ataḥ śuddhiṃ pravakṣyāmi janane maraṇe tathā
dinatrayeṇa śudhyanti brāhmaṇāḥ pretasūtake
||1||kṣatriyo dvādaśāhena vaiśyaḥ pañcadaśāhakaiḥ
śūdraḥ śudhyati māsena parāśaravaco yathā
||2||upāsane tu viprāṇāmaṅgaśuddhiśca jāyate
brāhmaṇānāṃ prasūtau tu dehasparśo vidhīyate
||3||jātau vipro daśāhena dvādaśāhena bhūmipaḥ
vaiśyaḥ pañcadaśāhena śūdro māsena śudhyati
||4||ekāhācchudhyate vipro yo'gnivedasamanvitaḥ
tryahātkevalavedastu dvihīno daśabhirdinaiḥ
||5||janmakarmaparibhraṣṭaḥ saṃdhyopāsanavarjitaḥ
nāmadhārakaviprastu daśāhaṃ sūtakī bhavet
||6||ekapiṇḍāstu dāyādāḥ pṛthagdāraniketanāḥ
janmanyapi vipattau ca teṣāṃ tatsūtakaṃ bhavet
||7||tāvattatsūtakaṃ gotre caturthapuruṣeṇa tu
dāyādvicchedamāpnoti pañcamo vātmavaṃśajaḥ
||8||caturthe daśarātraṃ syātṣaṇṇiśāḥ puṃsi pañcame
ṣaṣṭhe caturahācchuddhiḥ saptame tu dinatrayāt
||9||bhṛgvagnimaraṇe caiva deśāntaramṛte tathā
bāle prete ca saṃnyaste sadyaḥ śaucaṃ vidhīyate
||10||deśāntaramṛtaḥ kaścitsagotraḥ śrūyate yadi
na trirātramahorātraṃ sadyaḥ snātvā śucirbhavet
||11||deśāntaragato vipraḥ prayāsātkālakāritāt
dehanāśamanuprāptastithirna jñāyate yadi
||12||kṛṣṇāṣṭamī tvamāvāsyā kṛṣṇā caikādaśī ca yā
udakaṃ piṇḍadānaṃ ca tatra śrāddhaṃ ca kārayet
||13||ajātadantā ye bālā ye ca garbhādviniḥsṛtāḥ
na teṣāmagnisaṃskāro nāśaucaṃ nodakakriyā
||14||yadi garbho vipadyeta sravate vāpi yoṣitaḥ
yāvanmāsaṃ sthito garbho dinaṃ tāvattu sūtakam
||15||ā caturthādbhavetsrāvaḥ pātaḥ pañcamaṣaṣṭhayoḥ
ata ūrdhvaṃ prasūtiḥ syāddaśāhaṃ sūtakaṃ bhavet
||16||dantajāte'nujāte ca kṛtacūḍe ca saṃsthite
agnisaṃskaraṇe teṣāṃ trirātramaśucirbhavet
||16||ā dantajanmanaḥ sadya ā cūḍānnaiṣikī smṛtā
trirātramā vratādeśāddaśarātramataḥ param
||17||brahmacārī gṛhe yeṣāṃ hūyate ca hutāśanaḥ
saṃparkaṃ na ca kurvanti na teṣāṃ sūtakaṃ bhavet
||18||saṃparkādduṣyate vipro janane maraṇe tathā
saṃparkācca nivṛttasya na pretaṃ naiva sūtakam
||19||śilpinaḥ kārukā vaidyā dāsīdāsāśca nāpitāḥ
rājānaḥ śrotriyāścaiva sadyaḥ śaucāḥ prakīrtitāḥ
||20||savrataḥ satrapūtaśca āhitāgniśca yo dvijaḥ
rājñaśca sūtakaṃ nāsti yasya cecchati pārthivaḥ
||21||udyato nidhane dāne ārto vipro nimantritaḥ
tadaiva ṛṣibhirdṛṣṭaṃ yathā kālena śudhyati
||22||prasave gṛhamedhī tu na kuryātsaṃkaraṃ yadi
daśāhācchudhyate mātā tvavagāhya pitā śuciḥ
||23||sarveṣāṃ śāvamāśaucaṃ mātā pitrostu sūtakam
sūtakaṃ mātureva syādupaspṛśya pitā śuciḥ
||24||yadi patnyāṃ prasūtāyāṃ saṃparkaṃ kurute dvijaḥ
sūtakaṃ tu bhavettasya yadi vipraḥ ṣaḍaṅgavit
||25||saṃparkājjāyate doṣo nānyo doṣo'sti vai dvije
tasmātsarvaprayatnena saṃparkaṃ varjayedbudhaḥ
||26||vivāhotsavayajñeṣu tvantarā mṛtasūtake
pūrvasaṃkalpitaṃ dravyaṃ dīyamānaṃ na duṣyati
||27||antarā daśāhasya punarmaraṇajanmanī
tāvatsyādaśucirvipro yāvattatsyādanirdaśam
||28||brāhmaṇārthe vipannānāṃ bandigograhaṇe tathā
āhaveṣu vipannānāmekarātramaśaucakam
||29||dvāvimau puruṣau loke sūryamaṇḍalabhedinau
parivrāḍyogayuktaśca raṇe cābhimukho hataḥ
||30||yatra yatra hataḥ śūraḥ śatrubhiḥ pariveṣṭitaḥ
akṣayāṃllabhate lokānyadi klībaṃ na bhāṣate
||31||saṃnyastaṃ brāhmaṇaṃ dṛṣṭvā sthānāccalati bhāskaraḥ
eṣa me maṇḍalaṃ bhittvā paraṃ sthānaṃ prayāsyati
||32||yastu bhagneṣu sainyeṣu vidravatsu samantataḥ
paritrātā yadā gacchetsa ca kratuphalaṃ labhet
||33||yasya cchedakṣataṃ gātraṃ śaramudgarayaṣṭibhiḥ
devakanyāstu taṃ vīraṃ haranti ramayanti ca
||34||devāṅganāsahasrāṇi śūramāyodhane hatam
tvaramāṇāḥ pradhāvanti mama bhartā mameti ca
||35||yaṃ yajñasaṃghaistapasā ca viprāḥ svargaiṣiṇo vātra yathā yānti
kṣaṇena yāntyeva hi tatra vīrāḥ prāṇānsuyuddhena parityajantaḥ
||36||jitena labhyate lakṣmīrmṛtenāpi surāṅganāḥ
kṣaṇadhvaṃsini kāye'sminkā cintā maraṇe raṇe
||37||lalāṭadeśe rudhiraṃ sravacca yasyāhave tu praviśecca vaktram
tatsomapānena kilāsya tulyaṃ saṃgrāmayajñe vidhivacca dṛṣṭam
||38||anāthaṃ brāhmaṇaṃ pretaṃ ye vahanti dvijātayaḥ
pade pade yajñaphalamānupūrvyāṃllabhanti te
||39||na teṣāmaśubhaṃ kiṃcitpāpaṃ vā śubhakarmaṇām
jalāvagāhanātteṣāṃ sadyaḥśaucaṃ vidhīyate
||40||asagotramabandhuṃ ca pretībhūtaṃ dvijottamam
vahitvā ca dahitvā ca prāṇāyāmena śudhyati
||41||anugamyecchayā pretaṃ jñātimajñātimeva vā
snātvā sacailaṃ spṛṣṭvāgniṃ ghṛtaṃ prāśya viśudhyati
||42||kṣatriyaṃ mṛtamajñānādbrāhmaṇo yo'nugacchati
ekāhamaśucirbhūtvā pañcagavyena śudhyati
||43||śavaṃ ca vaiśyamajñānādbrāhmaṇo yo'nugacchati
kṛtvāśaucaṃ dvirātraṃ ca prāṇāyāmānṣaḍācaret
||44||pretībhūtaṃ tu yaḥ śūdraṃ brāhmaṇo jñānadurbalaḥ
anugacchennīyamānaṃ trirātramaśucirbhavet
||45||trirātre tu tataḥ pūrṇe nadīṃ gatvā samudragām
prāṇāyāmaśataṃ kṛtvā ghṛtaṃ prāśya viśudhyati
||46||vinirvartya yadā śūdrā udakāntamupasthitāḥ
dvijaistadānugantavyā eṣa dharmaḥ sanātanaḥ
||47||