oṃ || hira̍ṇyavarṇā̱ḥ śuca̍yaḥ pāva̱kā yāsu̍ jā̱taḥ ka̱śyapo̱ yāsvindra̍ḥ |
a̱gniṃ yā garbha̍ṃ dadhi̱re virū̍pā̱stā na̱ āpa̱śśagͫ syo̱nā bha̍vantu ||
yāsā̱g̱ͫ rājā̱ varu̍ṇo̱ yāti̱ madhye̍ satyānṛ̱te a̍va̱paśya̱ṃ janā̍nām |
ma̱dhu̱ścuta̱śśuca̍yo̱ yāḥ pā̍va̱kāstā na̱ āpa̱śśagͫ syo̱nā bha̍vantu ||
yāsā̎ṃ de̱vā di̱vi kṛ̱ṇvanti̍ bha̱kṣaṃ yā a̱ntari̍kṣe bahu̱dhā bhava̍nti |
yāḥ pṛ̍thi̱vīṃ paya̍so̱ndanti śu̱krāstā na̱ āpa̱śśagͫ syo̱nā bha̍vantu ||
śi̱vena̍ mā̱ cakṣu̍ṣā paśyatā”paśśi̱vayā̍ ta̱nuvopa̍ spṛśata̱ tvaca̍ṃ me |
sarvāgͫ̍ a̱gnīgͫ ra̍psu̱ṣado̍ huve vo̱ mayi̱ varco̱ bala̱mojo̱ ni dha̍tta ||
pava̍māna̱ssuva̱rjana̍ḥ | pa̱vitre̍ṇa̱ vica̍rṣaṇiḥ | yaḥ potā̱ sa pu̍nātu mā | pu̱nantu̍ mā devaja̱nāḥ |
pu̱nantu̱ mana̍vo dhi̱yā | pu̱nantu̱ viśva̍ ā̱yava̍ḥ | jāta̍vedaḥ pavitra̍vat | pa̱vitre̍ṇa punāhi mā |
śu̱kreṇa̍ deva̱dīdya̍t | agne̱ kratvā̱ kratū̱g̱ͫ ranu̍ | yatte̍ pa̱vitra̍ma̱rciṣi̍ | agne̱ vita̍tamanta̱rā |
brahma̱ tena̍ punīmahe | u̱bhābhyā̎ṃ devasavitaḥ | pa̱vitre̍ṇa sa̱vena̍ ca | i̱daṃ brahma̍ punīmahe |
vai̱śva̱de̱vī pu̍na̱tī de̱vyāgā̎t | yasyai̍ ba̱hvīsta̱nuvo̍ vī̱tapṛ̍ṣṭhāḥ |
tayā̱ mada̍ntaḥ sadha̱mādye̍ṣu | va̱yagͫ syā̍ma̱ pata̍yo rayī̱ṇām |
vai̱śvā̱na̱ro ra̱śmibhi̍rmā punātu | vāta̍ḥ prā̱ṇene̍ṣi̱ro ma̍yo̱ bhūḥ |
dyāvā̍pṛthi̱vī paya̍sā̱ payo̍bhiḥ | ṛ̱tāva̍rī ya̱jñiye̍ mā punītām |
bṛ̱hadbhi̍ḥ savita̱stṛbhi̍ḥ | varṣi̍ṣṭhairdeva̱manma̍bhiḥ |
agne̱ dakṣai̎ḥ punāhi mā | yena̍ de̱vā apu̍nata |
yenāpo̍ di̱vyaṃkaśa̍ḥ | tena̍ di̱vyena̱ brahma̍ṇā | i̱daṃ brahma̍ punīmahe |
yaḥ pā̍vamā̱nīra̱dhyeti̍ | ṛṣi̍bhi̱ssambhṛ̍ta̱g̱ͫ rasam̎ | sarva̱g̱ͫ sa pū̱tama̍śnāti |
sva̱di̱taṃ mā̍ta̱riśva̍nā |
pā̱va̱mānīryo a̱dhyeti̍ | ṛṣi̍bhi̱ssambhṛ̍ta̱g̱ͫ rasam̎ | tasmai̱ sara̍svatī duhe | kṣī̱ragͫ sa̱rpirmadhū̍da̱kam ||
pā̱va̱mā̱nīssva̱styaya̍nīḥ | su̱dughā̱hi paya̍svatīḥ |
ṛṣi̍bhi̱ssambhṛ̍to̱ rasa̍ḥ | brā̱hma̱ṇeṣva̱mṛtagͫ̍ hi̱tam |
pā̱va̱mā̱nīrdi̍śantu naḥ | i̱maṃ lo̱kamatho̍ a̱mum |
kāmā̱nthsama̍rdhayantu naḥ | de̱vīrde̱vaiḥ sa̱mābhṛ̍tāḥ |
pā̱va̱mā̱nīssva̱styaya̍nīḥ | su̱dughā̱hi ghṛ̍ta̱ścuta̍ḥ |
ṛṣi̍bhi̱ssaṃbhṛ̍to̱ rasa̍ḥ | brā̱hma̱ṇeṣva̱mṛtagͫ̍ hi̱tam |
yena̍ de̱vāḥ pa̱vitre̍ṇa | ā̱tmāna̍ṃ pu̱nate̱ sadā̎ |
tena̍ sa̱hasra̍dhāreṇa | pā̱va̱mā̱nyaḥ pu̍nantu mā |
prā̱jā̱pa̱tyaṃ pa̱vitram̎| śa̱todhyā̍magͫ hira̱ṇmayam̎ |
tena̍ brahma̱ vido̍ va̱yam | pū̱taṃ brahma̍ punīmahe |
indra̍ssunī̱tī sa̱hamā̍ punātu | soma̍ssva̱styā va̍ruṇassa̱mīcyā̎ |
yamo̱ rājā̎ pramṛ̱ṇābhi̍ḥ punātu mā | jā̱tave̍dā mo̱rjaya̍ntyā punātu |
bhūrbhuva̱ssuva̍ḥ |
oṃ taccha̱ṃ yorāvṛ̍ṇīmahe | gā̱tuṃ ya̱jñāya̍ | gā̱tuṃ ya̱jñapa̍taye |
daivī̎ssva̱stira̍stu naḥ | sva̱stirmānu̍ṣebhyaḥ |
ū̱rdhvaṃ ji̍gātu bheṣa̱jam | śanno̍ astu dvi̱pade̎ | śaṃ catu̍ṣpade |
oṃ śānti̱ḥ śānti̱ḥ śānti̍ḥ