५ प्रचेता आंगिरसः। दु:स्वप्ननाशनम्। अनुष्टुप् , ३ त्रिष्टुप्, ५ पंक्तिः।
अपे॑हि मनसस्प॒तेऽप॑ क्राम प॒रश्च॑र । प॒रो निॠ॑त्या॒ आ च॑क्ष्व बहु॒धा जीव॑तो॒ मन॑: ॥10.164.1॥
ape̍hi manasaspa̱te'pa̍ krāma pa̱raśca̍ra | pa̱ro niṝ̍tyā̱ ā ca̍kṣva bahu̱dhā jīva̍to̱ mana̍:
भ॒द्रं वै वरं॑ वृणते भ॒द्रं यु॑ञ्जन्ति॒ दक्षि॑णम् । भ॒द्रं वै॑वस्व॒ते चक्षु॑र्बहु॒त्रा जीव॑तो॒ मन॑: ॥10.164.2॥
bha̱draṃ vai vara̍ṃ vṛṇate bha̱draṃ yu̍ñjanti̱ dakṣi̍ṇam | bha̱draṃ vai̍vasva̱te cakṣu̍rbahu̱trā jīva̍to̱ mana̍:
यदा॒शसा॑ नि॒:शसा॑भि॒शसो॑पारि॒म जाग्र॑तो॒ यत्स्व॒पन्त॑: ।
अ॒ग्निर्विश्वा॒न्यप॑ दुष्कृ॒तान्यजु॑ष्टान्या॒रे अ॒स्मद्द॑धातु ॥10.164.3॥
yadā̱śasā̍ ni̱:śasā̍bhi̱śaso̍pāri̱ma jāgra̍to̱ yatsva̱panta̍: |
a̱gnirviśvā̱nyapa̍ duṣkṛ̱tānyaju̍ṣṭānyā̱re a̱smadda̍dhātu
यदि॑न्द्र ब्रह्मणस्पतेऽभिद्रो॒हं चरा॑मसि । प्रचे॑ता न आङ्गिर॒सो द्वि॑ष॒तां पा॒त्वंह॑सः ॥10.164.4॥
yadi̍ndra brahmaṇaspate'bhidro̱haṃ carā̍masi | prace̍tā na āṅgira̱so dvi̍ṣa̱tāṃ pā̱tvaṃha̍saḥ
अजै॑ष्मा॒द्यास॑नाम॒ चाभू॒माना॑गसो व॒यम् ।
जा॒ग्र॒त्स्व॒प्नः सं॑क॒ल्पः पा॒पो यं द्वि॒ष्मस्तं स ऋ॑च्छतु॒ यो नो॒ द्वेष्टि॒ तमृ॑च्छतु ॥10.164.5॥
ajai̍ṣmā̱dyāsa̍nāma̱ cābhū̱mānā̍gaso va̱yam |
jā̱gra̱tsva̱pnaḥ sa̍ṃka̱lpaḥ pā̱po yaṃ dvi̱ṣmastaṃ sa ṛ̍cchatu̱ yo no̱ dveṣṭi̱ tamṛ̍cchatu