śrīśaṅkarabhagavatpādakṛtam
bhagavati bhavalīlāmaulimāle tavāmbhaḥ
kaṇamaṇuparimāṇaṃ prāṇino ye spṛśanti |
amaranagaranārīcāmaramaragrāhiṇīnāṃ
vigatakalikalaṅkātaṅkamaṅke luṭhanti ||
||1||brahmāṇḍaṃ khaṇḍayantī haraśirasi jaṭāvallimullāsayantī
svarlokādāpatantī kanakagiriguhāgaṇḍaśailāt skhalantī |
kṣoṇī pṛṣṭhe luṭhantī duritacayacamūṃ nirbharaṃ bhartsayantī
pāthodhiṃ pūrayantī suranagarasarit pāvanī naḥ punātu ||
||2||majjanamātaṅgakumbhacyutamadamadirāmodamattālijālaṃ
snānaiḥ siddhāṅganānāṃ kucayugavigalat kuṅkumāsaṅgapiṅgam |
sāyaṃ prātarmunīnāṃ kuśakusumacayaiśchinnatīrasthanīraṃ
pāyānno gāṅgamambhaḥ karikalabhakarākrāntaraṃ hastaraṅgam ||
||3||ādāvādipitāmahasya niyamavyāpārapātre jalaṃ
paścāt pannagaśāyino bhagavataḥ pādodakaṃ pāvanam |
bhūyaḥ śambhujaṭāvibhūṣaṇamaṇirjahnormaharṣeriyaṃ
kanyā kalmaṣanāśinī bhagavatī bhāgīrathī pātu mām ||
||4||śailendrādavatāriṇī nijajala-majjajjanottāriṇī
pārāvāravihāriṇī bhavabhayaśreṇī-samutsāriṇī |
śeṣāheranukāriṇī haraśirovallīdalākāriṇī
kāśīprāntavihāriṇī vijayate gaṅgā manohāriṇī ||
||5||kuto vīcī vīcistava yadi gatā locanapathaṃ
tvamāpītā pītāmbarapugnivāsaṃ vitarasi |
tvadutsaṅge gaṅge patati yadi kāyastanubhṛtāṃ
tadā mātaḥ śāntakratavapadalābho'pyatilaghuḥ ||
||6||bhagavati tava tīre nīramātrāśano'haṃ
vigataviṣayatṛṣṇaḥ kṛṣṇamārādhayāmi |
sakalakaluṣabhaṅge svargasopānagaṅge
taralatarataraṅge devi gaṅge prasīda ||
||7||mātarjāhnavī śambhusaṅgavalite maulau nidhāyāñjaliṃ
tvattīre vapuṣo'vasānasamaye nārāyaṇāṅghridvayam |
sānandaṃ smarato bhaviṣyati mama prāṇaprayāṇotsave
bhūyād bhaktiravicyutā hariharādvaitātmikā śāśvatī ||
||8||gaṅgāṣṭakamidaṃ puṇyaṃ yaḥ paṭhet prayato naraḥ |
sarvapāpavinirbhukto viṣṇulokaṃ sa gacchati ||
||9||gaṅge trailokyasāre sakalasuravadhūdhautavistīrṇatoye
pūrṇabrahmasvarūpe haricaraṇarajohāriṇi svargamārge |
prāyaścitaṃ yadi syāt tava jalakāṇikrā brahmahatyādipāpe
kastvāṃ stotuṃ samarthaḥ trijagadaghahare devi gaṅge prasīda ||
||10||iti śrīmatparamahaṃsaparivrājakācāryasya śrī-govinda-bhagavatpūjya-pāda-śiṣyasya śrīmacchaṅkarabhagavataḥ kṛtau śrī-gaṅgāṣṭakaṃ sampūrṇam