Study
- Anukramaṇī
- grahagṛhītasyābhimantraṇādayaḥ
- Source
- याजुषमन्त्ररत्नाकरम् (मुद्रितग्रन्थः) पृष्ठम् ६३५–६३७ — मुद्रितग्रन्थस्य PDF-पाठात् स्वरसहितं यथावत् उद्धृतम्। कोष्ठकेषु सङ्ख्याः ग्रन्थस्य पृष्ठनिर्देशाः।
grahagṛhītasyābhimantraṇādayaḥ
kū̱rku̱raḥ sukū̎rku̱raḥ kūku̱ro vā̍laba̱ndhana̍ḥ| u̱pari̍ṣṭā̱dyadejā̍ya tṛ̱tīya̍syā i̱to di̱vaḥ| aula̍ba̱ ittamupā̎hvayathā̱rjīñchyā̱maḥ śa̱bala̍ḥ| a̱dhorā̍ma ulumba̱laḥ sā̍ra̱meyo̍ ha̱ dhāva̍ti sa̱mu̱drama̍va̱cāka̍śat| bi̱bhranniṣka̍ṃ ca ru̱kmaṃ ca̱ śunā̱magra̍gͫ subīri̱ṇaḥ| subī̍riṇa̱ sṛja̱sṛja̱ śuna̍ka̱ sṛjaika̍vrātya̱ sṛja̱cchat|
||1||tatsa̱tyaṃ yattvendro̎'bravī̱d gāḥ spā̍śaya̱sveti̱ tāstvagͫ̄ spā̍śayi̱tvā''ga̍ccha̱staṃ tvā̎'bravī̱davi̍da̱ hā3 ityavi̍da̱gͫhīti̱ vara̍ṃ vṛṇī̱ṣveti̍ kumā̱rame̱vāhaṃ vara̍ṃ vṛṇa̱ itya̍bravīrvi̱gṛhya̍ bā̱hū pla̱vase̱ dyāma̍va̱cāka̍śat| bi̱bhranniṣka̍ṃ ca ru̱kmaṃ ca̱ śunā̱magra̍gͫ subīri̱ṇaḥ|
||2||subī̍riṇa̱ sṛja̱sṛja̱ śuna̍ka̱ sṛjaika̍vrātya̱ sṛja̱cchat| tatsa̱tyaṃ yatte̍ sara̱mā mā̱tā lohi̍taḥ pi̱tā| a̱mī eke̍ sarasya̱kā a̍va̱dhāva̍ti tṛ̱tīya̍syā i̱to di̱vaḥ| teka̍śca sasaramata̱ṇḍaśca̱ tūla̍śca̱ vitū̍la̱ścārju̍naśca̱ lohi̍taśca| dulā̍ ha̱ nāma̍ vo mā̱tā manthā̍ka̱ko ha̍ vaḥ pi̱tā| sa̱ṃ takṣā̍ hanti ca̱krī vo̱ na sīsa̍rīdata|
||3||cha̱da̱pehi̍ sīsarama sārameya̱ nama̍ste astu sīsara| samaśvā̱ vṛṣa̍ṇaḥ pa̱do na sīsa̍rīdata| cha̱da̱pehi̍ sīsarama sārameya̱ nama̍ste astu sīsara| śvāna̱micchvā'da̱nna pu̍ruṣa̱ṃ chat| e̱te te̱ prati̍dṛśyete samā̱nava̍sane u̱bhe| te a̱hagͫ sā̱raye̍ṇa̱ musa̍le̱nāva̍hanmyu̱lūkha̍le| ha̱taḥ śa̱ṅkho ha̱taḥ śa̍ṅkhapi̱tā ha̱taḥ śa̍ṅkhakuturva̱kaḥ| apye̍ṣāgͫ stha̱pati̍rha̱taḥ|
||4||ṛṣi̍rbo̱dhaḥ prabo̍dha̱ḥ svapno̍ māta̱riśvā̎| te te̎ prā̱ṇān spa̍ri̱ṣyanti̱ mā bhai̍ṣī̱rna ma̍ri̱ṣyasi̍| ja̱gdho maśa̍ko ja̱gdhā vitṛ̍ṣṭirja̱gdho vya̍dhva̱raḥ svāhā̍ ja̱gdho vya̍dhva̱ro ja̱gdho maśa̍ko ja̱gdhā vitṛ̍ṣṭi̱ḥ svāhā̎ ja̱gdhā vitṛ̍ṣṭirja̱gdho vya̍dhva̱ro ja̱gdho maśa̍ka̱ḥ svāhā̎||16||
||5||indra̍ jahi danda̱śūka̍ṃ pa̱kṣiṇa̱ṃ yaḥ sarī̍sṛ̱paḥ| da̱ṃkṣṇanta̍ṃ ca da̱śanta̍ṃ ca̱ sarvā̱gͫ̄stāni̍ndra jambhaya̱ svāhā̎| a̱psu jā̍ta̱ sare̍ vṛddha de̱vānā̱mapi̍ hastya| tvama̍gna indra̱preṣi̍ta̱ḥ sa no̱ mā hi̍gͫsī̱ḥ svāhā̎| trāṇa̍masi pari̱trāṇa̍masi pari̱dhira̍si|
||6||anne̍na manu̱ṣyā̍gͫ̄ strāya̍se̱ tṛṇai̎ḥ pa̱śūnga̱rtena̍ sa̱rpān ya̱jñena̍ de̱vān sva̱dhayā̍ pi̱tṝn svāhā̎| tatsa̱tyaṃ yatte̍'māvā̱syā̍yāṃ ca paurṇamā̱syāṃ ca̍ viṣaba̱ligͫ hara̍nti̱ sarva̍ udarasa̱rpiṇa̍ḥ| tatte̱ prera̍te̱ tvayi̱ saṃvi̍śanti̱ tvayi̍ naḥ sa̱tastvayi̍ sa̱dbhyo va̱rṣābhyo̍ na̱ḥ pari̍dehi|
||7||(namo̍ astu sa̱rpebhya̱ iti̍ ti̱sraḥ|) {namo̍ astu sa̱rpebhyo̱ ye ke ca̍ pṛthi̱vīmanu̍| ye a̱ntari̍kṣe̱ ye di̱vi tebhya̍ḥ sa̱rpebhyo̱ nama̍ḥ|| ye̍'do ro̍ca̱ne di̱vo ye vā̱ sūrya̍sya ra̱śmiṣu̍| yeṣā̍ma̱psu sada̍ḥ kṛ̱taṃ tebhya̍ḥ sa̱rpebhyo̱ nama̍ḥ|| yā iṣa̍vo yātu̱dhānā̍nā̱ṃ ye vā̱ vana̱spatī̱gͫ ranu̍|
||8||ye vā̍'va̱ṭeṣu̱ śera̍te̱ tebhya̍ḥ sa̱rpebhyo̱ nama̍ḥ||} namo̍ astu sa̱rpebhyo̱ ye pārthi̍vā̱ ya ā̎ntari̱kṣyā̍ ye di̱vyā ye di̱śyā̎ḥ| tebhya̍ i̱maṃ ba̱ligͫ ha̍riṣyāmi̱ tebhya̍ i̱maṃ ba̱limahā̍rṣam| takṣa̍ka̱ vaiśā̍leya dhṛ̱tarā̎ṣṭrairāvata̱ste jī̍vā̱stvayi̍ naḥ sa̱tastvayi̍ sa̱dbhyo va̱rṣābhyo̍ na̱ḥ pari̍dehi|
||9||dhṛ̱tarā̎ṣṭrairāvata̱ takṣa̍ka̱ vaiśā̍leya̱ste jī̍vā̱stvayi̍ naḥ sa̱tastvayi̍ sa̱dbhyo va̱rṣābhyo̍ na̱ḥ pari̍dehi| a̱hi̱gͫsā̱'ti̱ba̱laste ji̍vā̱stvayi̍ naḥ sa̱tastvayi̍ sa̱dbhyo va̱rṣābhyo̍ na̱ḥ pari̍dehi| a̱ti̱ba̱lā̱'hi̱gͫsaste ji̍vā̱stvayi̍ naḥ sa̱tastvayi̍ sa̱dbhyo va̱rṣābhyo̍ na̱ḥ pari̍dehi|
||10||ye da̍nda̱śūkā̱ḥ pārthi̍vā̱stāgͫ̄stvami̱taḥ pa̱rogavyū̍ti̱ nive̍śaya| santi̱ vai na̍ḥ śa̱phina̱ḥ santi̍ da̱ṇḍina̱ste vo̱ neddhi̱nasā̱nnyedyū̱yama̱smān hi̱nasā̍ta| (sa̱mīcī̱ nāmā̍si̱ prācī̱ digghe̱tayo̱ nāma̱ stheti̱ dvāda̍śa paryā̱yāḥ|) apa̍śveta pa̱dā ja̍hi̱ pūrve̍ṇa̱ cā'pa̍reṇa ca| sa̱pta ca̱ mānu̍ṣīri̱māsti̱sraśca̍ rā̱jaba̍ndhavīḥ|
||11||na vai śve̱tasyā̎dhyācā̱re'hi̍rja̱ghāna̱ kañca̱na| śve̱tāya̍ vaida̱rvāya̱ namo̱ nama̍ḥ śve̱tāya̍ vaida̱rvāya̍||17||
||12||