gaṇeśapurāṇam, upāsanākhaṇḍaḥ, adhyāyaḥ 13
śrīgaṇeśāya namaḥ
brahmaviṣṇumaheśvarā ūcuḥ
ajaṃ nirvikalpaṃ nirākāramekaṃ
nirālambamadvaitamānandapūrṇam |
paraṃ nirguṇaṃ nirviśeṣaṃ nirīhaṃ
paraṃ brahmarūpaṃ gaṇeśaṃ bhajema ||
||1||guṇātītamādyaṃ cidānandarūpaṃ
cidābhāsakaṃ sarvagaṃ jñānagamyam |
munidhyeyamākāśarūpaṃ pareśaṃ
paraṃ brahmarūpaṃ gaṇeśaṃ bhajema ||
||2||jagatkāraṇaṃ kāraṇājñānahīnaṃ
surādiṃ sukhādiṃ yugādiṃ gaṇeśam |
jagadvyāpinaṃ viśvavandyaṃ sureśaṃ
paraṃ brahmarūpaṃ gaṇeśaṃ bhajema ||
||3||rajoyogato brahmarūpaṃ śrutijñaṃ
sadā kāryasaktaṃ hṛdā'cintyarūpam |
jagatkārakaṃ sarvavidyānidhānaṃ
sadā brahmarūpaṃ gaṇeśaṃ natāḥ smaḥ ||
||4||sadā sattvayogaṃ mudā krīḍamānaṃ
surārīn harantaṃ jagatpālayantam |
anekāvatāraṃ nijājñānahāraṃ
sadā viṣṇurūpaṃ gaṇeśaṃ natāḥ smaḥ ||
||5||tamoyoginaṃ rudrarūpaṃ trinetraṃ
jagaddhārakaṃ tārakaṃ jñānahetum |
anekāgamaiḥ svaṃ janaṃ bodhayantaṃ
sadā śarvarūpaṃ gaṇeśaṃ natāḥ smaḥ ||
||6||tamaḥstomahāraṃ janājñānahāraṃ
trayīvedasāraṃ parabrahmapāram |
munijñānakāraṃ vidūre vikāraṃ
sadā bradhnarūpaṃ gaṇeśaṃ natāḥ smaḥ ||
||7||nijairauṣadhaistarpayantaṃ karaughaiḥ
suraughān kalābhiḥ sudhāsrāviṇībhiḥ |
dineśāṃśusantāpahāraṃ dvijeśaṃ
śaśāṅkasvarūpaṃ gaṇeśaṃ natāḥ smaḥ ||
||8||prakāśasvarūpaṃ nabhovāyurūpaṃ
vikārādihetuṃ kalākālabhūtam |
anekakriyānekaśaktisvarūpaṃ
sadā śaktirūpaṃ gaṇeśaṃ natāḥ smaḥ ||
||9||pradhānasvarūpaṃ mahattattvarūpaṃ
dharāvārirūpaṃ digīśādirūpam |
asatsatsvarūpaṃ jagaddhetubhūtaṃ
sadā viśvarūpaṃ gaṇeśaṃ natāḥ smaḥ ||
||10||tvadīye manaḥ sthāpayedaṅghriyugme
jano vighnasaṅghānna pīḍāṃ labheta |
lasatsūryabimbe viśāle sthite'yaṃ
jano dhvāntabādhāṃ kathaṃ vā labheta ||
||11||vayaṃ bhrāmitāḥ sarvathā'jñānayogāt
alabdhvā tavāṅghriṃ bahūnvarṣapūgān |
idānīmavāptāstavaiva prasādāt
prapannānsadā pāhi viśvambharādya ||
||12||brahmovāca
evaṃ stuto gaṇeśastu santuṣṭo'bhūnmahāmune |
kṛpayā parayopeto'bhidhātuṃ tān pracakrame ||
||13||gaṇeśa uvāca
yadarthaṃ kleśitā yūyaṃ yadarthamiha cāgatāḥ |
prīto'hamanayā stutyā varaṃ matto vṛṇīta tam ||
||14||kṛtañca mama yatstotraṃ bhavadbhirbhāvitātmabhiḥ |
stotrarājamitikhyātaṃ bhaviṣyati mamājñayā ||
||15||idaṃ yaḥ paṭhetprātarutthāya dhīmāṃstrisandhyaṃ
sadā bhaktiyukto viśuddhaḥ |
sa putrān śriyaṃ sarvakāmān labheta
parabrahmarūpo bhavedantakāle ||
||16||iti gaṇeśapurāṇe upāsanākhaṇḍe trayodaśo'dhyāye brahmaviṣṇumaheśvarākṛto gaṇapatistavaḥ sampūrṇaḥ |