skipLink.label
Vaidhika DharmaVaidhika Dharma

उदाहरणानि

शीघ्र मार्गाः

पूर्ण पृष्ठसूची

पवमानसूक्तम्

पवमानसूक्तम्. Also called pavamana suktam rig, pavamana, Pavamānasūktam. Svara-marked text on Vaidhika Dharma. IAST

MD
अध्ययनम्
अनुक्रमणिका
संहिता निर्देशाः
अन्यत्र सङ्ग्रहे
मूलम्

१० मधुच्छन्दा वैश्वामित्र:। पवमान: सोम: । गायत्री ।

स्वादि॑ष्ठया॒ मदि॑ष्ठया॒ पव॑स्व सोम॒ धार॑या । इन्द्रा॑य॒ पात॑वे सु॒तः ॥9.1.1॥

svādi̍ṣṭhayā̱ madi̍ṣṭhayā̱ pava̍sva soma̱ dhāra̍yā | indrā̍ya̱ pāta̍ve su̱taḥ

र॒क्षो॒हा वि॒श्वच॑र्षणिर॒भि योनि॒मयो॑हतम् । द्रुणा॑ स॒धस्थ॒मास॑दत् ॥9.1.2॥

ra̱kṣo̱hā vi̱śvaca̍rṣaṇira̱bhi yoni̱mayo̍hatam | druṇā̍ sa̱dhastha̱māsa̍dat

व॒रि॒वो॒धात॑मो भव॒ मंहि॑ष्ठो वृत्र॒हन्त॑मः । पर्षि॒ राधो॑ म॒घोना॑म् ॥9.1.3॥

va̱ri̱vo̱dhāta̍mo bhava̱ maṃhi̍ṣṭho vṛtra̱hanta̍maḥ | parṣi̱ rādho̍ ma̱ghonā̍m

अ॒भ्य॑र्ष म॒हानां॑ दे॒वानां॑ वी॒तिमन्ध॑सा । अ॒भि वाज॑मु॒त श्रव॑: ॥9.1.4॥

a̱bhya̍rṣa ma̱hānā̍ṃ de̱vānā̍ṃ vī̱timandha̍sā | a̱bhi vāja̍mu̱ta śrava̍:

त्वामच्छा॑ चरामसि॒ तदिदर्थं॑ दि॒वेदि॑वे । इन्दो॒ त्वे न॑ आ॒शस॑: ॥9.1.5॥

tvāmacchā̍ carāmasi̱ tadidartha̍ṃ di̱vedi̍ve | indo̱ tve na̍ ā̱śasa̍:

पु॒नाति॑ ते परि॒स्रुतं॒ सोमं॒ सूर्य॑स्य दुहि॒ता । वारे॑ण॒ शश्व॑ता॒ तना॑ ॥9.1.6॥

pu̱nāti̍ te pari̱sruta̱ṃ soma̱ṃ sūrya̍sya duhi̱tā | vāre̍ṇa̱ śaśva̍tā̱ tanā̍

तमी॒मण्वी॑: सम॒र्य आ गृ॒भ्णन्ति॒ योष॑णो॒ दश॑ । स्वसा॑र॒: पार्ये॑ दि॒वि ॥9.1.7॥

tamī̱maṇvī̍: sama̱rya ā gṛ̱bhṇanti̱ yoṣa̍ṇo̱ daśa̍ | svasā̍ra̱: pārye̍ di̱vi

तमीं॑ हिन्वन्त्य॒ग्रुवो॒ धम॑न्ति बाकु॒रं दृति॑म् । त्रि॒धातु॑ वार॒णं मधु॑ ॥9.1.8॥

tamī̍ṃ hinvantya̱gruvo̱ dhama̍nti bāku̱raṃ dṛti̍m | tri̱dhātu̍ vāra̱ṇaṃ madhu̍

अ॒भी॒३ममघ्न्या॑ उ॒त श्री॒णन्ति॑ धे॒नव॒: शिशु॑म् । सोम॒मिन्द्रा॑य॒ पात॑वे ॥9.1.9॥

a̱bhī̱3mamaghnyā̍ u̱ta śrī̱ṇanti̍ dhe̱nava̱: śiśu̍m | soma̱mindrā̍ya̱ pāta̍ve

अ॒स्येदिन्द्रो॒ मदे॒ष्वा विश्वा॑ वृ॒त्राणि॑ जिघ्नते । शूरो॑ म॒घा च॑ मंहते ॥9.1.10॥

a̱syedindro̱ made̱ṣvā viśvā̍ vṛ̱trāṇi̍ jighnate | śūro̍ ma̱ghā ca̍ maṃhate

१० मेधातिथि: काण्व: । पवमान: सोम: । गायत्री ।

पव॑स्व देव॒वीरति॑ प॒वित्रं॑ सोम॒ रंह्या॑ । इन्द्र॑मिन्दो॒ वृषा वि॑श ॥9.2.1॥

pava̍sva deva̱vīrati̍ pa̱vitra̍ṃ soma̱ raṃhyā̍ | indra̍mindo̱ vṛṣā vi̍śa

आ व॑च्यस्व॒ महि॒ प्सरो॒ वृषे॑न्दो द्यु॒म्नव॑त्तमः । आ योनिं॑ धर्ण॒सिः स॑दः ॥9.2.2॥

ā va̍cyasva̱ mahi̱ psaro̱ vṛṣe̍ndo dyu̱mnava̍ttamaḥ | ā yoni̍ṃ dharṇa̱siḥ sa̍daḥ

अधु॑क्षत प्रि॒यं मधु॒ धारा॑ सु॒तस्य॑ वे॒धस॑: । अ॒पो व॑सिष्ट सु॒क्रतु॑: ॥9.2.3॥

adhu̍kṣata pri̱yaṃ madhu̱ dhārā̍ su̱tasya̍ ve̱dhasa̍: | a̱po va̍siṣṭa su̱kratu̍:

म॒हान्तं॑ त्वा म॒हीरन्वापो॑ अर्षन्ति॒ सिन्ध॑वः । यद्गोभि॑र्वासयि॒ष्यसे॑ ॥9.2.4॥

ma̱hānta̍ṃ tvā ma̱hīranvāpo̍ arṣanti̱ sindha̍vaḥ | yadgobhi̍rvāsayi̱ṣyase̍

स॒मु॒द्रो अ॒प्सु मा॑मृजे विष्ट॒म्भो ध॒रुणो॑ दि॒वः । सोम॑: प॒वित्रे॑ अस्म॒युः ॥9.2.5॥

sa̱mu̱dro a̱psu mā̍mṛje viṣṭa̱mbho dha̱ruṇo̍ di̱vaḥ | soma̍: pa̱vitre̍ asma̱yuḥ

अचि॑क्रद॒द्वृषा॒ हरि॑र्म॒हान्मि॒त्रो न द॑र्श॒तः । सं सूर्ये॑ण रोचते ॥9.2.6॥

aci̍krada̱dvṛṣā̱ hari̍rma̱hānmi̱tro na da̍rśa̱taḥ | saṃ sūrye̍ṇa rocate

गिर॑स्त इन्द॒ ओज॑सा मर्मृ॒ज्यन्ते॑ अप॒स्युव॑: । याभि॒र्मदा॑य॒ शुम्भ॑से ॥9.2.7॥

gira̍sta inda̱ oja̍sā marmṛ̱jyante̍ apa̱syuva̍: | yābhi̱rmadā̍ya̱ śumbha̍se

तं त्वा॒ मदा॑य॒ घृष्व॑य उ लोककृ॒त्नुमी॑महे । तव॒ प्रश॑स्तयो म॒हीः ॥9.2.8॥

taṃ tvā̱ madā̍ya̱ ghṛṣva̍ya u lokakṛ̱tnumī̍mahe | tava̱ praśa̍stayo ma̱hīḥ

अ॒स्मभ्य॑मिन्दविन्द्र॒युर्मध्व॑: पवस्व॒ धार॑या । प॒र्जन्यो॑ वृष्टि॒माँ इ॑व ॥9.2.9॥

a̱smabhya̍mindavindra̱yurmadhva̍: pavasva̱ dhāra̍yā | pa̱rjanyo̍ vṛṣṭi̱mām̐ i̍va

गो॒षा इ॑न्दो नृ॒षा अ॑स्यश्व॒सा वा॑ज॒सा उ॒त । आ॒त्मा य॒ज्ञस्य॑ पू॒र्व्यः ॥9.2.10॥

go̱ṣā i̍ndo nṛ̱ṣā a̍syaśva̱sā vā̍ja̱sā u̱ta | ā̱tmā ya̱jñasya̍ pū̱rvyaḥ

१० आजीगर्ति: शुन: शेप :, कृत्रिमो वैश्वामित्रो देवरात: । पवमान: सोम: । गायत्री ।

ए॒ष दे॒वो अम॑र्त्यः पर्ण॒वीरि॑व दीयति । अ॒भि द्रोणा॑न्या॒सद॑म् ॥9.3.1॥

e̱ṣa de̱vo ama̍rtyaḥ parṇa̱vīri̍va dīyati | a̱bhi droṇā̍nyā̱sada̍m

ए॒ष दे॒वो वि॒पा कृ॒तोऽति॒ ह्वरां॑सि धावति । पव॑मानो॒ अदा॑भ्यः ॥9.3.2॥

e̱ṣa de̱vo vi̱pā kṛ̱to'ti̱ hvarā̍ṃsi dhāvati | pava̍māno̱ adā̍bhyaḥ

ए॒ष दे॒वो वि॑प॒न्युभि॒: पव॑मान ऋता॒युभि॑: । हरि॒र्वाजा॑य मृज्यते ॥9.3.3॥

e̱ṣa de̱vo vi̍pa̱nyubhi̱: pava̍māna ṛtā̱yubhi̍: | hari̱rvājā̍ya mṛjyate

ए॒ष विश्वा॑नि॒ वार्या॒ शूरो॒ यन्नि॑व॒ सत्व॑भिः । पव॑मानः सिषासति ॥9.3.4॥

e̱ṣa viśvā̍ni̱ vāryā̱ śūro̱ yanni̍va̱ satva̍bhiḥ | pava̍mānaḥ siṣāsati

ए॒ष दे॒वो र॑थर्यति॒ पव॑मानो दशस्यति । आ॒विष्कृ॑णोति वग्व॒नुम् ॥9.3.5॥

e̱ṣa de̱vo ra̍tharyati̱ pava̍māno daśasyati | ā̱viṣkṛ̍ṇoti vagva̱num

ए॒ष विप्रै॑र॒भिष्टु॑तो॒ऽपो दे॒वो वि गा॑हते । दध॒द्रत्ना॑नि दा॒शुषे॑ ॥9.3.6॥

e̱ṣa viprai̍ra̱bhiṣṭu̍to̱'po de̱vo vi gā̍hate | dadha̱dratnā̍ni dā̱śuṣe̍

ए॒ष दिवं॒ वि धा॑वति ति॒रो रजां॑सि॒ धार॑या । पव॑मान॒: कनि॑क्रदत् ॥9.3.7॥

e̱ṣa diva̱ṃ vi dhā̍vati ti̱ro rajā̍ṃsi̱ dhāra̍yā | pava̍māna̱: kani̍kradat

ए॒ष दिवं॒ व्यास॑रत्ति॒रो रजां॒स्यस्पृ॑तः । पव॑मानः स्वध्व॒रः ॥9.3.8॥

e̱ṣa diva̱ṃ vyāsa̍ratti̱ro rajā̱ṃsyaspṛ̍taḥ | pava̍mānaḥ svadhva̱raḥ

ए॒ष प्र॒त्नेन॒ जन्म॑ना दे॒वो दे॒वेभ्य॑: सु॒तः । हरि॑: प॒वित्रे॑ अर्षति ॥9.3.9॥

e̱ṣa pra̱tnena̱ janma̍nā de̱vo de̱vebhya̍: su̱taḥ | hari̍: pa̱vitre̍ arṣati

ए॒ष उ॒ स्य पु॑रुव्र॒तो ज॑ज्ञा॒नो ज॒नय॒न्निष॑: । धार॑या पवते सु॒तः ॥9.3.10॥

e̱ṣa u̱ sya pu̍ruvra̱to ja̍jñā̱no ja̱naya̱nniṣa̍: | dhāra̍yā pavate su̱taḥ

१० हिरण्यस्तूप आङ्गिरस: । पवमान: सोम: । गायत्री ।

सना॑ च सोम॒ जेषि॑ च॒ पव॑मान॒ महि॒ श्रव॑: । अथा॑ नो॒ वस्य॑सस्कृधि ॥9.4.1॥

sanā̍ ca soma̱ jeṣi̍ ca̱ pava̍māna̱ mahi̱ śrava̍: | athā̍ no̱ vasya̍saskṛdhi

सना॒ ज्योति॒: सना॒ स्व१र्विश्वा॑ च सोम॒ सौभ॑गा । अथा॑ नो॒ वस्य॑सस्कृधि ॥9.4.2॥

sanā̱ jyoti̱: sanā̱ sva1rviśvā̍ ca soma̱ saubha̍gā | athā̍ no̱ vasya̍saskṛdhi

सना॒ दक्ष॑मु॒त क्रतु॒मप॑ सोम॒ मृधो॑ जहि । अथा॑ नो॒ वस्य॑सस्कृधि ॥9.4.3॥

sanā̱ dakṣa̍mu̱ta kratu̱mapa̍ soma̱ mṛdho̍ jahi | athā̍ no̱ vasya̍saskṛdhi

पवी॑तारः पुनी॒तन॒ सोम॒मिन्द्रा॑य॒ पात॑वे । अथा॑ नो॒ वस्य॑सस्कृधि ॥9.4.4॥

pavī̍tāraḥ punī̱tana̱ soma̱mindrā̍ya̱ pāta̍ve | athā̍ no̱ vasya̍saskṛdhi

त्वं सूर्ये॑ न॒ आ भ॑ज॒ तव॒ क्रत्वा॒ तवो॒तिभि॑: । अथा॑ नो॒ वस्य॑सस्कृधि ॥9.4.5॥

tvaṃ sūrye̍ na̱ ā bha̍ja̱ tava̱ kratvā̱ tavo̱tibhi̍: | athā̍ no̱ vasya̍saskṛdhi

तव॒ क्रत्वा॒ तवो॒तिभि॒र्ज्योक्प॑श्येम॒ सूर्य॑म् । अथा॑ नो॒ वस्य॑सस्कृधि ॥9.4.6॥

tava̱ kratvā̱ tavo̱tibhi̱rjyokpa̍śyema̱ sūrya̍m | athā̍ no̱ vasya̍saskṛdhi

अ॒भ्य॑र्ष स्वायुध॒ सोम॑ द्वि॒बर्ह॑सं र॒यिम् । अथा॑ नो॒ वस्य॑सस्कृधि ॥9.4.7॥

a̱bhya̍rṣa svāyudha̱ soma̍ dvi̱barha̍saṃ ra̱yim | athā̍ no̱ vasya̍saskṛdhi

अ॒भ्य१र्षान॑पच्युतो र॒यिं स॒मत्सु॑ सास॒हिः । अथा॑ नो॒ वस्य॑सस्कृधि ॥9.4.8॥

a̱bhya1rṣāna̍pacyuto ra̱yiṃ sa̱matsu̍ sāsa̱hiḥ | athā̍ no̱ vasya̍saskṛdhi

त्वां य॒ज्ञैर॑वीवृध॒न्पव॑मान॒ विध॑र्मणि । अथा॑ नो॒ वस्य॑सस्कृधि ॥9.4.9॥

tvāṃ ya̱jñaira̍vīvṛdha̱npava̍māna̱ vidha̍rmaṇi | athā̍ no̱ vasya̍saskṛdhi

र॒यिं न॑श्चि॒त्रम॒श्विन॒मिन्दो॑ वि॒श्वायु॒मा भ॑र । अथा॑ नो॒ वस्य॑सस्कृधि ॥9.4.10॥

ra̱yiṃ na̍ści̱trama̱śvina̱mindo̍ vi̱śvāyu̱mā bha̍ra | athā̍ no̱ vasya̍saskṛdhi

११ काश्यपोऽसितो देवलो वा । पवमान: सोम: । गायत्री ।

समि॑द्धो वि॒श्वत॒स्पति॒: पव॑मानो॒ वि रा॑जति । प्री॒णन्वृषा॒ कनि॑क्रदत् ॥9.5.1॥

sami̍ddho vi̱śvata̱spati̱: pava̍māno̱ vi rā̍jati | prī̱ṇanvṛṣā̱ kani̍kradat

तनू॒नपा॒त्पव॑मान॒: शृङ्गे॒ शिशा॑नो अर्षति । अ॒न्तरि॑क्षेण॒ रार॑जत् ॥9.5.2॥

tanū̱napā̱tpava̍māna̱: śṛṅge̱ śiśā̍no arṣati | a̱ntari̍kṣeṇa̱ rāra̍jat

ई॒ळेन्य॒: पव॑मानो र॒यिर्वि रा॑जति द्यु॒मान् । मधो॒र्धारा॑भि॒रोज॑सा ॥9.5.3॥

ī̱l̤enya̱: pava̍māno ra̱yirvi rā̍jati dyu̱mān | madho̱rdhārā̍bhi̱roja̍sā

ब॒र्हिः प्रा॒चीन॒मोज॑सा॒ पव॑मानः स्तृ॒णन्हरि॑: । दे॒वेषु॑ दे॒व ई॑यते ॥9.5.4॥

ba̱rhiḥ prā̱cīna̱moja̍sā̱ pava̍mānaḥ stṛ̱ṇanhari̍: | de̱veṣu̍ de̱va ī̍yate

उदातै॑र्जिहते बृ॒हद्द्वारो॑ दे॒वीर्हि॑र॒ण्ययी॑: । पव॑मानेन॒ सुष्टु॑ताः ॥9.5.5॥

udātai̍rjihate bṛ̱haddvāro̍ de̱vīrhi̍ra̱ṇyayī̍: | pava̍mānena̱ suṣṭu̍tāḥ

सु॒शि॒ल्पे बृ॑ह॒ती म॒ही पव॑मानो वृषण्यति । नक्तो॒षासा॒ न द॑र्श॒ते ॥9.5.6॥

su̱śi̱lpe bṛ̍ha̱tī ma̱hī pava̍māno vṛṣaṇyati | nakto̱ṣāsā̱ na da̍rśa̱te

उ॒भा दे॒वा नृ॒चक्ष॑सा॒ होता॑रा॒ दैव्या॑ हुवे । पव॑मान॒ इन्द्रो॒ वृषा॑ ॥9.5.7॥

u̱bhā de̱vā nṛ̱cakṣa̍sā̱ hotā̍rā̱ daivyā̍ huve | pava̍māna̱ indro̱ vṛṣā̍

भार॑ती॒ पव॑मानस्य॒ सर॑स्व॒तीळा॑ म॒ही । इ॒मं नो॑ य॒ज्ञमा ग॑मन्ति॒स्रो दे॒वीः सु॒पेश॑सः ॥9.5.8॥

bhāra̍tī̱ pava̍mānasya̱ sara̍sva̱tīl̤ā̍ ma̱hī | i̱maṃ no̍ ya̱jñamā ga̍manti̱sro de̱vīḥ su̱peśa̍saḥ

त्वष्टा॑रमग्र॒जां गो॒पां पु॑रो॒यावा॑न॒मा हु॑वे । इन्दु॒रिन्द्रो॒ वृषा॒ हरि॒: पव॑मानः प्र॒जाप॑तिः ॥9.5.9॥

tvaṣṭā̍ramagra̱jāṃ go̱pāṃ pu̍ro̱yāvā̍na̱mā hu̍ve | indu̱rindro̱ vṛṣā̱ hari̱: pava̍mānaḥ pra̱jāpa̍tiḥ

वन॒स्पतिं॑ पवमान॒ मध्वा॒ सम॑ङ्ग्धि॒ धार॑या । स॒हस्र॑वल्शं॒ हरि॑तं॒ भ्राज॑मानं हिर॒ण्यय॑म् ॥9.5.10॥

vana̱spati̍ṃ pavamāna̱ madhvā̱ sama̍ṅgdhi̱ dhāra̍yā | sa̱hasra̍valśa̱ṃ hari̍ta̱ṃ bhrāja̍mānaṃ hira̱ṇyaya̍m

विश्वे॑ देवा॒: स्वाहा॑कृतिं॒ पव॑मान॒स्या ग॑त । वा॒युर्बृह॒स्पति॒: सूर्यो॒ऽग्निरिन्द्र॑: स॒जोष॑सः ॥9.5.11॥

viśve̍ devā̱: svāhā̍kṛti̱ṃ pava̍māna̱syā ga̍ta | vā̱yurbṛha̱spati̱: sūryo̱'gnirindra̍: sa̱joṣa̍saḥ

९ काश्यपोऽसितो देवलो वा । पवमान: सोम: । गायत्री ।

म॒न्द्रया॑ सोम॒ धार॑या॒ वृषा॑ पवस्व देव॒युः । अव्यो॒ वारे॑ष्वस्म॒युः ॥9.6.1॥

ma̱ndrayā̍ soma̱ dhāra̍yā̱ vṛṣā̍ pavasva deva̱yuḥ | avyo̱ vāre̍ṣvasma̱yuḥ

अ॒भि त्यं मद्यं॒ मद॒मिन्द॒विन्द्र॒ इति॑ क्षर । अ॒भि वा॒जिनो॒ अर्व॑तः ॥9.6.2॥

a̱bhi tyaṃ madya̱ṃ mada̱minda̱vindra̱ iti̍ kṣara | a̱bhi vā̱jino̱ arva̍taḥ

अ॒भि त्यं पू॒र्व्यं मदं॑ सुवा॒नो अ॑र्ष प॒वित्र॒ आ । अ॒भि वाज॑मु॒त श्रव॑: ॥9.6.3॥

a̱bhi tyaṃ pū̱rvyaṃ mada̍ṃ suvā̱no a̍rṣa pa̱vitra̱ ā | a̱bhi vāja̍mu̱ta śrava̍:

अनु॑ द्र॒प्सास॒ इन्द॑व॒ आपो॒ न प्र॒वता॑सरन् । पु॒ना॒ना इन्द्र॑माशत ॥9.6.4॥

anu̍ dra̱psāsa̱ inda̍va̱ āpo̱ na pra̱vatā̍saran | pu̱nā̱nā indra̍māśata

यमत्य॑मिव वा॒जिनं॑ मृ॒जन्ति॒ योष॑णो॒ दश॑ । वने॒ क्रीळ॑न्त॒मत्य॑विम् ॥9.6.5॥

yamatya̍miva vā̱jina̍ṃ mṛ̱janti̱ yoṣa̍ṇo̱ daśa̍ | vane̱ krīl̤a̍nta̱matya̍vim

तं गोभि॒र्वृष॑णं॒ रसं॒ मदा॑य दे॒ववी॑तये । सु॒तं भरा॑य॒ सं सृ॑ज ॥9.6.6॥

taṃ gobhi̱rvṛṣa̍ṇa̱ṃ rasa̱ṃ madā̍ya de̱vavī̍taye | su̱taṃ bharā̍ya̱ saṃ sṛ̍ja

दे॒वो दे॒वाय॒ धार॒येन्द्रा॑य पवते सु॒तः । पयो॒ यद॑स्य पी॒पय॑त् ॥9.6.7॥

de̱vo de̱vāya̱ dhāra̱yendrā̍ya pavate su̱taḥ | payo̱ yada̍sya pī̱paya̍t

आ॒त्मा य॒ज्ञस्य॒ रंह्या॑ सुष्वा॒णः प॑वते सु॒तः । प्र॒त्नं नि पा॑ति॒ काव्य॑म् ॥9.6.8॥

ā̱tmā ya̱jñasya̱ raṃhyā̍ suṣvā̱ṇaḥ pa̍vate su̱taḥ | pra̱tnaṃ ni pā̍ti̱ kāvya̍m

ए॒वा पु॑ना॒न इ॑न्द्र॒युर्मदं॑ मदिष्ठ वी॒तये॑ । गुहा॑ चिद्दधिषे॒ गिर॑: ॥9.6.9॥

e̱vā pu̍nā̱na i̍ndra̱yurmada̍ṃ madiṣṭha vī̱taye̍ | guhā̍ ciddadhiṣe̱ gira̍:

९ काश्यपोऽसितो देवलो वा । पवमान: सोम: । गायत्री ।

असृ॑ग्र॒मिन्द॑वः प॒था धर्म॑न्नृ॒तस्य॑ सु॒श्रिय॑: । वि॒दा॒ना अ॑स्य॒ योज॑नम् ॥9.7.1॥

asṛ̍gra̱minda̍vaḥ pa̱thā dharma̍nnṛ̱tasya̍ su̱śriya̍: | vi̱dā̱nā a̍sya̱ yoja̍nam

प्र धारा॒ मध्वो॑ अग्रि॒यो म॒हीर॒पो वि गा॑हते । ह॒विर्ह॒विष्षु॒ वन्द्य॑: ॥9.7.2॥

pra dhārā̱ madhvo̍ agri̱yo ma̱hīra̱po vi gā̍hate | ha̱virha̱viṣṣu̱ vandya̍:

प्र यु॒जो वा॒चो अ॑ग्रि॒यो वृषाव॑ चक्रद॒द्वने॑ । सद्मा॒भि स॒त्यो अ॑ध्व॒रः ॥9.7.3॥

pra yu̱jo vā̱co a̍gri̱yo vṛṣāva̍ cakrada̱dvane̍ | sadmā̱bhi sa̱tyo a̍dhva̱raḥ

परि॒ यत्काव्या॑ क॒विर्नृ॒म्णा वसा॑नो॒ अर्ष॑ति । स्व॑र्वा॒जी सि॑षासति ॥9.7.4॥

pari̱ yatkāvyā̍ ka̱virnṛ̱mṇā vasā̍no̱ arṣa̍ti | sva̍rvā̱jī si̍ṣāsati

पव॑मानो अ॒भि स्पृधो॒ विशो॒ राजे॑व सीदति । यदी॑मृ॒ण्वन्ति॑ वे॒धस॑: ॥9.7.5॥

pava̍māno a̱bhi spṛdho̱ viśo̱ rāje̍va sīdati | yadī̍mṛ̱ṇvanti̍ ve̱dhasa̍:

अव्यो॒ वारे॒ परि॑ प्रि॒यो हरि॒र्वने॑षु सीदति । रे॒भो व॑नुष्यते म॒ती ॥9.7.6॥

avyo̱ vāre̱ pari̍ pri̱yo hari̱rvane̍ṣu sīdati | re̱bho va̍nuṣyate ma̱tī

स वा॒युमिन्द्र॑म॒श्विना॑ सा॒कं मदे॑न गच्छति । रणा॒ यो अ॑स्य॒ धर्म॑भिः ॥9.7.7॥

sa vā̱yumindra̍ma̱śvinā̍ sā̱kaṃ made̍na gacchati | raṇā̱ yo a̍sya̱ dharma̍bhiḥ

आ मि॒त्रावरु॑णा॒ भगं॒ मध्व॑: पवन्त ऊ॒र्मय॑: । वि॒दा॒ना अ॑स्य॒ शक्म॑भिः ॥9.7.8॥

ā mi̱trāvaru̍ṇā̱ bhaga̱ṃ madhva̍: pavanta ū̱rmaya̍: | vi̱dā̱nā a̍sya̱ śakma̍bhiḥ

अ॒स्मभ्यं॑ रोदसी र॒यिं मध्वो॒ वाज॑स्य सा॒तये॑ । श्रवो॒ वसू॑नि॒ सं जि॑तम् ॥9.7.9॥

a̱smabhya̍ṃ rodasī ra̱yiṃ madhvo̱ vāja̍sya sā̱taye̍ | śravo̱ vasū̍ni̱ saṃ ji̍tam

९ काश्यपोऽसितो देवलो वा । पवमान: सोम: । गायत्री ।

ए॒ते सोमा॑ अ॒भि प्रि॒यमिन्द्र॑स्य॒ काम॑मक्षरन् । वर्ध॑न्तो अस्य वी॒र्य॑म् ॥9.8.1॥

e̱te somā̍ a̱bhi pri̱yamindra̍sya̱ kāma̍makṣaran | vardha̍nto asya vī̱rya̍m

पु॒ना॒नास॑श्चमू॒षदो॒ गच्छ॑न्तो वा॒युम॒श्विना॑ । ते नो॑ धान्तु सु॒वीर्य॑म् ॥9.8.2॥

pu̱nā̱nāsa̍ścamū̱ṣado̱ gaccha̍nto vā̱yuma̱śvinā̍ | te no̍ dhāntu su̱vīrya̍m

इन्द्र॑स्य सोम॒ राध॑से पुना॒नो हार्दि॑ चोदय । ऋ॒तस्य॒ योनि॑मा॒सद॑म् ॥9.8.3॥

indra̍sya soma̱ rādha̍se punā̱no hārdi̍ codaya | ṛ̱tasya̱ yoni̍mā̱sada̍m

मृ॒जन्ति॑ त्वा॒ दश॒ क्षिपो॑ हि॒न्वन्ति॑ स॒प्त धी॒तय॑: । अनु॒ विप्रा॑ अमादिषुः ॥9.8.4॥

mṛ̱janti̍ tvā̱ daśa̱ kṣipo̍ hi̱nvanti̍ sa̱pta dhī̱taya̍: | anu̱ viprā̍ amādiṣuḥ

दे॒वेभ्य॑स्त्वा॒ मदा॑य॒ कं सृ॑जा॒नमति॑ मे॒ष्य॑: । सं गोभि॑र्वासयामसि ॥9.8.5॥

de̱vebhya̍stvā̱ madā̍ya̱ kaṃ sṛ̍jā̱namati̍ me̱ṣya̍: | saṃ gobhi̍rvāsayāmasi

पु॒ना॒नः क॒लशे॒ष्वा वस्त्रा॑ण्यरु॒षो हरि॑: । परि॒ गव्या॑न्यव्यत ॥9.8.6॥

pu̱nā̱naḥ ka̱laśe̱ṣvā vastrā̍ṇyaru̱ṣo hari̍: | pari̱ gavyā̍nyavyata

म॒घोन॒ आ प॑वस्व नो ज॒हि विश्वा॒ अप॒ द्विष॑: । इन्दो॒ सखा॑य॒मा वि॑श ॥9.8.7॥

ma̱ghona̱ ā pa̍vasva no ja̱hi viśvā̱ apa̱ dviṣa̍: | indo̱ sakhā̍ya̱mā vi̍śa

वृ॒ष्टिं दि॒वः परि॑ स्रव द्यु॒म्नं पृ॑थि॒व्या अधि॑ । सहो॑ नः सोम पृ॒त्सु धा॑: ॥9.8.8॥

vṛ̱ṣṭiṃ di̱vaḥ pari̍ srava dyu̱mnaṃ pṛ̍thi̱vyā adhi̍ | saho̍ naḥ soma pṛ̱tsu dhā̍:

नृ॒चक्ष॑सं त्वा व॒यमिन्द्र॑पीतं स्व॒र्विद॑म् । भ॒क्षी॒महि॑ प्र॒जामिष॑म् ॥9.8.9॥

nṛ̱cakṣa̍saṃ tvā va̱yamindra̍pītaṃ sva̱rvida̍m | bha̱kṣī̱mahi̍ pra̱jāmiṣa̍m

९ काश्यपोऽसितो देवलो वा । पवमान: सोम: । गायत्री ।

परि॑ प्रि॒या दि॒वः क॒विर्वयां॑सि न॒प्त्यो॑र्हि॒तः । सु॒वा॒नो या॑ति क॒विक्र॑तुः ॥9.9.1॥

pari̍ pri̱yā di̱vaḥ ka̱virvayā̍ṃsi na̱ptyo̍rhi̱taḥ | su̱vā̱no yā̍ti ka̱vikra̍tuḥ

प्रप्र॒ क्षया॑य॒ पन्य॑से॒ जना॑य॒ जुष्टो॑ अ॒द्रुहे॑ । वी॒त्य॑र्ष॒ चनि॑ष्ठया ॥9.9.2॥

prapra̱ kṣayā̍ya̱ panya̍se̱ janā̍ya̱ juṣṭo̍ a̱druhe̍ | vī̱tya̍rṣa̱ cani̍ṣṭhayā

स सू॒नुर्मा॒तरा॒ शुचि॑र्जा॒तो जा॒ते अ॑रोचयत् । म॒हान्म॒ही ऋ॑ता॒वृधा॑ ॥9.9.3॥

sa sū̱nurmā̱tarā̱ śuci̍rjā̱to jā̱te a̍rocayat | ma̱hānma̱hī ṛ̍tā̱vṛdhā̍

स स॒प्त धी॒तिभि॑र्हि॒तो न॒द्यो॑ अजिन्वद॒द्रुह॑: । या एक॒मक्षि॑ वावृ॒धुः ॥9.9.4॥

sa sa̱pta dhī̱tibhi̍rhi̱to na̱dyo̍ ajinvada̱druha̍: | yā eka̱makṣi̍ vāvṛ̱dhuḥ

ता अ॒भि सन्त॒मस्तृ॑तं म॒हे युवा॑न॒मा द॑धुः । इन्दु॑मिन्द्र॒ तव॑ व्र॒ते ॥9.9.5॥

tā a̱bhi santa̱mastṛ̍taṃ ma̱he yuvā̍na̱mā da̍dhuḥ | indu̍mindra̱ tava̍ vra̱te

अ॒भि वह्नि॒रम॑र्त्यः स॒प्त प॑श्यति॒ वाव॑हिः । क्रिवि॑र्दे॒वीर॑तर्पयत् ॥9.9.6॥

a̱bhi vahni̱rama̍rtyaḥ sa̱pta pa̍śyati̱ vāva̍hiḥ | krivi̍rde̱vīra̍tarpayat

अवा॒ कल्पे॑षु नः पुम॒स्तमां॑सि सोम॒ योध्या॑ । तानि॑ पुनान जङ्घनः ॥9.9.7॥

avā̱ kalpe̍ṣu naḥ puma̱stamā̍ṃsi soma̱ yodhyā̍ | tāni̍ punāna jaṅghanaḥ

नू नव्य॑से॒ नवी॑यसे सू॒क्ताय॑ साधया प॒थः । प्र॒त्न॒वद्रो॑चया॒ रुच॑: ॥9.9.8॥

nū navya̍se̱ navī̍yase sū̱ktāya̍ sādhayā pa̱thaḥ | pra̱tna̱vadro̍cayā̱ ruca̍:

पव॑मान॒ महि॒ श्रवो॒ गामश्वं॑ रासि वी॒रव॑त् । सना॑ मे॒धां सना॒ स्व॑: ॥9.9.9॥

pava̍māna̱ mahi̱ śravo̱ gāmaśva̍ṃ rāsi vī̱rava̍t | sanā̍ me̱dhāṃ sanā̱ sva̍:

९ काश्यपोऽसितो देवलो वा । पवमान: सोम: । गायत्री ।

प्र स्वा॒नासो॒ रथा॑ इ॒वाऽर्व॑न्तो॒ न श्र॑व॒स्यव॑: । सोमा॑सो रा॒ये अ॑क्रमुः ॥9.10.1॥

pra svā̱nāso̱ rathā̍ i̱vā'rva̍nto̱ na śra̍va̱syava̍: | somā̍so rā̱ye a̍kramuḥ

हि॒न्वा॒नासो॒ रथा॑ इव दधन्वि॒रे गभ॑स्त्योः । भरा॑सः का॒रिणा॑मिव ॥9.10.2॥

hi̱nvā̱nāso̱ rathā̍ iva dadhanvi̱re gabha̍styoḥ | bharā̍saḥ kā̱riṇā̍miva

राजा॑नो॒ न प्रश॑स्तिभि॒: सोमा॑सो॒ गोभि॑रञ्जते । य॒ज्ञो न स॒प्त धा॒तृभि॑: ॥9.10.3॥

rājā̍no̱ na praśa̍stibhi̱: somā̍so̱ gobhi̍rañjate | ya̱jño na sa̱pta dhā̱tṛbhi̍:

परि॑ सुवा॒नास॒ इन्द॑वो॒ मदा॑य ब॒र्हणा॑ गि॒रा । सु॒ता अ॑र्षन्ति॒ धार॑या ॥9.10.4॥

pari̍ suvā̱nāsa̱ inda̍vo̱ madā̍ya ba̱rhaṇā̍ gi̱rā | su̱tā a̍rṣanti̱ dhāra̍yā

आ॒पा॒नासो॑ वि॒वस्व॑तो॒ जन॑न्त उ॒षसो॒ भग॑म् । सूरा॒ अण्वं॒ वि त॑न्वते ॥9.10.5॥

ā̱pā̱nāso̍ vi̱vasva̍to̱ jana̍nta u̱ṣaso̱ bhaga̍m | sūrā̱ aṇva̱ṃ vi ta̍nvate

अप॒ द्वारा॑ मती॒नां प्र॒त्ना ऋ॑ण्वन्ति का॒रव॑: । वृष्णो॒ हर॑स आ॒यव॑: ॥9.10.6॥

apa̱ dvārā̍ matī̱nāṃ pra̱tnā ṛ̍ṇvanti kā̱rava̍: | vṛṣṇo̱ hara̍sa ā̱yava̍:

स॒मी॒ची॒नास॑ आसते॒ होता॑रः स॒प्तजा॑मयः । प॒दमेक॑स्य॒ पिप्र॑तः ॥9.10.7॥

sa̱mī̱cī̱nāsa̍ āsate̱ hotā̍raḥ sa̱ptajā̍mayaḥ | pa̱dameka̍sya̱ pipra̍taḥ

नाभा॒ नाभिं॑ न॒ आ द॑दे॒ चक्षु॑श्चि॒त्सूर्ये॒ सचा॑ । क॒वेरप॑त्य॒मा दु॑हे ॥9.10.8॥

nābhā̱ nābhi̍ṃ na̱ ā da̍de̱ cakṣu̍ści̱tsūrye̱ sacā̍ | ka̱verapa̍tya̱mā du̍he

अ॒भि प्रि॒या दि॒वस्प॒दम॑ध्व॒र्युभि॒र्गुहा॑ हि॒तम् । सूर॑: पश्यति॒ चक्ष॑सा ॥9.10.9॥

a̱bhi pri̱yā di̱vaspa̱dama̍dhva̱ryubhi̱rguhā̍ hi̱tam | sūra̍: paśyati̱ cakṣa̍sā

९ काश्यपोऽसितो देवलो वा । पवमान: सोम: । गायत्री ।

उपा॑स्मै गायता नर॒: पव॑माना॒येन्द॑वे । अ॒भि दे॒वाँ इय॑क्षते ॥9.11.1॥

upā̍smai gāyatā nara̱: pava̍mānā̱yenda̍ve | a̱bhi de̱vām̐ iya̍kṣate

अ॒भि ते॒ मधु॑ना॒ पयोऽथ॑र्वाणो अशिश्रयुः । दे॒वं दे॒वाय॑ देव॒यु ॥9.11.2॥

a̱bhi te̱ madhu̍nā̱ payo'tha̍rvāṇo aśiśrayuḥ | de̱vaṃ de̱vāya̍ deva̱yu

स न॑: पवस्व॒ शं गवे॒ शं जना॑य॒ शमर्व॑ते । शं रा॑ज॒न्नोष॑धीभ्यः ॥9.11.3॥

sa na̍: pavasva̱ śaṃ gave̱ śaṃ janā̍ya̱ śamarva̍te | śaṃ rā̍ja̱nnoṣa̍dhībhyaḥ

ब॒भ्रवे॒ नु स्वत॑वसेऽरु॒णाय॑ दिवि॒स्पृशे॑ । सोमा॑य गा॒थम॑र्चत ॥9.11.4॥

ba̱bhrave̱ nu svata̍vase'ru̱ṇāya̍ divi̱spṛśe̍ | somā̍ya gā̱thama̍rcata

हस्त॑च्युतेभि॒रद्रि॑भिः सु॒तं सोमं॑ पुनीतन । मधा॒वा धा॑वता॒ मधु॑ ॥9.11.5॥

hasta̍cyutebhi̱radri̍bhiḥ su̱taṃ soma̍ṃ punītana | madhā̱vā dhā̍vatā̱ madhu̍

नम॒सेदुप॑ सीदत द॒ध्नेद॒भि श्री॑णीतन । इन्दु॒मिन्द्रे॑ दधातन ॥9.11.6॥

nama̱sedupa̍ sīdata da̱dhneda̱bhi śrī̍ṇītana | indu̱mindre̍ dadhātana

अ॒मि॒त्र॒हा विच॑र्षणि॒: पव॑स्व सोम॒ शं गवे॑ । दे॒वेभ्यो॑ अनुकाम॒कृत् ॥9.11.7॥

a̱mi̱tra̱hā vica̍rṣaṇi̱: pava̍sva soma̱ śaṃ gave̍ | de̱vebhyo̍ anukāma̱kṛt

इन्द्रा॑य सोम॒ पात॑वे॒ मदा॑य॒ परि॑ षिच्यसे । म॒न॒श्चिन्मन॑स॒स्पति॑: ॥9.11.8॥

indrā̍ya soma̱ pāta̍ve̱ madā̍ya̱ pari̍ ṣicyase | ma̱na̱ścinmana̍sa̱spati̍:

पव॑मान सु॒वीर्यं॑ र॒यिं सो॑म रिरीहि नः । इन्द॒विन्द्रे॑ण नो यु॒जा ॥9.11.9॥

pava̍māna su̱vīrya̍ṃ ra̱yiṃ so̍ma rirīhi naḥ | inda̱vindre̍ṇa no yu̱jā

९ काश्यपोऽसितो देवलो वा । पवमान: सोम: । गायत्री ।

सोमा॑ असृग्र॒मिन्द॑वः सु॒ता ऋ॒तस्य॒ साद॑ने । इन्द्रा॑य॒ मधु॑मत्तमाः ॥9.12.1॥

somā̍ asṛgra̱minda̍vaḥ su̱tā ṛ̱tasya̱ sāda̍ne | indrā̍ya̱ madhu̍mattamāḥ

अ॒भि विप्रा॑ अनूषत॒ गावो॑ व॒त्सं न मा॒तर॑: । इन्द्रं॒ सोम॑स्य पी॒तये॑ ॥9.12.2॥

a̱bhi viprā̍ anūṣata̱ gāvo̍ va̱tsaṃ na mā̱tara̍: | indra̱ṃ soma̍sya pī̱taye̍

म॒द॒च्युत्क्षे॑ति॒ साद॑ने॒ सिन्धो॑रू॒र्मा वि॑प॒श्चित् । सोमो॑ गौ॒री अधि॑ श्रि॒तः ॥9.12.3॥

ma̱da̱cyutkṣe̍ti̱ sāda̍ne̱ sindho̍rū̱rmā vi̍pa̱ścit | somo̍ gau̱rī adhi̍ śri̱taḥ

दि॒वो नाभा॑ विचक्ष॒णोऽव्यो॒ वारे॑ महीयते । सोमो॒ यः सु॒क्रतु॑: क॒विः ॥9.12.4॥

di̱vo nābhā̍ vicakṣa̱ṇo'vyo̱ vāre̍ mahīyate | somo̱ yaḥ su̱kratu̍: ka̱viḥ

यः सोम॑: क॒लशे॒ष्वाँ अ॒न्तः प॒वित्र॒ आहि॑तः । तमिन्दु॒: परि॑ षस्वजे ॥9.12.5॥

yaḥ soma̍: ka̱laśe̱ṣvām̐ a̱ntaḥ pa̱vitra̱ āhi̍taḥ | tamindu̱: pari̍ ṣasvaje

प्र वाच॒मिन्दु॑रिष्यति समु॒द्रस्याधि॑ वि॒ष्टपि॑ । जिन्व॒न्कोशं॑ मधु॒श्चुत॑म् ॥9.12.6॥

pra vāca̱mindu̍riṣyati samu̱drasyādhi̍ vi̱ṣṭapi̍ | jinva̱nkośa̍ṃ madhu̱ścuta̍m

नित्य॑स्तोत्रो॒ वन॒स्पति॑र्धी॒नाम॒न्तः स॑ब॒र्दुघ॑: । हि॒न्वा॒नो मानु॑षा यु॒गा ॥9.12.7॥

nitya̍stotro̱ vana̱spati̍rdhī̱nāma̱ntaḥ sa̍ba̱rdugha̍: | hi̱nvā̱no mānu̍ṣā yu̱gā

अ॒भि प्रि॒या दि॒वस्प॒दा सोमो॑ हिन्वा॒नो अ॑र्षति । विप्र॑स्य॒ धार॑या क॒विः ॥9.12.8॥

a̱bhi pri̱yā di̱vaspa̱dā somo̍ hinvā̱no a̍rṣati | vipra̍sya̱ dhāra̍yā ka̱viḥ

आ प॑वमान धारय र॒यिं स॒हस्र॑वर्चसम् । अ॒स्मे इ॑न्दो स्वा॒भुव॑म् ॥9.12.9॥

ā pa̍vamāna dhāraya ra̱yiṃ sa̱hasra̍varcasam | a̱sme i̍ndo svā̱bhuva̍m

९ काश्यपोऽसितो देवलो वा । पवमान: सोम: । गायत्री ।

सोम॑: पुना॒नो अ॑र्षति स॒हस्र॑धारो॒ अत्य॑विः । वा॒योरिन्द्र॑स्य निष्कृ॒तम् ॥9.13.1॥

soma̍: punā̱no a̍rṣati sa̱hasra̍dhāro̱ atya̍viḥ | vā̱yorindra̍sya niṣkṛ̱tam

पव॑मानमवस्यवो॒ विप्र॑म॒भि प्र गा॑यत । सु॒ष्वा॒णं दे॒ववी॑तये ॥9.13.2॥

pava̍mānamavasyavo̱ vipra̍ma̱bhi pra gā̍yata | su̱ṣvā̱ṇaṃ de̱vavī̍taye

पव॑न्ते॒ वाज॑सातये॒ सोमा॑: स॒हस्र॑पाजसः । गृ॒णा॒ना दे॒ववी॑तये ॥9.13.3॥

pava̍nte̱ vāja̍sātaye̱ somā̍: sa̱hasra̍pājasaḥ | gṛ̱ṇā̱nā de̱vavī̍taye

उ॒त नो॒ वाज॑सातये॒ पव॑स्व बृह॒तीरिष॑: । द्यु॒मदि॑न्दो सु॒वीर्य॑म् ॥9.13.4॥

u̱ta no̱ vāja̍sātaye̱ pava̍sva bṛha̱tīriṣa̍: | dyu̱madi̍ndo su̱vīrya̍m

ते न॑: सह॒स्रिणं॑ र॒यिं पव॑न्ता॒मा सु॒वीर्य॑म् । सु॒वा॒ना दे॒वास॒ इन्द॑वः ॥9.13.5॥

te na̍: saha̱sriṇa̍ṃ ra̱yiṃ pava̍ntā̱mā su̱vīrya̍m | su̱vā̱nā de̱vāsa̱ inda̍vaḥ

अत्या॑ हिया॒ना न हे॒तृभि॒रसृ॑ग्रं॒ वाज॑सातये । वि वार॒मव्य॑मा॒शव॑: ॥9.13.6॥

atyā̍ hiyā̱nā na he̱tṛbhi̱rasṛ̍gra̱ṃ vāja̍sātaye | vi vāra̱mavya̍mā̱śava̍:

वा॒श्रा अ॑र्ष॒न्तीन्द॑वो॒ऽभि व॒त्सं न धे॒नव॑: । द॒ध॒न्वि॒रे गभ॑स्त्योः ॥9.13.7॥

vā̱śrā a̍rṣa̱ntīnda̍vo̱'bhi va̱tsaṃ na dhe̱nava̍: | da̱dha̱nvi̱re gabha̍styoḥ

जुष्ट॒ इन्द्रा॑य मत्स॒रः पव॑मान॒ कनि॑क्रदत् । विश्वा॒ अप॒ द्विषो॑ जहि ॥9.13.8॥

juṣṭa̱ indrā̍ya matsa̱raḥ pava̍māna̱ kani̍kradat | viśvā̱ apa̱ dviṣo̍ jahi

अ॒प॒घ्नन्तो॒ अरा॑व्ण॒: पव॑मानाः स्व॒र्दृश॑: । योना॑वृ॒तस्य॑ सीदत ॥9.13.9॥

a̱pa̱ghnanto̱ arā̍vṇa̱: pava̍mānāḥ sva̱rdṛśa̍: | yonā̍vṛ̱tasya̍ sīdata

८ काश्यपोऽसितो देवलो वा । पवमान: सोम: । गायत्री ।

परि॒ प्रासि॑ष्यदत्क॒विः सिन्धो॑रू॒र्मावधि॑ श्रि॒तः । का॒रं बिभ्र॑त्पुरु॒स्पृह॑म् ॥9.14.1॥

pari̱ prāsi̍ṣyadatka̱viḥ sindho̍rū̱rmāvadhi̍ śri̱taḥ | kā̱raṃ bibhra̍tpuru̱spṛha̍m

गि॒रा यदी॒ सब॑न्धव॒: पञ्च॒ व्राता॑ अप॒स्यव॑: । प॒रि॒ष्कृ॒ण्वन्ति॑ धर्ण॒सिम् ॥9.14.2॥

gi̱rā yadī̱ saba̍ndhava̱: pañca̱ vrātā̍ apa̱syava̍: | pa̱ri̱ṣkṛ̱ṇvanti̍ dharṇa̱sim

आद॑स्य शु॒ष्मिणो॒ रसे॒ विश्वे॑ दे॒वा अ॑मत्सत । यदी॒ गोभि॑र्वसा॒यते॑ ॥9.14.3॥

āda̍sya śu̱ṣmiṇo̱ rase̱ viśve̍ de̱vā a̍matsata | yadī̱ gobhi̍rvasā̱yate̍

नि॒रि॒णा॒नो वि धा॑वति॒ जह॒च्छर्या॑णि॒ तान्वा॑ । अत्रा॒ सं जि॑घ्नते यु॒जा ॥9.14.4॥

ni̱ri̱ṇā̱no vi dhā̍vati̱ jaha̱ccharyā̍ṇi̱ tānvā̍ | atrā̱ saṃ ji̍ghnate yu̱jā

न॒प्तीभि॒र्यो वि॒वस्व॑तः शु॒भ्रो न मा॑मृ॒जे युवा॑ । गाः कृ॑ण्वा॒नो न नि॒र्णिज॑म् ॥9.14.5॥

na̱ptībhi̱ryo vi̱vasva̍taḥ śu̱bhro na mā̍mṛ̱je yuvā̍ | gāḥ kṛ̍ṇvā̱no na ni̱rṇija̍m

अति॑ श्रि॒ती ति॑र॒श्चता॑ ग॒व्या जि॑गा॒त्यण्व्या॑ । व॒ग्नुमि॑यर्ति॒ यं वि॒दे ॥9.14.6॥

ati̍ śri̱tī ti̍ra̱ścatā̍ ga̱vyā ji̍gā̱tyaṇvyā̍ | va̱gnumi̍yarti̱ yaṃ vi̱de

अ॒भि क्षिप॒: सम॑ग्मत म॒र्जय॑न्तीरि॒षस्पति॑म् । पृ॒ष्ठा गृ॑भ्णत वा॒जिन॑: ॥9.14.7॥

a̱bhi kṣipa̱: sama̍gmata ma̱rjaya̍ntīri̱ṣaspati̍m | pṛ̱ṣṭhā gṛ̍bhṇata vā̱jina̍:

परि॑ दि॒व्यानि॒ मर्मृ॑श॒द्विश्वा॑नि सोम॒ पार्थि॑वा । वसू॑नि याह्यस्म॒युः ॥9.14.8॥

pari̍ di̱vyāni̱ marmṛ̍śa̱dviśvā̍ni soma̱ pārthi̍vā | vasū̍ni yāhyasma̱yuḥ

८ काश्यपोऽसितो देवलो वा । पवमान: सोम: । गायत्री ।

ए॒ष धि॒या या॒त्यण्व्या॒ शूरो॒ रथे॑भिरा॒शुभि॑: । गच्छ॒न्निन्द्र॑स्य निष्कृ॒तम् ॥9.15.1॥

e̱ṣa dhi̱yā yā̱tyaṇvyā̱ śūro̱ rathe̍bhirā̱śubhi̍: | gaccha̱nnindra̍sya niṣkṛ̱tam

ए॒ष पु॒रू धि॑यायते बृह॒ते दे॒वता॑तये । यत्रा॒मृता॑स॒ आस॑ते ॥9.15.2॥

e̱ṣa pu̱rū dhi̍yāyate bṛha̱te de̱vatā̍taye | yatrā̱mṛtā̍sa̱ āsa̍te

ए॒ष हि॒तो वि नी॑यते॒ऽन्तः शु॒भ्राव॑ता प॒था । यदी॑ तु॒ञ्जन्ति॒ भूर्ण॑यः ॥9.15.3॥

e̱ṣa hi̱to vi nī̍yate̱'ntaḥ śu̱bhrāva̍tā pa̱thā | yadī̍ tu̱ñjanti̱ bhūrṇa̍yaḥ

ए॒ष शृङ्गा॑णि॒ दोधु॑व॒च्छिशी॑ते यू॒थ्यो॒३ वृषा॑ । नृ॒म्णा दधा॑न॒ ओज॑सा ॥9.15.4॥

e̱ṣa śṛṅgā̍ṇi̱ dodhu̍va̱cchiśī̍te yū̱thyo̱3 vṛṣā̍ | nṛ̱mṇā dadhā̍na̱ oja̍sā

ए॒ष रु॒क्मिभि॑रीयते वा॒जी शु॒भ्रेभि॑रं॒शुभि॑: । पति॒: सिन्धू॑नां॒ भव॑न् ॥9.15.5॥

e̱ṣa ru̱kmibhi̍rīyate vā̱jī śu̱bhrebhi̍ra̱ṃśubhi̍: | pati̱: sindhū̍nā̱ṃ bhava̍n

ए॒ष वसू॑नि पिब्द॒ना परु॑षा ययि॒वाँ अति॑ । अव॒ शादे॑षु गच्छति ॥9.15.6॥

e̱ṣa vasū̍ni pibda̱nā paru̍ṣā yayi̱vām̐ ati̍ | ava̱ śāde̍ṣu gacchati

ए॒तं मृ॑जन्ति॒ मर्ज्य॒मुप॒ द्रोणे॑ष्वा॒यव॑: । प्र॒च॒क्रा॒णं म॒हीरिष॑: ॥9.15.7॥

e̱taṃ mṛ̍janti̱ marjya̱mupa̱ droṇe̍ṣvā̱yava̍: | pra̱ca̱krā̱ṇaṃ ma̱hīriṣa̍:

ए॒तमु॒ त्यं दश॒ क्षिपो॑ मृ॒जन्ति॑ स॒प्त धी॒तय॑: । स्वा॒यु॒धं म॒दिन्त॑मम् ॥9.15.8॥

e̱tamu̱ tyaṃ daśa̱ kṣipo̍ mṛ̱janti̍ sa̱pta dhī̱taya̍: | svā̱yu̱dhaṃ ma̱dinta̍mam

८ काश्यपोऽसितो देवलो वा । पवमान: सोम: । गायत्री ।

प्र ते॑ सो॒तार॑ ओ॒ण्यो॒३ रसं॒ मदा॑य॒ घृष्व॑ये । सर्गो॒ न त॒क्त्येत॑शः ॥9.16.1॥

pra te̍ so̱tāra̍ o̱ṇyo̱3 rasa̱ṃ madā̍ya̱ ghṛṣva̍ye | sargo̱ na ta̱ktyeta̍śaḥ

क्रत्वा॒ दक्ष॑स्य र॒थ्य॑म॒पो वसा॑न॒मन्ध॑सा । गो॒षामण्वे॑षु सश्चिम ॥9.16.2॥

kratvā̱ dakṣa̍sya ra̱thya̍ma̱po vasā̍na̱mandha̍sā | go̱ṣāmaṇve̍ṣu saścima

अन॑प्तम॒प्सु दु॒ष्टरं॒ सोमं॑ प॒वित्र॒ आ सृ॑ज । पु॒नी॒हीन्द्रा॑य॒ पात॑वे ॥9.16.3॥

ana̍ptama̱psu du̱ṣṭara̱ṃ soma̍ṃ pa̱vitra̱ ā sṛ̍ja | pu̱nī̱hīndrā̍ya̱ pāta̍ve

प्र पु॑ना॒नस्य॒ चेत॑सा॒ सोम॑: प॒वित्रे॑ अर्षति । क्रत्वा॑ स॒धस्थ॒मास॑दत् ॥9.16.4॥

pra pu̍nā̱nasya̱ ceta̍sā̱ soma̍: pa̱vitre̍ arṣati | kratvā̍ sa̱dhastha̱māsa̍dat

प्र त्वा॒ नमो॑भि॒रिन्द॑व॒ इन्द्र॒ सोमा॑ असृक्षत । म॒हे भरा॑य का॒रिण॑: ॥9.16.5॥

pra tvā̱ namo̍bhi̱rinda̍va̱ indra̱ somā̍ asṛkṣata | ma̱he bharā̍ya kā̱riṇa̍:

पु॒ना॒नो रू॒पे अ॒व्यये॒ विश्वा॒ अर्ष॑न्न॒भि श्रिय॑: । शूरो॒ न गोषु॑ तिष्ठति ॥9.16.6॥

pu̱nā̱no rū̱pe a̱vyaye̱ viśvā̱ arṣa̍nna̱bhi śriya̍: | śūro̱ na goṣu̍ tiṣṭhati

दि॒वो न सानु॑ पि॒प्युषी॒ धारा॑ सु॒तस्य॑ वे॒धस॑: । वृथा॑ प॒वित्रे॑ अर्षति ॥9.16.7॥

di̱vo na sānu̍ pi̱pyuṣī̱ dhārā̍ su̱tasya̍ ve̱dhasa̍: | vṛthā̍ pa̱vitre̍ arṣati

त्वं सो॑म विप॒श्चितं॒ तना॑ पुना॒न आ॒युषु॑ । अव्यो॒ वारं॒ वि धा॑वसि ॥9.16.8॥

tvaṃ so̍ma vipa̱ścita̱ṃ tanā̍ punā̱na ā̱yuṣu̍ | avyo̱ vāra̱ṃ vi dhā̍vasi

८ काश्यपोऽसितो देवलो वा । पवमान: सोम: । गायत्री ।

प्र नि॒म्नेने॑व॒ सिन्ध॑वो॒ घ्नन्तो॑ वृ॒त्राणि॒ भूर्ण॑यः । सोमा॑ असृग्रमा॒शव॑: ॥9.17.1॥

pra ni̱mnene̍va̱ sindha̍vo̱ ghnanto̍ vṛ̱trāṇi̱ bhūrṇa̍yaḥ | somā̍ asṛgramā̱śava̍:

अ॒भि सु॑वा॒नास॒ इन्द॑वो वृ॒ष्टय॑: पृथि॒वीमि॑व । इन्द्रं॒ सोमा॑सो अक्षरन् ॥9.17.2॥

a̱bhi su̍vā̱nāsa̱ inda̍vo vṛ̱ṣṭaya̍: pṛthi̱vīmi̍va | indra̱ṃ somā̍so akṣaran

अत्यू॑र्मिर्मत्स॒रो मद॒: सोम॑: प॒वित्रे॑ अर्षति । वि॒घ्नन्रक्षां॑सि देव॒युः ॥9.17.3॥

atyū̍rmirmatsa̱ro mada̱: soma̍: pa̱vitre̍ arṣati | vi̱ghnanrakṣā̍ṃsi deva̱yuḥ

आ क॒लशे॑षु धावति प॒वित्रे॒ परि॑ षिच्यते । उ॒क्थैर्य॒ज्ञेषु॑ वर्धते ॥9.17.4॥

ā ka̱laśe̍ṣu dhāvati pa̱vitre̱ pari̍ ṣicyate | u̱kthairya̱jñeṣu̍ vardhate

अति॒ त्री सो॑म रोच॒ना रोह॒न्न भ्रा॑जसे॒ दिव॑म् । इ॒ष्णन्त्सूर्यं॒ न चो॑दयः ॥9.17.5॥

ati̱ trī so̍ma roca̱nā roha̱nna bhrā̍jase̱ diva̍m | i̱ṣṇantsūrya̱ṃ na co̍dayaḥ

अ॒भि विप्रा॑ अनूषत मू॒र्धन्य॒ज्ञस्य॑ का॒रव॑: । दधा॑ना॒श्चक्ष॑सि प्रि॒यम् ॥9.17.6॥

a̱bhi viprā̍ anūṣata mū̱rdhanya̱jñasya̍ kā̱rava̍: | dadhā̍nā̱ścakṣa̍si pri̱yam

तमु॑ त्वा वा॒जिनं॒ नरो॑ धी॒भिर्विप्रा॑ अव॒स्यव॑: । मृ॒जन्ति॑ दे॒वता॑तये ॥9.17.7॥

tamu̍ tvā vā̱jina̱ṃ naro̍ dhī̱bhirviprā̍ ava̱syava̍: | mṛ̱janti̍ de̱vatā̍taye

मधो॒र्धारा॒मनु॑ क्षर ती॒व्रः स॒धस्थ॒मास॑दः । चारु॑ॠ॒ताय॑ पी॒तये॑ ॥9.17.8॥

madho̱rdhārā̱manu̍ kṣara tī̱vraḥ sa̱dhastha̱māsa̍daḥ | cāru̍ṝ̱tāya̍ pī̱taye̍

७ काश्यपोऽसितो देवलो वा । पवमान: सोम: । गायत्री ।

परि॑ सुवा॒नो गि॑रि॒ष्ठाः प॒वित्रे॒ सोमो॑ अक्षाः । मदे॑षु सर्व॒धा अ॑सि ॥9.18.1॥

pari̍ suvā̱no gi̍ri̱ṣṭhāḥ pa̱vitre̱ somo̍ akṣāḥ | made̍ṣu sarva̱dhā a̍si

त्वं विप्र॒स्त्वं क॒विर्मधु॒ प्र जा॒तमन्ध॑सः । मदे॑षु सर्व॒धा अ॑सि ॥9.18.2॥

tvaṃ vipra̱stvaṃ ka̱virmadhu̱ pra jā̱tamandha̍saḥ | made̍ṣu sarva̱dhā a̍si

तव॒ विश्वे॑ स॒जोष॑सो दे॒वास॑: पी॒तिमा॑शत । मदे॑षु सर्व॒धा अ॑सि ॥9.18.3॥

tava̱ viśve̍ sa̱joṣa̍so de̱vāsa̍: pī̱timā̍śata | made̍ṣu sarva̱dhā a̍si

आ यो विश्वा॑नि॒ वार्या॒ वसू॑नि॒ हस्त॑योर्द॒धे । मदे॑षु सर्व॒धा अ॑सि ॥9.18.4॥

ā yo viśvā̍ni̱ vāryā̱ vasū̍ni̱ hasta̍yorda̱dhe | made̍ṣu sarva̱dhā a̍si

य इ॒मे रोद॑सी म॒ही सं मा॒तरे॑व॒ दोह॑ते । मदे॑षु सर्व॒धा अ॑सि ॥9.18.5॥

ya i̱me roda̍sī ma̱hī saṃ mā̱tare̍va̱ doha̍te | made̍ṣu sarva̱dhā a̍si

परि॒ यो रोद॑सी उ॒भे स॒द्यो वाजे॑भि॒रर्ष॑ति । मदे॑षु सर्व॒धा अ॑सि ॥9.18.6॥

pari̱ yo roda̍sī u̱bhe sa̱dyo vāje̍bhi̱rarṣa̍ti | made̍ṣu sarva̱dhā a̍si

स शु॒ष्मी क॒लशे॒ष्वा पु॑ना॒नो अ॑चिक्रदत् । मदे॑षु सर्व॒धा अ॑सि ॥9.18.7॥

sa śu̱ṣmī ka̱laśe̱ṣvā pu̍nā̱no a̍cikradat | made̍ṣu sarva̱dhā a̍si

७ काश्यपोऽसितो देवलो वा । पवमान: सोम: । गायत्री ।

यत्सो॑म चि॒त्रमु॒क्थ्यं॑ दि॒व्यं पार्थि॑वं॒ वसु॑ । तन्न॑: पुना॒न आ भ॑र ॥9.19.1॥

yatso̍ma ci̱tramu̱kthya̍ṃ di̱vyaṃ pārthi̍va̱ṃ vasu̍ | tanna̍: punā̱na ā bha̍ra

यु॒वं हि स्थः स्व॑र्पती॒ इन्द्र॑श्च सोम॒ गोप॑ती । ई॒शा॒ना पि॑प्यतं॒ धिय॑: ॥9.19.2॥

yu̱vaṃ hi sthaḥ sva̍rpatī̱ indra̍śca soma̱ gopa̍tī | ī̱śā̱nā pi̍pyata̱ṃ dhiya̍:

वृषा॑ पुना॒न आ॒युषु॑ स्त॒नय॒न्नधि॑ ब॒र्हिषि॑ । हरि॒: सन्योनि॒मास॑दत् ॥9.19.3॥

vṛṣā̍ punā̱na ā̱yuṣu̍ sta̱naya̱nnadhi̍ ba̱rhiṣi̍ | hari̱: sanyoni̱māsa̍dat

अवा॑वशन्त धी॒तयो॑ वृष॒भस्याधि॒ रेत॑सि । सू॒नोर्व॒त्सस्य॑ मा॒तर॑: ॥9.19.4॥

avā̍vaśanta dhī̱tayo̍ vṛṣa̱bhasyādhi̱ reta̍si | sū̱norva̱tsasya̍ mā̱tara̍:

कु॒विद्वृ॑ष॒ण्यन्ती॑भ्यः पुना॒नो गर्भ॑मा॒दध॑त् । याः शु॒क्रं दु॑ह॒ते पय॑: ॥9.19.5॥

ku̱vidvṛ̍ṣa̱ṇyantī̍bhyaḥ punā̱no garbha̍mā̱dadha̍t | yāḥ śu̱kraṃ du̍ha̱te paya̍:

उप॑ शिक्षापत॒स्थुषो॑ भि॒यस॒मा धे॑हि॒ शत्रु॑षु । पव॑मान वि॒दा र॒यिम् ॥9.19.6॥

upa̍ śikṣāpata̱sthuṣo̍ bhi̱yasa̱mā dhe̍hi̱ śatru̍ṣu | pava̍māna vi̱dā ra̱yim

नि शत्रो॑: सोम॒ वृष्ण्यं॒ नि शुष्मं॒ नि वय॑स्तिर । दू॒रे वा॑ स॒तो अन्ति॑ वा ॥9.19.7॥

ni śatro̍: soma̱ vṛṣṇya̱ṃ ni śuṣma̱ṃ ni vaya̍stira | dū̱re vā̍ sa̱to anti̍ vā

७ काश्यपोऽसितो देवलो वा । पवमान: सोम: । गायत्री ।

प्र क॒विर्दे॒ववी॑त॒येऽव्यो॒ वारे॑भिरर्षति । सा॒ह्वान्विश्वा॑ अ॒भि स्पृध॑: ॥9.20.1॥

pra ka̱virde̱vavī̍ta̱ye'vyo̱ vāre̍bhirarṣati | sā̱hvānviśvā̍ a̱bhi spṛdha̍:

स हि ष्मा॑ जरि॒तृभ्य॒ आ वाजं॒ गोम॑न्त॒मिन्व॑ति । पव॑मानः सह॒स्रिण॑म् ॥9.20.2॥

sa hi ṣmā̍ jari̱tṛbhya̱ ā vāja̱ṃ goma̍nta̱minva̍ti | pava̍mānaḥ saha̱sriṇa̍m

परि॒ विश्वा॑नि॒ चेत॑सा मृ॒शसे॒ पव॑से म॒ती । स न॑: सोम॒ श्रवो॑ विदः ॥9.20.3॥

pari̱ viśvā̍ni̱ ceta̍sā mṛ̱śase̱ pava̍se ma̱tī | sa na̍: soma̱ śravo̍ vidaḥ

अ॒भ्य॑र्ष बृ॒हद्यशो॑ म॒घव॑द्भ्यो ध्रु॒वं र॒यिम् । इषं॑ स्तो॒तृभ्य॒ आ भ॑र ॥9.20.4॥

a̱bhya̍rṣa bṛ̱hadyaśo̍ ma̱ghava̍dbhyo dhru̱vaṃ ra̱yim | iṣa̍ṃ sto̱tṛbhya̱ ā bha̍ra

त्वं राजे॑व सुव्र॒तो गिर॑: सो॒मा वि॑वेशिथ । पु॒ना॒नो व॑ह्ने अद्भुत ॥9.20.5॥

tvaṃ rāje̍va suvra̱to gira̍: so̱mā vi̍veśitha | pu̱nā̱no va̍hne adbhuta

स वह्नि॑र॒प्सु दु॒ष्टरो॑ मृ॒ज्यमा॑नो॒ गभ॑स्त्योः । सोम॑श्च॒मूषु॑ सीदति ॥9.20.6॥

sa vahni̍ra̱psu du̱ṣṭaro̍ mṛ̱jyamā̍no̱ gabha̍styoḥ | soma̍śca̱mūṣu̍ sīdati

क्री॒ळुर्म॒खो न मं॑ह॒युः प॒वित्रं॑ सोम गच्छसि । दध॑त्स्तो॒त्रे सु॒वीर्य॑म् ॥9.20.7॥

krī̱l̤urma̱kho na ma̍ṃha̱yuḥ pa̱vitra̍ṃ soma gacchasi | dadha̍tsto̱tre su̱vīrya̍m

७ काश्यपोऽसितो देवलो वा । पवमान: सोम: । गायत्री ।

ए॒ते धा॑व॒न्तीन्द॑व॒: सोमा॒ इन्द्रा॑य॒ घृष्व॑यः । म॒त्स॒रास॑: स्व॒र्विद॑: ॥9.21.1॥

e̱te dhā̍va̱ntīnda̍va̱: somā̱ indrā̍ya̱ ghṛṣva̍yaḥ | ma̱tsa̱rāsa̍: sva̱rvida̍:

प्र॒वृ॒ण्वन्तो॑ अभि॒युज॒: सुष्व॑ये वरिवो॒विद॑: । स्व॒यं स्तो॒त्रे व॑य॒स्कृत॑: ॥9.21.2॥

pra̱vṛ̱ṇvanto̍ abhi̱yuja̱: suṣva̍ye varivo̱vida̍: | sva̱yaṃ sto̱tre va̍ya̱skṛta̍:

वृथा॒ क्रीळ॑न्त॒ इन्द॑वः स॒धस्थ॑म॒भ्येक॒मित् । सिन्धो॑रू॒र्मा व्य॑क्षरन् ॥9.21.3॥

vṛthā̱ krīl̤a̍nta̱ inda̍vaḥ sa̱dhastha̍ma̱bhyeka̱mit | sindho̍rū̱rmā vya̍kṣaran

ए॒ते विश्वा॑नि॒ वार्या॒ पव॑मानास आशत । हि॒ता न सप्त॑यो॒ रथे॑ ॥9.21.4॥

e̱te viśvā̍ni̱ vāryā̱ pava̍mānāsa āśata | hi̱tā na sapta̍yo̱ rathe̍

आस्मि॑न्पि॒शङ्ग॑मिन्दवो॒ दधा॑ता वे॒नमा॒दिशे॑ । यो अ॒स्मभ्य॒मरा॑वा ॥9.21.5॥

āsmi̍npi̱śaṅga̍mindavo̱ dadhā̍tā ve̱namā̱diśe̍ | yo a̱smabhya̱marā̍vā

ऋ॒भुर्न रथ्यं॒ नवं॒ दधा॑ता॒ केत॑मा॒दिशे॑ । शु॒क्राः प॑वध्व॒मर्ण॑सा ॥9.21.6॥

ṛ̱bhurna rathya̱ṃ nava̱ṃ dadhā̍tā̱ keta̍mā̱diśe̍ | śu̱krāḥ pa̍vadhva̱marṇa̍sā

ए॒त उ॒ त्ये अ॑वीवश॒न्काष्ठां॑ वा॒जिनो॑ अक्रत । स॒तः प्रासा॑विषुर्म॒तिम् ॥9.21.7॥

e̱ta u̱ tye a̍vīvaśa̱nkāṣṭhā̍ṃ vā̱jino̍ akrata | sa̱taḥ prāsā̍viṣurma̱tim

७ काश्यपोऽसितो देवलो वा । पवमान: सोम: । गायत्री ।

ए॒ते सोमा॑स आ॒शवो॒ रथा॑ इव॒ प्र वा॒जिन॑: । सर्गा॑: सृ॒ष्टा अ॑हेषत ॥9.22.1॥

e̱te somā̍sa ā̱śavo̱ rathā̍ iva̱ pra vā̱jina̍: | sargā̍: sṛ̱ṣṭā a̍heṣata

ए॒ते वाता॑ इवो॒रव॑: प॒र्जन्य॑स्येव वृ॒ष्टय॑: । अ॒ग्नेरि॑व भ्र॒मा वृथा॑ ॥9.22.2॥

e̱te vātā̍ ivo̱rava̍: pa̱rjanya̍syeva vṛ̱ṣṭaya̍: | a̱gneri̍va bhra̱mā vṛthā̍

ए॒ते पू॒ता वि॑प॒श्चित॒: सोमा॑सो॒ दध्या॑शिरः । वि॒पा व्या॑नशु॒र्धिय॑: ॥9.22.3॥

e̱te pū̱tā vi̍pa̱ścita̱: somā̍so̱ dadhyā̍śiraḥ | vi̱pā vyā̍naśu̱rdhiya̍:

ए॒ते मृ॒ष्टा अम॑र्त्याः ससृ॒वांसो॒ न श॑श्रमुः । इय॑क्षन्तः प॒थो रज॑: ॥9.22.4॥

e̱te mṛ̱ṣṭā ama̍rtyāḥ sasṛ̱vāṃso̱ na śa̍śramuḥ | iya̍kṣantaḥ pa̱tho raja̍:

ए॒ते पृ॒ष्ठानि॒ रोद॑सोर्विप्र॒यन्तो॒ व्या॑नशुः । उ॒तेदमु॑त्त॒मं रज॑: ॥9.22.5॥

e̱te pṛ̱ṣṭhāni̱ roda̍sorvipra̱yanto̱ vyā̍naśuḥ | u̱tedamu̍tta̱maṃ raja̍:

तन्तुं॑ तन्वा॒नमु॑त्त॒ममनु॑ प्र॒वत॑ आशत । उ॒तेदमु॑त्त॒माय्य॑म् ॥9.22.6॥

tantu̍ṃ tanvā̱namu̍tta̱mamanu̍ pra̱vata̍ āśata | u̱tedamu̍tta̱māyya̍m

त्वं सो॑म प॒णिभ्य॒ आ वसु॒ गव्या॑नि धारयः । त॒तं तन्तु॑मचिक्रदः ॥9.22.7॥

tvaṃ so̍ma pa̱ṇibhya̱ ā vasu̱ gavyā̍ni dhārayaḥ | ta̱taṃ tantu̍macikradaḥ

७ काश्यपोऽसितो देवलो वा । पवमान: सोम: । गायत्री ।

सोमा॑ असृग्रमा॒शवो॒ मधो॒र्मद॑स्य॒ धार॑या । अ॒भि विश्वा॑नि॒ काव्या॑ ॥9.23.1॥

somā̍ asṛgramā̱śavo̱ madho̱rmada̍sya̱ dhāra̍yā | a̱bhi viśvā̍ni̱ kāvyā̍

अनु॑ प्र॒त्नास॑ आ॒यव॑: प॒दं नवी॑यो अक्रमुः । रु॒चे ज॑नन्त॒ सूर्य॑म् ॥9.23.2॥

anu̍ pra̱tnāsa̍ ā̱yava̍: pa̱daṃ navī̍yo akramuḥ | ru̱ce ja̍nanta̱ sūrya̍m

आ प॑वमान नो भरा॒ऽर्यो अदा॑शुषो॒ गय॑म् । कृ॒धि प्र॒जाव॑ती॒रिष॑: ॥9.23.3॥

ā pa̍vamāna no bharā̱'ryo adā̍śuṣo̱ gaya̍m | kṛ̱dhi pra̱jāva̍tī̱riṣa̍:

अ॒भि सोमा॑स आ॒यव॒: पव॑न्ते॒ मद्यं॒ मद॑म् । अ॒भि कोशं॑ मधु॒श्चुत॑म् ॥9.23.4॥

a̱bhi somā̍sa ā̱yava̱: pava̍nte̱ madya̱ṃ mada̍m | a̱bhi kośa̍ṃ madhu̱ścuta̍m

सोमो॑ अर्षति धर्ण॒सिर्दधा॑न इन्द्रि॒यं रस॑म् । सु॒वीरो॑ अभिशस्ति॒पाः ॥9.23.5॥

somo̍ arṣati dharṇa̱sirdadhā̍na indri̱yaṃ rasa̍m | su̱vīro̍ abhiśasti̱pāḥ

इन्द्रा॑य सोम पवसे दे॒वेभ्य॑: सध॒माद्य॑: । इन्दो॒ वाजं॑ सिषाससि ॥9.23.6॥

indrā̍ya soma pavase de̱vebhya̍: sadha̱mādya̍: | indo̱ vāja̍ṃ siṣāsasi

अ॒स्य पी॒त्वा मदा॑ना॒मिन्द्रो॑ वृ॒त्राण्य॑प्र॒ति । ज॒घान॑ ज॒घन॑च्च॒ नु ॥9.23.7॥

a̱sya pī̱tvā madā̍nā̱mindro̍ vṛ̱trāṇya̍pra̱ti | ja̱ghāna̍ ja̱ghana̍cca̱ nu

७ काश्यपोऽसितो देवलो वा । पवमान: सोम: । गायत्री ।

प्र सोमा॑सो अधन्विषु॒: पव॑मानास॒ इन्द॑वः । श्री॒णा॒ना अ॒प्सु मृ॑ञ्जत ॥9.24.1॥

pra somā̍so adhanviṣu̱: pava̍mānāsa̱ inda̍vaḥ | śrī̱ṇā̱nā a̱psu mṛ̍ñjata

अ॒भि गावो॑ अधन्विषु॒रापो॒ न प्र॒वता॑ य॒तीः । पु॒ना॒ना इन्द्र॑माशत ॥9.24.2॥

a̱bhi gāvo̍ adhanviṣu̱rāpo̱ na pra̱vatā̍ ya̱tīḥ | pu̱nā̱nā indra̍māśata

प्र प॑वमान धन्वसि॒ सोमेन्द्रा॑य॒ पात॑वे । नृभि॑र्य॒तो वि नी॑यसे ॥9.24.3॥

pra pa̍vamāna dhanvasi̱ somendrā̍ya̱ pāta̍ve | nṛbhi̍rya̱to vi nī̍yase

त्वं सो॑म नृ॒माद॑न॒: पव॑स्व चर्षणी॒सहे॑ । सस्नि॒र्यो अ॑नु॒माद्य॑: ॥9.24.4॥

tvaṃ so̍ma nṛ̱māda̍na̱: pava̍sva carṣaṇī̱sahe̍ | sasni̱ryo a̍nu̱mādya̍:

इन्दो॒ यदद्रि॑भिः सु॒तः प॒वित्रं॑ परि॒धाव॑सि । अर॒मिन्द्र॑स्य॒ धाम्ने॑ ॥9.24.5॥

indo̱ yadadri̍bhiḥ su̱taḥ pa̱vitra̍ṃ pari̱dhāva̍si | ara̱mindra̍sya̱ dhāmne̍

पव॑स्व वृत्रहन्तमो॒क्थेभि॑रनु॒माद्य॑: । शुचि॑: पाव॒को अद्भु॑तः ॥9.24.6॥

pava̍sva vṛtrahantamo̱kthebhi̍ranu̱mādya̍: | śuci̍: pāva̱ko adbhu̍taḥ

शुचि॑: पाव॒क उ॑च्यते॒ सोम॑: सु॒तस्य॒ मध्व॑: । दे॒वा॒वीर॑घशंस॒हा ॥9.24.7॥

śuci̍: pāva̱ka u̍cyate̱ soma̍: su̱tasya̱ madhva̍: | de̱vā̱vīra̍ghaśaṃsa̱hā

६ दृळहच्युत आगस्त्य: । पवमान: सोम: । गायत्री ।

पव॑स्व दक्ष॒साध॑नो दे॒वेभ्य॑: पी॒तये॑ हरे । म॒रुद्भ्यो॑ वा॒यवे॒ मद॑: ॥9.25.1॥

pava̍sva dakṣa̱sādha̍no de̱vebhya̍: pī̱taye̍ hare | ma̱rudbhyo̍ vā̱yave̱ mada̍:

पव॑मान धि॒या हि॒तो॒३ऽभि योनिं॒ कनि॑क्रदत् । धर्म॑णा वा॒युमा वि॑श ॥9.25.2॥

pava̍māna dhi̱yā hi̱to̱3'bhi yoni̱ṃ kani̍kradat | dharma̍ṇā vā̱yumā vi̍śa

सं दे॒वैः शो॑भते॒ वृषा॑ क॒विर्योना॒वधि॑ प्रि॒यः । वृ॒त्र॒हा दे॑व॒वीत॑मः ॥9.25.3॥

saṃ de̱vaiḥ śo̍bhate̱ vṛṣā̍ ka̱viryonā̱vadhi̍ pri̱yaḥ | vṛ̱tra̱hā de̍va̱vīta̍maḥ

विश्वा॑ रू॒पाण्या॑वि॒शन्पु॑ना॒नो या॑ति हर्य॒तः । यत्रा॒मृता॑स॒ आस॑ते ॥9.25.4॥

viśvā̍ rū̱pāṇyā̍vi̱śanpu̍nā̱no yā̍ti harya̱taḥ | yatrā̱mṛtā̍sa̱ āsa̍te

अ॒रु॒षो ज॒नय॒न्गिर॒: सोम॑: पवत आयु॒षक् । इन्द्रं॒ गच्छ॑न्क॒विक्र॑तुः ॥9.25.5॥

a̱ru̱ṣo ja̱naya̱ngira̱: soma̍: pavata āyu̱ṣak | indra̱ṃ gaccha̍nka̱vikra̍tuḥ

आ प॑वस्व मदिन्तम प॒वित्रं॒ धार॑या कवे । अ॒र्कस्य॒ योनि॑मा॒सद॑म् ॥9.25.6॥

ā pa̍vasva madintama pa̱vitra̱ṃ dhāra̍yā kave | a̱rkasya̱ yoni̍mā̱sada̍m

६ इध्मवाहो दार्ढच्युत: । पवमान: सोम: । गायत्री ।

तम॑मृक्षन्त वा॒जिन॑मु॒पस्थे॒ अदि॑ते॒रधि॑ । विप्रा॑सो॒ अण्व्या॑ धि॒या ॥9.26.1॥

tama̍mṛkṣanta vā̱jina̍mu̱pasthe̱ adi̍te̱radhi̍ | viprā̍so̱ aṇvyā̍ dhi̱yā

तं गावो॑ अ॒भ्य॑नूषत स॒हस्र॑धार॒मक्षि॑तम् । इन्दुं॑ ध॒र्तार॒मा दि॒वः ॥9.26.2॥

taṃ gāvo̍ a̱bhya̍nūṣata sa̱hasra̍dhāra̱makṣi̍tam | indu̍ṃ dha̱rtāra̱mā di̱vaḥ

तं वे॒धां मे॒धया॑ह्य॒न्पव॑मान॒मधि॒ द्यवि॑ । ध॒र्ण॒सिं भूरि॑धायसम् ॥9.26.3॥

taṃ ve̱dhāṃ me̱dhayā̍hya̱npava̍māna̱madhi̱ dyavi̍ | dha̱rṇa̱siṃ bhūri̍dhāyasam

तम॑ह्यन्भु॒रिजो॑र्धि॒या सं॒वसा॑नं वि॒वस्व॑तः । पतिं॑ वा॒चो अदा॑भ्यम् ॥9.26.4॥

tama̍hyanbhu̱rijo̍rdhi̱yā sa̱ṃvasā̍naṃ vi̱vasva̍taḥ | pati̍ṃ vā̱co adā̍bhyam

तं साना॒वधि॑ जा॒मयो॒ हरिं॑ हिन्व॒न्त्यद्रि॑भिः । ह॒र्य॒तं भूरि॑चक्षसम् ॥9.26.5॥

taṃ sānā̱vadhi̍ jā̱mayo̱ hari̍ṃ hinva̱ntyadri̍bhiḥ | ha̱rya̱taṃ bhūri̍cakṣasam

तं त्वा॑ हिन्वन्ति वे॒धस॒: पव॑मान गिरा॒वृध॑म् । इन्द॒विन्द्रा॑य मत्स॒रम् ॥9.26.6॥

taṃ tvā̍ hinvanti ve̱dhasa̱: pava̍māna girā̱vṛdha̍m | inda̱vindrā̍ya matsa̱ram

६ नृमेध आङ्गिरस: । पवमान: सोम: । गायत्री ।

ए॒ष क॒विर॒भिष्टु॑तः प॒वित्रे॒ अधि॑ तोशते । पु॒ना॒नो घ्नन्नप॒ स्रिध॑: ॥9.27.1॥

e̱ṣa ka̱vira̱bhiṣṭu̍taḥ pa̱vitre̱ adhi̍ tośate | pu̱nā̱no ghnannapa̱ sridha̍:

ए॒ष इन्द्रा॑य वा॒यवे॑ स्व॒र्जित्परि॑ षिच्यते । प॒वित्रे॑ दक्ष॒साध॑नः ॥9.27.2॥

e̱ṣa indrā̍ya vā̱yave̍ sva̱rjitpari̍ ṣicyate | pa̱vitre̍ dakṣa̱sādha̍naḥ

ए॒ष नृभि॒र्वि नी॑यते दि॒वो मू॒र्धा वृषा॑ सु॒तः । सोमो॒ वने॑षु विश्व॒वित् ॥9.27.3॥

e̱ṣa nṛbhi̱rvi nī̍yate di̱vo mū̱rdhā vṛṣā̍ su̱taḥ | somo̱ vane̍ṣu viśva̱vit

ए॒ष ग॒व्युर॑चिक्रद॒त्पव॑मानो हिरण्य॒युः । इन्दु॑: सत्रा॒जिदस्तृ॑तः ॥9.27.4॥

e̱ṣa ga̱vyura̍cikrada̱tpava̍māno hiraṇya̱yuḥ | indu̍: satrā̱jidastṛ̍taḥ

ए॒ष सूर्ये॑ण हासते॒ पव॑मानो॒ अधि॒ द्यवि॑ । प॒वित्रे॑ मत्स॒रो मद॑: ॥9.27.5॥

e̱ṣa sūrye̍ṇa hāsate̱ pava̍māno̱ adhi̱ dyavi̍ | pa̱vitre̍ matsa̱ro mada̍:

ए॒ष शु॒ष्म्य॑सिष्यदद॒न्तरि॑क्षे॒ वृषा॒ हरि॑: । पु॒ना॒न इन्दु॒रिन्द्र॒मा ॥9.27.6॥

e̱ṣa śu̱ṣmya̍siṣyadada̱ntari̍kṣe̱ vṛṣā̱ hari̍: | pu̱nā̱na indu̱rindra̱mā

६ प्रियमेध आङ्गिरस: । पवमान: सोम: । गायत्री ।

ए॒ष वा॒जी हि॒तो नृभि॑र्विश्व॒विन्मन॑स॒स्पति॑: । अव्यो॒ वारं॒ वि धा॑वति ॥9.28.1॥

e̱ṣa vā̱jī hi̱to nṛbhi̍rviśva̱vinmana̍sa̱spati̍: | avyo̱ vāra̱ṃ vi dhā̍vati

ए॒ष प॒वित्रे॑ अक्षर॒त्सोमो॑ दे॒वेभ्य॑: सु॒तः । विश्वा॒ धामा॑न्यावि॒शन् ॥9.28.2॥

e̱ṣa pa̱vitre̍ akṣara̱tsomo̍ de̱vebhya̍: su̱taḥ | viśvā̱ dhāmā̍nyāvi̱śan

ए॒ष दे॒वः शु॑भाय॒तेऽधि॒ योना॒वम॑र्त्यः । वृ॒त्र॒हा दे॑व॒वीत॑मः ॥9.28.3॥

e̱ṣa de̱vaḥ śu̍bhāya̱te'dhi̱ yonā̱vama̍rtyaḥ | vṛ̱tra̱hā de̍va̱vīta̍maḥ

ए॒ष वृषा॒ कनि॑क्रदद्द॒शभि॑र्जा॒मिभि॑र्य॒तः । अ॒भि द्रोणा॑नि धावति ॥9.28.4॥

e̱ṣa vṛṣā̱ kani̍kradadda̱śabhi̍rjā̱mibhi̍rya̱taḥ | a̱bhi droṇā̍ni dhāvati

ए॒ष सूर्य॑मरोचय॒त्पव॑मानो॒ विच॑र्षणिः । विश्वा॒ धामा॑नि विश्व॒वित् ॥9.28.5॥

e̱ṣa sūrya̍marocaya̱tpava̍māno̱ vica̍rṣaṇiḥ | viśvā̱ dhāmā̍ni viśva̱vit

ए॒ष शु॒ष्म्यदा॑भ्य॒: सोम॑: पुना॒नो अ॑र्षति । दे॒वा॒वीर॑घशंस॒हा ॥9.28.6॥

e̱ṣa śu̱ṣmyadā̍bhya̱: soma̍: punā̱no a̍rṣati | de̱vā̱vīra̍ghaśaṃsa̱hā

६ नृमेध आङ्गिरस: । पवमान: सोम: । गायत्री ।

प्रास्य॒ धारा॑ अक्षर॒न्वृष्ण॑: सु॒तस्यौज॑सा । दे॒वाँ अनु॑ प्र॒भूष॑तः ॥9.29.1॥

prāsya̱ dhārā̍ akṣara̱nvṛṣṇa̍: su̱tasyauja̍sā | de̱vām̐ anu̍ pra̱bhūṣa̍taḥ

सप्तिं॑ मृजन्ति वे॒धसो॑ गृ॒णन्त॑: का॒रवो॑ गि॒रा । ज्योति॑र्जज्ञा॒नमु॒क्थ्य॑म् ॥9.29.2॥

sapti̍ṃ mṛjanti ve̱dhaso̍ gṛ̱ṇanta̍: kā̱ravo̍ gi̱rā | jyoti̍rjajñā̱namu̱kthya̍m

सु॒षहा॑ सोम॒ तानि॑ ते पुना॒नाय॑ प्रभूवसो । वर्धा॑ समु॒द्रमु॒क्थ्य॑म् ॥9.29.3॥

su̱ṣahā̍ soma̱ tāni̍ te punā̱nāya̍ prabhūvaso | vardhā̍ samu̱dramu̱kthya̍m

विश्वा॒ वसू॑नि सं॒जय॒न्पव॑स्व सोम॒ धार॑या । इ॒नु द्वेषां॑सि स॒ध्र्य॑क् ॥9.29.4॥

viśvā̱ vasū̍ni sa̱ṃjaya̱npava̍sva soma̱ dhāra̍yā | i̱nu dveṣā̍ṃsi sa̱dhrya̍k

रक्षा॒ सु नो॒ अर॑रुषः स्व॒नात्स॑मस्य॒ कस्य॑ चित् । नि॒दो यत्र॑ मुमु॒च्महे॑ ॥9.29.5॥

rakṣā̱ su no̱ ara̍ruṣaḥ sva̱nātsa̍masya̱ kasya̍ cit | ni̱do yatra̍ mumu̱cmahe̍

एन्दो॒ पार्थि॑वं र॒यिं दि॒व्यं प॑वस्व॒ धार॑या । द्यु॒मन्तं॒ शुष्म॒मा भ॑र ॥9.29.6॥

endo̱ pārthi̍vaṃ ra̱yiṃ di̱vyaṃ pa̍vasva̱ dhāra̍yā | dyu̱manta̱ṃ śuṣma̱mā bha̍ra

६ बिन्दुराङ्गिरस: । पवमान: सोम: । गायत्री ।

प्र धारा॑ अस्य शु॒ष्मिणो॒ वृथा॑ प॒वित्रे॑ अक्षरन् । पु॒ना॒नो वाच॑मिष्यति ॥9.30.1॥

pra dhārā̍ asya śu̱ṣmiṇo̱ vṛthā̍ pa̱vitre̍ akṣaran | pu̱nā̱no vāca̍miṣyati

इन्दु॑र्हिया॒नः सो॒तृभि॑र्मृ॒ज्यमा॑न॒: कनि॑क्रदत् । इय॑र्ति व॒ग्नुमि॑न्द्रि॒यम् ॥9.30.2॥

indu̍rhiyā̱naḥ so̱tṛbhi̍rmṛ̱jyamā̍na̱: kani̍kradat | iya̍rti va̱gnumi̍ndri̱yam

आ न॒: शुष्मं॑ नृ॒षाह्यं॑ वी॒रव॑न्तं पुरु॒स्पृह॑म् । पव॑स्व सोम॒ धार॑या ॥9.30.3॥

ā na̱: śuṣma̍ṃ nṛ̱ṣāhya̍ṃ vī̱rava̍ntaṃ puru̱spṛha̍m | pava̍sva soma̱ dhāra̍yā

प्र सोमो॒ अति॒ धार॑या॒ पव॑मानो असिष्यदत् । अ॒भि द्रोणा॑न्या॒सद॑म् ॥9.30.4॥

pra somo̱ ati̱ dhāra̍yā̱ pava̍māno asiṣyadat | a̱bhi droṇā̍nyā̱sada̍m

अ॒प्सु त्वा॒ मधु॑मत्तमं॒ हरिं॑ हिन्व॒न्त्यद्रि॑भिः । इन्द॒विन्द्रा॑य पी॒तये॑ ॥9.30.5॥

a̱psu tvā̱ madhu̍mattama̱ṃ hari̍ṃ hinva̱ntyadri̍bhiḥ | inda̱vindrā̍ya pī̱taye̍

सु॒नोता॒ मधु॑मत्तमं॒ सोम॒मिन्द्रा॑य व॒ज्रिणे॑ । चारुं॒ शर्धा॑य मत्स॒रम् ॥9.30.6॥

su̱notā̱ madhu̍mattama̱ṃ soma̱mindrā̍ya va̱jriṇe̍ | cāru̱ṃ śardhā̍ya matsa̱ram

६ गोतमो राहूगण:। पवमान: सोम: । गायत्री ।

प्र सोमा॑सः स्वा॒ध्य१: पव॑मानासो अक्रमुः । र॒यिं कृ॑ण्वन्ति॒ चेत॑नम् ॥9.31.1॥

pra somā̍saḥ svā̱dhya1: pava̍mānāso akramuḥ | ra̱yiṃ kṛ̍ṇvanti̱ ceta̍nam

दि॒वस्पृ॑थि॒व्या अधि॒ भवे॑न्दो द्युम्न॒वर्ध॑नः । भवा॒ वाजा॑नां॒ पति॑: ॥9.31.2॥

di̱vaspṛ̍thi̱vyā adhi̱ bhave̍ndo dyumna̱vardha̍naḥ | bhavā̱ vājā̍nā̱ṃ pati̍:

तुभ्यं॒ वाता॑ अभि॒प्रिय॒स्तुभ्य॑मर्षन्ति॒ सिन्ध॑वः । सोम॒ वर्ध॑न्ति ते॒ मह॑: ॥9.31.3॥

tubhya̱ṃ vātā̍ abhi̱priya̱stubhya̍marṣanti̱ sindha̍vaḥ | soma̱ vardha̍nti te̱ maha̍:

आ प्या॑यस्व॒ समे॑तु ते वि॒श्वत॑: सोम॒ वृष्ण्य॑म् । भवा॒ वाज॑स्य संग॒थे ॥9.31.4॥

ā pyā̍yasva̱ same̍tu te vi̱śvata̍: soma̱ vṛṣṇya̍m | bhavā̱ vāja̍sya saṃga̱the

तुभ्यं॒ गावो॑ घृ॒तं पयो॒ बभ्रो॑ दुदु॒ह्रे अक्षि॑तम् । वर्षि॑ष्ठे॒ अधि॒ सान॑वि ॥9.31.5॥

tubhya̱ṃ gāvo̍ ghṛ̱taṃ payo̱ babhro̍ dudu̱hre akṣi̍tam | varṣi̍ṣṭhe̱ adhi̱ sāna̍vi

स्वा॒यु॒धस्य॑ ते स॒तो भुव॑नस्य पते व॒यम् । इन्दो॑ सखि॒त्वमु॑श्मसि ॥9.31.6॥

svā̱yu̱dhasya̍ te sa̱to bhuva̍nasya pate va̱yam | indo̍ sakhi̱tvamu̍śmasi

६ श्यावाश्व आत्रेय: । पवमान: सोम: । गायत्री ।

प्र सोमा॑सो मद॒च्युत॒: श्रव॑से नो म॒घोन॑: । सु॒ता वि॒दथे॑ अक्रमुः ॥9.32.1॥

pra somā̍so mada̱cyuta̱: śrava̍se no ma̱ghona̍: | su̱tā vi̱dathe̍ akramuḥ

आदीं॑ त्रि॒तस्य॒ योष॑णो॒ हरिं॑ हिन्व॒न्त्यद्रि॑भिः । इन्दु॒मिन्द्रा॑य पी॒तये॑ ॥9.32.2॥

ādī̍ṃ tri̱tasya̱ yoṣa̍ṇo̱ hari̍ṃ hinva̱ntyadri̍bhiḥ | indu̱mindrā̍ya pī̱taye̍

आदीं॑ हं॒सो यथा॑ ग॒णं विश्व॑स्यावीवशन्म॒तिम् । अत्यो॒ न गोभि॑रज्यते ॥9.32.3॥

ādī̍ṃ ha̱ṃso yathā̍ ga̱ṇaṃ viśva̍syāvīvaśanma̱tim | atyo̱ na gobhi̍rajyate

उ॒भे सो॑माव॒चाक॑शन्मृ॒गो न त॒क्तो अ॑र्षसि । सीद॑न्नृ॒तस्य॒ योनि॒मा ॥9.32.4॥

u̱bhe so̍māva̱cāka̍śanmṛ̱go na ta̱kto a̍rṣasi | sīda̍nnṛ̱tasya̱ yoni̱mā

अ॒भि गावो॑ अनूषत॒ योषा॑ जा॒रमि॑व प्रि॒यम् । अग॑न्ना॒जिं यथा॑ हि॒तम् ॥9.32.5॥

a̱bhi gāvo̍ anūṣata̱ yoṣā̍ jā̱rami̍va pri̱yam | aga̍nnā̱jiṃ yathā̍ hi̱tam

अ॒स्मे धे॑हि द्यु॒मद्यशो॑ म॒घव॑द्भ्यश्च॒ मह्यं॑ च । स॒निं मे॒धामु॒त श्रव॑: ॥9.32.6॥

a̱sme dhe̍hi dyu̱madyaśo̍ ma̱ghava̍dbhyaśca̱ mahya̍ṃ ca | sa̱niṃ me̱dhāmu̱ta śrava̍:

६ त्रित आप्त्य: । पवमान: सोम: । गायत्री ।

प्र सोमा॑सो विप॒श्चितो॒ऽपां न य॑न्त्यू॒र्मय॑: । वना॑नि महि॒षा इ॑व ॥9.33.1॥

pra somā̍so vipa̱ścito̱'pāṃ na ya̍ntyū̱rmaya̍: | vanā̍ni mahi̱ṣā i̍va

अ॒भि द्रोणा॑नि ब॒भ्रव॑: शु॒क्रा ऋ॒तस्य॒ धार॑या । वाजं॒ गोम॑न्तमक्षरन् ॥9.33.2॥

a̱bhi droṇā̍ni ba̱bhrava̍: śu̱krā ṛ̱tasya̱ dhāra̍yā | vāja̱ṃ goma̍ntamakṣaran

सु॒ता इन्द्रा॑य वा॒यवे॒ वरु॑णाय म॒रुद्भ्य॑: । सोमा॑ अर्षन्ति॒ विष्ण॑वे ॥9.33.3॥

su̱tā indrā̍ya vā̱yave̱ varu̍ṇāya ma̱rudbhya̍: | somā̍ arṣanti̱ viṣṇa̍ve

ति॒स्रो वाच॒ उदी॑रते॒ गावो॑ मिमन्ति धे॒नव॑: । हरि॑रेति॒ कनि॑क्रदत् ॥9.33.4॥

ti̱sro vāca̱ udī̍rate̱ gāvo̍ mimanti dhe̱nava̍: | hari̍reti̱ kani̍kradat

अ॒भि ब्रह्मी॑रनूषत य॒ह्वीॠ॒तस्य॑ मा॒तर॑: । म॒र्मृ॒ज्यन्ते॑ दि॒वः शिशु॑म् ॥9.33.5॥

a̱bhi brahmī̍ranūṣata ya̱hvīṝ̱tasya̍ mā̱tara̍: | ma̱rmṛ̱jyante̍ di̱vaḥ śiśu̍m

रा॒यः स॑मु॒द्राँश्च॒तुरो॒ऽस्मभ्यं॑ सोम वि॒श्वत॑: । आ प॑वस्व सह॒स्रिण॑: ॥9.33.6॥

rā̱yaḥ sa̍mu̱drām̐śca̱turo̱'smabhya̍ṃ soma vi̱śvata̍: | ā pa̍vasva saha̱sriṇa̍:

६ त्रित आप्त्य: । पवमान: सोम: । गायत्री ।

प्र सु॑वा॒नो धार॑या॒ तनेन्दु॑र्हिन्वा॒नो अ॑र्षति । रु॒जद्दृ॒ळ्हा व्योज॑सा ॥9.34.1॥

pra su̍vā̱no dhāra̍yā̱ tanendu̍rhinvā̱no a̍rṣati | ru̱jaddṛ̱l̤hā vyoja̍sā

सु॒त इन्द्रा॑य वा॒यवे॒ वरु॑णाय म॒रुद्भ्य॑: । सोमो॑ अर्षति॒ विष्ण॑वे ॥9.34.2॥

su̱ta indrā̍ya vā̱yave̱ varu̍ṇāya ma̱rudbhya̍: | somo̍ arṣati̱ viṣṇa̍ve

वृषा॑णं॒ वृष॑भिर्य॒तं सु॒न्वन्ति॒ सोम॒मद्रि॑भिः । दु॒हन्ति॒ शक्म॑ना॒ पय॑: ॥9.34.3॥

vṛṣā̍ṇa̱ṃ vṛṣa̍bhirya̱taṃ su̱nvanti̱ soma̱madri̍bhiḥ | du̱hanti̱ śakma̍nā̱ paya̍:

भुव॑त्त्रि॒तस्य॒ मर्ज्यो॒ भुव॒दिन्द्रा॑य मत्स॒रः । सं रू॒पैर॑ज्यते॒ हरि॑: ॥9.34.4॥

bhuva̍ttri̱tasya̱ marjyo̱ bhuva̱dindrā̍ya matsa̱raḥ | saṃ rū̱paira̍jyate̱ hari̍:

अ॒भीमृ॒तस्य॑ वि॒ष्टपं॑ दुह॒ते पृश्नि॑मातरः । चारु॑ प्रि॒यत॑मं ह॒विः ॥9.34.5॥

a̱bhīmṛ̱tasya̍ vi̱ṣṭapa̍ṃ duha̱te pṛśni̍mātaraḥ | cāru̍ pri̱yata̍maṃ ha̱viḥ

समे॑न॒मह्रु॑ता इ॒मा गिरो॑ अर्षन्ति स॒स्रुत॑: । धे॒नूर्वा॒श्रो अ॑वीवशत् ॥9.34.6॥

same̍na̱mahru̍tā i̱mā giro̍ arṣanti sa̱sruta̍: | dhe̱nūrvā̱śro a̍vīvaśat

६ प्रभूवसुराङ्गिरस: । पवमान: सोम: । गायत्री ।

आ न॑: पवस्व॒ धार॑या॒ पव॑मान र॒यिं पृ॒थुम् । यया॒ ज्योति॑र्वि॒दासि॑ नः ॥9.35.1॥

ā na̍: pavasva̱ dhāra̍yā̱ pava̍māna ra̱yiṃ pṛ̱thum | yayā̱ jyoti̍rvi̱dāsi̍ naḥ

इन्दो॑ समुद्रमीङ्खय॒ पव॑स्व विश्वमेजय । रा॒यो ध॒र्ता न॒ ओज॑सा ॥9.35.2॥

indo̍ samudramīṅkhaya̱ pava̍sva viśvamejaya | rā̱yo dha̱rtā na̱ oja̍sā

त्वया॑ वी॒रेण॑ वीरवो॒ऽभि ष्या॑म पृतन्य॒तः । क्षरा॑ णो अ॒भि वार्य॑म् ॥9.35.3॥

tvayā̍ vī̱reṇa̍ vīravo̱'bhi ṣyā̍ma pṛtanya̱taḥ | kṣarā̍ ṇo a̱bhi vārya̍m

प्र वाज॒मिन्दु॑रिष्यति॒ सिषा॑सन्वाज॒सा ऋषि॑: । व्र॒ता वि॑दा॒न आयु॑धा ॥9.35.4॥

pra vāja̱mindu̍riṣyati̱ siṣā̍sanvāja̱sā ṛṣi̍: | vra̱tā vi̍dā̱na āyu̍dhā

तं गी॒र्भिर्वा॑चमीङ्ख॒यं पु॑ना॒नं वा॑सयामसि । सोम॒ जन॑स्य॒ गोप॑तिम् ॥9.35.5॥

taṃ gī̱rbhirvā̍camīṅkha̱yaṃ pu̍nā̱naṃ vā̍sayāmasi | soma̱ jana̍sya̱ gopa̍tim

विश्वो॒ यस्य॑ व्र॒ते जनो॑ दा॒धार॒ धर्म॑ण॒स्पते॑: । पु॒ना॒नस्य॑ प्र॒भूव॑सोः ॥9.35.6॥

viśvo̱ yasya̍ vra̱te jano̍ dā̱dhāra̱ dharma̍ṇa̱spate̍: | pu̱nā̱nasya̍ pra̱bhūva̍soḥ

६ प्रभूवसुराङ्गिरस: । पवमान: सोम: । गायत्री ।

अस॑र्जि॒ रथ्यो॑ यथा प॒वित्रे॑ च॒म्वो॑: सु॒तः । कार्ष्म॑न्वा॒जी न्य॑क्रमीत् ॥9.36.1॥

asa̍rji̱ rathyo̍ yathā pa̱vitre̍ ca̱mvo̍: su̱taḥ | kārṣma̍nvā̱jī nya̍kramīt

स वह्नि॑: सोम॒ जागृ॑वि॒: पव॑स्व देव॒वीरति॑ । अ॒भि कोशं॑ मधु॒श्चुत॑म् ॥9.36.2॥

sa vahni̍: soma̱ jāgṛ̍vi̱: pava̍sva deva̱vīrati̍ | a̱bhi kośa̍ṃ madhu̱ścuta̍m

स नो॒ ज्योतीं॑षि पूर्व्य॒ पव॑मान॒ वि रो॑चय । क्रत्वे॒ दक्षा॑य नो हिनु ॥9.36.3॥

sa no̱ jyotī̍ṃṣi pūrvya̱ pava̍māna̱ vi ro̍caya | kratve̱ dakṣā̍ya no hinu

शु॒म्भमा॑न ऋता॒युभि॑र्मृ॒ज्यमा॑नो॒ गभ॑स्त्योः । पव॑ते॒ वारे॑ अ॒व्यये॑ ॥9.36.4॥

śu̱mbhamā̍na ṛtā̱yubhi̍rmṛ̱jyamā̍no̱ gabha̍styoḥ | pava̍te̱ vāre̍ a̱vyaye̍

स विश्वा॑ दा॒शुषे॒ वसु॒ सोमो॑ दि॒व्यानि॒ पार्थि॑वा । पव॑ता॒मान्तरि॑क्ष्या ॥9.36.5॥

sa viśvā̍ dā̱śuṣe̱ vasu̱ somo̍ di̱vyāni̱ pārthi̍vā | pava̍tā̱māntari̍kṣyā

आ दि॒वस्पृ॒ष्ठम॑श्व॒युर्ग॑व्य॒युः सो॑म रोहसि । वी॒र॒युः श॑वसस्पते ॥9.36.6॥

ā di̱vaspṛ̱ṣṭhama̍śva̱yurga̍vya̱yuḥ so̍ma rohasi | vī̱ra̱yuḥ śa̍vasaspate

६ रहूगण आङ्गिरस: । पवमान: सोम: । गायत्री ।

स सु॒तः पी॒तये॒ वृषा॒ सोम॑: प॒वित्रे॑ अर्षति । वि॒घ्नन्रक्षां॑सि देव॒युः ॥9.37.1॥

sa su̱taḥ pī̱taye̱ vṛṣā̱ soma̍: pa̱vitre̍ arṣati | vi̱ghnanrakṣā̍ṃsi deva̱yuḥ

स प॒वित्रे॑ विचक्ष॒णो हरि॑रर्षति धर्ण॒सिः । अ॒भि योनिं॒ कनि॑क्रदत् ॥9.37.2॥

sa pa̱vitre̍ vicakṣa̱ṇo hari̍rarṣati dharṇa̱siḥ | a̱bhi yoni̱ṃ kani̍kradat

स वा॒जी रो॑च॒ना दि॒वः पव॑मानो॒ वि धा॑वति । र॒क्षो॒हा वार॑म॒व्यय॑म् ॥9.37.3॥

sa vā̱jī ro̍ca̱nā di̱vaḥ pava̍māno̱ vi dhā̍vati | ra̱kṣo̱hā vāra̍ma̱vyaya̍m

स त्रि॒तस्याधि॒ सान॑वि॒ पव॑मानो अरोचयत् । जा॒मिभि॒: सूर्यं॑ स॒ह ॥9.37.4॥

sa tri̱tasyādhi̱ sāna̍vi̱ pava̍māno arocayat | jā̱mibhi̱: sūrya̍ṃ sa̱ha

स वृ॑त्र॒हा वृषा॑ सु॒तो व॑रिवो॒विददा॑भ्यः । सोमो॒ वाज॑मिवासरत् ॥9.37.5॥

sa vṛ̍tra̱hā vṛṣā̍ su̱to va̍rivo̱vidadā̍bhyaḥ | somo̱ vāja̍mivāsarat

स दे॒वः क॒विने॑षि॒तो॒३ऽभि द्रोणा॑नि धावति । इन्दु॒रिन्द्रा॑य मं॒हना॑ ॥9.37.6॥

sa de̱vaḥ ka̱vine̍ṣi̱to̱3'bhi droṇā̍ni dhāvati | indu̱rindrā̍ya ma̱ṃhanā̍

६ रहूगण आङ्गिरस: । पवमान: सोम: । गायत्री ।

ए॒ष उ॒ स्य वृषा॒ रथोऽव्यो॒ वारे॑भिरर्षति । गच्छ॒न्वाजं॑ सह॒स्रिण॑म् ॥9.38.1॥

e̱ṣa u̱ sya vṛṣā̱ ratho'vyo̱ vāre̍bhirarṣati | gaccha̱nvāja̍ṃ saha̱sriṇa̍m

ए॒तं त्रि॒तस्य॒ योष॑णो॒ हरिं॑ हिन्व॒न्त्यद्रि॑भिः । इन्दु॒मिन्द्रा॑य पी॒तये॑ ॥9.38.2॥

e̱taṃ tri̱tasya̱ yoṣa̍ṇo̱ hari̍ṃ hinva̱ntyadri̍bhiḥ | indu̱mindrā̍ya pī̱taye̍

ए॒तं त्यं ह॒रितो॒ दश॑ मर्मृ॒ज्यन्ते॑ अप॒स्युव॑: । याभि॒र्मदा॑य॒ शुम्भ॑ते ॥9.38.3॥

e̱taṃ tyaṃ ha̱rito̱ daśa̍ marmṛ̱jyante̍ apa̱syuva̍: | yābhi̱rmadā̍ya̱ śumbha̍te

ए॒ष स्य मानु॑षी॒ष्वा श्ये॒नो न वि॒क्षु सी॑दति । गच्छ॑ञ्जा॒रो न यो॒षित॑म् ॥9.38.4॥

e̱ṣa sya mānu̍ṣī̱ṣvā śye̱no na vi̱kṣu sī̍dati | gaccha̍ñjā̱ro na yo̱ṣita̍m

ए॒ष स्य मद्यो॒ रसोऽव॑ चष्टे दि॒वः शिशु॑: । य इन्दु॒र्वार॒मावि॑शत् ॥9.38.5॥

e̱ṣa sya madyo̱ raso'va̍ caṣṭe di̱vaḥ śiśu̍: | ya indu̱rvāra̱māvi̍śat

ए॒ष स्य पी॒तये॑ सु॒तो हरि॑रर्षति धर्ण॒सिः । क्रन्द॒न्योनि॑म॒भि प्रि॒यम् ॥9.38.6॥

e̱ṣa sya pī̱taye̍ su̱to hari̍rarṣati dharṇa̱siḥ | kranda̱nyoni̍ma̱bhi pri̱yam

६ बृहन्मतिराङ्गिरस: । पवमान: सोम: । गायत्री ।

आ॒शुर॑र्ष बृहन्मते॒ परि॑ प्रि॒येण॒ धाम्ना॑ । यत्र॑ दे॒वा इति॒ ब्रव॑न् ॥9.39.1॥

ā̱śura̍rṣa bṛhanmate̱ pari̍ pri̱yeṇa̱ dhāmnā̍ | yatra̍ de̱vā iti̱ brava̍n

प॒रि॒ष्कृ॒ण्वन्ननि॑ष्कृतं॒ जना॑य या॒तय॒न्निष॑: । वृ॒ष्टिं दि॒वः परि॑ स्रव ॥9.39.2॥

pa̱ri̱ṣkṛ̱ṇvannani̍ṣkṛta̱ṃ janā̍ya yā̱taya̱nniṣa̍: | vṛ̱ṣṭiṃ di̱vaḥ pari̍ srava

सु॒त ए॑ति प॒वित्र॒ आ त्विषिं॒ दधा॑न॒ ओज॑सा । वि॒चक्षा॑णो विरो॒चय॑न् ॥9.39.3॥

su̱ta e̍ti pa̱vitra̱ ā tviṣi̱ṃ dadhā̍na̱ oja̍sā | vi̱cakṣā̍ṇo viro̱caya̍n

अ॒यं स यो दि॒वस्परि॑ रघु॒यामा॑ प॒वित्र॒ आ । सिन्धो॑रू॒र्मा व्यक्ष॑रत् ॥9.39.4॥

a̱yaṃ sa yo di̱vaspari̍ raghu̱yāmā̍ pa̱vitra̱ ā | sindho̍rū̱rmā vyakṣa̍rat

आ॒विवा॑सन्परा॒वतो॒ अथो॑ अर्वा॒वत॑: सु॒तः । इन्द्रा॑य सिच्यते॒ मधु॑ ॥9.39.5॥

ā̱vivā̍sanparā̱vato̱ atho̍ arvā̱vata̍: su̱taḥ | indrā̍ya sicyate̱ madhu̍

स॒मी॒ची॒ना अ॑नूषत॒ हरिं॑ हिन्व॒न्त्यद्रि॑भिः । योना॑वृ॒तस्य॑ सीदत ॥9.39.6॥

sa̱mī̱cī̱nā a̍nūṣata̱ hari̍ṃ hinva̱ntyadri̍bhiḥ | yonā̍vṛ̱tasya̍ sīdata

६ बृहन्मतिराङ्गिरस: । पवमान: सोम: । गायत्री ।

पु॒ना॒नो अ॑क्रमीद॒भि विश्वा॒ मृधो॒ विच॑र्षणिः । शु॒म्भन्ति॒ विप्रं॑ धी॒तिभि॑: ॥9.40.1॥

pu̱nā̱no a̍kramīda̱bhi viśvā̱ mṛdho̱ vica̍rṣaṇiḥ | śu̱mbhanti̱ vipra̍ṃ dhī̱tibhi̍:

आ योनि॑मरु॒णो रु॑ह॒द्गम॒दिन्द्रं॒ वृषा॑ सु॒तः । ध्रु॒वे सद॑सि सीदति ॥9.40.2॥

ā yoni̍maru̱ṇo ru̍ha̱dgama̱dindra̱ṃ vṛṣā̍ su̱taḥ | dhru̱ve sada̍si sīdati

नू नो॑ र॒यिं म॒हामि॑न्दो॒ऽस्मभ्यं॑ सोम वि॒श्वत॑: । आ प॑वस्व सह॒स्रिण॑म् ॥9.40.3॥

nū no̍ ra̱yiṃ ma̱hāmi̍ndo̱'smabhya̍ṃ soma vi̱śvata̍: | ā pa̍vasva saha̱sriṇa̍m

विश्वा॑ सोम पवमान द्यु॒म्नानी॑न्द॒वा भ॑र । वि॒दाः स॑ह॒स्रिणी॒रिष॑: ॥9.40.4॥

viśvā̍ soma pavamāna dyu̱mnānī̍nda̱vā bha̍ra | vi̱dāḥ sa̍ha̱sriṇī̱riṣa̍:

स न॑: पुना॒न आ भ॑र र॒यिं स्तो॒त्रे सु॒वीर्य॑म् । ज॒रि॒तुर्व॑र्धया॒ गिर॑: ॥9.40.5॥

sa na̍: punā̱na ā bha̍ra ra̱yiṃ sto̱tre su̱vīrya̍m | ja̱ri̱turva̍rdhayā̱ gira̍:

पु॒ना॒न इ॑न्द॒वा भ॑र॒ सोम॑ द्वि॒बर्ह॑सं र॒यिम् । वृष॑न्निन्दो न उ॒क्थ्य॑म् ॥9.40.6॥

pu̱nā̱na i̍nda̱vā bha̍ra̱ soma̍ dvi̱barha̍saṃ ra̱yim | vṛṣa̍nnindo na u̱kthya̍m

६ मेध्यातिथि: काण्व: । पवमान: सोम: । गायत्री ।

प्र ये गावो॒ न भूर्ण॑यस्त्वे॒षा अ॒यासो॒ अक्र॑मुः । घ्नन्त॑: कृ॒ष्णामप॒ त्वच॑म् ॥9.41.1॥

pra ye gāvo̱ na bhūrṇa̍yastve̱ṣā a̱yāso̱ akra̍muḥ | ghnanta̍: kṛ̱ṣṇāmapa̱ tvaca̍m

सु॒वि॒तस्य॑ मनाम॒हेऽति॒ सेतुं॑ दुरा॒व्य॑म् । सा॒ह्वांसो॒ दस्यु॑मव्र॒तम् ॥9.41.2॥

su̱vi̱tasya̍ manāma̱he'ti̱ setu̍ṃ durā̱vya̍m | sā̱hvāṃso̱ dasyu̍mavra̱tam

शृ॒ण्वे वृ॒ष्टेरि॑व स्व॒नः पव॑मानस्य शु॒ष्मिण॑: । चर॑न्ति वि॒द्युतो॑ दि॒वि ॥9.41.3॥

śṛ̱ṇve vṛ̱ṣṭeri̍va sva̱naḥ pava̍mānasya śu̱ṣmiṇa̍: | cara̍nti vi̱dyuto̍ di̱vi

आ प॑वस्व म॒हीमिषं॒ गोम॑दिन्दो॒ हिर॑ण्यवत् । अश्वा॑व॒द्वाज॑वत्सु॒तः ॥9.41.4॥

ā pa̍vasva ma̱hīmiṣa̱ṃ goma̍dindo̱ hira̍ṇyavat | aśvā̍va̱dvāja̍vatsu̱taḥ

स प॑वस्व विचर्षण॒ आ म॒ही रोद॑सी पृण । उ॒षाः सूर्यो॒ न र॒श्मिभि॑: ॥9.41.5॥

sa pa̍vasva vicarṣaṇa̱ ā ma̱hī roda̍sī pṛṇa | u̱ṣāḥ sūryo̱ na ra̱śmibhi̍:

परि॑ णः शर्म॒यन्त्या॒ धार॑या सोम वि॒श्वत॑: । सरा॑ र॒सेव॑ वि॒ष्टप॑म् ॥9.41.6॥

pari̍ ṇaḥ śarma̱yantyā̱ dhāra̍yā soma vi̱śvata̍: | sarā̍ ra̱seva̍ vi̱ṣṭapa̍m

६ मेध्यातिथि: काण्व: । पवमान: सोम: । गायत्री ।

ज॒नय॑न्रोच॒ना दि॒वो ज॒नय॑न्न॒प्सु सूर्य॑म् । वसा॑नो॒ गा अ॒पो हरि॑: ॥9.42.1॥

ja̱naya̍nroca̱nā di̱vo ja̱naya̍nna̱psu sūrya̍m | vasā̍no̱ gā a̱po hari̍:

ए॒ष प्र॒त्नेन॒ मन्म॑ना दे॒वो दे॒वेभ्य॒स्परि॑ । धार॑या पवते सु॒तः ॥9.42.2॥

e̱ṣa pra̱tnena̱ manma̍nā de̱vo de̱vebhya̱spari̍ | dhāra̍yā pavate su̱taḥ

वा॒वृ॒धा॒नाय॒ तूर्व॑ये॒ पव॑न्ते॒ वाज॑सातये । सोमा॑: स॒हस्र॑पाजसः ॥9.42.3॥

vā̱vṛ̱dhā̱nāya̱ tūrva̍ye̱ pava̍nte̱ vāja̍sātaye | somā̍: sa̱hasra̍pājasaḥ

दु॒हा॒नः प्र॒त्नमित्पय॑: प॒वित्रे॒ परि॑ षिच्यते । क्रन्द॑न्दे॒वाँ अ॑जीजनत् ॥9.42.4॥

du̱hā̱naḥ pra̱tnamitpaya̍: pa̱vitre̱ pari̍ ṣicyate | kranda̍nde̱vām̐ a̍jījanat

अ॒भि विश्वा॑नि॒ वार्या॒भि दे॒वाँ ऋ॑ता॒वृध॑: । सोम॑: पुना॒नो अ॑र्षति ॥9.42.5॥

a̱bhi viśvā̍ni̱ vāryā̱bhi de̱vām̐ ṛ̍tā̱vṛdha̍: | soma̍: punā̱no a̍rṣati

गोम॑न्नः सोम वी॒रव॒दश्वा॑व॒द्वाज॑वत्सु॒तः । पव॑स्व बृह॒तीरिष॑: ॥9.42.6॥

goma̍nnaḥ soma vī̱rava̱daśvā̍va̱dvāja̍vatsu̱taḥ | pava̍sva bṛha̱tīriṣa̍:

६ मेध्यातिथि: काण्व: । पवमान: सोम: । गायत्री ।

यो अत्य॑ इव मृ॒ज्यते॒ गोभि॒र्मदा॑य हर्य॒तः । तं गी॒र्भिर्वा॑सयामसि ॥9.43.1॥

yo atya̍ iva mṛ̱jyate̱ gobhi̱rmadā̍ya harya̱taḥ | taṃ gī̱rbhirvā̍sayāmasi

तं नो॒ विश्वा॑ अव॒स्युवो॒ गिर॑: शुम्भन्ति पू॒र्वथा॑ । इन्दु॒मिन्द्रा॑य पी॒तये॑ ॥9.43.2॥

taṃ no̱ viśvā̍ ava̱syuvo̱ gira̍: śumbhanti pū̱rvathā̍ | indu̱mindrā̍ya pī̱taye̍

पु॒ना॒नो या॑ति हर्य॒तः सोमो॑ गी॒र्भिः परि॑ष्कृतः । विप्र॑स्य॒ मेध्या॑तिथेः ॥9.43.3॥

pu̱nā̱no yā̍ti harya̱taḥ somo̍ gī̱rbhiḥ pari̍ṣkṛtaḥ | vipra̍sya̱ medhyā̍titheḥ

पव॑मान वि॒दा र॒यिम॒स्मभ्यं॑ सोम सु॒श्रिय॑म् । इन्दो॑ स॒हस्र॑वर्चसम् ॥9.43.4॥

pava̍māna vi̱dā ra̱yima̱smabhya̍ṃ soma su̱śriya̍m | indo̍ sa̱hasra̍varcasam

इन्दु॒रत्यो॒ न वा॑ज॒सृत्कनि॑क्रन्ति प॒वित्र॒ आ । यदक्षा॒रति॑ देव॒युः ॥9.43.5॥

indu̱ratyo̱ na vā̍ja̱sṛtkani̍kranti pa̱vitra̱ ā | yadakṣā̱rati̍ deva̱yuḥ

पव॑स्व॒ वाज॑सातये॒ विप्र॑स्य गृण॒तो वृ॒धे । सोम॒ रास्व॑ सु॒वीर्य॑म् ॥9.43.6॥

pava̍sva̱ vāja̍sātaye̱ vipra̍sya gṛṇa̱to vṛ̱dhe | soma̱ rāsva̍ su̱vīrya̍m

६ अयास्य आङ्गिरस: । पवमान: सोम: । गायत्री ।

प्र ण॑ इन्दो म॒हे तन॑ ऊ॒र्मिं न बिभ्र॑दर्षसि । अ॒भि दे॒वाँ अ॒यास्य॑: ॥9.44.1॥

pra ṇa̍ indo ma̱he tana̍ ū̱rmiṃ na bibhra̍darṣasi | a̱bhi de̱vām̐ a̱yāsya̍:

म॒ती जु॒ष्टो धि॒या हि॒तः सोमो॑ हिन्वे परा॒वति॑ । विप्र॑स्य॒ धार॑या क॒विः ॥9.44.2॥

ma̱tī ju̱ṣṭo dhi̱yā hi̱taḥ somo̍ hinve parā̱vati̍ | vipra̍sya̱ dhāra̍yā ka̱viḥ

अ॒यं दे॒वेषु॒ जागृ॑विः सु॒त ए॑ति प॒वित्र॒ आ । सोमो॑ याति॒ विच॑र्षणिः ॥9.44.3॥

a̱yaṃ de̱veṣu̱ jāgṛ̍viḥ su̱ta e̍ti pa̱vitra̱ ā | somo̍ yāti̱ vica̍rṣaṇiḥ

स न॑: पवस्व वाज॒युश्च॑क्रा॒णश्चारु॑मध्व॒रम् । ब॒र्हिष्माँ॒ आ वि॑वासति ॥9.44.4॥

sa na̍: pavasva vāja̱yuśca̍krā̱ṇaścāru̍madhva̱ram | ba̱rhiṣmā̱m̐ ā vi̍vāsati

स नो॒ भगा॑य वा॒यवे॒ विप्र॑वीरः स॒दावृ॑धः । सोमो॑ दे॒वेष्वा य॑मत् ॥9.44.5॥

sa no̱ bhagā̍ya vā̱yave̱ vipra̍vīraḥ sa̱dāvṛ̍dhaḥ | somo̍ de̱veṣvā ya̍mat

स नो॑ अ॒द्य वसु॑त्तये क्रतु॒विद्गा॑तु॒वित्त॑मः । वाजं॑ जेषि॒ श्रवो॑ बृ॒हत् ॥9.44.6॥

sa no̍ a̱dya vasu̍ttaye kratu̱vidgā̍tu̱vitta̍maḥ | vāja̍ṃ jeṣi̱ śravo̍ bṛ̱hat

६ अयास्य आङ्गिरस: । पवमान: सोम: । गायत्री ।

स प॑वस्व॒ मदा॑य॒ कं नृ॒चक्षा॑ दे॒ववी॑तये । इन्द॒विन्द्रा॑य पी॒तये॑ ॥9.45.1॥

sa pa̍vasva̱ madā̍ya̱ kaṃ nṛ̱cakṣā̍ de̱vavī̍taye | inda̱vindrā̍ya pī̱taye̍

स नो॑ अर्षा॒भि दू॒त्यं१ त्वमिन्द्रा॑य तोशसे । दे॒वान्त्सखि॑भ्य॒ आ वर॑म् ॥9.45.2॥

sa no̍ arṣā̱bhi dū̱tyaṃ1 tvamindrā̍ya tośase | de̱vāntsakhi̍bhya̱ ā vara̍m

उ॒त त्वाम॑रु॒णं व॒यं गोभि॑रञ्ज्मो॒ मदा॑य॒ कम् । वि नो॑ रा॒ये दुरो॑ वृधि ॥9.45.3॥

u̱ta tvāma̍ru̱ṇaṃ va̱yaṃ gobhi̍rañjmo̱ madā̍ya̱ kam | vi no̍ rā̱ye duro̍ vṛdhi

अत्यू॑ प॒वित्र॑मक्रमीद्वा॒जी धुरं॒ न याम॑नि । इन्दु॑र्दे॒वेषु॑ पत्यते ॥9.45.4॥

atyū̍ pa̱vitra̍makramīdvā̱jī dhura̱ṃ na yāma̍ni | indu̍rde̱veṣu̍ patyate

समी॒ सखा॑यो अस्वर॒न्वने॒ क्रीळ॑न्त॒मत्य॑विम् । इन्दुं॑ ना॒वा अ॑नूषत ॥9.45.5॥

samī̱ sakhā̍yo asvara̱nvane̱ krīl̤a̍nta̱matya̍vim | indu̍ṃ nā̱vā a̍nūṣata

तया॑ पवस्व॒ धार॑या॒ यया॑ पी॒तो वि॒चक्ष॑से । इन्दो॑ स्तो॒त्रे सु॒वीर्य॑म् ॥9.45.6॥

tayā̍ pavasva̱ dhāra̍yā̱ yayā̍ pī̱to vi̱cakṣa̍se | indo̍ sto̱tre su̱vīrya̍m

६ अयास्य आङ्गिरस: । पवमान: सोम: । गायत्री ।

असृ॑ग्रन्दे॒ववी॑त॒येऽत्या॑स॒: कृत्व्या॑ इव । क्षर॑न्तः पर्वता॒वृध॑: ॥9.46.1॥

asṛ̍grande̱vavī̍ta̱ye'tyā̍sa̱: kṛtvyā̍ iva | kṣara̍ntaḥ parvatā̱vṛdha̍:

परि॑ष्कृतास॒ इन्द॑वो॒ योषे॑व॒ पित्र्या॑वती । वा॒युं सोमा॑ असृक्षत ॥9.46.2॥

pari̍ṣkṛtāsa̱ inda̍vo̱ yoṣe̍va̱ pitryā̍vatī | vā̱yuṃ somā̍ asṛkṣata

ए॒ते सोमा॑स॒ इन्द॑व॒: प्रय॑स्वन्तश्च॒मू सु॒ताः । इन्द्रं॑ वर्धन्ति॒ कर्म॑भिः ॥9.46.3॥

e̱te somā̍sa̱ inda̍va̱: praya̍svantaśca̱mū su̱tāḥ | indra̍ṃ vardhanti̱ karma̍bhiḥ

आ धा॑वता सुहस्त्यः शु॒क्रा गृ॑भ्णीत म॒न्थिना॑ । गोभि॑: श्रीणीत मत्स॒रम् ॥9.46.4॥

ā dhā̍vatā suhastyaḥ śu̱krā gṛ̍bhṇīta ma̱nthinā̍ | gobhi̍: śrīṇīta matsa̱ram

स प॑वस्व धनंजय प्रय॒न्ता राध॑सो म॒हः । अ॒स्मभ्यं॑ सोम गातु॒वित् ॥9.46.5॥

sa pa̍vasva dhanaṃjaya praya̱ntā rādha̍so ma̱haḥ | a̱smabhya̍ṃ soma gātu̱vit

ए॒तं मृ॑जन्ति॒ मर्ज्यं॒ पव॑मानं॒ दश॒ क्षिप॑: । इन्द्रा॑य मत्स॒रं मद॑म् ॥9.46.6॥

e̱taṃ mṛ̍janti̱ marjya̱ṃ pava̍māna̱ṃ daśa̱ kṣipa̍: | indrā̍ya matsa̱raṃ mada̍m

५ कविर्भार्गव: । पवमान: सोम: । गायत्री ।

अ॒या सोम॑: सुकृ॒त्यया॑ म॒हश्चि॑द॒भ्य॑वर्धत । म॒न्दा॒न उद्वृ॑षायते ॥9.47.1॥

a̱yā soma̍: sukṛ̱tyayā̍ ma̱haści̍da̱bhya̍vardhata | ma̱ndā̱na udvṛ̍ṣāyate

कृ॒तानीद॑स्य॒ कर्त्वा॒ चेत॑न्ते दस्यु॒तर्ह॑णा । ऋ॒णा च॑ धृ॒ष्णुश्च॑यते ॥9.47.2॥

kṛ̱tānīda̍sya̱ kartvā̱ ceta̍nte dasyu̱tarha̍ṇā | ṛ̱ṇā ca̍ dhṛ̱ṣṇuśca̍yate

आत्सोम॑ इन्द्रि॒यो रसो॒ वज्र॑: सहस्र॒सा भु॑वत् । उ॒क्थं यद॑स्य॒ जाय॑ते ॥9.47.3॥

ātsoma̍ indri̱yo raso̱ vajra̍: sahasra̱sā bhu̍vat | u̱kthaṃ yada̍sya̱ jāya̍te

स्व॒यं क॒विर्वि॑ध॒र्तरि॒ विप्रा॑य॒ रत्न॑मिच्छति । यदी॑ मर्मृ॒ज्यते॒ धिय॑: ॥9.47.4॥

sva̱yaṃ ka̱virvi̍dha̱rtari̱ viprā̍ya̱ ratna̍micchati | yadī̍ marmṛ̱jyate̱ dhiya̍:

सि॒षा॒सतू॑ रयी॒णां वाजे॒ष्वर्व॑तामिव । भरे॑षु जि॒ग्युषा॑मसि ॥9.47.5॥

si̱ṣā̱satū̍ rayī̱ṇāṃ vāje̱ṣvarva̍tāmiva | bhare̍ṣu ji̱gyuṣā̍masi

५ कविर्भार्गव: । पवमान: सोम: । गायत्री ।

तं त्वा॑ नृ॒म्णानि॒ बिभ्र॑तं स॒धस्थे॑षु म॒हो दि॒वः । चारुं॑ सुकृ॒त्यये॑महे ॥9.48.1॥

taṃ tvā̍ nṛ̱mṇāni̱ bibhra̍taṃ sa̱dhasthe̍ṣu ma̱ho di̱vaḥ | cāru̍ṃ sukṛ̱tyaye̍mahe

संवृ॑क्तधृष्णुमु॒क्थ्यं॑ म॒हाम॑हिव्रतं॒ मद॑म् । श॒तं पुरो॑ रुरु॒क्षणि॑म् ॥9.48.2॥

saṃvṛ̍ktadhṛṣṇumu̱kthya̍ṃ ma̱hāma̍hivrata̱ṃ mada̍m | śa̱taṃ puro̍ ruru̱kṣaṇi̍m

अत॑स्त्वा र॒यिम॒भि राजा॑नं सुक्रतो दि॒वः । सु॒प॒र्णो अ॑व्य॒थिर्भ॑रत् ॥9.48.3॥

ata̍stvā ra̱yima̱bhi rājā̍naṃ sukrato di̱vaḥ | su̱pa̱rṇo a̍vya̱thirbha̍rat

विश्व॑स्मा॒ इत्स्व॑र्दृ॒शे साधा॑रणं रज॒स्तुर॑म् । गो॒पामृ॒तस्य॒ विर्भ॑रत् ॥9.48.4॥

viśva̍smā̱ itsva̍rdṛ̱śe sādhā̍raṇaṃ raja̱stura̍m | go̱pāmṛ̱tasya̱ virbha̍rat

अधा॑ हिन्वा॒न इ॑न्द्रि॒यं ज्यायो॑ महि॒त्वमा॑नशे । अ॒भि॒ष्टि॒कृद्विच॑र्षणिः ॥9.48.5॥

adhā̍ hinvā̱na i̍ndri̱yaṃ jyāyo̍ mahi̱tvamā̍naśe | a̱bhi̱ṣṭi̱kṛdvica̍rṣaṇiḥ

५ कविर्भार्गव: । पवमान: सोम: । गायत्री ।

पव॑स्व वृ॒ष्टिमा सु नो॒ऽपामू॒र्मिं दि॒वस्परि॑ । अ॒य॒क्ष्मा बृ॑ह॒तीरिष॑: ॥9.49.1॥

pava̍sva vṛ̱ṣṭimā su no̱'pāmū̱rmiṃ di̱vaspari̍ | a̱ya̱kṣmā bṛ̍ha̱tīriṣa̍:

तया॑ पवस्व॒ धार॑या॒ यया॒ गाव॑ इ॒हागम॑न् । जन्या॑स॒ उप॑ नो गृ॒हम् ॥9.49.2॥

tayā̍ pavasva̱ dhāra̍yā̱ yayā̱ gāva̍ i̱hāgama̍n | janyā̍sa̱ upa̍ no gṛ̱ham

घृ॒तं प॑वस्व॒ धार॑या य॒ज्ञेषु॑ देव॒वीत॑मः । अ॒स्मभ्यं॑ वृ॒ष्टिमा प॑व ॥9.49.3॥

ghṛ̱taṃ pa̍vasva̱ dhāra̍yā ya̱jñeṣu̍ deva̱vīta̍maḥ | a̱smabhya̍ṃ vṛ̱ṣṭimā pa̍va

स न॑ ऊ॒र्जे व्य१व्ययं॑ प॒वित्रं॑ धाव॒ धार॑या । दे॒वास॑: शृ॒णव॒न्हि क॑म् ॥9.49.4॥

sa na̍ ū̱rje vya1vyaya̍ṃ pa̱vitra̍ṃ dhāva̱ dhāra̍yā | de̱vāsa̍: śṛ̱ṇava̱nhi ka̍m

पव॑मानो असिष्यद॒द्रक्षां॑स्यप॒जङ्घ॑नत् । प्र॒त्न॒वद्रो॒चय॒न्रुच॑: ॥9.49.5॥

pava̍māno asiṣyada̱drakṣā̍ṃsyapa̱jaṅgha̍nat | pra̱tna̱vadro̱caya̱nruca̍:

५ उचथ्य आङ्गिरस: । पवमान: सोम: । गायत्री ।

उत्ते॒ शुष्मा॑स ईरते॒ सिन्धो॑रू॒र्मेरि॑व स्व॒नः । वा॒णस्य॑ चोदया प॒विम् ॥9.50.1॥

utte̱ śuṣmā̍sa īrate̱ sindho̍rū̱rmeri̍va sva̱naḥ | vā̱ṇasya̍ codayā pa̱vim

प्र॒स॒वे त॒ उदी॑रते ति॒स्रो वाचो॑ मख॒स्युव॑: । यदव्य॒ एषि॒ सान॑वि ॥9.50.2॥

pra̱sa̱ve ta̱ udī̍rate ti̱sro vāco̍ makha̱syuva̍: | yadavya̱ eṣi̱ sāna̍vi

अव्यो॒ वारे॒ परि॑ प्रि॒यं हरिं॑ हिन्व॒न्त्यद्रि॑भिः । पव॑मानं मधु॒श्चुत॑म् ॥9.50.3॥

avyo̱ vāre̱ pari̍ pri̱yaṃ hari̍ṃ hinva̱ntyadri̍bhiḥ | pava̍mānaṃ madhu̱ścuta̍m

आ प॑वस्व मदिन्तम प॒वित्रं॒ धार॑या कवे । अ॒र्कस्य॒ योनि॑मा॒सद॑म् ॥9.50.4॥

ā pa̍vasva madintama pa̱vitra̱ṃ dhāra̍yā kave | a̱rkasya̱ yoni̍mā̱sada̍m

स प॑वस्व मदिन्तम॒ गोभि॑रञ्जा॒नो अ॒क्तुभि॑: । इन्द॒विन्द्रा॑य पी॒तये॑ ॥9.50.5॥

sa pa̍vasva madintama̱ gobhi̍rañjā̱no a̱ktubhi̍: | inda̱vindrā̍ya pī̱taye̍

५ उचथ्य आङ्गिरस: । पवमान: सोम: । गायत्री ।

अध्व॑र्यो॒ अद्रि॑भिः सु॒तं सोमं॑ प॒वित्र॒ आ सृ॑ज । पु॒नी॒हीन्द्रा॑य॒ पात॑वे ॥9.51.1॥

adhva̍ryo̱ adri̍bhiḥ su̱taṃ soma̍ṃ pa̱vitra̱ ā sṛ̍ja | pu̱nī̱hīndrā̍ya̱ pāta̍ve

दि॒वः पी॒यूष॑मुत्त॒मं सोम॒मिन्द्रा॑य व॒ज्रिणे॑ । सु॒नोता॒ मधु॑मत्तमम् ॥9.51.2॥

di̱vaḥ pī̱yūṣa̍mutta̱maṃ soma̱mindrā̍ya va̱jriṇe̍ | su̱notā̱ madhu̍mattamam

तव॒ त्य इ॑न्दो॒ अन्ध॑सो दे॒वा मधो॒र्व्य॑श्नते । पव॑मानस्य म॒रुत॑: ॥9.51.3॥

tava̱ tya i̍ndo̱ andha̍so de̱vā madho̱rvya̍śnate | pava̍mānasya ma̱ruta̍:

त्वं हि सो॑म व॒र्धय॑न्त्सु॒तो मदा॑य॒ भूर्ण॑ये । वृष॑न्त्स्तो॒तार॑मू॒तये॑ ॥9.51.4॥

tvaṃ hi so̍ma va̱rdhaya̍ntsu̱to madā̍ya̱ bhūrṇa̍ye | vṛṣa̍ntsto̱tāra̍mū̱taye̍

अ॒भ्य॑र्ष विचक्षण प॒वित्रं॒ धार॑या सु॒तः । अ॒भि वाज॑मु॒त श्रव॑: ॥9.51.5॥

a̱bhya̍rṣa vicakṣaṇa pa̱vitra̱ṃ dhāra̍yā su̱taḥ | a̱bhi vāja̍mu̱ta śrava̍:

५ उचथ्य आङ्गिरस: । पवमान: सोम: । गायत्री ।

परि॑ द्यु॒क्षः स॒नद्र॑यि॒र्भर॒द्वाजं॑ नो॒ अन्ध॑सा । सु॒वा॒नो अ॑र्ष प॒वित्र॒ आ ॥9.52.1॥

pari̍ dyu̱kṣaḥ sa̱nadra̍yi̱rbhara̱dvāja̍ṃ no̱ andha̍sā | su̱vā̱no a̍rṣa pa̱vitra̱ ā

तव॑ प्र॒त्नेभि॒रध्व॑भि॒रव्यो॒ वारे॒ परि॑ प्रि॒यः । स॒हस्र॑धारो या॒त्तना॑ ॥9.52.2॥

tava̍ pra̱tnebhi̱radhva̍bhi̱ravyo̱ vāre̱ pari̍ pri̱yaḥ | sa̱hasra̍dhāro yā̱ttanā̍

च॒रुर्न यस्तमी॑ङ्ख॒येन्दो॒ न दान॑मीङ्खय । व॒धैर्व॑धस्नवीङ्खय ॥9.52.3॥

ca̱rurna yastamī̍ṅkha̱yendo̱ na dāna̍mīṅkhaya | va̱dhairva̍dhasnavīṅkhaya

नि शुष्म॑मिन्दवेषां॒ पुरु॑हूत॒ जना॑नाम् । यो अ॒स्माँ आ॒दिदे॑शति ॥9.52.4॥

ni śuṣma̍mindaveṣā̱ṃ puru̍hūta̱ janā̍nām | yo a̱smām̐ ā̱dide̍śati

श॒तं न॑ इन्द ऊ॒तिभि॑: स॒हस्रं॑ वा॒ शुची॑नाम् । पव॑स्व मंह॒यद्र॑यिः ॥9.52.5॥

śa̱taṃ na̍ inda ū̱tibhi̍: sa̱hasra̍ṃ vā̱ śucī̍nām | pava̍sva maṃha̱yadra̍yiḥ

४ अवत्सार: काश्यपः । पवमान: सोम: । गायत्री ।

उत्ते॒ शुष्मा॑सो अस्थू॒ रक्षो॑ भि॒न्दन्तो॑ अद्रिवः । नु॒दस्व॒ याः प॑रि॒स्पृध॑: ॥9.53.1॥

utte̱ śuṣmā̍so asthū̱ rakṣo̍ bhi̱ndanto̍ adrivaḥ | nu̱dasva̱ yāḥ pa̍ri̱spṛdha̍:

अ॒या नि॑ज॒घ्निरोज॑सा रथसं॒गे धने॑ हि॒ते । स्तवा॒ अबि॑भ्युषा हृ॒दा ॥9.53.2॥

a̱yā ni̍ja̱ghniroja̍sā rathasa̱ṃge dhane̍ hi̱te | stavā̱ abi̍bhyuṣā hṛ̱dā

अस्य॑ व्र॒तानि॒ नाधृषे॒ पव॑मानस्य दू॒ढ्या॑ । रु॒ज यस्त्वा॑ पृत॒न्यति॑ ॥9.53.3॥

asya̍ vra̱tāni̱ nādhṛṣe̱ pava̍mānasya dū̱ḍhyā̍ | ru̱ja yastvā̍ pṛta̱nyati̍

तं हि॑न्वन्ति मद॒च्युतं॒ हरिं॑ न॒दीषु॑ वा॒जिन॑म् । इन्दु॒मिन्द्रा॑य मत्स॒रम् ॥9.53.4॥

taṃ hi̍nvanti mada̱cyuta̱ṃ hari̍ṃ na̱dīṣu̍ vā̱jina̍m | indu̱mindrā̍ya matsa̱ram

४ अवत्सार: काश्यपः । पवमान: सोम: । गायत्री ।

अ॒स्य प्र॒त्नामनु॒ द्युतं॑ शु॒क्रं दु॑दुह्रे॒ अह्र॑यः । पय॑: सहस्र॒सामृषि॑म् ॥9.54.1॥

a̱sya pra̱tnāmanu̱ dyuta̍ṃ śu̱kraṃ du̍duhre̱ ahra̍yaḥ | paya̍: sahasra̱sāmṛṣi̍m

अ॒यं सूर्य॑ इवोप॒दृग॒यं सरां॑सि धावति । स॒प्त प्र॒वत॒ आ दिव॑म् ॥9.54.2॥

a̱yaṃ sūrya̍ ivopa̱dṛga̱yaṃ sarā̍ṃsi dhāvati | sa̱pta pra̱vata̱ ā diva̍m

अ॒यं विश्वा॑नि तिष्ठति पुना॒नो भुव॑नो॒परि॑ । सोमो॑ दे॒वो न सूर्य॑: ॥9.54.3॥

a̱yaṃ viśvā̍ni tiṣṭhati punā̱no bhuva̍no̱pari̍ | somo̍ de̱vo na sūrya̍:

परि॑ णो दे॒ववी॑तये॒ वाजाँ॑ अर्षसि॒ गोम॑तः । पु॒ना॒न इ॑न्दविन्द्र॒युः ॥9.54.4॥

pari̍ ṇo de̱vavī̍taye̱ vājā̍m̐ arṣasi̱ goma̍taḥ | pu̱nā̱na i̍ndavindra̱yuḥ

४ अवत्सार: काश्यपः । पवमान: सोम: । गायत्री ।

यवं॑यवं नो॒ अन्ध॑सा पु॒ष्टम्पु॑ष्टं॒ परि॑ स्रव । सोम॒ विश्वा॑ च॒ सौभ॑गा ॥9.55.1॥

yava̍ṃyavaṃ no̱ andha̍sā pu̱ṣṭampu̍ṣṭa̱ṃ pari̍ srava | soma̱ viśvā̍ ca̱ saubha̍gā

इन्दो॒ यथा॒ तव॒ स्तवो॒ यथा॑ ते जा॒तमन्ध॑सः । नि ब॒र्हिषि॑ प्रि॒ये स॑दः ॥9.55.2॥

indo̱ yathā̱ tava̱ stavo̱ yathā̍ te jā̱tamandha̍saḥ | ni ba̱rhiṣi̍ pri̱ye sa̍daḥ

उ॒त नो॑ गो॒विद॑श्व॒वित्पव॑स्व सो॒मान्ध॑सा । म॒क्षूत॑मेभि॒रह॑भिः ॥9.55.3॥

u̱ta no̍ go̱vida̍śva̱vitpava̍sva so̱māndha̍sā | ma̱kṣūta̍mebhi̱raha̍bhiḥ

यो जि॒नाति॒ न जीय॑ते॒ हन्ति॒ शत्रु॑म॒भीत्य॑ । स प॑वस्व सहस्रजित् ॥9.55.4॥

yo ji̱nāti̱ na jīya̍te̱ hanti̱ śatru̍ma̱bhītya̍ | sa pa̍vasva sahasrajit

४ अवत्सार: काश्यपः । पवमान: सोम: । गायत्री ।

परि॒ सोम॑ ऋ॒तं बृ॒हदा॒शुः प॒वित्रे॑ अर्षति । वि॒घ्नन्रक्षां॑सि देव॒युः ॥9.56.1॥

pari̱ soma̍ ṛ̱taṃ bṛ̱hadā̱śuḥ pa̱vitre̍ arṣati | vi̱ghnanrakṣā̍ṃsi deva̱yuḥ

यत्सोमो॒ वाज॒मर्ष॑ति श॒तं धारा॑ अप॒स्युव॑: । इन्द्र॑स्य स॒ख्यमा॑वि॒शन् ॥9.56.2॥

yatsomo̱ vāja̱marṣa̍ti śa̱taṃ dhārā̍ apa̱syuva̍: | indra̍sya sa̱khyamā̍vi̱śan

अ॒भि त्वा॒ योष॑णो॒ दश॑ जा॒रं न क॒न्या॑नूषत । मृ॒ज्यसे॑ सोम सा॒तये॑ ॥9.56.3॥

a̱bhi tvā̱ yoṣa̍ṇo̱ daśa̍ jā̱raṃ na ka̱nyā̍nūṣata | mṛ̱jyase̍ soma sā̱taye̍

त्वमिन्द्रा॑य॒ विष्ण॑वे स्वा॒दुरि॑न्दो॒ परि॑ स्रव । नॄन्त्स्तो॒तॄन्पा॒ह्यंह॑सः ॥9.56.4॥

tvamindrā̍ya̱ viṣṇa̍ve svā̱duri̍ndo̱ pari̍ srava | nṝntsto̱tṝnpā̱hyaṃha̍saḥ

४ अवत्सार: काश्यपः । पवमान: सोम: । गायत्री ।

प्र ते॒ धारा॑ अस॒श्चतो॑ दि॒वो न य॑न्ति वृ॒ष्टय॑: । अच्छा॒ वाजं॑ सह॒स्रिण॑म् ॥9.57.1॥

pra te̱ dhārā̍ asa̱ścato̍ di̱vo na ya̍nti vṛ̱ṣṭaya̍: | acchā̱ vāja̍ṃ saha̱sriṇa̍m

अ॒भि प्रि॒याणि॒ काव्या॒ विश्वा॒ चक्षा॑णो अर्षति । हरि॑स्तुञ्जा॒न आयु॑धा ॥9.57.2॥

a̱bhi pri̱yāṇi̱ kāvyā̱ viśvā̱ cakṣā̍ṇo arṣati | hari̍stuñjā̱na āyu̍dhā

स म॑र्मृजा॒न आ॒युभि॒रिभो॒ राजे॑व सुव्र॒तः । श्ये॒नो न वंसु॑ षीदति ॥9.57.3॥

sa ma̍rmṛjā̱na ā̱yubhi̱ribho̱ rāje̍va suvra̱taḥ | śye̱no na vaṃsu̍ ṣīdati

स नो॒ विश्वा॑ दि॒वो वसू॒तो पृ॑थि॒व्या अधि॑ । पु॒ना॒न इ॑न्द॒वा भ॑र ॥9.57.4॥

sa no̱ viśvā̍ di̱vo vasū̱to pṛ̍thi̱vyā adhi̍ | pu̱nā̱na i̍nda̱vā bha̍ra

४ अवत्सार: काश्यपः । पवमान: सोम: । गायत्री ।

तर॒त्स म॒न्दी धा॑वति॒ धारा॑ सु॒तस्यान्ध॑सः । तर॒त्स म॒न्दी धा॑वति ॥9.58.1॥

tara̱tsa ma̱ndī dhā̍vati̱ dhārā̍ su̱tasyāndha̍saḥ | tara̱tsa ma̱ndī dhā̍vati

उ॒स्रा वे॑द॒ वसू॑नां॒ मर्त॑स्य दे॒व्यव॑सः । तर॒त्स म॒न्दी धा॑वति ॥9.58.2॥

u̱srā ve̍da̱ vasū̍nā̱ṃ marta̍sya de̱vyava̍saḥ | tara̱tsa ma̱ndī dhā̍vati

ध्व॒स्रयो॑: पुरु॒षन्त्यो॒रा स॒हस्रा॑णि दद्महे । तर॒त्स म॒न्दी धा॑वति ॥9.58.3॥

dhva̱srayo̍: puru̱ṣantyo̱rā sa̱hasrā̍ṇi dadmahe | tara̱tsa ma̱ndī dhā̍vati

आ ययो॑स्त्रिं॒शतं॒ तना॑ स॒हस्रा॑णि च॒ दद्म॑हे । तर॒त्स म॒न्दी धा॑वति ॥9.58.4॥

ā yayo̍stri̱ṃśata̱ṃ tanā̍ sa̱hasrā̍ṇi ca̱ dadma̍he | tara̱tsa ma̱ndī dhā̍vati

४ अवत्सार: काश्यपः । पवमान: सोम: । गायत्री ।

पव॑स्व गो॒जिद॑श्व॒जिद्वि॑श्व॒जित्सो॑म रण्य॒जित् । प्र॒जाव॒द्रत्न॒मा भ॑र ॥9.59.1॥

pava̍sva go̱jida̍śva̱jidvi̍śva̱jitso̍ma raṇya̱jit | pra̱jāva̱dratna̱mā bha̍ra

पव॑स्वा॒द्भ्यो अदा॑भ्य॒: पव॒स्वौष॑धीभ्यः । पव॑स्व धि॒षणा॑भ्यः ॥9.59.2॥

pava̍svā̱dbhyo adā̍bhya̱: pava̱svauṣa̍dhībhyaḥ | pava̍sva dhi̱ṣaṇā̍bhyaḥ

त्वं सो॑म॒ पव॑मानो॒ विश्वा॑नि दुरि॒ता त॑र । क॒विः सी॑द॒ नि ब॒र्हिषि॑ ॥9.59.3॥

tvaṃ so̍ma̱ pava̍māno̱ viśvā̍ni duri̱tā ta̍ra | ka̱viḥ sī̍da̱ ni ba̱rhiṣi̍

पव॑मान॒ स्व॑र्विदो॒ जाय॑मानोऽभवो म॒हान् । इन्दो॒ विश्वाँ॑ अ॒भीद॑सि ॥9.59.4॥

pava̍māna̱ sva̍rvido̱ jāya̍māno'bhavo ma̱hān | indo̱ viśvā̍m̐ a̱bhīda̍si

४ अवत्सार: काश्यपः । पवमान: सोम: । गायत्री ।३ पुरउष्णिक ।

प्र गा॑य॒त्रेण॑ गायत॒ पव॑मानं॒ विच॑र्षणिम् । इन्दुं॑ स॒हस्र॑चक्षसम् ॥9.60.1॥

pra gā̍ya̱treṇa̍ gāyata̱ pava̍māna̱ṃ vica̍rṣaṇim | indu̍ṃ sa̱hasra̍cakṣasam

तं त्वा॑ स॒हस्र॑चक्षस॒मथो॑ स॒हस्र॑भर्णसम् । अति॒ वार॑मपाविषुः ॥9.60.2॥

taṃ tvā̍ sa̱hasra̍cakṣasa̱matho̍ sa̱hasra̍bharṇasam | ati̱ vāra̍mapāviṣuḥ

अति॒ वारा॒न्पव॑मानो असिष्यदत्क॒लशाँ॑ अ॒भि धा॑वति । इन्द्र॑स्य॒ हार्द्या॑वि॒शन् ॥9.60.3॥

ati̱ vārā̱npava̍māno asiṣyadatka̱laśā̍m̐ a̱bhi dhā̍vati | indra̍sya̱ hārdyā̍vi̱śan

इन्द्र॑स्य सोम॒ राध॑से॒ शं प॑वस्व विचर्षणे । प्र॒जाव॒द्रेत॒ आ भ॑र ॥9.60.4॥

indra̍sya soma̱ rādha̍se̱ śaṃ pa̍vasva vicarṣaṇe | pra̱jāva̱dreta̱ ā bha̍ra

३० अमहीयुराङ्गिरस: । पवमान: सोम: । गायत्री ।

अ॒या वी॒ती परि॑ स्रव॒ यस्त॑ इन्दो॒ मदे॒ष्वा । अ॒वाह॑न्नव॒तीर्नव॑ ॥9.61.1॥

a̱yā vī̱tī pari̍ srava̱ yasta̍ indo̱ made̱ṣvā | a̱vāha̍nnava̱tīrnava̍

पुर॑: स॒द्य इ॒त्थाधि॑ये॒ दिवो॑दासाय॒ शम्ब॑रम् । अध॒ त्यं तु॒र्वशं॒ यदु॑म् ॥9.61.2॥

pura̍: sa̱dya i̱tthādhi̍ye̱ divo̍dāsāya̱ śamba̍ram | adha̱ tyaṃ tu̱rvaśa̱ṃ yadu̍m

परि॑ णो॒ अश्व॑मश्व॒विद्गोम॑दिन्दो॒ हिर॑ण्यवत् । क्षरा॑ सह॒स्रिणी॒रिष॑: ॥9.61.3॥

pari̍ ṇo̱ aśva̍maśva̱vidgoma̍dindo̱ hira̍ṇyavat | kṣarā̍ saha̱sriṇī̱riṣa̍:

पव॑मानस्य ते व॒यं प॒वित्र॑मभ्युन्द॒तः । स॒खि॒त्वमा वृ॑णीमहे ॥9.61.4॥

pava̍mānasya te va̱yaṃ pa̱vitra̍mabhyunda̱taḥ | sa̱khi̱tvamā vṛ̍ṇīmahe

ये ते॑ प॒वित्र॑मू॒र्मयो॑ऽभि॒क्षर॑न्ति॒ धार॑या । तेभि॑र्नः सोम मृळय ॥9.61.5॥

ye te̍ pa̱vitra̍mū̱rmayo̍'bhi̱kṣara̍nti̱ dhāra̍yā | tebhi̍rnaḥ soma mṛl̤aya

स न॑: पुना॒न आ भ॑र र॒यिं वी॒रव॑ती॒मिष॑म् । ईशा॑नः सोम वि॒श्वत॑: ॥9.61.6॥

sa na̍: punā̱na ā bha̍ra ra̱yiṃ vī̱rava̍tī̱miṣa̍m | īśā̍naḥ soma vi̱śvata̍:

ए॒तमु॒ त्यं दश॒ क्षिपो॑ मृ॒जन्ति॒ सिन्धु॑मातरम् । समा॑दि॒त्येभि॑रख्यत ॥9.61.7॥

e̱tamu̱ tyaṃ daśa̱ kṣipo̍ mṛ̱janti̱ sindhu̍mātaram | samā̍di̱tyebhi̍rakhyata

समिन्द्रे॑णो॒त वा॒युना॑ सु॒त ए॑ति प॒वित्र॒ आ । सं सूर्य॑स्य र॒श्मिभि॑: ॥9.61.8॥

samindre̍ṇo̱ta vā̱yunā̍ su̱ta e̍ti pa̱vitra̱ ā | saṃ sūrya̍sya ra̱śmibhi̍:

स नो॒ भगा॑य वा॒यवे॑ पू॒ष्णे प॑वस्व॒ मधु॑मान् । चारु॑र्मि॒त्रे वरु॑णे च ॥9.61.9॥

sa no̱ bhagā̍ya vā̱yave̍ pū̱ṣṇe pa̍vasva̱ madhu̍mān | cāru̍rmi̱tre varu̍ṇe ca

उ॒च्चा ते॑ जा॒तमन्ध॑सो दि॒वि षद्भूम्या द॑दे । उ॒ग्रं शर्म॒ महि॒ श्रव॑: ॥9.61.10॥

u̱ccā te̍ jā̱tamandha̍so di̱vi ṣadbhūmyā da̍de | u̱graṃ śarma̱ mahi̱ śrava̍:

ए॒ना विश्वा॑न्य॒र्य आ द्यु॒म्नानि॒ मानु॑षाणाम् । सिषा॑सन्तो वनामहे ॥9.61.11॥

e̱nā viśvā̍nya̱rya ā dyu̱mnāni̱ mānu̍ṣāṇām | siṣā̍santo vanāmahe

स न॒ इन्द्रा॑य॒ यज्य॑वे॒ वरु॑णाय म॒रुद्भ्य॑: । व॒रि॒वो॒वित्परि॑ स्रव ॥9.61.12॥

sa na̱ indrā̍ya̱ yajya̍ve̱ varu̍ṇāya ma̱rudbhya̍: | va̱ri̱vo̱vitpari̍ srava

उपो॒ षु जा॒तम॒प्तुरं॒ गोभि॑र्भ॒ङ्गं परि॑ष्कृतम् । इन्दुं॑ दे॒वा अ॑यासिषुः ॥9.61.13॥

upo̱ ṣu jā̱tama̱ptura̱ṃ gobhi̍rbha̱ṅgaṃ pari̍ṣkṛtam | indu̍ṃ de̱vā a̍yāsiṣuḥ

तमिद्व॑र्धन्तु नो॒ गिरो॑ व॒त्सं सं॒शिश्व॑रीरिव । य इन्द्र॑स्य हृदं॒सनि॑: ॥9.61.14॥

tamidva̍rdhantu no̱ giro̍ va̱tsaṃ sa̱ṃśiśva̍rīriva | ya indra̍sya hṛda̱ṃsani̍:

अर्षा॑ णः सोम॒ शं गवे॑ धु॒क्षस्व॑ पि॒प्युषी॒मिष॑म् । वर्धा॑ समु॒द्रमु॒क्थ्य॑म् ॥9.61.15॥

arṣā̍ ṇaḥ soma̱ śaṃ gave̍ dhu̱kṣasva̍ pi̱pyuṣī̱miṣa̍m | vardhā̍ samu̱dramu̱kthya̍m

पव॑मानो अजीजनद्दि॒वश्चि॒त्रं न त॑न्य॒तुम् । ज्योति॑र्वैश्वान॒रं बृ॒हत् ॥9.61.16॥

pava̍māno ajījanaddi̱vaści̱traṃ na ta̍nya̱tum | jyoti̍rvaiśvāna̱raṃ bṛ̱hat

पव॑मानस्य ते॒ रसो॒ मदो॑ राजन्नदुच्छु॒नः । वि वार॒मव्य॑मर्षति ॥9.61.17॥

pava̍mānasya te̱ raso̱ mado̍ rājannaducchu̱naḥ | vi vāra̱mavya̍marṣati

पव॑मान॒ रस॒स्तव॒ दक्षो॒ वि रा॑जति द्यु॒मान् । ज्योति॒र्विश्वं॒ स्व॑र्दृ॒शे ॥9.61.18॥

pava̍māna̱ rasa̱stava̱ dakṣo̱ vi rā̍jati dyu̱mān | jyoti̱rviśva̱ṃ sva̍rdṛ̱śe

यस्ते॒ मदो॒ वरे॑ण्य॒स्तेना॑ पव॒स्वान्ध॑सा । दे॒वा॒वीर॑घशंस॒हा ॥9.61.19॥

yaste̱ mado̱ vare̍ṇya̱stenā̍ pava̱svāndha̍sā | de̱vā̱vīra̍ghaśaṃsa̱hā

जघ्नि॑र्वृ॒त्रम॑मि॒त्रियं॒ सस्नि॒र्वाजं॑ दि॒वेदि॑वे । गो॒षा उ॑ अश्व॒सा अ॑सि ॥9.61.20॥

jaghni̍rvṛ̱trama̍mi̱triya̱ṃ sasni̱rvāja̍ṃ di̱vedi̍ve | go̱ṣā u̍ aśva̱sā a̍si

सम्मि॑श्लो अरु॒षो भ॑व सूप॒स्थाभि॒र्न धे॒नुभि॑: । सीद॑ञ्छ्ये॒नो न योनि॒मा ॥9.61.21॥

sammi̍ślo aru̱ṣo bha̍va sūpa̱sthābhi̱rna dhe̱nubhi̍: | sīda̍ñchye̱no na yoni̱mā

स प॑वस्व॒ य आवि॒थेन्द्रं॑ वृ॒त्राय॒ हन्त॑वे । व॒व्रि॒वांसं॑ म॒हीर॒पः ॥9.61.22॥

sa pa̍vasva̱ ya āvi̱thendra̍ṃ vṛ̱trāya̱ hanta̍ve | va̱vri̱vāṃsa̍ṃ ma̱hīra̱paḥ

सु॒वीरा॑सो व॒यं धना॒ जये॑म सोम मीढ्वः । पु॒ना॒नो व॑र्ध नो॒ गिर॑: ॥9.61.23॥

su̱vīrā̍so va̱yaṃ dhanā̱ jaye̍ma soma mīḍhvaḥ | pu̱nā̱no va̍rdha no̱ gira̍:

त्वोता॑स॒स्तवाव॑सा॒ स्याम॑ व॒न्वन्त॑ आ॒मुर॑: । सोम॑ व्र॒तेषु॑ जागृहि ॥9.61.24॥

tvotā̍sa̱stavāva̍sā̱ syāma̍ va̱nvanta̍ ā̱mura̍: | soma̍ vra̱teṣu̍ jāgṛhi

अ॒प॒घ्नन्प॑वते॒ मृधोऽप॒ सोमो॒ अरा॑व्णः । गच्छ॒न्निन्द्र॑स्य निष्कृ॒तम् ॥9.61.25॥

a̱pa̱ghnanpa̍vate̱ mṛdho'pa̱ somo̱ arā̍vṇaḥ | gaccha̱nnindra̍sya niṣkṛ̱tam

म॒हो नो॑ रा॒य आ भ॑र॒ पव॑मान ज॒ही मृध॑: । रास्वे॑न्दो वी॒रव॒द्यश॑: ॥9.61.26॥

ma̱ho no̍ rā̱ya ā bha̍ra̱ pava̍māna ja̱hī mṛdha̍: | rāsve̍ndo vī̱rava̱dyaśa̍:

न त्वा॑ श॒तं च॒न ह्रुतो॒ राधो॒ दित्स॑न्त॒मा मि॑नन् । यत्पु॑ना॒नो म॑ख॒स्यसे॑ ॥9.61.27॥

na tvā̍ śa̱taṃ ca̱na hruto̱ rādho̱ ditsa̍nta̱mā mi̍nan | yatpu̍nā̱no ma̍kha̱syase̍

पव॑स्वेन्दो॒ वृषा॑ सु॒तः कृ॒धी नो॑ य॒शसो॒ जने॑ । विश्वा॒ अप॒ द्विषो॑ जहि ॥9.61.28॥

pava̍svendo̱ vṛṣā̍ su̱taḥ kṛ̱dhī no̍ ya̱śaso̱ jane̍ | viśvā̱ apa̱ dviṣo̍ jahi

अस्य॑ ते स॒ख्ये व॒यं तवे॑न्दो द्यु॒म्न उ॑त्त॒मे । सा॒स॒ह्याम॑ पृतन्य॒तः ॥9.61.29॥

asya̍ te sa̱khye va̱yaṃ tave̍ndo dyu̱mna u̍tta̱me | sā̱sa̱hyāma̍ pṛtanya̱taḥ

या ते॑ भी॒मान्यायु॑धा ति॒ग्मानि॒ सन्ति॒ धूर्व॑णे । रक्षा॑ समस्य नो नि॒दः ॥9.61.30॥

yā te̍ bhī̱mānyāyu̍dhā ti̱gmāni̱ santi̱ dhūrva̍ṇe | rakṣā̍ samasya no ni̱daḥ

३० जमदग्निर्भार्गव: । पवमान: सोम: । गायत्री ।

ए॒ते अ॑सृग्र॒मिन्द॑वस्ति॒रः प॒वित्र॑मा॒शव॑: । विश्वा॑न्य॒भि सौभ॑गा ॥9.62.1॥

e̱te a̍sṛgra̱minda̍vasti̱raḥ pa̱vitra̍mā̱śava̍: | viśvā̍nya̱bhi saubha̍gā

वि॒घ्नन्तो॑ दुरि॒ता पु॒रु सु॒गा तो॒काय॑ वा॒जिन॑: । तना॑ कृ॒ण्वन्तो॒ अर्व॑ते ॥9.62.2॥

vi̱ghnanto̍ duri̱tā pu̱ru su̱gā to̱kāya̍ vā̱jina̍: | tanā̍ kṛ̱ṇvanto̱ arva̍te

कृ॒ण्वन्तो॒ वरि॑वो॒ गवे॒ऽभ्य॑र्षन्ति सुष्टु॒तिम् । इळा॑म॒स्मभ्यं॑ सं॒यत॑म् ॥9.62.3॥

kṛ̱ṇvanto̱ vari̍vo̱ gave̱'bhya̍rṣanti suṣṭu̱tim | il̤ā̍ma̱smabhya̍ṃ sa̱ṃyata̍m

असा॑व्यं॒शुर्मदा॑या॒ऽप्सु दक्षो॑ गिरि॒ष्ठाः । श्ये॒नो न योनि॒मास॑दत् ॥9.62.4॥

asā̍vya̱ṃśurmadā̍yā̱'psu dakṣo̍ giri̱ṣṭhāḥ | śye̱no na yoni̱māsa̍dat

शु॒भ्रमन्धो॑ दे॒ववा॑तम॒प्सु धू॒तो नृभि॑: सु॒तः । स्वद॑न्ति॒ गाव॒: पयो॑भिः ॥9.62.5॥

śu̱bhramandho̍ de̱vavā̍tama̱psu dhū̱to nṛbhi̍: su̱taḥ | svada̍nti̱ gāva̱: payo̍bhiḥ

आदी॒मश्वं॒ न हेता॒रोऽशू॑शुभन्न॒मृता॑य । मध्वो॒ रसं॑ सध॒मादे॑ ॥9.62.6॥

ādī̱maśva̱ṃ na hetā̱ro'śū̍śubhanna̱mṛtā̍ya | madhvo̱ rasa̍ṃ sadha̱māde̍

यास्ते॒ धारा॑ मधु॒श्चुतोऽसृ॑ग्रमिन्द ऊ॒तये॑ । ताभि॑: प॒वित्र॒मास॑दः ॥9.62.7॥

yāste̱ dhārā̍ madhu̱ścuto'sṛ̍graminda ū̱taye̍ | tābhi̍: pa̱vitra̱māsa̍daḥ

सो अ॒र्षेन्द्रा॑य पी॒तये॑ ति॒रो रोमा॑ण्य॒व्यया॑ । सीद॒न्योना॒ वने॒ष्वा ॥9.62.8॥

so a̱rṣendrā̍ya pī̱taye̍ ti̱ro romā̍ṇya̱vyayā̍ | sīda̱nyonā̱ vane̱ṣvā

त्वमि॑न्दो॒ परि॑ स्रव॒ स्वादि॑ष्ठो॒ अङ्गि॑रोभ्यः । व॒रि॒वो॒विद्घृ॒तं पय॑: ॥9.62.9॥

tvami̍ndo̱ pari̍ srava̱ svādi̍ṣṭho̱ aṅgi̍robhyaḥ | va̱ri̱vo̱vidghṛ̱taṃ paya̍:

अ॒यं विच॑र्षणिर्हि॒तः पव॑मान॒: स चे॑तति । हि॒न्वा॒न आप्यं॑ बृ॒हत् ॥9.62.10॥

a̱yaṃ vica̍rṣaṇirhi̱taḥ pava̍māna̱: sa ce̍tati | hi̱nvā̱na āpya̍ṃ bṛ̱hat

ए॒ष वृषा॒ वृष॑व्रत॒: पव॑मानो अशस्ति॒हा । कर॒द्वसू॑नि दा॒शुषे॑ ॥9.62.11॥

e̱ṣa vṛṣā̱ vṛṣa̍vrata̱: pava̍māno aśasti̱hā | kara̱dvasū̍ni dā̱śuṣe̍

आ प॑वस्व सह॒स्रिणं॑ र॒यिं गोम॑न्तम॒श्विन॑म् । पु॒रु॒श्च॒न्द्रं पु॑रु॒स्पृह॑म् ॥9.62.12॥

ā pa̍vasva saha̱sriṇa̍ṃ ra̱yiṃ goma̍ntama̱śvina̍m | pu̱ru̱śca̱ndraṃ pu̍ru̱spṛha̍m

ए॒ष स्य परि॑ षिच्यते मर्मृ॒ज्यमा॑न आ॒युभि॑: । उ॒रु॒गा॒यः क॒विक्र॑तुः ॥9.62.13॥

e̱ṣa sya pari̍ ṣicyate marmṛ̱jyamā̍na ā̱yubhi̍: | u̱ru̱gā̱yaḥ ka̱vikra̍tuḥ

स॒हस्रो॑तिः श॒ताम॑घो वि॒मानो॒ रज॑सः क॒विः । इन्द्रा॑य पवते॒ मद॑: ॥9.62.14॥

sa̱hasro̍tiḥ śa̱tāma̍gho vi̱māno̱ raja̍saḥ ka̱viḥ | indrā̍ya pavate̱ mada̍:

गि॒रा जा॒त इ॒ह स्तु॒त इन्दु॒रिन्द्रा॑य धीयते । विर्योना॑ वस॒तावि॑व ॥9.62.15॥

gi̱rā jā̱ta i̱ha stu̱ta indu̱rindrā̍ya dhīyate | viryonā̍ vasa̱tāvi̍va

पव॑मानः सु॒तो नृभि॒: सोमो॒ वाज॑मिवासरत् । च॒मूषु॒ शक्म॑ना॒सद॑म् ॥9.62.16॥

pava̍mānaḥ su̱to nṛbhi̱: somo̱ vāja̍mivāsarat | ca̱mūṣu̱ śakma̍nā̱sada̍m

तं त्रि॑पृ॒ष्ठे त्रि॑वन्धु॒रे रथे॑ युञ्जन्ति॒ यात॑वे । ऋषी॑णां स॒प्त धी॒तिभि॑: ॥9.62.17॥

taṃ tri̍pṛ̱ṣṭhe tri̍vandhu̱re rathe̍ yuñjanti̱ yāta̍ve | ṛṣī̍ṇāṃ sa̱pta dhī̱tibhi̍:

तं सो॑तारो धन॒स्पृत॑मा॒शुं वाजा॑य॒ यात॑वे । हरिं॑ हिनोत वा॒जिन॑म् ॥9.62.18॥

taṃ so̍tāro dhana̱spṛta̍mā̱śuṃ vājā̍ya̱ yāta̍ve | hari̍ṃ hinota vā̱jina̍m

आ॒वि॒शन्क॒लशं॑ सु॒तो विश्वा॒ अर्ष॑न्न॒भि श्रिय॑: । शूरो॒ न गोषु॑ तिष्ठति ॥9.62.19॥

ā̱vi̱śanka̱laśa̍ṃ su̱to viśvā̱ arṣa̍nna̱bhi śriya̍: | śūro̱ na goṣu̍ tiṣṭhati

आ त॑ इन्दो॒ मदा॑य॒ कं पयो॑ दुहन्त्या॒यव॑: । दे॒वा दे॒वेभ्यो॒ मधु॑ ॥9.62.20॥

ā ta̍ indo̱ madā̍ya̱ kaṃ payo̍ duhantyā̱yava̍: | de̱vā de̱vebhyo̱ madhu̍

आ न॒: सोमं॑ प॒वित्र॒ आ सृ॒जता॒ मधु॑मत्तमम् । दे॒वेभ्यो॑ देव॒श्रुत्त॑मम् ॥9.62.21॥

ā na̱: soma̍ṃ pa̱vitra̱ ā sṛ̱jatā̱ madhu̍mattamam | de̱vebhyo̍ deva̱śrutta̍mam

ए॒ते सोमा॑ असृक्षत गृणा॒नाः श्रव॑से म॒हे । म॒दिन्त॑मस्य॒ धार॑या ॥9.62.22॥

e̱te somā̍ asṛkṣata gṛṇā̱nāḥ śrava̍se ma̱he | ma̱dinta̍masya̱ dhāra̍yā

अ॒भि गव्या॑नि वी॒तये॑ नृ॒म्णा पु॑ना॒नो अ॑र्षसि । स॒नद्वा॑ज॒: परि॑ स्रव ॥9.62.23॥

a̱bhi gavyā̍ni vī̱taye̍ nṛ̱mṇā pu̍nā̱no a̍rṣasi | sa̱nadvā̍ja̱: pari̍ srava

उ॒त नो॒ गोम॑ती॒रिषो॒ विश्वा॑ अर्ष परि॒ष्टुभ॑: । गृ॒णा॒नो ज॒मद॑ग्निना ॥9.62.24॥

u̱ta no̱ goma̍tī̱riṣo̱ viśvā̍ arṣa pari̱ṣṭubha̍: | gṛ̱ṇā̱no ja̱mada̍gninā

पव॑स्व वा॒चो अ॑ग्रि॒यः सोम॑ चि॒त्राभि॑रू॒तिभि॑: । अ॒भि विश्वा॑नि॒ काव्या॑ ॥9.62.25॥

pava̍sva vā̱co a̍gri̱yaḥ soma̍ ci̱trābhi̍rū̱tibhi̍: | a̱bhi viśvā̍ni̱ kāvyā̍

त्वं स॑मु॒द्रिया॑ अ॒पो॑ऽग्रि॒यो वाच॑ ई॒रय॑न् । पव॑स्व विश्वमेजय ॥9.62.26॥

tvaṃ sa̍mu̱driyā̍ a̱po̍'gri̱yo vāca̍ ī̱raya̍n | pava̍sva viśvamejaya

तुभ्ये॒मा भुव॑ना कवे महि॒म्ने सो॑म तस्थिरे । तुभ्य॑मर्षन्ति॒ सिन्ध॑वः ॥9.62.27॥

tubhye̱mā bhuva̍nā kave mahi̱mne so̍ma tasthire | tubhya̍marṣanti̱ sindha̍vaḥ

प्र ते॑ दि॒वो न वृ॒ष्टयो॒ धारा॑ यन्त्यस॒श्चत॑: । अ॒भि शु॒क्रामु॑प॒स्तिर॑म् ॥9.62.28॥

pra te̍ di̱vo na vṛ̱ṣṭayo̱ dhārā̍ yantyasa̱ścata̍: | a̱bhi śu̱krāmu̍pa̱stira̍m

इन्द्रा॒येन्दुं॑ पुनीतनो॒ग्रं दक्षा॑य॒ साध॑नम् । ई॒शा॒नं वी॒तिरा॑धसम् ॥9.62.29॥

indrā̱yendu̍ṃ punītano̱graṃ dakṣā̍ya̱ sādha̍nam | ī̱śā̱naṃ vī̱tirā̍dhasam

पव॑मान ऋ॒तः क॒विः सोम॑: प॒वित्र॒मास॑दत् । दध॑त्स्तो॒त्रे सु॒वीर्य॑म् ॥9.62.30॥

pava̍māna ṛ̱taḥ ka̱viḥ soma̍: pa̱vitra̱māsa̍dat | dadha̍tsto̱tre su̱vīrya̍m

३०निध्रुवि: काश्यपः । पवमान: सोम: । गायत्री ।

आ प॑वस्व सह॒स्रिणं॑ र॒यिं सो॑म सु॒वीर्य॑म् । अ॒स्मे श्रवां॑सि धारय ॥9.63.1॥

ā pa̍vasva saha̱sriṇa̍ṃ ra̱yiṃ so̍ma su̱vīrya̍m | a̱sme śravā̍ṃsi dhāraya

इष॒मूर्जं॑ च पिन्वस॒ इन्द्रा॑य मत्स॒रिन्त॑मः । च॒मूष्वा नि षी॑दसि ॥9.63.2॥

iṣa̱mūrja̍ṃ ca pinvasa̱ indrā̍ya matsa̱rinta̍maḥ | ca̱mūṣvā ni ṣī̍dasi

सु॒त इन्द्रा॑य॒ विष्ण॑वे॒ सोम॑: क॒लशे॑ अक्षरत् । मधु॑माँ अस्तु वा॒यवे॑ ॥9.63.3॥

su̱ta indrā̍ya̱ viṣṇa̍ve̱ soma̍: ka̱laśe̍ akṣarat | madhu̍mām̐ astu vā̱yave̍

ए॒ते अ॑सृग्रमा॒शवोऽति॒ ह्वरां॑सि ब॒भ्रव॑: । सोमा॑ ऋ॒तस्य॒ धार॑या ॥9.63.4॥

e̱te a̍sṛgramā̱śavo'ti̱ hvarā̍ṃsi ba̱bhrava̍: | somā̍ ṛ̱tasya̱ dhāra̍yā

इन्द्रं॒ वर्ध॑न्तो अ॒प्तुर॑: कृ॒ण्वन्तो॒ विश्व॒मार्य॑म् । अ॒प॒घ्नन्तो॒ अरा॑व्णः ॥9.63.5॥

indra̱ṃ vardha̍nto a̱ptura̍: kṛ̱ṇvanto̱ viśva̱mārya̍m | a̱pa̱ghnanto̱ arā̍vṇaḥ

सु॒ता अनु॒ स्वमा रजो॒ऽभ्य॑र्षन्ति ब॒भ्रव॑: । इन्द्रं॒ गच्छ॑न्त॒ इन्द॑वः ॥9.63.6॥

su̱tā anu̱ svamā rajo̱'bhya̍rṣanti ba̱bhrava̍: | indra̱ṃ gaccha̍nta̱ inda̍vaḥ

अ॒या प॑वस्व॒ धार॑या॒ यया॒ सूर्य॒मरो॑चयः । हि॒न्वा॒नो मानु॑षीर॒पः ॥9.63.7॥

a̱yā pa̍vasva̱ dhāra̍yā̱ yayā̱ sūrya̱maro̍cayaḥ | hi̱nvā̱no mānu̍ṣīra̱paḥ

अयु॑क्त॒ सूर॒ एत॑शं॒ पव॑मानो म॒नावधि॑ । अ॒न्तरि॑क्षेण॒ यात॑वे ॥9.63.8॥

ayu̍kta̱ sūra̱ eta̍śa̱ṃ pava̍māno ma̱nāvadhi̍ | a̱ntari̍kṣeṇa̱ yāta̍ve

उ॒त त्या ह॒रितो॒ दश॒ सूरो॑ अयुक्त॒ यात॑वे । इन्दु॒रिन्द्र॒ इति॑ ब्रु॒वन् ॥9.63.9॥

u̱ta tyā ha̱rito̱ daśa̱ sūro̍ ayukta̱ yāta̍ve | indu̱rindra̱ iti̍ bru̱van

परी॒तो वा॒यवे॑ सु॒तं गिर॒ इन्द्रा॑य मत्स॒रम् । अव्यो॒ वारे॑षु सिञ्चत ॥9.63.10॥

parī̱to vā̱yave̍ su̱taṃ gira̱ indrā̍ya matsa̱ram | avyo̱ vāre̍ṣu siñcata

पव॑मान वि॒दा र॒यिम॒स्मभ्यं॑ सोम दु॒ष्टर॑म् । यो दू॒णाशो॑ वनुष्य॒ता ॥9.63.11॥

pava̍māna vi̱dā ra̱yima̱smabhya̍ṃ soma du̱ṣṭara̍m | yo dū̱ṇāśo̍ vanuṣya̱tā

अ॒भ्य॑र्ष सह॒स्रिणं॑ र॒यिं गोम॑न्तम॒श्विन॑म् । अ॒भि वाज॑मु॒त श्रव॑: ॥9.63.12॥

a̱bhya̍rṣa saha̱sriṇa̍ṃ ra̱yiṃ goma̍ntama̱śvina̍m | a̱bhi vāja̍mu̱ta śrava̍:

सोमो॑ दे॒वो न सूर्योऽद्रि॑भिः पवते सु॒तः । दधा॑नः क॒लशे॒ रस॑म् ॥9.63.13॥

somo̍ de̱vo na sūryo'dri̍bhiḥ pavate su̱taḥ | dadhā̍naḥ ka̱laśe̱ rasa̍m

ए॒ते धामा॒न्यार्या॑ शु॒क्रा ऋ॒तस्य॒ धार॑या । वाजं॒ गोम॑न्तमक्षरन् ॥9.63.14॥

e̱te dhāmā̱nyāryā̍ śu̱krā ṛ̱tasya̱ dhāra̍yā | vāja̱ṃ goma̍ntamakṣaran

सु॒ता इन्द्रा॑य व॒ज्रिणे॒ सोमा॑सो॒ दध्या॑शिरः । प॒वित्र॒मत्य॑क्षरन् ॥9.63.15॥

su̱tā indrā̍ya va̱jriṇe̱ somā̍so̱ dadhyā̍śiraḥ | pa̱vitra̱matya̍kṣaran

प्र सो॑म॒ मधु॑मत्तमो रा॒ये अ॑र्ष प॒वित्र॒ आ । मदो॒ यो दे॑व॒वीत॑मः ॥9.63.16॥

pra so̍ma̱ madhu̍mattamo rā̱ye a̍rṣa pa̱vitra̱ ā | mado̱ yo de̍va̱vīta̍maḥ

तमी॑ मृजन्त्या॒यवो॒ हरिं॑ न॒दीषु॑ वा॒जिन॑म् । इन्दु॒मिन्द्रा॑य मत्स॒रम् ॥9.63.17॥

tamī̍ mṛjantyā̱yavo̱ hari̍ṃ na̱dīṣu̍ vā̱jina̍m | indu̱mindrā̍ya matsa̱ram

आ प॑वस्व॒ हिर॑ण्यव॒दश्वा॑वत्सोम वी॒रव॑त् । वाजं॒ गोम॑न्त॒मा भ॑र ॥9.63.18॥

ā pa̍vasva̱ hira̍ṇyava̱daśvā̍vatsoma vī̱rava̍t | vāja̱ṃ goma̍nta̱mā bha̍ra

परि॒ वाजे॒ न वा॑ज॒युमव्यो॒ वारे॑षु सिञ्चत । इन्द्रा॑य॒ मधु॑मत्तमम् ॥9.63.19॥

pari̱ vāje̱ na vā̍ja̱yumavyo̱ vāre̍ṣu siñcata | indrā̍ya̱ madhu̍mattamam

क॒विं मृ॑जन्ति॒ मर्ज्यं॑ धी॒भिर्विप्रा॑ अव॒स्यव॑: । वृषा॒ कनि॑क्रदर्षति ॥9.63.20॥

ka̱viṃ mṛ̍janti̱ marjya̍ṃ dhī̱bhirviprā̍ ava̱syava̍: | vṛṣā̱ kani̍kradarṣati

वृष॑णं धी॒भिर॒प्तुरं॒ सोम॑मृ॒तस्य॒ धार॑या । म॒ती विप्रा॒: सम॑स्वरन् ॥9.63.21॥

vṛṣa̍ṇaṃ dhī̱bhira̱ptura̱ṃ soma̍mṛ̱tasya̱ dhāra̍yā | ma̱tī viprā̱: sama̍svaran

पव॑स्व देवायु॒षगिन्द्रं॑ गच्छतु ते॒ मद॑: । वा॒युमा रो॑ह॒ धर्म॑णा ॥9.63.22॥

pava̍sva devāyu̱ṣagindra̍ṃ gacchatu te̱ mada̍: | vā̱yumā ro̍ha̱ dharma̍ṇā

पव॑मान॒ नि तो॑शसे र॒यिं सो॑म श्र॒वाय्य॑म् । प्रि॒यः स॑मु॒द्रमा वि॑श ॥9.63.23॥

pava̍māna̱ ni to̍śase ra̱yiṃ so̍ma śra̱vāyya̍m | pri̱yaḥ sa̍mu̱dramā vi̍śa

अ॒प॒घ्नन्प॑वसे॒ मृध॑: क्रतु॒वित्सो॑म मत्स॒रः । नु॒दस्वादे॑वयुं॒ जन॑म् ॥9.63.24॥

a̱pa̱ghnanpa̍vase̱ mṛdha̍: kratu̱vitso̍ma matsa̱raḥ | nu̱dasvāde̍vayu̱ṃ jana̍m

पव॑माना असृक्षत॒ सोमा॑: शु॒क्रास॒ इन्द॑वः । अ॒भि विश्वा॑नि॒ काव्या॑ ॥9.63.25॥

pava̍mānā asṛkṣata̱ somā̍: śu̱krāsa̱ inda̍vaḥ | a̱bhi viśvā̍ni̱ kāvyā̍

पव॑मानास आ॒शव॑: शु॒भ्रा अ॑सृग्र॒मिन्द॑वः । घ्नन्तो॒ विश्वा॒ अप॒ द्विष॑: ॥9.63.26॥

pava̍mānāsa ā̱śava̍: śu̱bhrā a̍sṛgra̱minda̍vaḥ | ghnanto̱ viśvā̱ apa̱ dviṣa̍:

पव॑माना दि॒वस्पर्य॒न्तरि॑क्षादसृक्षत । पृ॒थि॒व्या अधि॒ सान॑वि ॥9.63.27॥

pava̍mānā di̱vasparya̱ntari̍kṣādasṛkṣata | pṛ̱thi̱vyā adhi̱ sāna̍vi

पु॒ना॒नः सो॑म॒ धार॒येन्दो॒ विश्वा॒ अप॒ स्रिध॑: । ज॒हि रक्षां॑सि सुक्रतो ॥9.63.28॥

pu̱nā̱naḥ so̍ma̱ dhāra̱yendo̱ viśvā̱ apa̱ sridha̍: | ja̱hi rakṣā̍ṃsi sukrato

अ॒प॒घ्नन्त्सो॑म र॒क्षसो॒ऽभ्य॑र्ष॒ कनि॑क्रदत् । द्यु॒मन्तं॒ शुष्म॑मुत्त॒मम् ॥9.63.29॥

a̱pa̱ghnantso̍ma ra̱kṣaso̱'bhya̍rṣa̱ kani̍kradat | dyu̱manta̱ṃ śuṣma̍mutta̱mam

अ॒स्मे वसू॑नि धारय॒ सोम॑ दि॒व्यानि॒ पार्थि॑वा । इन्दो॒ विश्वा॑नि॒ वार्या॑ ॥9.63.30॥

a̱sme vasū̍ni dhāraya̱ soma̍ di̱vyāni̱ pārthi̍vā | indo̱ viśvā̍ni̱ vāryā̍

३० कश्यपो मारीच: । पवमान: सोम: । गायत्री ।

वृषा॑ सोम द्यु॒माँ अ॑सि॒ वृषा॑ देव॒ वृष॑व्रतः । वृषा॒ धर्मा॑णि दधिषे ॥9.64.1॥

vṛṣā̍ soma dyu̱mām̐ a̍si̱ vṛṣā̍ deva̱ vṛṣa̍vrataḥ | vṛṣā̱ dharmā̍ṇi dadhiṣe

वृष्ण॑स्ते॒ वृष्ण्यं॒ शवो॒ वृषा॒ वनं॒ वृषा॒ मद॑: । स॒त्यं वृ॑ष॒न्वृषेद॑सि ॥9.64.2॥

vṛṣṇa̍ste̱ vṛṣṇya̱ṃ śavo̱ vṛṣā̱ vana̱ṃ vṛṣā̱ mada̍: | sa̱tyaṃ vṛ̍ṣa̱nvṛṣeda̍si

अश्वो॒ न च॑क्रदो॒ वृषा॒ सं गा इ॑न्दो॒ समर्व॑तः । वि नो॑ रा॒ये दुरो॑ वृधि ॥9.64.3॥

aśvo̱ na ca̍krado̱ vṛṣā̱ saṃ gā i̍ndo̱ samarva̍taḥ | vi no̍ rā̱ye duro̍ vṛdhi

असृ॑क्षत॒ प्र वा॒जिनो॑ ग॒व्या सोमा॑सो अश्व॒या । शु॒क्रासो॑ वीर॒याशव॑: ॥9.64.4॥

asṛ̍kṣata̱ pra vā̱jino̍ ga̱vyā somā̍so aśva̱yā | śu̱krāso̍ vīra̱yāśava̍:

शु॒म्भमा॑ना ऋता॒युभि॑र्मृ॒ज्यमा॑ना॒ गभ॑स्त्योः । पव॑न्ते॒ वारे॑ अ॒व्यये॑ ॥9.64.5॥

śu̱mbhamā̍nā ṛtā̱yubhi̍rmṛ̱jyamā̍nā̱ gabha̍styoḥ | pava̍nte̱ vāre̍ a̱vyaye̍

ते विश्वा॑ दा॒शुषे॒ वसु॒ सोमा॑ दि॒व्यानि॒ पार्थि॑वा । पव॑न्ता॒मान्तरि॑क्ष्या ॥9.64.6॥

te viśvā̍ dā̱śuṣe̱ vasu̱ somā̍ di̱vyāni̱ pārthi̍vā | pava̍ntā̱māntari̍kṣyā

पव॑मानस्य विश्ववि॒त्प्र ते॒ सर्गा॑ असृक्षत । सूर्य॑स्येव॒ न र॒श्मय॑: ॥9.64.7॥

pava̍mānasya viśvavi̱tpra te̱ sargā̍ asṛkṣata | sūrya̍syeva̱ na ra̱śmaya̍:

के॒तुं कृ॒ण्वन्दि॒वस्परि॒ विश्वा॑ रू॒पाभ्य॑र्षसि । स॒मु॒द्रः सो॑म पिन्वसे ॥9.64.8॥

ke̱tuṃ kṛ̱ṇvandi̱vaspari̱ viśvā̍ rū̱pābhya̍rṣasi | sa̱mu̱draḥ so̍ma pinvase

हि॒न्वा॒नो वाच॑मिष्यसि॒ पव॑मान॒ विध॑र्मणि । अक्रा॑न्दे॒वो न सूर्य॑: ॥9.64.9॥

hi̱nvā̱no vāca̍miṣyasi̱ pava̍māna̱ vidha̍rmaṇi | akrā̍nde̱vo na sūrya̍:

इन्दु॑: पविष्ट॒ चेत॑नः प्रि॒यः क॑वी॒नां म॒ती । सृ॒जदश्वं॑ र॒थीरि॑व ॥9.64.10॥

indu̍: paviṣṭa̱ ceta̍naḥ pri̱yaḥ ka̍vī̱nāṃ ma̱tī | sṛ̱jadaśva̍ṃ ra̱thīri̍va

ऊ॒र्मिर्यस्ते॑ प॒वित्र॒ आ दे॑वा॒वीः प॒र्यक्ष॑रत् । सीद॑न्नृ॒तस्य॒ योनि॒मा ॥9.64.11॥

ū̱rmiryaste̍ pa̱vitra̱ ā de̍vā̱vīḥ pa̱ryakṣa̍rat | sīda̍nnṛ̱tasya̱ yoni̱mā

स नो॑ अर्ष प॒वित्र॒ आ मदो॒ यो दे॑व॒वीत॑मः । इन्द॒विन्द्रा॑य पी॒तये॑ ॥9.64.12॥

sa no̍ arṣa pa̱vitra̱ ā mado̱ yo de̍va̱vīta̍maḥ | inda̱vindrā̍ya pī̱taye̍

इ॒षे प॑वस्व॒ धार॑या मृ॒ज्यमा॑नो मनी॒षिभि॑: । इन्दो॑ रु॒चाभि गा इ॑हि ॥9.64.13॥

i̱ṣe pa̍vasva̱ dhāra̍yā mṛ̱jyamā̍no manī̱ṣibhi̍: | indo̍ ru̱cābhi gā i̍hi

पु॒ना॒नो वरि॑वस्कृ॒ध्यूर्जं॒ जना॑य गिर्वणः । हरे॑ सृजा॒न आ॒शिर॑म् ॥9.64.14॥

pu̱nā̱no vari̍vaskṛ̱dhyūrja̱ṃ janā̍ya girvaṇaḥ | hare̍ sṛjā̱na ā̱śira̍m

पु॒ना॒नो दे॒ववी॑तय॒ इन्द्र॑स्य याहि निष्कृ॒तम् । द्यु॒ता॒नो वा॒जिभि॑र्य॒तः ॥9.64.15॥

pu̱nā̱no de̱vavī̍taya̱ indra̍sya yāhi niṣkṛ̱tam | dyu̱tā̱no vā̱jibhi̍rya̱taḥ

प्र हि॑न्वा॒नास॒ इन्द॒वोऽच्छा॑ समु॒द्रमा॒शव॑: । धि॒या जू॒ता अ॑सृक्षत ॥9.64.16॥

pra hi̍nvā̱nāsa̱ inda̱vo'cchā̍ samu̱dramā̱śava̍: | dhi̱yā jū̱tā a̍sṛkṣata

म॒र्मृ॒जा॒नास॑ आ॒यवो॒ वृथा॑ समु॒द्रमिन्द॑वः । अग्म॑न्नृ॒तस्य॒ योनि॒मा ॥9.64.17॥

ma̱rmṛ̱jā̱nāsa̍ ā̱yavo̱ vṛthā̍ samu̱draminda̍vaḥ | agma̍nnṛ̱tasya̱ yoni̱mā

परि॑ णो याह्यस्म॒युर्विश्वा॒ वसू॒न्योज॑सा । पा॒हि न॒: शर्म॑ वी॒रव॑त् ॥9.64.18॥

pari̍ ṇo yāhyasma̱yurviśvā̱ vasū̱nyoja̍sā | pā̱hi na̱: śarma̍ vī̱rava̍t

मिमा॑ति॒ वह्नि॒रेत॑शः प॒दं यु॑जा॒न ऋक्व॑भिः । प्र यत्स॑मु॒द्र आहि॑तः ॥9.64.19॥

mimā̍ti̱ vahni̱reta̍śaḥ pa̱daṃ yu̍jā̱na ṛkva̍bhiḥ | pra yatsa̍mu̱dra āhi̍taḥ

आ यद्योनिं॑ हिर॒ण्यय॑मा॒शुॠ॒तस्य॒ सीद॑ति । जहा॒त्यप्र॑चेतसः ॥9.64.20॥

ā yadyoni̍ṃ hira̱ṇyaya̍mā̱śuṝ̱tasya̱ sīda̍ti | jahā̱tyapra̍cetasaḥ

अ॒भि वे॒ना अ॑नूष॒तेय॑क्षन्ति॒ प्रचे॑तसः । मज्ज॒न्त्यवि॑चेतसः ॥9.64.21॥

a̱bhi ve̱nā a̍nūṣa̱teya̍kṣanti̱ prace̍tasaḥ | majja̱ntyavi̍cetasaḥ

इन्द्रा॑येन्दो म॒रुत्व॑ते॒ पव॑स्व॒ मधु॑मत्तमः । ऋ॒तस्य॒ योनि॑मा॒सद॑म् ॥9.64.22॥

indrā̍yendo ma̱rutva̍te̱ pava̍sva̱ madhu̍mattamaḥ | ṛ̱tasya̱ yoni̍mā̱sada̍m

तं त्वा॒ विप्रा॑ वचो॒विद॒: परि॑ ष्कृण्वन्ति वे॒धस॑: । सं त्वा॑ मृजन्त्या॒यव॑: ॥9.64.23॥

taṃ tvā̱ viprā̍ vaco̱vida̱: pari̍ ṣkṛṇvanti ve̱dhasa̍: | saṃ tvā̍ mṛjantyā̱yava̍:

रसं॑ ते मि॒त्रो अ॑र्य॒मा पिब॑न्ति॒ वरु॑णः कवे । पव॑मानस्य म॒रुत॑: ॥9.64.24॥

rasa̍ṃ te mi̱tro a̍rya̱mā piba̍nti̱ varu̍ṇaḥ kave | pava̍mānasya ma̱ruta̍:

त्वं सो॑म विप॒श्चितं॑ पुना॒नो वाच॑मिष्यसि । इन्दो॑ स॒हस्र॑भर्णसम् ॥9.64.25॥

tvaṃ so̍ma vipa̱ścita̍ṃ punā̱no vāca̍miṣyasi | indo̍ sa̱hasra̍bharṇasam

उ॒तो स॒हस्र॑भर्णसं॒ वाचं॑ सोम मख॒स्युव॑म् । पु॒ना॒न इ॑न्द॒वा भ॑र ॥9.64.26॥

u̱to sa̱hasra̍bharṇasa̱ṃ vāca̍ṃ soma makha̱syuva̍m | pu̱nā̱na i̍nda̱vā bha̍ra

पु॒ना॒न इ॑न्दवेषां॒ पुरु॑हूत॒ जना॑नाम् । प्रि॒यः स॑मु॒द्रमा वि॑श ॥9.64.27॥

pu̱nā̱na i̍ndaveṣā̱ṃ puru̍hūta̱ janā̍nām | pri̱yaḥ sa̍mu̱dramā vi̍śa

दवि॑द्युतत्या रु॒चा प॑रि॒ष्टोभ॑न्त्या कृ॒पा । सोमा॑: शु॒क्रा गवा॑शिरः ॥9.64.28॥

davi̍dyutatyā ru̱cā pa̍ri̱ṣṭobha̍ntyā kṛ̱pā | somā̍: śu̱krā gavā̍śiraḥ

हि॒न्वा॒नो हे॒तृभि॑र्य॒त आ वाजं॑ वा॒ज्य॑क्रमीत् । सीद॑न्तो व॒नुषो॑ यथा ॥9.64.29॥

hi̱nvā̱no he̱tṛbhi̍rya̱ta ā vāja̍ṃ vā̱jya̍kramīt | sīda̍nto va̱nuṣo̍ yathā

ऋ॒धक्सो॑म स्व॒स्तये॑ संजग्मा॒नो दि॒वः क॒विः । पव॑स्व॒ सूर्यो॑ दृ॒शे ॥9.64.30॥

ṛ̱dhakso̍ma sva̱staye̍ saṃjagmā̱no di̱vaḥ ka̱viḥ | pava̍sva̱ sūryo̍ dṛ̱śe

३० भृगुर्वारुणिजमदग्निर्भार्गवो वा । पवमान: सोम: । गायत्री ।

हि॒न्वन्ति॒ सूर॒मुस्र॑य॒: स्वसा॑रो जा॒मय॒स्पति॑म् । म॒हामिन्दुं॑ मही॒युव॑: ॥9.65.1॥

hi̱nvanti̱ sūra̱musra̍ya̱: svasā̍ro jā̱maya̱spati̍m | ma̱hāmindu̍ṃ mahī̱yuva̍:

पव॑मान रु॒चारु॑चा दे॒वो दे॒वेभ्य॒स्परि॑ । विश्वा॒ वसू॒न्या वि॑श ॥9.65.2॥

pava̍māna ru̱cāru̍cā de̱vo de̱vebhya̱spari̍ | viśvā̱ vasū̱nyā vi̍śa

आ प॑वमान सुष्टु॒तिं वृ॒ष्टिं दे॒वेभ्यो॒ दुव॑: । इ॒षे प॑वस्व सं॒यत॑म् ॥9.65.3॥

ā pa̍vamāna suṣṭu̱tiṃ vṛ̱ṣṭiṃ de̱vebhyo̱ duva̍: | i̱ṣe pa̍vasva sa̱ṃyata̍m

वृषा॒ ह्यसि॑ भा॒नुना॑ द्यु॒मन्तं॑ त्वा हवामहे । पव॑मान स्वा॒ध्य॑: ॥9.65.4॥

vṛṣā̱ hyasi̍ bhā̱nunā̍ dyu̱manta̍ṃ tvā havāmahe | pava̍māna svā̱dhya̍:

आ प॑वस्व सु॒वीर्यं॒ मन्द॑मानः स्वायुध । इ॒हो ष्वि॑न्द॒वा ग॑हि ॥9.65.5॥

ā pa̍vasva su̱vīrya̱ṃ manda̍mānaḥ svāyudha | i̱ho ṣvi̍nda̱vā ga̍hi

यद॒द्भिः प॑रिषि॒च्यसे॑ मृ॒ज्यमा॑नो॒ गभ॑स्त्योः । द्रुणा॑ स॒धस्थ॑मश्नुषे ॥9.65.6॥

yada̱dbhiḥ pa̍riṣi̱cyase̍ mṛ̱jyamā̍no̱ gabha̍styoḥ | druṇā̍ sa̱dhastha̍maśnuṣe

प्र सोमा॑य व्यश्व॒वत्पव॑मानाय गायत । म॒हे स॒हस्र॑चक्षसे ॥9.65.7॥

pra somā̍ya vyaśva̱vatpava̍mānāya gāyata | ma̱he sa̱hasra̍cakṣase

यस्य॒ वर्णं॑ मधु॒श्चुतं॒ हरिं॑ हि॒न्वन्त्यद्रि॑भिः । इन्दु॒मिन्द्रा॑य पी॒तये॑ ॥9.65.8॥

yasya̱ varṇa̍ṃ madhu̱ścuta̱ṃ hari̍ṃ hi̱nvantyadri̍bhiḥ | indu̱mindrā̍ya pī̱taye̍

तस्य॑ ते वा॒जिनो॑ व॒यं विश्वा॒ धना॑नि जि॒ग्युष॑: । स॒खि॒त्वमा वृ॑णीमहे ॥9.65.9॥

tasya̍ te vā̱jino̍ va̱yaṃ viśvā̱ dhanā̍ni ji̱gyuṣa̍: | sa̱khi̱tvamā vṛ̍ṇīmahe

वृषा॑ पवस्व॒ धार॑या म॒रुत्व॑ते च मत्स॒रः । विश्वा॒ दधा॑न॒ ओज॑सा ॥9.65.10॥

vṛṣā̍ pavasva̱ dhāra̍yā ma̱rutva̍te ca matsa̱raḥ | viśvā̱ dadhā̍na̱ oja̍sā

तं त्वा॑ ध॒र्तार॑मो॒ण्यो॒३: पव॑मान स्व॒र्दृश॑म् । हि॒न्वे वाजे॑षु वा॒जिन॑म् ॥9.65.11॥

taṃ tvā̍ dha̱rtāra̍mo̱ṇyo̱3: pava̍māna sva̱rdṛśa̍m | hi̱nve vāje̍ṣu vā̱jina̍m

अ॒या चि॒त्तो वि॒पानया॒ हरि॑: पवस्व॒ धार॑या । युजं॒ वाजे॑षु चोदय ॥9.65.12॥

a̱yā ci̱tto vi̱pānayā̱ hari̍: pavasva̱ dhāra̍yā | yuja̱ṃ vāje̍ṣu codaya

आ न॑ इन्दो म॒हीमिषं॒ पव॑स्व वि॒श्वद॑र्शतः । अ॒स्मभ्यं॑ सोम गातु॒वित् ॥9.65.13॥

ā na̍ indo ma̱hīmiṣa̱ṃ pava̍sva vi̱śvada̍rśataḥ | a̱smabhya̍ṃ soma gātu̱vit

आ क॒लशा॑ अनूष॒तेन्दो॒ धारा॑भि॒रोज॑सा । एन्द्र॑स्य पी॒तये॑ विश ॥9.65.14॥

ā ka̱laśā̍ anūṣa̱tendo̱ dhārā̍bhi̱roja̍sā | endra̍sya pī̱taye̍ viśa

यस्य॑ ते॒ मद्यं॒ रसं॑ ती॒व्रं दु॒हन्त्यद्रि॑भिः । स प॑वस्वाभिमाति॒हा ॥9.65.15॥

yasya̍ te̱ madya̱ṃ rasa̍ṃ tī̱vraṃ du̱hantyadri̍bhiḥ | sa pa̍vasvābhimāti̱hā

राजा॑ मे॒धाभि॑रीयते॒ पव॑मानो म॒नावधि॑ । अ॒न्तरि॑क्षेण॒ यात॑वे ॥9.65.16॥

rājā̍ me̱dhābhi̍rīyate̱ pava̍māno ma̱nāvadhi̍ | a̱ntari̍kṣeṇa̱ yāta̍ve

आ न॑ इन्दो शत॒ग्विनं॒ गवां॒ पोषं॒ स्वश्व्य॑म् । वहा॒ भग॑त्तिमू॒तये॑ ॥9.65.17॥

ā na̍ indo śata̱gvina̱ṃ gavā̱ṃ poṣa̱ṃ svaśvya̍m | vahā̱ bhaga̍ttimū̱taye̍

आ न॑: सोम॒ सहो॒ जुवो॑ रू॒पं न वर्च॑से भर । सु॒ष्वा॒णो दे॒ववी॑तये ॥9.65.18॥

ā na̍: soma̱ saho̱ juvo̍ rū̱paṃ na varca̍se bhara | su̱ṣvā̱ṇo de̱vavī̍taye

अर्षा॑ सोम द्यु॒मत्त॑मो॒ऽभि द्रोणा॑नि॒ रोरु॑वत् । सीद॑ञ्छ्ये॒नो न योनि॒मा ॥9.65.19॥

arṣā̍ soma dyu̱matta̍mo̱'bhi droṇā̍ni̱ roru̍vat | sīda̍ñchye̱no na yoni̱mā

अ॒प्सा इन्द्रा॑य वा॒यवे॒ वरु॑णाय म॒रुद्भ्य॑: । सोमो॑ अर्षति॒ विष्ण॑वे ॥9.65.20॥

a̱psā indrā̍ya vā̱yave̱ varu̍ṇāya ma̱rudbhya̍: | somo̍ arṣati̱ viṣṇa̍ve

इषं॑ तो॒काय॑ नो॒ दध॑द॒स्मभ्यं॑ सोम वि॒श्वत॑: । आ प॑वस्व सह॒स्रिण॑म् ॥9.65.21॥

iṣa̍ṃ to̱kāya̍ no̱ dadha̍da̱smabhya̍ṃ soma vi̱śvata̍: | ā pa̍vasva saha̱sriṇa̍m

ये सोमा॑सः परा॒वति॒ ये अ॑र्वा॒वति॑ सुन्वि॒रे । ये वा॒दः श॑र्य॒णाव॑ति ॥9.65.22॥

ye somā̍saḥ parā̱vati̱ ye a̍rvā̱vati̍ sunvi̱re | ye vā̱daḥ śa̍rya̱ṇāva̍ti

य आ॑र्जी॒केषु॒ कृत्व॑सु॒ ये मध्ये॑ प॒स्त्या॑नाम् । ये वा॒ जने॑षु प॒ञ्चसु॑ ॥9.65.23॥

ya ā̍rjī̱keṣu̱ kṛtva̍su̱ ye madhye̍ pa̱styā̍nām | ye vā̱ jane̍ṣu pa̱ñcasu̍

ते नो॑ वृ॒ष्टिं दि॒वस्परि॒ पव॑न्ता॒मा सु॒वीर्य॑म् । सु॒वा॒ना दे॒वास॒ इन्द॑वः ॥9.65.24॥

te no̍ vṛ̱ṣṭiṃ di̱vaspari̱ pava̍ntā̱mā su̱vīrya̍m | su̱vā̱nā de̱vāsa̱ inda̍vaḥ

पव॑ते हर्य॒तो हरि॑र्गृणा॒नो ज॒मद॑ग्निना । हि॒न्वा॒नो गोरधि॑ त्व॒चि ॥9.65.25॥

pava̍te harya̱to hari̍rgṛṇā̱no ja̱mada̍gninā | hi̱nvā̱no goradhi̍ tva̱ci

प्र शु॒क्रासो॑ वयो॒जुवो॑ हिन्वा॒नासो॒ न सप्त॑यः । श्री॒णा॒ना अ॒प्सु मृ॑ञ्जत ॥9.65.26॥

pra śu̱krāso̍ vayo̱juvo̍ hinvā̱nāso̱ na sapta̍yaḥ | śrī̱ṇā̱nā a̱psu mṛ̍ñjata

तं त्वा॑ सु॒तेष्वा॒भुवो॑ हिन्वि॒रे दे॒वता॑तये । स प॑वस्वा॒नया॑ रु॒चा ॥9.65.27॥

taṃ tvā̍ su̱teṣvā̱bhuvo̍ hinvi̱re de̱vatā̍taye | sa pa̍vasvā̱nayā̍ ru̱cā

आ ते॒ दक्षं॑ मयो॒भुवं॒ वह्नि॑म॒द्या वृ॑णीमहे । पान्त॒मा पु॑रु॒स्पृह॑म् ॥9.65.28॥

ā te̱ dakṣa̍ṃ mayo̱bhuva̱ṃ vahni̍ma̱dyā vṛ̍ṇīmahe | pānta̱mā pu̍ru̱spṛha̍m

आ म॒न्द्रमा वरे॑ण्य॒मा विप्र॒मा म॑नी॒षिण॑म् । पान्त॒मा पु॑रु॒स्पृह॑म् ॥9.65.29॥

ā ma̱ndramā vare̍ṇya̱mā vipra̱mā ma̍nī̱ṣiṇa̍m | pānta̱mā pu̍ru̱spṛha̍m

आ र॒यिमा सु॑चे॒तुन॒मा सु॑क्रतो त॒नूष्वा । पान्त॒मा पु॑रु॒स्पृह॑म् ॥9.65.30॥

ā ra̱yimā su̍ce̱tuna̱mā su̍krato ta̱nūṣvā | pānta̱mā pu̍ru̱spṛha̍m

३० शतं वैखानसा: । पवमान: सोम:, १९-२१ अग्नि: पवमान: । गायत्री,१८ अनुष्टुप् ।

पव॑स्व विश्वचर्षणे॒ऽभि विश्वा॑नि॒ काव्या॑ । सखा॒ सखि॑भ्य॒ ईड्य॑: ॥9.66.1॥

pava̍sva viśvacarṣaṇe̱'bhi viśvā̍ni̱ kāvyā̍ | sakhā̱ sakhi̍bhya̱ īḍya̍:

ताभ्यां॒ विश्व॑स्य राजसि॒ ये प॑वमान॒ धाम॑नी । प्र॒ती॒ची सो॑म त॒स्थतु॑: ॥9.66.2॥

tābhyā̱ṃ viśva̍sya rājasi̱ ye pa̍vamāna̱ dhāma̍nī | pra̱tī̱cī so̍ma ta̱sthatu̍:

परि॒ धामा॑नि॒ यानि॑ ते॒ त्वं सो॑मासि वि॒श्वत॑: । पव॑मान ऋ॒तुभि॑: कवे ॥9.66.3॥

pari̱ dhāmā̍ni̱ yāni̍ te̱ tvaṃ so̍māsi vi̱śvata̍: | pava̍māna ṛ̱tubhi̍: kave

पव॑स्व ज॒नय॒न्निषो॒ऽभि विश्वा॑नि॒ वार्या॑ । सखा॒ सखि॑भ्य ऊ॒तये॑ ॥9.66.4॥

pava̍sva ja̱naya̱nniṣo̱'bhi viśvā̍ni̱ vāryā̍ | sakhā̱ sakhi̍bhya ū̱taye̍

तव॑ शु॒क्रासो॑ अ॒र्चयो॑ दि॒वस्पृ॒ष्ठे वि त॑न्वते । प॒वित्रं॑ सोम॒ धाम॑भिः ॥9.66.5॥

tava̍ śu̱krāso̍ a̱rcayo̍ di̱vaspṛ̱ṣṭhe vi ta̍nvate | pa̱vitra̍ṃ soma̱ dhāma̍bhiḥ

तवे॒मे स॒प्त सिन्ध॑वः प्र॒शिषं॑ सोम सिस्रते । तुभ्यं॑ धावन्ति धे॒नव॑: ॥9.66.6॥

tave̱me sa̱pta sindha̍vaḥ pra̱śiṣa̍ṃ soma sisrate | tubhya̍ṃ dhāvanti dhe̱nava̍:

प्र सो॑म याहि॒ धार॑या सु॒त इन्द्रा॑य मत्स॒रः । दधा॑नो॒ अक्षि॑ति॒ श्रव॑: ॥9.66.7॥

pra so̍ma yāhi̱ dhāra̍yā su̱ta indrā̍ya matsa̱raḥ | dadhā̍no̱ akṣi̍ti̱ śrava̍:

समु॑ त्वा धी॒भिर॑स्वरन्हिन्व॒तीः स॒प्त जा॒मय॑: । विप्र॑मा॒जा वि॒वस्व॑तः ॥9.66.8॥

samu̍ tvā dhī̱bhira̍svaranhinva̱tīḥ sa̱pta jā̱maya̍: | vipra̍mā̱jā vi̱vasva̍taḥ

मृ॒जन्ति॑ त्वा॒ सम॒ग्रुवोऽव्ये॑ जी॒रावधि॒ ष्वणि॑ । रे॒भो यद॒ज्यसे॒ वने॑ ॥9.66.9॥

mṛ̱janti̍ tvā̱ sama̱gruvo'vye̍ jī̱rāvadhi̱ ṣvaṇi̍ | re̱bho yada̱jyase̱ vane̍

पव॑मानस्य ते कवे॒ वाजि॒न्त्सर्गा॑ असृक्षत । अर्व॑न्तो॒ न श्र॑व॒स्यव॑: ॥9.66.10॥

pava̍mānasya te kave̱ vāji̱ntsargā̍ asṛkṣata | arva̍nto̱ na śra̍va̱syava̍:

अच्छा॒ कोशं॑ मधु॒श्चुत॒मसृ॑ग्रं॒ वारे॑ अ॒व्यये॑ । अवा॑वशन्त धी॒तय॑: ॥9.66.11॥

acchā̱ kośa̍ṃ madhu̱ścuta̱masṛ̍gra̱ṃ vāre̍ a̱vyaye̍ | avā̍vaśanta dhī̱taya̍:

अच्छा॑ समु॒द्रमिन्द॒वोऽस्तं॒ गावो॒ न धे॒नव॑: । अग्म॑न्नृ॒तस्य॒ योनि॒मा ॥9.66.12॥

acchā̍ samu̱draminda̱vo'sta̱ṃ gāvo̱ na dhe̱nava̍: | agma̍nnṛ̱tasya̱ yoni̱mā

प्र ण॑ इन्दो म॒हे रण॒ आपो॑ अर्षन्ति॒ सिन्ध॑वः । यद्गोभि॑र्वासयि॒ष्यसे॑ ॥9.66.13॥

pra ṇa̍ indo ma̱he raṇa̱ āpo̍ arṣanti̱ sindha̍vaḥ | yadgobhi̍rvāsayi̱ṣyase̍

अस्य॑ ते स॒ख्ये व॒यमिय॑क्षन्त॒स्त्वोत॑यः । इन्दो॑ सखि॒त्वमु॑श्मसि ॥9.66.14॥

asya̍ te sa̱khye va̱yamiya̍kṣanta̱stvota̍yaḥ | indo̍ sakhi̱tvamu̍śmasi

आ प॑वस्व॒ गवि॑ष्टये म॒हे सो॑म नृ॒चक्ष॑से । एन्द्र॑स्य ज॒ठरे॑ विश ॥9.66.15॥

ā pa̍vasva̱ gavi̍ṣṭaye ma̱he so̍ma nṛ̱cakṣa̍se | endra̍sya ja̱ṭhare̍ viśa

म॒हाँ अ॑सि सोम॒ ज्येष्ठ॑ उ॒ग्राणा॑मिन्द॒ ओजि॑ष्ठः । युध्वा॒ सञ्छश्व॑ज्जिगेथ ॥9.66.16॥

ma̱hām̐ a̍si soma̱ jyeṣṭha̍ u̱grāṇā̍minda̱ oji̍ṣṭhaḥ | yudhvā̱ sañchaśva̍jjigetha

य उ॒ग्रेभ्य॑श्चि॒दोजी॑या॒ञ्छूरे॑भ्यश्चि॒च्छूर॑तरः । भू॒रि॒दाभ्य॑श्चि॒न्मंही॑यान् ॥9.66.17॥

ya u̱grebhya̍ści̱dojī̍yā̱ñchūre̍bhyaści̱cchūra̍taraḥ | bhū̱ri̱dābhya̍ści̱nmaṃhī̍yān

त्वं सो॑म॒ सूर॒ एष॑स्तो॒कस्य॑ सा॒ता त॒नूना॑म् । वृ॒णी॒महे॑ स॒ख्याय॑ वृणी॒महे॒ युज्या॑य ॥9.66.18॥

tvaṃ so̍ma̱ sūra̱ eṣa̍sto̱kasya̍ sā̱tā ta̱nūnā̍m | vṛ̱ṇī̱mahe̍ sa̱khyāya̍ vṛṇī̱mahe̱ yujyā̍ya

अग्न॒ आयूं॑षि पवस॒ आ सु॒वोर्ज॒मिषं॑ च नः । आ॒रे बा॑धस्व दु॒च्छुना॑म् ॥9.66.19॥

agna̱ āyū̍ṃṣi pavasa̱ ā su̱vorja̱miṣa̍ṃ ca naḥ | ā̱re bā̍dhasva du̱cchunā̍m

अ॒ग्निॠषि॒: पव॑मान॒: पाञ्च॑जन्यः पु॒रोहि॑तः । तमी॑महे महाग॒यम् ॥9.66.20॥

a̱gniṝṣi̱: pava̍māna̱: pāñca̍janyaḥ pu̱rohi̍taḥ | tamī̍mahe mahāga̱yam

अग्ने॒ पव॑स्व॒ स्वपा॑ अ॒स्मे वर्च॑: सु॒वीर्य॑म् । दध॑द्र॒यिं मयि॒ पोष॑म् ॥9.66.21॥

agne̱ pava̍sva̱ svapā̍ a̱sme varca̍: su̱vīrya̍m | dadha̍dra̱yiṃ mayi̱ poṣa̍m

पव॑मानो॒ अति॒ स्रिधो॒ऽभ्य॑र्षति सुष्टु॒तिम् । सूरो॒ न वि॒श्वद॑र्शतः ॥9.66.22॥

pava̍māno̱ ati̱ sridho̱'bhya̍rṣati suṣṭu̱tim | sūro̱ na vi̱śvada̍rśataḥ

स म॑र्मृजा॒न आ॒युभि॒: प्रय॑स्वा॒न्प्रय॑से हि॒तः । इन्दु॒रत्यो॑ विचक्ष॒णः ॥9.66.23॥

sa ma̍rmṛjā̱na ā̱yubhi̱: praya̍svā̱npraya̍se hi̱taḥ | indu̱ratyo̍ vicakṣa̱ṇaḥ

पव॑मान ऋ॒तं बृ॒हच्छु॒क्रं ज्योति॑रजीजनत् । कृ॒ष्णा तमां॑सि॒ जङ्घ॑नत् ॥9.66.24॥

pava̍māna ṛ̱taṃ bṛ̱hacchu̱kraṃ jyoti̍rajījanat | kṛ̱ṣṇā tamā̍ṃsi̱ jaṅgha̍nat

पव॑मानस्य॒ जङ्घ्न॑तो॒ हरे॑श्च॒न्द्रा अ॑सृक्षत । जी॒रा अ॑जि॒रशो॑चिषः ॥9.66.25॥

pava̍mānasya̱ jaṅghna̍to̱ hare̍śca̱ndrā a̍sṛkṣata | jī̱rā a̍ji̱raśo̍ciṣaḥ

पव॑मानो र॒थीत॑मः शु॒भ्रेभि॑: शु॒भ्रश॑स्तमः । हरि॑श्चन्द्रो म॒रुद्ग॑णः ॥9.66.26॥

pava̍māno ra̱thīta̍maḥ śu̱bhrebhi̍: śu̱bhraśa̍stamaḥ | hari̍ścandro ma̱rudga̍ṇaḥ

पव॑मानो॒ व्य॑श्नवद्र॒श्मिभि॑र्वाज॒सात॑मः । दध॑त्स्तो॒त्रे सु॒वीर्य॑म् ॥9.66.27॥

pava̍māno̱ vya̍śnavadra̱śmibhi̍rvāja̱sāta̍maḥ | dadha̍tsto̱tre su̱vīrya̍m

प्र सु॑वा॒न इन्दु॑रक्षाः प॒वित्र॒मत्य॒व्यय॑म् । पु॒ना॒न इन्दु॒रिन्द्र॒मा ॥9.66.28॥

pra su̍vā̱na indu̍rakṣāḥ pa̱vitra̱matya̱vyaya̍m | pu̱nā̱na indu̱rindra̱mā

ए॒ष सोमो॒ अधि॑ त्व॒चि गवां॑ क्रीळ॒त्यद्रि॑भिः । इन्द्रं॒ मदा॑य॒ जोहु॑वत् ॥9.66.29॥

e̱ṣa somo̱ adhi̍ tva̱ci gavā̍ṃ krīl̤a̱tyadri̍bhiḥ | indra̱ṃ madā̍ya̱ johu̍vat

यस्य॑ ते द्यु॒म्नव॒त्पय॒: पव॑मा॒नाभृ॑तं दि॒वः । तेन॑ नो मृळ जी॒वसे॑ ॥9.66.30॥

yasya̍ te dyu̱mnava̱tpaya̱: pava̍mā̱nābhṛ̍taṃ di̱vaḥ | tena̍ no mṛl̤a jī̱vase̍

(१-३२) १-३ भरद्वाजो बार्हस्पत्य:, ४-६ कश्यपो मारीच:, ७-९ गोतमो राहूगण:, १०-१२ अत्रिर्भौम:, १३-१५ विश्वामित्रो गाथिन:, १६-१८ जमदग्निर्भार्गव:, १९-२१ वसिष्ठो मैत्रावरुणि:,२२-३२ पवित्र आङ्गिरसो वा वसिष्ठो वा उभौ वा । पवमानः सोम:, १०-१२ पवमानः पूषा वा, २३-२७ पवमानोऽग्नि:, २५ पवमानः सविता वा, २६ पवमानाग्निसवितार:, २७ विश्वे देवा वा , ३१-३२ पवमान्यध्येता ।गायत्री, १६ -१८ नित्यद्विपदा गायत्री , ३० पुरउष्णिक्; २७ ,३१ ,३२, अनुष्टुप् ।

त्वं सो॑मासि धार॒युर्म॒न्द्र ओजि॑ष्ठो अध्व॒रे । पव॑स्व मंह॒यद्र॑यिः ॥9.67.1॥

tvaṃ so̍māsi dhāra̱yurma̱ndra oji̍ṣṭho adhva̱re | pava̍sva maṃha̱yadra̍yiḥ

त्वं सु॒तो नृ॒माद॑नो दध॒न्वान्म॑त्स॒रिन्त॑मः । इन्द्रा॑य सू॒रिरन्ध॑सा ॥9.67.2॥

tvaṃ su̱to nṛ̱māda̍no dadha̱nvānma̍tsa̱rinta̍maḥ | indrā̍ya sū̱rirandha̍sā

त्वं सु॑ष्वा॒णो अद्रि॑भिर॒भ्य॑र्ष॒ कनि॑क्रदत् । द्यु॒मन्तं॒ शुष्म॑मुत्त॒मम् ॥9.67.3॥

tvaṃ su̍ṣvā̱ṇo adri̍bhira̱bhya̍rṣa̱ kani̍kradat | dyu̱manta̱ṃ śuṣma̍mutta̱mam

इन्दु॑र्हिन्वा॒नो अ॑र्षति ति॒रो वारा॑ण्य॒व्यया॑ । हरि॒र्वाज॑मचिक्रदत् ॥9.67.4॥

indu̍rhinvā̱no a̍rṣati ti̱ro vārā̍ṇya̱vyayā̍ | hari̱rvāja̍macikradat

इन्दो॒ व्यव्य॑मर्षसि॒ वि श्रवां॑सि॒ वि सौभ॑गा । वि वाजा॑न्त्सोम॒ गोम॑तः ॥9.67.5॥

indo̱ vyavya̍marṣasi̱ vi śravā̍ṃsi̱ vi saubha̍gā | vi vājā̍ntsoma̱ goma̍taḥ

आ न॑ इन्दो शत॒ग्विनं॑ र॒यिं गोम॑न्तम॒श्विन॑म् । भरा॑ सोम सह॒स्रिण॑म् ॥9.67.6॥

ā na̍ indo śata̱gvina̍ṃ ra̱yiṃ goma̍ntama̱śvina̍m | bharā̍ soma saha̱sriṇa̍m

पव॑मानास॒ इन्द॑वस्ति॒रः प॒वित्र॑मा॒शव॑: । इन्द्रं॒ यामे॑भिराशत ॥9.67.7॥

pava̍mānāsa̱ inda̍vasti̱raḥ pa̱vitra̍mā̱śava̍: | indra̱ṃ yāme̍bhirāśata

क॒कु॒हः सो॒म्यो रस॒ इन्दु॒रिन्द्रा॑य पू॒र्व्यः । आ॒युः प॑वत आ॒यवे॑ ॥9.67.8॥

ka̱ku̱haḥ so̱myo rasa̱ indu̱rindrā̍ya pū̱rvyaḥ | ā̱yuḥ pa̍vata ā̱yave̍

हि॒न्वन्ति॒ सूर॒मुस्र॑य॒: पव॑मानं मधु॒श्चुत॑म् । अ॒भि गि॒रा सम॑स्वरन् ॥9.67.9॥

hi̱nvanti̱ sūra̱musra̍ya̱: pava̍mānaṃ madhu̱ścuta̍m | a̱bhi gi̱rā sama̍svaran

अ॒वि॒ता नो॑ अ॒जाश्व॑: पू॒षा याम॑नियामनि । आ भ॑क्षत्क॒न्या॑सु नः ॥9.67.10॥

a̱vi̱tā no̍ a̱jāśva̍: pū̱ṣā yāma̍niyāmani | ā bha̍kṣatka̱nyā̍su naḥ

अ॒यं सोम॑: कप॒र्दिने॑ घृ॒तं न प॑वते॒ मधु॑ । आ भ॑क्षत्क॒न्या॑सु नः ॥9.67.11॥

a̱yaṃ soma̍: kapa̱rdine̍ ghṛ̱taṃ na pa̍vate̱ madhu̍ | ā bha̍kṣatka̱nyā̍su naḥ

अ॒यं त॑ आघृणे सु॒तो घृ॒तं न प॑वते॒ शुचि॑ । आ भ॑क्षत्क॒न्या॑सु नः ॥9.67.12॥

a̱yaṃ ta̍ āghṛṇe su̱to ghṛ̱taṃ na pa̍vate̱ śuci̍ | ā bha̍kṣatka̱nyā̍su naḥ

वा॒चो ज॒न्तुः क॑वी॒नां पव॑स्व सोम॒ धार॑या । दे॒वेषु॑ रत्न॒धा अ॑सि ॥9.67.13॥

vā̱co ja̱ntuḥ ka̍vī̱nāṃ pava̍sva soma̱ dhāra̍yā | de̱veṣu̍ ratna̱dhā a̍si

आ क॒लशे॑षु धावति श्ये॒नो वर्म॒ वि गा॑हते । अ॒भि द्रोणा॒ कनि॑क्रदत् ॥9.67.14॥

ā ka̱laśe̍ṣu dhāvati śye̱no varma̱ vi gā̍hate | a̱bhi droṇā̱ kani̍kradat

परि॒ प्र सो॑म ते॒ रसोऽस॑र्जि क॒लशे॑ सु॒तः । श्ये॒नो न त॒क्तो अ॑र्षति ॥9.67.15॥

pari̱ pra so̍ma te̱ raso'sa̍rji ka̱laśe̍ su̱taḥ | śye̱no na ta̱kto a̍rṣati

पव॑स्व सोम म॒न्दय॒न्निन्द्रा॑य॒ मधु॑मत्तमः ॥9.67.16॥

pava̍sva soma ma̱ndaya̱nnindrā̍ya̱ madhu̍mattamaḥ

असृ॑ग्रन्दे॒ववी॑तये वाज॒यन्तो॒ रथा॑ इव ॥9.67.17॥

asṛ̍grande̱vavī̍taye vāja̱yanto̱ rathā̍ iva

ते सु॒तासो॑ म॒दिन्त॑माः शु॒क्रा वा॒युम॑सृक्षत ॥9.67.18॥

te su̱tāso̍ ma̱dinta̍māḥ śu̱krā vā̱yuma̍sṛkṣata

ग्राव्णा॑ तु॒न्नो अ॒भिष्टु॑तः प॒वित्रं॑ सोम गच्छसि । दध॑त्स्तो॒त्रे सु॒वीर्य॑म् ॥9.67.19॥

grāvṇā̍ tu̱nno a̱bhiṣṭu̍taḥ pa̱vitra̍ṃ soma gacchasi | dadha̍tsto̱tre su̱vīrya̍m

ए॒ष तु॒न्नो अ॒भिष्टु॑तः प॒वित्र॒मति॑ गाहते । र॒क्षो॒हा वार॑म॒व्यय॑म् ॥9.67.20॥

e̱ṣa tu̱nno a̱bhiṣṭu̍taḥ pa̱vitra̱mati̍ gāhate | ra̱kṣo̱hā vāra̍ma̱vyaya̍m

यदन्ति॒ यच्च॑ दूर॒के भ॒यं वि॒न्दति॒ मामि॒ह । पव॑मान॒ वि तज्ज॑हि ॥9.67.21॥

yadanti̱ yacca̍ dūra̱ke bha̱yaṃ vi̱ndati̱ māmi̱ha | pava̍māna̱ vi tajja̍hi

पव॑मान॒: सो अ॒द्य न॑: प॒वित्रे॑ण॒ विच॑र्षणिः । यः पो॒ता स पु॑नातु नः ॥9.67.22॥

pava̍māna̱: so a̱dya na̍: pa̱vitre̍ṇa̱ vica̍rṣaṇiḥ | yaḥ po̱tā sa pu̍nātu naḥ

यत्ते॑ प॒वित्र॑म॒र्चिष्यग्ने॒ वित॑तम॒न्तरा । ब्रह्म॒ तेन॑ पुनीहि नः ॥9.67.23॥

yatte̍ pa̱vitra̍ma̱rciṣyagne̱ vita̍tama̱ntarā | brahma̱ tena̍ punīhi naḥ

यत्ते॑ प॒वित्र॑मर्चि॒वदग्ने॒ तेन॑ पुनीहि नः । ब्र॒ह्म॒स॒वैः पु॑नीहि नः ॥9.67.24॥

yatte̍ pa̱vitra̍marci̱vadagne̱ tena̍ punīhi naḥ | bra̱hma̱sa̱vaiḥ pu̍nīhi naḥ

उ॒भाभ्यां॑ देव सवितः प॒वित्रे॑ण स॒वेन॑ च । मां पु॑नीहि वि॒श्वत॑: ॥9.67.25॥

u̱bhābhyā̍ṃ deva savitaḥ pa̱vitre̍ṇa sa̱vena̍ ca | māṃ pu̍nīhi vi̱śvata̍:

त्रि॒भिष्ट्वं दे॑व सवित॒र्वर्षि॑ष्ठैः सोम॒ धाम॑भिः । अग्ने॒ दक्षै॑: पुनीहि नः ॥9.67.26॥

tri̱bhiṣṭvaṃ de̍va savita̱rvarṣi̍ṣṭhaiḥ soma̱ dhāma̍bhiḥ | agne̱ dakṣai̍: punīhi naḥ

पु॒नन्तु॒ मां दे॑वज॒नाः पु॒नन्तु॒ वस॑वो धि॒या । विश्वे॑ देवाः पुनी॒त मा॒ जात॑वेदः पुनी॒हि मा॑ ॥9.67.27॥

pu̱nantu̱ māṃ de̍vaja̱nāḥ pu̱nantu̱ vasa̍vo dhi̱yā | viśve̍ devāḥ punī̱ta mā̱ jāta̍vedaḥ punī̱hi mā̍

प्र प्या॑यस्व॒ प्र स्य॑न्दस्व॒ सोम॒ विश्वे॑भिरं॒शुभि॑: । दे॒वेभ्य॑ उत्त॒मं ह॒विः ॥9.67.28॥

pra pyā̍yasva̱ pra sya̍ndasva̱ soma̱ viśve̍bhira̱ṃśubhi̍: | de̱vebhya̍ utta̱maṃ ha̱viḥ

उप॑ प्रि॒यं पनि॑प्नतं॒ युवा॑नमाहुती॒वृध॑म् । अग॑न्म॒ बिभ्र॑तो॒ नम॑: ॥9.67.29॥

upa̍ pri̱yaṃ pani̍pnata̱ṃ yuvā̍namāhutī̱vṛdha̍m | aga̍nma̱ bibhra̍to̱ nama̍:

अ॒लाय्य॑स्य पर॒शुर्न॑नाश॒ तमा प॑वस्व देव सोम । आ॒खुं चि॑दे॒व दे॑व सोम ॥9.67.30॥

a̱lāyya̍sya para̱śurna̍nāśa̱ tamā pa̍vasva deva soma | ā̱khuṃ ci̍de̱va de̍va soma

यः पा॑वमा॒नीर॒ध्येत्यृषि॑भि॒: सम्भृ॑तं॒ रस॑म् । सर्वं॒ स पू॒तम॑श्नाति स्वदि॒तं मा॑त॒रिश्व॑ना ॥9.67.31॥

yaḥ pā̍vamā̱nīra̱dhyetyṛṣi̍bhi̱: sambhṛ̍ta̱ṃ rasa̍m | sarva̱ṃ sa pū̱tama̍śnāti svadi̱taṃ mā̍ta̱riśva̍nā

पा॒व॒मा॒नीर्यो अ॒ध्येत्यृषि॑भि॒: सम्भृ॑तं॒ रस॑म् । तस्मै॒ सर॑स्वती दुहे क्षी॒रं स॒र्पिर्मधू॑द॒कम् ॥9.67.32॥

pā̱va̱mā̱nīryo a̱dhyetyṛṣi̍bhi̱: sambhṛ̍ta̱ṃ rasa̍m | tasmai̱ sara̍svatī duhe kṣī̱raṃ sa̱rpirmadhū̍da̱kam

१०वत्सप्रिर्भालन्दन: । पवमान: सोम: ।जगती ,१० त्रिष्टुप् ।

प्र दे॒वमच्छा॒ मधु॑मन्त॒ इन्द॒वोऽसि॑ष्यदन्त॒ गाव॒ आ न धे॒नव॑: ।

ब॒र्हि॒षदो॑ वच॒नाव॑न्त॒ ऊध॑भिः परि॒स्रुत॑मु॒स्रिया॑ नि॒र्णिजं॑ धिरे ॥9.68.1॥

pra de̱vamacchā̱ madhu̍manta̱ inda̱vo'si̍ṣyadanta̱ gāva̱ ā na dhe̱nava̍: |

ba̱rhi̱ṣado̍ vaca̱nāva̍nta̱ ūdha̍bhiḥ pari̱sruta̍mu̱sriyā̍ ni̱rṇija̍ṃ dhire

स रोरु॑वद॒भि पूर्वा॑ अचिक्रददुपा॒रुह॑: श्र॒थय॑न्त्स्वादते॒ हरि॑: ।

ति॒रः प॒वित्रं॑ परि॒यन्नु॒रु ज्रयो॒ नि शर्या॑णि दधते दे॒व आ वर॑म् ॥9.68.2॥

sa roru̍vada̱bhi pūrvā̍ acikradadupā̱ruha̍: śra̱thaya̍ntsvādate̱ hari̍: |

ti̱raḥ pa̱vitra̍ṃ pari̱yannu̱ru jrayo̱ ni śaryā̍ṇi dadhate de̱va ā vara̍m

वि यो म॒मे य॒म्या॑ संय॒ती मद॑: साकं॒वृधा॒ पय॑सा पिन्व॒दक्षि॑ता ।

म॒ही अ॑पा॒रे रज॑सी वि॒वेवि॑ददभि॒व्रज॒न्नक्षि॑तं॒ पाज॒ आ द॑दे ॥9.68.3॥

vi yo ma̱me ya̱myā̍ saṃya̱tī mada̍: sāka̱ṃvṛdhā̱ paya̍sā pinva̱dakṣi̍tā |

ma̱hī a̍pā̱re raja̍sī vi̱vevi̍dadabhi̱vraja̱nnakṣi̍ta̱ṃ pāja̱ ā da̍de

स मा॒तरा॑ वि॒चर॑न्वा॒जय॑न्न॒पः प्र मेधि॑रः स्व॒धया॑ पिन्वते प॒दम् ।

अं॒शुर्यवे॑न पिपिशे य॒तो नृभि॒: सं जा॒मिभि॒र्नस॑ते॒ रक्ष॑ते॒ शिर॑: ॥9.68.4॥

sa mā̱tarā̍ vi̱cara̍nvā̱jaya̍nna̱paḥ pra medhi̍raḥ sva̱dhayā̍ pinvate pa̱dam |

a̱ṃśuryave̍na pipiśe ya̱to nṛbhi̱: saṃ jā̱mibhi̱rnasa̍te̱ rakṣa̍te̱ śira̍:

सं दक्षे॑ण॒ मन॑सा जायते क॒विॠ॒तस्य॒ गर्भो॒ निहि॑तो य॒मा प॒रः ।

यूना॑ ह॒ सन्ता॑ प्रथ॒मं वि ज॑ज्ञतु॒र्गुहा॑ हि॒तं जनि॑म॒ नेम॒मुद्य॑तम् ॥9.68.5॥

saṃ dakṣe̍ṇa̱ mana̍sā jāyate ka̱viṝ̱tasya̱ garbho̱ nihi̍to ya̱mā pa̱raḥ |

yūnā̍ ha̱ santā̍ pratha̱maṃ vi ja̍jñatu̱rguhā̍ hi̱taṃ jani̍ma̱ nema̱mudya̍tam

म॒न्द्रस्य॑ रू॒पं वि॑विदुर्मनी॒षिण॑: श्ये॒नो यदन्धो॒ अभ॑रत्परा॒वत॑: ।

तं म॑र्जयन्त सु॒वृधं॑ न॒दीष्वाँ उ॒शन्त॑मं॒शुं प॑रि॒यन्त॑मृ॒ग्मिय॑म् ॥9.68.6॥

ma̱ndrasya̍ rū̱paṃ vi̍vidurmanī̱ṣiṇa̍: śye̱no yadandho̱ abha̍ratparā̱vata̍: |

taṃ ma̍rjayanta su̱vṛdha̍ṃ na̱dīṣvām̐ u̱śanta̍ma̱ṃśuṃ pa̍ri̱yanta̍mṛ̱gmiya̍m

त्वां मृ॑जन्ति॒ दश॒ योष॑णः सु॒तं सोम॒ ऋषि॑भिर्म॒तिभि॑र्धी॒तिभि॑र्हि॒तम् ।

अव्यो॒ वारे॑भिरु॒त दे॒वहू॑तिभि॒र्नृभि॑र्य॒तो वाज॒मा द॑र्षि सा॒तये॑ ॥9.68.7॥

tvāṃ mṛ̍janti̱ daśa̱ yoṣa̍ṇaḥ su̱taṃ soma̱ ṛṣi̍bhirma̱tibhi̍rdhī̱tibhi̍rhi̱tam |

avyo̱ vāre̍bhiru̱ta de̱vahū̍tibhi̱rnṛbhi̍rya̱to vāja̱mā da̍rṣi sā̱taye̍

प॒रि॒प्र॒यन्तं॑ व॒य्यं॑ सुषं॒सदं॒ सोमं॑ मनी॒षा अ॒भ्य॑नूषत॒ स्तुभ॑: ।

यो धार॑या॒ मधु॑माँ ऊ॒र्मिणा॑ दि॒व इय॑र्ति॒ वाचं॑ रयि॒षाळम॑र्त्यः ॥9.68.8॥

pa̱ri̱pra̱yanta̍ṃ va̱yya̍ṃ suṣa̱ṃsada̱ṃ soma̍ṃ manī̱ṣā a̱bhya̍nūṣata̱ stubha̍: |

yo dhāra̍yā̱ madhu̍mām̐ ū̱rmiṇā̍ di̱va iya̍rti̱ vāca̍ṃ rayi̱ṣāl̤ama̍rtyaḥ

अ॒यं दि॒व इ॑यर्ति॒ विश्व॒मा रज॒: सोम॑: पुना॒नः क॒लशे॑षु सीदति ।

अ॒द्भिर्गोभि॑र्मृज्यते॒ अद्रि॑भिः सु॒तः पु॑ना॒न इन्दु॒र्वरि॑वो विदत्प्रि॒यम् ॥9.68.9॥

a̱yaṃ di̱va i̍yarti̱ viśva̱mā raja̱: soma̍: punā̱naḥ ka̱laśe̍ṣu sīdati |

a̱dbhirgobhi̍rmṛjyate̱ adri̍bhiḥ su̱taḥ pu̍nā̱na indu̱rvari̍vo vidatpri̱yam

ए॒वा न॑: सोम परिषि॒च्यमा॑नो॒ वयो॒ दध॑च्चि॒त्रत॑मं पवस्व ।

अ॒द्वे॒षे द्यावा॑पृथि॒वी हु॑वेम॒ देवा॑ ध॒त्त र॒यिम॒स्मे सु॒वीर॑म् ॥9.68.10॥

e̱vā na̍: soma pariṣi̱cyamā̍no̱ vayo̱ dadha̍cci̱trata̍maṃ pavasva |

a̱dve̱ṣe dyāvā̍pṛthi̱vī hu̍vema̱ devā̍ dha̱tta ra̱yima̱sme su̱vīra̍m

१० हिरण्यस्तूप आङ्गिरस: । पवमान: सोम: ।जगती ,९-१० त्रिष्टुप् ।

इषु॒र्न धन्व॒न्प्रति॑ धीयते म॒तिर्व॒त्सो न मा॒तुरुप॑ स॒र्ज्यूध॑नि ।

उ॒रुधा॑रेव दुहे॒ अग्र॑ आय॒त्यस्य॑ व्र॒तेष्वपि॒ सोम॑ इष्यते ॥9.69.1॥

iṣu̱rna dhanva̱nprati̍ dhīyate ma̱tirva̱tso na mā̱turupa̍ sa̱rjyūdha̍ni |

u̱rudhā̍reva duhe̱ agra̍ āya̱tyasya̍ vra̱teṣvapi̱ soma̍ iṣyate

उपो॑ म॒तिः पृ॒च्यते॑ सि॒च्यते॒ मधु॑ म॒न्द्राज॑नी चोदते अ॒न्तरा॒सनि॑ ।

पव॑मानः संत॒निः प्र॑घ्न॒तामि॑व॒ मधु॑मान्द्र॒प्सः परि॒ वार॑मर्षति ॥9.69.2॥

upo̍ ma̱tiḥ pṛ̱cyate̍ si̱cyate̱ madhu̍ ma̱ndrāja̍nī codate a̱ntarā̱sani̍ |

pava̍mānaḥ saṃta̱niḥ pra̍ghna̱tāmi̍va̱ madhu̍māndra̱psaḥ pari̱ vāra̍marṣati

अव्ये॑ वधू॒युः प॑वते॒ परि॑ त्व॒चि श्र॑थ्नी॒ते न॒प्तीरदि॑तेॠ॒तं य॒ते ।

हरि॑रक्रान्यज॒तः सं॑य॒तो मदो॑ नृ॒म्णा शिशा॑नो महि॒षो न शो॑भते ॥9.69.3॥

avye̍ vadhū̱yuḥ pa̍vate̱ pari̍ tva̱ci śra̍thnī̱te na̱ptīradi̍teṝ̱taṃ ya̱te |

hari̍rakrānyaja̱taḥ sa̍ṃya̱to mado̍ nṛ̱mṇā śiśā̍no mahi̱ṣo na śo̍bhate

उ॒क्षा मि॑माति॒ प्रति॑ यन्ति धे॒नवो॑ दे॒वस्य॑ दे॒वीरुप॑ यन्ति निष्कृ॒तम् ।

अत्य॑क्रमी॒दर्जु॑नं॒ वार॑म॒व्यय॒मत्कं॒ न नि॒क्तं परि॒ सोमो॑ अव्यत ॥9.69.4॥

u̱kṣā mi̍māti̱ prati̍ yanti dhe̱navo̍ de̱vasya̍ de̱vīrupa̍ yanti niṣkṛ̱tam |

atya̍kramī̱darju̍na̱ṃ vāra̍ma̱vyaya̱matka̱ṃ na ni̱ktaṃ pari̱ somo̍ avyata

अमृ॑क्तेन॒ रुश॑ता॒ वास॑सा॒ हरि॒रम॑र्त्यो निर्णिजा॒नः परि॑ व्यत ।

दि॒वस्पृ॒ष्ठं ब॒र्हणा॑ नि॒र्णिजे॑ कृतोप॒स्तर॑णं च॒म्वो॑र्नभ॒स्मय॑म् ॥9.69.5॥

amṛ̍ktena̱ ruśa̍tā̱ vāsa̍sā̱ hari̱rama̍rtyo nirṇijā̱naḥ pari̍ vyata |

di̱vaspṛ̱ṣṭhaṃ ba̱rhaṇā̍ ni̱rṇije̍ kṛtopa̱stara̍ṇaṃ ca̱mvo̍rnabha̱smaya̍m

सूर्य॑स्येव र॒श्मयो॑ द्रावयि॒त्नवो॑ मत्स॒रास॑: प्र॒सुप॑: सा॒कमी॑रते ।

तन्तुं॑ त॒तं परि॒ सर्गा॑स आ॒शवो॒ नेन्द्रा॑दृ॒ते प॑वते॒ धाम॒ किं च॒न ॥9.69.6॥

sūrya̍syeva ra̱śmayo̍ drāvayi̱tnavo̍ matsa̱rāsa̍: pra̱supa̍: sā̱kamī̍rate |

tantu̍ṃ ta̱taṃ pari̱ sargā̍sa ā̱śavo̱ nendrā̍dṛ̱te pa̍vate̱ dhāma̱ kiṃ ca̱na

सिन्धो॑रिव प्रव॒णे नि॒म्न आ॒शवो॒ वृष॑च्युता॒ मदा॑सो गा॒तुमा॑शत ।

शं नो॑ निवे॒शे द्वि॒पदे॒ चतु॑ष्पदे॒ऽस्मे वाजा॑: सोम तिष्ठन्तु कृ॒ष्टय॑: ॥9.69.7॥

sindho̍riva prava̱ṇe ni̱mna ā̱śavo̱ vṛṣa̍cyutā̱ madā̍so gā̱tumā̍śata |

śaṃ no̍ nive̱śe dvi̱pade̱ catu̍ṣpade̱'sme vājā̍: soma tiṣṭhantu kṛ̱ṣṭaya̍:

आ न॑: पवस्व॒ वसु॑म॒द्धिर॑ण्यव॒दश्वा॑व॒द्गोम॒द्यव॑मत्सु॒वीर्य॑म् ।

यू॒यं हि सो॑म पि॒तरो॒ मम॒ स्थन॑ दि॒वो मू॒र्धान॒: प्रस्थि॑ता वय॒स्कृत॑: ॥9.69.8॥

ā na̍: pavasva̱ vasu̍ma̱ddhira̍ṇyava̱daśvā̍va̱dgoma̱dyava̍matsu̱vīrya̍m |

yū̱yaṃ hi so̍ma pi̱taro̱ mama̱ sthana̍ di̱vo mū̱rdhāna̱: prasthi̍tā vaya̱skṛta̍:

ए॒ते सोमा॒: पव॑मानास॒ इन्द्रं॒ रथा॑ इव॒ प्र य॑युः सा॒तिमच्छ॑ ।

सु॒ताः प॒वित्र॒मति॑ य॒न्त्यव्यं॑ हि॒त्वी व॒व्रिं ह॒रितो॑ वृ॒ष्टिमच्छ॑ ॥9.69.9॥

e̱te somā̱: pava̍mānāsa̱ indra̱ṃ rathā̍ iva̱ pra ya̍yuḥ sā̱timaccha̍ |

su̱tāḥ pa̱vitra̱mati̍ ya̱ntyavya̍ṃ hi̱tvī va̱vriṃ ha̱rito̍ vṛ̱ṣṭimaccha̍

इन्द॒विन्द्रा॑य बृह॒ते प॑वस्व सुमृळी॒को अ॑नव॒द्यो रि॒शादा॑: ।

भरा॑ च॒न्द्राणि॑ गृण॒ते वसू॑नि दे॒वैर्द्या॑वापृथिवी॒ प्राव॑तं नः ॥9.69.10॥

inda̱vindrā̍ya bṛha̱te pa̍vasva sumṛl̤ī̱ko a̍nava̱dyo ri̱śādā̍: |

bharā̍ ca̱ndrāṇi̍ gṛṇa̱te vasū̍ni de̱vairdyā̍vāpṛthivī̱ prāva̍taṃ naḥ

रेणुर्वैश्वामित्र: । पवमान: सोम: ।जगती ,१० त्रिष्टुप् ।

त्रिर॑स्मै स॒प्त धे॒नवो॑ दुदुह्रे स॒त्यामा॒शिरं॑ पू॒र्व्ये व्यो॑मनि ।

च॒त्वार्य॒न्या भुव॑नानि नि॒र्णिजे॒ चारू॑णि चक्रे॒ यदृ॒तैरव॑र्धत ॥9.70.1॥

trira̍smai sa̱pta dhe̱navo̍ duduhre sa̱tyāmā̱śira̍ṃ pū̱rvye vyo̍mani |

ca̱tvārya̱nyā bhuva̍nāni ni̱rṇije̱ cārū̍ṇi cakre̱ yadṛ̱tairava̍rdhata

स भिक्ष॑माणो अ॒मृत॑स्य॒ चारु॑ण उ॒भे द्यावा॒ काव्ये॑ना॒ वि श॑श्रथे ।

तेजि॑ष्ठा अ॒पो मं॒हना॒ परि॑ व्यत॒ यदी॑ दे॒वस्य॒ श्रव॑सा॒ सदो॑ वि॒दुः ॥9.70.2॥

sa bhikṣa̍māṇo a̱mṛta̍sya̱ cāru̍ṇa u̱bhe dyāvā̱ kāvye̍nā̱ vi śa̍śrathe |

teji̍ṣṭhā a̱po ma̱ṃhanā̱ pari̍ vyata̱ yadī̍ de̱vasya̱ śrava̍sā̱ sado̍ vi̱duḥ

ते अ॑स्य सन्तु के॒तवोऽमृ॑त्य॒वोऽदा॑भ्यासो ज॒नुषी॑ उ॒भे अनु॑ ।

येभि॑र्नृ॒म्णा च॑ दे॒व्या॑ च पुन॒त आदिद्राजा॑नं म॒नना॑ अगृभ्णत ॥9.70.3॥

te a̍sya santu ke̱tavo'mṛ̍tya̱vo'dā̍bhyāso ja̱nuṣī̍ u̱bhe anu̍ |

yebhi̍rnṛ̱mṇā ca̍ de̱vyā̍ ca puna̱ta ādidrājā̍naṃ ma̱nanā̍ agṛbhṇata

स मृ॒ज्यमा॑नो द॒शभि॑: सु॒कर्म॑भि॒: प्र म॑ध्य॒मासु॑ मा॒तृषु॑ प्र॒मे सचा॑ ।

व्र॒तानि॑ पा॒नो अ॒मृत॑स्य॒ चारु॑ण उ॒भे नृ॒चक्षा॒ अनु॑ पश्यते॒ विशौ॑ ॥9.70.4॥

sa mṛ̱jyamā̍no da̱śabhi̍: su̱karma̍bhi̱: pra ma̍dhya̱māsu̍ mā̱tṛṣu̍ pra̱me sacā̍ |

vra̱tāni̍ pā̱no a̱mṛta̍sya̱ cāru̍ṇa u̱bhe nṛ̱cakṣā̱ anu̍ paśyate̱ viśau̍

स म॑र्मृजा॒न इ॑न्द्रि॒याय॒ धाय॑स॒ ओभे अ॒न्ता रोद॑सी हर्षते हि॒तः ।

वृषा॒ शुष्मे॑ण बाधते॒ वि दु॑र्म॒तीरा॒देदि॑शानः शर्य॒हेव॑ शु॒रुध॑: ॥9.70.5॥

sa ma̍rmṛjā̱na i̍ndri̱yāya̱ dhāya̍sa̱ obhe a̱ntā roda̍sī harṣate hi̱taḥ |

vṛṣā̱ śuṣme̍ṇa bādhate̱ vi du̍rma̱tīrā̱dedi̍śānaḥ śarya̱heva̍ śu̱rudha̍:

स मा॒तरा॒ न ददृ॑शान उ॒स्रियो॒ नान॑ददेति म॒रुता॑मिव स्व॒नः ।

जा॒नन्नृ॒तं प्र॑थ॒मं यत्स्व॑र्णरं॒ प्रश॑स्तये॒ कम॑वृणीत सु॒क्रतु॑: ॥9.70.6॥

sa mā̱tarā̱ na dadṛ̍śāna u̱sriyo̱ nāna̍dadeti ma̱rutā̍miva sva̱naḥ |

jā̱nannṛ̱taṃ pra̍tha̱maṃ yatsva̍rṇara̱ṃ praśa̍staye̱ kama̍vṛṇīta su̱kratu̍:

रु॒वति॑ भी॒मो वृ॑ष॒भस्त॑वि॒ष्यया॒ शृङ्गे॒ शिशा॑नो॒ हरि॑णी विचक्ष॒णः ।

आ योनिं॒ सोम॒: सुकृ॑तं॒ नि षी॑दति ग॒व्ययी॒ त्वग्भ॑वति नि॒र्णिग॒व्ययी॑ ॥9.70.7॥

ru̱vati̍ bhī̱mo vṛ̍ṣa̱bhasta̍vi̱ṣyayā̱ śṛṅge̱ śiśā̍no̱ hari̍ṇī vicakṣa̱ṇaḥ |

ā yoni̱ṃ soma̱: sukṛ̍ta̱ṃ ni ṣī̍dati ga̱vyayī̱ tvagbha̍vati ni̱rṇiga̱vyayī̍

शुचि॑: पुना॒नस्त॒न्व॑मरे॒पस॒मव्ये॒ हरि॒र्न्य॑धाविष्ट॒ सान॑वि ।

जुष्टो॑ मि॒त्राय॒ वरु॑णाय वा॒यवे॑ त्रि॒धातु॒ मधु॑ क्रियते सु॒कर्म॑भिः ॥9.70.8॥

śuci̍: punā̱nasta̱nva̍mare̱pasa̱mavye̱ hari̱rnya̍dhāviṣṭa̱ sāna̍vi |

juṣṭo̍ mi̱trāya̱ varu̍ṇāya vā̱yave̍ tri̱dhātu̱ madhu̍ kriyate su̱karma̍bhiḥ

पव॑स्व सोम दे॒ववी॑तये॒ वृषेन्द्र॑स्य॒ हार्दि॑ सोम॒धान॒मा वि॑श ।

पु॒रा नो॑ बा॒धाद्दु॑रि॒ताति॑ पारय क्षेत्र॒विद्धि दिश॒ आहा॑ विपृच्छ॒ते ॥9.70.9॥

pava̍sva soma de̱vavī̍taye̱ vṛṣendra̍sya̱ hārdi̍ soma̱dhāna̱mā vi̍śa |

pu̱rā no̍ bā̱dhāddu̍ri̱tāti̍ pāraya kṣetra̱viddhi diśa̱ āhā̍ vipṛccha̱te

हि॒तो न सप्ति॑र॒भि वाज॑म॒र्षेन्द्र॑स्येन्दो ज॒ठर॒मा प॑वस्व ।

ना॒वा न सिन्धु॒मति॑ पर्षि वि॒द्वाञ्छूरो॒ न युध्य॒न्नव॑ नो नि॒दः स्प॑: ॥9.70.10॥

hi̱to na sapti̍ra̱bhi vāja̍ma̱rṣendra̍syendo ja̱ṭhara̱mā pa̍vasva |

nā̱vā na sindhu̱mati̍ parṣi vi̱dvāñchūro̱ na yudhya̱nnava̍ no ni̱daḥ spa̍:

९ ऋषभो वैश्वामित्र: । पवमान: सोम: ।जगती ,९ त्रिष्टुप् ।

आ दक्षि॑णा सृज्यते शु॒ष्म्या॒३सदं॒ वेति॑ द्रु॒हो र॒क्षस॑: पाति॒ जागृ॑विः ।

हरि॑रोप॒शं कृ॑णुते॒ नभ॒स्पय॑ उप॒स्तिरे॑ च॒म्वो॒३र्ब्रह्म॑ नि॒र्णिजे॑ ॥9.71.1॥

ā dakṣi̍ṇā sṛjyate śu̱ṣmyā̱3sada̱ṃ veti̍ dru̱ho ra̱kṣasa̍: pāti̱ jāgṛ̍viḥ |

hari̍ropa̱śaṃ kṛ̍ṇute̱ nabha̱spaya̍ upa̱stire̍ ca̱mvo̱3rbrahma̍ ni̱rṇije̍

प्र कृ॑ष्टि॒हेव॑ शू॒ष ए॑ति॒ रोरु॑वदसु॒र्यं१ वर्णं॒ नि रि॑णीते अस्य॒ तम् ।

जहा॑ति व॒व्रिं पि॒तुरे॑ति निष्कृ॒तमु॑प॒प्रुतं॑ कृणुते नि॒र्णिजं॒ तना॑ ॥9.71.2॥

pra kṛ̍ṣṭi̱heva̍ śū̱ṣa e̍ti̱ roru̍vadasu̱ryaṃ1 varṇa̱ṃ ni ri̍ṇīte asya̱ tam |

jahā̍ti va̱vriṃ pi̱ture̍ti niṣkṛ̱tamu̍pa̱pruta̍ṃ kṛṇute ni̱rṇija̱ṃ tanā̍

अद्रि॑भिः सु॒तः प॑वते॒ गभ॑स्त्योर्वृषा॒यते॒ नभ॑सा॒ वेप॑ते म॒ती ।

स मो॑दते॒ नस॑ते॒ साध॑ते गि॒रा ने॑नि॒क्ते अ॒प्सु यज॑ते॒ परी॑मणि ॥9.71.3॥

adri̍bhiḥ su̱taḥ pa̍vate̱ gabha̍styorvṛṣā̱yate̱ nabha̍sā̱ vepa̍te ma̱tī |

sa mo̍date̱ nasa̍te̱ sādha̍te gi̱rā ne̍ni̱kte a̱psu yaja̍te̱ parī̍maṇi

परि॑ द्यु॒क्षं सह॑सः पर्वता॒वृधं॒ मध्व॑: सिञ्चन्ति ह॒र्म्यस्य॑ स॒क्षणि॑म् ।

आ यस्मि॒न्गाव॑: सुहु॒ताद॒ ऊध॑नि मू॒र्धञ्छ्री॒णन्त्य॑ग्रि॒यं वरी॑मभिः ॥9.71.4॥

pari̍ dyu̱kṣaṃ saha̍saḥ parvatā̱vṛdha̱ṃ madhva̍: siñcanti ha̱rmyasya̍ sa̱kṣaṇi̍m |

ā yasmi̱ngāva̍: suhu̱tāda̱ ūdha̍ni mū̱rdhañchrī̱ṇantya̍gri̱yaṃ varī̍mabhiḥ

समी॒ रथं॒ न भु॒रिजो॑रहेषत॒ दश॒ स्वसा॑रो॒ अदि॑तेरु॒पस्थ॒ आ ।

जिगा॒दुप॑ ज्रयति॒ गोर॑पी॒च्यं॑ प॒दं यद॑स्य म॒तुथा॒ अजी॑जनन् ॥9.71.5॥

samī̱ ratha̱ṃ na bhu̱rijo̍raheṣata̱ daśa̱ svasā̍ro̱ adi̍teru̱pastha̱ ā |

jigā̱dupa̍ jrayati̱ gora̍pī̱cya̍ṃ pa̱daṃ yada̍sya ma̱tuthā̱ ajī̍janan

श्ये॒नो न योनिं॒ सद॑नं धि॒या कृ॒तं हि॑र॒ण्यय॑मा॒सदं॑ दे॒व एष॑ति ।

ए रि॑णन्ति ब॒र्हिषि॑ प्रि॒यं गि॒राऽश्वो॒ न दे॒वाँ अप्ये॑ति य॒ज्ञिय॑: ॥9.71.6॥

śye̱no na yoni̱ṃ sada̍naṃ dhi̱yā kṛ̱taṃ hi̍ra̱ṇyaya̍mā̱sada̍ṃ de̱va eṣa̍ti |

e ri̍ṇanti ba̱rhiṣi̍ pri̱yaṃ gi̱rā'śvo̱ na de̱vām̐ apye̍ti ya̱jñiya̍:

परा॒ व्य॑क्तो अरु॒षो दि॒वः क॒विर्वृषा॑ त्रिपृ॒ष्ठो अ॑नविष्ट॒ गा अ॒भि ।

स॒हस्र॑णीति॒र्यति॑: परा॒यती॑ रे॒भो न पू॒र्वीरु॒षसो॒ वि रा॑जति ॥9.71.7॥

parā̱ vya̍kto aru̱ṣo di̱vaḥ ka̱virvṛṣā̍ tripṛ̱ṣṭho a̍naviṣṭa̱ gā a̱bhi |

sa̱hasra̍ṇīti̱ryati̍: parā̱yatī̍ re̱bho na pū̱rvīru̱ṣaso̱ vi rā̍jati

त्वे॒षं रू॒पं कृ॑णुते॒ वर्णो॑ अस्य॒ स यत्राश॑य॒त्समृ॑ता॒ सेध॑ति स्रि॒धः ।

अ॒प्सा या॑ति स्व॒धया॒ दैव्यं॒ जनं॒ सं सु॑ष्टु॒ती नस॑ते॒ सं गोअ॑ग्रया ॥9.71.8॥

tve̱ṣaṃ rū̱paṃ kṛ̍ṇute̱ varṇo̍ asya̱ sa yatrāśa̍ya̱tsamṛ̍tā̱ sedha̍ti sri̱dhaḥ |

a̱psā yā̍ti sva̱dhayā̱ daivya̱ṃ jana̱ṃ saṃ su̍ṣṭu̱tī nasa̍te̱ saṃ goa̍grayā

उ॒क्षेव॑ यू॒था प॑रि॒यन्न॑रावी॒दधि॒ त्विषी॑रधित॒ सूर्य॑स्य ।

दि॒व्यः सु॑प॒र्णोऽव॑ चक्षत॒ क्षां सोम॒: परि॒ क्रतु॑ना पश्यते॒ जाः ॥9.71.9॥

u̱kṣeva̍ yū̱thā pa̍ri̱yanna̍rāvī̱dadhi̱ tviṣī̍radhita̱ sūrya̍sya |

di̱vyaḥ su̍pa̱rṇo'va̍ cakṣata̱ kṣāṃ soma̱: pari̱ kratu̍nā paśyate̱ jāḥ

९ हरिमन्त आङ्गिरस: । पवमान: सोम: ।जगती ।

हरिं॑ मृजन्त्यरु॒षो न यु॑ज्यते॒ सं धे॒नुभि॑: क॒लशे॒ सोमो॑ अज्यते ।

उद्वाच॑मी॒रय॑ति हि॒न्वते॑ म॒ती पु॑रुष्टु॒तस्य॒ कति॑ चित्परि॒प्रिय॑: ॥9.72.1॥

hari̍ṃ mṛjantyaru̱ṣo na yu̍jyate̱ saṃ dhe̱nubhi̍: ka̱laśe̱ somo̍ ajyate |

udvāca̍mī̱raya̍ti hi̱nvate̍ ma̱tī pu̍ruṣṭu̱tasya̱ kati̍ citpari̱priya̍:

सा॒कं व॑दन्ति ब॒हवो॑ मनी॒षिण॒ इन्द्र॑स्य॒ सोमं॑ ज॒ठरे॒ यदा॑दु॒हुः ।

यदी॑ मृ॒जन्ति॒ सुग॑भस्तयो॒ नर॒: सनी॑ळाभिर्द॒शभि॒: काम्यं॒ मधु॑ ॥9.72.2॥

sā̱kaṃ va̍danti ba̱havo̍ manī̱ṣiṇa̱ indra̍sya̱ soma̍ṃ ja̱ṭhare̱ yadā̍du̱huḥ |

yadī̍ mṛ̱janti̱ suga̍bhastayo̱ nara̱: sanī̍l̤ābhirda̱śabhi̱: kāmya̱ṃ madhu̍

अर॑ममाणो॒ अत्ये॑ति॒ गा अ॒भि सूर्य॑स्य प्रि॒यं दु॑हि॒तुस्ति॒रो रव॑म् ।

अन्व॑स्मै॒ जोष॑मभरद्विनंगृ॒सः सं द्व॒यीभि॒: स्वसृ॑भिः क्षेति जा॒मिभि॑: ॥9.72.3॥

ara̍mamāṇo̱ atye̍ti̱ gā a̱bhi sūrya̍sya pri̱yaṃ du̍hi̱tusti̱ro rava̍m |

anva̍smai̱ joṣa̍mabharadvinaṃgṛ̱saḥ saṃ dva̱yībhi̱: svasṛ̍bhiḥ kṣeti jā̱mibhi̍:

नृधू॑तो॒ अद्रि॑षुतो ब॒र्हिषि॑ प्रि॒यः पति॒र्गवां॑ प्र॒दिव॒ इन्दु॑ॠ॒त्विय॑: ।

पुरं॑धिवा॒न्मनु॑षो यज्ञ॒साध॑न॒: शुचि॑र्धि॒या प॑वते॒ सोम॑ इन्द्र ते ॥9.72.4॥

nṛdhū̍to̱ adri̍ṣuto ba̱rhiṣi̍ pri̱yaḥ pati̱rgavā̍ṃ pra̱diva̱ indu̍ṝ̱tviya̍: |

pura̍ṃdhivā̱nmanu̍ṣo yajña̱sādha̍na̱: śuci̍rdhi̱yā pa̍vate̱ soma̍ indra te

नृबा॒हुभ्यां॑ चोदि॒तो धार॑या सु॒तो॑ऽनुष्व॒धं प॑वते॒ सोम॑ इन्द्र ते ।

आप्रा॒: क्रतू॒न्त्सम॑जैरध्व॒रे म॒तीर्वेर्न द्रु॒षच्च॒म्वो॒३रास॑द॒द्धरि॑: ॥9.72.5॥

nṛbā̱hubhyā̍ṃ codi̱to dhāra̍yā su̱to̍'nuṣva̱dhaṃ pa̍vate̱ soma̍ indra te |

āprā̱: kratū̱ntsama̍jairadhva̱re ma̱tīrverna dru̱ṣacca̱mvo̱3rāsa̍da̱ddhari̍:

अं॒शुं दु॑हन्ति स्त॒नय॑न्त॒मक्षि॑तं क॒विं क॒वयो॒ऽपसो॑ मनी॒षिण॑: ।

समी॒ गावो॑ म॒तयो॑ यन्ति सं॒यत॑ ऋ॒तस्य॒ योना॒ सद॑ने पुन॒र्भुव॑: ॥9.72.6॥

a̱ṃśuṃ du̍hanti sta̱naya̍nta̱makṣi̍taṃ ka̱viṃ ka̱vayo̱'paso̍ manī̱ṣiṇa̍: |

samī̱ gāvo̍ ma̱tayo̍ yanti sa̱ṃyata̍ ṛ̱tasya̱ yonā̱ sada̍ne puna̱rbhuva̍:

नाभा॑ पृथि॒व्या ध॒रुणो॑ म॒हो दि॒वो॒३ऽपामू॒र्मौ सिन्धु॑ष्व॒न्तरु॑क्षि॒तः ।

इन्द्र॑स्य॒ वज्रो॑ वृष॒भो वि॒भूव॑सु॒: सोमो॑ हृ॒दे प॑वते॒ चारु॑ मत्स॒रः ॥9.72.7॥

nābhā̍ pṛthi̱vyā dha̱ruṇo̍ ma̱ho di̱vo̱3'pāmū̱rmau sindhu̍ṣva̱ntaru̍kṣi̱taḥ |

indra̍sya̱ vajro̍ vṛṣa̱bho vi̱bhūva̍su̱: somo̍ hṛ̱de pa̍vate̱ cāru̍ matsa̱raḥ

स तू प॑वस्व॒ परि॒ पार्थि॑वं॒ रज॑: स्तो॒त्रे शिक्ष॑न्नाधून्व॒ते च॑ सुक्रतो ।

मा नो॒ निर्भा॒ग्वसु॑नः सादन॒स्पृशो॑ र॒यिं पि॒शङ्गं॑ बहु॒लं व॑सीमहि ॥9.72.8॥

sa tū pa̍vasva̱ pari̱ pārthi̍va̱ṃ raja̍: sto̱tre śikṣa̍nnādhūnva̱te ca̍ sukrato |

mā no̱ nirbhā̱gvasu̍naḥ sādana̱spṛśo̍ ra̱yiṃ pi̱śaṅga̍ṃ bahu̱laṃ va̍sīmahi

आ तू न॑ इन्दो श॒तदा॒त्वश्व्यं॑ स॒हस्र॑दातु पशु॒मद्धिर॑ण्यवत् ।

उप॑ मास्व बृह॒ती रे॒वती॒रिषोऽधि॑ स्तो॒त्रस्य॑ पवमान नो गहि ॥9.72.9॥

ā tū na̍ indo śa̱tadā̱tvaśvya̍ṃ sa̱hasra̍dātu paśu̱maddhira̍ṇyavat |

upa̍ māsva bṛha̱tī re̱vatī̱riṣo'dhi̍ sto̱trasya̍ pavamāna no gahi

९ पवित्र आङ्गिरस: । पवमान: सोम: ।जगती ।

स्रक्वे॑ द्र॒प्सस्य॒ धम॑त॒: सम॑स्वरन्नृ॒तस्य॒ योना॒ सम॑रन्त॒ नाभ॑यः ।

त्रीन्त्स मू॒र्ध्नो असु॑रश्चक्र आ॒रभे॑ स॒त्यस्य॒ नाव॑: सु॒कृत॑मपीपरन् ॥9.73.1॥

srakve̍ dra̱psasya̱ dhama̍ta̱: sama̍svarannṛ̱tasya̱ yonā̱ sama̍ranta̱ nābha̍yaḥ |

trīntsa mū̱rdhno asu̍raścakra ā̱rabhe̍ sa̱tyasya̱ nāva̍: su̱kṛta̍mapīparan

स॒म्यक्स॒म्यञ्चो॑ महि॒षा अ॑हेषत॒ सिन्धो॑रू॒र्मावधि॑ वे॒ना अ॑वीविपन् ।

मधो॒र्धारा॑भिर्ज॒नय॑न्तो अ॒र्कमित्प्रि॒यामिन्द्र॑स्य त॒न्व॑मवीवृधन् ॥9.73.2॥

sa̱myaksa̱myañco̍ mahi̱ṣā a̍heṣata̱ sindho̍rū̱rmāvadhi̍ ve̱nā a̍vīvipan |

madho̱rdhārā̍bhirja̱naya̍nto a̱rkamitpri̱yāmindra̍sya ta̱nva̍mavīvṛdhan

प॒वित्र॑वन्त॒: परि॒ वाच॑मासते पि॒तैषां॑ प्र॒त्नो अ॒भि र॑क्षति व्र॒तम् ।

म॒हः स॑मु॒द्रं वरु॑णस्ति॒रो द॑धे॒ धीरा॒ इच्छे॑कुर्ध॒रुणे॑ष्वा॒रभ॑म् ॥9.73.3॥

pa̱vitra̍vanta̱: pari̱ vāca̍māsate pi̱taiṣā̍ṃ pra̱tno a̱bhi ra̍kṣati vra̱tam |

ma̱haḥ sa̍mu̱draṃ varu̍ṇasti̱ro da̍dhe̱ dhīrā̱ icche̍kurdha̱ruṇe̍ṣvā̱rabha̍m

स॒हस्र॑धा॒रेऽव॒ ते सम॑स्वरन्दि॒वो नाके॒ मधु॑जिह्वा अस॒श्चत॑: ।

अस्य॒ स्पशो॒ न नि मि॑षन्ति॒ भूर्ण॑यः प॒देप॑दे पा॒शिन॑: सन्ति॒ सेत॑वः ॥9.73.4॥

sa̱hasra̍dhā̱re'va̱ te sama̍svarandi̱vo nāke̱ madhu̍jihvā asa̱ścata̍: |

asya̱ spaśo̱ na ni mi̍ṣanti̱ bhūrṇa̍yaḥ pa̱depa̍de pā̱śina̍: santi̱ seta̍vaḥ

पि॒तुर्मा॒तुरध्या ये स॒मस्व॑रन्नृ॒चा शोच॑न्तः सं॒दह॑न्तो अव्र॒तान् ।

इन्द्र॑द्विष्टा॒मप॑ धमन्ति मा॒यया॒ त्वच॒मसि॑क्नीं॒ भूम॑नो दि॒वस्परि॑ ॥9.73.5॥

pi̱turmā̱turadhyā ye sa̱masva̍rannṛ̱cā śoca̍ntaḥ sa̱ṃdaha̍nto avra̱tān |

indra̍dviṣṭā̱mapa̍ dhamanti mā̱yayā̱ tvaca̱masi̍knī̱ṃ bhūma̍no di̱vaspari̍

प्र॒त्नान्माना॒दध्या ये स॒मस्व॑र॒ञ्छ्लोक॑यन्त्रासो रभ॒सस्य॒ मन्त॑वः ।

अपा॑न॒क्षासो॑ बधि॒रा अ॑हासत ऋ॒तस्य॒ पन्थां॒ न त॑रन्ति दु॒ष्कृत॑: ॥9.73.6॥

pra̱tnānmānā̱dadhyā ye sa̱masva̍ra̱ñchloka̍yantrāso rabha̱sasya̱ manta̍vaḥ |

apā̍na̱kṣāso̍ badhi̱rā a̍hāsata ṛ̱tasya̱ panthā̱ṃ na ta̍ranti du̱ṣkṛta̍:

स॒हस्र॑धारे॒ वित॑ते प॒वित्र॒ आ वाचं॑ पुनन्ति क॒वयो॑ मनी॒षिण॑: ।

रु॒द्रास॑ एषामिषि॒रासो॑ अ॒द्रुह॒: स्पश॒: स्वञ्च॑: सु॒दृशो॑ नृ॒चक्ष॑सः ॥9.73.7॥

sa̱hasra̍dhāre̱ vita̍te pa̱vitra̱ ā vāca̍ṃ punanti ka̱vayo̍ manī̱ṣiṇa̍: |

ru̱drāsa̍ eṣāmiṣi̱rāso̍ a̱druha̱: spaśa̱: svañca̍: su̱dṛśo̍ nṛ̱cakṣa̍saḥ

ऋ॒तस्य॑ गो॒पा न दभा॑य सु॒क्रतु॒स्त्री ष प॒वित्रा॑ हृ॒द्य१न्तरा द॑धे ।

वि॒द्वान्त्स विश्वा॒ भुव॑ना॒भि प॑श्य॒त्यवाजु॑ष्टान्विध्यति क॒र्ते अ॑व्र॒तान् ॥9.73.8॥

ṛ̱tasya̍ go̱pā na dabhā̍ya su̱kratu̱strī ṣa pa̱vitrā̍ hṛ̱dya1ntarā da̍dhe |

vi̱dvāntsa viśvā̱ bhuva̍nā̱bhi pa̍śya̱tyavāju̍ṣṭānvidhyati ka̱rte a̍vra̱tān

ऋ॒तस्य॒ तन्तु॒र्वित॑तः प॒वित्र॒ आ जि॒ह्वाया॒ अग्रे॒ वरु॑णस्य मा॒यया॑ ।

धीरा॑श्चि॒त्तत्स॒मिन॑क्षन्त आश॒ताऽत्रा॑ क॒र्तमव॑ पदा॒त्यप्र॑भुः ॥9.73.9॥

ṛ̱tasya̱ tantu̱rvita̍taḥ pa̱vitra̱ ā ji̱hvāyā̱ agre̱ varu̍ṇasya mā̱yayā̍ |

dhīrā̍ści̱ttatsa̱mina̍kṣanta āśa̱tā'trā̍ ka̱rtamava̍ padā̱tyapra̍bhuḥ

९ कक्षीवान् दैर्घतमस: । पवमान: सोम: ।जगती , ८ त्रिष्टुप् ।

शिशु॒र्न जा॒तोऽव॑ चक्रद॒द्वने॒ स्व१र्यद्वा॒ज्य॑रु॒षः सिषा॑सति ।

दि॒वो रेत॑सा सचते पयो॒वृधा॒ तमी॑महे सुम॒ती शर्म॑ स॒प्रथ॑: ॥9.74.1॥

śiśu̱rna jā̱to'va̍ cakrada̱dvane̱ sva1ryadvā̱jya̍ru̱ṣaḥ siṣā̍sati |

di̱vo reta̍sā sacate payo̱vṛdhā̱ tamī̍mahe suma̱tī śarma̍ sa̱pratha̍:

दि॒वो यः स्क॒म्भो ध॒रुण॒: स्वा॑तत॒ आपू॑र्णो अं॒शुः प॒र्येति॑ वि॒श्वत॑: ।

सेमे म॒ही रोद॑सी यक्षदा॒वृता॑ समीची॒ने दा॑धार॒ समिष॑: क॒विः ॥9.74.2॥

di̱vo yaḥ ska̱mbho dha̱ruṇa̱: svā̍tata̱ āpū̍rṇo a̱ṃśuḥ pa̱ryeti̍ vi̱śvata̍: |

seme ma̱hī roda̍sī yakṣadā̱vṛtā̍ samīcī̱ne dā̍dhāra̱ samiṣa̍: ka̱viḥ

महि॒ प्सर॒: सुकृ॑तं सो॒म्यं मधू॒र्वी गव्यू॑ति॒रदि॑तेॠ॒तं य॒ते ।

ईशे॒ यो वृ॒ष्टेरि॒त उ॒स्रियो॒ वृषा॒ऽपां ने॒ता य इ॒तऊ॑तिॠ॒ग्मिय॑: ॥9.74.3॥

mahi̱ psara̱: sukṛ̍taṃ so̱myaṃ madhū̱rvī gavyū̍ti̱radi̍teṝ̱taṃ ya̱te |

īśe̱ yo vṛ̱ṣṭeri̱ta u̱sriyo̱ vṛṣā̱'pāṃ ne̱tā ya i̱taū̍tiṝ̱gmiya̍:

आ॒त्म॒न्वन्नभो॑ दुह्यते घृ॒तं पय॑ ऋ॒तस्य॒ नाभि॑र॒मृतं॒ वि जा॑यते ।

स॒मी॒ची॒नाः सु॒दान॑वः प्रीणन्ति॒ तं नरो॑ हि॒तमव॑ मेहन्ति॒ पेर॑वः ॥9.74.4॥

ā̱tma̱nvannabho̍ duhyate ghṛ̱taṃ paya̍ ṛ̱tasya̱ nābhi̍ra̱mṛta̱ṃ vi jā̍yate |

sa̱mī̱cī̱nāḥ su̱dāna̍vaḥ prīṇanti̱ taṃ naro̍ hi̱tamava̍ mehanti̱ pera̍vaḥ

अरा॑वीदं॒शुः सच॑मान ऊ॒र्मिणा॑ देवा॒व्यं१ मनु॑षे पिन्वति॒ त्वच॑म् ।

दधा॑ति॒ गर्भ॒मदि॑तेरु॒पस्थ॒ आ येन॑ तो॒कं च॒ तन॑यं च॒ धाम॑हे ॥9.74.5॥

arā̍vīda̱ṃśuḥ saca̍māna ū̱rmiṇā̍ devā̱vyaṃ1 manu̍ṣe pinvati̱ tvaca̍m |

dadhā̍ti̱ garbha̱madi̍teru̱pastha̱ ā yena̍ to̱kaṃ ca̱ tana̍yaṃ ca̱ dhāma̍he

स॒हस्र॑धा॒रेऽव॒ ता अ॑स॒श्चत॑स्तृ॒तीये॑ सन्तु॒ रज॑सि प्र॒जाव॑तीः ।

चत॑स्रो॒ नाभो॒ निहि॑ता अ॒वो दि॒वो ह॒विर्भ॑रन्त्य॒मृतं॑ घृत॒श्चुत॑: ॥9.74.6॥

sa̱hasra̍dhā̱re'va̱ tā a̍sa̱ścata̍stṛ̱tīye̍ santu̱ raja̍si pra̱jāva̍tīḥ |

cata̍sro̱ nābho̱ nihi̍tā a̱vo di̱vo ha̱virbha̍rantya̱mṛta̍ṃ ghṛta̱ścuta̍:

श्वे॒तं रू॒पं कृ॑णुते॒ यत्सिषा॑सति॒ सोमो॑ मी॒ढ्वाँ असु॑रो वेद॒ भूम॑नः ।

धि॒या शमी॑ सचते॒ सेम॒भि प्र॒वद्दि॒वस्कव॑न्ध॒मव॑ दर्षदु॒द्रिण॑म् ॥9.74.7॥

śve̱taṃ rū̱paṃ kṛ̍ṇute̱ yatsiṣā̍sati̱ somo̍ mī̱ḍhvām̐ asu̍ro veda̱ bhūma̍naḥ |

dhi̱yā śamī̍ sacate̱ sema̱bhi pra̱vaddi̱vaskava̍ndha̱mava̍ darṣadu̱driṇa̍m

अध॑ श्वे॒तं क॒लशं॒ गोभि॑र॒क्तं कार्ष्म॒न्ना वा॒ज्य॑क्रमीत्सस॒वान् ।

आ हि॑न्विरे॒ मन॑सा देव॒यन्त॑: क॒क्षीव॑ते श॒तहि॑माय॒ गोना॑म् ॥9.74.8॥

adha̍ śve̱taṃ ka̱laśa̱ṃ gobhi̍ra̱ktaṃ kārṣma̱nnā vā̱jya̍kramītsasa̱vān |

ā hi̍nvire̱ mana̍sā deva̱yanta̍: ka̱kṣīva̍te śa̱tahi̍māya̱ gonā̍m

अ॒द्भिः सो॑म पपृचा॒नस्य॑ ते॒ रसोऽव्यो॒ वारं॒ वि प॑वमान धावति ।

स मृ॒ज्यमा॑नः क॒विभि॑र्मदिन्तम॒ स्वद॒स्वेन्द्रा॑य पवमान पी॒तये॑ ॥9.74.9॥

a̱dbhiḥ so̍ma papṛcā̱nasya̍ te̱ raso'vyo̱ vāra̱ṃ vi pa̍vamāna dhāvati |

sa mṛ̱jyamā̍naḥ ka̱vibhi̍rmadintama̱ svada̱svendrā̍ya pavamāna pī̱taye̍

५ कविर्भार्गव: । पवमान: सोम: ।जगती ।

अ॒भि प्रि॒याणि॑ पवते॒ चनो॑हितो॒ नामा॑नि य॒ह्वो अधि॒ येषु॒ वर्ध॑ते ।

आ सूर्य॑स्य बृह॒तो बृ॒हन्नधि॒ रथं॒ विष्व॑ञ्चमरुहद्विचक्ष॒णः ॥9.75.1॥

a̱bhi pri̱yāṇi̍ pavate̱ cano̍hito̱ nāmā̍ni ya̱hvo adhi̱ yeṣu̱ vardha̍te |

ā sūrya̍sya bṛha̱to bṛ̱hannadhi̱ ratha̱ṃ viṣva̍ñcamaruhadvicakṣa̱ṇaḥ

ऋ॒तस्य॑ जि॒ह्वा प॑वते॒ मधु॑ प्रि॒यं व॒क्ता पति॑र्धि॒यो अ॒स्या अदा॑भ्यः ।

दधा॑ति पु॒त्रः पि॒त्रोर॑पी॒च्यं१ नाम॑ तृ॒तीय॒मधि॑ रोच॒ने दि॒वः ॥9.75.2॥

ṛ̱tasya̍ ji̱hvā pa̍vate̱ madhu̍ pri̱yaṃ va̱ktā pati̍rdhi̱yo a̱syā adā̍bhyaḥ |

dadhā̍ti pu̱traḥ pi̱trora̍pī̱cyaṃ1 nāma̍ tṛ̱tīya̱madhi̍ roca̱ne di̱vaḥ

अव॑ द्युता॒नः क॒लशाँ॑ अचिक्रद॒न्नृभि॑र्येमा॒नः कोश॒ आ हि॑र॒ण्यये॑ ।

अ॒भीमृ॒तस्य॑ दो॒हना॑ अनूष॒ताऽधि॑ त्रिपृ॒ष्ठ उ॒षसो॒ वि रा॑जति ॥9.75.3॥

ava̍ dyutā̱naḥ ka̱laśā̍m̐ acikrada̱nnṛbhi̍ryemā̱naḥ kośa̱ ā hi̍ra̱ṇyaye̍ |

a̱bhīmṛ̱tasya̍ do̱hanā̍ anūṣa̱tā'dhi̍ tripṛ̱ṣṭha u̱ṣaso̱ vi rā̍jati

अद्रि॑भिः सु॒तो म॒तिभि॒श्चनो॑हितः प्ररो॒चय॒न्रोद॑सी मा॒तरा॒ शुचि॑: ।

रोमा॒ण्यव्या॑ स॒मया॒ वि धा॑वति॒ मधो॒र्धारा॒ पिन्व॑माना दि॒वेदि॑वे ॥9.75.4॥

adri̍bhiḥ su̱to ma̱tibhi̱ścano̍hitaḥ praro̱caya̱nroda̍sī mā̱tarā̱ śuci̍: |

romā̱ṇyavyā̍ sa̱mayā̱ vi dhā̍vati̱ madho̱rdhārā̱ pinva̍mānā di̱vedi̍ve

परि॑ सोम॒ प्र ध॑न्वा स्व॒स्तये॒ नृभि॑: पुना॒नो अ॒भि वा॑सया॒शिर॑म् ।

ये ते॒ मदा॑ आह॒नसो॒ विहा॑यस॒स्तेभि॒रिन्द्रं॑ चोदय॒ दात॑वे म॒घम् ॥9.75.5॥

pari̍ soma̱ pra dha̍nvā sva̱staye̱ nṛbhi̍: punā̱no a̱bhi vā̍sayā̱śira̍m |

ye te̱ madā̍ āha̱naso̱ vihā̍yasa̱stebhi̱rindra̍ṃ codaya̱ dāta̍ve ma̱gham

५ कविर्भार्गव: । पवमान: सोम: ।जगती ।

ध॒र्ता दि॒वः प॑वते॒ कृत्व्यो॒ रसो॒ दक्षो॑ दे॒वाना॑मनु॒माद्यो॒ नृभि॑: ।

हरि॑: सृजा॒नो अत्यो॒ न सत्व॑भि॒र्वृथा॒ पाजां॑सि कृणुते न॒दीष्वा ॥9.76.1॥

dha̱rtā di̱vaḥ pa̍vate̱ kṛtvyo̱ raso̱ dakṣo̍ de̱vānā̍manu̱mādyo̱ nṛbhi̍: |

hari̍: sṛjā̱no atyo̱ na satva̍bhi̱rvṛthā̱ pājā̍ṃsi kṛṇute na̱dīṣvā

शूरो॒ न ध॑त्त॒ आयु॑धा॒ गभ॑स्त्यो॒: स्व१: सिषा॑सन्रथि॒रो गवि॑ष्टिषु ।

इन्द्र॑स्य॒ शुष्म॑मी॒रय॑न्नप॒स्युभि॒रिन्दु॑र्हिन्वा॒नो अ॑ज्यते मनी॒षिभि॑: ॥9.76.2॥

śūro̱ na dha̍tta̱ āyu̍dhā̱ gabha̍styo̱: sva1: siṣā̍sanrathi̱ro gavi̍ṣṭiṣu |

indra̍sya̱ śuṣma̍mī̱raya̍nnapa̱syubhi̱rindu̍rhinvā̱no a̍jyate manī̱ṣibhi̍:

इन्द्र॑स्य सोम॒ पव॑मान ऊ॒र्मिणा॑ तवि॒ष्यमा॑णो ज॒ठरे॒ष्वा वि॑श ।

प्र ण॑: पिन्व वि॒द्युद॒भ्रेव॒ रोद॑सी धि॒या न वाजाँ॒ उप॑ मासि॒ शश्व॑तः ॥9.76.3॥

indra̍sya soma̱ pava̍māna ū̱rmiṇā̍ tavi̱ṣyamā̍ṇo ja̱ṭhare̱ṣvā vi̍śa |

pra ṇa̍: pinva vi̱dyuda̱bhreva̱ roda̍sī dhi̱yā na vājā̱m̐ upa̍ māsi̱ śaśva̍taḥ

विश्व॑स्य॒ राजा॑ पवते स्व॒र्दृश॑ ऋ॒तस्य॑ धी॒तिमृ॑षि॒षाळ॑वीवशत् ।

यः सूर्य॒स्यासि॑रेण मृ॒ज्यते॑ पि॒ता म॑ती॒नामस॑मष्टकाव्यः ॥9.76.4॥

viśva̍sya̱ rājā̍ pavate sva̱rdṛśa̍ ṛ̱tasya̍ dhī̱timṛ̍ṣi̱ṣāl̤a̍vīvaśat |

yaḥ sūrya̱syāsi̍reṇa mṛ̱jyate̍ pi̱tā ma̍tī̱nāmasa̍maṣṭakāvyaḥ

वृषे॑व यू॒था परि॒ कोश॑मर्षस्य॒पामु॒पस्थे॑ वृष॒भः कनि॑क्रदत् ।

स इन्द्रा॑य पवसे मत्स॒रिन्त॑मो॒ यथा॒ जेषा॑म समि॒थे त्वोत॑यः ॥9.76.5॥

vṛṣe̍va yū̱thā pari̱ kośa̍marṣasya̱pāmu̱pasthe̍ vṛṣa̱bhaḥ kani̍kradat |

sa indrā̍ya pavase matsa̱rinta̍mo̱ yathā̱ jeṣā̍ma sami̱the tvota̍yaḥ

५ कविर्भार्गव: । पवमान: सोम: ।जगती ।

ए॒ष प्र कोशे॒ मधु॑माँ अचिक्रद॒दिन्द्र॑स्य॒ वज्रो॒ वपु॑षो॒ वपु॑ष्टरः ।

अ॒भीमृ॒तस्य॑ सु॒दुघा॑ घृत॒श्चुतो॑ वा॒श्रा अ॑र्षन्ति॒ पय॑सेव धे॒नव॑: ॥9.77.1॥

e̱ṣa pra kośe̱ madhu̍mām̐ acikrada̱dindra̍sya̱ vajro̱ vapu̍ṣo̱ vapu̍ṣṭaraḥ |

a̱bhīmṛ̱tasya̍ su̱dughā̍ ghṛta̱ścuto̍ vā̱śrā a̍rṣanti̱ paya̍seva dhe̱nava̍:

स पू॒र्व्यः प॑वते॒ यं दि॒वस्परि॑ श्ये॒नो म॑था॒यदि॑षि॒तस्ति॒रो रज॑: ।

स मध्व॒ आ यु॑वते॒ वेवि॑जान॒ इत्कृ॒शानो॒रस्तु॒र्मन॒साह॑ बि॒भ्युषा॑ ॥9.77.2॥

sa pū̱rvyaḥ pa̍vate̱ yaṃ di̱vaspari̍ śye̱no ma̍thā̱yadi̍ṣi̱tasti̱ro raja̍: |

sa madhva̱ ā yu̍vate̱ vevi̍jāna̱ itkṛ̱śāno̱rastu̱rmana̱sāha̍ bi̱bhyuṣā̍

ते न॒: पूर्वा॑स॒ उप॑रास॒ इन्द॑वो म॒हे वाजा॑य धन्वन्तु॒ गोम॑ते ।

ई॒क्षे॒ण्या॑सो अ॒ह्यो॒३ न चार॑वो॒ ब्रह्म॑ब्रह्म॒ ये जु॑जु॒षुर्ह॒विर्ह॑विः ॥9.77.3॥

te na̱: pūrvā̍sa̱ upa̍rāsa̱ inda̍vo ma̱he vājā̍ya dhanvantu̱ goma̍te |

ī̱kṣe̱ṇyā̍so a̱hyo̱3 na cāra̍vo̱ brahma̍brahma̱ ye ju̍ju̱ṣurha̱virha̍viḥ

अ॒यं नो॑ वि॒द्वान्व॑नवद्वनुष्य॒त इन्दु॑: स॒त्राचा॒ मन॑सा पुरुष्टु॒तः ।

इ॒नस्य॒ यः सद॑ने॒ गर्भ॑माद॒धे गवा॑मुरु॒ब्जम॒भ्यर्ष॑ति व्र॒जम् ॥9.77.4॥

a̱yaṃ no̍ vi̱dvānva̍navadvanuṣya̱ta indu̍: sa̱trācā̱ mana̍sā puruṣṭu̱taḥ |

i̱nasya̱ yaḥ sada̍ne̱ garbha̍māda̱dhe gavā̍muru̱bjama̱bhyarṣa̍ti vra̱jam

चक्रि॑र्दि॒वः प॑वते॒ कृत्व्यो॒ रसो॑ म॒हाँ अद॑ब्धो॒ वरु॑णो हु॒रुग्य॒ते ।

असा॑वि मि॒त्रो वृ॒जने॑षु य॒ज्ञियोऽत्यो॒ न यू॒थे वृ॑ष॒युः कनि॑क्रदत् ॥9.77.5॥

cakri̍rdi̱vaḥ pa̍vate̱ kṛtvyo̱ raso̍ ma̱hām̐ ada̍bdho̱ varu̍ṇo hu̱rugya̱te |

asā̍vi mi̱tro vṛ̱jane̍ṣu ya̱jñiyo'tyo̱ na yū̱the vṛ̍ṣa̱yuḥ kani̍kradat

५ कविर्भार्गव: । पवमान: सोम: ।जगती ।

प्र राजा॒ वाचं॑ ज॒नय॑न्नसिष्यदद॒पो वसा॑नो अ॒भि गा इ॑यक्षति ।

गृ॒भ्णाति॑ रि॒प्रमवि॑रस्य॒ तान्वा॑ शु॒द्धो दे॒वाना॒मुप॑ याति निष्कृ॒तम् ॥9.78.1॥

pra rājā̱ vāca̍ṃ ja̱naya̍nnasiṣyadada̱po vasā̍no a̱bhi gā i̍yakṣati |

gṛ̱bhṇāti̍ ri̱pramavi̍rasya̱ tānvā̍ śu̱ddho de̱vānā̱mupa̍ yāti niṣkṛ̱tam

इन्द्रा॑य सोम॒ परि॑ षिच्यसे॒ नृभि॑र्नृ॒चक्षा॑ ऊ॒र्मिः क॒विर॑ज्यसे॒ वने॑ ।

पू॒र्वीर्हि ते॑ स्रु॒तय॒: सन्ति॒ यात॑वे स॒हस्र॒मश्वा॒ हर॑यश्चमू॒षद॑: ॥9.78.2॥

indrā̍ya soma̱ pari̍ ṣicyase̱ nṛbhi̍rnṛ̱cakṣā̍ ū̱rmiḥ ka̱vira̍jyase̱ vane̍ |

pū̱rvīrhi te̍ sru̱taya̱: santi̱ yāta̍ve sa̱hasra̱maśvā̱ hara̍yaścamū̱ṣada̍:

स॒मु॒द्रिया॑ अप्स॒रसो॑ मनी॒षिण॒मासी॑ना अ॒न्तर॒भि सोम॑मक्षरन् ।

ता ईं॑ हिन्वन्ति ह॒र्म्यस्य॑ स॒क्षणिं॒ याच॑न्ते सु॒म्नं पव॑मान॒मक्षि॑तम् ॥9.78.3॥

sa̱mu̱driyā̍ apsa̱raso̍ manī̱ṣiṇa̱māsī̍nā a̱ntara̱bhi soma̍makṣaran |

tā ī̍ṃ hinvanti ha̱rmyasya̍ sa̱kṣaṇi̱ṃ yāca̍nte su̱mnaṃ pava̍māna̱makṣi̍tam

गो॒जिन्न॒: सोमो॑ रथ॒जिद्धि॑रण्य॒जित्स्व॒र्जिद॒ब्जित्प॑वते सहस्र॒जित् ।

यं दे॒वास॑श्चक्रि॒रे पी॒तये॒ मदं॒ स्वादि॑ष्ठं द्र॒प्सम॑रु॒णं म॑यो॒भुव॑म् ॥9.78.4॥

go̱jinna̱: somo̍ ratha̱jiddhi̍raṇya̱jitsva̱rjida̱bjitpa̍vate sahasra̱jit |

yaṃ de̱vāsa̍ścakri̱re pī̱taye̱ mada̱ṃ svādi̍ṣṭhaṃ dra̱psama̍ru̱ṇaṃ ma̍yo̱bhuva̍m

ए॒तानि॑ सोम॒ पव॑मानो अस्म॒युः स॒त्यानि॑ कृ॒ण्वन्द्रवि॑णान्यर्षसि ।

ज॒हि शत्रु॑मन्ति॒के दू॑र॒के च॒ य उ॒र्वीं गव्यू॑ति॒मभ॑यं च नस्कृधि ॥9.78.5॥

e̱tāni̍ soma̱ pava̍māno asma̱yuḥ sa̱tyāni̍ kṛ̱ṇvandravi̍ṇānyarṣasi |

ja̱hi śatru̍manti̱ke dū̍ra̱ke ca̱ ya u̱rvīṃ gavyū̍ti̱mabha̍yaṃ ca naskṛdhi

५ कविर्भार्गव: । पवमान: सोम: ।जगती ।

अ॒चो॒दसो॑ नो धन्व॒न्त्विन्द॑व॒: प्र सु॑वा॒नासो॑ बृ॒हद्दि॑वेषु॒ हर॑यः ।

वि च॒ नश॑न्न इ॒षो अरा॑तयो॒ऽर्यो न॑शन्त॒ सनि॑षन्त नो॒ धिय॑: ॥9.79.1॥

a̱co̱daso̍ no dhanva̱ntvinda̍va̱: pra su̍vā̱nāso̍ bṛ̱haddi̍veṣu̱ hara̍yaḥ |

vi ca̱ naśa̍nna i̱ṣo arā̍tayo̱'ryo na̍śanta̱ sani̍ṣanta no̱ dhiya̍:

प्र णो॑ धन्व॒न्त्विन्द॑वो मद॒च्युतो॒ धना॑ वा॒ येभि॒रर्व॑तो जुनी॒मसि॑ ।

ति॒रो मर्त॑स्य॒ कस्य॑ चि॒त्परि॑ह्वृतिं व॒यं धना॑नि वि॒श्वधा॑ भरेमहि ॥9.79.2॥

pra ṇo̍ dhanva̱ntvinda̍vo mada̱cyuto̱ dhanā̍ vā̱ yebhi̱rarva̍to junī̱masi̍ |

ti̱ro marta̍sya̱ kasya̍ ci̱tpari̍hvṛtiṃ va̱yaṃ dhanā̍ni vi̱śvadhā̍ bharemahi

उ॒त स्वस्या॒ अरा॑त्या अ॒रिर्हि ष उ॒तान्यस्या॒ अरा॑त्या॒ वृको॒ हि षः ।

धन्व॒न्न तृष्णा॒ सम॑रीत॒ ताँ अ॒भि सोम॑ ज॒हि प॑वमान दुरा॒ध्य॑: ॥9.79.3॥

u̱ta svasyā̱ arā̍tyā a̱rirhi ṣa u̱tānyasyā̱ arā̍tyā̱ vṛko̱ hi ṣaḥ |

dhanva̱nna tṛṣṇā̱ sama̍rīta̱ tām̐ a̱bhi soma̍ ja̱hi pa̍vamāna durā̱dhya̍:

दि॒वि ते॒ नाभा॑ पर॒मो य आ॑द॒दे पृ॑थि॒व्यास्ते॑ रुरुहु॒: सान॑वि॒ क्षिप॑: ।

अद्र॑यस्त्वा बप्सति॒ गोरधि॑ त्व॒च्य१प्सु त्वा॒ हस्तै॑र्दुदुहुर्मनी॒षिण॑: ॥9.79.4॥

di̱vi te̱ nābhā̍ para̱mo ya ā̍da̱de pṛ̍thi̱vyāste̍ ruruhu̱: sāna̍vi̱ kṣipa̍: |

adra̍yastvā bapsati̱ goradhi̍ tva̱cya1psu tvā̱ hastai̍rduduhurmanī̱ṣiṇa̍:

ए॒वा त॑ इन्दो सु॒भ्वं॑ सु॒पेश॑सं॒ रसं॑ तुञ्जन्ति प्रथ॒मा अ॑भि॒श्रिय॑: ।

निदं॑निदं पवमान॒ नि ता॑रिष आ॒विस्ते॒ शुष्मो॑ भवतु प्रि॒यो मद॑: ॥9.79.5॥

e̱vā ta̍ indo su̱bhva̍ṃ su̱peśa̍sa̱ṃ rasa̍ṃ tuñjanti pratha̱mā a̍bhi̱śriya̍: |

nida̍ṃnidaṃ pavamāna̱ ni tā̍riṣa ā̱viste̱ śuṣmo̍ bhavatu pri̱yo mada̍:

५ वसुर्भारद्वाज: । पवमान: सोम: ।जगती ।

सोम॑स्य॒ धारा॑ पवते नृ॒चक्ष॑स ऋ॒तेन॑ दे॒वान्ह॑वते दि॒वस्परि॑ ।

बृह॒स्पते॑ र॒वथे॑ना॒ वि दि॑द्युते समु॒द्रासो॒ न सव॑नानि विव्यचुः ॥9.80.1॥

soma̍sya̱ dhārā̍ pavate nṛ̱cakṣa̍sa ṛ̱tena̍ de̱vānha̍vate di̱vaspari̍ |

bṛha̱spate̍ ra̱vathe̍nā̱ vi di̍dyute samu̱drāso̱ na sava̍nāni vivyacuḥ

यं त्वा॑ वाजिन्न॒घ्न्या अ॒भ्यनू॑ष॒ताऽयो॑हतं॒ योनि॒मा रो॑हसि द्यु॒मान् ।

म॒घोना॒मायु॑: प्रति॒रन्महि॒ श्रव॒ इन्द्रा॑य सोम पवसे॒ वृषा॒ मद॑: ॥9.80.2॥

yaṃ tvā̍ vājinna̱ghnyā a̱bhyanū̍ṣa̱tā'yo̍hata̱ṃ yoni̱mā ro̍hasi dyu̱mān |

ma̱ghonā̱māyu̍: prati̱ranmahi̱ śrava̱ indrā̍ya soma pavase̱ vṛṣā̱ mada̍:

एन्द्र॑स्य कु॒क्षा प॑वते म॒दिन्त॑म॒ ऊर्जं॒ वसा॑न॒: श्रव॑से सुम॒ङ्गल॑: ।

प्र॒त्यङ्स विश्वा॒ भुव॑ना॒भि प॑प्रथे॒ क्रीळ॒न्हरि॒रत्य॑: स्यन्दते॒ वृषा॑ ॥9.80.3॥

endra̍sya ku̱kṣā pa̍vate ma̱dinta̍ma̱ ūrja̱ṃ vasā̍na̱: śrava̍se suma̱ṅgala̍: |

pra̱tyaṅsa viśvā̱ bhuva̍nā̱bhi pa̍prathe̱ krīl̤a̱nhari̱ratya̍: syandate̱ vṛṣā̍

तं त्वा॑ दे॒वेभ्यो॒ मधु॑मत्तमं॒ नर॑: स॒हस्र॑धारं दुहते॒ दश॒ क्षिप॑: ।

नृभि॑: सोम॒ प्रच्यु॑तो॒ ग्राव॑भिः सु॒तो विश्वा॑न्दे॒वाँ आ प॑वस्वा सहस्रजित् ॥9.80.4॥

taṃ tvā̍ de̱vebhyo̱ madhu̍mattama̱ṃ nara̍: sa̱hasra̍dhāraṃ duhate̱ daśa̱ kṣipa̍: |

nṛbhi̍: soma̱ pracyu̍to̱ grāva̍bhiḥ su̱to viśvā̍nde̱vām̐ ā pa̍vasvā sahasrajit

तं त्वा॑ ह॒स्तिनो॒ मधु॑मन्त॒मद्रि॑भिर्दु॒हन्त्य॒प्सु वृ॑ष॒भं दश॒ क्षिप॑: ।

इन्द्रं॑ सोम मा॒दय॒न्दैव्यं॒ जनं॒ सिन्धो॑रिवो॒र्मिः पव॑मानो अर्षसि ॥9.80.5॥

taṃ tvā̍ ha̱stino̱ madhu̍manta̱madri̍bhirdu̱hantya̱psu vṛ̍ṣa̱bhaṃ daśa̱ kṣipa̍: |

indra̍ṃ soma mā̱daya̱ndaivya̱ṃ jana̱ṃ sindho̍rivo̱rmiḥ pava̍māno arṣasi

५ वसुर्भारद्वाज: । पवमान: सोम: ।जगती, ५ त्रिष्टुप् ।

प्र सोम॑स्य॒ पव॑मानस्यो॒र्मय॒ इन्द्र॑स्य यन्ति ज॒ठरं॑ सु॒पेश॑सः ।

द॒ध्ना यदी॒मुन्नी॑ता य॒शसा॒ गवां॑ दा॒नाय॒ शूर॑मु॒दम॑न्दिषुः सु॒ताः ॥9.81.1॥

pra soma̍sya̱ pava̍mānasyo̱rmaya̱ indra̍sya yanti ja̱ṭhara̍ṃ su̱peśa̍saḥ |

da̱dhnā yadī̱munnī̍tā ya̱śasā̱ gavā̍ṃ dā̱nāya̱ śūra̍mu̱dama̍ndiṣuḥ su̱tāḥ

अच्छा॒ हि सोम॑: क॒लशाँ॒ असि॑ष्यद॒दत्यो॒ न वोळ्हा॑ र॒घुव॑र्तनि॒र्वृषा॑ ।

अथा॑ दे॒वाना॑मु॒भय॑स्य॒ जन्म॑नो वि॒द्वाँ अ॑श्नोत्य॒मुत॑ इ॒तश्च॒ यत् ॥9.81.2॥

acchā̱ hi soma̍: ka̱laśā̱m̐ asi̍ṣyada̱datyo̱ na vol̤hā̍ ra̱ghuva̍rtani̱rvṛṣā̍ |

athā̍ de̱vānā̍mu̱bhaya̍sya̱ janma̍no vi̱dvām̐ a̍śnotya̱muta̍ i̱taśca̱ yat

आ न॑: सोम॒ पव॑मानः किरा॒ वस्विन्दो॒ भव॑ म॒घवा॒ राध॑सो म॒हः ।

शिक्षा॑ वयोधो॒ वस॑वे॒ सु चे॒तुना॒ मा नो॒ गय॑मा॒रे अ॒स्मत्परा॑ सिचः ॥9.81.3॥

ā na̍: soma̱ pava̍mānaḥ kirā̱ vasvindo̱ bhava̍ ma̱ghavā̱ rādha̍so ma̱haḥ |

śikṣā̍ vayodho̱ vasa̍ve̱ su ce̱tunā̱ mā no̱ gaya̍mā̱re a̱smatparā̍ sicaḥ

आ न॑: पू॒षा पव॑मानः सुरा॒तयो॑ मि॒त्रो ग॑च्छन्तु॒ वरु॑णः स॒जोष॑सः ।

बृह॒स्पति॑र्म॒रुतो॑ वा॒युर॒श्विना॒ त्वष्टा॑ सवि॒ता सु॒यमा॒ सर॑स्वती ॥9.81.4॥

ā na̍: pū̱ṣā pava̍mānaḥ surā̱tayo̍ mi̱tro ga̍cchantu̱ varu̍ṇaḥ sa̱joṣa̍saḥ |

bṛha̱spati̍rma̱ruto̍ vā̱yura̱śvinā̱ tvaṣṭā̍ savi̱tā su̱yamā̱ sara̍svatī

उ॒भे द्यावा॑पृथि॒वी वि॑श्वमि॒न्वे अ॑र्य॒मा दे॒वो अदि॑तिर्विधा॒ता ।

भगो॒ नृशंस॑ उ॒र्व१न्तरि॑क्षं॒ विश्वे॑ दे॒वाः पव॑मानं जुषन्त ॥9.81.5॥

u̱bhe dyāvā̍pṛthi̱vī vi̍śvami̱nve a̍rya̱mā de̱vo adi̍tirvidhā̱tā |

bhago̱ nṛśaṃsa̍ u̱rva1ntari̍kṣa̱ṃ viśve̍ de̱vāḥ pava̍mānaṃ juṣanta

५ वसुर्भारद्वाज: । पवमान: सोम: ।जगती , ५ त्रिष्टुप् ।

असा॑वि॒ सोमो॑ अरु॒षो वृषा॒ हरी॒ राजे॑व द॒स्मो अ॒भि गा अ॑चिक्रदत् ।

पु॒ना॒नो वारं॒ पर्ये॑त्य॒व्ययं॑ श्ये॒नो न योनिं॑ घृ॒तव॑न्तमा॒सद॑म् ॥9.82.1॥

asā̍vi̱ somo̍ aru̱ṣo vṛṣā̱ harī̱ rāje̍va da̱smo a̱bhi gā a̍cikradat |

pu̱nā̱no vāra̱ṃ parye̍tya̱vyaya̍ṃ śye̱no na yoni̍ṃ ghṛ̱tava̍ntamā̱sada̍m

क॒विर्वे॑ध॒स्या पर्ये॑षि॒ माहि॑न॒मत्यो॒ न मृ॒ष्टो अ॒भि वाज॑मर्षसि ।

अ॒प॒सेध॑न्दुरि॒ता सो॑म मृळय घृ॒तं वसा॑न॒: परि॑ यासि नि॒र्णिज॑म् ॥9.82.2॥

ka̱virve̍dha̱syā parye̍ṣi̱ māhi̍na̱matyo̱ na mṛ̱ṣṭo a̱bhi vāja̍marṣasi |

a̱pa̱sedha̍nduri̱tā so̍ma mṛl̤aya ghṛ̱taṃ vasā̍na̱: pari̍ yāsi ni̱rṇija̍m

प॒र्जन्य॑: पि॒ता म॑हि॒षस्य॑ प॒र्णिनो॒ नाभा॑ पृथि॒व्या गि॒रिषु॒ क्षयं॑ दधे ।

स्वसा॑र॒ आपो॑ अ॒भि गा उ॒तास॑र॒न्त्सं ग्राव॑भिर्नसते वी॒ते अ॑ध्व॒रे ॥9.82.3॥

pa̱rjanya̍: pi̱tā ma̍hi̱ṣasya̍ pa̱rṇino̱ nābhā̍ pṛthi̱vyā gi̱riṣu̱ kṣaya̍ṃ dadhe |

svasā̍ra̱ āpo̍ a̱bhi gā u̱tāsa̍ra̱ntsaṃ grāva̍bhirnasate vī̱te a̍dhva̱re

जा॒येव॒ पत्या॒वधि॒ शेव॑ मंहसे॒ पज्रा॑या गर्भ शृणु॒हि ब्रवी॑मि ते ।

अ॒न्तर्वाणी॑षु॒ प्र च॑रा॒ सु जी॒वसे॑ऽनि॒न्द्यो वृ॒जने॑ सोम जागृहि ॥9.82.4॥

jā̱yeva̱ patyā̱vadhi̱ śeva̍ maṃhase̱ pajrā̍yā garbha śṛṇu̱hi bravī̍mi te |

a̱ntarvāṇī̍ṣu̱ pra ca̍rā̱ su jī̱vase̍'ni̱ndyo vṛ̱jane̍ soma jāgṛhi

यथा॒ पूर्वे॑भ्यः शत॒सा अमृ॑ध्रः सहस्र॒साः प॒र्यया॒ वाज॑मिन्दो ।

ए॒वा प॑वस्व सुवि॒ताय॒ नव्य॑से॒ तव॑ व्र॒तमन्वाप॑: सचन्ते ॥9.82.5॥

yathā̱ pūrve̍bhyaḥ śata̱sā amṛ̍dhraḥ sahasra̱sāḥ pa̱ryayā̱ vāja̍mindo |

e̱vā pa̍vasva suvi̱tāya̱ navya̍se̱ tava̍ vra̱tamanvāpa̍: sacante

५ पवित्र आङ्गिरस: । पवमान: सोम: ।जगती ।

प॒वित्रं॑ ते॒ वित॑तं ब्रह्मणस्पते प्र॒भुर्गात्रा॑णि॒ पर्ये॑षि वि॒श्वत॑: ।

अत॑प्ततनू॒र्न तदा॒मो अ॑श्नुते शृ॒तास॒ इद्वह॑न्त॒स्तत्समा॑शत ॥9.83.1॥

pa̱vitra̍ṃ te̱ vita̍taṃ brahmaṇaspate pra̱bhurgātrā̍ṇi̱ parye̍ṣi vi̱śvata̍: |

ata̍ptatanū̱rna tadā̱mo a̍śnute śṛ̱tāsa̱ idvaha̍nta̱statsamā̍śata

तपो॑ष्प॒वित्रं॒ वित॑तं दि॒वस्प॒दे शोच॑न्तो अस्य॒ तन्त॑वो॒ व्य॑स्थिरन् ।

अव॑न्त्यस्य पवी॒तार॑मा॒शवो॑ दि॒वस्पृ॒ष्ठमधि॑ तिष्ठन्ति॒ चेत॑सा ॥9.83.2॥

tapo̍ṣpa̱vitra̱ṃ vita̍taṃ di̱vaspa̱de śoca̍nto asya̱ tanta̍vo̱ vya̍sthiran |

ava̍ntyasya pavī̱tāra̍mā̱śavo̍ di̱vaspṛ̱ṣṭhamadhi̍ tiṣṭhanti̱ ceta̍sā

अरू॑रुचदु॒षस॒: पृश्नि॑रग्रि॒य उ॒क्षा बि॑भर्ति॒ भुव॑नानि वाज॒युः ।

मा॒या॒विनो॑ ममिरे अस्य मा॒यया॑ नृ॒चक्ष॑सः पि॒तरो॒ गर्भ॒मा द॑धुः ॥9.83.3॥

arū̍rucadu̱ṣasa̱: pṛśni̍ragri̱ya u̱kṣā bi̍bharti̱ bhuva̍nāni vāja̱yuḥ |

mā̱yā̱vino̍ mamire asya mā̱yayā̍ nṛ̱cakṣa̍saḥ pi̱taro̱ garbha̱mā da̍dhuḥ

ग॒न्ध॒र्व इ॒त्था प॒दम॑स्य रक्षति॒ पाति॑ दे॒वानां॒ जनि॑मा॒न्यद्भु॑तः ।

गृ॒भ्णाति॑ रि॒पुं नि॒धया॑ नि॒धाप॑तिः सु॒कृत्त॑मा॒ मधु॑नो भ॒क्षमा॑शत ॥9.83.4॥

ga̱ndha̱rva i̱tthā pa̱dama̍sya rakṣati̱ pāti̍ de̱vānā̱ṃ jani̍mā̱nyadbhu̍taḥ |

gṛ̱bhṇāti̍ ri̱puṃ ni̱dhayā̍ ni̱dhāpa̍tiḥ su̱kṛtta̍mā̱ madhu̍no bha̱kṣamā̍śata

ह॒विर्ह॑विष्मो॒ महि॒ सद्म॒ दैव्यं॒ नभो॒ वसा॑न॒: परि॑ यास्यध्व॒रम् ।

राजा॑ प॒वित्र॑रथो॒ वाज॒मारु॑हः स॒हस्र॑भृष्टिर्जयसि॒ श्रवो॑ बृ॒हत् ॥9.83.5॥

ha̱virha̍viṣmo̱ mahi̱ sadma̱ daivya̱ṃ nabho̱ vasā̍na̱: pari̍ yāsyadhva̱ram |

rājā̍ pa̱vitra̍ratho̱ vāja̱māru̍haḥ sa̱hasra̍bhṛṣṭirjayasi̱ śravo̍ bṛ̱hat

५ वाच्य: प्रजापति: । पवमान: सोम: ।जगती ।

पव॑स्व देव॒माद॑नो॒ विच॑र्षणिर॒प्सा इन्द्रा॑य॒ वरु॑णाय वा॒यवे॑ ।

कृ॒धी नो॑ अ॒द्य वरि॑वः स्वस्ति॒मदु॑रुक्षि॒तौ गृ॑णीहि॒ दैव्यं॒ जन॑म् ॥9.84.1॥

pava̍sva deva̱māda̍no̱ vica̍rṣaṇira̱psā indrā̍ya̱ varu̍ṇāya vā̱yave̍ |

kṛ̱dhī no̍ a̱dya vari̍vaḥ svasti̱madu̍rukṣi̱tau gṛ̍ṇīhi̱ daivya̱ṃ jana̍m

आ यस्त॒स्थौ भुव॑ना॒न्यम॑र्त्यो॒ विश्वा॑नि॒ सोम॒: परि॒ तान्य॑र्षति ।

कृ॒ण्वन्त्सं॒चृतं॑ वि॒चृत॑म॒भिष्ट॑य॒ इन्दु॑: सिषक्त्यु॒षसं॒ न सूर्य॑: ॥9.84.2॥

ā yasta̱sthau bhuva̍nā̱nyama̍rtyo̱ viśvā̍ni̱ soma̱: pari̱ tānya̍rṣati |

kṛ̱ṇvantsa̱ṃcṛta̍ṃ vi̱cṛta̍ma̱bhiṣṭa̍ya̱ indu̍: siṣaktyu̱ṣasa̱ṃ na sūrya̍:

आ यो गोभि॑: सृ॒ज्यत॒ ओष॑धी॒ष्वा दे॒वानां॑ सु॒म्न इ॒षय॒न्नुपा॑वसुः ।

आ वि॒द्युता॑ पवते॒ धार॑या सु॒त इन्द्रं॒ सोमो॑ मा॒दय॒न्दैव्यं॒ जन॑म् ॥9.84.3॥

ā yo gobhi̍: sṛ̱jyata̱ oṣa̍dhī̱ṣvā de̱vānā̍ṃ su̱mna i̱ṣaya̱nnupā̍vasuḥ |

ā vi̱dyutā̍ pavate̱ dhāra̍yā su̱ta indra̱ṃ somo̍ mā̱daya̱ndaivya̱ṃ jana̍m

ए॒ष स्य सोम॑: पवते सहस्र॒जिद्धि॑न्वा॒नो वाच॑मिषि॒रामु॑ष॒र्बुध॑म् ।

इन्दु॑: समु॒द्रमुदि॑यर्ति वा॒युभि॒रेन्द्र॑स्य॒ हार्दि॑ क॒लशे॑षु सीदति ॥9.84.4॥

e̱ṣa sya soma̍: pavate sahasra̱jiddhi̍nvā̱no vāca̍miṣi̱rāmu̍ṣa̱rbudha̍m |

indu̍: samu̱dramudi̍yarti vā̱yubhi̱rendra̍sya̱ hārdi̍ ka̱laśe̍ṣu sīdati

अ॒भि त्यं गाव॒: पय॑सा पयो॒वृधं॒ सोमं॑ श्रीणन्ति म॒तिभि॑: स्व॒र्विद॑म् ।

ध॒नं॒ज॒यः प॑वते॒ कृत्व्यो॒ रसो॒ विप्र॑: क॒विः काव्ये॑ना॒ स्व॑र्चनाः ॥9.84.5॥

a̱bhi tyaṃ gāva̱: paya̍sā payo̱vṛdha̱ṃ soma̍ṃ śrīṇanti ma̱tibhi̍: sva̱rvida̍m |

dha̱na̱ṃja̱yaḥ pa̍vate̱ kṛtvyo̱ raso̱ vipra̍: ka̱viḥ kāvye̍nā̱ sva̍rcanāḥ

१२ वेनो भार्गव: । पवमान: सोम: ।जगती , ११-१२ त्रिष्टुप् ।

इन्द्रा॑य सोम॒ सुषु॑त॒: परि॑ स्र॒वाऽपामी॑वा भवतु॒ रक्ष॑सा स॒ह ।

मा ते॒ रस॑स्य मत्सत द्वया॒विनो॒ द्रवि॑णस्वन्त इ॒ह स॒न्त्विन्द॑वः ॥9.85.1॥

indrā̍ya soma̱ suṣu̍ta̱: pari̍ sra̱vā'pāmī̍vā bhavatu̱ rakṣa̍sā sa̱ha |

mā te̱ rasa̍sya matsata dvayā̱vino̱ dravi̍ṇasvanta i̱ha sa̱ntvinda̍vaḥ

अ॒स्मान्त्स॑म॒र्ये प॑वमान चोदय॒ दक्षो॑ दे॒वाना॒मसि॒ हि प्रि॒यो मद॑: ।

ज॒हि शत्रूँ॑र॒भ्या भ॑न्दनाय॒तः पिबे॑न्द्र॒ सोम॒मव॑ नो॒ मृधो॑ जहि ॥9.85.2॥

a̱smāntsa̍ma̱rye pa̍vamāna codaya̱ dakṣo̍ de̱vānā̱masi̱ hi pri̱yo mada̍: |

ja̱hi śatrū̍m̐ra̱bhyā bha̍ndanāya̱taḥ pibe̍ndra̱ soma̱mava̍ no̱ mṛdho̍ jahi

अद॑ब्ध इन्दो पवसे म॒दिन्त॑म आ॒त्मेन्द्र॑स्य भवसि धा॒सिरु॑त्त॒मः ।

अ॒भि स्व॑रन्ति ब॒हवो॑ मनी॒षिणो॒ राजा॑नम॒स्य भुव॑नस्य निंसते ॥9.85.3॥

ada̍bdha indo pavase ma̱dinta̍ma ā̱tmendra̍sya bhavasi dhā̱siru̍tta̱maḥ |

a̱bhi sva̍ranti ba̱havo̍ manī̱ṣiṇo̱ rājā̍nama̱sya bhuva̍nasya niṃsate

स॒हस्र॑णीथः श॒तधा॑रो॒ अद्भु॑त॒ इन्द्रा॒येन्दु॑: पवते॒ काम्यं॒ मधु॑ ।

जय॒न्क्षेत्र॑म॒भ्य॑र्षा॒ जय॑न्न॒प उ॒रुं नो॑ गा॒तुं कृ॑णु सोम मीढ्वः ॥9.85.4॥

sa̱hasra̍ṇīthaḥ śa̱tadhā̍ro̱ adbhu̍ta̱ indrā̱yendu̍: pavate̱ kāmya̱ṃ madhu̍ |

jaya̱nkṣetra̍ma̱bhya̍rṣā̱ jaya̍nna̱pa u̱ruṃ no̍ gā̱tuṃ kṛ̍ṇu soma mīḍhvaḥ

कनि॑क्रदत्क॒लशे॒ गोभि॑रज्यसे॒ व्य१व्ययं॑ स॒मया॒ वार॑मर्षसि ।

म॒र्मृ॒ज्यमा॑नो॒ अत्यो॒ न सा॑न॒सिरिन्द्र॑स्य सोम ज॒ठरे॒ सम॑क्षरः ॥9.85.5॥

kani̍kradatka̱laśe̱ gobhi̍rajyase̱ vya1vyaya̍ṃ sa̱mayā̱ vāra̍marṣasi |

ma̱rmṛ̱jyamā̍no̱ atyo̱ na sā̍na̱sirindra̍sya soma ja̱ṭhare̱ sama̍kṣaraḥ

स्वा॒दुः प॑वस्व दि॒व्याय॒ जन्म॑ने स्वा॒दुरिन्द्रा॑य सु॒हवी॑तुनाम्ने ।

स्वा॒दुर्मि॒त्राय॒ वरु॑णाय वा॒यवे॒ बृह॒स्पत॑ये॒ मधु॑माँ॒ अदा॑भ्यः ॥9.85.6॥

svā̱duḥ pa̍vasva di̱vyāya̱ janma̍ne svā̱durindrā̍ya su̱havī̍tunāmne |

svā̱durmi̱trāya̱ varu̍ṇāya vā̱yave̱ bṛha̱spata̍ye̱ madhu̍mā̱m̐ adā̍bhyaḥ

अत्यं॑ मृजन्ति क॒लशे॒ दश॒ क्षिप॒: प्र विप्रा॑णां म॒तयो॒ वाच॑ ईरते ।

पव॑माना अ॒भ्य॑र्षन्ति सुष्टु॒तिमेन्द्रं॑ विशन्ति मदि॒रास॒ इन्द॑वः ॥9.85.7॥

atya̍ṃ mṛjanti ka̱laśe̱ daśa̱ kṣipa̱: pra viprā̍ṇāṃ ma̱tayo̱ vāca̍ īrate |

pava̍mānā a̱bhya̍rṣanti suṣṭu̱timendra̍ṃ viśanti madi̱rāsa̱ inda̍vaḥ

पव॑मानो अ॒भ्य॑र्षा सु॒वीर्य॑मु॒र्वीं गव्यू॑तिं॒ महि॒ शर्म॑ स॒प्रथ॑: ।

माकि॑र्नो अ॒स्य परि॑षूतिरीश॒तेन्दो॒ जये॑म॒ त्वया॒ धनं॑धनम् ॥9.85.8॥

pava̍māno a̱bhya̍rṣā su̱vīrya̍mu̱rvīṃ gavyū̍ti̱ṃ mahi̱ śarma̍ sa̱pratha̍: |

māki̍rno a̱sya pari̍ṣūtirīśa̱tendo̱ jaye̍ma̱ tvayā̱ dhana̍ṃdhanam

अधि॒ द्याम॑स्थाद्वृष॒भो वि॑चक्ष॒णोऽरू॑रुच॒द्वि दि॒वो रो॑च॒ना क॒विः ।

राजा॑ प॒वित्र॒मत्ये॑ति॒ रोरु॑वद्दि॒वः पी॒यूषं॑ दुहते नृ॒चक्ष॑सः ॥9.85.9॥

adhi̱ dyāma̍sthādvṛṣa̱bho vi̍cakṣa̱ṇo'rū̍ruca̱dvi di̱vo ro̍ca̱nā ka̱viḥ |

rājā̍ pa̱vitra̱matye̍ti̱ roru̍vaddi̱vaḥ pī̱yūṣa̍ṃ duhate nṛ̱cakṣa̍saḥ

दि॒वो नाके॒ मधु॑जिह्वा अस॒श्चतो॑ वे॒ना दु॑हन्त्यु॒क्षणं॑ गिरि॒ष्ठाम् ।

अ॒प्सु द्र॒प्सं वा॑वृधा॒नं स॑मु॒द्र आ सिन्धो॑रू॒र्मा मधु॑मन्तं प॒वित्र॒ आ ॥9.85.10॥

di̱vo nāke̱ madhu̍jihvā asa̱ścato̍ ve̱nā du̍hantyu̱kṣaṇa̍ṃ giri̱ṣṭhām |

a̱psu dra̱psaṃ vā̍vṛdhā̱naṃ sa̍mu̱dra ā sindho̍rū̱rmā madhu̍mantaṃ pa̱vitra̱ ā

नाके॑ सुप॒र्णमु॑पपप्ति॒वांसं॒ गिरो॑ वे॒नाना॑मकृपन्त पू॒र्वीः ।

शिशुं॑ रिहन्ति म॒तय॒: पनि॑प्नतं हिर॒ण्ययं॑ शकु॒नं क्षाम॑णि॒ स्थाम् ॥9.85.11॥

nāke̍ supa̱rṇamu̍papapti̱vāṃsa̱ṃ giro̍ ve̱nānā̍makṛpanta pū̱rvīḥ |

śiśu̍ṃ rihanti ma̱taya̱: pani̍pnataṃ hira̱ṇyaya̍ṃ śaku̱naṃ kṣāma̍ṇi̱ sthām

ऊ॒र्ध्वो ग॑न्ध॒र्वो अधि॒ नाके॑ अस्था॒द्विश्वा॑ रू॒पा प्र॑ति॒चक्षा॑णो अस्य ।

भा॒नुः शु॒क्रेण॑ शो॒चिषा॒ व्य॑द्यौ॒त्प्रारू॑रुच॒द्रोद॑सी मा॒तरा॒ शुचि॑: ॥9.85.12॥

ū̱rdhvo ga̍ndha̱rvo adhi̱ nāke̍ asthā̱dviśvā̍ rū̱pā pra̍ti̱cakṣā̍ṇo asya |

bhā̱nuḥ śu̱kreṇa̍ śo̱ciṣā̱ vya̍dyau̱tprārū̍ruca̱droda̍sī mā̱tarā̱ śuci̍:

(१-४८ ) १-१० अकृष्टा माषा:, ११-२० सिकता निवावरी, २१-३० पृश्नियोऽजा:, ३१-४० अकृष्टमाषादयस्त्रय:,४१-४५ भौमोऽत्रि:, ४६-४८ गृत्समद: शौनक: । पवमान: सोम: ।जगती ।

प्र त॑ आ॒शव॑: पवमान धी॒जवो॒ मदा॑ अर्षन्ति रघु॒जा इ॑व॒ त्मना॑ ।

दि॒व्याः सु॑प॒र्णा मधु॑मन्त॒ इन्द॑वो म॒दिन्त॑मास॒: परि॒ कोश॑मासते ॥9.86.1॥

pra ta̍ ā̱śava̍: pavamāna dhī̱javo̱ madā̍ arṣanti raghu̱jā i̍va̱ tmanā̍ |

di̱vyāḥ su̍pa̱rṇā madhu̍manta̱ inda̍vo ma̱dinta̍māsa̱: pari̱ kośa̍māsate

प्र ते॒ मदा॑सो मदि॒रास॑ आ॒शवोऽसृ॑क्षत॒ रथ्या॑सो॒ यथा॒ पृथ॑क् ।

धे॒नुर्न व॒त्सं पय॑सा॒भि व॒ज्रिण॒मिन्द्र॒मिन्द॑वो॒ मधु॑मन्त ऊ॒र्मय॑: ॥9.86.2॥

pra te̱ madā̍so madi̱rāsa̍ ā̱śavo'sṛ̍kṣata̱ rathyā̍so̱ yathā̱ pṛtha̍k |

dhe̱nurna va̱tsaṃ paya̍sā̱bhi va̱jriṇa̱mindra̱minda̍vo̱ madhu̍manta ū̱rmaya̍:

अत्यो॒ न हि॑या॒नो अ॒भि वाज॑मर्ष स्व॒र्वित्कोशं॑ दि॒वो अद्रि॑मातरम् ।

वृषा॑ प॒वित्रे॒ अधि॒ सानो॑ अ॒व्यये॒ सोम॑: पुना॒न इ॑न्द्रि॒याय॒ धाय॑से ॥9.86.3॥

atyo̱ na hi̍yā̱no a̱bhi vāja̍marṣa sva̱rvitkośa̍ṃ di̱vo adri̍mātaram |

vṛṣā̍ pa̱vitre̱ adhi̱ sāno̍ a̱vyaye̱ soma̍: punā̱na i̍ndri̱yāya̱ dhāya̍se

प्र त॒ आश्वि॑नीः पवमान धी॒जुवो॑ दि॒व्या अ॑सृग्र॒न्पय॑सा॒ धरी॑मणि ।

प्रान्तॠष॑य॒: स्थावि॑रीरसृक्षत॒ ये त्वा॑ मृ॒जन्त्यृ॑षिषाण वे॒धस॑: ॥9.86.4॥

pra ta̱ āśvi̍nīḥ pavamāna dhī̱juvo̍ di̱vyā a̍sṛgra̱npaya̍sā̱ dharī̍maṇi |

prāntaṝṣa̍ya̱: sthāvi̍rīrasṛkṣata̱ ye tvā̍ mṛ̱jantyṛ̍ṣiṣāṇa ve̱dhasa̍:

विश्वा॒ धामा॑नि विश्वचक्ष॒ ऋभ्व॑सः प्र॒भोस्ते॑ स॒तः परि॑ यन्ति के॒तव॑: ।

व्या॒न॒शिः प॑वसे सोम॒ धर्म॑भि॒: पति॒र्विश्व॑स्य॒ भुव॑नस्य राजसि ॥9.86.5॥

viśvā̱ dhāmā̍ni viśvacakṣa̱ ṛbhva̍saḥ pra̱bhoste̍ sa̱taḥ pari̍ yanti ke̱tava̍: |

vyā̱na̱śiḥ pa̍vase soma̱ dharma̍bhi̱: pati̱rviśva̍sya̱ bhuva̍nasya rājasi

उ॒भ॒यत॒: पव॑मानस्य र॒श्मयो॑ ध्रु॒वस्य॑ स॒तः परि॑ यन्ति के॒तव॑: ।

यदी॑ प॒वित्रे॒ अधि॑ मृ॒ज्यते॒ हरि॒: सत्ता॒ नि योना॑ क॒लशे॑षु सीदति ॥9.86.6॥

u̱bha̱yata̱: pava̍mānasya ra̱śmayo̍ dhru̱vasya̍ sa̱taḥ pari̍ yanti ke̱tava̍: |

yadī̍ pa̱vitre̱ adhi̍ mṛ̱jyate̱ hari̱: sattā̱ ni yonā̍ ka̱laśe̍ṣu sīdati

य॒ज्ञस्य॑ के॒तुः प॑वते स्वध्व॒रः सोमो॑ दे॒वाना॒मुप॑ याति निष्कृ॒तम् ।

स॒हस्र॑धार॒: परि॒ कोश॑मर्षति॒ वृषा॑ प॒वित्र॒मत्ये॑ति॒ रोरु॑वत् ॥9.86.7॥

ya̱jñasya̍ ke̱tuḥ pa̍vate svadhva̱raḥ somo̍ de̱vānā̱mupa̍ yāti niṣkṛ̱tam |

sa̱hasra̍dhāra̱: pari̱ kośa̍marṣati̱ vṛṣā̍ pa̱vitra̱matye̍ti̱ roru̍vat

राजा॑ समु॒द्रं न॒द्यो॒३ वि गा॑हते॒ऽपामू॒र्मिं स॑चते॒ सिन्धु॑षु श्रि॒तः ।

अध्य॑स्था॒त्सानु॒ पव॑मानो अ॒व्ययं॒ नाभा॑ पृथि॒व्या ध॒रुणो॑ म॒हो दि॒वः ॥9.86.8॥

rājā̍ samu̱draṃ na̱dyo̱3 vi gā̍hate̱'pāmū̱rmiṃ sa̍cate̱ sindhu̍ṣu śri̱taḥ |

adhya̍sthā̱tsānu̱ pava̍māno a̱vyaya̱ṃ nābhā̍ pṛthi̱vyā dha̱ruṇo̍ ma̱ho di̱vaḥ

दि॒वो न सानु॑ स्त॒नय॑न्नचिक्रद॒द्द्यौश्च॒ यस्य॑ पृथि॒वी च॒ धर्म॑भिः ।

इन्द्र॑स्य स॒ख्यं प॑वते वि॒वेवि॑द॒त्सोम॑: पुना॒नः क॒लशे॑षु सीदति ॥9.86.9॥

di̱vo na sānu̍ sta̱naya̍nnacikrada̱ddyauśca̱ yasya̍ pṛthi̱vī ca̱ dharma̍bhiḥ |

indra̍sya sa̱khyaṃ pa̍vate vi̱vevi̍da̱tsoma̍: punā̱naḥ ka̱laśe̍ṣu sīdati

ज्योति॑र्य॒ज्ञस्य॑ पवते॒ मधु॑ प्रि॒यं पि॒ता दे॒वानां॑ जनि॒ता वि॒भूव॑सुः ।

दधा॑ति॒ रत्नं॑ स्व॒धयो॑रपी॒च्यं॑ म॒दिन्त॑मो मत्स॒र इ॑न्द्रि॒यो रस॑: ॥9.86.10॥

jyoti̍rya̱jñasya̍ pavate̱ madhu̍ pri̱yaṃ pi̱tā de̱vānā̍ṃ jani̱tā vi̱bhūva̍suḥ |

dadhā̍ti̱ ratna̍ṃ sva̱dhayo̍rapī̱cya̍ṃ ma̱dinta̍mo matsa̱ra i̍ndri̱yo rasa̍:

अ॒भि॒क्रन्द॑न्क॒लशं॑ वा॒ज्य॑र्षति॒ पति॑र्दि॒वः श॒तधा॑रो विचक्ष॒णः ।

हरि॑र्मि॒त्रस्य॒ सद॑नेषु सीदति मर्मृजा॒नोऽवि॑भि॒: सिन्धु॑भि॒र्वृषा॑ ॥9.86.11॥

a̱bhi̱kranda̍nka̱laśa̍ṃ vā̱jya̍rṣati̱ pati̍rdi̱vaḥ śa̱tadhā̍ro vicakṣa̱ṇaḥ |

hari̍rmi̱trasya̱ sada̍neṣu sīdati marmṛjā̱no'vi̍bhi̱: sindhu̍bhi̱rvṛṣā̍

अग्रे॒ सिन्धू॑नां॒ पव॑मानो अर्ष॒त्यग्रे॑ वा॒चो अ॑ग्रि॒यो गोषु॑ गच्छति ।

अग्रे॒ वाज॑स्य भजते महाध॒नं स्वा॑यु॒धः सो॒तृभि॑: पूयते॒ वृषा॑ ॥9.86.12॥

agre̱ sindhū̍nā̱ṃ pava̍māno arṣa̱tyagre̍ vā̱co a̍gri̱yo goṣu̍ gacchati |

agre̱ vāja̍sya bhajate mahādha̱naṃ svā̍yu̱dhaḥ so̱tṛbhi̍: pūyate̱ vṛṣā̍

अ॒यं म॒तवा॑ञ्छकु॒नो यथा॑ हि॒तोऽव्ये॑ ससार॒ पव॑मान ऊ॒र्मिणा॑ ।

तव॒ क्रत्वा॒ रोद॑सी अन्त॒रा क॑वे॒ शुचि॑र्धि॒या प॑वते॒ सोम॑ इन्द्र ते ॥9.86.13॥

a̱yaṃ ma̱tavā̍ñchaku̱no yathā̍ hi̱to'vye̍ sasāra̱ pava̍māna ū̱rmiṇā̍ |

tava̱ kratvā̱ roda̍sī anta̱rā ka̍ve̱ śuci̍rdhi̱yā pa̍vate̱ soma̍ indra te

द्रा॒पिं वसा॑नो यज॒तो दि॑वि॒स्पृश॑मन्तरिक्ष॒प्रा भुव॑ने॒ष्वर्पि॑तः ।

स्व॑र्जज्ञा॒नो नभ॑सा॒भ्य॑क्रमीत्प्र॒त्नम॑स्य पि॒तर॒मा वि॑वासति ॥9.86.14॥

drā̱piṃ vasā̍no yaja̱to di̍vi̱spṛśa̍mantarikṣa̱prā bhuva̍ne̱ṣvarpi̍taḥ |

sva̍rjajñā̱no nabha̍sā̱bhya̍kramītpra̱tnama̍sya pi̱tara̱mā vi̍vāsati

सो अ॑स्य वि॒शे महि॒ शर्म॑ यच्छति॒ यो अ॑स्य॒ धाम॑ प्रथ॒मं व्या॑न॒शे ।

प॒दं यद॑स्य पर॒मे व्यो॑म॒न्यतो॒ विश्वा॑ अ॒भि सं या॑ति सं॒यत॑: ॥9.86.15॥

so a̍sya vi̱śe mahi̱ śarma̍ yacchati̱ yo a̍sya̱ dhāma̍ pratha̱maṃ vyā̍na̱śe |

pa̱daṃ yada̍sya para̱me vyo̍ma̱nyato̱ viśvā̍ a̱bhi saṃ yā̍ti sa̱ṃyata̍:

प्रो अ॑यासी॒दिन्दु॒रिन्द्र॑स्य निष्कृ॒तं सखा॒ सख्यु॒र्न प्र मि॑नाति सं॒गिर॑म् ।

मर्य॑ इव युव॒तिभि॒: सम॑र्षति॒ सोम॑: क॒लशे॑ श॒तया॑म्ना प॒था ॥9.86.16॥

pro a̍yāsī̱dindu̱rindra̍sya niṣkṛ̱taṃ sakhā̱ sakhyu̱rna pra mi̍nāti sa̱ṃgira̍m |

marya̍ iva yuva̱tibhi̱: sama̍rṣati̱ soma̍: ka̱laśe̍ śa̱tayā̍mnā pa̱thā

प्र वो॒ धियो॑ मन्द्र॒युवो॑ विप॒न्युव॑: पन॒स्युव॑: सं॒वस॑नेष्वक्रमुः ।

सोमं॑ मनी॒षा अ॒भ्य॑नूषत॒ स्तुभो॒ऽभि धे॒नव॒: पय॑सेमशिश्रयुः ॥9.86.17॥

pra vo̱ dhiyo̍ mandra̱yuvo̍ vipa̱nyuva̍: pana̱syuva̍: sa̱ṃvasa̍neṣvakramuḥ |

soma̍ṃ manī̱ṣā a̱bhya̍nūṣata̱ stubho̱'bhi dhe̱nava̱: paya̍semaśiśrayuḥ

आ न॑: सोम सं॒यतं॑ पि॒प्युषी॒मिष॒मिन्दो॒ पव॑स्व॒ पव॑मानो अ॒स्रिध॑म् ।

या नो॒ दोह॑ते॒ त्रिरह॒न्नस॑श्चुषी क्षु॒मद्वाज॑व॒न्मधु॑मत्सु॒वीर्य॑म् ॥9.86.18॥

ā na̍: soma sa̱ṃyata̍ṃ pi̱pyuṣī̱miṣa̱mindo̱ pava̍sva̱ pava̍māno a̱sridha̍m |

yā no̱ doha̍te̱ triraha̱nnasa̍ścuṣī kṣu̱madvāja̍va̱nmadhu̍matsu̱vīrya̍m

वृषा॑ मती॒नां प॑वते विचक्ष॒णः सोमो॒ अह्न॑: प्रतरी॒तोषसो॑ दि॒वः ।

क्रा॒णा सिन्धू॑नां क॒लशाँ॑ अवीवश॒दिन्द्र॑स्य॒ हार्द्या॑वि॒शन्म॑नी॒षिभि॑: ॥9.86.19॥

vṛṣā̍ matī̱nāṃ pa̍vate vicakṣa̱ṇaḥ somo̱ ahna̍: pratarī̱toṣaso̍ di̱vaḥ |

krā̱ṇā sindhū̍nāṃ ka̱laśā̍m̐ avīvaśa̱dindra̍sya̱ hārdyā̍vi̱śanma̍nī̱ṣibhi̍:

म॒नी॒षिभि॑: पवते पू॒र्व्यः क॒विर्नृभि॑र्य॒तः परि॒ कोशाँ॑ अचिक्रदत् ।

त्रि॒तस्य॒ नाम॑ ज॒नय॒न्मधु॑ क्षर॒दिन्द्र॑स्य वा॒योः स॒ख्याय॒ कर्त॑वे ॥9.86.20॥

ma̱nī̱ṣibhi̍: pavate pū̱rvyaḥ ka̱virnṛbhi̍rya̱taḥ pari̱ kośā̍m̐ acikradat |

tri̱tasya̱ nāma̍ ja̱naya̱nmadhu̍ kṣara̱dindra̍sya vā̱yoḥ sa̱khyāya̱ karta̍ve

अ॒यं पु॑ना॒न उ॒षसो॒ वि रो॑चयद॒यं सिन्धु॑भ्यो अभवदु लोक॒कृत् ।

अ॒यं त्रिः स॒प्त दु॑दुहा॒न आ॒शिरं॒ सोमो॑ हृ॒दे प॑वते॒ चारु॑ मत्स॒रः ॥9.86.21॥

a̱yaṃ pu̍nā̱na u̱ṣaso̱ vi ro̍cayada̱yaṃ sindhu̍bhyo abhavadu loka̱kṛt |

a̱yaṃ triḥ sa̱pta du̍duhā̱na ā̱śira̱ṃ somo̍ hṛ̱de pa̍vate̱ cāru̍ matsa̱raḥ

पव॑स्व सोम दि॒व्येषु॒ धाम॑सु सृजा॒न इ॑न्दो क॒लशे॑ प॒वित्र॒ आ ।

सीद॒न्निन्द्र॑स्य ज॒ठरे॒ कनि॑क्रद॒न्नृभि॑र्य॒तः सूर्य॒मारो॑हयो दि॒वि ॥9.86.22॥

pava̍sva soma di̱vyeṣu̱ dhāma̍su sṛjā̱na i̍ndo ka̱laśe̍ pa̱vitra̱ ā |

sīda̱nnindra̍sya ja̱ṭhare̱ kani̍krada̱nnṛbhi̍rya̱taḥ sūrya̱māro̍hayo di̱vi

अद्रि॑भिः सु॒तः प॑वसे प॒वित्र॒ आँ इन्द॒विन्द्र॑स्य ज॒ठरे॑ष्वावि॒शन् ।

त्वं नृ॒चक्षा॑ अभवो विचक्षण॒ सोम॑ गो॒त्रमङ्गि॑रोभ्योऽवृणो॒रप॑ ॥9.86.23॥

adri̍bhiḥ su̱taḥ pa̍vase pa̱vitra̱ ām̐ inda̱vindra̍sya ja̱ṭhare̍ṣvāvi̱śan |

tvaṃ nṛ̱cakṣā̍ abhavo vicakṣaṇa̱ soma̍ go̱tramaṅgi̍robhyo'vṛṇo̱rapa̍

त्वां सो॑म॒ पव॑मानं स्वा॒ध्योऽनु॒ विप्रा॑सो अमदन्नव॒स्यव॑: ।

त्वां सु॑प॒र्ण आभ॑रद्दि॒वस्परीन्दो॒ विश्वा॑भिर्म॒तिभि॒: परि॑ष्कृतम् ॥9.86.24॥

tvāṃ so̍ma̱ pava̍mānaṃ svā̱dhyo'nu̱ viprā̍so amadannava̱syava̍: |

tvāṃ su̍pa̱rṇa ābha̍raddi̱vasparīndo̱ viśvā̍bhirma̱tibhi̱: pari̍ṣkṛtam

अव्ये॑ पुना॒नं परि॒ वार॑ ऊ॒र्मिणा॒ हरिं॑ नवन्ते अ॒भि स॒प्त धे॒नव॑: ।

अ॒पामु॒पस्थे॒ अध्या॒यव॑: क॒विमृ॒तस्य॒ योना॑ महि॒षा अ॑हेषत ॥9.86.25॥

avye̍ punā̱naṃ pari̱ vāra̍ ū̱rmiṇā̱ hari̍ṃ navante a̱bhi sa̱pta dhe̱nava̍: |

a̱pāmu̱pasthe̱ adhyā̱yava̍: ka̱vimṛ̱tasya̱ yonā̍ mahi̱ṣā a̍heṣata

इन्दु॑: पुना॒नो अति॑ गाहते॒ मृधो॒ विश्वा॑नि कृ॒ण्वन्त्सु॒पथा॑नि॒ यज्य॑वे ।

गाः कृ॑ण्वा॒नो नि॒र्णिजं॑ हर्य॒तः क॒विरत्यो॒ न क्रीळ॒न्परि॒ वार॑मर्षति ॥9.86.26॥

indu̍: punā̱no ati̍ gāhate̱ mṛdho̱ viśvā̍ni kṛ̱ṇvantsu̱pathā̍ni̱ yajya̍ve |

gāḥ kṛ̍ṇvā̱no ni̱rṇija̍ṃ harya̱taḥ ka̱viratyo̱ na krīl̤a̱npari̱ vāra̍marṣati

अ॒स॒श्चत॑: श॒तधा॑रा अभि॒श्रियो॒ हरिं॑ नव॒न्तेऽव॒ ता उ॑द॒न्युव॑: ।

क्षिपो॑ मृजन्ति॒ परि॒ गोभि॒रावृ॑तं तृ॒तीये॑ पृ॒ष्ठे अधि॑ रोच॒ने दि॒वः ॥9.86.27॥

a̱sa̱ścata̍: śa̱tadhā̍rā abhi̱śriyo̱ hari̍ṃ nava̱nte'va̱ tā u̍da̱nyuva̍: |

kṣipo̍ mṛjanti̱ pari̱ gobhi̱rāvṛ̍taṃ tṛ̱tīye̍ pṛ̱ṣṭhe adhi̍ roca̱ne di̱vaḥ

तवे॒माः प्र॒जा दि॒व्यस्य॒ रेत॑स॒स्त्वं विश्व॑स्य॒ भुव॑नस्य राजसि ।

अथे॒दं विश्वं॑ पवमान ते॒ वशे॒ त्वमि॑न्दो प्रथ॒मो धा॑म॒धा अ॑सि ॥9.86.28॥

tave̱māḥ pra̱jā di̱vyasya̱ reta̍sa̱stvaṃ viśva̍sya̱ bhuva̍nasya rājasi |

athe̱daṃ viśva̍ṃ pavamāna te̱ vaśe̱ tvami̍ndo pratha̱mo dhā̍ma̱dhā a̍si

त्वं स॑मु॒द्रो अ॑सि विश्व॒वित्क॑वे॒ तवे॒माः पञ्च॑ प्र॒दिशो॒ विध॑र्मणि ।

त्वं द्यां च॑ पृथि॒वीं चाति॑ जभ्रिषे॒ तव॒ ज्योतीं॑षि पवमान॒ सूर्य॑: ॥9.86.29॥

tvaṃ sa̍mu̱dro a̍si viśva̱vitka̍ve̱ tave̱māḥ pañca̍ pra̱diśo̱ vidha̍rmaṇi |

tvaṃ dyāṃ ca̍ pṛthi̱vīṃ cāti̍ jabhriṣe̱ tava̱ jyotī̍ṃṣi pavamāna̱ sūrya̍:

त्वं प॒वित्रे॒ रज॑सो॒ विध॑र्मणि दे॒वेभ्य॑: सोम पवमान पूयसे ।

त्वामु॒शिज॑: प्रथ॒मा अ॑गृभ्णत॒ तुभ्ये॒मा विश्वा॒ भुव॑नानि येमिरे ॥9.86.30॥

tvaṃ pa̱vitre̱ raja̍so̱ vidha̍rmaṇi de̱vebhya̍: soma pavamāna pūyase |

tvāmu̱śija̍: pratha̱mā a̍gṛbhṇata̱ tubhye̱mā viśvā̱ bhuva̍nāni yemire

प्र रे॒भ ए॒त्यति॒ वार॑म॒व्ययं॒ वृषा॒ वने॒ष्वव॑ चक्रद॒द्धरि॑: ।

सं धी॒तयो॑ वावशा॒ना अ॑नूषत॒ शिशुं॑ रिहन्ति म॒तय॒: पनि॑प्नतम् ॥9.86.31॥

pra re̱bha e̱tyati̱ vāra̍ma̱vyaya̱ṃ vṛṣā̱ vane̱ṣvava̍ cakrada̱ddhari̍: |

saṃ dhī̱tayo̍ vāvaśā̱nā a̍nūṣata̱ śiśu̍ṃ rihanti ma̱taya̱: pani̍pnatam

स सूर्य॑स्य र॒श्मिभि॒: परि॑ व्यत॒ तन्तुं॑ तन्वा॒नस्त्रि॒वृतं॒ यथा॑ वि॒दे ।

नय॑न्नृ॒तस्य॑ प्र॒शिषो॒ नवी॑यसी॒: पति॒र्जनी॑ना॒मुप॑ याति निष्कृ॒तम् ॥9.86.32॥

sa sūrya̍sya ra̱śmibhi̱: pari̍ vyata̱ tantu̍ṃ tanvā̱nastri̱vṛta̱ṃ yathā̍ vi̱de |

naya̍nnṛ̱tasya̍ pra̱śiṣo̱ navī̍yasī̱: pati̱rjanī̍nā̱mupa̍ yāti niṣkṛ̱tam

राजा॒ सिन्धू॑नां पवते॒ पति॑र्दि॒व ऋ॒तस्य॑ याति प॒थिभि॒: कनि॑क्रदत् ।

स॒हस्र॑धार॒: परि॑ षिच्यते॒ हरि॑: पुना॒नो वाचं॑ ज॒नय॒न्नुपा॑वसुः ॥9.86.33॥

rājā̱ sindhū̍nāṃ pavate̱ pati̍rdi̱va ṛ̱tasya̍ yāti pa̱thibhi̱: kani̍kradat |

sa̱hasra̍dhāra̱: pari̍ ṣicyate̱ hari̍: punā̱no vāca̍ṃ ja̱naya̱nnupā̍vasuḥ

पव॑मान॒ मह्यर्णो॒ वि धा॑वसि॒ सूरो॒ न चि॒त्रो अव्य॑यानि॒ पव्य॑या ।

गभ॑स्तिपूतो॒ नृभि॒रद्रि॑भिः सु॒तो म॒हे वाजा॑य॒ धन्या॑य धन्वसि ॥9.86.34॥

pava̍māna̱ mahyarṇo̱ vi dhā̍vasi̱ sūro̱ na ci̱tro avya̍yāni̱ pavya̍yā |

gabha̍stipūto̱ nṛbhi̱radri̍bhiḥ su̱to ma̱he vājā̍ya̱ dhanyā̍ya dhanvasi

इष॒मूर्जं॑ पवमाना॒भ्य॑र्षसि श्ये॒नो न वंसु॑ क॒लशे॑षु सीदसि ।

इन्द्रा॑य॒ मद्वा॒ मद्यो॒ मद॑: सु॒तो दि॒वो वि॑ष्ट॒म्भ उ॑प॒मो वि॑चक्ष॒णः ॥9.86.35॥

iṣa̱mūrja̍ṃ pavamānā̱bhya̍rṣasi śye̱no na vaṃsu̍ ka̱laśe̍ṣu sīdasi |

indrā̍ya̱ madvā̱ madyo̱ mada̍: su̱to di̱vo vi̍ṣṭa̱mbha u̍pa̱mo vi̍cakṣa̱ṇaḥ

स॒प्त स्वसा॑रो अ॒भि मा॒तर॒: शिशुं॒ नवं॑ जज्ञा॒नं जेन्यं॑ विप॒श्चित॑म् ।

अ॒पां ग॑न्ध॒र्वं दि॒व्यं नृ॒चक्ष॑सं॒ सोमं॒ विश्व॑स्य॒ भुव॑नस्य रा॒जसे॑ ॥9.86.36॥

sa̱pta svasā̍ro a̱bhi mā̱tara̱: śiśu̱ṃ nava̍ṃ jajñā̱naṃ jenya̍ṃ vipa̱ścita̍m |

a̱pāṃ ga̍ndha̱rvaṃ di̱vyaṃ nṛ̱cakṣa̍sa̱ṃ soma̱ṃ viśva̍sya̱ bhuva̍nasya rā̱jase̍

ई॒शा॒न इ॒मा भुव॑नानि॒ वीय॑से युजा॒न इ॑न्दो ह॒रित॑: सुप॒र्ण्य॑: ।

तास्ते॑ क्षरन्तु॒ मधु॑मद्घृ॒तं पय॒स्तव॑ व्र॒ते सो॑म तिष्ठन्तु कृ॒ष्टय॑: ॥9.86.37॥

ī̱śā̱na i̱mā bhuva̍nāni̱ vīya̍se yujā̱na i̍ndo ha̱rita̍: supa̱rṇya̍: |

tāste̍ kṣarantu̱ madhu̍madghṛ̱taṃ paya̱stava̍ vra̱te so̍ma tiṣṭhantu kṛ̱ṣṭaya̍:

त्वं नृ॒चक्षा॑ असि सोम वि॒श्वत॒: पव॑मान वृषभ॒ ता वि धा॑वसि ।

स न॑: पवस्व॒ वसु॑म॒द्धिर॑ण्यवद्व॒यं स्या॑म॒ भुव॑नेषु जी॒वसे॑ ॥9.86.38॥

tvaṃ nṛ̱cakṣā̍ asi soma vi̱śvata̱: pava̍māna vṛṣabha̱ tā vi dhā̍vasi |

sa na̍: pavasva̱ vasu̍ma̱ddhira̍ṇyavadva̱yaṃ syā̍ma̱ bhuva̍neṣu jī̱vase̍

गो॒वित्प॑वस्व वसु॒विद्धि॑रण्य॒विद्रे॑तो॒धा इ॑न्दो॒ भुव॑ने॒ष्वर्पि॑तः ।

त्वं सु॒वीरो॑ असि सोम विश्व॒वित्तं त्वा॒ विप्रा॒ उप॑ गि॒रेम आ॑सते ॥9.86.39॥

go̱vitpa̍vasva vasu̱viddhi̍raṇya̱vidre̍to̱dhā i̍ndo̱ bhuva̍ne̱ṣvarpi̍taḥ |

tvaṃ su̱vīro̍ asi soma viśva̱vittaṃ tvā̱ viprā̱ upa̍ gi̱rema ā̍sate

उन्मध्व॑ ऊ॒र्मिर्व॒नना॑ अतिष्ठिपद॒पो वसा॑नो महि॒षो वि गा॑हते ।

राजा॑ प॒वित्र॑रथो॒ वाज॒मारु॑हत्स॒हस्र॑भृष्टिर्जयति॒ श्रवो॑ बृ॒हत् ॥9.86.40॥

unmadhva̍ ū̱rmirva̱nanā̍ atiṣṭhipada̱po vasā̍no mahi̱ṣo vi gā̍hate |

rājā̍ pa̱vitra̍ratho̱ vāja̱māru̍hatsa̱hasra̍bhṛṣṭirjayati̱ śravo̍ bṛ̱hat

स भ॒न्दना॒ उदि॑यर्ति प्र॒जाव॑तीर्वि॒श्वायु॒र्विश्वा॑: सु॒भरा॒ अह॑र्दिवि ।

ब्रह्म॑ प्र॒जाव॑द्र॒यिमश्व॑पस्त्यं पी॒त इ॑न्द॒विन्द्र॑म॒स्मभ्यं॑ याचतात् ॥9.86.41॥

sa bha̱ndanā̱ udi̍yarti pra̱jāva̍tīrvi̱śvāyu̱rviśvā̍: su̱bharā̱ aha̍rdivi |

brahma̍ pra̱jāva̍dra̱yimaśva̍pastyaṃ pī̱ta i̍nda̱vindra̍ma̱smabhya̍ṃ yācatāt

सो अग्रे॒ अह्नां॒ हरि॑र्हर्य॒तो मद॒: प्र चेत॑सा चेतयत॒त अनु॒ द्युभि॑: ।

द्वा जना॑ या॒तय॑न्न॒न्तरी॑यते॒ नरा॑ च॒ शंसं॒ दैव्यं॑ च ध॒र्तरि॑ ॥9.86.42॥

so agre̱ ahnā̱ṃ hari̍rharya̱to mada̱: pra ceta̍sā cetayata̱ta anu̱ dyubhi̍: |

dvā janā̍ yā̱taya̍nna̱ntarī̍yate̱ narā̍ ca̱ śaṃsa̱ṃ daivya̍ṃ ca dha̱rtari̍

अ॒ञ्जते॒ व्य॑ञ्जते॒ सम॑ञ्जते॒ क्रतुं॑ रिहन्ति॒ मधु॑ना॒भ्य॑ञ्जते ।

सिन्धो॑रुच्छ्वा॒से प॒तय॑न्तमु॒क्षणं॑ हिरण्यपा॒वाः प॒शुमा॑सु गृभ्णते ॥9.86.43॥

a̱ñjate̱ vya̍ñjate̱ sama̍ñjate̱ kratu̍ṃ rihanti̱ madhu̍nā̱bhya̍ñjate |

sindho̍rucchvā̱se pa̱taya̍ntamu̱kṣaṇa̍ṃ hiraṇyapā̱vāḥ pa̱śumā̍su gṛbhṇate

वि॒प॒श्चिते॒ पव॑मानाय गायत म॒ही न धारात्यन्धो॑ अर्षति ।

अहि॒र्न जू॒र्णामति॑ सर्पति॒ त्वच॒मत्यो॒ न क्रीळ॑न्नसर॒द्वृषा॒ हरि॑: ॥9.86.44॥

vi̱pa̱ścite̱ pava̍mānāya gāyata ma̱hī na dhārātyandho̍ arṣati |

ahi̱rna jū̱rṇāmati̍ sarpati̱ tvaca̱matyo̱ na krīl̤a̍nnasara̱dvṛṣā̱ hari̍:

अ॒ग्रे॒गो राजाप्य॑स्तविष्यते वि॒मानो॒ अह्नां॒ भुव॑ने॒ष्वर्पि॑तः ।

हरि॑र्घृ॒तस्नु॑: सु॒दृशी॑को अर्ण॒वो ज्यो॒तीर॑थः पवते रा॒य ओ॒क्य॑: ॥9.86.45॥

a̱gre̱go rājāpya̍staviṣyate vi̱māno̱ ahnā̱ṃ bhuva̍ne̱ṣvarpi̍taḥ |

hari̍rghṛ̱tasnu̍: su̱dṛśī̍ko arṇa̱vo jyo̱tīra̍thaḥ pavate rā̱ya o̱kya̍:

अस॑र्जि स्क॒म्भो दि॒व उद्य॑तो॒ मद॒: परि॑ त्रि॒धातु॒र्भुव॑नान्यर्षति ।

अं॒शुं रि॑हन्ति म॒तय॒: पनि॑प्नतं गि॒रा यदि॑ नि॒र्णिज॑मृ॒ग्मिणो॑ य॒युः ॥9.86.46॥

asa̍rji ska̱mbho di̱va udya̍to̱ mada̱: pari̍ tri̱dhātu̱rbhuva̍nānyarṣati |

a̱ṃśuṃ ri̍hanti ma̱taya̱: pani̍pnataṃ gi̱rā yadi̍ ni̱rṇija̍mṛ̱gmiṇo̍ ya̱yuḥ

प्र ते॒ धारा॒ अत्यण्वा॑नि मे॒ष्य॑: पुना॒नस्य॑ सं॒यतो॑ यन्ति॒ रंह॑यः ।

यद्गोभि॑रिन्दो च॒म्वो॑: सम॒ज्यस॒ आ सु॑वा॒नः सो॑म क॒लशे॑षु सीदसि ॥9.86.47॥

pra te̱ dhārā̱ atyaṇvā̍ni me̱ṣya̍: punā̱nasya̍ sa̱ṃyato̍ yanti̱ raṃha̍yaḥ |

yadgobhi̍rindo ca̱mvo̍: sama̱jyasa̱ ā su̍vā̱naḥ so̍ma ka̱laśe̍ṣu sīdasi

पव॑स्व सोम क्रतु॒विन्न॑ उ॒क्थ्योऽव्यो॒ वारे॒ परि॑ धाव॒ मधु॑ प्रि॒यम् ।

ज॒हि विश्वा॑न्र॒क्षस॑ इन्दो अ॒त्रिणो॑ बृ॒हद्व॑देम वि॒दथे॑ सु॒वीरा॑: ॥9.86.48॥

pava̍sva soma kratu̱vinna̍ u̱kthyo'vyo̱ vāre̱ pari̍ dhāva̱ madhu̍ pri̱yam |

ja̱hi viśvā̍nra̱kṣasa̍ indo a̱triṇo̍ bṛ̱hadva̍dema vi̱dathe̍ su̱vīrā̍:

९ उशना काव्य: । पवमान: सोम: । त्रिष्टुप् ।

प्र तु द्र॑व॒ परि॒ कोशं॒ नि षी॑द॒ नृभि॑: पुना॒नो अ॒भि वाज॑मर्ष ।

अश्वं॒ न त्वा॑ वा॒जिनं॑ म॒र्जय॒न्तोऽच्छा॑ ब॒र्ही र॑श॒नाभि॑र्नयन्ति ॥9.87.1॥

pra tu dra̍va̱ pari̱ kośa̱ṃ ni ṣī̍da̱ nṛbhi̍: punā̱no a̱bhi vāja̍marṣa |

aśva̱ṃ na tvā̍ vā̱jina̍ṃ ma̱rjaya̱nto'cchā̍ ba̱rhī ra̍śa̱nābhi̍rnayanti

स्वा॒यु॒धः प॑वते दे॒व इन्दु॑रशस्ति॒हा वृ॒जनं॒ रक्ष॑माणः ।

पि॒ता दे॒वानां॑ जनि॒ता सु॒दक्षो॑ विष्ट॒म्भो दि॒वो ध॒रुण॑: पृथि॒व्याः ॥9.87.2॥

svā̱yu̱dhaḥ pa̍vate de̱va indu̍raśasti̱hā vṛ̱jana̱ṃ rakṣa̍māṇaḥ |

pi̱tā de̱vānā̍ṃ jani̱tā su̱dakṣo̍ viṣṭa̱mbho di̱vo dha̱ruṇa̍: pṛthi̱vyāḥ

ऋषि॒र्विप्र॑: पुरए॒ता जना॑नामृ॒भुर्धीर॑ उ॒शना॒ काव्ये॑न ।

स चि॑द्विवेद॒ निहि॑तं॒ यदा॑सामपी॒च्यं१ गुह्यं॒ नाम॒ गोना॑म् ॥9.87.3॥

ṛṣi̱rvipra̍: purae̱tā janā̍nāmṛ̱bhurdhīra̍ u̱śanā̱ kāvye̍na |

sa ci̍dviveda̱ nihi̍ta̱ṃ yadā̍sāmapī̱cyaṃ1 guhya̱ṃ nāma̱ gonā̍m

ए॒ष स्य ते॒ मधु॑माँ इन्द्र॒ सोमो॒ वृषा॒ वृष्णे॒ परि॑ प॒वित्रे॑ अक्षाः ।

स॒ह॒स्र॒साः श॑त॒सा भू॑रि॒दावा॑ शश्वत्त॒मं ब॒र्हिरा वा॒ज्य॑स्थात् ॥9.87.4॥

e̱ṣa sya te̱ madhu̍mām̐ indra̱ somo̱ vṛṣā̱ vṛṣṇe̱ pari̍ pa̱vitre̍ akṣāḥ |

sa̱ha̱sra̱sāḥ śa̍ta̱sā bhū̍ri̱dāvā̍ śaśvatta̱maṃ ba̱rhirā vā̱jya̍sthāt

ए॒ते सोमा॑ अ॒भि ग॒व्या स॒हस्रा॑ म॒हे वाजा॑या॒मृता॑य॒ श्रवां॑सि ।

प॒वित्रे॑भि॒: पव॑माना असृग्रञ्छ्रव॒स्यवो॒ न पृ॑त॒नाजो॒ अत्या॑: ॥9.87.5॥

e̱te somā̍ a̱bhi ga̱vyā sa̱hasrā̍ ma̱he vājā̍yā̱mṛtā̍ya̱ śravā̍ṃsi |

pa̱vitre̍bhi̱: pava̍mānā asṛgrañchrava̱syavo̱ na pṛ̍ta̱nājo̱ atyā̍:

परि॒ हि ष्मा॑ पुरुहू॒तो जना॑नां॒ विश्वास॑र॒द्भोज॑ना पू॒यमा॑नः ।

अथा भ॑र श्येनभृत॒ प्रयां॑सि र॒यिं तुञ्जा॑नो अ॒भि वाज॑मर्ष ॥9.87.6॥

pari̱ hi ṣmā̍ puruhū̱to janā̍nā̱ṃ viśvāsa̍ra̱dbhoja̍nā pū̱yamā̍naḥ |

athā bha̍ra śyenabhṛta̱ prayā̍ṃsi ra̱yiṃ tuñjā̍no a̱bhi vāja̍marṣa

ए॒ष सु॑वा॒नः परि॒ सोम॑: प॒वित्रे॒ सर्गो॒ न सृ॒ष्टो अ॑दधाव॒दर्वा॑ ।

ति॒ग्मे शिशा॑नो महि॒षो न शृङ्गे॒ गा ग॒व्यन्न॒भि शूरो॒ न सत्वा॑ ॥9.87.7॥

e̱ṣa su̍vā̱naḥ pari̱ soma̍: pa̱vitre̱ sargo̱ na sṛ̱ṣṭo a̍dadhāva̱darvā̍ |

ti̱gme śiśā̍no mahi̱ṣo na śṛṅge̱ gā ga̱vyanna̱bhi śūro̱ na satvā̍

ए॒षा य॑यौ पर॒माद॒न्तरद्रे॒: कूचि॑त्स॒तीरू॒र्वे गा वि॑वेद ।

दि॒वो न वि॒द्युत्स्त॒नय॑न्त्य॒भ्रैः सोम॑स्य ते पवत इन्द्र॒ धारा॑ ॥9.87.8॥

e̱ṣā ya̍yau para̱māda̱ntaradre̱: kūci̍tsa̱tīrū̱rve gā vi̍veda |

di̱vo na vi̱dyutsta̱naya̍ntya̱bhraiḥ soma̍sya te pavata indra̱ dhārā̍

उ॒त स्म॑ रा॒शिं परि॑ यासि॒ गोना॒मिन्द्रे॑ण सोम स॒रथं॑ पुना॒नः ।

पू॒र्वीरिषो॑ बृह॒तीर्जी॑रदानो॒ शिक्षा॑ शचीव॒स्तव॒ ता उ॑प॒ष्टुत् ॥9.87.9॥

u̱ta sma̍ rā̱śiṃ pari̍ yāsi̱ gonā̱mindre̍ṇa soma sa̱ratha̍ṃ punā̱naḥ |

pū̱rvīriṣo̍ bṛha̱tīrjī̍radāno̱ śikṣā̍ śacīva̱stava̱ tā u̍pa̱ṣṭut

८ उशना काव्य: । पवमान: सोम: । त्रिष्टुप् ।

अ॒यं सोम॑ इन्द्र॒ तुभ्यं॑ सुन्वे॒ तुभ्यं॑ पवते॒ त्वम॑स्य पाहि ।

त्वं ह॒ यं च॑कृ॒षे त्वं व॑वृ॒ष इन्दुं॒ मदा॑य॒ युज्या॑य॒ सोम॑म् ॥9.88.1॥

a̱yaṃ soma̍ indra̱ tubhya̍ṃ sunve̱ tubhya̍ṃ pavate̱ tvama̍sya pāhi |

tvaṃ ha̱ yaṃ ca̍kṛ̱ṣe tvaṃ va̍vṛ̱ṣa indu̱ṃ madā̍ya̱ yujyā̍ya̱ soma̍m

स ईं॒ रथो॒ न भु॑रि॒षाळ॑योजि म॒हः पु॒रूणि॑ सा॒तये॒ वसू॑नि ।

आदीं॒ विश्वा॑ नहु॒ष्या॑णि जा॒ता स्व॑र्षाता॒ वन॑ ऊ॒र्ध्वा न॑वन्त ॥9.88.2॥

sa ī̱ṃ ratho̱ na bhu̍ri̱ṣāl̤a̍yoji ma̱haḥ pu̱rūṇi̍ sā̱taye̱ vasū̍ni |

ādī̱ṃ viśvā̍ nahu̱ṣyā̍ṇi jā̱tā sva̍rṣātā̱ vana̍ ū̱rdhvā na̍vanta

वा॒युर्न यो नि॒युत्वाँ॑ इ॒ष्टया॑मा॒ नास॑त्येव॒ हव॒ आ शम्भ॑विष्ठः ।

वि॒श्ववा॑रो द्रविणो॒दा इ॑व॒ त्मन्पू॒षेव॑ धी॒जव॑नोऽसि सोम ॥9.88.3॥

vā̱yurna yo ni̱yutvā̍m̐ i̱ṣṭayā̍mā̱ nāsa̍tyeva̱ hava̱ ā śambha̍viṣṭhaḥ |

vi̱śvavā̍ro draviṇo̱dā i̍va̱ tmanpū̱ṣeva̍ dhī̱java̍no'si soma

इन्द्रो॒ न यो म॒हा कर्मा॑णि॒ चक्रि॑र्ह॒न्ता वृ॒त्राणा॑मसि सोम पू॒र्भित् ।

पै॒द्वो न हि त्वमहि॑नाम्नां ह॒न्ता विश्व॑स्यासि सोम॒ दस्यो॑: ॥9.88.4॥

indro̱ na yo ma̱hā karmā̍ṇi̱ cakri̍rha̱ntā vṛ̱trāṇā̍masi soma pū̱rbhit |

pai̱dvo na hi tvamahi̍nāmnāṃ ha̱ntā viśva̍syāsi soma̱ dasyo̍:

अ॒ग्निर्न यो वन॒ आ सृ॒ज्यमा॑नो॒ वृथा॒ पाजां॑सि कृणुते न॒दीषु॑ ।

जनो॒ न युध्वा॑ मह॒त उ॑प॒ब्दिरिय॑र्ति॒ सोम॒: पव॑मान ऊ॒र्मिम् ॥9.88.5॥

a̱gnirna yo vana̱ ā sṛ̱jyamā̍no̱ vṛthā̱ pājā̍ṃsi kṛṇute na̱dīṣu̍ |

jano̱ na yudhvā̍ maha̱ta u̍pa̱bdiriya̍rti̱ soma̱: pava̍māna ū̱rmim

ए॒ते सोमा॒ अति॒ वारा॒ण्यव्या॑ दि॒व्या न कोशा॑सो अ॒भ्रव॑र्षाः ।

वृथा॑ समु॒द्रं सिन्ध॑वो॒ न नीची॑: सु॒तासो॑ अ॒भि क॒लशाँ॑ असृग्रन् ॥9.88.6॥

e̱te somā̱ ati̱ vārā̱ṇyavyā̍ di̱vyā na kośā̍so a̱bhrava̍rṣāḥ |

vṛthā̍ samu̱draṃ sindha̍vo̱ na nīcī̍: su̱tāso̍ a̱bhi ka̱laśā̍m̐ asṛgran

शु॒ष्मी शर्धो॒ न मारु॑तं पव॒स्वान॑भिशस्ता दि॒व्या यथा॒ विट् ।

आपो॒ न म॒क्षू सु॑म॒तिर्भ॑वा नः स॒हस्रा॑प्साः पृतना॒षाण्न य॒ज्ञः ॥9.88.7॥

śu̱ṣmī śardho̱ na māru̍taṃ pava̱svāna̍bhiśastā di̱vyā yathā̱ viṭ |

āpo̱ na ma̱kṣū su̍ma̱tirbha̍vā naḥ sa̱hasrā̍psāḥ pṛtanā̱ṣāṇna ya̱jñaḥ

राज्ञो॒ नु ते॒ वरु॑णस्य व्र॒तानि॑ बृ॒हद्ग॑भी॒रं तव॑ सोम॒ धाम॑ ।

शुचि॒ष्ट्वम॑सि प्रि॒यो न मि॒त्रो द॒क्षाय्यो॑ अर्य॒मेवा॑सि सोम ॥9.88.8॥

rājño̱ nu te̱ varu̍ṇasya vra̱tāni̍ bṛ̱hadga̍bhī̱raṃ tava̍ soma̱ dhāma̍ |

śuci̱ṣṭvama̍si pri̱yo na mi̱tro da̱kṣāyyo̍ arya̱mevā̍si soma

७ उशना काव्य: । पवमान: सोम: । त्रिष्टुप् ।

प्रो स्य वह्नि॑: प॒थ्या॑भिरस्यान्दि॒वो न वृ॒ष्टिः पव॑मानो अक्षाः ।

स॒हस्र॑धारो असद॒न्न्य१स्मे मा॒तुरु॒पस्थे॒ वन॒ आ च॒ सोम॑: ॥9.89.1॥

pro sya vahni̍: pa̱thyā̍bhirasyāndi̱vo na vṛ̱ṣṭiḥ pava̍māno akṣāḥ |

sa̱hasra̍dhāro asada̱nnya1sme mā̱turu̱pasthe̱ vana̱ ā ca̱ soma̍:

राजा॒ सिन्धू॑नामवसिष्ट॒ वास॑ ऋ॒तस्य॒ नाव॒मारु॑ह॒द्रजि॑ष्ठाम् ।

अ॒प्सु द्र॒प्सो वा॑वृधे श्ये॒नजू॑तो दु॒ह ईं॑ पि॒ता दु॒ह ईं॑ पि॒तुर्जाम् ॥9.89.2॥

rājā̱ sindhū̍nāmavasiṣṭa̱ vāsa̍ ṛ̱tasya̱ nāva̱māru̍ha̱draji̍ṣṭhām |

a̱psu dra̱pso vā̍vṛdhe śye̱najū̍to du̱ha ī̍ṃ pi̱tā du̱ha ī̍ṃ pi̱turjām

सिं॒हं न॑सन्त॒ मध्वो॑ अ॒यासं॒ हरि॑मरु॒षं दि॒वो अ॒स्य पति॑म् ।

शूरो॑ यु॒त्सु प्र॑थ॒मः पृ॑च्छते॒ गा अस्य॒ चक्ष॑सा॒ परि॑ पात्यु॒क्षा ॥9.89.3॥

si̱ṃhaṃ na̍santa̱ madhvo̍ a̱yāsa̱ṃ hari̍maru̱ṣaṃ di̱vo a̱sya pati̍m |

śūro̍ yu̱tsu pra̍tha̱maḥ pṛ̍cchate̱ gā asya̱ cakṣa̍sā̱ pari̍ pātyu̱kṣā

मधु॑पृष्ठं घो॒रम॒यास॒मश्वं॒ रथे॑ युञ्जन्त्युरुच॒क्र ऋ॒ष्वम् ।

स्वसा॑र ईं जा॒मयो॑ मर्जयन्ति॒ सना॑भयो वा॒जिन॑मूर्जयन्ति ॥9.89.4॥

madhu̍pṛṣṭhaṃ gho̱rama̱yāsa̱maśva̱ṃ rathe̍ yuñjantyuruca̱kra ṛ̱ṣvam |

svasā̍ra īṃ jā̱mayo̍ marjayanti̱ sanā̍bhayo vā̱jina̍mūrjayanti

चत॑स्र ईं घृत॒दुह॑: सचन्ते समा॒ने अ॒न्तर्ध॒रुणे॒ निष॑त्ताः ।

ता ई॑मर्षन्ति॒ नम॑सा पुना॒नास्ता ईं॑ वि॒श्वत॒: परि॑ षन्ति पू॒र्वीः ॥9.89.5॥

cata̍sra īṃ ghṛta̱duha̍: sacante samā̱ne a̱ntardha̱ruṇe̱ niṣa̍ttāḥ |

tā ī̍marṣanti̱ nama̍sā punā̱nāstā ī̍ṃ vi̱śvata̱: pari̍ ṣanti pū̱rvīḥ

वि॒ष्ट॒म्भो दि॒वो ध॒रुण॑: पृथि॒व्या विश्वा॑ उ॒त क्षि॒तयो॒ हस्ते॑ अस्य ।

अस॑त्त॒ उत्सो॑ गृण॒ते नि॒युत्वा॒न्मध्वो॑ अं॒शुः प॑वत इन्द्रि॒याय॑ ॥9.89.6॥

vi̱ṣṭa̱mbho di̱vo dha̱ruṇa̍: pṛthi̱vyā viśvā̍ u̱ta kṣi̱tayo̱ haste̍ asya |

asa̍tta̱ utso̍ gṛṇa̱te ni̱yutvā̱nmadhvo̍ a̱ṃśuḥ pa̍vata indri̱yāya̍

व॒न्वन्नवा॑तो अ॒भि दे॒ववी॑ति॒मिन्द्रा॑य सोम वृत्र॒हा प॑वस्व ।

श॒ग्धि म॒हः पु॑रुश्च॒न्द्रस्य॑ रा॒यः सु॒वीर्य॑स्य॒ पत॑यः स्याम ॥9.89.7॥

va̱nvannavā̍to a̱bhi de̱vavī̍ti̱mindrā̍ya soma vṛtra̱hā pa̍vasva |

śa̱gdhi ma̱haḥ pu̍ruśca̱ndrasya̍ rā̱yaḥ su̱vīrya̍sya̱ pata̍yaḥ syāma

६ वसिष्ठो मैत्रावरुणि: । पवमान: सोम: । त्रिष्टुप् ।

प्र हि॑न्वा॒नो ज॑नि॒ता रोद॑स्यो॒ रथो॒ न वाजं॑ सनि॒ष्यन्न॑यासीत् ।

इन्द्रं॒ गच्छ॒न्नायु॑धा सं॒शिशा॑नो॒ विश्वा॒ वसु॒ हस्त॑योरा॒दधा॑नः ॥9.90.1॥

pra hi̍nvā̱no ja̍ni̱tā roda̍syo̱ ratho̱ na vāja̍ṃ sani̱ṣyanna̍yāsīt |

indra̱ṃ gaccha̱nnāyu̍dhā sa̱ṃśiśā̍no̱ viśvā̱ vasu̱ hasta̍yorā̱dadhā̍naḥ

अ॒भि त्रि॑पृ॒ष्ठं वृष॑णं वयो॒धामा॑ङ्गू॒षाणा॑मवावशन्त॒ वाणी॑: ।

वना॒ वसा॑नो॒ वरु॑णो॒ न सिन्धू॒न्वि र॑त्न॒धा द॑यते॒ वार्या॑णि ॥9.90.2॥

a̱bhi tri̍pṛ̱ṣṭhaṃ vṛṣa̍ṇaṃ vayo̱dhāmā̍ṅgū̱ṣāṇā̍mavāvaśanta̱ vāṇī̍: |

vanā̱ vasā̍no̱ varu̍ṇo̱ na sindhū̱nvi ra̍tna̱dhā da̍yate̱ vāryā̍ṇi

शूर॑ग्राम॒: सर्व॑वीर॒: सहा॑वा॒ञ्जेता॑ पवस्व॒ सनि॑ता॒ धना॑नि ।

ति॒ग्मायु॑धः क्षि॒प्रध॑न्वा स॒मत्स्वषा॑ळ्हः सा॒ह्वान्पृत॑नासु॒ शत्रू॑न् ॥9.90.3॥

śūra̍grāma̱: sarva̍vīra̱: sahā̍vā̱ñjetā̍ pavasva̱ sani̍tā̱ dhanā̍ni |

ti̱gmāyu̍dhaḥ kṣi̱pradha̍nvā sa̱matsvaṣā̍l̤haḥ sā̱hvānpṛta̍nāsu̱ śatrū̍n

उ॒रुग॑व्यूति॒रभ॑यानि कृ॒ण्वन्त्स॑मीची॒ने आ प॑वस्वा॒ पुरं॑धी ।

अ॒पः सिषा॑सन्नु॒षस॒: स्व१र्गाः सं चि॑क्रदो म॒हो अ॒स्मभ्यं॒ वाजा॑न् ॥9.90.4॥

u̱ruga̍vyūti̱rabha̍yāni kṛ̱ṇvantsa̍mīcī̱ne ā pa̍vasvā̱ pura̍ṃdhī |

a̱paḥ siṣā̍sannu̱ṣasa̱: sva1rgāḥ saṃ ci̍krado ma̱ho a̱smabhya̱ṃ vājā̍n

मत्सि॑ सोम॒ वरु॑णं॒ मत्सि॑ मि॒त्रं मत्सीन्द्र॑मिन्दो पवमान॒ विष्णु॑म् ।

मत्सि॒ शर्धो॒ मारु॑तं॒ मत्सि॑ दे॒वान्मत्सि॑ म॒हामिन्द्र॑मिन्दो॒ मदा॑य ॥9.90.5॥

matsi̍ soma̱ varu̍ṇa̱ṃ matsi̍ mi̱traṃ matsīndra̍mindo pavamāna̱ viṣṇu̍m |

matsi̱ śardho̱ māru̍ta̱ṃ matsi̍ de̱vānmatsi̍ ma̱hāmindra̍mindo̱ madā̍ya

ए॒वा राजे॑व॒ क्रतु॑माँ॒ अमे॑न॒ विश्वा॒ घनि॑घ्नद्दुरि॒ता प॑वस्व ।

इन्दो॑ सू॒क्ताय॒ वच॑से॒ वयो॑ धा यू॒यं पा॑त स्व॒स्तिभि॒: सदा॑ नः ॥9.90.6॥

e̱vā rāje̍va̱ kratu̍mā̱m̐ ame̍na̱ viśvā̱ ghani̍ghnadduri̱tā pa̍vasva |

indo̍ sū̱ktāya̱ vaca̍se̱ vayo̍ dhā yū̱yaṃ pā̍ta sva̱stibhi̱: sadā̍ naḥ

६ कश्यपो मारीच: । पवमान: सोम: । त्रिष्टुप् ।

अस॑र्जि॒ वक्वा॒ रथ्ये॒ यथा॒जौ धि॒या म॒नोता॑ प्रथ॒मो म॑नी॒षी ।

दश॒ स्वसा॑रो॒ अधि॒ सानो॒ अव्येऽज॑न्ति॒ वह्निं॒ सद॑ना॒न्यच्छ॑ ॥9.91.1॥

asa̍rji̱ vakvā̱ rathye̱ yathā̱jau dhi̱yā ma̱notā̍ pratha̱mo ma̍nī̱ṣī |

daśa̱ svasā̍ro̱ adhi̱ sāno̱ avye'ja̍nti̱ vahni̱ṃ sada̍nā̱nyaccha̍

वी॒ती जन॑स्य दि॒व्यस्य॑ क॒व्यैरधि॑ सुवा॒नो न॑हु॒ष्ये॑भि॒रिन्दु॑: ।

प्र यो नृभि॑र॒मृतो॒ मर्त्ये॑भिर्मर्मृजा॒नोऽवि॑भि॒र्गोभि॑र॒द्भिः ॥9.91.2॥

vī̱tī jana̍sya di̱vyasya̍ ka̱vyairadhi̍ suvā̱no na̍hu̱ṣye̍bhi̱rindu̍: |

pra yo nṛbhi̍ra̱mṛto̱ martye̍bhirmarmṛjā̱no'vi̍bhi̱rgobhi̍ra̱dbhiḥ

वृषा॒ वृष्णे॒ रोरु॑वदं॒शुर॑स्मै॒ पव॑मानो॒ रुश॑दीर्ते॒ पयो॒ गोः ।

स॒हस्र॒मृक्वा॑ प॒थिभि॑र्वचो॒विद॑ध्व॒स्मभि॒: सूरो॒ अण्वं॒ वि या॑ति ॥9.91.3॥

vṛṣā̱ vṛṣṇe̱ roru̍vada̱ṃśura̍smai̱ pava̍māno̱ ruśa̍dīrte̱ payo̱ goḥ |

sa̱hasra̱mṛkvā̍ pa̱thibhi̍rvaco̱vida̍dhva̱smabhi̱: sūro̱ aṇva̱ṃ vi yā̍ti

रु॒जा दृ॒ळ्हा चि॑द्र॒क्षस॒: सदां॑सि पुना॒न इ॑न्द ऊर्णुहि॒ वि वाजा॑न् ।

वृ॒श्चोपरि॑ष्टात्तुज॒ता व॒धेन॒ ये अन्ति॑ दू॒रादु॑पना॒यमे॑षाम् ॥9.91.4॥

ru̱jā dṛ̱l̤hā ci̍dra̱kṣasa̱: sadā̍ṃsi punā̱na i̍nda ūrṇuhi̱ vi vājā̍n |

vṛ̱ścopari̍ṣṭāttuja̱tā va̱dhena̱ ye anti̍ dū̱rādu̍panā̱yame̍ṣām

स प्र॑त्न॒वन्नव्य॑से विश्ववार सू॒क्ताय॑ प॒थः कृ॑णुहि॒ प्राच॑: ।

ये दु॒:षहा॑सो व॒नुषा॑ बृ॒हन्त॒स्ताँस्ते॑ अश्याम पुरुकृत्पुरुक्षो ॥9.91.5॥

sa pra̍tna̱vannavya̍se viśvavāra sū̱ktāya̍ pa̱thaḥ kṛ̍ṇuhi̱ prāca̍: |

ye du̱:ṣahā̍so va̱nuṣā̍ bṛ̱hanta̱stām̐ste̍ aśyāma purukṛtpurukṣo

ए॒वा पु॑ना॒नो अ॒पः स्व१र्गा अ॒स्मभ्यं॑ तो॒का तन॑यानि॒ भूरि॑ ।

शं न॒: क्षेत्र॑मु॒रु ज्योतीं॑षि सोम॒ ज्योङ्न॒: सूर्यं॑ दृ॒शये॑ रिरीहि ॥9.91.6॥

e̱vā pu̍nā̱no a̱paḥ sva1rgā a̱smabhya̍ṃ to̱kā tana̍yāni̱ bhūri̍ |

śaṃ na̱: kṣetra̍mu̱ru jyotī̍ṃṣi soma̱ jyoṅna̱: sūrya̍ṃ dṛ̱śaye̍ rirīhi

६ कश्यपो मारीच: । पवमान: सोम: । त्रिष्टुप् ।

परि॑ सुवा॒नो हरि॑रं॒शुः प॒वित्रे॒ रथो॒ न स॑र्जि स॒नये॑ हिया॒नः ।

आप॒च्छ्लोक॑मिन्द्रि॒यं पू॒यमा॑न॒: प्रति॑ दे॒वाँ अ॑जुषत॒ प्रयो॑भिः ॥9.92.1॥

pari̍ suvā̱no hari̍ra̱ṃśuḥ pa̱vitre̱ ratho̱ na sa̍rji sa̱naye̍ hiyā̱naḥ |

āpa̱cchloka̍mindri̱yaṃ pū̱yamā̍na̱: prati̍ de̱vām̐ a̍juṣata̱ prayo̍bhiḥ

अच्छा॑ नृ॒चक्षा॑ असरत्प॒वित्रे॒ नाम॒ दधा॑नः क॒विर॑स्य॒ योनौ॑ ।

सीद॒न्होते॑व॒ सद॑ने च॒मूषूपे॑मग्म॒न्नृष॑यः स॒प्त विप्रा॑: ॥9.92.2॥

acchā̍ nṛ̱cakṣā̍ asaratpa̱vitre̱ nāma̱ dadhā̍naḥ ka̱vira̍sya̱ yonau̍ |

sīda̱nhote̍va̱ sada̍ne ca̱mūṣūpe̍magma̱nnṛṣa̍yaḥ sa̱pta viprā̍:

प्र सु॑मे॒धा गा॑तु॒विद्वि॒श्वदे॑व॒: सोम॑: पुना॒नः सद॑ एति॒ नित्य॑म् ।

भुव॒द्विश्वे॑षु॒ काव्ये॑षु॒ रन्ताऽनु॒ जना॑न्यतते॒ पञ्च॒ धीर॑: ॥9.92.3॥

pra su̍me̱dhā gā̍tu̱vidvi̱śvade̍va̱: soma̍: punā̱naḥ sada̍ eti̱ nitya̍m |

bhuva̱dviśve̍ṣu̱ kāvye̍ṣu̱ rantā'nu̱ janā̍nyatate̱ pañca̱ dhīra̍:

तव॒ त्ये सो॑म पवमान नि॒ण्ये विश्वे॑ दे॒वास्त्रय॑ एकाद॒शास॑: ।

दश॑ स्व॒धाभि॒रधि॒ सानो॒ अव्ये॑ मृ॒जन्ति॑ त्वा न॒द्य॑: स॒प्त य॒ह्वीः ॥9.92.4॥

tava̱ tye so̍ma pavamāna ni̱ṇye viśve̍ de̱vāstraya̍ ekāda̱śāsa̍: |

daśa̍ sva̱dhābhi̱radhi̱ sāno̱ avye̍ mṛ̱janti̍ tvā na̱dya̍: sa̱pta ya̱hvīḥ

तन्नु स॒त्यं पव॑मानस्यास्तु॒ यत्र॒ विश्वे॑ का॒रव॑: सं॒नस॑न्त ।

ज्योति॒र्यदह्ने॒ अकृ॑णोदु लो॒कं प्राव॒न्मनुं॒ दस्य॑वे कर॒भीक॑म् ॥9.92.5॥

tannu sa̱tyaṃ pava̍mānasyāstu̱ yatra̱ viśve̍ kā̱rava̍: sa̱ṃnasa̍nta |

jyoti̱ryadahne̱ akṛ̍ṇodu lo̱kaṃ prāva̱nmanu̱ṃ dasya̍ve kara̱bhīka̍m

परि॒ सद्मे॑व पशु॒मान्ति॒ होता॒ राजा॒ न स॒त्यः समि॑तीरिया॒नः ।

सोम॑: पुना॒नः क॒लशाँ॑ अयासी॒त्सीद॑न्मृ॒गो न म॑हि॒षो वने॑षु ॥9.92.6॥

pari̱ sadme̍va paśu̱mānti̱ hotā̱ rājā̱ na sa̱tyaḥ sami̍tīriyā̱naḥ |

soma̍: punā̱naḥ ka̱laśā̍m̐ ayāsī̱tsīda̍nmṛ̱go na ma̍hi̱ṣo vane̍ṣu

५ नोधा गौतम: । पवमान: सोम: । त्रिष्टुप् ।

सा॒क॒मुक्षो॑ मर्जयन्त॒ स्वसा॑रो॒ दश॒ धीर॑स्य धी॒तयो॒ धनु॑त्रीः ।

हरि॒: पर्य॑द्रव॒ज्जाः सूर्य॑स्य॒ द्रोणं॑ ननक्षे॒ अत्यो॒ न वा॒जी ॥9.93.1॥

sā̱ka̱mukṣo̍ marjayanta̱ svasā̍ro̱ daśa̱ dhīra̍sya dhī̱tayo̱ dhanu̍trīḥ |

hari̱: parya̍drava̱jjāḥ sūrya̍sya̱ droṇa̍ṃ nanakṣe̱ atyo̱ na vā̱jī

सं मा॒तृभि॒र्न शिशु॑र्वावशा॒नो वृषा॑ दधन्वे पुरु॒वारो॑ अ॒द्भिः ।

मर्यो॒ न योषा॑म॒भि नि॑ष्कृ॒तं यन्त्सं ग॑च्छते क॒लश॑ उ॒स्रिया॑भिः ॥9.93.2॥

saṃ mā̱tṛbhi̱rna śiśu̍rvāvaśā̱no vṛṣā̍ dadhanve puru̱vāro̍ a̱dbhiḥ |

maryo̱ na yoṣā̍ma̱bhi ni̍ṣkṛ̱taṃ yantsaṃ ga̍cchate ka̱laśa̍ u̱sriyā̍bhiḥ

उ॒त प्र पि॑प्य॒ ऊध॒रघ्न्या॑या॒ इन्दु॒र्धारा॑भिः सचते सुमे॒धाः ।

मू॒र्धानं॒ गाव॒: पय॑सा च॒मूष्व॒भि श्री॑णन्ति॒ वसु॑भि॒र्न नि॒क्तैः ॥9.93.3॥

u̱ta pra pi̍pya̱ ūdha̱raghnyā̍yā̱ indu̱rdhārā̍bhiḥ sacate sume̱dhāḥ |

mū̱rdhāna̱ṃ gāva̱: paya̍sā ca̱mūṣva̱bhi śrī̍ṇanti̱ vasu̍bhi̱rna ni̱ktaiḥ

स नो॑ दे॒वेभि॑: पवमान र॒देन्दो॑ र॒यिम॒श्विनं॑ वावशा॒नः ।

र॒थि॒रा॒यता॑मुश॒ती पुरं॑धिरस्म॒द्र्य१गा दा॒वने॒ वसू॑नाम् ॥9.93.4॥

sa no̍ de̱vebhi̍: pavamāna ra̱dendo̍ ra̱yima̱śvina̍ṃ vāvaśā̱naḥ |

ra̱thi̱rā̱yatā̍muśa̱tī pura̍ṃdhirasma̱drya1gā dā̱vane̱ vasū̍nām

नू नो॑ र॒यिमुप॑ मास्व नृ॒वन्तं॑ पुना॒नो वा॒ताप्यं॑ वि॒श्वश्च॑न्द्रम् ।

प्र व॑न्दि॒तुरि॑न्दो ता॒र्यायु॑: प्रा॒तर्म॒क्षू धि॒याव॑सुर्जगम्यात् ॥9.93.5॥

nū no̍ ra̱yimupa̍ māsva nṛ̱vanta̍ṃ punā̱no vā̱tāpya̍ṃ vi̱śvaśca̍ndram |

pra va̍ndi̱turi̍ndo tā̱ryāyu̍: prā̱tarma̱kṣū dhi̱yāva̍surjagamyāt

५ कण्वो घौर: । पवमान: सोम: । त्रिष्टुप् ।

अधि॒ यद॑स्मिन्वा॒जिनी॑व॒ शुभ॒: स्पर्ध॑न्ते॒ धिय॒: सूर्ये॒ न विश॑: ।

अ॒पो वृ॑णा॒नः प॑वते कवी॒यन्व्र॒जं न प॑शु॒वर्ध॑नाय॒ मन्म॑ ॥9.94.1॥

adhi̱ yada̍sminvā̱jinī̍va̱ śubha̱: spardha̍nte̱ dhiya̱: sūrye̱ na viśa̍: |

a̱po vṛ̍ṇā̱naḥ pa̍vate kavī̱yanvra̱jaṃ na pa̍śu̱vardha̍nāya̱ manma̍

द्वि॒ता व्यू॒र्ण्वन्न॒मृत॑स्य॒ धाम॑ स्व॒र्विदे॒ भुव॑नानि प्रथन्त ।

धिय॑: पिन्वा॒नाः स्वस॑रे॒ न गाव॑ ऋता॒यन्ती॑र॒भि वा॑वश्र॒ इन्दु॑म् ॥9.94.2॥

dvi̱tā vyū̱rṇvanna̱mṛta̍sya̱ dhāma̍ sva̱rvide̱ bhuva̍nāni prathanta |

dhiya̍: pinvā̱nāḥ svasa̍re̱ na gāva̍ ṛtā̱yantī̍ra̱bhi vā̍vaśra̱ indu̍m

परि॒ यत्क॒विः काव्या॒ भर॑ते॒ शूरो॒ न रथो॒ भुव॑नानि॒ विश्वा॑ ।

दे॒वेषु॒ यशो॒ मर्ता॑य॒ भूष॒न्दक्षा॑य रा॒यः पु॑रु॒भूषु॒ नव्य॑: ॥9.94.3॥

pari̱ yatka̱viḥ kāvyā̱ bhara̍te̱ śūro̱ na ratho̱ bhuva̍nāni̱ viśvā̍ |

de̱veṣu̱ yaśo̱ martā̍ya̱ bhūṣa̱ndakṣā̍ya rā̱yaḥ pu̍ru̱bhūṣu̱ navya̍:

श्रि॒ये जा॒तः श्रि॒य आ निरि॑याय॒ श्रियं॒ वयो॑ जरि॒तृभ्यो॑ दधाति ।

श्रियं॒ वसा॑ना अमृत॒त्वमा॑य॒न्भव॑न्ति स॒त्या स॑मि॒था मि॒तद्रौ॑ ॥9.94.4॥

śri̱ye jā̱taḥ śri̱ya ā niri̍yāya̱ śriya̱ṃ vayo̍ jari̱tṛbhyo̍ dadhāti |

śriya̱ṃ vasā̍nā amṛta̱tvamā̍ya̱nbhava̍nti sa̱tyā sa̍mi̱thā mi̱tadrau̍

इष॒मूर्ज॑म॒भ्य१र्षाश्वं॒ गामु॒रु ज्योति॑: कृणुहि॒ मत्सि॑ दे॒वान् ।

विश्वा॑नि॒ हि सु॒षहा॒ तानि॒ तुभ्यं॒ पव॑मान॒ बाध॑से सोम॒ शत्रू॑न् ॥9.94.5॥

iṣa̱mūrja̍ma̱bhya1rṣāśva̱ṃ gāmu̱ru jyoti̍: kṛṇuhi̱ matsi̍ de̱vān |

viśvā̍ni̱ hi su̱ṣahā̱ tāni̱ tubhya̱ṃ pava̍māna̱ bādha̍se soma̱ śatrū̍n

५ प्रस्कण्व: काण्व: । पवमान: सोम: । त्रिष्टुप् ।

कनि॑क्रन्ति॒ हरि॒रा सृ॒ज्यमा॑न॒: सीद॒न्वन॑स्य ज॒ठरे॑ पुना॒नः ।

नृभि॑र्य॒तः कृ॑णुते नि॒र्णिजं॒ गा अतो॑ म॒तीर्ज॑नयत स्व॒धाभि॑: ॥9.95.1॥

kani̍kranti̱ hari̱rā sṛ̱jyamā̍na̱: sīda̱nvana̍sya ja̱ṭhare̍ punā̱naḥ |

nṛbhi̍rya̱taḥ kṛ̍ṇute ni̱rṇija̱ṃ gā ato̍ ma̱tīrja̍nayata sva̱dhābhi̍:

हरि॑: सृजा॒नः प॒थ्या॑मृ॒तस्येय॑र्ति॒ वाच॑मरि॒तेव॒ नाव॑म् ।

दे॒वो दे॒वानां॒ गुह्या॑नि॒ नामा॒ऽऽविष्कृ॑णोति ब॒र्हिषि॑ प्र॒वाचे॑ ॥9.95.2॥

hari̍: sṛjā̱naḥ pa̱thyā̍mṛ̱tasyeya̍rti̱ vāca̍mari̱teva̱ nāva̍m |

de̱vo de̱vānā̱ṃ guhyā̍ni̱ nāmā̱''viṣkṛ̍ṇoti ba̱rhiṣi̍ pra̱vāce̍

अ॒पामि॒वेदू॒र्मय॒स्तर्तु॑राणा॒: प्र म॑नी॒षा ई॑रते॒ सोम॒मच्छ॑ ।

न॒म॒स्यन्ती॒रुप॑ च॒ यन्ति॒ सं चा ऽऽच॑ विशन्त्युश॒तीरु॒शन्त॑म् ॥9.95.3॥

a̱pāmi̱vedū̱rmaya̱startu̍rāṇā̱: pra ma̍nī̱ṣā ī̍rate̱ soma̱maccha̍ |

na̱ma̱syantī̱rupa̍ ca̱ yanti̱ saṃ cā ''ca̍ viśantyuśa̱tīru̱śanta̍m

तं म॑र्मृजा॒नं म॑हि॒षं न साना॑वं॒शुं दु॑हन्त्यु॒क्षणं॑ गिरि॒ष्ठाम् ।

तं वा॑वशा॒नं म॒तय॑: सचन्ते त्रि॒तो बि॑भर्ति॒ वरु॑णं समु॒द्रे ॥9.95.4॥

taṃ ma̍rmṛjā̱naṃ ma̍hi̱ṣaṃ na sānā̍va̱ṃśuṃ du̍hantyu̱kṣaṇa̍ṃ giri̱ṣṭhām |

taṃ vā̍vaśā̱naṃ ma̱taya̍: sacante tri̱to bi̍bharti̱ varu̍ṇaṃ samu̱dre

इष्य॒न्वाच॑मुपव॒क्तेव॒ होतु॑: पुना॒न इ॑न्दो॒ वि ष्या॑ मनी॒षाम् ।

इन्द्र॑श्च॒ यत्क्षय॑थ॒: सौभ॑गाय सु॒वीर्य॑स्य॒ पत॑यः स्याम ॥9.95.5॥

iṣya̱nvāca̍mupava̱kteva̱ hotu̍: punā̱na i̍ndo̱ vi ṣyā̍ manī̱ṣām |

indra̍śca̱ yatkṣaya̍tha̱: saubha̍gāya su̱vīrya̍sya̱ pata̍yaḥ syāma

२४ दैवोदासि: प्रतर्दन: । पवमान: सोम: । त्रिष्टुप् ।

प्र से॑ना॒नीः शूरो॒ अग्रे॒ रथा॑नां ग॒व्यन्ने॑ति॒ हर्ष॑ते अस्य॒ सेना॑ ।

भ॒द्रान्कृ॒ण्वन्नि॑न्द्रह॒वान्त्सखि॑भ्य॒ आ सोमो॒ वस्त्रा॑ रभ॒सानि॑ दत्ते ॥9.96.1॥

pra se̍nā̱nīḥ śūro̱ agre̱ rathā̍nāṃ ga̱vyanne̍ti̱ harṣa̍te asya̱ senā̍ |

bha̱drānkṛ̱ṇvanni̍ndraha̱vāntsakhi̍bhya̱ ā somo̱ vastrā̍ rabha̱sāni̍ datte

सम॑स्य॒ हरिं॒ हर॑यो मृजन्त्यश्वह॒यैरनि॑शितं॒ नमो॑भिः ।

आ ति॑ष्ठति॒ रथ॒मिन्द्र॑स्य॒ सखा॑ वि॒द्वाँ ए॑ना सुम॒तिं या॒त्यच्छ॑ ॥9.96.2॥

sama̍sya̱ hari̱ṃ hara̍yo mṛjantyaśvaha̱yairani̍śita̱ṃ namo̍bhiḥ |

ā ti̍ṣṭhati̱ ratha̱mindra̍sya̱ sakhā̍ vi̱dvām̐ e̍nā suma̱tiṃ yā̱tyaccha̍

स नो॑ देव दे॒वता॑ते पवस्व म॒हे सो॑म॒ प्सर॑स इन्द्र॒पान॑: ।

कृ॒ण्वन्न॒पो व॒र्षय॒न्द्यामु॒तेमामु॒रोरा नो॑ वरिवस्या पुना॒नः ॥9.96.3॥

sa no̍ deva de̱vatā̍te pavasva ma̱he so̍ma̱ psara̍sa indra̱pāna̍: |

kṛ̱ṇvanna̱po va̱rṣaya̱ndyāmu̱temāmu̱rorā no̍ varivasyā punā̱naḥ

अजी॑त॒येऽह॑तये पवस्व स्व॒स्तये॑ स॒र्वता॑तये बृह॒ते ।

तदु॑शन्ति॒ विश्व॑ इ॒मे सखा॑य॒स्तद॒हं व॑श्मि पवमान सोम ॥9.96.4॥

ajī̍ta̱ye'ha̍taye pavasva sva̱staye̍ sa̱rvatā̍taye bṛha̱te |

tadu̍śanti̱ viśva̍ i̱me sakhā̍ya̱stada̱haṃ va̍śmi pavamāna soma

सोम॑: पवते जनि॒ता म॑ती॒नां ज॑नि॒ता दि॒वो ज॑नि॒ता पृ॑थि॒व्याः ।

ज॒नि॒ताग्नेर्ज॑नि॒ता सूर्य॑स्य जनि॒तेन्द्र॑स्य जनि॒तोत विष्णो॑: ॥9.96.5॥

soma̍: pavate jani̱tā ma̍tī̱nāṃ ja̍ni̱tā di̱vo ja̍ni̱tā pṛ̍thi̱vyāḥ |

ja̱ni̱tāgnerja̍ni̱tā sūrya̍sya jani̱tendra̍sya jani̱tota viṣṇo̍:

ब्र॒ह्मा दे॒वानां॑ पद॒वीः क॑वी॒नामृषि॒र्विप्रा॑णां महि॒षो मृ॒गाणा॑म् ।

श्ये॒नो गृध्रा॑णां॒ स्वधि॑ति॒र्वना॑नां॒ सोम॑: प॒वित्र॒मत्ये॑ति॒ रेभ॑न् ॥9.96.6॥

bra̱hmā de̱vānā̍ṃ pada̱vīḥ ka̍vī̱nāmṛṣi̱rviprā̍ṇāṃ mahi̱ṣo mṛ̱gāṇā̍m |

śye̱no gṛdhrā̍ṇā̱ṃ svadhi̍ti̱rvanā̍nā̱ṃ soma̍: pa̱vitra̱matye̍ti̱ rebha̍n

प्रावी॑विपद्वा॒च ऊ॒र्मिं न सिन्धु॒र्गिर॒: सोम॒: पव॑मानो मनी॒षाः ।

अ॒न्तः पश्य॑न्वृ॒जने॒माव॑रा॒ण्या ति॑ष्ठति वृष॒भो गोषु॑ जा॒नन् ॥9.96.7॥

prāvī̍vipadvā̱ca ū̱rmiṃ na sindhu̱rgira̱: soma̱: pava̍māno manī̱ṣāḥ |

a̱ntaḥ paśya̍nvṛ̱jane̱māva̍rā̱ṇyā ti̍ṣṭhati vṛṣa̱bho goṣu̍ jā̱nan

स म॑त्स॒रः पृ॒त्सु व॒न्वन्नवा॑तः स॒हस्र॑रेता अ॒भि वाज॑मर्ष ।

इन्द्रा॑येन्दो॒ पव॑मानो मनी॒ष्यं१शोरू॒र्मिमी॑रय॒ गा इ॑ष॒ण्यन् ॥9.96.8॥

sa ma̍tsa̱raḥ pṛ̱tsu va̱nvannavā̍taḥ sa̱hasra̍retā a̱bhi vāja̍marṣa |

indrā̍yendo̱ pava̍māno manī̱ṣyaṃ1śorū̱rmimī̍raya̱ gā i̍ṣa̱ṇyan

परि॑ प्रि॒यः क॒लशे॑ दे॒ववा॑त॒ इन्द्रा॑य॒ सोमो॒ रण्यो॒ मदा॑य ।

स॒हस्र॑धारः श॒तवा॑ज॒ इन्दु॑र्वा॒जी न सप्ति॒: सम॑ना जिगाति ॥9.96.9॥

pari̍ pri̱yaḥ ka̱laśe̍ de̱vavā̍ta̱ indrā̍ya̱ somo̱ raṇyo̱ madā̍ya |

sa̱hasra̍dhāraḥ śa̱tavā̍ja̱ indu̍rvā̱jī na sapti̱: sama̍nā jigāti

स पू॒र्व्यो व॑सु॒विज्जाय॑मानो मृजा॒नो अ॒प्सु दु॑दुहा॒नो अद्रौ॑ ।

अ॒भि॒श॒स्ति॒पा भुव॑नस्य॒ राजा॑ वि॒दद्गा॒तुं ब्रह्म॑णे पू॒यमा॑नः ॥9.96.10॥

sa pū̱rvyo va̍su̱vijjāya̍māno mṛjā̱no a̱psu du̍duhā̱no adrau̍ |

a̱bhi̱śa̱sti̱pā bhuva̍nasya̱ rājā̍ vi̱dadgā̱tuṃ brahma̍ṇe pū̱yamā̍naḥ

त्वया॒ हि न॑: पि॒तर॑: सोम॒ पूर्वे॒ कर्मा॑णि च॒क्रुः प॑वमान॒ धीरा॑: ।

व॒न्वन्नवा॑तः परि॒धीँरपो॑र्णु वी॒रेभि॒रश्वै॑र्म॒घवा॑ भवा नः ॥9.96.11॥

tvayā̱ hi na̍: pi̱tara̍: soma̱ pūrve̱ karmā̍ṇi ca̱kruḥ pa̍vamāna̱ dhīrā̍: |

va̱nvannavā̍taḥ pari̱dhīm̐rapo̍rṇu vī̱rebhi̱raśvai̍rma̱ghavā̍ bhavā naḥ

यथाप॑वथा॒ मन॑वे वयो॒धा अ॑मित्र॒हा व॑रिवो॒विद्ध॒विष्मा॑न् ।

ए॒वा प॑वस्व॒ द्रवि॑णं॒ दधा॑न॒ इन्द्रे॒ सं ति॑ष्ठ ज॒नयायु॑धानि ॥9.96.12॥

yathāpa̍vathā̱ mana̍ve vayo̱dhā a̍mitra̱hā va̍rivo̱viddha̱viṣmā̍n |

e̱vā pa̍vasva̱ dravi̍ṇa̱ṃ dadhā̍na̱ indre̱ saṃ ti̍ṣṭha ja̱nayāyu̍dhāni

पव॑स्व सोम॒ मधु॑माँ ऋ॒तावा॒ऽपो वसा॑नो॒ अधि॒ सानो॒ अव्ये॑ ।

अव॒ द्रोणा॑नि घृ॒तवा॑न्ति सीद म॒दिन्त॑मो मत्स॒र इ॑न्द्र॒पान॑: ॥9.96.13॥

pava̍sva soma̱ madhu̍mām̐ ṛ̱tāvā̱'po vasā̍no̱ adhi̱ sāno̱ avye̍ |

ava̱ droṇā̍ni ghṛ̱tavā̍nti sīda ma̱dinta̍mo matsa̱ra i̍ndra̱pāna̍:

वृ॒ष्टिं दि॒वः श॒तधा॑रः पवस्व सहस्र॒सा वा॑ज॒युर्दे॒ववी॑तौ ।

सं सिन्धु॑भिः क॒लशे॑ वावशा॒नः समु॒स्रिया॑भिः प्रति॒रन्न॒ आयु॑: ॥9.96.14॥

vṛ̱ṣṭiṃ di̱vaḥ śa̱tadhā̍raḥ pavasva sahasra̱sā vā̍ja̱yurde̱vavī̍tau |

saṃ sindhu̍bhiḥ ka̱laśe̍ vāvaśā̱naḥ samu̱sriyā̍bhiḥ prati̱ranna̱ āyu̍:

ए॒ष स्य सोमो॑ म॒तिभि॑: पुना॒नोऽत्यो॒ न वा॒जी तर॒तीदरा॑तीः ।

पयो॒ न दु॒ग्धमदि॑तेरिषि॒रमु॒र्वि॑व गा॒तुः सु॒यमो॒ न वोळ्हा॑ ॥9.96.15॥

e̱ṣa sya somo̍ ma̱tibhi̍: punā̱no'tyo̱ na vā̱jī tara̱tīdarā̍tīḥ |

payo̱ na du̱gdhamadi̍teriṣi̱ramu̱rvi̍va gā̱tuḥ su̱yamo̱ na vol̤hā̍

स्वा॒यु॒धः सो॒तृभि॑: पू॒यमा॑नो॒ऽभ्य॑र्ष॒ गुह्यं॒ चारु॒ नाम॑ ।

अ॒भि वाजं॒ सप्ति॑रिव श्रव॒स्याऽभि वा॒युम॒भि गा दे॑व सोम ॥9.96.16॥

svā̱yu̱dhaḥ so̱tṛbhi̍: pū̱yamā̍no̱'bhya̍rṣa̱ guhya̱ṃ cāru̱ nāma̍ |

a̱bhi vāja̱ṃ sapti̍riva śrava̱syā'bhi vā̱yuma̱bhi gā de̍va soma

शिशुं॑ जज्ञा॒नं ह॑र्य॒तं मृ॑जन्ति शु॒म्भन्ति॒ वह्निं॑ म॒रुतो॑ ग॒णेन॑ ।

क॒विर्गी॒र्भिः काव्ये॑ना क॒विः सन्त्सोम॑: प॒वित्र॒मत्ये॑ति॒ रेभ॑न् ॥9.96.17॥

śiśu̍ṃ jajñā̱naṃ ha̍rya̱taṃ mṛ̍janti śu̱mbhanti̱ vahni̍ṃ ma̱ruto̍ ga̱ṇena̍ |

ka̱virgī̱rbhiḥ kāvye̍nā ka̱viḥ santsoma̍: pa̱vitra̱matye̍ti̱ rebha̍n

ऋषि॑मना॒ य ऋ॑षि॒कृत्स्व॒र्षाः स॒हस्र॑णीथः पद॒वीः क॑वी॒नाम् ।

तृ॒तीयं॒ धाम॑ महि॒षः सिषा॑स॒न्त्सोमो॑ वि॒राज॒मनु॑ राजति॒ ष्टुप् ॥9.96.18॥

ṛṣi̍manā̱ ya ṛ̍ṣi̱kṛtsva̱rṣāḥ sa̱hasra̍ṇīthaḥ pada̱vīḥ ka̍vī̱nām |

tṛ̱tīya̱ṃ dhāma̍ mahi̱ṣaḥ siṣā̍sa̱ntsomo̍ vi̱rāja̱manu̍ rājati̱ ṣṭup

च॒मू॒षच्छ्ये॒नः श॑कु॒नो वि॒भृत्वा॑ गोवि॒न्दुर्द्र॒प्स आयु॑धानि॒ बिभ्र॑त् ।

अ॒पामू॒र्मिं सच॑मानः समु॒द्रं तु॒रीयं॒ धाम॑ महि॒षो वि॑वक्ति ॥9.96.19॥

ca̱mū̱ṣacchye̱naḥ śa̍ku̱no vi̱bhṛtvā̍ govi̱ndurdra̱psa āyu̍dhāni̱ bibhra̍t |

a̱pāmū̱rmiṃ saca̍mānaḥ samu̱draṃ tu̱rīya̱ṃ dhāma̍ mahi̱ṣo vi̍vakti

मर्यो॒ न शु॒भ्रस्त॒न्वं॑ मृजा॒नोऽत्यो॒ न सृत्वा॑ स॒नये॒ धना॑नाम् ।

वृषे॑व यू॒था परि॒ कोश॒मर्ष॒न्कनि॑क्रदच्च॒म्वो॒३रा वि॑वेश ॥9.96.20॥

maryo̱ na śu̱bhrasta̱nva̍ṃ mṛjā̱no'tyo̱ na sṛtvā̍ sa̱naye̱ dhanā̍nām |

vṛṣe̍va yū̱thā pari̱ kośa̱marṣa̱nkani̍kradacca̱mvo̱3rā vi̍veśa

पव॑स्वेन्दो॒ पव॑मानो॒ महो॑भि॒: कनि॑क्रद॒त्परि॒ वारा॑ण्यर्ष ।

क्रीळ॑ञ्च॒म्वो॒३रा वि॑श पू॒यमा॑न॒ इन्द्रं॑ ते॒ रसो॑ मदि॒रो म॑मत्तु ॥9.96.21॥

pava̍svendo̱ pava̍māno̱ maho̍bhi̱: kani̍krada̱tpari̱ vārā̍ṇyarṣa |

krīl̤a̍ñca̱mvo̱3rā vi̍śa pū̱yamā̍na̱ indra̍ṃ te̱ raso̍ madi̱ro ma̍mattu

प्रास्य॒ धारा॑ बृह॒तीर॑सृग्रन्न॒क्तो गोभि॑: क॒लशाँ॒ आ

वि॑वेश । साम॑ कृ॒ण्वन्त्सा॑म॒न्यो॑ विप॒श्चित्क्रन्द॑न्नेत्य॒भि सख्यु॒र्न जा॒मिम् ॥9.96.22॥

prāsya̱ dhārā̍ bṛha̱tīra̍sṛgranna̱kto gobhi̍: ka̱laśā̱m̐ ā

vi̍veśa | sāma̍ kṛ̱ṇvantsā̍ma̱nyo̍ vipa̱ścitkranda̍nnetya̱bhi sakhyu̱rna jā̱mim

अ॒प॒घ्नन्ने॑षि पवमान॒ शत्रू॑न्प्रि॒यां न जा॒रो अ॒भिगी॑त॒ इन्दु॑: ।

सीद॒न्वने॑षु शकु॒नो न पत्वा॒ सोम॑: पुना॒नः क॒लशे॑षु॒ सत्ता॑ ॥9.96.23॥

a̱pa̱ghnanne̍ṣi pavamāna̱ śatrū̍npri̱yāṃ na jā̱ro a̱bhigī̍ta̱ indu̍: |

sīda̱nvane̍ṣu śaku̱no na patvā̱ soma̍: punā̱naḥ ka̱laśe̍ṣu̱ sattā̍

आ ते॒ रुच॒: पव॑मानस्य सोम॒ योषे॑व यन्ति सु॒दुघा॑: सुधा॒राः ।

हरि॒रानी॑तः पुरु॒वारो॑ अ॒प्स्वचि॑क्रदत्क॒लशे॑ देवयू॒नाम् ॥9.96.24॥

ā te̱ ruca̱: pava̍mānasya soma̱ yoṣe̍va yanti su̱dughā̍: sudhā̱rāḥ |

hari̱rānī̍taḥ puru̱vāro̍ a̱psvaci̍kradatka̱laśe̍ devayū̱nām

(५८) १-३ मैत्रावरुणिर्वसिष्ठ:, ४-६ वासिष्ठ इन्द्रप्रमति:,७-९ वासिष्ठो वृषगण:,१० -१२ वासिष्ठो मन्यु :, १३-१५ वासिष्ठ उपमन्यु:, १६-१८ वासिष्ठो व्याघ्रपाद् , १९ -२१ वासिष्ठः शक्ति:, २२-२४ वासिष्ठः कर्णश्रुद् ,२५ -२७ वासिष्ठो मृळीक:, २८-३० वासिष्ठो वसुक्र:, ३१-४४ पराशर: शाक्त्य:, ४५-५८ कुत्स आङ्गिरस: । पवमान: सोम: ।त्रिष्टुप् ।

अ॒स्य प्रे॒षा हे॒मना॑ पू॒यमा॑नो दे॒वो दे॒वेभि॒: सम॑पृक्त॒ रस॑म् ।

सु॒तः प॒वित्रं॒ पर्ये॑ति॒ रेभ॑न्मि॒तेव॒ सद्म॑ पशु॒मान्ति॒ होता॑ ॥9.97.1॥

a̱sya pre̱ṣā he̱manā̍ pū̱yamā̍no de̱vo de̱vebhi̱: sama̍pṛkta̱ rasa̍m |

su̱taḥ pa̱vitra̱ṃ parye̍ti̱ rebha̍nmi̱teva̱ sadma̍ paśu̱mānti̱ hotā̍

भ॒द्रा वस्त्रा॑ सम॒न्या॒३ वसा॑नो म॒हान्क॒विर्नि॒वच॑नानि॒ शंस॑न् ।

आ व॑च्यस्व च॒म्वो॑: पू॒यमा॑नो विचक्ष॒णो जागृ॑विर्दे॒ववी॑तौ ॥9.97.2॥

bha̱drā vastrā̍ sama̱nyā̱3 vasā̍no ma̱hānka̱virni̱vaca̍nāni̱ śaṃsa̍n |

ā va̍cyasva ca̱mvo̍: pū̱yamā̍no vicakṣa̱ṇo jāgṛ̍virde̱vavī̍tau

समु॑ प्रि॒यो मृ॑ज्यते॒ सानो॒ अव्ये॑ य॒शस्त॑रो य॒शसां॒ क्षैतो॑ अ॒स्मे ।

अ॒भि स्व॑र॒ धन्वा॑ पू॒यमा॑नो यू॒यं पा॑त स्व॒स्तिभि॒: सदा॑ नः ॥9.97.3॥

samu̍ pri̱yo mṛ̍jyate̱ sāno̱ avye̍ ya̱śasta̍ro ya̱śasā̱ṃ kṣaito̍ a̱sme |

a̱bhi sva̍ra̱ dhanvā̍ pū̱yamā̍no yū̱yaṃ pā̍ta sva̱stibhi̱: sadā̍ naḥ

प्र गा॑यता॒भ्य॑र्चाम दे॒वान्त्सोमं॑ हिनोत मह॒ते धना॑य ।

स्वा॒दुः प॑वाते॒ अति॒ वार॒मव्य॒मा सी॑दाति क॒लशं॑ देव॒युर्न॑: ॥9.97.4॥

pra gā̍yatā̱bhya̍rcāma de̱vāntsoma̍ṃ hinota maha̱te dhanā̍ya |

svā̱duḥ pa̍vāte̱ ati̱ vāra̱mavya̱mā sī̍dāti ka̱laśa̍ṃ deva̱yurna̍:

इन्दु॑र्दे॒वाना॒मुप॑ स॒ख्यमा॒यन्त्स॒हस्र॑धारः पवते॒ मदा॑य ।

नृभि॒: स्तवा॑नो॒ अनु॒ धाम॒ पूर्व॒मग॒न्निन्द्रं॑ मह॒ते सौभ॑गाय ॥9.97.5॥

indu̍rde̱vānā̱mupa̍ sa̱khyamā̱yantsa̱hasra̍dhāraḥ pavate̱ madā̍ya |

nṛbhi̱: stavā̍no̱ anu̱ dhāma̱ pūrva̱maga̱nnindra̍ṃ maha̱te saubha̍gāya

स्तो॒त्रे रा॒ये हरि॑रर्षा पुना॒न इन्द्रं॒ मदो॑ गच्छतु ते॒ भरा॑य ।

दे॒वैर्या॑हि स॒रथं॒ राधो॒ अच्छा॑ यू॒यं पा॑त स्व॒स्तिभि॒: सदा॑ नः ॥9.97.6॥

sto̱tre rā̱ye hari̍rarṣā punā̱na indra̱ṃ mado̍ gacchatu te̱ bharā̍ya |

de̱vairyā̍hi sa̱ratha̱ṃ rādho̱ acchā̍ yū̱yaṃ pā̍ta sva̱stibhi̱: sadā̍ naḥ

प्र काव्य॑मु॒शने॑व ब्रुवा॒णो दे॒वो दे॒वानां॒ जनि॑मा विवक्ति ।

महि॑व्रत॒: शुचि॑बन्धुः पाव॒कः प॒दा व॑रा॒हो अ॒भ्ये॑ति॒ रेभ॑न् ॥9.97.7॥

pra kāvya̍mu̱śane̍va bruvā̱ṇo de̱vo de̱vānā̱ṃ jani̍mā vivakti |

mahi̍vrata̱: śuci̍bandhuḥ pāva̱kaḥ pa̱dā va̍rā̱ho a̱bhye̍ti̱ rebha̍n

प्र हं॒सास॑स्तृ॒पलं॑ म॒न्युमच्छा॒मादस्तं॒ वृष॑गणा अयासुः ।

आ॒ङ्गू॒ष्यं१ पव॑मानं॒ सखा॑यो दु॒र्मर्षं॑ सा॒कं प्र व॑दन्ति वा॒णम् ॥9.97.8॥

pra ha̱ṃsāsa̍stṛ̱pala̍ṃ ma̱nyumacchā̱mādasta̱ṃ vṛṣa̍gaṇā ayāsuḥ |

ā̱ṅgū̱ṣyaṃ1 pava̍māna̱ṃ sakhā̍yo du̱rmarṣa̍ṃ sā̱kaṃ pra va̍danti vā̱ṇam

स रं॑हत उरुगा॒यस्य॑ जू॒तिं वृथा॒ क्रीळ॑न्तं मिमते॒ न गाव॑: ।

प॒री॒ण॒सं कृ॑णुते ति॒ग्मशृ॑ङ्गो॒ दिवा॒ हरि॒र्ददृ॑शे॒ नक्त॑मृ॒ज्रः ॥9.97.9॥

sa ra̍ṃhata urugā̱yasya̍ jū̱tiṃ vṛthā̱ krīl̤a̍ntaṃ mimate̱ na gāva̍: |

pa̱rī̱ṇa̱saṃ kṛ̍ṇute ti̱gmaśṛ̍ṅgo̱ divā̱ hari̱rdadṛ̍śe̱ nakta̍mṛ̱jraḥ

इन्दु॑र्वा॒जी प॑वते॒ गोन्यो॑घा॒ इन्द्रे॒ सोम॒: सह॒ इन्व॒न्मदा॑य ।

हन्ति॒ रक्षो॒ बाध॑ते॒ पर्यरा॑ती॒र्वरि॑वः कृ॒ण्वन्वृ॒जन॑स्य॒ राजा॑ ॥9.97.10॥

indu̍rvā̱jī pa̍vate̱ gonyo̍ghā̱ indre̱ soma̱: saha̱ inva̱nmadā̍ya |

hanti̱ rakṣo̱ bādha̍te̱ paryarā̍tī̱rvari̍vaḥ kṛ̱ṇvanvṛ̱jana̍sya̱ rājā̍

अध॒ धार॑या॒ मध्वा॑ पृचा॒नस्ति॒रो रोम॑ पवते॒ अद्रि॑दुग्धः ।

इन्दु॒रिन्द्र॑स्य स॒ख्यं जु॑षा॒णो दे॒वो दे॒वस्य॑ मत्स॒रो मदा॑य ॥9.97.11॥

adha̱ dhāra̍yā̱ madhvā̍ pṛcā̱nasti̱ro roma̍ pavate̱ adri̍dugdhaḥ |

indu̱rindra̍sya sa̱khyaṃ ju̍ṣā̱ṇo de̱vo de̱vasya̍ matsa̱ro madā̍ya

अ॒भि प्रि॒याणि॑ पवते पुना॒नो दे॒वो दे॒वान्त्स्वेन॒ रसे॑न पृ॒ञ्चन् ।

इन्दु॒र्धर्मा॑ण्यृतु॒था वसा॑नो॒ दश॒ क्षिपो॑ अव्यत॒ सानो॒ अव्ये॑ ॥9.97.12॥

a̱bhi pri̱yāṇi̍ pavate punā̱no de̱vo de̱vāntsvena̱ rase̍na pṛ̱ñcan |

indu̱rdharmā̍ṇyṛtu̱thā vasā̍no̱ daśa̱ kṣipo̍ avyata̱ sāno̱ avye̍

वृषा॒ शोणो॑ अभि॒कनि॑क्रद॒द्गा न॒दय॑न्नेति पृथि॒वीमु॒त द्याम् ।

इन्द्र॑स्येव व॒ग्नुरा शृ॑ण्व आ॒जौ प्र॑चे॒तय॑न्नर्षति॒ वाच॒मेमाम् ॥9.97.13॥

vṛṣā̱ śoṇo̍ abhi̱kani̍krada̱dgā na̱daya̍nneti pṛthi̱vīmu̱ta dyām |

indra̍syeva va̱gnurā śṛ̍ṇva ā̱jau pra̍ce̱taya̍nnarṣati̱ vāca̱memām

र॒साय्य॒: पय॑सा॒ पिन्व॑मान ई॒रय॑न्नेषि॒ मधु॑मन्तमं॒शुम् ।

पव॑मानः संत॒निमे॑षि कृ॒ण्वन्निन्द्रा॑य सोम परिषि॒च्यमा॑नः ॥9.97.14॥

ra̱sāyya̱: paya̍sā̱ pinva̍māna ī̱raya̍nneṣi̱ madhu̍mantama̱ṃśum |

pava̍mānaḥ saṃta̱nime̍ṣi kṛ̱ṇvannindrā̍ya soma pariṣi̱cyamā̍naḥ

ए॒वा प॑वस्व मदि॒रो मदा॑योदग्रा॒भस्य॑ न॒मय॑न्वध॒स्नैः ।

परि॒ वर्णं॒ भर॑माणो॒ रुश॑न्तं ग॒व्युर्नो॑ अर्ष॒ परि॑ सोम सि॒क्तः ॥9.97.15॥

e̱vā pa̍vasva madi̱ro madā̍yodagrā̱bhasya̍ na̱maya̍nvadha̱snaiḥ |

pari̱ varṇa̱ṃ bhara̍māṇo̱ ruśa̍ntaṃ ga̱vyurno̍ arṣa̱ pari̍ soma si̱ktaḥ

जु॒ष्ट्वी न॑ इन्दो सु॒पथा॑ सु॒गान्यु॒रौ प॑वस्व॒ वरि॑वांसि कृ॒ण्वन् ।

घ॒नेव॒ विष्व॑ग्दुरि॒तानि॑ वि॒घ्नन्नधि॒ ष्णुना॑ धन्व॒ सानो॒ अव्ये॑ ॥9.97.16॥

ju̱ṣṭvī na̍ indo su̱pathā̍ su̱gānyu̱rau pa̍vasva̱ vari̍vāṃsi kṛ̱ṇvan |

gha̱neva̱ viṣva̍gduri̱tāni̍ vi̱ghnannadhi̱ ṣṇunā̍ dhanva̱ sāno̱ avye̍

वृ॒ष्टिं नो॑ अर्ष दि॒व्यां जि॑ग॒त्नुमिळा॑वतीं शं॒गयीं॑ जी॒रदा॑नुम् ।

स्तुके॑व वी॒ता ध॑न्वा विचि॒न्वन्बन्धूँ॑रि॒माँ अव॑राँ इन्दो वा॒यून् ॥9.97.17॥

vṛ̱ṣṭiṃ no̍ arṣa di̱vyāṃ ji̍ga̱tnumil̤ā̍vatīṃ śa̱ṃgayī̍ṃ jī̱radā̍num |

stuke̍va vī̱tā dha̍nvā vici̱nvanbandhū̍m̐ri̱mām̐ ava̍rām̐ indo vā̱yūn

ग्र॒न्थिं न वि ष्य॑ ग्रथि॒तं पु॑ना॒न ऋ॒जुं च॑ गा॒तुं वृ॑जि॒नं च॑ सोम ।

अत्यो॒ न क्र॑दो॒ हरि॒रा सृ॑जा॒नो मर्यो॑ देव धन्व प॒स्त्या॑वान् ॥9.97.18॥

gra̱nthiṃ na vi ṣya̍ grathi̱taṃ pu̍nā̱na ṛ̱juṃ ca̍ gā̱tuṃ vṛ̍ji̱naṃ ca̍ soma |

atyo̱ na kra̍do̱ hari̱rā sṛ̍jā̱no maryo̍ deva dhanva pa̱styā̍vān

जुष्टो॒ मदा॑य दे॒वता॑त इन्दो॒ परि॒ ष्णुना॑ धन्व॒ सानो॒ अव्ये॑ ।

स॒हस्र॑धारः सुर॒भिरद॑ब्ध॒: परि॑ स्रव॒ वाज॑सातौ नृ॒षह्ये॑ ॥9.97.19॥

juṣṭo̱ madā̍ya de̱vatā̍ta indo̱ pari̱ ṣṇunā̍ dhanva̱ sāno̱ avye̍ |

sa̱hasra̍dhāraḥ sura̱bhirada̍bdha̱: pari̍ srava̱ vāja̍sātau nṛ̱ṣahye̍

अ॒र॒श्मानो॒ ये॑ऽर॒था अयु॑क्ता॒ अत्या॑सो॒ न स॑सृजा॒नास॑ आ॒जौ ।

ए॒ते शु॒क्रासो॑ धन्वन्ति॒ सोमा॒ देवा॑स॒स्ताँ उप॑ याता॒ पिब॑ध्यै ॥9.97.20॥

a̱ra̱śmāno̱ ye̍'ra̱thā ayu̍ktā̱ atyā̍so̱ na sa̍sṛjā̱nāsa̍ ā̱jau |

e̱te śu̱krāso̍ dhanvanti̱ somā̱ devā̍sa̱stām̐ upa̍ yātā̱ piba̍dhyai

ए॒वा न॑ इन्दो अ॒भि दे॒ववी॑तिं॒ परि॑ स्रव॒ नभो॒ अर्ण॑श्च॒मूषु॑ ।

सोमो॑ अ॒स्मभ्यं॒ काम्यं॑ बृ॒हन्तं॑ र॒यिं द॑दातु वी॒रव॑न्तमु॒ग्रम् ॥9.97.21॥

e̱vā na̍ indo a̱bhi de̱vavī̍ti̱ṃ pari̍ srava̱ nabho̱ arṇa̍śca̱mūṣu̍ |

somo̍ a̱smabhya̱ṃ kāmya̍ṃ bṛ̱hanta̍ṃ ra̱yiṃ da̍dātu vī̱rava̍ntamu̱gram

तक्ष॒द्यदी॒ मन॑सो॒ वेन॑तो॒ वाग्ज्येष्ठ॑स्य वा॒ धर्म॑णि॒ क्षोरनी॑के ।

आदी॑माय॒न्वर॒मा वा॑वशा॒ना जुष्टं॒ पतिं॑ क॒लशे॒ गाव॒ इन्दु॑म् ॥9.97.22॥

takṣa̱dyadī̱ mana̍so̱ vena̍to̱ vāgjyeṣṭha̍sya vā̱ dharma̍ṇi̱ kṣoranī̍ke |

ādī̍māya̱nvara̱mā vā̍vaśā̱nā juṣṭa̱ṃ pati̍ṃ ka̱laśe̱ gāva̱ indu̍m

प्र दा॑नु॒दो दि॒व्यो दा॑नुपि॒न्व ऋ॒तमृ॒ताय॑ पवते सुमे॒धाः ।

ध॒र्मा भु॑वद्वृज॒न्य॑स्य॒ राजा॒ प्र र॒श्मिभि॑र्द॒शभि॑र्भारि॒ भूम॑ ॥9.97.23॥

pra dā̍nu̱do di̱vyo dā̍nupi̱nva ṛ̱tamṛ̱tāya̍ pavate sume̱dhāḥ |

dha̱rmā bhu̍vadvṛja̱nya̍sya̱ rājā̱ pra ra̱śmibhi̍rda̱śabhi̍rbhāri̱ bhūma̍

प॒वित्रे॑भि॒: पव॑मानो नृ॒चक्षा॒ राजा॑ दे॒वाना॑मु॒त मर्त्या॑नाम् ।

द्वि॒ता भु॑वद्रयि॒पती॑ रयी॒णामृ॒तं भ॑र॒त्सुभृ॑तं॒ चार्विन्दु॑: ॥9.97.24॥

pa̱vitre̍bhi̱: pava̍māno nṛ̱cakṣā̱ rājā̍ de̱vānā̍mu̱ta martyā̍nām |

dvi̱tā bhu̍vadrayi̱patī̍ rayī̱ṇāmṛ̱taṃ bha̍ra̱tsubhṛ̍ta̱ṃ cārvindu̍:

अर्वाँ॑ इव॒ श्रव॑से सा॒तिमच्छेन्द्र॑स्य वा॒योर॒भि वी॒तिम॑र्ष ।

स न॑: स॒हस्रा॑ बृह॒तीरिषो॑ दा॒ भवा॑ सोम द्रविणो॒वित्पु॑ना॒नः ॥9.97.25॥

arvā̍m̐ iva̱ śrava̍se sā̱timacchendra̍sya vā̱yora̱bhi vī̱tima̍rṣa |

sa na̍: sa̱hasrā̍ bṛha̱tīriṣo̍ dā̱ bhavā̍ soma draviṇo̱vitpu̍nā̱naḥ

दे॒वा॒व्यो॑ नः परिषि॒च्यमा॑ना॒: क्षयं॑ सु॒वीरं॑ धन्वन्त॒ सोमा॑: ।

आ॒य॒ज्यव॑: सुम॒तिं वि॒श्ववा॑रा॒ होता॑रो॒ न दि॑वि॒यजो॑ म॒न्द्रत॑माः ॥9.97.26॥

de̱vā̱vyo̍ naḥ pariṣi̱cyamā̍nā̱: kṣaya̍ṃ su̱vīra̍ṃ dhanvanta̱ somā̍: |

ā̱ya̱jyava̍: suma̱tiṃ vi̱śvavā̍rā̱ hotā̍ro̱ na di̍vi̱yajo̍ ma̱ndrata̍māḥ

ए॒वा दे॑व दे॒वता॑ते पवस्व म॒हे सो॑म॒ प्सर॑से देव॒पान॑: ।

म॒हश्चि॒द्धि ष्मसि॑ हि॒ताः स॑म॒र्ये कृ॒धि सु॑ष्ठा॒ने रोद॑सी पुना॒नः ॥9.97.27॥

e̱vā de̍va de̱vatā̍te pavasva ma̱he so̍ma̱ psara̍se deva̱pāna̍: |

ma̱haści̱ddhi ṣmasi̍ hi̱tāḥ sa̍ma̱rye kṛ̱dhi su̍ṣṭhā̱ne roda̍sī punā̱naḥ

अश्वो॒ नो क्र॑दो॒ वृष॑भिर्युजा॒नः सिं॒हो न भी॒मो मन॑सो॒ जवी॑यान् ।

अ॒र्वा॒चीनै॑: प॒थिभि॒र्ये रजि॑ष्ठा॒ आ प॑वस्व सौमन॒सं न॑ इन्दो ॥9.97.28॥

aśvo̱ no kra̍do̱ vṛṣa̍bhiryujā̱naḥ si̱ṃho na bhī̱mo mana̍so̱ javī̍yān |

a̱rvā̱cīnai̍: pa̱thibhi̱rye raji̍ṣṭhā̱ ā pa̍vasva saumana̱saṃ na̍ indo

श॒तं धारा॑ दे॒वजा॑ता असृग्रन्त्स॒हस्र॑मेनाः क॒वयो॑ मृजन्ति ।

इन्दो॑ स॒नित्रं॑ दि॒व आ प॑वस्व पुरए॒तासि॑ मह॒तो धन॑स्य ॥9.97.29॥

śa̱taṃ dhārā̍ de̱vajā̍tā asṛgrantsa̱hasra̍menāḥ ka̱vayo̍ mṛjanti |

indo̍ sa̱nitra̍ṃ di̱va ā pa̍vasva purae̱tāsi̍ maha̱to dhana̍sya

दि॒वो न सर्गा॑ अससृग्र॒मह्नां॒ राजा॒ न मि॒त्रं प्र मि॑नाति॒ धीर॑: ।

पि॒तुर्न पु॒त्रः क्रतु॑भिर्यता॒न आ प॑वस्व वि॒शे अ॒स्या अजी॑तिम् ॥9.97.30॥

di̱vo na sargā̍ asasṛgra̱mahnā̱ṃ rājā̱ na mi̱traṃ pra mi̍nāti̱ dhīra̍: |

pi̱turna pu̱traḥ kratu̍bhiryatā̱na ā pa̍vasva vi̱śe a̱syā ajī̍tim

प्र ते॒ धारा॒ मधु॑मतीरसृग्र॒न्वारा॒न्यत्पू॒तो अ॒त्येष्यव्या॑न् ।

पव॑मान॒ पव॑से॒ धाम॒ गोनां॑ जज्ञा॒नः सूर्य॑मपिन्वो अ॒र्कैः ॥9.97.31॥

pra te̱ dhārā̱ madhu̍matīrasṛgra̱nvārā̱nyatpū̱to a̱tyeṣyavyā̍n |

pava̍māna̱ pava̍se̱ dhāma̱ gonā̍ṃ jajñā̱naḥ sūrya̍mapinvo a̱rkaiḥ

कनि॑क्रद॒दनु॒ पन्था॑मृ॒तस्य॑ शु॒क्रो वि भा॑स्य॒मृत॑स्य॒ धाम॑ ।

स इन्द्रा॑य पवसे मत्स॒रवा॑न्हिन्वा॒नो वाचं॑ म॒तिभि॑: कवी॒नाम् ॥9.97.32॥

kani̍krada̱danu̱ panthā̍mṛ̱tasya̍ śu̱kro vi bhā̍sya̱mṛta̍sya̱ dhāma̍ |

sa indrā̍ya pavase matsa̱ravā̍nhinvā̱no vāca̍ṃ ma̱tibhi̍: kavī̱nām

दि॒व्यः सु॑प॒र्णोऽव॑ चक्षि सोम॒ पिन्व॒न्धारा॒: कर्म॑णा दे॒ववी॑तौ ।

एन्दो॑ विश क॒लशं॑ सोम॒धानं॒ क्रन्द॑न्निहि॒ सूर्य॒स्योप॑ र॒श्मिम् ॥9.97.33॥

di̱vyaḥ su̍pa̱rṇo'va̍ cakṣi soma̱ pinva̱ndhārā̱: karma̍ṇā de̱vavī̍tau |

endo̍ viśa ka̱laśa̍ṃ soma̱dhāna̱ṃ kranda̍nnihi̱ sūrya̱syopa̍ ra̱śmim

ति॒स्रो वाच॑ ईरयति॒ प्र वह्नि॑ॠ॒तस्य॑ धी॒तिं ब्रह्म॑णो मनी॒षाम् ।

गावो॑ यन्ति॒ गोप॑तिं पृ॒च्छमा॑ना॒: सोमं॑ यन्ति म॒तयो॑ वावशा॒नाः ॥9.97.34॥

ti̱sro vāca̍ īrayati̱ pra vahni̍ṝ̱tasya̍ dhī̱tiṃ brahma̍ṇo manī̱ṣām |

gāvo̍ yanti̱ gopa̍tiṃ pṛ̱cchamā̍nā̱: soma̍ṃ yanti ma̱tayo̍ vāvaśā̱nāḥ

सोमं॒ गावो॑ धे॒नवो॑ वावशा॒नाः सोमं॒ विप्रा॑ म॒तिभि॑: पृ॒च्छमा॑नाः ।

सोम॑: सु॒तः पू॑यते अ॒ज्यमा॑न॒: सोमे॑ अ॒र्कास्त्रि॒ष्टुभ॒: सं न॑वन्ते ॥9.97.35॥

soma̱ṃ gāvo̍ dhe̱navo̍ vāvaśā̱nāḥ soma̱ṃ viprā̍ ma̱tibhi̍: pṛ̱cchamā̍nāḥ |

soma̍: su̱taḥ pū̍yate a̱jyamā̍na̱: some̍ a̱rkāstri̱ṣṭubha̱: saṃ na̍vante

ए॒वा न॑: सोम परिषि॒च्यमा॑न॒ आ प॑वस्व पू॒यमा॑नः स्व॒स्ति ।

इन्द्र॒मा वि॑श बृह॒ता रवे॑ण व॒र्धया॒ वाचं॑ ज॒नया॒ पुरं॑धिम् ॥9.97.36॥

e̱vā na̍: soma pariṣi̱cyamā̍na̱ ā pa̍vasva pū̱yamā̍naḥ sva̱sti |

indra̱mā vi̍śa bṛha̱tā rave̍ṇa va̱rdhayā̱ vāca̍ṃ ja̱nayā̱ pura̍ṃdhim

आ जागृ॑वि॒र्विप्र॑ ऋ॒ता म॑ती॒नां सोम॑: पुना॒नो अ॑सदच्च॒मूषु॑ ।

सप॑न्ति॒ यं मि॑थु॒नासो॒ निका॑मा अध्व॒र्यवो॑ रथि॒रास॑: सु॒हस्ता॑: ॥9.97.37॥

ā jāgṛ̍vi̱rvipra̍ ṛ̱tā ma̍tī̱nāṃ soma̍: punā̱no a̍sadacca̱mūṣu̍ |

sapa̍nti̱ yaṃ mi̍thu̱nāso̱ nikā̍mā adhva̱ryavo̍ rathi̱rāsa̍: su̱hastā̍:

स पु॑ना॒न उप॒ सूरे॒ न धातोभे अ॑प्रा॒ रोद॑सी॒ वि ष आ॑वः ।

प्रि॒या चि॒द्यस्य॑ प्रिय॒सास॑ ऊ॒ती स तू धनं॑ का॒रिणे॒ न प्र यं॑सत् ॥9.97.38॥

sa pu̍nā̱na upa̱ sūre̱ na dhātobhe a̍prā̱ roda̍sī̱ vi ṣa ā̍vaḥ |

pri̱yā ci̱dyasya̍ priya̱sāsa̍ ū̱tī sa tū dhana̍ṃ kā̱riṇe̱ na pra ya̍ṃsat

स व॑र्धि॒ता वर्ध॑नः पू॒यमा॑न॒: सोमो॑ मी॒ढ्वाँ अ॒भि नो॒ ज्योति॑षावीत् ।

येना॑ न॒: पूर्वे॑ पि॒तर॑: पद॒ज्ञाः स्व॒र्विदो॑ अ॒भि गा अद्रि॑मु॒ष्णन् ॥9.97.39॥

sa va̍rdhi̱tā vardha̍naḥ pū̱yamā̍na̱: somo̍ mī̱ḍhvām̐ a̱bhi no̱ jyoti̍ṣāvīt |

yenā̍ na̱: pūrve̍ pi̱tara̍: pada̱jñāḥ sva̱rvido̍ a̱bhi gā adri̍mu̱ṣṇan

अक्रा॑न्त्समु॒द्रः प्र॑थ॒मे विध॑र्मञ्ज॒नय॑न्प्र॒जा भुव॑नस्य॒ राजा॑ ।

वृषा॑ प॒वित्रे॒ अधि॒ सानो॒ अव्ये॑ बृ॒हत्सोमो॑ वावृधे सुवा॒न इन्दु॑: ॥9.97.40॥

akrā̍ntsamu̱draḥ pra̍tha̱me vidha̍rmañja̱naya̍npra̱jā bhuva̍nasya̱ rājā̍ |

vṛṣā̍ pa̱vitre̱ adhi̱ sāno̱ avye̍ bṛ̱hatsomo̍ vāvṛdhe suvā̱na indu̍:

म॒हत्तत्सोमो॑ महि॒षश्च॑कारा॒ऽपां यद्गर्भोऽवृ॑णीत दे॒वान् ।

अद॑धा॒दिन्द्रे॒ पव॑मान॒ ओजोऽज॑नय॒त्सूर्ये॒ ज्योति॒रिन्दु॑: ॥9.97.41॥

ma̱hattatsomo̍ mahi̱ṣaśca̍kārā̱'pāṃ yadgarbho'vṛ̍ṇīta de̱vān |

ada̍dhā̱dindre̱ pava̍māna̱ ojo'ja̍naya̱tsūrye̱ jyoti̱rindu̍:

मत्सि॑ वा॒युमि॒ष्टये॒ राध॑से च॒ मत्सि॑ मि॒त्रावरु॑णा पू॒यमा॑नः ।

मत्सि॒ शर्धो॒ मारु॑तं॒ मत्सि॑ दे॒वान्मत्सि॒ द्यावा॑पृथि॒वी दे॑व सोम ॥9.97.42॥

matsi̍ vā̱yumi̱ṣṭaye̱ rādha̍se ca̱ matsi̍ mi̱trāvaru̍ṇā pū̱yamā̍naḥ |

matsi̱ śardho̱ māru̍ta̱ṃ matsi̍ de̱vānmatsi̱ dyāvā̍pṛthi̱vī de̍va soma

ऋ॒जुः प॑वस्व वृजि॒नस्य॑ ह॒न्ताऽपामी॑वां॒ बाध॑मानो॒ मृध॑श्च ।

अ॒भि॒श्री॒णन्पय॒: पय॑सा॒भि गोना॒मिन्द्र॑स्य॒ त्वं तव॑ व॒यं सखा॑यः ॥9.97.43॥

ṛ̱juḥ pa̍vasva vṛji̱nasya̍ ha̱ntā'pāmī̍vā̱ṃ bādha̍māno̱ mṛdha̍śca |

a̱bhi̱śrī̱ṇanpaya̱: paya̍sā̱bhi gonā̱mindra̍sya̱ tvaṃ tava̍ va̱yaṃ sakhā̍yaḥ

मध्व॒: सूदं॑ पवस्व॒ वस्व॒ उत्सं॑ वी॒रं च॑ न॒ आ प॑वस्वा॒ भगं॑ च ।

स्वद॒स्वेन्द्रा॑य॒ पव॑मान इन्दो र॒यिं च॑ न॒ आ प॑वस्वा समु॒द्रात् ॥9.97.44॥

madhva̱: sūda̍ṃ pavasva̱ vasva̱ utsa̍ṃ vī̱raṃ ca̍ na̱ ā pa̍vasvā̱ bhaga̍ṃ ca |

svada̱svendrā̍ya̱ pava̍māna indo ra̱yiṃ ca̍ na̱ ā pa̍vasvā samu̱drāt

सोम॑: सु॒तो धार॒यात्यो॒ न हित्वा॒ सिन्धु॒र्न नि॒म्नम॒भि वा॒ज्य॑क्षाः ।

आ योनिं॒ वन्य॑मसदत्पुना॒नः समिन्दु॒र्गोभि॑रसर॒त्सम॒द्भिः ॥9.97.45॥

soma̍: su̱to dhāra̱yātyo̱ na hitvā̱ sindhu̱rna ni̱mnama̱bhi vā̱jya̍kṣāḥ |

ā yoni̱ṃ vanya̍masadatpunā̱naḥ samindu̱rgobhi̍rasara̱tsama̱dbhiḥ

ए॒ष स्य ते॑ पवत इन्द्र॒ सोम॑श्च॒मूषु॒ धीर॑ उश॒ते तव॑स्वान् ।

स्व॑र्चक्षा रथि॒रः स॒त्यशु॑ष्म॒: कामो॒ न यो दे॑वय॒तामस॑र्जि ॥9.97.46॥

e̱ṣa sya te̍ pavata indra̱ soma̍śca̱mūṣu̱ dhīra̍ uśa̱te tava̍svān |

sva̍rcakṣā rathi̱raḥ sa̱tyaśu̍ṣma̱: kāmo̱ na yo de̍vaya̱tāmasa̍rji

ए॒ष प्र॒त्नेन॒ वय॑सा पुना॒नस्ति॒रो वर्पां॑सि दुहि॒तुर्दधा॑नः ।

वसा॑न॒: शर्म॑ त्रि॒वरू॑थम॒प्सु होते॑व याति॒ सम॑नेषु॒ रेभ॑न् ॥9.97.47॥

e̱ṣa pra̱tnena̱ vaya̍sā punā̱nasti̱ro varpā̍ṃsi duhi̱turdadhā̍naḥ |

vasā̍na̱: śarma̍ tri̱varū̍thama̱psu hote̍va yāti̱ sama̍neṣu̱ rebha̍n

नू न॒स्त्वं र॑थि॒रो दे॑व सोम॒ परि॑ स्रव च॒म्वो॑: पू॒यमा॑नः ।

अ॒प्सु स्वादि॑ष्ठो॒ मधु॑माँ ऋ॒तावा॑ दे॒वो न यः स॑वि॒ता स॒त्यम॑न्मा ॥9.97.48॥

nū na̱stvaṃ ra̍thi̱ro de̍va soma̱ pari̍ srava ca̱mvo̍: pū̱yamā̍naḥ |

a̱psu svādi̍ṣṭho̱ madhu̍mām̐ ṛ̱tāvā̍ de̱vo na yaḥ sa̍vi̱tā sa̱tyama̍nmā

अ॒भि वा॒युं वी॒त्य॑र्षा गृणा॒नो॒३ऽभि मि॒त्रावरु॑णा पू॒यमा॑नः ।

अ॒भी नरं॑ धी॒जव॑नं रथे॒ष्ठाम॒भीन्द्रं॒ वृष॑णं॒ वज्र॑बाहुम् ॥9.97.49॥

a̱bhi vā̱yuṃ vī̱tya̍rṣā gṛṇā̱no̱3'bhi mi̱trāvaru̍ṇā pū̱yamā̍naḥ |

a̱bhī nara̍ṃ dhī̱java̍naṃ rathe̱ṣṭhāma̱bhīndra̱ṃ vṛṣa̍ṇa̱ṃ vajra̍bāhum

अ॒भि वस्त्रा॑ सुवस॒नान्य॑र्षा॒ऽभि धे॒नूः सु॒दुघा॑: पू॒यमा॑नः ।

अ॒भि च॒न्द्रा भर्त॑वे नो॒ हिर॑ण्या॒ऽभ्यश्वा॑न्र॒थिनो॑ देव सोम ॥9.97.50॥

a̱bhi vastrā̍ suvasa̱nānya̍rṣā̱'bhi dhe̱nūḥ su̱dughā̍: pū̱yamā̍naḥ |

a̱bhi ca̱ndrā bharta̍ve no̱ hira̍ṇyā̱'bhyaśvā̍nra̱thino̍ deva soma

अ॒भी नो॑ अर्ष दि॒व्या वसू॑न्य॒भि विश्वा॒ पार्थि॑वा पू॒यमा॑नः ।

अ॒भि येन॒ द्रवि॑णम॒श्नवा॑मा॒ऽभ्या॑र्षे॒यं ज॑मदग्नि॒वन्न॑: ॥9.97.51॥

a̱bhī no̍ arṣa di̱vyā vasū̍nya̱bhi viśvā̱ pārthi̍vā pū̱yamā̍naḥ |

a̱bhi yena̱ dravi̍ṇama̱śnavā̍mā̱'bhyā̍rṣe̱yaṃ ja̍madagni̱vanna̍:

अ॒या प॒वा प॑वस्वै॒ना वसू॑नि माँश्च॒त्व इ॑न्दो॒ सर॑सि॒ प्र ध॑न्व ।

ब्र॒ध्नश्चि॒दत्र॒ वातो॒ न जू॒तः पु॑रु॒मेध॑श्चि॒त्तक॑वे॒ नरं॑ दात् ॥9.97.52॥

a̱yā pa̱vā pa̍vasvai̱nā vasū̍ni mām̐śca̱tva i̍ndo̱ sara̍si̱ pra dha̍nva |

bra̱dhnaści̱datra̱ vāto̱ na jū̱taḥ pu̍ru̱medha̍ści̱ttaka̍ve̱ nara̍ṃ dāt

उ॒त न॑ ए॒ना प॑व॒या प॑व॒स्वाऽधि॑ श्रु॒ते श्र॒वाय्य॑स्य ती॒र्थे ।

ष॒ष्टिं स॒हस्रा॑ नैगु॒तो वसू॑नि वृ॒क्षं न प॒क्वं धू॑नव॒द्रणा॑य ॥9.97.53॥

u̱ta na̍ e̱nā pa̍va̱yā pa̍va̱svā'dhi̍ śru̱te śra̱vāyya̍sya tī̱rthe |

ṣa̱ṣṭiṃ sa̱hasrā̍ naigu̱to vasū̍ni vṛ̱kṣaṃ na pa̱kvaṃ dhū̍nava̱draṇā̍ya

मही॒मे अ॑स्य॒ वृष॒नाम॑ शू॒षे माँश्च॑त्वे वा॒ पृश॑ने वा॒ वध॑त्रे ।

अस्वा॑पयन्नि॒गुत॑: स्ने॒हय॒च्चाऽपा॒मित्राँ॒ अपा॒चितो॑ अचे॒तः ॥9.97.54॥

mahī̱me a̍sya̱ vṛṣa̱nāma̍ śū̱ṣe mām̐śca̍tve vā̱ pṛśa̍ne vā̱ vadha̍tre |

asvā̍payanni̱guta̍: sne̱haya̱ccā'pā̱mitrā̱m̐ apā̱cito̍ ace̱taḥ

सं त्री प॒वित्रा॒ वित॑तान्ये॒ष्यन्वेकं॑ धावसि पू॒यमा॑नः ।

असि॒ भगो॒ असि॑ दा॒त्रस्य॑ दा॒ताऽसि॑ म॒घवा॑ म॒घव॑द्भ्य इन्दो ॥9.97.55॥

saṃ trī pa̱vitrā̱ vita̍tānye̱ṣyanveka̍ṃ dhāvasi pū̱yamā̍naḥ |

asi̱ bhago̱ asi̍ dā̱trasya̍ dā̱tā'si̍ ma̱ghavā̍ ma̱ghava̍dbhya indo

ए॒ष वि॑श्व॒वित्प॑वते मनी॒षी सोमो॒ विश्व॑स्य॒ भुव॑नस्य॒ राजा॑ ।

द्र॒प्साँ ई॒रय॑न्वि॒दथे॒ष्विन्दु॒र्वि वार॒मव्यं॑ स॒मयाति॑ याति ॥9.97.56॥

e̱ṣa vi̍śva̱vitpa̍vate manī̱ṣī somo̱ viśva̍sya̱ bhuva̍nasya̱ rājā̍ |

dra̱psām̐ ī̱raya̍nvi̱dathe̱ṣvindu̱rvi vāra̱mavya̍ṃ sa̱mayāti̍ yāti

इन्दुं॑ रिहन्ति महि॒षा अद॑ब्धाः प॒दे रे॑भन्ति क॒वयो॒ न गृध्रा॑: ।

हि॒न्वन्ति॒ धीरा॑ द॒शभि॒: क्षिपा॑भि॒: सम॑ञ्जते रू॒पम॒पां रसे॑न ॥9.97.57॥

indu̍ṃ rihanti mahi̱ṣā ada̍bdhāḥ pa̱de re̍bhanti ka̱vayo̱ na gṛdhrā̍: |

hi̱nvanti̱ dhīrā̍ da̱śabhi̱: kṣipā̍bhi̱: sama̍ñjate rū̱pama̱pāṃ rase̍na

त्वया॑ व॒यं पव॑मानेन सोम॒ भरे॑ कृ॒तं वि चि॑नुयाम॒ शश्व॑त् ।

तन्नो॑ मि॒त्रो वरु॑णो मामहन्ता॒मदि॑ति॒: सिन्धु॑: पृथि॒वी उ॒त द्यौः ॥9.97.58॥

tvayā̍ va̱yaṃ pava̍mānena soma̱ bhare̍ kṛ̱taṃ vi ci̍nuyāma̱ śaśva̍t |

tanno̍ mi̱tro varu̍ṇo māmahantā̱madi̍ti̱: sindhu̍: pṛthi̱vī u̱ta dyauḥ

१२ अम्बरीषो वार्षागिर:, ऋजिश्वा भारद्वाजश्च । पवमान: सोम: ।अनुष्टुप् , ११ बृहती ।

अ॒भि नो॑ वाज॒सात॑मं र॒यिम॑र्ष पुरु॒स्पृह॑म् । इन्दो॑ स॒हस्र॑भर्णसं तुविद्यु॒म्नं वि॑भ्वा॒सह॑म् ॥9.98.1॥

a̱bhi no̍ vāja̱sāta̍maṃ ra̱yima̍rṣa puru̱spṛha̍m | indo̍ sa̱hasra̍bharṇasaṃ tuvidyu̱mnaṃ vi̍bhvā̱saha̍m

परि॒ ष्य सु॑वा॒नो अ॒व्ययं॒ रथे॒ न वर्मा॑व्यत । इन्दु॑र॒भि द्रुणा॑ हि॒तो हि॑या॒नो धारा॑भिरक्षाः ॥9.98.2॥

pari̱ ṣya su̍vā̱no a̱vyaya̱ṃ rathe̱ na varmā̍vyata | indu̍ra̱bhi druṇā̍ hi̱to hi̍yā̱no dhārā̍bhirakṣāḥ

परि॒ ष्य सु॑वा॒नो अ॑क्षा॒ इन्दु॒रव्ये॒ मद॑च्युतः । धारा॒ य ऊ॒र्ध्वो अ॑ध्व॒रे भ्रा॒जा नैति॑ गव्य॒युः ॥9.98.3॥

pari̱ ṣya su̍vā̱no a̍kṣā̱ indu̱ravye̱ mada̍cyutaḥ | dhārā̱ ya ū̱rdhvo a̍dhva̱re bhrā̱jā naiti̍ gavya̱yuḥ

स हि त्वं दे॑व॒ शश्व॑ते॒ वसु॒ मर्ता॑य दा॒शुषे॑ । इन्दो॑ सह॒स्रिणं॑ र॒यिं श॒तात्मा॑नं विवाससि ॥9.98.4॥

sa hi tvaṃ de̍va̱ śaśva̍te̱ vasu̱ martā̍ya dā̱śuṣe̍ | indo̍ saha̱sriṇa̍ṃ ra̱yiṃ śa̱tātmā̍naṃ vivāsasi

व॒यं ते॑ अ॒स्य वृ॑त्रह॒न्वसो॒ वस्व॑: पुरु॒स्पृह॑: । नि नेदि॑ष्ठतमा इ॒षः स्याम॑ सु॒म्नस्या॑ध्रिगो ॥9.98.5॥

va̱yaṃ te̍ a̱sya vṛ̍traha̱nvaso̱ vasva̍: puru̱spṛha̍: | ni nedi̍ṣṭhatamā i̱ṣaḥ syāma̍ su̱mnasyā̍dhrigo

द्विर्यं पञ्च॒ स्वय॑शसं॒ स्वसा॑रो॒ अद्रि॑संहतम् । प्रि॒यमिन्द्र॑स्य॒ काम्यं॑ प्रस्ना॒पय॑न्त्यू॒र्मिण॑म् ॥9.98.6॥

dviryaṃ pañca̱ svaya̍śasa̱ṃ svasā̍ro̱ adri̍saṃhatam | pri̱yamindra̍sya̱ kāmya̍ṃ prasnā̱paya̍ntyū̱rmiṇa̍m

परि॒ त्यं ह॑र्य॒तं हरिं॑ ब॒भ्रुं पु॑नन्ति॒ वारे॑ण । यो दे॒वान्विश्वाँ॒ इत्परि॒ मदे॑न स॒ह गच्छ॑ति ॥9.98.7॥

pari̱ tyaṃ ha̍rya̱taṃ hari̍ṃ ba̱bhruṃ pu̍nanti̱ vāre̍ṇa | yo de̱vānviśvā̱m̐ itpari̱ made̍na sa̱ha gaccha̍ti

अ॒स्य वो॒ ह्यव॑सा॒ पान्तो॑ दक्ष॒साध॑नम् । यः सू॒रिषु॒ श्रवो॑ बृ॒हद्द॒धे स्व१र्ण ह॑र्य॒तः ॥9.98.8॥

a̱sya vo̱ hyava̍sā̱ pānto̍ dakṣa̱sādha̍nam | yaḥ sū̱riṣu̱ śravo̍ bṛ̱hadda̱dhe sva1rṇa ha̍rya̱taḥ

स वां॑ य॒ज्ञेषु॑ मानवी॒ इन्दु॑र्जनिष्ट रोदसी । दे॒वो दे॑वी गिरि॒ष्ठा अस्रे॑ध॒न्तं तु॑वि॒ष्वणि॑ ॥9.98.9॥

sa vā̍ṃ ya̱jñeṣu̍ mānavī̱ indu̍rjaniṣṭa rodasī | de̱vo de̍vī giri̱ṣṭhā asre̍dha̱ntaṃ tu̍vi̱ṣvaṇi̍

इन्द्रा॑य सोम॒ पात॑वे वृत्र॒घ्ने परि॑ षिच्यसे । नरे॑ च॒ दक्षि॑णावते दे॒वाय॑ सदना॒सदे॑ ॥9.98.10॥

indrā̍ya soma̱ pāta̍ve vṛtra̱ghne pari̍ ṣicyase | nare̍ ca̱ dakṣi̍ṇāvate de̱vāya̍ sadanā̱sade̍

ते प्र॒त्नासो॒ व्यु॑ष्टिषु॒ सोमा॑: प॒वित्रे॑ अक्षरन् ।

अ॒प॒प्रोथ॑न्तः सनु॒तर्हु॑र॒श्चित॑: प्रा॒तस्ताँ अप्र॑चेतसः ॥9.98.11॥

te pra̱tnāso̱ vyu̍ṣṭiṣu̱ somā̍: pa̱vitre̍ akṣaran |

a̱pa̱protha̍ntaḥ sanu̱tarhu̍ra̱ścita̍: prā̱tastām̐ apra̍cetasaḥ

तं स॑खायः पुरो॒रुचं॑ यू॒यं व॒यं च॑ सू॒रय॑: । अ॒श्याम॒ वाज॑गन्ध्यं स॒नेम॒ वाज॑पस्त्यम् ॥9.98.12॥

taṃ sa̍khāyaḥ puro̱ruca̍ṃ yū̱yaṃ va̱yaṃ ca̍ sū̱raya̍: | a̱śyāma̱ vāja̍gandhyaṃ sa̱nema̱ vāja̍pastyam

८ रेभसूनू काश्यपौ । पवमान: सोम: ।अनुष्टुप् ,१ बृहती।

आ ह॑र्य॒ताय॑ धृ॒ष्णवे॒ धनु॑स्तन्वन्ति॒ पौंस्य॑म् ।

शु॒क्रां व॑य॒न्त्यसु॑राय नि॒र्णिजं॑ वि॒पामग्रे॑ मही॒युव॑: ॥9.99.1॥

ā ha̍rya̱tāya̍ dhṛ̱ṣṇave̱ dhanu̍stanvanti̱ pauṃsya̍m |

śu̱krāṃ va̍ya̱ntyasu̍rāya ni̱rṇija̍ṃ vi̱pāmagre̍ mahī̱yuva̍:

अध॑ क्ष॒पा परि॑ष्कृतो॒ वाजाँ॑ अ॒भि प्र गा॑हते । यदी॑ वि॒वस्व॑तो॒ धियो॒ हरिं॑ हि॒न्वन्ति॒ यात॑वे ॥9.99.2॥

adha̍ kṣa̱pā pari̍ṣkṛto̱ vājā̍m̐ a̱bhi pra gā̍hate | yadī̍ vi̱vasva̍to̱ dhiyo̱ hari̍ṃ hi̱nvanti̱ yāta̍ve

तम॑स्य मर्जयामसि॒ मदो॒ य इ॑न्द्र॒पात॑मः । यं गाव॑ आ॒सभि॑र्द॒धुः पु॒रा नू॒नं च॑ सू॒रय॑: ॥9.99.3॥

tama̍sya marjayāmasi̱ mado̱ ya i̍ndra̱pāta̍maḥ | yaṃ gāva̍ ā̱sabhi̍rda̱dhuḥ pu̱rā nū̱naṃ ca̍ sū̱raya̍:

तं गाथ॑या पुरा॒ण्या पु॑ना॒नम॒भ्य॑नूषत । उ॒तो कृ॑पन्त धी॒तयो॑ दे॒वानां॒ नाम॒ बिभ्र॑तीः ॥9.99.4॥

taṃ gātha̍yā purā̱ṇyā pu̍nā̱nama̱bhya̍nūṣata | u̱to kṛ̍panta dhī̱tayo̍ de̱vānā̱ṃ nāma̱ bibhra̍tīḥ

तमु॒क्षमा॑णम॒व्यये॒ वारे॑ पुनन्ति धर्ण॒सिम् । दू॒तं न पू॒र्वचि॑त्तय॒ आ शा॑सते मनी॒षिण॑: ॥9.99.5॥

tamu̱kṣamā̍ṇama̱vyaye̱ vāre̍ punanti dharṇa̱sim | dū̱taṃ na pū̱rvaci̍ttaya̱ ā śā̍sate manī̱ṣiṇa̍:

स पु॑ना॒नो म॒दिन्त॑म॒: सोम॑श्च॒मूषु॑ सीदति । प॒शौ न रेत॑ आ॒दध॒त्पति॑र्वचस्यते धि॒यः ॥9.99.6॥

sa pu̍nā̱no ma̱dinta̍ma̱: soma̍śca̱mūṣu̍ sīdati | pa̱śau na reta̍ ā̱dadha̱tpati̍rvacasyate dhi̱yaḥ

स मृ॑ज्यते सु॒कर्म॑भिर्दे॒वो दे॒वेभ्य॑: सु॒तः । वि॒दे यदा॑सु संद॒दिर्म॒हीर॒पो वि गा॑हते ॥9.99.7॥

sa mṛ̍jyate su̱karma̍bhirde̱vo de̱vebhya̍: su̱taḥ | vi̱de yadā̍su saṃda̱dirma̱hīra̱po vi gā̍hate

सु॒त इ॑न्दो प॒वित्र॒ आ नृभि॑र्य॒तो वि नी॑यसे । इन्द्रा॑य मत्स॒रिन्त॑मश्च॒मूष्वा नि षी॑दसि ॥9.99.8॥

su̱ta i̍ndo pa̱vitra̱ ā nṛbhi̍rya̱to vi nī̍yase | indrā̍ya matsa̱rinta̍maśca̱mūṣvā ni ṣī̍dasi

९ रेभसूनू काश्यपौ । पवमान: सोम: । अनुष्टुप् ।

अ॒भी न॑वन्ते अ॒द्रुह॑: प्रि॒यमिन्द्र॑स्य॒ काम्य॑म् । व॒त्सं न पूर्व॒ आयु॑नि जा॒तं रि॑हन्ति मा॒तर॑: ॥9.100.1॥

a̱bhī na̍vante a̱druha̍: pri̱yamindra̍sya̱ kāmya̍m | va̱tsaṃ na pūrva̱ āyu̍ni jā̱taṃ ri̍hanti mā̱tara̍:

पु॒ना॒न इ॑न्द॒वा भ॑र॒ सोम॑ द्वि॒बर्ह॑सं र॒यिम् । त्वं वसू॑नि पुष्यसि॒ विश्वा॑नि दा॒शुषो॑ गृ॒हे ॥9.100.2॥

pu̱nā̱na i̍nda̱vā bha̍ra̱ soma̍ dvi̱barha̍saṃ ra̱yim | tvaṃ vasū̍ni puṣyasi̱ viśvā̍ni dā̱śuṣo̍ gṛ̱he

त्वं धियं॑ मनो॒युजं॑ सृ॒जा वृ॒ष्टिं न त॑न्य॒तुः । त्वं वसू॑नि॒ पार्थि॑वा दि॒व्या च॑ सोम पुष्यसि ॥9.100.3॥

tvaṃ dhiya̍ṃ mano̱yuja̍ṃ sṛ̱jā vṛ̱ṣṭiṃ na ta̍nya̱tuḥ | tvaṃ vasū̍ni̱ pārthi̍vā di̱vyā ca̍ soma puṣyasi

परि॑ ते जि॒ग्युषो॑ यथा॒ धारा॑ सु॒तस्य॑ धावति । रंह॑माणा॒ व्य१व्ययं॒ वारं॑ वा॒जीव॑ सान॒सिः ॥9.100.4॥

pari̍ te ji̱gyuṣo̍ yathā̱ dhārā̍ su̱tasya̍ dhāvati | raṃha̍māṇā̱ vya1vyaya̱ṃ vāra̍ṃ vā̱jīva̍ sāna̱siḥ

क्रत्वे॒ दक्षा॑य नः कवे॒ पव॑स्व सोम॒ धार॑या । इन्द्रा॑य॒ पात॑वे सु॒तो मि॒त्राय॒ वरु॑णाय च ॥9.100.5॥

kratve̱ dakṣā̍ya naḥ kave̱ pava̍sva soma̱ dhāra̍yā | indrā̍ya̱ pāta̍ve su̱to mi̱trāya̱ varu̍ṇāya ca

पव॑स्व वाज॒सात॑मः प॒वित्रे॒ धार॑या सु॒तः । इन्द्रा॑य सोम॒ विष्ण॑वे दे॒वेभ्यो॒ मधु॑मत्तमः ॥9.100.6॥

pava̍sva vāja̱sāta̍maḥ pa̱vitre̱ dhāra̍yā su̱taḥ | indrā̍ya soma̱ viṣṇa̍ve de̱vebhyo̱ madhu̍mattamaḥ

त्वां रि॑हन्ति मा॒तरो॒ हरिं॑ प॒वित्रे॑ अ॒द्रुह॑: । व॒त्सं जा॒तं न धे॒नव॒: पव॑मान॒ विध॑र्मणि ॥9.100.7॥

tvāṃ ri̍hanti mā̱taro̱ hari̍ṃ pa̱vitre̍ a̱druha̍: | va̱tsaṃ jā̱taṃ na dhe̱nava̱: pava̍māna̱ vidha̍rmaṇi

पव॑मान॒ महि॒ श्रव॑श्चि॒त्रेभि॑र्यासि र॒श्मिभि॑: । शर्ध॒न्तमां॑सि जिघ्नसे॒ विश्वा॑नि दा॒शुषो॑ गृ॒हे ॥9.100.8॥

pava̍māna̱ mahi̱ śrava̍ści̱trebhi̍ryāsi ra̱śmibhi̍: | śardha̱ntamā̍ṃsi jighnase̱ viśvā̍ni dā̱śuṣo̍ gṛ̱he

त्वं द्यां च॑ महिव्रत पृथि॒वीं चाति॑ जभ्रिषे । प्रति॑ द्रा॒पिम॑मुञ्चथा॒: पव॑मान महित्व॒ना ॥9.100.9॥

tvaṃ dyāṃ ca̍ mahivrata pṛthi̱vīṃ cāti̍ jabhriṣe | prati̍ drā̱pima̍muñcathā̱: pava̍māna mahitva̱nā

(१६) १-३अन्धीगु: श्यावाश्वि:,४-६ यायातिर्नाहुष:,७-९ नहुषो मानव:,१०-१२ मनु: सांवरण:, १३-१६ वैश्वामित्रो वाच्यो वा प्रजापति: । पवमान: सोम: । अनुष्टुप् , २-३ गायत्री ।

पु॒रोजि॑ती वो॒ अन्ध॑सः सु॒ताय॑ मादयि॒त्नवे॑ । अप॒ श्वानं॑ श्नथिष्टन॒ सखा॑यो दीर्घजि॒ह्व्य॑म् ॥9.101.1॥

pu̱roji̍tī vo̱ andha̍saḥ su̱tāya̍ mādayi̱tnave̍ | apa̱ śvāna̍ṃ śnathiṣṭana̱ sakhā̍yo dīrghaji̱hvya̍m

यो धार॑या पाव॒कया॑ परिप्र॒स्यन्द॑ते सु॒तः । इन्दु॒रश्वो॒ न कृत्व्य॑: ॥9.101.2॥

yo dhāra̍yā pāva̱kayā̍ paripra̱syanda̍te su̱taḥ | indu̱raśvo̱ na kṛtvya̍:

तं दु॒रोष॑म॒भी नर॒: सोमं॑ वि॒श्वाच्या॑ धि॒या । य॒ज्ञं हि॑न्व॒न्त्यद्रि॑भिः ॥9.101.3॥

taṃ du̱roṣa̍ma̱bhī nara̱: soma̍ṃ vi̱śvācyā̍ dhi̱yā | ya̱jñaṃ hi̍nva̱ntyadri̍bhiḥ

सु॒तासो॒ मधु॑मत्तमा॒: सोमा॒ इन्द्रा॑य म॒न्दिन॑: । प॒वित्र॑वन्तो अक्षरन्दे॒वान्ग॑च्छन्तु वो॒ मदा॑: ॥9.101.4॥

su̱tāso̱ madhu̍mattamā̱: somā̱ indrā̍ya ma̱ndina̍: | pa̱vitra̍vanto akṣarande̱vānga̍cchantu vo̱ madā̍:

इन्दु॒रिन्द्रा॑य पवत॒ इति॑ दे॒वासो॑ अब्रुवन् । वा॒चस्पति॑र्मखस्यते॒ विश्व॒स्येशा॑न॒ ओज॑सा ॥9.101.5॥

indu̱rindrā̍ya pavata̱ iti̍ de̱vāso̍ abruvan | vā̱caspati̍rmakhasyate̱ viśva̱syeśā̍na̱ oja̍sā

स॒हस्र॑धारः पवते समु॒द्रो वा॑चमीङ्ख॒यः । सोम॒: पती॑ रयी॒णां सखेन्द्र॑स्य दि॒वेदि॑वे ॥9.101.6॥

sa̱hasra̍dhāraḥ pavate samu̱dro vā̍camīṅkha̱yaḥ | soma̱: patī̍ rayī̱ṇāṃ sakhendra̍sya di̱vedi̍ve

अ॒यं पू॒षा र॒यिर्भग॒: सोम॑: पुना॒नो अ॑र्षति । पति॒र्विश्व॑स्य॒ भूम॑नो॒ व्य॑ख्य॒द्रोद॑सी उ॒भे ॥9.101.7॥

a̱yaṃ pū̱ṣā ra̱yirbhaga̱: soma̍: punā̱no a̍rṣati | pati̱rviśva̍sya̱ bhūma̍no̱ vya̍khya̱droda̍sī u̱bhe

समु॑ प्रि॒या अ॑नूषत॒ गावो॒ मदा॑य॒ घृष्व॑यः । सोमा॑सः कृण्वते प॒थः पव॑मानास॒ इन्द॑वः ॥9.101.8॥

samu̍ pri̱yā a̍nūṣata̱ gāvo̱ madā̍ya̱ ghṛṣva̍yaḥ | somā̍saḥ kṛṇvate pa̱thaḥ pava̍mānāsa̱ inda̍vaḥ

य ओजि॑ष्ठ॒स्तमा भ॑र॒ पव॑मान श्र॒वाय्य॑म् । यः पञ्च॑ चर्ष॒णीर॒भि र॒यिं येन॒ वना॑महै ॥9.101.9॥

ya oji̍ṣṭha̱stamā bha̍ra̱ pava̍māna śra̱vāyya̍m | yaḥ pañca̍ carṣa̱ṇīra̱bhi ra̱yiṃ yena̱ vanā̍mahai

सोमा॑: पवन्त॒ इन्द॑वो॒ऽस्मभ्यं॑ गातु॒वित्त॑माः । मि॒त्राः सु॑वा॒ना अ॑रे॒पस॑: स्वा॒ध्य॑: स्व॒र्विद॑: ॥9.101.10॥

somā̍: pavanta̱ inda̍vo̱'smabhya̍ṃ gātu̱vitta̍māḥ | mi̱trāḥ su̍vā̱nā a̍re̱pasa̍: svā̱dhya̍: sva̱rvida̍:

सु॒ष्वा॒णासो॒ व्यद्रि॑भि॒श्चिता॑ना॒ गोरधि॑ त्व॒चि । इष॑म॒स्मभ्य॑म॒भित॒: सम॑स्वरन्वसु॒विद॑: ॥9.101.11॥

su̱ṣvā̱ṇāso̱ vyadri̍bhi̱ścitā̍nā̱ goradhi̍ tva̱ci | iṣa̍ma̱smabhya̍ma̱bhita̱: sama̍svaranvasu̱vida̍:

ए॒ते पू॒ता वि॑प॒श्चित॒: सोमा॑सो॒ दध्या॑शिरः । सूर्या॑सो॒ न द॑र्श॒तासो॑ जिग॒त्नवो॑ ध्रु॒वा घृ॒ते ॥9.101.12॥

e̱te pū̱tā vi̍pa̱ścita̱: somā̍so̱ dadhyā̍śiraḥ | sūryā̍so̱ na da̍rśa̱tāso̍ jiga̱tnavo̍ dhru̱vā ghṛ̱te

प्र सु॑न्वा॒नस्यान्ध॑सो॒ मर्तो॒ न वृ॑त॒ तद्वच॑: । अप॒ श्वान॑मरा॒धसं॑ ह॒ता म॒खं न भृग॑वः ॥9.101.13॥

pra su̍nvā̱nasyāndha̍so̱ marto̱ na vṛ̍ta̱ tadvaca̍: | apa̱ śvāna̍marā̱dhasa̍ṃ ha̱tā ma̱khaṃ na bhṛga̍vaḥ

आ जा॒मिरत्के॑ अव्यत भु॒जे न पु॒त्र ओ॒ण्यो॑: । सर॑ज्जा॒रो न योष॑णां व॒रो न योनि॑मा॒सद॑म् ॥9.101.14॥

ā jā̱miratke̍ avyata bhu̱je na pu̱tra o̱ṇyo̍: | sara̍jjā̱ro na yoṣa̍ṇāṃ va̱ro na yoni̍mā̱sada̍m

स वी॒रो द॑क्ष॒साध॑नो॒ वि यस्त॒स्तम्भ॒ रोद॑सी । हरि॑: प॒वित्रे॑ अव्यत वे॒धा न योनि॑मा॒सद॑म् ॥9.101.15॥

sa vī̱ro da̍kṣa̱sādha̍no̱ vi yasta̱stambha̱ roda̍sī | hari̍: pa̱vitre̍ avyata ve̱dhā na yoni̍mā̱sada̍m

अव्यो॒ वारे॑भिः पवते॒ सोमो॒ गव्ये॒ अधि॑ त्व॒चि । कनि॑क्रद॒द्वृषा॒ हरि॒रिन्द्र॑स्या॒भ्ये॑ति निष्कृ॒तम् ॥9.101.16॥

avyo̱ vāre̍bhiḥ pavate̱ somo̱ gavye̱ adhi̍ tva̱ci | kani̍krada̱dvṛṣā̱ hari̱rindra̍syā̱bhye̍ti niṣkṛ̱tam

८ त्रित आप्त्य: । पवमान: सोम: । उष्णिक् ।

क्रा॒णा शिशु॑र्म॒हीनां॑ हि॒न्वन्नृ॒तस्य॒ दीधि॑तिम् । विश्वा॒ परि॑ प्रि॒या भु॑व॒दध॑ द्वि॒ता ॥9.102.1॥

krā̱ṇā śiśu̍rma̱hīnā̍ṃ hi̱nvannṛ̱tasya̱ dīdhi̍tim | viśvā̱ pari̍ pri̱yā bhu̍va̱dadha̍ dvi̱tā

उप॑ त्रि॒तस्य॑ पा॒ष्यो॒३रभ॑क्त॒ यद्गुहा॑ प॒दम् । य॒ज्ञस्य॑ स॒प्त धाम॑भि॒रध॑ प्रि॒यम् ॥9.102.2॥

upa̍ tri̱tasya̍ pā̱ṣyo̱3rabha̍kta̱ yadguhā̍ pa̱dam | ya̱jñasya̍ sa̱pta dhāma̍bhi̱radha̍ pri̱yam

त्रीणि॑ त्रि॒तस्य॒ धार॑या पृ॒ष्ठेष्वेर॑या र॒यिम् । मिमी॑ते अस्य॒ योज॑ना॒ वि सु॒क्रतु॑: ॥9.102.3॥

trīṇi̍ tri̱tasya̱ dhāra̍yā pṛ̱ṣṭheṣvera̍yā ra̱yim | mimī̍te asya̱ yoja̍nā̱ vi su̱kratu̍:

ज॒ज्ञा॒नं स॒प्त मा॒तरो॑ वे॒धाम॑शासत श्रि॒ये । अ॒यं ध्रु॒वो र॑यी॒णां चिके॑त॒ यत् ॥9.102.4॥

ja̱jñā̱naṃ sa̱pta mā̱taro̍ ve̱dhāma̍śāsata śri̱ye | a̱yaṃ dhru̱vo ra̍yī̱ṇāṃ cike̍ta̱ yat

अ॒स्य व्र॒ते स॒जोष॑सो॒ विश्वे॑ दे॒वासो॑ अ॒द्रुह॑: । स्पा॒र्हा भ॑वन्ति॒ रन्त॑यो जु॒षन्त॒ यत् ॥9.102.5॥

a̱sya vra̱te sa̱joṣa̍so̱ viśve̍ de̱vāso̍ a̱druha̍: | spā̱rhā bha̍vanti̱ ranta̍yo ju̱ṣanta̱ yat

यमी॒ गर्भ॑मृता॒वृधो॑ दृ॒शे चारु॒मजी॑जनन् । क॒विं मंहि॑ष्ठमध्व॒रे पु॑रु॒स्पृह॑म् ॥9.102.6॥

yamī̱ garbha̍mṛtā̱vṛdho̍ dṛ̱śe cāru̱majī̍janan | ka̱viṃ maṃhi̍ṣṭhamadhva̱re pu̍ru̱spṛha̍m

स॒मी॒ची॒ने अ॒भि त्मना॑ य॒ह्वी ऋ॒तस्य॑ मा॒तरा॑ । त॒न्वा॒ना य॒ज्ञमा॑नु॒षग्यद॑ञ्ज॒ते ॥9.102.7॥

sa̱mī̱cī̱ne a̱bhi tmanā̍ ya̱hvī ṛ̱tasya̍ mā̱tarā̍ | ta̱nvā̱nā ya̱jñamā̍nu̱ṣagyada̍ñja̱te

क्रत्वा॑ शु॒क्रेभि॑र॒क्षभि॑ॠ॒णोरप॑ व्र॒जं दि॒वः । हि॒न्वन्नृ॒तस्य॒ दीधि॑तिं॒ प्राध्व॒रे ॥9.102.8॥

kratvā̍ śu̱krebhi̍ra̱kṣabhi̍ṝ̱ṇorapa̍ vra̱jaṃ di̱vaḥ | hi̱nvannṛ̱tasya̱ dīdhi̍ti̱ṃ prādhva̱re

६ द्वित आप्त्य: । पवमान: सोम: । उष्णिक् ।

प्र पु॑ना॒नाय॑ वे॒धसे॒ सोमा॑य॒ वच॒ उद्य॑तम् । भृ॒तिं न भ॑रा म॒तिभि॒र्जुजो॑षते ॥9.103.1॥

pra pu̍nā̱nāya̍ ve̱dhase̱ somā̍ya̱ vaca̱ udya̍tam | bhṛ̱tiṃ na bha̍rā ma̱tibhi̱rjujo̍ṣate

परि॒ वारा॑ण्य॒व्यया॒ गोभि॑रञ्जा॒नो अ॑र्षति । त्री ष॒धस्था॑ पुना॒नः कृ॑णुते॒ हरि॑: ॥9.103.2॥

pari̱ vārā̍ṇya̱vyayā̱ gobhi̍rañjā̱no a̍rṣati | trī ṣa̱dhasthā̍ punā̱naḥ kṛ̍ṇute̱ hari̍:

परि॒ कोशं॑ मधु॒श्चुत॑म॒व्यये॒ वारे॑ अर्षति । अ॒भि वाणी॒ॠषी॑णां स॒प्त नू॑षत ॥9.103.3॥

pari̱ kośa̍ṃ madhu̱ścuta̍ma̱vyaye̱ vāre̍ arṣati | a̱bhi vāṇī̱ṝṣī̍ṇāṃ sa̱pta nū̍ṣata

परि॑ णे॒ता म॑ती॒नां वि॒श्वदे॑वो॒ अदा॑भ्यः । सोम॑: पुना॒नश्च॒म्वो॑र्विश॒द्धरि॑: ॥9.103.4॥

pari̍ ṇe̱tā ma̍tī̱nāṃ vi̱śvade̍vo̱ adā̍bhyaḥ | soma̍: punā̱naśca̱mvo̍rviśa̱ddhari̍:

परि॒ दैवी॒रनु॑ स्व॒धा इन्द्रे॑ण याहि स॒रथ॑म् । पु॒ना॒नो वा॒घद्वा॒घद्भि॒रम॑र्त्यः ॥9.103.5॥

pari̱ daivī̱ranu̍ sva̱dhā indre̍ṇa yāhi sa̱ratha̍m | pu̱nā̱no vā̱ghadvā̱ghadbhi̱rama̍rtyaḥ

परि॒ सप्ति॒र्न वा॑ज॒युर्दे॒वो दे॒वेभ्य॑: सु॒तः । व्या॒न॒शिः पव॑मानो॒ वि धा॑वति ॥9.103.6॥

pari̱ sapti̱rna vā̍ja̱yurde̱vo de̱vebhya̍: su̱taḥ | vyā̱na̱śiḥ pava̍māno̱ vi dhā̍vati

६ पर्वतनारदौ काण्वौ, काश्यप्यौ शिखण्डिन्यावप्सरसौ वा । पवमान: सोम: । उष्णिक् ।

सखा॑य॒ आ नि षी॑दत पुना॒नाय॒ प्र गा॑यत । शिशुं॒ न य॒ज्ञैः परि॑ भूषत श्रि॒ये ॥9.104.1॥

sakhā̍ya̱ ā ni ṣī̍data punā̱nāya̱ pra gā̍yata | śiśu̱ṃ na ya̱jñaiḥ pari̍ bhūṣata śri̱ye

समी॑ व॒त्सं न मा॒तृभि॑: सृ॒जता॑ गय॒साध॑नम् । दे॒वा॒व्यं१ मद॑म॒भि द्विश॑वसम् ॥9.104.2॥

samī̍ va̱tsaṃ na mā̱tṛbhi̍: sṛ̱jatā̍ gaya̱sādha̍nam | de̱vā̱vyaṃ1 mada̍ma̱bhi dviśa̍vasam

पु॒नाता॑ दक्ष॒साध॑नं॒ यथा॒ शर्धा॑य वी॒तये॑ । यथा॑ मि॒त्राय॒ वरु॑णाय॒ शंत॑मः ॥9.104.3॥

pu̱nātā̍ dakṣa̱sādha̍na̱ṃ yathā̱ śardhā̍ya vī̱taye̍ | yathā̍ mi̱trāya̱ varu̍ṇāya̱ śaṃta̍maḥ

अ॒स्मभ्यं॑ त्वा वसु॒विद॑म॒भि वाणी॑रनूषत । गोभि॑ष्टे॒ वर्ण॑म॒भि वा॑सयामसि ॥9.104.4॥

a̱smabhya̍ṃ tvā vasu̱vida̍ma̱bhi vāṇī̍ranūṣata | gobhi̍ṣṭe̱ varṇa̍ma̱bhi vā̍sayāmasi

स नो॑ मदानां पत॒ इन्दो॑ दे॒वप्स॑रा असि । सखे॑व॒ सख्ये॑ गातु॒वित्त॑मो भव ॥9.104.5॥

sa no̍ madānāṃ pata̱ indo̍ de̱vapsa̍rā asi | sakhe̍va̱ sakhye̍ gātu̱vitta̍mo bhava

सने॑मि कृ॒ध्य१स्मदा र॒क्षसं॒ कं चि॑द॒त्रिण॑म् । अपादे॑वं द्व॒युमंहो॑ युयोधि नः ॥9.104.6॥

sane̍mi kṛ̱dhya1smadā ra̱kṣasa̱ṃ kaṃ ci̍da̱triṇa̍m | apāde̍vaṃ dva̱yumaṃho̍ yuyodhi naḥ

६ पर्वतनारदौ काण्वौ । पवमान: सोम: । उष्णिक् ।

तं व॑: सखायो॒ मदा॑य पुना॒नम॒भि गा॑यत । शिशुं॒ न य॒ज्ञैः स्व॑दयन्त गू॒र्तिभि॑: ॥9.105.1॥

taṃ va̍: sakhāyo̱ madā̍ya punā̱nama̱bhi gā̍yata | śiśu̱ṃ na ya̱jñaiḥ sva̍dayanta gū̱rtibhi̍:

सं व॒त्स इ॑व मा॒तृभि॒रिन्दु॑र्हिन्वा॒नो अ॑ज्यते । दे॒वा॒वीर्मदो॑ म॒तिभि॒: परि॑ष्कृतः ॥9.105.2॥

saṃ va̱tsa i̍va mā̱tṛbhi̱rindu̍rhinvā̱no a̍jyate | de̱vā̱vīrmado̍ ma̱tibhi̱: pari̍ṣkṛtaḥ

अ॒यं दक्षा॑य॒ साध॑नो॒ऽयं शर्धा॑य वी॒तये॑ । अ॒यं दे॒वेभ्यो॒ मधु॑मत्तमः सु॒तः ॥9.105.3॥

a̱yaṃ dakṣā̍ya̱ sādha̍no̱'yaṃ śardhā̍ya vī̱taye̍ | a̱yaṃ de̱vebhyo̱ madhu̍mattamaḥ su̱taḥ

गोम॑न्न इन्दो॒ अश्व॑वत्सु॒तः सु॑दक्ष धन्व । शुचिं॑ ते॒ वर्ण॒मधि॒ गोषु॑ दीधरम् ॥9.105.4॥

goma̍nna indo̱ aśva̍vatsu̱taḥ su̍dakṣa dhanva | śuci̍ṃ te̱ varṇa̱madhi̱ goṣu̍ dīdharam

स नो॑ हरीणां पत॒ इन्दो॑ दे॒वप्स॑रस्तमः । सखे॑व॒ सख्ये॒ नर्यो॑ रु॒चे भ॑व ॥9.105.5॥

sa no̍ harīṇāṃ pata̱ indo̍ de̱vapsa̍rastamaḥ | sakhe̍va̱ sakhye̱ naryo̍ ru̱ce bha̍va

सने॑मि॒ त्वम॒स्मदाँ अदे॑वं॒ कं चि॑द॒त्रिण॑म् । सा॒ह्वाँ इ॑न्दो॒ परि॒ बाधो॒ अप॑ द्व॒युम् ॥9.105.6॥

sane̍mi̱ tvama̱smadām̐ ade̍va̱ṃ kaṃ ci̍da̱triṇa̍m | sā̱hvām̐ i̍ndo̱ pari̱ bādho̱ apa̍ dva̱yum

((१४) १-३, १०-१४ अग्निश्चाक्षुष:, ४-६ चक्षुर्मानव:, ७-९ मनुराप्सव: । पवमान: सोम: । उष्णिक् ।

इन्द्र॒मच्छ॑ सु॒ता इ॒मे वृष॑णं यन्तु॒ हर॑यः । श्रु॒ष्टी जा॒तास॒ इन्द॑वः स्व॒र्विद॑: ॥9.106.1॥

indra̱maccha̍ su̱tā i̱me vṛṣa̍ṇaṃ yantu̱ hara̍yaḥ | śru̱ṣṭī jā̱tāsa̱ inda̍vaḥ sva̱rvida̍:

अ॒यं भरा॑य सान॒सिरिन्द्रा॑य पवते सु॒तः । सोमो॒ जैत्र॑स्य चेतति॒ यथा॑ वि॒दे ॥9.106.2॥

a̱yaṃ bharā̍ya sāna̱sirindrā̍ya pavate su̱taḥ | somo̱ jaitra̍sya cetati̱ yathā̍ vi̱de

अ॒स्येदिन्द्रो॒ मदे॒ष्वा ग्रा॒भं गृ॑भ्णीत सान॒सिम् । वज्रं॑ च॒ वृष॑णं भर॒त्सम॑प्सु॒जित् ॥9.106.3॥

a̱syedindro̱ made̱ṣvā grā̱bhaṃ gṛ̍bhṇīta sāna̱sim | vajra̍ṃ ca̱ vṛṣa̍ṇaṃ bhara̱tsama̍psu̱jit

प्र ध॑न्वा सोम॒ जागृ॑वि॒रिन्द्रा॑येन्दो॒ परि॑ स्रव । द्यु॒मन्तं॒ शुष्म॒मा भ॑रा स्व॒र्विद॑म् ॥9.106.4॥

pra dha̍nvā soma̱ jāgṛ̍vi̱rindrā̍yendo̱ pari̍ srava | dyu̱manta̱ṃ śuṣma̱mā bha̍rā sva̱rvida̍m

इन्द्रा॑य॒ वृष॑णं॒ मदं॒ पव॑स्व वि॒श्वद॑र्शतः । स॒हस्र॑यामा पथि॒कृद्वि॑चक्ष॒णः ॥9.106.5॥

indrā̍ya̱ vṛṣa̍ṇa̱ṃ mada̱ṃ pava̍sva vi̱śvada̍rśataḥ | sa̱hasra̍yāmā pathi̱kṛdvi̍cakṣa̱ṇaḥ

अ॒स्मभ्यं॑ गातु॒वित्त॑मो दे॒वेभ्यो॒ मधु॑मत्तमः । स॒हस्रं॑ याहि प॒थिभि॒: कनि॑क्रदत् ॥9.106.6॥

a̱smabhya̍ṃ gātu̱vitta̍mo de̱vebhyo̱ madhu̍mattamaḥ | sa̱hasra̍ṃ yāhi pa̱thibhi̱: kani̍kradat

पव॑स्व दे॒ववी॑तय॒ इन्दो॒ धारा॑भि॒रोज॑सा । आ क॒लशं॒ मधु॑मान्त्सोम नः सदः ॥9.106.7॥

pava̍sva de̱vavī̍taya̱ indo̱ dhārā̍bhi̱roja̍sā | ā ka̱laśa̱ṃ madhu̍māntsoma naḥ sadaḥ

तव॑ द्र॒प्सा उ॑द॒प्रुत॒ इन्द्रं॒ मदा॑य वावृधुः । त्वां दे॒वासो॑ अ॒मृता॑य॒ कं प॑पुः ॥9.106.8॥

tava̍ dra̱psā u̍da̱pruta̱ indra̱ṃ madā̍ya vāvṛdhuḥ | tvāṃ de̱vāso̍ a̱mṛtā̍ya̱ kaṃ pa̍puḥ

आ न॑: सुतास इन्दवः पुना॒ना धा॑वता र॒यिम् । वृ॒ष्टिद्या॑वो रीत्यापः स्व॒र्विद॑: ॥9.106.9॥

ā na̍: sutāsa indavaḥ punā̱nā dhā̍vatā ra̱yim | vṛ̱ṣṭidyā̍vo rītyāpaḥ sva̱rvida̍:

सोम॑: पुना॒न ऊ॒र्मिणाऽव्यो॒ वारं॒ वि धा॑वति । अग्रे॑ वा॒चः पव॑मान॒: कनि॑क्रदत् ॥9.106.10॥

soma̍: punā̱na ū̱rmiṇā'vyo̱ vāra̱ṃ vi dhā̍vati | agre̍ vā̱caḥ pava̍māna̱: kani̍kradat

धी॒भिर्हि॑न्वन्ति वा॒जिनं॒ वने॒ क्रीळ॑न्त॒मत्य॑विम् । अ॒भि त्रि॑पृ॒ष्ठं म॒तय॒: सम॑स्वरन् ॥9.106.11॥

dhī̱bhirhi̍nvanti vā̱jina̱ṃ vane̱ krīl̤a̍nta̱matya̍vim | a̱bhi tri̍pṛ̱ṣṭhaṃ ma̱taya̱: sama̍svaran

अस॑र्जि क॒लशाँ॑ अ॒भि मी॒ळ्हे सप्ति॒र्न वा॑ज॒युः । पु॒ना॒नो वाचं॑ ज॒नय॑न्नसिष्यदत् ॥9.106.12॥

asa̍rji ka̱laśā̍m̐ a̱bhi mī̱l̤he sapti̱rna vā̍ja̱yuḥ | pu̱nā̱no vāca̍ṃ ja̱naya̍nnasiṣyadat

पव॑ते हर्य॒तो हरि॒रति॒ ह्वरां॑सि॒ रंह्या॑ । अ॒भ्यर्ष॑न्त्स्तो॒तृभ्यो॑ वी॒रव॒द्यश॑: ॥9.106.13॥

pava̍te harya̱to hari̱rati̱ hvarā̍ṃsi̱ raṃhyā̍ | a̱bhyarṣa̍ntsto̱tṛbhyo̍ vī̱rava̱dyaśa̍:

अ॒या प॑वस्व देव॒युर्मधो॒र्धारा॑ असृक्षत । रेभ॑न्प॒वित्रं॒ पर्ये॑षि वि॒श्वत॑: ॥9.106.14॥

a̱yā pa̍vasva deva̱yurmadho̱rdhārā̍ asṛkṣata | rebha̍npa̱vitra̱ṃ parye̍ṣi vi̱śvata̍:

२६ सप्तर्षय: ( १ भरद्वाजो बार्हस्पत्य: , २ कश्यपो मारीच:, ३ गोतमो राहूगण:, ४ भौमोऽत्रि:, ५ विश्वामित्रो गाथिन:, ६ जमदग्निर्भार्गव:, ७ मैत्रावरुणिर्वसिष्ठ: ) ।पवमान: सोम: । प्रगाथ:= (१,४,६,८,९,१०,१२,१४,१७ बृहती; २,५,७,११,१३,१५,१८ सतोबृहती, ) ३,१६ द्विपदा विराट् ; १९-२६ प्रगाथ:= ( विषमा बृहती, समा सतोबृहती ) ।

परी॒तो षि॑ञ्चता सु॒तं सोमो॒ य उ॑त्त॒मं ह॒विः ।

द॒ध॒न्वाँ यो नर्यो॑ अ॒प्स्व१न्तरा सु॒षाव॒ सोम॒मद्रि॑भिः ॥9.107.1॥

parī̱to ṣi̍ñcatā su̱taṃ somo̱ ya u̍tta̱maṃ ha̱viḥ |

da̱dha̱nvām̐ yo naryo̍ a̱psva1ntarā su̱ṣāva̱ soma̱madri̍bhiḥ

नू॒नं पु॑ना॒नोऽवि॑भि॒: परि॑ स्र॒वाऽद॑ब्धः सुर॒भिन्त॑रः ।

सु॒ते चि॑त्त्वा॒प्सु म॑दामो॒ अन्ध॑सा श्री॒णन्तो॒ गोभि॒रुत्त॑रम् ॥9.107.2॥

nū̱naṃ pu̍nā̱no'vi̍bhi̱: pari̍ sra̱vā'da̍bdhaḥ sura̱bhinta̍raḥ |

su̱te ci̍ttvā̱psu ma̍dāmo̱ andha̍sā śrī̱ṇanto̱ gobhi̱rutta̍ram

परि॑ सुवा॒नश्चक्ष॑से देव॒माद॑न॒: क्रतु॒रिन्दु॑र्विचक्ष॒णः ॥9.107.3॥

pari̍ suvā̱naścakṣa̍se deva̱māda̍na̱: kratu̱rindu̍rvicakṣa̱ṇaḥ

पु॒ना॒नः सो॑म॒ धार॑या॒ऽपो वसा॑नो अर्षसि ।

आ र॑त्न॒धा योनि॑मृ॒तस्य॑ सीद॒स्युत्सो॑ देव हिर॒ण्यय॑: ॥9.107.4॥

pu̱nā̱naḥ so̍ma̱ dhāra̍yā̱'po vasā̍no arṣasi |

ā ra̍tna̱dhā yoni̍mṛ̱tasya̍ sīda̱syutso̍ deva hira̱ṇyaya̍:

दु॒हा॒न ऊध॑र्दि॒व्यं मधु॑ प्रि॒यं प्र॒त्नं स॒धस्थ॒मास॑दत् ।

आ॒पृच्छ्यं॑ ध॒रुणं॑ वा॒ज्य॑र्षति॒ नृभि॑र्धू॒तो वि॑चक्ष॒णः ॥9.107.5॥

du̱hā̱na ūdha̍rdi̱vyaṃ madhu̍ pri̱yaṃ pra̱tnaṃ sa̱dhastha̱māsa̍dat |

ā̱pṛcchya̍ṃ dha̱ruṇa̍ṃ vā̱jya̍rṣati̱ nṛbhi̍rdhū̱to vi̍cakṣa̱ṇaḥ

पु॒ना॒नः सो॑म॒ जागृ॑वि॒रव्यो॒ वारे॒ परि॑ प्रि॒यः ।

त्वं विप्रो॑ अभ॒वोऽङ्गि॑रस्तमो॒ मध्वा॑ य॒ज्ञं मि॑मिक्ष नः ॥9.107.6॥

pu̱nā̱naḥ so̍ma̱ jāgṛ̍vi̱ravyo̱ vāre̱ pari̍ pri̱yaḥ |

tvaṃ vipro̍ abha̱vo'ṅgi̍rastamo̱ madhvā̍ ya̱jñaṃ mi̍mikṣa naḥ

सोमो॑ मी॒ढ्वान्प॑वते गातु॒वित्त॑म॒ ऋषि॒र्विप्रो॑ विचक्ष॒णः ।

त्वं क॒विर॑भवो देव॒वीत॑म॒ आ सूर्यं॑ रोहयो दि॒वि ॥9.107.7॥

somo̍ mī̱ḍhvānpa̍vate gātu̱vitta̍ma̱ ṛṣi̱rvipro̍ vicakṣa̱ṇaḥ |

tvaṃ ka̱vira̍bhavo deva̱vīta̍ma̱ ā sūrya̍ṃ rohayo di̱vi

सोम॑ उ षुवा॒णः सो॒तृभि॒रधि॒ ष्णुभि॒रवी॑नाम् ।

अश्व॑येव ह॒रिता॑ याति॒ धार॑या म॒न्द्रया॑ याति॒ धार॑या ॥9.107.8॥

soma̍ u ṣuvā̱ṇaḥ so̱tṛbhi̱radhi̱ ṣṇubhi̱ravī̍nām |

aśva̍yeva ha̱ritā̍ yāti̱ dhāra̍yā ma̱ndrayā̍ yāti̱ dhāra̍yā

अ॒नू॒पे गोमा॒न्गोभि॑रक्षा॒: सोमो॑ दु॒ग्धाभि॑रक्षाः ।

स॒मु॒द्रं न सं॒वर॑णान्यग्मन्म॒न्दी मदा॑य तोशते ॥9.107.9॥

a̱nū̱pe gomā̱ngobhi̍rakṣā̱: somo̍ du̱gdhābhi̍rakṣāḥ |

sa̱mu̱draṃ na sa̱ṃvara̍ṇānyagmanma̱ndī madā̍ya tośate

आ सो॑म सुवा॒नो अद्रि॑भिस्ति॒रो वारा॑ण्य॒व्यया॑ ।

जनो॒ न पु॒रि च॒म्वो॑र्विश॒द्धरि॒: सदो॒ वने॑षु दधिषे ॥9.107.10॥

ā so̍ma suvā̱no adri̍bhisti̱ro vārā̍ṇya̱vyayā̍ |

jano̱ na pu̱ri ca̱mvo̍rviśa̱ddhari̱: sado̱ vane̍ṣu dadhiṣe

स मा॑मृजे ति॒रो अण्वा॑नि मे॒ष्यो॑ मी॒ळ्हे सप्ति॒र्न वा॑ज॒युः ।

अ॒नु॒माद्य॒: पव॑मानो मनी॒षिभि॒: सोमो॒ विप्रे॑भि॒ॠक्व॑भिः ॥9.107.11॥

sa mā̍mṛje ti̱ro aṇvā̍ni me̱ṣyo̍ mī̱l̤he sapti̱rna vā̍ja̱yuḥ |

a̱nu̱mādya̱: pava̍māno manī̱ṣibhi̱: somo̱ vipre̍bhi̱ṝkva̍bhiḥ

प्र सो॑म दे॒ववी॑तये॒ सिन्धु॒र्न पि॑प्ये॒ अर्ण॑सा ।

अं॒शोः पय॑सा मदि॒रो न जागृ॑वि॒रच्छा॒ कोशं॑ मधु॒श्चुत॑म् ॥9.107.12॥

pra so̍ma de̱vavī̍taye̱ sindhu̱rna pi̍pye̱ arṇa̍sā |

a̱ṃśoḥ paya̍sā madi̱ro na jāgṛ̍vi̱racchā̱ kośa̍ṃ madhu̱ścuta̍m

आ ह॑र्य॒तो अर्जु॑ने॒ अत्के॑ अव्यत प्रि॒यः सू॒नुर्न मर्ज्य॑: ।

तमीं॑ हिन्वन्त्य॒पसो॒ यथा॒ रथं॑ न॒दीष्वा गभ॑स्त्योः ॥9.107.13॥

ā ha̍rya̱to arju̍ne̱ atke̍ avyata pri̱yaḥ sū̱nurna marjya̍: |

tamī̍ṃ hinvantya̱paso̱ yathā̱ ratha̍ṃ na̱dīṣvā gabha̍styoḥ

अ॒भि सोमा॑स आ॒यव॒: पव॑न्ते॒ मद्यं॒ मद॑म् ।

स॒मु॒द्रस्याधि॑ वि॒ष्टपि॑ मनी॒षिणो॑ मत्स॒रास॑: स्व॒र्विद॑: ॥9.107.14॥

a̱bhi somā̍sa ā̱yava̱: pava̍nte̱ madya̱ṃ mada̍m |

sa̱mu̱drasyādhi̍ vi̱ṣṭapi̍ manī̱ṣiṇo̍ matsa̱rāsa̍: sva̱rvida̍:

तर॑त्समु॒द्रं पव॑मान ऊ॒र्मिणा॒ राजा॑ दे॒व ऋ॒तं बृ॒हत् ।

अर्ष॑न्मि॒त्रस्य॒ वरु॑णस्य॒ धर्म॑णा॒ प्र हि॑न्वा॒न ऋ॒तं बृ॒हत् ॥9.107.15॥

tara̍tsamu̱draṃ pava̍māna ū̱rmiṇā̱ rājā̍ de̱va ṛ̱taṃ bṛ̱hat |

arṣa̍nmi̱trasya̱ varu̍ṇasya̱ dharma̍ṇā̱ pra hi̍nvā̱na ṛ̱taṃ bṛ̱hat

नृभि॑र्येमा॒नो ह॑र्य॒तो वि॑चक्ष॒णो राजा॑ दे॒वः स॑मु॒द्रिय॑: ॥9.107.16॥

nṛbhi̍ryemā̱no ha̍rya̱to vi̍cakṣa̱ṇo rājā̍ de̱vaḥ sa̍mu̱driya̍:

इन्द्रा॑य पवते॒ मद॒: सोमो॑ म॒रुत्व॑ते सु॒तः । स॒हस्र॑धारो॒ अत्यव्य॑मर्षति॒ तमी॑ मृजन्त्या॒यव॑: ॥9.107.17॥

indrā̍ya pavate̱ mada̱: somo̍ ma̱rutva̍te su̱taḥ | sa̱hasra̍dhāro̱ atyavya̍marṣati̱ tamī̍ mṛjantyā̱yava̍:

पु॒ना॒नश्च॒मू ज॒नय॑न्म॒तिं क॒विः सोमो॑ दे॒वेषु॑ रण्यति ।

अ॒पो वसा॑न॒: परि॒ गोभि॒रुत्त॑र॒: सीद॒न्वने॑ष्वव्यत ॥9.107.18॥

pu̱nā̱naśca̱mū ja̱naya̍nma̱tiṃ ka̱viḥ somo̍ de̱veṣu̍ raṇyati |

a̱po vasā̍na̱: pari̱ gobhi̱rutta̍ra̱: sīda̱nvane̍ṣvavyata

तवा॒हं सो॑म रारण स॒ख्य इ॑न्दो दि॒वेदि॑वे ।

पु॒रूणि॑ बभ्रो॒ नि च॑रन्ति॒ मामव॑ परि॒धीँरति॒ ताँ इ॑हि ॥9.107.19॥

tavā̱haṃ so̍ma rāraṇa sa̱khya i̍ndo di̱vedi̍ve |

pu̱rūṇi̍ babhro̱ ni ca̍ranti̱ māmava̍ pari̱dhīm̐rati̱ tām̐ i̍hi

उ॒ताहं नक्त॑मु॒त सो॑म ते॒ दिवा॑ स॒ख्याय॑ बभ्र॒ ऊध॑नि ।

घृ॒णा तप॑न्त॒मति॒ सूर्यं॑ प॒रः श॑कु॒ना इ॑व पप्तिम ॥9.107.20॥

u̱tāhaṃ nakta̍mu̱ta so̍ma te̱ divā̍ sa̱khyāya̍ babhra̱ ūdha̍ni |

ghṛ̱ṇā tapa̍nta̱mati̱ sūrya̍ṃ pa̱raḥ śa̍ku̱nā i̍va paptima

मृ॒ज्यमा॑नः सुहस्त्य समु॒द्रे वाच॑मिन्वसि ।

र॒यिं पि॒शङ्गं॑ बहु॒लं पु॑रु॒स्पृहं॒ पव॑माना॒भ्य॑र्षसि ॥9.107.21॥

mṛ̱jyamā̍naḥ suhastya samu̱dre vāca̍minvasi |

ra̱yiṃ pi̱śaṅga̍ṃ bahu̱laṃ pu̍ru̱spṛha̱ṃ pava̍mānā̱bhya̍rṣasi

मृ॒जा॒नो वारे॒ पव॑मानो अ॒व्यये॒ वृषाव॑ चक्रदो॒ वने॑ ।

दे॒वानां॑ सोम पवमान निष्कृ॒तं गोभि॑रञ्जा॒नो अ॑र्षसि ॥9.107.22॥

mṛ̱jā̱no vāre̱ pava̍māno a̱vyaye̱ vṛṣāva̍ cakrado̱ vane̍ |

de̱vānā̍ṃ soma pavamāna niṣkṛ̱taṃ gobhi̍rañjā̱no a̍rṣasi

पव॑स्व॒ वाज॑सातये॒ऽभि विश्वा॑नि॒ काव्या॑ ।

त्वं स॑मु॒द्रं प्र॑थ॒मो वि धा॑रयो दे॒वेभ्य॑: सोम मत्स॒रः ॥9.107.23॥

pava̍sva̱ vāja̍sātaye̱'bhi viśvā̍ni̱ kāvyā̍ |

tvaṃ sa̍mu̱draṃ pra̍tha̱mo vi dhā̍rayo de̱vebhya̍: soma matsa̱raḥ

स तू प॑वस्व॒ परि॒ पार्थि॑वं॒ रजो॑ दि॒व्या च॑ सोम॒ धर्म॑भिः ।

त्वां विप्रा॑सो म॒तिभि॑र्विचक्षण शु॒भ्रं हि॑न्वन्ति धी॒तिभि॑: ॥9.107.24॥

sa tū pa̍vasva̱ pari̱ pārthi̍va̱ṃ rajo̍ di̱vyā ca̍ soma̱ dharma̍bhiḥ |

tvāṃ viprā̍so ma̱tibhi̍rvicakṣaṇa śu̱bhraṃ hi̍nvanti dhī̱tibhi̍:

पव॑माना असृक्षत प॒वित्र॒मति॒ धार॑या ।

म॒रुत्व॑न्तो मत्स॒रा इ॑न्द्रि॒या हया॑ मे॒धाम॒भि प्रयां॑सि च ॥9.107.25॥

pava̍mānā asṛkṣata pa̱vitra̱mati̱ dhāra̍yā |

ma̱rutva̍nto matsa̱rā i̍ndri̱yā hayā̍ me̱dhāma̱bhi prayā̍ṃsi ca

अ॒पो वसा॑न॒: परि॒ कोश॑मर्ष॒तीन्दु॑र्हिया॒नः सो॒तृभि॑: ।

ज॒नय॒ञ्ज्योति॑र्म॒न्दना॑ अवीवश॒द्गाः कृ॑ण्वा॒नो न नि॒र्णिज॑म् ॥9.107.26॥

a̱po vasā̍na̱: pari̱ kośa̍marṣa̱tīndu̍rhiyā̱naḥ so̱tṛbhi̍: |

ja̱naya̱ñjyoti̍rma̱ndanā̍ avīvaśa̱dgāḥ kṛ̍ṇvā̱no na ni̱rṇija̍m

(१-१६ ) १-२ गौरिवीति: शाक्त्य:; ३,१४-१६ शक्तिर्वासिष्ठ:,४-५ ऊरूराङ्गिरस:,६-७ ऋजिश्वा भारद्वाज:, ८-९ ऊर्ध्वसद्मा आङ्गिरस:, १०-११ कृतयशा आङ्गिरस:,१२-१३ ऋणचयो राजर्षि: । पवमान: सोम: । काकुभ: प्रगाथ:=( विषमा ककुप् , समा सतोबृहती ) , १३ यवमध्या गायत्री ।

पव॑स्व॒ मधु॑मत्तम॒ इन्द्रा॑य सोम क्रतु॒वित्त॑मो॒ मद॑: । महि॑ द्यु॒क्षत॑मो॒ मद॑: ॥9.108.1॥

pava̍sva̱ madhu̍mattama̱ indrā̍ya soma kratu̱vitta̍mo̱ mada̍: | mahi̍ dyu̱kṣata̍mo̱ mada̍:

यस्य॑ ते पी॒त्वा वृ॑ष॒भो वृ॑षा॒यते॒ऽस्य पी॒ता स्व॒र्विद॑: ।

स सु॒प्रके॑तो अ॒भ्य॑क्रमी॒दिषोऽच्छा॒ वाजं॒ नैत॑शः ॥9.108.2॥

yasya̍ te pī̱tvā vṛ̍ṣa̱bho vṛ̍ṣā̱yate̱'sya pī̱tā sva̱rvida̍: |

sa su̱prake̍to a̱bhya̍kramī̱diṣo'cchā̱ vāja̱ṃ naita̍śaḥ

त्वं ह्य१ङ्ग दैव्या॒ पव॑मान॒ जनि॑मानि द्यु॒मत्त॑मः । अ॒मृ॒त॒त्वाय॑ घो॒षय॑: ॥9.108.3॥

tvaṃ hya1ṅga daivyā̱ pava̍māna̱ jani̍māni dyu̱matta̍maḥ | a̱mṛ̱ta̱tvāya̍ gho̱ṣaya̍:

येना॒ नव॑ग्वो द॒ध्यङ्ङ॑पोर्णु॒ते येन॒ विप्रा॑स आपि॒रे ।

दे॒वानां॑ सु॒म्ने अ॒मृत॑स्य॒ चारु॑णो॒ येन॒ श्रवां॑स्यान॒शुः ॥9.108.4॥

yenā̱ nava̍gvo da̱dhyaṅṅa̍porṇu̱te yena̱ viprā̍sa āpi̱re |

de̱vānā̍ṃ su̱mne a̱mṛta̍sya̱ cāru̍ṇo̱ yena̱ śravā̍ṃsyāna̱śuḥ

ए॒ष स्य धार॑या सु॒तोऽव्यो॒ वारे॑भिः पवते म॒दिन्त॑मः । क्रीळ॑न्नू॒र्मिर॒पामि॑व ॥9.108.5॥

e̱ṣa sya dhāra̍yā su̱to'vyo̱ vāre̍bhiḥ pavate ma̱dinta̍maḥ | krīl̤a̍nnū̱rmira̱pāmi̍va

य उ॒स्रिया॒ अप्या॑ अ॒न्तरश्म॑नो॒ निर्गा अकृ॑न्त॒दोज॑सा ।

अ॒भि व्र॒जं त॑त्निषे॒ गव्य॒मश्व्यं॑ व॒र्मीव॑ धृष्ण॒वा रु॑ज ॥9.108.6॥

ya u̱sriyā̱ apyā̍ a̱ntaraśma̍no̱ nirgā akṛ̍nta̱doja̍sā |

a̱bhi vra̱jaṃ ta̍tniṣe̱ gavya̱maśvya̍ṃ va̱rmīva̍ dhṛṣṇa̱vā ru̍ja

आ सो॑ता॒ परि॑ षिञ्च॒ताऽश्वं॒ न स्तोम॑म॒प्तुरं॑ रज॒स्तुर॑म् । व॒न॒क्र॒क्षमु॑द॒प्रुत॑म् ॥9.108.7॥

ā so̍tā̱ pari̍ ṣiñca̱tā'śva̱ṃ na stoma̍ma̱ptura̍ṃ raja̱stura̍m | va̱na̱kra̱kṣamu̍da̱pruta̍m

स॒हस्र॑धारं वृष॒भं प॑यो॒वृधं॑ प्रि॒यं दे॒वाय॒ जन्म॑ने ।

ऋ॒तेन॒ य ऋ॒तजा॑तो विवावृ॒धे राजा॑ दे॒व ऋ॒तं बृ॒हत् ॥9.108.8॥

sa̱hasra̍dhāraṃ vṛṣa̱bhaṃ pa̍yo̱vṛdha̍ṃ pri̱yaṃ de̱vāya̱ janma̍ne |

ṛ̱tena̱ ya ṛ̱tajā̍to vivāvṛ̱dhe rājā̍ de̱va ṛ̱taṃ bṛ̱hat

अ॒भि द्यु॒म्नं बृ॒हद्यश॒ इष॑स्पते दिदी॒हि दे॑व देव॒युः । वि कोशं॑ मध्य॒मं यु॑व ॥9.108.9॥

a̱bhi dyu̱mnaṃ bṛ̱hadyaśa̱ iṣa̍spate didī̱hi de̍va deva̱yuḥ | vi kośa̍ṃ madhya̱maṃ yu̍va

आ व॑च्यस्व सुदक्ष च॒म्वो॑: सु॒तो वि॒शां वह्नि॒र्न वि॒श्पति॑: ।

वृ॒ष्टिं दि॒वः प॑वस्व री॒तिम॒पां जिन्वा॒ गवि॑ष्टये॒ धिय॑: ॥9.108.10॥

ā va̍cyasva sudakṣa ca̱mvo̍: su̱to vi̱śāṃ vahni̱rna vi̱śpati̍: |

vṛ̱ṣṭiṃ di̱vaḥ pa̍vasva rī̱tima̱pāṃ jinvā̱ gavi̍ṣṭaye̱ dhiya̍:

ए॒तमु॒ त्यं म॑द॒च्युतं॑ स॒हस्र॑धारं वृष॒भं दिवो॑ दुहुः । विश्वा॒ वसू॑नि॒ बिभ्र॑तम् ॥9.108.11॥

e̱tamu̱ tyaṃ ma̍da̱cyuta̍ṃ sa̱hasra̍dhāraṃ vṛṣa̱bhaṃ divo̍ duhuḥ | viśvā̱ vasū̍ni̱ bibhra̍tam

वृषा॒ वि ज॑ज्ञे ज॒नय॒न्नम॑र्त्यः प्र॒तप॒ञ्ज्योति॑षा॒ तम॑: ।

स सुष्टु॑तः क॒विभि॑र्नि॒र्णिजं॑ दधे त्रि॒धात्व॑स्य॒ दंस॑सा ॥9.108.12॥

vṛṣā̱ vi ja̍jñe ja̱naya̱nnama̍rtyaḥ pra̱tapa̱ñjyoti̍ṣā̱ tama̍: |

sa suṣṭu̍taḥ ka̱vibhi̍rni̱rṇija̍ṃ dadhe tri̱dhātva̍sya̱ daṃsa̍sā

स सु॑न्वे॒ यो वसू॑नां॒ यो रा॒यामा॑ने॒ता य इळा॑नाम् । सोमो॒ यः सु॑क्षिती॒नाम् ॥9.108.13॥

sa su̍nve̱ yo vasū̍nā̱ṃ yo rā̱yāmā̍ne̱tā ya il̤ā̍nām | somo̱ yaḥ su̍kṣitī̱nām

यस्य॑ न॒ इन्द्र॒: पिबा॒द्यस्य॑ म॒रुतो॒ यस्य॑ वार्य॒मणा॒ भग॑: ।

आ येन॑ मि॒त्रावरु॑णा॒ करा॑मह॒ एन्द्र॒मव॑से म॒हे ॥9.108.14॥

yasya̍ na̱ indra̱: pibā̱dyasya̍ ma̱ruto̱ yasya̍ vārya̱maṇā̱ bhaga̍: |

ā yena̍ mi̱trāvaru̍ṇā̱ karā̍maha̱ endra̱mava̍se ma̱he

इन्द्रा॑य सोम॒ पात॑वे॒ नृभि॑र्य॒तः स्वा॑यु॒धो म॒दिन्त॑मः । पव॑स्व॒ मधु॑मत्तमः ॥9.108.15॥

indrā̍ya soma̱ pāta̍ve̱ nṛbhi̍rya̱taḥ svā̍yu̱dho ma̱dinta̍maḥ | pava̍sva̱ madhu̍mattamaḥ

इन्द्र॑स्य॒ हार्दि॑ सोम॒धान॒मा वि॑श समु॒द्रमि॑व॒ सिन्ध॑वः ।

जुष्टो॑ मि॒त्राय॒ वरु॑णाय वा॒यवे॑ दि॒वो वि॑ष्ट॒म्भ उ॑त्त॒मः ॥9.108.16॥

indra̍sya̱ hārdi̍ soma̱dhāna̱mā vi̍śa samu̱drami̍va̱ sindha̍vaḥ |

juṣṭo̍ mi̱trāya̱ varu̍ṇāya vā̱yave̍ di̱vo vi̍ṣṭa̱mbha u̍tta̱maḥ

२२ अग्नयो धिष्ण्या ऐश्वरय: । पवमान: सोम: ।द्विपदा विराट् ।

परि॒ प्र ध॒न्वेन्द्रा॑य सोम स्वा॒दुर्मि॒त्राय॑ पू॒ष्णे भगा॑य। १

इन्द्र॑स्ते सोम सु॒तस्य॑ पेया॒: क्रत्वे॒ दक्षा॑य॒ विश्वे॑ च दे॒वाः ॥9.109.1॥

pari̱ pra dha̱nvendrā̍ya soma svā̱durmi̱trāya̍ pū̱ṣṇe bhagā̍ya| 1

indra̍ste soma su̱tasya̍ peyā̱: kratve̱ dakṣā̍ya̱ viśve̍ ca de̱vāḥ

२

ए॒वामृता॑य म॒हे क्षया॑य॒ स शु॒क्रो अ॑र्ष दि॒व्यः पी॒यूष॑:। ३

पव॑स्व सोम म॒हान्त्स॑मु॒द्रः पि॒ता दे॒वानां॒ विश्वा॒भि धाम॑ ॥9.109.2॥

2

e̱vāmṛtā̍ya ma̱he kṣayā̍ya̱ sa śu̱kro a̍rṣa di̱vyaḥ pī̱yūṣa̍:| 3

pava̍sva soma ma̱hāntsa̍mu̱draḥ pi̱tā de̱vānā̱ṃ viśvā̱bhi dhāma̍

४

शु॒क्रः प॑वस्व दे॒वेभ्य॑: सोम दि॒वे पृ॑थि॒व्यै शं च॑ प्र॒जायै॑। ५

दि॒वो ध॒र्तासि॑ शु॒क्रः पी॒यूष॑: स॒त्ये विध॑र्मन्वा॒जी प॑वस्व ॥9.109.3॥

4

śu̱kraḥ pa̍vasva de̱vebhya̍: soma di̱ve pṛ̍thi̱vyai śaṃ ca̍ pra̱jāyai̍| 5

di̱vo dha̱rtāsi̍ śu̱kraḥ pī̱yūṣa̍: sa̱tye vidha̍rmanvā̱jī pa̍vasva

६

पव॑स्व सोम द्यु॒म्नी सु॑धा॒रो म॒हामवी॑ना॒मनु॑ पू॒र्व्यः। ७

नृभि॑र्येमा॒नो ज॑ज्ञा॒नः पू॒तः क्षर॒द्विश्वा॑नि म॒न्द्रः स्व॒र्वित् ॥9.109.4॥

6

pava̍sva soma dyu̱mnī su̍dhā̱ro ma̱hāmavī̍nā̱manu̍ pū̱rvyaḥ| 7

nṛbhi̍ryemā̱no ja̍jñā̱naḥ pū̱taḥ kṣara̱dviśvā̍ni ma̱ndraḥ sva̱rvit

८

इन्दु॑: पुना॒नः प्र॒जामु॑रा॒णः कर॒द्विश्वा॑नि॒ द्रवि॑णानि नः। ९

पव॑स्व सोम॒ क्रत्वे॒ दक्षा॒याऽश्वो॒ न नि॒क्तो वा॒जी धना॑य ॥9.109.5॥

8

indu̍: punā̱naḥ pra̱jāmu̍rā̱ṇaḥ kara̱dviśvā̍ni̱ dravi̍ṇāni naḥ| 9

pava̍sva soma̱ kratve̱ dakṣā̱yā'śvo̱ na ni̱kto vā̱jī dhanā̍ya

१०

तं ते॑ सो॒तारो॒ रसं॒ मदा॑य पु॒नन्ति॒ सोमं॑ म॒हे द्यु॒म्नाय॑ । ११

शिशुं॑ जज्ञा॒नं हरिं॑ मृजन्ति प॒वित्रे॒ सोमं॑ दे॒वेभ्य॒ इन्दु॑म् ॥9.109.6॥

10

taṃ te̍ so̱tāro̱ rasa̱ṃ madā̍ya pu̱nanti̱ soma̍ṃ ma̱he dyu̱mnāya̍ | 11

śiśu̍ṃ jajñā̱naṃ hari̍ṃ mṛjanti pa̱vitre̱ soma̍ṃ de̱vebhya̱ indu̍m

१२

इन्दु॑: पविष्ट॒ चारु॒र्मदा॑या॒ऽपामु॒पस्थे॑ क॒विर्भगा॑य १३

बिभ॑र्ति॒ चार्विन्द्र॑स्य॒ नाम॒ येन॒ विश्वा॑नि वृ॒त्रा ज॒घान॑ ॥9.109.7॥

12

indu̍: paviṣṭa̱ cāru̱rmadā̍yā̱'pāmu̱pasthe̍ ka̱virbhagā̍ya 13

bibha̍rti̱ cārvindra̍sya̱ nāma̱ yena̱ viśvā̍ni vṛ̱trā ja̱ghāna̍

१४

पिब॑न्त्यस्य॒ विश्वे॑ दे॒वासो॒ गोभि॑: श्री॒तस्य॒ नृभि॑: सु॒तस्य॑ । १५

प्र सु॑वा॒नो अ॑क्षाः स॒हस्र॑धारस्ति॒रः प॒वित्रं॒ वि वार॒मव्य॑म् ॥9.109.8॥

14

piba̍ntyasya̱ viśve̍ de̱vāso̱ gobhi̍: śrī̱tasya̱ nṛbhi̍: su̱tasya̍ | 15

pra su̍vā̱no a̍kṣāḥ sa̱hasra̍dhārasti̱raḥ pa̱vitra̱ṃ vi vāra̱mavya̍m

१६

स वा॒ज्य॑क्षाः स॒हस्र॑रेता अ॒द्भिर्मृ॑जा॒नो गोभि॑: श्रीणा॒नः । १७

प्र सो॑म या॒हीन्द्र॑स्य कु॒क्षा नृभि॑र्येमा॒नो अद्रि॑भिः सु॒तः ॥9.109.9॥

16

sa vā̱jya̍kṣāḥ sa̱hasra̍retā a̱dbhirmṛ̍jā̱no gobhi̍: śrīṇā̱naḥ | 17

pra so̍ma yā̱hīndra̍sya ku̱kṣā nṛbhi̍ryemā̱no adri̍bhiḥ su̱taḥ

१८

अस॑र्जि वा॒जी ति॒रः प॒वित्र॒मिन्द्रा॑य॒ सोम॑: स॒हस्र॑धारः । १९

अ॒ञ्जन्त्ये॑नं॒ मध्वो॒ रसे॒नेन्द्रा॑य॒ वृष्ण॒ इन्दुं॒ मदा॑य ॥9.109.10॥

18

asa̍rji vā̱jī ti̱raḥ pa̱vitra̱mindrā̍ya̱ soma̍: sa̱hasra̍dhāraḥ | 19

a̱ñjantye̍na̱ṃ madhvo̱ rase̱nendrā̍ya̱ vṛṣṇa̱ indu̱ṃ madā̍ya

२०

दे॒वेभ्य॑स्त्वा॒ वृथा॒ पाज॑से॒ऽपो वसा॑नं॒ हरिं॑ मृजन्ति । २१

इन्दु॒रिन्द्रा॑य तोशते॒ नि तो॑शते श्री॒णन्नु॒ग्रो रि॒णन्न॒पः ॥9.109.11॥

20

de̱vebhya̍stvā̱ vṛthā̱ pāja̍se̱'po vasā̍na̱ṃ hari̍ṃ mṛjanti | 21

indu̱rindrā̍ya tośate̱ ni to̍śate śrī̱ṇannu̱gro ri̱ṇanna̱paḥ

१२ त्र्यरुणस्त्रैवृष्ण:,त्रसदस्यु: पौरुकुत्स्य: । पवमान: सोम: ।१-३ पिपीलिकमध्या अनुष्टुप् , ४-९ ऊर्ध्वबृहती,१०-१२ विराट् ।

पर्यू॒ षु प्र ध॑न्व॒ वाज॑सातये॒ परि॑ वृ॒त्राणि॑ स॒क्षणि॑: । द्वि॒षस्त॒रध्या॑ ऋण॒या न॑ ईयसे ॥9.110.1॥

paryū̱ ṣu pra dha̍nva̱ vāja̍sātaye̱ pari̍ vṛ̱trāṇi̍ sa̱kṣaṇi̍: | dvi̱ṣasta̱radhyā̍ ṛṇa̱yā na̍ īyase

अनु॒ हि त्वा॑ सु॒तं सो॑म॒ मदा॑मसि म॒हे स॑मर्य॒राज्ये॑ । वाजाँ॑ अ॒भि प॑वमान॒ प्र गा॑हसे ॥9.110.2॥

anu̱ hi tvā̍ su̱taṃ so̍ma̱ madā̍masi ma̱he sa̍marya̱rājye̍ | vājā̍m̐ a̱bhi pa̍vamāna̱ pra gā̍hase

अजी॑जनो॒ हि प॑वमान॒ सूर्यं॑ वि॒धारे॒ शक्म॑ना॒ पय॑: । गोजी॑रया॒ रंह॑माण॒: पुरं॑ध्या ॥9.110.3॥

ajī̍jano̱ hi pa̍vamāna̱ sūrya̍ṃ vi̱dhāre̱ śakma̍nā̱ paya̍: | gojī̍rayā̱ raṃha̍māṇa̱: pura̍ṃdhyā

अजी॑जनो अमृत॒ मर्त्ये॒ष्वाँ ऋ॒तस्य॒ धर्म॑न्न॒मृत॑स्य॒ चारु॑णः । सदा॑सरो॒ वाज॒मच्छा॒ सनि॑ष्यदत् ॥9.110.4॥

ajī̍jano amṛta̱ martye̱ṣvām̐ ṛ̱tasya̱ dharma̍nna̱mṛta̍sya̱ cāru̍ṇaḥ | sadā̍saro̱ vāja̱macchā̱ sani̍ṣyadat

अ॒भ्य॑भि॒ हि श्रव॑सा त॒तर्दि॒थोत्सं॒ न कं चि॑ज्जन॒पान॒मक्षि॑तम् । शर्या॑भि॒र्न भर॑माणो॒ गभ॑स्त्योः ॥9.110.5॥

a̱bhya̍bhi̱ hi śrava̍sā ta̱tardi̱thotsa̱ṃ na kaṃ ci̍jjana̱pāna̱makṣi̍tam | śaryā̍bhi̱rna bhara̍māṇo̱ gabha̍styoḥ

आदीं॒ के चि॒त्पश्य॑मानास॒ आप्यं॑ वसु॒रुचो॑ दि॒व्या अ॒भ्य॑नूषत । वारं॒ न दे॒वः स॑वि॒ता व्यू॑र्णुते ॥9.110.6॥

ādī̱ṃ ke ci̱tpaśya̍mānāsa̱ āpya̍ṃ vasu̱ruco̍ di̱vyā a̱bhya̍nūṣata | vāra̱ṃ na de̱vaḥ sa̍vi̱tā vyū̍rṇute

त्वे सो॑म प्रथ॒मा वृ॒क्तब॑र्हिषो म॒हे वाजा॑य॒ श्रव॑से॒ धियं॑ दधुः । स त्वं नो॑ वीर वी॒र्या॑य चोदय ॥9.110.7॥

tve so̍ma pratha̱mā vṛ̱ktaba̍rhiṣo ma̱he vājā̍ya̱ śrava̍se̱ dhiya̍ṃ dadhuḥ | sa tvaṃ no̍ vīra vī̱ryā̍ya codaya

दि॒वः पी॒यूषं॑ पू॒र्व्यं यदु॒क्थ्यं॑ म॒हो गा॒हाद्दि॒व आ निर॑धुक्षत । इन्द्र॑म॒भि जाय॑मानं॒ सम॑स्वरन् ॥9.110.8॥

di̱vaḥ pī̱yūṣa̍ṃ pū̱rvyaṃ yadu̱kthya̍ṃ ma̱ho gā̱hāddi̱va ā nira̍dhukṣata | indra̍ma̱bhi jāya̍māna̱ṃ sama̍svaran

अध॒ यदि॒मे प॑वमान॒ रोद॑सी इ॒मा च॒ विश्वा॒ भुव॑ना॒भि म॒ज्मना॑ ।

यू॒थे न नि॒:ष्ठा वृ॑ष॒भो वि ति॑ष्ठसे ॥9.110.9॥

adha̱ yadi̱me pa̍vamāna̱ roda̍sī i̱mā ca̱ viśvā̱ bhuva̍nā̱bhi ma̱jmanā̍ |

yū̱the na ni̱:ṣṭhā vṛ̍ṣa̱bho vi ti̍ṣṭhase

सोम॑: पुना॒नो अ॒व्यये॒ वारे॒ शिशु॒र्न क्रीळ॒न्पव॑मानो अक्षाः । स॒हस्र॑धारः श॒तवा॑ज॒ इन्दु॑: ॥9.110.10॥

soma̍: punā̱no a̱vyaye̱ vāre̱ śiśu̱rna krīl̤a̱npava̍māno akṣāḥ | sa̱hasra̍dhāraḥ śa̱tavā̍ja̱ indu̍:

ए॒ष पु॑ना॒नो मधु॑माँ ऋ॒तावेन्द्रा॒येन्दु॑: पवते स्वा॒दुरू॒र्मिः । वा॒ज॒सनि॑र्वरिवो॒विद्व॑यो॒धाः ॥9.110.11॥

e̱ṣa pu̍nā̱no madhu̍mām̐ ṛ̱tāvendrā̱yendu̍: pavate svā̱durū̱rmiḥ | vā̱ja̱sani̍rvarivo̱vidva̍yo̱dhāḥ

स प॑वस्व॒ सह॑मानः पृत॒न्यून्त्सेध॒न्रक्षां॒स्यप॑ दु॒र्गहा॑णि । स्वा॒यु॒धः सा॑स॒ह्वान्त्सो॑म॒ शत्रू॑न् ॥9.110.12॥

sa pa̍vasva̱ saha̍mānaḥ pṛta̱nyūntsedha̱nrakṣā̱ṃsyapa̍ du̱rgahā̍ṇi | svā̱yu̱dhaḥ sā̍sa̱hvāntso̍ma̱ śatrū̍n

३ अनानत: पारुच्छेपि: । पवमान: सोम: ।अत्यष्टि: ।

अ॒या रु॒चा हरि॑ण्या पुना॒नो विश्वा॒ द्वेषां॑सि तरति स्व॒युग्व॑भि॒: सूरो॒ न स्व॒युग्व॑भिः ।

धारा॑ सु॒तस्य॑ रोचते पुना॒नो अ॑रु॒षो हरि॑: । विश्वा॒ यद्रू॒पा प॑रि॒यात्यृक्व॑भिः स॒प्तास्ये॑भि॒ॠक्व॑भिः ॥9.111.1॥

a̱yā ru̱cā hari̍ṇyā punā̱no viśvā̱ dveṣā̍ṃsi tarati sva̱yugva̍bhi̱: sūro̱ na sva̱yugva̍bhiḥ |

dhārā̍ su̱tasya̍ rocate punā̱no a̍ru̱ṣo hari̍: | viśvā̱ yadrū̱pā pa̍ri̱yātyṛkva̍bhiḥ sa̱ptāsye̍bhi̱ṝkva̍bhiḥ

त्वं त्यत्प॑णी॒नां वि॑दो॒ वसु॒ सं मा॒तृभि॑र्मर्जयसि॒ स्व आ दम॑ ऋ॒तस्य॑ धी॒तिभि॒र्दमे॑ ।

प॒रा॒वतो॒ न साम॒ तद्यत्रा॒ रण॑न्ति धी॒तय॑: । त्रि॒धातु॑भि॒ररु॑षीभि॒र्वयो॑ दधे॒ रोच॑मानो॒ वयो॑ दधे ॥9.111.2॥

tvaṃ tyatpa̍ṇī̱nāṃ vi̍do̱ vasu̱ saṃ mā̱tṛbhi̍rmarjayasi̱ sva ā dama̍ ṛ̱tasya̍ dhī̱tibhi̱rdame̍ |

pa̱rā̱vato̱ na sāma̱ tadyatrā̱ raṇa̍nti dhī̱taya̍: | tri̱dhātu̍bhi̱raru̍ṣībhi̱rvayo̍ dadhe̱ roca̍māno̱ vayo̍ dadhe

पूर्वा॒मनु॑ प्र॒दिशं॑ याति॒ चेकि॑त॒त्सं र॒श्मिभि॑र्यतते दर्श॒तो रथो॒ दैव्यो॑ दर्श॒तो रथ॑: ।

अग्म॑न्नु॒क्थानि॒ पौंस्येन्द्रं॒ जैत्रा॑य हर्षयन् । वज्र॑श्च॒ यद्भव॑थो॒ अन॑पच्युता स॒मत्स्वन॑पच्युता ॥9.111.3॥

pūrvā̱manu̍ pra̱diśa̍ṃ yāti̱ ceki̍ta̱tsaṃ ra̱śmibhi̍ryatate darśa̱to ratho̱ daivyo̍ darśa̱to ratha̍: |

agma̍nnu̱kthāni̱ pauṃsyendra̱ṃ jaitrā̍ya harṣayan | vajra̍śca̱ yadbhava̍tho̱ ana̍pacyutā sa̱matsvana̍pacyutā

४ शिशुराङ्गिरस: । पवमान: सोम: ।पङ्क्ति: ।

ना॒ना॒नं वा उ॑ नो॒ धियो॒ वि व्र॒तानि॒ जना॑नाम् ।

तक्षा॑ रि॒ष्टं रु॒तं भि॒षग्ब्र॒ह्मा सु॒न्वन्त॑मिच्छ॒तीन्द्रा॑येन्दो॒ परि॑ स्रव ॥9.112.1॥

nā̱nā̱naṃ vā u̍ no̱ dhiyo̱ vi vra̱tāni̱ janā̍nām |

takṣā̍ ri̱ṣṭaṃ ru̱taṃ bhi̱ṣagbra̱hmā su̱nvanta̍miccha̱tīndrā̍yendo̱ pari̍ srava

जर॑तीभि॒रोष॑धीभिः प॒र्णेभि॑: शकु॒नाना॑म् ।

का॒र्मा॒रो अश्म॑भि॒र्द्युभि॒र्हिर॑ण्यवन्तमिच्छ॒तीन्द्रा॑येन्दो॒ परि॑ स्रव ॥9.112.2॥

jara̍tībhi̱roṣa̍dhībhiḥ pa̱rṇebhi̍: śaku̱nānā̍m |

kā̱rmā̱ro aśma̍bhi̱rdyubhi̱rhira̍ṇyavantamiccha̱tīndrā̍yendo̱ pari̍ srava

का॒रुर॒हं त॒तो भि॒षगु॑पलप्र॒क्षिणी॑ न॒ना ।

नाना॑धियो वसू॒यवोऽनु॒ गा इ॑व तस्थि॒मेन्द्रा॑येन्दो॒ परि॑ स्रव ॥9.112.3॥

kā̱rura̱haṃ ta̱to bhi̱ṣagu̍palapra̱kṣiṇī̍ na̱nā |

nānā̍dhiyo vasū̱yavo'nu̱ gā i̍va tasthi̱mendrā̍yendo̱ pari̍ srava

अश्वो॒ वोळ्हा॑ सु॒खं रथं॑ हस॒नामु॑पम॒न्त्रिण॑: ।

शेपो॒ रोम॑ण्वन्तौ भे॒दौ वारिन्म॒ण्डूक॑ इच्छ॒तीन्द्रा॑येन्दो॒ परि॑ स्रव ॥9.112.4॥

aśvo̱ vol̤hā̍ su̱khaṃ ratha̍ṃ hasa̱nāmu̍pama̱ntriṇa̍: |

śepo̱ roma̍ṇvantau bhe̱dau vārinma̱ṇḍūka̍ iccha̱tīndrā̍yendo̱ pari̍ srava

११ कश्यपो मारीच: । पवमान: सोम: । पङ्क्ति: ।

श॒र्य॒णाव॑ति॒ सोम॒मिन्द्र॑: पिबतु वृत्र॒हा ।

बलं॒ दधा॑न आ॒त्मनि॑ करि॒ष्यन्वी॒र्यं॑ म॒हदिन्द्रा॑येन्दो॒ परि॑ स्रव ॥9.113.1॥

śa̱rya̱ṇāva̍ti̱ soma̱mindra̍: pibatu vṛtra̱hā |

bala̱ṃ dadhā̍na ā̱tmani̍ kari̱ṣyanvī̱rya̍ṃ ma̱hadindrā̍yendo̱ pari̍ srava

आ प॑वस्व दिशां पत आर्जी॒कात्सो॑म मीढ्वः ।

ऋ॒त॒वा॒केन॑ स॒त्येन॑ श्र॒द्धया॒ तप॑सा सु॒त इन्द्रा॑येन्दो॒ परि॑ स्रव ॥9.113.2॥

ā pa̍vasva diśāṃ pata ārjī̱kātso̍ma mīḍhvaḥ |

ṛ̱ta̱vā̱kena̍ sa̱tyena̍ śra̱ddhayā̱ tapa̍sā su̱ta indrā̍yendo̱ pari̍ srava

प॒र्जन्य॑वृद्धं महि॒षं तं सूर्य॑स्य दुहि॒ताभ॑रत् ।

तं ग॑न्ध॒र्वाः प्रत्य॑गृभ्ण॒न्तं सोमे॒ रस॒माद॑धु॒रिन्द्रा॑येन्दो॒ परि॑ स्रव ॥9.113.3॥

pa̱rjanya̍vṛddhaṃ mahi̱ṣaṃ taṃ sūrya̍sya duhi̱tābha̍rat |

taṃ ga̍ndha̱rvāḥ pratya̍gṛbhṇa̱ntaṃ some̱ rasa̱māda̍dhu̱rindrā̍yendo̱ pari̍ srava

ऋ॒तं वद॑न्नृतद्युम्न स॒त्यं वद॑न्त्सत्यकर्मन् ।

श्र॒द्धां वद॑न्त्सोम राजन्धा॒त्रा सो॑म॒ परि॑ष्कृत॒ इन्द्रा॑येन्दो॒ परि॑ स्रव ॥9.113.4॥

ṛ̱taṃ vada̍nnṛtadyumna sa̱tyaṃ vada̍ntsatyakarman |

śra̱ddhāṃ vada̍ntsoma rājandhā̱trā so̍ma̱ pari̍ṣkṛta̱ indrā̍yendo̱ pari̍ srava

स॒त्यमु॑ग्रस्य बृह॒तः सं स्र॑वन्ति संस्र॒वाः ।

सं य॑न्ति र॒सिनो॒ रसा॑: पुना॒नो ब्रह्म॑णा हर॒ इन्द्रा॑येन्दो॒ परि॑ स्रव ॥9.113.5॥

sa̱tyamu̍grasya bṛha̱taḥ saṃ sra̍vanti saṃsra̱vāḥ |

saṃ ya̍nti ra̱sino̱ rasā̍: punā̱no brahma̍ṇā hara̱ indrā̍yendo̱ pari̍ srava

यत्र॑ ब्र॒ह्मा प॑वमान छन्द॒स्यां॒३ वाचं॒ वद॑न् ।

ग्राव्णा॒ सोमे॑ मही॒यते॒ सोमे॑नान॒न्दं ज॒नय॒न्निन्द्रा॑येन्दो॒ परि॑ स्रव ॥9.113.6॥

yatra̍ bra̱hmā pa̍vamāna chanda̱syā̱ṃ3 vāca̱ṃ vada̍n |

grāvṇā̱ some̍ mahī̱yate̱ some̍nāna̱ndaṃ ja̱naya̱nnindrā̍yendo̱ pari̍ srava

यत्र॒ ज्योति॒रज॑स्रं॒ यस्मिँ॑ल्लो॒के स्व॑र्हि॒तम् ।

तस्मि॒न्मां धे॑हि पवमाना॒ऽमृते॑ लो॒के अक्षि॑त॒ इन्द्रा॑येन्दो॒ परि॑ स्रव ॥9.113.7॥

yatra̱ jyoti̱raja̍sra̱ṃ yasmi̍m̐llo̱ke sva̍rhi̱tam |

tasmi̱nmāṃ dhe̍hi pavamānā̱'mṛte̍ lo̱ke akṣi̍ta̱ indrā̍yendo̱ pari̍ srava

यत्र॒ राजा॑ वैवस्व॒तो यत्रा॑व॒रोध॑नं दि॒वः ।

यत्रा॒मूर्य॒ह्वती॒राप॒स्तत्र॒ माम॒मृतं॑ कृ॒धीन्द्रा॑येन्दो॒ परि॑ स्रव ॥9.113.8॥

yatra̱ rājā̍ vaivasva̱to yatrā̍va̱rodha̍naṃ di̱vaḥ |

yatrā̱mūrya̱hvatī̱rāpa̱statra̱ māma̱mṛta̍ṃ kṛ̱dhīndrā̍yendo̱ pari̍ srava

यत्रा॑नुका॒मं चर॑णं त्रिना॒के त्रि॑दि॒वे दि॒वः ।

लो॒का यत्र॒ ज्योति॑ष्मन्त॒स्तत्र॒ माम॒मृतं॑ कृ॒धीन्द्रा॑येन्दो॒ परि॑ स्रव ॥9.113.9॥

yatrā̍nukā̱maṃ cara̍ṇaṃ trinā̱ke tri̍di̱ve di̱vaḥ |

lo̱kā yatra̱ jyoti̍ṣmanta̱statra̱ māma̱mṛta̍ṃ kṛ̱dhīndrā̍yendo̱ pari̍ srava

यत्र॒ कामा॑ निका॒माश्च॒ यत्र॑ ब्र॒ध्नस्य॑ वि॒ष्टप॑म् ।

स्व॒धा च॒ यत्र॒ तृप्ति॑श्च॒ तत्र॒ माम॒मृतं॑ कृ॒धीन्द्रा॑येन्दो॒ परि॑ स्रव ॥9.113.10॥

yatra̱ kāmā̍ nikā̱māśca̱ yatra̍ bra̱dhnasya̍ vi̱ṣṭapa̍m |

sva̱dhā ca̱ yatra̱ tṛpti̍śca̱ tatra̱ māma̱mṛta̍ṃ kṛ̱dhīndrā̍yendo̱ pari̍ srava

यत्रा॑न॒न्दाश्च॒ मोदा॑श्च॒ मुद॑: प्र॒मुद॒ आस॑ते ।

काम॑स्य॒ यत्रा॒प्ताः कामा॒स्तत्र॒ माम॒मृतं॑ कृ॒धीन्द्रा॑येन्दो॒ परि॑ स्रव ॥9.113.11॥

yatrā̍na̱ndāśca̱ modā̍śca̱ muda̍: pra̱muda̱ āsa̍te |

kāma̍sya̱ yatrā̱ptāḥ kāmā̱statra̱ māma̱mṛta̍ṃ kṛ̱dhīndrā̍yendo̱ pari̍ srava

४ कश्यपो मारीच: । पवमान: सोम: । पङ्क्ति: ।

य इन्दो॒: पव॑मान॒स्याऽनु॒ धामा॒न्यक्र॑मीत् ।

तमा॑हुः सुप्र॒जा इति॒ यस्ते॑ सो॒मावि॑ध॒न्मन॒ इन्द्रा॑येन्दो॒ परि॑ स्रव ॥9.114.1॥

ya indo̱: pava̍māna̱syā'nu̱ dhāmā̱nyakra̍mīt |

tamā̍huḥ supra̱jā iti̱ yaste̍ so̱māvi̍dha̱nmana̱ indrā̍yendo̱ pari̍ srava

ऋषे॑ मन्त्र॒कृतां॒ स्तोमै॒: कश्य॑पोद्व॒र्धय॒न्गिर॑: ।

सोमं॑ नमस्य॒ राजा॑नं॒ यो ज॒ज्ञे वी॒रुधां॒ पति॒रिन्द्रा॑येन्दो॒ परि॑ स्रव ॥9.114.2॥

ṛṣe̍ mantra̱kṛtā̱ṃ stomai̱: kaśya̍podva̱rdhaya̱ngira̍: |

soma̍ṃ namasya̱ rājā̍na̱ṃ yo ja̱jñe vī̱rudhā̱ṃ pati̱rindrā̍yendo̱ pari̍ srava

स॒प्त दिशो॒ नाना॑सूर्याः स॒प्त होता॑र ऋ॒त्विज॑: ।

दे॒वा आ॑दि॒त्या ये स॒प्त तेभि॑: सोमा॒भि र॑क्ष न॒ इन्द्रा॑येन्दो॒ परि॑ स्रव ॥9.114.3॥

sa̱pta diśo̱ nānā̍sūryāḥ sa̱pta hotā̍ra ṛ̱tvija̍: |

de̱vā ā̍di̱tyā ye sa̱pta tebhi̍: somā̱bhi ra̍kṣa na̱ indrā̍yendo̱ pari̍ srava

यत्ते॑ राजञ्छृ॒तं ह॒विस्तेन॑ सोमा॒भि र॑क्ष नः ।

अ॒रा॒ती॒वा मा न॑स्तारी॒न्मो च॑ न॒: किं च॒नाम॑म॒दिन्द्रा॑येन्दो॒ परि॑ स्रव ॥9.114.4॥

yatte̍ rājañchṛ̱taṃ ha̱vistena̍ somā̱bhi ra̍kṣa naḥ |

a̱rā̱tī̱vā mā na̍stārī̱nmo ca̍ na̱: kiṃ ca̱nāma̍ma̱dindrā̍yendo̱ pari̍ srava