Śaṅkara by tradition
labdhā vidyā rājamānyā tataḥ kiṃ
prāptā sampatprābhavāḍhyā tataḥ kim |
bhuktā nārī sundarāṅgī tataḥ kim
yena svātmā naiva sākṣātkṛto'bhūt ||
||1||keyūrādyairbhūṣito vā tataḥ kiṃ
kauśeyādyairāvṛto vā tataḥ kim |
tṛpto mṛṣṭānnādinā vā tataḥ kiṃ
yena svātmā naiva sākṣātkṛto'bhūt ||
||2||dṛṣṭā nānā cārudeśāstataḥ kiṃ
puṣṭāśceṣṭā bandhuvargāstataḥ kim |
naṣṭaṃ dāridryādiduḥkhaṃ tataḥ kiṃ
yena svātmā naiva sākṣātkṛto'bhūt ||
||3||snātastīrthe jahnujādau tataḥ kiṃ
dānaṃ dattaṃ dvyaṣṭasaṃkhyaṃ tataḥ kim |
japtā mantrāḥ koṭiśo vā tataḥ kiṃ
yena svātmā naiva sākṣātkṛto'bhūt ||
||4||gotraṃ samyagbhūṣitaṃ vā tataḥ kiṃ
gātraṃ bhasmācchāditaṃ vā tataḥ kim |
rudrākṣādiḥ saṃdhṛto vā tataḥ kim
yena svātmā naiva sākṣātkṛto'bhūt ||
||5||annairviprāstarpitā vā tataḥ kiṃ
yajñairdevāstoṣitā vā tataḥ kim |
kīrtyā vyāptāḥ sarvalokāstataḥ kiṃ
yena svātmā naiva sākṣātkṛto'bhūt ||
||6||kāyaḥ kliṣṭaścopavāsaistataḥ kiṃ
labdhāḥ putrāḥ svīyapatnyāstataḥ kim |
prāṇāyāmaḥ sādhito vā tataḥ kiṃ
yena svātmā naiva sākṣātkṛto'bhūt ||
||7||yuddhe śatrurnirjito vā tataḥ kiṃ
bhūyo mitraiḥ pūrito vā tataḥ kim |
yogaiḥ prāptāḥ siddhayo vā tataḥ kiṃ
yena svātmā naiva sākṣātkṛto'bhūt ||
||8||abdhiḥ padbhyāṃ laṅghito vā tataḥ kiṃ
vāyuḥ kumbhe sthāpito vā tataḥ kim |
meruḥ pāṇāvuddhṛto vā tataḥ kiṃ
yena svātmā naiva sākṣātkṛto'bhūt ||
||9||kṣvelaḥ pīto dugdhavadvā tataḥ kiṃ
vahnirjagdho lājavadvā tataḥ kim |
prāptaścāraḥ pakṣivatkhe tataḥ kiṃ
yena svātmā naiva sākṣātkṛto'bhūt ||
||10||baddhāḥ samyakpāvakādyāstataḥ kiṃ
sākṣādviddhā lohavaryāstataḥ kim |
labdho nikṣepo'ñjanādyaistataḥ kiṃ
yena svātmā naiva sākṣātkṛto'bhūt ||
||11||bhūpendratvaṃ prāptamurvyāṃ tataḥ kiṃ
devendratvaṃ sambhṛtaṃ vā tataḥ kim |
muṇḍīndratvaṃ copalabdhaṃ tataḥ kiṃ
yena svātmā naiva sākṣātkṛto'bhūt ||
||12||mantraiḥ sarvaḥ stambhito vā tataḥ kiṃ
bāṇairlakṣyo bhedito vā tataḥ kim |
kālajñānaṃ cāpi labdhaṃ tataḥ kiṃ
yena svātmā naiva sākṣātkṛto'bhūt ||
||13||kāmātaṅkaḥ khaṇḍito vā tataḥ kiṃ
kopāveśaḥ kuṇṭhito vā tataḥ kim |
lobhāśleṣo varjito vā tataḥ kiṃ
yena svātmā naiva sākṣātkṛto'bhūt ||
||14||mohadhvāntaḥ peṣito vā tataḥ kiṃ
jāto bhūmau nirmado vā tataḥ kim |
mātsaryārtirmīlitā vā tataḥ kiṃ
yena svātmā naiva sākṣātkṛto'bhūt ||
||15||dhāturlokaḥ sādhito vā tataḥ kiṃ
viṣṇorloko vīkṣito vā tataḥ kim |
śaṃbhorlokaḥ śāsito vā tataḥ kiṃ
yena svātmā naiva sākṣātkṛto'bhūt ||
||16||yasyedaṃ hṛdaye samyaganātmaśrīvigarhaṇam |
sadodeti sa evātmasākṣātkārasya bhājanam ||
||17||anye tu māyikajagadbhrāntivyāmohamohitāḥ |
na teṣāṃ jāyate kvāpi svātmasākṣātkṛtirbhuvi ||
||18||iti śrīmatparamahaṃsaparivrājakācāryasya śrīgovindabhagavatpūjyapādaśiṣyasya śrīmacchaṅkarabhagavataḥ kṛtau anātmaśrīvigarhaṇaprakaraṇaṃ sampūrṇam