Anuvāka 1
namo̍ vā̱ce yā co̍di̱tā yā cānu̍ditā̱ tasyai̍ vā̱ce namo̱ namo̍ vā̱ce namo̍ vā̱caspata̍ye̱ nama̱ ṛṣi̍bhyo mantra̱kṛdbhyo̱ mantra̍patibhyo̱ mā māmṛṣa̍yo mantra̱kṛto̍ mantra̱pata̍ya̱ḥ parā̍du̱rmāhamṛṣī̎nmantra̱kṛto̍ mantra̱patī̱nparā̍dāṃ vaiśvade̱vīṃ vāca̍mudyāsaṃ śi̱vāmada̍stā̱ṃ juṣṭā̎ṃ de̱vebhya̱ḥ śarma̍ me̱ dyauḥ śarma̍ pṛthi̱vī śarma̱ viśva̍mi̱daṃ jaga̍t.
śarma̍ ca̱ndraśca̱ sūrya̍śca̱ śarma̍ brahmaprajāpa̱tī.
bhū̱taṃ va̍diṣye̱ bhuva̍naṃ vadiṣye̱ tejo̍ vadiṣye̱ yaśo̍ vadiṣye̱ tapo̍ vadiṣye̱ brahma̍ vadiṣye sa̱tyaṃ va̍diṣye̱ tasmā̍ a̱hami̱damu̍pa̱stara̍ṇa̱mupa̍stṛṇa upa̱stara̍ṇaṃ me pra̱jāyai̍ paśū̱nāṃ bhū̍yādupa̱stara̍ṇama̱haṃ pra̱jāyai̍ paśū̱nāṃ bhū̍yāsa̱ṃ prāṇā̍pānau mṛ̱tyormā̍ pāta̱ṃ prāṇā̍pānau̱ mā mā̍ hāsiṣṭa̱ṃ madhu̍ maniṣye̱ madhu̍ janiṣye̱ madhu̍ vakṣyāmi̱ madhu̍ vadiṣyāmi̱ madhu̍matīṃ de̱vebhyo̱ vāca̍mudyāsaṃ śuśrū̱ṣeṇyā̎ṃ manu̱ṣye̎bhya̱staṃ mā̍ de̱vā a̍vantu śo̱bhāyai̍ pi̱taro'nu̍madantu.
oṃ śānti̱ḥ śānti̱ḥ śānti̍ḥ..
namo̍ vā̱ce yā co̍di̱tā yā cānu̍ditā̱ tasyai̍ vā̱ce namo̱ namo̍ vā̱ce namo̍ vā̱caspata̍ye̱ nama̱ ṛṣi̍bhyo mantra̱kṛdbhyo̱ mantra̍patibhyo̱ mā māmṛṣa̍yo mantra̱kṛto̍ mantra̱pata̍ya̱ḥ parā̍du̱rmāhamṛṣī̎nmantra̱kṛto̍ mantra̱patī̱nparā̍dāṃ vaiśvade̱vīṃ vāca̍mudyāsaṃ śi̱vāmada̍stā̱ṃ juṣṭā̎ṃ de̱vebhya̱ḥ śarma̍ me̱ dyauḥ śarma̍ pṛthi̱vī śarma̱ viśva̍mi̱daṃ jaga̍t.
śarma̍ ca̱ndraśca̱ sūrya̍śca̱ śarma̍ brahmaprajāpa̱tī.
bhū̱taṃ va̍diṣye̱ bhuva̍naṃ vadiṣye̱ tejo̍ vadiṣye̱ yaśo̍ vadiṣye̱ tapo̍ vadiṣye̱ brahma̍ vadiṣye sa̱tyaṃ va̍diṣye̱ tasmā̍ a̱hami̱damu̍pa̱stara̍ṇa̱mupa̍stṛṇa upa̱stara̍ṇaṃ me pra̱jāyai̍ paśū̱nāṃ bhū̍yādupa̱stara̍ṇama̱haṃ pra̱jāyai̍ paśū̱nāṃ bhū̍yāsa̱ṃ prāṇā̍pānau mṛ̱tyormā̍ pāta̱ṃ prāṇā̍pānau̱ mā mā̍ hāsiṣṭa̱ṃ madhu̍ maniṣye̱ madhu̍ janiṣye̱ madhu̍ vakṣyāmi̱ madhu̍ vadiṣyāmi̱ madhu̍matīṃ de̱vebhyo̱ vāca̍mudyāsaṃ śuśrū̱ṣeṇyā̎ṃ manu̱ṣye̎bhya̱staṃ mā̍ de̱vā a̍vantu śo̱bhāyai̍ pi̱taro'nu̍madantu..1..
Anuvāka 2
yu̱ñjate̱ mana̍ u̱ta yu̍ñjate̱ dhiya̍ḥ.
viprā̱ vipra̍sya bṛha̱to vi̍pa̱ścita̍ḥ.
vi hotrā̍ dadhe vayunā̱videka̱ it.
ma̱hī de̱vasya̍ savi̱tuḥ pari̍ṣṭutiḥ.
de̱vasya̍ tvā savi̱tuḥ pra̍sa̱ve.
a̱śvino̎rbā̱hubhyā̎m.
pū̱ṣṇo hastā̎bhyā̱māda̍de.
abhri̍rasi̱ nāri̍rasi.
a̱dhva̱ra̱kṛdde̱vebhya̍ḥ.
utti̍ṣṭha brahmaṇaspate..2..
de̱va̱yanta̍stvemahe.
upa̱ praya̍ntu ma̱ruta̍ḥ su̱dāna̍vaḥ.
indra̍ prā̱śūrbha̍vā̱ sacā̎.
praitu̱ brahma̍ṇa̱spati̍ḥ.
pra de̱vye̍tu sū̱nṛtā̎.
acchā̍ vī̱raṃ narya̍ṃ pa̱ṅktirā̍dhasam.
de̱vā ya̱jñaṃ na̍yantu naḥ.
devī̎ dyāvāpṛthivī̱ anu̍ me maṃsāthām.
ṛ̱ddhyāsa̍ma̱dya.
ma̱khasya̱ śira̍ḥ..3..
ma̱khāya̍ tvā.
ma̱khasya̍ tvā śī̱rṣṇe.
iya̱tyagra̍ āsīḥ.
ṛ̱ddhyāsa̍ma̱dya.
ma̱khasya̱ śira̍ḥ.
ma̱khāya̍ tvā.
ma̱khasya̍ tvā śī̱rṣṇe.
devī̎rvamrīra̱sya bhū̱tasya̍ prathamajā ṛtāvarīḥ.
ṛ̱ddhyāsa̍ma̱dya.
ma̱khasya̱ śira̍ḥ..4..
ma̱khāya̍ tvā.
ma̱khasya̍ tvā śī̱rṣṇe.
indra̱syaujo̍'si.
ṛ̱ddhyāsa̍ma̱dya.
ma̱khasya̱ śira̍ḥ.
ma̱khāya̍ tvā.
ma̱khasya̍ tvā śī̱rṣṇe.
a̱gni̱jā a̍si pra̱jāpa̍te̱ reta̍ḥ.
ṛ̱ddhyāsa̍ma̱dya.
ma̱khasya̱ śira̍ḥ..5..
ma̱khāya̍ tvā.
ma̱khasya̍ tvā śī̱rṣṇe.
āyu̍rdhehi prā̱ṇaṃ dhe̍hi.
a̱pā̱naṃ dhe̍hi vyā̱naṃ dhe̍hi.
cakṣu̍rdhehi̱ śrotra̍ṃ dhehi.
mano̍ dhehi̱ vāca̍ṃ dhehi.
ā̱tmāna̍ṃ dhehi prati̱ṣṭhāṃ dhe̍hi.
māṃ dhe̍hi̱ mayi̍ dhehi.
madhu̍ tvā madhu̱lā ka̍rotu.
ma̱khasya̱ śiro̍'si..6..
ya̱jñasya̍ pa̱de stha̍ḥ.
gā̱ya̱treṇa̍ tvā̱ chanda̍sā karomi.
traiṣṭu̍bhena tvā̱ chanda̍sā karomi.
jāga̍tena tvā̱ chanda̍sā karomi.
ma̱khasya̱ rāsnā̍'si.
adi̍tiste̱ bila̍ṃ gṛhṇātu.
pāṅkte̍na̱ chanda̍sā.
sūrya̍sya̱ hara̍sā śrāya.
ma̱kho̍'si..7..
Anuvāka 3
vṛṣṇo̱ aśva̍sya ni̱ṣpada̍si.
varu̍ṇastvā dhṛ̱tavra̍ta̱ ādhū̍payatu.
mi̱trāvaru̍ṇayordhru̱veṇa̱ dharma̍ṇā.
a̱rciṣe̎ tvā.
śo̱ciṣe̎ tvā.
jyoti̍ṣe tvā.
tapa̍se tvā.
a̱bhīmaṃ ma̍hi̱nā divam̎.
mi̱tro ba̍bhūva sa̱prathā̎ḥ.
u̱ta śrava̍sā pṛthi̱vīm..8..
mi̱trasya̍ carṣaṇī̱dhṛta̍ḥ.
śravo̍ de̱vasya̍ sāna̱sim.
dyu̱mnaṃ ci̱traśra̍vastamam.
sidhyai̎ tvā.
de̱vastvā̍ savi̱todva̍patu.
su̱pā̱ṇiḥ sva̍ṅgu̱riḥ.
su̱bā̱huru̱ta śaktyā̎.
apa̍dyamānaḥ pṛthi̱vyām.
āśā̱ diśa̱ ā pṛ̍ṇa.
utti̍ṣṭha bṛ̱hanbha̍va..9..
ū̱rdhvasti̍ṣṭhaddhru̱vastvam.
sūrya̍sya tvā̱ cakṣu̱ṣā'nvī̎kṣe.
ṛ̱jave̎ tvā.
sā̱dhave̎ tvā.
su̱kṣi̱tyai tvā̱ bhūtyai̎ tvā.
i̱dama̱hama̱mumā̍muṣyāya̱ṇaṃ vi̱śā pa̱śubhi̍rbrahmavarca̱sena̱ paryū̍hāmi.
gā̱ya̱treṇa̍ tvā̱ chanda̱sā''cchṛ̍ṇadmi.
traiṣṭu̍bhena tvā̱ chanda̱sā''cchṛ̍ṇadmi.
jāga̍tena tvā̱ chanda̱sā''cchṛ̍ṇadmi.
chṛ̱ṇattu̍ tvā̱ vāk.
chṛ̱ṇattu̱ tvork.
chṛ̱ṇattu̍ tvā ha̱viḥ.
chṛ̱ndhi vācam̎.
chṛ̱ndhyūrjam̎.
chṛ̱ndhi ha̱viḥ.
deva̍ puraścara sa̱gghyāsa̍ṃ tvā..10..
Anuvāka 4
brahma̍n prava̱rgye̍ṇa̱ praca̍riṣyāmaḥ.
hota̍rgha̱rmama̱bhiṣṭu̍hi.
agnī̱drauhi̍ṇau puro̱ḍāśā̱vadhi̍śraya.
prati̍prasthāta̱rviha̍ra.
prasto̍ta̱ḥ sāmā̍ni gāya.
yaju̍ryukta̱ṃ sāma̍bhi̱rākta̍khantvā.
viśvai̎rde̱vairanu̍mataṃ ma̱rudbhi̍ḥ.
dakṣi̍ṇābhi̱ḥ prata̍taṃ pārayi̱ṣṇum.
stubho̍ vahantu sumana̱syamā̍nam.
sa no̱ ruca̍ṃ dhe̱hyahṛ̍ṇīyamānaḥ.
bhūrbhuva̱ḥ suva̍ḥ.
omindra̍vanta̱ḥ praca̍rata..11..%
Anuvāka 5
brahma̱npraca̍riṣyāmaḥ.
hota̍rgha̱rmama̱bhiṣṭu̍hi.
ya̱māya̍ tvā ma̱khāya̍ tvā.
sūrya̍sya̱ hara̍se tvā.
prā̱ṇāya̱ svāhā̎ vyā̱nāya̱ svāhā̍'pā̱nāya̱ svāhā̎.
cakṣu̍ṣe̱ svāhā̱ śrotrā̍ya̱ svāhā̎.
mana̍se̱ svāhā̍ vā̱ce sara̍svatyai̱ svāhā̎.
dakṣā̍ya̱ svāhā̱ krata̍ve̱ svāhā̎.
oja̍se̱ svāhā̱ balā̍ya̱ svāhā̎.
de̱vastvā̍ savi̱tā madhvā̍'naktu..12..
pṛ̱thi̱vīṃ tapa̍sastrāyasva.
a̱rcira̍si śo̱cira̍si̱ jyoti̍rasi̱ tapo̍'si.
saṃsī̍dasva ma̱hāṃ a̍si.
śoca̍sva deva̱vīta̍maḥ.
vidhū̱mama̍gne aru̱ṣaṃ mi̍yedhya.
sṛ̱ja pra̍śastadarśa̱tam.
a̱ñjanti̱ yaṃ pra̱thaya̍nto̱ na viprā̎ḥ.
va̱pāva̍nta̱ṃ nāgninā̱ tapa̍ntaḥ.
pi̱turna pu̱tra upa̍si̱ preṣṭha̍ḥ.
ā gha̱rmo a̱gnimṛ̱taya̍nnasādīt..13..
a̱nā̱dhṛ̱ṣyā pu̱rastā̎t.
a̱gnerādhi̍patye.
āyu̍rme dāḥ.
pu̱trava̍tī dakṣiṇa̱taḥ.
indra̱syā''dhi̍patye.
pra̱jāṃ me̍ dāḥ.
su̱ṣadā̍ pa̱ścāt.
de̱vasya̍ savi̱turādhi̍patye.
prā̱ṇaṃ me̍ dāḥ.
āśru̍tiruttara̱taḥ..14..
mi̱trāvaru̍ṇayo̱rādhi̍patye.
śrotra̍ṃ me dāḥ.
vidhṛ̍tiru̱pari̍ṣṭāt.
bṛha̱spate̱rādhi̍patye.
brahma̍ me dāḥ kṣa̱traṃ me̍ dāḥ.
tejo̍ me dhā̱ varco̍ me dhāḥ.
yaśo̍ me dhā̱stapo̍ me dhāḥ.
mano̍ me dhāḥ.
mano̱raśvā̍'si̱ bhūri̍putrā.
viśvā̎bhyo mā nā̱ṣṭrābhya̍ḥ pāhi..15..
sū̱pa̱sadā̍ me bhūyā̱ mā mā̍ hiṃsīḥ.
tapo̱ṣva̍gne̱ anta̍rāṃ a̱mitrān̍.
tapā̱śaṃsa̍mara̱ruṣa̱ḥ para̍sya.
tapā̍vaso cikitā̱no a̱cittān̍.
vi te̍ tiṣṭhantāma̱jarā̍ a̱yāsa̍ḥ.
cita̍ḥ stha pari̱cita̍ḥ.
svāhā̍ ma̱rudbhi̱ḥ pari̍śrayasva.
mā a̍si.
pra̱mā a̍si.
pra̱ti̱mā a̍si..16..
sa̱mmā a̍si.
vi̱mā a̍si.
u̱nmā a̍si.
a̱ntari̍kṣasyānta̱rdhira̍si.
diva̱ṃ tapa̍sastrāyasva.
ā̱bhirgī̱rbhiryadato̍ na ū̱nam.
āpyā̍yaya harivo̱ vardha̍mānaḥ.
ya̱dā sto̱tṛbhyo̱ mahi̍ go̱trā ru̱jāsi̍.
bhū̱yi̱ṣṭha̱bhājo̱ adha̍ te syāma.
śu̱kraṃ te̍ a̱nyadya̍ja̱taṃ te̍ a̱nyat..17..
viṣu̍rūpe̱ aha̍nī̱ dyauri̍vāsi.
viśvā̱ hi mā̱yā ava̍si svadhāvaḥ.
bha̱drā te̍ pūṣanni̱ha rā̱tira̍stu.
arha̍nbibharṣi̱ sāya̍kāni̱ dhanva̍.
arha̍ṃ ni̱ṣkaṃ ya̍ja̱taṃ vi̱śvarū̍pam.
arha̍ṃ ni̱danda̍yase̱ viśva̱mabbhu̍vam.
na vā ojī̍yo rudra̱ tvada̍sti.
gā̱ya̱trama̍si.
traiṣṭu̍bhamasi.
jāga̍tamasi.
madhu̱ madhu̱ madhu̍..18..
Anuvāka 6
daśa̱ prācī̱rdaśa̍ bhāsi dakṣi̱ṇā.
daśa̍ pra̱tīcī̱rdaśa̍ bhā̱syudī̍cīḥ.
daśo̱rdhvā bhā̍si sumana̱syamā̍naḥ.
sa no̱ ruca̍ṃ dhe̱hyahṛ̍ṇīyamānaḥ.
a̱gniṣṭvā̱ vasu̍bhiḥ pu̱rastā̎drocayatu gāya̱treṇa̱ chanda̍sā.
sa mā̍ ruci̱to ro̍caya.
indra̍stvā ru̱drairda̍kṣiṇa̱to ro̍cayatu̱ traiṣṭu̍bhena̱ chanda̍sā.
sa mā̍ ruci̱to ro̍caya.
varu̍ṇastvādi̱tyaiḥ pa̱ścādro̍cayatu̱ jāga̍tena̱ chanda̍sā.
sa mā̍ ruci̱to ro̍caya..19..
dyu̱tā̱nastvā̍ māru̱to ma̱rudbhi̍ruttara̱to ro̍caya̱tvā'nu̍ṣṭubhena̱ chanda̍sā.
sa mā̍ ruci̱to ro̍caya.
bṛha̱spati̍stvā̱ viśvai̎rde̱vairu̱pari̍ṣṭādrocayatu̱ pāṅkte̍na̱ chanda̍sā.
sa mā̍ ruci̱to ro̍caya.
ro̱ci̱tastvaṃ de̍va gharma de̱veṣvasi̍.
ro̱ci̱ṣī̱yāhaṃ ma̍nu̱ṣye̍ṣu.
samrā̎ḍgharma ruci̱tastvaṃ de̱veṣvāyu̍ṣmāṃsteja̱svī bra̍hmavarca̱sya̍si.
ru̱ci̱to̍'haṃ ma̍nu̱ṣye̎ṣvāyu̍ṣmāṃsteja̱svī bra̍hmavarca̱sī bhū̍yāsam.
ruga̍si.
ruca̱ṃ mayi̍ dhehi..20..
mayi̱ ruk.
daśa̍ pu̱rastā̎drocase.
daśa̍ dakṣi̱ṇā.
daśa̍ pra̱tyaṅṅ.
daśodaṅṅ̍.
daśo̱rdhvo bhā̍si sumana̱syamā̍naḥ.
sa na̍ḥ samrā̱ḍiṣa̱mūrja̍ṃ dhehi.
vā̱jī vā̱jine̍ pavasva.
ro̱ci̱to gha̱rmo ru̍cī̱ya..21..
Anuvāka 7
apa̍śyaṃ go̱pāmani̍padyamānam.
ā ca̱ parā̍ ca pa̱thibhi̱ścara̍ntam.
sa sa̱dhrīcī̱ḥ sa viṣū̍cī̱rvasā̍naḥ.
ā va̍rīvarti̱ bhuva̍neṣva̱ntaḥ.
atra̍ prā̱vīḥ.
madhu̱ mādhvī̎bhyā̱ṃ madhu̱ mādhū̍cībhyām.
anu̍ vāṃ de̱vavī̍taye.
sama̱gnira̱gninā̍ gata.
saṃ de̱vena̍ savi̱trā.
saṃ sūrye̍ṇa rocate..22..
svāhā̱ sama̱gnistapa̍sā gata.
saṃ de̱vena̍ savi̱trā.
saṃ sūrye̍ṇārociṣṭa.
dha̱rtā di̱vo vibhā̍si̱ raja̍saḥ.
pṛ̱thi̱vyā dha̱rtā.
u̱rora̱ntari̍kṣasya dha̱rtā.
dha̱rtā de̱vo de̱vānā̎m.
ama̍rtyastapo̱jāḥ.
hṛ̱de tvā̱ mana̍se tvā.
di̱ve tvā̱ sūryā̍ya tvā..23..
ū̱rdhvami̱mama̍dhva̱raṃ kṛ̍dhi.
di̱vi de̱veṣu̱ hotrā̍ yaccha.
viśvā̍sāṃ bhuvāṃ pate.
viśva̍sya bhuvanaspate.
viśva̍sya manasaspate.
viśva̍sya vacasaspate.
viśva̍sya tapasaspate.
viśva̍sya brahmaṇaspate.
de̱va̱śrūstvaṃ de̍va gharma de̱vānpā̍hi.
ta̱po̱jāṃ vāca̍ma̱sme niya̍ccha devā̱yuvam̎..24..
garbho̍ de̱vānā̎m.
pi̱tā ma̍tī̱nām.
pati̍ḥ pra̱jānā̎m.
mati̍ḥ kavī̱nām.
saṃ de̱vo de̱vena̍ savi̱trā ya̍tiṣṭa.
saṃ sūrye̍ṇārukta.
ā̱yu̱rdāstvama̱smabhya̍ṃ gharma varco̱dā a̍si.
pi̱tā no̍'si pi̱tā no̍ bodha.
ā̱yu̱rdhāsta̍nū̱dhāḥ pa̍yo̱dhāḥ.
va̱rco̱dā va̍rivo̱dā dra̍viṇo̱dāḥ..25..
a̱nta̱ri̱kṣa̱pra̱ u̱rorvarī̍yān.
a̱śī̱mahi̍ tvā̱ mā mā̍ hiṃsīḥ.
tvama̍gne gṛ̱hapa̍tirvi̱śāma̍si.
viśvā̍sā̱ṃ mānu̍ṣīṇām.
śa̱taṃ pū̱rbhirya̍viṣṭha pā̱hyaṃha̍saḥ.
sa̱me̱ddhāra̍ṃ śa̱taṃ himā̎ḥ.
ta̱ndrā̱viṇa̍ṃ hārdivā̱nam.
i̱haiva rā̱taya̍ḥ santu.
tvaṣṭī̍matī te sapeya.
su̱retā̱ reto̱ dadhā̍nā.
vī̱raṃ vi̍deya̱ tava̍ sa̱ndṛśi̍.
mā'haṃ rā̱yaspoṣe̍ṇa̱ vi yo̍ṣam..26..
Anuvāka 8
de̱vasya̍ tvā savi̱tuḥ pra̍sa̱ve.
a̱śvino̎rbā̱hubhyā̎m.
pū̱ṣṇo hastā̎bhyā̱māda̍de.
adi̍tyai̱ rāsnā̍si.
iḍa̱ ehi̍.
adi̍ta̱ ehi̍.
sara̍sva̱tyehi̍.
asā̱vehi̍.
asā̱vehi̍.
asā̱vehi̍..27..
adi̍tyā u̱ṣṇīṣa̍masi.
vā̱yura̍syai̱ḍaḥ.
pū̱ṣā tvo̱pāva̍sṛjatu.
a̱śvibhyā̱ṃ pradā̍paya.
yaste̱ stana̍ḥ śaśa̱yo yo ma̍yo̱bhūḥ.
yena̱ viśvā̱ puṣya̍si̱ vāryā̍ṇi.
yo ra̍tna̱dhā va̍su̱vidyaḥ su̱datra̍ḥ.
sara̍svati̱ tami̱ha dhāta̍vekaḥ.
usra̍ gha̱rmaṃ śi̍ṃṣa.
usra̍ gha̱rmaṃ pā̍hi..28..
gha̱rmāya̍ śiṃṣa.
bṛha̱spati̱stvopa̍sīdatu.
dāna̍vaḥ stha̱ pera̍vaḥ.
vi̱ṣva̱gvṛto̱ lohi̍tena.
a̱śvibhyā̎ṃ pinvasva.
sara̍svatyai pinvasva.
pū̱ṣṇe pi̍nvasva.
bṛha̱spata̍ye pinvasva.
indrā̍ya pinvasva.
indrā̍ya pinvasva..29..
gā̱ya̱tro̍'si.
traiṣṭu̍bho'si.
jāga̍tamasi.
sa̱horjo bhā̱genopa̱mehi̍.
indrā̎śvinā̱ madhu̍naḥ sāra̱ghasya̍.
gha̱rmaṃ pā̍ta vasavo̱ yaja̍tā̱ vaṭ.
svāhā̎ tvā̱ sūrya̍sya ra̱śmaye̍ vṛṣṭi̱vana̍ye juhomi.
madhu̍ ha̱vira̍si.
sūrya̍sya̱ tapa̍stapa.
dyāvā̍pṛthi̱vībhyā̎ṃ tvā̱ pari̍gṛhṇāmi..30..
a̱ntari̍kṣeṇa̱ tvopa̍yacchāmi.
de̱vānā̎ṃ tvā pitṛ̱ṇāmanu̍mato̱ bhartu̍ṃ śakeyam.
tejo̍'si.
tejo'nu̱ prehi̍.
di̱vi̱spṛṅmā mā̍ hiṃsīḥ.
a̱nta̱ri̱kṣa̱spṛṅmā mā̍ hiṃsīḥ.
pṛ̱thi̱vi̱spṛṅmā mā̍ hiṃsīḥ.
suva̍rasi̱ suva̍rme yaccha.
diva̍ṃ yaccha di̱vo mā̍ pāhi..31..
Anuvāka 9
sa̱mu̱drāya̍ tvā̱ vātā̍ya̱ svāhā̎.
sa̱li̱lāya̍ tvā̱ vātā̍ya̱ svāhā̎.
a̱nā̱dhṛ̱ṣyāya̍ tvā̱ vātā̍ya̱ svāhā̎.
a̱pra̱ti̱dhṛ̱ṣyāya̍ tvā̱ vātā̍ya̱ svāhā̎.
a̱va̱syave̎ tvā̱ vātā̍ya̱ svāhā̎.
duva̍svate tvā̱ vātā̍ya̱ svāhā̎.
śimi̍dvate tvā̱ vātā̍ya̱ svāhā̎.
a̱gnaye̎ tvā̱ vasu̍mate̱ svāhā̎.
somā̍ya tvā ru̱drava̍te̱ svāhā̎.
varu̍ṇāya tvā''di̱tyava̍te̱ svāhā̎..32..
bṛha̱spata̍ye tvā vi̱śvade̎vyāvate̱ svāhā̎.
sa̱vi̱tre tva̍rbhu̱mate̍ vibhu̱mate̎ prabhu̱mate̱ vāja̍vate̱ svāhā̎.
ya̱māya̱ tvā'ṅgi̍rasvate pitṛ̱mate̱ svāhā̎.
viśvā̱ āśā̍ dakṣiṇa̱sat.
viśvā̎ṃ de̱vāna̍yāḍi̱ha.
svāhā̍kṛtasya gha̱rmasya̍.
madho̎ḥ pibatamaśvinā.
svāhā̱'gnaye̍ ya̱jñiyā̍ya.
śaṃ yaju̍rbhiḥ.
aśvi̍nā gha̱rmaṃ pā̍taṃ hārdivā̱nam..33..
aha̍rdi̱vābhi̍rū̱tibhi̍ḥ.
anu̍ vā̱ṃ dyāvā̍pṛthi̱vī ma̍ṃsātām.
svāhendrā̍ya.
svāhendrā̱vaṭ.
gha̱rmama̍pātamaśvinā hārdivā̱nam.
aha̍rdi̱vābhi̍rū̱tibhi̍ḥ.
anu̍ vā̱ṃ dyāvā̍pṛthi̱vī a̍maṃsātām.
taṃ prā̱vya̍ṃ yathā̱ vaṭ.
namo̍ di̱ve.
nama̍ḥ pṛthi̱vyai..34..
di̱vi dhā̍ i̱maṃ ya̱jñam.
ya̱jñami̱maṃ di̱vi dhā̎ḥ.
diva̍ṃ gaccha.
a̱ntari̍kṣaṃ gaccha.
pṛ̱thi̱vīṃ ga̍ccha.
pañca̍ pra̱diśo̍ gaccha.
de̱vāngha̍rma̱pānga̍ccha.
pi̱tṝngha̍rma̱pānga̍ccha..35..
Anuvāka 10
i̱ṣe pī̍pihi.
ū̱rje pī̍pihi.
brahma̍ṇe pīpihi.
kṣa̱trāya̍ pīpihi.
a̱dbhyaḥ pī̍pihi.
oṣa̍dhībhyaḥ pīpihi.
vana̱spati̍bhyaḥ pīpihi.
dyāvā̍pṛ̱thivībhyā̎ṃ pīpihi.
su̱bhū̱tāya̍ pīpihi.
bra̱hma̱va̱rca̱sāya̍ pīpihi..36..
yaja̍mānāya pīpihi.
mahya̱ṃ jyaiṣṭhyā̍ya pīpihi.
tviṣyai̎ tvā.
dyu̱mnāya̍ tvā.
i̱ndri̱yāya̍ tvā̱ bhūtyai̎ tvā.
dharmā̍'si su̱dharmā me̎ nya̱sme.
brahmā̍ṇi dhāraya.
kṣa̱trāṇi̍ dhāraya.
viśa̍ṃ dhāraya.
nettvā̱ vāta̍ḥ ska̱ndayā̎t..37..
a̱muṣya̍ tvā prā̱ṇe sā̍dayāmi.
a̱munā̍ sa̱ha ni̍ra̱rthaṃ ga̍ccha.
yo̎'smāndveṣṭi̍.
yaṃ ca̍ va̱yaṃ dvi̱ṣmaḥ.
pū̱ṣṇe śara̍se̱ svāhā̎.
grāva̍bhya̱ḥ svāhā̎.
pra̱ti̱rebhya̱ḥ svāhā̎.
dyāvā̍pṛthi̱vībhyā̱ṃ svāhā̎.
pi̱tṛbhyo̍ gharma̱pebhya̱ḥ svāhā̎.
ru̱drāya̍ ru̱draho̎tre̱ svāhā̎..38..
aha̱rjyoti̍ḥ ke̱tunā̍ juṣatām.
su̱jyo̱tirjyoti̍ṣā̱ṃ svāhā̎.
rātri̱rjyoti̍ḥ ke̱tunā̍ juṣatām.
su̱jyo̱tirjyoti̍ṣā̱ṃ svāhā̎.
apī̍paro̱ mā'hno̱ rātri̍yai mā pāhi.
e̱ṣā te̍ agne sa̱mit.
tayā̱ sami̍dhyasva.
āyu̍rme dāḥ.
varca̍sā māñjīḥ.
apī̍paro mā̱ rātri̍yā̱ ahno̍ mā pāhi..39..
e̱ṣā te̍ agne sa̱mit.
tayā̱ sami̍dhyasva.
āyu̍rme dāḥ.
varca̍sā māñjīḥ.
a̱gnirjyoti̱rjyoti̍ra̱gniḥ svāhā̎.
sūryo̱ jyoti̱rjyoti̱ḥ sūrya̱ḥ svāhā̎.
bhūḥ svāhā̎.
hu̱taṃ ha̱viḥ.
madhu̍ ha̱viḥ.
indra̍tame̱'gnau..40..
pi̱tā no̍'si̱ mā mā̍ hiṃsīḥ.
a̱śyāma̍ te devagharma.
madhu̍mato̱ vāja̍vataḥ pitu̱mata̍ḥ.
aṅgi̍rasvataḥ svadhā̱vina̍ḥ.
a̱śī̱mahi̍ tvā̱ mā mā̍ hiṃsīḥ.
svāhā̎ tvā̱ sūrya̍sya ra̱śmibhya̍ḥ.
svāhā̎ tvā̱ nakṣa̍trebhyaḥ..41..%
Anuvāka 11
gharma̱ yā te̍ di̱vi śuk.
yā gā̍ya̱tre chanda̍si.
yā brā̎hma̱ṇe.
yā ha̍vi̱rdhāne̎.
tānta̍ e̱tenāva̍ yaje̱ svāhā̎.
gharma̱ yā te̱'ntari̍kṣe̱ śuk.
yā traiṣṭu̍bhe̱ chanda̍si.
yā rā̍ja̱nye̎.
yā''gnī̎dhre.
tānta̍ e̱tenāva̍ yaje̱ svāhā̎..42..
gharma̱ yā te̍ pṛthi̱vyāṃ śuk.
yā jāga̍te̱ chanda̍si.
yā vaiśye̎.
yā sada̍si.
tānta̍ e̱tenāva̍ yaje̱ svāhā̎.
anu̍no̱'dyānu̍matiḥ.
anvida̍numate̱ tvam.
di̱vastvā̍ para̱spāyā̎ḥ.
a̱ntari̍kṣasya ta̱nuva̍ḥ pāhi.
pṛ̱thi̱vyāstvā̱ dharma̍ṇā..43..
va̱yamanu̍krāmāma suvi̱tāya̱ navya̍se.
brahma̍ṇastvā para̱spāyā̎ḥ.
kṣa̱trasya̍ ta̱nuva̍ḥ pāhi.
vi̱śastvā̱ dharma̍ṇā.
va̱yamanu̍krāmāma suvi̱tāya̱ navya̍se.
prā̱ṇasya̍ tvā para̱spāyai̎.
cakṣu̍ṣasta̱nuva̍ḥ pāhi.
śrotra̍sya tvā̱ dharma̍ṇā.
va̱yamanu̍krāmāma suvi̱tāya̱ navya̍se.
va̱lgura̍si śa̱ṃ yudhā̍yāḥ..44..
śiśu̱rjana̍dhāyāḥ.
śaṃ ca̱ vakṣi̱ pari̍ ca̱ vakṣi̍.
catu̍ḥ srakti̱rnābhi̍rṛ̱tasya̍.
sado̍ vi̱śvāyu̱ḥ śarma̍ sa̱prathā̎ḥ.
apa̱ dveṣo̱ apa̱ hvara̍ḥ.
a̱nyadvra̍tasya saścima.
gharmai̱tatte'nna̍me̱tatpurī̍ṣam.
tena̱ vardha̍sva̱ cā'' ca̍ pyāyasva.
va̱rdhi̱ṣī̱mahi̍ ca va̱yam.
ā ca̍ pyāsiṣī̱mahi̍..45..
ranti̱rnāmā̍si di̱vyo ga̍ndha̱rvaḥ.
tasya̍ te pa̱dvaddha̍vi̱rdhānam̎.
a̱gniradhya̍kṣāḥ.
ru̱dro'dhi̍patiḥ.
sama̱hamāyu̍ṣā.
saṃ prā̱ṇena̍.
saṃ varca̍sā.
saṃ paya̍sā.
saṃ gau̍pa̱tyena̍.
saṃ rā̱yaspoṣe̍ṇa..46..
vya̍sau.
yo̎'smāndveṣṭi̍.
yaṃ ca̍ va̱yaṃ dvi̱ṣmaḥ.
aci̍krada̱dvṛṣā̱ hari̍ḥ.
ma̱hānmi̱tro na da̍rśa̱taḥ.
saṃ sūrye̍ṇa rocate.
cida̍si samu̱drayo̍niḥ.
indu̱rdakṣa̍ḥ śye̱na ṛ̱tāvā̎.
hira̍ṇyapakṣaḥ śaku̱no bhu̍ra̱ṇyuḥ.
ma̱hānthsa̱dhasthe̎ dhru̱va āniṣa̍ttaḥ..47..
nama̍ste astu̱ mā mā̍ hiṃsīḥ.
vi̱śvāva̍suṃ soma gandha̱rvam.
āpo̍ dadṛ̱śuṣī̎ḥ.
tadṛ̱tenā̱vyā̍yan.
tada̱nvavai̎t.
indro̍ rārahā̱ṇa ā̍sām.
pari̱ sūrya̍sya pari̱dhīṃ ra̍paśyat.
vi̱śvāva̍sura̱bhi tanno̍ gṛṇātu.
di̱vyo ga̍ndha̱rvo raja̍so vi̱māna̍ḥ.
yadvā̍ ghā sa̱tyamu̱ta yanna vi̱dma..48..
dhiyo̍ hinvā̱no dhiya̱ inno̍ avyāt.
sasni̍mavinda̱ccara̍ṇe na̱dīnā̎m.
apā̍vṛṇo̱dduro̱ aśma̍vrajānām.
prāsā̎ngandha̱rvo a̱mṛtā̍ni vocat.
indro̱ dakṣa̱ṃ pari̍jānāda̱hīnam̎.
e̱tattvaṃ de̍va gharma de̱vo de̱vānupā̍gāḥ.
i̱dama̱haṃ ma̍nu̱ṣyo̍ manu̱ṣyān̍.
soma̍pī̱thānu̱mehi̍.
sa̱ha pra̱jayā̍ sa̱ha rā̱yaspoṣe̍ṇa.
su̱mi̱trā na̱ āpa̱ oṣa̍dhayaḥ santu..49..
du̱rmi̱trāstasmai̍ bhūyāsuḥ.
yo̎'smāndveṣṭi̍.
yaṃ ca̍ va̱yaṃ dvi̱ṣmaḥ.
udva̱yaṃ tama̍sa̱spari̍.
udu̱tyaṃ ci̱tram.
i̱mamū̱ṣutyama̱smabhya̍ṃ sa̱nim.
gā̱ya̱traṃ navī̍yāṃsam.
agne̍ de̱veṣu̱ pravo̍caḥ..50..
Anuvāka 12
ma̱hī̱nāṃ payo̍'si̱ vihi̍taṃ deva̱trā.
jyo̱ti̱rbhā a̍si̱ vana̱spatī̍nā̱moṣa̍dhīnā̱ṃ rasa̍ḥ.
vā̱jina̍ṃ tvā vā̱jino'va̍ nayāmaḥ.
ū̱rdhvaṃ mana̍ḥ suva̱rgam..51..
Anuvāka 13
askā̱ndyauḥ pṛ̍thi̱vīm.
askā̍nṛṣa̱bho yuvā̱gāḥ.
ska̱nnemā viśvā̱ bhuva̍nā.
ska̱nno ya̱jñaḥ praja̍nayatu.
askā̱naja̍ni̱ prāja̍ni.
ā ska̱nnājjā̍yate̱ vṛṣā̎.
ska̱nnāt praja̍niṣīmahi..52..
Anuvāka 14
yā pu̱rastā̎dvi̱dyudāpa̍tat.
tānta̍ e̱tenāva̍ yaje̱ svāhā̎.
yā da̍kṣiṇa̱taḥ.
yā pa̱ścāt.
yotta̍ra̱taḥ.
yopari̍ṣṭādvi̱dyudāpa̍tat.
tānta̍ e̱tenāva̍ yaje̱ svāhā̎..53..
Anuvāka 15
prā̱ṇāya̱ svāhā̎ vyā̱nāya̱ svāhā̍'pā̱nāya̱ svāhā̎.
cakṣu̍ṣe̱ svāhā̱ śrotrā̍ya̱ svāhā̎.
mana̍se̱ svāhā̍ vā̱ce sara̍svatyai̱ svāhā̎..54..%
Anuvāka 16
pū̱ṣṇe svāhā̍ pū̱ṣṇe śara̍se̱ svāhā̎.
pū̱ṣṇe pra̍pa̱tthyā̍ya̱ svāhā̍ pū̱ṣṇe na̱randhi̍ṣāya̱ svāhā̎.
pū̱ṣṇe'ṅghṛ̍ṇaye̱ svāhā̍ pū̱ṣṇe na̱ruṇā̍ya̱ svāhā̎.
pū̱ṣṇe sā̍ke̱tāya̱ svāhā̎..55..
Anuvāka 17
uda̍sya̱ śuṣmā̎dbhā̱nurnārta̱ bibha̍rti.
bhā̱raṃ pṛ̍thi̱vī na bhūma̍.
pra śu̱kraitu̍ de̱vī ma̍nī̱ṣā.
a̱smathsuta̍ṣṭo̱ ratho̱ na vā̱jī.
arca̍nta̱ eke̱ mahi̱ sāma̍manvata.
tena̱ sūrya̍madhārayan.
tena̱ sūrya̍marocayan.
gha̱rmaḥ śira̱stada̱yama̱gniḥ.
purī̍ṣamasi̱ saṃ pri̍yaṃ pra̱jayā̍ pa̱śubhi̍rbhuvat.
pra̱jāpati̍stvā sādayatu.
tayā̍ de̱vata̍yā'ṅgira̱svaddhru̱vā sī̍da..56..
Anuvāka 18
yāste̍ agna ā̱rdrā yona̍yo̱ yāḥ ku̍lā̱yinī̎ḥ.
ye te̍ agna̱ inda̍vo̱ yā u̱ nābha̍yaḥ.
yāste̍ agne ta̱nuva̱ ūrjo̱ nāma̍.
tābhi̱stvamu̱bhayī̍bhiḥ saṃvidā̱naḥ.
pra̱jābhi̍ragne̱ dravi̍ṇe̱ha sī̍da.
pra̱jāpa̍tistvā sādayatu.
tayā̍ de̱vata̍yā'ṅgira̱svaddhru̱vā sī̍da..57..
Anuvāka 19
a̱gnira̍si vaiśvāna̱ro̍'si.
sa̱ṃva̱thsa̱ro̍'si parivathsa̱ro̍'si.
i̱dā̱va̱thsa̱ro̍'sīduvathsa̱ro̍'si.
i̱dva̱thsa̱ro̍'si vathsa̱ro̍'si.
tasya̍ te vasa̱ntaḥ śira̍ḥ.
grī̱ṣmo dakṣi̍ṇaḥ pa̱kṣaḥ.
va̱ṟṣāḥ puccham̎.
śa̱radutta̍raḥ pa̱kṣaḥ.
he̱ma̱nto madhyam̎.
pū̱rva̱pa̱kṣāścita̍yaḥ.
a̱pa̱ra̱pa̱kṣāḥ purī̍ṣam.
a̱ho̱rā̱trāṇīṣṭa̍kāḥ.
tasya̍ te̱ māsā̎ścārdhamā̱sāśca̍ kalpantām.
ṛ̱tava̍ste kalpantām.
sa̱ṃva̱thsa̱raste̍ kalpatām.
a̱ho̱rā̱trāṇi̍ te kalpantām.
eti̱ preti̱ vīti̱ samityuditi̍.
pra̱jāpa̍tistvā sādayatu.
tayā̍ de̱vata̍yā'ṅgira̱svaddhru̱vaḥ sī̍da..58..
Anuvāka 20
bhūrbhuva̱ḥ suva̍ḥ.
ū̱rdhva ū̱ ṣu ṇa̍ ū̱taye̎.
ū̱rdhvo na̍ḥ pā̱hyaṃha̍saḥ.
vi̱dhunda̍drā̱ṇaṃ sama̍ne bahū̱nām.
yuvā̍na̱ṃ santa̍ṃ pali̱to ja̍gāra.
de̱vasya̍ paśya̱ kāvya̍ṃ mahi̱tvādyā ma̱māra̍.
sahya̱ḥ samā̍na.
yadṛ̱te ci̍dabhi̱śriṣa̍ḥ.
pu̱rā ja̱rtṛbhya̍ ā̱tṛda̍ḥ.
sandhā̍tā sa̱ndhiṃ ma̱ghavā̍ puro̱vasu̍ḥ..59..
niṣka̍rtā̱ vihru̍ta̱ṃ puna̍ḥ.
puna̍rū̱rjā sa̱ha ra̱yyā.
mā no̍ gharma vyathi̱to vi̍vyatho naḥ.
mā na̱ḥ para̱madha̍ra̱ṃ mā rajo̍'naiḥ.
moṣva̍smāṃ stama̍syanta̱rā dhā̎ḥ.
mā ru̱driyā̍so a̱bhigu̍rvṛ̱dhāna̍ḥ.
mā na̱ḥ kratu̍bhirhīḍi̱tebhi̍ra̱smān.
dviṣā̍sunīte̱ mā parā̍ dāḥ.
mā no̍ ru̱dro nirṛ̍ti̱rmā no̱ astā̎.
mā dyāvā̍pṛthi̱vī hī̍ḍiṣātām..60..
upa̍ no mitrāvaruṇāvi̱hāva̍tam.
a̱nvādī̎dhyāthāmi̱ha na̍ḥ sakhāyā.
ā̱di̱tyānā̱ṃ prasi̍tirhe̱tiḥ.
u̱grā śa̱tāpā̎ṣṭhā gha̱viṣā̱ pari̍ ṇo vṛṇaktu.
i̱maṃ me̍ varuṇa̱ tattvā̍ yāmi.
tvaṃ no̍ agne̱ sa tvaṃ no̍ agne.
tvama̍gne a̱yāsi̍.
udva̱yaṃ tama̍sa̱spari̍.
udu̱tyaṃ ci̱tram.
vaya̍ḥ supa̱rṇāḥ..61..
Anuvāka 21
bhūrbhuva̱ḥ suva̍ḥ.
mayi̱ tyadi̍ndri̱yaṃ ma̱hat.
mayi̱ dakṣo̱ mayi̱ kratu̍ḥ.
mayi̍ dhāyi su̱vīryam̎.
triśu̍ggha̱rmo vibhā̍tu me.
ākū̎tyā̱ mana̍sā sa̱ha.
vi̱rājā̱ jyoti̍ṣā sa̱ha.
ya̱jñena̱ paya̍sā sa̱ha.
brahma̍ṇā̱ teja̍sā sa̱ha.
kṣa̱treṇa̱ yaśa̍sā sa̱ha.
sa̱tyena̱ tapa̍sā sa̱ha.
tasya̱ doha̍maśīmahi.
tasya̍ su̱mnama̍śīmahi.
tasya̍ bha̱kṣama̍śīmahi.
tasya̍ ta̱ indre̍ṇa pī̱tasya̱ madhu̍mataḥ.
upa̍hūta̱syopa̍hūto bhakṣayāmi..62..
Anuvāka 22
yāste̍ agne gho̱rāsta̱nuva̍ḥ.
kṣucca̱ tṛṣṇā̍ ca.
asnu̱kcānā̍hutiśca.
a̱śa̱na̱yā ca̍ pipā̱sā ca̍.
se̱diścāma̍tiśca.
e̱tāste̍ agne gho̱rāsta̱nuva̍ḥ.
tābhi̍ra̱muṃ ga̍ccha.
yo̎'smāndveṣṭi̍.
yaṃ ca̍ va̱yaṃ dvi̱ṣmaḥ..63..
Anuvāka 23
snikca̱ snīhi̍tiśca̱ snihi̍tiśca.
u̱ṣṇā ca̍ śī̱tā ca̍.
u̱grā ca̍ bhī̱mā ca̍.
sa̱dāmnī̍ se̱dirani̍rā.
e̱tāste̍ agne gho̱rāsta̱nuva̍ḥ.
tābhi̍ra̱muṃ ga̍ccha.
yo̎'smāndveṣṭi̍.
yaṃ ca̍ va̱yaṃ dvi̱ṣmaḥ..64..
Anuvāka 24
dhuni̍śca dhvā̱ntaśca̍ dhva̱naśca̍ dhva̱naya̍ṃśca.
ni̱li̱mpaśca̍ vili̱mpaśca̍ vikṣi̱paḥ..65..
Anuvāka 25
u̱graśca̱ dhuni̍śca dhvā̱ntaśca̍ dhva̱naśca̍ dhva̱naya̍ṃśca.
sa̱ha̱sa̱hvāṃśca̱ saha̍mānaśca̱ saha̍svāṃśca̱ sahī̍yāṃśca.
etya̱ pretya̍ vikṣi̱paḥ..66..
Anuvāka 26
a̱ho̱rā̱tre tvodī̍rayatām.
a̱rdha̱mā̱sāstvodī̎ṃ jayantu.
māsā̎stvā śrapayantu.
ṛ̱tava̍stvā pacantu.
sa̱ṃva̱thsa̱rastvā̍ hantvasau..67..
Anuvāka 27
khaṭ phaḍ ja̱hi.
chi̱ndhī bhi̱ndhī ha̱ndhī kaṭ.
iti̱ vāca̍ḥ krūrā̱ṇi..68..
Anuvāka 28
vigā i̍ndra vi̱cara̎nthspāśayasva.
sva̱panta̍mindra paśu̱manta̍miccha.
vajre̍ṇā̱muṃ bo̍dhaya durvi̱datram̎.
sva̱pa̱to̎'sya̱ praha̍ra̱ bhoja̍nebhyaḥ.
agne̍ a̱gninā̱ saṃva̍dasva.
mṛtyo̍ mṛ̱tyunā̱ saṃva̍dasva.
nama̍ste astu bhagavaḥ.
sa̱kṛtte̍ agne̱ nama̍ḥ.
dviste̱ nama̍ḥ.
triste̱ nama̍ḥ.
ca̱tuste̱ nama̍ḥ.
pa̱ñca̱kṛtva̍ste̱ nama̍ḥ.
da̱śa̱kṛtva̍ste̱ nama̍ḥ.
śa̱ta̱kṛtva̍ste̱ nama̍ḥ.
ā̱sa̱ha̱sra̱kṛtva̍ste̱ nama̍ḥ.
a̱pa̱ri̱mi̱ta̱kṛtva̍ste̱ nama̍ḥ.
nama̍ste astu̱ mā mā̍ hiṃsīḥ..69..
Anuvāka 29
asṛ̍nmukho rudhi̱reṇā̱vya̍ktaḥ.
ya̱masya̍ dū̱taḥ śvapā̱dvidhā̍vasi.
gṛdhra̍ḥ supa̱rṇaḥ ku̱ṇapa̱ṃ niṣe̍vase.
ya̱masya̍ dū̱taḥ prahi̍to bha̱vasya̍ co̱bhayo̎ḥ..70..%
Anuvāka 30
yade̱tadvṛ̍ka̱so bhū̱tvā.
vāgde̎vyabhi̱rāya̍si.
dvi̱ṣanta̍ṃ me̱'bhirā̍ya.
taṃ mṛ̍tyo mṛ̱tyave̍ naya.
sa ārtyā''rti̱mārccha̍tu..71..%
Anuvāka 31
yadī̍ṣi̱to yadi̍ vā svakā̱mī.
bha̱yeḍa̍ko̱ vada̍ti̱ vāca̍me̱tām.
tāmi̍ndrā̱gnī brahma̍ṇā saṃvidā̱nau.
śi̱vāma̱smabhya̍ṃ kṛṇutaṃ gṛ̱heṣu̍..72..%
Anuvāka 32
dīrgha̍mukhi̱ durha̍ṇu.
mā sma̍ dakṣiṇa̱to va̍daḥ.
yadi̍ dakṣiṇa̱to vadā̎ddvi̱ṣanta̱ṃ me'va̍ bādhāsai..73..
Anuvāka 33
i̱tthādulū̍ka̱ āpa̍ptat.
hi̱ra̱ṇyā̱kṣo ayo̍mukhaḥ.
rakṣa̍sāṃ dū̱ta āga̍taḥ.
tami̱to nā̍śayāgne..74..
Anuvāka 34
yade̱tadbhū̱tānya̍nvā̱viśya̍.
daivī̱ṃ vāca̍ṃ va̱dasi̍.
dvi̱ṣato̍ na̱ḥ parā̍vada.
tānmṛ̍tyo mṛ̱tyave̍ naya.
ta ārtyā''rti̱mārccha̍ntu.
a̱gninā̱'gniḥ saṃva̍datām..75..
Anuvāka 35
pra̱sārya̍ sa̱kthyau̍ pata̍si.
sa̱vyamakṣi̍ ni̱pepi̍ ca.
meha ka̍sya ca̱ nāma̍mat..76..
Anuvāka 36
atri̍ṇā tvā krime hanmi.
kaṇve̍na ja̱mada̍gninā.
vi̱śvāva̍so̱rbrahma̍ṇā ha̱taḥ.
krimī̍ṇā̱ṃ rājā̎.
apye̍ṣāṃ stha̱pati̍rha̱taḥ.
atho̍ mā̱tā'tho̍ pi̱tā.
atho̎ sthū̱rā atho̎ kṣu̱drāḥ.
atho̍ kṛ̱ṣṇā atho̎ śve̱tāḥ.
atho̍ ā̱śāti̍kā ha̱tāḥ.
śve̱tābhi̍ḥ sa̱ha sarve̍ ha̱tāḥ..77..
Anuvāka 37
āha̱rāva̍dya.
śṛ̱tasya̍ ha̱viṣo̱ yathā̎.
tathsa̱tyam.
yada̱muṃ ya̱masya̱ jambha̍yoḥ.
āda̍dhāmi̱ tathā̱ hi tat.
khaṇphaṇmrasi̍..78..
Anuvāka 38
brahma̍ṇā tvā śapāmi.
brahma̍ṇastvā śa̱pathe̍na śapāmi.
gho̱reṇa̍ tvā̱ bhṛgū̍ṇā̱ṃ cakṣu̍ṣā̱ prekṣe̎.
rau̱dreṇa̱ tvāṅgi̍rasā̱ṃ mana̍sā dhyāyāmi.
a̱ghasya̍ tvā̱ dhāra̍yā viddhyāmi.
adha̍ro̱ matpa̍dyasvāsau..79..%
Anuvāka 39
uttu̍da śimijāvari.
talpe̍je̱ talpa̱ uttu̍da.
gi̱rīṃ ranu̱ prave̍śaya.
marī̍cī̱rupa̱ sannu̍da.
yāva̍di̱taḥ pu̱rastā̍du̱dayā̍ti̱ sūrya̍ḥ.
tāva̍di̱to̍'muṃ nā̍śaya.
yo̎'smāndveṣṭi̍.
yaṃ ca̍ va̱yaṃ dvi̱ṣmaḥ..80..%
Anuvāka 40
bhūrbhuva̱ḥ suvo̱ bhūrbhuva̱ḥ suvo̱ bhūrbhuva̱ḥ suva̍ḥ.
bhuvo̎'ddhāyi̱ bhuvo̎'ddhāyi̱ bhuvo̎'ddhāyi.
nṛ̱mṇāyi nṛ̱mṇaṃ nṛ̱mṇāyi nṛ̱mṇaṃ nṛ̱mṇāyi nṛ̱mṇam.
ni̱dhāyyo̍ vāyi ni̱dhāyyo̍ vāyi ni̱dhāyyo̍ vāyi.
e a̱sme a̱sme.
suva̱rna jyotī̎ḥ..81..
Anuvāka 41
pṛ̱thi̱vī sa̱mit.
tāma̱gniḥ sami̍ndhe.
sā'gniṃ sami̍ndhe.
tāma̱haṃ sami̍ndhe.
sā mā̱ sami̍ddhā.
āyu̍ṣā̱ teja̍sā.
varca̍sā śri̱yā.
yaśa̍sā brahmavarca̱sena̍.
a̱nnādye̍na̱ sami̍ntā̱ṃ svāhā̎.
a̱ntari̍kṣaṃ sa̱mit..82..
tāṃ vā̱yuḥ sami̍ndhe.
sā vā̱yuṃ sami̍ndhe.
tāma̱haṃ sami̍ndhe.
sā mā̱ sami̍ddhā.
āyu̍ṣā̱ teja̍sā.
varca̍sā śri̱yā.
yaśa̍sā brahmavarca̱sena̍.
a̱nnādye̍na̱ sami̍ntā̱ṃ svāhā̎.
dyauḥ sa̱mit.
tāmā̍di̱tyaḥ sami̍ndhe..83..
sā''di̱tyaṃ sami̍ndhe.
tāma̱haṃ sami̍ndhe.
sā mā̱ sami̍ddhā.
āyu̍ṣā̱ teja̍sā.
varca̍sā śri̱yā.
yaśa̍sā brahmavarca̱sena̍.
a̱nnādye̍na̱ sami̍ntā̱ṃ svāhā̎.
prā̱jā̱pa̱tyā me̍ sa̱mida̍si sapatna̱kṣaya̍ṇī.
bhrā̱tṛ̱vya̱hā me̍'si̱ svāhā̎.
agne̎ vratapate vra̱taṃ ca̍riṣyāmi..84..
taccha̍keya̱ṃ tanme̍ rādhyatām.
vāyo̎ vratapata̱ ādi̍tya vratapate.
vra̱tānā̎ṃ vratapate vra̱taṃ ca̍riṣyāmi.
taccha̍keya̱ṃ tanme̍ rādhyatām.
dyauḥ sa̱mit.
tāmā̍di̱tyaḥ sami̍ndhe.
sā''di̱tyaṃ sami̍ndhe.
tāma̱haṃ sami̍ndhe.
sā mā̱ sami̍ddhā.
āyu̍ṣā̱ teja̍sā..85..
varca̍sā śri̱yā.
yaśa̍sā brahmavarca̱sena̍.
a̱nnādye̍na̱ sami̍ntā̱ṃ svāhā̎.
a̱ntari̍kṣaṃ sa̱mit.
tāṃ vā̱yuḥ sami̍ndhe.
sā vā̱yuṃ sami̍ndhe.
tāma̱haṃ sami̍ndhe.
sā mā̱ sami̍ddhā.
āyu̍ṣā̱ teja̍sā.
varca̍sā śri̱yā..86..
yaśa̍sā brahmavarca̱sena̍.
a̱nnādye̍na̱ sami̍ntā̱ṃ svāhā̎.
pṛ̱thi̱vī sa̱mit.
tāma̱gniḥ sami̍ndhe.
sā'gniṃ sami̍ndhe.
tāma̱haṃ sami̍ndhe.
sā mā̱ sami̍ddhā.
āyu̍ṣā̱ teja̍sā.
varca̍sā śri̱yā.
yaśa̍sā brahmavarca̱sena̍..87..
a̱nnādye̍na̱ sami̍ntā̱ṃ svāhā̎.
prā̱jā̱pa̱tyā me̍ sa̱mida̍si sapatna̱kṣaya̍ṇī.
bhrā̱tṛ̱vya̱hā me̍'si̱ svāhā̎.
ādi̍tya vratapate vra̱tama̍cāriṣam.
tada̍śaka̱ṃ tanme̍'rādhi.
vāyo̎ vratapa̱te'gne̎ vratapate.
vra̱tānā̎ṃ vratapate vra̱tama̍cāriṣam.
tada̍śaka̱ṃ tanme̍'rādhi..88..
Anuvāka 42
śaṃ no̱ vāta̍ḥ pavatāṃ māta̱riśvā̱ śaṃ na̍stapatu̱ sūrya̍ḥ.
ahā̍ni̱śaṃ bha̍vantu na̱ḥ śaṃ rātri̱ḥ prati̍dhīyatām.
śamu̱ṣā no̱ vyu̍cchatu̱ śamā̍di̱tya ude̍tu naḥ.
śi̱vā na̱ḥ śanta̍mā bhava sumṛḍī̱kā sara̍svati.
mā te̱ vyo̍ma sa̱ndṛśi̍.
iḍā̍yai̱ vāstva̍si vāstu̱madvā̎stu̱manto̍ bhūyāsma̱ mā vāsto̎śchithsmahyavā̱stuḥ sa bhū̍yā̱dyo̎'smāndveṣṭi̱ yaṃ ca̍ va̱yaṃ dvi̱ṣmaḥ.
pra̱ti̱ṣṭhāsi̍ prati̱ṣṭhāva̍nto bhūyāsma̱ mā pra̍ti̱ṣṭhāyā̎śchithsmahyaprati̱ṣṭhaḥ sa bhū̍yā̱dyo̎'smāndveṣṭi̱ yaṃ ca̍ va̱yaṃ dvi̱ṣmaḥ.
ā vā̍ta vāhi bheṣa̱jaṃ vi vā̍ta vāhi̱ yadrapa̍ḥ.
tvaṃ hi vi̱śvabhe̍ṣajo de̱vānā̎ṃ dū̱ta īya̍se.
dvāvi̱mau vātau̍ vāta̱ ā sindho̱rā pa̍rā̱vata̍ḥ..89..
dakṣa̍ṃ me a̱nya ā̱vātu̱ parā̱nyo vā̍tu̱ yadrapa̍ḥ.
yada̱do vā̍tate gṛ̱he̍'mṛta̍sya ni̱dhirhi̱taḥ.
tato̍ no dehi jī̱vase̱ tato̍ no dhehi bheṣa̱jam.
tato̍ no̱ maha̱ āva̍ha̱ vāta̱ āvā̍tu bheṣa̱jam.
śa̱mbhūrma̍yo̱bhūrno̍ hṛ̱de pra ṇa̱ āyū̍ṃṣi tāriṣat.
indra̍sya gṛ̱ho̍'si̱ taṃ tvā̱ prapa̍dye̱ sagu̱ḥ sāśva̍ḥ.
sa̱ha yanme̱ asti̱ tena̍.
bhūḥ prapa̍dye̱ bhuva̱ḥ prapa̍dye̱ suva̱ḥ prapa̍dye̱ bhūrbhuva̱ḥ suva̱ḥ prapa̍dye vā̱yuṃ prapa̱dye'nā̎rtāṃ de̱vatā̱ṃ prapa̱dye'śmā̍namākha̱ṇaṃ prapa̍dye pra̱jāpa̍terbrahmako̱śaṃ brahma̱ prapa̍dya̱ oṃ prapa̍dye.
a̱ntari̍kṣaṃ ma u̱rva̍ntara̍ṃ bṛ̱hada̱gnaya̱ḥ parva̍tāśca̱ yayā̱ vāta̍ḥ sva̱styā sva̍sti̱māntayā̎ sva̱styā sva̍sti̱māna̍sāni.
prāṇā̍pānau mṛ̱tyormā̍ pāta̱ṃ prāṇā̍pānau̱ mā mā̍ hāsiṣṭa̱ṃ mayi̍ me̱dhāṃ mayi̍ pra̱jāṃ mayya̱gnistejo̍ dadhātu̱ mayi̍ me̱dhāṃ mayi̍ pra̱jāṃ mayīndra̍ indri̱yaṃ da̍dhātu̱ mayi̍ me̱dhāṃ mayi̍ pra̱jāṃ mayi̱ sūryo̱ bhrājo̍ dadhātu..90..
dyu̱bhira̱ktubhi̱ḥ pari̍pātama̱smānari̍ṣṭebhiraśvinā̱ saubha̍gebhiḥ.
tanno̍ mi̱tro varu̍ṇo māmahantā̱madi̍ti̱ḥ sindhu̍ḥ pṛthi̱vī u̱ta dyauḥ.
kayā̍ naści̱tra ā bhu̍vadū̱tī sa̱dāvṛ̍dha̱ḥ sakhā̎.
kayā̱ śaci̍ṣṭhayā vṛ̱tā.
kastvā̍ sa̱tyo madā̍nā̱ṃ maṃhi̍ṣṭho mathsa̱dandha̍saḥ.
dṛ̱ḍhāci̍dā̱ruje̱ vasu̍.
a̱bhī ṣu ṇa̱ḥ sakhī̍nāmavi̱tā ja̍ritṝ̱ṇām.
śa̱taṃ bha̍vāsyū̱tibhi̍ḥ.
vaya̍ḥ supa̱rṇā upa̍sedu̱rindra̍ṃ pri̱yame̍dhā̱ ṛṣa̍yo̱ nādha̍mānāḥ.
apa̍ dhvā̱ntamū̎rṇu̱hi pū̱rdhi cakṣu̍rmumu̱gdhya̍smānni̱dhaye̍va ba̱ddhān..91..
śaṃ no̍ de̱vīra̱bhiṣṭa̍ya̱ āpo̍ bhavantu pī̱taye̎.
śa̱ṃ yora̱bhisra̍vantu naḥ.
īśā̍nā̱ vāryā̍ṇā̱ṃ kṣaya̍ntīścarṣaṇī̱nām.
a̱po yā̍cāmi bheṣa̱jam.
su̱mi̱trā na̱ āpa̱ oṣa̍dhayaḥ santu durmi̱trāstasmai̍ bhūyāsu̱ryo̎'smāndveṣṭi̱ yaṃ ca̍ va̱yaṃ dvi̱ṣmaḥ.
āpo̱ hi ṣṭhā ma̍yo̱bhuva̱stā na̍ ū̱rje da̍dhātana.
ma̱he raṇā̍ya̱ cakṣa̍se.
yo va̍ḥ śi̱vata̍mo̱ rasa̱stasya̍ bhājayate̱ha na̍ḥ.
u̱śa̱tīri̍va mā̱tara̍ḥ.
tasmā̱ ara̍ṃ gamāma vo̱ yasya̱ kṣayā̍ya̱ jinva̍tha..92..
āpo̍ ja̱naya̍thā ca naḥ.
pṛ̱thi̱vī śā̱ntā sā'gninā̍ śā̱ntā sā me̍ śā̱ntā śuca̍ṃ śamayatu.
a̱ntari̍kṣaṃ śā̱ntaṃ tadvā̱yunā̍ śā̱ntaṃ tanme̍ śā̱ntaṃ śuca̍ṃ śamayatu.
dyauḥ śā̱ntā sā''di̱tyena̍ śā̱ntā sā me̍ śā̱ntā śuca̍ṃ śamayatu.
pṛ̱thi̱vī śānti̍ra̱ntari̍kṣa̱ṃ śānti̱rdyauḥ śānti̱rdiśa̱ḥ śānti̍ravāntaradi̱śāḥ śānti̍ra̱gniḥ śānti̍rvā̱yuḥ śānti̍rādi̱tyaḥ śānti̍śca̱ndramā̱ḥ śānti̱rnakṣa̍trāṇi̱ śānti̱rāpa̱ḥ śānti̱roṣa̍dhaya̱ḥ śānti̱rvana̱spata̍ya̱ḥ śānti̱rgauḥ śānti̍ra̱jā śānti̱raśva̱ḥ śānti̱ḥ puru̍ṣa̱ḥ śānti̱rbrahma̱ śānti̍rbrāhma̱ṇaḥ śānti̱ḥ śānti̍re̱va śānti̱ḥ śānti̍rme astu̱ śānti̍ḥ.
tayā̱haṃ śā̱ntyā sa̍rvaśā̱ntyā mahya̍ṃ dvi̱pade̱ catu̍ṣpade ca̱ śānti̍ṃ karomi̱ śānti̍rme astu̱ śānti̍ḥ.
eha̱ śrīśca̱ hrīśca̱ dhṛti̍śca̱ tapo̍ me̱dhā pra̍ti̱ṣṭhā śra̱ddhā sa̱tyaṃ dharma̍ścai̱tāni̱ motti̍ṣṭhanta̱manūtti̍ṣṭhantu̱ mā mā̱ṃ śrīśca̱ hrīśca̱ dhṛti̍śca̱ tapo̍ me̱dhā pra̍ti̱ṣṭhā śra̱ddhā sa̱tyaṃ dharma̍ścai̱tāni̍ mā̱ mā hā̍siṣuḥ.
udāyu̍ṣā svā̱yuṣodoṣa̍dhīnā̱ṃ rase̱notpa̱rjanya̍sya̱ śuṣme̱ṇoda̍sthāma̱mṛtā̱ṃ anu̍.
taccakṣu̍rde̱vahi̍taṃ pu̱rastā̎cchu̱kramu̱ccara̍t.
paśye̍ma śa̱rada̍ḥ śa̱taṃ jīve̍ma śa̱rada̍ḥ śa̱taṃ nandā̍ma śa̱rada̍ḥ śa̱taṃ modā̍ma śa̱rada̍ḥ śa̱taṃ bhavā̍ma śa̱rada̍ḥ śa̱taṃ śṛ̱ṇavā̍ma śa̱rada̍ḥ śa̱taṃ prabra̍vāma śa̱rada̍ḥ śa̱tamajī̍tāḥ syāma śa̱rada̍ḥ śa̱taṃ jyokca̱ sūrya̍ṃ dṛ̱śe.
ya uda̍gānmaha̱to'rṇavā̎dvi̱bhrāja̍mānaḥ sari̱rasya̱ madhyā̱thsa mā̍ vṛṣa̱bho lo̍hitā̱kṣaḥ sūryo̍ vipa̱ścinmana̍sā punātu.
brahma̍ṇa̱ścota̍nyasi̱ brahma̍ṇa ā̱ṇī stho̱ brahma̍ṇa ā̱vapa̍namasi dhāri̱teyaṃ pṛ̍thi̱vī brahma̍ṇā ma̱hī dhā̍ri̱tame̍nena ma̱hada̱ntari̍kṣa̱ṃ diva̍ṃ dādhāra pṛthi̱vīṃ sade̍vā̱ṃ yada̱haṃ veda̱ tada̱haṃ dhā̍rayāṇi̱ mā madvedo'dhi̱visra̍sat.
me̱dhā̱ma̱nī̱ṣe māvi̍śatāṃ sa̱mīcī̍ bhū̱tasya̱ bhavya̱syāva̍rudhyai̱ sarva̱māyu̍rayāṇi̱ sarva̱māyu̍rayāṇi.
ā̱bhirgī̱rbhiryadato̍ na ū̱namāpyā̍yaya harivo̱ vardha̍mānaḥ.
ya̱dā sto̱tṛbhyo̱ mahi̍ go̱trā ru̱jāsi̍ bhūyiṣṭha̱bhājo̱ adha̍ te syāma.
brahma̱ prāvā̍diṣma̱ tanno̱ mā hā̍sīt..93..
namo̍ vā̱ce yā co̍di̱tā yā cānu̍ditā̱ tasyai̍ vā̱ce namo̱ namo̍ vā̱ce namo̍ vā̱caspata̍ye̱ nama̱ ṛṣi̍bhyo mantra̱kṛdbhyo̱ mantra̍patibhyo̱ mā māmṛṣa̍yo mantra̱kṛto̍ mantra̱pata̍ya̱ḥ parā̍du̱rmāhamṛṣī̎nmantra̱kṛto̍ mantra̱patī̱nparā̍dāṃ vaiśvade̱vīṃ vāca̍mudyāsaṃ śi̱vāmada̍stā̱ṃ juṣṭā̎ṃ de̱vebhya̱ḥ śarma̍ me̱ dyauḥ śarma̍ pṛthi̱vī śarma̱ viśva̍mi̱daṃ jaga̍t.
śarma̍ ca̱ndraśca̱ sūrya̍śca̱ śarma̍ brahmaprajāpa̱tī.
bhū̱taṃ va̍diṣye̱ bhuva̍naṃ vadiṣye̱ tejo̍ vadiṣye̱ yaśo̍ vadiṣye̱ tapo̍ vadiṣye̱ brahma̍ vadiṣye sa̱tyaṃ va̍diṣye̱ tasmā̍ a̱hami̱damu̍pa̱stara̍ṇa̱mupa̍stṛṇa upa̱stara̍ṇaṃ me pra̱jāyai̍ paśū̱nāṃ bhū̍yādupa̱stara̍ṇama̱haṃ pra̱jāyai̍ paśū̱nāṃ bhū̍yāsa̱ṃ prāṇā̍pānau mṛ̱tyormā̍ pāta̱ṃ prāṇā̍pānau̱ mā mā̍ hāsiṣṭa̱ṃ madhu̍ maniṣye̱ madhu̍ janiṣye̱ madhu̍ vakṣyāmi̱ madhu̍ vadiṣyāmi̱ madhu̍matīṃ de̱vebhyo̱ vāca̍mudyāsaṃ śuśrū̱ṣeṇyā̎ṃ manu̱ṣye̎bhya̱staṃ mā̍ de̱vā a̍vantu śo̱bhāyai̍ pi̱taro'nu̍madantu.
oṃ śānti̱ḥ śānti̱ḥ śānti̍ḥ..