāsyatyalpaguṇānnṛpa
||17||शुङ्गा दशैते भोक्ष्यन्ति भूमिं वर्षशताधिकम् ततः काण्वानियं भूमिर्यास्यत्यल्पगुणान्नृप
śuṅgaṃ hatvā devabhūtiṃ kāṇvo'mātyastu kāminam svayaṃ kariṣyate rājyaṃ vasudevo mahāmatiḥ
||18||शुङ्गं हत्वा देवभूतिं काण्वोऽमात्यस्तु कामिनम् स्वयं करिष्यते राज्यं वसुदेवो महामतिः
tasya putrastu bhūmitrastasya nārāyaṇaḥ sutaḥ kāṇvāyanā ime bhūmiṃ catvāriṃśacca pañca ca śatāni trīṇi bhokṣyanti varṣāṇāṃ ca kalau yuge
||19||तस्य पुत्रस्तु भूमित्रस्तस्य नारायणः सुतः काण्वायना इमे भूमिं चत्वारिंशच्च पञ्च च शतानि त्रीणि भोक्ष्यन्ति वर्षाणां च कलौ युगे
hatvā kāṇvaṃ suśarmāṇaṃ tadbhṛtyo vṛṣalo balī gāṃ bhokṣyatyandhrajātīyaḥ kañcitkālamasattamaḥ
||20||हत्वा काण्वं सुशर्माणं तद्भृत्यो वृषलो बली गां भोक्ष्यत्यन्ध्रजातीयः कञ्चित्कालमसत्तमः
kṛṣṇanāmātha tadbhrātā bhavitā pṛthivīpatiḥ śrīśāntakarṇastatputraḥ paurṇamāsastu tatsutaḥ
||21||कृष्णनामाथ तद्भ्राता भविता पृथिवीपतिः श्रीशान्तकर्णस्तत्पुत्रः पौर्णमासस्तु तत्सुतः
lambodarastu tatputrastasmāccibilako nṛpaḥ meghasvātiścibilakādaṭamānastu tasya ca
||22||लम्बोदरस्तु तत्पुत्रस्तस्माच्चिबिलको नृपः मेघस्वातिश्चिबिलकादटमानस्तु तस्य च
aniṣṭakarmā hāleyastalakastasya cātmajaḥ purīṣabhīrustatputrastato rājā sunandanaḥ
||23||अनिष्टकर्मा हालेयस्तलकस्तस्य चात्मजः पुरीषभीरुस्तत्पुत्रस्ततो राजा सुनन्दनः
cakoro bahavo yatra śivasvātirarindamaḥ tasyāpi gomatī putraḥ purīmānbhavitā tataḥ
||24||चकोरो बहवो यत्र शिवस्वातिररिन्दमः तस्यापि गोमती पुत्रः पुरीमान्भविता ततः
medaśirāḥ śivaskando yajñaśrīstatsutastataḥ vijayastatsuto bhāvyaścandra vijñaḥ salomadhiḥ
||25||मेदशिराः शिवस्कन्दो यज्ञश्रीस्तत्सुतस्ततः विजयस्तत्सुतो भाव्यश्चन्द्र विज्ञः सलोमधिः
ete triṃśannṛpatayaścatvāryabdaśatāni ca ṣaṭpañcāśacca pṛthivīṃ bhokṣyanti kurunandana
||26||एते त्रिंशन्नृपतयश्चत्वार्यब्दशतानि च षट्पञ्चाशच्च पृथिवीं भोक्ष्यन्ति कुरुनन्दन
saptābhīrā āvabhṛtyā daśa gardabhino nṛpāḥ kaṅkāḥ ṣoḍaśa bhūpālā bhaviṣyantyatilolupāḥ
||27||सप्ताभीरा आवभृत्या दश गर्दभिनो नृपाः कङ्काः षोडश भूपाला भविष्यन्त्यतिलोलुपाः
tato'ṣṭau yavanā bhāvyāścaturdaśa turuṣkakāḥ bhūyo daśa guruṇḍāśca maulā ekādaśaiva tu
||28||ततोऽष्टौ यवना भाव्याश्चतुर्दश तुरुष्ककाः भूयो दश गुरुण्डाश्च मौला एकादशैव तु
ete bhokṣyanti pṛthivīṃ daśa varṣaśatāni ca navādhikāṃ ca navatiṃ maulā ekādaśa kṣitim
||29||एते भोक्ष्यन्ति पृथिवीं दश वर्षशतानि च नवाधिकां च नवतिं मौला एकादश क्षितिम्
bhokṣyantyabdaśatānyaṅga trīṇi taiḥ saṃsthite tataḥ kilakilāyāṃ nṛpatayo bhūtanando'tha vaṅgiriḥ
||30||भोक्ष्यन्त्यब्दशतान्यङ्ग त्रीणि तैः संस्थिते ततः किलकिलायां नृपतयो भूतनन्दोऽथ वङ्गिरिः
śiśunandiśca tadbhrātā yaśonandiḥ pravīrakaḥ ityete vai varṣaśataṃ bhaviṣyantyadhikāni ṣaṭ
||31||शिशुनन्दिश्च तद्भ्राता यशोनन्दिः प्रवीरकः इत्येते वै वर्षशतं भविष्यन्त्यधिकानि षट्
teṣāṃ trayodaśa sutā bhavitāraśca bāhlikāḥ puṣpamitro'tha rājanyo durmitro'sya tathaiva ca
||32||तेषां त्रयोदश सुता भवितारश्च बाह्लिकाः पुष्पमित्रोऽथ राजन्यो दुर्मित्रोऽस्य तथैव च
ekakālā ime bhūpāḥ saptāndhrāḥ sapta kauśalāḥ vidūrapatayo bhāvyā niṣadhāstata eva hi
||33||एककाला इमे भूपाः सप्तान्ध्राः सप्त कौशलाः विदूरपतयो भाव्या निषधास्तत एव हि
māgadhānāṃ tu bhavitā viśvasphūrjiḥ purañjayaḥ kariṣyatyaparo varṇānpulindayadumadra kān
||34||मागधानां तु भविता विश्वस्फूर्जिः पुरञ्जयः करिष्यत्यपरो वर्णान्पुलिन्दयदुमद्र कान्
prajāścābrahmabhūyiṣṭhāḥ sthāpayiṣyati durmatiḥ vīryavānkṣatramutsādya padmavatyāṃ sa vai puri anugaṅgamāprayāgaṃ guptāṃ bhokṣyati medinīm
||35||प्रजाश्चाब्रह्मभूयिष्ठाः स्थापयिष्यति दुर्मतिः वीर्यवान्क्षत्रमुत्साद्य पद्मवत्यां स वै पुरि अनुगङ्गमाप्रयागं गुप्तां भोक्ष्यति मेदिनीम्
saurāṣṭrāvantyābhīrāśca śūrā arbudamālavāḥ vrātyā dvijā bhaviṣyanti śūdra prāyā janādhipāḥ
||36||सौराष्ट्रावन्त्याभीराश्च शूरा अर्बुदमालवाः व्रात्या द्विजा भविष्यन्ति शूद्र प्राया जनाधिपाः
sindhostaṭaṃ candrabhāgāṃ kauntīṃ kāśmīramaṇḍalam bhokṣyanti śūdrā vrātyādyā mlecchāścābrahmavarcasaḥ
||37||सिन्धोस्तटं चन्द्रभागां कौन्तीं काश्मीरमण्डलम् भोक्ष्यन्ति शूद्रा व्रात्याद्या म्लेच्छाश्चाब्रह्मवर्चसः
tulyakālā ime rājanmlecchaprāyāśca bhūbhṛtaḥ ete'dharmānṛtaparāḥ phalgudāstīvramanyavaḥ
||38||तुल्यकाला इमे राजन्म्लेच्छप्रायाश्च भूभृतः एतेऽधर्मानृतपराः फल्गुदास्तीव्रमन्यवः
strībālagodvijaghnāśca paradāradhanādṛtāḥ uditāstamitaprāyā alpasattvālpakāyuṣaḥ
||39||स्त्रीबालगोद्विजघ्नाश्च परदारधनादृताः उदितास्तमितप्राया अल्पसत्त्वाल्पकायुषः
asaṃskṛtāḥ kriyāhīnā rajasā tamasāvṛtāḥ prajāste bhakṣayiṣyanti mlecchā rājanyarūpiṇaḥ
||40||असंस्कृताः क्रियाहीना रजसा तमसावृताः प्रजास्ते भक्षयिष्यन्ति म्लेच्छा राजन्यरूपिणः
tannāthāste janapadāstacchīlācāravādinaḥ anyonyato rājabhiśca kṣayaṃ yāsyanti pīḍitāḥ
||41||तन्नाथास्ते जनपदास्तच्छीलाचारवादिनः अन्योन्यतो राजभिश्च क्षयं यास्यन्ति पीडिताः
iti śrīmadbhāgavate mahāpurāṇe pāramahaṃsyāṃ saṃhitāyāṃ dvādaśaskandhe prathamo'dhyāyaḥ