Study
- Anukramaṇī
- tai॰brā॰ 3.9.19
- Saṃhitā citations
- Source
- Taittirīya / Ṛgveda corpus, as compiled in Yājuṣa Mantra Ratnākaram. Learn svara from a guru.
tai॰brā॰ 3.9.19
e̱ṣa vai vi̱bhūrnāma̍ ya̱jñaḥ|
sarvagͫ̍ ha̱ vai tatra̍ vi̱bhu bha̍vati|
yatrai̱tena̍ ya̱jñena̱ yaja̍nte|
e̱ṣa vai pra̱bhūrnāma̍ ya̱jñaḥ|
sarvagͫ̍ ha̱ vai tatra̍ pra̱bhu bha̍vati|
yatrai̱tena̍ ya̱jñena̱ yaja̍nte|
e̱ṣa vā ūrja̍svā̱nnāma̍ ya̱jñaḥ|
sarvagͫ̍ ha̱ vai tatrorja̍svadbhavati|
yatrai̱tena̍ ya̱jñena̱ yaja̍nte|
e̱ṣa vai paya̍svā̱nnāma̍ ya̱jñaḥ||70||
sarvagͫ̍ ha̱ vai tatra̱ paya̍svadbhavati|
yatrai̱tena̍ ya̱jñena̱ yaja̍nte|
e̱ṣa vai vidhṛ̍to̱ nāma̍ ya̱jñaḥ|
sarvagͫ̍ ha̱ vai tatra̱ vidhṛ̍taṃ bhavati|
yatrai̱tena̍ ya̱jñena̱ yaja̍nte|
e̱ṣa vai vyāvṛ̍tto̱ nāma̍ ya̱jñaḥ|
sarvagͫ̍ ha̱ vai tatra̱ vyāvṛ̍ttaṃ bhavati|
yatrai̱tena̍ ya̱jñena̱ yaja̍nte|
e̱ṣa vai prati̍ṣṭhito̱ nāma̍ ya̱jñaḥ|
sarvagͫ̍ ha̱ vai tatra̱ prati̍ṣṭhitaṃ bhavati||71||
yatrai̱tena̍ ya̱jñena̱ yaja̍nte|
e̱ṣa vai te̍ja̱svī nāma̍ ya̱jñaḥ|
sarvagͫ̍ ha̱ vai tatra̍ teja̱svi bha̍vati|
yatrai̱tena̍ ya̱jñena̱ yaja̍nte|
e̱ṣa vai bra̍hmavarca̱sī nāma̍ ya̱jñaḥ|
ā ha̱ vai tatra̍ brāhma̱ṇo bra̍hmavarca̱sī jā̍yate|
yatrai̱tena̍ ya̱jñena̱ yaja̍nte|
e̱ṣa vā a̍tivyā̱dhī nāma̍ ya̱jñaḥ|
ā ha̱ vai tatra̍ rāja̱nyo̍'tivyā̱dhī jā̍yate|
yatrai̱tena̍ ya̱jñena̱ yaja̍nte|
e̱ṣa vai dī̱rgho nāma̍ ya̱jñaḥ|
dī̱rghāyu̍ṣo ha̱ vai tatra̍ manu̱ṣyā̍ bhavanti|
yatrai̱tena̍ ya̱jñena̱ yaja̍nte|
e̱ṣa vai kḷ̱pto nāma̍ ya̱jñaḥ|
kalpa̍te ha̱ vai tatra̍ pra̱jābhyo̍ yogakṣe̱maḥ|
yatrai̱tena̍ ya̱jñena̱ yaja̍nte||72|| ॥TB 3.9.19॥
||1||