Śaṅkara by tradition
sthūlo māṃsamayo deho sūkṣmaḥ syādvāsanāmayaḥ |
jñānakarmendriyaiḥ sārdhaṃ dhīprāṇau taccharīragau ||
||1||ajñānaṃ kāraṇaṃ sākṣī bodhasteṣāṃ vibhāsakaḥ |
bodhābhāso buddhigataḥ kartā syātpuṇyapāpayoḥ ||
||2||sa eva saṃsaretkarmavaśāllokadvaye sadā |
bodhābhāsācchuddhabodhaṃ vivicyādatiyatnataḥ ||
||3||jāgarasvapnayoreva bodhābhāsaviḍambanā |
suptau tu tallaye bodhaḥ śuddho jāḍyaṃ prakāśayet ||
||4||jāgare'pi dhiyastūṣṇīmbhāvaḥ śuddhena bhāsyate |
dhīvyāpārāśca cidbhāsyāścidābhāsena saṃyutāḥ ||
||5||vahnitaptajalaṃ tāpayuktaṃ dehasya tāpakam |
cidbhāsyā dhīstadābhāsayuktānyaṃ bhāsayettathā ||
||6||rūpādau guṇadoṣādivikalpā buddhigāḥ kriyāḥ |
tāḥ kriyā viṣayaiḥ sārdhaṃ bhāsayantī citirmatā ||
||7||rūpācca guṇadoṣābhyāṃ viviktā kevalā citiḥ |
saivānuvartate rūparasādīnāṃ vikalpane ||
||8||kṣaṇe kṣaṇe'nyathābhūtā dhīvikalpāścitirna tu |
muktāsu sūtravadbuddhivikalpeṣu citistathā ||
||9||muktābhirāvṛtaṃ sūtraṃ muktayormadhya īkṣyate |
tathā vṛttivikalpaiścitspaṣṭā madhye vikalpayoḥ ||
||10||naṣṭe pūrvavikalpe tu yāvadanyasya nodayaḥ |
nirvikalpakacaitanyaṃ spaṣṭaṃ tāvadvibhāsate ||
||11||ekadvitrikṣaṇeṣvevaṃ vikalpasya nirodhanam |
krameṇābhyasyatāṃ yatnādbrahmānubhavakāṅkṣibhiḥ ||
||12||savikalpajīvo'yaṃ brahma tannirvikalpakam |
ahaṃ brahmeti vākyena so'yamartho'bhidhīyate ||
||13||savikalpakacidyo'haṃ brahmaikaṃ nirvikalpakam |
svataḥsiddhā vikalpāste niroddhavyāḥ prayatnataḥ ||
||14||śakyaḥ sarvanirodhena samādhiryoginaṃ priyaḥ |
tadaśaktau kṣaṇaṃ ruddhvā śraddhālurbrahmatātmanaḥ ||
||15||śraddhālurbrahmatāṃ svasya cintayedbuddhivṛttibhiḥ |
vākyavṛttyā yathāśakti jñātvāddhābhyasyatāṃ sadā ||
||16||taccintanaṃ tatkathanamanyonyaṃ tatprabodhanam |
etadekaparatvaṃ ca brahmābhyāsaṃ vidurbudhāḥ ||
||17||dehātmadhīvadbrahmātmadhīdārḍhye kṛtakṛtyatā |
yadā tadāyaṃ mriyatāṃ mukto'sau nātra saṃśayaḥ ||
||18||iti śrīmatparamahaṃsaparivrājakācāryasya śrīgovindabhagavatpūjyapādaśiṣyasya śrīmacchaṅkarabhagavataḥ kṛtau laghuvākyavṛttiḥ sampūrṇā