Study
- Anukramaṇī
- Source
8 śailūṣiḥ kulmalabarhiṣo, vāmadevyo'homugvā| viśvedevāḥ| upariṣṭādbṛhatī,8 triṣṭup|
na tamaṃho̱ na du̍ri̱taṃ devā̍so aṣṭa̱ martya̍m | sa̱joṣa̍so̱ yama̍rya̱mā mi̱tro naya̍nti̱ varu̍ṇo̱ ati̱ dviṣa̍: ॥10.126.1॥
न तमंहो॒ न दु॑रि॒तं देवा॑सो अष्ट॒ मर्त्य॑म् । स॒जोष॑सो॒ यम॑र्य॒मा मि॒त्रो नय॑न्ति॒ वरु॑णो॒ अति॒ द्विष॑:
taddhi va̱yaṃ vṛ̍ṇī̱mahe̱ varu̍ṇa̱ mitrārya̍man | yenā̱ niraṃha̍so yū̱yaṃ pā̱tha ne̱thā ca̱ martya̱mati̱ dviṣa̍: ॥10.126.2॥
तद्धि व॒यं वृ॑णी॒महे॒ वरु॑ण॒ मित्रार्य॑मन् । येना॒ निरंह॑सो यू॒यं पा॒थ ने॒था च॒ मर्त्य॒मति॒ द्विष॑:
te nū̱naṃ no̱'yamū̱taye̱ varu̍ṇo mi̱tro a̍rya̱mā | nayi̍ṣṭhā u no ne̱ṣaṇi̱ parṣi̍ṣṭhā u naḥ pa̱rṣaṇyati̱ dviṣa̍: ॥10.126.3॥
ते नू॒नं नो॒ऽयमू॒तये॒ वरु॑णो मि॒त्रो अ॑र्य॒मा । नयि॑ष्ठा उ नो ने॒षणि॒ पर्षि॑ष्ठा उ नः प॒र्षण्यति॒ द्विष॑:
yū̱yaṃ viśva̱ṃ pari̍ pātha̱ varu̍ṇo mi̱tro a̍rya̱mā | yu̱ṣmāka̱ṃ śarma̍ṇi pri̱ye syāma̍ supraṇīta̱yo'ti̱ dviṣa̍: ॥10.126.4॥
यू॒यं विश्वं॒ परि॑ पाथ॒ वरु॑णो मि॒त्रो अ॑र्य॒मा । यु॒ष्माकं॒ शर्म॑णि प्रि॒ये स्याम॑ सुप्रणीत॒योऽति॒ द्विष॑:
ā̱di̱tyāso̱ ati̱ sridho̱ varu̍ṇo mi̱tro a̍rya̱mā | u̱graṃ ma̱rudbhī̍ ru̱draṃ hu̍ve̱mendra̍ma̱gniṃ sva̱staye'ti̱ dviṣa̍: ॥10.126.5॥
आ॒दि॒त्यासो॒ अति॒ स्रिधो॒ वरु॑णो मि॒त्रो अ॑र्य॒मा । उ॒ग्रं म॒रुद्भी॑ रु॒द्रं हु॑वे॒मेन्द्र॑म॒ग्निं स्व॒स्तयेऽति॒ द्विष॑:
netā̍ra ū̱ ṣu ṇa̍sti̱ro varu̍ṇo mi̱tro a̍rya̱mā | ati̱ viśvā̍ni duri̱tā rājā̍naścarṣaṇī̱nāmati̱ dviṣa̍: ॥10.126.6॥
नेता॑र ऊ॒ षु ण॑स्ति॒रो वरु॑णो मि॒त्रो अ॑र्य॒मा । अति॒ विश्वा॑नि दुरि॒ता राजा॑नश्चर्षणी॒नामति॒ द्विष॑:
śu̱nama̱smabhya̍mū̱taye̱ varu̍ṇo mi̱tro a̍rya̱mā | śarma̍ yacchantu sa̱pratha̍ ādi̱tyāso̱ yadīma̍he̱ ati̱ dviṣa̍: ॥10.126.7॥
शु॒नम॒स्मभ्य॑मू॒तये॒ वरु॑णो मि॒त्रो अ॑र्य॒मा । शर्म॑ यच्छन्तु स॒प्रथ॑ आदि॒त्यासो॒ यदीम॑हे॒ अति॒ द्विष॑:
yathā̍ ha̱ tyadva̍savo gau̱rya̍ṃ citpa̱di ṣi̱tāmamu̍ñcatā yajatrāḥ |
e̱vo ṣva1smanmu̍ñcatā̱ vyaṃha̱: pra tā̍ryagne prata̱raṃ na̱ āyu̍: ॥10.126.8॥
यथा॑ ह॒ त्यद्व॑सवो गौ॒र्यं॑ चित्प॒दि षि॒ताममु॑ञ्चता यजत्राः ।
ए॒वो ष्व१स्मन्मु॑ञ्चता॒ व्यंह॒: प्र ता॑र्यग्ने प्रत॒रं न॒ आयु॑: