śāktapramodaḥ
nyāsaḥ
asya śivāṣṭottaraśatanāmastotrasya viṣṇurṛṣiḥ, anuṣṭup chandaḥ, śivaḥ parameśvaro devatā, śivaprasādasiddhyarthe jape viniyogaḥ|
dhyānam
dhyāyennityaṃ maheśaṃ rajatagirinibhaṃ cārucandrāvataṃsaṃ
ratnākalpojjvalāṅgaṃ paraśumṛgavarābhītihastaṃ prasannam |
padmāsīnaṃ samantāt stutamamaragaṇairvyāghrakṛttiṃ vasānaṃ
viśvādyaṃ viśvabījaṃ nikhilabhayaharaṃ pañcavaktraṃ trinetram ||
||1||stotram
śivo maheśvaraḥ śambhuḥ pinākī śaśiśekharaḥ |
vāmadevo virūpākṣaḥ kapardī nīlalohitaḥ ||
||2||śaṅkaraḥ śūlapāṇiśca khaṭvāṅgī viṣṇuvallabhaḥ |
śipiviṣṭo'mbikānāthaḥ śrīkaṇṭho bhaktavatsalaḥ ||
||3||bhavaḥ śarvastrilokīśaḥ śitikaṇṭhaḥ śivāpriyaḥ |
ugraḥ kapālī kāmārirandhakāsurasūdanaḥ ||
||4||gaṅgādharo lalāṭākṣaḥ kālakālaḥ kṛpānidhiḥ |
bhīmaḥ paraśuhastaśca mṛgapāṇirjaṭādharaḥ ||
||5||kailāsavāsī kavacī kaṭhorastripurāntakaḥ |
vṛṣāṅko vṛṣabhārūḍho bhasmoddhūlitavigrahaḥ ||
||6||sāmapriyaḥ svaramayastrayīmūrtiranīśvaraḥ |
sarvajñaḥ paramātmā ca somasūryāgnilocanaḥ ||
||7||haviryajñamayaḥ somaḥ pañcavaktraḥ sadāśivaḥ |
viśveśvaro vīrabhadro gaṇanāthaḥ prajāpatiḥ ||
||8||hiraṇyaretā durdharṣo girīśo giriśo'naghaḥ |
bhujaṅgabhūṣaṇo bhargo giridhanvā giripriyaḥ ||
||9||kṛttivāsāḥ purārātirbhagavān pramathādhipaḥ |
mṛtyuñjayaḥ sūkṣmatanurjagadvyāpī jagadguruḥ ||
||10||vyomakeśo mahāsenajanakaścāruvikramaḥ |
rudro bhūtapatiḥ sthāṇurahirbudhnyo digambaraḥ ||
||11||aṣṭamūrtiranekātmā sāttvikaḥ śuddhavigrahaḥ |
śāśvataḥ khaṇḍaparaśurajaḥ pāśavimocakaḥ ||
||12||mṛḍaḥ paśupatirdevo mahādevo'vyayo hariḥ |
pūṣadantabhidavyagro dakṣādhvaraharo haraḥ ||
||13||bhaganetrabhidavyaktaḥ sahasrākṣaḥ sahasrapāt |
apavargaprado'nantastārakaḥ parameśvaraḥ ||
||14||phalaśrutiḥ
imāni divyanāmāni japyante sarvadā mayā |
nāmakalpalateyaṃ me sarvābhīṣṭapradāyini ||
||15||nāmānyetāni subhage śivadāni na saṃśayaḥ |
vedasarvasvabhūtāni nāmānyetāni vastutaḥ ||
||16||etāni yāni nāmāni tāni sarvārthadānyataḥ |
japyante sādaraṃ nityaṃ mayā niyamapūrvakam ||
||17||vedeṣu śivanāmāni śreṣṭhānyaghaharāṇi ca |
santyanantāni subhage vedeṣu vividheṣvapi ||
||18||tebhyo nāmāni saṅgṛhya kumārāya maheśvaraḥ |
aṣṭottarasahasraṃ tu nāmnāmupadiśat purā ||
||19||iti śivarahasye saptameṃ'śe trayodaśe'dhyāye nāmakalpalatā nāma śivāṣṭottaraśatanāmastotraṃ sampūrṇam