Śaṅkara by tradition
ahameva paraṃ brahma vāsudevākhyamavyayam |
iti syānniścito mukto baddha evānyathā bhavet ||
||1||ahameva paraṃ brahma niścitaṃ citta cintyatām |
cidrūpatvādasaṅgatvādabādhyatvāt prayatnataḥ ||
||2||ahameva paraṃ brahma na cāhaṃ brahmaṇaḥ pṛthak |
ityevaṃ samupāsīta brāhmaṇo brahmaṇi sthitaḥ ||
||3||sarvopādhivinirmuktaṃ caitanyaṃ ca nirantaram |
tadbrahmāhamiti jñātvā kathaṃ varṇāśramī bhavet ||
||4||ahaṃ brahmāsmi yo veda sa sarvaṃ bhavati tvidam |
nābhūtyā īśate devāsteṣāmātmā bhaveddhi saḥ ||
||5||anyo'sāvahamanyo'smītyupāste yo'nyadevatām |
na sa veda naro brahma sa devānāṃ yathā paśuḥ ||
||6||ahamātmā na cānyo'smi brahmaivāhaṃ na śokabhāk |
saccidānandarūpo'haṃ nityamuktasvabhāvavān ||
||7||ātmānaṃ satataṃ brahma saṃbhāvya viharanti ye |
na teṣāṃ duṣkṛtaṃ kiñcidduṣkṛtotthā na cāpadaḥ ||
||8||ātmānaṃ satataṃ brahma saṃbhāvya viharetsukham |
kṣaṇaṃ brahmāhamasmīti yaḥ kuryādātmacintanam ||
||9||tanmahāpātakaṃ hanti tamaḥ sūryodayo yathā |
ajñānādbrahmaṇo jñātamātmākāśaṃ budbudopamam ||
||10||ākāśādvāyurutpanno vāyostejastataḥ payaḥ |
adbhyaśca pṛthivī jātā tato vrīhiyavādikam ||
||11||pṛthivyapsu payo vahnau vahnirvāyau nabhasyasau |
nabho'pyavyākṛte tacca śuddhe śuddho'smyahaṃ hariḥ ||
||12||ahaṃ viṣṇurahaṃ viṣṇurahaṃ viṣṇurahaṃ hariḥ |
kartṛbhoktrādikaṃ sarvaṃ tadavidyotthameva ca ||
||13||acyuto'hamananto'haṃ govindo'hamahaṃhariḥ |
ānando'hamaśeṣo'hamajo'hamamṛto'smyaham ||
||14||nityo'haṃ nirvikalpo'haṃ nirākāro'hamavyayaḥ |
saccidānandarūpo'haṃ pañcakośātigo'smyaham ||
||15||akartā'hamabhoktā'hamasaṅgaḥ parameśvaraḥ |
sadā matsannidhānena ceṣṭate sarvamindriyam ||
||16||ādimadhyāntamukto'haṃ na baddho'haṃ kadācana |
svabhāvanirmalaḥ śuddhaḥ sa evāhaṃ na saṃśayaḥ ||
||17||brahmaivāhaṃ na saṃsārī mukto'hamiti bhāvayet |
aśaknuvanbhāvayituṃ vākyametatsadā'bhyaset ||
||18||yadabhyāsena tadbhāvo bhavedbhramarakīṭavat |
atrāpahāya sandehamabhyasetkṛtaniścayaḥ ||
||19||dhyānayogena māsaikādbrahmahatyāṃ vyapohati |
saṃvatsaraṃ sadā'bhyāsātsiddhyaṣṭakamavāpnuyāt ||
||20||yāvajjīvaṃ sadā'bhyāsājjīvanmukto bhavedyatiḥ |
nāhaṃ deho na ca prāṇo nendriyāṇi tathaiva ca ||
||21||na mano'haṃ na buddhiśca naiva cittamahaṅkṛtiḥ |
nāhaṃ pṛthvī na salilaṃ na ca vahnistathā'nilaḥ ||
||22||na cākāśo na śabdaśca na ca sparśastathā rasaḥ |
nāhaṃ gandho na rūpaṃ ca na māyā'haṃ na saṃsṛtiḥ ||
||23||sadā sākṣisvarūpatvācchiva evāsmi kevalaḥ |
mayyeva sakalaṃ jātaṃ mayi sarvaṃ pratiṣṭhitam ||
||24||mayi sarvaṃ layaṃ yāti tadbrahmāsmyahamadvayam |
sarvajño'hamananto'haṃ sarveśaḥ sarvaśaktimān ||
||25||ānandaḥ satyabodho'hamiti brahmānucintanam |
ayaṃ prapañco mithyaiva satyaṃ brahmāhamavyayam ||
||26||atra pramāṇaṃ vedāntā guravo'nubhavastathā |
brahmaivāhaṃ na saṃsārī na cāhaṃ brahmaṇaḥ pṛthak ||
||27||nāhaṃ deho na me dehaḥ kevalo'haṃ sanātanaḥ |
ekamevādvitīyaṃ vai brahmaṇo neha kiñcana ||
||28||hṛdayakamalamadhye dīpavadvedasāraṃ
praṇavamayamatarkyaṃ yogibhirdhyānagamyam |
hariguruśivayogaṃ sarvabhūtasthamekaṃ
sakṛdapi manasā vai cintayedyaḥ sa muktaḥ ||
||29||iti śrīmad śaṅkarācāryaviracitaṃ brahmānucintanaṃ samāptam