16 nārāyaṇaḥ| puruṣaḥ| anuṣṭup , 16 triṣṭup|
sa̱hasra̍śīrṣā̱ puru̍ṣaḥ sahasrā̱kṣaḥ sa̱hasra̍pāt | sa bhūmi̍ṃ vi̱śvato̍ vṛ̱tvā'tya̍tiṣṭhaddaśāṅgu̱lam ॥10.90.1॥
puru̍ṣa e̱vedaṃ sarva̱ṃ yadbhū̱taṃ yacca̱ bhavya̍m | u̱tāmṛ̍ta̱tvasyeśā̍no̱ yadanne̍nāti̱roha̍ti ॥10.90.2॥
e̱tāvā̍nasya mahi̱mā'to̱ jyāyā̍m̐śca̱ pūru̍ṣaḥ | pādo̍'sya̱ viśvā̍ bhū̱tāni̍ tri̱pāda̍syā̱mṛta̍ṃ di̱vi ॥10.90.3॥
tri̱pādū̱rdhva udai̱tpuru̍ṣa̱: pādo̍'sye̱hābha̍va̱tpuna̍: | tato̱ viṣva̱ṅvya̍krāmatsāśanānaśa̱ne a̱bhi ॥10.90.4॥
tasmā̍dvi̱rāl̤a̍jāyata vi̱rājo̱ adhi̱ pūru̍ṣaḥ | sa jā̱to atya̍ricyata pa̱ścādbhūmi̱matho̍ pu̱raḥ ॥10.90.5॥
yatpuru̍ṣeṇa ha̱viṣā̍ de̱vā ya̱jñamata̍nvata | va̱sa̱nto a̍syāsī̱dājya̍ṃ grī̱ṣma i̱dhmaḥ śa̱raddha̱viḥ ॥10.90.6॥
taṃ ya̱jñaṃ ba̱rhiṣi̱ praukṣa̱npuru̍ṣaṃ jā̱tama̍gra̱taḥ | tena̍ de̱vā a̍yajanta sā̱dhyā ṛṣa̍yaśca̱ ye ॥10.90.7॥
tasmā̍dya̱jñātsa̍rva̱huta̱: sambhṛ̍taṃ pṛṣadā̱jyam | pa̱śūntām̐śca̍kre vāya̱vyā̍nāra̱ṇyāngrā̱myāśca̱ ye ॥10.90.8॥
tasmā̍dya̱jñātsa̍rva̱huta̱ ṛca̱: sāmā̍ni jajñire | chandā̍ṃsi jajñire̱ tasmā̱dyaju̱stasmā̍dajāyata ॥10.90.9॥
tasmā̱daśvā̍ ajāyanta̱ ye ke co̍bha̱yāda̍taḥ | gāvo̍ ha jajñire̱ tasmā̱ttasmā̍jjā̱tā a̍jā̱vaya̍: ॥10.90.10॥
yatpuru̍ṣa̱ṃ vyada̍dhuḥ kati̱dhā vya̍kalpayan | mukha̱ṃ kima̍sya̱ kau bā̱hū kā ū̱rū pādā̍ ucyete ॥10.90.11॥
brā̱hma̱ṇo̍'sya̱ mukha̍māsīdbā̱hū rā̍ja̱nya̍: kṛ̱taḥ | ū̱rū tada̍sya̱ yadvaiśya̍: pa̱dbhyāṃ śū̱dro a̍jāyata ॥10.90.12॥
ca̱ndramā̱ mana̍so jā̱taścakṣo̱: sūryo̍ ajāyata | mukhā̱dindra̍ścā̱gniśca̍ prā̱ṇādvā̱yura̍jāyata ॥10.90.13॥
nābhyā̍ āsīda̱ntari̍kṣaṃ śī̱rṣṇo dyauḥ sama̍vartata | pa̱dbhyāṃ bhūmi̱rdiśa̱: śrotrā̱ttathā̍ lo̱kām̐ a̍kalpayan ॥10.90.14॥
sa̱ptāsyā̍sanpari̱dhaya̱striḥ sa̱pta sa̱midha̍: kṛ̱tāḥ | de̱vā yadya̱jñaṃ ta̍nvā̱nā aba̍dhna̱npuru̍ṣaṃ pa̱śum ॥10.90.15॥
ya̱jñena̍ ya̱jñama̍yajanta de̱vāstāni̱ dharmā̍ṇi pratha̱mānyā̍san |
te ha̱ nāka̍ṃ mahi̱māna̍: sacanta̱ yatra̱ pūrve̍ sā̱dhyāḥ santi̍ de̱vāḥ ॥10.90.16॥