satrāṇi
Prathamā kaṇḍikā
caturviṃśatiparamāḥ sattramāsīran
||1||teṣāṃ dvādaśāhena sattrabhūtena kalpo vyākhyāto yāni purastātsaṃvatsarāt | gavāmayanenetareṣām
||2||ubhayato'tirātrāṇi bhavanti
||3||tṛtīyaṃ pañcadaśarātraṃ parihāpya kuṇḍapāyināṃ ca sattram
||4||ṛtūnāmekādaśarātreṇa prajāṃ sṛjante prajāmavarundhate prajāṃ vindante prajāvanto bhavanti
||5||jyotiratirātraḥ pṛṣṭhyaḥ ṣaḍahastrayaśchandomā atirātraḥ
||6||dvau trayodaśarātrau
||7||yaṃ kāmaṃ kāmayante tamabhyaśnuvate
||8||atirātraḥ pṛṣṭhyaḥ ṣaḍahaḥ sarvastomo'tirātraścatvāraśchandomā atirātraḥ
||9||dvitīyaṃ brahmavarcasakāmā upeyuḥ
||10||atirātro dvādaśāhasya daśāhāni mahāvratamatirātraśca
||11||trayaścaturdaśarātrāḥ
||12||yaṃ kāmaṃ kāmayante tamabhyaśnuvate
||13||atirātraḥ pṛṣṭhyaḥ ṣaḍaha āvṛttaḥ pṛṣṭhyaḥ ṣaḍaho'tirātraḥ
||14||dvitīyaṃ yāṃstalpa udake vivāhe vā mīmāṃseran
||15||atirātro jyotirgaurāyustryahaḥ pṛṣṭhyaḥ ṣaḍaha āyurgaurjyotiratirātraḥ
||16||tṛtīyamṛddhikāmā upeyuḥ
||17||atirātro goāyuṣī dvādaśāhasya daśāhānyatirātraḥ
||18||Dvitīyā kaṇḍikā
catvāraḥ pañcadaśarātrāḥ
||1||devatvaṃ gacchati
||2||amāvāsyāyāṃ prāyaṇīyo'ṣṭamyāṃ mahāvrataṃ paurṇamāsyāmudayanīyaḥ | etadvā viparītam
||3||atirātraḥ pṛṣṭhyaḥ ṣaḍaho mahāvratamāvṛttaḥ pṛṣṭhyaḥ ṣaḍaho'tirātraḥ
||4||dvitīyaṃ brahmavarcasakāmā upeyuḥ
||5||atirātrastrivṛdagniṣṭujjyotirgaurāyustryahaḥ pṛṣṭhyaḥ ṣaḍaha āyurgaurjyotiratirātraḥ
||6||tṛtīyenobhau kāmāvavarundhate yaḥ sattre yaścāhīne
||7||trivṛdagniṣṭujjyotirgaurāyustryaho dvādaśāhasya daśāhānyatirātraḥ
||8||caturthena praiva jāyante prajayā paśubhiḥ
||9||atirātro jyotirgaurāyustryaho dvādaśāhasya daśāhānyatirātraḥ
||10||aindraṃ ṣoḍaśarātramojaskāmā upeyuḥ
||11||etā eva samahāvratāḥ
||12||saptadaśarātramannādyakāmā upeyuḥ
||13||atirātro jyotirgaurāyurgaurāyuḥpañcāho dvādaśāhasya daśāhānyatirātraḥ
||14||aṣṭādaśarātraṃ paśukāmā upeyuḥ
||15||atirātro'bhiplavaḥ ṣaḍaho dvādaśāhasya daśāhānyatirātraḥ
||16||ekānnaviṃśatirātreṇa pra prajayā paśubhirjāyante
||17||etā eva samahāvratāḥ
||18||viṃśatirātreṇa brahmavarcasino'nnādā bhavanti
||19||atirātro 'bhiplavaḥ ṣaḍaho'bhijidviśvajitau dvādaśāhasya daśāhānyatirātraḥ
||20||Tṛtīyā kaṇḍikā
dvāvekaviṃśatirātrau
||1||yaṃ kāmaṃ kāmayante tamabhyaśnuvate
||2||atirātro'bhiplavaḥ ṣaḍaho'tirātro dvāvabhiplavāvatirātraḥ
||3||dvitīyaṃ brahmavarcasakāmā upeyuḥ
||4||somāpauṣṇaḥ paśurupālambhyaḥ
||5||manorṛcah sāmidhenyaḥ
||6||nidāgha upayanti
||7||apa tamo ghnate
||8||atirātraḥ pṛṣṭhyaḥ ṣaḍahastrayaḥ svarasāmāno divākīrtyamahastrayaḥ svarasāmāna āvṛttaḥ pṛṣṭhyaḥ ṣaḍaho'tirātraḥ
||9||dvāviṃśatirātreṇa saṃvatsarādebhyo lokebhyo'muṣmādādityādannādyamavarundhate
||10||atirātro jyotirgaurāyustryaho'bhiplavaḥ ṣaḍaho dvādaśāhasya daśāhāni mahāvratamatirātraśca
||11||trayoviṃśatirātraṃ paśukāmā upeyuḥ
||12||atirātro jyotirgaurāyurgaurāyuḥ pañcāho'bhiplavaḥ ṣaḍaho dvādaśāhasya daśāhānyatirātrah
||13||dvau caturviṃśatirātrau
||14||yaṃ kāmaṃ kāmayante tamabhyaśnuvate
||15||atirātro dvāvabhiplavau dvādaśāhasya daśāhānyatirātraḥ
||16||Caturthī kaṇḍikā
saṃsadā caturviṃśatirātreṇa svarge loke sīdanti
||1||atirātraścaturviṃśa ukthya ārambhaṇīyastrivṛdvā pṛṣṭhyastomaḥ ṣaḍahastrayastriṃśamaharaniruktaṃ trayastriṃśaṃ niruktaṃ triṇavaṃ dve ekaviṃśe triṇavaṃ trayastriṃśamaharniruktaṃ trayastriṃśamaniruktaṃ pṛṣṭhyastomaḥ ṣaḍahaḥ pratyaṅ trivṛdaharaniruktaṃ jyotiṣṭomo vaiśvānaro'tirātraḥ
||2||pañcaviṃśatirātraṃ paśukāmā upeyuḥ
||3||atirātro dvāvabhiplavau dvādaśāhasya daśāhāni mahāvratamatirātraśca
||4||ṣaḍviṃśatirātraṃ svargakāmā upeyuḥ
||5||atirātro goāyuṣī dvāvabhiplavau dvādaśāhasya daśāhānyatirātraḥ
||6||saptaviṃśatirātramannādyakāmā upeyuḥ
||7||atirātro jyotirgaurāyustryaho dvāvabhiplavau dvādaśāhasya daśāhānyatirātraḥ
||8||aṣṭāviṃśatirātraṃ paśukāmā upeyuḥ
||9||etā eva samahāvratāḥ
||10||ekānnatriṃśadrātreṇāparimitāṃ śriyaṃ jayanti
||11||atirātro jyotirgaurāyurgaurāyuḥpañcāho dvāvabhiplavau dvādaśāhasya daśāhānyatirātraḥ
||12||triṃśadrātramannādyakāmā upeyuḥ
||13||atirātrastrayo'bhiplavā dvādaśāhasya daśāhānyatirātraḥ
||14||Pañcamī kaṇḍikā
ekatriṃśadrātramannādyakāmā upeyuḥ
||1||etā eva samahāvratāḥ
||2||dvātriṃśadrātraṃ pratiṣṭhākāmā upeyuḥ
||3||atirātro goāyuṣī trayo'bhiplavā dvādaśāhasya daśāhānyatirātraḥ
||4||trayastrayastriṃśadrātrāḥ
||5||yaṃ kāmaṃ kāmayante tamabhyaśnuvate
||6||atirātrastrayaḥ pañcāhā viśvajidatirātra ekaḥ pañcāho dvādaśāhasya daśāhānyatirātraḥ
||7||dvitīyaṃ brahmavarcasakāmā upeyuḥ
||8||atirātro'bhiplavaḥ ṣaḍaho'tirātro'bhiplavaḥ ṣaḍaho'tirātro'bhiplavaḥ ṣaḍaho dvādaśāhasya daśāhāni mahāvratamatirātraśca
||9||tṛtīyamṛddhikāmā upeyuḥ
||10||atirātrastrayaḥ pañcāhā atirātrastrayaḥ pañcāhā atirātraḥ
||11||catustriṃśadrātramindriyakāmā upeyuḥ
||12||atirātro jyotirgaurāyustryahastrayo'bhiplavā dvādaśāhasya daśāhāni mahāvratamatirātraśca
||13||Ṣaṣṭhī kaṇḍikā
pañcatriṃśadrātraṃ paśukāmā upeyuḥ
||1||atirātro jyotirgaurāyurgaurāyuḥ pañcāhastrayo 'bhiplavā dvādaśāhasya daśāhānyatirātraḥ
||2||ṣaṭtriṃśadrātraṃ svargakāmā upeyuḥ
||3||atirātraścatvāro'bhiplavā dvādaśāhasya daśāhānyatirātraḥ
||4||saptatriṃśadrātramannādyakāmā upeyuḥ
||5||etā eva samahāvratāḥ
||6||aṣṭātriṃśadrātraṃ paśukāmā upeyuḥ
||7||atirātro goāyuṣī catvāro'bhiplavā dvādaśāhasya daśāhānyatirātraḥ
||8||ekānnacatvāriṃśadrātreṇānantāṃ śriyaṃ jayanti
||9||atirātro jyotirgaurāyustryahaścatvāro'bhiplavā dvādaśāhasya daśāhānyatirātraḥ
||10||catvāriṃśadrātreṇa paramāyāṃ virāji pratitiṣṭhanti
||11||etā eva samahāvratāḥ
||12||Saptamī kaṇḍikā
saptaikasmānnapañcāśadrātrā vidhṛtayaḥ
||1||prathamena vi pāpmanā bhrātṛvyeṇāvartante
||2||atirātrastrayastrivṛto'gniṣṭomā atirātro daśa pañcadaśā ukthyāḥ ṣoḍaśimaddaśamamaharatirātro dvādaśa saptadaśā ukthyā atirātrah pṛṣṭhyaḥ ṣaḍaho'tirātro dvādaśaikaviṃśā ukthyā atirātraḥ
||3||yamātirātro dvitīyaḥ
||4||yamevaiṣāṃ śrīrbhavati mitraśca varuṇaśca dhātā cāryamā cāṃśaśca bhagaścendraśca vivasvāṃścaitāsāṃ devatānāmṛddhimṛdhnuvanti
||5||atirātro dvāvabhiplavau goāyuṣī dvāvabhiplavāvabhijidviśvajiccātirātrāveko'bhiplavaḥ sarvastomo navasaptadaśāścātirātrau dvādaśāhasya daśāhāni mahāvratamatirātraśca
||6||āñjanābhyañjanastṛtīyaḥ
||7||yānna jānīyuryadā cāñjate'bhi cāñjate jānantyenān | śubhamevātmandadhate
||8||gaulgulavena prātaḥsavane saugandhikena mādhyaṃdine pautudraveṇa tṛtīyasavane
||9||atirātraścatvāro'bhiplavāḥ sarvastomo'tirātro dvāvabhiplavau dvādaśāhasya daśāhānyatirātraḥ
||10||saṃvatsarasaṃmitaścaturthaḥ
||11||saṃvatsarasyarddhimṛdhnuvanti
||12||atirātraścaturviṃśa ukthya ārambhaṇīyastrivṛdvā trayo'bhiplavā abhijittrayaḥ svarasāmāno divākīrtyamahastrayaḥ svarasāmāno viśvajideko'bhiplava ābṛtta āyurgaurdvādaśāhasya daśāhāni mahāvratamatirātraśca
||13||Aṣṭamī kaṇḍikā
savituḥ kakubhaḥ pañcamaḥ
||1||sarvasyānnādyasya prasavaṃ gacchanti
||2||atirātro nava trivṛntyahānyagniṣṭomamukhaḥ ṣaḍaho'tha yāni trīṇyagniṣṭomāvabhita ukthyaṃ madhye tathaiva nava pañcadaśāni tathaiva nava saptadaśāni tathaiva navaikaviṃśāni dvādaśāhasya daśāhāni mahāvratamatirātraśca
||3||ṣaṣṭhaṃ pratiṣṭhākāmā upeyuḥ
||4||atirātraścatvāro'bhiplavā mahāvrataṃ dvāvabhiplavau dvādaśāhasya daśāhānyatirātraḥ
||5||saptamenātyanyāḥ prajā bhavantyojiṣṭhā bhavanti
||6||atirātraḥ ṣaḍabhiplavā dvādaśāhasya daśāhāni mahāvratamatirātraśca
||7||ekaṣaṣṭirātramṛddhikāmā upeyuḥ
||8||deva varuṇa devayajanaṃ me dehīti devayajanamadhyavasāya juhoti
||9||atirātraścaturviṃśa ukthya ārambhaṇīyastrivṛdvā pṛṣṭhyaḥ ṣaḍahastrayo'bhiplavā abhijittrayaḥ svarasāmāno divākīrtyamahastrayaḥ svarasāmāno viśvajidāvṛttaḥ pṛṣṭhyaḥ ṣaḍaha eko'bhiplava āvṛtta āyurgaurdvādaśāhasya daśāhāni mahāvratamatirātraśca
||10||devānāṃ śatarātreṇa sarvamāyuryanti vasīyāṃso bhavanti
||11||atirātro jyotirgaurāyustryahaścaturdaśābhiplavā dvādaśāhasya daśāhāni mahāvratamatirātraśca
||12||abhiprayāyābhiṣuṇvanti samānatra vā
||13||Navamī kaṇḍikā
ādityānāmayanena prajātiṃ bhūmānaṃ gacchantyabhi svargaṃ lokaṃ jayantyeṣu lokeṣu pratitiṣṭhanti
||1||gavāmayanena vyākhyātam
||2||sarve'bhiplavāḥ
||3||māsāstrivṛtpañcadaśā madhyepṛṣṭhyā bhavanti
||4||abhijitaḥ sthāne trivṛdbṛhaspatisavaḥ | viśvajitaḥ sthāne pañcadaśa indrastoma ikthyaḥ
||5||tasmādanantaraṃ pṛṣṭhyābhiplavāvepetya dvādaśāhīyasya daśarātrasya vyūḍhā agniṣṭomāstrivṛtaḥ
||6||udbhidvalabhidbhyāmiti dvyūno māsaḥ pūryate
||7||āyuṣaṃ gāṃ copetya chandomadaśarātraḥ pratyaṅṅaṣṭācatvāriṃśaṃ catuścatvāriṃśaṃ catvāriṃśaṃ ṣaṭtriṃśaṃ dvātriṃśaṃ triṃśaṃ dve aṣṭāviṃśe pañcaviṃśaṃ caturviṃśam
||8||mahāvratodayanīyābhyāmiti dvyūno māsaḥ pūryate
||9||etenāṅgirasāmayanaṃ vyākhyātam
||10||svargakāmā uupeyuḥ
||11||trivṛto'bhiplavāḥ
||12||māsāḥ purastātpṛṣṭhyā bhavanti prāgviṣuvataḥ | ūrdhvaṃ viṣuvata upariṣṭātpṛṣṭhyāḥ pañcadaśinaḥ
||13||chandomadaśarātra ūrdhvastomaścaturviṃśaṃ pañcaviṃśaṃ dve aṣṭāviṃśe triṃśaṃ dvātriṃśaṃ ṣaṭtriṃśaṃ catvāriṃśaṃ catuścatvāriṃśamaṣṭācatvāriṃśam
||14||mahāvratodayanīyābhyāmiti dvyūno māsaḥ pūryate
||15||athaikeṣām | pṛṣṭhyā ākṣyanti cādityānāmayanamabhiplavā ākṣyanti cāṅgirasāmayanam | yadanyatpṛṣṭhābhiplavebhyastānyākṣyantītyācakṣate
||16||Daśamī kaṇḍikā
dṛtivātavatorayanena yaṃ kāmaṃ kāmayante tamabhyaśnuvate
||1||atirātrāvabhitaḥ
||2||trivṛtā māsaṃ pañcadaśena māsaṃ saptadaśena māsamekaviṃśena māsaṃ triṇavena māsaṃ trayastriṃśena māsam
||3||atha viṣuvānmahāvrataṃ vā
||4||eta evottare māsāstrayastriṃśārambhaṇāstrivṛduttamāḥ
||5||kuṇḍapāyināmayane māsaṃ dīkṣitā bhavanti
||6||prāyaṇīyayā pracarya rājānaṃ krītvopanahya nidadhati
||7||dvādaśabhirupasadbhiścaritvā haviryajñairyajante
||8||māsamagnihotraṃ juhvati | māsaṃ darśapūrṇamāsābhyāṃ yajante māsaṃ vaiśvadevena māsaṃ varuṇapraghāsairmāsaṃ sākamedhairmāsaṃ śunāsīrīyeṇa | trivṛtā māsaṃ pañcadaśena māsaṃ saptadaśena māsamekaviṃśena māsaṃ triṇavena māsam | aṣṭādaśa trayastriṃśānyahāni dvādaśāhasya daśāhāni mahāvratamatirātraśceti dvādaśa māsāḥ
||9||sarva eva bhavanti sarvāmṛddhimṛdhnuvanti
||10||atsarukaiścamasairbhakṣayanti
||11||yo hotā so'dhvaryuḥ sa potā | ya udgātā sa neṣṭā so'cchāvākaḥ | yo maitrāvaruṇaḥ sa brahmā sa pratihartā | yaḥ prastotā sa brāhmaṇācchaṃsī sa grāvastuta | yaḥ pratiprasthātā so'gnītsa unnetā | gṛhapatirgṛhapatiḥ | subrahmaṇyaḥ subrahmaṇyaḥ
||12||Ekādaśī kaṇḍikā
tapaścitāmayanaṃ svargakāmā upeyuḥ
||1||saṃvatsaraṃ dīkṣāḥ | saṃvatsaramupasadaḥ
||2||caturaścaturo māsānekaikenopasanmantreṇa juhoti
||3||anūpasadamagniṃ cinoti
||4||dvaudvau māsāvekaikā citiḥ | catura uttamā
||5||catustanaṃ tristanaṃ dvistanamekastanamiti trīṃstrīnmāsānvratāni
||6||saṃvatsaraṃ prasutāḥ
||7||prajāpaterdvādaśasaṃvatsareṇa prajāpaterṛddhimṛdhnuvanti
||8||trayastrivṛtaḥ saṃvatsarāstrayaḥ pañcadaśāstrayaḥ saptadaśāstraya ekaviṃśāḥ
||9||etadeva naimiṣīyāṇāṃ svargakāmā upeyuḥ
||10||nava trivṛtaḥ saṃvatsarā nava pañcadaśā nava saptadaśā navaikaviṃśāḥ śāktyānāṃ ṣaṭtriṃśatsaṃvatsaraṃ tarasapuroḍāśaṃ kāpyādhvaryavamāgastyagṛhapatikam
||11||saṃsthitesaṃsthite'hani gṛhapatirmṛgayāṃ yāti
||12||sa yānmṛgānhanti teṣāṃ tarasāḥ puroḍāśā bhavanti
||13||etena ha vai śāktyo gaurivītistarasapuroḍāśa ārdhnoddevaloke ca manuṣyaloke carddhimṛdhnuvanti
||14||pañcaviṃśatistrivṛtaḥ saṃvatsarāḥ pañcaviṃśatiḥ pañcadaśāḥ pañcaviṃśatiḥ saptadaśāḥ pañcaviṃśatirekaviṃśāḥ
||15||Dvādaśī kaṇḍikā
sādhyānāṃ śatasaṃvatsareṇa sagavāḥ sapuruṣāḥ svargaṃ lokaṃ yanti
||1||agneḥ sahasrasāvyena sarvasyānnādyasya prasavaṃ gacchanti
||2||atirātraḥ sahasraṃ trivṛntyahānyatirātraḥ
||3||trīṇi sārasvatāni sattrāṇi | mitrāvaruṇayoḥ prathamamindrāgniyordvitīyamaryamṇastṛtīyam
||4||sarasvatyā upamajjane dīkṣante
||5||prāyaṇīyayā pracarya rājānaṃ krītvopanahya nidadhati
||6||dvādaśabhirupasadbhiścaritvā prāyaṇīyamatirātramupetya tadaharvatsānapākurvanti
||7||saṃsthite prāyaṇīye sāṃnāyyena yajante
||8||tasminsaṃsthite'dhvaryuḥ śamyāṃ prācaḥ prāsyati
||9||sā yatra nipatati tadgārhapatyaḥ
||10||tasmātṣaṭtriṃśataṃ prācaḥ prakramānprakrāmati
||11||tadāhavanīyaḥ
||12||cakrīvanti sadohavirdhānānyāgnīdhraṃ ca
||13||āśvatthi havirdhānamāgnīdhraṃ ca
||14||ulukhalabudhno yūpaḥ prakṛṣya upopta eva
||15||noparavānkhananti
||16||ta etamāpūryamāṇapakṣamāmāvāsyena haviṣā yānti
||17||paurṇamāsyāṃ goṣṭomaṃ bṛhatsāmānamupayanti
||18||tasminsaṃsthite paurṇamāsena yajante
||19||ta etamaparapakṣaṃ paurṇamāsena haviṣā yānti
||20||amāvāsyāyāmāyuṣṭomaṃ rathaṃtarasāmānamupayanti
||21||tasminsaṃsthite sāṃnāyyena yajante
||22||ta evameva vyatyāsaṃ sarasvatyā dakṣiṇena kūlena
||23||Trayodaśī kaṇḍikā
ākrośantaḥ prāñco yānti
||1||dṛṣadvatyā apyaye'ponaptrīyaṃ caruṃ nirupyātiyanti
||2||daśasu goṣu śate varṣabhamutsṛjanti
||3||yadā daśaśataṃ kurvantyathaikamutthānaṃ yadā vā śataṃ sahasram | yadā vā gṛhapatirmriyeta yadā vā sarvasvaṃ jīyeranyadā vā plākṣaṃ prasravaṇaṃ prāpnuvanti
||4||plākṣaṃ prasravaṇaṃ prāpyāgnaye kāmāyeṣṭiṃ nirvapanti
||5||tasyāmaśvāṃ puruṣīṃ ca dhenuke dattvā kārapacavaṃ prati yanmunāmavabhṛthamabhya vayanti
||6||dvitīye trivṛdbṛhapatisavo goāyuṣī indrakukṣī
||7||atyanyāḥ prajā bhavantyojiṣṭhā bhavanti
||8||tṛtīye jyotirgaurāyurayanaṃ viśvajidabhijitāvindrakukṣī
||9||aryamṇaḥ panthānamārohanti devalokaṃ yanti
||10||dārṣadvate saṃvatsaraṃ brāhmaṇasya gā rakṣedanaṣṭaguḥ
||11||saṃvatsaraṃ vyarṇe naitandhave 'gnimindhīta
||12||pariṇahyagnimādhāya dṛṣadvatyā dakṣiṇena kūlenāgneyenāṣṭākapālena śamyāparāsīyāt
||13||triḥplakṣaṃ prati yamunāmavabhṛthamabhyavaiti
||14||tadaiva manuṣyebhyastiro bhavati
||15||Caturdaśī kaṇḍikā
turāyaṇena sarvāmṛddhimṛdhnoti
||1||adīkṣitaḥ kṛṣṇājinaṃ pratimuñcate | mānuṣīṃ tenarddhimṛdhnoti
||2||yattapastapyate daivīṃ tena
||3||havirucchiṣṭavrato bhavati
||4||saṃvatsaraṃ savanavidhā iṣṭīrnirvapati | āgneyo'ṣṭākapāla aindra ekādaśakapālo vaiśvadevo dvādaśakapālaḥ
||5||carurityeke
||6||prātaḥsavane vā sarvā
||7||sarpāṇāṃ sattreṇāpa jarāṃ ghnate | ādityānāmivaiṣāṃ prakāśaḥ
||8||sarvo daśadaśī saṃvatsaro dvādaśo viṣuvān
||9||triṣaṃvatsaraṃ gavāmayanamādityānāmaṅgirasām
||10||prajātiṃ bhūmānaṃ gacchantyabhi svargaṃ lokaṃ jayantyeṣu lokeṣu upratitiṣṭhanti
||11||prajāpateḥ sahasrasaṃvatsareṇa prajāpaterṛddhimṛdhnuvanti
||12||atirātraḥ sahasraṃ trivṛtaḥ saṃvatsarā atirātraḥ
||13||pañca pañcāśatastrivṛtaḥ saṃvatsarāḥ pañca pañcāśataḥ pañcadaśāḥ pañca pañcāśataḥ saptadaśāḥ pañca pañcāśata ekaviṃśā viśvasṛjāṃ sahasrasaṃvatsaram
||14||etena vai viśvasṛja idaṃ viśvamasṛjanta | yadviśvamasṛjanta tasmādviśvasṛjaḥ | viśvamenānanuprajāyate
||15||tatra ślokaḥ | viśvasṛjaḥ prathamā sattramāsata sahasrasamaṃ prasutena yantaḥ | tato ha jajñe bhuvanasya gopā hiraṇmayaḥ śakunirbrahmanāmeti
||16||brahmaṇaḥ sāyujyaṃ salokatāṃ yanti ya etadupayanti ya etadupayanti
||17||