७ आत्रेयी अपाला । इन्द्र: । अनुष्टुप् , १-२ पंक्ति: ।
क॒न्या॒३ वार॑वाय॒ती सोम॒मपि॑ स्रु॒तावि॑दत् । अस्तं॒ भर॑न्त्यब्रवी॒दिन्द्रा॑य सुनवै त्वा श॒क्राय॑ सुनवै त्वा ॥8.91.1॥
ka̱nyā̱3 vāra̍vāya̱tī soma̱mapi̍ sru̱tāvi̍dat | asta̱ṃ bhara̍ntyabravī̱dindrā̍ya sunavai tvā śa̱krāya̍ sunavai tvā
अ॒सौ य एषि॑ वीर॒को गृ॒हंगृ॑हं वि॒चाक॑शद् । इ॒मं जम्भ॑सुतं पिब धा॒नाव॑न्तं कर॒म्भिण॑मपू॒पव॑न्तमु॒क्थिन॑म् ॥8.91.2॥
a̱sau ya eṣi̍ vīra̱ko gṛ̱haṃgṛ̍haṃ vi̱cāka̍śad | i̱maṃ jambha̍sutaṃ piba dhā̱nāva̍ntaṃ kara̱mbhiṇa̍mapū̱pava̍ntamu̱kthina̍m
आ च॒न त्वा॑ चिकित्सा॒मोऽधि॑ च॒न त्वा॒ नेम॑सि । शनै॑रिव शन॒कैरि॒वेन्द्रा॑येन्दो॒ परि॑ स्रव ॥8.91.3॥
ā ca̱na tvā̍ cikitsā̱mo'dhi̍ ca̱na tvā̱ nema̍si | śanai̍riva śana̱kairi̱vendrā̍yendo̱ pari̍ srava
कु॒विच्छक॑त्कु॒वित्कर॑त्कु॒विन्नो॒ वस्य॑स॒स्कर॑त् । कु॒वित्प॑ति॒द्विषो॑ य॒तीरिन्द्रे॑ण सं॒गमा॑महै ॥8.91.4॥
ku̱vicchaka̍tku̱vitkara̍tku̱vinno̱ vasya̍sa̱skara̍t | ku̱vitpa̍ti̱dviṣo̍ ya̱tīrindre̍ṇa sa̱ṃgamā̍mahai
इ॒मानि॒ त्रीणि॑ वि॒ष्टपा॒ तानी॑न्द्र॒ वि रो॑हय । शिर॑स्त॒तस्यो॒र्वरा॒मादि॒दं म॒ उपो॒दरे॑ ॥8.91.5॥
i̱māni̱ trīṇi̍ vi̱ṣṭapā̱ tānī̍ndra̱ vi ro̍haya | śira̍sta̱tasyo̱rvarā̱mādi̱daṃ ma̱ upo̱dare̍
अ॒सौ च॒ या न॑ उ॒र्वरादि॒मां त॒न्वं१ मम॑ । अथो॑ त॒तस्य॒ यच्छिर॒: सर्वा॒ ता रो॑म॒शा कृ॑धि ॥8.91.6॥
a̱sau ca̱ yā na̍ u̱rvarādi̱māṃ ta̱nvaṃ1 mama̍ | atho̍ ta̱tasya̱ yacchira̱: sarvā̱ tā ro̍ma̱śā kṛ̍dhi
खे रथ॑स्य॒ खेऽन॑स॒: खे यु॒गस्य॑ शतक्रतो । अ॒पा॒लामि॑न्द्र॒ त्रिष्पू॒त्व्यकृ॑णो॒: सूर्य॑त्वचम् ॥8.91.7॥
khe ratha̍sya̱ khe'na̍sa̱: khe yu̱gasya̍ śatakrato | a̱pā̱lāmi̍ndra̱ triṣpū̱tvyakṛ̍ṇo̱: sūrya̍tvacam