Āpaduddhāraka-dvādaśamukha-hanumān-stotram — Stotrāṇi

oṃ asya śrī-āpaduddhāraka-dvādaśamukha-hanumān stotra-mahāmantrasya vibhīṣaṇa ṛṣiḥ. anuṣṭup chandaḥ. śrī-dvādaśamukha-pracaṇḍa-hanumān devatā. mārutātmaja iti bījam. añjanāsūnuriti śaktiḥ. vāyuputreti kīlakam. śrīhanumatprasādasiddhidvārā sarvāpannivāraṇārthe jape viniyogaḥ.

dhyānam

uṣṭrārūḍha-suvarcalāsahacaran sugrīvamitrāñjanā-

sūno vāyukumāra kesaritanūjākṣādidaityāntaka .

sītāśokaharāgninandana sumitrāsambhavaprāṇada

śrībhīmāgraja śambhuputra hanumān sūryāsya tubhyaṃ namaḥ ..

||1||

khaḍgaṃ kheṭaka-bhindipāla-paraśuṃ pāśa-triśūla-drumān

cakraṃ śaṅkha-gadā-phalāṅkuśa-sudhākumbhān halaṃ parvatam .

ṭaṅkaṃ parvatakārmukāhiḍamarūnetāni divyāyudhān

evaṃ viṃśatibāhubhiśca dadhataṃ dhyāyeddhanūmatprabhum ..

||2||

stotram

oṃ namo bhagavate tubhyaṃ namo mārutasūnave .

namaḥ śrīrāmabhaktāya śyāmāsyāya ca te namaḥ ..

||3||

namo vānaravīrāya sugrīvasakhyakāriṇe .

laṅkāvidāhakāyātha helāsāgaratāriṇe ..

||4||

sītāśokavināśāya rāmamudrādharāya ca .

rāvaṇasya kulacchedakāriṇe te namo namaḥ ..

||5||

meghanādamakhadhvaṃsakāriṇe te namo namaḥ .

aśokavanavidhvaṃsakāriṇe bhayahāriṇe ..

||6||

vāyuputrāya vīrāya ākāśodaragāmine .

vanapālaśiraśchetre laṅkāprāsādabhañjine ..

||7||

jvalatkanakavarṇāya dīrghalāṅgūladhāriṇe .

saumitrijayadātre ca rāmadūtāya te namaḥ ..

||8||

akṣasya vadhakartre ca brahmaśaktinivāriṇe .

lakṣmaṇāṅgamahāśakti-ghāta-kṣata-vināśine ..

||9||

rakṣoghnāya ripughnāya bhūtaghnāya ca te namaḥ .

ṛkṣavānaravīraugha-prāṇadāyaka te namaḥ ..

||10||

parasainyabalaghnāya śastrāstravighanāya ca .

viṣaghnāya dviṣaghnāya jvaraghnāya ca te namaḥ ..

||11||

mahābhayaripughnāya bhaktatrāṇaikakāriṇe .

parapreritamantrāṇāṃ yantrāṇāṃ stambhakāriṇe ..

||12||

payaḥ-pāṣāṇa-taraṇa-kāraṇāya namo namaḥ .

bālārkamaṇḍalagrāsakāriṇe bhavatāriṇe ..

||13||

nakhāyudhāya bhīmāya dantāyudhadharāya ca .

ripumāyāvināśāya rāmājñālokarakṣiṇe ..

||14||

pratigrāmasthitāyātha rakṣobhūtavadhārthine .

karālaśailaśastrāya drumaśastrāya te namaḥ ..

||15||

bālaikabrahmacaryāya rudramūrtidharāya ca .

vihaṅgamāya śarvāya vajradehāya te namaḥ ..

||16||

kaupīnavāsase tubhyaṃ rāmabhaktiratāya ca .

dakṣiṇāśābhāskarāya śatacandrodayātmane ..

||17||

kṛtyā-kṣata-vyathaghnāya sarvakleśaharāya ca .

svāmyājñā-pārthasaṅgrāma-saṅkhye sañjayadhāriṇe ..

||18||

bhaktānāṃ divyavādeṣu saṅgrāme jayadāyine .

kilakilyābūburoccaghoraśabdakarāya ca ..

||19||

sarpāgnivyādhisaṃstambhakāriṇe vanacāriṇe

sadā vanaphalāhāra-sattṛptāya viśeṣataḥ

mahārṇava-śilā-baddha-setave te namo namaḥ ..

||20||

vāde vivāde saṅgrāme bhaye ghore mahāvane .

siṃhavyāghrādi caurebhyaḥ stotrapāṭhād bhayaṃ na hi ..

||21||

divye bhūtabhaye vyādhau gṛhe sthāvarajaṅgame .

rājaśastrabhaye cograbādhā grahabhayeṣu ca ..

||22||

jale sarve mahāvṛṣṭau durbhikṣe prāṇasamplave

paṭhet stotraṃ pramucyeta bhayebhyaḥ sarvato naraḥ

tasya kvāpi bhayaṃ nāsti hanumatstavapāṭhataḥ ..

||23||

sarvathā vai trikālaṃ ca paṭhanīyamimaṃ stavam .

sarvān kāmānavāpnoti nātra kāryā vicāraṇā ..

||24||

vinatāyāḥ svamātuśca dāsītvasya nivṛttaye .

sudhārṇaṃ yātukāmāya mahāpauruṣaśāline ..

||25||

vibhīṣaṇakṛtaṃ stotraṃ tārkṣyeṇa samudīritam .

ye paṭhanti sadā bhaktyā siddhayastatkare sthitāḥ ..

||26||