Study
- Anukramaṇī
- Saṃhitā citations
- Source
tai॰saṃ॰ 1.4.44
46 dhā̱tā rā̱tiḥ sa̍vi̱tedaṃ ju̍ṣantāṃ pra̱jāpa̍tirnidhi̱pati̍rno a̱gniḥ | tvaṣṭā̱
viṣṇu̍ḥ pra̱jayā̍ sagͫrarā̱ṇo yaja̍mānāya̱ dravi̍ṇaṃ dadhātu || sami̍ndra ṇo̱
mana̍sā neṣi̱ gobhi̱ḥ sagͫ sū̱ribhi̍rmaghava̱nthsa2gͫ sva̱styā | saṃ brahma̍ṇā
de̱vakṛ̍ta̱ṃ yadasti̱ saṃ de̱vānāgͫ̍ suma̱tyā ya̱jñiyā̍nām || saṃ varca̍sā̱
paya̍sā̱ saṃ ta̱nūbhi̱raga̍nmahi̱ mana̍sā̱ sagͫ śi̱vena̍ | tvaṣṭā̍ no̱ atra̱
vari̍vaḥ kṛṇo̱tva
47 nu̍ mārṣṭu ta̱nuvo̱ yadvili̍ṣṭam || yada̱dya tvā̎ praya̱ti ya̱jñe a̱sminnagne̱
hotā̍ra̱mavṛ̍ṇīmahī̱ha | ṛdha̍gayā̱ḍṛdha̍gu̱tāśa̍miṣṭhāḥ prajā̱nan,
ya̱jñamupa̍yāhi vi̱dvān || sva̱gā vo̍ devā̱ḥ sada̍namakarma̱ ya ā̍ja̱gma sava̍ne̱daṃ
ju̍ṣā̱ṇāḥ | ja̱kṣi̱vāgͫsa̍ḥ papi̱vāgͫsa̍śca̱ viśve̱'sme dha̍tta vasavo̱
vasū̍ni || yānā'va̍ha uśa̱to de̍va de̱vān tān
48 prera̍ya̱ sve a̍gne sa̱dhasthe̎ | vaha̍mānā̱ bhara̍māṇā ha̱vīgͫṣi̱ vasu̍ṃ
gha̱rmaṃ diva̱mā ti̍ṣṭha̱tānu̍ || yajña̍ ya̱jñaṃ ga̍ccha ya̱jñapa̍tiṃ
gaccha̱ svāṃ yoni̍ṃ gaccha̱ svāhai̱ṣa te̍ ya̱jño ya̍jñapate sa̱hasū̎ktavākaḥ
su̱vīra̱ḥ svāhā̱ devā̍ gātuvido gā̱tuṃ vi̱tvā gā̱tumi̍ta̱ mana̍saspata i̱maṃ
no̍ deva de̱veṣu̍ ya̱jña2gͫ svāhā̍ vā̱ci svāhā̱ vāte̍ dhāḥ || kṛ̱ṇo̱tu̱
tāna̱ṣṭāca̍tvārigͫśacca ॥TS 1.4.44॥
||1||