अध्ययनम्
- अनुक्रमणिका
- अन्यत्र सङ्ग्रहे
- मूलम्
७,१ भरद्वाज:, २ कश्यपः, ३ गौतमः, ४ अत्रिः, ५ विश्वामित्रः, ६ जमदग्निः, ७ वसिष्ठः। विश्वेदेवाः। अनुष्टुप्।
उ॒त दे॑वा॒ अव॑हितं॒ देवा॒ उन्न॑यथा॒ पुन॑: । उ॒ताग॑श्च॒क्रुषं॑ देवा॒ देवा॑ जी॒वय॑था॒ पुन॑: ॥10.137.1॥
u̱ta de̍vā̱ ava̍hita̱ṃ devā̱ unna̍yathā̱ puna̍: | u̱tāga̍śca̱kruṣa̍ṃ devā̱ devā̍ jī̱vaya̍thā̱ puna̍:
द्वावि॒मौ वातौ॑ वात॒ आ सिन्धो॒रा प॑रा॒वत॑: । दक्षं॑ ते अ॒न्य आ वा॑तु॒ परा॒न्यो वा॑तु॒ यद्रप॑: ॥10.137.2॥
dvāvi̱mau vātau̍ vāta̱ ā sindho̱rā pa̍rā̱vata̍: | dakṣa̍ṃ te a̱nya ā vā̍tu̱ parā̱nyo vā̍tu̱ yadrapa̍:
आ वा॑त वाहि भेष॒जं वि वा॑त वाहि॒ यद्रप॑: । त्वं हि वि॒श्वभे॑षजो दे॒वानां॑ दू॒त ईय॑से ॥10.137.3॥
ā vā̍ta vāhi bheṣa̱jaṃ vi vā̍ta vāhi̱ yadrapa̍: | tvaṃ hi vi̱śvabhe̍ṣajo de̱vānā̍ṃ dū̱ta īya̍se
आ त्वा॑गमं॒ शंता॑तिभि॒रथो॑ अरि॒ष्टता॑तिभिः । दक्षं॑ ते भ॒द्रमाभा॑र्षं॒ परा॒ यक्ष्मं॑ सुवामि ते ॥10.137.4॥
ā tvā̍gama̱ṃ śaṃtā̍tibhi̱ratho̍ ari̱ṣṭatā̍tibhiḥ | dakṣa̍ṃ te bha̱dramābhā̍rṣa̱ṃ parā̱ yakṣma̍ṃ suvāmi te
त्राय॑न्तामि॒ह दे॒वास्त्राय॑तां म॒रुतां॑ ग॒णः । त्राय॑न्तां॒ विश्वा॑ भू॒तानि॒ यथा॒यम॑र॒पा अस॑त् ॥10.137.5॥
trāya̍ntāmi̱ha de̱vāstrāya̍tāṃ ma̱rutā̍ṃ ga̱ṇaḥ | trāya̍ntā̱ṃ viśvā̍ bhū̱tāni̱ yathā̱yama̍ra̱pā asa̍t
आप॒ इद्वा उ॑ भेष॒जीरापो॑ अमीव॒चात॑नीः । आप॒: सर्व॑स्य भेष॒जीस्तास्ते॑ कृण्वन्तु भेष॒जम् ॥10.137.6॥
āpa̱ idvā u̍ bheṣa̱jīrāpo̍ amīva̱cāta̍nīḥ | āpa̱: sarva̍sya bheṣa̱jīstāste̍ kṛṇvantu bheṣa̱jam
हस्ता॑भ्यां॒ दश॑शाखाभ्यां जि॒ह्वा वा॒चः पु॑रोग॒वी । अ॒ना॒म॒यि॒त्नुभ्यां॑ त्वा॒ ताभ्यां॒ त्वोप॑ स्पृशामसि ॥10.137.7॥
hastā̍bhyā̱ṃ daśa̍śākhābhyāṃ ji̱hvā vā̱caḥ pu̍roga̱vī | a̱nā̱ma̱yi̱tnubhyā̍ṃ tvā̱ tābhyā̱ṃ tvopa̍ spṛśāmasi