Study
- Anukramaṇī
- gṛhanirmāṇapraveśau
- Source
- याजुषमन्त्ररत्नाकरम् (मुद्रितग्रन्थः) पृष्ठम् ६३३–६३४ — मुद्रितग्रन्थस्य PDF-पाठात् स्वरसहितं यथावत् उद्धृतम्। कोष्ठकेषु सङ्ख्याः ग्रन्थस्य पृष्ठनिर्देशाः।
gṛhanirmāṇapraveśau
yadbhūme̎ḥ krū̱raṃ tadi̱to ha̍rāmi̱ parā̍cī̱ṃ nirṛ̍ti̱ṃ nirvā̍hayāmi| i̱dagͫ̄ śreyo̍'va̱sāna̱māga̍nma devā̱ goma̱daśvā̍vadi̱dama̍stu̱ pra bhūma̍| syo̱nā pṛ̍thivi̱ bhavā̍nṛkṣa̱rā ni̱veśa̍nī| yacchā̍ na̱ḥ śarma̍ sa̱prathā̎ḥ| i̱haiva ti̍ṣṭha̱ nimi̍tā̱ tilva̍lā syā̱dirā̍vatī| madhye̱ tālpya̍sya̱ tiṣṭhā̱nmā tvā̱ prāpa̍nnaghā̱yava̍ḥ|
||1||ā tvā̍ kumā̱rasta̱ruṇa̱ ā va̱tso jaga̍tā sa̱ha| ā tvā̍ pari̱sruta̍ḥ ku̱mbhā ā da̱dhnaḥ kala̍śīrayan| ṛ̱tena̱ sthūṇā̱vadhi̍roha va̱gͫśogro̍ vi̱rāja̱nnapa̍sedha̱ śatrū̍n| brahma̍ ca te kṣa̱traṃ ca̱ pūrve̱ sthūṇe̍ a̱bhi ra̍kṣatu| ya̱jñaśca̱ dakṣi̍ṇāśca̱ dakṣi̍ṇe|
||2||i̱ṣaśco̱rjaścāpa̍re mi̱traśca̱ varu̍ṇa̱ścotta̍re dha̱rmaste̱ sthūṇā̍rāja̱ḥ śrīste̱ stūpa̍ḥ| u̱ddhri̱yamā̍ṇa̱ uddha̍ra pā̱pmano̍ mā̱ yadavi̍dvā̱n yacca̍ vi̱dvāgͫ̄śca̱kāra̍| ahnā̱ yadena̍ḥ kṛ̱tama̍sti pā̱pagͫ rātryā̱ yadena̍ḥ kṛ̱tama̍sti pā̱pagͫsarva̍smā̱nmoddhṛ̱to mu̍ñca̱ tasmā̎t|
||3||indra̍sya gṛ̱hā vasu̍manto varū̱thina̱stāna̱hagͫ su̱mana̍sa̱ḥ prapa̍dye| a̱mṛ̱tā̱hu̱tima̱mṛtā̍yāṃ juhomya̱gniṃ pṛ̍thi̱vyāma̱mṛta̍sya̱ jityai̱ tayā̍'na̱ntaṃ kāma̍ma̱haṃ ja̍yāni pra̱jāpa̍ti̱ryaṃ pra̍tha̱mo ji̱gāyā̱gnima̍gnau̱ svāhā̎| (anna̍pata̱ itye̱ṣā)| {anna̍pa̱te'nna̍sya no dehyanamī̱vasya̍ śu̱ṣmiṇa̍ḥ|
||4||pra pra̍dā̱tāra̍ṃ tāriṣa̱ ūrja̍ṃ no dhehi dvi̱pade̱ catu̍ṣpade||} ari̍ṣṭā a̱smāka̍ṃ vī̱rāḥ sa̍ntu̱ mā parā̍seci me̱ dhana̎m| bhūmi̱rbhūmi̍magānmā̱tā mā̱tara̱mapya̍gāt| bhū̱yāsma̍ pu̱traiḥ pa̱śubhi̱ryo no̱ dveṣṭi̱ sa bhi̍dyatām|
||5||