अध्ययनम्
- अनुक्रमणिका
- अन्यत्र सङ्ग्रहे
- मूलम्
९ मधुच्छन्दा वैश्वामित्रः । अग्निः। गायत्री।
अ॒ग्निमी॑ळे पु॒रोहि॑तं य॒ज्ञस्य॑ दे॒वमृ॒त्विज॑म्। होता॑रं रत्न॒धात॑मम् ॥1.1.1॥
a̱gnimī̍l̤e pu̱rohi̍taṃ ya̱jñasya̍ de̱vamṛ̱tvija̍m| hotā̍raṃ ratna̱dhāta̍mam
अ॒ग्निः पूर्वे॑भि॒र्ऋषि॑भि॒रीड्यो॒ नूत॑नैरु॒त। स दे॒वाँ एह व॑क्षति ॥1.1.2॥
a̱gniḥ pūrve̍bhi̱rṛṣi̍bhi̱rīḍyo̱ nūta̍nairu̱ta| sa de̱vām̐ eha va̍kṣati
अ॒ग्निना॑ र॒यिम॑श्नव॒त् पोष॑मे॒व दि॒वेदि॑वे। य॒शसं॑ वी॒रव॑त्तमम् ॥1.1.3॥
a̱gninā̍ ra̱yima̍śnava̱t poṣa̍me̱va di̱vedi̍ve| ya̱śasa̍ṃ vī̱rava̍ttamam
अग्ने॒ यं य॒ज्ञम॑ध्व॒रं वि॒श्वत॑: परि॒भूरसि॑। स इद् दे॒वेषु॑ गच्छति ॥1.1.4॥
agne̱ yaṃ ya̱jñama̍dhva̱raṃ vi̱śvata̍: pari̱bhūrasi̍| sa id de̱veṣu̍ gacchati
अ॒ग्निर्होता॑ क॒विक्र॑तुः स॒त्यश्चि॒त्रश्र॑वस्तमः। दे॒वो दे॒वेभि॒रा ग॑मत् ॥1.1.5॥
a̱gnirhotā̍ ka̱vikra̍tuḥ sa̱tyaści̱traśra̍vastamaḥ| de̱vo de̱vebhi̱rā ga̍mat
यद॒ङ्ग दा॒शुषे॒ त्वमग्ने॑ भ॒द्रं क॑रि॒ष्यसि॑। तवेत् तत् स॒त्यम॑ङ्गिरः ॥1.1.6॥
yada̱ṅga dā̱śuṣe̱ tvamagne̍ bha̱draṃ ka̍ri̱ṣyasi̍| tavet tat sa̱tyama̍ṅgiraḥ
उप॑ त्वाग्ने दि॒वेदि॑वे॒ दोषा॑वस्तर्धि॒या व॒यम्। नमो॒ भर॑न्त॒ एम॑सि ॥1.1.7॥
upa̍ tvāgne di̱vedi̍ve̱ doṣā̍vastardhi̱yā va̱yam| namo̱ bhara̍nta̱ ema̍si
राज॑न्तमध्व॒राणां॑ गो॒पामृ॒तस्य॒ दीदि॑विम्। वर्ध॑मानं॒ स्वे दमे॑ ॥1.1.8॥
rāja̍ntamadhva̱rāṇā̍ṃ go̱pāmṛ̱tasya̱ dīdi̍vim| vardha̍māna̱ṃ sve dame̍
स न॑: पि॒तेव॑ सू॒नवे ऽग्ने॑ सूपाय॒नो भ॑व। सच॑स्वा नः स्व॒स्तये॑ ॥1.1.9॥
sa na̍: pi̱teva̍ sū̱nave 'gne̍ sūpāya̱no bha̍va| saca̍svā naḥ sva̱staye̍