८ अगस्त्यो मैत्रावरुणिः । अग्निः। त्रिष्टुप्।
अग्ने॒ नय॑ सु॒पथा॑ रा॒ये अ॒स्मान् विश्वा॑नि देव व॒युना॑नि वि॒द्वान् ।
यु॒यो॒ध्य१स्मज्जु॑हुरा॒णमेनो॒ भूयि॑ष्ठां ते॒ नम॑उक्तिं विधेम ॥1.189.1॥
agne̱ naya̍ su̱pathā̍ rā̱ye a̱smān viśvā̍ni deva va̱yunā̍ni vi̱dvān |
yu̱yo̱dhya1smajju̍hurā̱ṇameno̱ bhūyi̍ṣṭhāṃ te̱ nama̍uktiṃ vidhema
अग्ने॒ त्वं पा॑रया॒ नव्यो॑ अ॒स्मान् त्स्व॒स्तिभि॒रति॑ दु॒र्गाणि॒ विश्वा॑ ।
पूश्च॑ पृ॒थ्वी ब॑हु॒ला न॑ उ॒र्वी भवा॑ तो॒काय॒ तन॑याय॒ शं योः ॥1.189.2॥
agne̱ tvaṃ pā̍rayā̱ navyo̍ a̱smān tsva̱stibhi̱rati̍ du̱rgāṇi̱ viśvā̍ |
pūśca̍ pṛ̱thvī ba̍hu̱lā na̍ u̱rvī bhavā̍ to̱kāya̱ tana̍yāya̱ śaṃ yoḥ
अग्ने॒ त्वम॒स्मद् यु॑यो॒ध्यमी॑वा॒ अन॑ग्नित्रा अ॒भ्यम॑न्त कृ॒ष्टीः ।
पुन॑र॒स्मभ्यं॑ सुवि॒ताय॑ देव॒ क्षां विश्वे॑भिर॒मृते॑भिर्यजत्र ॥1.189.3॥
agne̱ tvama̱smad yu̍yo̱dhyamī̍vā̱ ana̍gnitrā a̱bhyama̍nta kṛ̱ṣṭīḥ |
puna̍ra̱smabhya̍ṃ suvi̱tāya̍ deva̱ kṣāṃ viśve̍bhira̱mṛte̍bhiryajatra
पा॒हि नो॑ अग्ने पा॒युभि॒रज॑स्रैरु॒त प्रि॒ये सद॑न॒ आ शु॑शु॒क्वान् ।
मा ते॑ भ॒यं ज॑रि॒तारं॑ यविष्ठ नू॒नं वि॑द॒न्माप॒रं स॑हस्वः ॥1.189.4॥
pā̱hi no̍ agne pā̱yubhi̱raja̍srairu̱ta pri̱ye sada̍na̱ ā śu̍śu̱kvān |
mā te̍ bha̱yaṃ ja̍ri̱tāra̍ṃ yaviṣṭha nū̱naṃ vi̍da̱nmāpa̱raṃ sa̍hasvaḥ
मा नो॑ अ॒ग्नेऽव॑ सृजो अ॒घाया॑ ऽवि॒ष्यवे॑ रि॒पवे॑ दु॒च्छुना॑यै ।
मा द॒त्वते॒ दश॑ते॒ मादते॑ नो॒ मा रीष॑ते सहसाव॒न् परा॑ दाः ॥1.189.5॥
mā no̍ a̱gne'va̍ sṛjo a̱ghāyā̍ 'vi̱ṣyave̍ ri̱pave̍ du̱cchunā̍yai |
mā da̱tvate̱ daśa̍te̱ mādate̍ no̱ mā rīṣa̍te sahasāva̱n parā̍ dāḥ
वि घ॒ त्वावाँ॑ ऋतजात यंसद् गृणा॒नो अ॑ग्ने त॒न्वे॒३ वरू॑थम् ।
विश्वा॑द् रिरि॒क्षोरु॒त वा॑ निनि॒त्सोर॑भि॒ह्रुता॒मसि॒ हि दे॑व वि॒ष्पट् ॥1.189.6॥
vi gha̱ tvāvā̍m̐ ṛtajāta yaṃsad gṛṇā̱no a̍gne ta̱nve̱3 varū̍tham |
viśvā̍d riri̱kṣoru̱ta vā̍ nini̱tsora̍bhi̱hrutā̱masi̱ hi de̍va vi̱ṣpaṭ
त्वं ताँ अ॑ग्न उ॒भया॒न् वि वि॒द्वान् वेषि॑ प्रपि॒त्वे मनु॑षो यजत्र ।
अ॒भि॒पि॒त्वे मन॑वे॒ शास्यो॑ भूर्मर्मृ॒जेन्य॑ उ॒शिग्भि॒र्नाक्रः ॥1.189.7॥
tvaṃ tām̐ a̍gna u̱bhayā̱n vi vi̱dvān veṣi̍ prapi̱tve manu̍ṣo yajatra |
a̱bhi̱pi̱tve mana̍ve̱ śāsyo̍ bhūrmarmṛ̱jenya̍ u̱śigbhi̱rnākraḥ
अवो॑चाम नि॒वच॑नान्यस्मि॒न् मान॑स्य सू॒नुः स॑हसा॒ने अ॒ग्नौ ।
व॒यं स॒हस्र॒मृषि॑भिः सनेम वि॒द्यामे॒षं वृ॒जनं॑ जी॒रदा॑नुम् ॥1.189.8॥
avo̍cāma ni̱vaca̍nānyasmi̱n māna̍sya sū̱nuḥ sa̍hasā̱ne a̱gnau |
va̱yaṃ sa̱hasra̱mṛṣi̍bhiḥ sanema vi̱dyāme̱ṣaṃ vṛ̱jana̍ṃ jī̱radā̍num