Study
- Anukramaṇī
- Also in this saṅgraha
- Source
23 gotamo rāhūgaṇaḥ| somaḥ| triṣṭup, 5-16 gāyatrī, 17 uṣṇik|
somo̍ dhe̱nuṃ somo̱ arva̍ntamā̱śuṃ somo̍ vī̱raṃ ka̍rma̱ṇya̍ṃ dadāti |
sā̱da̱nya̍ṃ vida̱thya̍ṃ sa̱bheya̍ṃ pitṛ̱śrava̍ṇa̱ṃ yo dadā̍śadasmai ॥1.91.20॥
सोमो॑ धे॒नुं सोमो॒ अर्व॑न्तमा॒शुं सोमो॑ वी॒रं क॑र्म॒ण्यं॑ ददाति ।
सा॒द॒न्यं॑ विद॒थ्यं॑ स॒भेयं॑ पितृ॒श्रव॑णं॒ यो ददा॑शदस्मै
10 gotamo rāhūgaṇaḥ| viśvedevāḥ, (1-2, 8-9 devāḥ, 10 aditiḥ)| jagatī, 6 virāṭ-sthānā, 8-10 triṣṭup|
tamīśā̍na̱ṃ jaga̍tasta̱sthuṣa̱spati̍ṃ dhiyaṃji̱nvamava̍se hūmahe va̱yam |
pū̱ṣā no̱ yathā̱ veda̍sā̱masa̍d vṛ̱dhe ra̍kṣi̱tā pā̱yurada̍bdhaḥ sva̱staye̍ ॥1.89.5॥
तमीशा॑नं॒ जग॑तस्त॒स्थुष॒स्पतिं॑ धियंजि॒न्वमव॑से हूमहे व॒यम् ।
पू॒षा नो॒ यथा॒ वेद॑सा॒मस॑द् वृ॒धे र॑क्षि॒ता पा॒युरद॑ब्धः स्व॒स्तये॑
4 kaśyapo mārīca: | pavamāna: soma: | paṅkti: |
ṛṣe̍ mantra̱kṛtā̱ṃ stomai̱: kaśya̍podva̱rdhaya̱ngira̍: |
soma̍ṃ namasya̱ rājā̍na̱ṃ yo ja̱jñe vī̱rudhā̱ṃ pati̱rindrā̍yendo̱ pari̍ srava ॥9.114.2॥
ऋषे॑ मन्त्र॒कृतां॒ स्तोमै॒: कश्य॑पोद्व॒र्धय॒न्गिर॑: ।
सोमं॑ नमस्य॒ राजा॑नं॒ यो ज॒ज्ञे वी॒रुधां॒ पति॒रिन्द्रा॑येन्दो॒ परि॑ स्रव
9 bhaumo'triḥ| indraḥ, 5 sūryaḥ, 6-9 atriḥ| 1-3 uṣṇik, 5-9 anuṣṭup, 4, 6-8 triṣṭup|
sva̍rbhāno̱radha̱ yadi̍ndra mā̱yā a̱vo di̱vo varta̍mānā a̱vāha̍n |
gū̱l̤ahaṃ sūrya̱ṃ tama̱sāpa̍vratena tu̱rīye̍ṇa̱ brahma̍ṇāvinda̱datri̍: ॥5.40.6॥
स्व॑र्भानो॒रध॒ यदि॑न्द्र मा॒या अ॒वो दि॒वो वर्त॑माना अ॒वाह॑न् ।
गू॒ळहं सूर्यं॒ तम॒साप॑व्रतेन तु॒रीये॑ण॒ ब्रह्म॑णाविन्द॒दत्रि॑:
3 krameṇa- pratho vāsiṣṭhaḥ, sapratho bhāradvājaḥ, dharmaḥ sauryaḥ| viśvedevāḥ| triṣṭup|
avi̍nda̱nte ati̍hita̱ṃ yadāsī̍dya̱jñasya̱ dhāma̍ para̱maṃ guhā̱ yat |
dhā̱turdyutā̍nātsavi̱tuśca̱ viṣṇo̍rbha̱radvā̍jo bṛ̱hadā ca̍kre a̱gneḥ ॥10.181.2॥
अवि॑न्द॒न्ते अति॑हितं॒ यदासी॑द्य॒ज्ञस्य॒ धाम॑ पर॒मं गुहा॒ यत् ।
धा॒तुर्द्युता॑नात्सवि॒तुश्च॒ विष्णो॑र्भ॒रद्वा॑जो बृ॒हदा च॑क्रे अ॒ग्नेः