tai॰brā॰ 1.4.4
ni vā e̱tasyā̍''hava̱nīyo̱ gārha̍patyaṃ kāmayate|
nigārha̍patya āhava̱nīyam̎|
yasyā̱gnimanu̍ddhṛta̱g̱ͫ sūryo̱'bhi ni̱mroca̍ti|
da̱rbheṇa̱ hira̍ṇyaṃ pra̱baddhya̍ pu̱rastā̎ddharet|
athā̱gnim|
athā̎gniho̱tram|
yaddhira̍ṇyaṃ pu̱rastā̱ddhara̍ti|
jyoti̱rvai hira̍ṇyam|
jyoti̍re̱vaina̱ṃ paśya̱nnuddha̍rati|
yada̱gniṃ pūrva̱g̱ͫ hara̱tyathā̎gniho̱tram||17||
bhā̱ga̱dheye̍nai̱vaina̱ṃ praṇa̍yati|
brā̱hma̱ṇa ā̍rṣe̱ya uddha̍ret|
brā̱hma̱ṇo vai sarvā̍ de̱vatā̎ḥ|
sarvā̍bhire̱vaina̍ṃ de̱vatā̍bhi̱ruddha̍rati|
a̱gni̱ho̱tramu̍pa̱sādyātami̍torāsīta|
vra̱tame̱va ha̱tamanu̍ mriyate|
anta̱ṃ vā e̱ṣa ā̱tmano̍ gacchati|
yastāmya̍ti|
anta̍me̱ṣa ya̱jñasya̍ gacchati|
yasyā̱gnimanu̍ddhṛta̱g̱ͫ sūryo̱'bhi ni̱mroca̍ti||18||
puna̍ḥ sa̱manya̍ juhoti|
ante̍nai̱vānta̍ṃ ya̱jñasya̱ niṣka̍roti|
varu̍ṇo̱ vā e̱tasya̍ ya̱jñaṃ gṛ̍hṇāti|
yasyā̱gnimanu̍ddhṛta̱g̱ͫ sūryo̱'bhi ni̱mroca̍ti|
vā̱ru̱ṇaṃ ca̱ruṃ nirva̍pet|
tenai̱va ya̱jñaṃ niṣkrī̍ṇīte|
ni vā e̱tasyā̍''hava̱nīyo̱ gārha̍patyaṃ kāmayate|
ni gārha̍patya āhava̱nīyam̎|
yasyā̱gnimanu̍ddhṛta̱g̱ͫ sūryo̱'bhyu̍deti̍|
ca̱tu̱rgṛ̱hī̱tamājya̍ṃ pu̱rastā̎ddharet||19||
athā̱gnim|
athā̎gniho̱tram|
yadājya̍ṃ pu̱rastā̱ddhara̍ti|
e̱tadvā a̱gneḥ pri̱yaṃ dhāma̍|
yadājyam̎|
pri̱yeṇai̱vaina̱ṃ dhāmnā̱ sama̍rdhayati|
yada̱gniṃ pūrva̱g̱ͫ hara̱tyathā̎gniho̱tram|
bhā̱ga̱dheye̍nai̱vaina̱ṃ praṇa̍yati|
brā̱hma̱ṇa ā̍rṣe̱ya uddha̍ret|
brā̱hma̱ṇo vai sarvā̍ de̱vatā̎ḥ||20||
sarvā̍bhire̱vaina̍ṃ de̱vatā̍bhi̱ruddha̍rati|
parā̍cī̱ vā e̱tasmai̎ vyu̱cchantī̱ vyu̍cchati|
yasyā̱gnimanu̍ddhṛta̱g̱ͫ sūryo̱'bhyu̍deti̍|
u̱ṣāḥ ke̱tunā̍ juṣatām|
ya̱jñaṃ de̱vebhi̍rinvi̱tam|
de̱vebhyo̱ madhu̍mattama̱g̱ͫ̄ svāheti̍ pra̱tyaṅni̱ṣadyājye̍na juhuyāt|
pra̱tīcī̍me̱vāsmai̱ vivā̍sayati|
a̱gni̱ho̱tramu̍pa̱sādyātami̍torāsīta|
vra̱tame̱va ha̱tamanu̍ mriyate|
anta̱ṃ vā e̱ṣa ā̱tmano̍ gacchati||21||
yastāmya̍ti|
anta̍me̱ṣa ya̱jñasya̍ gacchati|
yasyā̱gnimanu̍ddhṛta̱g̱ͫ sūryo̱'bhyu̍deti̍|
puna̍ḥ sa̱manya̍ juhoti|
ante̍nai̱vānta̍ṃ ya̱jñasya̱ niṣka̍roti|
mi̱tro vā e̱tasya̍ ya̱jñaṃ gṛ̍hṇāti|
yasyā̱gnimanu̍ddhṛta̱g̱ͫ sūryo̱'bhyu̍deti̍|
mai̱traṃ ca̱ruṃ nirva̍pet|
tenai̱va ya̱jñaṃ niṣkrī̍ṇīte|
yasyā̍''hava̱nīye'nu̍dvāte̱ gārha̍patya u̱dvāye̎t||22||
yadā̍hava̱nīya̱manu̍dvāpya̱ gārha̍patya̱ṃ manthe̎t|
vicchi̍ndyāt|
bhrātṛ̍vyamasmai janayet|
yadvai ya̱jñasya̍ vāsta̱vya̍ṃ kri̱yate̎|
tadanu̍ ru̱dro'va̍carati|
yatpūrva̍manvava̱syet|
vā̱sta̱vya̍ma̱gnimupā̍sīta|
ru̱dro̎'sya pa̱śūnghātu̍kaḥ syāt|
ā̱ha̱va̱nīya̍mu̱dvāpya̍|
gārha̍patyaṃ manthet||23||
i̱taḥ pra̍tha̱maṃ ja̍jñe a̱gniḥ|
svādyone̱radhi̍ jā̱tave̍dāḥ|
sa gā̍yatri̱yā tri̱ṣṭubhā̱ jaga̍tyā|
de̱vebhyo̍ ha̱vyaṃ va̍hatu prajā̱nanniti̍|
chando̍bhire̱vaina̱g̱ͫ̄ svādyone̱ḥ praja̍nayati|
gārha̍patyaṃ manthati|
gārha̍patya̱ṃ vā anvāhi̍tāgneḥ pa̱śava̱ upa̍ tiṣṭhante|
sa yadu̱dvāya̍ti|
tadanu̍ pa̱śavo'pa̍ krāmanti|
i̱ṣe ra̱yyai ra̍masva||24||
saha̍se dyu̱mnāya̍|
ū̱rje'patyā̱yetyā̍ha|
pa̱śavo̱ vai ra̱yiḥ|
pa̱śūne̱vāsmai̍ ramayati|
sā̱ra̱sva̱tau tvothsau̱ sami̍ndhātā̱mityā̍ha|
ṛ̱khsā̱me vai sā̍rasva̱tāvuthsau̎|
ṛ̱khsā̱mābhyā̍me̱vaina̱g̱ͫ sami̍ndhe|
sa̱mrāḍa̍si vi̱rāḍa̱sītyā̍ha|
ra̱tha̱nta̱raṃ vai sa̱mrāṭ|
bṛ̱hadvi̱rāṭ||25||
tābhyā̍me̱vaina̱g̱ͫ sami̍ndhe|
vajro̱ vai ca̱kram|
vajro̱ vā e̱tasya̍ ya̱jñaṃ vicchi̍natti|
yasyāno̍ vā̱ ratho̍ vā'nta̱rā'gnī yāti̍|
ā̱ha̱va̱nīya̍mu̱dvāpya̍|
gārha̍patyā̱duddha̍ret|
yada̍gne̱ pūrva̱ṃ prabhṛ̍taṃ pa̱dagͫ hi te̎|
sūrya̍sya ra̱śmīnanvā̍ta̱tāna̍|
tatra̍ rayi̱ṣṭhāmanu̱ saṃ bha̍rai̱tam|
saṃ na̍ḥ sṛja suma̱tyā vāja̍va̱tyeti̍||26||
pūrve̍ṇai̱vāsya̍ ya̱jñena̍ ya̱jñamanu̱ saṃ ta̍noti|
tvama̍gne sa̱prathā̍ a̱sītyā̍ha|
a̱gniḥ sarvā̍ de̱vatā̎ḥ|
de̱vatā̍bhire̱va ya̱jñagͫ saṃ ta̍noti|
a̱gnaye̍ pathi̱kṛte̍ puro̱ḍāśa̍ma̱ṣṭāka̍pāla̱ṃ nirva̍pet|
a̱gnime̱va pa̍thi̱kṛta̱g̱ͫ̄ svena̍ bhāga̱dheye̱nopa̍dhāvati|
sa e̱vaina̍ṃ ya̱jñiya̱ṃ panthā̱mapi̍ nayati|
a̱na̱ḍvāndakṣi̍ṇā|
va̱hī hye̍ṣa samṛ̍ddhyai||27|| ॥TB 1.4.4॥
||1||tai॰ā॰ 2.15
tasya̱ vā e̱tasya̍ ya̱jñasya̱ dvāva̍nadhyā̱yau yadā̱tmā'śuci̱ryadde̱śaḥ samṛ̍ddhirdaiva̱tāni̱ ya e̱vaṃ vi̱dvānma̍hārā̱tra u̱ṣasyudi̍te̱ vraja̱g̱ͫ̄stiṣṭha̱nnāsī̍na̱ḥ śayā̍no̱'raṇye̎ grāme̱ vā yāva̍tta̱rasagͫ̄̍ svādhyā̱yamadhī̍te̱ sarvā̎m̐llo̱kāñja̍yati̱ sarvā̎m̐llo̱kāna̍nṛ̱ṇo'nu̱sañca̍rati̱ tade̱ṣābhyu̍ktā|
a̱nṛ̱ṇā a̱sminna̍nṛ̱ṇāḥ para̍smigͫ̄stṛ̱tīye̍ lo̱ke a̍nṛ̱ṇāḥ syā̍ma|
ye de̍va̱yānā̍ u̱ta pi̍tṛ̱yāṇā̱ḥ sarvā̎npa̱tho a̍nṛ̱ṇā ākṣī̍ye̱metya̱gniṃ vai jā̱taṃ pā̱pmā ja̍grāha̱ taṃ de̱vā āhu̍tībhiḥ pā̱pmāna̱mapā̎ghna̱nnāhu̍tīnāṃ ya̱jñena̍ ya̱jñasya̱ dakṣi̍ṇābhi̱rdakṣi̍ṇānāṃ brāhma̱ṇena̍ brāhma̱ṇasya̱ chando̍bhi̱śchanda̍sāgͫ̄ svādhyā̱yenāpa̍hatapāpmā svādhyā̱yo̍ de̱vapa̍vitra̱ṃ vā e̱tattaṃ yo'nū̎thsṛ̱jatyabhā̍go vā̱ci bha̍va̱tyabhā̍go nā̱ke tade̱ṣā'bhyu̍ktā|
yasti̱tyāja̍ sakhi̱vida̱g̱ͫ sakhā̍ya̱ṃ na tasya̍ vā̱cyapi̍ bhā̱go a̍sti|
yadīgͫ̍ śṛ̱ṇotya̱lakagͫ̍ śṛṇoti̱ na hi pra̱veda̍ sukṛ̱tasya̱ panthā̱miti̱ tasmā̎thsvādhyā̱yo'dhye̍ta̱vyo̍ yaṃ ya̍ṃ kra̱tumadhī̍te̱ tena̍ tenāsye̱ṣṭaṃ bha̍vatya̱gnervā̱yorā̍di̱tyasya̱ sāyu̍jyaṃ gacchati̱ tade̱ṣā'bhyu̍ktā|
ye a̱rvāṅu̱ta vā̍ purā̱ṇe ve̱daṃ vi̱dvāgͫsa̍ma̱bhito̍ vadantyādi̱tyame̱va te pari̍vadanti̱ sarve̍ a̱gniṃ dvi̱tīya̍ṃ tṛ̱tīya̍ṃ ca ha̱g̱ͫsamiti̱ yāva̍tī̱rvai de̱vatā̱stāḥ sarvā̍ veda̱vidi̍ brāhma̱ṇe va̍santi̱ tasmā̎dbrāhma̱ṇebhyo̍ veda̱vidbhyo̍ di̱ve di̍ve̱ nama̍skuryā̱nnāślī̱laṃ kī̎rtayede̱tā e̱va de̱vatā̎ḥ prīṇāti||19|| ॥TA 2.15॥
||2||