athāto dravyaśuddhistu parāśaravaco yathā
dāravāṇāṃ pātrāṇāṃ takṣaṇācchuddhiriṣyate
||1||bhasmanā śudhyate kāṃsyaṃ tāmramamlena śudhyati
rajasā śudhyate nārī vikalaṃ yā na gacchati
||2||nadī vegena śudhyeta lopo yadi na dṛśyate
vāpīkūpataḍāgeṣu dūṣiteṣu kathaṃcana
||3||uddhṛtya vai ghaṭaśataṃ pañcagavyena śudhyati
aṣṭavarṣā bhavedgaurī navavarṣā tu rohiṇī
||4||daśavarṣā bhavetkanyā ata ūrdhvaṃ rajasvalā
prāpte tu dvādaśe varṣe yaḥ kanyāṃ na prayacchati
||5||māsi māsi rajastasyāḥ pibanti pitaraḥ svayam
mātā caiva pitā caiva jyeṣṭho bhrātā tathaiva ca
||6||trayaste narakaṃ yānti dṛṣṭvā kanyāṃ rajasvalām
yastāṃ samudvahetkanyāṃ brāhmaṇo madamohitaḥ
||7||asaṃbhāṣyo hyapāṅkteyaḥ sa vipro vṛṣalīpatiḥ
yaḥ karotyekarātreṇa vṛṣalīsevanaṃ dvijaḥ
||8||sa bhaikṣabhujjapannityaṃ tribhirvarṣairviśudhyati
astaṃgate yadā sūrye caṇḍālaṃ patitaṃ striyam
||9||sūtikāṃ spṛśataścaiva kathaṃ śuddhirvidhīyate
jātavedaḥ suvarṇaṃ ca somamārgaṃ vilokya ca
||10||brāhmaṇānumataścaiva snānaṃ kṛtvā viśudhyati
spṛṣṭvā rajasvalānyonyaṃ brāhmaṇī brāhmaṇī tathā
||11||tāvattiṣṭhennirāhārā trirātreṇaiva śudhyati
spṛṣṭvā rajasvalānyonyaṃ brāhmaṇī kṣatriyā tathā
||12||ardhakṛcchraṃ caretpūrvā pādamekamanantarā
spṛṣṭvā rajasvalānyonyaṃ brāhmaṇī vaiśyajā tathā
||13||pādahīnaṃ caretpūrvā pādamekamanantarā
spṛṣṭvā rajasvalānyonyaṃ brāhmaṇī śūdrajā tathā
||14||kṛcchreṇa śudhyate pūrvā śūdrā dānena śudhyati
snātā rajasvalā yā tu caturthe'hani śudhyati
||15||kuryādrajo nivṛttau tu daivapitryādi karma ca
rogeṇa yadrajaḥ strīṇāmanvahaṃ tu pravartate
||16||nāśuciḥ sā tatastena tatsyādvaikālikaṃ matam
sādhvācārā na tāvatsyādrajo yāvatpravartate
||17||rajonivṛttau gamyā strī gṛhakarmaṇi caiva hi
prathame'hani caṇḍālī dvitīye brahmaghātinī
||18||tṛtīye rajakī proktā caturthe'hani śudhyati
āture snānotpanne daśakṛtvo hyanāturaḥ
||19||snātvā snātvā spṛśedenaṃ tataḥ śudhyetsa āturaḥ
ucchiṣṭocchiṣṭasaṃspṛṣṭaḥ śunā śūdreṇa vā dvijaḥ
||20||upoṣya rajanīmekāṃ pañcagavyena śudhyati
anucchiṣṭena śūdreṇa sparśe snānaṃ vidhīyate
||21||tenocchiṣṭena saṃspṛṣṭaḥ prājāpatyaṃ samācaret
bhasmanā śudhyate kāṃsyaṃ surayā yanna lipyate
||22||surāmātreṇa saṃspṛṣṭaṃ śudhyate'gnyupalekhanaiḥ
gavāghrātāni kāṃsyāni śvakākopahatāni ca
||23||śudhyanti daśabhiḥ kṣāraiḥ śūdrocchiṣṭāni yāni ca
gaṇḍūṣaṃ pādaśaucaṃ ca kṛtvā vai kāṃsyabhājane
||24||ṣaṇmāsānbhuvi niḥkṣipya uddhṛtya punarāharet
āyaseṣvāyasānāṃ ca sīsasyāgnau viśodhanam
||25||dantamasthi tathā bhṛṅgaṃ rūpyaṃ sauvarṇabhājanam
maṇipāṣāṇapātrāṇītyetānprakṣālayejjalaiḥ
||26||pāṣāṇe tu punargharṣaḥ śuddhirevamudāhṛtā
mṛṇmaye dahanācchuddhirdhānyānāṃ mārjanādapi
||27||veṇuvalkalacīrāṇāṃ kṣaumakārpāsavāsasām
aurṇanetrapaṭānāṃ ca prokṣaṇācchuddhiriṣyate
||28||muñjopaskaraśūrpāṇāṃ śaṇasya phalacarmaṇām
tṛṇakāṣṭhasya rajjūṇāmudakābhyukṣaṇaṃ matam
||29||tūlikādyupadhānāni raktavastrādikāni ca
śoṣayitvātapenaiva prokṣaṇācchuddhitāmiyuḥ
||30||mārjāramakṣikākīṭapataṅgakṛmidardurāḥ
medhyāmedhyaṃ spṛśanto'pi nocchiṣṭaṃ manurabravīt
||31||mahīṃ spṛṣṭvāgataṃ toyaṃ yāścāpyanyonyavipruṣaḥ
bhuktocchiṣṭaṃ tathā snehaṃ nocchiṣṭaṃ manurabravīt
||32||tāmbūlekṣuphale caiva bhuktasnehānulepane
madhuparke ca some ca nocchiṣṭaṃ dharmato viduḥ
||33||rathyākardamatoyāni nāvaḥ panthāstṛṇāni ca
mārutārkeṇa śudhyanti pakveṣṭakacitāni ca
||34||aduṣṭā saṃtatā dhārā vātoddhūtāśca reṇavaḥ
striyo vṛddhāśca bālāśca na duṣyanti kadācana
||35||deśabhaṅge pravāse vā vyādhiṣu vyasaneṣvapi
rakṣedeva svadehādipaścāddharmaṃ samācaret
||36||yena kena ca dharmeṇa mṛdunā dāruṇena vā
uddhareddīnamātmānaṃ samartho dharmamācaret
||37||āpatkāle tu nistīrṇe śaucācāraṃ tu cintayet
śuddhiṃ samuddharetpaścātsvastho dharmaṃ samācaret
||38||