Study
- Anukramaṇī
- tai॰brā॰ 3.7.11
- Saṃhitā citations
- Source
- Taittirīya / Ṛgveda corpus, as compiled in Yājuṣa Mantra Ratnākaram. Learn svara from a guru.
tai॰brā॰ 3.7.11
brahma̍ prati̱ṣṭhā mana̍so̱ brahma̍ vā̱caḥ|
brahma̍ ya̱jñānāgͫ̍ ha̱viṣā̱mājya̍sya|
ati̍rikta̱ṃ karma̍ṇo̱ yacca̍ hī̱nam|
ya̱jñaḥ parvā̍ṇi prati̱ranne̍ti ka̱lpayan̍|
svāhā̍kṛ̱tā''hu̍tiretu de̱vān|
āśrā̍vitama̱tyāśrā̍vitam|
vaṣa̍ṭkṛtama̱tyanū̎ktaṃ ca ya̱jñe|
ati̍rikta̱ṃ karma̍ṇo̱ yacca̍ hī̱nam|
ya̱jñaḥ parvā̍ṇi prati̱ranne̍ti ka̱lpayan̍|
svāhā̍kṛ̱tā''hu̍tiretu de̱vān||111||
yadvo̍ devā atipā̱dayā̍ni|
vā̱cā ci̱tpraya̍taṃ deva̱heḍa̍nam|
a̱rā̱yo a̱smāgͫ a̱bhidu̍cchunā̱yate̎|
a̱nyatrā̱smanma̍ruta̱stannidhe̍tana|
ta̱taṃ ma̱ āpa̱stadu̍ tāyate̱ puna̍ḥ|
svādi̍ṣṭhā dhī̱tiru̱cathā̍ya śasyate|
a̱yagͫ sa̍mu̱dra u̱ta vi̱śvabhe̍ṣajaḥ|
svāhā̍kṛtasya̱ samu̍tṛpṇutarbhuvaḥ|
udva̱yaṃ tama̍sa̱spari̍|
udu̱tyaṃ ci̱tram||112||
i̱maṃ me̍ varuṇa̱ tattvā̍ yāmi|
tvanno̍ agne̱ sa tvanno̍ agne|
tvama̍gne a̱yāsi̱ prajā̍pate|
i̱maṃ jī̱vebhya̍ḥ pari̱dhiṃ da̍dhāmi|
maiṣānnu̍gā̱dapa̍ro̱ ardha̍me̱tam|
śa̱taṃ jī̍vantu śa̱rada̍ḥ purū̱cīḥ|
ti̱ro mṛ̱tyuṃ da̍dhatā̱ṃ parva̍tena|
i̱ṣṭebhya̱ḥ svāhā̱ vaṣa̱ḍani̍ṣṭebhya̱ḥ svāhā̎|
bhe̱ṣa̱jaṃ duri̍ṣṭyai̱ svāhā̱ niṣkṛ̍tyai̱ svāhā̎|
daurā̎rdhyai̱ svāhā̱ daivī̎bhyasta̱nūbhya̱ḥ svāhā̎||113||
ṛddhyai̱ svāhā̱ samṛ̍ddhyai̱ svāhā̎|
yata̍ indra̱ bhayā̍mahe|
tato̍ no̱ abha̍yaṃ kṛdhi|
magha̍vañcha̱gdhi tava̱ tanna̍ ū̱taye̎|
vi dviṣo̱ vi mṛdho̍ jahi|
sva̱sti̱dā vi̱śaspati̍ḥ|
vṛ̱tra̱hā vi mṛdho̍ va̱śī|
vṛṣendra̍ḥ pu̱ra e̍tu naḥ|
sva̱sti̱dā a̍bhayaṅka̱raḥ|
ā̱bhirgī̱rbhiryadato̍ na ū̱nam||114||
āpyā̍yaya harivo̱ vardha̍mānaḥ|
ya̱dā sto̱tṛbhyo̱ mahi̍ go̱trā ru̱jāsi̍|
bhū̱yi̱ṣṭha̱bhājo̱ adha̍ te syāma|
anā̎jñāta̱ṃ yadājñā̍tam|
ya̱jñasya̍ kri̱yate̱ mithu̍|
agne̱ tada̍sya kalpaya|
tvagͫ hi vettha̍ yathāta̱tham|
puru̍ṣasammito ya̱jñaḥ|
ya̱jñaḥ puru̍ṣasammitaḥ|
agne̱ tada̍sya kalpaya|
tvagͫ hi vettha̍ yathāta̱tham|
yatpā̍ka̱trā mana̍sā dī̱nada̍kṣā̱ na|
ya̱jñasya̍ ma̱nvate̱ martā̍saḥ|
a̱gniṣṭaddhotā̎ kratu̱vidvi̍jā̱nan|
yaji̍ṣṭho de̱vāgͫ ṛ̍tu̱śo ya̍jāti||115|| ॥TB 3.7.11॥
||1||