Study
- Anukramaṇī
- tai॰brā॰ 1.2.6
- Saṃhitā citations
- Source
- Taittirīya / Ṛgveda corpus, as compiled in Yājuṣa Mantra Ratnākaram. Learn svara from a guru.
tai॰brā॰ 1.2.6
pra̱jāpa̍tiḥ pra̱jāḥ sṛ̱ṣṭvā vṛ̱tto̍'śayat|
taṃ de̱vā bhū̱tānā̱g̱ͫ rasa̱ṃ teja̍ḥ sa̱mbhṛtya̍|
tenai̍namabhiṣajyan|
ma̱hāna̍vava̱rtīti̍|
tanma̍hāvra̱tasya̍ mahāvrata̱tvam|
ma̱hadvra̱tamiti̍|
tanma̍hāvra̱tasya̍ mahāvrata̱tvam|
ma̱ha̱to vra̱tamiti̍|
tanma̍hāvra̱tasya̍ mahāvrata̱tvam|
pa̱ñca̱vi̱g̱ͫśaḥ stomo̍ bhavati||44||
catu̍rvigͫśatyardhamāsaḥ saṃvathsa̱raḥ|
yadvā e̱tasmi̎nthsaṃvathsa̱re'dhi̱ prājā̍yata|
tadanna̍ṃ pañcavi̱g̱ͫśama̍bhavat|
ma̱dhya̱taḥ kri̍yate|
ma̱dhya̱to hyanna̍maśi̱taṃ dhi̱noti̍|
atho̍ madhya̱ta e̱va pra̱jānā̱mūrgdhī̍yate|
atha̱ yadvā i̱dama̍nta̱taḥ kri̱yate̎|
tasmā̍duda̱nte pra̱jāḥ same̍dhante|
a̱nta̱taḥ kri̍yate pra̱jana̍nāyai̱va|
tri̱vṛcchiro̍ bhavati||45||
tre̱dhā̱vi̱hi̱tagͫ hi śira̍ḥ|
loma̍ cha̱vīrasthi̍|
parā̍cā stuvanti|
tasmā̱ttathsa̱dṛge̱va|
na medya̱to'nu̍ medyati|
na kṛśya̱to'nu̍ kṛśyati|
pa̱ñca̱da̱śo̎'nyaḥ pa̱kṣo bha̍vati|
sa̱pta̱da̱śo̎'nyaḥ|
tasmā̱dvayāgͫ̄̍syanyata̱rama̱rdhama̱bhi pa̱ryāva̍rtante|
a̱nya̱ta̱rato̱ hi tadgarī̍yaḥ kri̱yate̎||46||
pa̱ñca̱vi̱g̱ͫśa ā̱tmā bha̍vati|
tasmā̎nmadhya̱taḥ pa̱śavo̱ vari̍ṣṭhāḥ|
e̱ka̱vi̱g̱ͫśaṃ puccham̎|
dvi̱padā̍su stuvanti̱ prati̍ṣṭhityai|
sarve̍ṇa sa̱ha stu̍vanti|
sarve̍ṇa̱ hyā̎tmanā̎''tma̱nvī|
sa̱hotpata̍nti|
ekai̍kā̱mucchigͫ̍ṣanti|
ā̱tmann hyaṅgā̍ni ba̱ddhāni̍|
na vā e̱tena̱ sarva̱ḥ puru̍ṣaḥ||47||
yadi̱ta i̍to̱ lomā̍ni da̱to na̱khān|
pa̱ri̱māda̍ḥ kriyante|
tānye̱va tena̱ pratyu̍pyante|
audu̍mbara̱stalpo̍ bhavati|
ūrgvā anna̍mudu̱mbara̍ḥ|
ū̱rja e̱vānnādya̱syāva̍ruddhyai|
yasya̍ talpa̱sadya̱mana̍bhijita̱g̱ͫ̄ syāt|
sa de̱vānā̱g̱ͫ sāmya̍kṣe|
ta̱lpa̱sadya̍ma̱bhija̍yā̱nīti̱ talpa̍mā̱ruhyodgā̍yet|
ta̱lpa̱sadya̍me̱vābhi ja̍yati||48||
yasya̍ talpa̱sadya̍ma̱bhiji̍ta̱g̱ͫ̄ syāt|
sa de̱vānā̱g̱ͫ sāmya̍kṣe|
ta̱lpa̱sadya̱ṃ mā parā̍je̱ṣīti̱ talpa̍mā̱ruhyodgā̍yet|
na ta̍lpa̱sadya̱ṃ parā̍jayate|
ple̱ṅkhe śagͫ̍sati|
maho̱ vai ple̱ṅkhaḥ|
maha̍sa e̱vānnādya̱syāva̍ruddhyai|
de̱vā̱su̱rāḥ saṃya̍ttā āsan|
ta ā̍di̱tye vyāya̍cchanta|
taṃ de̱vāḥ sama̍jayan||49||
brā̱hma̱ṇaśca̍ śū̱draśca̍ carmaka̱rte vyāya̍cchete|
daivyo̱ vai varṇo̎ brāhma̱ṇaḥ|
a̱su̱rya̍ḥ śū̱draḥ|
i̱me̍'rāthsuri̱me su̍bhū̱tama̍kra̱nnitya̍nyata̱ro brū̍yāt|
i̱ma u̍dvāsīkā̱riṇa̍ i̱me du̍rbhū̱tama̍kra̱nnitya̍nyata̱raḥ|
yade̱vaiṣāgͫ̍ sukṛ̱taṃ yā rāddhi̍ḥ|
tada̍nyata̱ro̍'bhi śrī̍ṇāti|
yade̱vaiṣā̎ṃ duṣkṛ̱taṃ yā'rā̎ddhiḥ|
tada̍nyata̱ro'pa̍ hanti|
brā̱hma̱ṇaḥ saṃ ja̍yati|
a̱mume̱vā''di̱tyaṃ bhrātṛ̍vyasya̱ saṃvi̍ndante||50|| ॥TB 1.2.6॥
||1||