7 juhūrbrahmajāyā, brāhmaḥ ūrdhvanābhā vā|viśvedevāḥ| triṣṭup , 6-7 anuṣṭup|
te̍'vadanpratha̱mā bra̍hmakilbi̱ṣe'kū̍pāraḥ sali̱lo mā̍ta̱riśvā̍ |
vī̱l̤uha̍rā̱stapa̍ u̱gro ma̍yo̱bhūrāpo̍ de̱vīḥ pra̍thama̱jā ṛ̱tena̍ ॥10.109.1॥
ते॑ऽवदन्प्रथ॒मा ब्र॑ह्मकिल्बि॒षेऽकू॑पारः सलि॒लो मा॑त॒रिश्वा॑ ।
वी॒ळुह॑रा॒स्तप॑ उ॒ग्रो म॑यो॒भूरापो॑ दे॒वीः प्र॑थम॒जा ऋ॒तेन॑
somo̱ rājā̍ pratha̱mo bra̍hmajā̱yāṃ puna̱: prāya̍ccha̱dahṛ̍ṇīyamānaḥ |
a̱nva̱rti̱tā varu̍ṇo mi̱tra ā̍sīda̱gnirhotā̍ hasta̱gṛhyā ni̍nāya ॥10.109.2॥
सोमो॒ राजा॑ प्रथ॒मो ब्र॑ह्मजा॒यां पुन॒: प्राय॑च्छ॒दहृ॑णीयमानः ।
अ॒न्व॒र्ति॒ता वरु॑णो मि॒त्र आ॑सीद॒ग्निर्होता॑ हस्त॒गृह्या नि॑नाय
haste̍nai̱va grā̱hya̍ ā̱dhira̍syā brahmajā̱yeyamiti̱ cedavo̍can |
na dū̱tāya̍ pra̱hye̍ tastha e̱ṣā tathā̍ rā̱ṣṭraṃ gu̍pi̱taṃ kṣa̱triya̍sya ॥10.109.3॥
हस्ते॑नै॒व ग्रा॒ह्य॑ आ॒धिर॑स्या ब्रह्मजा॒येयमिति॒ चेदवो॑चन् ।
न दू॒ताय॑ प्र॒ह्ये॑ तस्थ ए॒षा तथा॑ रा॒ष्ट्रं गु॑पि॒तं क्ष॒त्रिय॑स्य
de̱vā e̱tasyā̍mavadanta̱ pūrve̍ saptaṛ̱ṣaya̱stapa̍se̱ ye ni̍ṣe̱duḥ |
bhī̱mā jā̱yā brā̍hma̱ṇasyopa̍nītā du̱rdhāṃ da̍dhāti para̱me vyo̍man ॥10.109.4॥
दे॒वा ए॒तस्या॑मवदन्त॒ पूर्वे॑ सप्तऋ॒षय॒स्तप॑से॒ ये नि॑षे॒दुः ।
भी॒मा जा॒या ब्रा॑ह्म॒णस्योप॑नीता दु॒र्धां द॑धाति पर॒मे व्यो॑मन्
bra̱hma̱cā̱rī ca̍rati̱ vevi̍ṣa̱dviṣa̱: sa de̱vānā̍ṃ bhava̱tyeka̱maṅga̍m |
tena̍ jā̱yāmanva̍vinda̱dbṛha̱spati̱: some̍na nī̱tāṃ ju̱hvaṃ1 na de̍vāḥ ॥10.109.5॥
ब्र॒ह्म॒चा॒री च॑रति॒ वेवि॑ष॒द्विष॒: स दे॒वानां॑ भव॒त्येक॒मङ्ग॑म् ।
तेन॑ जा॒यामन्व॑विन्द॒द्बृह॒स्पति॒: सोमे॑न नी॒तां जु॒ह्वं१ न दे॑वाः
puna̱rvai de̱vā a̍dadu̱: puna̍rmanu̱ṣyā̍ u̱ta | rājā̍naḥ sa̱tyaṃ kṛ̍ṇvā̱nā bra̍hmajā̱yāṃ puna̍rdaduḥ ॥10.109.6॥
पुन॒र्वै दे॒वा अ॑ददु॒: पुन॑र्मनु॒ष्या॑ उ॒त । राजा॑नः स॒त्यं कृ॑ण्वा॒ना ब्र॑ह्मजा॒यां पुन॑र्ददुः
pu̱na̱rdāya̍ brahmajā̱yāṃ kṛ̱tvī de̱vairni̍kilbi̱ṣam | ūrja̍ṃ pṛthi̱vyā bha̱ktvāyo̍rugā̱yamupā̍sate ॥10.109.7॥
पु॒न॒र्दाय॑ ब्रह्मजा॒यां कृ॒त्वी दे॒वैर्नि॑किल्बि॒षम् । ऊर्जं॑ पृथि॒व्या भ॒क्त्वायो॑रुगा॒यमुपा॑सते