Śaṅkara by tradition
pure paurānpaśyannarayuvatināmākṛtimayān
suveṣānsvarṇālaṅkaraṇakalitāṃścitrasadṛśān |
svayaṃ sākṣāddraṣṭetyapi ca kalayaṃstaiḥ saha raman
munirna vyāmohaṃ bhajati gurudīkṣākṣatatamāḥ ||
||1||vane vṛkṣānpaśyandalaphalabharānnamrasuśikhān
ghanacchāyācchannānbahulakalakūjaddvijagaṇān |
bhajanghasrerātrāvavanitalakalpaikaśayano
munirna vyāmohaṃ bhajati gurudīkṣākṣatatamāḥ ||
||2||kadācitprāsāde kvacidapi ca saudheṣu dhanināṃ
kadā kāle śaile kvacidapi ca kūleṣu saritām |
kuṭīre dāntānāṃ munijanavarāṇāmapi vasan
munirna vyāmohaṃ bhajati gurudīkṣākṣatatamāḥ ||
||3||kvacidbālaiḥ sārdhaṃ karatalajatālaiḥ sahasitaiḥ
kvacittāruṇyālaṅkṛtanaravadhūbhiḥ saha raman |
kvacidvṛddhaiścintākulita hṛdayaiścāpi vilapan
munirna vyāmohaṃ bhajati gurudīkṣākṣatatamāḥ ||
||4||kadācidvidvadbhirvividiṣubhiratyantanirataiḥ
kadācitkāvyālaṅkṛtirasarasālaiḥ kavivaraiḥ |
kadācitsattarkairanumitiparaistārkikavarai-
rmunirna vyāmohaṃ bhajati gurudīkṣākṣatatamāḥ ||
||5||kadā dhyānābhyāsaiḥ kvacidapi saparyāṃ vikasitaiḥ
sugandhaiḥ satpuṣpaiḥ kvacidapi dalaireva vimalaiḥ |
prakurvandevasya pramuditamanāḥ sannatiparo
munirna vyāmohaṃ bhajati gurudīkṣākṣatatamāḥ ||
||6||śivāyāḥ śambhorvā kvacidapi ca viṣṇorapi kadā
gaṇādhyakṣasyāpi prakaṭitavarasyāpi ca kadā |
paṭhanvai nāmāliṃ nayanaracitānandasalilo
munirna vyāmohaṃ bhajati gurudīkṣākṣatatamāḥ ||
||7||kadā gaṅgāmbhobhiḥ kvacidapi ca kūpotthasalilaiḥ
kvacitkāsārotthaiḥ kvacidapi saduṣṇaiśca śiśiraiḥ |
bhajansnānaṃ bhūtyā kvacidapi ca karpūranibhayā
munirna vyāmohaṃ bhajati gurudīkṣākṣatatamāḥ ||
||8||kadācijjāgartyāṃ viṣayakaraṇaiḥ saṃvyavaharan
kadācitsvapnasthānapi ca viṣayāneva ca bhajan |
kadācitsauṣuptaṃ sukhamanubhavanneva satataṃ
munirna vyāmohaṃ bhajati gurudīkṣākṣatatamāḥ ||
||9||kadāpyāśāvāsāḥ kvacidapi ca divyāmbaradharaḥ
kvacitpañcāsyotthāṃ tvacamapi dadhānaḥ kaṭitaṭe |
manasvī niḥsaṅgaḥ sujanahṛdayānandajanako
munirna vyāmohaṃ bhajati gurudīkṣākṣatatamāḥ ||
||10||kadācitsattvasthaḥ kvacidapi rajovṛttisugata-
stamovṛttiḥ kvāpi tritayarahitaḥ kvāpi ca punaḥ |
kadācitsaṃsārī śrutipathavihārī kvacidaho
munirna vyāmohaṃ bhajati gurudīkṣākṣatatamāḥ ||
||11||kadācinmaunasthaḥ kvacidapi ca vāgvādanirataḥ
kadācitsvānandaṃ hasitarabhasastyaktavacanaḥ |
kadācillokānāṃ vyavahṛtisamālokanaparo
munirna vyāmohaṃ bhajati gurudīkṣākṣatatamāḥ ||
||12||kadācicchaktīnāṃ vikacamukhapadmeṣu kamalaṃ
kṣipaṃstāsāṃ kvāpi svayamapi ca gṛhṇansvamukhataḥ |
tadadvaitaṃ rūpaṃ nijaparavihīnaṃ prakaṭayan
munirna vyāmohaṃ bhajati gurudīkṣākṣatatamāḥ ||
||13||kvacicchaivaiḥ sārthaṃ kvacidapi ca śāktaiḥ saha vasan
kadā viṣṇorbhaktaiḥ kvacidapi ca sauraiḥ saha vasan |
kadā gāṇāpatyairgatasakalabhedo'dvayatayā
munirna vyāmohaṃ bhajati gurudīkṣākṣatatamāḥ ||
||14||nirākāraṃ kvāpi kvacidapi ca sākāramamalaṃ
nijaṃ śaiva rūpaṃ vividhaguṇabhedena bahudhā |
kadāścaryaṃ paśyankimidamiti hṛṣyannapi kadā
munirna vyāmohaṃ bhajati gurudīkṣākṣatatamāḥ ||
||15||kadā'dvaitaṃ paśyannakhilamapi satyaṃ śivamayaṃ
mahāvākyārthānāmavagatisamabhyāsavaśataḥ |
gatadvaitābhāsaḥ śiva śiva śivetyeva vilapan
munirna vyāmohaṃ bhajati gurudīkṣākṣatatamāḥ ||
||16||imāṃ muktāvasthāṃ paramaśivasaṃsthāṃ gurukṛpā-
sudhāpāṅgāvyāpyāṃ sahajasukhavyāpyāmanudinam |
muhurmajjanmajjanbhajati sukṛtaiścennaravaraḥ
tadā tyāgī yogī kaviriti vadantīha kavayaḥ ||
||17||iti śrīmatparamahaṃsaparivrājakācāryasya śrīgovindabhagavatpūjyapādaśiṣyasya śrīmacchaṅkarabhagavataḥ kṛtau jīvanmuktānandalaharī sampūrṇā