śrīśaṅkarabhagavatpādakṛtam
udyadbhānu-sahasrakoṭisadṛśāṃ keyūrahārojjvalāṃ
bimboṣṭhīṃ smitadantapaṅktirucirāṃ pītāmbarālaṅkṛtām |
viṣṇubrahmasurendrasevitapadāṃ tattvasvarūpāṃ śivāṃ
mīnākṣīṃ praṇato'smi santatamahaṃ kāruṇyavārānnidhim ||
||1||muktāhāralasatkirīṭarucirāṃ pūrṇenduvaktraprabhāṃ
śiñjannūpurakiṅkiṇīmaṇidharāṃ padmaprabhābhāsurām |
sarvābhīṣṭaphalapradāṃ girisutāṃ vāṇīramāsevitāṃ
mīnākṣīṃ praṇato'smi santatamahaṃ kāruṇyavārānnidhim ||
||2||śrīvidyāṃ śivavāmabhāganilayāṃ hrīṅkāramantrojjvalāṃ
śrīcakrāṅkita-bindumadhyavasatīṃ śrīmatsabhānāyakīm |
śrīmatṣaṇmukhavighnarājajananīṃ śrīmajjaganmohinīṃ
mīnākṣīṃ praṇato'smi santatamahaṃ kāruṇyavārānnidhim ||
||3||śrīmatsundaranāyakīṃ bhayaharāṃ jñānapradāṃ nirmalāṃ
śyāmābhāṃ kamalāsanārcitapadāṃ nārāyaṇasyānujām |
vīṇāveṇumṛdaṅgavādyarasikāṃ nānāvidhāḍāmbikāṃ
mīnākṣīṃ praṇato'smi santatamahaṃ kāruṇyavārānnidhim ||
||4||nānāyogimunīndrahṛnnivasatīṃ nānārthasiddhipradāṃ
nānāpuṣpavirājitāṅghriyugalāṃ nārāyaṇenārcitām |
nādabrahmamayīṃ parātparatarāṃ nānārthatattvātmikāṃ
mīnākṣīṃ praṇato'smi santatamahaṃ kāruṇyavārānnidhim ||
||5||iti śrīmatparamahaṃsaparivrājakācāryasya śrī-govinda-bhagavatpūjya-pāda-śiṣyasya śrīmacchaṅkarabhagavataḥ kṛtau śrī-mīnākṣīpañcaratnaṃ sampūrṇam