3 ariṣṭanemistārkṣyaḥ| tārkṣyaḥ| triṣṭup|
tyamū̱ ṣu vā̱jina̍ṃ de̱vajū̍taṃ sa̱hāvā̍naṃ taru̱tāra̱ṃ rathā̍nām |
ari̍ṣṭanemiṃ pṛta̱nāja̍mā̱śuṃ sva̱staye̱ tārkṣya̍mi̱hā hu̍vema ॥10.178.1॥
त्यमू॒ षु वा॒जिनं॑ दे॒वजू॑तं स॒हावा॑नं तरु॒तारं॒ रथा॑नाम् ।
अरि॑ष्टनेमिं पृत॒नाज॑मा॒शुं स्व॒स्तये॒ तार्क्ष्य॑मि॒हा हु॑वेम
indra̍syeva rā̱timā̱johu̍vānāḥ sva̱staye̱ nāva̍mi̱vā ru̍hema |
urvī̱ na pṛthvī̱ bahu̍le̱ gabhī̍re̱ mā vā̱metau̱ mā pare̍tau riṣāma ॥10.178.2॥
इन्द्र॑स्येव रा॒तिमा॒जोहु॑वानाः स्व॒स्तये॒ नाव॑मि॒वा रु॑हेम ।
उर्वी॒ न पृथ्वी॒ बहु॑ले॒ गभी॑रे॒ मा वा॒मेतौ॒ मा परे॑तौ रिषाम
sa̱dyaści̱dyaḥ śava̍sā̱ pañca̍ kṛ̱ṣṭīḥ sūrya̍ iva̱ jyoti̍ṣā̱pasta̱tāna̍ |
sa̱ha̱sra̱sāḥ śa̍ta̱sā a̍sya̱ raṃhi̱rna smā̍ varante yuva̱tiṃ na śaryā̍m ॥10.178.3॥
स॒द्यश्चि॒द्यः शव॑सा॒ पञ्च॑ कृ॒ष्टीः सूर्य॑ इव॒ ज्योति॑षा॒पस्त॒तान॑ ।
स॒ह॒स्र॒साः श॑त॒सा अ॑स्य॒ रंहि॒र्न स्मा॑ वरन्ते युव॒तिं न शर्या॑म्