Tṛtīyāṣṭakam

Anuvāka 1

a̱gnirna̍ḥ pātu̱ kṛtti̍kāḥ.
nakṣa̍traṃ de̱vami̍ndri̱yam.
i̱damā̍sāṃ vicakṣa̱ṇam.
ha̱virā̱saṃ ju̍hotana.
yasya̱ bhānti̍ ra̱śmayo̱ yasya̍ ke̱tava̍ḥ.
yasye̱mā viśvā̱ bhuva̍nāni̱ sarvā̎.
sa kṛtti̍kābhira̱bhisa̱ṃvasā̍naḥ.
a̱gnirno̍ de̱vaḥ su̍vi̱te da̍dhātu.
pra̱jāpa̍te rohi̱ṇī ve̍tu̱ patnī̎.
vi̱śvarū̍pā bṛha̱tī ci̱trabhā̍nuḥ..1..

sā no̍ ya̱jñasya̍ suvi̱te da̍dhātu.
yathā̱ jīve̍ma śa̱rada̱ḥ savī̍rāḥ.
ro̱hi̱ṇī de̱vyuda̍gātpu̱rastā̎t.
viśvā̍ rū̱pāṇi̍ prati̱moda̍mānā.
pra̱jāpa̍tiṃ ha̱viṣā̍ va̱rdhaya̍ntī.
pri̱yā de̱vānā̱mupa̍yātu ya̱jñam.
somo̱ rājā̍ mṛgaśī̱ṟṣeṇa̱ āgan̍.
śi̱vaṃ nakṣa̍traṃ pri̱yama̍sya̱ dhāma̍.
ā̱pyāya̍māno bahu̱dhā jane̍ṣu.
reta̍ḥ pra̱jāṃ yaja̍māne dadhātu..2..

yatte̱ nakṣa̍traṃ mṛgaśī̱ṟṣamasti̍.
pri̱yaṃ rā̍jan pri̱yata̍maṃ pri̱yāṇā̎m.
tasmai̍ te soma ha̱viṣā̍ vidhema.
śaṃ na̍ edhi dvi̱pade̱ śaṃ catu̍ṣpade.
ā̱rdrayā̍ ru̱draḥ pratha̍mā na eti.
śreṣṭho̍ de̱vānā̱ṃ pati̍raghni̱yānā̎m.
nakṣa̍tramasya ha̱viṣā̍ vidhema.
mā na̍ḥ pra̱jāṃ rī̍riṣa̱nmota vī̱rān.
he̱tī ru̱drasya̱ pari̍ ṇo vṛṇaktu.
ā̱rdrā nakṣa̍traṃ juṣatāṃ ha̱virna̍ḥ..3..

pra̱mu̱ñcamā̍nau duri̱tāni̱ viśvā̎.
apā̱ghaśa̍ṃ sannudatā̱marā̍tim.
puna̍rno de̱vyadi̍tiḥ spṛṇotu.
puna̍rvasū na̱ḥ puna̱retā̎ṃ ya̱jñam.
puna̍rno de̱vā a̱bhiya̍ntu̱ sarve̎.
puna̍ḥ punarvo ha̱viṣā̍ yajāmaḥ.
e̱vā na de̱vyadi̍tirana̱rvā.
viśva̍sya bha̱rtrī jaga̍taḥ prati̱ṣṭhā.
puna̍rvasū ha̱viṣā̍ va̱rdhaya̍ntī.
pri̱yaṃ de̱vānā̱mapye̍tu̱ pātha̍ḥ..4..

bṛha̱spati̍ḥ pratha̱maṃ jāya̍mānaḥ.
ti̱ṣya̍ṃ nakṣa̍trama̱bhi samba̍bhūva.
śreṣṭho̍ de̱vānā̱ṃ pṛta̍nāsu ji̱ṣṇuḥ.
di̱śo'nu̱ sarvā̱ abha̍yaṃ no astu.
ti̱ṣya̍ḥ pu̱rastā̍du̱ta ma̍dhya̱to na̍ḥ.
bṛha̱spati̍rna̱ḥ pari̍ pātu pa̱ścāt.
bādhe̍tā̱ṃ dveṣo̱ abha̍yaṃ kṛṇutām.
su̱vīrya̍sya̱ pata̍yaḥ syāma.
i̱daṃ sa̱rpebhyo̍ ha̱vira̍stu̱ juṣṭam̎.
ā̱śre̱ṣā yeṣā̍manu̱yanti̱ ceta̍ḥ..5..

ye a̱ntari̍kṣaṃ pṛthi̱vīṃ kṣi̱yanti̍.
te na̍ḥ sa̱rpāso̱ hava̱māga̍miṣṭhāḥ.
ye ro̍ca̱ne sūrya̱syāpi̍ sa̱rpāḥ.
ye diva̍ṃ de̱vīmanu̍ sa̱ñcara̍nti.
yeṣā̍māśre̱ṣā a̍nu̱yanti̱ kāmam̎.
tebhya̍ḥ sa̱rpebhyo̱ madhu̍majjuhomi.
upa̍hūtāḥ pi̱taro̱ ye ma̱ghāsu̍.
mano̍javasaḥ su̱kṛta̍ḥ sukṛ̱tyāḥ.
te no̱ nakṣa̍tre̱ hava̱māga̍miṣṭhāḥ.
sva̱dhābhi̍rya̱jñaṃ praya̍taṃ juṣantām..6..

ye a̍gnida̱gdhā ye'na̍gnidagdhāḥ.
ye̍'muṃ lo̱kaṃ pi̱tara̍ḥ kṣi̱yanti̍.
yāṃśca̍ vi̱dma yāṃ u̍ ca̱ na pra̍vi̱dma.
ma̱ghāsu̍ ya̱jñaṃ sukṛ̍taṃ juṣantām.
gavā̱ṃ pati̱ḥ phalgu̍nīnāmasi̱ tvam.
tada̍ryamanvaruṇamitra̱ cāru̍.
taṃ tvā̍ va̱yaṃ sa̍ni̱tāra̍ṃ sanī̱nām.
jī̱vā jīva̍nta̱mupa̱ saṃvi̍śema.
yene̱mā viśvā̱ bhuva̍nāni̱ sañji̍tā.
yasya̍ de̱vā a̍nu sa̱ṃ yanti̱ ceta̍ḥ..7..

a̱rya̱mā rājā̱'jara̱stuvi̍ṣmān.
phalgu̍nīnāmṛṣa̱bho ro̍ravīti.
śreṣṭho̍ de̱vānā̎ṃ bhagavo bhagāsi.
tattvā̍ vidu̱ḥ phalgu̍nī̱stasya̍ vittāt.
a̱smabhya̍ṃ kṣa̱trama̱jara̍ṃ su̱vīryam̎.
goma̱daśva̍va̱dupa̱ sannu̍de̱ha.
bhago̍ ha dā̱tā bhaga̱ itpra̍dā̱tā.
bhago̍ de̱vīḥ phalgu̍nī̱rā vi̍veśa.
bhaga̱syettaṃ pra̍sa̱vaṃ ga̍mema.
yatra̍ de̱vaiḥ sa̍dha̱māda̍ṃ madema..8..

āyā̍tu de̱vaḥ sa̍vi̱topa̍yātu.
hi̱ra̱ṇyaye̍na su̱vṛtā̱ rathe̍na.
vaha̱ṉ hasta̍ṃ su̱bhaga̍ṃ vidma̱nāpa̍sam.
pra̱yaccha̍nta̱ṃ papu̍ri̱ṃ puṇya̱maccha̍.
hasta̱ḥ praya̍cchatva̱mṛta̱ṃ vasī̍yaḥ.
dakṣi̍ṇena̱ prati̍gṛbhṇīma enat.
dā̱tāra̍ma̱dya sa̍vi̱tā vi̍deya.
yo no̱ hastā̍ya prasu̱vāti̍ ya̱jñam.
tvaṣṭā̱ nakṣa̍trama̱bhye̍ti ci̱trām.
su̱bhaṃ sa̍saṃ yuva̱tiṃ roca̍mānām..9..

ni̱ve̱śaya̍nna̱mṛtā̱nmartyā̍ṃśca.
rū̱pāṇi̍ pi̱ṃśan bhuva̍nāni̱ viśvā̎.
tanna̱stvaṣṭā̱ tadu̍ ci̱trā vica̍ṣṭām.
tannakṣa̍traṃ bhūri̱dā a̍stu̱ mahyam̎.
tanna̍ḥ pra̱jāṃ vī̱rava̍tīṃ sanotu.
gobhi̍rno̱ aśvai̱ḥ sama̍naktu ya̱jñam.
vā̱yurnakṣa̍trama̱bhye̍ti̱ niṣṭyā̎m.
ti̱gmaśṛ̍ṅgo vṛṣa̱bho roru̍vāṇaḥ.
sa̱mī̱raya̱n bhuva̍nā māta̱riśvā̎.
apa̱ dveṣā̍ṃsi nudatā̱marā̍tīḥ..10..

tanno̍ vā̱yustadu̱ niṣṭyā̍ śṛṇotu.
tannakṣa̍traṃ bhūri̱dā a̍stu̱ mahyam̎.
tanno̍ de̱vāso̱ anu̍jānantu̱ kāmam̎.
yathā̱ tare̍ma duri̱tāni̱ viśvā̎.
dū̱rama̱smacchatra̍vo yantu bhī̱tāḥ.
tadi̍ndrā̱gnī kṛ̍ṇutā̱ṃ tadviśā̍khe.
tanno̍ de̱vā anu̍madantu ya̱jñam.
pa̱ścāt pu̱rastā̱dabha̍yaṃ no astu.
nakṣa̍trāṇā̱madhi̍patnī̱ viśā̍khe.
śreṣṭhā̍vindrā̱gnī bhuva̍nasya go̱pau..11..

viṣū̍ca̱ḥ śatrū̍napa̱ bādha̍mānau.
apa̱ kṣudha̍ṃ nudatā̱marā̍tim.
pū̱rṇā pa̱ścādu̱ta pū̱rṇā pu̱rastā̎t.
unma̍dhya̱taḥ pau̎rṇamā̱sī ji̍gāya.
tasyā̎ṃ de̱vā adhi̍ sa̱ṃvasa̍ntaḥ.
u̱tta̱me nāka̍ i̱ha mā̍dayantām.
pṛ̱thvī su̱varcā̍ yuva̱tiḥ sa̱joṣā̎ḥ.
pau̱rṇa̱mā̱syuda̍gā̱cchobha̍mānā.
ā̱pyā̱yaya̍ntī duri̱tāni̱ viśvā̎.
u̱ruṃ duhā̱ṃ yaja̍mānāya ya̱jñam..12..

Anuvāka 2

ṛ̱ddhyāsma̍ ha̱vyairnama̍sopa̱sadya̍.
mi̱traṃ de̱vaṃ mi̍tra̱dheya̍ṃ no astu.
a̱nū̱rā̱dhān ha̱viṣā̍ va̱rdhaya̍ntaḥ.
śa̱taṃ jī̍vema śa̱rada̱ḥ savī̍rāḥ.
ci̱traṃ nakṣa̍tra̱muda̍gātpu̱rastā̎t.
a̱nū̱rā̱dhāsa̱ iti̱ yadvada̍nti.
tanmi̱tra e̍ti pa̱thibhi̍rdeva̱yānai̎ḥ.
hi̱ra̱ṇyayai̱rvita̍taira̱ntari̍kṣe.
indro̎ jye̱ṣṭhāmanu̱ nakṣa̍trameti.
yasmi̍nvṛ̱traṃ vṛ̍tra̱tūrye̍ ta̱tāra̍..13..

tasmi̍nva̱yama̱mṛta̱ṃ duhā̍nāḥ.
kṣudha̍ṃ tarema̱ duri̍ti̱ṃ duri̍ṣṭim.
pu̱ra̱nda̱rāya̍ vṛṣa̱bhāya̍ dhṛ̱ṣṇave̎.
aṣā̍ḍhāya̱ saha̍mānāya mī̱ḍhuṣe̎.
indrā̍ya jye̱ṣṭhā madhu̍ma̱dduhā̍nā.
u̱ruṃ kṛ̍ṇotu̱ yaja̍mānāya lo̱kam.
mūla̍ṃ pra̱jāṃ vī̱rava̍tīṃ videya.
parā̎cyetu̱ nirṛ̍tiḥ parā̱cā.
gobhi̱rnakṣa̍traṃ pa̱śubhi̱ḥ sama̍ktam.
aha̍rbhūyā̱dyaja̍mānāya̱ mahyam̎..14..

aha̍rno a̱dya su̍vi̱te da̍dhātu.
mūla̱ṃ nakṣa̍tra̱miti̱ yadvada̍nti.
parā̍cīṃ vā̱cā nirṛ̍tiṃ nudāmi.
śi̱vaṃ pra̱jāyai̍ śi̱vama̍stu̱ mahyam̎.
yā di̱vyā āpa̱ḥ paya̍sā sambabhū̱vuḥ.
yā a̱ntari̍kṣa u̱ta pārthi̍vī̱ryāḥ.
yāsā̍maṣā̱ḍhā a̍nu̱yanti̱ kāmam̎.
tā na̱ āpa̱ḥ śaṃ syo̱nā bha̍vantu.
yāśca̱ kūpyā̱ yāśca̍ nā̱dyā̎ḥ samu̱driyā̎ḥ.
yāśca̍ vaiśa̱ntīru̱ta prā̍sa̱cīryāḥ..15..

yāsā̍maṣā̱ḍhā madhu̍ bha̱kṣaya̍nti.
tā na̱ āpa̱ḥ śaṃ syo̱nā bha̍vantu.
tanno̱ viśve̱ upa̍ śṛṇvantu de̱vāḥ.
tada̍ṣā̱ḍhā a̱bhisaṃya̍ntu ya̱jñam.
tannakṣa̍traṃ prathatāṃ pa̱śubhya̍ḥ.
kṛ̱ṣirvṛ̱ṣṭiryaja̍mānāya kalpatām.
śu̱bhrāḥ ka̱nyā̍ yuva̱taya̍ḥ su̱peśa̍saḥ.
ka̱rma̱kṛta̍ḥ su̱kṛto̍ vī̱ryā̍vatīḥ.
viśvā̎n de̱vān ha̱viṣā̍ va̱rdhaya̍ntīḥ.
a̱ṣā̱ḍhāḥ kāma̱mupa̍ yāntu ya̱jñam..16..

yasmi̱n brahmā̱'bhyaja̍ya̱thsarva̍me̱tat.
a̱muṃ ca̍ lo̱kami̱damū̍ ca̱ sarvam̎.
tanno̱ nakṣa̍tramabhi̱jidvi̱jitya̍.
śriya̍ṃ dadhā̱tvahṛ̍ṇīyamānam.
u̱bhau lo̱kau brahma̍ṇā̱ sañji̍te̱mau.
tanno̱ nakṣa̍tramabhi̱jidvica̍ṣṭām.
tasmi̍nva̱yaṃ pṛta̍nā̱ḥ sañja̍yema.
tanno̍ de̱vāso̱ anu̍jānantu̱ kāmam̎.
śṛ̱ṇvanti̍ śro̱ṇāma̱mṛta̍sya go̱pām.
puṇyā̍masyā̱ upa̍śṛṇomi̱ vācam̎..17..

ma̱hīṃ de̱vīṃ viṣṇu̍patnīmajū̱ryām.
pra̱tīcī̍menāṃ ha̱viṣā̍ yajāmaḥ.
tre̱dhā viṣṇu̍rurugā̱yo vica̍krame.
ma̱hīṃ diva̍ṃ pṛthi̱vīma̱ntari̍kṣam.
tacchro̱ṇaiti̱śrava̍ i̱cchamā̍nā.
puṇya̱ṃ śloka̱ṃ yaja̍mānāya kṛṇva̱tī.
a̱ṣṭau de̱vā vasa̍vaḥ so̱myāsa̍ḥ.
cata̍sro de̱vīra̱jarā̱ḥ śravi̍ṣṭhāḥ.
te ya̱jñaṃ pā̎ntu̱ raja̍saḥ pa̱rastā̎t.
sa̱ṃva̱thsa̱rīṇa̍ma̱mṛta̍ṃ sva̱sti..18..

ya̱jñaṃ na̍ḥ pāntu̱ vasa̍vaḥ pu̱rastā̎t.
da̱kṣi̱ṇa̱to̍'bhiya̍ntu̱ śravi̍ṣṭhāḥ.
puṇya̱ṃ nakṣa̍trama̱bhi saṃvi̍śāma.
mā no̱ arā̍tira̱ghaśa̱ṃsā'gan̍.
kṣa̱trasya̱ rājā̱ varu̍ṇo'dhirā̱jaḥ.
nakṣa̍trāṇāṃ śa̱tabhi̍ṣa̱gvasi̍ṣṭhaḥ.
tau de̱vebhya̍ḥ kṛṇuto dī̱rghamāyu̍ḥ.
śa̱taṃ sa̱hasrā̍ bheṣa̱jāni̍ dhattaḥ.
ya̱jñaṃ no̱ rājā̱ varu̍ṇa̱ upa̍yātu.
tanno̱ viśve̍ a̱bhi saṃya̍ntu de̱vāḥ..19..

tanno̱ nakṣa̍traṃ śa̱tabhi̍ṣagjuṣā̱ṇam.
dī̱rghamāyu̱ḥ prati̍radbheṣa̱jāni̍.
a̱ja eka̍pā̱duda̍gātpu̱rastā̎t.
viśvā̍ bhū̱tāni̍ prati̱ moda̍mānaḥ.
tasya̍ de̱vāḥ pra̍sa̱vaṃ ya̍nti̱ sarve̎.
pro̱ṣṭha̱pa̱dāso̍ a̱mṛta̍sya go̱pāḥ.
vi̱bhrāja̍mānaḥ samidhā̱na u̱graḥ.
ā'ntari̍kṣamaruha̱daga̱ndyām.
taṃ sūrya̍ṃ de̱vama̱jameka̍pādam.
pro̱ṣṭha̱pa̱dāso̱ anu̍yanti̱ sarve̎..20..

ahi̍rbu̱dhniya̱ḥ pratha̍māna eti.
śreṣṭho̍ de̱vānā̍mu̱ta mānu̍ṣāṇām.
taṃ brā̎hma̱ṇāḥ so̍ma̱pāḥ so̱myāsa̍ḥ.
pro̱ṣṭha̱pa̱dāso̍ a̱bhi ra̍kṣanti̱ sarve̎.
ca̱tvāra̱ eka̍ma̱bhi karma̍ de̱vāḥ.
pro̱ṣṭha̱pa̱dāsa̱ iti̱ yān vada̍nti.
te bu̱dhniya̍ṃ pari̱ṣadya̍ṃ stu̱vanta̍ḥ.
ahi̍ṃ rakṣanti̱ nama̍sopa̱sadya̍.
pū̱ṣā re̱vatyanve̍ti̱ panthā̎m.
pu̱ṣṭi̱patī̍ paśu̱pā vāja̍bastyau..21..

i̱māni̍ ha̱vyā praya̍tā juṣā̱ṇā.
su̱gairno̱ yānai̱rupa̍yātāṃ ya̱jñam.
kṣu̱drān pa̱śūn ra̍kṣatu re̱vatī̍ naḥ.
gāvo̍ no̱ aśvā̱ṃ anve̍tu pū̱ṣā.
anna̱ṃ rakṣa̍ntau bahu̱dhā virū̍pam.
vāja̍ṃ sanutā̱ṃ yaja̍mānāya ya̱jñam.
tada̱śvinā̍vaśva̱yujopa̍yātām.
śubha̱ṅgami̍ṣṭhau su̱yame̍bhi̱raśvai̎ḥ.
svaṃ nakṣa̍traṃ ha̱viṣā̱ yaja̍ntau.
madhvā̱ sampṛ̍ktau̱ yaju̍ṣā̱ sama̍ktau..22..

yau de̱vānā̎ṃ bhi̱ṣajau̍ havyavā̱hau.
viśva̍sya dū̱tāva̱mṛta̍sya go̱pau.
tau nakṣa̍traṃ jujuṣā̱ṇopa̍yātām.
namo̱'śvibhyā̎ṃ kṛṇumo'śva̱yugbhyā̎m.
apa̍ pā̱pmāna̱ṃ bhara̍ṇīrbharantu.
tadya̱mo rājā̱ bhaga̍vā̱ṉ vica̍ṣṭām.
lo̱kasya̱ rājā̍ maha̱to ma̱hān hi.
su̱gaṃ na̱ḥ panthā̱mabha̍yaṃ kṛṇotu.
yasmi̱nnakṣa̍tre ya̱ma eti̱ rājā̎.
yasmi̍nnenama̱bhyaṣi̍ñcanta de̱vāḥ.
tada̍sya ci̱traṃ ha̱viṣā̍ yajāma.
apa̍ pā̱pmāna̱ṃ bhara̍ṇīrbharantu.
ni̱veśa̍nī̱ yatte̍ de̱vā ada̍dhuḥ..23..

Anuvāka 3

navo̍navo bhavati̱ jāya̍māno̱ yamā̍di̱tyā a̱ṃśumā̎pyā̱yaya̍nti.
ye virū̍pe̱ sama̍nasā sa̱ṃvyaya̍ntī.
sa̱mā̱naṃ tantu̍ṃ paritāta̱nā te̎.
vi̱bhū pra̱bhū a̍nu̱bhū vi̱śvato̍ huve.
te no̱ nakṣa̍tre̱ hava̱māga̍metam.
va̱yaṃ de̱vī brahma̍ṇā saṃvidā̱nāḥ.
su̱ratnā̍so de̱vavī̍ti̱ṃ dadhā̍nāḥ.
a̱ho̱rā̱tre ha̱viṣā̍ va̱rdhaya̍ntaḥ.
ati̍ pā̱pmāna̱mati̍ muktyā gamema.
pratyu̍vadṛśyāya̱tī..24..

vyu̱cchantī̍ duhi̱tā di̱vaḥ.
a̱po ma̱hī vṛ̍ṇute̱ cakṣu̍ṣā.
tamo̱ jyoti̍ṣkṛṇoti sū̱narī̎.
udu̱sriyā̎ḥ sacate̱ sūrya̍ḥ.
sacā̍ u̱dyannakṣa̍tramarci̱mat.
tavedu̍ṣo̱ vyuṣi̱ sūrya̍sya ca.
saṃ bha̱ktena̍ gamemahi.
tanno̱ nakṣa̍tramarci̱mat.
bhā̱nu̱matteja̍ u̱ccara̍t.
upa̍ya̱jñami̱hāga̍mat..25..

pra nakṣa̍trāya de̱vāya̍.
indrā̱yendu̍ṃ havāmahe.
sa na̍ḥ savi̱tā su̍vathsa̱nim.
pu̱ṣṭi̱dāṃ vī̱rava̍ttamam.
udu̱tyaṃ ci̱tram.
adi̍tirna uruṣyatu ma̱hīmū̱ṣu mā̱taram̎.
i̱daṃ viṣṇu̱ḥ pratadviṣṇu̍ḥ.
a̱gnirmū̱rdhā bhuva̍ḥ.
anu̍no̱'dyānu̍mati̱ranvida̍numate̱ tvam.
ha̱vya̱vāha̱ṃ svi̍ṣṭam..26..

Anuvāka 4

a̱gnirvā a̍kāmayata.
a̱nnā̱do de̱vānā̍ṃsyā̱miti̍.
sa e̱tama̱gnaye̱ kṛtti̍kābhyaḥ puro̱ḍāśa̍ma̱ṣṭāka̍pāla̱ṃ nira̍vapat.
tato̱ vai so̎'nnā̱do de̱vānā̍mabhavat.
a̱gnirvai de̱vānā̍mannā̱daḥ.
yathā̍ ha̱ vā a̱gnirde̱vānā̍mannā̱daḥ.
e̱vaṃ ha̱ vā e̱ṣa ma̍nu̱ṣyā̍ṇāṃ bhavati.
ya e̱tena̍ ha̱viṣā̱ yaja̍te.
ya u̍ cainade̱vaṃ veda̍.
so'tra̍ juhoti.
a̱gnaye̱ svāhā̱ kṛtti̍kābhya̱ḥ svāhā̎.
a̱mbāyai̱ svāhā̍ du̱lāyai̱ svāhā̎.
ni̱ta̱tnyai svāhā̱'bhraya̍ntyai̱ svāhā̎.
me̱ghaya̍ntyai̱ svāhā̍ va̱ṟṣaya̍ntyai̱ svāhā̎.
cu̱pu̱ṇīkā̍yai̱ svāheti̍..27..

pra̱jāpa̍tiḥ pra̱jā a̍sṛjata.
tā a̍smāthsṛ̱ṣṭāḥ parā̍cīrāyan.
tāsā̍ṃ rohi̱ṇīma̱bhya̍dhyāyat.
so̍'kāmayata.
upa̱ mā va̍rteta.
same̍nayā gacche̱yeti̍.
sa e̱taṃ pra̱jāpa̍taye rohi̱ṇyai ca̱ruṃ nira̍vapat.
tato̱ vai sā tamu̱pāva̍rtata.
same̍nayā gacchata.
upa̍ ha̱ vā e̍naṃ pri̱yamāva̍rtate.
saṃ pri̱yeṇa̍ gacchate.
ya e̱tena̍ ha̱viṣā̱ yaja̍te.
ya u̍cainade̱vaṃ veda̍.
so'tra̍ juhoti.
pra̱jāpa̍taye̱ svāhā̍ rohi̱ṇyai svāhā̎.
roca̍mānāyai̱ svāhā̎ pra̱jābhya̱ḥ svāheti̍..28..

somo̱ vā a̍kāmayata.
oṣa̍dhīnāṃ rā̱jyama̱bhija̍yeya̱miti̍.
sa e̱taṃ somā̍ya mṛgaśī̱ṟṣāya̍ śyāmā̱kaṃ ca̱ruṃ paya̍si̱ nira̍vapat.
tato̱ vai sa oṣa̍dhīnāṃ rā̱jyama̱bhya̍jayat.
sa̱mā̱nānā̍ṃ ha̱ vai rā̱jyama̱bhija̍yati.
ya e̱tena̍ ha̱viṣā̱ yaja̍te.
ya u̍ cainade̱vaṃ veda̍.
so'tra̍ juhoti.
somā̍ya̱ svāhā̍ mṛgaśī̱ṟṣāya̱ svāhā̎.
i̱nva̱kābhya̱ḥ svāhauṣa̍dhībhya̱ḥ svāhā̎.
rā̱jyāya̱ svāhā̱'bhiji̍tyai̱ svāheti̍..29..

ru̱dro vā a̍kāmayata.
pa̱śu̱mānthsyā̱miti̍.
sa e̱taṃ ru̱drāyā̱''rdrāyai̱ praiyya̍ṅgavaṃ ca̱ruṃ paya̍si̱ nira̍vapat.
tato̱ vai sa pa̍śu̱māna̍bhavat.
pa̱śu̱mān ha̱ vai bha̍vati.
ya e̱tena̍ ha̱viṣā̱ yaja̍te.
ya u̍ cainade̱vaṃ veda̍.
so'tra̍ juhoti.
ru̱drāya̱ svāhā̱''rdrāyai̱ svāhā̎.
pinva̍mānāyai̱ svāhā̍ pa̱śubhya̱ḥ svāheti̍..30..

ṛ̱kṣā vā i̱yama̍lo̱makā̍''sīt.
sā'kā̍mayata.
oṣa̍dhībhi̱rvana̱spati̍bhi̱ḥ prajā̍ye̱yeti̍.
saitamadi̍tyai̱ puna̍rvasubhyāṃ ca̱ruṃ nira̍vapat.
tato̱ vā i̱yamoṣa̍dhībhi̱rvana̱spati̍bhi̱ḥ prājā̍yata.
prajā̍yate ha̱ vai pra̱jayā̍ pa̱śubhi̍ḥ.
ya e̱tena̍ ha̱viṣā̱ yaja̍te.
ya u̍ cainade̱vaṃ veda̍.
so'tra̍ juhoti.
adi̍tyai̱ svāhā̱ puna̍rvasubhyām.
svāhā bhū̎tyai̱ svāhā̱ prajā̎tyai̱ svāheti̍..31..

bṛha̱spati̱rvā a̍kāmayata.
bra̱hma̱va̱rca̱sī syā̱miti̍.
sa e̱taṃ bṛha̱spata̍ye ti̱ṣyā̍ya naivā̱raṃ ca̱ruṃ paya̍si̱ nira̍vapat.
tato̱ vai sa bra̍hmavarca̱sya̍bhavat.
bra̱hma̱va̱rca̱sī ha̱ vai bha̍vati.
ya e̱tena̍ ha̱viṣā̱ yaja̍te.
ya u̍ cainade̱vaṃ veda̍.
so'tra̍ juhoti.
bṛha̱spata̍ye̱ svāhā̍ ti̱ṣyā̍ya̱ svāhā̎.
bra̱hma̱va̱rca̱sāya̱ svāheti̍..32..

de̱vā̱su̱rāḥ saṃya̍ttā āsan.
te de̱vāḥ sa̱rpebhya̍ āśre̱ṣābhya̱ ājye̍ kara̱mbhaṃ nira̍vapan.
tāne̱tābhi̍re̱va de̱vatā̍bhi̱rupā̍nayan.
e̱tābhi̍rha̱ vai de̱vatā̍bhirdvi̱ṣanta̱ṃ bhrātṛ̍vya̱mupa̍nayati.
ya e̱tena̍ ha̱viṣā̱ yaja̍te.
ya u̍ cainade̱vaṃ veda̍.
so'tra̍ juhoti.
sa̱rpebhya̱ḥ svāhā̎''śre̱ṣābhya̱ḥ svāhā̎.
da̱nda̱śūke̎bhya̱ḥ svāheti̍..33..

pi̱taro̱ vā a̍kāmayanta.
pi̱tṛ̱lo̱ka ṛ̍dhnuyā̱meti̍.
ta e̱taṃ pi̱tṛbhyo̍ ma̱ghābhya̍ḥ puro̱ḍāśa̱ṃ ṣaṭka̍pāla̱ṃ nira̍vapan.
tato̱ vai te pi̍tṛlo̱ka ā̎rdhnuvan.
pi̱tṛ̱lo̱ke ha̱ vā ṛ̍dhnoti.
ya e̱tena̍ ha̱viṣā̱ yaja̍te.
ya u̍ cainade̱vaṃ veda̍.
so'tra̍ juhoti.
pi̱tṛbhya̱ḥ svāhā̍ ma̱ghābhya̍ḥ.
svāhā̍'na̱ghābhya̱ḥ svāhā̍'ga̱dābhya̍ḥ.
svāhā̍'rundha̱tībhya̱ḥ svāheti̍..34..

a̱rya̱mā vā a̍kāmayata.
pa̱śu̱mānthsyā̱miti̍.
sa e̱tama̍rya̱mṇe phalgu̍nībhyāṃ ca̱ruṃ nira̍vapat.
tato̱ vai sa pa̍śu̱māna̍bhavat.
pa̱śu̱mān ha̱ vai bha̍vati.
ya e̱tena̍ ha̱viṣā̱ yaja̍te.
ya u̍ cainade̱vaṃ veda̍.
so'tra̍ juhoti.
a̱rya̱mṇe svāhā̱ phalgu̍nībhyā̱ṃ svāhā̎.
pa̱śubhya̱ḥ svāheti̍..35..

bhago̱ vā a̍kāmayata.
bha̱gī śre̱ṣṭhī de̱vānā̍ṃsyā̱miti̍.
sa e̱taṃ bhagā̍ya̱ phalgu̍nībhyāṃ ca̱ruṃ nira̍vapat.
tato̱ vai sa bha̱gī śre̱ṣṭhī de̱vānā̍mabhavat.
bha̱gī ha̱ vai śre̱ṣṭhī sa̍mā̱nānā̎ṃ bhavati.
ya e̱tena̍ ha̱viṣā̱ yaja̍te.
ya u̍ cainade̱vaṃ veda̍.
so'tra̍ juhoti.
bhagā̍ya̱ svāhā̱ phalgu̍nībhyā̱ṃ svāhā̎.
śraiṣṭhyā̍ya̱ svāheti̍..36..

sa̱vi̱tā vā a̍kāmayata.
śranme̍ de̱vā dadhī̍ran.
sa̱vi̱tā syā̱miti̍.
sa e̱taṃ sa̍vi̱tre hastā̍ya puro̱ḍāśa̱ṃ dvāda̍śakapāla̱ṃ nira̍vapadāśū̱nāṃ vrī̍hī̱ṇām.
tato̱ vai tasmai̱ śradde̱vā ada̍dhata.
sa̱vi̱tā'bha̍vat.
śraddha̱vā a̍smai manu̱ṣyā̍ dadhate.
sa̱vi̱tā sa̍mā̱nānā̎ṃ bhavati.
ya e̱tena̍ ha̱viṣā̱ yaja̍te.
ya u̍ cainade̱vaṃ veda̍.
so'tra̍ juhoti.
sa̱vi̱tre svāhā̱ hastā̍ya.
svāhā̍ dada̱te svāhā̍ pṛṇa̱te.
svāhā̎ pra̱yaccha̍te̱ svāhā̎ pratigṛbhṇa̱te svāheti̍..37..

tvaṣṭā̱ vā a̍kāmayata.
ci̱traṃ pra̱jāṃ vi̍nde̱yeti̍.
sa e̱taṃ tvaṣṭre̍ ci̱trāyai̍ puro̱ḍāśa̍ma̱ṣṭāka̍pāla̱ṃ nira̍vapat.
tato̱ vai sa ci̱traṃ pra̱jāma̍vindata.
ci̱traṃ ha̱ vai pra̱jāṃ vi̍ndate.
ya e̱tena̍ ha̱viṣā̱ yaja̍te.
ya u̍ cainade̱vaṃ veda̍.
so'tra̍ juhoti.
tvaṣṭre̱ svāhā̍ ci̱trāyai̱ svāhā̎.
caitrā̍ya̱ svāhā̎ pra̱jāyai̱ svāheti̍..38..

vā̱yurvā a̍kāmayata.
kā̱ma̱cāra̍me̱ṣu lo̱keṣva̱bhija̍yeya̱miti̍.
sa e̱tadvā̱yave̱ niṣṭyā̍yai gṛ̱ṣṭyai du̱gdhaṃ payo̱ nira̍vapat.
tato̱ vai sa kā̍ma̱cāra̍me̱ṣu lo̱keṣva̱bhya̍jayat.
kā̱ma̱cāra̍ṃ ha̱ vā e̱ṣu lo̱keṣva̱bhija̍yati.
ya e̱tena̍ ha̱viṣā̱ yaja̍te.
ya u̍ cainade̱vaṃ veda̍.
so'tra̍ juhoti.
vā̱yave̱ svāhā̱ niṣṭyā̍yai̱ svāhā̎.
kā̱ma̱cārā̍ya̱ svāhā̱'bhiji̍tyai̱ svāheti̍..39..

i̱ndrā̱gnī vā a̍kāmayetām.
śraiṣṭhya̍ṃ de̱vānā̍ma̱bhija̍ye̱veti̍.
tāve̱tami̍ndrā̱gnibhyā̱ṃ viśā̍khābhyāṃ puro̱ḍāśa̱mekā̍daśakapāla̱ṃ nira̍vapatām.
tato̱ vai tau śraiṣṭhya̍ṃ de̱vānā̍ma̱bhya̍jayatām.
śraiṣṭhya̍ṃ ha̱ vai sa̍mā̱nānā̍ma̱bhi ja̍yati.
ya e̱tena̍ ha̱viṣā̱ yaja̍te.
ya u̍ cainade̱vaṃ veda̍.
so'tra̍ juhoti.
i̱ndrā̱gnibhyā̱ṃ svāhā̱ viśā̍khābhyā̱ṃ svāhā̎.
śraiṣṭhyā̍ya̱ svāhā̱'bhiji̍tyai̱ svāheti̍..40..

athai̱tatpau̎rṇamā̱syā ājya̱ṃ nirva̍pati.
kāmo̱ vai pau̎rṇamā̱sī.
kāma̱ ājyam̎.
kāme̍nai̱va kāma̱ṃ sama̍rdhayati.
kṣi̱prame̍na̱ṃ sakāma̱ upa̍namati.
yena̱ kāme̍na̱ yaja̍te.
so'tra̍ juhoti.
pau̱rṇa̱mā̱syai svāhā̱ kāmā̍ya̱ svāhā''ga̍tyai̱ svāheti̍..41..

Anuvāka 5

mi̱tro vā a̍kāmayata.
mi̱tra̱dheya̍me̱ṣu lo̱keṣva̱bhija̍yeya̱miti̍.
sa e̱taṃ mi̱trāyā̍nūrā̱dhebhya̍śca̱ruṃ nira̍vapat.
tato̱ vai sa mi̍tra̱dheya̍me̱ṣu lo̱keṣva̱bhya̍jayat.
mi̱tra̱dheya̍ṃ ha̱ vā e̱ṣu lo̱keṣva̱bhija̍yati.
ya e̱tena̍ ha̱viṣā̱ yaja̍te.
ya u̍ cainade̱vaṃ veda̍.
so'tra̍ juhoti.
mi̱trāya̱ svāhā̍'nūrā̱dhebhya̱ḥ svāhā̎.
mi̱tra̱dheyā̍ya̱ svāhā̱'bhiji̍tyai̱ svāheti̍..42..

indro̱ vā a̍kāmayata.
jyaiṣṭhya̍ṃ de̱vānā̍ma̱bhija̍yeya̱miti̍.
sa e̱tamindrā̍ya jye̱ṣṭhāyai̍ puro̱ḍāśa̱mekā̍daśakapāla̱ṃ nira̍vapanma̱hāvrī̍hīṇām.
tato̱ vai sa jyaiṣṭhya̍ṃ de̱vānā̍ma̱bhya̍jayat.
jyaiṣṭhya̍ṃ ha̱ vai sa̍mā̱nānā̍ma̱bhija̍yati.
ya e̱tena̍ ha̱viṣā̱ yaja̍te.
ya u̍ cainade̱vaṃ veda̍.
so'tra̍ juhoti.
indrā̍ya̱ svāhā̎ jye̱ṣṭhāyai̱ svāhā̎.
jyaiṣṭhyā̍ya̱ svāhā̱'bhiji̍tyai̱ svāheti̍..43..

pra̱jāpa̍ti̱rvā a̍kāmayata.
mūla̍ṃ pra̱jāṃ vi̍nde̱yeti̍.
sa e̱taṃ pra̱jāpa̍taye̱ mūlā̍ya ca̱ruṃ nira̍vapat.
tato̱ vai sa mūla̍ṃ pra̱jāma̍vindata.
mūla̍ṃ ha̱ vai pra̱jāṃ vi̍ndate.
ya e̱tena̍ ha̱viṣā̱ yaja̍te.
ya u̍ cainade̱vaṃ veda̍.
so'tra̍ juhoti.
pra̱jāpa̍taye̱ svāhā̱ mūlā̍ya̱ svāhā̎.
pra̱jāyai̱ svāheti̍..44..

āpo̱ vā a̍kāmayanta.
sa̱mu̱draṃ kāma̍ma̱bhija̍ye̱meti̍.
tā e̱tama̱dbhyo̍'ṣā̱ḍhābhya̍śca̱ruṃ nira̍vapan.
tato̱ vai tāḥ sa̍mu̱draṃ kāma̍ma̱bhya̍jayan.
sa̱mu̱draṃ ha̱ vai kāma̍ma̱bhija̍yati.
ya e̱tena̍ ha̱viṣā̱ yaja̍te.
ya u̍ cainade̱vaṃ veda̍.
so'tra̍ juhoti.
a̱dbhyaḥ svāhā̍'ṣā̱ḍhābhya̱ḥ svāhā̎.
sa̱mu̱drāya̱ svāhā̱ kāmā̍ya̱ svāhā̎.
a̱bhiji̍tyai̱ svāheti̍..45..

viśve̱ vai de̱vā a̍kāmayanta.
a̱na̱pa̱ja̱yyaṃ ja̍ye̱meti̍.
ta e̱taṃ viśve̎bhyo de̱vebhyo̍'ṣā̱ḍhābhya̍śca̱ruṃ nira̍vapan.
tato̱ vai te̍'napaja̱yyama̍jayan.
a̱na̱pa̱ja̱yyaṃ ha̱ vai ja̍yati.
ya e̱tena̍ ha̱viṣā̱ yaja̍te.
ya u̍ cainade̱vaṃ veda̍.
so'tra̍ juhoti.
viśve̎bhyo de̱vebhya̱ḥ svāhā̍'ṣā̱ḍhābhya̱ḥ svāhā̎.
a̱na̱pa̱ja̱yyāya̱ svāhā̱ jityai̱ svāheti̍..46..

brahma̱ vā a̍kāmayata.
bra̱hma̱lo̱kama̱bhija̍yeya̱miti̍.
tade̱taṃ brahma̍ṇe'bhi̱jite̍ ca̱ruṃ nira̍vapat.
tato̱ vai tadbra̍hmalo̱kama̱bhya̍jayat.
bra̱hma̱lo̱kaṃ ha̱ vā a̱bhija̍yati.
ya e̱tena̍ ha̱viṣā̱ yaja̍te.
ya u̍ cainade̱vaṃ veda̍.
so'tra̍ juhoti.
brahma̍ṇe̱ svāhā̍'bhi̱jite̱ svāhā̎.
bra̱hma̱lo̱kāya̱ svāhā̱'bhiji̍tyai̱ svāheti̍..47..

viṣṇu̱rvā a̍kāmayata.
puṇya̱ṃ śloka̍ṃ śṛṇvīya.
na mā̍ pā̱pī kī̱rtirāga̍cche̱diti̍.
sa e̱taṃ viṣṇa̍ve śro̱ṇāyai̍ puro̱ḍāśa̍ṃ trikapā̱laṃ nira̍vapat.
tato̱ vai sa puṇya̱ṃ śloka̍maśṛṇuta.
naina̍ṃ pā̱pī kī̱rtirāga̍cchat.
puṇya̍ṃ ha̱ vai śloka̍ṃ śṛṇute.
naina̍ṃ pā̱pī kī̱rtirāga̍cchati.
ya e̱tena̍ ha̱viṣā̱ yaja̍te.
ya u̍ cainade̱vaṃ veda̍.
so'tra̍ juhoti.
viṣṇa̍ve̱ svāhā̎ śro̱ṇāyai̱ svāhā̎.
ślokā̍ya̱ svāhā̎ śru̱tāya̱ svāheti̍..48..

vasa̍vo̱ vā a̍kāmayanta.
agra̍ṃ de̱vatā̍nā̱ṃ parī̍yā̱meti̍.
ta e̱taṃ vasu̍bhya̱ḥ śravi̍ṣṭhābhyaḥ puro̱ḍāśa̍ma̱ṣṭāka̍pāla̱ṃ nira̍vapan.
tato̱ vai te'gra̍ṃ de̱vatā̍nā̱ṃ paryā̍yan.
agra̍ṃ ha̱ vai sa̍mā̱nānā̱ṃ parye̍ti.
ya e̱tena̍ ha̱viṣā̱ yaja̍te.
ya u̍ cainade̱vaṃ veda̍.
so'tra̍ juhoti.
vasu̍bhya̱ḥ svāhā̱ śravi̍ṣṭhābhya̱ḥ svāhā̎.
agrā̍ya̱ svāhā̱ parī̎tyai̱ svāheti̍..49..

indro̱ vā a̍kāmayata.
dṛ̱ḍho'śi̍thilaḥ syā̱miti̍.
sa e̱taṃ varu̍ṇāya śa̱tabhi̍ṣaje bheṣa̱jebhya̍ḥ puro̱ḍāśa̱ṃ daśa̍kapāla̱ṃ nira̍vapatkṛ̱ṣṇānā̎ṃ vrīhī̱ṇām.
tato̱ vai sa dṛ̱ḍho'śi̍thilo'bhavat.
dṛ̱ḍho ha̱ vā aśi̍thilo bhavati.
ya e̱tena̍ ha̱viṣā̱ yaja̍te.
ya u̍ cainade̱vaṃ veda̍.
so'tra̍ juhoti.
varu̍ṇāya̱ svāhā̍ śa̱tabhi̍ṣaje̱ svāhā̎.
bhe̱ṣa̱jebhya̱ḥ svāheti̍..50..

a̱jo vā eka̍pādakāmayata.
te̱ja̱svī bra̍hmavarca̱sī syā̱miti̍.
sa e̱tama̱jāyaika̍pade proṣṭhapa̱debhya̍śca̱ruṃ nira̍vapat.
tato̱ vai sa te̍ja̱svī bra̍hmavarca̱sya̍bhavat.
te̱ja̱svī ha̱ vai bra̍hmavarca̱sī bha̍vati.
ya e̱tena̍ ha̱viṣā̱ yajate.
ya u̍ cainade̱vaṃ veda̍.
so'tra̍ juhoti.
a̱jāyaika̍pade̱ svāhā̎ proṣṭhapa̱debhya̱ḥ svāhā̎.
teja̍se̱ svāhā̎ brahmavarca̱sāya̱ svāheti̍..51..

ahi̱rvai bu̱dhniyo̍'kāmayata.
i̱māṃ pra̍ti̱ṣṭhāṃ vi̍nde̱yeti̍.
sa e̱tamaha̍ye bu̱dhniyā̍ya proṣṭhapa̱debhya̍ḥ puro̱ḍāśa̱ṃ bhūmi̍kapāla̱ṃ nira̍vapat.
tato̱ vai sa i̱māṃ pra̍ti̱ṣṭhāma̍vindata.
i̱māṃ ha̱ vai pra̍ti̱ṣṭhāṃ vi̍ndate.
ya e̱tena̍ ha̱viṣā̱ yaja̍te.
ya u̍ cainade̱vaṃ veda̍.
so'tra̍ juhoti.
aha̍ye bu̱dhniyā̍ya̱ svāhā̎ proṣṭhapa̱debhya̱ḥ svāhā̎.
pra̱ti̱ṣṭhāyai̱ svāheti̍..52..

pū̱ṣā vā a̍kāmayata.
pa̱śu̱mānthsyā̱miti̍.
sa e̱taṃ pū̱ṣṇe re̱vatyai̍ ca̱ruṃ nira̍vapat.
tato̱ vai sa pa̍śu̱māna̍bhavat.
pa̱śu̱mān ha̱ vai bha̍vati.
ya e̱tena̍ ha̱viṣā̱ yaja̍te.
ya u̍ cainade̱vaṃ veda̍.
so'tra̍ juhoti.
pū̱ṣṇe svāhā̍ re̱vatyai̱ svāhā̎.
pa̱śubhya̱ḥ svāheti̍..53..

a̱śvinau̱ vā a̍kāmayetām.
śro̱tra̱svinā̱vaba̍dhirau syā̱veti̍.
tāve̱tama̱śvibhyā̍maśva̱yugbhyā̎ṃ puro̱ḍāśa̍ṃ dvikapā̱laṃ nira̍vapatām.
tato̱ vai tau śro̎tra̱svinā̱vaba̍dhirāvabhavatām.
śro̱tra̱svī ha̱ vā aba̍dhiro bhavati.
ya e̱tena̍ ha̱viṣā̱ yaja̍te.
ya u̍ cainade̱vaṃ veda̍.
so'tra̍ juhoti.
a̱śvibhyā̱ṃ svāhā̎'śva̱yugbhyā̱ṃ svāhā̎.
śrotrā̍ya̱ svāhā̱ śrutyai̱ svāheti̍..54..

ya̱mo vā a̍kāmayata.
pi̱tṛ̱ṇāṃ rā̱jyama̱bhija̍yeya̱miti̍.
sa e̱taṃ ya̱māyā̍pa̱bhara̍ṇībhyaśca̱ruṃ nira̍pavat.
tato̱ vai sa pi̍tṛ̱ṇāṃ rā̱jyama̱bhya̍jayat.
sa̱mā̱nānā̍ṃ ha̱ vai rā̱jyama̱bhi ja̍yati.
ya e̱tena̍ ha̱viṣā̱ yaja̍te.
ya u̍ cainade̱vaṃ veda̍.
so'tra̍ juhoti.
ya̱māya̱ svāhā̍'pa̱bhara̍ṇībhya̱ḥ svāhā̎.
rā̱jyāya̱ svāhā̱'bhiji̍tyai̱ svāheti̍..55..

athai̱tada̍māvā̱syā̍yā̱ ājya̱ṃ nirva̍pati.
kāmo̱ vā a̍māvā̱syā̎.
kāma̱ ājyam̎.
kāme̍nai̱va kāma̱ṃ sama̍rdhayati.
kṣi̱prame̍na̱ṃ sakāma̱ upa̍namati.
yena̱ kāme̍na̱ yaja̍te.
so'tra̍ juhoti.
a̱mā̱vā̱syā̍yai̱ svāhā̱ kāmā̍ya̱ svāhā''ga̍tyai̱ svāheti̍..56..

Anuvāka 6

ca̱ndramā̱ vā a̍kāmayata.
a̱ho̱rā̱trāna̍rdhamā̱sānmāsā̍nṛ̱tūnthsa̍ṃvathsa̱ramā̱ptvā.
ca̱ndrama̍sa̱ḥ sāyu̍jyaṃ salo̱katā̍māpnuyā̱miti̍.
sa e̱taṃ ca̱ndrama̍se pratī̱dṛśyā̍yai puro̱ḍāśa̱ṃ pañca̍daśakapāla̱ṃ nira̍vapat.
tato̱ vai so̍'horā̱trāna̍rdhamā̱sānmāsā̍nṛ̱tūnthsa̍ṃvathsa̱ramā̱ptvā.
ca̱ndrama̍sa̱ḥ sāyu̍jyaṃ salo̱katā̍māpnot.
a̱ho̱rā̱trān ha̱ vā a̍rdhamā̱sānmāsā̍nṛ̱tūnthsa̍ṃvathsa̱ramā̱ptvā.
ca̱ndrama̍sa̱ḥ sāyu̍jyaṃ salo̱katā̍māpnoti.
ya e̱tena̍ ha̱viṣā̱ yaja̍te.
ya u̍ cainade̱vaṃ veda̍.
so'tra̍ juhoti.
ca̱ndrama̍se̱ svāhā̎ pratī̱dṛśyā̍yai̱ svāhā̎.
a̱ho̱rā̱trebhya̱ḥ svāhā̎'rdhamā̱sebhya̱ḥ svāhā̎.
māse̎bhya̱ḥ svāha̱rtubhya̱ḥ svāhā̎.
sa̱ṃva̱thsa̱rāya̱ svāheti̍..57..

a̱ho̱rā̱tre vā a̍kāmayetām.
atya̍horā̱tre mu̍cyevahi.
na nā̍vahorā̱tre ā̎pnuyātā̱miti̍.
te e̱tama̍horā̱trābhyā̎ṃ ca̱ruṃ nira̍vapatām.
dva̱yānā̎ṃ vrīhī̱ṇām.
śu̱klānā̎ṃ ca kṛ̱ṣṇānā̎ṃ ca.
sa̱vā̱tyordu̱gdhe.
śve̱tāyai̍ ca kṛ̱ṣṇāyai̍ ca.
tato̱ vai te atya̍horā̱tre a̍mucyete.
naine̍ ahorā̱tre ā̎pnutām.
ati̍ ha̱ vā a̍horā̱tre mu̍cyate.
naina̍mahorā̱tre ā̎pnutaḥ.
ya e̱tena̍ ha̱viṣā̱ yaja̍te.
ya u̍ cainade̱vaṃ veda̍.
so'tra̍ juhoti.
ahne̱ svāhā̱ rātri̍yai̱ svāhā̎.
ati̍muktyai̱ svāheti̍..58..

u̱ṣā vā a̍kāmayata.
pri̱yā''di̱tyasya̍ su̱bhagā̎ syā̱miti̍.
saitamu̱ṣase̍ ca̱ruṃ nira̍vapat.
tato̱ vai sā pri̱yā''di̱tyasya̍ su̱bhagā̍'bhavat.
pri̱yo ha̱ vai sa̍mā̱nānā̍ṃ su̱bhago̍ bhavati.
ya e̱tena̍ ha̱viṣā̱ yaja̍te.
ya u̍ cainade̱vaṃ veda̍.
so'tra̍ juhoti.
u̱ṣase̱ svāhā̱ vyu̍ṣṭyai̱ svāhā̎.
vyū̱ṣuṣyai̱ svāhā̎ vyu̱cchantyai̱ svāhā̎.
vyu̍ṣṭāyai̱ svāheti̍..59..

athai̱tasmai̱ nakṣa̍trāya ca̱ruṃ nirva̍pati.
yathā̱ tvaṃ de̱vānā̱masi̍.
e̱vama̱haṃ ma̍nu̱ṣyā̍ṇāṃ bhūyāsa̱miti̍.
yathā̍ ha̱ vā e̱tadde̱vānā̎m.
e̱vaṃ ha̱ vā e̱ṣa ma̍nu̱ṣyā̍ṇāṃ bhavati.
ya e̱tena̍ ha̱viṣā̱ yaja̍te.
ya u̍ cainade̱vaṃ veda̍.
so'tra̍ juhoti.
nakṣa̍trāya̱ svāho̍deṣya̱te svāhā̎.
u̱dya̱te svāhodi̍tāya̱ svāhā̎.
hara̍se̱ svāhā̱ bhara̍se̱ svāhā̎.
bhrāja̍se̱ svāhā̱ teja̍se̱ svāhā̎.
tapa̍se̱ svāhā̎ brahmavarca̱sāya̱ svāheti̍..60..

sūryo̱ vā a̍kāmayata.
nakṣa̍trāṇāṃ prati̱ṣṭhā syā̱miti̍.
sa e̱taṃ sūryā̍ya̱ nakṣa̍trebhyaśca̱ruṃ nira̍vapat.
tato̱ vai sa nakṣa̍trāṇāṃ prati̱ṣṭhā'bha̍vat.
pra̱ti̱ṣṭhā ha̱ vai sa̍mā̱nānā̎ṃ bhavati.
ya e̱tena̍ ha̱viṣā̱ yaja̍te.
ya u̍ cainade̱vaṃ veda̍.
so'tra̍ juhoti.
sūryā̍ya̱ svāhā̱ nakṣa̍trebhya̱ḥ svāhā̎.
pra̱ti̱ṣṭhāyai̱ svāheti̍..61..

athai̱tamadi̍tyai ca̱ruṃ nirva̍pati.
i̱yaṃ vā adi̍tiḥ.
a̱syāme̱va prati̍ tiṣṭhati.
so'tra̍ juhoti.
adi̍tyai̱ svāhā̎ prati̱ṣṭhāyai̱ svāheti̍..62..

athai̱taṃ viṣṇa̍ve ca̱ruṃ nirva̍pati.
ya̱jño vai viṣṇu̍ḥ.
ya̱jña e̱vānta̱taḥ prati̍ tiṣṭhati.
so'tra̍ juhoti.
viṣṇa̍ve̱ svāhā̍ ya̱jñāya̱ svāhā̎.
pra̱ti̱ṣṭhāyai̱ svāheti̍..63..

Anuvāka 1

tṛ̱tīya̍syāmi̱to di̱vi soma̍ āsīt.
taṃ gā̍ya̱tryā'ha̍rat.
tasya̍ pa̱rṇama̍cchidyata.
tatpa̱rṇo̍'bhavat.
tatpa̱rṇasya̍ parṇa̱tvam.
brahma̱ vai pa̱rṇaḥ.
yatpa̍rṇaśā̱khayā̍ va̱thsāna̍pāka̱roti̍.
brahma̍ṇai̱vainā̍na̱pāka̍roti.
gā̱ya̱tro vai pa̱rṇaḥ.
gā̱ya̱trāḥ pa̱śava̍ḥ..1..

tasmā̱ttrīṇi̍trīṇi pa̱rṇasya̍ palā̱śāni̍.
tri̱padā̍ gāya̱trī.
yatpa̍rṇaśā̱khayā̱ gāḥ prā̱rpaya̍ti.
svayai̱vainā̍ de̱vata̍yā̱ prārpa̍yati.
yaṃ kā̱maye̍tāpa̱śuḥ syā̱diti̍.
a̱pa̱rṇāntasmai̱ śuṣkā̎grā̱māha̍ret.
a̱pa̱śure̱va bha̍vati.
yaṃ kā̱maye̍ta paśu̱mānthsyā̱diti̍.
ba̱hu̱pa̱rṇāntasmai̍ bahuśā̱khāmāha̍ret.
pa̱śu̱manta̍me̱vaina̍ṃ karoti..2..

yatprācī̍mā̱ hare̎t.
de̱va̱lo̱kama̱bhi ja̍yet.
yadudī̍cīṃ manuṣyalo̱kam.
prācī̱mudī̍cī̱mā ha̍rati.
u̱bhayo̎rlo̱kayo̍ra̱bhiji̍tyai.
i̱ṣe tvo̱rje tvetyā̍ha.
iṣa̍me̱vorja̱ṃ yaja̍māne dadhāti.
vā̱yava̱ḥ sthetyā̍ha.
vā̱yurvā a̱ntari̍kṣa̱syādhya̍kṣāḥ.
a̱nta̱ri̱kṣa̱de̱va̱tyā̎ḥ khalu̱ vai pa̱śava̍ḥ..3..

vā̱yava̍ e̱vainā̱npari̍ dadāti.
pra vā e̍nāne̱tadā ka̍roti.
yadāha̍.
vā̱yava̱ḥ sthetyu̍pā̱yava̱ḥ sthetyā̍ha.
yaja̍mānāyai̱va pa̱śūnupa̍ hvayate.
de̱vo va̍ḥ savi̱tā prārpa̍ya̱tvityā̍ha̱ prasū̎tyai.
śreṣṭha̍tamāya̱ karma̍ṇa̱ ityā̍ha.
ya̱jño hi śreṣṭha̍tama̱ṃ karma̍.
tasmā̍de̱vamā̍ha.
āpyā̍yadhvamaghniyā devabhā̱gamityā̍ha..4..

va̱thsebhya̍śca̱ vā e̱tāḥ pu̱rā ma̍nu̱ṣye̎bhya̱ścāpyā̍yanta.
de̱vebhya̍ e̱vainā̱ indrā̱yāpyā̍yayati.
ūrja̍svatī̱ḥ paya̍svatī̱rityā̍ha.
ūrja̱ṃ hi paya̍ḥ sa̱mbhara̍nti.
pra̱jāva̍tīranamī̱vā a̍ya̱kṣmā ityā̍ha̱ prajā̎tyai.
mā va̍ḥ ste̱na ī̍śata̱ mā'ghaśa̍ṃsa̱ ityā̍ha̱ guptyai̎.
ru̱drasya̍ he̱tiḥ pari̍ vo vṛṇa̱ktvityā̍ha.
ru̱drāde̱vainā̎strāyate.
dhru̱vā a̱smingopa̍tau syāta ba̱hvīrityā̍ha.
dhru̱vā e̱vāsmi̍nba̱hvīḥ ka̍roti..5..

yaja̍mānasya pa̱śūnpā̱hītyā̍ha.
pa̱śū̱nāṃ go̍pī̱thāya̍.
tasmā̎thsā̱yaṃ pa̱śava̱ upa̍sa̱māva̍rtante.
ana̍dhaḥ sādayati.
garbhā̍ṇā̱ṃ dhṛtyā̱ apra̍pādāya.
tasmā̱dgarbhā̎ḥ pra̱jānā̱mapra̍pādukāḥ.
u̱parī̍va̱ nida̍dhāti.
u̱parī̍va̱ hi su̍va̱rgo lo̱kaḥ.
su̱va̱rgasya̍ lo̱kasya̱ sama̍ṣṭyai..6..

Anuvāka 2

de̱vasya̍ tvā savi̱tuḥ pra̍sa̱va itya̍śvapa̱ṟśumāda̍tte̱ prasū̎tyai.
a̱śvino̎rbā̱hubhyā̱mityā̍ha.
a̱śvinau̱ hi de̱vānā̍madhva̱ryū āstā̎m.
pū̱ṣṇo hastā̎bhyā̱mityā̍ha̱ yatyai̎.
yo vā oṣa̍dhīḥ parva̱śo veda̍.
nainā̱ḥ sa hi̍nasti.
pra̱jāpa̍ti̱rvā oṣa̍dhīḥ parva̱śo ve̍da.
sa e̍nā̱ na hi̍nasti.
a̱śva̱pa̱rśvā ba̱ṟhiracchai̍ti.
prā̱jā̱pa̱tyo vā aśva̍ḥ sayoni̱tvāya̍..7..

oṣa̍dhīnā̱mahi̍ṃsāyai.
ya̱jñasya̍ gho̱ṣada̱sītyā̍ha.
yaja̍māna e̱va ra̱yiṃ da̍dhāti.
pratyu̍ṣṭa̱ṃ rakṣa̱ḥ pratyu̍ṣṭā̱ arā̍taya̱ ityā̍ha.
rakṣa̍sā̱mapa̍hatyai.
preyama̍gāddhi̱ṣaṇā̍ ba̱ṟhiracchetyā̍ha.
vi̱dyā vai dhi̱ṣaṇā̎.
vi̱dyayai̱vaina̱dacchai̍ti.
manu̍nā kṛ̱tā sva̱dhayā̱ vita̱ṣṭetyā̍ha.
mā̱na̱vī hi parśu̍ḥ sva̱dhākṛ̍tā..8..

ta āva̍hanti ka̱vaya̍ḥ pu̱rastā̱dityā̍ha.
śu̱śru̱vāṃso̱ vai ka̱vaya̍ḥ.
ya̱jñaḥ pu̱rastā̎t.
mu̱kha̱ta e̱va ya̱jñamā ra̍bhate.
atho̱ yade̱tadu̱ktvā yata̱ḥ kuta̍ścā̱ hara̍ti.
tatprācyā̍ e̱va di̱śo bha̍vati.
de̱vebhyo̱ juṣṭa̍mi̱ha ba̱ṟhirā̱sada̱ ityā̍ha.
ba̱ṟhiṣa̱ḥ samṛ̍ddhyai.
karma̱ṇo'na̍parādhāya.
de̱vānā̎ṃ pariṣū̱tama̱sītyā̍ha..9..

yadvā i̱daṃ kiṃ ca̍.
tadde̱vānā̎ṃ pariṣū̱tam.
atho̱ yathā̱ vasya̍se prati̱procyāhe̱daṃ ka̍riṣyā̱mīti̍.
e̱vame̱va tada̍dhva̱ryurde̱vebhya̍ḥ prati̱procya̍ ba̱ṟhirdā̍ti.
ā̱tmano'hi̍ṃsāyai.
yāva̍taḥ sta̱mbānpa̍ridi̱śet.
yatteṣā̍mucchi̱ṃṣyāt.
ati̱ tadya̱jñasya̍ recayet.
eka̍ṃ sta̱mbaṃ pari̍diśet.
taṃ sarva̍ṃ dāyāt..10..

ya̱jñasyāna̍tirekāya.
va̱ṟṣavṛ̍ddhama̱sītyā̍ha.
va̱ṟṣavṛ̍ddhā̱ vā oṣa̍dhayaḥ.
deva̍barhi̱rityā̍ha.
de̱vebhya̍ e̱vaina̍tkaroti.
mā tvā̱'nvaṅmā ti̱ryagityā̱hāhi̍ṃsāyai.
parva̍ te rādhyāsa̱mityā̱hardhyai̎.
ā̱cche̱ttā te̱ mā ri̍ṣa̱mityā̍ha.
nāsyā̱'̱'̱tmano̍ mīyate.
ya e̱vaṃ veda̍..11..

deva̍barhiḥ śa̱tava̍lśa̱ṃ viro̱hetyā̍ha.
pra̱jā vai ba̱ṟhiḥ.
pra̱jānā̎ṃ pra̱jana̍nāya.
sa̱hasra̍valśā̱ vi va̱yaṃ ru̍he̱metyā̍ha.
ā̱me̱vaitāmā śā̎ste.
pṛ̱thi̱vyāḥ sa̱mpṛca̍ḥ pā̱hītyā̍ha̱ prati̍ṣṭhityai.
ayu̍ṅgāyuṅgānmu̱ṣṭīṃ lu̍noti.
mi̱thu̱na̱tvāya̱ prajā̎tyai.
su̱sa̱mbhṛtā̎ tvā̱ sambha̍rā̱mītyā̍ha.
brahma̍ṇai̱vaina̱thsambha̍rati..12..

adi̍tyai̱ rāsnā̱'sītyā̍ha.
i̱yaṃ vā adi̍tiḥ.
a̱syā e̱vaina̱drāsnā̎ṃ karoti.
i̱ndrā̱ṇyai sa̱nnaha̍na̱mityā̍ha.
i̱ndrā̱ṇī vā agre̍ de̱vatā̍nā̱ṃ sama̍nahyata.
sā''rdhno̎t.
ṛddhyai̱ sanna̍hyati.
pra̱jā vai ba̱ṟhiḥ.
pra̱jānā̱mapa̍rāvāpāya.
tasmā̱thsnāva̍santatāḥ pra̱jā jā̍yante..13..

pū̱ṣā te̎ gra̱nthiṃ gra̍thnā̱tvityā̍ha.
puṣṭi̍me̱va yaja̍māne dadhāti.
sa te̱ māsthā̱dityā̱hāhi̍ṃsāyai.
pa̱ścātprāñca̱mupa̍gūhati.
pa̱ścādvai prā̱cīna̱ṃ reto̍ dhīyate.
pa̱ścāde̱vāsmai̎ prā̱cīna̱ṃ reto̍ dadhāti.
indra̍sya tvā bā̱hubhyā̱mudya̍ccha̱ ityā̍ha.
i̱ndri̱yame̱va yaja̍māne dadhāti.
bṛha̱spate̎rmū̱rdhnā ha̍rā̱mītyā̍ha.
brahma̱ vai de̱vānā̱ṃ bṛha̱spati̍ḥ..14..

brahma̍ṇai̱vaina̍ddharati.
u̱rva̍ntari̍kṣa̱manvi̱hītyā̍ha̱ gatyai̎.
de̱va̱ṅga̱mama̱sītyā̍ha.
de̱vāne̱vaina̍dgamayati.
ana̍dhaḥ sādayati.
garbhā̍ṇā̱ṃ dhṛtyā̱ apra̍pādāya.
tasmā̱dgarbhā̎ḥ pra̱jānā̱mapra̍pādukāḥ.
u̱parī̍va̱ ni da̍dhāti.
u̱parī̍va̱ hi su̍va̱rgo lo̱kaḥ.
su̱va̱rgasya̍ lo̱kasya̱ sama̍ṣṭyai..15..

Anuvāka 3

pū̱rve̱dyuri̱dhmāba̱ṟhiḥ ka̍roti.
ya̱jñame̱vārabhya̍ gṛhī̱tvopa̍vasati.
pra̱jāpa̍tirya̱jñama̍sṛjata.
tasyo̱khe a̍sraṃsetām.
ya̱jño vai pra̱jāpa̍tiḥ.
yathsā̎nnāyyo̱khe bhava̍taḥ.
ya̱jñasyai̱va tadu̱khe upa̍dadhā̱tyapra̍sraṃsāya.
śundha̍dhva̱ṃ daivyā̍ya̱ karma̍ṇe devaya̱jyāyā̱ ityā̍ha.
de̱va̱ya̱jyāyā̍ e̱vainā̍ni śundhati.
mā̱ta̱riśva̍no gha̱rmo̍'sītyā̍ha..16..

a̱ntari̍kṣa̱ṃ vai mā̍ta̱riśva̍no gha̱rmaḥ.
e̱ṣāṃ lo̱kānā̱ṃ vidhṛ̍tyai.
dyaura̍si pṛthi̱vya̍sītyā̍ha.
di̱vaśca̱ hye̍ṣā pṛ̍thi̱vyāśca̱ sambhṛ̍tā.
yadu̱khā.
tasmā̍de̱vamā̍ha.
vi̱śvadhā̍yā asi para̱meṇa̱ dhāmnetyā̍ha.
vṛṣṭi̱rvai vi̱śvadhā̍yāḥ.
vṛṣṭi̍me̱vāva̍ rundhe.
dṛṃha̍sva̱ mā hvā̱rityā̍ha̱ dhṛtyai̎..17..

vasū̍nāṃ pa̱vitra̍ma̱sītyā̍ha.
prā̱ṇā vai vasa̍vaḥ.
teṣā̱ṃ vā e̱tadbhā̍ga̱dheyam̎.
yatpa̱vitram̎.
tebhya̍ e̱vaina̍tkaroti.
śa̱tadhā̍raṃ sa̱hasra̍dhāra̱mityā̍ha.
prā̱ṇeṣve̱vāyu̍rdadhāti sarva̱tvāya̍.
tri̱vṛtpa̍lāśaśā̱khāyā̎ṃ darbha̱maya̍ṃ bhavati.
tri̱vṛdvai prā̱ṇaḥ.
tri̱vṛta̍me̱va prā̱ṇaṃ ma̍dhya̱to yaja̍māne dadhāti..18..

sau̱myaḥ pa̱rṇaḥ sa̍yoni̱tvāya̍.
sā̱kṣātpa̱vitra̍ṃ da̱rbhāḥ.
prākhsā̱yamadhi̱ni da̍dhāti.
tatprā̍ṇāpā̱nayo̍ rū̱pam.
ti̱ryakprā̱taḥ.
taddarśa̍sya rū̱pam.
dā̱rśyaṃ hye̍tadaha̍ḥ.
anna̱ṃ vai ca̱ndramā̎ḥ.
anna̍ṃ prā̱ṇāḥ.
u̱bhaya̍me̱vopai̱tyajā̍mitvāya..19..

tasmā̍da̱yaṃ sa̱rvata̍ḥ pavate.
hu̱taḥ sto̱ko hu̱to dra̱phsa ityā̍ha̱ prati̍ṣṭhityai.
ha̱viṣo'ska̍ndāya.
na hi hu̱taṃ svāhā̍kṛta̱ṃ skanda̍ti.
di̱vi nāko̱ nāmā̱gniḥ.
tasya̍ vi̱pruṣo̍ bhāga̱dheyam̎.
a̱gnaye̍ bṛha̱te nākā̱yetyā̍ha.
nāka̍me̱vāgniṃ bhā̍ga̱dheye̍na̱ sama̍rdhayati.
svāhā̱ dyāvā̍pṛthi̱vībhyā̱mityā̍ha.
dyāvā̍pṛthi̱vyore̱vaina̱tprati̍ṣṭhāpayati..20..

pa̱vitra̍va̱tyāna̍yati.
a̱pāṃ cai̱vauṣa̍dhīnāṃ ca̱ rasa̱ṃ saṃsṛ̍jati.
atho̱ oṣa̍dhīṣve̱va pa̱śūnprati̍ṣṭhāpayati.
a̱nvā̱rabhya̱ vāca̍ṃ yacchati.
ya̱jñasya̱ dhṛtyai̎.
dhā̱raya̍nnāste.
dhā̱raya̍nta iva̱ hi du̱hanti̍.
kāma̍dhukṣa̱ ityā̱hā''tṛ̱tīya̍syai.
traya̍ i̱me lo̱kāḥ.
i̱māne̱va lo̱kān yaja̍māno duhe..21..

a̱mūmiti̱ nāma̍ gṛhṇāti.
bha̱drame̱vāsā̱ṃ karmā̱ viṣka̍roti.
sā vi̱śvāyu̱ḥ sā vi̱śvavya̍cā̱ḥ sā vi̱śvaka̱rmetyā̍ha.
i̱yaṃ vai vi̱śvāyu̍ḥ.
a̱ntari̍kṣaṃ vi̱śvavya̍cāḥ.
a̱sau vi̱śvaka̍rmā.
i̱māne̱vaitābhi̍rlo̱kān ya̍thāpū̱rvaṃ du̍he.
atho̱ yathā̎ pradā̱tre puṇya̍mā̱śāste̎.
e̱vame̱vainā̍ e̱tadupa̍stauti.
tasmā̱tprādā̱dityu̱nnīya̱ vanda̍mānā upastu̱vanta̍ḥ pa̱śūndu̍hanti..22..

ba̱hu du̱gdhīndrā̍ya de̱vebhyo̍ ha̱viriti̱ vāca̱ṃ visṛ̍jate.
ya̱thā̱de̱va̱tame̱va prasau̍ti.
daivya̍sya ca mānu̱ṣasya̍ ca̱ vyāvṛ̍tyai.
trirā̍ha.
triṣa̍tyā̱ hi de̱vāḥ.
avā̍caṃ ya̱mo'na̍nvāra̱bhyotta̍rāḥ.
apa̍rimitame̱vāva̍ rundhe.
na dā̍rupā̱treṇa̍ duhyāt.
a̱gni̱vadvai dā̍rupā̱tram.
yaddā̍rupā̱treṇa̍ du̱hyāt..23..{ṇa̍}%for spacing!
yā̱tayā̎mnā ha̱viṣā̍ yajeta.
atho̱ khalvā̍huḥ.
pu̱ro̱ḍāśa̍mukhāni̱ vai ha̱vīṃṣi̍.
neta i̍taḥ puro̱ḍāśa̍ṃ ha̱viṣo̱ yāmo̱'stīti̍.
kāma̍me̱va dā̍rupā̱treṇa̍ duhyāt.
śū̱dra e̱va na du̍hyāt.
asa̍to̱ vā e̱ṣa sambhū̍taḥ.
yacchū̱draḥ.
aha̍vire̱va tadityā̍huḥ.
yacchū̱dro dogdhīti̍..24..

a̱gni̱ho̱trame̱va na du̍hyācchū̱draḥ.
taddhi notpu̱nanti̍.
ya̱dā khalu̱ vai pa̱vitra̍ma̱tyeti̍.
atha̱ taddha̱viriti̍.
sampṛ̍cyadhvamṛtāvarī̱rityā̍ha.
a̱pāṃ cai̱vauṣa̍dhīnāṃ ca̱ rasa̱ṃ saṃ sṛ̍jati.
tasmā̍da̱pāṃ cauṣa̍dhīnāṃ ca̱ rasa̱mupa̍jīvāmaḥ.
ma̱ndrā dhana̍sya sā̱taya̱ ityā̍ha.
puṣṭi̍me̱va yaja̍māne dadhāti.
some̍na̱ tvāta̍na̱cmīndrā̍ya̱ dadhītyā̍ha..25..

soma̍me̱vaina̍tkaroti.
yo vai soma̍ṃ bhakṣayi̱tvā.
sa̱ṃva̱thsa̱raṃ soma̱ṃ na piba̍ti.
pu̱na̱rbhakṣyo̎'sya somapī̱tho bha̍vati.
soma̱ḥ khalu̱ vai sā̎nnā̱yyam.
ya e̱vaṃ vi̱dvānthsā̎nnā̱yyaṃ piba̍ti.
a̱pu̱na̱rbhakṣyo̎'sya somapī̱tho bha̍vati.
na mṛ̱nmaye̱nāpi̍ dadhyāt.
yanmṛ̱nmaye̍nāpida̱dhyāt.
pi̱tṛ̱de̱va̱tya̍ṃ syāt..26..

a̱ya̱spā̱treṇa̍ vā dārupā̱treṇa̱ vā'pi̍ dadhāti.
taddhi sade̍vam.
u̱da̱nvadbha̍vati.
āpo̱ vai ra̍kṣo̱ghnīḥ.
rakṣa̍sā̱mapa̍hatyai.
ada̍stamasi̱ viṣṇa̍ve̱ tvetyā̍ha.
ya̱jño vai viṣṇu̍ḥ.
ya̱jñāyai̱vaina̱dada̍staṃ karoti.
viṣṇo̍ ha̱vyaṃ ra̍kṣa̱svetyā̍ha̱ guptyai̎.
ana̍dhaḥ sādayati.
garbhā̍ṇā̱ṃ dhṛtyā̱ apra̍pādāya.
tasmā̱dgarbhā̎ḥ pra̱jānā̱mapra̍pādukāḥ.
u̱parī̍va̱ nida̍dhāti.
u̱parī̍va̱ hi su̍va̱rgo lo̱kaḥ.
su̱va̱rgasya̍ lo̱kasya̱ sama̍ṣṭyai..27..

Anuvāka 4

karma̍ṇe vāṃ de̱vebhya̍ḥ śakeya̱mityā̍ha̱ śaktyai̎.
ya̱jñasya̱ vai santa̍ti̱manu̍ pra̱jāḥ pa̱śavo̱ yaja̍mānasya̱ santā̍yante.
ya̱jñasya̱ vicchi̍tti̱manu̍ pra̱jāḥ pa̱śavo̱ yaja̍mānasya̱ vicchi̍dyante.
ya̱jñasya̱ santa̍tirasi ya̱jñasya̍ tvā̱ santa̍tyai stṛṇāmi̱ santa̍tyai tvā ya̱jñasyetyāha̍va̱nīyā̱thsaṃ ta̍noti.
yaja̍mānasya pra̱jāyai̍ paśū̱nāṃ santa̍tyai.
a̱paḥ praṇa̍yati.
śra̱ddhā vā āpa̍ḥ.
śra̱ddhāme̱vārabhya̍ pra̱ṇīya̱ praca̍rati.
a̱paḥ praṇa̍yati.
ya̱jño vā āpa̍ḥ..28..

ya̱jñame̱vārabhya̍ pra̱ṇīya̱ praca̍rati.
a̱paḥ praṇa̍yati.
vajro̱ vā āpa̍ḥ.
vajra̍me̱va bhrātṛ̍vyebhyaḥ pra̱hṛtya̍ pra̱ṇīya̱ praca̍rati.
a̱paḥ praṇa̍yati.
āpo̱ vai ra̍kṣo̱ghnīḥ.
rakṣa̍sā̱mapa̍hatyai.
a̱paḥ praṇa̍yati.
āpo̱ vai de̱vānā̎ṃ pri̱yaṃ dhāma̍.
de̱vānā̍me̱va pri̱yaṃ dhāma̍ pra̱ṇīya̱ praca̍rati..29..

a̱paḥ praṇa̍yati.
āpo̱ vai sarvā̍ de̱vatā̎ḥ.
de̱vatā̍ e̱vā''rabhya̍ pra̱ṇīya̱ praca̍rati.
veṣā̍ya̱ tvetyā̍ha.
veṣā̍ya̱ hye̍nadāda̱tte.
pratyu̍ṣṭa̱ṃ rakṣa̱ḥ pratyu̍ṣṭā̱ arā̍taya̱ ityā̍ha.
rakṣa̍sā̱mapa̍hatyai.
dhūra̱sītyā̍ha.
e̱ṣa vai dhuryo̱'gniḥ.
taṃ yadanu̍paspṛśyātī̱yāt..30..

a̱dhva̱ryuṃ ca̱ yaja̍mānaṃ ca̱ prada̍het.
u̱pa̱spṛśyātye̍ti.
a̱dhva̱ryośca̱ yaja̍mānasya̱ cāpra̍dāhāya.
dhūrva̱ taṃ yo̎smāndhūrva̍ti̱ taṃ dhū̎rva̱ yaṃ va̱yaṃ dhūrvā̍ma̱ ityā̍ha.
dvau vāva puru̍ṣau.
yaṃ cai̱va dhūrva̍ti.
yaścai̍na̱ṃ dhūrva̍ti.
tāvu̱bhau śu̱cā'rpa̍yati.
tvaṃ de̱vānā̍masi̱ sasni̍tama̱ṃ papri̍tama̱ṃ juṣṭa̍tama̱ṃ vahni̍tamaṃ deva̱hūta̍ma̱mityā̍ha.
ya̱thā̱ya̱jure̱vaitat..31..

ahru̍tamasi havi̱rdhāna̱mityā̱hānā̎rtyai.
dṛṃha̍sva̱ mā hvā̱rityā̍ha̱ dhṛtyai̎.
mi̱trasya̍ tvā̱ cakṣu̍ṣā̱ prekṣa̱ ityā̍ha mitra̱tvāya̍.
mā bhermā saṃvi̍kthā̱ mā tvā̍ hiṃsiṣa̱mityā̱hāhi̍ṃsāyai.
yadvai kiṃ ca̱ vāto̱ nābhi̱ vāti̍.
tathsarva̍ṃ varuṇadeva̱tyam̎.
u̱ru vātā̱yetyā̍ha.
avā̍ruṇame̱vaina̍tkaroti.
de̱vasya̍ tvā savi̱tuḥ pra̍sa̱va ityā̍ha̱ prasū̎tyai.
a̱śvino̎rbā̱hubhyā̱mityā̍ha..32..

a̱śvinau̱ hi de̱vānā̍madhva̱ryū āstā̎m.
pū̱ṣṇo hastā̎bhyā̱mityā̍ha̱ yatyai̎.
a̱gnaye̱ juṣṭa̱ṃ nirva̍pā̱mītyā̍ha.
a̱gnaya̍ e̱vainā̱ṃ juṣṭa̱ṃ nirva̍pati.
triryaju̍ṣā.
traya̍ i̱me lo̱kāḥ.
e̱ṣāṃ lo̱kānā̱māptyai̎.
tū̱ṣṇīṃ ca̍tu̱rtham.
apa̍rimitame̱vāva̍ rundhe.
sa e̱vame̱vānu̍pū̱rvaṃ ha̱vīṃṣi̱ nirva̍pati..33..

i̱daṃ de̱vānā̍mi̱damu̍ naḥ sa̱hetyā̍ha̱ vyāvṛ̍tyai.
sphā̱tyai tvā̱ nārā̎tyā̱ ityā̍ha̱ guptyai̎.
tama̍sīva̱ vā e̱ṣo̎'ntaśca̍rati.
yaḥ pa̍rī̱ṇahi̍.
suva̍ra̱bhi vi khye̍ṣaṃ vaiśvāna̱raṃ jyoti̱rityā̍ha.
suva̍re̱vābhi vi pa̍śyati vaiśvāna̱raṃ jyoti̍ḥ.
dyāvā̍pṛthi̱vī ha̱viṣi̍ gṛhī̱ta uda̍vepetām.
dṛṃha̍ntā̱nduryā̱ dyāvā̍pṛthi̱vyorityā̍ha.
gṛ̱hāṇā̱ṃ dyāvā̍pṛthi̱vyordhṛtyai̎.
u̱rva̍ntari̍kṣa̱manvi̱hītyā̍ha̱ gatyai̎.
adi̍tyāstvo̱pasthe̍ sādayā̱mītyā̍ha.
i̱yaṃ vā adi̍tiḥ.
a̱syā e̱vaina̍du̱pasthe̍ sādayati.
agne̍ ha̱vyaṃ ra̍kṣa̱svetyā̍ha̱ guptyai̎..34..

Anuvāka 5

indro̍ vṛ̱trama̍han.
so̍'paḥ.
a̱bhya̍mriyata.
tāsā̱ṃ yanmedhya̍ṃ ya̱jñiya̱ṃ sade̍va̱māsī̎t.
tadapoda̍krāmat.
te da̱rbhā a̍bhavan.
yadda̱rbhaira̱pa u̍tpu̱nāti̍.
yā e̱va medhyā̍ ya̱jñiyā̱ḥ sade̍vā̱ āpa̍ḥ.
tābhi̍re̱vainā̱ utpu̍nāti.
dvābhyā̱mutpu̍nāti..35..

dvi̱pādyaja̍māna̱ḥ prati̍ṣṭhityai.
de̱vo va̍ḥ savi̱totpu̍nā̱tvityā̍ha.
sa̱vi̱tṛpra̍sūta e̱vainā̱ utpu̍nāti.
acchi̍dreṇa pa̱vitre̱ṇetyā̍ha.
a̱sau vā ā̍di̱tyo'cchi̍draṃ pa̱vitram̎.
tenai̱vainā̱ utpu̍nāti.
vaso̱ḥ sūrya̍sya ra̱śmibhi̱rityā̍ha.
prā̱ṇā vā āpa̍ḥ.
prā̱ṇā vasa̍vaḥ.
prā̱ṇā ra̱śmaya̍ḥ..36..

prā̱ṇaire̱va prā̱ṇānthsaṃ pṛ̍ṇakti.
sā̱vi̱tri̱yarcā.
sa̱vi̱tṛpra̍sūtaṃ me̱ karmā̍sa̱diti̍.
sa̱vi̱tṛpra̍sūtame̱vāsya̱ karma̍ bhavati.
pa̱ccho gā̍yatri̱yā tri̍ṣṣamṛddha̱tvāya̍.
āpo̍ devīragrepuvo agreguva̱ ityā̍ha.
rū̱pame̱vāsā̍me̱tanma̍hi̱māna̱ṃ vyāca̍ṣṭe.
agra̍ i̱maṃ ya̱jñaṃ na̍ya̱tāgre̍ ya̱jñapa̍ti̱mityā̍ha.
agra̍ e̱va ya̱jñaṃ na̍yanti.
agre̍ ya̱jñapa̍tim..37..

yu̱ṣmānindro̍'vṛṇīta vṛtra̱tūrye̍ yū̱yamindra̍mavṛṇīdhvaṃ vṛtra̱tūrya̱ ityā̍ha.
vṛ̱traṃ ha̍ hani̱ṣyannindra̱ āpo̍ vavre.
āpo̱ hendra̍ṃ vavrire.
sa̱ṃjñāme̱vāsā̍me̱tathsāmā̍na̱ṃ vyāca̍ṣṭe.
prokṣi̍tā̱ḥ sthetyā̍ha.
tenā''pa̱ḥ prokṣi̍tāḥ.
a̱gnaye̍ vo̱ juṣṭa̱ṃ prokṣā̎mya̱gnīṣomā̎bhyā̱mityā̍ha.
ya̱thā̱de̱va̱tame̱vainā̱nprokṣa̍ti.
triḥ prokṣa̍ti.
tryā̍vṛ̱ddhi ya̱jñaḥ..38..

atho̱ rakṣa̍sā̱mapa̍hatyai.
śundha̍dhva̱ṃ daivyā̍ya̱ karma̍ṇe devaya̱jyāyā̱ ityā̍ha.
de̱va̱ya̱jyāyā̍ e̱vainā̍ni śundhati.
triḥ prokṣa̍ti.
tryā̍vṛ̱ddhi ya̱jñaḥ.
atho̍ medhya̱tvāya̍.
ava̍dhūta̱ṃ rakṣo'va̍dhūtā̱ arā̍taya̱ ityā̍ha.
rakṣa̍sā̱mapa̍hatyai.
adi̍tyā̱stvaga̱sītyā̍ha.
i̱yaṃ vā adi̍tiḥ..39..

a̱syā e̱vaina̱ttvaca̍ṃ karoti.
prati̍ tvā pṛthi̱vī ve̱ttvityā̍ha̱ prati̍ṣṭhityai.
pu̱rastā̎tpratī̱cīna̍grīva̱mutta̍ralo̱mopa̍stṛṇāti medhya̱tvāya̍.
tasmā̎tpu̱rastā̎tpra̱tyañca̍ḥ pa̱śavo̱ medha̱mupa̍tiṣṭhante.
tasmā̎tpra̱jā mṛ̱gaṃ grāhu̍kāḥ.
ya̱jño de̱vebhyo̱ nilā̍yata.
kṛṣṇo̍ rū̱paṃ kṛ̱tvā.
yatkṛ̍ṣṇāji̱ne ha̱vira̍dhyava̱hanti̍.
ya̱jñāde̱va tadya̱jñaṃ prayu̍ṅkte.
ha̱viṣo'ska̍ndāya..40..

a̱dhi̱ṣava̍ṇamasi vānaspa̱tyamityā̍ha.
a̱dhi̱ṣava̍ṇame̱vaina̍tkaroti.
prati̱ tvā'di̍tyā̱stvagve̱ttvityā̍ha saya̱tvāya̍.
a̱gnesta̱nūra̱sītyā̍ha.
a̱gnervā e̱ṣā ta̱nūḥ.
yadoṣa̍dhayaḥ.
vā̱co vi̱sarja̍na̱mityā̍ha.
ya̱dā hi pra̱jā oṣa̍dhīnāma̱śñanti̍.
atha̱ vāca̱ṃ visṛ̍jante.
de̱vavī̍taye tvā gṛhṇā̱mītyā̍ha..41..

de̱vatā̍bhire̱vaina̱thsama̍rdhayati.
adri̍rasi vānaspa̱tya ityā̍ha.
grāvā̍ṇame̱vaina̍tkaroti.
sa i̱daṃ de̱vebhyo̍ ha̱vyaṃ su̱śami̍ śami̱ṣvetyā̍ha̱ śāntyai̎.
havi̍ṣkṛ̱dehītyā̍ha.
ya e̱va de̱vānā̍ṃ havi̱ṣkṛta̍ḥ.
tān hva̍yati.
trirhva̍yati.
triṣa̍tyā̱ hi de̱vāḥ.
iṣa̱māva̱dorja̱māva̱detyā̍ha..42..

iṣa̍me̱vorja̱ṃ yaja̍māne dadhāti.
dyu̱madva̍data va̱yaṃ sa̍ṅghā̱taṃ je̱ṣmetyā̍ha̱ bhrātṛ̍vyābhibhūtyai.
mano̎ḥ śra̱ddhāde̍vasya̱ yaja̍mānasyāsura̱ghnī vāk.
ya̱jñā̱yu̱dheṣu̱ pravi̍ṣṭā''sīt.
te'su̍rā̱ yāva̍nto yajñāyu̱dhānā̍mu̱dvada̍tāmu̱pāśṛ̍ṇvan.
te parā̍bhavan.
tasmā̱thsvānā̱ṃ madhye̍'va̱sāya̍ yajeta.
yāva̍nto'sya̱ bhrātṛ̍vyā yajñāyu̱dhānā̍mu̱dvada̍tāmupaśṛ̱ṇvanti̍.
te parā̍ bhavanti.
u̱ccaiḥ sa̱māha̍nta̱ vā ā̍ha̱ viji̍tyai..43..

vṛ̱ṅkta e̍ṣāmindri̱yaṃ vī̱ryam̎.
śreṣṭha̍ eṣāṃ bhavati.
va̱ṟṣavṛ̍ddhamasi̱ prati̍ tvā va̱ṟṣavṛ̍ddhaṃ ve̱ttvityā̍ha.
va̱ṟṣavṛ̍ddhā̱ vā oṣa̍dhayaḥ.
va̱ṟṣavṛ̍ddhā i̱ṣīkā̱ḥ samṛ̍ddhyai.
ya̱jñaṃ rakṣā̱ṃsyanu̱ prāvi̍śan.
tānya̱snā pa̱śubhyo̍ ni̱ravā̍dayanta.
tuṣai̱roṣa̍dhībhyaḥ.
parā̍pūta̱ṃ rakṣa̱ḥ parā̍pūtā̱ arā̍taya̱ ityā̍ha.
rakṣa̍sā̱mapa̍hatyai..44..

rakṣa̍sāṃ bhā̱go̍'sītyā̍ha.
tuṣai̍re̱va rakṣā̍ṃsi ni̱rava̍dayate.
a̱pa upa̍spṛśati medhya̱tvāya̍.
vā̱yurvo̱ vivi̍na̱ktvityā̍ha.
pa̱vitra̱ṃ vai vā̱yuḥ.
pu̱nātye̱vainān̍.
a̱ntari̍kṣādiva̱ vā e̱te praska̍ndanti.
ye śūrpā̎t.
de̱vo va̍ḥ savi̱tā hira̍ṇyapāṇi̱ḥ prati̍gṛhṇā̱tvityā̍ha̱ prati̍ṣṭhityai.
ha̱viṣo'ska̍ndāya.
triṣpha̱līka̍rta̱vā ā̍ha.
tryā̍vṛ̱ddhi ya̱jñaḥ.
atho̍ medhya̱tvāya̍..45..

Anuvāka 6

ava̍dhūta̱ṃ rakṣo'va̍dhūtā̱ arā̍taya̱ ityā̍ha.
rakṣa̍sā̱mapa̍hatyai.
adi̍tyā̱stvaga̱sītyā̍ha.
i̱yaṃ vā adi̍tiḥ.
a̱syā e̱vaina̱ttvaca̍ṃ karoti.
prati̍ tvā pṛthi̱vī ve̱ttvityā̍ha̱ prati̍ṣṭhityai.
pu̱rastā̎tpratī̱cīna̍grīva̱mutta̍ralo̱mopa̍stṛṇāti medhya̱tvāya̍.
tasmā̎tpu̱rastā̎tpra̱tyañca̍ḥ pa̱śavo̱ medha̱mupa̍tiṣṭhante.
tasmā̎tpra̱jā mṛ̱gaṃ grāhu̍kāḥ.
ya̱jño de̱vebhyo̱ nilā̍yata..46..

kṛṣṇo̍ rū̱paṃ kṛ̱tvā.
yatkṛ̍ṣṇāji̱ne ha̱vira̍dhipi̱naṣṭi̍.
ya̱jñāde̱va tadya̱jñaṃ prayu̍ṅkte.
ha̱viṣo'ska̍ndāya.
dyāvā̍pṛthi̱vī sa̱hāstā̎m.
te śa̍myāmā̱trameka̱maha̱rvyaitā̍ṃ śamyāmā̱trameka̱maha̍ḥ.
di̱vaḥ ska̍mbha̱nira̍si̱ prati̱ tvā'di̍tyā̱stvagve̱ttvityā̍ha.
dyāvā̍pṛthi̱vyorvītyai̎.
dhi̱ṣaṇā̍'si parva̱tyā prati̍ tvā di̱vaḥ ska̍mbha̱nirve̱ttvityā̍ha.
dyāvā̍pṛthi̱vyorvidhṛ̍tyai..47..

dhi̱ṣaṇā̍'si pārvate̱yī prati̍ tvā parva̱tirve̱ttvityā̍ha.
dyāvā̍pṛthi̱vyordhṛtyai̎.
de̱vasya̍ tvā savi̱tuḥ pra̍sa̱va ityā̍ha̱ prasū̎tyai.
a̱śvino̎rbā̱hubhyā̱mityā̍ha.
a̱śvinau̱ hi de̱vānā̍madhva̱ryū āstā̎m.
pū̱ṣṇo hastā̎bhyā̱mityā̍ha̱ yattyai̎.
adhi̍vapā̱mītyā̍ha.
ya̱thā̱de̱va̱tame̱vainā̱nadhi̍ vapati.
dhā̱nya̍masi dhinu̱hi de̱vānityā̍ha.
e̱tasya̱ yaju̍ṣo vī̱rye̍ṇa..48..

yāva̱dekā̍ de̱vatā̍ kā̱maya̍te̱ yāva̱dekā̎.
tāva̱dāhu̍tiḥ prathate.
na hi tadasti̍.
yattāva̍de̱va syāt.
yāva̍jju̱hoti̍.
prā̱ṇāya̍ tvā'pā̱nāya̱ tvetyā̍ha.
prā̱ṇāne̱va yaja̍māne dadhāti.
dī̱rghāmanu̱ prasi̍ti̱māyu̍ṣe dhā̱mityā̍ha.
āyu̍re̱vāsmi̍ndadhāti.
a̱ntari̍kṣādiva̱ vā e̱tāni̱ praska̍ndanti.
yāni̍ dṛ̱ṣada̍ḥ.
de̱vo va̍ḥ savi̱tā hira̍ṇyapāṇi̱ḥ prati̍gṛhṇā̱tvityā̍ha̱ prati̍ṣṭhityai.
ha̱viṣo'ska̍ndāya.
asa̍ṃvapantī piṃṣā̱ṇūni̍ kurutā̱dityā̍ha medhya̱tvāya̍..49..

Anuvāka 7

dhṛṣṭi̍rasi̱ brahma̍ ya̱cchetyā̍ha̱ dhṛtyai̎.
apā̎gne̱'gnimā̱māda̍ṃ jahi̱ niṣkra̱vyāda̍ṃ se̱dhā de̍va̱yaja̍ṃ va̱hetyā̍ha.
ya e̱vā''mātkra̱vyāt.
tama̍pa̱hatya̍.
medhye̱'gnau ka̱pāla̱mupa̍dadhāti.
nirda̍gdha̱ṃ rakṣo̱ nirda̍gdhā̱ arā̍taya̱ ityā̍ha.
rakṣā̍ṃsye̱va nirda̍hati.
a̱gni̱vatyupa̍dadhāti.
a̱sminne̱va lo̱ke jyoti̍rdhatte.
aṅgā̍ra̱madhi̍ vartayati..50..

a̱ntari̍kṣa e̱va jyoti̍rdhatte.
ā̱di̱tyame̱vāmuṣmi̍m̐llo̱ke jyoti̍rdhatte.
jyoti̍ṣmanto'smā i̱me lo̱kā bha̍vanti.
ya e̱vaṃ veda̍.
dhru̱vama̍si pṛthi̱vīṃ dṛ̱ṃhetyā̍ha.
pṛ̱thi̱vīme̱vaitena̍ dṛṃhati.
dha̱rtrama̍sya̱ntari̍kṣaṃ dṛ̱ṃhetyā̍ha.
a̱ntari̍kṣame̱vaitena̍ dṛṃhati.
dha̱ruṇa̍masi̱ diva̍ṃ dṛ̱ṃhetyā̍ha.
diva̍me̱vaitena̍ dṛṃhati..51..

dharmā̍si̱ diśo̍ dṛ̱ṃhetyā̍ha.
diśa̍ e̱vaitena̍ dṛṃhati.
i̱māne̱vaitairlo̱kāndṛ̍ṃhati.
dṛṃha̍nte'smā i̱me lo̱kāḥ pra̱jayā̍ pa̱śubhi̍ḥ.
ya e̱vaṃ veda̍.
trīṇyagre̍ ka̱pālā̱nyupa̍dadhāti.
traya̍ i̱me lo̱kāḥ.
e̱ṣāṃ lo̱kānā̱māptyai̎.
eka̱magre̍ ka̱pāla̱mupa̍ dadhāti.
eka̱ṃ vā agre̍ ka̱pāla̱ṃ puru̍ṣasya sa̱mbhava̍ti..52..

atha̱ dve.
atha̱ trīṇi̍.
atha̍ ca̱tvāri̍.
athā̱ṣṭau.
tasmā̍da̱ṣṭāka̍pāla̱ṃ puru̍ṣasya̱ śira̍ḥ.
yade̱vaṃ ka̱pālā̎nyupa̱dadhā̍ti.
ya̱jño vai pra̱jāpa̍tiḥ.
ya̱jñame̱va pra̱jāpa̍ti̱ṃ saṃska̍roti.
ā̱tmāna̍me̱va tathsaṃska̍roti.
taṃ saṃskṛ̍tamā̱tmānam̎..53..

a̱muṣmi̍m̐llo̱ke'nu̱ parai̍ti.
yada̱ṣṭāvu̍pa̱dadhā̍ti.
gā̱ya̱tri̱yā tathsammi̍tam.
yannava̍.
tri̱vṛtā̱ tat.
yaddaśa̍.
vi̱rājā̱ tat.
yadekā̍daśa.
tri̱ṣṭubhā̱ tat.
yaddvāda̍śa..54..

jaga̍tyā̱ tat.
chanda̍ḥ sammitāni̱ sa u̍pa̱dadha̍tka̱pālā̍ni.
i̱mām̐llo̱kāna̍nupū̱rvaṃ diśo̱ vidhṛ̍tyai dṛṃhati.
athā''yu̍ḥ prā̱ṇānpra̱jāṃ pa̱śūn yaja̍māne dadhāti.
sa̱jā̱tāna̍smā a̱bhito̍ bahu̱lānka̍roti.
cita̱ḥ sthetyā̍ha.
ya̱thā̱ya̱jure̱vaitat.
bhṛgū̍ṇā̱maṅgi̍rasā̱ṃ tapa̍sā tapyadhva̱mityā̍ha.
de̱vatā̍nāme̱vainā̍ni̱ tapa̍sā tapati.
tāni̱ tata̱ḥ saṃsthi̍te.
yāni̍ gha̱rme ka̱pālā̎nyupaci̱nvanti̍ ve̱dhasa̱ iti̱ catu̍ṣpadaya̱rcā vi mu̍ñcati.
catu̍ṣpādaḥ pa̱śava̍ḥ.
pa̱śuṣve̱vopari̍ṣṭā̱tprati̍ tiṣṭhati..55..

Anuvāka 8

de̱vasya̍ tvā savi̱tuḥ pra̍sa̱va ityā̍ha̱ prasū̎tyai.
a̱śvino̎rbā̱hubhyā̱mityā̍ha.
a̱śvinau̱ hi de̱vānā̍madhva̱ryū āstā̎m.
pū̱ṣṇo hastā̎bhyā̱mityā̍ha̱ yatyai̎.
saṃ va̍pā̱mītyā̍ha.
ya̱thā̱de̱va̱tame̱vainā̍ni̱ saṃva̍pati.
samāpo̍ a̱dbhira̍gmata̱ samoṣa̍dhayo̱ rase̱netyā̍ha.
āpo̱ vā oṣa̍dhīrjinvanti.
oṣa̍dhayo̱'po ji̍nvanti.
a̱nyā vā e̱tāsā̍ma̱nyā ji̍nvanti..56..

tasmā̍de̱vamā̍ha.
saṃ re̱vatī̱rjaga̍tībhi̱rmadhu̍matī̱rmadhu̍matībhiḥ sṛjyadhva̱mityā̍ha.
āpo̱ vai re̱vatī̎ḥ.
pa̱śavo̱ jaga̍tīḥ.
oṣa̍dhayo̱ madhu̍matīḥ.
āpa̱ oṣa̍dhīḥ pa̱śūn.
tāne̱vāsmā̍ eka̱dhā sa̱ṃsṛjya̍.
madhu̍mataḥ karoti.
a̱dbhyaḥ pari̱ prajā̍tāḥ stha̱ sama̱dbhiḥ pṛ̍cyadhva̱miti̍ pa̱ryāplā̍vayati.
yathā̱ suvṛ̍ṣṭa i̱māma̍nuvi̱sṛtya̍..57..

āpa̱ oṣa̍dhīrma̱haya̍nti.
tā̱dṛge̱va tat.
jana̍yatyai tvā̱ saṃyau̱mītyā̍ha.
pra̱jā e̱vaitena̍ dādhāra.
a̱gnaye̎ tvā̱'gnīṣomā̎bhyā̱mityā̍ha̱ vyāvṛ̍ttyai.
ma̱khasya̱ śiro̱'sītyā̍ha.
ya̱jño vai ma̱khaḥ.
tasyai̱tacchira̍ḥ.
yatpu̍ro̱ḍāśa̍ḥ.
tasmā̍de̱vamā̍ha..58..

gha̱rmo̍'si vi̱śvāyu̱rityā̍ha.
viśva̍me̱vāyu̱ryaja̍māne dadhāti.
u̱ru pra̍thasvo̱ru te̍ ya̱jñapa̍tiḥ prathatā̱mityā̍ha.
yaja̍māname̱va pra̱jayā̍ pa̱śubhi̍ḥ prathayati.
tvaca̍ṃ gṛhṇī̱ṣvetyā̍ha.
sarva̍me̱vaina̱ṃ sata̍nuṃ karoti.
athā̱''pa ā̱nīya̱ pari̍mārṣṭi.
mā̱ṃsa e̱va tattvaca̍ṃ dadhāti.
tasmā̎ttva̱cā mā̱ṃsaṃ cha̱nnam.
gha̱rmo vā e̱ṣo'śā̎ntaḥ..59..

a̱rdha̱mā̱se̎'rdhamāse̱ pravṛ̍jyate.
yatpu̍ro̱ḍāśa̍ḥ.
sa ī̎śva̱ro yaja̍mānaṃ śu̱cā pra̱daha̍ḥ.
parya̍gni karoti.
pa̱śume̱vaina̍makaḥ.
śāntyā̱ apra̍dāhāya.
triḥ parya̍gni karoti.
tryā̍vṛ̱ddhi ya̱jñaḥ.
atho̱ rakṣa̍sā̱mapa̍hatyai.
a̱ntari̍ta̱ṃ rakṣo̱'ntari̍tā̱ arā̍taya̱ ityā̍ha..60..

rakṣa̍sāma̱ntarhi̍tyai.
pu̱ro̱ḍāśa̱ṃ vā adhi̍śrita̱ṃ rakṣā̍ṃsyajighāṃsan.
di̱vi nāko̱ nāmā̱gnī ra̍kṣo̱hā.
sa e̱vāsmā̱drakṣā̱ṃsyapā̍han.
de̱vastvā̍ savi̱tā śra̍paya̱tvityā̍ha.
sa̱vi̱tṛpra̍sūta e̱vaina̍ṃ śrapayati.
varṣi̍ṣṭhe̱ adhi̱ nāka̱ ityā̍ha.
rakṣa̍sā̱mapa̍hatyai.
a̱gniste̍ ta̱nuva̱ṃ mā'ti̍dhā̱gityā̱hā'na̍tidāhāya.
agne̍ ha̱vyaṃ ra̍kṣa̱svetyā̍ha̱ guptyai̎..61..

avi̍dahantaḥ śrapaya̱teti̱ vāca̱ṃ visṛ̍jate.
ya̱jñame̱va ha̱vīṃṣya̍bhivyā̱hṛtya̱ prata̍nute.
pu̱ro̱ruca̱mavi̍dāhāya̱ śṛttyai̍ karoti.
ma̱stiṣko̱ vai pu̍ro̱ḍāśa̍ḥ.
taṃ yannābhi̍ vā̱saye̎t.
ā̱virma̱stiṣka̍ḥ syāt.
a̱bhivā̍sayati.
tasmā̱dguhā̍ ma̱stiṣka̍ḥ.
bhasma̍nā̱'bhivā̍sayati.
tasmā̎nmā̱ṃsenāsthi̍ cha̱nnam..62..

ve̱denā̱bhivā̍sayati.
tasmā̱tkeśai̱ḥ śira̍ścha̱nnam.
akha̍latibhāvuko bhavati.
ya e̱vaṃ veda̍.
pa̱śorvai pra̍ti̱mā pu̍ro̱ḍāśa̍ḥ.
sa nāya̱juṣka̍mabhi̱vāsya̍ḥ.
vṛthe̍va syāt.
ī̱śva̱rā yaja̍mānasya pa̱śava̱ḥ prame̍toḥ.
saṃ brahma̍ṇā pṛcya̱svetyā̍ha.
prā̱ṇā vai brahma̍..63..

prā̱ṇāḥ pa̱śava̍ḥ.
prā̱ṇaire̱va pa̱śūnthsampṛ̍ṇakti.
na pra̱māyu̍kā bhavanti.
yaja̍māno̱ vai pu̍ro̱ḍāśa̍ḥ.
pra̱jā pa̱śava̱ḥ purī̍ṣam.
yade̱vama̍bhivā̱saya̍ti.
yaja̍māname̱va pra̱jayā̍ pa̱śubhi̱ḥ sama̍rdhayati.
de̱vā vai ha̱virbhṛ̱tvā'bru̍van.
kasmi̍nni̱daṃ mra̍kṣyāmaha̱ iti̍.
so̎'gnira̍bravīt..64..

mayi̍ ta̱nūḥ saṃ nidha̍dhvam.
a̱haṃ va̱staṃ ja̍nayiṣyāmi.
yasmi̍nmra̱kṣyadhva̱ iti̍.
te de̱vā a̱gnau ta̱nūḥ sannya̍dadhata.
tasmā̍dāhuḥ.
a̱gniḥ sarvā̍ de̱vatā̱ iti̍.
so'ṅgā̍reṇā̱'̱'̱paḥ.
a̱bhya̍pātayat.
tata̍ eka̱to̍'jāyata.
sa dvi̱tīya̍ma̱bhya̍pātayat..65..

tato̎ dvi̱to̍'jāyata.
sa tṛ̱tīya̍ma̱bhya̍pātayat.
tata̍stri̱to̍'jāyata.
yada̱dbhyo'jā̍yanta.
tadā̱pyānā̍māpya̱tvam.
yadā̱tmabhyo'jā̍yanta.
tadā̱tmyānā̍mātmya̱tvam.
te de̱vā ā̱pyeṣva̍mṛjata.
ā̱pyā a̍mṛjata̱ sūryā̎bhyudite.
sūryā̎bhyudita̱ḥ sūryā̍bhinimrukte..66..

sūryā̍bhinimruktaḥ kuna̱khini̍.
ku̱na̱khī śyā̱vada̍ti.
śyā̱vada̍nnagradidhi̱ṣau.
a̱gra̱di̱dhi̱ṣuḥ pa̍rivi̱tte.
pa̱ri̱vi̱tto vī̍ra̱haṇi̍.
vī̱ra̱hā bra̍hma̱haṇi̍.
tadbra̍hma̱haṇa̱ṃ nātya̍cyavata.
a̱nta̱rve̱di nina̍ya̱tyava̍ruddhyai.
ulmu̍kenā̱bhi gṛ̍hṇāti śṛta̱tvāya̍.
śṛ̱takā̍mā iva̱ hi de̱vāḥ..67..

Anuvāka 9

de̱vasya̍ tvā savi̱tuḥ pra̍sa̱va iti̱ sphyamāda̍tte̱ prasū̎tyai.
a̱śvino̎rbā̱hubhyā̱mityā̍ha.
a̱śvinau̱ hi de̱vānā̍madhva̱ryū āstā̎m.
pū̱ṣṇo hastā̎bhyā̱mityā̍ha̱ yatyai̎.
āda̍da̱ indra̍sya bā̱hura̍si̱ dakṣi̍ṇa̱ ityā̍ha.
i̱ndri̱yame̱va yaja̍māne dadhāti.
sa̱hasra̍bhṛṣṭiḥ śa̱tate̍jā̱ ityā̍ha.
rū̱pame̱vāsyai̱tanma̍hi̱māna̱ṃ vyāca̍ṣṭe.
vā̱yura̍si ti̱gmate̍jā̱ ityā̍ha.
tejo̱ vai vā̱yuḥ..68..

teja̍ e̱vāsmi̍ndadhāti.
vi̱ṣādvai nāmā̍su̱ra ā̍sīt.
so̍'bibhet.
ya̱jñena̍ mā de̱vā a̱bhibha̍viṣya̱ntīti̍.
sa pṛ̍thi̱vīma̱bhya̍vamīt.
sā me̱dhyā'bha̍vat.
atho̱ yadindro̍ vṛ̱tramahan̍.
tasya̱ lohi̍taṃ pṛthi̱vīmanu̱ vya̍dhāvat.
sā me̱dhyā'bha̍vat.
pṛthi̍vi devayaja̱nītyā̍ha..69..

medhyā̍me̱vainā̎ṃ deva̱yaja̍nīṃ karoti.
oṣa̍dhyāste̱ mūla̱ṃ mā hi̍ṃsiṣa̱mityā̍ha.
oṣa̍dhīnā̱mahi̍ṃsāyai.
vra̱jaṃ ga̍ccha go̱sthāna̱mityā̍ha.
chandā̍ṃsi̱ vai vra̱jo go̱sthāna̍ḥ.
chandā̍ṃsye̱vāsmai̎ vra̱jaṃ go̱sthāna̍ṃ karoti.
varṣa̍tu te̱ dyaurityā̍ha.
vṛṣṭi̱rvai dyauḥ.
vṛṣṭi̍me̱vāva̍ rundhe.
ba̱dhā̱na de̍va savitaḥ para̱masyā̎ṃ parā̱vatītyā̍ha..70..

dvau vāva puru̍ṣau.
yaṃ cai̱va dveṣṭi̍.
yaścai̍na̱ṃ dveṣṭi̍.
tāvu̱bhau ba̍dhnāti para̱masyā̎ṃ parā̱vati̍ śa̱tena̱ pāśai̎ḥ.
yo̎'smāndveṣṭi̱ yaṃ ca̍ va̱yaṃ dvi̱ṣmastamato̱ mā mau̱gityā̱hāni̍mruktyai.
a̱raru̱rvai nāmā̍su̱ra ā̍sīt.
sa pṛ̍thi̱vyāmupa̍mlupto'śayat.
taṃ de̱vā apa̍hato̱'raru̍ḥ pṛthi̱vyā iti̍ pṛthi̱vyā apā̎ghnan.
bhrātṛ̍vyo̱ vā a̱raru̍ḥ.
apa̍hato̱'raru̍ḥ pṛthi̱vyā iti̱ yadāha̍..71..

bhrātṛ̍vyame̱va pṛ̍thi̱vyā apa̍hanti.
te̍'manyanta.
diva̱ṃ vā a̱yami̱taḥ pa̍tiṣya̱tīti̍.
tama̱raru̍ste̱ diva̱ṃ mā'skā̱niti̍ di̱vaḥ parya̍bādhanta.
bhrātṛ̍vyo̱ vā a̱raru̍ḥ.
a̱raru̍ste̱ diva̱ṃ mā skā̱niti̱ yadāha̍.
bhrātṛ̍vyame̱va di̱vaḥ pari̍bādhate.
sta̱mba̱ya̱jurha̍rati.
pṛ̱thi̱vyā e̱va bhrātṛ̍vya̱mapa̍hanti.
dvi̱tīya̍ṃ harati..72..

a̱ntari̍kṣāde̱vaina̱mapa̍hanti.
tṛ̱tīya̍ṃ harati.
di̱va e̱vaina̱mapa̍hanti.
tū̱ṣṇīṃ ca̍tu̱rthaṃ ha̍rati.
apa̍rimitāde̱vaina̱mapa̍hanti.
asu̍rāṇā̱ṃ vā i̱yamagra̍ āsīt.
yāva̱dāsī̍naḥ parā̱paśya̍ti.
tāva̍dde̱vānā̎m.
te de̱vā a̍bruvan.
astve̱va no̱'syāmapīti̍..73..

kya̍nno dāsya̱theti̍.
yāva̍thsva̱yaṃ pa̍rigṛhṇī̱theti̍.
te vasa̍va̱stveti̍ dakṣiṇa̱taḥ parya̍gṛhṇan.
ru̱drāstveti̍ pa̱ścāt.
ā̱di̱tyāstvetyu̍ttara̱taḥ.
te̎'gninā̱ prāñco̍'jayan.
vasu̍bhirdakṣi̱ṇā.
ru̱draiḥ pra̱tyañca̍ḥ.
ā̱di̱tyairuda̍ñcaḥ.
yasyai̱vaṃ vi̱duṣo̱ vedi̍ṃ parigṛ̱hṇanti̍..74..

bhava̍tyā̱tmanā̎.
parā̎'sya̱ bhrātṛ̍vyo bhavati.
de̱vasya̍ savi̱tuḥ sa̱va ityā̍ha̱ prasū̎tyai.
karma̍ kṛṇvanti ve̱dhasa̱ ityā̍ha.
i̱ṣi̱taṃ hi karma̍ kri̱yate̎.
pṛ̱thi̱vyai medhya̍ṃ cāme̱dhyaṃ ca̱ vyuda̍krāmatām.
prā̱cīna̍mudī̱cīna̱ṃ medhyam̎.
pra̱tī̱cīna̍ṃ dakṣi̱ṇā'me̱dhyam.
prācī̱mudī̍cīṃ prava̱ṇāṃ ka̍roti.
medhyā̍me̱vainā̎ṃ deva̱yaja̍nīṃ karoti..75..

prāñcau̍ vedya̱ṃsāvunna̍yati.
ā̱ha̱va̱nīya̍sya̱ pari̍gṛhītyai.
pra̱tīcī̱ śroṇī̎.
gārha̍patyasya̱ pari̍gṛhītyai.
atho̍ mithuna̱tvāya̍.
uddha̍nti.
yade̱vāsyā̍ ame̱dhyam.
tadapa̍hanti.
uddha̍nti.
tasmā̱doṣa̍dhaya̱ḥ parā̍bhavanti..76..

mūla̍ṃ chinatti.
bhrātṛ̍vyasyai̱va mūla̍ṃ chinatti.
mūla̱ṃ vā a̍ti̱tiṣṭha̱drakṣā̱ṃsyanūtpi̍pate.
yaddhaste̍na chi̱ndyāt.
ku̱na̱khinī̎ḥ pra̱jāḥ syu̍ḥ.
sphyena̍ chinatti.
vajro̱ vai sphyaḥ.
vajre̍ṇai̱va ya̱jñādrakṣā̱ṃsyapa̍hanti.
pi̱tṛ̱de̱va̱tyā'ti̍khātā.
iya̍tīṃ khanati..77..

pra̱jāpa̍tinā yajñamu̱khena̱ sammi̍tām.
vedi̍rde̱vebhyo̱ nilā̍yata.
tāṃ ca̍turaṅgu̱le'nva̍vindan.
tasmā̎ccaturaṅgu̱laṃ kheyā̎.
ca̱tu̱ra̱ṅgu̱laṃ kha̍nati.
ca̱tu̱ra̱ṅgu̱le hyoṣa̍dhayaḥ prati̱tiṣṭha̍nti.
ā pra̍ti̱ṣṭhāyai̍ khanati.
yaja̍māname̱va pra̍ti̱ṣṭhāṃ ga̍mayati.
da̱kṣi̱ṇa̱to varṣī̍yasīṃ karoti.
de̱va̱yaja̍nasyai̱va rū̱pama̍kaḥ..78..

purī̍ṣavatīṃ karoti.
pra̱jā vai pa̱śava̱ḥ purī̍ṣam.
pra̱jayai̱vaina̍ṃ pa̱śubhi̱ḥ purī̍ṣavantaṃ karoti.
utta̍raṃ parigrā̱haṃ pari̍gṛhṇāti.
e̱tāva̍tī̱ vai pṛ̍thi̱vī.
yāva̍tī̱ vedi̍ḥ.
tasyā̍ e̱tāva̍ta e̱va bhrātṛ̍vyaṃ ni̱rbhajya̍.
ā̱tmana̱ utta̍raṃ parigrā̱haṃ pari̍gṛhṇāti.
ṛ̱tama̍syṛta̱sada̍namasyṛta̱śrīra̱sītyā̍ha.
ya̱thā̱ya̱jure̱vaitat..79..

krū̱rami̍va̱ vā e̱tatka̍roti.
yadvedi̍ṃ ka̱roti̍.
dhā a̍si sva̱dhā a̱sīti̍ yoyupyate̱ śāntyai̎.
u̱rvī cāsi̱ vasvī̍ cā̱sītyā̍ha.
u̱rvīme̱vainā̱ṃ vasvī̎ṃ karoti.
pu̱rā krū̱rasya̍ vi̱sṛpo̍ viraphśi̱nnityā̍ha medhya̱tvāya̍.
u̱dā̱dāya̍ pṛthi̱vīṃ jī̱radā̍nu̱ryāmaira̍yaṃ ca̱ndrama̍si sva̱dhābhi̱rityā̍ha.
yade̱vāsyā̍ ame̱dhyam.
tada̍pa̱hatya̍.
medhyā̎ṃ deva̱yaja̍nīṃ kṛ̱tvā..80..

yada̱daśca̱ndrama̍si̱ medhyam̎.
tada̱syāmera̍yati.
tāṃ dhīrā̍so anu̱dṛśya̍ yajanta̱ ityā̱hānu̍khyātyai.
prokṣa̍ṇī̱rā sā̍daya.
i̱dhmāba̱ṟhirupa̍sādaya.
sru̱vaṃ ca̱ sruca̍śca̱ sammṛ̍ḍḍhi.
patnī̱ṃ sanna̍hya.
ājye̍no̱dehītyā̍hānupū̱rvatā̍yai.
prokṣa̍ṇī̱rā sā̍dayati.
āpo̱ vai ra̍kṣo̱ghnīḥ..81..

rakṣa̍sā̱mapa̍hatyai.
sphyasya̱ vartma̎nthsādayati.
ya̱jñasya̱ santa̍tyai.
u̱vāca̱ hāsi̍to daiva̱laḥ.
e̱tāva̍tī̱rvā a̱muṣmi̍m̐llo̱ka āpa̍ āsan.
yāva̍tī̱ḥ prokṣa̍ṇī̱riti̍.
tasmā̎dba̱hvīrā̱sādyā̎ḥ.
sphyamu̱dasyan̍.
yaṃ dvi̱ṣyāttaṃ dhyā̍yet.
śu̱caivaina̍marpayati..82..

Anuvāka 10

vajro̱ vai sphyaḥ.
yada̱nvañca̍ṃ dhā̱raye̎t.
vajre̎'dhva̱ryuḥ kṣa̍ṇvīta.
pu̱rastā̎tti̱ryañca̍ṃ dhārayati.
vajro̱ vai sphyaḥ.
vajre̍ṇai̱va ya̱jñasya̍ dakṣiṇa̱to rakṣā̱ṃsyapa̍hanti.
a̱gnibhyā̱ṃ prāca̍śca pra̱tīca̍śca.
sphyenodī̍caścādha̱rāca̍śca.
sphyena̱ vā e̱ṣa vajre̍ṇā̱syai pā̱pmāna̱ṃ bhrātṛ̍vyamapa̱hatya̍.
u̱tka̱re'dhi̱ pravṛ̍ścati..83..

yatho̍pa̱dhāya̍ vṛ̱ścantye̱vam.
hastā̱vava̍ nenikte.
ā̱tmāna̍me̱va pa̍vayate.
sphyaṃ prakṣā̍layati medhya̱tvāya̍.
atho̍ pā̱pmana̍ e̱va bhrātṛ̍vyasya nya̱ṅgaṃ chi̍natti.
i̱dhmāba̱ṟhirupa̍sādayati̱ yuktyai̎.
ya̱jñasya̍ mithuna̱tvāya̍.
atho̍ puro̱ruca̍me̱vaitāṃ da̍dhāti.
utta̍rasya̱ karma̱ṇo'nu̍khyātyai.
na pu̱rastā̎tpra̱tyagupa̍sādayet..84..

yatpu̱rastā̎tpra̱tyagu̍pasā̱daye̎t.
a̱nyatrā̍''hutipa̱thādi̱dhmaṃ prati̍pādayet.
pra̱jā vai ba̱ṟhiḥ.
apa̍rādhnuyādba̱ṟhiṣā̎ pra̱jānā̎ṃ pra̱jana̍nam.
pa̱ścātprāgupa̍sādayati.
ā̱hu̱ti̱pa̱thene̱dhmaṃ prati̍pādayati.
sa̱mpra̱tye̍va ba̱ṟhiṣā̎ pra̱jānā̎ṃ pra̱jana̍na̱mupai̍ti.
dakṣi̍ṇami̱dhmam.
utta̍raṃ ba̱ṟhiḥ.
ā̱tmā vā i̱dhmaḥ.
pra̱jā ba̱ṟhiḥ.
pra̱jā hyā̎tmana̱ utta̍ratarā tī̱rthe.
tato̱ medha̍mupa̱nīya̍.
ya̱thā̱de̱va̱tame̱vaina̱tprati̍ṣṭhāpayati.
prati̍ tiṣṭhati pra̱jayā̍ pa̱śubhi̱ryaja̍mānaḥ..85..

Anuvāka 1

pratyu̍ṣṭa̱ṃ rakṣa̱ḥ pratyu̍ṣṭā̱ arā̍taya̱ ityā̍ha.
rakṣa̍sā̱mapa̍hatyai.
a̱gnerva̱steji̍ṣṭhena̱ teja̍sā̱ niṣṭa̍pā̱mītyā̍ha medhya̱tvāya̍.
sruca̱ḥ sammā̎rṣṭi.
sru̱vamagre̎.
pumā̍ṃsame̱vābhya̱ḥ saṃśya̍ti mithuna̱tvāya̍.
atha̍ ju̱hūm.
atho̍pa̱bhṛtam̎.
atha̍ dhru̱vām.
a̱sau vai ju̱hūḥ..1..

a̱ntari̍kṣamupa̱bhṛt.
pṛ̱thi̱vī dhru̱vā.
i̱me vai lo̱kāḥ sruca̍ḥ.
vṛṣṭi̍ḥ sa̱mmārja̍nāni.
vṛṣṭi̱rvā i̱mām̐llo̱kāna̍nupū̱rvaṃ ka̍lpayati.
te tata̍ḥ kḷ̱ptāḥ same̍dhante.
same̍dhante'smā i̱me lo̱kāḥ pra̱jayā̍ pa̱śubhi̍ḥ.
ya e̱vaṃ veda̍.
yadi̍ kā̱maye̍ta̱ varṣu̍kaḥ pa̱rjanya̍ḥ syā̱diti̍.
a̱gra̱taḥ sammṛ̍jyāt..2..

vṛṣṭi̍me̱va ni ya̍cchati.
a̱vā̱cīnā̎grā̱ hi vṛṣṭi̍ḥ.
yadi̍ kā̱maye̱tāva̍rṣukaḥ syā̱diti̍.
mū̱la̱taḥ sammṛ̍jyāt.
vṛṣṭi̍me̱vodya̍cchati.
tadu̱ vā ā̍huḥ.
a̱gra̱ta e̱vopari̍ṣṭā̱thsammṛ̍jyāt.
mū̱la̱to̍'dhastā̎t.
tada̍nupū̱rvaṃ ka̍lpate.
varṣu̍ko bhava̱tīti̍..3..

prācī̍mabhyā̱kāram̎.
agrai̍rantara̱taḥ.
e̱vami̍va̱ hyanna̍ma̱dyate̎.
atho̱ agrā̱dvā oṣa̍dhīnā̱mūrja̍ṃ pra̱jā upa̍jīvanti.
ū̱rja e̱vānnādya̱syāva̍ruddhyai.
a̱dhastā̎tpra̱tīcī̎m.
da̱ṇḍamu̍ttama̱taḥ.
mūle̍na̱ mūla̱ṃ prati̍ṣṭhityai.
tasmā̍dara̱tnau prāñcyu̱pari̍ṣṭā̱llomā̍ni.
pra̱tyañcya̱dhastā̎t..4..

srugghye̍ṣā.
prā̱ṇo vai sru̱vaḥ.
ju̱hūrdakṣi̍ṇo̱ hasta̍ḥ.
u̱pa̱bhṛthsa̱vyaḥ.
ā̱tmā dhru̱vā.
anna̍ṃ sa̱mmārja̍nāni.
mu̱kha̱to vai prā̱ṇo̍'pā̱no bhū̱tvā.
ā̱tmāna̱manna̍ṃ pra̱viśya̍.
bā̱hya̱tasta̱nuva̍ṃ śubhayati.
tasmā̎thsru̱vame̱vāgre̱ sammā̎rṣṭi.
mu̱kha̱to hi prā̱ṇo̍'pā̱no bhū̱tvā.
ā̱tmāna̱manna̍māvi̱śati̍.
tau prā̍ṇāpā̱nau.
avya̍rdhukaḥ prāṇāpā̱nābhyā̎ṃ bhavati.
ya e̱vaṃ veda̍..5..

Anuvāka 2

di̱vaḥ śilpa̱mava̍tatam.
pṛ̱thi̱vyāḥ ka̱kubhi̍ śri̱tam.
tena̍ va̱yaṃ sa̱hasra̍valśena.
sa̱patna̍ṃ nāśayāmasi̱ svāheti̍ srukhsa̱mmārja̍nānya̱gnau pra ha̍rati.
āpo̱ vai da̱rbhāḥ.
rū̱pame̱vaiṣā̍me̱tanma̍hi̱māna̱ṃ vyāca̍ṣṭe.
a̱nu̱ṣṭubha̱rcā.
ānu̍ṣṭubhaḥ pra̱jāpa̍tiḥ.
prā̱jā̱pa̱tyo ve̱daḥ.
ve̱dasyāgra̍ṃ srukhsa̱mmārja̍nāni..6..

svenai̱vainā̍ni̱ chanda̍sā.
svayā̍ de̱vata̍yā̱ sama̍rdhayati.
atho̱ ṛgvāva yoṣā̎.
da̱rbho vṛṣā̎.
tanmi̍thu̱nam.
mi̱thu̱name̱vāsya̱ tadya̱jñe ka̍roti pra̱jana̍nāya.
prajā̍yate pra̱jayā̍ pa̱śubhi̱ryaja̍mānaḥ.
tānyeke̱ vṛthai̱vāpā̎syanti.
tattathā̱ na kā̱ryam̎.
āra̍bdhasya ya̱jñiya̍sya̱ karma̍ṇa̱ḥ savi̍do̱haḥ..7..

yadye̍nāni pa̱śavo̍'bhi̱ tiṣṭhe̍yuḥ.
na tatpa̱śubhya̱ḥ kam.
a̱dbhirmā̎rjayi̱tvotka̱re nya̍syet.
yadvai ya̱jñiya̍sya̱ karma̍ṇo̱'nyatrā''hu̍tībhyaḥ sa̱ntiṣṭha̍te.
u̱tka̱ro vāva tasya̍ prati̱ṣṭhā.
e̱tāṃ hi tasmai̎ prati̱ṣṭhāṃ de̱vāḥ sa̱mabha̍ran.
yada̱dbhirmā̱rjaya̍ti.
tena̍ śā̱ntam.
yadu̍tka̱re nya̱syati̍.
pra̱ti̱ṣṭhāme̱vainā̍ni̱ tadga̍mayati..8..

prati̍ tiṣṭhati pra̱jayā̍ pa̱śubhi̱ryaja̍mānaḥ.
atho̎ sta̱mbasya̱ vā e̱tadrū̱pam.
yathsru̍khsa̱mmārja̍nāni.
sta̱mba̱śo vā oṣa̍dhayaḥ.
tāsā̎ṃ jaratka̱kṣe pa̱śavo̱ na ra̍mante.
apri̍yo̱ hye̍ṣāṃ jaratka̱kṣaḥ.
yāva̍dapriyo ha̱ vai ja̍ratka̱kṣaḥ pa̍śū̱nām.
tāva̍dapriyaḥ paśū̱nāṃ bha̍vati.
yasyai̱tānya̱nyatrā̱gnerdadha̍ti.
na̱va̱dāvyā̍su̱ vā oṣa̍dhīṣu pa̱śavo̍ ramante..9..

na̱va̱dā̱vo hye̍ṣāṃ pri̱yaḥ.
yāva̍tpriyo ha̱ vai na̍vadā̱vaḥ pa̍śū̱nām.
tāva̍tpriyaḥ paśū̱nāṃ bha̍vati.
yasyai̱tānya̱gnau pra̱hara̍nti.
tasmā̍de̱tānya̱gnāve̱va praha̍ret.
ya̱ta̱rasmi̎nthsammṛ̱jyāt.
pa̱śū̱nāṃ dhṛtyai̎.
yo bhū̱tānā̱madhi̍patiḥ.
ru̱drasta̍ntica̱ro vṛṣā̎.
pa̱śūna̱smāka̱ṃ mā hi̍ṃsīḥ.
e̱tada̍stu hu̱taṃ tava̱ svāhetya̍gnisa̱mmārja̍nānya̱gnau praha̍rati.
e̱ṣā vā e̱teṣā̱ṃ yoni̍ḥ.
e̱ṣā pra̍ti̱ṣṭhā.
svāme̱vainā̍ni̱ yonim̎.
svāṃ pra̍ti̱ṣṭhāṃ ga̍mayati.
prati̍ tiṣṭhati pra̱jayā̍ pa̱śubhi̱ryaja̍mānaḥ..10..

Anuvāka 3

aya̍jño̱ vā e̱ṣaḥ.
yo̍'pa̱tnīka̍ḥ.
na pra̱jāḥ prajā̍yeran.
patnyanvā̎ste.
ya̱jñame̱vāka̍ḥ.
pra̱jānā̎ṃ pra̱jana̍nāya.
yattiṣṭha̍ntī sa̱nnahye̍ta.
pri̱yaṃ jñā̱tiṃ ru̍ndhyāt.
āsī̍nā̱ sanna̍hyate.
āsī̍nā̱ hye̍ṣā vī̱rya̍ṃ ka̱roti̍..11..

yatpa̱ścātprācya̱nvāsī̍ta.
a̱nayā̍ sa̱mada̍ndadhīta.
de̱vānā̱ṃ patni̍yā sa̱mada̍ndadhīta.
deśā̎ddakṣiṇa̱ta udī̱cyanvā̎ste.
ā̱tmano̍ gopī̱thāya̍.
ā̱śāsā̍nā saumana̱samityā̍ha.
medhyā̍me̱vainā̱ṃ keva̍līṃ kṛ̱tvā.
ā̱śiṣā̱ sama̍rdhayati.
a̱gneranu̍vratā bhū̱tvā sanna̍hye sukṛ̱tāya̱ kamityā̍ha.
e̱tadvai patni̍yai vratopa̱naya̍nam..12..

tenai̱vainā̎ṃ vra̱tamupa̍nayati.
tasmā̍dāhuḥ.
yaścai̱vaṃ veda̱ yaśca̱ na.
yoktra̍me̱va yu̍te.
yama̱nvāste̎.
tasyā̱muṣmi̍m̐llo̱ke bha̍va̱tīti̱ yoktre̍ṇa.
yadyoktram̎.
sa yoga̍ḥ.
yadāste̎.
sa kṣema̍ḥ..13..

yo̱ga̱kṣe̱masya̱ kḷptyai̎.
yu̱ktaṃ kri̍yātā ā̱śīḥ kāme̍ yujyātā̱ iti̍.
ā̱śiṣa̱ḥ samṛ̍ddhyai.
gra̱nthiṃ gra̍thnāti.
ā̱śiṣa̍ e̱vāsyā̱ṃ pari̍ gṛhṇāti.
pumā̱ṉ vai gra̱nthiḥ.
strī patnī̎.
tanmi̍thu̱nam.
mi̱thu̱name̱vāsya̱ tadya̱jñe ka̍roti pra̱jana̍nāya.
pra jā̍yate pra̱jayā̍ pa̱śubhi̱ryaja̍mānaḥ..14..

atho̍ a̱rdho vā e̱ṣa ā̱tmana̍ḥ.
yatpatnī̎.
ya̱jñasya̱ dhṛtyā̱ aśi̍thilaṃ bhāvāya.
su̱pra̱jasa̍stvā va̱yaṃ su̱patnī̱rupa̍ sedi̱metyā̍ha.
ya̱jñame̱va tanmi̍thu̱nīka̍roti.
ū̱ne'ti̍riktaṃ dhīyātā̱ iti̱ prajā̎tyai.
ma̱hī̱nāṃ payo̱'syoṣa̍dhīnā̱ṃ rasa̱ ityā̍ha.
rū̱pame̱vāsyai̱tanma̍hi̱māna̱ṃ vyāca̍ṣṭe.
tasya̱ te'kṣī̍yamāṇasya̱ nirva̍pāmi devaya̱jyāyā̱ ityā̍ha.
ā̱me̱vaitāmā śā̎ste..15..

Anuvāka 4

ghṛ̱taṃ ca̱ vai madhu̍ ca pra̱jāpa̍tirāsīt.
yato̱ madhvā̍sīt.
tata̍ḥ pra̱jā a̍sṛjata.
tasmā̱nmadhu̍ṣi pra̱jana̍namivāsti.
tasmā̱nmadhu̍ṣā̱ na praca̍ranti.
yā̱tayā̍ma̱ hi.
ājye̍na̱ praca̍ranti.
ya̱jño vā ājyam̎.
ya̱jñenai̱va ya̱jñaṃ praca̍ra̱ntyayā̍tayāmatvāya.
patnyave̎kṣate..16..

mi̱thu̱na̱tvāya̱ prajā̎tyai.
yadvai patnī̍ ya̱jñasya̍ ka̱roti̍.
mi̱thu̱naṃ tat.
atho̱ patni̍yā e̱vaiṣa ya̱jñasyā̎nvāra̱mbho'na̍vacchittyai.
a̱me̱dhyaṃ vā e̱tatka̍roti.
yatpatnya̱vekṣa̍te.
gārha̍pa̱tye'dhi̍ śrayati medhya̱tvāya̍.
ā̱ha̱va̱nīya̍ma̱bhyuddra̍vati.
ya̱jñasya̱ santa̍tyai.
tejo̍'si̱ tejo'nu̱ prehītyā̍ha..17..

tejo̱ vā a̱gniḥ.
teja̱ ājyam̎.
teja̍sai̱va teja̱ḥ sama̍rdhayati.
a̱gniste̱ tejo̱ mā vinai̱dityā̱hāhi̍ṃsāyai.
sphyasya̱ vartma̎nthsādayati.
ya̱jñasya̱ santa̍tyai.
a̱gnerji̱hvā'si̍ su̱bhūrde̱vānā̱mityā̍ha.
ya̱thā̱ya̱jure̱vaitat.
dhāmne̍dhāmne de̱vebhyo̱ yaju̍ṣeyajuṣe bha̱vetyā̍ha.
ā̱me̱vaitāmā śā̎ste..18..

tadvā ata̍ḥ pa̱vitrā̎bhyāme̱votpu̍nāti.
yaja̍māno̱ vā ājyam̎.
prā̱ṇā̱pā̱nau pa̱vitre̎.
yaja̍māna e̱va prā̍ṇāpā̱nau da̍dhāti.
pu̱na̱rā̱hāram̎.
e̱vami̍va̱ hi prā̍ṇāpā̱nau sa̱ñcara̍taḥ.
śu̱krama̍si̱ jyoti̍rasi̱ tejo̱'sītyā̍ha.
rū̱pame̱vāsyai̱tanma̍hi̱māna̱ṃ vyāca̍ṣṭe.
triryaju̍ṣā.
traya̍ i̱me lo̱kāḥ..19..

e̱ṣāṃ lo̱kānā̱māptyai̎.
triḥ.
tryā̍vṛ̱ddhi ya̱jñaḥ.
atho̍ medhya̱tvāya̍.
athā''jya̍vatībhyāma̱paḥ.
rū̱pame̱vāsā̍me̱tadvarṇa̍ṃ dadhāti.
api̱ vā u̱tā''hu̍ḥ.
yathā̍ ha̱ vai yoṣā̍ su̱varṇa̱ṃ hira̍ṇyaṃ peśa̱laṃ bibhra̍tī rū̱pāṇyāste̎.
e̱vame̱tā e̱tarhīti̍.
āpo̱ vai sarvā̍ de̱vatā̎ḥ..20..

e̱ṣā hi viśve̍ṣāṃ de̱vānā̎ṃ ta̱nūḥ.
yadājyam̎.
tatro̱bhayo̎rmīmā̱ṃsā.
jā̱mi syāt.
yadyaju̱ṣā''jya̱ṃ yaju̍ṣā̱'pa u̍tpunī̱yāt.
chanda̍sā̱'pa utpu̍nā̱tyajā̍mitvāya.
atho̍ mithuna̱tvāya̍.
sā̱vi̱tri̱yarcā.
sa̱vi̱tṛpra̍sūtaṃ me̱ karmā̍sa̱diti̍.
sa̱vi̱tṛpra̍sūtame̱vāsya̱ karma̍ bhavati.
pa̱ccho gā̍yatri̱yā tri̍ṣṣamṛddha̱tvāya̍.
a̱dbhire̱vauṣa̍dhī̱ḥ saṃ na̍yati.
oṣa̍dhībhiḥ pa̱śūn.
pa̱śubhi̱ryaja̍mānam.
śu̱kraṃ tvā̍ śu̱krāyā̱ṃ jyoti̍stvā̱ jyoti̍ṣya̱rcistvā̱'rciṣītyā̍ha sarva̱tvāya̍.
paryā̎ptyā̱ ana̍ntarāyāya..21..

Anuvāka 5

de̱vā̱su̱rāḥ saṃya̍ttā āsan.
sa e̱tamindra̱ ājya̍syāvakā̱śama̍paśyat.
tenāvai̎kṣata.
tato̍ de̱vā abha̍van.
parā'su̍rāḥ.
ya e̱vaṃ vi̱dvānājya̍ma̱vekṣa̍te.
bhava̍tyā̱tmanā̎.
parā̎'sya̱ bhrātṛ̍vyo bhavati.
bra̱hma̱vā̱dino̍ vadanti.
yadājye̍nā̱nyāni̍ ha̱vīṃṣya̍bhighā̱raya̍ti..22..

atha̱ kenā''jya̱miti̍.
sa̱tyeneti̍ brūyāt.
cakṣu̱rvai sa̱tyam.
sa̱tyenai̱vaina̍da̱bhi ghā̍rayati.
ī̱śva̱ro vā e̱ṣo̎'ndho bhavi̍toḥ.
yaścakṣu̱ṣā''jya̍ma̱vekṣa̍te.
ni̱mīlyāve̎kṣeta.
dā̱dhārā̱tmañcakṣu̍ḥ.
a̱bhyājya̍ṃ ghārayati.
ājya̍ṃ gṛhṇāti..23..

chandā̍ṃsi̱ vā ājyam̎.
chandā̍ṃsye̱va prī̍ṇāti.
ca̱turju̱hvāṃ gṛ̍hṇāti.
catu̍ṣpādaḥ pa̱śava̍ḥ.
pa̱śūne̱vāva̍ rundhe.
a̱ṣṭāvu̍pa̱bhṛti̍.
a̱ṣṭākṣa̍rā gāya̱trī.
gā̱ya̱traḥ prā̱ṇaḥ.
prā̱ṇame̱va pa̱śuṣu̍ dadhāti.
ca̱turdhru̱vāyā̎m..24..

catu̍ṣpādaḥ pa̱śava̍ḥ.
pa̱śuṣve̱vopari̍ṣṭā̱tprati̍ tiṣṭhati.
ya̱ja̱mā̱na̱de̱va̱tyā̍ vai ju̱hūḥ.
bhrā̱tṛ̱vya̱de̱va̱tyo̍pa̱bhṛt.
ca̱turju̱hvāṃ gṛ̱hṇanbhūyo̍ gṛhṇīyāt.
a̱ṣṭāvu̍pa̱bhṛti̍ gṛ̱hṇankanī̍yaḥ.
yaja̍mānāyai̱va bhrātṛ̍vya̱mupa̍stiṃ karoti.
gaurvai sruca̍ḥ.
ca̱turju̱hvāṃ gṛ̍hṇāti.
tasmā̱ccatu̍ṣpadī..25..

a̱ṣṭāvu̍pa̱bhṛti̍.
tasmā̍da̱ṣṭāśa̍phā.
ca̱turdhru̱vāyā̎m.
tasmā̱ccatu̍ḥ stanā.
gāme̱va tathsaṃska̍roti.
sā'smai̱ saṃskṛ̱teṣa̱mūrja̍ṃ duhe.
yajju̱hvāṃ gṛ̱hṇāti̍.
pra̱yā̱jebhya̱stat.
yadu̍pa̱bhṛti̍.
pra̱yā̱jā̱nū̱yā̱jebhya̱stat.
sarva̍smai̱ vā e̱tadya̱jñāya̍ gṛhyate.
yaddhru̱vāyā̱mājyam̎..26..

Anuvāka 6

āpo̍ devīragrepuvo agreguva̱ ityā̍ha.
rū̱pame̱vāsā̍me̱tanma̍hi̱māna̱ṃ vyāca̍ṣṭe.
agra̍ i̱maṃ ya̱jñaṃ na̍ya̱tāgre̍ ya̱jñapa̍ti̱mityā̍ha.
agra̍ e̱va ya̱jñaṃ na̍yanti.
agre̍ ya̱jñapa̍tim.
yu̱ṣmānindro̍'vṛṇīta vṛtra̱tūrye̍ yū̱yamindra̍mavṛṇīdhvaṃ vṛtra̱tūrya̱ ityā̍ha.
vṛ̱traṃ ha̍ hani̱ṣyannindra̱ āpo̍ vavre.
āpo̱ hendra̍ṃ vavrire.
sa̱ṃjñāme̱vāsā̍me̱tathsāmā̍na̱ṃ vyāca̍ṣṭe.
prokṣi̍tā̱ḥ sthetyā̍ha..27..

tenā''pa̱ḥ prokṣi̍tāḥ.
a̱gnirde̱vebhyo̱ nilā̍yata.
kṛṣṇo̍ rū̱paṃ kṛ̱tvā.
sa vana̱spatī̱nprāvi̍śat.
kṛṣṇo̎'syākhare̱ṣṭho̎'gnaye̎ tvā̱ svāhetyā̍ha.
a̱gnaya̍ e̱vaina̱ṃ juṣṭa̍ṃ karoti.
atho̍ a̱gnere̱va medha̱mava̍ rundhe.
vedi̍rasi ba̱ṟhiṣe̎ tvā̱ svāhetyā̍ha.
pra̱jā vai ba̱ṟhiḥ.
pṛ̱thi̱vī vedi̍ḥ..28..

pra̱jā e̱va pṛ̍thi̱vyāṃ prati̍ṣṭhāpayati.
ba̱ṟhira̍si sru̱gbhyastvā̱ svāhetyā̍ha.
pra̱jā vai ba̱ṟhiḥ.
yaja̍māna̱ḥ sruca̍ḥ.
yaja̍māname̱va pra̱jāsu̱ prati̍ṣṭhāpayati.
di̱ve tvā̱'ntari̍kṣāya tvā pṛthi̱vyai tveti̍ ba̱ṟhirā̱sādya̱ prokṣa̍ti.
e̱bhya e̱vaina̍llo̱kebhya̱ḥ prokṣa̍ti.
atha̱ tata̍ḥ sa̱ha sru̱cā pu̱rastā̎tpra̱tyañca̍ṃ gra̱nthiṃ pratyu̍kṣati.
pra̱jā vai ba̱ṟhiḥ.
yathā̱ sūtyai̍ kā̱la āpa̍ḥ pu̱rastā̱dyanti̍..29..

tā̱dṛge̱va tat.
sva̱dhā pi̱tṛbhya̱ ityā̍ha.
sva̱dhā̱kā̱ro hi pi̍tṛ̱ṇām.
ūrgbha̍va barhi̱ṣadbhya̱ iti̱ dakṣi̍ṇāyai̱ śroṇe̱rotta̍rasyai̱ nina̍yati̱ santa̍tyai.
māsā̱ vai pi̱taro̍ barhi̱ṣada̍ḥ.
māsā̍ne̱va prī̍ṇāti.
māsā̱ vā oṣa̍dhīrva̱rdhaya̍nti.
māsā̎ḥ pacanti̱ samṛ̍ddhyai.
ana̍tiskandan ha pa̱rjanyo̍ varṣati.
yatrai̱tade̱vaṃ kri̱yate̎..30..

ū̱rjā pṛ̍thi̱vīṃ ga̍ccha̱tetyā̍ha.
pṛ̱thi̱vyāme̱vorja̍ṃ dadhāti.
tasmā̎tpṛthi̱vyā ū̱rjā bhu̍ñjate.
gra̱nthiṃ vi sra̍ṃsayati.
praja̍nayatye̱va tat.
ū̱rdhvaṃ prāñca̱mudgū̍ḍhaṃ pra̱tyañca̱mā ya̍cchati.
tasmā̎tprā̱cīna̱ṃ reto̍ dhīyate.
pra̱tīcī̎ḥ pra̱jā jā̍yante.
viṣṇo̱ḥ stūpo̱'sītyā̍ha.
ya̱jño vai viṣṇu̍ḥ..31..

ya̱jñasya̱ dhṛtyai̎.
pu̱rastā̎tprasta̱raṃ gṛ̍hṇāti.
mukhya̍me̱vaina̍ṃ karoti.
iya̍ntaṃ gṛhṇāti.
pra̱jāpa̍tinā yajñamu̱khena̱ sammi̍tam.
iya̍ntaṃ gṛhṇāti.
ya̱jña̱pa̱ruṣā̱ sammi̍tam.
iya̍ntaṃ gṛhṇāti.
e̱tāva̱dvai puru̍ṣe vī̱ryam̎.
vī̱rya̍sammitam..32..

apa̍rimitaṃ gṛhṇāti.
apa̍rimita̱syāva̍ruddhyai.
tasmi̍npa̱vitre̱ api̍ sṛjati.
yaja̍māno̱ vai pra̍sta̱raḥ.
prā̱ṇā̱pā̱nau pa̱vitre̎.
yaja̍māna e̱va prā̍ṇāpā̱nau da̍dhāti.
ūrṇā̎mradasaṃ tvā stṛṇā̱mītyā̍ha.
ya̱thā̱ya̱jure̱vaitat.
svā̱sa̱sthaṃ de̱vebhya̱ ityā̍ha.
de̱vebhya̍ e̱vaina̍thsvāsa̱sthaṃ ka̍roti..33..

ba̱ṟhiḥ stṛ̍ṇāti.
pra̱jā vai ba̱ṟhiḥ.
pṛ̱thi̱vī vedi̍ḥ.
pra̱jā e̱va pṛ̍thi̱vyāṃ prati̍ṣṭhāpayati.
ana̍tidṛśñaṃ stṛṇāti.
pra̱jayai̱vaina̍ṃ pa̱śubhi̱rana̍tidṛśñaṃ karoti.
dhā̱raya̍nprasta̱raṃ pa̍ri̱dhīnpari̍ dadhāti.
yaja̍māno̱ vai pra̍sta̱raḥ.
yaja̍māna e̱va tathsva̱yaṃ pa̍ri̱dhīnpari̍ dadhāti.
ga̱ndha̱rvo̍'si vi̱śvāva̍su̱rityā̍ha..34..

viśva̍me̱vāyu̱ryaja̍māne dadhāti.
indra̍sya bā̱hura̍si̱ dakṣi̍ṇa̱ ityā̍ha.
i̱ndri̱yame̱va yaja̍māne dadhāti.
mi̱trāvaru̍ṇau tvottara̱taḥ pari̍dhattā̱mityā̍ha.
prā̱ṇā̱pā̱nau mi̱trāvaru̍ṇau.
prā̱ṇā̱pā̱nāve̱vāsmi̍ndadhāti.
sūrya̍stvā pu̱rastā̎t pā̱tvityā̍ha.
rakṣa̍sā̱mapa̍hatyai.
kasyā̎ścida̱bhiśa̍styā̱ ityā̍ha.
apa̍rimitāde̱vaina̍ṃ pāti..35..

vī̱tiho̎traṃ tvā kava̱ ityā̍ha.
a̱gnime̱va ho̱treṇa̱ sama̍rdhayati.
dyu̱manta̱ṃ sami̍dhīma̱hītyā̍ha̱ sami̍ddhyai.
agne̍ bṛ̱hanta̍madhva̱ra ityā̍ha̱ vṛddhyai̎.
vi̱śo ya̱ntre stha̱ ityā̍ha.
vi̱śāṃ yatyai̎.
u̱dī̱cīnā̎gre̱ ni da̍dhāti̱ prati̍ṣṭhityai.
vasū̍nāṃ ru̱drāṇā̍mādi̱tyānā̱ṃ sada̍si sī̱detyā̍ha.
de̱vatā̍nāme̱va sada̍ne prasta̱raṃ sā̍dayati.
ju̱hūra̍si ghṛ̱tācī̱ nāmnetyā̍ha..36..

a̱sau vai ju̱hūḥ.
a̱ntari̍kṣamupa̱bhṛt.
pṛ̱thi̱vī dhru̱vā.
tāsā̍me̱tade̱va pri̱yaṃ nāma̍.
yadghṛ̱tācīti̍.
yadghṛ̱tācītyāha̍.
pri̱yeṇai̱vainā̱ nāmnā̍ sādayati.
e̱tā a̍sadanthsukṛ̱tasya̍ lo̱ka ityā̍ha.
sa̱tyaṃ vai su̍kṛ̱tasya̍ lo̱kaḥ.
sa̱tya e̱vainā̎ḥ sukṛ̱tasya̍ lo̱ke sā̍dayati.
tā vi̍ṣṇo pā̱hītyā̍ha.
ya̱jño vai viṣṇu̍ḥ.
ya̱jñasya̱ dhṛtyai̎.
pā̱hi ya̱jñaṃ pā̱hi ya̱jñapa̍tiṃ pā̱hi māṃ ya̍jña̱niya̱mityā̍ha.
ya̱jñāya̱ yaja̍mānāyā̱''tmane̎.
tebhya̍ e̱vā''śiṣa̱māśā̱ste'nā̎rtyai..37..

Anuvāka 7

a̱gninā̱ vai hotrā̎.
de̱vā asu̍rāna̱bhya̍bhavan.
a̱gnaye̍ sami̱dhyamā̍nā̱yānu̍brū̱hītyā̍ha̱ bhrātṛ̍vyā'bhibhūtyai.
eka̍viṃśatimidhmadā̱rūṇi̍ bhavanti.
e̱ka̱vi̱ṃśo vai puru̍ṣaḥ.
puru̍ṣa̱syā''ptyai̎.
pañca̍daśedhmadā̱rūṇya̱bhyā da̍dhāti.
pañca̍daśa̱ vā a̍rdhamā̱sasya̱ rātra̍yaḥ.
a̱rdha̱mā̱sa̱śaḥ sa̍ṃvathsa̱ra ā̎pyate.
trīnpa̍ri̱dhīnpari̍ dadhāti..38..

ū̱rdhve sa̱midhā̱vā da̍dhāti.
a̱nū̱yā̱jebhya̍ḥ sa̱midha̱mati̍ śinaṣṭi.
ṣaṭthsaṃ pa̍dyante.
ṣaḍvā ṛ̱tava̍ḥ.
ṛ̱tūne̱va prī̍ṇāti.
ve̱denopa̍ vājayati.
prā̱jā̱pa̱tyo vai ve̱daḥ.
prā̱jā̱pa̱tyaḥ prā̱ṇaḥ.
yaja̍māna āhava̱nīya̍ḥ.
yaja̍māna e̱va prā̱ṇaṃ da̍dhāti..39..

trirupa̍ vājayati.
trayo̱ vai prā̱ṇāḥ.
prā̱ṇāne̱vāsmi̍ndadhāti.
ve̱deno̍pa̱yatya̍ sru̱veṇa̍ prājāpa̱tyamā̍ghā̱ramā ghā̍rayati.
ya̱jño vai pra̱jāpa̍tiḥ.
ya̱jñame̱va pra̱jāpa̍tiṃ mukha̱ta āra̍bhate.
atho̎ pra̱jāpa̍ti̱ḥ sarvā̍ de̱vatā̎ḥ.
sarvā̍ e̱va de̱vatā̎ḥ prīṇāti.
a̱gnima̍gnī̱ttristri̱ḥ saṃ mṛ̱ḍḍhītyā̍ha.
tryā̍vṛ̱ddhi ya̱jñaḥ..40..

atho̱ rakṣa̍sā̱mapa̍hatyai.
pa̱ri̱dhīnthsaṃ mā̎rṣṭi.
pu̱nātye̱vainān̍.
tristri̱ḥ saṃ mā̎rṣṭi.
tryā̍vṛ̱ddhi ya̱jñaḥ.
atho̍ medhya̱tvāya̍.
atho̍ e̱te vai de̍vā̱śvāḥ.
de̱vā̱śvāne̱va tathsaṃ mā̎rṣṭi.
su̱va̱rgasya̍ lo̱kasya̱ sama̍ṣṭyai.
āsī̍no̱'nyamā̍ghā̱ramā ghā̍rayati..41..

tiṣṭha̍nna̱nyam.
yathā'no̍ vā̱ ratha̍ṃ vā yu̱ñjyāt.
e̱vame̱va tada̍dhva̱ryurya̱jñaṃ yu̍nakti.
su̱va̱rgasya̍ lo̱kasyā̱bhyū̎ḍhyai.
vaha̍ntyenaṃ grā̱myāḥ pa̱śava̍ḥ.
ya e̱vaṃ veda̍.
bhuva̍namasi̱ vi pra̍tha̱svetyā̍ha.
ya̱jño vai bhuva̍nam.
ya̱jña e̱va yaja̍mānaṃ pra̱jayā̍ pa̱śubhi̍ḥ prathayati.
agne̱ yaṣṭa̍ri̱daṃ nama̱ ityā̍ha..42..

a̱gnirvai de̱vānā̱ṃ yaṣṭā̎.
ya e̱va de̱vānā̱ṃ yaṣṭā̎.
tasmā̍ e̱va nama̍skaroti.
juhvehya̱gnistvā̎ hvayati devaya̱jyāyā̱ upa̍bhṛ̱dehi̍ de̱vastvā̍ savi̱tā hva̍yati devaya̱jyāyā̱ ityā̍ha.
ā̱gne̱yī vai ju̱hūḥ.
sā̱vi̱tryu̍pa̱bhṛt.
tābhyā̍me̱vaine̱ prasū̍ta̱ āda̍tte.
agnā̍viṣṇū̱ mā vā̱mava̍ kramiṣa̱mityā̍ha.
a̱gniḥ pu̱rastā̎t.
viṣṇu̍rya̱jñaḥ pa̱ścāt..43..

tābhyā̍me̱va pra̍ti̱procyā̱tyā krā̍mati.
viji̍hāthā̱ṃ mā mā̱ santā̎pta̱mityā̱hāhi̍ṃsāyai.
lo̱kaṃ me̍ lokakṛtau kṛṇuta̱mityā̍ha.
ā̱me̱vaitāmā śā̎ste.
viṣṇo̱ḥ sthāna̍ma̱sītyā̍ha.
ya̱jño vai viṣṇu̍ḥ.
e̱tatkhalu̱ vai de̱vānā̱mapa̍rājitamā̱yata̍nam.
yadya̱jñaḥ.
de̱vānā̍me̱vāpa̍rājita ā̱yata̍ne tiṣṭhati.
i̱ta indro̍ akṛṇodvī̱ryā̍ṇītyā̍ha..44..

i̱ndri̱yame̱va yaja̍māne dadhāti.
sa̱mā̱rabhyo̱rdhvo a̍dhva̱ro di̍vi̱spṛśa̱mityā̍ha̱ vṛddhyai̎.
ā̱ghā̱ramā̍ghā̱ryamā̍ṇa̱manu̍ samā̱rabhya̍.
e̱tasmi̍nkā̱le de̱vāḥ su̍va̱rgaṃ lo̱kamā̍yan.
sā̱kṣāde̱va yaja̍mānaḥ suva̱rgaṃ lo̱kame̍ti.
atho̱ samṛ̍ddhenai̱va ya̱jñena̱ yaja̍mānaḥ suva̱rgaṃ lo̱kame̍ti.
ahru̍to ya̱jño ya̱jñapa̍te̱rityā̱hānā̎rtyai.
indrā̍vā̱nthsvāhetyā̍ha.
i̱ndri̱yame̱va yaja̍māne dadhāti.
bṛ̱hadbhā ityā̍ha..45..

su̱va̱rgo vai lo̱ko bṛ̱hadbhāḥ.
su̱va̱rgasya̍ lo̱kasya̱ sama̍ṣṭyai.
ya̱ja̱mā̱na̱de̱va̱tyā̍ vai ju̱hūḥ.
bhrā̱tṛ̱vya̱de̱va̱tyo̍pa̱bhṛt.
prā̱ṇa ā̍ghā̱raḥ.
yathsa̍ṃspa̱ṟśaye̎t.
bhrātṛ̍vye'sya prā̱ṇaṃ da̍dhyāt.
asa̍ṃsparśayanna̱tyā krā̍mati.
yaja̍māna e̱va prā̱ṇaṃ da̍dhāti.
pā̱hi mā̎'gne̱ duśca̍ritā̱dā mā̱ suca̍rite bha̱jetyā̍ha..46..

a̱gnirvāva pa̱vitram̎.
vṛ̱ji̱namanṛ̍ta̱ṃ duśca̍ritam.
ṛ̱ju̱ka̱rmaṃ sa̱tyaṃ suca̍ritam.
a̱gnire̱vaina̍ṃ vṛji̱nādanṛ̍tā̱dduśca̍ritātpāti.
ṛ̱ju̱ka̱rme sa̱tye suca̍rite bhajati.
tasmā̍de̱vamā śā̎ste.
ā̱tmano̍ gopī̱thāya̍.
śiro̱ vā e̱tadya̱jñasya̍.
yadā̍ghā̱raḥ.
ā̱tmā dhru̱vā..47..

ā̱ghā̱ramā̱ghārya̍ dhru̱vāṃ sama̍nakti.
ā̱tmanne̱va ya̱jñasya̱ śira̱ḥ prati̍ dadhāti.
dviḥ sama̍nakti.
dvau hi prā̍ṇāpā̱nau.
tadā̍huḥ.
trire̱va sama̍ñjyāt.
tridhā̍tu̱ hi śira̱ iti̍.
śira̍ ivai̱tadya̱jñasya̍.
atho̱ trayo̱ vai prā̱ṇāḥ.
prā̱ṇāne̱vāsmi̍ndadhāti.
ma̱khasya̱ śiro̍'si̱ sañjyoti̍ṣā̱ jyoti̍raṅktā̱mityā̍ha.
jyoti̍re̱vāsmā̍ u̱pari̍ṣṭāddadhāti.
su̱va̱rgasya̍ lo̱kasyānu̍khyātyai..48..

Anuvāka 8

dhiṣṇi̍yā̱ vā e̱te nyu̍pyante.
yadbra̱hmā.
yaddhotā̎.
yada̍dhva̱ryuḥ.
yada̱gnīt.
yadyaja̍mānaḥ.
tān yada̍ntare̱yāt.
yaja̍mānasya prā̱ṇānthsaṅka̍rṣet.
pra̱māyu̍kaḥ syāt.
pu̱ro̱ḍāśa̍mapa̱gṛhya̱ sañca̍ratyadhva̱ryuḥ..49..

yaja̍mānāyai̱va tallo̱kaṃ śi̍ṃṣati.
nāsya̍ prā̱ṇānthsaṅka̍rṣati.
na pra̱māyu̍ko bhavati.
pu̱rastā̎t pra̱tyaṅṅāsī̍naḥ.
iḍā̍yā̱ iḍā̱mā da̍dhāti.
hastyā̱ṃ hotre̎.
pa̱śavo̱ vā iḍā̎.
pa̱śava̱ḥ puru̍ṣaḥ.
pa̱śuṣve̱va pa̱śūnprati̍ṣṭhāpayati.
iḍā̍yai̱ vā e̱ṣā prajā̍tiḥ..50..

tāṃ prajā̍ti̱ṃ yaja̍mā̱no'nu̱ pra jā̍yate.
dvira̱ṅgulā̍vanakti̱ parva̍ṇoḥ.
dvi̱pādyaja̍māna̱ḥ prati̍ṣṭhityai.
sa̱kṛdupa̍ stṛṇāti.
dvirā da̍dhāti.
sa̱kṛda̱bhi ghā̍rayati.
ca̱tuḥ saṃ pa̍dyate.
ca̱tvāri̱ vai pa̱śoḥ pra̍ti̱ṣṭhānā̍ni.
yāvā̍ne̱va pa̱śuḥ.
tamupa̍hvayate..51..

mukha̍miva̱ pratyupa̍hvayeta.
sa̱mmu̱khāne̱va pa̱śūnupa̍ hvayate.
pa̱śavo̱ vā iḍā̎.
tasmā̱thsā'nvā̱rabhyā̎.
a̱dhva̱ryuṇā̍ ca̱ yaja̍mānena ca.
upa̍hūtaḥ paśu̱māna̍sā̱nītyā̍ha.
upa̱ hye̍nau̱ hvaya̍te̱ hotā̎.
iḍā̍yai de̱vatā̍nāmupaha̱ve.
upa̍hūtaḥ paśu̱mānbha̍vati.
ya e̱vaṃ veda̍..52..

yāṃ vai hastyā̱miḍā̍mā̱dadhā̍ti.
vā̱caḥ sā bhā̍ga̱dheyam̎.
yāmu̍pa̱hvaya̍te.
prā̱ṇānā̱ṃ sā.
vāca̍ṃ cai̱va prā̱ṇāṃścāva̍ rundhe.
atha̱ vā e̱tarhyupa̍hūtāyā̱miḍā̍yām.
pu̱ro̱ḍāśa̍syai̱va ba̍rhi̱ṣado̍ mīmā̱ṃsā.
yaja̍mānaṃ de̱vā a̍bruvan.
ha̱virno̱ nirva̱peti̍.
nāhama̍bhā̱go nirva̍phsyā̱mītya̍bravīt..53..

na mayā̍'bhā̱gayā'nu̍vakṣya̱theti̱ vāga̍bravīt.
nāhama̍bhā̱gā pu̍ronuvā̱kyā̍ bhaviṣyā̱mīti̍ puronuvā̱kyā̎.
nāhama̍bhā̱gā yā̱jyā̍ bhaviṣyā̱mīti̍ yā̱jyā̎.
na mayā̍'bhā̱gena̱ vaṣa̍ṭkariṣya̱theti̍ vaṣaṭkā̱raḥ.
yadya̍jamānabhā̱gaṃ ni̱dhāya̍ puro̱ḍāśa̍ṃ barhi̱ṣada̍ṃ ka̱roti̍.
tāne̱va tadbhā̱gina̍ḥ karoti.
ca̱tu̱rdhā ka̍roti.
cata̍sro̱ diśa̍ḥ.
di̱kṣve̍va prati̍ tiṣṭhati.
ba̱ṟhi̱ṣada̍ṃ karoti..54..

yaja̍māno̱ vai pu̍ro̱ḍāśa̍ḥ.
pra̱jā ba̱ṟhiḥ.
yaja̍māname̱va pra̱jāsu̱ prati̍ṣṭhāpayati.
tasmā̍da̱sthnā'nyāḥ pra̱jāḥ pra̍ti̱tiṣṭha̍nti.
mā̱ṃsenā̱nyāḥ.
atho̱ khalvā̍huḥ.
dakṣi̍ṇā̱ vā e̱tā ha̍virya̱jñasyā̎ntarve̱dyava̍ rudhyante.
yatpu̍ro̱ḍāśa̍ṃ barhi̱ṣada̍ṃ ka̱rotīti̍.
ca̱tu̱rdhā ka̍roti.
ca̱tvāro̱ hye̍te ha̍virya̱jñasya̱rtvija̍ḥ..55..

bra̱hmā hotā̎'dhva̱ryura̱gnīt.
tama̱bhi mṛ̍śet.
i̱daṃ bra̱hmaṇa̍ḥ.
i̱daṃ hotu̍ḥ.
i̱dama̍dhva̱ryoḥ.
i̱dama̱gnīdha̱ iti̍.
yathai̱vādaḥ sau̱mye̎'dhva̱re.
ā̱deśa̍mṛ̱tvigbhyo̱ dakṣi̍ṇā nī̱yante̎.
tā̱dṛge̱va tat.
a̱gnīdhe̎ pratha̱māyā da̍dhāti..56..

a̱gnimu̍khā̱ hyṛddhi̍ḥ.
a̱gnimu̍khāme̱varddhi̱ṃ yaja̍māna ṛdhnoti.
sa̱kṛdu̍pa̱stīrya̱ dvirā̱dadha̍t.
u̱pa̱stīrya̱ dvira̱bhi ghā̍rayati.
ṣaṭthsaṃ pa̍dyante.
ṣaḍvā ṛ̱tava̍ḥ.
ṛ̱tūne̱va prī̍ṇāti.
ve̱dena̍ bra̱hmaṇe̎ brahmabhā̱gaṃ pari̍harati.
prā̱jā̱pa̱tyo vai ve̱daḥ.
prā̱jā̱pa̱tyo bra̱hmā..57..

sa̱vi̱tā ya̱jñasya̱ prasū̎tyai.
atha̱ kāma̍ma̱nyena̍.
tato̱ hotre̎.
madhya̱ṃ vā e̱tadya̱jñasya̍.
yaddhotā̎.
ma̱dhya̱ta e̱va ya̱jñaṃ prī̍ṇāti.
athā̎dhva̱ryave̎.
pra̱ti̱ṣṭhā vā e̱ṣā ya̱jñasya̍.
yada̍dhva̱ryuḥ.
tasmā̎ddhavirya̱jñasyai̱tāme̱vā''vṛta̱manu̍..58..

a̱nyā dakṣi̍ṇā nīyante.
ya̱jñasya̱ prati̍ṣṭhityai.
a̱gnima̍gnīthsa̱kṛthsa̍kṛ̱thsaṃ mṛ̱ḍḍhītyā̍ha.
parā̍ṅiva̱ hye̍tarhi̍ ya̱jñaḥ.
i̱ṣi̱tā daivyā̱ hotā̍ra̱ ityā̍ha.
i̱ṣi̱taṃ hi karma̍ kri̱yate̎.
bha̱dra̱vācyā̍ya̱ preṣi̍to̱ mānu̍ṣaḥ sūktavā̱kāya̍ sū̱ktā brū̱hītyā̍ha.
ā̱me̱vaitāmā śā̎ste.
sva̱gā daivyā̱ hotṛ̍bhya̱ ityā̍ha.
ya̱jñame̱va tathsva̱gā ka̍roti.
sva̱stirmānu̍ṣebhya̱ ityā̍ha.
ā̱me̱vaitāmā śā̎ste.
śa̱ṃ yorbrū̱hītyā̍ha.
śa̱ṃyume̱va bā̍rhaspa̱tyaṃ bhā̍ga̱dheye̍na̱ sama̍rdhayati..59..

Anuvāka 9

atha̱ srucā̍vanu̱ṣṭugbhyā̱ṃ vāja̍vatībhyā̱ṃ vyū̍hati.
pra̱ti̱ṣṭhā vā a̍nu̱ṣṭuk.
anna̱ṃ vāja̱ḥ prati̍ṣṭhityai.
a̱nnādya̱syāva̍ruddhyai.
prācī̎ṃ ju̱hūmū̍hati.
jā̱tāne̱va bhrātṛ̍vyā̱npraṇu̍date.
pra̱tīcī̍mupa̱bhṛtam̎.
ja̱ni̱ṣyamā̍ṇāne̱va prati̍nudate.
saviṣū̍ca e̱vāpohya̍ sa̱patnā̱ṉ yaja̍mānaḥ.
a̱smim̐llo̱ke prati̍ tiṣṭhati..60..

dvābhyā̎m.
dvipra̍tiṣṭho̱ hi.
vasu̍bhyastvā ru̱drebhya̍stvā''di̱tyebhya̱stvetyā̍ha.
ya̱thā̱ya̱jure̱vaitat.
sru̱kṣu pra̍sta̱rama̍nakti.
i̱me vai lo̱kāḥ sruca̍ḥ.
yaja̍mānaḥ prasta̱raḥ.
yaja̍māname̱va teja̍sā'nakti.
tre̱dhā'na̍kti.
traya̍ i̱me lo̱kāḥ..61..

e̱bhya e̱vaina̍ṃ lo̱kebhyo̍'nakti.
a̱bhi̱pū̱rvama̍nakti.
a̱bhi̱pū̱rvame̱va yaja̍māna̱ṃ teja̍sā'nakti.
a̱ktaṃ rihā̍ṇā̱ ityā̍ha.
tejo̱ vā ājyam̎.
yaja̍mānaḥ prasta̱raḥ.
yaja̍māname̱va teja̍sā'nakti.
vi̱yantu̱ vaya̱ ityā̍ha.
vaya̍ e̱vaina̍ṃ kṛ̱tvā.
su̱va̱rgaṃ lo̱kaṃ ga̍mayati..62..

pra̱jāṃ yoni̱ṃ mā nirmṛ̍kṣa̱mityā̍ha.
pra̱jāyai̍ gopī̱thāya̍.
āpyā̍yantā̱māpa̱ oṣa̍dhaya̱ ityā̍ha.
āpa̍ e̱vauṣa̍dhī̱rā pyā̍yayati.
ma̱rutā̱ṃ pṛṣa̍taya̱ḥ sthetyā̍ha.
ma̱ruto̱ vai vṛṣṭyā̍ īśate.
vṛṣṭi̍me̱vāva̍ rundhe.
diva̍ṃ gaccha̱ tato̍ no̱ vṛṣṭi̱mera̱yetyā̍ha.
vṛṣṭi̱rvai dyauḥ.
vṛṣṭi̍me̱vāva̍ rundhe..63..

yāva̱dvā a̍dhva̱ryuḥ pra̍sta̱raṃ pra̱hara̍ti.
tāva̍da̱syāyu̍rmīyate.
ā̱yu̱ṣpā a̍gne̱'syāyu̍rme pā̱hītyā̍ha.
āyu̍re̱vā''tmandha̍tte.
yāva̱dvā a̍dhva̱ryuḥ pra̍sta̱raṃ pra̱hara̍ti.
tāva̍dasya̱ cakṣu̍rmīyate.
ca̱kṣu̱ṣpā a̍gne'si̱ cakṣu̍rme pā̱hītyā̍ha.
cakṣu̍re̱vā''tmandha̍tte.
dhru̱vā'sītyā̍ha̱ prati̍ṣṭhityai.
yaṃ pa̍ri̱dhiṃ pa̱ryadha̍tthā̱ ityā̍ha..64..

ya̱thā̱ya̱jure̱vaitat.
agne̍ deva pa̱ṇibhi̍rvī̱yamā̍ṇa̱ ityā̍ha.
a̱gnaya̍ e̱vaina̱ṃ juṣṭa̍ṃ karoti.
tanta̍ e̱tamanu̱ joṣa̍ṃ bharā̱mītyā̍ha.
sa̱jā̱tāne̱vāsmā̱ anu̍kānkaroti.
nede̱ṣa tvada̍pace̱tayā̍tā̱ ityā̱hānu̍khyātyai.
ya̱jñasya̱ pātha̱ upa̱ sami̍ta̱mityā̍ha.
bhū̱māna̍me̱vopai̍ti.
pa̱ri̱dhīnpra ha̍rati.
ya̱jñasya̱ sami̍ṣṭyai..65..

srucau̱ saṃ prasrā̍vayati.
yade̱va tatra̍ krū̱ram.
tattena̍ śamayati.
ju̱hvāmu̍pa̱bhṛtam̎.
ya̱ja̱mā̱na̱de̱va̱tyā̍ vai ju̱hūḥ.
bhrā̱tṛ̱vya̱de̱va̱tyo̍pa̱bhṛt.
yaja̍mānāyai̱va bhrātṛ̍vya̱mupa̍stiṃ karoti.
sa̱ṃsrā̱vabhā̍gā̱ḥ sthetyā̍ha.
vasa̍vo̱ vai ru̱drā ā̍di̱tyāḥ sa̍ṃsrā̱vabhā̍gāḥ.
teṣā̱ṃ tadbhā̍ga̱dheyam̎..66..

tāne̱va tena̍ prīṇāti.
vai̱śva̱de̱vyarcā.
e̱te hi viśve̍ de̱vāḥ.
tri̱ṣṭugbha̍vati.
i̱ndri̱yaṃ vai tri̱ṣṭuk.
i̱ndri̱yame̱va yaja̍māne dadhāti.
a̱gnervā̱mapa̍nnagṛhasya̱ sada̍si sādayā̱mītyā̍ha.
i̱yaṃ vā a̱gnirapa̍nnagṛhaḥ.
a̱syā e̱vaine̱ sada̍ne sādayati.
su̱mnāya̍ sumninī su̱mne mā̍ dhatta̱mityā̍ha..67..

pra̱jā vai pa̱śava̍ḥ su̱mnam.
pra̱jāme̱va pa̱śūnā̱tmandha̍tte.
dhu̱ri dhu̱ryau̍ pāta̱mityā̍ha.
jā̱yā̱pa̱tyorgo̍pī̱thāya̍.
agne̍'dabdhāyo'śītatano̱ ityā̍ha.
ya̱thā̱ya̱jure̱vaitat.
pā̱hi mā̱'dya di̱vaḥ pā̱hi prasi̍tyai pā̱hi duri̍ṣṭyai pā̱hi du̍radma̱nyai pā̱hi duśca̍ritā̱dityā̍ha.
ā̱me̱vaitāmā śā̎ste.
avi̍ṣannaḥ pi̱tuṃ kṛ̍ṇu su̱ṣadā̱ yoni̱ṃ svāhetī̎dhmasa̱ṃvṛśca̍nānyanvāhārya̱paca̍ne'bhyā̱dhāya̍ phalīkaraṇaho̱maṃ ju̍hoti.
ati̍riktāni̱ vā i̍dhmasa̱ṃ vṛśca̍nāni..68..

ati̍riktāḥ phalī̱kara̍ṇāḥ.
ati̍riktamājyoccheṣa̱ṇam.
ati̍rikta e̱vāti̍riktaṃ dadhāti.
atho̱ ati̍riktenai̱vāti̍riktamā̱ptvā'va̍ rundhe.
vedi̍rde̱vebhyo̱ nilā̍yata.
tāṃ ve̱denānva̍vindan.
ve̱dena̱ vedi̍ṃ vividuḥ pṛthi̱vīm.
sā pa̍prathe pṛthi̱vī pārthi̍vāni.
garbha̍ṃ bibharti̱ bhuva̍neṣva̱ntaḥ.
tato̍ ya̱jño jā̍yate viśva̱dāni̱riti̍ pu̱rastā̎thstambaya̱juṣo̍ ve̱dena̱ vedi̱ṃ sammā̱rṣṭyanu̍vittyai..69..

atho̱ yadve̱daśca̱ vedi̍śca̱ bhava̍taḥ.
mi̱thu̱na̱tvāya̱ prajā̎tyai.
pra̱jāpa̍te̱rvā e̱tāni̱ śmaśrū̍ṇi.
yadve̱daḥ.
patni̍yā u̱pastha̱ āsya̍ti.
mi̱thu̱name̱va ka̍roti.
vi̱ndate̎ pra̱jām.
ve̱daṃ hotā''ha̍va̱nīyā̎thstṛ̱ṇanne̍ti.
ya̱jñame̱va tathsaṃ ta̍no̱tyotta̍rasmādardhamā̱sāt.
taṃ santa̍ta̱mutta̍re'rdhamā̱sa āla̍bhate..70..

taṃ kā̱lekā̍la̱ āga̍te yajate.
bra̱hma̱vā̱dino̍ vadanti.
sa tvā a̍dhva̱ryuḥ syā̎t.
yo yato̍ ya̱jñaṃ pra̍yu̱ṅkte.
tade̍naṃ pratiṣṭhā̱paya̱tīti̍.
vātā̱dvā a̍dhva̱ryurya̱jñaṃ prayu̍ṅkte.
devā̍ gātuvido gā̱tuṃ vi̱tvā gā̱tumi̱tetyā̍ha.
yata̍ e̱va ya̱jñaṃ pra̍yu̱ṅkte.
tade̍na̱ṃ prati̍ṣṭhāpayati.
prati̍ tiṣṭhati pra̱jayā̍ pa̱śubhi̱ryaja̍mānaḥ..71..

Anuvāka 10

yo vā aya̍thādevataṃ ya̱jñamu̍pa̱cara̍ti.
ā de̱vatā̎bhyo vṛścyate.
pāpī̍yānbhavati.
yo ya̍thādeva̱tam.
na de̱vatā̎bhya̱ āvṛ̍ścyate.
vasī̍yānbhavati.
vā̱ru̱ṇo vai pāśa̍ḥ.
i̱maṃ viṣyā̍mi̱ varu̍ṇasya̱ pāśa̱mityā̍ha.
va̱ru̱ṇa̱pā̱śāde̱vainā̎ṃ muñcati.
sa̱vi̱tṛpra̍sūto yathādeva̱tam..72..

na de̱vatā̎bhya̱ āvṛ̍ścyate.
vasī̍yānbhavati.
dhā̱tuśca̱ yonau̍ sukṛ̱tasya̍ lo̱ka ityā̍ha.
a̱gnirvai dhā̱tā.
puṇya̱ṃ karma̍ sukṛ̱tasya̍ lo̱kaḥ.
a̱gnire̱vainā̎ṃ dhā̱tā.
puṇye̱ karma̍ṇi sukṛ̱tasya̍ lo̱ke da̍dhāti.
syo̱naṃ me̍ sa̱ha patyā̍ karo̱mītyā̍ha.
ā̱tmana̍śca̱ yaja̍mānasya̱ cānā̎tyai sa̱ntvāya̍.
samāyu̍ṣā̱ saṃ pra̱jayetyā̍ha..73..

ā̱me̱vaitāmā śā̎ste pūrṇapā̱tre.
a̱nta̱to̍'nu̱ṣṭubhā̎.
catu̍ṣpa̱dvā e̱tacchanda̱ḥ prati̍ṣṭhita̱ṃ patni̍yai pūrṇapā̱tre bha̍vati.
a̱smim̐llo̱ke prati̍ tiṣṭhā̱nīti̍.
a̱sminne̱va lo̱ke prati̍ tiṣṭhati.
atho̱ vāgvā a̍nu̱ṣṭuk.
vāṅmi̍thu̱nam.
āpo̱ reta̍ḥ pra̱jana̍nam.
e̱tasmā̱dvai mi̍thu̱nādvi̱dyota̍mānaḥ sta̱naya̍nvarṣati.
reta̍ḥ si̱ñcan..74..

pra̱jāḥ pra̍ja̱nayan̍.
yadvai ya̱jñasya̱ brahma̍ṇā yu̱jyate̎.
brahma̍ṇā̱ vai tasya̍ vimo̱kaḥ.
a̱dbhiḥ śānti̍ḥ.
vimu̍kta̱ṃ vā e̱tarhi̱ yoktra̱ṃ brahma̍ṇā.
ā̱dāyai̍na̱tpatnī̍ sa̱hāpa upa̍gṛhṇīte̱ śāntyai̎.
a̱ñja̱lau pū̎rṇapā̱tramā na̍yati.
reta̍ e̱vāsyā̎ṃ pra̱jāṃ da̍dhāti.
pra̱jayā̱ hi ma̍nu̱ṣya̍ḥ pū̱rṇaḥ.
mukha̱ṃ vi mṛ̍ṣṭe.
a̱va̱bhṛ̱thasyai̱va rū̱paṃ kṛ̱tvotti̍ṣṭhati..75..

Anuvāka 11

pa̱ri̱ve̱ṣo vā e̱ṣa vana̱spatī̍nām.
yadu̍pave̱ṣaḥ.
ya e̱vaṃ veda̍.
vi̱ndate̍ parive̱ṣṭāram̎.
tamu̍tka̱re.
yaṃ de̱vā ma̍nu̱ṣye̍ṣu.
u̱pa̱ve̱ṣamadhā̍rayan.
ye a̱smadapa̍ cetasaḥ.
tāna̱smabhya̍mi̱hā ku̍ru.
upa̍ve̱ṣopa̍ viḍḍhi naḥ..76..

pra̱jāṃ puṣṭi̱matho̱ dhanam̎.
dvi̱pado̍ na̱ścatu̍ṣpadaḥ.
dhru̱vānana̍pagānku̱rviti̍ pu̱rastā̎tpra̱tyañca̱mupa̍ gūhati.
tasmā̎tpu̱rastā̎tpra̱tyañca̍ḥ śū̱drā ava̍syanti.
stha̱vi̱ma̱ta upa̍gūhati.
apra̍tivādina e̱vainā̎nkurute.
dhṛṣṭi̱rvā u̍pave̱ṣaḥ.
śu̱carto vajro̱ brahma̍ṇā̱ saṃśi̍taḥ.
yopa̍ve̱ṣe śuk.
sā'mumṛ̍cchatu̱ yaṃ dvi̱ṣma iti̍..77..

athā̎smai nāma̱ gṛhya̱ praha̍rati.
nira̱munnu̍da̱ oka̍saḥ.
sa̱patno̱ yaḥ pṛ̍ta̱nyati̍.
ni̱rbā̱dhye̍na ha̱viṣā̎.
indra̍ eṇa̱ṃ parā̍śarīt.
i̱hi ti̱sraḥ pa̍rā̱vata̍ḥ.
i̱hi pañca̱ janā̱ṃ ati̍.
i̱hi ti̱sro'ti̍ roca̱nāyāva̍t.
sūryo̱ asa̍ddi̱vi.
pa̱ra̱māntvā̍ parā̱vatam̎..78..

indro̍ nayatu vṛtra̱hā.
yato̱ na puna̱rāya̍si.
śa̱śva̱tībhya̱ḥ samā̎bhya̱ iti̍.
tri̱vṛdvā e̱ṣa vajro̱ brahma̍ṇā̱ saṃśi̍taḥ.
śu̱caivaina̍ṃ vi̱dhvā.
e̱bhyo lo̱kebhyo̍ ni̱rṇudya̍.
vajre̍ṇa̱ brahma̍ṇā stṛṇute.
ha̱to̍'sāvava̍dhiṣmā̱mumityā̍ha̱ stṛtyai̎.
yaṃ dvi̱ṣyāttaṃ dhyā̍yet.
śu̱caivaina̍marpayati..79..

Anuvāka 1

brahma̍ṇe brāhma̱ṇamāla̍bhate.
kṣa̱trāya̍ rāja̱nyam̎.
ma̱rudbhyo̱ vaiśyam̎.
tapa̍se śū̱dram.
tama̍se̱ taska̍ram.
nāra̍kāya vīra̱haṇam̎.
pā̱pmane̎ klī̱bam.
ā̱kra̱yāyā̍yo̱gūm.
kāmā̍ya puṃśca̱lūm.
ati̍kruṣṭāya māga̱dham..1..

Anuvāka 2

gī̱tāya̍ sū̱tam.
nṛ̱ttāya̍ śailū̱ṣam.
dharmā̍ya sabhāca̱ram.
na̱rmāya̍ re̱bham.
nari̍ṣṭhāyai bhīma̱lam.
hasā̍ya̱ kārim̎.
ā̱na̱ndāya̍ strīṣa̱kham.
pramude̍ kumārīpu̱tram.
me̱dhāyai̍ rathakā̱ram.
dhairyā̍ya̱ takṣā̍ṇam..2..

Anuvāka 3

śramā̍ya kaulā̱lam.
mā̱yāyai̍ kārmā̱ram.
rū̱pāya̍ maṇikā̱ram.
śubhe̍ va̱pam.
śa̱ra̱vyā̍yā iṣukā̱ram.
he̱tyai dha̍nvakā̱ram.
karma̍ṇe jyākā̱ram.
di̱ṣṭāya̍ rajjusa̱rgam.
mṛ̱tyave̍ mṛga̱yum.
anta̍kāya śva̱nitam̎..3..

Anuvāka 4

sa̱ndhaye̍ jā̱ram.
ge̱hāyo̍papa̱tim.
nirṛ̍tyai parivi̱ttam.
ārtyai̍ parivividā̱nam.
arā̎dhyai didhiṣū̱patim̎.
pa̱vitrā̍ya bhi̱ṣajam̎.
pra̱jñānā̍ya nakṣatrada̱ṟśam.
niṣkṛ̍tyai peśaskā̱rīm.
balā̍yopa̱dām.
varṇā̍yānū̱rudham̎..4..

Anuvāka 5

na̱dībhya̍ḥ pauñji̱ṣṭam.
ṛ̱kṣīkā̎bhyo̱ naiṣā̍dam.
pu̱ru̱ṣa̱vyā̱ghrāya̍ du̱rmadam̎.
pra̱yudbhya̱ unma̍ttam.
ga̱ndha̱rvā̱phsa̱rābhyo̱ vrātyam̎.
sa̱rpa̱de̱va̱ja̱nebhyo'pra̍tipadam.
ave̎bhyaḥ kita̱vam.
i̱ryatā̍yā̱ aki̍tavam.
pi̱śā̱cebhyo̍ bidalakā̱ram.
yā̱tu̱dhāne̎bhyaḥ kaṇṭakakā̱ram..5..

Anuvāka 6

u̱thsā̱debhya̍ḥ ku̱bjam.
pra̱mude̍ vāma̱nam.
dvā̱rbhyaḥ srā̱mam.
svapnā̍yā̱ndham.
adha̍rmāya badhi̱ram.
sa̱ṃjñānā̍ya smarakā̱rīm.
pra̱kā̱modyā̍yopa̱sadam̎.
ā̱śi̱kṣāyai̎ pra̱śñinam̎.
u̱pa̱śi̱kṣāyā̍ abhipra̱śñinam̎.
ma̱ryādā̍yai praśñavivā̱kam..6..

Anuvāka 7

ṛtyai̎ ste̱nahṛ̍dayam.
vaira̍hatyāya̱ piśu̍nam.
vivi̍ttyai kṣa̱ttāram̎.
aupa̍draṣṭāya saṅgrahī̱tāram̎.
balā̍yānuca̱ram.
bhū̱mne pa̍riṣka̱ndam.
pri̱yāya̍ priyavā̱dinam̎.
ari̍ṣṭyā aśvasā̱dam.
medhā̍ya vāsaḥ palpū̱līm.
pra̱kā̱māya̍ rajayi̱trīm..7..

Anuvāka 8

bhāyai̍ dārvāhā̱ram.
pra̱bhāyā̍ āgne̱ndham.
nāka̍sya pṛ̱ṣṭhāyā̍bhiṣe̱ktāram̎.
bra̱dhnasya̍ vi̱ṣṭapā̍ya pātranirṇe̱gam.
de̱va̱lo̱kāya̍ peśi̱tāram̎.
ma̱nu̱ṣya̱lo̱kāya̍ prakari̱tāram̎.
sarve̎bhyo lo̱kebhya̍ upase̱ktāram̎.
ava̍rtyai va̱dhāyo̍pamanthi̱tāram̎.
su̱va̱rgāya̍ lo̱kāya̍ bhāga̱dugham̎.
varṣi̍ṣṭhāya̱ nākā̍ya parive̱ṣṭāram̎..8..

Anuvāka 9

arme̎bhyo hasti̱pam.
ja̱vāyā̎śva̱pam.
puṣṭyai̍ gopā̱lam.
teja̍se'japā̱lam.
vī̱ryā̍yāvipā̱lam.
irā̍yai kī̱nāśam̎.
kī̱lālā̍ya surākā̱ram.
bha̱drāya̍ gṛha̱pam.
śreya̍se vitta̱dham.
adhya̍kṣāyānukṣa̱ttāram̎..9..

Anuvāka 10

ma̱nyave̍'yastā̱pam.
krodhā̍ya nisa̱ram.
śokā̍yābhisa̱ram.
u̱tkū̱la̱vi̱kū̱lābhyā̎ṃ tri̱sthinam̎.
yogā̍ya yo̱ktāram̎.
kṣemā̍ya vimo̱ktāram̎.
vapu̍ṣe mānaskṛ̱tam.
śīlā̍yāñjanīkā̱ram.
nirṛ̍tyai kośakā̱rīm.
ya̱māyā̱sūm..10..

Anuvāka 11

ya̱myai̍ yama̱sūm.
atha̍rva̱bhyo'va̍tokām.
sa̱ṃva̱thsa̱rāya̍ paryā̱riṇī̎m.
pa̱ri̱va̱thsa̱rāyāvi̍jātām.
i̱dā̱va̱thsa̱rāyā̍pa̱skadva̍rīm.
i̱dva̱thsa̱rāyā̱tītva̍rīm.
va̱thsa̱rāya̱ vija̍rjarām.
sa̱ṃva̱thsa̱rāya̱ pali̍knīm.
vanā̍ya vana̱pam.
a̱nyato̍raṇyāya dāva̱pam..11..

Anuvāka 12

saro̎bhyo dhaiva̱ram.
veśa̍ntābhyo̱ dāśam̎.
u̱pa̱sthāva̍rībhyo̱ baindam̎.
na̱ḍva̱lābhya̍ḥ śauṣka̱lam.
pā̱ryā̍ya kaiva̱rtam.
a̱vā̱ryā̍ya mārgā̱ram.
tī̱rthebhya̍ ā̱ndam.
viṣa̍mebhyo mainā̱lam.
svane̎bhya̱ḥ parṇa̍kam.
guhā̎bhya̱ḥ kirā̍tam.
sānu̍bhyo̱ jambha̍kam.
parva̍tebhya̱ḥ kimpū̍ruṣam..12..

Anuvāka 13

pra̱ti̱śrutkā̍yā ṛtu̱lam.
ghoṣā̍ya bha̱ṣam.
antā̍ya bahuvā̱dinam̎.
a̱na̱ntāya̱ mūkam̎.
maha̍se vīṇāvā̱dam.
krośā̍ya tūṇava̱dhmam.
ā̱kra̱ndāya̍ dundubhyāghā̱tam.
a̱va̱ra̱spa̱rāya̍ śaṅkha̱dhmam.
ṛ̱bhubhyo̍jinasandhā̱yam.
sā̱dhyebhya̍ścarma̱mṇam..13..

Anuvāka 14

bī̱bha̱thsāyai̍ paulka̱sam.
bhūtyai̍ jāgara̱ṇam.
abhū̎tyai svapa̱nam.
tu̱lāyai̍ vāṇi̱jam.
varṇā̍ya hiraṇyakā̱ram.
viśve̎bhyo de̱vebhya̍ḥ sidhma̱lam.
pa̱ścā̱ddo̱ṣāya̍ glā̱vam.
ṛtyai̍ janavā̱dinam̎.
vyṛ̍ddhyā apaga̱lbham.
sa̱ṃśa̱rāya̍ pra̱cchidam̎..14..

Anuvāka 15

hasā̍ya puṃśca̱lūmā la̍bhate.
vī̱ṇā̱vā̱daṃ gaṇa̍kaṃ gī̱tāya̍.
yāda̍se śābu̱lyām.
na̱rmāya̍ bhadrava̱tīm.
tū̱ṇa̱va̱dhmaṃ grā̍ma̱ṇya̍ṃ pāṇisaṅghā̱taṃ nṛ̱ttāya̍.
modā̍yānu̱krośa̍kam.
ā̱na̱ndāya̍ tala̱vam..15..

Anuvāka 16

a̱kṣa̱rā̱jāya̍ kita̱vam.
kṛ̱tāya̍ sabhā̱vinam̎.
tretā̍yā ādinavada̱ṟśam.
dvā̱pa̱rāya̍ bahi̱ḥ sadam̎.
kala̍ye sabhāsthā̱ṇum.
du̱ṣkṛ̱tāya̍ ca̱rakā̍cāryam.
adhva̍ne brahmacā̱riṇam̎.
pi̱śā̱cebhya̍ḥ saila̱gam.
pi̱pā̱sāyai̍ govya̱ccham.
nirṛ̍tyai goghā̱tam.
kṣu̱dhe go̍vika̱rtam.
kṣu̱ttṛ̱ṣṇābhyā̱ṃ tam.
yo gāṃ vi̱kṛnta̍ntaṃ mā̱ṃsaṃ bhikṣa̍māṇa upa̱tiṣṭha̍te..16..

Anuvāka 17

bhūmyai̍ pīṭhasa̱rpiṇa̱mā la̍bhate.
a̱gnaye'ṃ̍sa̱lam.
vā̱yave̍ cāṇḍā̱lam.
a̱ntari̍kṣāya vaṃśana̱rtinam̎.
di̱ve kha̍la̱tim.
sūryā̍ya harya̱kṣam.
ca̱ndrama̍se mirmi̱ram.
nakṣa̍trebhyaḥ ki̱lāsam̎.
ahne̍ śu̱klaṃ pi̍ṅga̱lam.
rātri̍yai kṛ̱ṣṇaṃ pi̍ṅgā̱kṣam..17..

Anuvāka 18

vā̱ce puru̍ṣa̱mā la̍bhate.
prā̱ṇama̍pā̱naṃ vyā̱namu̍dā̱naṃ sa̍mā̱naṃ tān vā̱yave̎.
sūryā̍ya̱ cakṣu̱rā la̍bhate.
mana̍śca̱ndrama̍se.
di̱gbhyaḥ śrotram̎.
pra̱jāpa̍taye̱ puru̍ṣam..18..

Anuvāka 19

athai̱tānarū̍pebhya̱ āla̍bhate.
ati̍hrasva̱mati̍dīrgham.
ati̍kṛśa̱matya̍ṃsalam.
ati̍śukla̱mati̍kṛṣṇam.
ati̍ślakṣṇa̱mati̍lomaśam.
ati̍kiriṭa̱mati̍danturam.
ati̍mirmira̱mati̍memiṣam.
ā̱śāyai̍ jā̱mim.
pra̱tī̱kṣāyai̍ kumā̱rīm..19..

Anuvāka 1

sa̱tyaṃ prapa̍dye.
ṛ̱taṃ prapa̍dye.
a̱mṛta̱ṃ prapa̍dye.
pra̱jāpa̍teḥ pri̱yāṃ ta̱nuva̱manā̎rtā̱ṃ prapa̍dye.
i̱dama̱haṃ pa̍ñcada̱śena̱ vajre̍ṇa.
dvi̱ṣanta̱ṃ bhrātṛ̍vya̱mava̍ krāmāmi.
yo̎'smāndveṣṭi̍.
yaṃ ca̍ va̱yaṃ dvi̱ṣmaḥ.
bhūrbhuva̱ḥ suva̍ḥ.
him..1..

Anuvāka 2

pra vo̱ vājā̍ a̱bhidya̍vaḥ.
ha̱viṣma̍nto ghṛ̱tācyā̎.
de̱vāñji̍gāti sumna̱yuḥ.
agna̱ āyā̍hi vī̱taye̎.
gṛ̱ṇā̱no ha̱vyadā̍taye.
ni hotā̍ sathsi ba̱ṟhiṣi̍.
taṃ tvā̍ sa̱midbhi̍raṅgiraḥ.
ghṛ̱tena̍ vardhayāmasi.
bṛ̱haccho̍cā yaviṣṭhya.
sa na̍ḥ pṛ̱thuḥ śra̱vāyyam̎..2..

acchā̍ deva vivāsasi.
bṛ̱hada̍gne su̱vīryam̎.
ī̱ḍenyo̍ nama̱sya̍sti̱raḥ.
tamā̍ṃsi darśa̱taḥ.
sama̱gniri̍dhyate̱ vṛṣā̎.
vṛṣo̍ a̱gniḥ sami̍dhyate.
aśvo̱ na de̍va̱vāha̍naḥ.
taṃ ha̱viṣma̍nta īḍate.
vṛṣa̍ṇaṃ tvā va̱yaṃ vṛṣan̍.
vṛṣā̍ṇa̱ḥ sami̍dhīmahi..3..

agne̱ dīdya̍taṃ bṛ̱hat.
a̱gniṃ dū̱taṃ vṛ̍ṇīmahe.
hotā̍raṃ vi̱śvave̍dasam.
a̱sya ya̱jñasya̍ su̱kratum̎.
sa̱mi̱dhyamā̍no adhva̱re.
a̱gniḥ pā̍va̱ka īḍya̍ḥ.
śo̱ciṣke̍śa̱stamī̍mahe.
sami̍ddho agna āhuta.
de̱vān ya̍kṣi svadhvara.
tvaṃ hi ha̍vya̱vāḍasi̍.
ā ju̍hota duva̱syata̍.
a̱gniṃ pra̍ya̱tya̍dhva̱re.
vṛ̱ṇī̱dhvaṃ ha̍vya̱vāha̍nam.
tvaṃ varu̍ṇa u̱ta mi̱tro a̍gne.
tvāṃ va̍rdhanti ma̱tibhi̱rvasi̍ṣṭhāḥ.
tve vasu̍ suṣaṇa̱nāni̍ santu.
yū̱yaṃ pā̍ta sva̱stibhi̱ḥ sadā̍ naḥ..4..

Anuvāka 3

agne̍ ma̱hāṃ a̍si brāhmaṇa bhārata.
asā̱vasau̎.
de̱veddho̱ manvi̍ddhaḥ.
ṛṣi̍ṣṭuto̱ viprā̍numaditaḥ.
ka̱vi̱śa̱sto brahma̍saṃśito ghṛ̱tāha̍vanaḥ.
pra̱ṇīrya̱jñānā̎m.
ra̱thīra̍dhva̱rāṇā̎m.
a̱tūrto̱ hotā̎.
tūrṇi̍rhavya̱vāṭ.
āspātra̍ṃ ju̱hūrde̱vānā̎m..5..

ca̱ma̱so de̍va̱pāna̍ḥ.
a̱rāṃ i̍vāgne ne̱mirde̱vāṃstvaṃ pa̍ri̱bhūra̍si.
ā va̍ha de̱vān yaja̍mānāya.
a̱gnima̍gna̱ āva̍ha.
soma̱māva̍ha.
a̱gnimāva̍ha.
pra̱jāpa̍ti̱māva̍ha.
a̱gnīṣomā̱vāva̍ha.
i̱ndrā̱gnī āva̍ha.
indra̱māva̍ha.
ma̱he̱ndramāva̍ha.
de̱vāṃ ā̎jya̱pāṃ āva̍ha.
a̱gniṃ ho̱trāyā''va̍ha.
svaṃ ma̍hi̱māna̱māva̍ha.
ā cā̎gne de̱vān vaha̍.
su̱yajā̍ ca yaja jātavedaḥ..6..

Anuvāka 4

a̱gnirhotā̱ vetva̱gniḥ.
ho̱traṃ ve̎ttu prāvi̱tram.
smo va̱yam.
sā̱dhu te̍ yajamāna de̱vatā̎.
ghṛ̱tava̍tīmadhvaryo̱ sruca̱māsya̍sva.
de̱vā̱yuva̍ṃ vi̱śvavā̍rām.
īḍā̍mahai de̱vāṃ ī̱ḍenyān̍.
na̱ma̱syāma̍ nama̱syān̍.
yajā̍ma ya̱jñiyān̍..7..

Anuvāka 5

sa̱midho̍ agna̱ ājya̍sya viyantu.
tanū̱napā̍dagna̱ ājya̍sya vetu.
i̱ḍo a̍gna̱ ājya̍sya viyantu.
ba̱ṟhira̍gna̱ ājya̍sya vetu.
svāhā̱'gnim.
svāhā̱ somam̎.
svāhā̱'gnim.
svāhā̎ pra̱jāpa̍tim.
svāhā̱'gnīṣomau̎.
svāhe̎ndrā̱gnī.
svāhendram̎.
svāhā̍ mahe̱ndram.
svāhā̍ de̱vāṃ ā̎jya̱pān.
svāhā̱'gniṃ ho̱trājju̍ṣā̱ṇāḥ.
agna̱ ājya̍sya viyantu..8..

Anuvāka 6

a̱gnirvṛ̱trāṇi̍ jaṅghanat.
dra̱vi̱ṇa̱syurvi̍pa̱nyayā̎.
sami̍ddhaḥ śu̱kra āhu̍taḥ.
ju̱ṣā̱ṇo a̱gnirājya̍sya vetu.
tvaṃ so̍māsi̱ satpa̍tiḥ.
tvaṃ rājo̱ta vṛ̍tra̱hā.
tvaṃ bha̱dro a̍si̱ kratu̍ḥ.
ju̱ṣā̱ṇaḥ soma̱ ājya̍sya ha̱viṣo̍ vetu.
a̱gniḥ pra̱tnena̱ janma̍nā.
śumbhā̍nasta̱nuva̱ṃ svām.
ka̱virvipre̍ṇa vāvṛdhe.
ju̱ṣā̱ṇo a̱gnirājya̍sya vetu.
soma̍ gī̱rbhiṣṭvā̍ va̱yam.
va̱rdhayā̍mo vaco̱vida̍ḥ.
su̱mṛ̱ḍī̱ko na̱ āvi̍śa.
ju̱ṣā̱ṇaḥ soma̱ ājya̍sya ha̱viṣo̍ vetu..9..

Anuvāka 7

a̱gnirmū̱rdhā di̱vaḥ ka̱kut.
pati̍ḥ pṛthi̱vyā a̱yam.
a̱pāṃ retā̍ṃsi jinvati.
bhuvo̍ ya̱jñasya̱ raja̍saśca ne̱tā.
yatrā̍ ni̱yudbhi̱ḥ saca̍se śi̱vābhi̍ḥ.
di̱vi mū̱rdhāna̍ṃ dadhiṣe suva̱ṟṣām.
ji̱hvāma̍gne cakṛṣe havya̱vāham̎.
prajā̍pate̱ na tvade̱tānya̱nyaḥ.
viśvā̍ jā̱tāni̱ pari̱ tā ba̍bhūva.
yatkā̍māste jahu̱mastaṃ no̍ astu..10..

va̱yaṃ syā̍ma̱ pata̍yo rayī̱ṇām.
sa ve̍da pu̱traḥ pi̱tara̱ṃ sa mā̱taram̎.
sa sū̱nurbhu̍va̱thsa bhu̍va̱tpuna̍rmaghaḥ.
sa dyāmaurṇo̍da̱ntari̍kṣa̱ṃ sa suva̍ḥ.
sa viśvā̱ bhuvo̍ abhava̱thsa ābha̍vat.
agnī̍ṣomā̱ save̍dasā.
sahū̍tī vanata̱ṅgira̍ḥ.
sande̍va̱trā ba̍bhūvathuḥ.
yu̱vame̱tāni̍ di̱vi ro̍ca̱nāni̍.
a̱gniśca̍ soma̱ sakra̍tū adhattam..11..

yu̱vaṃ sindhū̍ṃ ra̱bhiśa̍sterava̱dyāt.
agnī̍ṣomā̱vamu̍ñcataṃ gṛbhī̱tān.
indrā̎gnī roca̱nā di̱vaḥ.
pari̱ vāje̍ṣu bhūṣathaḥ.
tadvā̎ñceti̱ pravī̱ryam̎.
śñatha̍dvṛ̱tramu̱ta sa̍noti̱ vājam̎.
indrā̱ yo a̱gnī sahu̍rī sapa̱ryāt.
i̱ra̱jyantā̍ vasa̱vya̍sya̱ bhūre̎ḥ.
saha̍stamā̱ saha̍sā vāja̱yantā̎.
endra̍ sāna̱siṃ ra̱yim..12..

sa̱jitvā̍naṃ sadā̱saham̎.
varṣi̍ṣṭhamū̱taye̍ bhara.
prasa̍sāhiṣe puruhūta̱ śatrūn̍.
jyeṣṭha̍ste̱ śuṣma̍ i̱ha rā̱tira̍stu.
indrā bha̍ra̱ dakṣi̍ṇenā̱ vasū̍ni.
pati̱ḥ sindhū̍nāmasi re̱vatī̍nām.
ma̱hāṃ indro̱ ya oja̍sā.
pa̱rjanyo̍ vṛṣṭi̱māṃ i̍va.
stomai̎rva̱thsasya̍ vāvṛdhe.
ma̱hāṃ indro̍ nṛ̱vadāca̍rṣaṇi̱prāḥ..13..

u̱ta dvi̱barhā̍ ami̱naḥ saho̍bhiḥ.
a̱sma̱driya̍gvāvṛdhe vī̱ryā̍ya.
u̱ruḥ pṛ̱thuḥ sukṛ̍taḥ ka̱rtṛbhi̍rbhūt.
pi̱prī̱hi de̱vāṃ u̍śa̱to ya̍viṣṭha.
vi̱dvāṃ ṛ̱tūṃrṛ̍tupate yaje̱ha.
ye daivyā̍ ṛ̱tvija̱stebhi̍ragne.
tvaṃ hotṝ̍ṇāma̱syāya̍jiṣṭhaḥ.
a̱gniṃ svi̍ṣṭa̱kṛtam̎.
ayā̍ḍa̱gnira̱gneḥ pri̱yā dhāmā̍ni.
ayā̱ṭthsoma̍sya pri̱yā dhāmā̍ni..14..

ayā̍ḍa̱gneḥ pri̱yā dhāmā̍ni.
ayā̎ṭpra̱jāpa̍teḥ pri̱yā dhāmā̍ni.
ayā̍ḍa̱gnīṣoma̍yoḥ pri̱yā dhāmā̍ni.
ayā̍ḍindrāgni̱yoḥ pri̱yā dhāmā̍ni.
ayā̱ḍindra̍sya pri̱yā dhāmā̍ni.
ayā̎ṇmahe̱ndrasya̍ pri̱yā dhāmā̍ni.
ayā̎ḍde̱vānā̍mājya̱pānā̎ṃ pri̱yā dhāmā̍ni.
yakṣa̍da̱gnerhotu̍ḥ pri̱yā dhāmā̍ni.
yakṣa̱thsvaṃ ma̍hi̱mānam̎.
āya̍jatā̱mejyā̱ iṣa̍ḥ.
kṛ̱ṇotu̱ so a̍dhva̱rā jā̱tave̍dāḥ.
ju̱ṣatā̍ṃ ha̱viḥ.
agne̱ yada̱dya vi̱śo a̍dhvarasya hotaḥ.
pāva̍ka śoce̱ veṣṭvaṃ hi yajvā̎.
ṛ̱tā ya̍jāsi mahi̱nā viyadbhūḥ.
ha̱vyā va̍ha yaviṣṭha̱ yā te̍ a̱dya..15..

Anuvāka 8

upa̍hūtaṃ rathanta̱raṃ sa̱ha pṛ̍thi̱vyā.
upa̍ mā rathanta̱raṃ sa̱ha pṛ̍thi̱vyā hva̍yatām.
upa̍hūtaṃ vāmade̱vyaṃ sa̱hāntari̍kṣeṇa.
upa̍ mā vāmade̱vyaṃ sa̱hāntari̍kṣeṇa hvayatām.
upa̍hūtaṃ bṛ̱hathsa̱ha di̱vā.
upa̍ mā bṛ̱hathsa̱ha di̱vā hva̍yatām.
upa̍hūtāḥ sa̱pta hotrā̎ḥ.
upa̍ mā sa̱pta hotrā̎ hvayantām.
upa̍hūtā dhe̱nuḥ sa̱harṣa̍bhā.
upa̍ mā dhe̱nuḥ sa̱harṣa̍bhā hvayatām..16..

upa̍hūto bha̱kṣaḥ sakhā̎.
upa̍ mā bha̱kṣaḥ sakhā̎ hvayatām.
upa̍hū̱tām̐(4)ho.
iḍopa̍hūtā.
upa̍hū̱teḍā̎.
upo̍ a̱smāṃ iḍā̎ hvayatām.
iḍopa̍hūtā.
upa̍hū̱teḍā̎.
mā̱na̱vī ghṛ̱tapa̍dī maitrāvaru̱ṇī.
brahma̍ de̱vakṛ̍ta̱mupa̍hūtam..17..

daivyā̍ adhva̱ryava̱ upa̍hūtāḥ.
upa̍hūtā manu̱ṣyā̎ḥ.
ya i̱maṃ ya̱jñamavān̍.
ye ya̱jñapa̍ti̱ṃ vardhān̍.
upa̍hūte̱ dyāvā̍pṛthi̱vī.
pū̱rva̱je ṛ̱tāva̍rī.
de̱vī de̱vapu̍tre.
upa̍hūto̱'yaṃ yaja̍mānaḥ.
utta̍rasyāndevaya̱jyāyā̱mupa̍hūtaḥ.
bhūya̍si havi̱ṣkara̍ṇa̱ upa̍hūtaḥ.
di̱vye dhāma̱nnupa̍hūtaḥ.
i̱daṃ me̍ de̱vā ha̱virju̍ṣantā̱miti̱ tasmi̱nnupa̍hūtaḥ.
viśva̍masya pri̱yamupa̍hūtam.
viśva̍sya pri̱yasyopa̍hūta̱syopa̍hūtaḥ..18..

Anuvāka 9

de̱vaṃ ba̱ṟhiḥ.
va̱su̱vane̍ vasu̱dheya̍sya vetu.
de̱vo narā̱śaṃsa̍ḥ.
va̱su̱vane̍ vasu̱dheya̍sya vetu.
de̱vo a̱gniḥ svi̍ṣṭa̱kṛt.
su̱dravi̍ṇā ma̱ndraḥ ka̱viḥ.
sa̱tyama̍nmāya̱jī hotā̎.
hotu̍rhotu̱rāya̍jīyān.
agne̱ yānde̱vānayā̎ṭ.
yāṃ api̍preḥ.
ye te̍ ho̱tre ama̍thsata.
tāṃ sa̍sa̱nuṣī̱ṃ hotrā̎ndevaṅga̱mām.
di̱vi de̱veṣu̍ ya̱jñamera̍ye̱mam.
svi̱ṣṭa̱kṛccāgne̱ hotā'bhū̎ḥ.
va̱su̱vane̍ vasu̱dheya̍sya namovā̱ke vīhi̍..19..

Anuvāka 10

i̱daṃ dyā̍vāpṛthivī bha̱drama̍bhūt.
ārdhma̍ sūktavā̱kam.
u̱ta na̍movā̱kam.
ṛ̱dhyāsma̍ sū̱ktocya̍magne.
tvaṃ sū̎kta̱vāga̍si.
upa̍śrito di̱vaḥ pṛ̍thi̱vyoḥ.
oma̍nvatī te̱'smin ya̱jñe ya̍jamāna̱ dyāvā̍pṛthi̱vī stā̎m.
śa̱ṅga̱ye jī̱radā̍nū.
atra̍snū̱ apra̍vede.
u̱ruga̍vyūtī abhaya̱ṃ kṛtau̎..20..

vṛ̱ṣṭidyā̍vā rī̱tyā̍pā.
śa̱mbhuvau̍ mayo̱bhuvau̎.
ūrja̍svatī ca̱ paya̍svatī ca.
sū̱pa̱ca̱ra̱ṇā ca̍ svadhicara̱ṇā ca̍.
tayo̍rā̱vidi̍.
a̱gniri̱daṃ ha̱vira̍juṣata.
avī̍vṛdhata̱ maho̱ jyāyo̍'kṛta.
soma̍ i̱daṃha̱vira̍juṣata.
avī̍vṛdhata̱ maho̱ jyāyo̍'kṛta.
a̱gniri̱daṃ ha̱vira̍juṣata..21..

avī̍vṛdhata̱ maho̱ jyāyo̍'kṛta.
pra̱jāpa̍tiri̱daṃ ha̱vira̍juṣata.
avī̍vṛdhata̱ maho̱ jyāyo̍'kṛta.
a̱gnīṣomā̍vi̱daṃ ha̱vira̍juṣetām.
avī̍vṛdhetā̱ṃ maho̱ jyāyo̎'krātām.
i̱ndrā̱gnī i̱daṃ ha̱vira̍juṣetām.
avī̍vṛdhetā̱ṃ maho̱ jyāyo̎'krātām.
indra̍ i̱daṃ ha̱vira̍juṣata.
avī̍vṛdhata̱ maho̱ jyāyo̍'kṛta.
ma̱he̱ndra i̱daṃ ha̱vira̍juṣata..22..

avī̍vṛdhata̱ maho̱ jyāyo̍'kṛta.
de̱vā ā̎jya̱pā ājya̍majuṣanta.
avī̍vṛdhanta̱ maho̱ jyāyo̎'krata.
a̱gnirho̱treṇe̱daṃ ha̱vira̍juṣata.
avī̍vṛdhata̱ maho̱ jyāyo̍'kṛta.
a̱syāmṛdha̱ddhotrā̍yāndevaṅga̱māyā̎m.
āśā̎ste̱'yaṃ yaja̍māno̱'sau.
āyu̱rā śā̎ste.
su̱pra̱jā̱stvamā śā̎ste.
sa̱jā̱ta̱va̱na̱syāmā śā̎ste..23..

utta̍rāndevaya̱jyāmā śā̎ste.
bhūyo̍ havi̱ṣkara̍ṇa̱mā śā̎ste.
di̱vyaṃ dhāmā śā̎ste.
viśva̍ṃ pri̱yamā śā̎ste.
yada̱nena̍ ha̱viṣā''śā̎ste.
tada̍śyā̱ttadṛ̍dhyāt.
tada̍smai de̱vā rā̍santām.
tada̱gnirde̱vo de̱vebhyo̱ vana̍te.
va̱yama̱gnermānu̍ṣāḥ.
i̱ṣṭaṃ ca̍ vī̱taṃ ca̍.
u̱bhe ca̍ no̱ dyāvā̍pṛthi̱vī aṃha̍saspātām.
i̱ha gati̍rvā̱masye̱daṃ ca̍.
namo̍ de̱vebhya̍ḥ..24..

Anuvāka 11

taccha̱ṃ yorāvṛ̍ṇīmahe.
gā̱tuṃ ya̱jñāya̍.
gā̱tuṃ ya̱jñapa̍taye.
daivī̎ sva̱stira̍stu naḥ.
sva̱stirmānu̍ṣebhyaḥ.
ū̱rdhvaṃ ji̍gātu bheṣa̱jam.
śaṃ no̍ astu dvi̱pade̎.
śaṃ catu̍ṣpade..25..

Anuvāka 12

āpyā̍yasva̱ sante̎.
i̱ha tvaṣṭā̍ramagri̱yaṃ tanna̍stu̱rīpam̎.
de̱vānā̱ṃ patnī̍ruśa̱tīra̍vantu naḥ.
prāva̍ntu nastu̱jaye̱ vāja̍sātaye.
yāḥ pārthi̍vāso̱ yā a̱pāmapi̍ vra̱te.
tā no̍ devīḥ suhavā̱ḥ śarma̍ yacchata.
u̱ta gnā vi̍yantu de̱vapa̍tnīḥ.
i̱ndrā̱ṇya̍gnāyya̱śvinī̱ rāṭ.
ā roda̍sī varuṇā̱nī śṛ̍ṇotu.
vi̱yantu̍ de̱vīrya ṛ̱turjanī̍nām..26..

a̱gnirhotā̍ gṛ̱hapa̍ti̱ḥ sa rājā̎.
viśvā̍ veda̱ jani̍mā jā̱tave̍dāḥ.
de̱vānā̍mu̱ta yo martyā̍nām.
yaji̍ṣṭha̱ḥ sa pra ya̍jatāmṛ̱tāvā̎.
va̱yamu̍ tvā gṛhapate̱ janā̍nām.
agne̱ aka̍rma sa̱midhā̍ bṛ̱hantam̎.
a̱sthū̱ri ṇo̱ gārha̍patyāni santu.
ti̱gmena̍ na̱steja̍sā̱ saṃśi̍śādhi..27..

Anuvāka 13

daivyā̍ adhva̱ryava̱ upa̍hūtāḥ.
upa̍hūtā manu̱ṣyā̎ḥ.
ya i̱maṃ ya̱jñamavān̍.
ye ya̱jñapa̍tnī̱ṃ vardhān̍.
upa̍hūte̱ dyāvā̍pṛthi̱vī.
pū̱rva̱je ṛ̱tāva̍rī.
de̱vī de̱vapu̍tre.
upa̍hūte̱yaṃ yaja̍mānā.
i̱ndrā̱ṇīvā̍'vidha̱vā.
adi̍tiriva supu̱trā.
utta̍rasyāndevaya̱jyāyā̱mupa̍hūtā.
bhūya̍si havi̱ṣkara̍ṇa̱ upa̍hūtā.
di̱vye dhāma̱nnupa̍hūtā.
i̱daṃ me̍ de̱vā ha̱virju̍ṣantā̱miti̱ tasmi̱nnupa̍hūtā.
viśva̍masyāḥ pri̱yamupa̍hūtam.
viśva̍sya pri̱yasyopa̍hūta̱syopa̍hūtā..30..

Anuvāka 1

a̱ñjanti̱ tvāma̍dhva̱re de̍va̱yanta̍ḥ.
vana̍spate̱ madhu̍nā̱ daivye̍na.
yadū̱rdhvasti̍ṣṭhā̱ddravi̍ṇe̱ha dha̍ttāt.
yadvā̱ kṣayo̍ mā̱tura̱syā u̱pasthe̎.
ucchra̍yasva vanaspate.
varṣma̍npṛthi̱vyā adhi̍.
sumi̍tī mī̱yamā̍naḥ.
varco̍dhā ya̱jñavā̍hase.
sami̍ddhasya̱ śraya̍māṇaḥ pu̱rastā̎t.
brahma̍ vanvā̱no a̱jara̍ṃ su̱vīram̎..1..

ā̱re a̱smadama̍ti̱ṃ bādha̍mānaḥ.
ucchra̍yasva maha̱te saubha̍gāya.
ū̱rdhva ū̱ ṣu ṇa̍ ū̱taye̎.
tiṣṭhā̍ de̱vo na sa̍vi̱tā.
ū̱rdhvo vāja̍sya̱ sani̍tā̱ yada̱ñjibhi̍ḥ.
vā̱ghadbhi̍rvi̱hvayā̍mahe.
ū̱rdhvo na̍ḥ pā̱hyaṃha̍so̱ ni ke̱tunā̎.
viśva̱ṃ sama̱triṇa̍ṃ daha.
kṛ̱dhī na̍ ū̱rdhvāṃ ca̱ rathā̍ya jī̱vase̎.
vi̱dā de̱veṣu̍ no̱ duva̍ḥ..2..

jā̱to jā̍yate sudina̱tve ahnā̎m.
sama̱rya ā vi̱dathe̱ vardha̍mānaḥ.
pu̱nanti̱ dhīrā̍ a̱paso̍ manī̱ṣā.
de̱va̱yā vipra̱ udi̍yarti̱ vācam̎.
yuvā̍ su̱vāsā̱ḥ pari̍vīta̱ āgā̎t.
sa u̱ śreyā̎nbhavati̱ jāya̍mānaḥ.
taṃ dhīrā̍saḥ ka̱vaya̱ unna̍yanti.
svā̱dhiyo̱ mana̍sā deva̱yanta̍ḥ.
pṛ̱thu̱pājā̱ ama̍rtyaḥ.
ghṛ̱tani̍rṇi̱khsvā̍hutaḥ.
a̱gnirya̱jñasya̍ havya̱vāṭ.
taṃ sa̱bādho̍ ya̱taḥ sru̍caḥ.
i̱tthā dhi̱yā ya̱jñava̍ntaḥ.
āca̍krura̱gnimū̱taye̎.
tvaṃ varu̍ṇa u̱ta mi̱tro a̍gne.
tvāṃ va̍rdhanti ma̱tibhi̱rvasi̍ṣṭhāḥ.
tve vasu̍ suṣaṇa̱nāni̍ santu.
yū̱yaṃ pā̍ta sva̱stibhi̱ḥ sadā̍ naḥ..3..

Anuvāka 2

hotā̍ yakṣada̱gniṃ sa̱midhā̍ suṣa̱midhā̱ sami̍ddha̱ṃ nābhā̍ pṛthi̱vyāḥ sa̍ṅga̱the vā̱masya̍.
varṣma̍ndi̱va i̱ḍaspa̱de vetvā''jya̍sya̱ hota̱ryaja̍.
hotā̍ yakṣa̱ttanū̱napā̍ta̱madi̍te̱rgarbha̱ṃ bhuva̍nasya go̱pām.
madhvā̱dya de̱vo de̱vebhyo̍ deva̱yānā̎npa̱tho a̍naktu̱ vetvā''jya̍sya̱ hota̱ryaja̍.
hotā̍ yakṣa̱nnarā̱śaṃsa̍ṃ nṛśa̱straṃ nṝḥ pra̍ṇetram.
gobhi̍rva̱pāvā̱nthsyādvī̱raiḥ śaktī̍vā̱nrathai̎ḥ prathama̱yā vā̱ hira̍ṇyaiśca̱ndrī vetvā''jya̍sya̱ hota̱ryaja̍.
hotā̍ yakṣada̱gnimi̱ḍa ī̍ḍi̱to de̱vo de̱vāṃ āva̍kṣaddū̱to ha̍vya̱vāḍamū̍raḥ.
upe̱maṃ ya̱jñamupe̱māṃ de̱vo de̱vahū̍timavatu̱ vetvā''jya̍sya̱ hota̱ryaja̍.
hotā̍ yakṣadba̱ṟhiḥ su̱ṣṭarī̱morṇa̍mradā a̱smin ya̱jñe vi ca̱ pra ca̍ prathatāṃ svāsa̱sthaṃ de̱vebhya̍ḥ.
eme̍nada̱dya vasa̍vo ru̱drā ā̍di̱tyāḥ sa̍dantu pri̱yamindra̍syāstu̱ vetvā''jya̍sya̱ hota̱ryaja̍..4..

hotā̍ yakṣa̱ddura̍ ṛ̱ṣvāḥ ka̍va̱ṣyo ko̍ṣadhāvanī̱rudātā̍bhī̱rjiha̍tā̱ṃ vipakṣo̍bhiḥ śrayantām.
su̱prā̱ya̱ṇā a̱smin ya̱jñe viśra̍yantāmṛtā̱vṛdho̍ vi̱yantvājya̍sya̱ hota̱ryaja̍.
hotā̍ yakṣadu̱ṣāsā̱naktā̍ bṛha̱tī su̱peśa̍sā̱ nṝḥ pati̍bhyo̱ yoni̍ṃ kṛṇvā̱ne.
sa̱ṃsmaya̍māne̱ indre̍ṇa de̱vairedaṃ ba̱ṟhiḥ sī̍datāṃ vī̱tāmājya̍sya̱ hota̱ryaja̍.
hotā̍ yakṣa̱ddaivyā̱ hotā̍rā ma̱ndrā potā̍rā ka̱vī prace̍tasā.
svi̍ṣṭama̱dyānyaḥ ka̍radi̱ṣā sva̍bhigūrtama̱nya ū̱rjā sata̍vase̱maṃ ya̱jñaṃ di̱vi de̱veṣu̍ dhattāṃ vī̱tāmājya̍sya̱ hota̱ryaja̍.
hotā̍ yakṣatti̱sro de̱vīra̱pasā̍ma̱pasta̍mā̱ acchi̍drama̱dyedamapa̍stanvatām.
de̱vebhyo̍ de̱vīrde̱vamapo̍ vi̱yantvājya̍sya̱ hota̱ryaja̍.
hotā̍ yakṣa̱ttvaṣṭā̍ra̱maci̍ṣṭu̱mapā̍kaṃ reto̱dhāṃ viśra̍vasaṃ yaśo̱dhām.
pu̱ru̱rūpa̱makā̍makarśanaṃ su̱poṣa̱ḥ poṣai̱ḥ syāthsu̱vīro̍ vī̱rairvetvā''jya̍sya̱ hota̱ryaja̍.
hotā̍ yakṣa̱dvana̱spati̍mu̱pāva̍srakṣaddhi̱yo jo̱ṣṭāra̍ṃ śa̱śama̱nnara̍ḥ.
svadā̱thsvadhi̍tirṛtu̱thādya de̱vo de̱vebhyo̍ ha̱vyāvā̱ḍvetvā''jya̍sya̱ hota̱ryaja̍.
hotā̍ yakṣada̱gniṃ svāhā''jya̍sya̱ svāhā̱ meda̍sa̱ḥ svāhā̎ sto̱kānā̱ṃ svāhā̱ svāhā̍kṛtīnā̱ṃ svāhā̍ ha̱vyasū̎ktīnām.
svāhā̍ de̱vāṃ ā̎jya̱pānthsvāhā̱'gniṃ ho̱trājju̍ṣā̱ṇā agna̱ ājya̍sya viyantu̱ hota̱ryaja̍..5..

Anuvāka 3

sami̍ddho a̱dya manu̍ṣo duro̱ṇe.
de̱vo de̱vān ya̍jasi jātavedaḥ.
ā ca̱ vaha̍ mitramahaściki̱tvān.
tvaṃ dū̱taḥ ka̱vira̍si̱ prace̍tāḥ.
tanū̍napātpa̱tha ṛ̱tasya̱ yānān̍.
madhvā̍ sama̱ñjanthsva̍dayā sujihva.
manmā̍ni dhī̱bhiru̱ta ya̱jñamṛ̱ndhan.
de̱va̱trā ca̍ kṛṇuhyadhva̱raṃ na̍ḥ.
narā̱śaṃsa̍sya mahi̱māna̍meṣām.
upa̍ stoṣāma yaja̱tasya̍ ya̱jñaiḥ..6..

te su̱krata̍va̱ḥ śuca̍yo dhiya̱ndhāḥ.
svada̍ntu de̱vā u̱bhayā̍ni ha̱vyā.
ā̱juhvā̍na̱ īḍyo̱ vandya̍śca.
āyā̎hyagne̱ vasu̍bhiḥ sa̱joṣā̎ḥ.
tvaṃ de̱vānā̍masi yahva̱ hotā̎.
sa e̍nān yakṣīṣi̱to yajī̍yān.
prā̱cīna̍ṃ ba̱ṟhiḥ pra̱diśā̍ pṛthi̱vyāḥ.
vasto̍ra̱syā vṛ̍jyate̱ agre̱ ahnā̎m.
vyu̍ prathate vita̱raṃ varī̍yaḥ.
de̱vebhyo̱ adi̍taye syo̱nam..7..

vyaca̍svatīrurvi̱yā viśra̍yantām.
pati̍bhyo̱ na jana̍ya̱ḥ śumbha̍mānāḥ.
devī̎rdvāro bṛhatīrviśvaminvāḥ.
de̱vebhyo̍ bhavatha suprāya̱ṇāḥ.
āsu̱ṣvaya̍ntī yaja̱te upā̍ke.
u̱ṣāsā̱naktā̍ sadatā̱ṃ ni yonau̎.
di̱vye yoṣa̍ṇe bṛha̱tī su̍ru̱kme.
adhi̱ śriya̍ṃ śukra̱piśa̱ṃ dadhā̍ne.
daivyā̱ hotā̍rā pratha̱mā su̱vācā̎.
mimā̍nā ya̱jñaṃ manu̍ṣo̱ yaja̍dhyai..8..

pra̱co̱daya̍ntā vi̱dathe̍ṣu kā̱rū.
prā̱cīna̱ṃ jyoti̍ḥ pra̱diśā̍ di̱śantā̎.
ā no̍ ya̱jñaṃ bhāra̍tī̱ tūya̍metu.
iḍā̍ manu̱ṣvadi̱ha ce̱taya̍ntī.
ti̱sro de̱vīrba̱ṟhiredaṃ syo̱nam.
sara̍svatī̱ svapa̍saḥ sadantu.
ya i̱me dyāvā̍pṛthi̱vī jani̍trī.
rū̱pairapi̍ṃśa̱dbhuva̍nāni̱ viśvā̎.
tama̱dya ho̍tariṣi̱to yajī̍yān.
de̱vaṃ tvaṣṭā̍rami̱ha ya̍kṣi vi̱dvān..9..

u̱pāva̍sṛja̱tmanyā̍ sama̱ñjan.
de̱vānā̱ṃ pātha̍ ṛtu̱thā ha̱vīṃṣi̍.
vana̱spati̍ḥ śami̱tā de̱vo a̱gniḥ.
svada̍ntu ha̱vyaṃ madhu̍nā ghṛ̱tena̍.
sa̱dyo jā̱to vya̍mimīta ya̱jñam.
a̱gnirde̱vānā̍mabhavatpuro̱gāḥ.
a̱sya hotu̍ḥ pra̱diśyṛ̱tasya̍ vā̱ci.
svāhā̍kṛtaṃ ha̱vira̍dantu de̱vāḥ..10..

Anuvāka 4

a̱gnirhotā̍ no adhva̱re.
vā̱jī sanpari̍ṇīyate.
de̱vo de̱veṣu̍ ya̱jñiya̍ḥ.
pari̍trivi̱ṣṭya̍dhva̱ram.
yātya̱gnī ra̱thīri̍va.
ā de̱veṣu̱ prayo̱ dadha̍t.
pari̱ vāja̍patiḥ ka̱viḥ.
a̱gnirha̱vyānya̍kramīt.
dadha̱dratnā̍ni dā̱śuṣe̎..11..

Anuvāka 5

ajai̍da̱gniḥ.
asa̍na̱dvāja̱nni.
de̱vo de̱vebhyo̍ ha̱vyāvā̎ṭ.
prāñjo̍bhirhinvā̱naḥ.
dhenā̍bhi̱ḥ kalpa̍mānaḥ.
ya̱jñasyāyu̍ḥ prati̱ran.
upa̱ preṣya̍ hotaḥ.
ha̱vyā de̱vebhya̍ḥ..12..

Anuvāka 6

daivyā̎ḥ śamitāra u̱ta ma̍nuṣyā̱ āra̍bhadhvam.
upa̍nayata̱ medhyā̱ dura̍ḥ.
ā̱śāsā̍nā̱ medha̍patibhyā̱ṃ medham̎.
prāsmā̍ a̱gniṃ bha̍rata.
stṛ̱ṇī̱ta ba̱ṟhiḥ.
anve̍naṃ mā̱tā ma̍nyatām.
anu̍ pi̱tā.
anu̱ bhrātā̱ saga̍rbhyaḥ.
anu̱ sakhā̱ sayū̎thyaḥ.
u̱dī̱cīnā̍ṃ asya pa̱do nidha̍ttāt..13..

sūrya̱ṃ cakṣu̍rgamayatāt.
vāta̍ṃ prā̱ṇama̱nvava̍sṛjatāt.
diśa̱ḥ śrotram̎.
a̱ntari̍kṣa̱masum̎.
pṛ̱thi̱vīṃ śarī̍ram.
e̱ka̱dhā'sya̱ tvaca̱mācchya̍tāt.
pu̱rā nābhyā̍ api̱śaso̍ va̱pāmutkhi̍datāt.
a̱ntare̱voṣmāṇa̍ṃ vārayatāt.
śye̱nama̍sya̱ vakṣa̍ḥ kṛṇutāt.
pra̱śasā̍ bā̱hū..14..

śa̱lā do̱ṣaṇī̎.
ka̱śyape̱vāṃsā̎.
acchi̍dre̱ śroṇī̎.
ka̱vaṣo̱rū sre̱kapa̍rṇāṣṭhī̱vantā̎.
ṣaḍvi̍ṃśatirasya̱ vaṅkra̍yaḥ.
tā a̍nu̱ṣṭhyoccyā̍vayatāt.
gātra̍ṃ gātrama̱syānū̍naṃ kṛṇutāt.
ū̱va̱dhya̱go̱haṃ pārthi̍vaṃ khanatāt.
a̱snā rakṣa̱ḥ saṃsṛ̍jatāt.
va̱ni̱ṣṭhuma̍sya̱ mā rā̍viṣṭa..15..

urū̍ka̱ṃ manya̍mānāḥ.
nedva̍sto̱ke tana̍ye.
ravi̍tā̱rava̍cchamitāraḥ.
adhri̍go śamī̱dhvam.
su̱śami̍ śamīdhvam.
śa̱mī̱dhvama̍dhrigo.
adhri̍gu̱ścāpā̍paśca.
u̱bhau de̱vānā̍ṃ śami̱tārau̎.
tāvi̱maṃ pa̱śūṃ śra̍payatāṃ pravi̱dvāṃsau̎.
yathā̍yathā'sya̱ śrapa̍ṇa̱ntathā̍tathā..16..

Anuvāka 7

ju̱ṣasva̍ sa̱pratha̍stamam.
vaco̍ de̱vaphsa̍rastamam.
ha̱vyā juhvā̍na ā̱sani̍.
i̱maṃ no̍ ya̱jñama̱mṛte̍ṣu dhehi.
i̱mā ha̱vyā jā̍tavedo juṣasva.
sto̱kānā̍magne̱ meda̍so ghṛ̱tasya̍.
hota̱ḥ prāśā̍na pratha̱mo ni̱ṣadya̍.
ghṛ̱tava̍ntaḥ pāvaka te.
sto̱kāḥ śco̍tanti̱ meda̍saḥ.
svadha̍rmaṃ de̱vavī̍taye..17..

śreṣṭha̍ṃ no dhehi̱ vāryam̎.
tubhya̍ṃ sto̱kā ghṛ̍ta̱ścuta̍ḥ.
agne̱ viprā̍ya santya.
ṛṣi̱ḥ śreṣṭha̱ḥ sami̍dhyase.
ya̱jñasya̍ prāvi̱tā bha̍va.
tubhya̍ṃ ścotantyadhrigo śacīvaḥ.
sto̱kāso̍ agne̱ meda̍so ghṛ̱tasya̍.
ka̱vi̱śa̱sto bṛ̍ha̱tā bhā̱nunāgā̎ḥ.
ha̱vyā ju̍ṣasva medhira.
oji̍ṣṭhante madhya̱to meda̱ udbhṛ̍tam.
pra te̍ va̱yaṃ da̍dāmahe.
ścota̍nti te vaso sto̱kā adhi̍tva̱ci.
prati̱ tānde̍va̱śovi̍hi..18..

Anuvāka 8

āvṛ̍trahaṇā vṛtra̱habhi̱ḥ śuṣmai̎ḥ.
indra̍ yā̱tannamo̍bhiragne a̱rvāk.
yu̱vaṃ rādho̍bhi̱raka̍vebhirindra.
agne̍ a̱sme bha̍vatamutta̱mebhi̍ḥ.
hotā̍ yakṣadindrā̱gnī.
chāga̍sya va̱pāyā̱ meda̍saḥ.
ju̱ṣetā̍ṃ ha̱viḥ.
hota̱ryaja̍.
vihyakhya̱nmana̍sā̱ vasya̍ i̱cchan.
indrā̎gnī jñā̱sa u̱ta vā̍ sajā̱tān..19..{vā̍}%for spacing!
nānyā yu̱vatprama̍tirasti̱ mahyam̎.
sa vā̱ṃ dhiya̍ṃ vāja̱yantī̍matakṣam.
hotā̍ yakṣadindrā̱gnī.
pu̱ro̱ḍāśa̍sya ju̱ṣetā̍ṃ ha̱viḥ.
hota̱ryaja̍.
tvāmī̍ḍate aji̱raṃ dū̱tyā̍ya.
ha̱viṣma̍nta̱ḥ sada̱minmānu̍ṣāsaḥ.
yasya̍ de̱vairāsa̍do ba̱ṟhira̍gne.
ahā̎nyasmai su̱dinā̍ bhavantu.
hotā̍ yakṣada̱gnim.
pu̱ro̱ḍāśa̍sya ju̱ṣatā̍ṃ ha̱viḥ.
hota̱ryaja̍..20..

Anuvāka 9

gī̱rbhirvipra̱ḥ prama̍timi̱cchamā̍naḥ.
īṭṭe̍ ra̱yiṃ ya̱śasa̍ṃ pūrva̱bhājam̎.
indrā̎gnī vṛtrahaṇā suvajrā.
pra ṇo̱ navye̍bhistirataṃ de̱ṣṇaiḥ.
mācche̎dma ra̱śmīṃriti̱ nādha̍mānāḥ.
pi̱tṛ̱ṇāṃ śaktī̍ranu̱yaccha̍mānāḥ.
i̱ndrā̱gnibhyā̱ṃ kaṃ vṛṣa̍ṇo madanti.
tāhyadrī̍ dhi̱ṣaṇā̍yā u̱pasthe̎.
a̱gniṃ su̍dī̱tiṃ su̱dṛśa̍ṃ gṛ̱ṇanta̍ḥ.
na̱ma̱syāma̱stveḍya̍ṃ jātavedaḥ.
tvāṃ dū̱tama̍ra̱tiṃ ha̍vya̱vāham̎.
de̱vā a̍kṛṇvanna̱mṛta̍sya̱ nābhim̎..21..

Anuvāka 10

tvaṃ hya̍gne pratha̱mo ma̱notā̎.
a̱syā dhi̱yo abha̍vo dasma̱hotā̎.
tvaṃ sīṃ vṛṣannakṛṇordu̱ṣṭarī̍tu.
saho̱ viśva̍smai̱ saha̍se̱ saha̍dhyai.
adhā̱ hotā̱ nya̍sīdo̱ yajī̍yān.
i̱ḍaspa̱da i̱ṣaya̱nnīḍya̱ḥ san.
taṃ tvā̱ nara̍ḥ pratha̱maṃ de̍va̱yanta̍ḥ.
ma̱ho rā̱ye ci̱taya̍nto̱ anu̍gman.
vṛ̱teva̱ yanta̍ṃ ba̱hubhi̍rvasa̱vyai̎ḥ.
tve ra̱yiṃ jā̍gṛ̱vāṃso̱ anu̍gman..22..

ruśa̍ntama̱gniṃ da̍rśa̱taṃ bṛ̱hantam̎.
va̱pāva̍ntaṃ vi̱śvahā̍ dīdi̱vāṃsam̎.
pa̱daṃ de̱vasya̱ nama̍sā vi̱yanta̍ḥ.
śra̱va̱syava̱ḥ śrava̍ āpa̱nnamṛ̍ktam.
nāmā̍ni ciddadhire ya̱jñiyā̍ni.
bha̱drāyāṃ te raṇayanta̱ sandṛ̍ṣṭau.
tvāṃ va̍rdhanti kṣi̱taya̍ḥ pṛthi̱vyām.
tvaṃ rāya̍ u̱bhayā̍so̱ janā̍nām.
tvaṃ trā̱tā ta̍raṇe̱ cetyo̍'bhūḥ.
pi̱tā mā̱tā sada̱minmānu̍ṣāṇām..23..

sapa̱ryeṇya̱ḥ sa pri̱yo vi̱kṣva̍gniḥ.
hotā̍ ma̱ndro niṣa̍sādā̱ yajī̍yān.
taṃ tvā̍ va̱yaṃ dama̱ ā dī̍di̱vāṃsam̎.
upa̍jñu̱bādho̱ nama̍sā sadema.
taṃ tvā̍ va̱yaṃ su̱dhiyo̱ navya̍magne.
su̱mnā̱yava̍ īmahe deva̱yanta̍ḥ.
tvaṃ viśo̍ anayo̱ dīdyā̍naḥ.
di̱vo a̍gne bṛha̱tā ro̍ca̱nena̍.
vi̱śāṃ ka̱viṃ vi̱śpati̱ṃ śaśva̍tīnām.
ni̱tośa̍naṃ vṛṣa̱bhaṃ ca̍rṣaṇī̱nām..24..

pretī̍ṣaṇi mi̱ṣaya̍ntaṃ pāva̱kam.
rāja̍ntama̱gniṃ ya̍ja̱taṃ ra̍yī̱ṇām.
so a̍gna īje śaśa̱me ca̱ marta̍ḥ.
yasta̱ āna̍ṭthsa̱midhā̍ ha̱vyadā̍tim.
ya āhu̍ti̱ṃ pari̱ vedā̱ namo̍bhiḥ.
viśvethsavā̱mā da̍dhate̱ tvota̍ḥ.
a̱smā u̍ te̱ mahi̍ ma̱he vi̍dhema.
namo̍bhiragne sa̱midho̱ta ha̱vyaiḥ.
vedī̍sūno sahaso gī̱rbhiru̱kthaiḥ.
ā te̍ bha̱drāyā̍ṃ suma̱tau ya̍tema..25..

ā yasta̱tantha̱ roda̍sī̱ vibhā̱sā.
śravo̍bhiśca śrava̱sya̍staru̍traḥ.
bṛ̱hadbhi̱rvājai̱ḥ sthavi̍rebhira̱sme.
re̱vadbhi̍ragne vita̱raṃ vi bhā̍hi.
nṛ̱vadva̍so̱ sada̱middhe̎hya̱sme.
bhūri̍to̱kāya̱ tana̍yāya pa̱śvaḥ.
pū̱rvīriṣo̍ bṛha̱tīrā̱re a̍ghāḥ.
a̱sme bha̱drā sau̎śrava̱sāni̍ santu.
pu̱rūṇya̍gne puru̱dhā tvā̱yā.
vasū̍ni rājanva̱sutā̍te aśyām.
pu̱rūṇi̱ hi tve pu̍ruvāra̱ santi̍.
agne̱ vasu̍ vidha̱te rāja̍ni̱tve..26..

Anuvāka 11

ābha̍rataṃ śikṣataṃ vajrabāhū.
a̱smāṃ i̍ndrāgnī avata̱ṃ śacī̍bhiḥ.
i̱me nu te ra̱śmaya̱ḥ sūrya̍sya.
yebhi̍ḥ sapi̱tvaṃ pi̱taro̍ na̱ āyan̍.
hotā̍ yakṣadindrā̱gnī.
chāga̍sya ha̱viṣa̱ āttā̍ma̱dya.
ma̱dhya̱to meda̱ udbhṛ̍tam.
pu̱rā dveṣo̎bhyaḥ.
pu̱rā pauru̍ṣeyyā gṛ̱bhaḥ.
ghastā̎nnū̱nam..27..

ghā̱se a̍jrāṇā̱ṃ yava̍saprathamānām.
su̱matkṣa̍rāṇāṃ śa̱taru̍driyāṇām.
a̱gni̱ṣvā̱ttānā̱ṃ pīvo̍pavasanānām.
pā̱rśva̱taḥ śro̍ṇi̱taḥ śi̍tāma̱ta u̍thsāda̱taḥ.
aṅgā̍daṅgā̱dava̍ttānām.
kara̍ta e̱vendrā̱gnī.
ju̱ṣetā̍ṃ ha̱viḥ.
hota̱ryaja̍.
de̱vebhyo̍ vanaspate ha̱vīṃṣi̍.
hira̍ṇyaparṇa pra̱diva̍ste̱ artham̎..28..

pra̱da̱kṣi̱ṇidra̍śa̱nayā̍ ni̱yūya̍.
ṛ̱tasya̍ vakṣi pa̱thibhī̱ raji̍ṣṭhaiḥ.
hotā̍ yakṣa̱dvana̱spati̍ma̱bhihi.
pi̱ṣṭata̍mayā̱ rabhi̍ṣṭhayā raśa̱nayādhi̍ta.
yatre̎ndrāgni̱yośchāga̍sya ha̱viṣa̍ḥ pri̱yā dhāmā̍ni.
yatra̱ vana̱spate̎ḥ pri̱yā pāthā̍ṃsi.
yatra̍ de̱vānā̍mājya̱pānā̎ṃ pri̱yā dhāmā̍ni.
yatrā̱gnerhotu̍ḥ pri̱yā dhāmā̍ni.
tatrai̱taṃ pra̱stutye̍vopa̱stutye̍ vo̱pāva̍srakṣat.
rabhī̍yāṃsamiva kṛ̱tvī..29..

kara̍de̱vaṃ de̱vo vana̱spati̍ḥ.
ju̱ṣatā̍ṃ ha̱viḥ.
hota̱ryaja̍.
pi̱prī̱hi de̱vāṃ u̍śa̱to ya̍viṣṭha.
vi̱dvāṃ ṛ̱tūṃrṛ̍tupate yaje̱ha.
ye daivyā̍ ṛ̱tvija̱stebhi̍ragne.
tvaṃ hotṝ̍ṇāma̱syāya̍jiṣṭhaḥ.
hotā̍ yakṣada̱gniṃ svi̍ṣṭa̱kṛtam̎.
ayā̍ḍa̱gniri̍ndrāgni̱yośchāga̍sya ha̱viṣa̍ḥ pri̱yā dhāmā̍ni.
ayā̱ḍvana̱spate̎ḥ pri̱yā pāthā̍ṃsi.
ayā̎ḍde̱vānā̍mājya̱pānā̎ṃ pri̱yā dhāmā̍ni.
yakṣa̍da̱gnerhotu̍ḥ pri̱yā dhāmā̍ni.
yakṣa̱thsvaṃ ma̍hi̱mānam̎.
āya̍jatā̱mejyā̱ iṣa̍ḥ.
kṛ̱ṇotu̱ so a̍dhva̱rā jā̱tave̍dāḥ.
ju̱ṣatā̍ṃ ha̱viḥ.
hota̱ryaja̍..30..

Anuvāka 12

upo̍ ha̱ yadvi̱datha̍ṃ vā̱jino̱ gūḥ.
gī̱rbhirviprā̱ḥ prama̍timi̱cchamā̍nāḥ.
a̱rvanto̱ na kāṣṭhā̱nnakṣa̍māṇāḥ.
i̱ndrā̱gnī johu̍vato̱ nara̱ste.
vana̍spate raśa̱nayā̍'bhi̱dhāya̍.
pi̱ṣṭata̍mayā va̱yunā̍ni vi̱dvān.
vaha̍ deva̱trā di̍dhiṣo ha̱vīṃṣi̍.
pra ca̍dā̱tāra̍ma̱mṛte̍ṣu vocaḥ.
a̱gniṃ svi̍ṣṭa̱kṛtam̎.
ayā̍ḍa̱gniri̍ndrāgni̱yośchāga̍sya ha̱viṣa̍ḥ pri̱yā dhāmā̍ni..31..

ayā̱ḍvana̱spate̎ḥ pri̱yā pāthā̍ṃsi.
ayā̎ḍde̱vānā̍mājya̱pānā̎ṃ pri̱yā dhāmā̍ni.
yakṣa̍da̱gnerhotu̍ḥ pri̱yā dhāmā̍ni.
yakṣa̱thsvaṃ ma̍hi̱mānam̎.
āya̍jatā̱mejyā̱ iṣa̍ḥ.
kṛ̱ṇotu̱ so a̍dhva̱rā jā̱tave̍dāḥ.
ju̱ṣatā̍ṃ ha̱viḥ.
agne̱ yada̱dya vi̱śo a̍dhvarasya hotaḥ.
pāva̍ka śoce̱ veṣṭvaṃ hi yajvā̎.
ṛ̱tā ya̍jāsi mahi̱nā viyadbhūḥ.
ha̱vyā va̍ha yaviṣṭha̱ yā te̍ a̱dya..32..

Anuvāka 13

de̱vaṃ ba̱ṟhiḥ su̍de̱vaṃ de̱vaiḥ syāthsu̱vīra̍ṃ vī̱rairvasto̎rvṛ̱jyetā̱ktoḥ prabhri̍ye̱tātya̱nyānrā̱yā ba̱ṟhiṣma̍to madema vasu̱vane̍ vasu̱dheya̍sya vetu̱ yaja̍.
de̱vīrdvāra̍ḥ saṅghā̱te vi̱ḍvīryāma̍ñchithi̱rā dhru̱vā de̱vahū̍tau va̱thsa ī̍menā̱staru̍ṇa̱ āmi̍mīyātkumā̱ro vā̱ nava̍jāto̱ mainā̱ arvā̍ re̱ṇuka̍kāṭa̱ḥ pṛṇa̍gvasu̱vane̍ vasu̱dheya̍sya viyantu̱ yaja̍.
de̱vī u̱ṣāsā̱naktā'dyā̱smin ya̱jñe pra̍ya̱tya̍hvetā̱mapi̍ nū̱naṃ daivī̱rviśa̱ḥ prāyā̍siṣṭā̱ṃ suprī̍te̱ sudhi̍te vasu̱vane̍ vasu̱dheya̍sya vītā̱ṃ yaja̍.
de̱vī joṣṭrī̱ vasu̍dhitī̱ yayo̍ra̱nyā'ghāddveṣā̍ṃsi yu̱yava̱dānyāva̍kṣa̱dvasu̱ vāryā̍ṇi̱ yaja̍mānāya vasu̱vane̍ vasu̱dheya̍sya vītā̱ṃ yaja̍.
de̱vī ū̱rjāhu̍tī̱ iṣa̱mūrja̍ma̱nyāva̍kṣa̱thsagdhi̱ṃ sapī̍tima̱nyā nave̍na̱ pūrva̱ṃ daya̍mānā̱ḥ syāma̍ purā̱ṇena̱ nava̱ṃ tāmūrja̍mū̱rjāhu̍tī ū̱rjaya̍māne adhātāṃ vasu̱vane̍ vasu̱dheya̍sya vītā̱ṃ yaja̍.
de̱vā daivyā̱ hotā̍rā̱ neṣṭā̍rā̱ potā̍rā ha̱tāgha̍śaṃsāvābha̱radva̍sū vasu̱vane̍ vasu̱dheya̍sya vītā̱ṃ yaja̍.
de̱vīsti̱srasti̱sro de̱vīriḍā̱ sara̍svatī̱ bhāra̍tī̱ dyāṃ bhāra̍tyādi̱tyaira̍spṛkṣa̱thsara̍svatī̱maṃ ru̱drairya̱jñamā̍vīdi̱haiveḍa̍yā̱ vasu̍matyā sadha̱māda̍ṃ madema vasu̱vane̍ vasu̱dheya̍sya viyantu̱ yaja̍.
de̱vo narā̱śaṃsa̍striśī̱ṟṣā ṣa̍ḍa̱kṣaḥ śa̱tamide̍naṃśitipṛ̱ṣṭhā āda̍dhati sa̱hasra̍mī̱ṃ prava̍hanti mi̱trāvaru̱ṇeda̍sya ho̱tramarha̍to̱ bṛha̱spati̍ḥ sto̱trama̱śvinā''dhva̍ryavaṃ vasu̱vane̍ vasu̱dheyasya̍ vetu̱ yaja̍.
de̱vo vana̱spati̍rva̱ṟṣaprā̍vā ghṛ̱tani̍rṇi̱gdyāmagre̱ṇāspṛ̍kṣa̱dāntari̍kṣa̱ṃ madhye̍nāprāḥ pṛthi̱vīmupa̍reṇādṛṃhīdvasu̱vane̍ vasu̱dheya̍sya vetu̱ yaja̍.
de̱vaṃ ba̱ṟhirvāri̍tīnāṃ ni̱dhedhā̍'si̱ pracyu̍tīnā̱mapra̍cyutannikāma̱dhara̍ṇaṃ puruspā̱ṟhaṃ yaśa̍svade̱nā ba̱ṟhiṣā̱'nyā ba̱ṟhīṃṣya̱bhi ṣyā̍ma vasu̱vane̍ vasu̱dheya̍sya vetu̱ yaja̍.
de̱vo a̱gniḥ svi̍ṣṭa̱kṛthsu̱dravi̍ṇā ma̱ndraḥ ka̱viḥ sa̱tyama̍nmā''ya̱jī hotā̱ hotu̍rhotu̱rāya̍jīyā̱nagne̱ yānde̱vānayā̱ḍyāṃ api̍pre̱rye te̍ ho̱tre ama̍thsata̱ tāṃ sa̍sa̱nuṣī̱ṃ hotrāṃ devaṅga̱māndi̱vi de̱veṣu̍ ya̱jñamera̍ye̱maṃ svi̍ṣṭa̱kṛccāgne̱ hotā'bhū̎rvasu̱vane̍ vasu̱dheya̍sya namovā̱ke vīhi̱ yaja̍..33..

Anuvāka 14

de̱vaṃ ba̱ṟhiḥ.
va̱su̱vane̍ vasu̱dheya̍sya vetu.
de̱vīrdvāra̍ḥ.
va̱su̱vane̍ vasu̱dheya̍sya viyantu.
de̱vī u̱ṣāsā̱naktā̎.
va̱su̱vane̍ vasu̱dheya̍sya vītām.
de̱vī joṣṭrī̎.
va̱su̱vane̍ vasu̱dheya̍sya vītām.
de̱vī ū̱rjāhu̍tī.
va̱su̱vane̍ vasu̱dheyasya̍ vītām..34..

de̱vā daivyā̱ hotā̍rā.
va̱su̱vane̍ vasu̱dheya̍sya vītām.
de̱vīsti̱srasti̱sro de̱vīḥ.
va̱su̱vane̍ vasu̱dheya̍sya viyantu.
de̱vo narā̱śaṃsa̍ḥ.
va̱su̱vane̍ vasu̱dheya̍sya vetu.
de̱vo vana̱spati̍ḥ.
va̱su̱vane̍ vasu̱dheya̍sya vetu.
de̱vaṃ ba̱ṟhirvāri̍tīnām.
va̱su̱vane̍ vasu̱dheya̍sya vetu..35..

de̱vo a̱gniḥ svi̍ṣṭa̱kṛt.
su̱dravi̍ṇā ma̱ndraḥ ka̱viḥ.
sa̱tyama̍nmāya̱jī hotā̎.
hotu̍rhotu̱rāya̍jīyān.
agne̱ yānde̱vānayā̎ṭ.
yāṃ api̍preḥ.
ye te̍ ho̱tre ama̍thsata.
tāṃ sa̍sa̱nuṣī̱ṃ hotrā̎ndevaṅga̱mām.
di̱vi de̱veṣu̍ ya̱jñamera̍ye̱mam.
svi̱ṣṭa̱kṛccāgne̱ hotā'bhū̎ḥ.
va̱su̱vane̍ vasu̱dheya̍sya namovā̱ke vīhi̍..36..

Anuvāka 15

a̱gnima̱dya hotā̍ramavṛṇītā̱yaṃ yaja̍māna̱ḥ paca̍npa̱ktīḥ paca̍npuro̱ḍāśa̍ṃ ba̱dhnanni̍ndrā̱gnibhyā̱ṃ chāga̍ṃ sūpa̱sthā a̱dya de̱vo vana̱spati̍rabhavadindrā̱gnibhyā̱ṃ chāge̱nāgha̍stā̱ntaṃ me̍da̱staḥ prati̍paca̱tāgra̍bhīṣṭā̱mavī̍vṛdhetāṃ puro̱ḍāśe̍na̱ tvāma̱dyarṣa̍ ārṣeya ṛṣīṇāṃ napādavṛṇītā̱yaṃ yaja̍māno ba̱hubhya̱ ā saṅga̍tebhya e̱ṣa me̍ de̱veṣu̱ vasu̱ vāryā ya̍kṣyata̱ iti̱ tā yā de̱vā de̍va̱dānā̱nyadu̱stānya̍smā̱ ā ca̱ śāsvā ca̍ gurasveṣi̱taśca̍ hota̱rasi̍ bhadra̱vācyā̍ya̱ preṣi̍to̱ mānu̍ṣaḥ sūktavā̱kāya̍ sū̱ktā brū̍hi..37..

Anuvāka 1

sarvā̱ṉ vā e̱ṣo̎'gnau kāmā̱nprave̍śayati.
yo̎'gnīna̍nvā̱dhāya̍ vra̱tamu̱paiti̍.
sayadani̍ṣṭvā prayā̱yāt.
akā̍maprītā ena̱ṃ kāmā̱ nānu̱prayā̍yuḥ.
a̱te̱jā a̍vī̱rya̍ḥ syāt.
sa ju̍huyāt.
tubhya̱ṃ tā a̍ṅgirastama.
viśvā̎ḥ sukṣi̱taya̱ḥ pṛtha̍k.
agne̱ kāmā̍ya yemira̱ iti̍.
kāmā̍ne̱vāsmi̍ndadhāti..1..

kāma̍prītā ena̱ṃ kāmā̱ anu̱ prayā̎nti.
te̱ja̱svī vī̱ryā̍vānbhavati.
santa̍ti̱rvā e̱ṣā ya̱jñasya̍.
yo̎'gnīna̍nvā̱dhāya̍ vra̱tamu̱paiti̍.
sa yadu̱dvāya̍ti.
vicchi̍ttire̱vāsya̱ sā.
taṃ prāñca̍mu̱ddhṛtya̍.
mana̱sopa̍tiṣṭheta.
mano̱ vai pra̱jāpa̍tiḥ.
prā̱jā̱pa̱tyo ya̱jñaḥ..2..

mana̍sai̱va ya̱jñaṃ saṃ ta̍noti.
bhūrityā̍ha.
bhū̱to vai pra̱jāpa̍tiḥ.
bhūti̍me̱vopai̍ti.
vi vā e̱ṣa i̍ndri̱yeṇa̍ vī̱rye̍ṇardhyate.
yasyā''hi̍tāgnera̱gnira̍pa̱kṣāya̍ti.
yāva̱cchamya̍yā pra̱vidhye̎t.
yadi̱ tāva̍dapa̱kṣāye̎t.
taṃ sambha̍ret.
i̱daṃ ta̱ eka̍ṃ pa̱ra u̍ ta̱ ekam̎..3..

tṛ̱tīye̍na̱ jyoti̍ṣā̱ saṃvi̍śasva.
sa̱ṃveśa̍nasta̱nuvai̱ cāru̍redhi.
pri̱ye de̱vānā̎ṃ para̱me ja̱nitra̱ iti̍.
brahma̍ṇai̱vaina̱ṃ sambha̍rati.
saiva tata̱ḥ prāya̍ścittiḥ.
yadi̍ parasta̱rāma̍pa̱kṣāye̎t.
a̱nu̱pra̱yāyāva̍syet.
so e̱va tata̱ḥ prāya̍ścittiḥ.
oṣa̍dhī̱rvā e̱tasya̍ pa̱śūnpaya̱ḥ pravi̍śati.
yasya̍ ha̱viṣe̍ va̱thsā a̱pākṛ̍tā̱ dhaya̍nti..4..

tān yaddu̱hyāt.
yā̱tayā̎mnā ha̱viṣā̍ yajeta.
yanna du̱hyāt.
ya̱jña̱pa̱rura̱ntari̍yāt.
vā̱ya̱vyā̎ṃ yavā̱gūṃ nirva̍pet.
vā̱yurvai paya̍saḥ pradāpayi̱tā.
sa e̱vāsmai̱ paya̱ḥ pradā̍payati.
payo̱ vā oṣa̍dhayaḥ.
paya̱ḥ paya̍ḥ.
paya̍sai̱vāsmai̱ payo'va̍ rundhe..5..

athotta̍rasmai ha̱viṣe̍ va̱thsāna̱pāku̍ryāt.
saiva tata̱ḥ prāya̍ścittiḥ.
a̱nya̱ta̱rān vā e̱ṣa de̱vānbhā̍ga̱dheye̍na̱ vya̍rdhayati.
ye yaja̍mānasya sā̱yaṃ gṛ̱hamā̱ gaccha̍nti.
yasya̍ sāyaṃ du̱gdhaṃ ha̱virārti̍mā̱rcchati̍.
indrā̍ya vrī̱hīnni̱rupyopa̍ vaset.
payo̱ vā oṣa̍dhayaḥ.
paya̍ e̱vā''rabhya̍ gṛhī̱tvopa̍ vasati.
yatprā̱taḥ syāt.
tacchṛ̱taṃ ku̍ryāt..6..

atheta̍ra ai̱ndraḥ pu̍ro̱ḍāśa̍ḥ syāt.
i̱ndri̱ye e̱vāsmai̍ sa̱mīcī̍ dadhāti.
payo̱ vā oṣa̍dhayaḥ.
paya̱ḥ paya̍ḥ.
paya̍sai̱vāsmai̱ payo'va̍ rundhe.
athotta̍rasmai ha̱viṣe̍ va̱thsāna̱pāku̍ryāt.
saiva tata̱ḥ prāya̍ścittiḥ.
u̱bhayā̱ṉ vā e̱ṣa de̱vānbhā̍ga̱dheye̍na̱ vya̍rdhayati.
ye yaja̍mānasya sā̱yaṃ ca̍ prā̱taśca̍ gṛ̱hamā̱ gaccha̍nti.
yasyo̱bhaya̍ṃ ha̱virārti̍mā̱rcchati̍..7..

ai̱ndraṃ pañca̍śarāvamoda̱naṃ nirva̍pet.
a̱gniṃ de̱vatā̍nāṃ pratha̱maṃ ya̍jet.
a̱gnimu̍khā e̱va de̱vatā̎ḥ prīṇāti.
a̱gniṃ vā anva̱nyā de̱vatā̎ḥ.
indra̱manva̱nyāḥ.
tā e̱vobhayī̎ḥ prīṇāti.
payo̱ vā oṣa̍dhayaḥ.
paya̱ḥ paya̍ḥ.
paya̍sai̱vāsmai̱ payo'va̍ rundhe.
athotta̍rasmai ha̱viṣe̍ va̱thsāna̱pāku̍ryāt..8..

saiva tata̱ḥ prāya̍ścittiḥ.
a̱rdho vā e̱tasya̍ ya̱jñasya̍ mīyate.
yasya̱ vratye'ha̱npatnya̍nālambhu̱kā bhava̍ti.
tāma̍pa̱rudhya̍ yajeta.
sarve̍ṇai̱va ya̱jñena̍ yajate.
tāmi̱ṣṭvopa̍ hvayeta.
amū̱hama̍smi.
sā tvam.
dyaura̱ham.
pṛ̱thi̱vī tvam.
sāmā̱ham.
ṛktvam.
tāvehi̱ sambha̍vāva.
sa̱ha reto̍ dadhāvahai.
pu̱ṃse pu̱trāya̱ vetta̍vai.
rā̱yaspoṣā̍ya suprajā̱stvāya̍ su̱vīryā̱yeti̍.
a̱rdha e̱vainā̱mupa̍ hvayate.
saiva tata̱ḥ prāya̍ścittiḥ..9..

Anuvāka 2

yadviṣṣa̍ṇṇena juhu̱yāt.
apra̍jā apa̱śuryaja̍mānaḥ syāt.
yadanā̍yatane ni̱naye̎t.
a̱nā̱ya̱ta̱naḥ syā̎t.
prā̱jā̱pa̱tyaya̱rcā va̍lmīkava̱pāyā̱mava̍ nayet.
prā̱jā̱pa̱tyo vai va̱lmīka̍ḥ.
ya̱jñaḥ pra̱jāpa̍tiḥ.
pra̱jāpa̍tāve̱va ya̱jñaṃ prati̍ṣṭhāpayati.
bhūrityā̍ha.
bhū̱to vai pra̱jāpa̍tiḥ..10..

bhūti̍me̱vopai̍ti.
tatkṛ̱tvā.
a̱nyāṃ du̱gdhvā puna̍rhota̱vyam̎.
saiva tata̱ḥ prāya̍ścittiḥ.
yatkī̱ṭāva̍pannena juhu̱yāt.
apra̍jā apa̱śuryaja̍mānaḥ syāt.
yadanā̍yatane ni̱naye̎t.
a̱nā̱ya̱ta̱naḥ syā̎t.
ma̱dhya̱mena̍ pa̱rṇena̍ dyāvāpṛthi̱vya̍ya̱rcā'nta̍ḥ pari̱dhi nina̍yet.
dyāvā̍pṛthi̱vyore̱vaina̱tprati̍ṣṭhāpayati..11..

tatkṛ̱tvā.
a̱nyāṃ du̱gdhvā puna̍rhota̱vyam̎.
saiva tata̱ḥ prāya̍ścittiḥ.
yadava̍vṛṣṭena juhu̱yāt.
apa̍rūpamasyā̱'̱'̱tmañjā̍yeta.
ki̱lāso̍ vā̱syāda̍rśa̱so vā̎.
yatpratye̱yāt.
ya̱jñaṃ vicchi̍ndyāt.
sa ju̍huyāt.
mi̱tro janā̎nkalpayati prajā̱nan..12..

mi̱tro dā̍dhāra pṛthi̱vīmu̱ta dyām.
mi̱traḥ kṛ̱ṣṭīrani̍miṣā̱'bhi ca̍ṣṭe.
sa̱tyāya̍ ha̱vyaṃ ghṛ̱tava̍jjuho̱teti̍.
mi̱treṇai̱vaina̍tkalpayati.
tatkṛ̱tvā.
a̱nyāṃ du̱gdhvā puna̍rhota̱vyam̎.
saiva tata̱ḥ prāya̍ścittiḥ.
yatpūrva̍syā̱māhu̍tyāṃ hu̱tāyā̱mutta̱rā''hu̍ti̱ḥ skande̎t.
dvi̱pādbhi̍ḥ pa̱śubhi̱ryaja̍māno̱ vyṛ̍dhyeta.
yadutta̍rayā̱'bhi ju̍hu̱yāt..13..

catu̍ṣpādbhiḥ pa̱śubhi̱ryaja̍māno̱ vyṛ̍dhyeta.
yatra̱ vettha̍ vanaspate de̱vānā̱ṃ guhyā̱ nāmā̍ni.
tatra̍ ha̱vyāni̍ gāma̱yeti̍ vānaspa̱tyaya̱rcā sa̱midha̍mā̱dhāya̍.
tū̱ṣṇīme̱va puna̍rjuhuyāt.
vana̱spati̍nai̱va ya̱jñasyā''rtā̱ṃ cānā̎rtā̱ṃ cā''hu̍tī̱ vi dā̍dhāra.
tatkṛ̱tvā.
a̱nyāṃ du̱gdhvā puna̍rhota̱vyam̎.
saiva tata̱ḥ prāya̍ścittiḥ.
yatpu̱rā pra̍yā̱jebhya̱ḥ prāṅaṅgā̍ra̱ḥ skande̎t.
a̱dhva̱ryave̍ ca̱ yaja̍mānāya̱ cāka̍ṃ syāt..14..

yadda̍kṣi̱ṇā.
bra̱hmaṇe̍ ca̱ yaja̍mānāya̱ cāka̍ṃ syāt.
yatpra̱tyak.
hotre̍ ca̱ patni̍yai ca̱ yaja̍mānāya̱ cāka̍ṃ syāt.
yadudaṅṅ̍.
a̱gnīdhe̍ ca pa̱śubhya̍śca̱ yaja̍mānāya̱ cāka̍ṃ syāt.
yada̍bhijuhu̱yāt.
ru̱dro̎'sya pa̱śūnghātu̍kaḥ syāt.
yannābhi̍juhu̱yāt.
aśā̎nta̱ḥ prahri̍yeta..15..

sru̱vasya̱ budhne̍nābhi̱nida̍dhyāt.
mā ta̍mo̱ mā ya̱jñasta̍ma̱nmā yaja̍mānastamat.
nama̍ste astvāya̱te.
namo̍ rudra parāya̱te.
namo̱ yatra̍ ni̱ṣīda̍si.
a̱muṃ mā hi̍ṃsīra̱muṃ mā hi̍ṃsī̱riti̱ yena̱ skande̎t.
taṃ praha̍ret.
sa̱hasra̍śṛṅgo vṛṣa̱bho jā̱tave̍dāḥ.
stoma̍pṛṣṭho ghṛ̱tavā̎nthsu̱pratī̍kaḥ.
mā no̍ hāsīnmetthi̱to nettvā̱ jahā̍ma.
go̱po̱ṣaṃ no̍ vīrapo̱ṣaṃ ca̍ ya̱ccheti̍.
brahma̍ṇai̱vaina̱ṃ pra ha̍rati.
saiva tata̱ḥ prāya̍ścittiḥ..16..

Anuvāka 3

vi vā e̱ṣa i̍ndri̱yeṇa̍ vī̱rye̍ṇardhyate.
yasyā''hi̍tāgnera̱gnirma̱thyamā̍no̱ na jāya̍te.
yatrā̱nyaṃ paśye̎t.
tata̍ ā̱hṛtya̍ hota̱vyam̎.
a̱gnāve̱vāsyā̎gniho̱traṃ hu̱taṃ bha̍vati.
yadya̱nyanna vi̱ndet.
a̱jāyā̍ṃ hota̱vyam̎.
ā̱gne̱yī vā e̱ṣā.
yada̱jā.
a̱gnāve̱vāsyā̎gniho̱traṃ hu̱taṃ bha̍vati..17..

a̱jasya̱ tu nāśñī̍yāt.
yada̱jasyā̎śñī̱yāt.
yāme̱vāgnāvāhu̍tiṃ juhu̱yāt.
tāma̍dyāt.
tasmā̍da̱jasya̱ nāśyam̎.
yadya̱jānna vi̱ndet.
brā̱hma̱ṇasya̱ dakṣi̍ṇe̱ haste̍ hota̱vyam̎.
e̱ṣa vā a̱gnirvai̎śvāna̱raḥ.
yadbrā̎hma̱ṇaḥ.
a̱gnāve̱vāsyā̎gniho̱traṃ hu̱taṃ bha̍vati..18..

brā̱hma̱ṇaṃ tu va̍sa̱tyai̍ nāpa̍ rundhyāt.
yadbrā̎hma̱ṇaṃ va̍sa̱tyā a̍paru̱ndhyāt.
yasmi̍nne̱vāgnāvāhu̍tiṃ juhu̱yāt.
taṃ bhā̍ga̱dheye̍na̱ vya̍rdhayet.
tasmā̎dbrāhma̱ṇo va̍sa̱tyai̍ nāpa̱rudhya̍ḥ.
yadi̍ brāhma̱ṇaṃ na vi̱ndet.
da̱rbha̱sta̱mbe ho̍ta̱vyam̎.
a̱gni̱vān vai da̍rbhasta̱mbaḥ.
a̱gnāve̱vāsyā̎gniho̱traṃ hu̱taṃ bha̍vati.
da̱rbhāṃstu nādhyā̍sīta..19..

yadda̱rbhāna̱dhyāsī̍ta.
yāme̱vāgnāvāhu̍tiṃ juhu̱yāt.
tāmadhyā̍sīta.
tasmā̎dda̱rbhā nādhyā̍sita̱vyā̎ḥ.
yadi̍ da̱rbhānna vi̱ndet.
a̱phsu ho̍ta̱vyam̎.
āpo̱ vai sarvā̍ de̱vatā̎ḥ.
de̱vatā̎sve̱vāsyā̎gniho̱traṃ hu̱taṃ bha̍vati.
āpa̱stu na pari̍cakṣīta.
yadāpa̍ḥ pari̱cakṣī̍ta..20..

yāme̱vāphsvāhu̍tiṃ juhu̱yāt.
tāṃ pari̍cakṣīta.
tasmā̱dāpo̱ na pa̍ri̱cakṣyā̎ḥ.
medhyā̍ ca̱ vā e̱tasyā̍me̱dhyā ca̍ ta̱nuvau̱ saṃ sṛ̍jyete.
yasyā''hi̍tāgnera̱nyaira̱gnibhi̍ra̱gnaya̍ḥ saṃsṛ̱jyante̎.
a̱gnaye̱ vivi̍caye puro̱ḍāśa̍ma̱ṣṭāka̍pāla̱ṃ nirva̍pet.
medhyāṃ cai̱vāsyā̍me̱dhyāṃ ca̍ ta̱nuvau̱ vyāva̍rtayati.
a̱gnaye̎ vra̱tapa̍taye puro̱ḍāśa̍ma̱ṣṭāka̍pāla̱ṃ nirva̍pet.
a̱gnime̱va vra̱tapa̍ti̱ṃ svena̍ bhāga̱dheye̱nopa̍ dhāvati.
sa e̱vaina̍ṃ vra̱tamā la̍mbhayati..21..

garbha̱ṃ srava̍ntamaga̱dama̍kaḥ.
a̱gnirindra̱stvaṣṭā̱ bṛha̱spati̍ḥ.
pṛ̱thi̱vyāmava̍ cuścotai̱tat.
nābhiprāpno̍ti̱ nirṛ̍tiṃ parā̱caiḥ.
reto̱ vā e̱tadvāji̍na̱māhi̍tāgneḥ.
yada̍gniho̱tram.
tadyathsrave̎t.
reto̎'sya̱ vāji̍naṃ sravet.
garbha̱ṃ srava̍ntamaga̱dama̍ka̱rityā̍ha.
reta̍ e̱vāsmi̱nvāji̍naṃ dadhāti..22..

a̱gnirityā̍ha.
a̱gnirvai re̍to̱dhāḥ.
reta̍ e̱va tadda̍dhāti.
indra̱ ityā̍ha.
i̱ndri̱yame̱vāsmi̍ndadhāti.
tvaṣṭetyā̍ha.
tvaṣṭā̱ vai pa̍śū̱nāṃ mi̍thu̱nānā̍ṃ rūpa̱kṛt.
rū̱pame̱va pa̱śuṣu̍ dadhāti.
bṛha̱spati̱rityā̍ha.
brahma̱ vai de̱vānā̱ṃ bṛha̱spati̍ḥ.
brahma̍ṇai̱vāsmai̎ pra̱jāḥ pra ja̍nayati.
pṛ̱thi̱vyāmava̍ cuścotai̱tadityā̍ha.
a̱syāme̱vaina̱tprati̍ṣṭhāpayati.
nābhiprāpno̍ti̱ nirṛ̍tiṃ parā̱cairityā̍ha.
rakṣa̍sā̱mapa̍hatyai..23..

Anuvāka 4

yāḥ pu̱rastā̎tpra̱srava̍nti.
u̱pari̍ṣṭāthsa̱rvata̍śca̱ yāḥ.
tābhī̍ ra̱śmipa̍vitrābhiḥ.
śra̱ddhāṃ ya̱jñamā ra̍bhe.
devā̍ gātuvidaḥ.
gā̱tuṃ ya̱jñāya̍ vindata.
mana̍sa̱spati̍nā de̱vena̍.
vātā̎dya̱jñaḥ pra yu̍jyatām.
tṛ̱tīya̍syai di̱vaḥ.
gā̱ya̱tri̱yā soma̱ ābhṛ̍taḥ..24..

so̱ma̱pī̱thāya̱ sanna̍yitum.
vaka̍la̱manta̍ra̱mā da̍de.
āpo̍ devīḥ śu̱ddhāḥ stha̍.
i̱mā pātrā̍ṇi śundhata.
u̱pā̱ta̱ṅkyā̍ya de̱vānā̎m.
pa̱rṇa̱va̱lkamu̱ta śu̍ndhata.
payo̍ gṛ̱heṣu̱ payo̍ aghni̱yāsu̍.
payo̍ va̱thseṣu̱ paya̱ indrā̍ya ha̱viṣe̎ dhriyasva.
gā̱ya̱trī pa̍rṇava̱lkena̍.
paya̱ḥ soma̍ṃ karotvi̱mam..25..

a̱gniṃ gṛ̍hṇāmi su̱ratha̱ṃ yo ma̍yo̱bhūḥ.
ya u̱dyanta̍mā̱roha̍ti̱ sūrya̱mahne̎.
ā̱di̱tyaṃ jyoti̍ṣā̱ṃ jyoti̍rutta̱mam.
śvo ya̱jñāya̍ ramatāṃ de̱vatā̎bhyaḥ.
vasū̎nru̱drānā̍di̱tyān.
indre̍ṇa sa̱ha de̱vatā̎ḥ.
tāḥ pūrva̱ḥ pari̍ gṛhṇāmi.
sva ā̱yata̍ne manī̱ṣayā̎.
i̱māmūrja̍ṃ pañcada̱śīṃ ye pravi̍ṣṭāḥ.
tānde̱vānpari̍ gṛhṇāmi̱ pūrva̍ḥ..26..

a̱gnirha̍vya̱vāḍi̱ha tānā va̍hatu.
pau̱rṇa̱mā̱saṃ ha̱viri̱dame̍ṣā̱ṃ mayi̍.
ā̱mā̱vā̱sya̍ṃ ha̱viri̱dame̍ṣā̱ṃ mayi̍.
a̱nta̱rā'gnī pa̱śava̍ḥ.
de̱va̱sa̱ṃsada̱mā ga̍man.
tānpūrva̱ḥ pari̍ gṛhṇāmi.
sva ā̱yata̍ne manī̱ṣayā̎.
i̱ha pra̱jā vi̱śvarū̍pā ramantām.
a̱gniṃ gṛ̱hapa̍tima̱bhi sa̱ṃvasā̍nāḥ.
tāḥ pūrva̱ḥ pari̍ gṛhṇāmi..27..

sva ā̱yata̍ne manī̱ṣayā̎.
i̱ha pa̱śavo̍ vi̱śvarū̍pā ramantām.
a̱gniṃ gṛ̱hapa̍tima̱bhi sa̱ṃvasā̍nāḥ.
tānpūrva̱ḥ pari̍ gṛhṇāmi.
sva ā̱yata̍ne manī̱ṣayā̎.
a̱yaṃ pi̍tṛ̱ṇāma̱gniḥ.
avā̎ḍḍha̱vyā pi̱tṛbhya̱ ā.
taṃ pūrva̱ḥ pari̍ gṛhṇāmi.
avi̍ṣannaḥ pi̱tuṃ ka̍rat.
aja̍sra̱ṃ tvāṃ sa̍bhāpā̱lāḥ..28..

vi̱ja̱yabhā̍ga̱ṃ sami̍ndhatām.
agne̍ dī̱dā̍ya me sabhya.
viji̍tyai śa̱rada̍ḥ śa̱tam.
anna̍māvasa̱thīyam̎.
a̱bhi ha̍rāṇi śa̱rada̍ḥ śa̱tam.
ā̱va̱sa̱the śriya̱ṃ mantram̎.
ahi̍rbu̱dhniyo̱ ni ya̍cchatu.
i̱dama̱hama̱gnijye̎ṣṭhebhyaḥ.
vasu̍bhyo ya̱jñaṃ prabra̍vīmi.
i̱dama̱hamindra̍jyeṣṭhebhyaḥ..29..

ru̱drebhyo̍ ya̱jñaṃ pra bra̍vīmi.
i̱dama̱haṃ varu̍ṇajyeṣṭhebhyaḥ.
ā̱di̱tyebhyo̍ ya̱jñaṃ pra bra̍vīmi.
paya̍svatī̱roṣa̍dhayaḥ.
paya̍svadvī̱rudhā̱ṃ paya̍ḥ.
a̱pāṃ paya̍so̱ yatpaya̍ḥ.
tena̱ māmi̍ndra̱ saṃ sṛ̍ja.
agne̎ vratapate vra̱taṃ ca̍riṣyāmi.
taccha̍keya̱ṃ tanme̍ rādhyatām.
vāyo̎ vratapata̱ ādi̍tya vratapate..30..

vra̱tānā̎ṃ vratapate vra̱taṃ ca̍riṣyāmi.
taccha̍keya̱ṃ tanme̍ rādhyatām.
i̱māṃ prācī̱mudī̍cīm.
iṣa̱mūrja̍ma̱bhi saṃskṛ̍tām.
ba̱hu̱pa̱rṇāmaśu̍ṣkāgrām.
harā̍mi paśu̱pāma̱ham.
yatkṛṣṇo̍ rū̱paṃ kṛ̱tvā.
prāvi̍śa̱stvaṃ vana̱spatīn̍.
tata̱stvāme̍kaviṃśati̱dhā.
sambha̍rāmi susa̱mbhṛtā̎..31..

trīnpa̍ri̱dhīṃsti̱sraḥ sa̱midha̍ḥ.
ya̱jñāyu̍ranusañca̱rān.
u̱pa̱ve̱ṣaṃ mekṣa̍ṇa̱ṃ dhṛṣṭim̎.
saṃ bha̍rāmi susa̱mbhṛtā̎.
yā jā̱tā oṣa̍dhayaḥ.
de̱vebhya̍striyu̱gaṃ pu̱rā.
tāsā̱ṃ parva̍ rādhyāsam.
pa̱ri̱sta̱ramā̱haran̍.
a̱pāṃ medhya̍ṃ ya̱jñiyam̎.
sade̍vaṃ śi̱vama̍stu me..32..

ā̱cche̱ttā vo̱ mā ri̍ṣam.
jīvā̍ni śa̱rada̍ḥ śa̱tam.
apa̍rimitānā̱ṃ pari̍mitāḥ.
sanna̍hye sukṛ̱tāya̱ kam.
eno̱ mā nigā̎ṅkata̱macca̱nāham.
puna̍ru̱tthāya̍ bahu̱lā bha̍vantu.
sa̱kṛ̱dā̱cchi̱nnaṃ ba̱ṟhirūrṇā̍mṛdu.
syo̱naṃ pi̱tṛbhya̍stvā bharāmya̱ham.
a̱sminthsī̍dantu me pi̱tara̍ḥ so̱myāḥ.
pi̱tā̱ma̱hāḥ prapi̍tāmahāścānu̱gaiḥ sa̱ha..33..

tri̱vṛtpa̍lā̱śe da̱rbhaḥ.
iyā̎nprāde̱śasa̍mmitaḥ.
ya̱jñe pa̱vitra̱ṃ potṛ̍tamam.
payo̍ ha̱vyaṃ ka̍rotu me.
i̱mau prā̍ṇāpā̱nau.
ya̱jñasyāṅgā̍ni sarva̱śaḥ.
ā̱pyā̱yaya̍ntau̱ sañca̍ratām.
pa̱vitre̍ havya̱śodha̍ne.
pa̱vitre̎ stho vaiṣṇa̱vī.
vā̱yurvā̱ṃ mana̍sā punātu..34..

a̱yaṃ prā̱ṇaścā̍pā̱naśca̍.
yaja̍māna̱mapi̍ gacchatām.
ya̱jñe hyabhū̍tā̱ṃ potā̍rau.
pa̱vitre̍ havya̱śodha̍ne.
tvayā̱ vedi̍ṃ vividuḥ pṛthi̱vīm.
tvayā̍ ya̱jño jā̍yate viśva̱dāni̍ḥ.
acchi̍draṃ ya̱jñamanve̍ṣi vi̱dvān.
tvayā̱ hotā̱ saṃ ta̍notyardhamā̱sān.
tra̱ya̱stri̱ṃśo̍'si̱ tantū̍nām.
pa̱vitre̍ṇa sa̱hāga̍hi..35..

śi̱veyaṃ rajju̍rabhi̱dhānī̎.
a̱ghni̱yāmupa̍ sevatām.
apra̍sraṃsāya ya̱jñasya̍.
u̱khe upa̍dadhāmya̱ham.
pa̱śubhi̱ḥ sannī̍taṃ bibhṛtām.
indrā̍ya śṛ̱taṃ dadhi̍.
u̱pa̱ve̱ṣo̍'si ya̱jñāya̍.
tvāṃ pa̍rive̱ṣama̍dhārayan.
indrā̍ya ha̱viḥ kṛ̱ṇvanta̍ḥ.
śi̱vaḥ śa̱gmo bha̍vāsi naḥ..36..

amṛ̍nmayandevapā̱tram.
ya̱jñasyā''yu̍ṣi̱ pra yu̍jyatām.
ti̱ra̱ḥ pa̱vi̱tramati̍nītāḥ.
āpo̍ dhāraya̱ māti̍guḥ.
de̱vena̍ savi̱trotpū̍tāḥ.
vaso̱ḥ sūrya̍sya ra̱śmibhi̍ḥ.
gāṃ do̍hapavi̱tre rajjum̎.
sarvā̱ pātrā̍ṇi śundhata.
e̱tā ā ca̍ranti̱ madhu̍ma̱dduhā̍nāḥ.
pra̱jāva̍tīrya̱śaso̍ vi̱śvarū̍pāḥ..37..

ba̱hvīrbhava̍ntī̱rupa̱jāya̍mānāḥ.
i̱ha va̱ indro̍ ramayatu gāvaḥ.
pū̱ṣā stha̍.
a̱ya̱kṣmā va̍ḥ pra̱jayā̱ saṃ sṛ̍jāmi.
rā̱yaspoṣe̍ṇa bahu̱lābhava̍ntīḥ.
ūrja̱ṃ paya̱ḥ pinva̍mānā ghṛ̱taṃ ca̍.
jī̱vo jīva̍ntī̱rupa̍vaḥ sadeyam.
dyauśce̱maṃ ya̱jñaṃ pṛ̍thi̱vī ca̱ sandu̍hātām.
dhā̱tā some̍na sa̱ha vāte̍na vā̱yuḥ.
yaja̍mānāya̱ dravi̍ṇaṃ dadhātu..38..

uthsa̍ṃ duhanti ka̱laśa̱ṃ catu̍rbilam.
iḍā̎ṃ de̱vīṃ madhu̍matīṃ suva̱rvidam̎.
tadi̍ndrā̱gnī ji̍nvataṃ sū̱nṛtā̍vat.
tadyaja̍mānamamṛta̱tve da̍dhātu.
kāma̍dhukṣa̱ḥ pra ṇo̎ brūhi.
indrā̍ya ha̱viri̍ndri̱yam.
a̱mūṃ yasyā̎ṃ de̱vānā̎m.
ma̱nu̱ṣyā̍ṇā̱ṃ payo̍ hi̱tam.
ba̱hu du̱gdhīndrā̍ya de̱vebhya̍ḥ.
ha̱vyamā pyā̍yatā̱ṃ puna̍ḥ..39..

va̱thsebhyo̍ manu̱ṣye̎bhyaḥ.
pu̱na̱rdo̱hāya̍ kalpatām.
ya̱jñasya̱ santa̍tirasi.
ya̱jñasya̍ tvā̱ santa̍ti̱manu̱ saṃ ta̍nomi.
ada̍stamasi̱ viṣṇa̍ve tvā.
ya̱jñāyāpi̍ dadhāmya̱ham.
a̱dbhirari̍ktena̱ pātre̍ṇa.
yāḥ pū̱tāḥ pa̍ri̱śera̍te.
a̱yaṃ paya̱ḥ soma̍ṃ kṛ̱tvā.
svāṃ yoni̱mapi̍ gacchatu..40..

pa̱rṇa̱va̱lkaḥ pa̱vitram̎.
sau̱myaḥ somā̱ddhi nirmi̍taḥ.
i̱mau pa̱rṇaṃ ca̍ da̱rbhaṃ ca̍.
de̱vānā̍ṃ havya̱śodha̍nau.
prā̱ta̱rve̱ṣāya̍ gopāya.
viṣṇo̍ ha̱vyaṃ hi rakṣa̍si.
u̱bhāva̱gnī u̍pastṛṇa̱te.
de̱vatā̱ upa̍vasantu me.
a̱haṃ grā̱myānupa̍ vasāmi.
mahya̱ṃ gopa̍taye pa̱śūn..41..

Anuvāka 5

devā̍ de̱veṣu̱ parā̎kramadhvam.
pratha̍mā dvi̱tīye̍ṣu.
dvitī̍yāstṛ̱tīye̍ṣu.
trire̍kādaśā i̱ha mā̍'vata.
i̱daṃ śa̍keya̱ṃ yadi̱daṃ ka̱romi̍.
ā̱tmā ka̍rotvā̱tmane̎.
i̱daṃ ka̍riṣye bheṣa̱jam.
i̱daṃ me̍ viśvabheṣajā.
aśvi̍nā̱ prāva̍taṃ yu̱vam.
i̱dama̱haṃ senā̍yā a̱bhītva̍ryai..42..

mukha̱mapo̍hāmi.
sūrya̍ jyoti̱rvi bhā̍hi.
ma̱ha̱ta i̍ndri̱yāya̍.
ā pyā̍yatāṃ ghṛ̱tayo̍niḥ.
a̱gnirha̱vyā'nu̍ manyatām.
khama̍ṅkṣva̱ tvaca̍maṅkṣva.
su̱rū̱paṃ tvā̍ vasu̱vidam̎.
pa̱śū̱nāṃ teja̍sā.
a̱gnaye̱ juṣṭa̍ma̱bhi ghā̍rayāmi.
syo̱naṃ te̱ sada̍naṃ karomi..43..

ghṛ̱tasya̱ dhāra̍yā su̱śeva̍ṃ kalpayāmi.
tasmi̎nthsīdā̱mṛte̱ prati̍ tiṣṭha.
vrī̱hī̱ṇāṃ me̍dha sumana̱syamā̍naḥ.
ā̱rdraḥ pra̍thasnu̱rbhuva̍nasya go̱pāḥ.
śṛ̱ta uthsnā̍ti jani̱tā ma̍tī̱nām.
yasta̍ ā̱tmā pa̱śuṣu̱ pravi̍ṣṭaḥ.
de̱vānā̎ṃ vi̱ṣṭhāmanu̱ yo vi̍ta̱sthe.
ā̱tma̱nvānthso̍ma ghṛ̱tavā̱ṉ hi bhū̱tvā.
de̱vānga̍ccha̱ suva̍rvinda̱ yaja̍mānāya̱ mahyam̎.
irā̱ bhūti̍ḥ pṛthi̱vyai raso̱ motkra̍mīt..44..

devā̎ḥ pitara̱ḥ pita̍ro devāḥ.
yo̍'hama̍smi̱ sa san ya̍je.
yasyā̎smi̱ na tama̱ntare̍mi.
svaṃ ma̍ i̱ṣṭaṃ svaṃ da̱ttam.
svaṃ pū̱rtaṃ svaṃ śrā̱ntam.
svaṃ hu̱tam.
tasya̍ me̱'gniru̍padra̱ṣṭā.
vā̱yuru̍paśro̱tā.
ā̱di̱tyo̍'nukhyā̱tā.
dyauḥ pi̱tā..45..

pṛ̱thi̱vī mā̱tā.
pra̱jāpa̍ti̱rbandhu̍ḥ.
ya e̱vāsmi̱ sa san ya̍je.
mā bhermā saṃvi̍kthā̱ mā tvā̍ hiṃsiṣam.
mā te̱ tejo'pa̍ kramīt.
bha̱ra̱tamuddha̍re̱manu̍ṣiñca.
a̱va̱dānā̍ni te pra̱tyava̍dāsyāmi.
nama̍ste astu̱ mā mā̍ hiṃsīḥ.
yada̍va̱dānā̍ni te'va̱dyan.
vilo̱mākā̍rṣamā̱tmana̍ḥ..46..

ājye̍na̱ pratya̍najmyenat.
tatta̱ ā pyā̍yatā̱ṃ puna̍ḥ.
ajyā̍yo yavamā̱trāt.
ā̱vyā̱dhātkṛ̍tyatāmi̱dam.
mā rū̍rupāma ya̱jñasya̍.
śu̱ddhaṃ svi̍ṣṭami̱daṃ ha̱viḥ.
manu̍nā dṛ̱ṣṭāṃ ghṛ̱tapa̍dīm.
mi̱trāvaru̍ṇasamīritām.
da̱kṣi̱ṇā̱rdhādasa̍mbhindan.
ava̍dyāmyeka̱tomu̍khām..47..

iḍe̍ bhā̱gaṃ ju̍ṣasva naḥ.
jinva̱ gā jinvārva̍taḥ.
tasyā̎ste bhakṣi̱vāṇa̍ḥ syāma.
sa̱rvātmā̍naḥ sa̱rvaga̍ṇāḥ.
bradhna̱ pinva̍sva.
dada̍to me̱ mā kṣā̍yi.
ku̱rva̱to me̱ mopa̍dasat.
di̱śāṃ kḷpti̍rasi.
diśo̍ me kalpantām.
kalpa̍ntāṃ me̱ diśa̍ḥ..48..

daivī̎śca̱ mānu̍ṣīśca.
a̱ho̱rā̱tre me̍ kalpetām.
a̱rdha̱mā̱sā me̍ kalpantām.
māsā̍ me kalpantām.
ṛ̱tavo̍ me kalpantām.
sa̱ṃva̱thsa̱ro me̍ kalpatām.
kḷpti̍rasi̱ kalpa̍tāṃ me.
āśā̍nāṃ tvā''śāpā̱lebhya̍ḥ.
ca̱turbhyo̍ a̱mṛte̎bhyaḥ.
i̱daṃ bhū̱tasyādhya̍kṣebhyaḥ..49..

vi̱dhema̍ ha̱viṣā̍ va̱yam.
bhaja̍tāṃ bhā̱gī bhā̱gam.
mā bhā̱go'bha̍kta.
nira̍bhā̱gaṃ bha̍jāmaḥ.
a̱paspi̍nva.
oṣa̍dhīrjinva.
dvi̱pātpā̍hi.
catu̍ṣpādava.
di̱vo vṛṣṭi̱mera̍ya.
brā̱hma̱ṇānā̍mi̱daṃ ha̱viḥ..50..

so̱myānā̍ṃ somapī̱thinā̎m.
nirbha̱kto brā̎hmaṇaḥ.
nehā brā̎hmaṇasyāsti.
sama̍ṅktāṃ ba̱ṟhirha̱viṣā̍ ghṛ̱tena̍.
samā̍di̱tyairvasu̍bhi̱ḥ saṃ ma̱rudbhi̍ḥ.
samindre̍ṇa̱ viśve̍bhirde̱vebhi̍raṅktām.
di̱vyaṃ nabho̍ gacchatu̱ yathsvāhā̎.
i̱ndrā̱ṇīvā̍vidha̱vā bhū̍yāsam.
adi̍tiriva supu̱trā.
a̱sthū̱ri tvā̍ gārhapatya..51..

upa̱niṣa̍de suprajā̱stvāya̍.
saṃ patnī̱ patyā̍ sukṛ̱tena̍ gacchatām.
ya̱jñasya̍ yu̱ktau dhuryā̍vabhūtām.
sa̱ñjā̱nā̱nau vija̍hatā̱marā̍tīḥ.
di̱vi jyoti̍ra̱jara̱mā ra̍bhetām.
daśa̍te ta̱nuvo̍ yajña ya̱jñiyā̎ḥ.
tāḥ prī̍ṇātu̱ yaja̍māno ghṛ̱tena̍.
nā̱ri̱ṣṭhayo̎ḥ pra̱śiṣa̱mīḍa̍mānaḥ.
de̱vānā̱ṃ daivye'pi̱ yaja̍māno̱'mṛto̍'bhūt.
yaṃ vā̎ṃ de̱vā a̍kalpayan..52..

ū̱rjo bhā̱gaṃ śa̍takratū.
e̱tadvā̱ṃ tena̍ prīṇāni.
tena̍ tṛpyatamaṃhahau.
a̱haṃ de̱vānā̍ṃ su̱kṛtā̍masmi lo̱ke.
mame̱dami̱ṣṭaṃ na mithu̍rbhavāti.
a̱haṃ nā̍ri̱ṣṭhāvanu̍ yajāmi vi̱dvān.
yadā̎bhyā̱mindro̱ ada̍dhādbhāga̱dheyam̎.
adā̍rasṛdbhavata devasoma.
a̱smin ya̱jñe ma̍ruto mṛḍatā naḥ.
mā no̍ vidada̱bhibhā̱mo aśa̍stiḥ..53..

mā no̍ vidadvṛ̱janā̱ dveṣyā̱ yā.
ṛ̱ṣa̱bhaṃ vā̱jina̍ṃ va̱yam.
pū̱rṇamā̍saṃ yajāmahe.
sa no̍ dohatāṃ su̱vīryam̎.
rā̱yaspoṣa̍ṃ saha̱sriṇam̎.
prā̱ṇāya̍ su̱rādha̍se.
pū̱rṇamā̍sāya̱ svāhā̎.
a̱mā̱vā̱syā̍ su̱bhagā̍ su̱śevā̎.
dhe̱nuri̍va̱ bhūya̍ ā̱pyāya̍mānā.
sā no̍ dohatāṃ su̱vīryam̎.
rā̱yaspoṣa̍ṃ saha̱sriṇam̎.
a̱pā̱nāya̍ su̱rādha̍se.
a̱mā̱vā̱syā̍yai̱ svāhā̎.
a̱bhi stṛ̍ṇīhi̱ pari̍ dhehi̱ vedim̎.
jā̱miṃ mā hi̍ṃsīramu̱yā śayā̍nā.
ho̱tṛ̱ṣada̍nā̱ hari̍tāḥ su̱varṇā̎ḥ.
ni̱ṣkā i̱me yaja̍mānasya bra̱dhne..54..

Anuvāka 6

pari̍stṛṇīta̱ pari̍dhattā̱gnim.
pari̍hito̱'gniryaja̍mānaṃ bhunaktu.
a̱pāṃ rasa̱ oṣa̍dhīnāṃ su̱varṇa̍ḥ.
ni̱ṣkā i̱me yaja̍mānasya santu kāma̱dughā̎ḥ.
a̱mutrā̱muṣmi̍m̐llo̱ke.
bhūpa̍te̱ bhuva̍napate.
ma̱ha̱to bhū̱tasya̍ pate.
bra̱hmāṇa̍ṃ tvā vṛṇīmahe.
a̱haṃ bhūpa̍tira̱haṃ bhuva̍napatiḥ.
a̱haṃ ma̍ha̱to bhū̱tasya̱ pati̍ḥ..55..

de̱vena̍ savi̱trā prasū̍ta̱ ārtvi̍jyaṃ kariṣyāmi.
deva̍ savitare̱taṃ tvā̍ vṛṇate.
bṛha̱spati̱ṃ daivya̍ṃ bra̱hmāṇam̎.
tada̱haṃ mana̍se̱ pra bra̍vīmi.
mano̍ gāyatri̱yai.
gā̱ya̱trī tri̱ṣṭubhe̎.
tri̱ṣṭubjaga̍tyai.
jaga̍tyanu̱ṣṭubhe̎.
a̱nu̱ṣṭukpa̱ṅktyai.
pa̱ṅktiḥ pra̱jāpa̍taye..56..

pra̱jāpa̍ti̱rviśve̎bhyo de̱vebhya̍ḥ.
viśve̍ de̱vā bṛha̱spata̍ye.
bṛha̱spati̱rbrahma̍ṇe.
brahma̱ bhūrbhuva̱ḥ suva̍ḥ.
bṛha̱spati̍rde̱vānā̎ṃ bra̱hmā.
a̱haṃ ma̍nu̱ṣyā̍ṇām.
bṛha̍spate ya̱jñaṃ go̍pāya.
i̱daṃ tasmai̍ ha̱rmyaṃ ka̍romi.
yo vo̍ devā̱ścara̍ti brahma̱caryam̎.
me̱dhā̱vī di̱kṣu mana̍sā tapa̱svī..57..

a̱ntardū̱taśca̍rati̱ mānu̍ṣīṣu.
catu̍ḥ śikhaṇḍā yuva̱tiḥ su̱peśā̎ḥ.
ghṛ̱tapra̍tīkā̱ bhuva̍nasya̱ madhye̎.
ma̱rmṛ̱jyamā̍nā maha̱te saubha̍gāya.
mahya̍ṃ dhukṣva̱ yaja̍mānāya̱ kāmān̍.
bhūmi̍rbhū̱tvā ma̍hi̱māna̍ṃ pupoṣa.
tato̍ de̱vī va̍rdhayate̱ payā̍ṃsi.
ya̱jñiyā̍ ya̱jñaṃ vi ca̱ yanti̱ śaṃ ca̍.
oṣa̍dhī̱rāpa̍ i̱ha śakva̍rīśca.
yo mā̍ hṛ̱dā mana̍sā̱ yaśca̍ vā̱cā..58..

yo brahma̍ṇā̱ karma̍ṇā̱ dveṣṭi̍ devāḥ.
yaḥ śru̱tena̱ hṛda̍yeneṣṇa̱tā ca̍.
tasye̎ndra̱ vajre̍ṇa̱ śira̍śchinadmi.
ūrṇā̍mṛdu̱ pratha̍mānaṃ syo̱nam.
de̱vebhyo̱ juṣṭa̱ṃ sada̍nāya ba̱ṟhiḥ.
su̱va̱rge lo̱ke yaja̍māna̱ṃ hi dhe̱hi.
māṃ nāka̍sya pṛ̱ṣṭhe pa̍ra̱me vyo̍man.
catu̍ḥ śikhaṇḍā yuva̱tiḥ su̱peśā̎ḥ.
ghṛ̱tapra̍tīkā va̱yunā̍ni vaste.
sā''stī̱ryamā̍ṇā maha̱te saubha̍gāya..59..

sā me̍ dhukṣva̱ yaja̍mānāya̱ kāmān̍.
śi̱vā ca̍ me śa̱gmā cai̍dhi.
syo̱nā ca̍ me su̱ṣadā̍ caidhi.
ūrja̍svatī ca me̱ paya̍svatī caidhi.
iṣa̱mūrja̍ṃ me pinvasva.
brahma̱ tejo̍ me pinvasva.
kṣa̱tramojo̍ me pinvasva.
viśa̱ṃ puṣṭi̍ṃ me pinvasva.
āyu̍ra̱nnādya̍ṃ me pinvasva.
pra̱jāṃ pa̱śūnme̍ pinvasva..60..

a̱smin ya̱jña upa̱ bhūya̱ innu me̎.
avi̍kṣobhāya pari̱dhīṃ da̍dhāmi.
dha̱rtā dha̱ruṇo̱ dharī̍yān.
a̱gnirdveṣā̍ṃsi̱ niri̱to nu̍dātai.
vicchi̍nadmi̱ vidhṛ̍tībhyāṃ sa̱patnān̍.
jā̱tānbhrātṛ̍vyā̱ṉ ye ca̍ jani̱ṣyamā̍ṇāḥ.
vi̱śo ya̱ntrābhyā̱ṃ vidha̍māmyenān.
a̱haṃ svānā̍mutta̱mo̍'sāni devāḥ.
vi̱śo ya̱ntre nu̱damā̍ne̱ arā̍tim.
viśva̍ṃ pā̱pmāna̱mama̍tiṃ durmarā̱yum..61..

sīda̍ntī de̱vī su̍kṛ̱tasya̍ lo̱ke.
dhṛtī̎ stho̱ vidhṛ̍tī̱ svadhṛ̍tī.
prā̱ṇānmayi̍ dhārayatam.
pra̱jāṃ mayi̍ dhārayatam.
pa̱śūnmayi̍ dhārayatam.
a̱yaṃ pra̍sta̱ra u̱bhaya̍sya dha̱rtā.
dha̱rtā pra̍yā̱jānā̍mu̱tānū̍yā̱jānā̎m.
sa dā̍dhāra sa̱midho̍ vi̱śvarū̍pāḥ.
tasmi̱nthsruco̱ adhyā sā̍dayāmi.
ā ro̍ha pa̱tho ju̍hu deva̱yānān̍..62..

yatrarṣa̍yaḥ prathama̱jā ye pu̍rā̱ṇāḥ.
hira̍ṇyapakṣā'ji̱rā sambhṛ̍tāṅgā.
vahā̍si mā su̱kṛtā̱ṃ yatra̍ lo̱kāḥ.
avā̱haṃ bā̍dha upa̱bhṛtā̍ sa̱patnān̍.
jā̱tānbhrātṛ̍vyā̱ṉ ye ca̍ jani̱ṣyamā̍ṇāḥ.
dohai̍ ya̱jñaṃ su̱dughā̍miva dhe̱num.
a̱hamutta̍ro bhūyāsam.
adha̍re̱ mathsa̱patnā̎ḥ.
yo mā̍ vā̱cā mana̍sā durmarā̱yuḥ.
hṛ̱dā'rā̍tī̱yāda̍bhi̱dāsa̍dagne..63..

i̱dama̍sya ci̱ttamadha̍raṃ dhru̱vāyā̎ḥ.
a̱hamutta̍ro bhūyāsam.
adha̍re̱ mathsa̱patnā̎ḥ.
ṛ̱ṣa̱bho̍'si śākva̱raḥ.
ghṛ̱tācī̍nāṃ sū̱nuḥ.
pri̱yeṇa̱ nāmnā̎ pri̱ye sada̍si sīda.
syo̱no me̍ sīda su̱ṣada̍ḥ pṛthi̱vyām.
pratha̍yi pra̱jayā̍ pa̱śubhi̍ḥ suva̱rge lo̱ke.
di̱vi sī̍da pṛthi̱vyāma̱ntari̍kṣe.
a̱hamutta̍ro bhūyāsam..64..{tta̍}%for spacing!
adha̍re̱ mathsa̱patnā̎ḥ.
i̱yaṃ sthā̱lī ghṛ̱tasya̍ pū̱rṇā.
acchi̍nnapayāḥ śa̱tadhā̍ra̱ uthsa̍ḥ.
mā̱ru̱tena̱ śarma̍ṇā̱ daivye̍na.
ya̱jño̍'si sa̱rvata̍ḥ śri̱taḥ.
sa̱rvato̱ māṃ bhū̱taṃ bha̍vi̱ṣyacchra̍yatām.
śa̱taṃ me̍ santvā̱śiṣa̍ḥ.
sa̱hasra̍ṃ me santu sū̱nṛtā̎ḥ.
irā̍vatīḥ paśu̱matī̎ḥ.
pra̱jāpa̍tirasi sa̱rvata̍ḥ śri̱taḥ..65..

sa̱rvato̱ māṃ bhū̱taṃ bha̍vi̱ṣyacchra̍yatām.
śa̱taṃ me̍ santvā̱śiṣa̍ḥ.
sa̱hasra̍ṃ me santu sū̱nṛtā̎ḥ.
irā̍vatīḥ paśu̱matī̎ḥ.
i̱dami̍ndri̱yama̱mṛta̍ṃ vī̱ryam̎.
a̱nenendrā̍ya pa̱śavo̍'cikithsan.
tena̍ devā ava̱topa̱ mām.
i̱heṣa̱mūrja̱ṃ yaśa̱ḥ saha̱ oja̍ḥ saneyam.
śṛ̱taṃ mayi̍ śrayatām.
yatpṛ̍thi̱vīmaca̍ra̱ttatpravi̍ṣṭam..66..

yenāsi̍ñca̱dbala̱mindre̎ pra̱jāpa̍tiḥ.
i̱daṃ tacchu̱kraṃ madhu̍ vā̱jinī̍vat.
yeno̱pari̍ṣṭā̱dadhi̍nonmahe̱ndram.
dadhi̱ māṃ dhi̍notu.
a̱yaṃ ve̱daḥ pṛ̍thi̱vīmanva̍vindat.
guhā̍ sa̱tīṃ gaha̍ne̱ gahva̍reṣu.
sa vi̍ndatu̱ yaja̍mānāya lo̱kam.
acchi̍draṃ ya̱jñaṃ bhūri̍karmā karotu.
a̱yaṃ ya̱jñaḥ sama̍sadaddha̱viṣmān̍.
ṛ̱cā sāmnā̱ yaju̍ṣā de̱vatā̍bhiḥ..67..

tena̍ lo̱kānthsūrya̍vato jayema.
indra̍sya sa̱khyama̍mṛta̱tvama̍śyām.
yo na̱ḥ kanī̍ya i̱ha kā̱mayā̍tai.
a̱smin ya̱jñe yaja̍mānāya̱ mahyam̎.
apa̱ tami̍ndrā̱gnī bhuva̍nānnudetām.
a̱haṃ pra̱jāṃ vī̱rava̍tīṃ videya.
agne̍ vājajit.
vāja̍ṃ tvā sari̱ṣyantam̎.
vāja̍ṃ je̱ṣyantam̎.
vā̱jina̍ṃ vāja̱jitam̎..68..

vā̱ja̱ji̱tyāyai̱ saṃ mā̎rjmi.
a̱gnima̍nnā̱dama̱nnādyā̍ya.
upa̍hūto̱ dyauḥ pi̱tā.
upa̱ māṃ dyauḥ pi̱tā hva̍yatām.
a̱gnirāgnī̎dhrāt.
āyu̍ṣe̱ varca̍se.
jī̱vātvai puṇyā̍ya.
upa̍hūtā pṛthi̱vī mā̱tā.
upa̱ māṃ mā̱tā pṛ̍thi̱vī hva̍yatām.
a̱gnirāgnī̎dhrāt..69..

āyu̍ṣe̱ varca̍se.
jī̱vātvai puṇyā̍ya.
mano̱ jyoti̍rjuṣatā̱mājyam̎.
vicchi̍nnaṃ ya̱jñaṃ sami̱maṃ da̍dhātu.
bṛha̱spati̍stanutāmi̱maṃ na̍ḥ.
viśve̍ de̱vā i̱ha mā̍dayantām.
yante̍ agna āvṛ̱ścāmi̍.
a̱haṃ vā̎ kṣipi̱taścaran̍.
pra̱jāṃ ca̱ tasya̱ mūla̍ṃ ca.
nī̱cairde̍vā̱ ni vṛ̍ścata..70..

agne̱ yo no̍'bhi̱dāsa̍ti.
sa̱mā̱no yaśca̱ niṣṭya̍ḥ.
i̱dhmasye̍va pra̱kṣāya̍taḥ.
mā tasyocche̍ṣi̱ kiñca̱na.
yo māṃ dveṣṭi̍ jātavedaḥ.
yaṃ cā̱''haṃ dveṣmi̱ yaśca̱ mām.
sarvā̱ṃstāna̍gne̱ sanda̍ha.
yāṃścā̱haṃ dveṣmi̱ ye ca̱ mām.
agne̍ vājajit.
vāja̍ṃ tvā sasṛ̱vāṃsam̎..71..

vāja̍ṃ jigi̱vāṃsam̎.
vā̱jina̍ṃ vāja̱jitam̎.
vā̱ja̱ji̱tyāyai̱ sammā̎rjmi.
a̱gnima̍nnā̱dama̱nnādyā̍ya.
vedi̍rba̱ṟhiḥ śṛ̱taṃ ha̱viḥ.
i̱dhmaḥ pa̍ri̱dhaya̱ḥ sruca̍ḥ.
ājya̍ṃ ya̱jña ṛco̱ yaju̍ḥ.
yā̱jyā̎śca vaṣaṭkā̱rāḥ.
saṃ me̱ sanna̍tayo namantām.
i̱dhma̱sa̱nnaha̍ne hu̱te..72..

di̱vaḥ khīlo'va̍tataḥ.
pṛ̱thi̱vyā adhyutthi̍taḥ.
tenā̍ sa̱hasra̍kāṇḍena.
dvi̱ṣanta̍ṃ śocayāmasi.
dvi̱ṣanme̍ ba̱hu śo̍catu.
oṣa̍dhe̱ mo a̱haṃ śu̍cam.
yajña̱ nama̍ste yajña.
namo̱ nama̍śca te yajña.
śi̱vena̍ me̱ santi̍ṣṭhasva.
syo̱nena̍ me̱ santi̍ṣṭhasva..73..

su̱bhū̱tena̍ me̱ santi̍ṣṭhasva.
bra̱hma̱va̱rca̱sena̍ me̱ santi̍ṣṭhasva.
ya̱jñasyarddhi̱manu̱ santi̍ṣṭhasva.
upa̍ te yajña̱ nama̍ḥ.
upa̍ te̱ nama̍ḥ.
upa̍ te̱ nama̍ḥ.
triṣpha̱līkri̱yamā̍ṇānām.
yo nya̱ṅgo a̍va̱śiṣya̍te.
rakṣa̍sāṃ bhāga̱dheyam̎.
āpa̱statpra va̍hatādi̱taḥ..74..

u̱lūkha̍le̱ musa̍le̱ yacca̱ śūrpe̎.
ā̱śi̱śleṣa̍ dṛ̱ṣadi̱ yatka̱pāle̎.
a̱va̱pruṣo̍ vi̱pruṣa̱ḥ saṃya̍jāmi.
viśve̍ de̱vā ha̱viri̱daṃ ju̍ṣantām.
ya̱jñe yā vi̱pruṣa̱ḥ santi̍ ba̱hvīḥ.
a̱gnau tāḥ sarvā̱ḥ svi̍ṣṭā̱ḥ suhu̍tā juhomi.
u̱dyanna̱dyami̍tra mahaḥ.
sa̱patnā̎nme anīnaśaḥ.
divai̍nān vi̱dyutā̍ jahi.
ni̱mroca̱nnadha̍rānkṛdhi..75..

u̱dyanna̱dya vi no̍ bhaja.
pi̱tā pu̱trebhyo̱ yathā̎.
dī̱rghā̱yu̱tvasya̍ heśiṣe.
tasya̍ no dehi sūrya.
u̱dyanna̱dya mi̍tramahaḥ.
ā̱roha̱nnutta̍rā̱ṃ divam̎.
hṛ̱dro̱gaṃ mama̍ sūrya.
ha̱ri̱māṇa̍ṃ ca nāśaya.
śuke̍ṣu me hari̱māṇam̎.
ro̱pa̱ṇākā̍su dadhmasi..76..

atho̍ hāridra̱veṣu̍ me.
ha̱ri̱māṇa̱ṃ ni da̍dhmasi.
uda̍gāda̱yamā̍di̱tyaḥ.
viśve̍na̱ saha̍sā sa̱ha.
dvi̱ṣanta̱ṃ mama̍ ra̱ndhayan̍.
mo a̱haṃ dvi̍ṣa̱to ra̍dham.
{ }
yo na̱ḥ śapā̱daśa̍pataḥ.
yaśca̍ na̱ḥ śapa̍ta̱ḥ śapā̎t.
u̱ṣāśca̱ tasmai̍ ni̱mrukca̍.
sarva̍ṃ pā̱paṃ samū̍hatām..77..

yo na̍ḥ sa̱patno̱ yo raṇa̍ḥ.
marto̍'bhi̱dāsa̍ti devāḥ.
i̱dhmasye̍va pra̱kṣāya̍taḥ.
mā tasyocche̍ṣi̱ kiñca̱na.
ava̍sṛṣṭa̱ḥ parā̍pata.
śa̱ro brahma̍saṃśitaḥ.
gacchā̱'mitrā̱npra vi̍śa.
maiṣā̱ṃ kañca̱nocchi̍ṣaḥ..78..

Anuvāka 7

sakṣe̱daṃ pa̍śya.
vidha̍rtari̱daṃ pa̍śya.
nāke̱daṃ pa̍śya.
ra̱mati̱ḥ pani̍ṣṭhā.
ṛ̱taṃ varṣi̍ṣṭham.
a̱mṛtā̱yānyā̱huḥ.
sūryo̱ vari̍ṣṭho a̱kṣabhi̱rvibhā̍ti.
anu̱ dyāvā̍pṛthi̱vī de̱vapu̍tre.
dī̱kṣā'si̱ tapa̍so̱ yoni̍ḥ.
tapo̍'si̱ brahma̍ṇo̱ yoni̍ḥ..79..

brahmā̍si kṣa̱trasya̱ yoni̍ḥ.
kṣa̱trama̍syṛ̱tasya̱ yoni̍ḥ.
ṛ̱tama̍si̱ bhūrā ra̍bhe.
śra̱ddhāṃ mana̍sā.
dī̱kṣāṃ tapa̍sā.
viśva̍sya̱ bhuva̍na̱syādhi̍patnīm.
sarve̱ kāmā̱ yaja̍mānasya santu.
vāta̍ṃ prā̱ṇaṃ mana̍sā̱'nvā ra̍bhāmahe.
pra̱jāpa̍ti̱ṃ yo bhuva̍nasya go̱pāḥ.
sa no̍ mṛ̱tyostrā̍yatā̱ṃ pātvaṃha̍saḥ..80..

jyogjī̱vā ja̱rāma̍śīmahi.
indra̍ śākvara gāya̱trīṃ prapa̍dye.
tānte̍ yunajmi.
indra̍ śākvara tri̱ṣṭubha̱ṃ prapa̍dye.
tānte̍ yunajmi.
indra̍ śākvara̱ jaga̍tī̱ṃ prapa̍dye.
tānte̍ yunajmi.
indra̍ śākvarānu̱ṣṭubha̱ṃ prapa̍dye.
tānte̍ yunajmi.
indra̍ śākvara pa̱ṅktiṃ prapa̍dye..81..

tānte̍ yunajmi.
ā'haṃ dī̱kṣāma̍ruhamṛ̱tasya̱ patnī̎m.
gā̱ya̱treṇa̱ chanda̍sā̱ brahma̍ṇā ca.
ṛ̱taṃ sa̱tye̍'dhāyi.
sa̱tyamṛ̱te̍'dhāyi.
ṛ̱taṃ ca̍ me sa̱tyaṃ cā̍bhūtām.
jyoti̍rabhūva̱ṃ suva̍ragamam.
su̱va̱rgaṃ lo̱kaṃ nāka̍sya pṛ̱ṣṭham.
bra̱dhnasya̍ vi̱ṣṭapa̍magamam.
pṛ̱thi̱vī dī̱kṣā..82..

tayā̱'gnirdī̱kṣayā̍ dīkṣi̱taḥ.
yayā̱'gnirdī̱kṣayā̍ dīkṣi̱taḥ.
tayā̎ tvā dī̱kṣayā̍ dīkṣayāmi.
a̱ntari̍kṣaṃ dī̱kṣā.
tayā̍ vā̱yurdī̱kṣayā̍ dīkṣi̱taḥ.
yayā̍ vā̱yurdī̱kṣayā̍ dīkṣi̱taḥ.
tayā̎ tvā dī̱kṣayā̍ dīkṣayāmi.
dyaurdī̱kṣā.
tayā̍''di̱tyo dī̱kṣayā̍ dīkṣi̱taḥ.
yayā̍''di̱tyo dī̱kṣayā̍ dīkṣi̱taḥ..83..

tayā̎ tvā dī̱kṣayā̍ dīkṣayāmi.
diśo̍ dī̱kṣā.
tayā̍ ca̱ndramā̍ dī̱kṣayā̍ dīkṣi̱taḥ.
yayā̍ ca̱ndramā̍ dī̱kṣayā̍ dīkṣi̱taḥ.
tayā̎ tvā dī̱kṣayā̍ dīkṣayāmi.
āpo̍ dī̱kṣā.
tayā̱ varu̍ṇo̱ rājā̍ dī̱kṣayā̍ dīkṣi̱taḥ.
yayā̱ varu̍ṇo̱ rājā̍ dī̱kṣayā̍ dīkṣi̱taḥ.
tayā̎ tvā dī̱kṣayā̍ dīkṣayāmi.
oṣa̍dhayo dī̱kṣā..84..

tayā̱ somo̱ rājā̍ dī̱kṣayā̍ dīkṣi̱taḥ.
yayā̱ somo̱ rājā̍ dī̱kṣayā̍ dīkṣi̱taḥ.
tayā̎ tvā dī̱kṣayā̍ dīkṣayāmi.
vāgdī̱kṣā.
tayā̎ prā̱ṇo dī̱kṣayā̍ dīkṣi̱taḥ.
yayā̎ prā̱ṇo dī̱kṣayā̍ dīkṣi̱taḥ.
tayā̎ tvā dī̱kṣayā̍ dīkṣayāmi.
pṛ̱thi̱vī tvā̱ dīkṣa̍māṇa̱manu̍ dīkṣatām.
a̱ntari̍kṣaṃ tvā̱ dīkṣa̍māṇa̱manu̍ dīkṣatām.
dyaustvā̱ dīkṣa̍māṇa̱manu̍ dīkṣatām..85..

diśa̍stvā̱ dīkṣa̍māṇa̱manu̍ dīkṣantām.
āpa̍stvā̱ dīkṣa̍māṇa̱manu̍ dīkṣantām.
oṣa̍dhayastvā̱ dīkṣa̍māṇa̱manu̍ dīkṣantām.
vāktvā̱ dīkṣa̍māṇa̱manu̍ dīkṣatām.
ṛca̍stvā̱ dīkṣa̍māṇa̱manu̍ dīkṣantām.
sāmā̍ni tvā̱ dīkṣa̍māṇa̱manu̍ dīkṣantām.
yajū̍ṃṣi tvā̱ dīkṣa̍māṇa̱manu̍ dīkṣantām.
aha̍śca̱ rātri̍śca.
kṛ̱ṣiśca̱ vṛṣṭi̍śca.
tviṣi̱ścāpa̍citiśca..86..

āpa̱ścauṣa̍dhayaśca.
ūrkca̍ sū̱nṛtā̍ ca.
tāstvā̱ dīkṣa̍māṇa̱manu̍ dīkṣantām.
sve dakṣe̱ dakṣa̍pite̱ha sī̍da.
de̱vānā̍ṃ su̱mno ma̍ha̱te raṇā̍ya.
svā̱sa̱sthasta̱nuvā̱ saṃvi̍śasva.
pi̱tevai̍dhi sū̱nava̱ ā su̱śeva̍ḥ.
śi̱vo mā̍ śi̱vamā vi̍śa.
sa̱tyaṃ ma̍ ā̱tmā.
śra̱ddhā me'kṣi̍tiḥ..87..

tapo̍ me prati̱ṣṭhā.
sa̱vi̱tṛpra̍sūtā mā̱ diśo̍ dīkṣayantu.
sa̱tyama̍smi.
a̱haṃ tvada̍smi̱ mada̍si̱ tvame̱tat.
mamā̍si̱ yoni̱stava̱ yoni̍rasmi.
mamai̱va sanvaha̍ ha̱vyānya̍gne.
pu̱traḥ pi̱tre lo̍ka̱kṛjjā̍tavedaḥ.
ā̱juhvā̍naḥ su̱pratī̍kaḥ pu̱rastā̎t.
agne̱ svāṃ yoni̱mā sī̍da sā̱dhyā.
a̱sminthsa̱dhasthe̱ adhyutta̍rasmin..88..

viśve̍ devā̱ yaja̍mānaśca sīdata.
eka̍mi̱ṣe viṣṇu̱stvā'nve̍tu.
dve ū̱rje viṣṇu̱stvā'nve̍tu.
trīṇi̍ vra̱tāya̱ viṣṇu̱stvā'nve̍tu.
ca̱tvāri̱ māyo̍bhavāya̱ viṣṇu̱stvā'nve̍tu.
pañca̍ pa̱śubhyo̱ viṣṇu̱stvā'nve̍tu.
ṣaḍrā̱yaspoṣā̍ya̱ viṣṇu̱stvā'nve̍tu.
sa̱pta sa̱ptabhyo̱ hotrā̎bhyo̱ viṣṇu̱stvā'nve̍tu.
sakhā̍yaḥ sa̱ptapa̍dā abhūma.
sa̱khyaṃ te̍ gameyam..89..

sa̱khyātte̱ mā yo̍ṣam.
sa̱khyānme̱ mā yo̎ṣṭhāḥ.
sā'si̍ subrahmaṇye.
tasyā̎ste pṛthi̱vī pāda̍ḥ.
sā'si̍ subrahmaṇye.
tasyā̎ste̱'ntari̍kṣa̱ṃ pāda̍ḥ.
sā'si̍ subrahmaṇye.
tasyā̎ste̱ dyauḥ pāda̍ḥ.
sā'si̍ subrahmaṇye.
tasyā̎ste̱ diśa̱ḥ pāda̍ḥ..90..

pa̱rora̍jāste pañca̱maḥ pāda̍ḥ.
sā na̱ iṣa̱mūrja̍ṃ dhukṣva.
teja̍ indri̱yam.
bra̱hma̱va̱rca̱sama̱nnādyam̎.
vi mi̍me tvā̱ paya̍svatīm.
de̱vānāṃ dhe̱nuṃ su̱dughā̱mana̍pasphurantīm.
indra̱ḥ soma̍ṃ pibatu.
kṣemo̍ astu naḥ.
i̱mānna̍rāḥ kṛṇuta̱ vedi̱metya̍.
vasu̍matīṃ ru̱drava̍tīmādi̱tyava̍tīm..91..

varṣma̍ndi̱vaḥ.
nābhā̍ pṛthi̱vyāḥ.
yathā̱'yaṃ yaja̍māno̱ na riṣye̎t.
de̱vasya̍ savi̱tuḥ sa̱ve.
catu̍ḥ śikhaṇḍā yuva̱tiḥ su̱peśā̎ḥ.
ghṛ̱tapra̍tīkā̱ bhuva̍nasya̱ madhye̎.
tasyā̍ṃ supa̱rṇāvadhi̱ yau nivi̍ṣṭau.
tayo̎rde̱vānā̱madhi̍ bhāga̱dheyam̎.
apa̱ janya̍ṃ bha̱yaṃ nu̍da.
apa̍ ca̱krāṇi̍ vartaya.
gṛ̱haṃ soma̍sya gacchatam.
na vā u̍ ve̱tanmri̍yase̱ na ri̍ṣyasi.
de̱vāṃ ide̍ṣi pa̱thibhi̍ḥ su̱gebhi̍ḥ.
yatra̱ yanti̍ su̱kṛto̱ nāpi̍ du̱ṣkṛta̍ḥ.
tatra̍ tvā de̱vaḥ sa̍vi̱tā da̍dhātu..92..

Anuvāka 8

yada̱sya pā̱re raja̍saḥ.
śu̱kraṃ jyoti̱rajā̍yata.
tanna̍ḥ parṣa̱dati̱ dviṣa̍ḥ.
agne̍ vaiśvānara̱ svāhā̎.
yasmā̎dbhī̱ṣā'vā̍śiṣṭhāḥ.
tato̍ no̱ abha̍yaṃ kṛdhi.
pra̱jābhya̱ḥ sarvā̎bhyo mṛḍa.
namo̍ ru̱drāya̍ mī̱ḍhuṣe̎.
yasmā̎dbhī̱ṣā nyaṣa̍daḥ.
tato̍ no̱ abha̍yaṃ kṛdhi..93..

pra̱jābhya̱ḥ sarvā̎bhyo mṛḍa.
namo̍ ru̱drāya̍ mī̱ḍhuṣe̎.
udu̍sra tiṣṭha̱ prati̍ tiṣṭha̱ māri̍ṣaḥ.
memaṃ ya̱jñaṃ yaja̍mānaṃ ca rīriṣaḥ.
su̱va̱rge lo̱ke yaja̍māna̱ṃ hi dhe̱hi.
śanna̍ edhi dvi̱pade̱ śaṃ catu̍ṣpade.
yasmā̎dbhī̱ṣā've̍piṣṭhāḥ pa̱lāyi̍ṣṭhāḥ sa̱majñā̎sthāḥ.
tato̍ no̱ abha̍yaṃ kṛdhi.
pra̱jābhya̱ḥ sarvā̎bhyo mṛḍa.
namo̍ ru̱drāya̍ mī̱ḍhuṣe̎..94..

ya i̱damaka̍ḥ.
tasmai̱ nama̍ḥ.
tasmai̱ svāhā̎.
na vā u̍ve̱tanmri̍yase.
āśā̍nāṃ tvā̱ viśvā̱ āśā̎ḥ.
ya̱jñasya̱ hi stha ṛ̱tviyau̎.
indrā̎gnī̱ ceta̍nasya ca.
hu̱tā̱hu̱tasya̍ tṛpyatam.
ahu̍tasya hu̱tasya̍ ca.
hu̱tasya̱ cāhu̍tasya ca.
ahu̍tasya hu̱tasya̍ ca.
indrā̎gnī a̱sya soma̍sya.
vī̱taṃ pi̍bataṃ ju̱ṣethā̎m.
mā yaja̍māna̱ṃ tamo̍ vidat.
martvijo̱ mo i̱māḥ pra̱jāḥ.
mā yaḥ soma̍mi̱maṃ pibā̎t.
saṃsṛ̍ṣṭamu̱bhaya̍ṃ kṛ̱tam..95..

Anuvāka 9

a̱nā̱gasa̍stvā va̱yam.
indre̍ṇa̱ preṣi̍tā̱ upa̍.
vā̱yuṣṭe̍ astvaṃśa̱bhūḥ.
mi̱traste̍ astvaṃśa̱bhūḥ.
varu̍ṇaste astvaṃśa̱bhūḥ.
apā̎ṅkṣayā̱ ṛta̍sya garbhāḥ.
bhuva̍nasya gopā̱ḥ śyenā̍ atithayaḥ.
parva̍tānāṃ kakubhaḥ pra̱yuto̍ napātāraḥ.
va̱gnunendra̍ṃ hvayata.
ghoṣe̱ṇāmī̍vāṃścātayata..96..

yu̱ktāḥ stha̱ vaha̍ta.
de̱vā grāvā̍ṇa̱ indu̱rindra̱ itya̍vādiṣuḥ.
endra̍macucyavuḥ para̱masyā̎ḥ parā̱vata̍ḥ.
ā'smāthsa̱dhasthā̎t.
orora̱ntari̍kṣāt.
ā su̍bhū̱tama̍suṣavuḥ.
bra̱hma̱va̱rca̱saṃ ma̱ āsu̍ṣavuḥ.
sa̱ma̱re rakṣā̍ṃsyavadhiṣuḥ.
apa̍hataṃ brahma̱jyasya̍.
vākca̍ tvā̱ mana̍śca śrīṇītām..97..

prā̱ṇaśca̍ tvā'pā̱naśca̍ śrīṇītām.
cakṣu̍śca tvā̱ śrotra̍ṃ ca śrīṇītām.
dakṣa̍śca tvā̱ bala̍ṃ ca śrīṇītām.
oja̍śca tvā̱ saha̍śca śrīṇītām.
āyu̍śca tvā'ja̱rā ca̍ śrīṇītām.
ā̱tmā ca̍ tvā ta̱nūśca̍ śrīṇītām.
śṛ̱to̍'si śṛ̱taṃ kṛ̍taḥ.
śṛ̱tāya̍ tvā śṛ̱tebhya̍stvā.
yamindra̍mā̱hurvaru̍ṇa̱ṃ yamā̱huḥ.
yaṃ mi̱tramā̱huryamu̍ sa̱tyamā̱huḥ..98..

yo de̱vānā̎ṃ de̱vata̍mastapo̱jāḥ.
tasmai̎ tvā̱ tebhya̍stvā.
mayi̱ tyadi̍ndri̱yaṃ ma̱hat.
mayi̱ dakṣo̱ mayi̱ kratu̍ḥ.
mayi̍ dhāyi su̱vīryam̎.
triśu̍ggha̱rmo vi bhā̍tu me.
ākū̎tyā̱ mana̍sā sa̱ha.
vi̱rājā̱ jyoti̍ṣā sa̱ha.
ya̱jñena̱ paya̍sā sa̱ha.
tasya̱ doha̍maśīmahi..99..

tasya̍ su̱mnama̍śīmahi.
tasya̍ bha̱kṣama̍śīmahi.
vāgju̍ṣā̱ṇā soma̍sya tṛpyatu.
mi̱tro janā̱npra sa mi̍tra.
yasmā̱nna jā̱taḥ paro̍ a̱nyo asti̍.
ya ā̍vi̱veśa̱ bhuva̍nāni̱ viśvā̎.
pra̱jāpa̍tiḥ pra̱jayā̍ saṃvidā̱naḥ.
trīṇi̱ jyotī̍ṃṣi sacate̱ sa ṣo̍ḍa̱śī.
e̱ṣa bra̱hmā ya ṛ̱tviya̍ḥ.
indro̱ nāma̍ śru̱to ga̱ṇe..100..

pra te̍ ma̱he vi̱dathe̍ śaṃsiṣa̱ṃ harī̎.
ya ṛ̱tviya̱ḥ pra te̍ vanve.
va̱nuṣo̍ harya̱taṃ madam̎.
indro̱ nāma̍ ghṛ̱taṃ nayaḥ.
hari̍bhi̱ścāru̱ seca̍te.
śru̱to ga̱ṇa ā tvā̍ viśantu.
hari̍varpasa̱ṅgira̍ḥ.
indrādhi̍pa̱te'dhi̍pati̱stvaṃ de̱vānā̍masi.
adhi̍pati̱ṃ mām.
āyu̍ṣmanta̱ṃ varca̍svantaṃ manu̱ṣye̍ṣu kuru..101..

indra̍śca sa̱mrāḍvaru̍ṇaśca̱ rājā̎.
tau te̍ bha̱kṣaṃ ca̍kratu̱ragra̍ e̱tam.
tayo̱ranu̍ bha̱kṣaṃ bha̍kṣayāmi.
vāgju̍ṣā̱ṇā soma̍sya tṛpyatu.
pra̱jāpa̍tirvi̱śvaka̍rmā.
tasya̱ mano̍ de̱vaṃ ya̱jñena̍ rādhyāsam.
a̱rthe̱gā a̱sya ja̍hitaḥ.
a̱va̱sāna̍pate'va̱sāna̍ṃ me vinda.
namo̍ ru̱drāya̍ vāsto̱ṣpata̍ye.
āya̍ne vi̱drava̍ṇe..102..

u̱dyāne̱ yatpa̱rāya̍ṇe.
ā̱varta̍ne vi̱varta̍ne.
yo go̍pā̱yati̱ taṃ hu̍ve.
yānya̍pā̱mityā̱nyapra̍tīttā̱nyasmi̍.
ya̱masya̍ ba̱linā̱ carā̍mi.
i̱haiva santa̱ḥ prati̱ tadyā̍tayāmaḥ.
jī̱vā jī̱vebhyo̱ ni ha̍rāma enat.
a̱nṛ̱ṇā a̱sminna̍nṛ̱ṇāḥ para̍smin.
tṛ̱tīye̍ lo̱ke a̍nṛ̱ṇāḥ syā̍ma.
ye de̍va̱yānā̍ u̱ta pi̍tṛ̱yāṇā̎ḥ..103..

sarvā̎npa̱tho a̍nṛ̱ṇā ākṣī̍yema.
i̱damū̱nu śreyo̍'va̱sāna̱mā ga̍nma.
śi̱ve no̱ dyāvā̍pṛthi̱vī u̱bhe i̱me.
goma̱ddhana̍va̱daśva̍va̱dūrja̍svat.
su̱vīrā̍ vī̱rairanu̱ sañca̍rema.
a̱rkaḥ pa̱vitra̱ṃ raja̍so vi̱māna̍ḥ.
pu̱nāti̍ de̱vānā̱ṃ bhuva̍nāni̱ viśvā̎.
dyāvā̍pṛthi̱vī paya̍sā saṃvidā̱ne.
ghṛ̱taṃ du̍hāte a̱mṛta̱ṃ prapī̍ne.
pa̱vitra̍ma̱rko raja̍so vi̱māna̍ḥ.
pu̱nāti̍ de̱vānā̱ṃ bhuva̍nāni̱ viśvā̎.
suva̱rjyoti̱ryaśo̍ ma̱hat.
a̱śī̱mahi̍ gā̱dhamu̱ta pra̍ti̱ṣṭhām..104..

Anuvāka 10

uda̍stāmphsīthsavi̱tā mi̱tro a̍rya̱mā.
sarvā̍na̱mitrā̍navadhīdyu̱gena̍.
bṛ̱hanta̱ṃ māma̍karadvī̱rava̍ntam.
ra̱tha̱nta̱re śra̍yasva̱ svāhā̍ pṛthi̱vyām.
vā̱ma̱de̱vye śra̍yasva̱ svāhā̱'ntari̍kṣe.
bṛ̱ha̱ti śra̍yasva̱ svāhā̍ di̱vi.
bṛ̱ha̱tā tvopa̍stabhnomi.
ā tvā̍ dade̱ yaśa̍se vī̱ryā̍ya ca.
a̱smāsva̍ghniyā yū̱yaṃ da̍dhāthendri̱yaṃ paya̍ḥ.
yaste̎ dra̱phso yasta̍ uda̱ṟṣaḥ..105..

daivya̍ḥ ke̱turviśva̱ṃ bhuva̍namāvi̱veśa̍.
sa na̍ḥ pā̱hyari̍ṣṭyai̱ svāhā̎.
anu̍ mā̱ sarvo̍ ya̱jño̍'yame̍tu.
viśve̍ de̱vā ma̱ruta̱ḥ sāmā̱rkaḥ.
ā̱priya̱śchandā̍ṃsi ni̱vido̱ yajū̍ṃṣi.
a̱syai pṛ̍thi̱vyai yadya̱jñiyam̎.
pra̱jāpa̍tervarta̱nimanu̍ vartasva.
anu̍vī̱rairanu̍ rādhyāma̱ gobhi̍ḥ.
anvaśvai̱ranu̱ sarvai̍ru pu̱ṣṭaiḥ.
anu̍ pra̱jayā'nvi̍ndri̱yeṇa̍..106..

de̱vā no̍ ya̱jñamṛ̍ju̱dhā na̍yantu.
prati̍kṣa̱tre prati̍ tiṣṭhāmi rā̱ṣṭre.
pratyaśve̍ṣu̱ prati̍ tiṣṭhāmi̱ goṣu̍.
prati̍ pra̱jāyā̱ṃ prati̍ tiṣṭhāmi̱ bhavye̎.
viśva̍ma̱nyā'bhi̍ vāvṛ̱dhe.
tada̱nyasyā̱madhi̍śri̱tam.
di̱ve ca̍ vi̱śvaka̍rmaṇe.
pṛ̱thi̱vyai cā̍kara̱ṃ nama̍ḥ.
askā̱ndyauḥ pṛ̍thi̱vīm.
askā̍nṛṣa̱bho yuvā̱gāḥ..107..

ska̱nnemā viśvā̱ bhuva̍nā.
ska̱nno ya̱jñaḥ pra ja̍nayatu.
askā̱naja̍ni̱ prāja̍ni.
ā ska̱nnājjā̍yate̱ vṛṣā̎.
ska̱nnātpra ja̍niṣīmahi.
ye de̱vā yeṣā̍mi̱daṃ bhā̍ga̱dheya̍ṃ ba̱bhūva̍.
yeṣā̎ṃ prayā̱jā u̱tānū̍yā̱jāḥ.
indra̍jyeṣṭhebhyo̱ varu̍ṇarājabhyaḥ.
a̱gniho̍tṛbhyo de̱vebhya̱ḥ svāhā̎.
u̱ta tyā no̱ divā̍ ma̱tiḥ..108..

adi̍tirū̱tyā ga̍mat.
sā śantā̍cī̱ maya̍skarat.
apa̱ sridha̍ḥ.
u̱ta tyā daivyā̍ bhi̱ṣajā̎.
śanna̍skarato a̱śvinā̎.
yū̱yātā̍ma̱smadrapa̍ḥ.
apa̱ sridha̍ḥ.
śama̱gnira̱gnibhi̍skarat.
śanna̍stapatu̱ sūrya̍ḥ.
śaṃ vāto̍ vātvara̱pāḥ..109..

apa̱ sridha̍ḥ.
taditpa̱daṃ na vici̍keta vi̱dvān.
yanmṛ̱taḥ puna̍ra̱pyeti̍ jī̱vān.
tri̱vṛdyadbhuva̍nasya ratha̱vṛt.
jī̱vo garbho̱ na mṛ̱taḥ sa jī̍vāt.
pratya̍smai̱ pipī̍ṣate.
viśvā̍ni vi̱duṣe̍ bhara.
a̱ra̱ṅga̱māya̱ jagma̍ve.
apa̍ścāddaghvane̱ nare̎.
indu̱rindu̱mavā̍gāt.
indo̱rindro̍'pāt.
tasya̍ ta inda̱vindra̍pītasya̱ madhu̍mataḥ.
upa̍hūta̱syopa̍hūto bhakṣayāmi..110..

Anuvāka 11

brahma̍ prati̱ṣṭhā mana̍so̱ brahma̍ vā̱caḥ.
brahma̍ ya̱jñānā̍ṃ ha̱viṣā̱mājya̍sya.
ati̍rikta̱ṃ karma̍ṇo̱ yacca̍ hī̱nam.
ya̱jñaḥ parvā̍ṇi prati̱ranne̍ti ka̱lpayan̍.
svāhā̍kṛ̱tā''hu̍tiretu de̱vān.
āśrā̍vitama̱tyāśrā̍vitam.
vaṣa̍ṭkṛtama̱tyanū̎ktaṃ ca ya̱jñe.
ati̍rikta̱ṃ karma̍ṇo̱ yacca̍ hī̱nam.
ya̱jñaḥ parvā̍ṇi prati̱ranne̍ti ka̱lpayan̍.
svāhā̍kṛ̱tā''hu̍tiretu de̱vān..111..

yadvo̍ devā atipā̱dayā̍ni.
vā̱cā ci̱tpraya̍taṃ deva̱heḍa̍nam.
a̱rā̱yo a̱smāṃ a̱bhidu̍cchunā̱yate̎.
a̱nyatrā̱smanma̍ruta̱stannidhe̍tana.
ta̱taṃ ma̱ āpa̱stadu̍ tāyate̱ puna̍ḥ.
svādi̍ṣṭhā dhī̱tiru̱cathā̍ya śasyate.
a̱yaṃ sa̍mu̱dra u̱ta vi̱śvabhe̍ṣajaḥ.
svāhā̍kṛtasya̱ samu̍tṛpṇutarbhuvaḥ.
udva̱yaṃ tama̍sa̱spari̍.
udu̱tyaṃ ci̱tram..112..

i̱maṃ me̍ varuṇa̱ tattvā̍ yāmi.
tvanno̍ agne̱ sa tvanno̍ agne.
tvama̍gne a̱yāsi̱ prajā̍pate.
i̱maṃ jī̱vebhya̍ḥ pari̱dhiṃ da̍dhāmi.
maiṣānnu̍gā̱dapa̍ro̱ ardha̍me̱tam.
śa̱taṃ jī̍vantu śa̱rada̍ḥ purū̱cīḥ.
ti̱ro mṛ̱tyuṃ da̍dhatā̱ṃ parva̍tena.
i̱ṣṭebhya̱ḥ svāhā̱ vaṣa̱ḍani̍ṣṭebhya̱ḥ svāhā̎.
bhe̱ṣa̱jaṃ duri̍ṣṭyai̱ svāhā̱ niṣkṛ̍tyai̱ svāhā̎.
daurā̎rdhyai̱ svāhā̱ daivī̎bhyasta̱nūbhya̱ḥ svāhā̎..113..

ṛddhyai̱ svāhā̱ samṛ̍ddhyai̱ svāhā̎.
yata̍ indra̱ bhayā̍mahe.
tato̍ no̱ abha̍yaṃ kṛdhi.
magha̍vañcha̱gdhi tava̱ tanna̍ ū̱taye̎.
vi dviṣo̱ vi mṛdho̍ jahi.
sva̱sti̱dā vi̱śaspati̍ḥ.
vṛ̱tra̱hā vi mṛdho̍ va̱śī.
vṛṣendra̍ḥ pu̱ra e̍tu naḥ.
sva̱sti̱dā a̍bhayaṅka̱raḥ.
ā̱bhirgī̱rbhiryadato̍ na ū̱nam..114..

āpyā̍yaya harivo̱ vardha̍mānaḥ.
ya̱dā sto̱tṛbhyo̱ mahi̍ go̱trā ru̱jāsi̍.
bhū̱yi̱ṣṭha̱bhājo̱ adha̍ te syāma.
anā̎jñāta̱ṃ yadājñā̍tam.
ya̱jñasya̍ kri̱yate̱ mithu̍.
agne̱ tada̍sya kalpaya.
tvaṃ hi vettha̍ yathāta̱tham.
puru̍ṣasammito ya̱jñaḥ.
ya̱jñaḥ puru̍ṣasammitaḥ.
agne̱ tada̍sya kalpaya.
tvaṃ hi vettha̍ yathāta̱tham.
yatpā̍ka̱trā mana̍sā dī̱nada̍kṣā̱ na.
ya̱jñasya̍ ma̱nvate̱ martā̍saḥ.
a̱gniṣṭaddhotā̎ kratu̱vidvi̍jā̱nan.
yaji̍ṣṭho de̱vāṃ ṛ̍tu̱śo ya̍jāti..115..

Anuvāka 12

yadde̍vā deva̱heḍa̍nam.
devā̍saścakṛ̱mā va̱yam.
ādi̍tyā̱stasmā̎nmā muñcata.
ṛ̱tasya̱rtena̱ māmu̱ta.
devā̍ jīvanakā̱myā yat.
vā̱cā'nṛ̍tamūdi̱ma.
a̱gnirmā̱ tasmā̱dena̍saḥ.
gārha̍patya̱ḥ pramu̍ñcatu.
du̱ri̱tā yāni̍ cakṛ̱ma.
ka̱rotu̱ māma̍ne̱nasam̎..116..

ṛ̱tena̍ dyāvāpṛthivī.
ṛ̱tena̱ tvaṃ sa̍rasvati.
ṛ̱tānmā̍ muñca̱tāṃha̍saḥ.
yada̱nyakṛ̍tamāri̱ma.
sa̱jā̱ta̱śa̱ṃsādu̱ta vā̍ jāmiśa̱ṃsāt.
jyāya̍sa̱ḥ śaṃsā̍du̱ta vā̱ kanī̍yasaḥ.
anā̎jñātaṃ de̱vakṛ̍ta̱ṃ yadena̍ḥ.
tasmā̱ttvama̱smāñjā̍tavedo mumugdhi.
yadvā̱cā yanmana̍sā.
bā̱hubhyā̍mū̱rubhyā̍maṣṭhī̱vadbhyā̎m..117..

śi̱śñairyadanṛ̍taṃ cakṛ̱mā va̱yam.
a̱gnirmā̱ tasmā̱dena̍saḥ.
yaddhastā̎bhyāṃ ca̱kara̱ kilbi̍ṣāṇi.
a̱kṣāṇā̎ṃ va̱gnumu̍pa̱jighna̍mānaḥ.
dū̱re̱pa̱śyā ca̍ rāṣṭra̱bhṛcca̍.
tānya̍phsa̱rasā̱vanu̍dattāmṛ̱ṇāni̍.
adī̎vyannṛ̱ṇaṃ yada̱haṃ ca̱kāra̍.
yadvādā̎syanthsañja̱gārā̱ jane̎bhyaḥ.
a̱gnirmā̱ tasmā̱dena̍saḥ.
yanmayi̍ mā̱tā garbhe̍ sa̱ti..118..

ena̍śca̱kāra̱ yatpi̱tā.
a̱gnirmā̱ tasmā̱dena̍saḥ.
yadā̍ pi̱peṣa̍ mā̱tara̍ṃ pi̱taram̎.
pu̱traḥ pramu̍dito̱ dhayan̍.
ahi̍ṃsitau pi̱tarau̱ mayā̱ tat.
tada̍gne anṛ̱ṇo bha̍vāmi.
yada̱ntari̍kṣaṃ pṛthi̱vīmu̱ta dyām.
yanmā̱tara̍ṃ pi̱tara̍ṃ vā jihiṃsi̱ma.
a̱gnirmā̱ tasmā̱dena̍saḥ.
yadā̱śasā̍ ni̱śasā̱ yatpa̍rā̱śasā̎..119..

yadena̍ścakṛ̱mā nūta̍na̱ṃ yatpu̍rā̱ṇam.
a̱gnirmā̱ tasmā̱dena̍saḥ.
ati̍ krāmāmi duri̱taṃ yadena̍ḥ.
jahā̍mi ri̱praṃ pa̍ra̱me sa̱dhasthe̎.
yatra̱ yanti̍ su̱kṛto̱ nāpi̍ du̱ṣkṛta̍ḥ.
tamā ro̍hāmi su̱kṛtā̱ṃ nu lo̱kam.
tri̱te de̱vā a̍mṛjatai̱tadena̍ḥ.
tri̱ta e̱tanma̍nu̱ṣye̍ṣu māmṛje.
tato̍ mā̱ yadi̱ kiñci̍dāna̱śe.
a̱gnirmā̱ tasmā̱dena̍saḥ..120..

gārha̍patya̱ḥ pramu̍ñcatu.
du̱ri̱tā yāni̍ cakṛ̱ma.
ka̱rotu̱ māma̍ne̱nasam̎.
di̱vi jā̱tā a̱phsu jā̱tāḥ.
yā jā̱tā oṣa̍dhībhyaḥ.
atho̱ yā a̍gni̱jā āpa̍ḥ.
tā na̍ḥ śundhantu̱ śundha̍nīḥ.
yadāpo̱ nakta̍ṃ duri̱taṃ carā̍ma.
yadvā̱ divā̱ nūta̍na̱ṃ yatpu̍rā̱ṇam.
hira̍ṇyavarṇā̱stata̱ utpu̍nīta naḥ.
i̱maṃ me̍ varuṇa̱ tattvā̍ yāmi.
tvanno̍ agne̱ sa tvanno̍ agne.
tvama̍gne a̱yāsi̍..121..

Anuvāka 13

yatte̱ grāvṇṇā̍ cicchi̱duḥ so̍ma rājan.
pri̱yāṇyaṅgā̍ni̱ svadhi̍tā̱ parū̍ṃṣi.
tathsandha̱thsvājye̍no̱ta va̍rdhayasva.
a̱nā̱gaso̱ adha̱mithsa̱ṅkṣaye̍ma.
yatte̱ grāvā̍ bā̱hucyu̍to̱ acu̍cyavuḥ.
naro̱ yatte̍ dudu̱hurdakṣi̍ṇena.
tatta̱ āpyā̍yatā̱ṃ tatte̎.
niṣṭyā̍yatāṃ deva soma.
yatte̱ tvaca̍ṃ bibhi̱duryacca̱ yonim̎.
yadā̱sthānā̱tpracyu̍to̱ vena̍si̱ tmanā̎..122..

tvayā̱ tathso̍ma gu̱ptama̍stu naḥ.
sā na̍ḥ sa̱ndhāsa̍tpara̱me vyo̍man.
ahā̱ccharī̍ra̱ṃ paya̍sā sa̱metya̍.
a̱nyo̎nyo bhavati̱ varṇo̍ asya.
tasmi̍nva̱yamupa̍hūtā̱stava̍ smaḥ.
ā no̍ bhaja̱ sada̍si vi̱śvarū̍pe.
nṛ̱cakṣā̱ḥ soma̍ u̱ta śu̱śruga̍stu.
mā no̱ vi hā̍sī̱dgira̍ āvṛṇā̱naḥ.
anā̍gāsta̱nuvo̍ vāvṛdhā̱naḥ.
ā no̍ rū̱paṃ va̍hatu̱ jāya̍mānaḥ..123..

upa̍ kṣaranti ju̱hvo̍ ghṛ̱tena̍.
pri̱yāṇyaṅgā̍ni̱ tava̍ va̱rdhaya̍ntīḥ.
tasmai̍ te soma̱ nama̱ idvaṣa̍ṭca.
upa̍ mā rājanthsukṛ̱te hva̍yasva.
saṃ prā̍ṇāpā̱nābhyā̱ṃ samu̱ cakṣu̍ṣā̱ tvam.
saṃ śrotre̍ṇa gacchasva soma rājan.
yatta̱ āsthi̍ta̱ṃ śamu̱ tatte̍ astu.
jā̱nī̱tānna̍ḥ sa̱ṅgama̍ne pathī̱nām.
e̱taṃ jā̍nītātpara̱me vyo̍man.
vṛkā̎ḥ sadhasthā vi̱da rū̱pama̍sya..124..

yadā̱gacchā̎tpa̱thibhi̍rdeva̱yānai̎ḥ.
i̱ṣṭā̱pū̱rte kṛ̍ṇutādā̱vira̍smai.
ari̍ṣṭo rājannaga̱daḥ pare̍hi.
nama̍ste astu̱ cakṣa̍se raghūya̱te.
nāka̱māro̍ha sa̱ha yaja̍mānena.
sūrya̍ṃ gacchatātpara̱me vyo̍man.
abhū̎dde̱vaḥ sa̍vi̱tā vandyo̱nu na̍ḥ.
i̱dānī̱mahna̍ upa̱vācyo̱ nṛbhi̍ḥ.
vi yo ratnā̱ bhaja̍ti māna̱vebhya̍ḥ.
śreṣṭha̍ṃ no̱ atra̱ dravi̍ṇa̱ṃ yathā̱ dadha̍t.
upa̍ no mitrāvaruṇāvi̱hāva̍tam.
a̱nvādī̎dhyāthāmi̱ha na̍ḥ sakhāyā.
ā̱di̱tyānā̱ṃ prasi̍tirhe̱tiḥ.
u̱grā śa̱tāpā̎ṣṭhā gha̱viṣā̱ pari̍ ṇo vṛṇaktu.
āpyā̍yasva̱ sante̎..125..

Anuvāka 14

yaddi̍dī̱kṣe mana̍sā̱ yacca̍ vā̱cā.
yadvā̎ prā̱ṇaiścakṣu̍ṣā̱ yacca̱ śrotre̍ṇa.
yadreta̍sā mithu̱nenāpyā̱tmanā̎.
a̱dbhyo lo̱kā da̍dhire̱ teja̍ indri̱yam.
śu̱krā dī̱kṣāyai̱ tapa̍so vi̱moca̍nīḥ.
āpo̍ vimo̱ktrīrmayi̱ teja̍ indri̱yam.
yadṛ̱cā sāmnā̱ yaju̍ṣā.
pa̱śū̱nāṃ carma̍n ha̱viṣā̍ didī̱kṣe.
yacchando̍bhi̱roṣa̍dhībhi̱rvana̱spatau̎.
a̱dbhyo lo̱kā da̍dhire̱ teja̍ indri̱yam..126..

śu̱krā dī̱kṣāyai̱ tapa̍so vi̱moca̍nīḥ.
āpo̍ vimo̱ktrīrmayi̱ teja̍ indri̱yam.
yena̱ brahma̱ yena̍ kṣa̱tram.
yene̎ndrā̱gnī pra̱jāpa̍ti̱ḥ somo̱ varu̍ṇo̱ yena̱ rājā̎.
viśve̍ de̱vā ṛṣa̍yo̱ yena̍ prā̱ṇāḥ.
a̱dbhyo lo̱kā da̍dhire̱ teja̍ indri̱yam.
śu̱krā dī̱kṣāyai̱ tapa̍so vi̱moca̍nīḥ.
āpo̍ vimo̱ktrīrmayi̱ teja̍ indri̱yam.
a̱pāṃ puṣpa̍ma̱syoṣa̍dhīnā̱ṃ rasa̍ḥ.
soma̍sya pri̱yaṃ dhāma̍..127..

a̱gneḥ pri̱yata̍maṃ ha̱viḥ svāhā̎.
a̱pāṃ puṣpa̍ma̱syoṣa̍dhīnā̱ṃ rasa̍ḥ.
soma̍sya pri̱yaṃ dhāma̍.
indra̍sya pri̱yata̍maṃ ha̱viḥ svāhā̎.
a̱pāṃ puṣpa̍ma̱syoṣa̍dhīnā̱ṃ rasa̍ḥ.
soma̍sya pri̱yaṃ dhāma̍.
viśve̍ṣāṃ de̱vānā̎ṃ pri̱yata̍maṃ ha̱viḥ svāhā̎.
va̱yaṃ so̍ma vra̱te tava̍.
mana̍sta̱nūṣu̱ pipra̍taḥ.
pra̱jāva̍nto aśīmahi..128..

de̱vebhya̍ḥ pi̱tṛbhya̱ḥ svāhā̎.
so̱myebhya̍ḥ pi̱tṛbhya̱ḥ svāhā̎.
ka̱vyebhya̍ḥ pi̱tṛbhya̱ḥ svāhā̎.
devā̍sa i̱ha mā̍dayadhvam.
somyā̍sa i̱ha mā̍dayadhvam.
kavyā̍sa i̱ha mā̍dayadhvam.
ana̍ntaritāḥ pi̱tara̍ḥ so̱myāḥ so̍mapī̱thāt.
apai̍tu mṛ̱tyura̱mṛta̍ṃ na̱ āgan̍.
vai̱va̱sva̱to no̱ abha̍yaṃ kṛṇotu.
pa̱rṇaṃ vana̱spate̍riva..129..

a̱bhi na̍ḥ śīyatāṃ ra̱yiḥ.
saca̍tāṃ na̱ḥ śacī̱pati̍ḥ.
para̍ṃ mṛtyo̱ anu̱ pare̍hi̱ panthā̎m.
yaste̱ sva ita̍ro deva̱yānā̎t.
cakṣu̍ṣmate śṛṇva̱te te̎ bravīmi.
mā na̍ḥ pra̱jāṃ rī̍riṣo̱ mota vī̱rān.
i̱damū̱nu śreyo̍va̱sāna̱māga̍nma.
yadgo̱jiddha̍na̱jida̍śva̱jidyat.
pa̱rṇaṃ vana̱spate̍riva.
a̱bhi na̍ḥ śīyatāṃ ra̱yiḥ.
saca̍tāṃ na̱ḥ śacī̱pati̍ḥ..130..

Anuvāka 1

sā̱ṅgra̱ha̱ṇyeṣṭyā̍ yajate.
i̱māñja̱natā̱ṃ saṅgṛ̍hṇā̱nīti̍.
dvāda̍śāratnī raśa̱nā bha̍vati.
dvāda̍śa̱ māsā̎ḥ saṃvathsa̱raḥ.
sa̱ṃva̱thsa̱rame̱vāva̍ rundhe.
mau̱ñjī bha̍vati.
ūrgvai muñjā̎ḥ.
ūrja̍me̱vāva̍ rundhe.
ci̱trā nakṣa̍traṃ bhavati.
ci̱traṃ vā e̱tatkarma̍..1..

yada̍śvame̱dhaḥ samṛ̍ddhyai.
puṇya̍nāma deva̱yaja̍nama̱dhyava̍syati.
puṇyā̍me̱va tena̍ kī̱rtima̱bhi ja̍yati.
apa̍dātīnṛ̱tvija̍ḥ sa̱māva̍ha̱ntyā su̍brahma̱ṇyāyā̎ḥ.
su̱va̱rgasya̍ lo̱kasya̱ sama̍ṣṭyai.
ke̱śa̱śma̱śru va̍pate.
na̱khāni̱ ni kṛ̍ntate.
da̱to dhā̍vate.
snāti̍.
aha̍ta̱ṃ vāsa̱ḥ pari̍dhatte.
pā̱pmano'pa̍hatyai.
vāca̍ṃ ya̱tvopa̍ vasati.
su̱va̱rgasya̍ lo̱kasya̱ guptyai̎.
rātri̍ṃ jāga̱raya̍nta āsate.
su̱va̱rgasya̍ lo̱kasya̱ sama̍ṣṭyai..2..

Anuvāka 2

catu̍ṣṭayya̱ āpo̍ bhavanti.
catu̍ḥ śapho̱ vā aśva̍ḥ prājāpa̱tyaḥ samṛ̍ddhyai.
tā di̱gbhyaḥ sa̱mābhṛ̍tā bhavanti.
di̱kṣu vā āpa̍ḥ.
anna̱ṃ vā āpa̍ḥ.
a̱dbhyo vā anna̍ṃ jāyate.
yade̱vādbhyo'nna̱ṃ jāya̍te.
tadava̍ rundhe.
tāsu̍ brahmauda̱naṃ pa̍cati.
reta̍ e̱va tadda̍dhāti..3..

catu̍ḥ śarāvo bhavati.
di̱kṣve̍va prati̍ tiṣṭhati.
u̱bha̱yato̍ru̱kmau bha̍vataḥ.
u̱bha̱yata̍ e̱vāsmi̱nruca̍ṃ dadhāti.
uddha̍rati śṛta̱tvāya̍.
sa̱rpiṣvā̎nbhavati medhya̱tvāya̍.
ca̱tvāra̍ ārṣe̱yāḥ prāśña̍nti.
di̱śāme̱va jyoti̍ṣi juhoti.
ca̱tvāri̱ hira̍ṇyāni dadāti.
di̱śāme̱va jyotī̱ṃṣyava̍ rundhe..4..

yadājya̍mu̱cchiṣya̍te.
tasmi̍nraśa̱nānyu̍natti.
pra̱jāpa̍ti̱rvā o̍da̱naḥ.
reta̱ ājyam̎.
yadājye̍ raśa̱nānyu̱natti̍.
pra̱jāpa̍time̱va reta̍sā̱ sama̍rdhayati.
da̱rbha̱mayī̍ raśa̱nā bha̍vati.
ba̱hu vā e̱ṣa ku̍ca̱ro̍ me̱dhyamupa̍gacchati.
yadaśva̍ḥ.
pa̱vitra̱ṃ vai da̱rbhāḥ..5..

yadda̍rbha̱mayī̍ raśa̱nā bhava̍ti.
pu̱nātye̱vainam̎.
pū̱tame̍na̱ṃ medhya̱mā la̍bhate.
aśva̍sya̱ vā āla̍bdhasya mahi̱moda̍krāmat.
sa ma̱hartvi̍ja̱ḥ prāvi̍śat.
tanma̱hartvi̍jāṃ mahartvi̱ktvam.
yanma̱hartvi̍jaḥ prā̱śñanti̍.
ma̱hi̱māna̍me̱vāsmi̱ntadda̍dhati.
aśva̍sya̱ vā āla̍bdhasya̱ reta̱ uda̍krāmat.
tathsu̱varṇa̱ṃ hira̍ṇyamabhavat.
yathsu̱varṇa̱ṃ hira̍ṇya̱ṃ dadā̍ti.
reta̍ e̱va tadda̍dhāti.
o̱da̱ne da̍dāti.
reto̱ vā o̍da̱naḥ.
reto̱ hira̍ṇyam.
reta̍sai̱vāsmi̱nreto̍ dadhāti..6..

Anuvāka 3

yo vai brahma̍ṇe de̱vebhya̍ḥ pra̱jāpa̍ta̱ye'pra̍tipro̱cyāśva̱ṃ medhya̍ṃ ba̱dhnāti̍.
ā de̱vatā̎bhyo vṛścyate.
pāpī̍yānbhavati.
yaḥ pra̍ti̱procya̍.
na de̱vatā̎bhya̱ āvṛ̍ścyate.
vasī̍yānbhavati.
yadāha̍.
brahma̱nnaśva̱ṃ medhya̍ṃ bhanthsyāmi de̱vebhya̍ḥ pra̱jāpa̍taye̱ tena̍ rādhyāsa̱miti̍.
brahma̱ vai bra̱hmā.
brahma̍ṇa e̱va de̱vebhya̍ḥ pra̱jāpa̍taye prati̱procyāśva̱ṃ medhya̍ṃ badhnāti..7..

na de̱vatā̎bhya̱ ā vṛ̍ścyate.
vasī̍yānbhavati.
de̱vasya̍ tvā savi̱tuḥ pra̍sa̱va iti̍ raśa̱nāmāda̍tte̱ prasū̎tyai.
a̱śvino̎rbā̱hubhyā̱mityā̍ha.
a̱śvinau̱ hi de̱vānā̍madhva̱ryū āstā̎m.
pū̱ṣṇo hastā̎bhyā̱mityā̍ha̱ yatyai̎.
vyṛ̍ddha̱ṃ vā e̱tadya̱jñasya̍.
yada̍ya̱juṣke̍ṇa kri̱yate̎.
i̱māma̍gṛbhṇanraśa̱nāmṛ̱tasyetyadhi̍ vadati̱ yaju̍ṣkṛtyai.
ya̱jñasya̱ samṛ̍ddhyai..8..

tadā̍huḥ.
dvāda̍śāratnī raśa̱nā ka̍rta̱vyā(3) trayo̍daśāra̱tnī(3)riti̍.
ṛ̱ṣa̱bho vā e̱ṣa ṛ̍tū̱nām.
yathsa̍ṃvathsa̱raḥ.
tasya̍ trayoda̱śo māso̍ vi̱ṣṭapam̎.
ṛ̱ṣa̱bha e̱ṣa ya̱jñānā̎m.
yada̍śvame̱dhaḥ.
yathā̱ vā ṛ̍ṣa̱bhasya̍ vi̱ṣṭapam̎.
e̱vame̱tasya̍ vi̱ṣṭapam̎.
tra̱yo̱da̱śama̍ra̱tniṃ ra̍śa̱nāyā̍mu̱pā da̍dhāti..9..

yatha̍rṣa̱bhasya̍ vi̱ṣṭapa̍ṃ saṃska̱roti̍.
tā̱dṛge̱va tat.
pūrva̱ āyu̍ṣi vi̱dathe̍ṣu ka̱vyetyā̍ha.
āyu̍re̱vāsmi̍ndadhāti.
tayā̍ de̱vāḥ su̱tamā ba̍bhūvu̱rityā̍ha.
bhūti̍me̱vopāva̍rtate.
ṛ̱tasya̱ sāma̎nthsa̱ramā̱rapa̱ntītyā̍ha.
sa̱tyaṃ vā ṛ̱tam.
sa̱tyenai̱vaina̍mṛ̱tenāra̍bhate.
a̱bhi̱dhā a̱sītyā̍ha..10..

tasmā̍daśvamedhayā̱jī sarvā̍ṇi bhū̱tānya̱bhi bha̍vati.
bhuva̍nama̱sītyā̍ha.
bhū̱māna̍me̱vopai̍ti.
ya̱ntā'sītyā̍ha.
ya̱ntāra̍me̱vaina̍ṃ karoti.
dha̱rtā'sītyā̍ha.
dha̱rtāra̍me̱vaina̍ṃ karoti.
so̎'gniṃ vai̎śvāna̱ramityā̍ha.
a̱gnāve̱vaina̍ṃ vaiśvāna̱re ju̍hoti.
sapra̍thasa̱mityā̍ha..11..

pra̱jayai̱vaina̍ṃ pa̱śubhi̍ḥ prathayati.
svāhā̍kṛta̱ ityā̍ha.
homa̍ e̱vāsyai̱ṣaḥ.
pṛ̱thi̱vyāmityā̍ha.
a̱syāme̱vaina̱ṃ prati̍ṣṭhāpayati.
ya̱ntā rāḍya̱ntā'si̱ yama̍no dha̱rtā'si̍ dha̱ruṇa̱ ityā̍ha.
rū̱pame̱vāsyai̱tanma̍hi̱māna̱ṃ vyāca̍ṣṭe.
kṛ̱ṣyai tvā̱ kṣemā̍ya tvā ra̱yyai tvā̱ poṣā̍ya̱ tvetyā̍ha.
ā̱me̱vaitāmā śā̎ste.
sva̱gā tvā̍ de̱vebhya̱ ityā̍ha.
de̱vebhya̍ e̱vaina̍ṃ sva̱gā ka̍roti.
svāhā̎ tvā pra̱jāpa̍taya̱ ityā̍ha.
prā̱jā̱pa̱tyo vā aśva̍ḥ.
yasyā̍ e̱va de̱vatā̍yā āla̱bhyate̎.
tayai̱vaina̱ṃ sama̍rdhayati..12..

Anuvāka 4

yaḥ pi̱tura̍nu̱jāyā̎ḥ pu̱traḥ.
sa pu̱rastā̎nnayati.
yo mā̱tura̍nu̱jāyā̎ḥ pu̱traḥ.
sa pa̱ścānna̍yati.
viṣva̍ñcame̱vāsmā̎tpā̱pmāna̱ṃ vivṛ̍hataḥ.
yo arva̍nta̱ṃ jighā̍ṃsati̱ tama̱bhya̍mīti̱ varu̍ṇa̱ iti̱ śvāna̍ṃ catura̱kṣaṃ prasau̍ti.
pa̱ro marta̍ḥ pa̱raḥ śveti̱ śuna̍ścatura̱kṣasya̱ praha̍nti.
śveva̱ vai pā̱pmā bhrātṛ̍vyaḥ.
pā̱pmāna̍me̱vāsya̱ bhrātṛ̍vyaṃ hanti.
sai̱dhra̱kaṃ musa̍laṃ bhavati..13..

karma̍karmai̱vāsmai̍ sādhayati.
pau̱ṃśca̱le̱yo ha̍nti.
pu̱ṃśca̱lvāṃ vai de̱vāḥ śuca̱ṃ nya̍dadhuḥ.
śu̱caivāsya̱ śuca̍ṃ hanti.
pā̱pmā vā e̱tamī̎phsa̱tītyā̍huḥ.
yo̎'śvame̱dhena̱ yaja̍ta̱ iti̍.
aśva̍syādhaspa̱damupā̎syati.
va̱jrī vā aśva̍ḥ prājāpa̱tyaḥ.
vajre̍ṇai̱va pā̱pmāna̱ṃ bhrātṛ̍vya̱mava̍krāmati.
da̱kṣi̱ṇā'pa̍ plāvayati..14..

pā̱pmāna̍me̱vāsmā̱cchama̍la̱mapa̍ plāvayati.
ai̱ṣī̱ka u̍dū̱ho bha̍vati.
āyu̱rvā i̱ṣīkā̎ḥ.
āyu̍re̱vāsmi̍ndadhati.
a̱mṛta̱ṃ vā i̱ṣīkā̎ḥ.
a̱mṛta̍me̱vāsmi̍ndadhati.
ve̱ta̱sa̱śā̱khopa̱samba̍ddhā bhavati.
a̱phsuyo̍ni̱rvā aśva̍ḥ.
a̱phsu̱jo ve̍ta̱saḥ.
svāde̱vaina̱ṃ yone̱rnirmi̍mīte.
pu̱rastā̎tpra̱tyañca̍ma̱bhyudū̍hati.
pu̱rastā̍de̱vāsmi̍npra̱tīcya̱mṛta̍ṃ dadhāti.
a̱haṃ ca̱ tvaṃ ca̍ vṛtraha̱nniti̍ bra̱hmā yaja̍mānasya̱ hasta̍ṃ gṛhṇāti.
bra̱hma̱kṣa̱tre e̱va sanda̍dhāti.
a̱bhikratve̎ndra bhū̱radha̱jmannitya̍dhva̱ryuryaja̍mānaṃ vācayatya̱bhiji̍tyai..15..

Anuvāka 5

ca̱tvāra̍ ṛ̱tvija̱ḥ samu̍kṣanti.
ā̱bhya e̱vaina̍ṃ cata̱sṛbhyo̍ di̱gbhyo̍'bhi samī̍rayanti.
śa̱tena̍ rājapu̱traiḥ sa̱hādhva̱ryuḥ.
pu̱rastā̎tpra̱tyaṅtiṣṭha̱nprokṣa̍ti.
a̱nenāśve̍na̱ medhye̍ne̱ṣṭvā.
a̱yaṃ rājā̍ vṛ̱traṃ va̍dhyā̱diti̍.
rā̱jyaṃ vā a̍dhva̱ryuḥ.
kṣa̱traṃ rā̍japu̱traḥ.
rā̱jyenai̱vāsmi̍nkṣa̱traṃ da̍dhāti.
śa̱tenā̍rā̱jabhi̍ru̱graiḥ sa̱ha bra̱hmā..16..

da̱kṣi̱ṇa̱ta uda̱ṅtiṣṭha̱nprokṣa̍ti.
a̱nenāśve̍na̱ medhye̍ne̱ṣṭvā.
a̱yaṃ rājā̎'pratidhṛ̱ṣyo̎'stviti̍.
bala̱ṃ vai bra̱hmā.
bala̍marā̱jograḥ.
bale̍nai̱vāsmi̱nbala̍ṃ dadhāti.
śa̱tena̍ sūtagrāma̱ṇibhi̍ḥ sa̱ha hotā̎.
pa̱ścātprāṅtiṣṭha̱nprokṣa̍ti.
a̱nenāśve̍na̱ medhye̍ne̱ṣṭvā.
a̱yaṃ rājā̱'syai vi̱śaḥ..17..

ba̱hu̱gvai ba̍hva̱śvāyai̍ bahvajāvi̱kāyai̎.
ba̱hu̱vrī̱hi̱ya̱vāyai̍ bahumāṣati̱lāyai̎.
ba̱hu̱hi̱ra̱ṇyāyai̍ bahuha̱stikā̍yai.
ba̱hu̱dā̱sa̱pū̱ru̱ṣāyai̍ rayi̱matyai̱ puṣṭi̍matyai.
ba̱hu̱rā̱ya̱spo̱ṣāyai̱ rājā̱stviti̍.
bhū̱mā vai hotā̎.
bhū̱mā sū̍tagrāma̱ṇya̍ḥ.
bhū̱mnaivāsmi̍nbhū̱māna̍ṃ dadhāti.
śa̱tena̍ kṣattasaṅgrahī̱tṛbhi̍ḥ sa̱hodgā̱tā.
u̱tta̱ra̱to da̍kṣi̱ṇā tiṣṭha̱nprokṣa̍ti..18..

a̱nenāśve̍na̱ medhye̍ne̱ṣṭvā.
a̱yaṃ rājā̱ sarva̱māyu̍re̱tviti̍.
āyu̱rvā u̍dgā̱tā.
āyu̍ḥ kṣattasaṅgrahī̱tāra̍ḥ.
āyu̍ṣai̱vāsmi̱nnāyu̍rdadhāti.
śa̱taṃśa̍taṃ bhavanti.
śa̱tāyu̱ḥ puru̍ṣaḥ śa̱tendri̍yaḥ.
āyu̍ṣye̱vendri̱ye prati̍ tiṣṭhati.
ca̱tu̱ḥ śa̱tā bha̍vanti.
cata̍sro̱ diśa̍ḥ.
di̱kṣve̍va prati̍ tiṣṭhati..19..

Anuvāka 6

yathā̱ vai ha̱viṣo̍ gṛhī̱tasya̱ skanda̍ti.
e̱vaṃ vā e̱tadaśva̍sya skandati.
yanni̱ktamanā̍labdhamuthsṛ̱janti̍.
yathstokyā̍ a̱nvāha̍.
sa̱rva̱huta̍me̱vaina̍ṃ karo̱tyaska̍ndāya.
aska̍nna̱ṃ hi tat.
yaddhu̱tasya̱ skanda̍ti.
sa̱hasra̱manvā̍ha.
sa̱hasra̍sammitaḥ suva̱rgo lo̱kaḥ.
su̱va̱rgasya̍ lo̱kasyā̱bhiji̍tyai..20..

yatpari̍mitā anubrū̱yāt.
pari̍mita̱mava̍ rundhīta.
apa̍rimitā̱ anvā̍ha.
apa̍rimitaḥ suva̱rgo lo̱kaḥ.
su̱va̱rgasya̍ lo̱kasya̱ sama̍ṣṭyai.
stokyā̍ juhoti.
yā e̱va varṣyā̱ āpa̍ḥ.
tā ava̍ rundhe.
a̱syāṃ ju̍hoti.
i̱yaṃ vā a̱gnirvai̎śvāna̱raḥ..21..

a̱syāme̱vainā̱ḥ prati̍ṣṭhāpayati.
u̱vāca̍ ha pra̱jāpa̍tiḥ.
stokyā̍su̱ vā a̱hama̍śvame̱dhaṃ saṃsthā̍payāmi.
tena̱ tata̱ḥ saṃsthi̍tena carā̱mīti̍.
a̱gnaye̱ svāhetyā̍ha.
a̱gnaya̍ e̱vaina̍ṃ juhoti.
somā̍ya̱ svāhetyā̍ha.
somā̍yai̱vaina̍ṃ juhoti.
sa̱vi̱tre svāhetyā̍ha.
sa̱vi̱tra e̱vaina̍ṃ juhoti..22..

sara̍svatyai̱ svāhetyā̍ha.
sara̍svatyā e̱vaina̍ṃ juhoti.
pū̱ṣṇe svāhetyā̍ha.
pū̱ṣṇa e̱vaina̍ṃ juhoti.
bṛha̱spata̍ye̱ svāhetyā̍ha.
bṛha̱spata̍ya e̱vaina̍ṃ juhoti.
a̱pāṃ modā̍ya̱ svāhetyā̍ha.
a̱dbhya e̱vaina̍ṃ juhoti.
vā̱yave̱ svāhetyā̍ha.
vā̱yava̍ e̱vaina̍ṃ juhoti..23..

mi̱trāya̱ svāhetyā̍ha.
mi̱trāyai̱vaina̍ṃ juhoti.
varu̍ṇāya̱ svāhetyā̍ha.
varu̍ṇāyai̱vaina̍ṃ juhoti.
e̱tābhya̍ e̱vaina̍ṃ de̱vatā̎bhyo juhoti.
daśa̍daśa sa̱mpāda̍ṃ juhoti.
daśā̎kṣarā vi̱rāṭ.
anna̍ṃ vi̱rāṭ.
vi̱rājai̱vānnādya̱mava̍ rundhe.
pra vā e̱ṣo̎'smāllo̱kāccya̍vate.
yaḥ parā̍cī̱rāhu̍tīrju̱hoti̍.
puna̍ḥ punarabhyā̱varta̍ṃ juhoti.
a̱sminne̱va lo̱ke prati̍ tiṣṭhati.
e̱tāṃ ha̱ vāva so̎'śvame̱dhasya̱ saṃsthi̍timuvā̱cāska̍ndāya.
aska̍nna̱ṃ hi tat.
yadya̱jñasya̱ saṃsthi̍tasya̱ skanda̍ti..24..

Anuvāka 7

pra̱jāpa̍taye tvā̱ juṣṭa̱ṃ prokṣā̱mīti̍ pu̱rastā̎tpra̱tyaṅtiṣṭha̱nprokṣa̍ti.
pra̱jāpa̍ti̱rvai de̱vānā̍mannā̱do vī̱ryā̍vān.
a̱nnādya̍me̱vāsmi̍nvī̱rya̍ṃ dadhāti.
tasmā̱daśva̍ḥ paśū̱nāma̍nnā̱do vī̱ryā̍vattamaḥ.
i̱ndrā̱gnibhyā̱ṃ tveti̍ dakṣiṇa̱taḥ.
i̱ndrā̱gnī vai de̱vānā̱moji̍ṣṭhau̱ bali̍ṣṭhau.
oja̍ e̱vāsmi̱nbala̍ṃ dadhāti.
tasmā̱daśva̍ḥ paśū̱nāmoji̍ṣṭho̱ bali̍ṣṭhaḥ.
vā̱yave̱ tveti̍ pa̱ścāt.
vā̱yurvai de̱vānā̍mā̱śuḥ sā̍rasā̱rita̍maḥ..25..

ja̱vame̱vāsmi̍ndadhāti.
tasmā̱daśva̍ḥ paśū̱nāmā̱śuḥ sā̍rasā̱rita̍maḥ.
viśve̎bhyastvā de̱vebhya̱ ityu̍ttara̱taḥ.
viśve̱ vai de̱vā de̱vānā̎ṃ yaśa̱svita̍māḥ.
yaśa̍ e̱vāsmi̍ndadhāti.
tasmā̱daśva̍ḥ paśū̱nāṃ ya̍śa̱svita̍maḥ.
de̱vebhya̱stvetya̱dhastā̎t.
de̱vā vai de̱vānā̱mapa̍citatamāḥ.
apa̍citime̱vāsmi̍ndadhāti.
tasmā̱daśva̍ḥ paśū̱nāmapa̍citatamaḥ..26..

sarve̎bhyastvā de̱vebhya̱ ityu̱pari̍ṣṭāt.
sarve̱ vai de̱vāstviṣi̍manto hara̱svina̍ḥ.
tviṣi̍me̱vāsmi̱ṉ haro̍ dadhāti.
tasmā̱daśva̍ḥ paśū̱nāṃ tviṣi̍mān hara̱svita̍maḥ.
di̱ve tvā̱'ntari̍kṣāya tvā pṛthi̱vyai tvetyā̍ha.
e̱bhya e̱vaina̍ṃ lo̱kebhya̱ḥ prokṣa̍ti.
sa̱te tvā'sa̍te tvā̱'dbhyastvauṣa̍dhībhyastvā̱ viśve̎bhyastvā bhū̱tebhya̱ ityā̍ha.
tasmā̍daśvamedhayā̱jina̱ṃ sarvā̍ṇi bhū̱tānyupa̍jīvanti.
bra̱hma̱vā̱dino̍ vadanti.
yatprā̍jāpa̱tyo'śva̍ḥ.
atha̱ kasmā̍denama̱nyābhyo̍ de̱vatā̱bhyo'pi̱ prokṣa̱tīti̍.
aśve̱ vai sarvā̍ de̱vatā̍ a̱nvāya̍ttāḥ.
taṃ yadviśve̎bhyastvā bhū̱tebhya̱ iti̍ pro̱kṣati̍.
de̱vatā̍ e̱vāsmi̍nna̱nvā yā̍tayati.
tasmā̱daśve̱ sarvā̍ de̱vatā̍ a̱nvāya̍ttāḥ..27..

Anuvāka 8

yathā̱ vai ha̱viṣo̍ gṛhī̱tasya̱ skanda̍ti.
e̱vaṃ vā e̱tadaśva̍sya skandati.
yatprokṣi̍ta̱manā̍labdhamuthsṛ̱janti̍.
yada̍śvacari̱tāni̍ ju̱hoti̍.
sa̱rva̱huta̍me̱vaina̍ṃ karo̱tyaska̍ndāya.
aska̍nna̱ṃ hi tat.
yaddhu̱tasya̱ skanda̍ti.
ī̱ṅkā̱rāya̱ svāheṅkṛ̍tāya̱ svāhetyā̍ha.
e̱tāni̱ vā a̍śvacari̱tāni̍.
ca̱ri̱taire̱vaina̱ṃ sama̍rdhayati..28..

tadā̍huḥ.
anā̍hutayo̱ vā a̍śvacari̱tāni̍.
naitā ho̍ta̱vyā̍ iti̍.
atho̱ khalvā̍huḥ.
ho̱ta̱vyā̍ e̱va.
atra̱ vāvaivaṃ vi̱dvāna̍śvame̱dhaṃ saṃsthā̍payati.
yada̍śvacari̱tāni̍ ju̱hoti̍.
tasmā̎ddhota̱vyā̍ iti̍.
ba̱hi̱rdhā vā e̍name̱tadā̱yata̍nāddadhāti.
bhrātṛ̍vyamasmai janayati..29..

yasyā̍nāyata̱ne̎'nyatrā̱gnerāhu̍tīrju̱hoti̍.
sā̱vi̱tri̱yā iṣṭyā̎ḥ pu̱rastā̎thsviṣṭa̱kṛta̍ḥ.
ā̱ha̱va̱nīye̎'śvacari̱tāni̍ juhoti.
ā̱yata̍na e̱vāsyā''hu̍tīrjuhoti.
nāsmai̱ bhrātṛ̍vyaṃ janayati.
tadā̍huḥ.
ya̱jña̱mu̱kheya̍jñamukhe hota̱vyā̎ḥ.
ya̱jñasya̱ kḷptyai̎.
su̱va̱rgasya̍ lo̱kasyānu̍khyātyā̱ iti̍.
atho̱ khalvā̍huḥ..30..

yadya̍jñamu̱kheya̍jñamukhe juhu̱yāt.
pa̱śubhi̱ryaja̍māna̱ṃ vya̍rdhayet.
ava̍ suva̱rgāllo̱kātpa̍dyeta.
pāpī̍yānthsyā̱diti̍.
sa̱kṛde̱va ho̍ta̱vyā̎ḥ.
na yaja̍mānaṃ pa̱śubhi̱rvya̍rdhayati.
a̱bhi su̍va̱rgaṃ lo̱kaṃ ja̍yati.
na pāpī̍yānbhavati.
a̱ṣṭāca̍tvāriṃśatamaśvarū̱pāṇi̍ juhoti.
a̱ṣṭāca̍tvāriṃśadakṣarā̱ jaga̍tī.
jāga̱to'śva̍ḥ prājāpa̱tyaḥ samṛ̍ddhyai.
eka̱mati̍riktaṃ juhoti.
tasmā̱deka̍ḥ pra̱jāsvardhu̍kaḥ..31..

Anuvāka 9

vi̱bhūrmā̱trā pra̱bhūḥ pi̱tretyā̍ha.
i̱yaṃ vai mā̱tā.
a̱sau pi̱tā.
ā̱bhyāme̱vaina̱ṃ pari̍dadāti.
aśvo̍'si̱ hayo̱'sītyā̍ha.
śāstye̱vaina̍me̱tat.
tasmā̎cchi̱ṣṭāḥ pra̱jā jā̍yante.
atyo̱'sītyā̍ha.
tasmā̱daśva̱ḥ sarvā̎npa̱śūnatye̍ti.
tasmā̱daśva̱ḥ sarve̍ṣāṃ paśū̱nāṃ śraiṣṭhya̍ṃ gacchati..32..

pra yaśa̱ḥ śraiṣṭhya̍māpnoti.
ya e̱vaṃ veda̍.
naro̱'syarvā̍'si̱ sapti̍rasi vā̱jya̍sītyā̍ha.
rū̱pame̱vāsyai̱tanma̍hi̱māna̱ṃ vyāca̍ṣṭe.
yayu̱rnāmā̱sītyā̍ha.
e̱tadvā aśva̍sya pri̱yaṃ nā̍ma̱dheyam̎.
pri̱yeṇai̱vaina̍ṃ nāma̱dheye̍nā̱bhi va̍dati.
tasmā̱dapyā̍mi̱trau sa̱ṅgatya̍.
nāmnā̱ ceddhvaye̍te.
mi̱trame̱va bha̍vataḥ..33..

ā̱di̱tyānā̱ṃ patvā'nvi̱hītyā̍ha.
ā̱di̱tyāne̱vaina̍ṃ gamayati.
a̱gnaye̱ svāhā̱ svāhe̎ndrā̱gnibhyā̱miti̍ pūrvaho̱māṃ ju̍hoti.
pūrva̍ e̱va dvi̱ṣanta̱ṃ bhrātṛ̍vya̱mati̍ krāmati.
bhūra̍si bhu̱ve tvā̱ bhavyā̍ya tvā bhaviṣya̱te tvetyuthsṛ̍jati sarva̱tvāya̍.
devā̍ āśāpālā e̱taṃ de̱vebhyo'śva̱ṃ medhā̍ya̱ prokṣi̍taṃ gopāya̱tetyā̍ha.
śa̱taṃ vai talpyā̍ rājapu̱trā de̱vā ā̍śāpā̱lāḥ.
tebhya̍ e̱vaina̱ṃ pari̍ dadāti.
ī̱śva̱ro vā aśva̱ḥ pramu̍kta̱ḥ parā̎ṃ parā̱vata̱ṃ ganto̎ḥ.
i̱ha dhṛti̱ḥ svāhe̱ha vidhṛ̍ti̱ḥ svāhe̱ha ranti̱ḥ svāhe̱ha rama̍ti̱ḥ svāheti̍ catṛ̱ṣu pa̱thsu ju̍hoti..34..

e̱tā vā aśva̍sya̱ bandha̍nam.
tābhi̍re̱vaina̍ṃ badhnāti.
tasmā̱daśva̱ḥ pramu̍kto̱ bandha̍na̱mā ga̍cchati.
tasmā̱daśva̱ḥ pramu̍kto̱ bandha̍na̱ṃ na ja̍hāti.
rā̱ṣṭraṃ vā a̍śvame̱dhaḥ.
rā̱ṣṭre khalu̱ vā e̱te vyāya̍cchante.
ye'śva̱ṃ medhya̱ṃ rakṣa̍nti.
teṣā̱ṃ ya u̱dṛca̱ṃ gaccha̍nti.
rā̱ṣṭrāde̱va te rā̱ṣṭraṃ ga̍cchanti.
atha̱ ya u̱dṛca̱ṃ na gaccha̍nti..35..

rā̱ṣṭrāde̱va te vyava̍cchidyante.
parā̱ vā e̱ṣa si̍cyate.
yo̍'ba̱lo̎'śvame̱dhena̱ yaja̍te.
yada̱mitrā̱ aśva̍ṃ vi̱nderan̍.
ha̱nyetā̎sya ya̱jñaḥ.
ca̱tu̱ḥ śa̱tā ra̍kṣanti.
ya̱jñasyāghā̍tāya.
athā̱nyamā̱nīya̱ prokṣe̍yuḥ.
saiva tata̱ḥ prāya̍ścittiḥ..36..

Anuvāka 10

pra̱jāpa̍tirakāmayatāśvame̱dhena̍ yaje̱yeti̍.
sa tapo̍'tapyata.
tasya̍ tepā̱nasya̍.
sa̱ptā''tmano̍ de̱vatā̱ uda̍krāman.
sā dī̱kṣā'bha̍vat.
sa e̱tāni̍ vaiśvade̱vānya̍paśyat.
tānya̍juhot.
tairvai sa dī̱kṣāmavā̍rundha.
yadvai̎śvade̱vāni̍ ju̱hoti̍.
dī̱kṣāme̱va tairyaja̍mā̱no'va̍ rundhe..37..

sa̱pta ju̍hoti.
sa̱pta hi tā de̱vatā̍ u̱dakrā̍man.
a̱nva̱haṃ ju̍hoti.
a̱nva̱hame̱va dī̱kṣāmava̍ rundhe.
trīṇi̍ vaiśvade̱vāni̍ juhoti.
ca̱tvāryau̎dgraha̱ṇāni̍.
sa̱pta saṃ pa̍dyante.
sa̱pta vai śī̍rṣa̱ṇyā̎ḥ prā̱ṇāḥ.
prā̱ṇā dī̱kṣā.
prā̱ṇaire̱va prā̱ṇāndī̱kṣāmava̍ rundhe..38..

eka̍viṃśatiṃ vaiśvade̱vāni̍ juhoti.
eka̍viṃśati̱rvai de̍valo̱kāḥ.
dvāda̍śa̱ māsā̱ḥ pañca̱rtava̍ḥ.
traya̍ i̱me lo̱kāḥ.
a̱sāvā̍di̱tya e̍kavi̱ṃśaḥ.
e̱ṣa su̍va̱rgo lo̱kaḥ.
taddaivya̍ṃ kṣa̱tram.
sā śrīḥ.
tadbra̱dhnasya̍ vi̱ṣṭapam̎.
tathsvārā̎jyamucyate..39..

tri̱ṃśata̍maudgraha̱ṇāni̍ juhoti.
tri̱ṃśada̍kṣarā vi̱rāṭ.
anna̍ṃ vi̱rāṭ.
vi̱rājai̱vānnādya̱mava̍ rundhe.
tre̱dhā vi̱bhajya̍ de̱vatā̎ṃ juhoti.
tryā̍vṛto̱ vai de̱vāḥ.
tryā̍vṛta i̱me lo̱kāḥ.
e̱ṣāṃ lo̱kānā̱māptyai̎.
e̱ṣāṃ lo̱kānā̱ṃ kḷptyai̎.
apa̱ vā e̱tasmā̎tprā̱ṇāḥ krā̍manti..40..

yo dī̱kṣāma̍tire̱caya̍ti.
sa̱ptā̱haṃ praca̍ranti.
sa̱pta vai śī̍rṣa̱ṇyā̎ḥ prā̱ṇāḥ.
prā̱ṇā dī̱kṣā.
prā̱ṇaire̱va prā̱ṇāndī̱kṣāmava̍ rundhe.
pū̱rṇā̱hu̱timu̍tta̱māṃ ju̍hoti.
sarva̱ṃ vai pū̎rṇāhu̱tiḥ.
sarva̍me̱vāpno̍ti.
atho̍ i̱yaṃ vai pū̎rṇāhu̱tiḥ.
a̱syāme̱va prati̍ tiṣṭhati..41..

Anuvāka 11

pra̱jāpa̍tiraśvame̱dhama̍sṛjata.
taṃ sṛ̱ṣṭaṃ na kiñca̱noda̍yacchat.
taṃ vai̎śvade̱vānye̱voda̍yacchan.
yadvai̎śvade̱vāni̍ ju̱hoti̍.
ya̱jñasyodya̍tyai.
svāhā̱''dhimādhī̍tāya̱ svāhā̎.
svāhā'dhī̍ta̱ṃ mana̍se̱ svāhā̎.
svāhā̱ mana̍ḥ pra̱jāpa̍taye̱ svāhā̎.
kāya̱ svāhā̱ kasmai̱ svāhā̍ kata̱masmai̱ svāheti̍ prājāpa̱tye mukhye̍ bhavataḥ.
pra̱jāpa̍timukhābhire̱vaina̍ṃ de̱vatā̍bhi̱rudya̍cchate..42..

adi̍tyai̱ svāhā'di̍tyai ma̱hyai̎ svāhā'di̍tyai sumṛḍī̱kāyai̱ svāhetyā̍ha.
i̱yaṃ vā adi̍tiḥ.
a̱syā e̱vaina̍ṃ prati̱ṣṭhāyodya̍cchate.
sara̍svatyai̱ svāhā̱ sara̍svatyai bṛha̱tyai̎ svāhā̱ sara̍svatyai pāva̱kāyai̱ svāhetyā̍ha.
vāgvai sara̍svatī.
vā̱caivaina̱mudya̍cchate.
pū̱ṣṇe svāhā̍ pū̱ṣṇe pra̍pa̱thyā̍ya̱ svāhā̍ pū̱ṣṇe na̱randhi̍ṣāya̱ svāhetyā̍ha.
pa̱śavo̱ vai pū̱ṣā.
pa̱śubhi̍re̱vaina̱mudya̍cchate.
tvaṣṭre̱ svāhā̱ tvaṣṭre̍ tu̱rīpā̍ya̱ svāhā̱ tvaṣṭre̍ puru̱rūpā̍ya̱ svāhetyā̍ha.
tvaṣṭā̱ vai pa̍śū̱nāṃ mi̍thu̱nānā̍ṃ rūpa̱kṛt.
rū̱pame̱va pa̱śuṣu̍ dadhāti.
atho̍ rū̱paire̱vaina̱mudya̍cchate.
viṣṇa̍ve̱ svāhā̱ viṣṇa̍ve nikhurya̱pāya̱ svāhā̱ viṣṇa̍ve nibhūya̱pāya̱ svāhetyā̍ha.
ya̱jño vai viṣṇu̍ḥ.
ya̱jñāyai̱vaina̱mudya̍cchate.
pū̱rṇā̱hu̱timu̍tta̱māṃ ju̍hoti.
pratyutta̍bdhyai saya̱tvāya̍..43..

Anuvāka 12

sā̱vi̱trama̱ṣṭāka̍pālaṃ prā̱tarnirva̍pati.
a̱ṣṭākṣa̍rā gāya̱trī.
gā̱ya̱traṃ prā̍taḥ sava̱nam.
prā̱ta̱ḥ sa̱va̱nāde̱vaina̍ṃ gāyatri̱yāśchanda̱so'dhi̱ nirmi̍mīte.
atho̎ prātaḥ sava̱name̱va tenā̎''pnoti.
gā̱ya̱trīṃ chanda̍ḥ.
sa̱vi̱tre pra̍savi̱tra ekā̍daśakapālaṃ ma̱dhyandi̍ne.
ekā̍daśākṣarā tri̱ṣṭup.
traiṣṭu̍bha̱ṃ mādhya̍ṃ dina̱ṃ sava̍nam.
mādhya̍ṃ dināde̱vaina̱ṃ sava̍nāttri̱ṣṭubha̱śchanda̱so'dhi̱ nirmi̍mīte..44..

atho̱ mādhya̍ṃ diname̱va sava̍na̱ṃ tenā̎''pnoti.
tri̱ṣṭubha̱ṃ chanda̍ḥ.
sa̱vi̱tra ā̍savi̱tre dvāda̍śakapālamaparā̱hṇe.
dvāda̍śākṣarā̱ jaga̍tī.
jāga̍taṃ tṛtīyasava̱nam.
tṛ̱tī̱ya̱sa̱va̱nāde̱vaina̱ṃ jaga̍tyā̱śchanda̱so'dhi̱ nirmi̍mīte.
atho̍ tṛtīyasava̱name̱va tenā̎''pnoti.
jaga̍tī̱ṃ chanda̍ḥ.
ī̱śva̱ro vā aśva̱ḥ pramu̍kta̱ḥ parā̎ṃ parā̱vata̱ṃ ganto̎ḥ.
i̱ha dhṛti̱ḥ svāhe̱ha vidhṛ̍ti̱ḥ svāhe̱ha ranti̱ḥ svāhe̱ha rama̍ti̱ḥ svāheti̱ cata̍sra̱ āhu̍tīrjuhoti..45..

cata̍sro̱ diśa̍ḥ.
di̱gbhire̱vaina̱ṃ pari̍gṛhṇāti.
āśva̍ttho vra̱jo bha̍vati.
pra̱jāpa̍tirde̱vebhyo̱ nilā̍yata.
aśvo̍ rū̱paṃ kṛ̱tvā.
so̎'śva̱tthe sa̍ṃvathsa̱rama̍tiṣṭhat.
tada̍śva̱tthasyā̎śvattha̱tvam.
yadāśva̍ttho vra̱jo bhava̍ti.
sva e̱vaina̱ṃ yonau̱ prati̍ṣṭhāpayati..46..

Anuvāka 13

ā brahma̍nbrāhma̱ṇo bra̍hmavarca̱sī jā̍yatā̱mityā̍ha.
brā̱hma̱ṇa e̱va bra̍hmavarca̱saṃ da̍dhāti.
tasmā̎tpu̱rā brā̎hma̱ṇo bra̍hmavarca̱sya̍jāyata.
ā'sminrā̱ṣṭre rā̍ja̱nya̍ iṣa̱vya̍ḥ śūro̍ mahāra̱tho jā̍yatā̱mityā̍ha.
rā̱ja̱nya̍ e̱va śau̱ryaṃ ma̍hi̱māna̍ṃ dadhāti.
tasmā̎tpu̱rā rā̍ja̱nya̍ iṣa̱vya̍ḥ śūro̍ mahāra̱tho̍'jāyata.
dogdhrī̍ dhe̱nurityā̍ha.
dhe̱nvāme̱va payo̍ dadhāti.
tasmā̎tpu̱rā dogdhrī̍ dhe̱nura̍jāyata.
voḍhā̍'na̱ḍvānityā̍ha..47..

a̱na̱ḍuhye̱va vī̱rya̍ṃ dadhāti.
tasmā̎tpu̱rā voḍhā̍'na̱ḍvāna̍jāyata.
ā̱śuḥ sapti̱rityā̍ha.
aśva̍ e̱va ja̱vaṃ da̍dhāti.
tasmā̎tpu̱rā''śuraśvo̍'jāyata.
pura̍ndhi̱ryoṣetyā̍ha.
yo̱ṣitye̱va rū̱paṃ da̍dhāti.
tasmā̱thstrī yu̍va̱tiḥ pri̱yā bhāvu̍kā.
ji̱ṣṇū ra̍the̱ṣṭhā ityā̍ha.
ā ha̱ vai tatra̍ ji̱ṣṇū ra̍the̱ṣṭhā jā̍yate..48..

yatrai̱tena̍ ya̱jñena̱ yaja̍nte.
sa̱bheyo̱ yuvetyā̍ha.
yo vai pū̎rvavaya̱sī.
sa sa̱bheyo̱ yuvā̎.
tasmā̱dyuvā̱ pumā̎npri̱yo bhāvu̍kaḥ.
ā'sya yaja̍mānasya vī̱ro jā̍yatā̱mityā̍ha.
ā ha̱ vai tatra̱ yaja̍mānasya vī̱ro jā̍yate.
yatrai̱tena̍ ya̱jñena̱ yaja̍nte.
ni̱kā̱meni̍kāme naḥ pa̱rjanyo̍ varṣa̱tvityā̍ha.
ni̱kā̱meni̍kāme ha̱ vai tatra̍ pa̱rjanyo̍ varṣati.
yatrai̱tena̍ ya̱jñena̱ yaja̍nte.
pha̱linyo̍ na̱ oṣa̍dhayaḥ pacyantā̱mityā̍ha.
pha̱linyo̍ ha̱ vai tatrauṣa̍dhayaḥ pacyante.
yatrai̱tena̍ ya̱jñena̱ yaja̍nte.
yo̱ga̱kṣe̱mo na̍ḥ kalpatā̱mityā̍ha.
kalpa̍te ha̱ vai tatra̍ pra̱jābhyo̍ yogakṣe̱maḥ.
yatrai̱tena̍ ya̱jñena̱ yaja̍nte..49..

Anuvāka 14

pra̱jāpa̍tirde̱vebhyo̍ ya̱jñānvyādi̍śat.
sa ā̱tmanna̍śvame̱dhama̍dhatta.
taṃ de̱vā a̍bruvan.
e̱ṣa vāva ya̱jñaḥ.
yada̍śvame̱dhaḥ.
apye̱va no'trā̱stviti̍.
tebhya̍ e̱tāna̍nnaho̱mānprāya̍cchat.
tāna̍juhot.
tairvai sa de̱vāna̍prīṇāt.
yada̍nnaho̱māṃ ju̱hoti̍..50..

de̱vāne̱va tairyaja̍mānaḥ prīṇāti.
ājye̍na juhoti.
a̱gnervā e̱tadrū̱pam.
yadājyam̎.
yadājye̍na ju̱hoti̍.
a̱gnime̱va tatprī̍ṇāti.
madhu̍nā juhoti.
ma̱ha̱tyai vā e̱tadde̱vatā̍yai rū̱pam.
yanmadhu̍.
yanmadhu̍nā ju̱hoti̍..51..

ma̱ha̱tīme̱va tadde̱vatā̎ṃ prīṇāti.
ta̱ṇḍu̱lairju̍hoti.
vasū̍nā̱ṃ vā e̱tadrū̱pam.
yatta̍ṇḍu̱lāḥ.
yatta̍ṇḍu̱lairju̱hoti̍.
vasū̍ne̱va tatprī̍ṇāti.
pṛthu̍kairjuhoti.
ru̱drāṇā̱ṃ vā e̱tadrū̱pam.
yatpṛthu̍kāḥ.
yatpṛthu̍kairju̱hoti̍..52..

ru̱drāne̱va tatprī̍ṇāti.
lā̱jairju̍hoti.
ā̱di̱tyānā̱ṃ vā e̱tadrū̱pam.
yallā̱jāḥ.
yallā̱jairju̱hoti̍.
ā̱di̱tyāne̱va tatprī̍ṇāti.
ka̱rambai̎rjuhoti.
viśve̍ṣā̱ṃ vā e̱tadde̱vānā̍ṃ rū̱pam.
yatka̱rambā̎ḥ.
yatka̱rambai̎rju̱hoti̍..53..

viśvā̍ne̱va tadde̱vānprī̍ṇāti.
dhā̱nābhi̍rjuhoti.
nakṣa̍trāṇā̱ṃ vā e̱tadrū̱pam.
yaddhā̱nāḥ.
yaddhā̱nābhi̍rju̱hoti̍.
nakṣa̍trāṇye̱va tatprī̍ṇāti.
saktu̍bhirjuhoti.
pra̱jāpa̍te̱rvā e̱tadrū̱pam.
yathsakta̍vaḥ.
yathsaktu̍bhirju̱hoti̍..54..

pra̱jā̍patime̱va tatprī̍ṇāti.
ma̱sūsyai̎rjuhoti.
sarvā̍sā̱ṃ vā e̱tadde̱vatā̍nāṃ rū̱pam.
yanma̱sūsyā̍ni.
yanma̱sūsyai̎rju̱hoti̍.
sarvā̍ e̱va tadde̱vatā̎ḥ prīṇāti.
pri̱ya̱ṅgu̱ta̱ṇḍu̱lairju̍hoti.
pri̱yāṅgā̍ ha̱ vai nāmai̱te.
e̱tairvai de̱vā aśva̱syāṅgā̍ni̱ sama̍dadhuḥ.
yatpri̍yaṅgutaṇḍu̱lairju̱hoti̍.
aśva̍syai̱vāṅgā̍ni̱ sanda̍dhāti.
daśānnā̍ni juhoti.
daśā̎kṣarā vi̱rāṭ.
vi̱rāṭkṛ̱thsnasyā̱nnādya̱syāva̍ruddhyai..55..

Anuvāka 15

pra̱jāpa̍tiraśvame̱dhama̍sṛjata.
taṃ sṛ̱ṣṭaṃ rakṣā̍ṃsyajighāṃsan.
sa e̱tānpra̱jāpa̍tirna̱ktaṃ ho̱māna̍paśyat.
tāna̍juhot.
tairvai sa ya̱jñādrakṣā̱ṃsyapā̍han.
yanna̍ktaṃ ho̱māṃ ju̱hoti̍.
ya̱jñāde̱va tairyaja̍māno̱ rakṣā̱ṃsyapa̍ hanti.
ājye̍na juhoti.
vajro̱ vā ājyam̎.
vajre̍ṇai̱va ya̱jñādrakṣā̱ṃsyapa̍ hanti..56..

ājya̍sya prati̱pada̍ṃ karoti.
prā̱ṇo vā ājyam̎.
mu̱kha̱ta e̱vāsya̍ prā̱ṇaṃ da̍dhāti.
a̱nna̱ho̱māñju̍hoti.
śarī̍ravade̱vāva̍ rundhe.
vya̱tyāsa̍ṃ juhoti.
u̱bhaya̱syāva̍ruddhyai.
nakta̍ṃ juhoti.
rakṣa̍sā̱mapa̍hatyai.
ājye̍nānta̱to ju̍hoti..57..

prā̱ṇo vā ājyam̎.
u̱bha̱yata̍ e̱vāsya̍ prā̱ṇaṃ da̍dhāti.
pu̱rastā̎cco̱pari̍ṣṭācca.
eka̍smai̱ svāhetyā̍ha.
a̱sminne̱va lo̱ke prati̍ tiṣṭhati.
dvābhyā̱ṃ svāhetyā̍ha.
a̱muṣmi̍nne̱va lo̱ke prati̍ tiṣṭhati.
u̱bhayo̍re̱va lo̱kayo̱ḥ prati̍ tiṣṭhati.
a̱smiṃścā̱muṣmi̍ṃśca.
śa̱tāya̱ svāhetyā̍ha.
śa̱tāyu̱rvai puru̍ṣaḥ śa̱tavī̎ryaḥ.
āyu̍re̱va vī̱rya̍mava̍ rundhe.
sa̱hasrā̍ya̱ svāhetyā̍ha.
āyu̱rvai sa̱hasram̎.
āyu̍re̱vāva̍ rundhe.
sarva̍smai̱ svāhetyā̍ha.
apa̍rimitame̱vāva̍ rundhe..58..

Anuvāka 16

pra̱jāpa̍ti̱ṃ vā e̱ṣa ī̎phsa̱tītyā̍huḥ.
yo̎'śvame̱dhena̱ yaja̍ta̱ iti̍.
atho̍ āhuḥ.
sarvā̍ṇi bhū̱tānīti̍.
eka̍smai̱ svāhetyā̍ha.
pra̱jāpa̍ti̱rvā eka̍ḥ.
tame̱vā''pno̍ti.
eka̍smai̱ svāhā̱ dvābhyā̱ṃ svāhetya̍bhipū̱rvamāhu̍tīrjuhoti.
a̱bhi̱pū̱rvame̱va su̍va̱rgaṃ lo̱kame̍ti.
e̱ko̱tta̱raṃ ju̍hoti..59..

e̱ka̱vade̱va su̍va̱rgaṃ lo̱kame̍ti.
santa̍taṃ juhoti.
su̱va̱rgasya̍ lo̱kasya̱ santa̍tyai.
śa̱tāya̱ svāhetyā̍ha.
śa̱tāyu̱rvai puru̍ṣaḥ śa̱tavī̎ryaḥ.
āyu̍re̱va vī̱rya̍mava̍ rundhe.
sa̱hasrā̍ya̱ svāhetyā̍ha.
āyu̱rvai sa̱hasram̎.
āyu̍re̱vāva̍ rundhe.
a̱yutā̍ya̱ svāhā̍ ni̱yutā̍ya̱ svāhā̎ pra̱yutā̍ya̱ svāhetyā̍ha..60..

traya̍ i̱me lo̱kāḥ.
i̱māne̱va lo̱kānava̍ rundhe.
arbu̍dāya̱ svāhetyā̍ha.
vāgvā arbu̍dam.
vāca̍me̱vāva̍ rundhe.
nya̍rbudāya̱ svāhetyā̍ha.
yo vai vā̱co bhū̱mā.
tannya̍rbudam.
vā̱ca e̱va bhū̱māna̱mava̍ rundhe.
sa̱mu̱drāya̱ svāhetyā̍ha..61..

sa̱mu̱drame̱vā''pno̍ti.
madhyā̍ya̱ svāhetyā̍ha.
madhya̍me̱vā''pno̍ti.
antā̍ya̱ svāhetyā̍ha.
anta̍me̱vā''pno̍ti.
pa̱rā̱rdhāya̱ svāhetyā̍ha.
pa̱rā̱rdhame̱vā''pno̍ti.
u̱ṣase̱ svāhā̱ vyu̍ṣṭyai̱ svāhetyā̍ha.
rātri̱rvā u̱ṣāḥ.
aha̱rvyu̍ṣṭiḥ.
a̱ho̱rā̱tre e̱vāva̍ rundhe.
atho̍ ahorā̱trayo̍re̱va prati̍ tiṣṭhati.
tā yadu̱bhayī̱rdivā̍ vā̱ nakta̍ṃ vā juhu̱yāt.
a̱ho̱rā̱tre mo̍hayet.
u̱ṣase̱ svāhā̱ vyu̍ṣṭyai̱ svāho̍deṣya̱te svāho̎dya̱te svāhetyanu̍dite juhoti.
udi̍tāya̱ svāhā̍ suva̱rgāya̱ svāhā̍ lo̱kāya̱ svāhetyudi̍te juhoti.
a̱ho̱rā̱trayo̱ravya̍timohāya..62..

Anuvāka 17

vi̱bhūrmā̱trā pra̱bhūḥ pi̱tretya̍śvanā̱māni̍ juhoti.
u̱bhayo̍re̱vaina̍ṃ lo̱kayo̎rnāma̱dheya̍ṃ gamayati.
āya̍nāya̱ svāhā̱ prāya̍ṇāya̱ svāhetyu̍ddrā̱vāñju̍hoti.
sarva̍me̱vaina̱maska̍nnaṃ suva̱rgaṃ lo̱kaṃ ga̍mayati.
a̱gnaye̱ svāhā̱ somā̍ya̱ svāheti̍ pūrvaho̱māñju̍hoti.
pūrva̍ e̱va dvi̱ṣanta̱ṃ bhrātṛ̍vya̱mati̍ krāmati.
pṛ̱thi̱vyai svāhā̱'ntari̍kṣāya̱ svāhetyā̍ha.
ya̱thā̱ya̱jure̱vaitat.
a̱gnaye̱ svāhā̱ somā̍ya̱ svāheti̍ pūrvadī̱kṣā ju̍hoti.
pūrva̍ e̱va dvi̱ṣanta̱ṃ bhrātṛ̍vya̱mati̍ krāmati..63..

pṛ̱thi̱vyai svāhā̱'ntari̍kṣāya̱ svāhetye̍kavi̱ṃśinī̎ṃ dī̱kṣāṃ ju̍hoti.
eka̍viṃśati̱rvai de̍valo̱kāḥ.
dvāda̍śa̱ māsā̱ḥ pañca̱rtava̍ḥ.
traya̍ i̱me lo̱kāḥ.
a̱sāvā̍di̱tya e̍kavi̱ṃśaḥ.
e̱ṣa su̍va̱rgo lo̱kaḥ.
su̱va̱rgasya̍ lo̱kasya̱ sama̍ṣṭyai.
bhuvo̍ de̱vānā̱ṃ karma̱ṇetyṛ̍tudī̱kṣā ju̍hoti.
ṛ̱tūne̱vāsmai̍ kalpayati.
a̱gnaye̱ svāhā̍ vā̱yave̱ svāheti̍ juho̱tyana̍ntarityai..64..

a̱rvāṅya̱jñaḥ saṅkrā̍ma̱tvityāptī̎rjuhoti.
su̱va̱rgasya̍ lo̱kasyā''ptyai̎.
bhū̱taṃ bhavya̍ṃ bhavi̱ṣyaditi̱ paryā̎ptīrjuhoti.
su̱va̱rgasya̍ lo̱kasya̱ paryā̎ptyai.
ā me̍ gṛ̱hā bha̍va̱ntvityā̱bhūrju̍hoti.
su̱va̱rgasya̍ lo̱kasyābhū̎tyai.
a̱gninā̱ tapo'nva̍bhava̱ditya̍nu̱bhūrju̍hoti.
su̱va̱rgasya̍ lo̱kasyānu̍bhūtyai.
svāhā̱''dhimādhī̍tāya̱ svāheti̱ sama̍stāni vaiśvade̱vāni̍ juhoti.
sama̍stame̱va dvi̱ṣanta̱ṃ bhrātṛ̍vya̱mati̍ krāmati..65..

da̱dbhyaḥ svāhā̱ hanū̎bhyā̱ṃ svāhetya̍ṅgaho̱māñju̍hoti.
aṅge̍aṅge̱ vai puru̍ṣasya pā̱pmopa̍śliṣṭaḥ.
aṅgā̍daṅgāde̱vaina̍ṃ pā̱pmana̱stena̍ muñcati.
a̱ñjye̱tāya̱ svāhā̍ kṛ̱ṣṇāya̱ svāhā̎ śve̱tāya̱ svāhetya̍śvarū̱pāṇi̍ juhoti.
rū̱paire̱vaina̱ṃ sama̍rdhayati.
oṣa̍dhībhya̱ḥ svāhā̱ mūle̎bhya̱ḥ svāhetyo̍ṣadhiho̱māñju̍hoti.
dva̱yyo vā oṣa̍dhayaḥ.
puṣpe̎bhyo̱'nyāḥ phala̍ṃ gṛ̱hṇanti̍.
mūle̎bhyo̱'nyāḥ.
tā e̱vobhayī̱rava̍ rundhe..66..

vana̱spati̍bhya̱ḥ svāheti̍ vanaspatiho̱māñju̍hoti.
ā̱ra̱ṇyasyā̱nnādya̱syāva̍ruddhyai.
me̱ṣastvā̍ paca̱taira̍va̱tvityapā̎vyāni juhoti.
prā̱ṇā vai de̱vā apā̎vyāḥ.
prā̱ṇāne̱vāva̍ rundhe.
kūpyā̎bhya̱ḥ svāhā̱'dbhyaḥ svāhetya̱pāṃ homā̎ñjuhoti.
a̱phsu vā āpa̍ḥ.
anna̱ṃ vā āpa̍ḥ.
a̱dbhyo vā anna̍ṃ jāyate.
yade̱vādbhyo'nna̱ṃ jāya̍te.
tadava̍ rundhe..67..

Anuvāka 18

ambhā̍ṃsi juhoti.
a̱yaṃ vai lo̱ko'mbhā̍ṃsi.
tasya̱ vasa̱vo'dhi̍patayaḥ.
a̱gnirjyoti̍ḥ.
yadambhā̍ṃsi ju̱hoti̍.
i̱mame̱va lo̱kamava̍ rundhe.
vasū̍nā̱ṃ sāyu̍jyaṃ gacchati.
a̱gniṃ jyoti̱rava̍ rundhe.
nabhā̍ṃsi juhoti.
a̱ntari̍kṣa̱ṃ vai nabhā̍ṃsi..68..

tasya̍ ru̱drā adhi̍patayaḥ.
vā̱yurjyoti̍ḥ.
yannabhā̍ṃsi ju̱hoti̍.
a̱ntari̍kṣame̱vāva̍ rundhe.
ru̱drāṇā̱ṃ sāyu̍jyaṃ gacchati.
vā̱yuṃ jyoti̱rava̍ rundhe.
mahā̍ṃsi juhoti.
a̱sau vai lo̱ko mahā̍ṃsi.
tasyā̍di̱tyā adhi̍patayaḥ.
sūryo̱ jyoti̍ḥ..69..

yanmahā̍ṃsi ju̱hoti̍.
a̱mume̱va lo̱kamava̍ rundhe.
ā̱di̱tyānā̱ṃ sāyu̍jyaṃ gacchati.
sūrya̱ṃ jyoti̱rava̍ rundhe.
namo̱ rājñe̱ namo̱ varu̍ṇā̱yeti̍ ya̱vyāni̍ juhoti.
a̱nnādya̱syāva̍ruddhyai.
ma̱yo̱bhūrvāto̍ a̱bhi vā̍tū̱srā iti̍ ga̱vyāni̍ juhoti.
pa̱śū̱nāmava̍ruddhyai.
prā̱ṇāya̱ svāhā̎ vyā̱nāya̱ svāheti̍ santatiho̱māñju̍hoti.
su̱va̱rgasya̍ lo̱kasya̱ santa̍tyai..70..

si̱tāya̱ svāhā'si̍tāya̱ svāheti̱ pramu̍ktīrjuhoti.
su̱va̱rgasya̍ lo̱kasya̱ pramu̍ktyai.
pṛ̱thi̱vyai svāhā̱'ntari̍kṣāya̱ svāhetyā̍ha.
ya̱thā̱ya̱jure̱vaitat.
da̱tvate̱ svāhā̍'da̱ntakā̍ya̱ svāheti̍ śarīraho̱māñju̍hoti.
pi̱tṛ̱lo̱kame̱va tairyaja̍mā̱no'va̍ rundhe.
kastvā̍ yunakti̱ sa tvā̍ yuna̱ktviti̍ pari̱dhīn yu̍nakti.
i̱me vai lo̱kāḥ pa̍ri̱dhaya̍ḥ.
i̱māne̱vāsmai̍ lo̱kān yu̍nakti.
su̱va̱rgasya̍ lo̱kasya̱ sama̍ṣṭyai..71..

yaḥ prā̍ṇa̱to ya ā̎tma̱dā iti̍ mahi̱mānau̍ juhoti.
su̱va̱rgo vai lo̱ko maha̍ḥ.
su̱va̱rgame̱va tābhyā̎ṃ lo̱kaṃ yaja̍mā̱no'va̍ rundhe.
ā brahma̍nbrāhma̱ṇo bra̍hmavarca̱sī jā̍yatā̱miti̱ sama̍stāni brahmavarca̱sāni̍ juhoti.
bra̱hma̱va̱rcasame̱va tairyaja̍mā̱no'va̍ rundhe.
jajñi̱ bīja̱miti̍ juho̱tyana̍ntarityai.
a̱gnaye̱ sama̍namatpṛthi̱vyai sama̍nama̱diti̍ sannatiho̱māñju̍hoti.
su̱va̱rgasya̍ lo̱kasya̱ sanna̍tyai.
bhū̱tāya̱ svāhā̍ bhaviṣya̱te svāheti̍ bhūtābha̱vyau homau̍ juhoti.
a̱yaṃ vai lo̱ko bhū̱tam..72..

a̱sau bha̍vi̱ṣyat.
a̱nayo̍re̱va lo̱kayo̱ḥ prati̍ tiṣṭhati.
sarva̱syā''ptyai̎.
sarva̱syāva̍ruddhyai.
yadakra̍ndaḥ pratha̱maṃ jāya̍māna̱ itya̍śvasto̱mīya̍ṃ juhoti.
sarva̱syā''ptyai̎.
sarva̍sya̱ jityai̎.
sarva̍me̱va tenā̎''pnoti.
sarva̍ṃ jayati.
yo̎'śvame̱dhena̱ yaja̍te..73..

ya u̍ cainame̱vaṃ veda̍.
ya̱jñaṃ rakṣā̍ṃsyajighāṃsan.
sa e̱tānpra̱jāpa̍tirnaktaṃho̱māna̍paśyat.
tāna̍juhot.
tairvai sa ya̱jñādrakṣā̱ṃsyapā̍han.
yanna̍ktaṃho̱māñju̱hoti̍.
ya̱jñāde̱va tairyaja̍māno̱ rakṣā̱ṃsyapa̍hanti.
u̱ṣase̱ svāhā̱ vyu̍ṣṭyai̱ svāhetya̍nta̱to ju̍hoti.
su̱va̱rgasya̍ lo̱kasya̱ sama̍ṣṭyai..74..

Anuvāka 19

e̱ka̱yū̱po vai̍kāda̱śinī̍ vā.
a̱nyeṣā̎ṃ ya̱jñānā̱ṃ yūpā̍ bhavanti.
e̱ka̱vi̱ṃśinya̍śvame̱dhasya̍.
su̱va̱rgasya̍ lo̱kasyā̱bhiji̍tyai.
bai̱ḻvo vā̍ khādi̱ro vā̍ pālā̱śo vā̎.
a̱nyeṣā̎ṃ yajñakratū̱nāṃ yūpā̍ bhavanti.
rājju̍dāla̱ eka̍viṃśatyaratniraśvame̱dhasya̍.
su̱va̱rgasya̍ lo̱kasya̱ sama̍ṣṭyai.
nānyeṣā̎ṃ paśū̱nāṃ te̍ja̱nyā a̍va̱dyanti̍.
ava̍dya̱ntyaśva̍sya..75..

pā̱pmā vai te̍ja̱nī.
pā̱pmano'pa̍hatyai.
pla̱kṣa̱śā̱khāyā̍ma̱nyeṣā̎ṃ paśū̱nāma̍va̱dyanti̍.
ve̱ta̱sa̱śā̱khāyā̱maśva̍sya.
a̱phsuyo̍ni̱rvā aśva̍ḥ.
a̱phsu̱jo ve̍ta̱saḥ.
sva e̱vāsya̱ yonā̱vava̍ dyati.
yūpe̍ṣu grā̱myānpa̱śūnni̍yu̱ñjanti̍.
ā̱ro̱keṣvā̍ra̱ṇyāndhā̍rayanti.
pa̱śū̱nāṃ vyāvṛ̍ttyai.
ā grā̱myānpa̱śūllam̐bha̍nte.
prāra̱ṇyānthsṛ̍janti.
pā̱pmano'pa̍hatyai..76..

Anuvāka 20

rājju̍dālamagni̱ṣṭhaṃ mi̍noti.
bhrū̱ṇa̱ha̱tyāyā̱ apa̍hatyai.
pautu̍dravāva̱bhito̍ bhavataḥ.
puṇya̍sya ga̱ndhasyāva̍ruddhyai.
bhrū̱ṇa̱ha̱tyāme̱vāsmā̍dapa̱hatya̍.
puṇye̍na ga̱ndheno̍bha̱yata̱ḥ pari̍ gṛhṇāti.
ṣaḍbai̱ḻvā bha̍vanti.
bra̱hma̱va̱rca̱sasyāva̍ruddhyai.
ṣaṭkhā̍di̱rāḥ.
teja̱so'va̍ruddhyai..77..

ṣaṭpā̍lā̱śāḥ.
so̱ma̱pī̱thasyāva̍ruddhyai.
eka̍viṃśati̱ḥ saṃ pa̍dyante.
eka̍viṃśati̱rvai de̍valo̱kāḥ.
dvāda̍śa̱ māsā̱ḥ pañca̱rtava̍ḥ.
traya̍ i̱me lo̱kāḥ.
a̱sāvā̍di̱tya eka̍vi̱ṃśaḥ.
e̱ṣa su̍va̱rgo lo̱kaḥ.
su̱va̱rgasya̍ lo̱kasya̱ sama̍ṣṭyai.
śa̱taṃ pa̱śavo̍ bhavanti..78..

śa̱tāyu̱ḥ puru̍ṣaḥ śa̱tendri̍yaḥ.
āyu̍ṣye̱vendri̱ye prati̍ tiṣṭhati.
sarva̱ṃ vā a̍śvame̱dhyāpno̍ti.
apa̍rimitā bhavanti.
apa̍rimita̱syāva̍ruddhyai.
bra̱hma̱vā̱dino̍ vadanti.
kasmā̎thsa̱tyāt.
da̱kṣi̱ṇa̱to̎'nyeṣā̎ṃ paśū̱nāma̍va̱dyanti̍.
u̱tta̱ra̱to'śva̱syeti̍.
vā̱ru̱ṇo vā aśva̍ḥ..79..

e̱ṣā vai varu̍ṇasya̱ dik.
svāyā̍me̱vāsya̍ di̱śyava̍dyati.
yadita̍reṣāṃ paśū̱nāma̍va̱dyati̍.
śa̱ta̱de̱va̱tya̍ṃ tenāva̍ rundhe.
ci̱te̎'gnāvadhi̍ vaita̱se kaṭe'śva̍ṃ cinoti.
a̱phsuyo̍ni̱rvā aśva̍ḥ.
a̱phsu̱jo ve̍ta̱saḥ.
sva e̱vaina̱ṃ yonau̱ prati̍ṣṭhāpayati.
pu̱rastā̎tpra̱tyañca̍ṃ tūpa̱raṃ ci̍noti.
pa̱ścātprā̱cīna̍ṃ gomṛ̱gam..80..

prā̱ṇā̱pā̱nāve̱vāsmi̎nthsa̱myañcau̍ dadhāti.
aśva̍ṃ tūpa̱raṃ go̍mṛ̱gamiti̍ sarva̱huta̍ e̱tāñju̍hoti.
e̱ṣāṃ lo̱kānā̍ma̱bhiji̍tyai.
ā̱tmanā̱'bhi ju̍hoti.
sātmā̍name̱vaina̱ṃ sata̍nuṃ karoti.
sātmā̱'muṣmi̍m̐llo̱ke bha̍vati.
ya e̱vaṃ veda̍.
atho̱ vaso̍re̱va dhārā̱ṃ tenāva̍ rundhe.
i̱lu̱vardā̍ya̱ svāhā̍ bali̱vardā̍ya̱ svāhetyā̍ha.
sa̱ṃva̱thsa̱ro vā i̍lu̱varda̍ḥ.
pa̱ri̱va̱thsa̱ro ba̍li̱varda̍ḥ.
sa̱ṃva̱thsa̱rāde̱va pa̍rivathsa̱rādāyu̱rava̍ rundhe.
āyu̍re̱vāsmi̍ndadhāti.
tasmā̍daśvamedhayā̱jī ja̱rasā̍ vi̱srasā̱muṃ lo̱kame̍ti..81..

Anuvāka 21

e̱ka̱vi̱ṃśo̎'gnirbha̍vati.
e̱ka̱vi̱ṃśaḥ stoma̍ḥ.
eka̍viṃśati̱ryūpā̎ḥ.
yathā̱ vā aśvā̍ varṣa̱bhā vā̱ vṛṣā̍ṇaḥ saṃsphu̱reran̍.
e̱vame̱va tathstomā̱ḥ saṃsphu̍rante.
yade̍kavi̱ṃśāḥ.
te yathsa̍mṛ̱ccheran̍.
ha̱nyetā̎sya ya̱jñaḥ.
dvā̱da̱śa e̱vāgniḥ syā̱dityā̍huḥ.
dvā̱da̱śaḥ stoma̍ḥ..82..

ekā̍daśa̱ yūpā̎ḥ.
yaddvā̍da̱śo̎'gnirbhava̍ti.
dvāda̍śa̱ māsā̎ḥ saṃvathsa̱raḥ.
sa̱ṃva̱thsa̱reṇai̱vāsmā̱ anna̱mava̍ rundhe.
yaddaśa̱ yūpā̱ bhava̍nti.
daśā̎kṣarā vi̱rāṭ.
anna̍ṃ vi̱rāṭ.
vi̱rājai̱vānnādya̱mava̍ rundhe.
ya e̍kāda̱śaḥ.
stana̍ e̱vāsyai̱ saḥ..83..

du̱ha e̱vainā̱ṃ tena̍.
tadā̍huḥ.
yaddvā̍da̱śo̎'gniḥ syā̎ddvāda̱śaḥ stoma̱ ekā̍daśa̱ yūpā̎ḥ.
yathā̱ sthūri̍ṇā yā̱yāt.
tā̱dṛktat.
e̱ka̱vi̱ṃśa e̱vāgniḥ syā̱dityā̍huḥ.
e̱ka̱vi̱ṃśaḥ stoma̍ḥ.
eka̍viṃśati̱ryūpā̎ḥ.
yathā̱ praṣṭi̍bhi̱ryāti̍.
tā̱dṛge̱va tat..84..

yo vā a̍śvame̱dhe ti̱sraḥ ka̱kubho̱ veda̍.
ka̱kuddha̱ rājñā̎ṃ bhavati.
e̱ka̱vi̱ṃśo̎'gnirbha̍vati.
e̱ka̱vi̱ṃśaḥ stoma̍ḥ.
eka̍viṃśati̱ryūpā̎ḥ.
e̱tā vā a̍śvame̱dhe ti̱sraḥ ka̱kubha̍ḥ.
ya e̱vaṃ veda̍.
ka̱kuddha̱ rājñā̎ṃ bhavati.
yo vā a̍śvame̱dhe trīṇi̍ śī̱ṟṣāṇi̱ veda̍.
śiro̍ ha̱ rājñā̎ṃ bhavati.
e̱ka̱vi̱ṃśo̎'gnirbha̍vati.
e̱ka̱vi̱ṃśaḥ stoma̍ḥ.
eka̍viṃśati̱ryūpā̎ḥ.
e̱tāni̱ vā a̍śvame̱dhe trīṇi̍ śī̱ṟṣāṇi̍.
ya e̱vaṃ veda̍.
śiro̍ ha̱ rājñā̎ṃ bhavati..85..

Anuvāka 22

de̱vā vā a̍śvame̱dhe pava̍māne.
su̱va̱rgaṃ lo̱kaṃ na prājā̍nan.
tamaśva̱ḥ prājā̍nāt.
yada̍śvame̱dhe'śve̍na̱ medhye̱noda̍ñco bahiṣpavamā̱naṃ sarpa̍nti.
su̱va̱rgasya̍ lo̱kasya̱ prajñā̎tyai.
na vai ma̍nu̱ṣya̍ḥ suva̱rgaṃ lo̱kamañja̍sā veda.
aśvo̱ vai su̍va̱rgaṃ lo̱kamañja̍sā veda.
yadu̍dgā̱todgāye̎t.
yathā kṣe̎trajño̱'nyena̍ pa̱thā pra̍tipā̱daye̎t.
tā̱dṛktat..86..

u̱dgā̱tāra̍mapa̱rudhya̍.
aśva̍mudgī̱thāya̍ vṛṇīte.
yathā̎ kṣetra̱jño'ñja̍sā̱ naya̍ti.
e̱vame̱vaina̱maśva̍ḥ suva̱rgaṃ lo̱kamañja̍sā nayati.
puccha̍ma̱nvā ra̍bhante.
su̱va̱rgasya̍ lo̱kasya̱ sama̍ṣṭyai.
hiṃ ka̍roti.
sāmai̱vāka̍ḥ.
hiṃ ka̍roti.
u̱dgī̱tha e̱vāsya̱ saḥ..87..

vaḍa̍bā̱ upa̍ rundhanti.
mi̱thu̱na̱tvāya̱ prajā̎tyai.
atho̱ yatho̍pagā̱tāra̍ upa̱gāya̍nti.
tā̱dṛge̱va tat.
uda̍gāsī̱daśvo̱ medhya̱ ityā̍ha.
prā̱jā̱pa̱tyo vā aśva̍ḥ.
pra̱jāpa̍tirudgī̱thaḥ.
u̱dgī̱thame̱vāva̍ rundhe.
atho̍ ṛkhsā̱mayo̍re̱va prati̍ tiṣṭhati.
hira̍ṇyeno̱pāka̍roti.
jyoti̱rvai hira̍ṇyam.
jyoti̍re̱va mu̍kha̱to da̍dhāti.
yaja̍māne ca pra̱jāsu̍ ca.
atho̱ hira̍ṇyajyotire̱va yaja̍mānaḥ suva̱rgaṃ lo̱kame̍ti..88..

Anuvāka 23

puru̍ṣo̱ vai ya̱jñaḥ.
ya̱jñaḥ pra̱jāpa̍tiḥ.
yadaśve̍ pa̱śūnni̍yu̱ñjanti̍.
ya̱jñāde̱va tadya̱jñaṃ prayu̍ṅkte.
aśva̍ṃ tūpa̱raṃ go̍mṛ̱gam.
tāna̍gni̱ṣṭha āla̍bhate.
se̱nā̱mu̱khame̱va tathsaṃśya̍ti.
tasmā̎drājamu̱khaṃ bhī̱ṣmaṃ bhāvu̍kam.
ā̱gne̱yaṃ kṛ̱ṣṇagrī̍vaṃ pu̱rastā̎lla̱lāṭe̎.
pū̱rvā̱gnime̱va taṃ ku̍rute..89..

tasmā̎tpūrvā̱gniṃ pu̱rastā̎thsthāpayanti.
pau̱ṣṇama̱nvañcam̎.
anna̱ṃ vai pū̱ṣā.
tasmā̎tpūrvā̱gnāvā̍hā̱rya̍mā ha̍ranti.
ai̱ndrā̱pau̱ṣṇamu̱pari̍ṣṭāt.
ai̱ndro vai rā̍ja̱nyo'nna̍ṃ pū̱ṣā.
a̱nnādye̍nai̱vaina̍mubha̱yata̱ḥ pari̍ gṛhṇāti.
tasmā̎drāja̱nyo̎'nnā̱do bhāvu̍kaḥ.
ā̱gne̱yau kṛ̱ṣṇagrī̍vau bāhu̱voḥ.
bā̱hu̱vore̱va vī̱rya̍ṃ dhatte..90..

tasmā̎drāja̱nyo̍ bāhuba̱lībhāvu̍kaḥ.
tvā̱ṣṭrau lo̍maśasa̱kthau sa̱kthyoḥ.
sa̱kthyore̱va vī̱rya̍ṃ dhatte.
tasmā̎drāja̱nya̍ ūruba̱lībhāvu̍kaḥ.
śi̱ti̱pṛ̱ṣṭhau bā̍rhaspa̱tyau pṛ̱ṣṭhe.
bra̱hma̱va̱rca̱same̱vopari̍ṣṭāddhatte.
atho̍ ka̱vace̍ e̱vaite a̱bhita̱ḥ paryū̍hate.
tasmā̎drāja̱nya̍ḥ sanna̍ddho vī̱rya̍ṃ karoti.
dhā̱tre pṛ̍ṣoda̱rama̱dhastā̎t.
pra̱ti̱ṣṭhāme̱vaitāṃ ku̍rute.
atho̍ i̱yaṃ vai dhā̱tā.
a̱syāme̱va prati̍ tiṣṭhati.
sau̱ryaṃ ba̱lakṣa̱ṃ pucche̎.
u̱thse̱dhame̱va taṃ ku̍rute.
tasmā̍duthse̱dhaṃ bha̱ye pra̱jā a̱bhisaṃśra̍yanti..91..

Anuvāka 1

pra̱jāpa̍tiraśvame̱dhama̍sṛjata.
so̎'smāthsṛ̱ṣṭo'pā̎krāmat.
tama̍ṣṭāda̱śibhi̱ranu̱ prāyu̍ṅkta.
tamā̎pnot.
tamā̱ptvā'ṣṭā̍da̱śibhi̱ravā̍rundha.
yada̍ṣṭāda̱śina̍ āla̱bhyante̎.
ya̱jñame̱va tairā̱ptvā yaja̍mā̱no'va̍ rundhe.
sa̱ṃva̱thsa̱rasya̱ vā e̱ṣā pra̍ti̱mā.
yada̍ṣṭāda̱śina̍ḥ.
dvāda̍śa̱ māsā̱ḥ pañca̱rtava̍ḥ..1..

sa̱ṃva̱thsa̱ro̎'ṣṭāda̱śaḥ.
yada̍ṣṭāda̱śina̍ āla̱bhyante̎.
sa̱ṃva̱thsa̱rame̱va tairā̱ptvā yaja̍mā̱no'va̍ rundhe.
a̱gni̱ṣṭhe̎'nyānpa̱śūnu̍pāka̱roti̍.
ita̍reṣu̱ yūpe̎ṣvaṣṭāda̱śino'jā̍mitvāya.
nava̍na̱vāla̍bhyante savīrya̱tvāya̍.
yadā̍ra̱ṇyaiḥ sa̍ṃsthā̱paye̎t.
vyava̍syetāṃ pitāpu̱trau.
vyadhvā̍naḥ krāmeyuḥ.
vidū̍ra̱ṃ grāma̍yorgrāmā̱ntau syā̍tām..2..

ṛ̱kṣīkā̎ḥ puruṣavyā̱ghrāḥ pa̍rimo̱ṣiṇa̍ āvyā̱dhinī̱staska̍rā̱ ara̍ṇye̱ṣvājā̍yeran.
tadā̍huḥ.
apa̍śavo̱ vā e̱te.
yadā̍ra̱ṇyāḥ.
yadā̍ra̱ṇyaiḥ sa̍ṃsthā̱paye̎t.
kṣi̱pre yaja̍māna̱mara̍ṇyaṃ mṛ̱taṃ ha̍reyuḥ.
ara̍ṇyāyatanā̱ hyā̍ra̱ṇyāḥ pa̱śava̱ iti̍.
yatpa̱śūnnālabhe̍ta.
ana̍varuddhā asya pa̱śava̍ḥ syuḥ.
yatparya̍gnikṛtānuthsṛ̱jet..3..

ya̱jña̱ve̱śa̱saṃ ku̍ryāt.
yatpa̱śūnā̱labha̍te.
tenai̱va pa̱śūnava̍ rundhe.
yatparya̍gnikṛtānuthsṛ̱jatyaya̍jñaveśasāya.
ava̍ruddhā asya pa̱śavo̱ bhava̍nti.
na ya̍jñaveśa̱saṃ bha̍vati.
na yaja̍māna̱mara̍ṇyaṃ mṛ̱taṃ ha̍ranti.
grā̱myaiḥ saṃ sthā̍payati.
e̱te vai pa̱śava̱ḥ kṣemo̱ nāma̍.
saṃ pi̍tāpu̱trāvava̍syataḥ.
samadhvā̍naḥ krāmanti.
sa̱ma̱nti̱kaṃ grāma̍yorgrāmā̱ntau bha̍vataḥ.
narkṣīkā̎ḥ puruṣavyā̱ghrāḥ pa̍rimo̱ṣiṇa̍ āvyā̱dhinī̱staska̍rā̱ ara̍ṇye̱ṣvājā̍yante..4..

Anuvāka 2

pra̱jāpa̍tirakāmayato̱bhau lo̱kāvava̍ rundhī̱yeti̍.
sa e̱tānu̱bhayā̎npa̱śūna̍paśyat.
grā̱myāṃścā̍ra̱ṇyāṃśca̍.
tānāla̍bhata.
tairvai sa u̱bhau lo̱kāvavā̍rundha.
grā̱myaire̱va pa̱śubhi̍ri̱maṃ lo̱kamavā̍rundha.
ā̱ra̱ṇyaira̱mum.
yad grā̱myānpa̱śūnā̱labha̍te.
i̱mame̱va tairlo̱kamava̍ rundhe.
yadā̍ra̱ṇyān..5..

a̱muṃ taiḥ.
ana̍varuddho̱ vā e̱tasya̍ saṃvathsa̱ra ityā̍huḥ.
ya i̱tai̍taścāturmā̱syāni̍ saṃvathsa̱raṃ pra̍yu̱ṅkta iti̍.
e̱tāvā̱ṉ vai sa̍ṃvathsa̱raḥ.
yaccā̍turmā̱syāni̍.
yade̱te cā̍turmā̱syāḥ pa̱śava̍ āla̱bhyante̎.
pra̱tyakṣa̍me̱va taiḥ sa̍ṃvathsa̱raṃ yaja̍mā̱no'va̍ rundhe.
vi vā e̱ṣa pra̱jayā̍ pa̱śubhi̍rṛdhyate.
yaḥ sa̍ṃvathsa̱raṃ pra̍yu̱ṅkte.
sa̱ṃva̱thsa̱raḥ su̍va̱rgo lo̱kaḥ..6..

su̱va̱rgaṃ tu lo̱kaṃ nāpa̍rādhnoti.
pra̱jā vai pa̱śava̍ ekāda̱śinī̎.
yade̱ta ai̍kādaśi̱nāḥ pa̱śava̍ āla̱bhyante̎.
sā̱kṣāde̱va pra̱jāṃ pa̱śūn yaja̍mā̱no'va̍ rundhe.
pra̱jāpa̍tirvi̱rāja̍masṛjata.
sā sṛ̱ṣṭā'śva̍me̱dhaṃ prāvi̍śat.
tānda̱śibhi̱ranu̱ prāyu̍ṅkta.
tāmā̎pnot.
tāmā̱ptvā da̱śibhi̱ravā̍rundha.
yadda̱śina̍ āla̱bhyante̎..7..

vi̱rāja̍me̱va tairā̱ptvā yaja̍mā̱no'va̍ rundhe.
ekā̍daśa da̱śata̱ āla̍bhyante.
ekā̍daśākṣarā tri̱ṣṭup.
traiṣṭu̍bhāḥ pa̱śava̍ḥ.
pa̱śūne̱vāva̍ rundhe.
vai̱śva̱de̱vo vā aśva̍ḥ.
nā̱nā̱de̱va̱tyā̎ḥ pa̱śavo̍ bhavanti.
aśva̍sya sarva̱tvāya̍.
nānā̍rūpā bhavanti.
tasmā̱nnānā̍rūpāḥ pa̱śava̍ḥ.
ba̱hu̱rū̱pā bha̍vanti.
tasmā̎dbahurū̱pāḥ pa̱śava̱ḥ samṛ̍ddhyai..8..

Anuvāka 3

a̱smai vai lo̱kāya̍ grā̱myāḥ pa̱śava̱ āla̍bhyante.
a̱muṣmā̍ āra̱ṇyāḥ.
yadgrā̱myānpa̱śūnā̱labha̍te.
i̱mame̱va tairlo̱kamava̍ rundhe.
yadā̍ra̱ṇyān.
a̱muṃ taiḥ.
u̱bhayā̎npa̱śūnāla̍bhate.
gā̱myāṃścā̍ra̱ṇyāṃśca̍.
u̱bhayo̎rlo̱kayo̱rava̍ruddhyai.
u̱bhayā̎npa̱śūnāla̍bhate..9..

grā̱myāṃścā̍ra̱ṇyāṃśca̍.
u̱bhaya̍syā̱nnādya̱syāva̍ruddhyai.
u̱bhayā̎npa̱śūnāla̍bhate.
grā̱myāṃścā̍ra̱ṇyāṃśca̍.
u̱bhaye̍ṣāṃ paśū̱nāmava̍ruddhyai.
traya̍strayo bhavanti.
traya̍ i̱me lo̱kāḥ.
e̱ṣāṃ lo̱kānā̱māptyai̎.
bra̱hma̱vā̱dino̍ vadanti.
kasmā̎thsa̱tyāt..10..

a̱smim̐llo̱ke ba̱hava̱ḥ kāmā̱ iti̍.
yathsa̍mā̱nībhyo̍ de̱vatā̎bhyo̱'nye̎'nye pa̱śava̍ āla̱bhyante̎.
a̱sminne̱va tallo̱ke kāmā̎ndadhāti.
tasmā̍da̱smim̐llo̱ke ba̱hava̱ḥ kāmā̎ḥ.
tra̱yā̱ṇāṃ tra̍yāṇāṃ sa̱ha va̱pā ju̍hoti.
tryā̍vṛto̱ vai de̱vāḥ.
tryā̍vṛta i̱me lo̱kāḥ.
e̱ṣāṃ lo̱kānā̱māptyai̎.
e̱ṣāṃ lo̱kānā̱ṃ kḷptyai̎.
parya̍gnikṛtānāra̱ṇyānuthsṛ̍ja̱ntyahi̍ṃsāyai..11..

Anuvāka 4

yu̱ñjanti̍ bra̱dhnamityā̍ha.
a̱sau vā ā̍di̱tyo bra̱dhnaḥ.
ā̱di̱tyame̱vāsmai̍ yunakti.
a̱ru̱ṣamityā̍ha.
a̱gnirvā a̍ru̱ṣaḥ.
a̱gnime̱vāsmai̍ yunakti.
cara̍nta̱mityā̍ha.
vā̱yurvai caran̍.
vā̱yume̱vāsmai̍ yunakti.
pari̍ta̱sthuṣa̱ ityā̍ha..12..

i̱me vai lo̱kāḥ pari̍ta̱sthuṣa̍ḥ.
i̱māne̱vāsmai̍ lo̱kān yu̍nakti.
roca̍nte roca̱nā di̱vītyā̍ha.
nakṣa̍trāṇi̱ vai ro̍ca̱nā di̱vi.
nakṣa̍trāṇye̱vāsmai̍ rocayati.
yu̱ñjantya̍sya̱ kāmyetyā̍ha.
kāmā̍ne̱vāsmai̍ yunakti.
harī̱ vipa̍kṣa̱setyā̍ha.
i̱me vai harī̱ vipa̍kṣasā.
i̱me e̱vāsmai̍ yunakti..13..

śoṇā̍ dhṛ̱ṣṇū nṛ̱vāha̱setyā̍ha.
a̱ho̱rā̱tre vai nṛ̱vāha̍sā.
a̱ho̱rā̱tre e̱vāsmai̍ yunakti.
e̱tā e̱vāsmai̍ de̱vatā̍ yunakti.
su̱va̱rgasya̍ lo̱kasya̱ sama̍ṣṭyai.
ke̱tuṃ kṛ̱ṇvanna̍ke̱tava̱ iti̍ dhva̱jaṃ prati̍muñcati.
yaśa̍ e̱vaina̱ṃ rājñāṃ gamayati.
jī̱mūta̍syeva bhavati̱ pratī̍ka̱mityā̍ha.
ya̱thā̱ya̱jure̱vaitat.
ye te̱ panthā̍naḥ savitaḥ pū̱rvyāsa̱ itya̍dhva̱ryuryaja̍mānaṃ vācayatya̱bhiji̍tyai..14..

parā̱ vā e̱tasya̍ ya̱jña e̍ti.
yasya̍ pa̱śuru̱pākṛ̍to̱'nyatra̱ vedyā̱ eti̍.
e̱taṃsto̍tare̱tena̍ pa̱thā puna̱raśva̱māva̍rtayāsi na̱ ityā̍ha.
vā̱yurvai stotā̎.
vā̱yume̱vāsya̍ pa̱rastā̎ddadhā̱tyāvṛ̍ttyai.
yathā̱ vai ha̱viṣo̍ gṛhī̱tasya̱ skanda̍ti.
e̱vaṃ vā e̱tadaśva̍sya skandati.
yada̍syo̱pākṛ̍tasya̱ lomā̍ni̱ śīya̍nte.
yadvāle̍ṣu kā̱cānā̱vaya̍nti.
lomā̎nye̱vāsya̱ tathsambha̍ranti..15..

bhūrbhuva̱ḥ suva̱riti̍ prājāpa̱tyābhi̱rāva̍yanti.
prā̱jā̱pa̱tyo vā aśva̍ḥ.
svayai̱vaina̍ṃ de̱vata̍yā̱ sama̍rdhayanti.
bhūriti̱ mahi̍ṣī.
bhuva̱ iti̍ vā̱vātā̎.
suva̱riti̍ parivṛ̱ktī.
e̱ṣāṃ lo̱kānā̍ma̱bhiji̍tyai.
hi̱ra̱ṇyayā̎ḥ kā̱cā bha̍vanti.
jyoti̱rvai hira̍ṇyam.
rā̱ṣṭrama̍śvame̱dhaḥ..16..

jyoti̍ścai̱vāsmai̍ rā̱ṣṭraṃ ca̍ sa̱mīcī̍ dadhāti.
sa̱hasra̍ṃ bhavanti.
sa̱hasra̍sammitaḥ suva̱rgo lo̱kaḥ.
su̱va̱rgasya̍ lo̱kasyā̱bhiji̍tyai.
apa̱ vā e̱tasmā̱tteja̍ indri̱yaṃ pa̱śava̱ḥ śrīḥ krā̍manti.
yo̎'śvame̱dhena̱ yaja̍te.
vasa̍vastvā'ñjantu gāya̱treṇa̱ chanda̱seti̱ mahi̍ṣya̱bhya̍nakti.
tejo̱ vā ājyam̎.
tejo̍ gāya̱trī.
teja̍sai̱vāsmai̱ tejo'va̍ rundhe..17..

ru̱drāstvā̎ñjantu̱ traiṣṭu̍bhena̱ chanda̱seti̍ vā̱vātā̎.
tejo̱ vā ājyam̎.
i̱ndri̱yaṃ tri̱ṣṭup.
teja̍sai̱vāsmā̍ indri̱yamava̍ rundhe.
ā̱di̱tyāstvā̎'ñjantu̱ jāga̍tena̱ chanda̱seti̍ parivṛ̱ktī.
tejo̱ vā ājyam̎.
pa̱śavo̱ jaga̍tī.
teja̍sai̱vāsme̍ pa̱śūnava̍ rundhe.
patna̍yo̱'bhya̍ñjanti.
śri̱yā vā e̱tadrū̱pam..18..

yatpatna̍yaḥ.
śriya̍me̱vāsmi̱ntadda̍dhati.
nāsmā̱tteja̍ indri̱yaṃ pa̱śava̱ḥ śrīrapa̍ krāmanti.
lājī(3)ñchācī(3)n yaśo̍ma̱mām̐(4) ityati̍rikta̱manna̱maśvā̍yo̱pāha̍ranti.
pra̱jāme̱vānnā̱dīṃ ku̍rvate.
e̱tadde̍vā̱ anna̍mattai̱tadanna̍maddhi prajāpata̱ ityā̍ha.
pra̱jāyā̍me̱vānnādya̍ṃ dadhate.
yadi̱ nāva̱jighre̎t.
a̱gniḥ pa̱śurā̍sī̱dityava̍ghrāpayet.
ava̍ hai̱va ji̍ghrati.
ākrān̍ vā̱jī kramai̱ratya̍kramīdvā̱jī dyauste̍ pṛ̱ṣṭhaṃ pṛ̍thi̱vī sa̱dhastha̱mityaśva̱manu̍mantrayate.
e̱ṣāṃ lo̱kānā̍ma̱bhiji̍tyai.
sami̍ddho a̱ñjankṛda̍raṃ matī̱nāmityaśva̍syā̱priyo̍ bhavanti sarūpa̱tvāya̍..19..

Anuvāka 5

teja̍sā̱ vā e̱ṣa bra̍hmavarca̱sena̱ vyṛ̍ddhyate.
yo̎'śvame̱dhena̱ yaja̍te.
hotā̍ ca bra̱hmā ca̍ bra̱hmodya̍ṃ vadataḥ.
teja̍sā cai̱vaina̍ṃ brahmavarca̱sena̍ ca̱ sama̍rdhayataḥ.
da̱kṣi̱ṇa̱to bra̱hmā bha̍vati.
da̱kṣi̱ṇa̱ta ā̍yatano̱ vai bra̱hmā.
bā̱ṟha̱spa̱tyo vai bra̱hmā.
bra̱hma̱va̱rca̱same̱vāsya̍ dakṣiṇa̱to da̍dhāti.
tasmā̱ddakṣi̱ṇo'rdho̎ brahmavarca̱sita̍raḥ.
u̱tta̱ra̱to hotā̍ bhavati..20..

u̱tta̱ra̱ta ā̍yatano̱ vai hotā̎.
ā̱gne̱yo vai hotā̎.
tejo̱ vā a̱gniḥ.
teja̍ e̱vāsyo̎ttara̱to da̍dhāti.
tasmā̱dutta̱ro'rdha̍steja̱svita̍raḥ.
yūpa̍ma̱bhito̍ vadataḥ.
ya̱ja̱mā̱na̱de̱va̱tyo̍ vai yūpa̍ḥ.
yaja̍māname̱va teja̍sā ca brahmavarca̱sena̍ ca̱ sama̍rdhayataḥ.
kiṃ svi̍dāsītpū̱rvaci̍tti̱rityā̍ha.
dyaurvai vṛṣṭi̍ḥ pū̱rvaci̍ttiḥ..21..

diva̍me̱va vṛṣṭi̱mava̍ rundhe.
kiṃ svi̍dāsīdbṛ̱hadvaya̱ ityā̍ha.
aśvo̱ vai bṛ̱hadvaya̍ḥ.
aśva̍me̱vāva̍ rundhe.
kiṃ svi̍dāsītpiśaṅgi̱letyā̍ha.
rātri̱rvai pi̍śaṅgi̱lā.
rātri̍me̱vāva̍ rundhe.
kiṃ svi̍dāsītpilippi̱letyā̍ha.
śrīrvai pi̍lippi̱lā.
a̱nnādya̍me̱vāva̍ rundhe..22..

kaḥ svi̍dekā̱kī ca̍ra̱tītyā̍ha.
a̱sau vā ā̍di̱tya e̍kā̱kī ca̍rati.
teja̍ e̱vāva̍ rundhe.
ka u̍svijjāyate̱ puna̱rityā̍ha.
ca̱ndramā̱ vai jā̍yate̱ puna̍ḥ.
āyu̍re̱vāva̍ rundhe.
kiṃ svi̍ddhi̱masya̍ bheṣa̱jamityā̍ha.
a̱gnirvai hi̱masya̍ bheṣa̱jam.
bra̱hma̱va̱rca̱same̱vāva̍ rundhe.
kiṃ svi̍dā̱vapa̍naṃ ma̱hadityā̍ha..23..

a̱yaṃ vai lo̱ka ā̱vapa̍naṃ ma̱hat.
a̱sminne̱va lo̱ke prati̍ tiṣṭhati.
pṛ̱cchāmi̍ tvā̱ para̱manta̍ṃ pṛthi̱vyā ityā̍ha.
vedi̱rvai paro'nta̍ḥ pṛthi̱vyāḥ.
vedi̍me̱vāva̍ rundhe.
pṛ̱cchāmi̍ tvā̱ bhuva̍nasya̱ nābhi̱mityā̍ha.
ya̱jño vai bhuva̍nasya̱ nābhi̍ḥ.
ya̱jñame̱vāva̍ rundhe.
pṛ̱cchāmi̍ tvā̱ vṛṣṇo̱ aśva̍sya̱ reta̱ ityā̍ha.
somo̱ vai vṛṣṇo̱ aśva̍sya̱ reta̍ḥ.
so̱ma̱pī̱thame̱vāva̍ rundhe.
pṛ̱cchāmi̍ vā̱caḥ pa̍ra̱maṃ vyo̍metyā̍ha.
brahma̱ vai vā̱caḥ pa̍ra̱maṃ vyo̍ma.
bra̱hma̱va̱rca̱same̱vāva̍ rundhe..24..

Anuvāka 6

apa̱ vā e̱tasmā̎tprā̱ṇāḥ krā̍manti.
yo̎'śvame̱dhena̱ yaja̍te.
prā̱ṇāya̱ svāhā̎ vyā̱nāya̱ svāheti̍ saṃjña̱pyamā̍na̱ āhu̍tīrjuhoti.
prā̱ṇāne̱vāsmi̍ndadhāti.
nāsmā̎tprā̱ṇā apa̍krāmanti.
ava̍ntī̱ḥ sthāva̍ntīstvā'vantu.
pri̱yaṃ tvā̎ pri̱yāṇā̎m.
varṣi̍ṣṭha̱māpyā̍nām.
ni̱dhī̱nāṃ tvā̍ nidhi̱pati̍ṃ havāmahe vaso ma̱metyā̍ha.
apai̱vāsmai̱ taddhnu̍vate..25..

atho̍ dhu̱vantye̱vainam̎.
atho̱ nye̍vāsmai̎ hnuvate.
triḥ pari̍yanti.
traya̍ i̱me lo̱kāḥ.
e̱bhya e̱vaina̍ṃ lo̱kebhyo̍ dhuvate.
triḥ puna̱ḥ pari̍yanti.
ṣaṭthsaṃ pa̍dyante.
ṣaḍvā ṛ̱tava̍ḥ.
ṛ̱tubhi̍re̱vaina̍ṃ dhuvate.
apa̱ vā e̱tebhya̍ḥ prā̱ṇāḥ krā̍manti..26..

ye ya̱jñe dhuva̍naṃ ta̱nvate̎.
na̱va̱kṛtva̱ḥ pari̍yanti.
nava̱ vai puru̍ṣe prā̱ṇāḥ.
prā̱ṇāne̱vā''tmanda̍dhate.
naibhya̍ḥ prā̱ṇā apa̍krāmanti.
ambe̱ ambā̱lyambi̍ka̱ iti̱ patnī̍mu̱dāna̍yati.
ahva̍tai̱vainā̎m.
subha̍ge̱ kāmpī̍lavāsi̱nītyā̍ha.
tapa̍ e̱vainā̱mupa̍nayati.
su̱va̱rge lo̱ke samprorṇvā̍thā̱mityā̍ha..27..

su̱va̱rgame̱vainā̎ṃ lo̱kaṃ ga̍mayati.
ā'hama̍jāni garbha̱dhamā tvama̍jā'si garbha̱dhamityā̍ha.
pra̱jā vai pa̱śavo̱ garbha̍ḥ.
pra̱jāme̱va pa̱śūnā̱tmandha̍tte.
de̱vā vā a̍śvame̱dhe pava̍māne.
su̱va̱rgaṃ lo̱kaṃ na prājā̍nan.
tamaśva̱ḥ prājā̍nāt.
yathsū̱cībhi̍rasipa̱thānka̱lpaya̍nti.
su̱va̱rgasya̍ lo̱kasya̱ prajñā̎tyai.
gā̱ya̱trī tri̱ṣṭubjaga̱tītyā̍ha..28..

ya̱thā̱ya̱jure̱vaitat.
tra̱yyaḥ sū̱cyo̍ bhavanti.
a̱ya̱smayyo̍ raja̱tā hari̍ṇyaḥ.
a̱sya vai lo̱kasya̍ rū̱pama̍ya̱smayya̍ḥ.
a̱ntari̍kṣasya raja̱tāḥ.
di̱vo hari̍ṇyaḥ.
diśo̱ vā a̍ya̱smayya̍ḥ.
a̱vā̱nta̱ra̱di̱śā ra̍ja̱tāḥ.
ū̱rdhvā hari̍ṇyaḥ.
diśa̍ e̱vāsmai̍ kalpayati.
kastvā̎ chyati̱ kastvā̱ viśā̱stītyā̱hāhi̍ṃsāyai..29..

Anuvāka 7

apa̱ vā e̱tasmā̱cchrī rā̱ṣṭraṃ krā̍mati.
yo̎'śvame̱dhena̱ yaja̍te.
ū̱rdhvāme̍nā̱mucchra̍yatā̱dityā̍ha.
śrīrvai rā̱ṣṭrama̍śvame̱dhaḥ.
śriya̍me̱vāsmai̍ rā̱ṣṭramū̱rdhvamucchra̍yati.
ve̱ṇu̱bhā̱raṅgi̱rāvi̱vetyā̍ha.
rā̱ṣṭraṃ vai bhā̱raḥ.
rā̱ṣṭrame̱vāsmai̱ paryū̍hati.
athā̎syā̱ madhya̍medhatā̱mityā̍ha.
śrīrvai rā̱ṣṭrasya̱ madhyam̎..30..

śriya̍me̱vāva̍ rundhe.
śī̱te vāte̍ pu̱nanni̱vetyā̍ha.
kṣemo̱ vai rā̱ṣṭrasya̍ śī̱to vāta̍ḥ.
kṣema̍me̱vāva̍ rundhe.
yaddha̍ri̱ṇī yava̱mattītyā̍ha.
viḍvai ha̍ri̱ṇī.
rā̱ṣṭraṃ yava̍ḥ.
viśa̍ṃ cai̱vāsmai̍ rā̱ṣṭraṃ ca̍ sa̱mīcī̍ dadhāti.
na pu̱ṣṭaṃ pa̱śu ma̍nyata̱ ityā̍ha.
tasmā̱drājā̍ pa̱śūnna puṣya̍ti..31..

śū̱drā yadarya̍jārā̱ na poṣā̍ya dhanāya̱tītyā̍ha.
tasmā̎dvaiśīpu̱traṃ nābhiṣi̍ñcante.
i̱yaṃ ya̱kā śa̍kunti̱ketyā̍ha.
viḍvai śa̍kunti̱kā.
rā̱ṣṭrama̍śvame̱dhaḥ.
viśa̍ṃ cai̱vāsmai̍ rā̱ṣṭraṃ ca̍ sa̱mīcī̍ dadhāti.
ā̱hala̱miti̱ sarpa̱tītyā̍ha.
tasmā̎drā̱ṣṭrāya̱ viśa̍ḥ sarpanti.
āha̍taṃ ga̱bhe pasa̱ ityā̍ha.
viḍvai gabha̍ḥ..32..

rā̱ṣṭraṃ pasa̍ḥ.
rā̱ṣṭrame̱va vi̱śyāha̍nti.
tasmā̎drā̱ṣṭraṃ viśa̱ṃ ghātu̍kam.
mā̱tā ca̍ te pi̱tā ca̍ ta̱ ityā̍ha.
i̱yaṃ vai mā̱tā.
a̱sau pi̱tā.
ā̱bhyāme̱vaina̱ṃ pari̍dadāti.
agra̍ṃ vṛ̱kṣasya̍ rohata̱ ityā̍ha.
śrīrvai vṛ̱kṣasyāgram̎.
śri̱ya̍me̱vāva̍ rundhe..33..

prasu̍lā̱mīti̍ te pi̱tā ga̱bhe mu̱ṣṭima̍taṃsaya̱dityā̍ha.
viḍvai gabha̍ḥ.
rā̱ṣṭraṃ mu̱ṣṭiḥ.
rā̱ṣṭrame̱va vi̱śyāha̍nti.
tasmā̎drā̱ṣṭraṃ viśa̱ṃ ghātu̍kam.
apa̱ vā e̱tebhya̍ḥ prā̱ṇāḥ krā̍manti.
ye ya̱jñe'pū̍ta̱ṃ vada̍nti.
da̱dhi̱krāvṇṇo̍ akāriṣa̱miti̍ surabhi̱matī̱mṛca̍ṃ vadanti.
prā̱ṇā vai su̍ra̱bhaya̍ḥ.
prā̱ṇāne̱vā''tmanda̍dhate.
naibhya̍ḥ prā̱ṇā apa̍krāmanti.
āpo̱ hi ṣṭhā ma̍yo̱bhuva̱ itya̱dbhirmā̎rjayante.
āpo̱ vai sarvā̍ de̱vatā̎ḥ.
de̱vatā̍bhire̱vā''tmāna̍ṃ pavayante..34..

Anuvāka 8

pra̱jāpa̍tiḥ pra̱jāḥ sṛ̱ṣṭvā pre̱ṇā'nu̱ prāvi̍śat.
tābhya̱ḥ puna̱ḥ sambha̍vitu̱ṃ nāśa̍knot.
so̎'bravīt.
ṛ̱dhnava̱dithsaḥ.
yo me̱taḥ puna̍ḥ sa̱mbhara̱diti̍.
taṃ de̱vā a̍śvame̱dhenai̱va sama̍bharan.
tato̱ vai ta ā̎rdhnuvan.
yo̎'śvame̱dhena̱ yaja̍te.
pra̱jāpa̍time̱va sambha̍ratyṛ̱dhnoti̍.
puru̍ṣa̱māla̍bhate..35..

vai̱rā̱jo vai puru̍ṣaḥ.
vi̱rāja̍me̱vāla̍bhate.
atho̱ anna̱ṃ vai vi̱rāṭ.
anna̍me̱vāva̍ rundhe.
aśva̱māla̍bhate.
prā̱jā̱pa̱tyo vā aśva̍ḥ.
pra̱jāpa̍time̱vāla̍bhate.
atho̱ śrīrvā eka̍śapham.
śriya̍me̱vāva̍ rundhe.
gāmāla̍bhate..36..

ya̱jño vai gauḥ.
ya̱jñame̱vāla̍bhate.
atho̱ anna̱ṃ vai gauḥ.
anna̍me̱vāva̍ rundhe.
a̱jā̱vī āla̍bhate bhū̱mne.
atho̱ puṣṭi̱rvai bhū̱mā.
puṣṭi̍me̱vāva̍ rundhe.
parya̍gnikṛta̱ṃ puru̍ṣaṃ cāra̱ṇyāṃścothsṛ̍ja̱ntyahi̍ṃsāyai.
u̱bhau vā e̱tau pa̱śū āla̍bhyete.
yaścā̍va̱mo yaśca̍ para̱maḥ.
te̎'syo̱bhaye̍ ya̱jñe ba̱ddhāḥ.
a̱bhīṣṭā̍ a̱bhiprī̍tāḥ.
a̱bhiji̍tā a̱bhihu̍tā bhavanti.
naina̍ṃ da̱ṅkṣṇava̍ḥ pa̱śavo̍ ya̱jñe ba̱ddhāḥ.
a̱bhīṣṭā̍ a̱bhiprī̍tāḥ.
a̱bhiji̍tā a̱bhihu̍tā hiṃsanti.
yo̎'śvame̱dhena̱ yaja̍te.
ya u̍ cainame̱vaṃ veda̍..37..

Anuvāka 9

pra̱tha̱mena̱ vā e̱ṣa stome̍na rā̱dhvā.
ca̱tu̱ṣṭo̱mena̍ kṛ̱tenāyā̍nā̱mutta̱rehan̍.
e̱ka̱vi̱ṃśe pra̍ti̱ṣṭhāyā̱ṃ prati̍ tiṣṭhati.
e̱ka̱vi̱ṃśātpra̍ti̱ṣṭhāyā̍ ṛ̱tūna̱nvāro̍hati.
ṛ̱tavo̱ vai pṛ̱ṣṭhāni̍.
ṛ̱tava̍ḥ saṃvathsa̱raḥ.
ṛ̱tuṣve̱va sa̍ṃvathsa̱re pra̍ti̱ṣṭhāya̍.
de̱vatā̍ a̱bhyāro̍hati.
śakva̍rayaḥ pṛ̱ṣṭhaṃ bha̍vantya̱nyada̍nya̱cchanda̍ḥ.
a̱nye̎'nye̱ vā e̱te pa̱śava̱ āla̍bhyante..38..

u̱teva̍ grā̱myāḥ.
u̱tevā̍ra̱ṇyāḥ.
aha̍re̱va rū̱peṇa̱ sama̍rdhayati.
atho̱ ahna̍ e̱vaiṣa ba̱lirhri̍yate.
tadā̍huḥ.
apa̍śavo̱ vā e̱te.
yada̍jā̱vaya̍ścāra̱ṇyāśca̍.
e̱te vai sarve̍ pa̱śava̍ḥ.
yadga̱vyā iti̍.
ga̱vyānpa̱śūnu̍tta̱me'ha̱ṃ nāla̍bhate..39..

tenai̱vobhayā̎npa̱śūnava̍ rundhe.
prā̱jā̱pa̱tyā bha̍vanti.
ana̍bhijitasyā̱bhiji̍tyai.
sau̱rīrnava̍ śve̱tā va̱śā a̍nūba̱ndhyā̍ bhavanti.
a̱nta̱ta e̱va bra̍hmavarca̱samava̍ rundhe.
somā̍ya sva̱rājñe̍'novā̱hāva̍na̱ḍvāhā̱viti̍ dva̱ndvina̍ḥ pa̱śūnāla̍bhate.
a̱ho̱rā̱trāṇā̍ma̱bhiji̍tyai.
pa̱śubhi̱rvā e̱ṣa vyṛ̍dhyate.
yo̎'śvame̱dhena̱ yaja̍te.
cha̱ga̱laṃ ka̱lmāṣa̍ṃ kikidī̱viṃ vi̍dī̱gaya̱miti̍ tvā̱ṣṭrānpa̱śūnā la̍bhate.
pa̱śubhi̍re̱vā''tmāna̱ṃ sama̍rdhayati.
ṛ̱tubhi̱rvā e̱ṣa vyṛ̍dhyate.
yo̎'śvame̱dhena̱ yaja̍te.
pi̱śaṅgā̱strayo̍ vāsa̱ntā ityṛ̍tupa̱śūnāla̍bhate.
ṛ̱tubhi̍re̱vā''tmāna̱ṃ sama̍rdhayati.
ā vā e̱ṣa pa̱śubhyo̍ vṛścyate.
yo̎'śvame̱dhena̱ yaja̍te.
parya̍gnikṛtā̱ uthsṛ̍ja̱ntyanā̎vraskāya..40..

Anuvāka 10

pra̱jāpa̍tirakāmayata ma̱hāna̍nnā̱daḥ syā̱miti̍.
sa e̱tāva̍śvame̱dhe ma̍hi̱mānā̍vapaśyat.
tāva̍gṛhṇīta.
tato̱ vai sa ma̱hāna̍nnā̱do̍'bhavat.
yaḥ kā̱maye̍ta ma̱hāna̍nnā̱daḥ syā̱miti̍.
sa e̱tāva̍śvame̱dhe ma̍hi̱mānau̍ gṛhṇīta.
ma̱hāne̱vānnā̱do bha̍vati.
ya̱ja̱mā̱na̱de̱va̱tyā̍ vai va̱pā.
rājā̍ mahi̱mā.
yadva̱pāṃ ma̍hi̱mnobha̱yata̍ḥ pari̱yaja̍ti.
yaja̍māname̱va rā̱jyeno̍bha̱yata̱ḥ pari̍gṛhṇāti.
pu̱rastā̎thsvāhākārā̱ vā a̱nye de̱vāḥ.
u̱pari̍ṣṭāthsvāhākārā a̱nye.
te vā e̱te'śva̍ e̱va medhya̍ u̱bhaye'va̍rudhyante.
yadva̱pāṃ ma̍hi̱mnobha̱yata̍ḥ pari̱yaja̍ti.
tāne̱vobhayā̎nprīṇāti..41..

Anuvāka 11

vai̱śva̱de̱vo vā aśva̍ḥ.
taṃ yatprā̍jāpa̱tyaṃ ku̱ryāt.
yā de̱vatā̱ api̍bhāgāḥ.
tā bhā̍ga̱dheye̍na̱ vya̍rdhayet.
de̱vatā̎bhyaḥ sa̱mada̍ṃ dadhyāt.
ste̱gāndaṃṣṭrā̎bhyāṃ ma̱ṇḍūkā̱ṃ jambhye̍bhi̱riti̍.
ājya̍mava̱dāna̍ṃ kṛ̱tvā pra̍tisa̱ṅkhyāya̱māhu̍tīrjuhoti.
yā e̱va de̱vatā̱ api̍bhāgāḥ.
tā bhā̍ga̱dheye̍na̱ sama̍rdhayati.
na de̱vatā̎bhyaḥ sa̱mada̍ṃ dadhāti..42..

catu̍rdaśai̱tāna̍nuvā̱kāñju̍ho̱tyana̍ntarityai.
pra̱yā̱sāya̱ svāheti̍ pañcada̱śam.
pañca̍daśa̱ vā a̍rdhamā̱sasya̱ rātra̍yaḥ.
a̱rdha̱mā̱sa̱śaḥ sa̍ṃvathsa̱ra ā̎pyate.
de̱vā̱su̱rāḥ saṃya̍ttā āsan.
te̎'bruvanna̱gnaya̍ḥ sviṣṭa̱kṛta̍ḥ.
aśva̍sya̱ medhya̍sya va̱yamu̍ddhā̱ramuddha̍rāmahai.
athai̱tāna̱bhi bha̍vā̱meti̍.
te lohi̍ta̱muda̍haranta.
tato̍ de̱vā abha̍van..43..

parā'su̍rāḥ.
yathsvi̍ṣṭa̱kṛdbhyo̱ lohi̍taṃ ju̱hoti̱ bhrātṛ̍vyā'bhibhūtyai.
bhava̍tyā̱tmanā̎.
parā̎'sya̱ bhrātṛ̍vyo bhavati.
go̱mṛ̱ga̱ka̱ṇṭhena̍ pratha̱māmāhu̍tiṃ juhoti.
pa̱śavo̱ vai go̍mṛ̱gaḥ.
ru̱dro̎'gniḥ svi̍ṣṭa̱kṛt.
ru̱drāde̱va pa̱śūna̱ntarda̍dhāti.
atho̱ yatrai̱ṣā''hu̍tirhū̱yate̎.
na tatra̍ ru̱draḥ pa̱śūna̱bhima̍nyate..44..

a̱śva̱śa̱phena̍ dvi̱tīyā̱māhu̍tiṃ juhoti.
pa̱śavo̱ vā eka̍śapham.
ru̱dro̎'gniḥ svi̍ṣṭa̱kṛt.
ru̱drāde̱va pa̱śūna̱ntarda̍dhāti.
atho̱ yatrai̱ṣā''hu̍tirhū̱yate̎.
na tatra̍ ru̱draḥ pa̱śūna̱bhima̍nyate.
a̱ya̱smaye̍na kama̱ṇḍalu̍nā tṛ̱tīyā̎m.
āhu̍tiṃ juhotyāyā̱syo̍ vai pra̱jāḥ.
ru̱dro̎'gniḥ svi̍ṣṭa̱kṛt.
ru̱drāde̱va pra̱jā a̱ntarda̍dhāti.
atho̱ yatrai̱ṣā''hu̍tirhū̱yate̎.
na tatra̍ ru̱draḥ pra̱jā a̱bhima̍nyate..45..

Anuvāka 12

aśva̍sya̱ vā āla̍bdhasya̱ medha̱ uda̍krāmat.
tada̍śvasto̱mīya̍mabhavat.
yada̍śvasto̱mīya̍ṃ ju̱hoti̍.
same̍dhame̱vaina̱māla̍bhate.
ājye̍na juhoti.
medho̱ vā ājyam̎.
medho̎'śvasto̱mīyam̎.
medhe̍nai̱vāsmi̱nmedha̍ṃ dadhāti.
ṣaṭtri̍ṃśataṃ juhoti.
ṣaṭtri̍ṃśadakṣarā bṛha̱tī..46..

bārha̍tāḥ pa̱śava̍ḥ.
sā pa̍śū̱nāṃ mātrā̎.
pa̱śūne̱va mātra̍yā̱ sama̍rdhayati.
tāyadbhūya̍sīrvā̱ kanī̍yasīrvā juhu̱yāt.
pa̱śūnmātra̍yā̱ vya̍rdhayet.
ṣaṭtri̍ṃśataṃ juhoti.
ṣaṭtri̍ṃśadakṣarā bṛha̱tī.
bārha̍tāḥ pa̱śava̍ḥ.
sā pa̍śū̱nāṃ mātrā̎.
pa̱śūne̱va mātra̍yā̱ sama̍rdhayati..47..

a̱śva̱sto̱mīya̍ṃ hu̱tvā dvi̱padā̍ juhoti.
dvi̱pādvai puru̍ṣo̱ dvipra̍tiṣṭhaḥ.
tade̍naṃ prati̱ṣṭhayā̱ sama̍rdhayati.
tadā̍huḥ.
a̱śva̱sto̱mīya̱ṃ pūrva̍ṃ hota̱vyām̐(3)ndvi̱padā(3) iti̍.
aśvo̱ vā a̍śvasto̱mīyam̎.
puru̍ṣo dvi̱padā̎ḥ.
a̱śva̱sto̱mīya̍ṃ hu̱tvā dvi̱padā̍ juhoti.
tasmā̎ddvi̱pāccatu̍ṣpādamatti.
atho̎ dvi̱padye̱va catu̍ṣpada̱ḥ prati̍ṣṭhāpayati.
dvi̱padā̍ hu̱tvā.
nānyāmutta̍rā̱māhu̍tiṃ juhuyāt.
yada̱nyāmutta̍rā̱māhu̍tiṃ juhu̱yāt.
pra pra̍ti̱ṣṭhāyā̎ścyaveta.
dvi̱padā̍ anta̱to ju̍hoti̱ prati̍ṣṭhityai..48..

Anuvāka 13

pra̱jāpa̍tiraśvame̱dhama̍sṛjata.
so̎'smāthsṛ̱ṣṭo'pā̎krāmat.
taṃ ya̍jñakra̱tubhi̱ranvai̎cchat.
taṃ ya̍jñakra̱tubhi̱rnānva̍vindat.
tamiṣṭi̍bhi̱ranvai̎cchat.
tamiṣṭi̍bhi̱ranva̍vindat.
tadiṣṭī̍nāmiṣṭi̱tvam.
yathsa̍ṃvathsa̱ramiṣṭi̍bhi̱ryaja̍te.
aśva̍me̱va tadanvi̍cchati.
sā̱vi̱triyo̍ bhavanti..49..

i̱yaṃ vai sa̍vi̱tā.
yo vā a̱syānnaśya̍ti̱ yo ni̱laya̍te.
a̱syāṃ vāva taṃ vi̍ndanti.
na vā i̱māṃ kaśca̱netyā̍huḥ.
ti̱ryaṅnordhvotye̍tumarha̱tīti̍.
yathsā̍vi̱triyo̱ bhava̍nti.
sa̱vi̱tṛpra̍sūta e̱vaina̍micchati.
ī̱śva̱ro vā aśva̱ḥ pramu̍kta̱ḥ parā̎ṃ parā̱vata̱ṃ ganto̎ḥ.
yathsā̱yaṃ dhṛtī̎rju̱hoti̍.
aśva̍sya̱ yatyai̱ dhṛtyai̎..50..

yatprā̱tariṣṭi̍bhi̱ryaja̍te.
aśva̍me̱va tadanvi̍cchati.
yathsā̱yaṃ dhṛtī̎rju̱hoti̍.
aśva̍syai̱va yatyai̱ dhṛtyai̎.
tasmā̎thsā̱yaṃ pra̱jāḥ kṣe̱myā̍ bhavanti.
yatprā̱tariṣṭi̍bhi̱ryaja̍te.
aśva̍me̱va tadanvi̍cchati.
tasmā̱ddivā̍ naṣṭai̱ṣa e̍ti.
yatprā̱tariṣṭi̍bhi̱ryaja̍te sā̱yaṃ dhṛtī̎rju̱hoti̍.
a̱ho̱rā̱trābhyā̍me̱vaina̱manvi̍cchati.
atho̍ ahorā̱trābhyā̍me̱vāsmai̍ yogakṣe̱maṃ ka̍lpayati..51..

Anuvāka 14

apa̱ vā e̱tasmā̱cchrī rā̱ṣṭraṃ krā̍mati.
yo̎'śvame̱dhena̱ yaja̍te.
brā̱hma̱ṇau vī̍ṇāgā̱thinau̍ gāyataḥ.
śri̱yā vā e̱tadrū̱pam.
yadvīṇā̎.
śriya̍me̱vāsmi̱ntaddha̍ttaḥ.
ya̱dā khalu̱ vai puru̍ṣa̱ḥ śriya̍maśñu̱te.
vīṇā̎'smai vādyate.
tadā̍huḥ.
yadu̱bhau brā̎hma̱ṇau gāye̍tām..52..

pra̱bhraṃśu̍kāsmā̱cchrīḥ syā̎t.
na vai brā̎hma̱ṇe śrī ra̍mata̱ iti̍.
brā̱hma̱ṇo̎'nyo gāye̎t.
rā̱ja̱nyo̎'nyaḥ.
brahma̱ vai brā̎hma̱ṇaḥ.
kṣa̱traṃ rā̍ja̱nya̍ḥ.
tathā̍ hāsya̱ brahma̍ṇā ca kṣa̱treṇa̍ cobha̱yata̱ḥ śrīḥ pari̍gṛhītā bhavati.
tadā̍huḥ.
yadu̱bhau divā̱ gāye̍tām.
apā̎smādrā̱ṣṭraṃ krā̍met..53..

na vai brā̎hma̱ṇe rā̱ṣṭraṃ ra̍mata̱ iti̍.
ya̱dā khalu̱ vai rājā̍ kā̱maya̍te.
atha̍ brāhma̱ṇaṃ ji̍nāti.
divā̎ brāhma̱ṇo gā̍yet.
nakta̍ṃ rāja̱nya̍ḥ.
brahma̍ṇo̱ vai rū̱pamaha̍ḥ.
kṣa̱trasya̱ rātri̍ḥ.
tathā̍ hāsya̱ brahma̍ṇā ca kṣa̱treṇa̍ cobha̱yato̍ rā̱ṣṭraṃ pari̍gṛhītaṃ bhavati.
itya̍dadā̱ itya̍yajathā̱ itya̍paca̱ iti̍ brāhma̱ṇo gāye̎t.
i̱ṣṭā̱pū̱rtaṃ vai brā̎hma̱ṇasya̍..54..

i̱ṣṭā̱pū̱rtenai̱vaina̱ṃ sa sama̍rdhayati.
itya̍jinā̱ itya̍yudhyathā̱ itya̱muṃ sa̍ṅgrā̱mama̍ha̱nniti̍ rāja̱nya̍ḥ.
yu̱ddhaṃ vai rā̍ja̱nya̍sya.
yu̱ddhenai̱vaina̱ṃ sa sama̍rdhayati.
akḷ̍ptā̱ vā e̱tasya̱rtava̱ ityā̍huḥ.
yo̎'śvame̱dhena̱ yaja̍ta̱ iti̍.
ti̱sro̎'nyo gāya̍ti ti̱sro̎'nyaḥ.
ṣaṭthsaṃ pa̍dyante.
ṣaḍvā ṛ̱tava̍ḥ.
ṛ̱tūne̱vāsmai̍ kalpayataḥ.
tābhyā̍ṃ sa̱ṃsthāyā̎m.
a̱no̱yu̱kte ca̍ śa̱te ca̍ dadāti.
śa̱tāyu̱ḥ puru̍ṣaḥ śa̱tendri̍yaḥ.
āyu̍ṣye̱vendri̱ye prati̍ tiṣṭhati..55..

Anuvāka 15

sarve̍ṣu̱ vā e̱ṣu lo̱keṣu̍ mṛ̱tyavo̱'nvāya̍ttāḥ.
tebhyo̱ yadāhu̍tī̱rna ju̍hu̱yāt.
lo̱kelo̍ka enaṃ mṛ̱tyurvi̍ndet.
mṛ̱tyave̱ svāhā̍ mṛ̱tyave̱ svāhetya̍bhipū̱rvamāhu̍tīrjuhoti.
lo̱kāllo̍kāde̱va mṛ̱tyumava̍yajate.
naina̍ṃ lo̱kelo̍ke mṛ̱tyurvi̍ndati.
yada̱muṣmai̱ svāhā̱'muṣmai̱ svāheti̱ juhva̍thsa̱ñcakṣī̍ta.
ba̱huṃ mṛ̱tyuma̱mitra̍ṃ kurvīta.
mṛ̱tyave̱ svāhetyeka̍smā e̱vaikā̎ṃ juhuyāt.
eko̱ vā a̱muṣmi̍m̐llo̱ke mṛ̱tyuḥ..56..

a̱śa̱na̱yā̱ mṛ̱tyure̱va.
tame̱vāmuṣmi̍m̐llo̱ke'va̍yajate.
bhrū̱ṇa̱ha̱tyāyai̱ svāhetya̍vabhṛ̱tha āhu̍tiṃ juhoti.
bhrū̱ṇa̱ha̱tyāme̱vāva̍ yajate.
tadā̍huḥ.
yadbhrū̍ṇaha̱tyā pā̱tryā'tha̍.
kasmā̎dya̱jñe'pi̍ kriyata̱ iti̍.
amṛ̍tyu̱rvā a̱nyo bhrū̍ṇaha̱tyāyā̱ ityā̍huḥ.
bhrū̱ṇa̱ha̱tyā vāva mṛ̱tyuriti̍.
yadbhrū̍ṇaha̱tyāyai̱ svāhetya̍vabhṛ̱tha āhu̍tiṃ ju̱hoti̍..57..

mṛ̱tyume̱vā''hu̍tyā tarpayi̱tvā pa̍ri̱pāṇa̍ṃ kṛ̱tvā.
bhrū̱ṇa̱ghne bhe̍ṣa̱jaṃ ka̍roti.
e̱tāṃ ha̱ vai mu̍ṇḍi̱bha au̍danya̱vaḥ.
bhrū̱ṇa̱ha̱tyāyai̱ prāya̍ścittiṃ vi̱dāṃ ca̍kāra.
yo hā̱syāpi̍ pra̱jāyā̎ṃ brāhma̱ṇaṃ hanti̍.
sarva̍smai̱ tasmai̍ bheṣa̱jaṃ ka̍roti.
ju̱mba̱kāya̱ svāhetya̍vabhṛ̱tha u̍tta̱māmāhu̍tiṃ juhoti.
varu̍ṇo̱ vai ju̍mba̱kaḥ.
a̱nta̱ta e̱va varu̍ṇa̱mava̍yajate.
kha̱la̱tervi̍kli̱dhasya̍ śu̱klasya̍ piṅgā̱kṣasya̍ mū̱rdhaṃ ju̍hoti.
e̱tadvai varu̍ṇasya rū̱pam.
rū̱peṇai̱va varu̍ṇa̱mava̍yajate..58..

Anuvāka 16

vā̱ru̱ṇo vā aśva̍ḥ.
taṃ de̱vata̍yā̱ vya̍rdhayati.
yatprā̍jāpa̱tyaṃ ka̱roti̍.
namo̱ rājñe̱ namo̱ varu̍ṇā̱yetyā̍ha.
vā̱ru̱ṇo vā aśva̍ḥ.
svayai̱vaina̍ṃ de̱vata̍yā̱ sama̍rdhayati.
namo'śvā̍ya̱ nama̍ḥ pra̱jāpa̍taya̱ ityā̍ha.
prā̱jā̱pa̱tyo vā aśva̍ḥ.
svayai̱vaina̍ṃ de̱vata̍yā̱ sama̍rdhayati.
namo'dhi̍pataya̱ ityā̍ha..59..

dharmo̱ vā adhi̍patiḥ.
dharma̍me̱vāva̍ rundhe.
adhi̍patira̱syadhi̍patiṃ mā ku̱rvadhi̍patira̱haṃ pra̱jānā̎ṃ bhūyāsa̱mityā̍ha.
adhi̍patime̱vaina̍ṃ samā̱nānā̎ṃ karoti.
māṃ dhe̍hi̱ mayi̍ dhe̱hītyā̍ha.
ā̱śiṣa̍me̱vaitāmā śā̎ste.
u̱pākṛ̍tāya̱ svāhetyu̱pākṛ̍te juhoti.
āla̍bdhāya̱ svāheti̱ niyu̍kte juhoti.
hu̱tāya̱ svāheti̍ hu̱te ju̍hoti.
e̱ṣāṃ lo̱kānā̍ma̱bhiji̍tyai..60..

pra vā e̱ṣa e̱bhyo lo̱kebhya̍ścyavate.
yo̎'śvame̱dhena̱ yaja̍te.
ā̱gne̱yamai̎ndrā̱gnamā̎śvi̱nam.
tānpa̱śūnāla̍bhate̱ prati̍ṣṭhityai.
yadā̎gne̱yo bhava̍ti.
a̱gniḥ sarvā̍ de̱vatā̎ḥ.
de̱vatā̍ e̱vāva̍ rundhe.
brahma̱ vā a̱gniḥ.
kṣa̱tramindra̍ḥ.
yadai̎ndrā̱gno bhava̍ti..61..

bra̱hma̱kṣa̱tre e̱vāva̍ rundhe.
yadā̎śvi̱no bhava̍ti.
ā̱śiṣā̱mava̍ruddhyai.
trayo̍ bhavanti.
traya̍ i̱me lo̱kāḥ.
e̱ṣve̍va lo̱keṣu̱ prati̍ tiṣṭhati.
a̱gnaye'ṃ̍ho̱muce̱'ṣṭāka̍pāla̱ iti̱ daśa̍haviṣa̱miṣṭi̱ṃ nirva̍pati.
daśā̎kṣarā vi̱rāṭ.
anna̍ṃ vi̱rāṭ.
vi̱rājai̱vānnādya̱mava̍ rundhe.
a̱gnerma̍nve pratha̱masya̱ prace̍tasa̱ iti̍ yājyānuvā̱kyā̍ bhavanti sarva̱tvāya̍..62..

Anuvāka 17

yadyaśva̍mupa̱tapa̍dvi̱ndet.
ā̱gne̱yama̱ṣṭāka̍pāla̱ṃ nirva̍pet.
sau̱myaṃ ca̱rum.
sā̱vi̱trama̱ṣṭāka̍pālam.
yadā̎gne̱yo bhava̍ti.
a̱gniḥ sarvā̍ de̱vatā̎ḥ.
de̱vatā̍bhire̱vaina̍ṃ bhiṣajyati.
yathsau̱myo bhava̍ti.
somo̱ vā oṣa̍dhīnā̱ṃ rājā̎.
yābhya̍ e̱vaina̍ṃ vi̱ndati̍..63..

tābhi̍re̱vaina̍ṃ bhiṣajyati.
yathsā̍vi̱tro bhava̍ti.
sa̱vi̱tṛpra̍sūta e̱vaina̍ṃ bhiṣajyati.
e̱tābhi̍re̱vaina̍ṃ de̱vatā̍bhirbhiṣajyati.
a̱ga̱do hai̱va bha̍vati.
pau̱ṣṇaṃ ca̱ruṃ nirva̍pet.
yadi̍ ślo̱ṇaḥ syāt.
pū̱ṣā vai ślauṇya̍sya bhi̱ṣak.
sa e̱vaina̍ṃ bhiṣajyati.
aślo̍ṇo hai̱va bha̍vati..64..

rau̱draṃ ca̱ruṃ nirva̍pet.
yadi̍ maha̱tī de̱vatā̍'bhi̱manye̍ta.
e̱ta̱dde̱va̱tyo̍ vā aśva̍ḥ.
svayai̱vaina̍ṃ de̱vata̍yā bhiṣajyati.
a̱ga̱do hai̱va bha̍vati.
vai̱śvā̱na̱raṃ dvāda̍śakapāla̱ṃ nirva̍penmṛgākha̱re yadi̱ nā''gacche̎t.
i̱yaṃ vā a̱gnirvai̎śvāna̱raḥ.
i̱yame̱vaina̍ma̱rcibhyā̎ṃ pari̱rodha̱māna̍yati.
āhai̱va sutya̱maha̍rgacchati.
yadya̍dhī̱yāt..65..

a̱gnaye'ṃ̍ho̱muce̱'ṣṭāka̍pālaḥ.
sau̱ryaṃ paya̍ḥ.
vā̱ya̱vya̍ ājya̍bhāgaḥ.
yaja̍māno̱ vā aśva̍ḥ.
aṃha̍sā̱ vā e̱ṣa gṛ̍hī̱taḥ.
yasyāśvo̱ medhā̍ya̱ prokṣi̍to̱'dhyeti̍.
yada̍ṃho̱muce̍ ni̱rvapa̍ti.
aṃha̍sa e̱va tena̍ mucyate.
yaja̍māno̱ vā aśva̍ḥ.
reta̍sā̱ vā e̱ṣa vyṛ̍dhyate..66..

yasyāśvo̱ medhā̍ya̱ prokṣi̍to̱'dhyeti̍.
sau̱ryaṃ reta̍ḥ.
yathsau̱ryaṃ payo̱ bhava̍ti.
reta̍sai̱vaina̱ṃ sa sama̍rdhayati.
yaja̍māno̱ vā aśva̍ḥ.
garbhai̱rvā e̱ṣa vyṛ̍dhyate.
yasyāśvo̱ medhā̍ya̱ prokṣi̍to̱'dhyeti̍.
vā̱ya̱vyā̍ garbhā̎ḥ.
yadvā̍ya̱vya̍ ājya̍bhāgo̱ bhava̍ti.
garbhai̍re̱vaina̱ṃ sa sama̍rdhayati.
atho̱ yasyai̱ṣā'śva̍me̱dhe prāya̍ścittiḥ kri̱yate̎.
i̱ṣṭvā vasī̍yānbhavati..67..

Anuvāka 18

tadā̍huḥ.
dvāda̍śa brahmauda̱nānthsaṃsthi̍te̱ nirva̍pet.
dvā̱da̱śabhi̱rveṣṭi̍bhiryaje̱teti̍.
yadiṣṭi̍bhi̱ryaje̍ta.
u̱pa̱nāmu̍ka enaṃ ya̱jñaḥ syā̎t.
pāpī̍yā̱ṃstu syā̎t.
ā̱ptāni̱ vā e̱tasya̱ chandā̍ṃsi.
ya ī̍jā̱naḥ.
tāni̱ ka e̱tāva̍dāśu̱ puna̱ḥ prayu̍ñjī̱teti̍.
sarvā̱ vai saṃsthi̍te ya̱jñe vāgā̎pyate..68..

sāptā bha̍vati yā̱tayā̎mnī.
krū̱rīkṛ̍teva̱ hi bhava̱tyaru̍ṣkṛtā.
sā na puna̍ḥ pra̱yujyetyā̍huḥ.
dvāda̍śai̱va bra̍hmauda̱nānthsaṃsthi̍te̱ nirva̍pet.
pra̱jāpa̍ti̱rvā o̍da̱naḥ.
ya̱jñaḥ pra̱jāpa̍tiḥ.
u̱pa̱nāmu̍ka enaṃ ya̱jño bha̍vati.
na pāpī̍yānbhavati.
dvāda̍śa bhavanti.
dvāda̍śa̱māsā̎ḥ saṃvathsa̱raḥ.
sa̱ṃva̱thsa̱ra e̱va prati̍ tiṣṭhati..69..

Anuvāka 19

e̱ṣa vai vi̱bhūrnāma̍ ya̱jñaḥ.
sarva̍ṃ ha̱ vai tatra̍ vi̱bhu bha̍vati.
yatrai̱tena̍ ya̱jñena̱ yaja̍nte.
e̱ṣa vai pra̱bhūrnāma̍ ya̱jñaḥ.
sarva̍ṃ ha̱ vai tatra̍ pra̱bhu bha̍vati.
yatrai̱tena̍ ya̱jñena̱ yaja̍nte.
e̱ṣa vā ūrja̍svā̱nnāma̍ ya̱jñaḥ.
sarva̍ṃ ha̱ vai tatrorja̍svadbhavati.
yatrai̱tena̍ ya̱jñena̱ yaja̍nte.
e̱ṣa vai paya̍svā̱nnāma̍ ya̱jñaḥ..70..

sarva̍ṃ ha̱ vai tatra̱ paya̍svadbhavati.
yatrai̱tena̍ ya̱jñena̱ yaja̍nte.
e̱ṣa vai vidhṛ̍to̱ nāma̍ ya̱jñaḥ.
sarva̍ṃ ha̱ vai tatra̱ vidhṛ̍taṃ bhavati.
yatrai̱tena̍ ya̱jñena̱ yaja̍nte.
e̱ṣa vai vyāvṛ̍tto̱ nāma̍ ya̱jñaḥ.
sarva̍ṃ ha̱ vai tatra̱ vyāvṛ̍ttaṃ bhavati.
yatrai̱tena̍ ya̱jñena̱ yaja̍nte.
e̱ṣa vai prati̍ṣṭhito̱ nāma̍ ya̱jñaḥ.
sarva̍ṃ ha̱ vai tatra̱ prati̍ṣṭhitaṃ bhavati..71..

yatrai̱tena̍ ya̱jñena̱ yaja̍nte.
e̱ṣa vai te̍ja̱svī nāma̍ ya̱jñaḥ.
sarva̍ṃ ha̱ vai tatra̍ teja̱svi bha̍vati.
yatrai̱tena̍ ya̱jñena̱ yaja̍nte.
e̱ṣa vai bra̍hmavarca̱sī nāma̍ ya̱jñaḥ.
ā ha̱ vai tatra̍ brāhma̱ṇo bra̍hmavarca̱sī jā̍yate.
yatrai̱tena̍ ya̱jñena̱ yaja̍nte.
e̱ṣa vā a̍tivyā̱dhī nāma̍ ya̱jñaḥ.
ā ha̱ vai tatra̍ rāja̱nyo̍'tivyā̱dhī jā̍yate.
yatrai̱tena̍ ya̱jñena̱ yaja̍nte.
e̱ṣa vai dī̱rgho nāma̍ ya̱jñaḥ.
dī̱rghāyu̍ṣo ha̱ vai tatra̍ manu̱ṣyā̍ bhavanti.
yatrai̱tena̍ ya̱jñena̱ yaja̍nte.
e̱ṣa vai kḷ̱pto nāma̍ ya̱jñaḥ.
kalpa̍te ha̱ vai tatra̍ pra̱jābhyo̍ yogakṣe̱maḥ.
yatrai̱tena̍ ya̱jñena̱ yaja̍nte..72..

Anuvāka 20

tā̱rpyeṇāśva̱ṃ saṃjña̍payanti.
ya̱jño vai tā̱rpyam.
ya̱jñenai̱vaina̱ṃ sama̍rdhayanti.
yā̱mena̱ sāmnā̎ prasto̱tā'nūpa̍tiṣṭhate.
ya̱ma̱lo̱kame̱vaina̍ṃ gamayati.
tā̱rpye ca̍ kṛtyadhīvā̱se cāśva̱ṃ saṃjña̍payanti.
e̱tadvai pa̍śū̱nāṃ rū̱pam.
rū̱peṇai̱va pa̱śūnava̍ rundhe.
hi̱ra̱ṇya̱ka̱śi̱pu bha̍vati.
teja̱so'va̍ruddhyai..73..

ru̱kmo bha̍vati.
su̱va̱rgasya̍ lo̱kasyānu̍khyātyai.
aśvo̍ bhavati.
pra̱jāpa̍te̱rāptyai̎.
a̱sya vai lo̱kasya̍ rū̱paṃ tā̱rpyam.
a̱ntari̍kṣasya kṛtyadhīvā̱saḥ.
di̱vo hi̍raṇyakaśi̱pu.
ā̱di̱tyasya̍ ru̱kmaḥ.
pra̱jāpa̍te̱raśva̍ḥ.
i̱mame̱va lo̱kaṃ tā̱rpyeṇā̎''pnoti..74..

a̱ntari̍kṣaṃ kṛtyadhīvā̱sena̍.
diva̍ṃ hiraṇyakaśi̱punā̎.
ā̱di̱tyaṃ ru̱kmeṇa̍.
aśve̍nai̱va medhye̍na pra̱jāpa̍te̱ḥ sāyu̍jyaṃ salo̱katā̍māpnoti.
e̱tāsā̍me̱va de̱vatā̍nā̱ṃ sāyu̍jyam.
sā̱rṣṭitā̍ṃ samānalo̱katā̍māpnoti.
yo̎'śvame̱dhena̱ yaja̍te.
ya u̍ cainame̱vaṃ veda̍..75..

Anuvāka 21

ā̱di̱tyāścāṅgi̍rasaśca suva̱rge lo̱ke̎'spardhanta.
te'ṅgi̍rasa ādi̱tyebhya̍ḥ.
a̱mumā̍di̱tyamaśva̍ṃ śve̱taṃ bhū̱taṃ dakṣi̍ṇāmanayan.
te̎'bruvan.
yanno ne̎ṣṭa.
sa varyo̍ bhū̱diti̍.
tasmā̱daśva̱ṃ sava̱ryetyāhva̍yanti.
tasmā̎dya̱jñe varo̍ dīyate.
yatpra̱jāpa̍ti̱rāla̱bdho'śvo'bha̍vat.
tasmā̱daśvo̱ nāma̍..76..

yacchvaya̱daru̱rāsī̎t.
tasmā̱darvā̱ nāma̍.
yathsa̱dyo vājā̎nthsa̱maja̍yat.
tasmā̎dvā̱jī nāma̍.
yadasu̍rāṇāṃ lo̱kānāda̍tta.
tasmā̍dādi̱tyo nāma̍.
a̱gnirvā a̍śvame̱dhasya̱ yoni̍rā̱yata̍nam.
sūryo̱'gneryoni̍rā̱yata̍nam.
yada̍śvame̱dhe̎'gnau citya̍ uttarave̱dimu̍pa̱vapa̍ti.
yoni̍mantame̱vaina̍mā̱yata̍navantaṃ karoti..77..

yoni̍mānā̱yata̍navānbhavati.
ya e̱vaṃ veda̍.
prā̱ṇā̱pā̱nau vā e̱tau de̱vānā̎m.
yada̍rkāśvame̱dhau.
prā̱ṇā̱pā̱nāve̱vāva̍ rundhe.
ojo̱ bala̱ṃ vā e̱tau de̱vānā̎m.
yada̍rkāśvame̱dhau.
ojo̱ bala̍me̱vāva̍ rundhe.
a̱gnirvā a̍śvame̱dhasya̱ yoni̍rā̱yata̍nam.
sūryo̱'gneryoni̍rā̱yata̍nam.
yada̍śvame̱dhe̎'gnau citya̍ uttarave̱diṃ ci̱noti̍.
tāva̍rkāśvame̱dhau.
a̱rkā̱śva̱me̱dhāve̱vāva̍ rundhe.
atho̍ arkāśvame̱dhayo̍re̱va prati̍ tiṣṭhati..78..

Anuvāka 22

pra̱jāpa̍ti̱ṃ vai de̱vāḥ pi̱taram̎.
pa̱śuṃ bhū̱taṃ medhā̱yā'''la̍bhanta.
tamā̱labhyopā̍vasan.
prā̱taryaṣṭā̎smaha̱ iti̍.
eka̱ṃ vā e̱tadde̱vānā̱maha̍ḥ.
yathsa̍ṃvathsa̱raḥ.
tasmā̱daśva̍ḥ pu̱rastā̎thsaṃvathsa̱ra āla̍bhyate.
yatpra̱jāpa̍ti̱rāla̱bdho'śvo'bha̍vat.
tasmā̱daśva̍ḥ.
yathsa̱dyo medho'bha̍vat..79..

tasmā̍daśvame̱dhaḥ.
vedu̱ko'śva̍mā̱śuṃ bha̍vati.
ya e̱vaṃ veda̍.
yadvai tatpra̱jāpa̍ti̱rāla̱bdho'śvo'bha̍vat.
tasmā̱daśva̍ḥ pra̱jāpa̍teḥ paśū̱nāmanu̍rūpatamaḥ.
ā'sya̍ pu̱traḥ prati̍rūpo jāyate.
ya e̱vaṃ veda̍.
sarvā̍ṇi bhū̱tāni̍ sa̱mbhṛtyā''la̍bhate.
same̍naṃ de̱vāsteja̍se brahmavarca̱sāya̍ bharanti.
yo̎'śvame̱dhena̱ yaja̍te..80..

ya u̍ cainame̱vaṃ veda̍.
e̱tadvai tadde̱vā e̱tānde̱vatā̎m.
pa̱śuṃ bhū̱taṃ medhā̱yā'''la̍bhanta.
ya̱jñame̱va.
ya̱jñena̍ ya̱jñama̍yajanta de̱vāḥ.
kā̱ma̱praṃ ya̱jñama̍kurvata.
te̍'mṛta̱tvama̍kāmayanta.
te̍'mṛta̱tvama̍gacchan.
yo̎'śvame̱dhena̱ yaja̍te.
de̱vānā̍me̱vāya̍nenaiti..81..

prā̱jā̱pa̱tyenai̱va ya̱jñena̍ yajate kāma̱preṇa̍.
apu̍narmārame̱va ga̍cchati.
e̱tasya̱ vai rū̱peṇa̍ pu̱rastā̎tprājāpa̱tyamṛ̍ṣa̱bhaṃ tū̍pa̱raṃ ba̍hurū̱pamāla̍bhate.
sarve̎bhya̱ḥ kāme̎bhyaḥ.
sarva̱syā''ptyai̎.
sarva̍sya̱ jityai̎.
sarva̍me̱va tenā̎''pnoti.
sarva̍ṃ jayati.
yo̎'śvame̱dhena̱ yaja̍te.
ya u̍ cainame̱vaṃ veda̍..82..

Anuvāka 23

yo vā aśva̍sya̱ medhya̍sya̱ loma̍nī̱ veda̍.
aśva̍syai̱va medhya̍sya̱ loma̍ṃ lomaṃ juhoti.
a̱ho̱rā̱tre vā aśva̍sya̱ medhya̍sya̱ loma̍nī.
yathsā̱yaṃ prā̍tarju̱hoti̍.
aśva̍syai̱va medhya̍sya̱ loma̍ṃ lomaṃ juhoti.
e̱tada̍nukṛti ha sma̱ vai pu̱rā.
aśva̍sya̱ medhya̍sya̱ loma̍ṃ lomaṃ juhvati.
yo vā aśva̍sya̱ medhya̍sya pa̱de veda̍.
aśva̍syai̱va medhya̍sya pa̱depa̍de juhoti.
da̱ṟśa̱pū̱rṇa̱mā̱sau vā aśva̍sya̱ medhya̍sya pa̱de..83..

yadda̍rśapūrṇamā̱sau yaja̍te.
aśva̍syai̱va medhya̍sya pa̱depa̍de juhoti.
e̱tada̍nukṛti ha sma̱ vai pu̱rā.
aśva̍sya̱ medhya̍sya pa̱depa̍de juhvati.
yo vā aśva̍sya̱ medhya̍sya vi̱varta̍na̱ṃ veda̍.
aśva̍syai̱va medhya̍sya vi̱varta̍nevivartane juhoti.
a̱sau vā ā̍di̱tyo'śva̍ḥ.
sa ā̍hava̱nīya̱māga̍cchati.
tadviva̍rtate.
yada̍gniho̱traṃ ju̱hoti̍.
aśva̍syai̱va medhya̍sya vi̱varta̍nevivartane juhoti.
e̱tada̍nukṛti ha sma̱ vai pu̱rā.
a̍śvasya̱ medhya̍sya vi̱varta̍nevivartane juhvati..84..

Anuvāka 1

sa̱ṃjñāna̍ṃ vi̱jñāna̍ṃ pra̱jñāna̍ṃ jā̱nada̍bhijā̱nat.
sa̱ṅkalpa̍mānaṃ pra̱kalpa̍mānamupa̱kalpa̍māna̱mupa̍kḷptaṃ kḷ̱ptam.
śreyo̱ vasī̍ya ā̱yathsambhū̍taṃ bhū̱tam.
ci̱traḥ ke̱tuḥ pra̱bhānā̱bhānthsa̱mbhān.
jyoti̍ṣmā̱ṃsteja̍svānā̱tapa̱ṃstapa̍nnabhi̱tapan̍.
ro̱ca̱no roca̍mānaḥ śobha̱naḥ śobha̍mānaḥ ka̱lyāṇa̍ḥ.
darśā̍ dṛ̱ṣṭā da̍rśa̱tā vi̱śvarū̍pā sudarśa̱nā.
ā̱pyāya̍mānā̱ pyāya̍mānā̱ pyāyā̍ sū̱nṛterā̎.
ā̱pūrya̍māṇā̱ pūrya̍māṇā pū̱raya̍ntī pū̱rṇā pau̎rṇamā̱sī.
dā̱tā pra̍dā̱tā''na̱ndo moda̍ḥ pramo̱daḥ..1..

ā̱ve̱śaya̍nnive̱śaya̎nthsa̱ṃveśa̍na̱ḥ saṃśā̎ntaḥ śā̱ntaḥ.
ā̱bhava̍npra̱bhava̎nthsa̱mbhava̱nthsambhū̍to bhū̱taḥ.
prastu̍ta̱ṃ viṣṭu̍ta̱ṃ saṃstu̍taṃ ka̱lyāṇa̍ṃ vi̱śvarū̍pam.
śu̱krama̱mṛta̍ṃ teja̱svi teja̱ḥ sami̍ddham.
a̱ru̱ṇaṃ bhā̍nu̱manmarī̍cimadabhi̱tapa̱ttapa̍svat.
sa̱vi̱tā pra̍savi̱tā dī̱pto dī̱paya̱ndīpya̍mānaḥ.
jvala̍ñjvali̱tā tapa̍nvi̱tapa̎nthsa̱ntapan̍.
ro̱ca̱no roca̍mānaḥ śu̱mbhūḥ śumbha̍māno vā̱maḥ.
su̱tā su̍nva̱tī prasu̍tā sū̱yamā̍nā'bhiṣū̱yamā̍ṇā.
pītī̎ pra̱pā sa̱mpā tṛpti̍sta̱rpaya̍ntī..2..

kā̱ntā kā̱myā kā̱majā̱tā''yu̍ṣmatī kāma̱dughā̎.
a̱bhi̱śā̱stā'nu̍ma̱ntā''na̱ndo moda̍ḥ pramo̱daḥ.
ā̱sā̱daya̍nniṣā̱daya̎nthsa̱ṃsāda̍na̱ḥ saṃsa̍nnaḥ sa̱nnaḥ.
ā̱bhūrvi̱bhūḥ pra̱bhūḥ śa̱mbhūrbhuva̍ḥ.
pa̱vitra̍ṃ pavayi̱ṣyanpū̱to medhya̍ḥ.
yaśo̱ yaśa̍svānā̱yura̱mṛta̍ḥ.
jī̱vo jī̍vi̱ṣyanthsva̱rgo lo̱kaḥ.
saha̍svā̱nthsahī̍yā̱noja̍svā̱nthsaha̍mānaḥ.
jaya̍nnabhi̱jaya̎nthsu̱dravi̍ṇo draviṇo̱dāḥ.
ā̱rdrapa̍vitro̱ hari̍keśo̱ moda̍ḥ pramo̱daḥ..3..

a̱ru̱ṇo̍'ru̱ṇara̍jāḥ pu̱ṇḍarī̍ko viśva̱jida̍bhi̱jit.
ā̱rdraḥ pinva̍mā̱no'nna̍vā̱nrasa̍vā̱nirā̍vān.
sa̱rvau̱ṣa̱dhaḥ sa̍mbha̱ro maha̍svān.
e̱ja̱tkā jo̍va̱tkāḥ.
kṣu̱lla̱kāḥ śi̍piviṣṭa̱kāḥ.
sa̱ri̱sra̱rāḥ su̱śera̍vaḥ.
a̱jirāso̍ gami̱ṣṇava̍ḥ.
i̱dānī̎ṃ ta̱dānī̍me̱tar{hi̍} kṣi̱prama̍ji̱ram.
ā̱śurni̍me̱ṣaḥ pha̱ṇo drava̍nnati̱dravan̍.
tvara̱ṃstvara̍māṇa ā̱śurāśī̍yāñja̱vaḥ.
a̱gni̱ṣṭo̱ma u̱kthyo̍'tirā̱tro dvi̍rā̱trastri̍rā̱traśca̍tūrā̱traḥ.
a̱gnirṛ̱tuḥ sūrya̍ ṛ̱tuśca̱ndramā̍ ṛ̱tuḥ.
pra̱jāpa̍tiḥ saṃvathsa̱ro ma̱hānkaḥ..4..

Anuvāka 2

bhūra̱gniṃ ca̍ pṛthi̱vīṃ ca̱ māṃ ca̍.
trīṃśca̍ lo̱kānthsa̍ṃvathsa̱raṃ ca̍.
pra̱jāpa̍tistvā sādayatu.
tayā̍ de̱vata̍yā'ṅgira̱svaddhru̱vā sī̍da.
bhuvo̍ vā̱yuṃ cā̱ntari̍kṣaṃ ca̱ māṃ ca̍.
trīṃśca̍ lo̱kānthsa̍ṃvathsa̱raṃ ca̍.
pra̱jāpa̍tistvā sādayatu.
tayā̍ de̱vata̍yā'ṅgira̱svaddhru̱vā sī̍da.
sva̍rādi̱tyaṃ ca̱ diva̍ṃ ca̱ māṃ ca̍.
trīṃśca̍ lo̱kānthsa̍ṃvathsa̱raṃ ca̍.
pra̱jāpa̍tistvā sādayatu.
tayā̍ de̱vata̍yā'ṅgira̱svaddhru̱vā sī̍da.
bhūrbhuva̱ḥ sva̍śca̱ndrama̍saṃ ca̱ diśa̍śca̱ māṃ ca̍.
trīṃśca̍ lo̱kānthsa̍ṃvathsa̱raṃ ca̍.
pra̱jāpa̍tistvā sādayatu.
tayā̍ de̱vata̍yā'ṅgira̱svaddhru̱vā sī̍da..5..

Anuvāka 3

tvame̱va tvāṃ ve̎ttha̱ yo̍'si̱ so'si̍.
tvame̱va tvāma̍caiṣīḥ.
ci̱taścāsi̱ sañci̍taścāsyagne.
e̱tāvā̱ṃścāsi̱ bhūyā̍ṃścāsyagne.
yatte̍ agne̱ nyū̍na̱ṃ yadu̱ te'ti̍riktam.
ā̱di̱tyāstadaṅgi̍rasaścinvantu.
viśve̍ te de̱vāściti̱māpū̍rayantu.
ci̱taścāsi̱ sañci̍taścāsyagne.
e̱tāvā̱ṃścāsi̱ bhūyā̍ṃścāsyagne.
mā te̍ agne ca̱ yena̱ mā'ti̍ ca̱ yenā''yu̱rāvṛ̍kṣi.
sarve̍ṣā̱ṃ jyoti̍ṣā̱ṃ jyoti̱ryada̱dāvu̱deti̍.
tapa̍so jā̱tamani̍bhṛṣṭa̱moja̍ḥ.
tatte̱ jyoti̍riṣṭake.
tena̍ me tapa.
tena̍ me jvala.
tena̍ me dīdihi.
yāva̍dde̱vāḥ.
yāva̱dasā̍ti̱ sūrya̍ḥ.
yāva̍du̱tāpi̱ brahma̍..6..

Anuvāka 4

sa̱ṃva̱thsa̱ro̍'si parivathsa̱ro̍'si.
i̱dā̱va̱thsa̱ro̍'sīduvathsa̱ro̍'si.
i̱dva̱thsa̱ro̍'si vathsa̱ro̍'si.
tasya̍ te vasa̱ntaḥ śira̍ḥ.
grī̱ṣmo dakṣi̍ṇaḥ pa̱kṣaḥ.
va̱ṟṣāḥ puccham̎.
śa̱radutta̍raḥ pa̱kṣaḥ.
he̱ma̱nto madhyam̎.
pū̱rva̱pa̱kṣāścita̍yaḥ.
a̱pa̱ra̱pa̱kṣāḥ purī̍ṣam..7..

a̱ho̱rā̱trāṇīṣṭa̍kāḥ.
ṛ̱ṣa̱bho̍'si sva̱rgo lo̱kaḥ.
yasyā̎ṃ di̱śi ma̱hīya̍se.
tato̍ no̱ maha̱ āva̍ha.
vā̱yurbhū̱tvā sarvā̱ diśa̱ āvā̍hi.
sarvā̱ diśo'nu̱vivā̍hi.
sarvā̱ diśo'nu̱saṃvā̍hi.
cittyā̱ citi̱māpṛ̍ṇa.
aci̍ttyā̱ citi̱māpṛ̍ṇa.
cida̍si samu̱drayo̍niḥ..8..

indu̱rdakṣa̍ḥ śye̱na ṛ̱tāvā̎.
hira̍ṇyapakṣaḥ śaku̱no bhu̍ra̱ṇyuḥ.
ma̱hānthsa̱dhasthe̎ dhru̱va āniṣa̍ttaḥ.
nama̍ste astu̱ mā mā̍ hiṃsīḥ.
eti̱ preti̱ vīti̱ samityuditi̍.
diva̍ṃ me yaccha.
a̱ntari̍kṣaṃ me yaccha.
pṛ̱thi̱vīṃ me̍ yaccha.
pṛ̱thi̱vīṃ me̍ yaccha.
a̱ntari̍kṣaṃ me yaccha.
diva̍ṃ me yaccha.
ahnā̱ prasā̍raya.
rātryā̱ sama̍ca.
rātryā̱ prasā̍raya.
ahnā̱ sama̍ca.
kāma̱ṃ prasā̍raya.
kāma̱ṃ sama̍ca..9..

Anuvāka 5

bhūrbhuva̱ḥ sva̍ḥ.
ojo̱ balam̎.
brahma̍ kṣa̱tram.
yaśo̍ ma̱hat.
sa̱tyaṃ tapo̱ nāma̍.
rū̱pama̱mṛtam̎.
cakṣu̱ḥ śrotram̎.
mana̱ āyu̍ḥ.
viśva̱ṃ yaśo̍ ma̱haḥ.
sa̱maṃ tapo̱ haro̱ bhāḥ.
jā̱tave̍dā̱ yadi̍ vā pāva̱ko'si̍.
vai̱śvā̱na̱ro yadi̍ vā vaidyu̱to'si̍.
śaṃ pra̱jābhyo̱ yaja̍mānāya lo̱kam.
ūrja̱ṃ puṣṭi̱ṃ dada̍da̱bhyāva̍vṛthsva..10..

Anuvāka 6

rājñī̍ vi̱rājñī̎.
sa̱mrājñī̎ sva̱rājñī̎.
a̱rciḥ śo̱ciḥ.
tapo̱ haro̱ bhāḥ.
a̱gnirindro̱ bṛha̱spati̍ḥ.
viśve̍ de̱vā bhuva̍nasya go̱pāḥ.
te mā̱ sarve̱ yaśa̍sā̱ saṃsṛ̍jantu..11..

Anuvāka 7

asa̍ve̱ svāhā̱ vasa̍ve̱ svāhā̎.
vibhu̍ve̱ svāhā̱ viva̍svate̱ svāhā̎.
a̱bhi̱bhuve̱ svāhā'dhi̍pataye̱ svāhā̎.
di̱vāṃ pata̍ye̱ svāhā'ṃ̍haspa̱tyāya̱ svāhā̎.
cā̱kṣu̱ṣma̱tyāya̱ svāhā̎ jyotiṣma̱tyāya̱ svāhā̎.
rājñe̱ svāhā̍ vi̱rājñe̱ svāhā̎.
sa̱mrājñe̱ svāhā̎ sva̱rājñe̱ svāhā̎.
śūṣā̍ya̱ svāhā̱ sūryā̍ya̱ svāhā̎.
ca̱ndrama̍se̱ svāhā̱ jyoti̍ṣe̱ svāhā̎.
sa̱ṃsarpā̍ya̱ svāhā̍ ka̱lyāṇā̍ya̱ svāhā̎.
arju̍nāya̱ svāhā̎..12..

Anuvāka 8

vi̱pa̱ścite̱ pava̍mānāya gāyata.
ma̱hī na dhārā'tyandho̍ arṣati.
ahi̍rha jī̱rṇāmati̍sarpati̱ tvacam̎.
atyo̱ na krīḍa̍nnasara̱dvṛṣā̱ hari̍ḥ.
u̱pa̱yā̱magṛ̍hīto'si mṛ̱tyave̎ tvā̱ juṣṭa̍ṃ gṛhṇāmi.
e̱ṣa te̱ yoni̍rmṛ̱tyave̎ tvā.
apa̍mṛ̱tyumapa̱kṣudham̎.
ape̱taḥ śa̱patha̍ṃ jahi.
adhā̍ no agna̱ āva̍ha.
rā̱yaspoṣa̍ṃ saha̱sriṇam̎..13..

ye te̍ sa̱hasra̍ma̱yuta̱ṃ pāśā̎ḥ.
mṛtyo̱ martyā̍ya̱ hanta̍ve.
tān ya̱jñasya̍ mā̱yayā̎.
sarvā̱nava̍yajāmahe.
bha̱kṣo̎'syamṛtabha̱kṣaḥ.
tasya̍ te mṛ̱tyupī̍tasyā̱mṛta̍vataḥ.
sva̱gākṛ̍tasya̱ madhu̍mataḥ.
upa̍hūta̱syopa̍hūto bhakṣayāmi.
ma̱ndrā'bhibhū̍tiḥ ke̱turya̱jñānā̱ṃ vāk.
asā̱vehi̍..14..

a̱ndho jāgṛ̍viḥ prāṇa.
asā̱vehi̍.
ba̱dhi̱ra ā̎krandayitarapāna.
asā̱vehi̍.
a̱ha̱stostvā̱ cakṣu̍ḥ.
asā̱vehi̍.
a̱pā̱dāśo̱ mana̍ḥ.
asā̱vehi̍.
kave̱ vipra̍citte̱ śrotra̍.
asā̱vehi̍..15..

su̱ha̱staḥ su̍vā̱sāḥ.
śū̱ṣo nāmā̎sya̱mṛto̱ martye̍ṣu.
taṃ tvā̱'haṃ tathā̱ veda̍.
asā̱vehi̍.
a̱gnirme̍ vā̱ci śri̱taḥ.
vāgghṛda̍ye.
hṛda̍ya̱ṃ mayi̍.
a̱hama̱mṛte̎.
a̱mṛta̱ṃ brahma̍ṇi.
vā̱yurme̎ prā̱ṇe śri̱taḥ..16..

prā̱ṇo hṛda̍ye.
hṛda̍ya̱ṃ mayi̍.
a̱hama̱mṛte̎.
a̱mṛta̱ṃ brahma̍ṇi.
sūryo̍ me̱ cakṣu̍ṣi śri̱taḥ.
cakṣu̱ṟhṛda̍ye.
hṛda̍ya̱ṃ mayi̍.
a̱hama̱mṛte̎.
a̱mṛta̱ṃ brahma̍ṇi.
ca̱ndramā̍ me̱ mana̍si śri̱taḥ..17..

mano̱ hṛda̍ye.
hṛda̍ya̱ṃ mayi̍.
a̱hama̱mṛte̎.
a̱mṛta̱ṃ brahma̍ṇi.
diśo̍ me̱ śrotre̎ śri̱tāḥ.
śrotra̱ṃ hṛda̍ye.
hṛda̍ya̱ṃ mayi̍.
a̱hama̱mṛte̎.
a̱mṛta̱ṃ brahma̍ṇi.
āpo̍ me̱ reta̍si śri̱tāḥ..18..

reto̱ hṛda̍ye.
hṛda̍ya̱ṃ mayi̍.
a̱hama̱mṛte̎.
a̱mṛta̱ṃ brahma̍ṇi.
pṛ̱thi̱vī me̱ śarī̍re śri̱tā.
śarī̍ra̱ṃ hṛda̍ye.
hṛda̍ya̱ṃ mayi̍.
a̱hama̱mṛte̎.
a̱mṛta̱ṃ brahma̍ṇi.
o̱ṣa̱dhi̱va̱na̱spa̱tayo̍ me̱ loma̍su śri̱tāḥ..19..

lomā̍ni̱ hṛda̍ye.
hṛda̍ya̱ṃ mayi̍.
a̱hama̱mṛte̎.
a̱mṛta̱ṃ brahma̍ṇi.
indro̍ me̱ bale̎ śri̱taḥ.
bala̱ṃ hṛda̍ye.
hṛda̍ya̱ṃ mayi̍.
a̱hama̱mṛte̎.
a̱mṛta̱ṃ brahma̍ṇi.
pa̱rjanyo̍ me mū̱rdhni śri̱taḥ..20..

mū̱rdhā hṛda̍ye.
hṛda̍ya̱ṃ mayi̍.
a̱hama̱mṛte̎.
a̱mṛta̱ṃ brahma̍ṇi.
īśā̍no me ma̱nyau śri̱taḥ.
ma̱nyurhṛda̍ye.
hṛda̍ya̱ṃ mayi̍.
a̱hama̱mṛte̎.
a̱mṛta̱ṃ brahma̍ṇi.
ā̱tmā ma̍ ā̱tmani̍ śri̱taḥ..21..

ā̱tmā hṛda̍ye.
hṛda̍ya̱ṃ mayi̍.
a̱hama̱mṛte̎.
a̱mṛta̱ṃ brahma̍ṇi.
puna̍rma ā̱tmā puna̱rāyu̱rāgā̎t.
puna̍ḥ prā̱ṇaḥ pu̱narākū̍ta̱māgā̎t.
vai̱śvā̱na̱ro ra̱śmibhi̍rvāvṛdhā̱naḥ.
a̱ntasti̍ṣṭhatva̱mṛta̍sya go̱pāḥ..22..

Anuvāka 9

pra̱jāpa̍tirde̱vāna̍sṛjata.
te pā̱pmanā̱ sandi̍tā ajāyanta.
tānvya̍dyat.
yadvya̱dyat.
tasmā̎dvi̱dyut.
tama̍vṛścat.
yadavṛ̍ścat.
tasmā̱dvṛṣṭi̍ḥ.
tasmā̱dyatrai̱te de̱vate̍ abhi̱prāpnu̍taḥ.
vi ca̍ hai̱vāsya̱ tatra̍ pā̱pmāna̱ṃ dyata̍ḥ..23..

vṛ̱ścata̍śca.
saiṣā mī̍mā̱ṃsā'gni̍ho̱tra e̱va sa̍mpannā.
atho̍ āhuḥ.
sarve̍ṣu yajñakra̱tuṣviti̍.
hoṣya̍nna̱pa upa̍spṛśet.
vidyu̍dasi̱ vidya̍ me pā̱pmāna̱miti̍.
atha̍ hu̱tvopa̍spṛśet.
vṛṣṭi̍rasi̱ vṛśca̍ me pā̱pmāna̱miti̍.
ya̱kṣyamā̍ṇo ve̱ṣṭvā vā̎.
vi ca̍ hai̱vāsyai̱te de̱vate̍ pā̱pmāna̱ṃ dyata̍ḥ..24..

vṛ̱ścata̍śca.
a̱tya̱ṃho hā''ru̍ṇiḥ.
bra̱hma̱cā̱riṇe̎ pra̱śnānprocya̱ praji̍ghāya.
pare̍hi.
pla̱kṣaṃ dayyā̎mpātiṃ pṛccha.
vettha̍ sāvi̱trā(3)nna ve̱tthā(3) iti̍.
tamā̱gatya̍ papraccha.
ā̱cāryo̍ mā̱ prāhai̍ṣīt.
vettha̍ sāvi̱trā(3)nna ve̱tthā(3) iti̍.
sa ho̍vāca̱ vedeti̍..25..

sa kasmi̱nprati̍ṣṭhita̱ iti̍.
pa̱rora̍ja̱sīti̍.
kastadyatpa̱rora̍jā̱ iti̍.
e̱ṣa vāva sa pa̱rora̍jā̱ iti̍ hovāca.
ya e̱ṣa tapa̍ti.
e̱ṣo̎'rvāgra̍jā̱ iti̍.
sa kasmi̍ntve̱ṣa iti̍.
sa̱tya iti̍.
kiṃ tathsa̱tyamiti̍.
tapa̱ iti̍..26..

kasmi̱nnu tapa̱ iti̍.
bala̱ iti̍.
kiṃ tadbala̱miti̍.
prā̱ṇa iti̍.
mā sma̍ prā̱ṇamati̍pṛccha̱ iti̍ mā''cā̱ryo̎'bravī̱diti̍ hovāca brahmacā̱rī.
sa ho̍vāca pla̱kṣo dayyā̎mpātiḥ.
yadvai bra̍hmacārinprā̱ṇamatya̍prakṣyaḥ.
mū̱rdhā te̱ vyapa̍tiṣyat.
a̱hamu̍ta ācā̱ryācchreyā̎nbhaviṣyāmi.
yo mā̍ sāvi̱tre sa̱mavā̍di̱ṣṭeti̍..27..

tasmā̎thsāvi̱tre na saṃva̍deta.
sa yo ha̱ vai sā̍vi̱traṃ vi̱duṣā̍ sāvi̱tre sa̱ṃvada̍te.
sahā̎smi̱ñchriya̍ṃ dadhāti.
anu̍ ha̱ vā a̍smā a̱sau tapa̱ñchriya̍ṃ manyate.
anva̍smai̱ śrīstapo̍ manyate.
anva̍smai̱ tapo̱ bala̍ṃ manyate.
anva̍smai̱ bala̍ṃ prā̱ṇaṃ ma̍nyate.
sa yadāha̍.
sa̱ṃjñāna̍ṃ vi̱jñāna̱ṃ darśā̍ dṛ̱ṣṭeti̍.
e̱ṣa e̱va tat..28..

atha̱ yadāha̍.
prastu̍ta̱ṃ viṣṭu̍taṃ su̱tā su̍nva̱tīti̍.
e̱ṣa e̱va tat.
e̱ṣa hye̍va tānyahā̍ni.
e̱ṣa rātra̍yaḥ.
atha̱ yadāha̍.
ci̱traḥ ke̱turdā̱tā pra̍dā̱tā sa̍vi̱tā pra̍savi̱tā'bhi̍śā̱stā'nu̍ma̱nteti̍.
e̱ṣa e̱va tat.
e̱ṣa hye̍va te'hno̍ muhū̱rtāḥ.
e̱ṣa rātre̎ḥ..29..

atha̱ yadāha̍.
pa̱vitra̍ṃ pavayi̱ṣyanthsaha̍svā̱nthsahī̍yānaru̱ṇo̍'ru̱ṇara̍jā̱ iti̍.
e̱ṣa e̱va tat.
e̱ṣa hye̍va te̎'rdhamā̱sāḥ.
e̱ṣa māsā̎ḥ.
atha̱ yadāha̍.
a̱gni̱ṣṭo̱ma u̱kthyo̎'gnirṛ̱tuḥ pra̱jāpa̍tiḥ saṃvathsa̱ra iti̍.
e̱ṣa e̱va tat.
e̱ṣa hye̍va te ya̍jñakra̱tava̍ḥ.
e̱ṣa ṛ̱tava̍ḥ..30..

e̱ṣa sa̍ṃvathsa̱raḥ.
atha̱ yadāha̍.
i̱dānī̎ṃ ta̱dānī̱miti̍.
e̱ṣa e̱va tat.
e̱ṣa hye̍va te mu̍hū̱rtānā̎ṃ muhū̱rtāḥ.
ja̱na̱ko ha̱ vaide̍haḥ.
a̱ho̱rā̱traiḥ sa̱māja̍gāma.
taṃ ho̍cuḥ.
yo vā a̱smān veda̍.
vi̱jaha̍tpā̱pmāna̍meti..31..

sarva̱māyu̍reti.
a̱bhi sva̱rgaṃ lo̱kaṃ ja̍yati.
nāsyā̱muṣmi̍m̐llo̱ke'nna̍ṃ kṣīyata̱ iti̍.
vi̱jaha̍ddha̱ vai pā̱pmāna̍meti.
sarva̱māyu̍reti.
a̱bhi sva̱rgaṃ lo̱kaṃ ja̍yati.
nāsyā̱muṣmi̍m̐llo̱ke'nna̍ṃ kṣīyate.
ya e̱vaṃ veda̍.
ahī̍nā̱ hā''śva̍thyaḥ.
sā̱vi̱traṃ vi̱dāṃ ca̍kāra..32..

sa ha̍ ha̱ṃso hi̍ra̱ṇmayo̍ bhū̱tvā.
sva̱rgaṃ lo̱kami̍yāya.
ā̱di̱tyasya̱ sāyu̍jyam.
ha̱ṃso ha̱ vai hi̍ra̱ṇmayo̍ bhū̱tvā.
sva̱rgaṃ lo̱kame̍ti.
ā̱di̱tyasya̱ sāyu̍jyam.
ya e̱vaṃ veda̍.
de̱va̱bhā̱go ha̍ śrauta̱ṟṣaḥ.
sā̱vi̱traṃ vi̱dāṃ ca̍kāra.
taṃ ha̱ vāgadṛ̍śyamā̱nā'bhyu̍vāca..33..

sarva̍ṃ bata gauta̱mo veda̍.
yaḥ sā̍vi̱traṃ vedeti̍.
sa ho̍vāca.
kaiṣā vāga̱sīti̍.
a̱yama̱haṃ sā̍vi̱traḥ.
de̱vānā̍mutta̱mo lo̱kaḥ.
guhya̱ṃ maho̱ bibhra̱diti̍.
e̱tāva̍ti ha gauta̱maḥ.
ya̱jño̱pa̱vī̱taṃ kṛ̱tvā'dho nipa̍pāta.
namo̱ nama̱ iti̍..34..

sa ho̍vāca.
mā bhai̍ṣīrgautama.
ji̱to vai te̍ lo̱ka iti̍.
tasmā̱dye ke ca̍ sāvi̱traṃ vi̱duḥ.
sarve̱ te ji̱talo̍kāḥ.
sa yo ha̱ vai sā̍vi̱trasyā̱ṣṭākṣa̍raṃ pa̱daṃ śri̱yā'bhiṣi̍kta̱ṃ veda̍.
śri̱yā hai̱vābhiṣi̍cyate.
ghṛṇi̱riti̱ dve a̱kṣare̎.
sūrya̱ iti̱ trīṇi̍.
ā̱di̱tya iti̱ trīṇi̍..35..

e̱tadvai sā̍vi̱trasyā̱ṣṭākṣa̍raṃ pa̱daṃ śri̱yā'bhiṣi̍ktam.
ya e̱vaṃ veda̍.
śri̱yā hai̱vābhiṣi̍cyate.
tade̱tadṛ̱cā'bhyu̍ktam.
ṛ̱co a̱kṣare̍ para̱me vyo̍man.
yasmi̍nde̱vā adhi̱ viśve̍ niṣe̱duḥ.
yastaṃ na veda̱ kimṛ̱cā ka̍riṣyati.
ya ittadvi̱dusta i̱me samā̍sata̱ iti̍.
na ha̱ vā e̱tasya̱rcā na yaju̍ṣā̱ na sāmnā'rtho̎'sti.
yaḥ sā̍vi̱traṃ veda̍..36..

tade̱tatpa̍ri̱ yadde̍vaca̱kram.
ā̱rdraṃ pinva̍mānaṃ sva̱rge lo̱ka e̍ti.
vi̱jaha̱dviśvā̍ bhū̱tāni̍ sa̱mpaśya̍t.
ā̱rdro ha̱ vai pinva̍mānaḥ sva̱rge lo̱ka e̍ti.
vi̱jaha̱nviśvā̍ bhū̱tāni̍ sa̱mpaśyan̍.
ya e̱vaṃ veda̍.
śū̱ṣo ha̱ vai vā̎rṣṇe̱yaḥ.
ā̱di̱tyena̍ sa̱māja̍gāma.
taṃ ho̍vāca.
ehi̍ sāvi̱traṃ vi̍ddhi.
a̱yaṃ vai sva̱rgyo̎'gniḥ pā̍rayi̱ṣṇura̱mṛtā̱thsambhū̍ta̱ iti̍.
e̱ṣa vāva sa sā̍vi̱traḥ.
ya e̱ṣa tapa̍ti.
ehi̱ māṃ vi̍ddhi.
iti̍ hai̱vaina̱ṃ tadu̍vāca..37..

Anuvāka 10

i̱yaṃ vāva sa̱raghā̎.
tasyā̍ a̱gnire̱va sā̍ra̱ghaṃ madhu̍.
yā e̱tāḥ pū̎rvapakṣāparapa̱kṣayo̱ rātra̍yaḥ.
tā ma̍dhu̱kṛta̍ḥ.
yānyahā̍ni.
te ma̍dhuvṛ̱ṣāḥ.
sa yo ha̱ vā e̱tā ma̍dhu̱kṛta̍śca madhuvṛ̱ṣāṃśca̱ veda̍.
ku̱rvanti̍ hāsyai̱tā a̱gnau madhu̍.
nāsye̎ṣṭāpū̱rtaṃ dha̍yanti.
atha̱ yo na veda̍..38..

na hā̎syai̱tā a̱gnau madhu̍ kurvanti.
dhaya̍ntyasyeṣṭāpū̱rtam.
yo ha̱ vā a̍horā̱trāṇā̎ṃ nāma̱dheyā̍ni̱ veda̍.
nāho̍rā̱treṣvārti̱mārccha̍ti.
sa̱ṃjñāna̍ṃ vi̱jñāna̱ṃ darśā̍ dṛ̱ṣṭeti̍.
e̱tāva̍nuvā̱kau pū̎rvapa̱kṣasyā̍horā̱trāṇā̎ṃ nāma̱dheyā̍ni.
prastu̍ta̱ṃ viṣṭu̍taṃ su̱tā su̍nva̱tīti̍.
e̱tāva̍nuvā̱kāva̍parapa̱kṣasyā̍horā̱trāṇā̎ṃ nāma̱dheyā̍ni.
nāho̍rā̱treṣvārti̱mārccha̍ti.
ya e̱vaṃ veda̍..39..

yo ha̱ vai mu̍hū̱rtānā̎ṃ nāma̱dheyā̍ni̱ veda̍.
na mu̍hū̱rteṣvārti̱mārccha̍ti.
ci̱traḥ ke̱turdā̱tā pra̍dā̱tā sa̍vi̱tā pra̍savi̱tā'bhi̍śā̱stā'nu̍ma̱nteti̍.
e̱te̍'nuvā̱kā mu̍hū̱rtānā̎ṃ nāma̱dheyā̍ni.
na muhū̱rteṣvārti̱mārccha̍ti.
ya e̱vaṃ veda̍.
yo ha̱ vā a̍rdhamā̱sānā̎ṃ ca̱ māsā̍nāṃ ca nāma̱dheyā̍ni̱ veda̍.
nārdha̍mā̱seṣu̱ na māse̱ṣvārti̱mārccha̍ti.
pa̱vitra̍ṃ pavayi̱ṣyanthsaha̍svā̱nthsahī̍yānaru̱ṇo̍'ru̱ṇara̍jā̱ iti̍.
e̱te̍'nuvā̱kā a̍rdhamā̱sānā̎ṃ ca̱ māsā̍nāṃ ca nāma̱dheyā̍ni..40..

nārdha̍mā̱seṣu̱ na māse̱ṣvārti̱mārccha̍ti.
ya e̱vaṃ veda̍.
yo ha̱ vai ya̍jñakratū̱nāṃ ca̍rtū̱nāṃ ca̍ saṃvathsa̱rasya̍ ca nāma̱dheyā̍ni̱ veda̍.
na ya̍jñakra̱tuṣu̱ nartuṣu̱ na sa̍ṃvathsa̱ra ārti̱mārccha̍ti.
a̱gni̱ṣṭo̱ma u̱kthyo̎'gnirṛ̱tuḥ pra̱jāpa̍tiḥ saṃvathsa̱ra iti̍.
e̱te̍'nuvā̱kā ya̍jñakratū̱nāṃ ca̍rtū̱nāṃ ca̍ saṃvathsa̱rasya̍ ca nāma̱dheyā̍ni..41..

na ya̍jñakra̱tuṣu̱ nartuṣu̱ na sa̍ṃvathsa̱ra ārti̱mārccha̍ti.
ya e̱vaṃ veda̍.
yo ha̱ vai mu̍hū̱rtānā̎ṃ muhū̱rtān veda̍.
na mu̍hū̱rtānā̎ṃ muhū̱rteṣvārti̱mārccha̍ti.
i̱dānī̎ṃ ta̱dānī̱miti̍.
e̱te vai mu̍hū̱rtānā̎ṃ muhū̱rtāḥ.
na mu̍hū̱rtānā̎ṃ muhū̱rteṣvārti̱mārccha̍ti.
ya e̱vaṃ veda̍.
atho̱ yathā̎ kṣetra̱jño bhū̱tvā'nu̍pra̱viśyānna̱matti̍.
e̱vame̱vaitānkṣe̎tra̱jño bhū̱tvā'nu̍pra̱viśyānna̍matti.
sa e̱teṣā̍me̱va sa̍lo̱katā̱ṃ sāyu̍jyamaśnute.
apa̍ punarmṛ̱tyuṃ ja̍yati.
ya e̱vaṃ veda̍..42..

Anuvāka 11

kaści̍ddha̱ vā a̱smāllo̱kātpretya̍.
ā̱tmāna̍ṃ veda.
a̱yama̱hama̱smīti̍.
kaści̱thsvaṃ lo̱kaṃ na prati̱prajā̍nāti.
a̱gnimu̍gdho hai̱va dhū̱matā̎ntaḥ.
svaṃ lo̱kaṃ na prati̱prajā̍nāti.
atha̱ yo hai̱vaitama̱gniṃ sā̍vi̱traṃ veda̍.
sa e̱vāsmāllo̱kātpretya̍.
ā̱tmāna̍ṃ veda.
a̱yama̱hama̱smīti̍..43..

sa svaṃ lo̱kaṃ prati̱prajā̍nāti.
e̱ṣa u̍ ve̱vaina̱ṃ tathsā̍vi̱traḥ.
sva̱rgaṃ lo̱kama̱bhiva̍hati.
a̱ho̱rā̱trairvā i̱daṃ sa̱yugbhi̍ḥ kriyate.
i̱ti̱rā̱trāyā̍dīkṣiṣata.
i̱ti̱rā̱trāya̍ vra̱tamupā̍gu̱riti̍.
tāni̱hāne̍vaṃ vi̱duṣa̍ḥ.
a̱muṣmi̍m̐llo̱ke śe̍va̱dhiṃ dha̍yanti.
dhī̱taṃ hai̱va sa śe̍va̱dhimanu̱ parai̍ti.
atha̱ yo hai̱vaita̱magniṃ sā̍vi̱traṃ veda̍..44..

tasya̍ hai̱vāho̍rā̱trāṇi̍.
a̱muṣmi̍m̐llo̱ke śe̍va̱dhiṃ na dha̍yanti.
adhī̍taṃ hai̱va sa śe̍va̱dhimanu̱ parai̍ti.
bha̱radvā̍jo ha tri̱bhirāyu̍rbhirbrahma̱carya̍muvāsa.
taṃ ha̱ jīrṇi̱ṃ sthavi̍ra̱ṃ śayā̍nam.
indra̍ upa̱vrajyo̍vāca.
bhara̍dvāja.
yatte̍ catu̱rthamāyu̍rda̱dyām.
kime̍nena kuryā̱ iti̍.
bra̱hma̱carya̍me̱vaine̍na careya̱miti̍ hovāca..45..

taṃ ha̱ trīngi̱rirū̍pā̱navi̍jñātāniva darśa̱yāṃ ca̍kāra.
teṣā̱ṃ haikai̍kasmānmu̱ṣṭinā''da̍de.
sa ho̍vāca.
bhara̍dvā̱jetyā̱mantrya̍.
vedā̱ vā e̱te.
a̱na̱ntā vai vedā̎ḥ.
e̱tadvā e̱taistri̱bhirāyu̍rbhi̱ranva̍vocathāḥ.
atha̍ ta̱ ita̍ra̱dana̍nūktame̱va.
ehī̱maṃ vi̍ddhi.
a̱yaṃ vai sa̍rvavi̱dyeti̍..46..

tasmai̍ hai̱tama̱gniṃ sā̍vi̱tramu̍vāca.
taṃ sa vi̍di̱tvā.
a̱mṛto̍ bhū̱tvā.
sva̱rgaṃ lo̱kami̍yāya.
ā̱di̱tyasya̱ sāyu̍jyam.
a̱mṛto̍ hai̱va bhū̱tvā.
sva̱rgaṃ lo̱kame̍ti.
ā̱di̱tyasya̱ sāyu̍jyam.
ya e̱vaṃ veda̍.
e̱ṣo e̱va trayī̍ vi̱dyā..47..

yāva̍ntaṃ ha̱ vai tra̱yyā vi̱dyayā̍ lo̱kaṃ ja̍yati.
tāva̍ntaṃ lo̱kaṃ ja̍yati.
ya e̱vaṃ veda̍.
a̱gnervā e̱tāni̍ nāma̱dheyā̍ni.
a̱gnere̱va sāyu̍jyaṃ salo̱katā̍māpnoti.
ya e̱vaṃ veda̍.
vā̱yorvā e̱tāni̍ nāma̱dheyā̍ni.
vā̱yore̱va sāyu̍jyaṃ salo̱katā̍māpnoti.
ya e̱vaṃ veda̍.
indra̍sya̱ vā e̱tāni̍ nāma̱dheyā̍ni..48..

indra̍syai̱va sāyu̍jyaṃ salo̱katā̍māpnoti.
ya e̱vaṃ veda̍.
bṛha̱spate̱rvā e̱tāni̍ nāma̱dheyā̍ni.
bṛha̱spate̍re̱va sāyu̍jyaṃ salo̱katā̍māpnoti.
ya e̱vaṃ veda̍.
pra̱jāpa̍te̱rvā e̱tāni̍ nāma̱dheyā̍ni.
pra̱jāpa̍tere̱va sāyu̍jyaṃ salo̱katā̍māpnoti.
ya e̱vaṃ veda̍.
brahma̍ṇo̱ vā e̱tāni̍ nāma̱dheyā̍ni.
brahma̍ṇa e̱va sāyu̍jyaṃ salo̱katā̍māpnoti.
ya e̱vaṃ veda̍.
sa vā e̱ṣo̎'gnira̍pakṣapu̱ccho vā̱yure̱va.
tasyā̱gnirmukham̎.
a̱sāvā̍di̱tyaḥ śira̍ḥ.
sa yade̱te de̱vate̱ anta̍reṇa.
tathsarva̍ṃ sīvyati.
tasmā̎thsāvi̱traḥ..49..

Anuvāka 1

lo̱ko̍'si sva̱rgo̍'si.
a̱na̱nto̎'syapā̱ro̍'si.
akṣi̍to'syakṣa̱yyo̍'si.
tapa̍saḥ prati̱ṣṭhā.
tvayī̱dama̱ntaḥ.
viśva̍ṃ ya̱kṣaṃ viśva̍ṃ bhū̱taṃ viśva̍ṃ subhū̱tam.
viśva̍sya bha̱rtā viśva̍sya janayi̱tā.
taṃ tvopa̍dadhe kāma̱dugha̱makṣi̍tam.
pra̱jāpa̍tistvā sādayatu.
tayā̍ de̱vatayā̍'ṅgira̱svaddhru̱vā sī̍da..1..

tapo̍'si lo̱ke śri̱tam.
teja̍saḥ prati̱ṣṭhā.
tvayī̱dama̱ntaḥ.
viśva̍ṃ ya̱kṣaṃ viśva̍ṃ bhū̱taṃ viśva̍ṃ subhū̱tam.
viśva̍sya bha̱rtṛ viśva̍sya janayi̱tṛ.
tattvopa̍dadhe kāma̱dugha̱makṣi̍tam.
pra̱jāpa̍tistvā sādayatu.
tayā̍ de̱vatayā̍'ṅgira̱svaddhru̱vā sī̍da..2..

tejo̍'si̱ tapa̍si śri̱tam.
sa̱mu̱drasya̍ prati̱ṣṭhā.
tvayī̱dama̱ntaḥ.
viśva̍ṃ ya̱kṣaṃ viśva̍ṃ bhū̱taṃ viśva̍ṃ subhū̱tam.
viśva̍sya bha̱rtṛ viśva̍sya janayi̱tṛ.
tattvopa̍dadhe kāma̱dugha̱makṣi̍tam.
pra̱jāpa̍tistvā sādayatu.
tayā̍ de̱vata̍yā'ṅgira̱svaddhru̱vā sī̍da..3..

sa̱mu̱dro̍'si̱ teja̍si śri̱taḥ.
a̱pāṃ pra̍ti̱ṣṭhā.
tvayī̱dama̱ntaḥ.
viśva̍ṃ ya̱kṣaṃ viśva̍ṃ bhū̱taṃ viśva̍ṃ subhū̱tam.
viśva̍sya bha̱rtā viśva̍sya janayi̱tā.
taṃ tvopa̍dadhe kāma̱dugha̱makṣi̍tam.
pra̱jāpa̍tistvā sādayatu.
tayā̍ de̱vata̍yā'ṅgira̱svaddhru̱vā sī̍da..4..

āpa̍ḥ stha samu̱dre śri̱tāḥ.
pṛ̱thi̱vyāḥ pra̍ti̱ṣṭhā yu̱ṣmāsu̍.
i̱dama̱ntaḥ.
viśva̍ṃ ya̱kṣaṃ viśva̍ṃ bhū̱taṃ viśva̍ṃ subhū̱tam.
viśva̍sya bha̱rtryo̍ viśva̍sya janayi̱trya̍ḥ.
tā va̱ upa̍dadhe kāma̱dughā̱ akṣi̍tāḥ.
pra̱jāpa̍tistvā sādayatu.
tayā̍ de̱vatayā̍'ṅgira̱svaddhru̱vā sī̍da..5..

pṛ̱thi̱vya̍sya̱phsu śri̱tā.
a̱gneḥ pra̍ti̱ṣṭhā.
tvayī̱dama̱ntaḥ.
viśva̍ṃ ya̱kṣaṃ viśva̍ṃ bhū̱taṃ viśva̍ṃ subhū̱tam.
viśva̍sya bha̱rtrī viśva̍sya janayi̱trī.
tāṃ tvopa̍dadhe kāma̱dughā̱makṣi̍tām.
pra̱jāpa̍tistvā sādayatu.
tayā̍ de̱vata̍yā'ṅgira̱svaddhru̱vā sī̍da..6..

a̱gnira̍si pṛthi̱vyāṃ śri̱taḥ.
a̱ntari̍kṣasya prati̱ṣṭhā.
tvayī̱dama̱ntaḥ.
viśva̍ṃ ya̱kṣaṃ viśva̍ṃ bhū̱taṃ viśva̍ṃ subhū̱tam.
viśva̍sya bha̱rtā viśva̍sya janayi̱tā.
taṃ tvopa̍dadhe kāma̱dugha̱makṣi̍tam.
pra̱jāpa̍tistvā sādayatu.
tayā̍ de̱vata̍yā'ṅgira̱svaddhru̱vā sī̍da..7..

a̱ntari̍kṣamasya̱gnau śri̱tam.
vā̱yoḥ pra̍ti̱ṣṭhā.
tvayī̱dama̱ntaḥ.
viśva̍ṃ ya̱kṣaṃ viśva̍ṃ bhū̱taṃ viśva̍ṃ subhū̱tam.
viśva̍sya bha̱rtṛ viśva̍sya janayi̱tṛ.
tattvopa̍dadhe kāma̱dugha̱makṣi̍tam.
pra̱jāpa̍tistvā sādayatu.
tayā̍ de̱vata̍yā'ṅgira̱svaddhru̱vā sī̍da..8..

vā̱yura̍sya̱ntari̍kṣe śri̱taḥ.
di̱vaḥ pra̍ti̱ṣṭhā.
tvayī̱dama̱ntaḥ.
viśva̍ṃ ya̱kṣaṃ viśva̍ṃ bhū̱taṃ viśva̍ṃ subhū̱tam.
viśva̍sya bha̱rtā viśva̍sya janayi̱tā.
taṃ tvopa̍dadhe kāma̱dugha̱makṣi̍tam.
pra̱jāpa̍tistvā sādayatu.
tayā̍ de̱vata̍yā'ṅgira̱svaddhru̱vā sī̍da..9..

dyaura̍si vā̱yau śri̱tā.
ā̱di̱tyasya̍ prati̱ṣṭhā.
tvayī̱dama̱ntaḥ.
viśva̍ṃ ya̱kṣaṃ viśva̍ṃ bhū̱taṃ viśva̍ṃ subhū̱tam.
viśva̍sya bha̱rtrī viśva̍sya janayi̱trī.
tāṃ tvopa̍dadhe kāma̱dughā̱makṣi̍tām.
pra̱jāpa̍tistvā sādayatu.
tayā̍ de̱vata̍yā'ṅgira̱svaddhru̱vā sī̍da..10..

ā̱di̱tyo̍'si di̱vi śri̱taḥ.
ca̱ndrama̍saḥ prati̱ṣṭhā.
tvayī̱dama̱ntaḥ.
viśva̍ṃ ya̱kṣaṃ viśva̍ṃ bhū̱taṃ viśva̍ṃ subhū̱tam.
viśva̍sya bha̱rtā viśva̍sya janayi̱tā.
taṃ tvopa̍dadhe kāma̱dugha̱makṣi̍tam.
pra̱jāpa̍tistvā sādayatu.
tayā̍ de̱vata̍yā'ṅgira̱svaddhru̱vā sī̍da..11..

ca̱ndramā̍ asyādi̱tye śri̱taḥ.
nakṣa̍trāṇāṃ prati̱ṣṭhā.
tvayī̱dama̱ntaḥ.
viśva̍ṃ ya̱kṣaṃ viśva̍ṃ bhū̱taṃ viśva̍ṃ subhū̱tam.
viśva̍sya bha̱rtā viśva̍sya janayi̱tā.
taṃ tvopa̍dadhe kāma̱dugha̱makṣi̍tam.
pra̱jāpa̍tistvā sādayatu.
tayā̍ de̱vata̍yā'ṅgira̱svaddhru̱vā sī̍da..12..

nakṣa̍trāṇi stha ca̱ndrama̍si śri̱tāni̍.
sa̱ṃva̱thsa̱rasya̍ prati̱ṣṭhā yu̱ṣmāsu̍.
i̱dama̱ntaḥ.
viśva̍ṃ ya̱kṣaṃ viśva̍ṃ bhū̱taṃ viśva̍ṃ subhū̱tam.
viśva̍sya bha̱rtṝṇi̱ viśva̍sya janayi̱tṝṇi̍.
tāni̍ va̱ upa̍dadhe kāma̱dughā̱nyakṣi̍tāni.
pra̱jāpa̍tistvā sādayatu.
tayā̍ de̱vata̍yā'ṅgira̱svaddhru̱vā sī̍da..13..

sa̱ṃva̱thsa̱ro̍'si̱ nakṣa̍treṣu śri̱taḥ.
ṛ̱tū̱nāṃ pra̍ti̱ṣṭhā.
tvayī̱dama̱ntaḥ.
viśva̍ṃ ya̱kṣaṃ viśva̍ṃ bhū̱taṃ viśva̍ṃ subhū̱tam.
viśva̍sya bha̱rtā viśva̍sya janayi̱tā.
taṃ tvopa̍dadhe kāma̱dugha̱makṣi̍tam.
pra̱jāpa̍tistvā sādayatu.
tayā̍ de̱vata̍yā'ṅgira̱svaddhru̱vā sī̍da..14..

ṛ̱tava̍ḥ stha saṃvathsa̱re śri̱tāḥ.
māsā̍nāṃ prati̱ṣṭhā yu̱ṣmāsu̍.
i̱dama̱ntaḥ.
viśva̍ṃ ya̱kṣaṃ viśva̍ṃ bhū̱taṃ viśva̍ṃ subhū̱tam.
viśva̍sya bha̱rtāro̱ viśva̍sya janayi̱tāra̍ḥ.
tān va̱ upa̍dadhe kāma̱dughā̱nakṣi̍tān.
pra̱jāpa̍tistvā sādayatu.
tayā̍ de̱vata̍yā'ṅgira̱svaddhru̱vā sī̍da..15..

māsā̎ḥ stha̱rtaṣu̍ śri̱tāḥ.
a̱rdha̱mā̱sānā̎ṃ prati̱ṣṭhā yu̱ṣmāsu̍.
i̱dama̱ntaḥ.
viśva̍ṃ ya̱kṣaṃ viśva̍ṃ bhū̱taṃ viśva̍ṃ subhū̱tam.
viśva̍sya bha̱rtāro̱ viśva̍sya janayi̱tāra̍ḥ.
tān va̱ upa̍dadhe kāma̱dughā̱nakṣi̍tān.
pra̱jāpa̍tistvā sādayatu.
tayā̍ de̱vata̍yā'ṅgira̱svaddhru̱vā sī̍da..16..

a̱rdha̱mā̱sāḥ stha̍ mā̱su śri̱tāḥ.
a̱ho̱rā̱trayo̎ḥ prati̱ṣṭhā yu̱ṣmāsu̍.
i̱dama̱ntaḥ.
viśva̍ṃ ya̱kṣaṃ viśva̍ṃ bhū̱taṃ viśva̍ṃ subhū̱tam.
viśva̍sya bha̱rtāro̱ viśva̍sya janayi̱tāra̍ḥ.
tān va̱ upa̍dadhe kāma̱dughā̱nakṣi̍tān.
pra̱jāpa̍tistvā sādayatu.
tayā̍ de̱vata̍yā'ṅgira̱svaddhru̱vā sī̍da..17..

a̱ho̱rā̱tre stho̎'rdhamā̱seṣu̍ śri̱te.
bhū̱tasya̍ prati̱ṣṭhe bhavya̍sya prati̱ṣṭhe.
yu̱vayo̍ri̱dama̱ntaḥ.
viśva̍ṃ ya̱kṣaṃ viśva̍ṃ bhū̱taṃ viśva̍ṃ subhū̱tam.
viśva̍sya bha̱rtryau̍ viśva̍sya janayi̱tryau̎.
te vā̱mupa̍dadhe kāma̱dughe̱ akṣi̍te.
pra̱jāpa̍tistvā sādayatu.
tayā̍ de̱vata̍yā'ṅgira̱svaddhru̱vā sī̍da..18..

pau̱rṇa̱mā̱syaṣṭa̍kā'māvā̱syā̎.
a̱nnā̱dāḥ sthā̎nna̱dugho̍ yu̱ṣmāsu̍.
i̱dama̱ntaḥ.
viśva̍ṃ ya̱kṣaṃ viśva̍ṃ bhū̱taṃ viśva̍ṃ subhū̱tam.
viśva̍sya bha̱rtryo̍ viśva̍sya janayi̱trya̍ḥ.
tā va̱ upa̍dadhe kāma̱dughā̱ akṣi̍tāḥ.
pra̱jāpa̍tistvā sādayatu.
tayā̍ de̱vata̍yā'ṅgira̱svaddhru̱vā sī̍da..19..

rāḍa̍si bṛha̱tī śrīra̱sīndra̍patnī̱ dharma̍patnī.
viśva̍ṃ bhū̱tamanu̱prabhū̍tā.
tvayī̱dama̱ntaḥ.
viśva̍ṃ ya̱kṣaṃ viśva̍ṃ bhū̱taṃ viśva̍ṃ subhū̱tam.
viśva̍sya bha̱rtrī viśva̍sya janayi̱trī.
tāṃ tvopa̍dadhe kāma̱dughā̱makṣi̍tām.
pra̱jāpa̍tistvā sādayatu.
tayā̍ de̱vata̍yā'ṅgira̱svaddhru̱vā sī̍da..20..

ojo̍'si̱ saho̍'si.
bala̍masi̱ bhrājo̍'si.
de̱vānā̱ṃ dhāmā̱mṛtam̎.
ama̍rtyastapo̱jāḥ.
tvayī̱dama̱ntaḥ.
viśva̍ṃ ya̱kṣaṃ viśva̍ṃ bhū̱taṃ viśva̍ṃ subhū̱tam.
viśva̍sya bha̱rtā viśva̍sya janayi̱tā.
taṃ tvopa̍dadhe kāma̱dugha̱makṣi̍tam.
pra̱jāpa̍tistvā sādayatu.
tayā̍ de̱vata̍yā'ṅgira̱svaddhru̱vā sī̍da..21..

Anuvāka 2

tvama̍gne ru̱dro asu̍ro ma̱ho di̱vaḥ.
tvaṃ śardho̱ māru̍taṃ pṛ̱kṣa ī̍śiṣe.
tvaṃ vātai̍raru̱ṇairyā̍si śaṅga̱yaḥ.
tvaṃ pū̱ṣā vi̍dha̱taḥ pā̍si̱ nu tmanā̎.
devā̍ de̱veṣu̍ śrayadhvam.
pratha̍mā dvi̱tīye̍ṣu śrayadhvam.
dvitī̍yāstṛ̱tīye̍ṣu śrayadhvam.
tṛtī̍yāścatu̱rtheṣu̍ śrayadhvam.
ca̱tu̱rthāḥ pa̍ñca̱meṣu̍ śrayadhvam.
pa̱ñca̱māḥ ṣa̱ṣṭheṣu̍ śrayadhvam..22..

ṣa̱ṣṭhāḥ sa̍pta̱meṣu̍ śrayadhvam.
sa̱pta̱mā a̍ṣṭa̱meṣu̍ śrayadhvam.
a̱ṣṭa̱mā na̍va̱meṣu̍ śrayadhvam.
na̱va̱mā da̍śa̱meṣu̍ śrayadhvam.
da̱śa̱mā e̍kāda̱śeṣu̍ śrayadhvam.
e̱kā̱da̱śā dvā̍da̱śeṣu̍ śrayadhvam.
dvā̱da̱śāstra̍yoda̱śeṣu̍ śrayadhvam.
tra̱yo̱da̱śāśca̍turda̱śeṣu̍ śrayadhvam.
ca̱tu̱rda̱śāḥ pa̍ñcada̱śeṣu̍ śrayadhvam.
pa̱ñca̱da̱śāḥ ṣo̍ḍa̱śeṣu̍ śrayadhvam..23..

ṣo̱ḍa̱śāḥ sa̍ptada̱śeṣu̍ śrayadhvam.
sa̱pta̱da̱śā a̍ṣṭāda̱śeṣu̍ śrayadhvam.
a̱ṣṭā̱da̱śā e̍kānnavi̱ṃśeṣu̍ śrayadhvam.
e̱kā̱nna̱vi̱ṃśā vi̱ṃśeṣu̍ śrayadhvam.
vi̱ṃśā e̍kavi̱ṃśeṣu̍ śrayadhvam.
e̱ka̱vi̱ṃśā dvā̍vi̱ṃśeṣu̍ śrayadhvam.
dvā̱vi̱ṃśāstra̍yovi̱ṃśe̍ṣu śrayadhvam.
tra̱yo̱vi̱ṃśāśca̍turvi̱ṃśeṣu̍ śrayadhvam.
ca̱tu̱rvi̱ṃśāḥ pa̍ñcavi̱ṃśeṣu̍ śrayadhvam.
pa̱ñca̱vi̱ṃśāḥ ṣa̍ḍvi̱ṃśeṣu̍ śrayadhvam..24..

ṣa̱ḍvi̱ṃśāḥ sa̍ptavi̱ṃśeṣu̍ śrayadhvam.
sa̱pta̱vi̱ṃśā a̍ṣṭāvi̱ṃśeṣu̍ śrayadhvam.
a̱ṣṭā̱vi̱ṃśā e̍kānnatri̱ṃśeṣu̍ śrayadhvam.
e̱kā̱nna̱tri̱ṃśāstri̱ṃśeṣu̍ śrayadhvam.
tri̱ṃśā e̍katri̱ṃśeṣu̍ śrayadhvam.
e̱ka̱tri̱ṃśā dvā̎tri̱ṃśeṣu̍ śrayadhvam.
dvā̱tri̱ṃśāstra̍yastri̱ṃśeṣu̍ śrayadhvam.
devā̎strirekādaśā̱stristra̍yastriṃśāḥ.
utta̍re bhavata.
utta̍ravartmāna̱ utta̍rasattvānaḥ.
yatkā̍ma i̱daṃ ju̱homi̍.
tanme̱ samṛ̍dhyatām.
va̱yaṃ syā̍ma̱ pata̍yo rayī̱ṇām.
bhūrbhuva̱ḥ sva̍ḥ svāhā̎..25..

Anuvāka 3

agnā̍viṣṇū sa̱joṣa̍sā.
i̱mā va̍rdhantu vā̱ṃ gira̍ḥ.
dyu̱mnairvāje̍bhi̱rāga̍tam.
rājñī̍ vi̱rājñī̎.
sa̱mrājñī̎ sva̱rājñī̎.
a̱rciḥ śo̱ciḥ.
tapo̱ haro̱ bhāḥ.
a̱gniḥ somo̱ bṛha̱spati̍ḥ.
viśve̍ de̱vā bhuva̍nasya go̱pāḥ.
te sarve̍ sa̱ṅgatya̍.
i̱daṃ me̱ prāva̍tā̱ vaca̍ḥ.
va̱yaṃ syā̍ma̱ pata̍yo rayī̱ṇām.
bhūrbhuva̱ḥ sva̍ḥ svāhā̎..26..

Anuvāka 4

anna̍pa̱te'nna̍sya no dehi.
a̱na̱mī̱vasya̍ śu̱ṣmiṇa̍ḥ.
pra pra̍dā̱tāra̍ṃ tāriṣaḥ.
ūrja̍ṃ no dhehi dvi̱pade̱ catu̍ṣpade.
agne̍ pṛthivīpate.
soma̍ vīrudhāṃ pate.
tvaṣṭa̍ḥ samidhāṃ pate.
viṣṇa̍vāśānāṃ pate.
mitra̍ satyānāṃ pate.
varu̍ṇa dharmaṇāṃ pate..27..

ma̱ruto̍ gaṇānāṃ patayaḥ.
rudra̍ paśūnāṃ pate.
indrau̍jasāṃ pate.
bṛha̍spate brahmaṇaspate.
ā ru̱cā ro̍ce̱'haṃ sva̱yam.
ru̱cā ru̍ruce̱ roca̍mānaḥ.
a̱tītyā̱daḥ sva̍rābha̍re̱ha.
tasmi̱n yonau̎ praja̱nau prajā̍yeya.
va̱yaṃ syā̍ma̱ pata̍yo rayī̱ṇām.
bhūrbhuva̱ḥ sva̍ḥ svāhā̎..28..

Anuvāka 5

sa̱pta te̍ agne sa̱midha̍ḥ sa̱pta ji̱hvāḥ.
sa̱ptarṣa̍yaḥ sa̱pta dhāma̍ pri̱yāṇi̍.
sa̱pta hotrā̍ anuvi̱dvān.
sa̱pta yonī̱rāpṛ̍ṇasvā ghṛ̱tena̍.
prācī̱ dik.
a̱gnirde̱vatā̎.
a̱gniṃ sa di̱śāṃ de̱vaṃ de̱vatā̍nāmṛcchatu.
yo mai̱tasyai̍ di̱śo̍'bhi̱dāsa̍ti.
da̱kṣi̱ṇā dik.
indro̍ de̱vatā̎..29..

indra̱ṃ sa di̱śāṃ de̱vaṃ de̱vatā̍nāmṛcchatu.
yo mai̱tasyai̍ di̱śo̍'bhi̱dāsa̍ti.
pra̱tīcī̱ dik.
somo̍ de̱vatā̎.
soma̱ṃ sa di̱śāṃ de̱vaṃ de̱vatā̍nāmṛcchatu.
yo mai̱tasyai̍ di̱śo̍'bhi̱dāsa̍ti.
udī̍cī̱ dik.
mi̱trāvaru̍ṇau de̱vatā̎.
mi̱trāvaru̍ṇau̱ sa di̱śāṃ de̱vau de̱vatā̍nāmṛcchatu.
yo mai̱tasyai̍ di̱śo̍'bhi̱dāsa̍ti..30..

ū̱rdhvā dik.
bṛha̱spati̍rde̱vatā̎.
bṛha̱spati̱ṃ sa di̱śāṃ de̱vaṃ de̱vatā̍nāmṛcchatu.
yo mai̱tasyai̍ di̱śo̍'bhi̱dāsa̍ti.
i̱yaṃ dik.
adi̍tirde̱vatā̎.
adi̍ti̱ṃ sa di̱śāṃ de̱vīṃ de̱vatā̍nāmṛcchatu.
yo mai̱tasyai̍ di̱śo̍'bhi̱dāsa̍ti.
puru̍ṣo̱ dik.
puru̍ṣo me̱ kāmā̱nthsama̍rdhayatu..31..

a̱ndho jāgṛ̍viḥ prāṇa.
asā̱vehi̍.
ba̱dhi̱ra ā̎krandayitarapāna.
asā̱vehi̍.
u̱ṣasa̍muṣasamaśīya.
a̱hamaso̱ jyoti̍raśīya.
a̱hamaso̱'po̍'śīya.
va̱yaṃ syā̍ma̱ pata̍yo rayī̱ṇām.
bhūrbhuva̱ḥ sva̍ḥ svāhā̎..32..

Anuvāka 6

yatte'ci̍ta̱ṃ yadu̍ ci̱taṃ te̍ agne.
yatta̍ ū̱naṃ yadu̱ te'ti̍riktam.
ā̱di̱tyāsta̱daṅgi̍rasaścinvantu.
viśve̍ te de̱vāściti̱māpū̍rayantu.
ci̱taścāsi̱ sañci̍taścāsyagne.
e̱tāvā̱ṃścāsi̱ bhūyā̍ṃścāsyagne.
lo̱kaṃ pṛ̍ṇa cchi̱draṃ pṛ̍ṇa.
atho̍ sīda śi̱vā tvam.
i̱ndrā̱gnī tvā̱ bṛha̱spati̍ḥ.
a̱smin yonā̍vasīṣadan..33..

tayā̍ de̱vata̍yā'ṅgira̱svaddhru̱vā sī̍da.
tā a̍sya̱ sūda̍dohasaḥ.
soma̍ṃ śrīṇanti̱ pṛśna̍yaḥ.
janma̍ṃ de̱vānā̱ṃ viśa̍ḥ.
tri̱ṣvā ro̍ca̱ne di̱vaḥ.
tayā̍ de̱vata̍yā'ṅgira̱svaddhru̱vā sī̍da.
agne̍ de̱vāṃ i̱hā''va̍ha.
ja̱jñā̱no vṛ̱ktaba̍rhiṣe.
asi̱ hotā̍ na̱ īḍya̍ḥ.
aga̍nma ma̱hā mana̍sā̱ yavi̍ṣṭham..34..

yo dī̱dāya̱ sami̍ddha̱ sve du̍ro̱ṇe.
ci̱trabhā̍nū̱ roda̍sī a̱ntaru̱rvī.
svā̍hutaṃ vi̱śvata̍ḥ pra̱tyañcam̎.
me̱dhā̱kā̱raṃ vi̱datha̍sya pra̱sādha̍nam.
a̱gniṃ hotā̍raṃ pari̱bhūta̍maṃ ma̱tim.
tvāmarbha̍sya ha̱viṣa̍ḥ samā̱namit.
tvāṃ ma̱ho vṛ̍ṇate̱ naro̱ nānyaṃ tvat.
ma̱nu̱ṣvattvā̱ nidhī̍mahi.
ma̱nu̱ṣvathsami̍dhīmahi.
agne̍ manu̱ṣvada̍ṅgiraḥ..35..

de̱vānde̍vāya̱te ya̍ja.
a̱gnirhi vā̱jina̍ṃ vi̱śe.
dadā̍ti vi̱śvaca̍rṣaṇiḥ.
a̱gnī rā̱ye svā̱bhuvam̎.
sa prī̱to yā̍ti̱ vāryam̎.
iṣa̍ṃ sto̱tṛbhya̱ ābha̍ra.
pṛ̱ṣṭo di̱vi pṛ̱ṣṭo a̱gniḥ pṛ̍thi̱vyām.
pṛ̱ṣṭo viśvā̱ oṣa̍dhī̱rāvi̍veśa.
vai̱śvā̱na̱raḥ saha̍sā pṛ̱ṣṭo a̱gniḥ.
sa no̱ divā̱ sa ri̱ṣaḥ pā̍tu̱ naktam̎..36..

Anuvāka 7

a̱yaṃ vāva yaḥ pava̍te.
so̎'gnirnā̍cike̱taḥ.
sa yatprāṅ pava̍te.
tada̍sya̱ śira̍ḥ.
atha̱ yadda̍kṣi̱ṇā.
sa dakṣi̍ṇaḥ pa̱kṣaḥ.
atha̱ yatpra̱tyak.
tatpuccham̎.
yadudaṅṅ̍.
sa utta̍raḥ pa̱kṣaḥ..37..

atha̱ yathsa̱ṃvāti̍.
tada̍sya sa̱mañca̍naṃ ca pra̱sāra̍ṇaṃ ca.
atho̍ sa̱mpade̱vāsya̱ sā.
saṃ ha̱ vā a̍smai̱ sa kāma̍ḥ padyate.
yatkā̍mo̱ yaja̍te.
yo̎'gniṃ nā̍cike̱taṃ ci̍nu̱te.
ya u̍ cainame̱vaṃ veda̍.
yo ha̱ vā a̱gnernā̍cike̱tasyā̱''yata̍naṃ prati̱ṣṭhāṃ veda̍.
ā̱yata̍navānbhavati.
gaccha̍ti prati̱ṣṭhām..38..

hira̍ṇya̱ṃ vā a̱gnernā̍cike̱tasyā̱''yata̍naṃ prati̱ṣṭhā.
ya e̱vaṃ veda̍.
ā̱yata̍navānbhavati.
gaccha̍ti prati̱ṣṭhām.
yo ha̱ vā a̱gnernā̍cike̱tasya̱ śarī̍ra̱ṃ veda̍.
saśa̍rīra e̱va sva̱rgaṃ lo̱kame̍ti.
hira̍ṇya̱ṃ vā a̱gnernā̍cike̱tasya̱ śarī̍ram.
ya e̱vaṃ veda̍.
saśa̍rīra e̱va sva̱rgaṃ lo̱kame̍ti.
atho̱ yathā̍ ru̱kma utta̍pto bhā̱yyāt..39..

e̱vame̱va sa teja̍sā̱ yaśa̍sā.
a̱smiṃśca̍ lo̱ke̍'muṣmi̍ṃśca bhāti.
u̱ravo̍ ha̱ vai nāmai̱te lo̱kāḥ.
ye'va̍reṇā''di̱tyam.
atha̍ hai̱te varī̍yāṃso lo̱kāḥ.
ye pare̍ṇā''di̱tyam.
anta̍vantaṃ ha̱ vā e̱ṣa kṣa̱yyaṃ lo̱kaṃ ja̍yati.
yo'va̍reṇā''di̱tyam.
atha̍ hai̱ṣo̍'na̱ntama̍pā̱rama̍kṣa̱yyaṃ lo̱kaṃ ja̍yati.
yaḥ pare̍ṇā''di̱tyam..40..

a̱na̱ntaṃ ha̱ vā a̍pā̱rama̍kṣa̱yyaṃ lo̱kaṃ ja̍yati.
yo̎'gniṃ nā̍cike̱taṃ ci̍nu̱te.
ya u̍ cainame̱vaṃ veda̍.
atho̱ yathā̱ rathe̱ tiṣṭha̱npakṣa̍sī paryā̱varta̍māne pra̱tyape̎kṣate.
e̱vama̍horā̱tre pra̱tyape̎kṣate.
nāsyā̍horā̱tre lo̱kamā̎pnutaḥ.
yo̎'gniṃ nā̍cike̱taṃ ci̍nu̱te.
ya u̍ cainame̱vaṃ veda̍..41..

Anuvāka 8

u̱śan ha̱ vai vā̍jaśrava̱saḥ sa̍rvaveda̱saṃ da̍dau.
tasya̍ ha̱ naci̍ketā̱ nāma̍ pu̱tra ā̍sa.
taṃ ha̍ kumā̱raṃ santam̎.
dakṣi̍ṇāsu nī̱yamā̍nāsu śra̱ddhā''vi̍veśa.
sa ho̍vāca.
tata̱ kasmai̱ māṃ dā̎sya̱sīti̍.
dvi̱tīya̍ṃ tṛ̱tīyam̎.
taṃ ha̱ parī̍ta uvāca.
mṛ̱tyave̎ tvā dadā̱mīti̍.
taṃ ha̱ smotthi̍ta̱ṃ vāga̱bhiva̍dati..42..

gauta̍ma kumā̱ramiti̍.
sa ho̍vāca.
pare̍hi mṛ̱tyorgṛ̱hān.
mṛ̱tyave̱ vai tvā̍'dā̱miti̍.
taṃ vai pra̱vasa̍ntaṃ ga̱ntāsīti̍ hovāca.
tasya̍ sma ti̱sro rātrī̱ranā̎śvāngṛ̱he va̍satāt.
sa yadi̍ tvā pṛ̱cchet.
kumā̍ra̱ kati̱ rātrī̍ravāthsī̱riti̍.
ti̱sra iti̱ prati̍brūtāt.
kiṃ pra̍tha̱māṃ rātri̍māśnā̱ iti̍..43..

pra̱jāṃ ta̱ iti̍.
kiṃ dvi̱tīyā̱miti̍.
pa̱śūṃsta̱ iti̍.
kiṃ tṛ̱tīyā̱miti̍.
sā̱dhu̱kṛ̱tyāṃ ta̱ iti̍.
taṃ vai pra̱vasa̍ntaṃ jagāma.
tasya̍ ha ti̱sro rātrī̱ranā̎śvāngṛ̱ha u̍vāsa.
tamā̱gatya̍ papraccha.
kumā̍ra̱ kati̱ rātrī̍ravāthsī̱riti̍.
ti̱sra iti̱ pratyu̍vāca..44..

kiṃ pra̍tha̱māṃ rātri̍māśnā̱ iti̍.
pra̱jāṃ ta̱ iti̍.
kiṃ dvi̱tīyā̱miti̍.
pa̱śūṃsta̱ iti̍.
kiṃ tṛ̱tīyā̱miti̍.
sā̱dhu̱kṛ̱tyāṃ ta̱ iti̍.
nama̍ste astu bhagava̱ iti̍ hovāca.
vara̍ṃ vṛṇī̱ṣveti̍.
pi̱tara̍me̱va jīva̍nnayā̱nīti̍.
dvi̱tīya̍ṃ vṛṇī̱ṣveti̍..45..

i̱ṣṭā̱pū̱rtayo̱rme'kṣi̍tiṃ brū̱hīti̍ hovāca.
tasmai̍ hai̱tama̱gniṃ nā̍cike̱tamu̍vāca.
tato̱ vai tasye̎ṣṭāpū̱rte nā kṣī̍yete.
nāsye̎ṣṭāpū̱rte kṣī̍yete.
yo̎'gniṃ nā̍cike̱taṃ ci̍nu̱te.
ya u̍ cainame̱vaṃ veda̍.
tṛ̱tīya̍ṃ vṛṇī̱ṣveti̍.
pu̱na̱rmṛ̱tyorme'pa̍citiṃ brū̱hīti̍ hovāca.
tasmai̍ hai̱tama̱gniṃ nā̍cike̱tamu̍vāca.
tato̱ vai so'pa̍ punarmṛ̱tyuma̍jayat..46..

apa̍ punarmṛ̱tyuṃ ja̍yati.
yo̎'gniṃ nā̍cike̱taṃ ci̍nu̱te.
ya u̍ cainame̱vaṃ veda̍.
pra̱jāpa̍ti̱rvai pra̱jākā̍ma̱stapo̍'tapyata.
sa hi̍raṇya̱mudā̎syat.
tada̱gnau prāsya̍t.
tada̍smai̱ nāccha̍dayat.
taddvi̱tīya̱ṃ prāsya̍t.
tada̍smai̱ naivāccha̍dayat.
tattṛ̱tīya̱ṃ prāsya̍t..47..

tada̍smai̱ naivāccha̍dayat.
tadā̱tmanne̱va hṛ̍da̱yye̎'gnau vai̎śvāna̱re prāsya̍t.
tada̍smā acchadayat.
tasmā̱ddhira̍ṇya̱ṃ kani̍ṣṭha̱ṃ dhanā̍nām.
bhu̱ñjatpri̱yata̍mam.
hṛ̱da̱ya̱jaṃ hi.
sa vai tame̱va nāvi̍ndat.
yasmai̱ tāṃ dakṣi̍ṇā̱mane̎ṣyat.
tāṃ svāyai̱va hastā̍ya̱ dakṣi̍ṇāyānayat.
tāṃ pratya̍gṛhṇāt..48..

dakṣā̍ya tvā̱ dakṣi̍ṇā̱ṃ prati̍gṛhṇā̱mīti̍.
so̍'dakṣata̱ dakṣi̍ṇāṃ prati̱gṛhya̍.
dakṣa̍te ha̱ vai dakṣi̍ṇāṃ prati̱gṛhya̍.
ya e̱vaṃ veda̍.
e̱taddha̍ sma̱ vai tadvi̱dvāṃso̍ vājaśrava̱sā gota̍māḥ.
apya̍nūde̱śyā̎ṃ dakṣi̍ṇā̱ṃ prati̍gṛhṇanti.
u̱bhaye̍na va̱yaṃ da̍kṣiṣyāmaha e̱va dakṣi̍ṇāṃ prati̱gṛhyeti̍.
te̍'dakṣanta̱ dakṣi̍ṇāṃ prati̱gṛhya̍.
dakṣa̍te ha̱ vai dakṣi̍ṇāṃ prati̱gṛhya̍.
ya e̱vaṃ veda̍.
pra hā̱nyaṃ vlī̍nāti..49..

Anuvāka 9

taṃ hai̱tameke̍ paśuba̱ndha e̱votta̍rave̱dyāṃ ci̍nvate.
u̱tta̱ra̱ve̱disa̍mmita e̱ṣo̎'gniriti̱ vada̍ntaḥ.
tanna tathā̍ ku̱ryāt.
e̱tama̱gniṃ kāme̍na̱ vya̍rdhayet.
sa e̍na̱ṃ kāme̍na̱ vyṛ̍ddhaḥ.
kāme̍na̱ vya̍rdhayet.
sau̱mye vāvaina̍madhva̱re ci̍nvī̱ta.
yatra̍ vā̱ bhūyi̍ṣṭhā̱ āhu̍tayo hū̱yeran̍.
e̱tama̱gniṃ kāme̍na̱ sama̍rdhayati.
sa e̍na̱ṃ kāme̍na̱ samṛ̍ddhaḥ..50..

kāme̍na̱ sama̍rdhayati.
atha̍ hainaṃ pu̱rarṣa̍yaḥ.
u̱tta̱ra̱ve̱dyāme̱va sa̱ttriya̍macinvata.
tato̱ vai te'vi̍ndanta pra̱jām.
a̱bhi sva̱rgaṃ lo̱kama̍jayan.
vi̱ndata̍ e̱va pra̱jām.
a̱bhi sva̱rgaṃ lo̱kaṃ ja̍yati.
yo̎'gniṃ nā̍cike̱taṃ ci̍nu̱te.
ya u̍ cainame̱vaṃ veda̍.
atha̍ hainaṃ vā̱yurṛddhi̍kāmaḥ..51..

ya̱thā̱nyu̱ptame̱vopa̍dadhe.
tato̱ vai sa e̱tāmṛddhi̍mārdhnot.
yāmi̱daṃ vā̱yurṛ̱ddhaḥ.
e̱tāmṛddhi̍mṛdhnoti.
yāmi̱daṃ vā̱yurṛ̱ddhaḥ.
yo̎'gniṃ nā̍cike̱taṃ ci̍nu̱te.
ya u̍ cainame̱vaṃ veda̍.
atha̍ hainaṃ goba̱lo vārṣṇa̍ḥ pa̱śukā̍maḥ.
pāṅkta̍me̱va ci̍kye.
pañca̍ pu̱rastā̎t..52..

pañca̍ dakṣiṇa̱taḥ.
pañca̍ pa̱ścāt.
pañco̎ttara̱taḥ.
ekā̱ṃ madhye̎.
tato̱ vai sa sa̱hasra̍ṃ pa̱śūnprāpno̎t.
pra sa̱hasra̍ṃ pa̱śūnā̎pnoti.
yo̎'gniṃ nā̍cike̱taṃ ci̍nu̱te.
ya u̍ cainame̱vaṃ veda̍.
atha̍ hainaṃ pra̱jāpa̍ti̱rjyaiṣṭhya̍kāmo̱ yaśa̍skāmaḥ pra̱jana̍nakāmaḥ.
tri̱vṛta̍me̱va ci̍kye..53..

sa̱pta pu̱rastā̎t.
ti̱sro da̍kṣiṇa̱taḥ.
sa̱pta pa̱ścāt.
ti̱sra u̍ttara̱taḥ.
ekā̱ṃ madhye̎.
tato̱ vai sa pra yaśo̱ jyaiṣṭhya̍māpnot.
e̱tāṃ prajā̍ti̱ṃ prājā̍yata.
yāmi̱daṃ pra̱jāḥ pra̱jāya̍nte.
tri̱vṛdvai jyaiṣṭhyam̎.
mā̱tā pi̱tā pu̱traḥ..54..

tri̱vṛtpra̱jana̍nam.
u̱pastho̱ yoni̍rmadhya̱mā.
pra yaśo̱ jyaiṣṭhya̍māpnoti.
e̱tāṃ prajā̍ti̱ṃ prajā̍yate.
yāmi̱daṃ pra̱jāḥ pra̱jāya̍nte.
yo̎'gniṃ nā̍cike̱taṃ ci̍nu̱te.
ya u̍ cainame̱vaṃ veda̍.
atha̍ haina̱mindro̱ jyaiṣṭhya̍kāmaḥ.
ū̱rdhvā e̱vopa̍dadhe.
tato̱ vai sa jyaiṣṭhya̍magacchat..55..

jyaiṣṭhya̍ṃ gacchati.
yo̎'gniṃ nā̍cike̱taṃ ci̍nu̱te.
ya u̍ cainame̱vaṃ veda̍.
atha̍ hainama̱sāvā̍di̱tyaḥ sva̱rgakā̍maḥ.
prācī̍re̱vopa̍dadhe.
tato̱ vai so̍'bhi sva̱rgaṃ lo̱kama̍jayat.
a̱bhi sva̱rgaṃ lo̱kaṃ ja̍yati.
yo̎'gniṃ nā̍cike̱taṃ ci̍nu̱te.
ya u̍ cainame̱vaṃ veda̍.
sa yadī̱cchet..56..

te̱ja̱svī ya̍śa̱svī bra̍hmavarca̱sī syā̱miti̍.
prāṅāhotu̱rdhiṣṇyā̱duthsa̍rpet.
yeyaṃ prāgā̱dyaśa̍svatī.
sā mā̱ prorṇo̍tu.
teja̍sā̱ yaśa̍sā brahmavarca̱seneti̍.
te̱ja̱svye̍va ya̍śa̱svī bra̍hmavarca̱sī bha̍vati.
atha̱ yadī̱cchet.
bhūyi̍ṣṭhaṃ me̱ śradda̍dhīran.
bhūyi̍ṣṭhā̱ dakṣi̍ṇā nayeyu̱riti̍.
dakṣi̍ṇāsu nī̱yamā̍nāsu̱ prācyehi̱ prācye̱hīti̱ prācī̍ juṣā̱ṇā vetvā''jya̍sya̱ svāheti̍ sru̱veṇo̍pa̱hatyā̍''hava̱nīye̍ juhuyāt..57..

bhūyi̍ṣṭhame̱vāsmai̱ śradda̍dhate.
bhūyi̍ṣṭhā̱ dakṣi̍ṇā nayanti.
purī̍ṣamupa̱dhāya̍.
ci̱ti̱kḷ̱ptibhi̍rabhi̱mṛśya̍.
a̱gniṃ pra̱ṇīyo̍pasamā̱dhāya̍.
cata̍sra e̱tā āhu̍tīrjuhoti.
tvama̍gne ru̱dra iti̍ śataru̱drīya̍sya rū̱pam.
agnā̍viṣṇū̱ iti̍ vaso̱rdhārā̍yāḥ.
anna̍pata̱ itya̍nnaho̱maḥ.
sa̱pta te̍ agne sa̱midha̍ḥ sa̱pta ji̱hvā iti̍ viśva̱prīḥ..58..

Anuvāka 10

yāṃ pra̍tha̱māmiṣṭa̍kāmupa̱dadhā̍ti.
i̱maṃ tayā̍ lo̱kama̱bhija̍yati.
atho̱ yā a̱smim̐llo̱ke de̱vatā̎ḥ.
tāsā̱ṃ sāyu̍jyaṃ salo̱katā̍māpnoti.
yāṃ dvi̱tīyā̍mupa̱dadhā̍ti.
a̱nta̱ri̱kṣa̱lo̱kaṃ tayā̱'bhija̍yati.
atho̱ yā a̍ntarikṣalo̱ke de̱vatā̎ḥ.
tāsā̱ṃ sāyu̍jyaṃ salo̱katā̍māpnoti.
yāṃ tṛ̱tīyā̍mupa̱dadhā̍ti.
a̱muṃ tayā̍ lo̱kama̱bhija̍yati..59..

atho̱ yā a̱muṣmi̍m̐llo̱ke de̱vatā̎ḥ.
tāsā̱ṃ sāyu̍jyaṃ salo̱katā̍māpnoti.
atho̱ yā a̱mūrita̍rā a̱ṣṭāda̍śa.
ya e̱vāmī u̱rava̍śca̱ varī̍yāṃsaśca lo̱kāḥ.
tāne̱va tābhi̍ra̱bhija̍yati..
kā̱ma̱cāro̍ ha̱ vā a̍syo̱ruṣu̍ ca̱ varī̍yaḥsu ca lo̱keṣu̍ bhavati.
yo̎'gniṃ nā̍cike̱taṃ ci̍nu̱te.
ya u̍ cainame̱vaṃ veda̍.
sa̱ṃva̱thsa̱ro vā a̱gnirnā̍cike̱taḥ.
tasya̍ vasa̱ntaḥ śira̍ḥ..60..

grī̱ṣmo dakṣi̍ṇaḥ pa̱kṣaḥ.
va̱ṟṣā utta̍raḥ.
śa̱ratpuccham̎.
māsā̎ḥ karmakā̱rāḥ.
a̱ho̱rā̱tre śa̍taru̱drīyam̎.
pa̱rjanyo̱ vaso̱rdhārā̎.
yathā̱ vai pa̱rjanya̱ḥ suvṛ̍ṣṭaṃ vṛ̱ṣṭvā.
pra̱jābhya̱ḥ sarvā̱nkāmā̎nthsampū̱raya̍ti.
e̱vame̱va sa tasya̱ sarvā̱nkāmā̱nthsampū̍rayati.
yo̎'gniṃ nā̍cike̱taṃ ci̍nu̱te..61..

ya u̍ cainame̱vaṃ veda̍.
sa̱ṃva̱thsa̱ro vā a̱gnirnā̍cike̱taḥ.
tasya̍ vasa̱ntaḥ śira̍ḥ.
grī̱ṣmo dakṣi̍ṇaḥ pa̱kṣaḥ.
va̱ṟṣāḥ puccham̎.
śa̱radutta̍raḥ pa̱kṣaḥ.
he̱ma̱nto madhyam̎.
pū̱rva̱pa̱kṣāścita̍yaḥ.
a̱pa̱ra̱pa̱kṣāḥ purī̍ṣam.
a̱ho̱rā̱trāṇīṣṭa̍kāḥ.
e̱ṣa vāva so̎'gnira̍gni̱maya̍ḥ punarṇa̱vaḥ.
a̱gni̱mayo̍ ha̱ vai pu̍narṇa̱vo bhū̱tvā.
sva̱rgaṃ lo̱kame̍ti.
ā̱di̱tyasya̱ sāyu̍jyam.
yo̎'gniṃ nā̍cike̱taṃ ci̍nu̱te.
ya u̍ cainame̱vaṃ veda̍..62..

Anuvāka 1

tubhya̱ṃ tā a̍ṅgirastamā̱'śyāma̱ taṃ kāma̍magne.
āśā̍nāṃ tvā̱ viśvā̱ āśā̎ḥ.
anu̍ no̱'dyānu̍mati̱ranvida̍numate̱ tvam.
kāmo̍ bhū̱tasya̱ kāma̱stadagre̎.
brahma̍ jajñā̱naṃ pi̱tā vi̱rājā̎m.
ya̱jño rā̱yo̍'yaṃ ya̱jñaḥ.
āpo̍ bha̱drā āditpa̍śyāmi.
tubhya̍ṃ bharanti̱ yo de̱hyaḥ.
pūrva̍ṃ devā̱ apa̍reṇa prāṇāpā̱nau.
ha̱vya̱vāha̱ṃ svi̍ṣṭam..1..

Anuvāka 2

de̱vebhyo̱ vai sva̱rgo lo̱kasti̱ro̍'bhavat.
te pra̱jāpa̍timabruvan.
prajā̍pate sva̱rgo vai no̍ lo̱kasti̱ro̍'bhūt.
tamanvi̱ccheti̍.
taṃ ya̍jñakra̱tubhi̱ranvai̎cchat.
taṃ ya̍jñakra̱tubhi̱rnānva̍vindat.
tamiṣṭi̍bhi̱ranvai̎cchat.
tamiṣṭi̍bhi̱ranva̍vindat.
tadiṣṭī̍nāmiṣṭi̱tvam.
eṣṭa̍yo ha̱ vai nāma̍.
tā iṣṭa̍ya̱ ityāca̍kṣate pa̱rokṣe̍ṇa.
pa̱rokṣa̍priyā iva̱ hi de̱vāḥ..2..

tamāśā̎'bravīt.
prajā̍pata ā̱śayā̱ vai śrā̎myasi.
a̱hamu̱ vā āśā̎'smi.
māṃ nu ya̍jasva.
atha̍ te sa̱tyā''śā̍ bhaviṣyati.
anu̍ sva̱rgaṃ lo̱kaṃ ve̱thsyasīti̍.
sa e̱tama̱gnaye̱ kāmā̍ya puro̱ḍāśa̍ma̱ṣṭāka̍pāla̱ṃ nira̍vapat.
ā̱śāyai̍ ca̱rum.
anu̍matyai ca̱rum.
tato̱ vai tasya̍ sa̱tyā''śā̍'bhavat.
anu̍ sva̱rgaṃ lo̱kama̍vindat.
sa̱tyā ha̱ vā a̱syā''śā̍ bhavati.
anu̍ sva̱rgaṃ lo̱kaṃ vi̍ndati.
ya e̱tena̍ ha̱viṣā̱ yaja̍te.
ya u̍ cainade̱vaṃ veda̍.
so'tra̍ juhoti.
a̱gnaye̱ kāmā̍ya̱ svāhā̱''śāyai̱ svāhā̎.
anu̍matyai̱ svāhā̎ pra̱jāpa̍taye̱ svāhā̎.
sva̱rgāya̍ lo̱kāya̱ svāhā̱'gnaye̎ sviṣṭa̱kṛte̱ svāheti̍..3..

taṃ kāmo̎'bravīt.
prajā̍pate̱ kāme̍na̱ vai śrā̎myasi.
a̱hamu̱ vai kāmo̎'smi.
māṃ nu ya̍jasva.
atha̍ te sa̱tyaḥ kāmo̍ bhaviṣyati.
anu̍ sva̱rgaṃ lo̱kaṃ ve̱thsyasīti̍.
sa e̱tama̱gnaye̱ kāmā̍ya puro̱ḍāśa̍ma̱ṣṭāka̍pāla̱ṃ nira̍vapat.
kāmā̍ya ca̱rum.
anu̍matyai ca̱rum.
tato̱ vai tasya̍ sa̱tyaḥ kāmo̍'bhavat.
anu̍ sva̱rgaṃ lo̱kama̍vindat.
sa̱tyo ha̱ vā a̍sya̱ kāmo̍ bhavati.
anu̍ sva̱rgaṃ lo̱kaṃ vi̍ndati.
ya e̱tena̍ ha̱viṣā̱ yaja̍te.
ya u̍ cainade̱vaṃ veda̍.
so'tra̍ juhoti.
a̱gnaye̱ kāmā̍ya̱ svāhā̱ kāmā̍ya̱ svāhā̎.
anu̍matyai̱ svāhā̎ pra̱jāpa̍taye̱ svāhā̎.
sva̱rgāya̍ lo̱kāya̱ svāhā̱'gnaye̎ sviṣṭa̱kṛte̱ svāheti̍..4..

taṃ brahmā̎'bravīt.
prajā̍pate̱ brahma̍ṇā̱ vai śrā̎myasi.
a̱hamu̱ vai brahmā̎'smi.
māṃ nu ya̍jasva.
atha̍ te brahma̱ṇvān ya̱jño bha̍viṣyati.
anu̍ sva̱rgaṃ lo̱kaṃ ve̱thsyasīti̍.
sa e̱tama̱gnaye̱ kāmā̍ya puro̱ḍāśa̍ma̱ṣṭāka̍pāla̱ṃ nira̍vapat.
brahma̍ṇe ca̱rum.
anu̍matyai ca̱rum.
tato̱ vai tasya̍ brahma̱ṇvān ya̱jño̍'bhavat.
anu̍ sva̱rgaṃ lo̱kama̍vindat.
bra̱hma̱ṇvān ha̱ vā a̍sya ya̱jño bha̍vati.
anu̍ sva̱rgaṃ lo̱kaṃ vi̍ndati.
ya e̱tena̍ ha̱viṣā̱ yaja̍te.
ya u̍ cainade̱vaṃ veda̍.
so'tra̍ juhoti.
a̱gnaye̱ kāmā̍ya̱ svāhā̱ brahma̍ṇe̱ svāhā̎.
anu̍matyai̱ svāhā̎ pra̱jāpa̍taye̱ svāhā̎.
sva̱rgāya̍ lo̱kāya̱ svāhā̱'gnaye̎ sviṣṭa̱kṛte̱ svāheti̍..5..

taṃ ya̱jño̎'bravīt.
prajā̍pate ya̱jñena̱ vai śrā̎myasi.
a̱hamu̱ vai ya̱jño̎'smi.
māṃ nu ya̍jasva.
atha̍ te sa̱tyo ya̱jño bha̍viṣyati.
anu̍ sva̱rgaṃ lo̱kaṃ ve̱thsyasīti̍.
sa e̱tama̱gnaye̱ kāmā̍ya puro̱ḍāśa̍ma̱ṣṭāka̍pāla̱ṃ nira̍vapat.
ya̱jñāya̍ ca̱rum.
anu̍matyai ca̱rum.
tato̱ vai tasya̍ sa̱tyo ya̱jño̍'bhavat.
anu̍ sva̱rgaṃ lo̱kama̍vindat.
sa̱tyo ha̱ vā a̍sya ya̱jño bha̍vati.
anu̍ sva̱rgaṃ lo̱kaṃ vi̍ndati.
ya e̱tena̍ ha̱viṣā̱ yaja̍te.
ya u̍ cainade̱vaṃ veda̍.
so'tra̍ juhoti.
a̱gnaye̱ kāmā̍ya̱ svāhā̍ ya̱jñāya̱ svāhā̎.
anu̍matyai̱ svāhā̎ pra̱jāpa̍taye̱ svāhā̎.
sva̱rgāya̍ lo̱kāya̱ svāhā̱'gnaye̎ sviṣṭa̱kṛte̱ svāheti̍..6..

tamāpo̎'bruvan.
prajā̍pate̱'phsu vai sarve̱ kāmā̎ḥ śri̱tāḥ.
va̱yamu̱ vā āpa̍ḥ smaḥ.
a̱smānnu ya̍jasva.
atha̱ tvayi̱ sarve̱ kāmā̎ḥ śrayiṣyante.
anu̍ sva̱rgaṃ lo̱kaṃ ve̱thsyasīti̍.
sa e̱tama̱gnaye̱ kāmā̍ya puro̱ḍāśa̍ma̱ṣṭāka̍pāla̱ṃ nira̍vapat.
a̱dbhyaśca̱rum.
anu̍matyai ca̱rum.
tato̱ vai tasmi̱nthsarve̱ kāmā̍ aśrayanta.
anu̍ sva̱rgaṃ lo̱kama̍vindat.
sarve̍ ha̱ vā a̍smi̱nkāmā̎ḥ śrayante.
anu̍ sva̱rgaṃ lo̱kaṃ vi̍ndati.
ya e̱tena̍ ha̱viṣā̱ yaja̍te.
ya u̍ cainade̱vaṃ veda̍.
so'tra̍ juhoti.
a̱gnaye̱ kāmā̍ya̱ svāhā̱'dbhyaḥ svāhā̎.
anu̍matyai̱ svāhā̎ pra̱jāpa̍taye̱ svāhā̎.
sva̱rgāya̍ lo̱kāya̱ svāhā̱'gnaye̎ sviṣṭa̱kṛte̱ svāheti̍..7..

tama̱gnirba̍li̱māna̍bravīt.
prajā̍pate̱'gnaye̱ vai ba̍li̱mate̱ sarvā̍ṇi bhū̱tāni̍ ba̱liṃ ha̍ranti.
a̱hamu̱ vā a̱gnirba̍li̱māna̍smi.
māṃ nu ya̍jasva.
atha̍ te̱ sarvā̍ṇi bhū̱tāni̍ ba̱liṃ ha̍riṣyanti.
anu̍ sva̱rgaṃ lo̱kaṃ ve̱thsyasīti̍.
sa e̱tama̱gnaye̱ kāmā̍ya puro̱ḍāśa̍ma̱ṣṭāka̍pāla̱ṃ nira̍vapat.
a̱gnaye̍ bali̱mate̍ ca̱rum.
anu̍matyai ca̱rum.
tato̱ vai tasmai̱ sarvā̍ṇi bhū̱tāni̍ ba̱lima̍haran.
anu̍ sva̱rgaṃ lo̱kama̍vindat.
sarvā̍ṇi ha̱ vā a̍smai bhū̱tāni̍ ba̱liṃ ha̍ranti.
anu̍ sva̱rgaṃ lo̱kaṃ vi̍ndati.
ya e̱tena̍ ha̱viṣā̱ yaja̍te.
ya u̍ cainade̱vaṃ veda̍.
so'tra̍ juhoti.
a̱gnaye̱ kāmā̍ya̱ svāhā̱'gnaye̍ bali̱mate̱ svāhā̎.
anu̍matyai̱ svāhā̎ pra̱jāpa̍taye̱ svāhā̎.
sva̱rgāya̍ lo̱kāya̱ svāhā̱'gnaye̎ sviṣṭa̱kṛte̱ svāheti̍..8..

tamanu̍vittirabravīt.
prajā̍pate sva̱rgaṃ vai lo̱kamanu̍vivithsasi.
a̱hamu̱ vā anu̍vittirasmi.
māṃ nu ya̍jasva.
atha̍ te sa̱tyā'nu̍vittirbhaviṣyati.
anu̍ sva̱rgaṃ lo̱kaṃ ve̱thsyasīti̍.
sa e̱tama̱gnaye̱ kāmā̍ya puro̱ḍāśa̍ma̱ṣṭāka̍pāla̱ṃ nira̍vapat.
anu̍vittyai ca̱rum.
anu̍matyai ca̱rum.
tato̱ vai tasya̍ sa̱tyā'nu̍vittirabhavat.
anu̍ sva̱rgaṃ lo̱kama̍vindat.
sa̱tyā ha̱ vā a̱syānu̍vittirbhavati.
anu̍ sva̱rgaṃ lo̱kaṃ vi̍ndati.
ya e̱tena̍ ha̱viṣā̱ yaja̍te.
ya u̍ cainade̱vaṃ veda̍.
so'tra̍ juhoti.
a̱gnaye̱ kāmā̍ya̱ svāhā'nu̍vittyai̱ svāhā̎.
anu̍matyai̱ svāhā̎ pra̱jāpa̍taye̱ svāhā̎.
sva̱rgāya̍ lo̱kāya̱ svāhā̱'gnaye̎ sviṣṭa̱kṛte̱ svāheti̍..9..

tā vā e̱tāḥ sa̱pta sva̱rgasya̍ lo̱kasya̱ dvāra̍ḥ.
di̱vaḥśye̍na̱yo'nu̍vittayo̱ nāma̍.
āśā̎ pratha̱māṃ ra̍kṣati.
kāmo̎ dvi̱tīyā̎m.
brahma̍ tṛ̱tīyā̎m.
ya̱jñaśca̍tu̱rthīm.
āpa̍ḥ pañca̱mīm.
a̱gnirba̍li̱mānthṣa̱ṣṭhīm.
anu̍vittiḥ sapta̱mīm.
anu̍ ha̱ vai sva̱rgaṃ lo̱kaṃ vi̍ndati.
kā̱ma̱cāro̎'sya sva̱rge lo̱ke bha̍vati.
ya e̱tābhi̱riṣṭi̍bhi̱ryaja̍te.
ya u̍ cainā e̱vaṃ veda̍.
tāsva̍nvi̱ṣṭi.
pa̱ṣṭhau̱hī̱va̱rāṃ da̍dyātka̱ṃsaṃ ca̍.
striyai̍ cā''bhā̱raṃ samṛ̍ddhyai..10..

Anuvāka 3

tapa̍sā de̱vā de̱vatā̱magra̍ āyan.
tapa̱sarṣa̍ya̱ḥ sva̍ranva̍vindan.
tapa̍sā sa̱patnā̱npraṇu̍dā̱mārā̍tīḥ.
yene̱daṃ viśva̱ṃ pari̍bhūta̱ṃ yadasti̍.
pra̱tha̱ma̱jaṃ de̱vaṃ ha̱viṣā̍ vidhema.
sva̱ya̱mbhu brahma̍ para̱maṃ tapo̱ yat.
sa e̱va pu̱traḥ sa pi̱tā sa mā̱tā.
tapo̍ ha ya̱kṣaṃ pra̍tha̱maṃ samba̍bhūva.
śra̱ddhayā de̍vo deva̱tvama̍śnute.
śra̱ddhā pra̍ti̱ṣṭhā lo̱kasya̍ de̱vī..11..

sā no̍ juṣā̱ṇopa̍ ya̱jñamāgā̎t.
kāma̍vathsā̱'mṛta̱ṃ duhā̍nā.
śra̱ddhā de̱vī pra̍thama̱jā ṛ̱tasya̍.
viśva̍sya bha̱rtrī jaga̍taḥ prati̱ṣṭhā.
tāṃ śra̱ddhāṃ ha̱viṣā̍ yajāmahe.
sā no̍ lo̱kama̱mṛta̍ṃ dadhātu.
īśā̍nā de̱vī bhuva̍na̱syādhi̍patnī.
āgā̎thsa̱tyaṃ ha̱viri̱daṃ ju̍ṣā̱ṇam.
yasmā̎dde̱vā ja̍jñire̱ bhuva̍naṃ ca̱ viśve̎.
tasmai̍ vidhema ha̱viṣā̍ ghṛ̱tena̍..12..

yathā̍ de̱vaiḥ sa̍dha̱māda̍ṃ madema.
yasya̍ prati̱ṣṭhorva̍ntari̍kṣam.
yasmā̎dde̱vā ja̍jñire̱ bhuva̍naṃ ca̱ sarve̎.
tathsa̱tyamarca̱dupa̍ ya̱jñaṃ na̱ āgā̎t.
brahmā''hu̍tī̱rupa̱moda̍mānam.
mana̍so̱ vaśe̱ sarva̍mi̱daṃ ba̍bhūva.
nānyasya̱ mano̱ vaśa̱manvi̍yāya.
bhī̱ṣmo hi de̱vaḥ saha̍sa̱ḥ sahī̍yān.
sa no̍ juṣā̱ṇa upa̍ ya̱jñamāgā̎t.
ākū̍tīnā̱madhi̍pati̱ṃ ceta̍sāṃ ca..13..

sa̱ṅka̱lpajū̍tiṃ de̱vaṃ vi̍pa̱ścim.
mano̱ rājā̍nami̱ha va̱rdhaya̍ntaḥ.
u̱pa̱ha̱ve̎'sya suma̱tau syā̍ma.
cara̍ṇaṃ pa̱vitra̱ṃ vita̍taṃ purā̱ṇam.
yena̍ pū̱tastara̍ti duṣkṛ̱tāni̍.
tena̍ pa̱vitre̍ṇa śu̱ddhena̍ pū̱tāḥ.
ati̍ pā̱pmāna̱marā̍tiṃ tarema.
lo̱kasya̱ dvāra̍marci̱matpa̱vitram̎.
jyoti̍ṣma̱dbhrāja̍māna̱ṃ maha̍svat.
a̱mṛta̍sya̱ dhārā̍ bahu̱dhā doha̍mānam.
cara̍ṇaṃ no lo̱ke sudhi̍tāṃ dadhātu.
a̱gnirmū̱rdhā bhuva̍ḥ.
anu̍ no̱'dyānu̍mati̱ranvida̍numate̱ tvam.
ha̱vya̱vāha̱ṃ svi̍ṣṭam..14..

Anuvāka 4

de̱vebhyo̱ vai sva̱rgo lo̱kasti̱ro̍'bhavat.
te pra̱jāpa̍timabruvan.
prajā̍pate sva̱rgo vai no̍ lo̱kasti̱ro̍'bhūt.
tamanvi̱ccheti̍.
taṃ ya̍jñakra̱tubhi̱ranvai̎cchat.
taṃ ya̍jñakra̱tubhi̱rnānva̍vindat.
tamiṣṭibhi̱ranvai̎cchat.
tamiṣṭi̍bhi̱ranva̍vindat.
tadiṣṭī̍nāmiṣṭi̱tvam.
eṣṭa̍yo ha̱ vai nāma̍.
tā iṣṭa̍ya̱ ityāca̍kṣate pa̱rokṣe̍ṇa.
pa̱rokṣa̍priyā iva̱ hi de̱vāḥ..15..

taṃ tapo̎'bravīt.
prajā̍pate̱ tapa̍sā̱ vai śrā̎myasi.
a̱hamu̱ vai tapo̎'smi.
māṃ nu ya̍jasva.
atha̍ te sa̱tyaṃ tapo̍ bhaviṣyati.
anu̍ sva̱rgaṃ lo̱kaṃ ve̱thsyasīti̍.
sa e̱tamā̎gne̱yama̱ṣṭāka̍pāla̱ṃ nira̍vapat.
tapa̍se ca̱rum.
anu̍matyai ca̱rum.
tato̱ vai tasya̍ sa̱tyaṃ tapo̍'bhavat.
anu̍ sva̱rgaṃ lo̱kama̍vindat.
sa̱tyaṃ ha̱ vā a̍sya̱ tapo̍ bhavati.
anu̍ sva̱rgaṃ lo̱kaṃ vi̍ndati.
ya e̱tena̍ ha̱viṣā̱ yaja̍te.
ya u̍ cainade̱vaṃ veda̍.
so'tra̍ juhoti.
a̱gnaye̱ svāhā̱ tapa̍se̱ svāhā̎.
anu̍matyai̱ svāhā̎ pra̱jāpa̍taye̱ svāhā̎.
sva̱rgāya̍ lo̱kāya̱ svāhā̱'gnaye̎ sviṣṭa̱kṛte̱ svāheti̍..16..

taṃ śra̱ddhā'bra̍vīt.
prajā̍pate śra̱ddhayā̱ vai śrā̎myasi.
a̱hamu̱ vai śra̱ddhā'smi̍.
māṃ nu ya̍jasva.
atha̍ te sa̱tyā śra̱ddhā bha̍viṣyati.
anu̍ sva̱rgaṃ lo̱kaṃ ve̱thsyasīti̍.
sa e̱tamā̎gne̱yama̱ṣṭāka̍pāla̱ṃ nira̍vapat.
śra̱ddhāyai̍ ca̱rum.
anu̍matyai ca̱rum.
tato̱ vai tasya̍ sa̱tyā śra̱ddhā'bha̍vat.
anu̍ sva̱rgaṃ lo̱kama̍vindat.
sa̱tyā ha̱ vā a̍sya śra̱ddhā bha̍vati.
anu̍ sva̱rgaṃ lo̱kaṃ vi̍ndati.
ya e̱tena̍ ha̱viṣā̱ yaja̍te.
ya u̍ cainade̱vaṃ veda̍.
so'tra̍ juhoti.
a̱gnaye̱ svāhā̎ śra̱ddhāyai̱ svāhā̎.
anu̍matyai̱ svāhā̎ pra̱jāpa̍taye̱ svāhā̎.
sva̱rgāya̍ lo̱kāya̱ svāhā̱'gnaye̎ sviṣṭa̱kṛte̱ svāheti̍..17..

taṃ sa̱tyama̍bravīt.
prajā̍pate sa̱tyena̱ vai śrā̎myasi.
a̱hamu̱ vai sa̱tyama̍smi.
māṃ nu ya̍jasva.
atha̍ te sa̱tyaṃ sa̱tyaṃ bha̍viṣyati.
anu̍ sva̱rgaṃ lo̱kaṃ ve̱thsyasīti̍.
sa e̱tamā̎gne̱yama̱ṣṭāka̍pāla̱ṃ nira̍vapat.
sa̱tyāya̍ ca̱rum.
anu̍matyai ca̱rum.
tato̱ vai tasya̍ sa̱tyaṃ sa̱tyama̍bhavat.
anu̍ sva̱rgaṃ lo̱kama̍vindat.
satyaṃ ha̱ vā a̍sya sa̱tyaṃ bha̍vati.
anu̍ sva̱rgaṃ lo̱kaṃ vi̍ndati.
ya e̱tena̍ ha̱viṣā̱ yaja̍te.
ya u̍ cainade̱vaṃ veda̍.
so'tra̍ juhoti.
a̱gnaye̱ svāhā̍ sa̱tyāya̱ svāhā̎.
anu̍matyai̱ svāhā̎ pra̱jāpa̍taye̱ svāhā̎.
sva̱rgāya̍ lo̱kāya̱ svāhā̱'gnaye̎ sviṣṭa̱kṛte̱ svāheti̍..18..

taṃ mano̎'bravīt.
prajā̍pate̱ mana̍sā̱ vai śrā̎myasi.
a̱hamu̱ vai mano̎'smi.
māṃ nu ya̍jasva.
atha̍ te sa̱tyaṃ mano̍ bhaviṣyati.
anu̍ sva̱rgaṃ lo̱kaṃ ve̱thsyasīti̍.
sa e̱tamā̎gne̱yama̱ṣṭāka̍pāla̱ṃ nira̍vapat.
mana̍se ca̱rum.
anu̍matyai ca̱rum.
tato̱ vai tasya̍ sa̱tyaṃ mano̍'bhavat.
anu̍ sva̱rgaṃ lo̱kama̍vindat.
sa̱tyaṃ ha̱ vā a̍sya̱ mano̍ bhavati.
anu̍ sva̱rgaṃ lo̱kaṃ vi̍ndati.
ya e̱tena̍ ha̱viṣā̱ yaja̍te.
ya u̍ cainade̱vaṃ veda̍.
so'tra̍ juhoti.
a̱gnaye̱ svāhā̱ mana̍se̱ svāhā̎.
anu̍matyai̱ svāhā̎ pra̱jāpa̍taye̱ svāhā̎.
sva̱rgāya̍ lo̱kāya̱ svāhā̱'gnaye̎ sviṣṭa̱kṛte̱ svāheti̍..19..

taṃ cara̍ṇamabravīt.
prajā̍pate̱ cara̍ṇena̱ vai śrā̎myasi.
a̱hamu̱ vai cara̍ṇamasmi.
māṃ nu ya̍jasva.
atha̍ te sa̱tyaṃ cara̍ṇaṃ bhaviṣyati.
anu̍ sva̱rgaṃ lo̱kaṃ ve̱thsyasīti̍.
sa e̱tamā̎gne̱yama̱ṣṭāka̍pāla̱ṃ nira̍vapat.
cara̍ṇāya ca̱rum.
anu̍matyai ca̱rum.
tato̱ vai tasya̍ sa̱tyaṃ cara̍ṇamabhavat.
anu̍ sva̱rgaṃ lo̱kama̍vindat.
sa̱tyaṃ ha̱ vā a̍sya̱ cara̍ṇaṃ bhavati.
anu̍ sva̱rgaṃ lo̱kaṃ vi̍ndati.
ya e̱tena̍ ha̱viṣā̱ yaja̍te.
ya u̍ cainade̱vaṃ veda̍.
so'tra̍ juhoti.
a̱gnaye̱ svāhā̱ cara̍ṇāya̱ svāhā̎.
anu̍matyai̱ svāhā̎ pra̱jāpa̍ta̱ye svāhā̎.
sva̱rgāya̍ lo̱kāya̱ svāhā̱'gnaye̎ sviṣṭa̱kṛte̱ svāheti̍..20..

tā vā e̱tāḥ pañca̍ sva̱rgasya̍ lo̱kasya̱ dvāra̍ḥ.
apā̍ghā̱ anu̍vittayo̱ nāma̍.
tapa̍ḥ pratha̱māṃ ra̍kṣati.
śra̱ddhā dvi̱tīyā̎m.
sa̱tyaṃ tṛ̱tīyā̎m.
mana̍ścatu̱rthīm.
cara̍ṇaṃ pañca̱mīm.
anu̍ ha̱ vai sva̱rgaṃ lo̱kaṃ vi̍ndati.
kā̱ma̱cāro̎'sya sva̱rge lo̱ke bha̍vati.
ya e̱tābhi̱riṣṭi̍bhi̱ryaja̍te.
ya u̍ cainā e̱vaṃ veda̍.
tāsva̍nvi̱ṣṭi.
pa̱ṣṭhau̱hī̱va̱rāṃ da̍dyātka̱ṃsaṃ ca̍.
striyai̍ cā''bhā̱raṃ samṛ̍ddhyai..21..

Anuvāka 5

brahma̱ vai catu̍rhotāraḥ.
catu̍rhotṛ̱bhyo'dhi̍ya̱jño nirmi̍taḥ.
naina̍ṃ śa̱ptam.
nābhica̍rita̱māga̍cchati.
ya e̱vaṃ veda̍.
yo ha̱ vai catu̍rhotṛṇāṃ caturhotṛ̱tvaṃ veda̍.
atho̱ pañca̍hotṛtvam.
sarvā̍ hāsmai̱ diśa̍ḥ kalpante.
vā̱caspati̱ṟhotā̱ daśa̍hotṝṇām.
pṛ̱thi̱vī hotā̱ catu̍rhotṝṇām..22..

a̱gnirhotā̱ pañca̍hotṝṇām.
vāgghotā̱ ṣaḍḍho̍tṝṇām.
ma̱hāha̍vi̱ṟhotā̍ sa̱ptaho̍tṝṇām.
e̱tadvai catu̍rhotṛṇāṃ caturhotṛ̱tvam.
atho̱ pañca̍hotṛtvam.
sarvā̍ hāsmai̱ diśa̍ḥ kalpante.
ya e̱vaṃ veda̍.
e̱ṣā vai sa̍rvavi̱dyā.
e̱tadbhe̍ṣa̱jam.
e̱ṣā pa̱ṅktiḥ sva̱rgasya̍ lo̱kasyā̎ñja̱sā'ya̍niḥ sru̱tiḥ..23..

e̱tān yo'dhyaityacha̍dirda̱ṟśe yāva̍tta̱rasam̎.
sva̍reti.
a̱na̱pa̱bra̱vaḥ sarva̱māyu̍reti.
vi̱ndate̎ pra̱jām.
rā̱yaspoṣa̍ṃ gaupa̱tyam.
bra̱hma̱va̱rca̱sī bha̍vati.
e̱tān yo'dhyaiti̍.
spṛ̱ṇotyā̱tmānam̎.
pra̱jāṃ pi̱tṝn.
e̱tān vā a̍ru̱ṇa au̍pave̱śirvi̱dāṃ ca̍kāra..24..

e̱taira̍dhivā̱damapā̍jayat.
atho̱ viśva̍ṃ pā̱pmānam̎.
sva̍ryayau.
e̱tānyo'dhyaiti̍.
a̱dhi̱vā̱daṃ ja̍yati.
atho̱ viśva̍ṃ pā̱pmānam̎.
sva̍reti.
e̱taira̱gniṃ ci̍nvīta sva̱rgakā̍maḥ.
e̱tairāyu̍ṣkāmaḥ.
pra̱jāpa̱śukā̍mo vā..25..{kā̍}
pu̱rastā̱ddaśa̍hotāra̱muda̍ñca̱mupa̍dadhāti yāvatpa̱dam.
hṛda̍ya̱ṃ yaju̍ṣī̱ patnyau̍ ca.
da̱kṣi̱ṇa̱taḥ prāñca̱ṃ catu̍rhotāram.
pa̱ścāduda̍ñca̱ṃ pañca̍hotāram.
u̱tta̱ra̱taḥ prāñca̱ṃ ṣaḍḍho̍tāram.
u̱pari̍ṣṭā̱tprāñca̍ṃ sa̱ptaho̍tāram.
hṛda̍ya̱ṃ yajū̍ṃṣi̱ patnya̍śca.
ya̱thā̱'̱va̱kā̱śaṃ grahān̍.
ya̱thā̱'̱va̱kā̱śaṃ pra̍tigra̱hām̐llo̍kaṃ pṛ̱ṇāśca̍.
sarvā̍ hāsyai̱tā de̱vatā̎ḥ prī̱tā a̱bhīṣṭā̍ bhavanti..26..

sade̍vama̱gniṃ ci̍nute.
ra̱thasa̍mmitaśceta̱vya̍ḥ.
vajro̱ vai ratha̍ḥ.
vajre̍ṇai̱va pā̱pmāna̱ṃ bhrātṛ̍vyaṃ stṛṇute.
pa̱kṣaḥ sa̍mmitaśceta̱vya̍ḥ.
e̱tāvā̱n vai ratha̍ḥ.
yāva̍tpa̱kṣaḥ.
ra̱thasa̍mmitame̱va ci̍nute.
i̱mame̱va lo̱kaṃ pa̍śuba̱ndhenā̱bhija̍yati.
atho̍ agniṣṭo̱mena̍..27..

a̱ntari̍kṣamu̱kthye̍na.
sva̍ratirā̱treṇa̍.
sarvā̎m̐llo̱kāna̍hī̱nena̍.
atho̍ sa̱treṇa̍.
varo̱ dakṣi̍ṇā.
vare̍ṇai̱va vara̍ṃ spṛṇoti.
ā̱tmā hi vara̍ḥ.
eka̍viṃśati̱rdakṣi̍ṇā dadāti.
e̱ka̱vi̱ṃśo vā i̱taḥ sva̱rgo lo̱kaḥ.
pra sva̱rgaṃ lo̱kamā̎pnoti..28..

a̱sāvā̍di̱tya e̍kavi̱ṃśaḥ.
a̱mume̱vā''di̱tyamā̎pnoti.
śa̱taṃ dadā̍ti.
śa̱tāyu̱ḥ puru̍ṣaḥ śa̱tendri̍yaḥ.
āyu̍ṣye̱vendri̱ye prati̍tiṣṭhati.
sa̱hasra̍ṃ dadāti.
sa̱hasra̍sammitaḥ sva̱rgo lo̱kaḥ.
sva̱rgasya̍ lo̱kasyā̱bhiji̍tyai.
a̱nvi̱ṣṭa̱kaṃ dakṣi̍ṇā dadāti.
sarvā̍ṇi̱ vayā̍ṃsi..29..

sarva̱syā''ptyai̎.
sarva̱syāva̍ruddhyai.
yadi̱ na vi̱ndeta̍.
ma̱nthāne̍tāva̱to da̍dyādoda̱nān vā̎.
a̱śnu̱te taṃ kāmam̎.
yasmai̱ kāmā̍yā̱gniścī̱yate̎.
pa̱ṣṭhau̱hīṃ tva̱ntarva̍tīṃ dadyāt.
sā hi sarvā̍ṇi̱ vayā̍ṃsi.
sarva̱syā''ptyai̎.
sarva̱syāva̍ruddhyai..30..

hira̍ṇyaṃ dadāti.
hira̍ṇyajyotire̱va sva̱rgaṃ lo̱kame̍ti.
vāso̍ dadāti.
tenā''yu̱ḥ prati̍rate.
ve̱di̱tṛ̱tī̱ye ya̍jeta.
triṣa̍tyā̱ hi de̱vāḥ.
sa sa̍tyama̱gniṃ ci̍nute.
tade̱tatpa̍śuba̱ndhe brāhma̍ṇaṃ brūyāt.
neta̍reṣu ya̱jñeṣu̍.
yo ha̱ vai catu̍rhotṝnanusava̱naṃ ta̍rpayita̱vyān̍ veda̍..31..

tṛpya̍ti pra̱jayā̍ pa̱śubhi̍ḥ.
upai̍naṃ somapī̱tho na̍mati.
e̱te vai catu̍rhotāro'nusava̱naṃ ta̍rpayita̱vyā̎ḥ.
ye brā̎hma̱ṇā ba̍hu̱vida̍ḥ.
tebhyo̱ yaddakṣi̍ṇā̱ na naye̎t.
duri̍ṣṭaṃ syāt.
a̱gnima̍sya vṛñjīran.
tebhyo̍ yathāśra̱ddhaṃ da̍dyāt.
svi̍ṣṭame̱vaitatkri̍yate.
nāsyā̱gniṃ vṛ̍ñjate..32..

hi̱ra̱ṇye̱ṣṭako bha̍vati.
yāva̍dutta̱mama̍ṅgulikā̱ṇḍaṃ ya̍jñapa̱ruṣā̱ sammi̍tam.
tejo̱ hira̍ṇyam.
yadi̱ hira̍ṇya̱ṃ na vi̱ndet.
śarka̍rā a̱ktā upa̍dadhyāt.
tejo̍ ghṛ̱tam.
sate̍jasame̱vāgniṃ ci̍nute.
a̱gniṃ ci̱tvā sau̎trāma̱ṇyā ya̍jeta maitrāvaru̱ṇyā vā̎.
vī̱rye̍ṇa̱ vā e̱ṣa vyṛ̍dhyate.
yo̎'gniṃ ci̍nu̱te..33..

yāva̍de̱va vī̱ryam̎.
tada̍smindadhāti.
brahma̍ṇa̱ḥ sāyu̍jyaṃ salo̱katā̍māpnoti.
e̱tāsā̍me̱va de̱vatā̍nā̱ṃ sāyu̍jyam.
sā̱rṣṭitā̍ṃ samānalo̱katā̍māpnoti.
ya e̱tama̱gniṃ ci̍nu̱te.
ya u̍ cainame̱vaṃ veda̍.
e̱tade̱va sā̍vi̱tre brāhma̍ṇam.
atho̍ nācike̱te..34..

Anuvāka 6

yaccā̱mṛta̱ṃ yacca̱ martyam̎.
yacca̱ prāṇi̍ti̱ yacca̱ na.
sarvā̱stā iṣṭa̍kāḥ kṛ̱tvā.
upa̍ kāma̱dughā̍ dadhe.
tenarṣi̍ṇā̱ tena̱ brahma̍ṇā.
tayā̍ de̱vata̍yā'ṅgira̱svaddhru̱vā sī̍da.
sarvā̱ḥ striya̱ḥ sarvā̎npu̱ṃsaḥ.
sarva̱ṃ na strī̍pumaṃ ca̱ yat.
sarvā̱stāḥ.
yāva̍ntaḥ pā̱ṃsavo̱ bhūme̎ḥ..35..

saṅkhyā̍tā devamā̱yayā̎.
sarvā̱stāḥ.
yāva̍nta̱ ūṣā̎ḥ paśū̱nām.
pṛ̱thi̱vyāṃ puṣṭi̍rhi̱tāḥ.
sarvā̱stāḥ.
yāva̍tī̱ḥ sika̍tā̱ḥ sarvā̎ḥ.
a̱phsva̍ntaśca̱ yāḥ śri̱tāḥ.
sarvā̱stāḥ.
yāva̍tī̱ḥ śarka̍rā̱ dhṛtyai̎.
a̱syāṃ pṛ̍thi̱vyāmadhi̍..36..

sarvā̱stāḥ.
yāva̱nto'śmā̍no̱'syāṃ pṛ̍thi̱vyām.
pra̱ti̱ṣṭhāsu̱ prati̍ṣṭhitāḥ.
sarvā̱stāḥ.
yāva̍tīrvī̱rudha̱ḥ sarvā̎ḥ.
viṣṭhi̍tāḥ pṛthi̱vīmanu̍.
sarvā̱stāḥ.
yāva̍tī̱roṣa̍dhī̱ḥ sarvā̎ḥ.
viṣṭhi̍tāḥ pṛthi̱vīmanu̍.
sarvā̱stāḥ..37..

yāva̍nto̱ vana̱spata̍yaḥ.
a̱syāṃ pṛ̍thi̱vyāmadhi̍.
sarvā̱stāḥ.
yāva̍nto grā̱myāḥ pa̱śava̱ḥ sarve̎.
ā̱ra̱ṇyāśca̱ ye.
sarvā̱stāḥ.
ye dvi̱pāda̱ścatu̍ṣpādaḥ.
a̱pāda̍ udarasa̱rpiṇa̍ḥ.
sarvā̱stāḥ.
yāva̱dāñja̍namu̱cyate̎..38..

de̱va̱trā yacca̍ mānu̱ṣam.
sarvā̱stāḥ.
yāva̍tkṛ̱ṣṇāya̍sa̱ṃ sarvam̎.
de̱va̱trā yacca̍ mānu̱ṣam.
sarvā̱stāḥ.
yāva̍llo̱hāya̍sa̱ṃ sarvam̎.
de̱va̱trā yacca̍ mānu̱ṣam.
sarvā̱stāḥ.
sarva̱ṃ sīsa̱ṃ sarva̱ṃ trapu̍.
de̱va̱trā yacca̍ mānu̱ṣam..39..

sarvā̱stāḥ.
sarva̱ṃ hira̍ṇyaṃ raja̱tam.
de̱va̱trā yacca̍ mānu̱ṣam.
sarvā̱stāḥ.
sarva̱ṃ suva̍rṇa̱ṃ hari̍tam.
de̱va̱trā yacca̍ mānu̱ṣam.
sarvā̱stā iṣṭa̍kāḥ kṛ̱tvā.
upa̍ kāma̱dughā̍ dadhe.
tenarṣi̍ṇā̱ tena̱ brahma̍ṇā.
tayā̍ de̱vata̍yā'ṅgira̱svaddhru̱vā sī̍da..40..

Anuvāka 7

sarvā̱ diśo̍ di̱kṣu.
yaccā̱ntarbhū̱taṃ prati̍ṣṭhitam.
sarvā̱stā iṣṭa̍kāḥ kṛ̱tvā.
upa̍ kāma̱dughā̍ dadhe.
tenarṣi̍ṇā̱ tena̱ brahma̍ṇā.
tayā̍ de̱vata̍yā'ṅgira̱svaddhru̱vā sī̍da.
a̱ntari̍kṣaṃ ca̱ keva̍lam.
yaccā̱sminna̍nta̱rāhi̍tam.
sarvā̱stāḥ.
ā̱nta̱ri̱kṣya̍śca̱ yāḥ pra̱jāḥ..41..

ga̱ndha̱rvā̱phsa̱rasa̍śca̱ ye.
sarvā̱stāḥ.
sarvā̍nudā̱rānthsa̱lilān̍.
a̱ntari̍kṣe̱ prati̍ṣṭhitān.
sarvā̱stāḥ.
sarvā̍nudā̱rānthsa̍li̱lān.
sthā̱va̱rāḥ pro̱ṣyā̎śca̱ ye.
sarvā̱stāḥ.
sarvā̱ṃ dhuni̱ṃ sarvā̎ndhva̱ṃsān.
hi̱mo yacca̍ śī̱yate̎..42..

sarvā̱stāḥ.
sarvā̱nmarī̍cī̱ṉ vita̍tān.
nī̱hā̱ro yacca̍ śī̱yate̎.
sarvā̱stāḥ.
sarvā̍ vi̱dyuta̱ḥ sarvā̎nthstanayi̱tnūn.
hrā̱dunī̱ryacca̍ śī̱yate̎.
sarvā̱stāḥ.
sarvā̱ḥ srava̍ntīḥ sa̱rita̍ḥ.
sarva̍maphsuca̱raṃ ca̱ yat.
sarvā̱stāḥ..43..

yāśca̱ kūpyā̱ yāśca̍ nā̱dyā̎ḥ samu̱driyā̎ḥ.
yāśca̍ vaiśa̱ntīru̱ta prā̍sa̱cīryāḥ.
sarvā̱stāḥ.
ye co̱ttiṣṭha̍nti jī̱mūtā̎ḥ.
yāśca̱ varṣa̍nti vṛ̱ṣṭaya̍ḥ.
sarvā̱stāḥ.
tapa̱steja̍ ākā̱śam.
yaccā̍''kā̱śe prati̍ṣṭhitam.
sarvā̱stāḥ.
vā̱yuṃ vayā̍ṃsi̱ sarvā̍ṇi..44..

a̱nta̱ri̱kṣa̱ca̱raṃ ca̱ yat.
sarvā̱stāḥ.
a̱gniṃ sūrya̍ṃ ca̱ndram.
mi̱traṃ varu̍ṇa̱ṃ bhagam̎.
sarvā̱stāḥ.
sa̱tyaṃ śra̱ddhāṃ tapo̱ damam̎.
nāma̍ rū̱paṃ ca̍ bhū̱tānā̎m.
sarvā̱stā iṣṭa̍kāḥ kṛ̱tvā.
upa̍ kāma̱dughā̍ dadhe.
tenarṣi̍ṇā̱ tena̱ brahma̍ṇā.
tayā̍ de̱vata̍yā'ṅgira̱svaddhru̱vā sī̍da..45..

Anuvāka 8

sarvā̱ndiva̱ṃ sarvā̎nde̱vāndi̱vi.
yaccā̱ntarbhū̱taṃ prati̍ṣṭhitam.
sarvā̱stā iṣṭa̍kāḥ kṛ̱tvā.
upa̍ kāma̱dughā̍ dadhe.
tenarṣi̍ṇā̱ tena̱ brahma̍ṇā.
tayā̍ de̱vata̍yā'ṅgira̱svaddhru̱vā sī̍da.
yāva̍tī̱stāra̍kā̱ḥ sarvā̎ḥ.
vita̍tā roca̱ne di̱vi.
sarvā̱stāḥ.
ṛco̱ yajū̍ṃṣi̱ sāmā̍ni..46..

a̱tha̱rvā̱ṅgi̱rasa̍śca̱ ye.
sarvā̱stāḥ.
i̱ti̱hā̱sa̱pu̱rā̱ṇaṃ ca̍.
sa̱rpa̱de̱va̱ja̱nāśca̱ ye.
sarvā̱stāḥ.
ye ca̍ lo̱kā ye cā̍lo̱kāḥ.
a̱ntarbhū̱taṃ prati̍ṣṭhitam.
sarvā̱stāḥ.
yacca̱ brahma̱ yaccā̎bra̱hma.
a̱ntarbra̱hmanprati̍ṣṭhitam..47..

sarvā̱stāḥ.
a̱ho̱rā̱trāṇi̱ sarvā̍ṇi.
a̱rdha̱mā̱sāṃśca̱ keva̍lān.
sarvā̱stāḥ.
sarvā̍nṛ̱tūnthsarvā̎nmā̱sān.
sa̱ṃva̱thsa̱raṃ ca̱ keva̍lam.
sarvā̱stāḥ.
sarva̱ṃ bhūta̱ṃ sarva̱ṃ bhavyam̎.
yaccā̱to'dhi̍bhavi̱ṣyati̍.
sarvā̱stā iṣṭa̍kāḥ kṛ̱tvā.
upa̍ kāma̱dughā̍ dadhe.
tenarṣi̍ṇā̱ tena̱ brahma̍ṇā.
tayā̍ de̱vata̍yā'ṅgira̱svaddhru̱vā sī̍da..48..

Anuvāka 9

ṛ̱cāṃ prācī̍ maha̱tī digu̍cyate.
dakṣi̍ṇāmāhu̱ryaju̍ṣāmapā̱rām.
atha̍rvaṇā̱maṅgi̍rasāṃ pra̱tīcī̎.
sāmnā̱mudī̍cī maha̱tī digu̍cyate.
ṛ̱gbhiḥ pū̎rvā̱hṇe di̱vi de̱va ī̍yate.
ya̱ju̱rve̱de ti̍ṣṭhati̱ madhye̱ ahna̍ḥ.
sā̱ma̱ve̱denā̎'stama̱ye mahī̍yate.
vedai̱raśū̎nyastri̱bhire̍ti̱ sūrya̍ḥ.
ṛ̱gbhyo jā̱tāṃ sa̍rva̱śo mūrti̍māhuḥ.
sarvā̱ gati̍ryāju̱ṣī hai̱va śaśva̍t..49..

sarva̱ṃ teja̍ḥ sāmarū̱pyaṃ ha̍ śaśvat.
sarva̍ṃ he̱daṃ brahma̍ṇā hai̱va sṛ̱ṣṭam.
ṛ̱gbhyo jā̱taṃ vaiśya̱ṃ varṇa̍māhuḥ.
ya̱ju̱rve̱daṃ kṣa̍tri̱yasyā̍''hu̱ryonim̎.
sā̱ma̱ve̱do brā̎hma̱ṇānā̱ṃ prasū̍tiḥ.
pūrve̱ pūrve̎bhyo̱ vaca̍ e̱tadū̍cuḥ.
ā̱da̱rśama̱gniṃ ci̍nvā̱nāḥ.
pūrve̍ viśva̱sṛjo̱'mṛtā̎ḥ.
śa̱taṃ va̍rṣasaha̱srāṇi̍.
dī̱kṣi̱tāḥ sa̱tramā̍sata..50..

tapa̍ āsīdgṛ̱hapa̍tiḥ.
brahma̍ bra̱hmā'bha̍vathsva̱yam.
sa̱tyaṃ ha̱ hotai̍ṣā̱māsī̎t.
yadvi̍śva̱sṛja̱ āsa̍ta.
a̱mṛta̍mebhya̱ uda̍gāyat.
sa̱hasra̍ṃ parivathsa̱rān.
bhū̱taṃ ha̍ prasto̱taiṣā̱māsī̎t.
bha̱vi̱ṣyatprati̍ cāharat.
prā̱ṇo a̍dhva̱ryura̍bhavat.
i̱daṃ sarva̱ṃ siṣā̍satām..51..

a̱pā̱no vi̱dvānā̱vṛta̍ḥ.
prati̱prāti̍ṣṭhadadhva̱re.
ā̱rta̱vā u̍pagā̱tāra̍ḥ.
sa̱da̱syā̍ ṛ̱tavo̍'bhavan.
a̱rdha̱mā̱sāśca̱ māsā̎śca.
ca̱ma̱sā̱dhva̱rya̱vo'bha̍van.
a̱śa̍ṃsa̱dbrahma̍ṇa̱steja̍ḥ.
a̱cchā̱vā̱ko'bha̍va̱dyaśa̍ḥ.
ṛ̱tame̍ṣāṃ praśā̱stā''sī̎t.
yadvi̍śva̱sṛja̱ āsa̍ta..52..

ūrgrājā̍na̱muda̍vahat.
dhru̱va̱go̱paḥ saho̍'bhavat.
ojo̱'bhya̍ṣṭau̱dgrāvṇṇa̍ḥ.
yadvi̍śva̱sṛja̱ āsa̍ta.
apa̍citiḥ po̱trīyā̍mayajat.
ne̱ṣṭrīyā̍mayaja̱ttviṣi̍ḥ.
āgnī̎ddhrādvi̱duṣī̍ sa̱tyam.
śra̱ddhā hai̱vāya̍jathsva̱yam.
irā̱ patnī̍ viśva̱sṛjā̎m.
ākū̍tirapinaḍḍha̱viḥ..53..

i̱dhmaṃ ha̱ kṣuccai̎bhya u̱gre.
tṛ̱ṣṇā cā''va̍hatāmu̱bhe.
vāge̍ṣāṃ subrahma̱ṇyā''sī̎t.
cha̱ndo̱yo̱gān vi̍jāna̱tī.
ka̱lpa̱ta̱ntrāṇi̍ tanvā̱nā'ha̍ḥ.
sa̱ṃsthāśca̍ sarva̱śaḥ.
a̱ho̱rā̱tre pa̍śupā̱lyau.
mu̱hū̱rtāḥ pre̱ṣyā̍ abhavan.
mṛ̱tyustada̍bhavaddhā̱tā.
śa̱mi̱togro vi̱śāṃ pati̍ḥ..54..

vi̱śva̱sṛja̍ḥ pratha̱māḥ sa̱tramā̍sata.
sa̱hasra̍sama̱ṃ prasu̍tena̱ yanta̍ḥ.
tato̍ ha jajñe̱ bhuva̍nasya go̱pāḥ.
hi̱ra̱ṇmaya̍ḥ śa̱kuni̱rbrahma̱ nāma̍.
yena̱ sūrya̱stapa̍ti̱ teja̍se̱ddhaḥ.
pi̱tā pu̱treṇa̍ pitṛ̱mān yoni̍yonau.
nāve̍davinmanute̱ taṃ bṛ̱hantam̎.
sa̱rvā̱nu̱bhumā̱tmāna̍ṃ samparā̱ye.
e̱ṣa ni̱tyo ma̍hi̱mā brā̎hma̱ṇasya̍.
na karma̍ṇā vardhate̱ no kanī̍yān..55..

tasyai̱vā''tmā pa̍da̱vittaṃ vi̍ditvā.
na karma̍ṇā lipyate̱ pāpa̍kena.
pañca̍pañcā̱śata̍stri̱vṛta̍ḥ saṃvathsa̱rāḥ.
pañca̍pañcā̱śata̍ḥ pañcada̱śāḥ.
pañca̍pañcā̱śata̍ḥ saptada̱śāḥ.
pañca̍pañcā̱śata̍ ekavi̱ṃśāḥ.
vi̱śva̱sṛjā̍ṃ sa̱hasra̍saṃvathsaram.
e̱tena̱ vai vi̍śva̱sṛja̍ i̱daṃ viśva̍masṛjanta.
yadviśva̱masṛ̍janta.
tasmā̎dviśva̱sṛja̍ḥ.
viśva̍menā̱nanu̱ prajā̍yate.
brahma̍ṇa̱ḥ sāyu̍jyaṃ salo̱katā̎ṃ yanti.
e̱tāsā̍me̱va de̱vatā̍nā̱ṃ sāyu̍jyam.
sā̱rṣṭitā̍ṃ samānalo̱katā̎ṃ yanti.
ya e̱tadu̍pa̱yanti̍.
ye cai̍na̱tprāhu̍ḥ.
yebhya̍ścaina̱tprāhu̍ḥ..56..

oṃ..

Anuvāka 10

{center}