23 ātharvaṇo bhiṣag| oṣadhayaḥ| anuṣṭup|
yā oṣa̍dhī̱: pūrvā̍ jā̱tā de̱vebhya̍striyu̱gaṃ pu̱rā | manai̱ nu ba̱bhrūṇā̍ma̱haṃ śa̱taṃ dhāmā̍ni sa̱pta ca̍ ॥10.97.1॥
śa̱taṃ vo̍ amba̱ dhāmā̍ni sa̱hasra̍mu̱ta vo̱ ruha̍: | adhā̍ śatakratvo yū̱yami̱maṃ me̍ aga̱daṃ kṛ̍ta ॥10.97.2॥
oṣa̍dhī̱: prati̍ modadhva̱ṃ puṣpa̍vatīḥ pra̱sūva̍rīḥ | aśvā̍ iva sa̱jitva̍rīrvī̱rudha̍: pārayi̱ṣṇva̍: ॥10.97.3॥
oṣa̍dhī̱riti̍ mātara̱stadvo̍ devī̱rupa̍ bruve | sa̱neya̱maśva̱ṃ gāṃ vāsa̍ ā̱tmāna̱ṃ tava̍ pūruṣa ॥10.97.4॥
a̱śva̱tthe vo̍ ni̱ṣada̍naṃ pa̱rṇe vo̍ vasa̱tiṣkṛ̱tā | go̱bhāja̱ itkilā̍satha̱ yatsa̱nava̍tha̱ pūru̍ṣam ॥10.97.5॥
yatrauṣa̍dhīḥ sa̱magma̍ta̱ rājā̍na̱: sami̍tāviva | vipra̱: sa u̍cyate bhi̱ṣagra̍kṣo̱hāmī̍va̱cāta̍naḥ ॥10.97.6॥
a̱śvā̱va̱tīṃ so̍māva̱tīmū̱rjaya̍ntī̱mudo̍jasam | āvi̍tsi̱ sarvā̱ oṣa̍dhīra̱smā a̍ri̱ṣṭatā̍taye ॥10.97.7॥
ucchuṣmā̱ oṣa̍dhīnā̱ṃ gāvo̍ go̱ṣṭhādi̍verate | dhana̍ṃ sani̱ṣyantī̍nāmā̱tmāna̱ṃ tava̍ pūruṣa ॥10.97.8॥
iṣkṛ̍ti̱rnāma̍ vo mā̱tā'tho̍ yū̱yaṃ stha̱ niṣkṛ̍tīḥ | sī̱rāḥ pa̍ta̱triṇī̍: sthana̱ yadā̱maya̍ti̱ niṣkṛ̍tha ॥10.97.9॥
ati̱ viśvā̍: pari̱ṣṭhā ste̱na i̍va vra̱jama̍kramuḥ | oṣa̍dhī̱: prācu̍cyavu̱ryatkiṃ ca̍ ta̱nvo̱3 rapa̍: ॥10.97.10॥
yadi̱mā vā̱jaya̍nna̱hamoṣa̍dhī̱rhasta̍ āda̱dhe | ā̱tmā yakṣma̍sya naśyati pu̱rā jī̍va̱gṛbho̍ yathā ॥10.97.11॥
yasyau̍ṣadhīḥ pra̱sarpa̱thāṅga̍maṅga̱ṃ paru̍ṣparuḥ | tato̱ yakṣma̱ṃ vi bā̍dhadhva u̱gro ma̍dhyama̱śīri̍va ॥10.97.12॥
sā̱kaṃ ya̍kṣma̱ pra pa̍ta̱ cāṣe̍ṇa kikidī̱vinā̍ | sā̱kaṃ vāta̍sya̱ dhrājyā̍ sā̱kaṃ na̍śya ni̱hāka̍yā ॥10.97.13॥
a̱nyā vo̍ a̱nyāma̍vatva̱nyānyasyā̱ upā̍vata | tāḥ sarvā̍: saṃvidā̱nā i̱daṃ me̱ prāva̍tā̱ vaca̍: ॥10.97.14॥
yāḥ pha̱linī̱ryā a̍pha̱lā a̍pu̱ṣpā yāśca̍ pu̱ṣpiṇī̍: | bṛha̱spati̍prasūtā̱stā no̍ muñca̱ntvaṃha̍saḥ ॥10.97.15॥
mu̱ñcantu̍ mā śapa̱thyā̱3datho̍ varu̱ṇyā̍du̱ta | atho̍ ya̱masya̱ paḍbī̍śā̱tsarva̍smāddevakilbi̱ṣāt ॥10.97.16॥
a̱va̱pata̍ntīravadandi̱va oṣa̍dhaya̱spari̍ | yaṃ jī̱vama̱śnavā̍mahai̱ na sa ri̍ṣyāti̱ pūru̍ṣaḥ ॥10.97.17॥
yā oṣa̍dhī̱: soma̍rājñīrba̱hvīḥ śa̱tavi̍cakṣaṇāḥ | tāsā̱ṃ tvama̍syutta̱māra̱ṃ kāmā̍ya̱ śaṃ hṛ̱de ॥10.97.18॥
yā oṣa̍dhī̱: soma̍rājñī̱rviṣṭhi̍tāḥ pṛthi̱vīmanu̍ | bṛha̱spati̍prasūtā a̱syai saṃ da̍tta vī̱rya̍m ॥10.97.19॥
mā vo̍ riṣatkhani̱tā yasmai̍ cā̱haṃ khanā̍mi vaḥ | dvi̱paccatu̍ṣpada̱smāka̱ṃ sarva̍mastvanātu̱ram ॥10.97.20॥
yāśce̱damu̍paśṛ̱ṇvanti̱ yāśca̍ dū̱raṃ parā̍gatāḥ | sarvā̍: sa̱ṃgatya̍ vīrudho̱'syai saṃ da̍tta vī̱rya̍m ॥10.97.21॥
oṣa̍dhaya̱: saṃ va̍dante̱ some̍na sa̱ha rājñā̍ | yasmai̍ kṛ̱ṇoti̍ brāhma̱ṇastaṃ rā̍janpārayāmasi ॥10.97.22॥
tvamu̍tta̱māsyo̍ṣadhe̱ tava̍ vṛ̱kṣā upa̍stayaḥ | upa̍stirastu̱ so̱3'smāka̱ṃ yo a̱smām̐ a̍bhi̱dāsa̍ti ॥10.97.23॥