Study
- Anukramaṇī
- ṛ॰saṃ॰ 10.71.2 · tai॰saṃ॰ 5.4.12 · tai॰brā॰ 3.1.2 · tai॰saṃ॰ 2.4.14 · tai॰saṃ॰ 2.3.11 · ṛ॰saṃ॰ 5.25.5
- Also in this book
- Source
- Taittirīya / Ṛgveda corpus, as compiled in Yājuṣa Mantra Ratnākaram. Learn svara from a guru.
ṛ॰saṃ॰ 10.71.2
saktu̍miva̱ tita̍unā pu̱nanto̱ yatra̱ dhīrā̱ mana̍sā̱ vāca̱makra̍ta |
atrā̱ sakhā̍yaḥ sa̱khyāni̍ jānate bha̱draiṣā̍ṃ la̱kṣmīrnihi̱tādhi̍ vā̱ci ॥RV 10.71.2॥
||1||tai॰saṃ॰ 5.4.12
56 pava̍sva̱ vāja̍sātaya̱ itya̍nu̱ṣṭukpra̍ti̱padbha̍vati
ti̱sro̍'nu̱ṣṭubha̱ścata̍sro gāya̱triyo̱ yat ti̱sro̍'nu̱ṣṭubha̱
stasmā̱daśva̍stri̱bhi stiṣṭhagg̍stiṣṭhati̱ yaccata̍sro
gāya̱triya̱stasmā̱thsarvāg̍śca̱tura̍ḥ pa̱daḥ pra̍ti̱dadha̱tpalā̍yate
para̱mā vā e̱ṣā chaṃda̍sā̱ṃ yada̍nu̱ṣṭukpa̍ra̱maśca̍tuṣṭo̱maḥ stomā̍nāṃ
para̱mastri̍rā̱tro ya̱jñānā̎ṃ para̱mo'śva̍ḥ paśū̱nāṃ pa̍ra̱meṇai̱vaina̍ṃ
para̱matā̎ṃ gamayatyekavi̱g̱ͫśamaha̍rbhavati̱
57 yasmi̱nnaśva̍ āla̱bhyate̱ dvāda̍śa̱ māsā̱ḥ pañca̱rtava̱straya̍ i̱me lo̱kā
a̱sāvā̍di̱tya e̍kavi̱g̱ͫśa e̱ṣa pra̱jāpa̍tiḥ prājāpa̱tyo'śva̱stame̱va
sā̱kṣādṛ̍dhnoti̱ śakva̍rayaḥ pṛ̱ṣṭhaṃ bha̍vantya̱nyada̍nya̱cchando̱'nye̎nye̱
vā e̱te pa̱śava̱ ā la̍bhyanta u̱teva̍ grā̱myā u̱tevā̍ra̱ṇyā yacchakva̍rayaḥ
pṛ̱ṣṭhaṃ bhava̱ntyaśva̍sya sarva̱tvāya̍ pārthura̱śmaṃ bra̍hmasā̱maṃ bha̍vati
ra̱śminā̱ vā aśvo̍
58 ya̱ta ī̎śva̱ro vā aśvo'ya̱to'pra̍tiṣṭhita̱ḥ parā̎ṃ parā̱vata̱ṃ
ganto̱ryatpā̎rthura̱śmaṃ bra̍hmasā̱maṃ bhava̱tyaśva̍sya̱ yatyai̱
dhṛtyai̱ saṃkṛ̍tyacchāvākasā̱maṃ bha̍vatyuthsannaya̱jño vā e̱ṣa
yada̍śvame̱dhaḥ kastadve̱detyā̍hu̱ryadi̱ sarvo̍ vā kri̱yate̱ na vā̱ sarva̱ iti̱
yathsaṃkṛ̍tyacchāvākasā̱maṃ bhava̱tyaśva̍sya sarva̱tvāya̱ paryā̎ptyā̱ ana̍ntarāyāya̱
sarva̍stomo'tirā̱tra u̍tta̱mamaha̍rbhavati̱ sarva̱syāptyai̱ sarva̍sya̱ jityai̱
sarva̍me̱va tenā̎pnoti̱ sarva̍ṃ jayati || 5| 4| 12|| aha̍rbhavati̱ vā aśvo'ha̍rbhavati̱
daśa̍ ca ॥TS 5.4.12॥
||2||tai॰brā॰ 3.1.2
ṛ̱ddhyāsma̍ ha̱vyairnama̍sopa̱sadya̍|
mi̱traṃ de̱vaṃ mi̍tra̱dheya̍ṃ no astu|
a̱nū̱rā̱dhān ha̱viṣā̍ va̱rdhaya̍ntaḥ|
śa̱taṃ jī̍vema śa̱rada̱ḥ savī̍rāḥ|
ci̱traṃ nakṣa̍tra̱muda̍gātpu̱rastā̎t|
a̱nū̱rā̱dhāsa̱ iti̱ yadvada̍nti|
tanmi̱tra e̍ti pa̱thibhi̍rdeva̱yānai̎ḥ|
hi̱ra̱ṇyayai̱rvita̍taira̱ntari̍kṣe|
indro̎ jye̱ṣṭhāmanu̱ nakṣa̍trameti|
yasmi̍nvṛ̱traṃ vṛ̍tra̱tūrye̍ ta̱tāra̍||13||
tasmi̍nva̱yama̱mṛta̱ṃ duhā̍nāḥ|
kṣudha̍ṃ tarema̱ duri̍ti̱ṃ duri̍ṣṭim|
pu̱ra̱nda̱rāya̍ vṛṣa̱bhāya̍ dhṛ̱ṣṇave̎|
aṣā̍ḍhāya̱ saha̍mānāya mī̱ḍhuṣe̎|
indrā̍ya jye̱ṣṭhā madhu̍ma̱dduhā̍nā|
u̱ruṃ kṛ̍ṇotu̱ yaja̍mānāya lo̱kam|
mūla̍ṃ pra̱jāṃ vī̱rava̍tīṃ videya|
parā̎cyetu̱ nirṛ̍tiḥ parā̱cā|
gobhi̱rnakṣa̍traṃ pa̱śubhi̱ḥ sama̍ktam|
aha̍rbhūyā̱dyaja̍mānāya̱ mahyam̎||14||
aha̍rno a̱dya su̍vi̱te da̍dhātu|
mūla̱ṃ nakṣa̍tra̱miti̱ yadvada̍nti|
parā̍cīṃ vā̱cā nirṛ̍tiṃ nudāmi|
śi̱vaṃ pra̱jāyai̍ śi̱vama̍stu̱ mahyam̎|
yā di̱vyā āpa̱ḥ paya̍sā sambabhū̱vuḥ|
yā a̱ntari̍kṣa u̱ta pārthi̍vī̱ryāḥ|
yāsā̍maṣā̱ḍhā a̍nu̱yanti̱ kāmam̎|
tā na̱ āpa̱ḥ śagͫ̄ syo̱nā bha̍vantu|
yāśca̱ kūpyā̱ yāśca̍ nā̱dyā̎ḥ samu̱driyā̎ḥ|
yāśca̍ vaiśa̱ntīru̱ta prā̍sa̱cīryāḥ||15||
yāsā̍maṣā̱ḍhā madhu̍ bha̱kṣaya̍nti|
tā na̱ āpa̱ḥ śagͫ̄ syo̱nā bha̍vantu|
tanno̱ viśve̱ upa̍ śṛṇvantu de̱vāḥ|
tada̍ṣā̱ḍhā a̱bhisaṃya̍ntu ya̱jñam|
tannakṣa̍traṃ prathatāṃ pa̱śubhya̍ḥ|
kṛ̱ṣirvṛ̱ṣṭiryaja̍mānāya kalpatām|
śu̱bhrāḥ ka̱nyā̍ yuva̱taya̍ḥ su̱peśa̍saḥ|
ka̱rma̱kṛta̍ḥ su̱kṛto̍ vī̱ryā̍vatīḥ|
viśvā̎n de̱vān ha̱viṣā̍ va̱rdhaya̍ntīḥ|
a̱ṣā̱ḍhāḥ kāma̱mupa̍ yāntu ya̱jñam||16||
yasmi̱n brahmā̱'bhyaja̍ya̱thsarva̍me̱tat|
a̱muṃ ca̍ lo̱kami̱damū̍ ca̱ sarvam̎|
tanno̱ nakṣa̍tramabhi̱jidvi̱jitya̍|
śriya̍ṃ dadhā̱tvahṛ̍ṇīyamānam|
u̱bhau lo̱kau brahma̍ṇā̱ sañji̍te̱mau|
tanno̱ nakṣa̍tramabhi̱jidvica̍ṣṭām|
tasmi̍nva̱yaṃ pṛta̍nā̱ḥ sañja̍yema|
tanno̍ de̱vāso̱ anu̍jānantu̱ kāmam̎|
śṛ̱ṇvanti̍ śro̱ṇāma̱mṛta̍sya go̱pām|
puṇyā̍masyā̱ upa̍śṛṇomi̱ vācam̎||17||
ma̱hīṃ de̱vīṃ viṣṇu̍patnīmajū̱ryām|
pra̱tīcī̍menāgͫ ha̱viṣā̍ yajāmaḥ|
tre̱dhā viṣṇu̍rurugā̱yo vica̍krame|
ma̱hīṃ diva̍ṃ pṛthi̱vīma̱ntari̍kṣam|
tacchro̱ṇaiti̱śrava̍ i̱cchamā̍nā|
puṇya̱g̱ͫ̄ śloka̱ṃ yaja̍mānāya kṛṇva̱tī|
a̱ṣṭau de̱vā vasa̍vaḥ so̱myāsa̍ḥ|
cata̍sro de̱vīra̱jarā̱ḥ śravi̍ṣṭhāḥ|
te ya̱jñaṃ pā̎ntu̱ raja̍saḥ pa̱rastā̎t|
sa̱ṃva̱thsa̱rīṇa̍ma̱mṛtagͫ̄̍ sva̱sti||18||
ya̱jñaṃ na̍ḥ pāntu̱ vasa̍vaḥ pu̱rastā̎t|
da̱kṣi̱ṇa̱to̍'bhiya̍ntu̱ śravi̍ṣṭhāḥ|
puṇya̱ṃ nakṣa̍trama̱bhi saṃvi̍śāma|
mā no̱ arā̍tira̱ghaśa̱g̱ͫsā'gan̍|
kṣa̱trasya̱ rājā̱ varu̍ṇo'dhirā̱jaḥ|
nakṣa̍trāṇāgͫ śa̱tabhi̍ṣa̱gvasi̍ṣṭhaḥ|
tau de̱vebhya̍ḥ kṛṇuto dī̱rghamāyu̍ḥ|
śa̱tagͫ sa̱hasrā̍ bheṣa̱jāni̍ dhattaḥ|
ya̱jñaṃ no̱ rājā̱ varu̍ṇa̱ upa̍yātu|
tanno̱ viśve̍ a̱bhi saṃya̍ntu de̱vāḥ||19||
tanno̱ nakṣa̍tragͫ śa̱tabhi̍ṣagjuṣā̱ṇam|
dī̱rghamāyu̱ḥ prati̍radbheṣa̱jāni̍|
a̱ja eka̍pā̱duda̍gātpu̱rastā̎t|
viśvā̍ bhū̱tāni̍ prati̱ moda̍mānaḥ|
tasya̍ de̱vāḥ pra̍sa̱vaṃ ya̍nti̱ sarve̎|
pro̱ṣṭha̱pa̱dāso̍ a̱mṛta̍sya go̱pāḥ|
vi̱bhrāja̍mānaḥ samidhā̱na u̱graḥ|
ā'ntari̍kṣamaruha̱daga̱ndyām|
tagͫ sūrya̍ṃ de̱vama̱jameka̍pādam|
pro̱ṣṭha̱pa̱dāso̱ anu̍yanti̱ sarve̎||20||
ahi̍rbu̱dhniya̱ḥ pratha̍māna eti|
śreṣṭho̍ de̱vānā̍mu̱ta mānu̍ṣāṇām|
taṃ brā̎hma̱ṇāḥ so̍ma̱pāḥ so̱myāsa̍ḥ|
pro̱ṣṭha̱pa̱dāso̍ a̱bhi ra̍kṣanti̱ sarve̎|
ca̱tvāra̱ eka̍ma̱bhi karma̍ de̱vāḥ|
pro̱ṣṭha̱pa̱dāsa̱ iti̱ yān vada̍nti|
te bu̱dhniya̍ṃ pari̱ṣadyagͫ̄̍ stu̱vanta̍ḥ|
ahigͫ̍ rakṣanti̱ nama̍sopa̱sadya̍|
pū̱ṣā re̱vatyanve̍ti̱ panthā̎m|
pu̱ṣṭi̱patī̍ paśu̱pā vāja̍bastyau||21||
i̱māni̍ ha̱vyā praya̍tā juṣā̱ṇā|
su̱gairno̱ yānai̱rupa̍yātāṃ ya̱jñam|
kṣu̱drān pa̱śūn ra̍kṣatu re̱vatī̍ naḥ|
gāvo̍ no̱ aśvā̱g̱ͫ anve̍tu pū̱ṣā|
anna̱g̱ͫ rakṣa̍ntau bahu̱dhā virū̍pam|
vājagͫ̍ sanutā̱ṃ yaja̍mānāya ya̱jñam|
tada̱śvinā̍vaśva̱yujopa̍yātām|
śubha̱ṅgami̍ṣṭhau su̱yame̍bhi̱raśvai̎ḥ|
svaṃ nakṣa̍tragͫ ha̱viṣā̱ yaja̍ntau|
madhvā̱ sampṛ̍ktau̱ yaju̍ṣā̱ sama̍ktau||22||
yau de̱vānā̎ṃ bhi̱ṣajau̍ havyavā̱hau|
viśva̍sya dū̱tāva̱mṛta̍sya go̱pau|
tau nakṣa̍traṃ jujuṣā̱ṇopa̍yātām|
namo̱'śvibhyā̎ṃ kṛṇumo'śva̱yugbhyā̎m|
apa̍ pā̱pmāna̱ṃ bhara̍ṇīrbharantu|
tadya̱mo rājā̱ bhaga̍vā̱ṉ vica̍ṣṭām|
lo̱kasya̱ rājā̍ maha̱to ma̱hān hi|
su̱gaṃ na̱ḥ panthā̱mabha̍yaṃ kṛṇotu|
yasmi̱nnakṣa̍tre ya̱ma eti̱ rājā̎|
yasmi̍nnenama̱bhyaṣi̍ñcanta de̱vāḥ|
tada̍sya ci̱tragͫ ha̱viṣā̍ yajāma|
apa̍ pā̱pmāna̱ṃ bhara̍ṇīrbharantu|
ni̱veśa̍nī̱ yatte̍ de̱vā ada̍dhuḥ||23|| ॥TB 3.1.2॥
||3||tai॰saṃ॰ 2.4.14
44 navo̍navo bhavati̱ jāya̍mā̱no'hnā̎ṃ ke̱turu̱ṣasā̍me̱tyagre̎ | bhā̱gaṃ
de̱vebhyo̱ vi da̍dhātyā̱yan pra ca̱ṃdramā̎stirati dī̱rghamāyu̍ḥ || yamā̍di̱tyā
a̱g̱ͫśumā̎pyā̱yaya̍nti̱ yamakṣi̍ta̱makṣi̍taya̱ḥ piba̍nti | tena̍ no̱
rājā̱ varu̍ṇo̱ bṛha̱spati̱rā pyā̍yayantu̱ bhuva̍nasya go̱pāḥ || prācyā̎ṃ di̱śi
tvami̍ṃdrāsi̱ rājo̱todī̎cyāṃ vṛtrahanvṛtra̱hāsi̍ | yatra̱ yanti̍ sro̱tyāsta
45 jji̱taṃ te̍ dakṣiṇa̱to vṛ̍ṣa̱bha e̍dhi̱ havya̍ḥ | iṃdro̍ jayāti̱ na parā̍
jayātā adhirā̱jo rāja̍su rājayāti | viśvā̱ hi bhū̱yāḥ pṛta̍nā abhi̱ṣṭīru̍pa̱sadyo̍
nama̱syo̍ yathāsa̍t || a̱syede̱va pra ri̍rice mahi̱tvaṃ di̱vaḥ pṛ̍thi̱vyāḥ
parya̱ntari̍kṣāt | sva̱rāḍiṃdro̱ dama̱ ā vi̱śvagū̎rtaḥ sva̱rirama̍tro vavakṣe̱
raṇā̍ya | a̱bhi tvā̍ śūra nonu̱mo 'du̍gdhā iva dhe̱nava̍ḥ | īśā̍na
46 ma̱sya jaga̍taḥ suva̱rdṛśa̱mīśā̍namiṃdra ta̱sthuṣa̍ḥ || tvāmiddhi havā̍mahe
sā̱tā vāja̍sya kā̱rava̍ḥ | tvāṃ vṛ̱treṣvi̍ṃdra̱ satpa̍ti̱ṃ nara̱stvāṃ
kāṣṭhā̱svarva̍taḥ || yaddyāva̍ iṃdra te śa̱tagͫ śa̱taṃ bhūmī̍ru̱ta syuḥ | na tvā̍
vajrinthsa̱hasra̱g̱ͫ sūryā̱ anu̱ na jā̱tama̍ṣṭa̱ roda̍sī || pibā̱ soma̍miṃdra̱
manda̍tu tvā̱ yaṃ te̍ su̱ṣāva̍ harya̱śvādri̍ḥ ||
47 so̱turbā̱hubhyā̱g̱ͫ suya̍to̱ nārvā̎ || re̱vatī̎rnaḥ sadha̱māda̱ iṃdre̍
santu tu̱vivā̍jāḥ | kṣu̱manto̱ yābhi̱rmade̍ma || uda̍gne̱ śuca̍ya̱stava̱
vi jyoti̱ṣodu̱ tyaṃ jā̱tave̍dasagͫ sa̱pta tvā̍ ha̱rito̱ rathe̱ vaha̍nti
deva sūrya | śo̱ciṣke̍śaṃ vicakṣaṇa || ci̱traṃ de̱vānā̱muda̍gā̱danī̍ka̱ṃ
cakṣu̍rmi̱trasya̱ varu̍ṇasyā̱gneḥ | āprā̱ dyāvā̍pṛthi̱vī a̱ntari̍kṣa̱g̱ͫ
sūrya̍ ā̱tmā jaga̍tasta̱sthuṣa̍
48 śca || viśve̍ de̱vā ṛ̍tā̱vṛdha̍ ṛ̱tubhi̍rhavana̱śruta̍ḥ | ju̱ṣantā̱ṃ
yujya̱ṃ paya̍ḥ || viśve̍ devāḥ śaṛṇu̱temagͫ hava̍ṃ me̱ ye a̱ntari̍kṣe̱ ya upa̱
dyavi̱ṣṭha | ye a̍gniji̱hvā u̱ta vā̱ yaja̍trā ā̱sadyā̱sminba̱rhiṣi̍ mādayadhvam ||
2| 4| 14|| tadīśā̍na̱madri̍sta̱sthuṣa̍stri̱g̱ͫśacca̍ ॥TS 2.4.14॥
||4||tai॰saṃ॰ 2.3.11
41 a̱gniṃ vā e̱tasya̱ śarī̍raṃ gacchati̱ soma̱g̱ͫ raso̱ varu̍ṇa enaṃ
varuṇapā̱śena̍ gṛhṇāti̱ sara̍svatī̱ṃ vāga̱gnāviṣṇū̍ ā̱tmā yasya̱ jyogā̱maya̍ti̱
yo jyogā̍mayāvī̱ syādyo vā̍ kā̱maye̍ta̱ sarva̱māyu̍riyā̱miti̱ tasmā̍ e̱tāmiṣṭi̱ṃ
nirva̍pedāgne̱yama̱ṣṭāka̍pālagͫ sau̱myaṃ ca̱ruṃ vā̍ru̱ṇaṃ daśa̍kapālagͫ
sārasva̱taṃ ca̱rumā̎gnāvaiṣṇa̱vamekā̍daśakapālama̱gnere̱vāsya̱ śarī̍raṃ
niṣkrī̱ṇāti̱ somā̱drasa̍ṃ
42 vāru̱ṇenai̱vaina̍ṃ varuṇapā̱śānmu̍ñcati sārasva̱tena̱ vāca̍ṃ dadhātya̱gniḥ sarvā̍
de̱vatā̱ viṣṇu̍rya̱jño de̱vatā̍bhiścai̱vaina̍ṃ ya̱jñena̍ ca bhiṣajyatyu̱ta
yadī̱tāsu̱rbhava̍ti̱ jīva̍tye̱va yannava̱mait tannava̍nītamabhava̱dityājya̱mave̎kṣate
rū̱pame̱vāsyai̱tanma̍hi̱māna̱ṃ vyāca̍ṣṭe̱'śvino̎ḥ prā̱ṇo̍'sītyā̍hā̱śvinau̱
vai de̱vānā̎ṃ
43 bhi̱ṣajau̱ tābhyā̍me̱vāsmai̍ bheṣa̱jaṃ ka̍ro̱tīṃdra̍sya
prā̱ṇo̍'sītyā̍heṃdri̱yame̱vāsmi̍nne̱tena̍ dadhāti mi̱trāvaru̍ṇayoḥ prā̱ṇo̍'sītyā̍ha
prāṇāpā̱nāve̱vāsmi̍nne̱tena̍ dadhāti̱ viśve̍ṣāṃ de̱vānā̎ṃ prā̱ṇo̍'sītyā̍ha
vī̱rya̍me̱vāsmi̍nne̱tena̍ dadhāti ghṛ̱tasya̱ dhārā̍ma̱mṛta̍sya̱ panthā̱mityā̍ha
yathāya̱jure̱vaitatpā̍vamā̱ne na̍ tvā̱ stome̱netyā̍
44 ha prā̱ṇame̱vāsmi̍nne̱tena̍ dadhāti bṛhadrathanta̱rayo̎stvā̱ stome̱netyā̱hauja̍
e̱vāsmi̍nne̱tena̍ dadhātya̱gnestvā̱ mātra̱yetyā̍hā̱tmāna̍me̱vāsmi̍nne̱tena̍
dadhātyṛ̱tvija̱ḥ paryā̍hu̱ryāva̍nta e̱vartvija̱sta e̍naṃ bhiṣajyanti bra̱hmaṇo̱
hasta̍manvā̱rabhya̱ paryā̍hureka̱dhaiva yaja̍māna̱ āyu̍rdadhati̱ yade̱va tasya̱
taddhira̍ṇyād
45 ghṛ̱taṃ niṣpi̍ba̱tyāyu̱rvai ghṛ̱tama̱mṛta̱g̱ͫ
hira̍ṇyama̱mṛtā̍de̱vāyu̱rniṣpi̍bati śa̱tamā̍naṃ bhavati śa̱tāyu̱ḥ puru̍ṣaḥ
śa̱teṃdri̍ya̱ āyu̍ṣye̱veṃdri̱ye prati̍tiṣṭha̱tyatho̱ khalu̱ yāva̍tī̱ḥ
samā̍ e̱ṣyanmanye̍ta̱ tāva̍nmāna2gͫ syā̱thsamṛ̍ddhyā i̱mama̍gna̱
āyu̍ṣe̱ varca̍se kṛ̱dhītyā̱hāyu̍re̱vāsmi̱nvarco̍dadhāti̱ viśve̍ devā̱
jara̍daṣṭi̱ryathāsa̱dityā̍ha̱ jara̍daṣṭime̱vaina̍ṃ karotya̱gnirāyu̍ṣmā̱niti̱
hasta̍ṃ gṛhṇātye̱te vai de̱vā āyu̍ṣmanta̱sta e̱vāsmi̱nnāyu̍rdadhati̱ sarva̱māyu̍reti
|| 2| 3| 11|| rasa̍ṃ de̱vānā̱g̱ stome̱neti̱ hira̍ṇyā̱dasa̱diti̱ dvāvigͫ̍śatiśca ॥TS 2.3.11॥
||5||ṛ॰saṃ॰ 5.25.5
a̱gnistu̱viśra̍vastamaṃ tu̱vibra̍hmāṇamutta̱mam |
a̱tūrta̍ṃ śrāva̱yatpa̍tiṃ pu̱traṃ da̍dāti dā̱śuṣe̍ ॥RV 5.25.5॥
||6||