pāramparikam
murārikāyakālimālalāmavāridhāriṇī
tṛṇīkṛtatriviṣṭapā trilokaśokahāriṇī .
mano'nukūlakūlakuñjapuñjadhūtadurmadā
dhunotu no manomalaṃ kalindanandinī sadā ..
||1||malāpahārivāripūribhūrimaṇḍitāmṛtā
bhṛśaṃ pravātakaprapañcanātipaṇḍitāniśā .
sunandanandināṅgasaṅgarāgarañjitā hitā
dhunotu no manomalaṃ kalindanandinī sadā ..
||2||lasattaraṅgasaṅgadhūtabhūtajātapātakā
navīnamādhurīdhurīṇabhaktijātacātakā .
taṭāntavā sadā sahaṃsasaṃsṛtāhnikāmadā
dhunotu no manomalaṃ kalindanandinī sadā ..
||3||vihārarāsasvedabhedadhīratīramārutā
gatā girāmagocare yadīyanīracārutā .
pravāhasāhacaryapūtamedinīnadīnadā
dhunotu no manomalaṃ kalindanandinī sadā ..
||4||taraṅgasaṅgasaikatāntarātitaṃ sadāsitā
śaranniśākarāṃśumañjumañjarī sabhājitā .
bhavārcanāpracāruṇāmbunā'dhunā viśāradā
dhunotu no manomalaṃ kalindanandinī sadā ..
||5||jalāntakelikāricārurādhikāṅgarāgiṇī
svabharturanyadurlabhāṅgatāṅgatāṃśabhāginī .
svadattasuptasaptasindhubhedinātikovidā
dhunotu no manomalaṃ kalindanandinī sadā ..
||6||jalacyutācyutāṅgarāgalampaṭāliśālinī
vilolarādhikākacāntacampakālimālinī .
sadāvagāhanāvatīrṇabhartṛbhṛtyanāradā
dhunotu no manomalaṃ kalindanandinī sadā ..
||7||sadaiva nandinandakeliśālikuñjamañjulā
taṭotthaphullamallikākadambareṇusūjjvalā .
jalāvagāhināṃ nṛṇāṃ bhavābdhisindhupāradā
dhunotu no manomalaṃ kalindanandinī sadā ..
||8||iti śrīmatparamahaṃsaparivrājakācāryasya śrī-govinda-bhagavatpūjya-pāda-śiṣyasya śrīmacchaṅkarabhagavataḥ kṛtau śrī-yamunāṣṭakaṃ sampūrṇam