Study
- Anukramaṇī
- upanayanam
- Source
- याजुषमन्त्ररत्नाकरम् (मुद्रितग्रन्थः) पृष्ठम् ६२०–६२१ — मुद्रितग्रन्थस्य PDF-पाठात् स्वरसहितं यथावत् उद्धृतम्। कोष्ठकेषु सङ्ख्याः ग्रन्थस्य पृष्ठनिर्देशाः।
upanayanam
ā̱ga̱ntrā sama̍ganmahi̱ prasu̍ mṛ̱tyuṃ yu̍yotana| ari̍ṣṭā̱ḥ saṃca̍remahi sva̱sti ca̍ratādi̱ha sva̱styā gṛ̱hebhya̍ḥ| sa̱mu̱drādū̱rmirmadhu̍mā̱gͫ udā̍radupā̱gͫśunā̱ sama̍mṛta̱tvama̍śyām| i̱me nu te ra̱śmaya̱ḥ sūrya̍sya̱ yebhi̍ḥ sapi̱tvaṃ pi̱taro̍ na̱ āya̍n|
||1||a̱gniṣṭe̱ hasta̍magrabhī̱tsoma̍ste̱ hasta̍magrabhītsavi̱tā te̱ hasta̍magrabhī̱tsara̍svatī te̱ hasta̍magrabhītpū̱ṣā te̱ hasta̍magrabhīdarya̱mā te̱ hasta̍magrabhī̱dagͫśu̍ste̱ hasta̍magrabhī̱dbhaga̍ste̱ hasta̍magrabhīnmi̱traste̱ hasta̍magrabhīnmi̱trastvama̍si̱ dharma̍ṇā̱'gnirā̍cā̱ryastava̍|
||2||a̱gnaye̎ tvā̱ pari̍ dadāmyasau̱ somā̍ya tvā̱ pari̍ dadāmyasau savi̱tre tvā̱ pari̍ dadāmyasau̱ sara̍svatyai tvā̱ pari̍ dadāmyasau mṛ̱tyave̎ tvā̱ pari̍ dadāmyasau ya̱māya̍ tvā̱ pari̍ dadāmyasau ga̱dāya̍ tvā̱ pari̍ dadāmyasā̱vanta̍kāya tvā̱ pari̍ dadāmyasāva̱dbhyastvā̱ pari̍ dadāmyasā̱voṣa̍dhībhyastvā̱ pari̍ dadāmyasau pṛthi̱vyai tvā̱ savai̎śvāna̱rāyai̱ pari̍ dadāmyasau|
||3||de̱vasya̍ tvā savi̱tuḥ pra̍sa̱va upa̍naye̱'sau| su̱pra̱jāḥ pra̱jayā̍ bhūyāḥ su̱vīro̍ vī̱raiḥ su̱varcā̱ varca̍sā su̱poṣa̱ḥ poṣai̎ḥ|
||4||bra̱hma̱carya̱māgā̱mupa̱ mā na̍yasva de̱vena̍ savi̱trā prasū̍taḥ| konāmā̎sya̱sau nāmā̎'smi̱ kasya̍ brahmacā̱rya̍syasau prā̱ṇasya̍ brahmacā̱rya̍smya̱sāve̱ṣa te̍ deva sūrya brahmacā̱rī taṃ go̍pāya sa̱ mā mṛ̍tai̱ṣa te̍ sūrya pu̱traḥ sudī̎rghā̱yuḥ sa̱ mā mṛ̍ta|
||5||yāgͫ̄ sva̱stima̱gnirvā̱yaḥ sūrya̍śca̱ndramā̱ āpo'nu̱ saṃ cara̍nti̱ tāgͫ̄ sva̱stimanu̱ saṃ ca̍rāsā̱vadhva̍nāmadhvapate̱ śreṣṭha̱syādhva̍naḥ pā̱rama̍śīya||3||
||6||