śrīśaṅkarabhagavatpādakṛtam
sabindu-sindhu-suskhalat-taraṅga-bhaṅga-rañjitaṃ
dviṣatsu pāpa-jāta-jātakādi-vāri-saṃyutam |
kṛtānta-dūta-kāla-bhūta-bhīti-hāri-varmade
tvadīya-pāda-paṅkajaṃ namāmi devi narmade ||
||1||tvadambu-līna-dīna-mīna-divya-sampradāyakaṃ
kalau malaugha-bhāra-hāri-sarva-tīrtha-nāyakam |
sumaccha-kaccha-nakra-cakra-vāka-cakra-śarmade
tvadīya-pāda-paṅkajaṃ namāmi devi narmade ||
||2||mahā-gabhīra-nīra-pūra-pāpa-dhūta-bhūtalaṃ
dhvanat-samasta-pātakāri-dāritāpa-dāchalam |
jagallaye mahābhaye mṛkaṇḍu-sūnu-harmyade
tvadīya-pādapaṅkajaṃ namāmi devi narmade ||
||3||gataṃ tadaiva me bhayaṃ tvadambu vīkṣitaṃ yadā
mṛkaṇḍu-sūnu-śaunakā-surāri-sevitaṃ sadā |
punar-bhavābdhi-janmajaṃ bhavābdhi-duḥkha-varmade
tvadīya-pāda-paṅkajaṃ namāmi devi narmade ||
||4||alakṣya-lakṣa-kinnarāmarāsurādi-pūjitaṃ
sulakṣa-nīra-tīra-dhīra-pakṣi-lakṣa-kūjitam |
vasiṣṭha-śiṣṭa-pippalādi-kardamādi-śarmade
tvadīya-pādapaṅkajaṃ namāmi devi narmade ||
||5||sanatkumāra-nāciketa-kaśyapātri-ṣatpadaiḥ
dhṛtaṃ svakīya-mānaseṣu nāradādi-ṣatpadaiḥ |
ravīndu-ranti-deva-devarāja-karma-śarmade
tvadīya-pāda-paṅkajaṃ namāmi devi narmade ||
||6||alakṣa-lakṣa-lakṣa-pāpa-lakṣa-sārasāyudhaṃ
tatastu jīva-jantu-tantu-bhukti-mukti-dāyakam |
viriñci-viṣṇu-śaṅkara-svakīya-dhāma-varmade
tvadīya-pāda-paṅkajaṃ namāmi devi narmade ||
||7||aho dhṛtaṃ svanaṃ śrutaṃ maheśi-keśa-jātaṭe
kirāta-sūta-bāḍabeṣu paṇḍite śaṭhe naṭe |
duranta-pāpa-tāpahāri-sarva-jantu-śarmade
tvadīya-pāda-paṅkajaṃ namāmi devi narmade ||
||8||idaṃ tu narmadāṣṭakaṃ trikālameva ye sadā
paṭhanti te nirantaraṃ na yānti durgatiṃ kadā |
sulabhyadehadurlabhaṃ maheśadhāmagauravaṃ
punarbhavā narā na vai vilokayanti rauravam ||
||9||iti śrīmatparamahaṃsaparivrājakācāryasya śrī-govinda-bhagavatpūjya-pāda-śiṣyasya śrīmacchaṅkarabhagavataḥ kṛtau śrī-narmadāṣṭakam sampūrṇam