8 bārhaspatyo bharadvāja: | gāva:; 2, 8 indro gāvo vā | triṣṭup , 2 – 4 jagatī, 8 anuṣṭup |
ā gāvo̍ agmannu̱ta bha̱drama̍kra̱ntsīda̍ntu go̱ṣṭhe ra̱ṇaya̍ntva̱sme |
pra̱jāva̍tīḥ puru̱rūpā̍ i̱ha syu̱rindrā̍ya pū̱rvīru̱ṣaso̱ duhā̍nāḥ ॥6.28.1॥
आ गावो॑ अग्मन्नु॒त भ॒द्रम॑क्र॒न्त्सीद॑न्तु गो॒ष्ठे र॒णय॑न्त्व॒स्मे ।
प्र॒जाव॑तीः पुरु॒रूपा॑ इ॒ह स्यु॒रिन्द्रा॑य पू॒र्वीरु॒षसो॒ दुहा॑नाः
indro̱ yajva̍ne pṛṇa̱te ca̍ śikṣa̱tyupedda̍dāti̱ na svaṃ mu̍ṣāyati |
bhūyo̍bhūyo ra̱yimida̍sya va̱rdhaya̱nnabhi̍nne khi̱lye ni da̍dhāti deva̱yum ॥6.28.2॥
इन्द्रो॒ यज्व॑ने पृण॒ते च॑ शिक्ष॒त्युपेद्द॑दाति॒ न स्वं मु॑षायति ।
भूयो॑भूयो र॒यिमिद॑स्य व॒र्धय॒न्नभि॑न्ने खि॒ल्ये नि द॑धाति देव॒युम्
na tā na̍śanti̱ na da̍bhāti̱ taska̍ro̱ nāsā̍māmi̱tro vyathi̱rā da̍dharṣati |
de̱vām̐śca̱ yābhi̱ryaja̍te̱ dadā̍ti ca̱ jyogittābhi̍: sacate̱ gopa̍tiḥ sa̱ha ॥6.28.3॥
न ता न॑शन्ति॒ न द॑भाति॒ तस्क॑रो॒ नासा॑मामि॒त्रो व्यथि॒रा द॑धर्षति ।
दे॒वाँश्च॒ याभि॒र्यज॑ते॒ ददा॑ति च॒ ज्योगित्ताभि॑: सचते॒ गोप॑तिः स॒ह
na tā arvā̍ re̱ṇuka̍kāṭo aśnute̱ na sa̍ṃskṛta̱tramupa̍ yanti̱ tā a̱bhi |
u̱ru̱gā̱yamabha̍ya̱ṃ tasya̱ tā anu̱ gāvo̱ marta̍sya̱ vi ca̍ranti̱ yajva̍naḥ ॥6.28.4॥
न ता अर्वा॑ रे॒णुक॑काटो अश्नुते॒ न सं॑स्कृत॒त्रमुप॑ यन्ति॒ ता अ॒भि ।
उ॒रु॒गा॒यमभ॑यं॒ तस्य॒ ता अनु॒ गावो॒ मर्त॑स्य॒ वि च॑रन्ति॒ यज्व॑नः
gāvo̱ bhago̱ gāva̱ indro̍ me acchā̱ngāva̱: soma̍sya pratha̱masya̍ bha̱kṣaḥ |
i̱mā yā gāva̱: sa ja̍nāsa̱ indra̍ i̱cchāmīddhṛ̱dā mana̍sā ci̱dindra̍m ॥6.28.5॥
गावो॒ भगो॒ गाव॒ इन्द्रो॑ मे अच्छा॒न्गाव॒: सोम॑स्य प्रथ॒मस्य॑ भ॒क्षः ।
इ॒मा या गाव॒: स ज॑नास॒ इन्द्र॑ इ॒च्छामीद्धृ॒दा मन॑सा चि॒दिन्द्र॑म्
yū̱yaṃ gā̍vo medayathā kṛ̱śaṃ ci̍daśrī̱raṃ ci̍tkṛṇuthā su̱pratī̍kam |
bha̱draṃ gṛ̱haṃ kṛ̍ṇutha bhadravāco bṛ̱hadvo̱ vaya̍ ucyate sa̱bhāsu̍ ॥6.28.6॥
यू॒यं गा॑वो मेदयथा कृ॒शं चि॑दश्री॒रं चि॑त्कृणुथा सु॒प्रती॑कम् ।
भ॒द्रं गृ॒हं कृ॑णुथ भद्रवाचो बृ॒हद्वो॒ वय॑ उच्यते स॒भासु॑
pra̱jāva̍tīḥ sū̱yava̍saṃ ri̱śantī̍: śu̱ddhā a̱paḥ su̍prapā̱ṇe piba̍ntīḥ |
mā va̍: ste̱na ī̍śata̱ māghaśa̍ṃsa̱: pari̍ vo he̱tī ru̱drasya̍ vṛjyāḥ ॥6.28.7॥
प्र॒जाव॑तीः सू॒यव॑सं रि॒शन्ती॑: शु॒द्धा अ॒पः सु॑प्रपा॒णे पिब॑न्तीः ।
मा व॑: स्ते॒न ई॑शत॒ माघशं॑स॒: परि॑ वो हे॒ती रु॒द्रस्य॑ वृज्याः
upe̱damu̍pa̱parca̍namā̱su goṣūpa̍ pṛcyatām | upa̍ ṛṣa̱bhasya̱ reta̱syupe̍ndra̱ tava̍ vī̱rye̍ ॥6.28.8॥
उपे॒दमु॑प॒पर्च॑नमा॒सु गोषूप॑ पृच्यताम् । उप॑ ऋष॒भस्य॒ रेत॒स्युपे॑न्द्र॒ तव॑ वी॒र्ये॑