Study
- Anukramaṇī
- vividhakarmāṇi
- Source
- याजुषमन्त्ररत्नाकरम् (मुद्रितग्रन्थः) पृष्ठम् ६४२–६४३ — मुद्रितग्रन्थस्य PDF-पाठात् स्वरसहितं यथावत् उद्धृतम्। कोष्ठकेषु सङ्ख्याः ग्रन्थस्य पृष्ठनिर्देशाः।
vividhakarmāṇi
yā ta̍ e̱ṣā ra̍rā̱ṭyā̍ ta̱nūrma̱nyormṛ̱dhrasya̱ nāśi̍nī| tāṃ de̱vā bra̍hmacā̱riṇo̱ vina̍yantu sume̱dhasa̍ḥ| yatta̍ e̱tanmukhe̍'ma̱tagͫ ra̱rāṭa̱mudi̍va̱ vidhya̍ti| vi te̱ krodha̍ṃ nayāmasi̱ garbha̍maśvata̱ryā i̍va| ava̱ jyāmi̍va̱ dhanva̍no hṛ̱do ma̱nyuṃ ta̍nomi te| indrāpā̎sya pali̱gama̱nyebhya̱ḥ puru̍ṣebhyo̱'nyatra̱ mat|
||1||yada̱haṃ dhane̍na̱ prapa̱ṇagͫ̄śca̍rāmi̱ dhane̍na devā̱ dhana̍mi̱cchamā̍naḥ| tasmi̱n somo̱ ruca̱māda̍dhātva̱gnirindro̱ bṛha̱spati̍śca̱ svāhā̎| pari̍ tvā̱ gire̍ramiha̱ṃ pari̱ bhrātu̱ḥ pari̱ṣvasu̍ḥ| pari̱ sarve̎bhyo̱ jñāti̍bhya̱ḥ pari̍ṣīta̱ḥ kve̎ṣyasi̍| śaśva̱tpari̍kupitena̱ sa̱ṃkrāme̱ṇā'vi̍cchidā| u̱lena̱ pari̍ṣītosi̱ pari̍ṣītosyu̱lena̍|
||2||(āva̍rtana varta̱yetye̱ṣā|) {āva̍rtana vartaya̱ ni ni̍vartana varta̱yendra̍ nardabuda| bhūmyā̱ścata̍sraḥ pra̱diśa̱stābhi̱rā va̍rtayā̱ puna̍ḥ||} ā̱va̍rtane ni̱varta̍na ā̱varta̍nanivarta̱nāya̱ svāhā̎| anu̍ po'hvadanu̱hvayo̱ niva̍rto po̱ nya̍vīvṛtat| ai̱ndraḥ pari̍krośo va̱ḥ pari̍krośatu sa̱rvata̍ḥ| yadi̱ māmati̱ manyā̎dhvā̱ ade̍vā de̱vava̍ttaram|
||3||indra̱ḥ pāśe̍na si̱ktvā vo̱ mahya̱midva̱śamāna̍yā̱tsvāhā̎| yadi̍ vṛ̱kṣādyadya̱ntari̍kṣā̱tphala̍ma̱bhya̍pata̱ttadu̍ vā̱yure̱va| yatrāspṛ̍kṣatta̱nuva̱ṃ yatra̱ vāsa̱ āpo̍ bādhantā̱ṃ nirṛ̍tiṃ parā̱caiḥ| ye pa̱kṣiṇa̍ḥ pa̱taya̍nti bi̱bhyato̱ nirṛ̍taiḥ sa̱ha| te mā̍ śi̱vena̍ śa̱gmena̱ teja̍so̱ndantu̱ varca̍sā|
||4||di̱vo nu mā̍ bṛha̱to a̱ntari̍kṣāda̱pāgͫ̄ sto̱ko a̱bhya̍patacchi̱vena̍| sama̱hami̍ndri̱yeṇa̱ mana̍sā̱'samāgā̱ṃ brahma̍ṇā saṃpṛcā̱naḥ su̱kṛtā̍ kṛ̱tena̍|
||5||(i̱maṃ me̍ varuṇa̱ tattvā̍ yāmi̱ tvaṃ no̍ agne̱ sa tvaṃ no̍ agne̱ tvama̍gne a̱yā'si̱ prajā̍pate|) (sa̱ṃrāja̍ṃ ca̱ vyāhṛ̍tī̱rvihṛ̍tāḥ|) i̱maṃ jī̱vebhya̍ḥ pari̱dhiṃ da̍dhāmi̱ maiṣāṃ nu̍ gā̱dapa̍ro̱ ardha̍me̱tam| śa̱taṃ jī̍vantu śa̱rada̍ḥ purū̱cīsti̱ro mṛ̱tyuṃ da̍dhatā̱ṃ parva̍tena||22||
||6||