athā”tmānaṃ śivātmānaṃ śrī rudra rūpaṃ dhyāyet||
śuddhasphaṭikasaṅkāśaṃ trinetraṃ pañcavaktrakam| gaṅgādharaṃ daśabhujaṃ sarvābharaṇabhūṣitam||
nīlagrīvaṃ śaśāṅkāṅkaṃ nāgayajñopavītinam| vyāghracarmottarīyaṃ ca vareṇyamabhayapradam||
kamaṇḍalvakṣasūtrāṇāṃ dhāriṇaṃ śūlapāṇinam| jvalantaṃ piṅgalajaṭāśikhāmudyotadhāriṇam||
vṛṣaskandhasamārūḍham umādehārdhadhāriṇam| amṛte nāplutaṃ śāntaṃ divyabhogasamanvitam||
digdevatā samāyuktaṃ surāsuranamaskṛtam| nityaṃ ca śāśvataṃ śuddhaṃ dhruvamakṣaramavyayam||
sarvavyāpinamīśānaṃ rudraṃ vai viśvarūpiṇam| evaṃ dhyātvā dvijaḥ samyak tato yajanamārabhet||
athāto rudra snānārcanābhiṣekavidhiṃ vyā̎khyāsyā̱maḥ |
pra̱jana̍ne bra̱hmā ti̍ṣṭhatu | pāda̍yorvi̱ṣṇusti̍ṣṭhatu | hasta̍yorha̱rasti̍ṣṭhatu | bā̍hvori̱ndrasti̍ṣṭhatu | jaṭha̱re a̱gnisti̍ṣṭhatu | hṛda̍ye śi̱vasti̍ṣṭhatu | kaṇṭhe vasava̍stiṣṭha̱ntu | va̱ktre sa̱rasvatī̍ tiṣṭhatu | nāsi̍kayorvā̱yusti̍ṣṭhatu | naya̍nayośca̱ndrādityau̍ tiṣṭhe̱tām | karṇa̍yora̱śvinau̍ tiṣṭhe̱tām | lalā̍ṭe ru̱drāsti̍ṣṭhantu | mū̍rdhnyādi̱tyāsti̍ṣṭhantu | śi̍rasi ma̱hāde̍vastiṣṭhatu | śikhā̍yāṃ vā̱madeva̍stiṣṭhatu | pṛ̱ṣṭhe pi̱nākī̍ tiṣṭhatu | pura̍taḥ śū̱lī ti̍ṣṭhatu | pārśva̍yoḥ śi̱vāśaṅkarau̍ tiṣṭhe̱tām | sarva̍to vā̱yusti̍ṣṭhatu | tato bahiḥ sarvato’gnirjvālāmālāparivṛta̍stiṣṭha̱tu | sarveṣvaṅgeṣu sarvā devatā yathāsthāna̍ṃ tiṣṭha̱ntu | māṃ rakṣantu | sarvān mahājanān sakuṭumbaṃ rakṣantu ||
a̱gnirme̍ vā̱ci śri̱taḥ| vāgghṛda̍ye| hṛda̍ya̱ṃ mayi̍| a̱hama̱mṛte̎| a̱mṛta̱ṃ brahma̍ṇi| (jihvā)
vā̱yurme̎ prā̱ṇe śri̱taḥ| prā̱ṇo hṛda̍ye| hṛda̍ya̱ṃ mayi̍| a̱hama̱mṛte̎| a̱mṛta̱ṃ brahma̍ṇi| (nāsikā)
sūryo̍ me̱ cakṣu̍ṣi śri̱taḥ| cakṣu̱ṟhṛda̍ye| hṛda̍ya̱ṃ mayi̍| a̱hama̱mṛte̎| a̱mṛta̱ṃ brahma̍ṇi| (netre)
ca̱ndramā̍ me̱ mana̍si śri̱taḥ| mano̱ hṛda̍ye| hṛda̍ya̱ṃ mayi̍| a̱hama̱mṛte̎| a̱mṛta̱ṃ brahma̍ṇi| (vakṣaḥ)
diśo̍ me̱ śrotre̎ śri̱tāḥ| śrotra̱g̱ͫ hṛda̍ye| hṛda̍ya̱ṃ mayi̍| a̱hama̱mṛte̎| a̱mṛta̱ṃ brahma̍ṇi| (śrotre)
āpo̍ me̱ reta̍si śri̱tāḥ| reto̱ hṛda̍ye| hṛda̍ya̱ṃ mayi̍| a̱hama̱mṛte̎| a̱mṛta̱ṃ brahma̍ṇi| (guhyam)
pṛ̱thi̱vī me̱ śarī̍re śri̱tā| śarī̍ra̱g̱ͫ hṛda̍ye| hṛda̍ya̱ṃ mayi̍| a̱hama̱mṛte̎| a̱mṛta̱ṃ brahma̍ṇi| (śarīram)
o̱ṣa̱dhi̱va̱na̱spa̱tayo̍ me̱ loma̍su śri̱tāḥ| lomā̍ni̱ hṛda̍ye| hṛda̍ya̱ṃ mayi̍| a̱hama̱mṛte̎| a̱mṛta̱ṃ brahma̍ṇi| (lomāni)
indro̍ me̱ bale̎ śri̱taḥ| bala̱g̱ͫ hṛda̍ye| hṛda̍ya̱ṃ mayi̍| a̱hama̱mṛte̎| a̱mṛta̱ṃ brahma̍ṇi| (bāhū)
pa̱rjanyo̍ me mū̱rdhni śri̱taḥ| mū̱rdhā hṛda̍ye| hṛda̍ya̱ṃ mayi̍| a̱hama̱mṛte̎| a̱mṛta̱ṃ brahma̍ṇi| (śiraḥ)
īśā̍no me ma̱nyau śri̱taḥ| ma̱nyurhṛda̍ye| hṛda̍ya̱ṃ mayi̍| a̱hama̱mṛte̎| a̱mṛta̱ṃ brahma̍ṇi| (hṛdayam)
ā̱tmā ma̍ ā̱tmani̍ śri̱taḥ| ā̱tmā hṛda̍ye| hṛda̍ya̱ṃ mayi̍| a̱hama̱mṛte̎| a̱mṛta̱ṃ brahma̍ṇi| (hṛdayam)
puna̍rma ā̱tmā puna̱rāyu̱rāgā̎t| puna̍ḥ prā̱ṇaḥ puna̱rākū̍ta̱māgā̎t| vai̱śvā̱na̱ro ra̱śmibhi̍rvāvṛdhā̱naḥ| a̱ntasti̍ṣṭhatva̱mṛta̍sya go̱pāḥ||
asya śrī rudrādhyāya praśna mahāmantrasya| aghora ṛṣiḥ| anuṣṭup chandaḥ| saṅkarṣaṇamūrtisvarūpo yo’sāvādityaḥ paramapuruṣaḥ sa eṣa rudro devatā||
namaḥ śivāyeti bījam| śivatarāyeti śaktiḥ| mahādevāyeti kīlakam| śrī sāmbasadāśivaprasādasiddhyarthe jape viniyogaḥ||
||karanyāsaḥ||
oṃ agnihotrātmane aṅguṣṭhābhyāṃ namaḥ|
darśapūrṇamāsātmane tarjanībhyāṃ namaḥ|
cāturmāsyātmane madhyamābhyāṃ namaḥ|
nirūḍhapaśubandhātmane anāmikābhyāṃ namaḥ|
jyotiṣṭomātmane kaniṣṭhikābhyāṃ namaḥ|
sarvakratvātmane karatalakarapṛṣṭhābhyāṃ namaḥ|
||aṅganyāsaḥ||
agnihotrātmane hṝdayāya namaḥ|
darśapūrṇamāsātmane śirase svāhā|
cāturmāsyātmane śikhāyai vaṣaṭ|
nirūḍhapaśubandhātmane kavacāya huṃ|
jyotiṣṭomātmane netratrayāya vauṣaṭ|
sarvakratvātmane astrāya phaṭ|
bhūrbhuvassuvaromiti digbandhaḥ|
dhyānam āpātāla nabhaḥ sthalānta bhuvana brahmāṇḍamāvisphurat jyotiḥ sphāṭika liṅga mauli vilasatpūrṇendu vāntāmṛtaiḥ astokāplutamekamīśamaniśaṃ rudrānuvākān japan dhyāyedīpsitasiddhaye dhruvapadaṃ vipro’bhiṣiñcecchivam brahmāṇḍa vyāpta dehā bhasita himarucā bhāsamānā bhujaṅgaiḥ kaṇṭhe kālāḥ kapardā kalita śaśikalāścaṇḍa kodaṇḍa hastāḥ tryakṣā rudrākṣamālāḥ prakaṭita vibhavāḥ śāmbhavā mūrtibhedāḥ rudrāḥ śrīrudrasūkta prakaṭita vibhavā naḥ prayacchantu saukhyam
oṃ ga̱ṇānā̎ṃ tvā ga̱ṇapa̍tigͫ havāmahe ka̱viṃ ka̍vī̱nāmu̍pa̱-maśra̍vastamam |
jye̱ṣṭha̱rāja̱ṃ brahma̍ṇāṃ brahmaṇaspata̱ ā na̍ḥ śṛ̱ṇvannū̱tibhi̍ḥ sīda̱ sāda̍nam ||
oṃ śrī mahāgaṇapataye̱ namaḥ||
śaṃ ca̍ me̱ maya̍śca me pri̱yaṃ ca̍ me’nukā̱maśca̍ me̱ kāma̍śca me saumana̱saśca̍ me bha̱draṃ ca̍ me̱ śreya̍śca me̱ vasya̍śca me̱ yaśa̍śca me̱ bhaga̍śca me̱ dravi̍ṇaṃ ca me ya̱ntā ca̍ me dha̱rtā ca̍ me̱ kṣema̍śca me̱ dhṛti̍śca me̱ viśva̍ṃ ca me̱ maha̍śca me sa̱ṃvicca̍ me̱ jñātra̍ṃ ca me̱ sūśca̍ me pra̱sūśca̍ me̱ sīra̍ṃ ca me la̱yaśca̍ ma ṛ̱taṃ ca̍ me̱’mṛta̍ṃ ca me’ya̱kṣmaṃ ca̱ me’nā̍mayacca me jī̱vātu̍śca me dīrghāyu̱tvaṃ ca̍ me’nami̱traṃ ca̱ me’bha̍yaṃ ca me su̱gaṃ ca̍ me̱ śaya̍naṃ ca me sū̱ṣā ca̍ me su̱dina̍ṃ ca me||3||
oṃ śānti̱ḥ śānti̱ḥ śānti̍ḥ