Varuṇasūktam — Veda Mantra Saṅgraha

Study

na̱hi te̍ kṣa̱traṃ na saho̱ na ma̱nyuṃ vaya̍śca̱nāmī pa̱taya̍nta ā̱puḥ |

nemā āpo̍ animi̱ṣaṃ cara̍ntī̱rna ye vāta̍sya prami̱nantyabhva̍m ॥1.24.6॥

न॒हि ते॑ क्ष॒त्रं न सहो॒ न म॒न्युं वय॑श्च॒नामी प॒तय॑न्त आ॒पुः ।

नेमा आपो॑ अनिमि॒षं चर॑न्ती॒र्न ये वात॑स्य प्रमि॒नन्त्यभ्व॑म्

a̱bu̱dhne rājā̱ varu̍ṇo̱ vana̍syo̱rdhvaṃ stūpa̍ṃ dadate pū̱tada̍kṣaḥ |

nī̱cīnā̍: sthuru̱pari̍ bu̱dhna e̍ṣāma̱sme a̱ntarnihi̍tāḥ ke̱tava̍: syuḥ ॥1.24.7॥

अ॒बु॒ध्ने राजा॒ वरु॑णो॒ वन॑स्यो॒र्ध्वं स्तूपं॑ ददते पू॒तद॑क्षः ।

नी॒चीना॑: स्थुरु॒परि॑ बु॒ध्न ए॑षाम॒स्मे अ॒न्तर्निहि॑ताः के॒तव॑: स्युः

u̱ruṃ hi rājā̱ varu̍ṇaśca̱kāra̱ sūryā̍ya̱ panthā̱manve̍ta̱vā u̍ |

a̱pade̱ pādā̱ prati̍dhātave'karu̱tāpa̍va̱ktā hṛ̍dayā̱vidha̍ścit ॥1.24.8॥

उ॒रुं हि राजा॒ वरु॑णश्च॒कार॒ सूर्या॑य॒ पन्था॒मन्वे॑त॒वा उ॑ ।

अ॒पदे॒ पादा॒ प्रति॑धातवेऽकरु॒ताप॑व॒क्ता हृ॑दया॒विध॑श्चित्

śa̱taṃ te̍ rājan bhi̱ṣaja̍: sa̱hasra̍mu̱rvī ga̍bhī̱rā su̍ma̱tiṣṭe̍ astu |

bādha̍sva dū̱re niṛ̍tiṃ parā̱caiḥ kṛ̱taṃ ci̱dena̱: pra mu̍mugdhya̱smat ॥1.24.9॥

श॒तं ते॑ राजन् भि॒षज॑: स॒हस्र॑मु॒र्वी ग॑भी॒रा सु॑म॒तिष्टे॑ अस्तु ।

बाध॑स्व दू॒रे निऋ॑तिं परा॒चैः कृ॒तं चि॒देन॒: प्र मु॑मुग्ध्य॒स्मत्

a̱mī ya ṛkṣā̱ nihi̍tāsa u̱ccā nakta̱ṃ dadṛ̍śre̱ kuha̍ ci̱d dive̍yuḥ |

ada̍bdhāni̱ varu̍ṇasya vra̱tāni̍ vi̱cāka̍śacca̱ndramā̱ nakta̍meti ॥1.24.10॥

अ॒मी य ऋक्षा॒ निहि॑तास उ॒च्चा नक्तं॒ ददृ॑श्रे॒ कुह॑ चि॒द् दिवे॑युः ।

अद॑ब्धानि॒ वरु॑णस्य व्र॒तानि॑ वि॒चाक॑शच्च॒न्द्रमा॒ नक्त॑मेति

tattvā̍ yāmi̱ brahma̍ṇā̱ vanda̍māna̱s tadā śā̍ste̱ yaja̍māno ha̱virbhi̍: |

ahe̍l̤amāno varuṇe̱ha bo̱dhyuru̍śaṃsa̱ mā na̱ āyu̱: pra mo̍ṣīḥ ॥1.24.11॥

तत्त्वा॑ यामि॒ ब्रह्म॑णा॒ वन्द॑मान॒स् तदा शा॑स्ते॒ यज॑मानो ह॒विर्भि॑: ।

अहे॑ळमानो वरुणे॒ह बो॒ध्युरु॑शंस॒ मा न॒ आयु॒: प्र मो॑षीः

tadinnakta̱ṃ tad divā̱ mahya̍māhu̱s tada̱yaṃ keto̍ hṛ̱da ā vi ca̍ṣṭe |

śuna̱:śepo̱ yamahva̍d gṛbhī̱taḥ so a̱smān rājā̱ varu̍ṇo mumoktu ॥1.24.12॥

तदिन्नक्तं॒ तद् दिवा॒ मह्य॑माहु॒स् तद॒यं केतो॑ हृ॒द आ वि च॑ष्टे ।

शुन॒:शेपो॒ यमह्व॑द् गृभी॒तः सो अ॒स्मान् राजा॒ वरु॑णो मुमोक्तु

śuna̱:śepo̱ hyahva̍d gṛbhī̱tas tri̱ṣvā̍di̱tyaṃ dru̍pa̱deṣu̍ ba̱ddhaḥ |

avai̍na̱ṃ rājā̱ varu̍ṇaḥ sasṛjyād vi̱dvām̐ ada̍bdho̱ vi mu̍moktu̱ pāśā̍n ॥1.24.13॥

शुन॒:शेपो॒ ह्यह्व॑द् गृभी॒तस् त्रि॒ष्वा॑दि॒त्यं द्रु॑प॒देषु॑ ब॒द्धः ।

अवै॑नं॒ राजा॒ वरु॑णः ससृज्याद् वि॒द्वाँ अद॑ब्धो॒ वि मु॑मोक्तु॒ पाशा॑न्

ava̍ te̱ hel̤o̍ varuṇa̱ namo̍bhi̱rava̍ ya̱jñebhi̍rīmahe ha̱virbhi̍: |

kṣaya̍nna̱smabhya̍masura pracetā̱ rāja̱nnenā̍ṃsi śiśrathaḥ kṛ̱tāni̍ ॥1.24.14॥

अव॑ ते॒ हेळो॑ वरुण॒ नमो॑भि॒रव॑ य॒ज्ञेभि॑रीमहे ह॒विर्भि॑: ।

क्षय॑न्न॒स्मभ्य॑मसुर प्रचेता॒ राज॒न्नेनां॑सि शिश्रथः कृ॒तानि॑

udu̍tta̱maṃ va̍ruṇa̱ pāśa̍ma̱smadavā̍dha̱maṃ vi ma̍dhya̱maṃ śra̍thāya |

athā̍ va̱yamā̍ditya vra̱te tavānā̍gaso̱ adi̍taye syāma ॥1.24.15॥

उदु॑त्त॒मं व॑रुण॒ पाश॑म॒स्मदवा॑ध॒मं वि म॑ध्य॒मं श्र॑थाय ।

अथा॑ व॒यमा॑दित्य व्र॒ते तवाना॑गसो॒ अदि॑तये स्याम

mā no̍ va̱dhāya̍ ha̱tnave̍ jihīl̤ā̱nasya̍ rīradhaḥ | mā hṛ̍ṇā̱nasya̍ ma̱nyave̍ ॥1.25.2॥

मा नो॑ व॒धाय॑ ह॒त्नवे॑ जिहीळा॒नस्य॑ रीरधः । मा हृ॑णा॒नस्य॑ म॒न्यवे॑

vi mṛ̍l̤ī̱kāya̍ te̱ mano̍ ra̱thīraśva̱ṃ na saṃdi̍tam | gī̱rbhirva̍ruṇa sīmahi ॥1.25.3॥

वि मृ॑ळी॒काय॑ ते॒ मनो॑ र॒थीरश्वं॒ न संदि॑तम् । गी॒र्भिर्व॑रुण सीमहि

parā̱ hi me̱ vima̍nyava̱: pata̍nti̱ vasya̍iṣṭaye | vayo̱ na va̍sa̱tīrupa̍ ॥1.25.4॥

परा॒ हि मे॒ विम॑न्यव॒: पत॑न्ति॒ वस्य॑इष्टये । वयो॒ न व॑स॒तीरुप॑

ka̱dā kṣa̍tra̱śriya̱ṃ nara̱mā varu̍ṇaṃ karāmahe | mṛ̱l̤ī̱kāyo̍ru̱cakṣa̍sam ॥1.25.5॥

क॒दा क्ष॑त्र॒श्रियं॒ नर॒मा वरु॑णं करामहे । मृ॒ळी॒कायो॑रु॒चक्ष॑सम्

tadit sa̍mā̱namā̍śāte̱ vena̍ntā̱ na pra yu̍cchataḥ | dhṛ̱tavra̍tāya dā̱śuṣe̍ ॥1.25.6॥

तदित् स॑मा॒नमा॑शाते॒ वेन॑न्ता॒ न प्र यु॑च्छतः । धृ॒तव्र॑ताय दा॒शुषे॑

vedā̱ yo vī̱nāṃ pa̱dama̱ntari̍kṣeṇa̱ pata̍tām | veda̍ nā̱vaḥ sa̍mu̱driya̍: ॥1.25.7॥

वेदा॒ यो वी॒नां प॒दम॒न्तरि॑क्षेण॒ पत॑ताम् । वेद॑ ना॒वः स॑मु॒द्रिय॑:

veda̍ mā̱so dhṛ̱tavra̍to̱ dvāda̍śa pra̱jāva̍taḥ | vedā̱ ya u̍pa̱jāya̍te ॥1.25.8॥

वेद॑ मा॒सो धृ॒तव्र॑तो॒ द्वाद॑श प्र॒जाव॑तः । वेदा॒ य उ॑प॒जाय॑ते

veda̱ vāta̍sya varta̱nimu̱roṝ̱ṣvasya̍ bṛha̱taḥ | vedā̱ ye a̱dhyāsa̍te ॥1.25.9॥

वेद॒ वात॑स्य वर्त॒निमु॒रोॠ॒ष्वस्य॑ बृह॒तः । वेदा॒ ये अ॒ध्यास॑ते

ni ṣa̍sāda dhṛ̱tavra̍to̱ varu̍ṇaḥ pa̱styā̱3svā | sāmrā̍jyāya su̱kratu̍: ॥1.25.10॥

नि ष॑साद धृ॒तव्र॑तो॒ वरु॑णः प॒स्त्या॒३स्वा । साम्रा॑ज्याय सु॒क्रतु॑:

ato̱ viśvā̱nyadbhu̍tā ciki̱tvām̐ a̱bhi pa̍śyati | kṛ̱tāni̱ yā ca̱ kartvā̍ ॥1.25.11॥

अतो॒ विश्वा॒न्यद्भु॑ता चिकि॒त्वाँ अ॒भि प॑श्यति । कृ॒तानि॒ या च॒ कर्त्वा॑

sa no̍ vi̱śvāhā̍ su̱kratu̍rādi̱tyaḥ su̱pathā̍ karat | pra ṇa̱ āyū̍ṃṣi tāriṣat ॥1.25.12॥

स नो॑ वि॒श्वाहा॑ सु॒क्रतु॑रादि॒त्यः सु॒पथा॑ करत् । प्र ण॒ आयूं॑षि तारिषत्

bibhra̍d dra̱piṃ hi̍ra̱ṇyaya̱ṃ varu̍ṇo vasta ni̱rṇija̍m | pari̱ spaśo̱ ni ṣe̍dire ॥1.25.13॥

बिभ्र॑द् द्र॒पिं हि॑र॒ण्ययं॒ वरु॑णो वस्त नि॒र्णिज॑म् । परि॒ स्पशो॒ नि षे॑दिरे

na yaṃ dipsa̍nti di̱psavo̱ na druhvā̍ṇo̱ janā̍nām | na de̱vama̱bhimā̍tayaḥ ॥1.25.14॥

न यं दिप्स॑न्ति दि॒प्सवो॒ न द्रुह्वा॑णो॒ जना॑नाम् । न दे॒वम॒भिमा॑तयः

u̱ta yo mānu̍ṣe̱ṣvā yaśa̍śca̱kre asā̱myā | a̱smāka̍mu̱dare̱ṣvā ॥1.25.15॥

उ॒त यो मानु॑षे॒ष्वा यश॑श्च॒क्रे असा॒म्या । अ॒स्माक॑मु॒दरे॒ष्वा

parā̍ me yanti dhī̱tayo̱ gāvo̱ na gavyū̍tī̱ranu̍ | i̱cchantī̍ruru̱cakṣa̍sam ॥1.25.16॥

परा॑ मे यन्ति धी॒तयो॒ गावो॒ न गव्यू॑ती॒रनु॑ । इ॒च्छन्ती॑रुरु॒चक्ष॑सम्

saṃ nu vo̍cāvahai̱ puna̱ryato̍ me̱ madhvābhṛ̍tam | hote̍va̱ kṣada̍se pri̱yam ॥1.25.17॥

सं नु वो॑चावहै॒ पुन॒र्यतो॑ मे॒ मध्वाभृ॑तम् । होते॑व॒ क्षद॑से प्रि॒यम्

darśa̱ṃ nu vi̱śvada̍rśata̱ṃ darśa̱ṃ ratha̱madhi̱ kṣami̍ | e̱tā ju̍ṣata me̱ gira̍: ॥1.25.18॥

दर्शं॒ नु वि॒श्वद॑र्शतं॒ दर्शं॒ रथ॒मधि॒ क्षमि॑ । ए॒ता जु॑षत मे॒ गिर॑:

i̱maṃ me̍ varuṇa śrudhī̱ hava̍ma̱dyā ca̍ mṛl̤aya | tvāma̍va̱syurā ca̍ke ॥1.25.19॥

इ॒मं मे॑ वरुण श्रुधी॒ हव॑म॒द्या च॑ मृळय । त्वाम॑व॒स्युरा च॑के

tvaṃ viśva̍syū medhira di̱vaśca̱ gmaśca̍ rājasi | sa yāma̍ni̱ prati̍ śrudhi ॥1.25.20॥

त्वं विश्व॑स्यू मेधिर दि॒वश्च॒ ग्मश्च॑ राजसि । स याम॑नि॒ प्रति॑ श्रुधि

udu̍tta̱maṃ mu̍mugdhi no̱ vi pāśa̍ṃ madhya̱maṃ cṛ̍ta | avā̍dha̱māni̍ jī̱vase̍ ॥1.25.21॥

उदु॑त्त॒मं मु॑मुग्धि नो॒ वि पाशं॑ मध्य॒मं चृ॑त । अवा॑ध॒मानि॑ जी॒वसे॑

i̱daṃ ka̱verā̍di̱tyasya̍ sva̱rājo̱ viśvā̍ni̱ sāntya̱bhya̍stu ma̱hnā |

ati̱ yo ma̱ndro ya̱jathā̍ya de̱vaḥ su̍kī̱rtiṃ bhi̍kṣe̱ varu̍ṇasya̱ bhūre̍: ॥2.28.1॥

इ॒दं क॒वेरा॑दि॒त्यस्य॑ स्व॒राजो॒ विश्वा॑नि॒ सान्त्य॒भ्य॑स्तु म॒ह्ना ।

अति॒ यो म॒न्द्रो य॒जथा॑य दे॒वः सु॑की॒र्तिं भि॑क्षे॒ वरु॑णस्य॒ भूरे॑:

tava̍ vra̱te su̱bhagā̍saḥ syāma svā̱dhyo̍ varuṇa tuṣṭu̱vāṃsa̍: |

u̱pāya̍na u̱ṣasā̱ṃ goma̍tīnāma̱gnayo̱ na jara̍māṇā̱ anu̱ dyūn ॥2.28.2॥

तव॑ व्र॒ते सु॒भगा॑सः स्याम स्वा॒ध्यो॑ वरुण तुष्टु॒वांस॑: ।

उ॒पाय॑न उ॒षसां॒ गोम॑तीनाम॒ग्नयो॒ न जर॑माणा॒ अनु॒ द्यून्

tava̍ syāma puru̱vīra̍sya̱ śarma̍nnuru̱śaṃsa̍sya varuṇa praṇetaḥ |

yū̱yaṃ na̍: putrā aditeradabdhā a̱bhi kṣa̍madhva̱ṃ yujyā̍ya devāḥ ॥2.28.3॥

तव॑ स्याम पुरु॒वीर॑स्य॒ शर्म॑न्नुरु॒शंस॑स्य वरुण प्रणेतः ।

यू॒यं न॑: पुत्रा अदितेरदब्धा अ॒भि क्ष॑मध्वं॒ युज्या॑य देवाः

pra sī̍mādi̱tyo a̍sṛjadvidha̱rtām̐ ṛ̱taṃ sindha̍vo̱ varu̍ṇasya yanti |

na śrā̍myanti̱ na vi mu̍cantye̱te vayo̱ na pa̍ptū raghu̱yā pari̍jman ॥2.28.4॥

प्र सी॑मादि॒त्यो अ॑सृजद्विध॒र्ताँ ऋ॒तं सिन्ध॑वो॒ वरु॑णस्य यन्ति ।

न श्रा॑म्यन्ति॒ न वि मु॑चन्त्ये॒ते वयो॒ न प॑प्तू रघु॒या परि॑ज्मन्

vi macchra̍thāya raśa̱nāmi̱vāga̍ ṛ̱dhyāma̍ te varuṇa̱ khāmṛ̱tasya̍ |

mā tantu̍śchedi̱ vaya̍to̱ dhiya̍ṃ me̱ mā mātrā̍ śārya̱pasa̍: pu̱ra ṛ̱toḥ ॥2.28.5॥

वि मच्छ्र॑थाय रश॒नामि॒वाग॑ ऋ॒ध्याम॑ ते वरुण॒ खामृ॒तस्य॑ ।

मा तन्तु॑श्छेदि॒ वय॑तो॒ धियं॑ मे॒ मा मात्रा॑ शार्य॒पस॑: पु॒र ऋ॒तोः

apo̱ su mya̍kṣa varuṇa bhi̱yasa̱ṃ matsamrā̱l̤ṛtā̱vo'nu̍ mā gṛbhāya |

dāme̍va va̱tsād vi mu̍mu̱gdhyaṃho̍ na̱hi tvadā̱re ni̱miṣa̍śca̱neśe̍ ॥2.28.6॥

अपो॒ सु म्य॑क्ष वरुण भि॒यसं॒ मत्सम्रा॒ळृता॒वोऽनु॑ मा गृभाय ।

दामे॑व व॒त्साद् वि मु॑मु॒ग्ध्यंहो॑ न॒हि त्वदा॒रे नि॒मिष॑श्च॒नेशे॑

mā no̍ va̱dhairva̍ruṇa̱ ye ta̍ i̱ṣṭāvena̍: kṛ̱ṇvanta̍masura bhrī̱ṇanti̍ |

mā jyoti̍ṣaḥ pravasa̱thāni̍ ganma̱ vi ṣū mṛdha̍: śiśratho jī̱vase̍ naḥ ॥2.28.7॥

मा नो॑ व॒धैर्व॑रुण॒ ये त॑ इ॒ष्टावेन॑: कृ॒ण्वन्त॑मसुर भ्री॒णन्ति॑ ।

मा ज्योति॑षः प्रवस॒थानि॑ गन्म॒ वि षू मृध॑: शिश्रथो जी॒वसे॑ नः

nama̍: pu̱rā te̍ varuṇo̱ta nū̱namu̱tāpa̱raṃ tu̍vijāta bravāma |

tve hi ka̱ṃ parva̍te̱ na śri̱tānyapra̍cyutāni dūl̤abha vra̱tāni̍ ॥2.28.8॥

नम॑: पु॒रा ते॑ वरुणो॒त नू॒नमु॒ताप॒रं तु॑विजात ब्रवाम ।

त्वे हि कं॒ पर्व॑ते॒ न श्रि॒तान्यप्र॑च्युतानि दूळभ व्र॒तानि॑

para̍ ṛ̱ṇā sā̍vī̱radha̱ matkṛ̍tāni̱ māhaṃ rā̍janna̱nyakṛ̍tena bhojam |

avyu̍ṣṭā̱ innu bhūya̍sīru̱ṣāsa̱ ā no̍ jī̱vān va̍ruṇa̱ tāsu̍ śādhi ॥2.28.9॥

पर॑ ऋ॒णा सा॑वी॒रध॒ मत्कृ॑तानि॒ माहं रा॑जन्न॒न्यकृ॑तेन भोजम् ।

अव्यु॑ष्टा॒ इन्नु भूय॑सीरु॒षास॒ आ नो॑ जी॒वान् व॑रुण॒ तासु॑ शाधि

yo me̍ rāja̱n yujyo̍ vā̱ sakhā̍ vā̱ svapne̍ bha̱yaṃ bhī̱rave̱ mahya̱māha̍ |

ste̱no vā̱ yo dipsa̍ti no̱ vṛko̍ vā̱ tvaṃ tasmā̍d varuṇa pāhya̱smān ॥2.28.10॥

यो मे॑ राज॒न् युज्यो॑ वा॒ सखा॑ वा॒ स्वप्ने॑ भ॒यं भी॒रवे॒ मह्य॒माह॑ ।

स्ते॒नो वा॒ यो दिप्स॑ति नो॒ वृको॑ वा॒ त्वं तस्मा॑द् वरुण पाह्य॒स्मान्

māhaṃ ma̱ghono̍ varuṇa pri̱yasya̍ bhūri̱dāvna̱ ā vi̍da̱ṃ śūna̍mā̱peḥ |

mā rā̱yo rā̍jan tsu̱yamā̱dava̍ sthāṃ bṛ̱had va̍dema vi̱dathe̍ su̱vīrā̍: ॥2.28.11॥

माहं म॒घोनो॑ वरुण प्रि॒यस्य॑ भूरि॒दाव्न॒ आ वि॑दं॒ शून॑मा॒पेः ।

मा रा॒यो रा॑जन् त्सु॒यमा॒दव॑ स्थां बृ॒हद् व॑देम वि॒दथे॑ सु॒वीरा॑:

pra sa̱mrāje̍ bṛ̱hada̍rcā gabhī̱raṃ brahma̍ pri̱yaṃ varu̍ṇāya śru̱tāya̍ |

vi yo ja̱ghāna̍ śami̱teva̱ carmo̍pa̱stire̍ pṛthi̱vīṃ sūryā̍ya ॥5.85.1॥

प्र स॒म्राजे॑ बृ॒हद॑र्चा गभी॒रं ब्रह्म॑ प्रि॒यं वरु॑णाय श्रु॒ताय॑ ।

वि यो ज॒घान॑ शमि॒तेव॒ चर्मो॑प॒स्तिरे॑ पृथि॒वीं सूर्या॑य

vane̍ṣu̱ vya1ntari̍kṣaṃ tatāna̱ vāja̱marva̍tsu̱ paya̍ u̱sriyā̍su |

hṛ̱tsu kratu̱ṃ varu̍ṇo a̱psva1gniṃ di̱vi sūrya̍madadhā̱t soma̱madrau̍ ॥5.85.2॥

वने॑षु॒ व्य१न्तरि॑क्षं ततान॒ वाज॒मर्व॑त्सु॒ पय॑ उ॒स्रिया॑सु ।

हृ॒त्सु क्रतुं॒ वरु॑णो अ॒प्स्व१ग्निं दि॒वि सूर्य॑मदधा॒त् सोम॒मद्रौ॑

nī̱cīna̍bāra̱ṃ varu̍ṇa̱: kava̍ndha̱ṃ pra sa̍sarja̱ roda̍sī a̱ntari̍kṣam |

tena̱ viśva̍sya̱ bhuva̍nasya̱ rājā̱ yava̱ṃ na vṛ̱ṣṭirvyu̍natti̱ bhūma̍ ॥5.85.3॥

नी॒चीन॑बारं॒ वरु॑ण॒: कव॑न्धं॒ प्र स॑सर्ज॒ रोद॑सी अ॒न्तरि॑क्षम् ।

तेन॒ विश्व॑स्य॒ भुव॑नस्य॒ राजा॒ यवं॒ न वृ॒ष्टिर्व्यु॑नत्ति॒ भूम॑

u̱natti̱ bhūmi̍ṃ pṛthi̱vīmu̱ta dyāṃ ya̱dā du̱gdhaṃ varu̍ṇo̱ vaṣṭyādit |

sama̱bhreṇa̍ vasata̱ parva̍tāsastaviṣī̱yanta̍: śrathayanta vī̱rāḥ ॥5.85.4॥

उ॒नत्ति॒ भूमिं॑ पृथि॒वीमु॒त द्यां य॒दा दु॒ग्धं वरु॑णो॒ वष्ट्यादित् ।

सम॒भ्रेण॑ वसत॒ पर्व॑तासस्तविषी॒यन्त॑: श्रथयन्त वी॒राः

i̱māmū̱ ṣvā̍su̱rasya̍ śru̱tasya̍ ma̱hīṃ mā̱yāṃ varu̍ṇasya̱ pra vo̍cam |

māne̍neva tasthi̱vām̐ a̱ntari̍kṣe̱ vi yo ma̱me pṛ̍thi̱vīṃ sūrye̍ṇa ॥5.85.5॥

इ॒मामू॒ ष्वा॑सु॒रस्य॑ श्रु॒तस्य॑ म॒हीं मा॒यां वरु॑णस्य॒ प्र वो॑चम् ।

माने॑नेव तस्थि॒वाँ अ॒न्तरि॑क्षे॒ वि यो म॒मे पृ॑थि॒वीं सूर्ये॑ण

i̱māmū̱ nu ka̱vita̍masya mā̱yāṃ ma̱hīṃ de̱vasya̱ naki̱rā da̍dharṣa |

eka̱ṃ yadu̱dnā na pṛ̱ṇantyenī̍rāsi̱ñcantī̍ra̱vana̍yaḥ samu̱dram ॥5.85.6॥

इ॒मामू॒ नु क॒वित॑मस्य मा॒यां म॒हीं दे॒वस्य॒ नकि॒रा द॑धर्ष ।

एकं॒ यदु॒द्ना न पृ॒णन्त्येनी॑रासि॒ञ्चन्ती॑र॒वन॑यः समु॒द्रम्

a̱rya̱mya̍ṃ varuṇa mi̱trya̍ṃ vā̱ sakhā̍yaṃ vā̱ sada̱mid bhrāta̍raṃ vā |

ve̱śaṃ vā̱ nitya̍ṃ varu̱ṇāra̍ṇaṃ vā̱ yat sī̱māga̍ścakṛ̱mā śi̱śratha̱stat ॥5.85.7॥

अ॒र्य॒म्यं॑ वरुण मि॒त्र्यं॑ वा॒ सखा॑यं वा॒ सद॒मिद् भ्रात॑रं वा ।

वे॒शं वा॒ नित्यं॑ वरु॒णार॑णं वा॒ यत् सी॒माग॑श्चकृ॒मा शि॒श्रथ॒स्तत्

ki̱ta̱vāso̱ yad ri̍ri̱purna dī̱vi yad vā̍ ghā sa̱tyamu̱ta yanna vi̱dma |

sarvā̱ tā vi ṣya̍ śithi̱reva̍ de̱vā'dhā̍ te syāma varuṇa pri̱yāsa̍: ॥5.85.8॥

कि॒त॒वासो॒ यद् रि॑रि॒पुर्न दी॒वि यद् वा॑ घा स॒त्यमु॒त यन्न वि॒द्म ।

सर्वा॒ ता वि ष्य॑ शिथि॒रेव॑ दे॒वाऽधा॑ ते स्याम वरुण प्रि॒यास॑:

dhīrā̱ tva̍sya mahi̱nā ja̱nūṃṣi̱ vi yasta̱stambha̱ roda̍sī cidu̱rvī |

pra nāka̍mṛ̱ṣvaṃ nu̍nude bṛ̱hanta̍ṃ dvi̱tā nakṣa̍traṃ pa̱pratha̍cca̱ bhūma̍ ॥7.86.1॥

धीरा॒ त्व॑स्य महि॒ना ज॒नूंषि॒ वि यस्त॒स्तम्भ॒ रोद॑सी चिदु॒र्वी ।

प्र नाक॑मृ॒ष्वं नु॑नुदे बृ॒हन्तं॑ द्वि॒ता नक्ष॑त्रं प॒प्रथ॑च्च॒ भूम॑

u̱ta svayā̍ ta̱nvā̱3 saṃ va̍de̱ tatka̱dā nva1ntarvaru̍ṇe bhuvāni |

kiṃ me̍ ha̱vyamahṛ̍ṇāno juṣeta ka̱dā mṛ̍l̤ī̱kaṃ su̱manā̍ a̱bhi khya̍m ॥7.86.2॥

उ॒त स्वया॑ त॒न्वा॒३ सं व॑दे॒ तत्क॒दा न्व१न्तर्वरु॑णे भुवानि ।

किं मे॑ ह॒व्यमहृ॑णानो जुषेत क॒दा मृ॑ळी॒कं सु॒मना॑ अ॒भि ख्य॑म्

pṛ̱cche tadeno̍ varuṇa di̱dṛkṣūpo̍ emi ciki̱tuṣo̍ vi̱pṛccha̍m |

sa̱mā̱naminme̍ ka̱vaya̍ścidāhura̱yaṃ ha̱ tubhya̱ṃ varu̍ṇo hṛṇīte ॥7.86.3॥

पृ॒च्छे तदेनो॑ वरुण दि॒दृक्षूपो॑ एमि चिकि॒तुषो॑ वि॒पृच्छ॑म् ।

स॒मा॒नमिन्मे॑ क॒वय॑श्चिदाहुर॒यं ह॒ तुभ्यं॒ वरु॑णो हृणीते

kimāga̍ āsa varuṇa̱ jyeṣṭha̱ṃ yatsto̱tāra̱ṃ jighā̍ṃsasi̱ sakhā̍yam |

pra tanme̍ voco dūl̤abha svadhā̱vo'va̍ tvāne̱nā nama̍sā tu̱ra i̍yām ॥7.86.4॥

किमाग॑ आस वरुण॒ ज्येष्ठं॒ यत्स्तो॒तारं॒ जिघां॑ससि॒ सखा॑यम् ।

प्र तन्मे॑ वोचो दूळभ स्वधा॒वोऽव॑ त्वाने॒ना नम॑सा तु॒र इ॑याम्

ava̍ dru̱gdhāni̱ pitryā̍ sṛjā̱ no'va̱ yā va̱yaṃ ca̍kṛ̱mā ta̱nūbhi̍: |

ava̍ rājanpaśu̱tṛpa̱ṃ na tā̱yuṃ sṛ̱jā va̱tsaṃ na dāmno̱ vasi̍ṣṭham ॥7.86.5॥

अव॑ द्रु॒ग्धानि॒ पित्र्या॑ सृजा॒ नोऽव॒ या व॒यं च॑कृ॒मा त॒नूभि॑: ।

अव॑ राजन्पशु॒तृपं॒ न ता॒युं सृ॒जा व॒त्सं न दाम्नो॒ वसि॑ष्ठम्

na sa svo dakṣo̍ varuṇa̱ dhruti̱: sā surā̍ ma̱nyurvi̱bhīda̍ko̱ aci̍ttiḥ |

asti̱ jyāyā̱nkanī̍yasa upā̱re svapna̍śca̱nedanṛ̍tasya prayo̱tā ॥7.86.6॥

न स स्वो दक्षो॑ वरुण॒ ध्रुति॒: सा सुरा॑ म॒न्युर्वि॒भीद॑को॒ अचि॑त्तिः ।

अस्ति॒ ज्याया॒न्कनी॑यस उपा॒रे स्वप्न॑श्च॒नेदनृ॑तस्य प्रयो॒ता

ara̍ṃ dā̱so na mī̱l̤huṣe̍ karāṇya̱haṃ de̱vāya̱ bhūrṇa̱ye'nā̍gāḥ |

ace̍tayada̱cito̍ de̱vo a̱ryo gṛtsa̍ṃ rā̱ye ka̱vita̍ro junāti ॥7.86.7॥

अरं॑ दा॒सो न मी॒ळ्हुषे॑ कराण्य॒हं दे॒वाय॒ भूर्ण॒येऽना॑गाः ।

अचे॑तयद॒चितो॑ दे॒वो अ॒र्यो गृत्सं॑ रा॒ये क॒वित॑रो जुनाति

a̱yaṃ su tubhya̍ṃ varuṇa svadhāvo hṛ̱di stoma̱ upa̍śritaścidastu |

śaṃ na̱: kṣeme̱ śamu̱ yoge̍ no astu yū̱yaṃ pā̍ta sva̱stibhi̱: sadā̍ naḥ ॥7.86.8॥

अ॒यं सु तुभ्यं॑ वरुण स्वधावो हृ॒दि स्तोम॒ उप॑श्रितश्चिदस्तु ।

शं न॒: क्षेमे॒ शमु॒ योगे॑ नो अस्तु यू॒यं पा॑त स्व॒स्तिभि॒: सदा॑ नः

rada̍tpa̱tho varu̍ṇa̱: sūryā̍ya̱ prārṇā̍ṃsi samu̱driyā̍ na̱dīnā̍m |

sargo̱ na sṛ̱ṣṭo arva̍tīṝtā̱yañca̱kāra̍ ma̱hīra̱vanī̱raha̍bhyaḥ ॥7.87.1॥

रद॑त्प॒थो वरु॑ण॒: सूर्या॑य॒ प्रार्णां॑सि समु॒द्रिया॑ न॒दीना॑म् ।

सर्गो॒ न सृ॒ष्टो अर्व॑तीॠता॒यञ्च॒कार॑ म॒हीर॒वनी॒रह॑भ्यः

ā̱tmā te̱ vāto̱ raja̱ ā na̍vīnotpa̱śurna bhūrṇi̱ryava̍se sasa̱vān |

a̱ntarma̱hī bṛ̍ha̱tī roda̍sī̱me viśvā̍ te̱ dhāma̍ varuṇa pri̱yāṇi̍ ॥7.87.2॥

आ॒त्मा ते॒ वातो॒ रज॒ आ न॑वीनोत्प॒शुर्न भूर्णि॒र्यव॑से सस॒वान् ।

अ॒न्तर्म॒ही बृ॑ह॒ती रोद॑सी॒मे विश्वा॑ ते॒ धाम॑ वरुण प्रि॒याणि॑

pari̱ spaśo̱ varu̍ṇasya̱ smadi̍ṣṭā u̱bhe pa̍śyanti̱ roda̍sī su̱meke̍ |

ṛ̱tāvā̍naḥ ka̱vayo̍ ya̱jñadhī̍rā̱: prace̍taso̱ ya i̱ṣaya̍nta̱ manma̍ ॥7.87.3॥

परि॒ स्पशो॒ वरु॑णस्य॒ स्मदि॑ष्टा उ॒भे प॑श्यन्ति॒ रोद॑सी सु॒मेके॑ ।

ऋ॒तावा॑नः क॒वयो॑ य॒ज्ञधी॑रा॒: प्रचे॑तसो॒ य इ॒षय॑न्त॒ मन्म॑

u̱vāca̍ me̱ varu̍ṇo̱ medhi̍rāya̱ triḥ sa̱pta nāmāghnyā̍ bibharti |

vi̱dvānpa̱dasya̱ guhyā̱ na vo̍cadyu̱gāya̱ vipra̱ upa̍rāya̱ śikṣa̍n ॥7.87.4॥

उ॒वाच॑ मे॒ वरु॑णो॒ मेधि॑राय॒ त्रिः स॒प्त नामाघ्न्या॑ बिभर्ति ।

वि॒द्वान्प॒दस्य॒ गुह्या॒ न वो॑चद्यु॒गाय॒ विप्र॒ उप॑राय॒ शिक्ष॑न्

ti̱sro dyāvo̱ nihi̍tā a̱ntara̍sminti̱sro bhūmī̱rupa̍rā̱: ṣaḍvi̍dhānāḥ |

gṛtso̱ rājā̱ varu̍ṇaścakra e̱taṃ di̱vi pre̱ṅkhaṃ hi̍ra̱ṇyaya̍ṃ śu̱bhe kam ॥7.87.5॥

ति॒स्रो द्यावो॒ निहि॑ता अ॒न्तर॑स्मिन्ति॒स्रो भूमी॒रुप॑रा॒: षड्वि॑धानाः ।

गृत्सो॒ राजा॒ वरु॑णश्चक्र ए॒तं दि॒वि प्रे॒ङ्खं हि॑र॒ण्ययं॑ शु॒भे कम्

ava̱ sindhu̱ṃ varu̍ṇo̱ dyauri̍va sthāddra̱pso na śve̱to mṛ̱gastuvi̍ṣmān |

ga̱mbhī̱raśa̍ṃso̱ raja̍so vi̱māna̍: supā̱rakṣa̍traḥ sa̱to a̱sya rājā̍ ॥7.87.6॥

अव॒ सिन्धुं॒ वरु॑णो॒ द्यौरि॑व स्थाद्द्र॒प्सो न श्वे॒तो मृ॒गस्तुवि॑ष्मान् ।

ग॒म्भी॒रशं॑सो॒ रज॑सो वि॒मान॑: सुपा॒रक्ष॑त्रः स॒तो अ॒स्य राजा॑

yo mṛ̱l̤ayā̍ti ca̱kruṣe̍ ci̱dāgo̍ va̱yaṃ syā̍ma̱ varu̍ṇe̱ anā̍gāḥ |

anu̍ vra̱tānyadi̍teṝ̱dhanto̍ yū̱yaṃ pā̍ta sva̱stibhi̱: sadā̍ naḥ ॥7.87.7॥

यो मृ॒ळया॑ति च॒क्रुषे॑ चि॒दागो॑ व॒यं स्या॑म॒ वरु॑णे॒ अना॑गाः ।

अनु॑ व्र॒तान्यदि॑तेॠ॒धन्तो॑ यू॒यं पा॑त स्व॒स्तिभि॒: सदा॑ नः

pra śu̱ndhyuva̱ṃ varu̍ṇāya̱ preṣṭhā̍ṃ ma̱tiṃ va̍siṣṭha mī̱l̤huṣe̍ bharasva |

ya ī̍ma̱rvāñca̱ṃ kara̍te̱ yaja̍traṃ sa̱hasrā̍magha̱ṃ vṛṣa̍ṇaṃ bṛ̱hanta̍m ॥7.88.1॥

प्र शु॒न्ध्युवं॒ वरु॑णाय॒ प्रेष्ठां॑ म॒तिं व॑सिष्ठ मी॒ळ्हुषे॑ भरस्व ।

य ई॑म॒र्वाञ्चं॒ कर॑ते॒ यज॑त्रं स॒हस्रा॑मघं॒ वृष॑णं बृ॒हन्त॑म्

adhā̱ nva̍sya sa̱ṃdṛśa̍ṃ jaga̱nvāna̱gneranī̍ka̱ṃ varu̍ṇasya maṃsi |

sva1ryadaśma̍nnadhi̱pā u̱ andho̱'bhi mā̱ vapu̍rdṛ̱śaye̍ ninīyāt ॥7.88.2॥

अधा॒ न्व॑स्य सं॒दृशं॑ जग॒न्वान॒ग्नेरनी॑कं॒ वरु॑णस्य मंसि ।

स्व१र्यदश्म॑न्नधि॒पा उ॒ अन्धो॒ऽभि मा॒ वपु॑र्दृ॒शये॑ निनीयात्

ā yadru̱hāva̱ varu̍ṇaśca̱ nāva̱ṃ pra yatsa̍mu̱dramī̱rayā̍va̱ madhya̍m |

adhi̱ yada̱pāṃ snubhi̱ścarā̍va̱ pra pre̱ṅkha ī̍ṅkhayāvahai śu̱bhe kam ॥7.88.3॥

आ यद्रु॒हाव॒ वरु॑णश्च॒ नावं॒ प्र यत्स॑मु॒द्रमी॒रया॑व॒ मध्य॑म् ।

अधि॒ यद॒पां स्नुभि॒श्चरा॑व॒ प्र प्रे॒ङ्ख ई॑ङ्खयावहै शु॒भे कम्

vasi̍ṣṭhaṃ ha̱ varu̍ṇo nā̱vyādhā̱dṛṣi̍ṃ cakāra̱ svapā̱ maho̍bhiḥ |

sto̱tāra̱ṃ vipra̍: sudina̱tve ahnā̱ṃ yānnu dyāva̍sta̱tana̱nyādu̱ṣāsa̍: ॥7.88.4॥

वसि॑ष्ठं ह॒ वरु॑णो ना॒व्याधा॒दृषिं॑ चकार॒ स्वपा॒ महो॑भिः ।

स्तो॒तारं॒ विप्र॑: सुदिन॒त्वे अह्नां॒ यान्नु द्याव॑स्त॒तन॒न्यादु॒षास॑:

kva1 tyāni̍ nau sa̱khyā ba̍bhūvu̱: sacā̍vahe̱ yada̍vṛ̱kaṃ pu̱rā ci̍t |

bṛ̱hanta̱ṃ māna̍ṃ varuṇa svadhāvaḥ sa̱hasra̍dvāraṃ jagamā gṛ̱haṃ te̍ ॥7.88.5॥

क्व१ त्यानि॑ नौ स॒ख्या ब॑भूवु॒: सचा॑वहे॒ यद॑वृ॒कं पु॒रा चि॑त् ।

बृ॒हन्तं॒ मानं॑ वरुण स्वधावः स॒हस्र॑द्वारं जगमा गृ॒हं ते॑

ya ā̱pirnityo̍ varuṇa pri̱yaḥ santvāmāgā̍ṃsi kṛ̱ṇava̱tsakhā̍ te |

mā ta̱ ena̍svanto yakṣinbhujema ya̱ndhi ṣmā̱ vipra̍: stuva̱te varū̍tham ॥7.88.6॥

य आ॒पिर्नित्यो॑ वरुण प्रि॒यः सन्त्वामागां॑सि कृ॒णव॒त्सखा॑ ते ।

मा त॒ एन॑स्वन्तो यक्षिन्भुजेम य॒न्धि ष्मा॒ विप्र॑: स्तुव॒ते वरू॑थम्

dhru̱vāsu̍ tvā̱su kṣi̱tiṣu̍ kṣi̱yanto̱ vya1smatpāśa̱ṃ varu̍ṇo mumocat |

avo̍ vanvā̱nā adi̍teru̱pasthā̍dyū̱yaṃ pā̍ta sva̱stibhi̱: sadā̍ naḥ ॥7.88.7॥

ध्रु॒वासु॑ त्वा॒सु क्षि॒तिषु॑ क्षि॒यन्तो॒ व्य१स्मत्पाशं॒ वरु॑णो मुमोचत् ।

अवो॑ वन्वा॒ना अदि॑तेरु॒पस्था॑द्यू॒यं पा॑त स्व॒स्तिभि॒: सदा॑ नः

mo ṣu va̍ruṇa mṛ̱nmaya̍ṃ gṛ̱haṃ rā̍janna̱haṃ ga̍mam | mṛ̱l̤ā su̍kṣatra mṛ̱l̤aya̍ ॥7.89.1॥

मो षु व॑रुण मृ॒न्मयं॑ गृ॒हं रा॑जन्न॒हं ग॑मम् । मृ॒ळा सु॑क्षत्र मृ॒ळय॑

yademi̍ prasphu̱ranni̍va̱ dṛti̱rna dhmā̱to a̍drivaḥ | mṛ̱l̤ā su̍kṣatra mṛ̱l̤aya̍ ॥7.89.2॥

यदेमि॑ प्रस्फु॒रन्नि॑व॒ दृति॒र्न ध्मा॒तो अ॑द्रिवः । मृ॒ळा सु॑क्षत्र मृ॒ळय॑

kratva̍: samaha dī̱natā̍ pratī̱paṃ ja̍gamā śuce | mṛ̱l̤ā su̍kṣatra mṛ̱l̤aya̍ ॥7.89.3॥

क्रत्व॑: समह दी॒नता॑ प्रती॒पं ज॑गमा शुचे । मृ॒ळा सु॑क्षत्र मृ॒ळय॑

a̱pāṃ madhye̍ tasthi̱vāṃsa̱ṃ tṛṣṇā̍vidajjari̱tāra̍m | mṛ̱l̤ā su̍kṣatra mṛ̱l̤aya̍ ॥7.89.4॥

अ॒पां मध्ये॑ तस्थि॒वांसं॒ तृष्णा॑विदज्जरि॒तार॑म् । मृ॒ळा सु॑क्षत्र मृ॒ळय॑

yatkiṃ ce̱daṃ va̍ruṇa̱ daivye̱ jane̍'bhidro̱haṃ ma̍nu̱ṣyā̱3ścarā̍masi |

aci̍ttī̱ yattava̱ dharmā̍ yuyopi̱ma mā na̱stasmā̱dena̍so deva rīriṣaḥ ॥7.89.5॥

यत्किं चे॒दं व॑रुण॒ दैव्ये॒ जने॑ऽभिद्रो॒हं म॑नु॒ष्या॒३श्चरा॑मसि ।

अचि॑त्ती॒ यत्तव॒ धर्मा॑ युयोपि॒म मा न॒स्तस्मा॒देन॑सो देव रीरिषः

a̱smā ū̱ ṣu prabhū̍taye̱ varu̍ṇāya ma̱rudbhyo'rcā̍ vi̱duṣṭa̍rebhyaḥ |

yo dhī̱tā mānu̍ṣāṇāṃ pa̱śvo gā i̍va̱ rakṣa̍ti̱ nabha̍ntāmanya̱ke sa̍me ॥8.41.1॥

अ॒स्मा ऊ॒ षु प्रभू॑तये॒ वरु॑णाय म॒रुद्भ्योऽर्चा॑ वि॒दुष्ट॑रेभ्यः ।

यो धी॒ता मानु॑षाणां प॒श्वो गा इ॑व॒ रक्ष॑ति॒ नभ॑न्तामन्य॒के स॑मे

tamū̱ ṣu sa̍ma̱nā gi̱rā pi̍tṝ̱ṇāṃ ca̱ manma̍bhiḥ |

nā̱bhā̱kasya̱ praśa̍stibhi̱ryaḥ sindhū̍nā̱mupo̍da̱ye sa̱ptasva̍sā̱ sa ma̍dhya̱mo nabha̍ntāmanya̱ke sa̍me ॥8.41.2॥

तमू॒ षु स॑म॒ना गि॒रा पि॑तॄ॒णां च॒ मन्म॑भिः ।

ना॒भा॒कस्य॒ प्रश॑स्तिभि॒र्यः सिन्धू॑ना॒मुपो॑द॒ये स॒प्तस्व॑सा॒ स म॑ध्य॒मो नभ॑न्तामन्य॒के स॑मे

sa kṣapa̱: pari̍ ṣasvaje̱ nyu1sro mā̱yayā̍ dadhe̱ sa viśva̱ṃ pari̍ darśa̱taḥ |

tasya̱ venī̱ranu̍ vra̱tamu̱ṣasti̱sro a̍vardhaya̱nnabha̍ntāmanya̱ke sa̍me ॥8.41.3॥

स क्षप॒: परि॑ षस्वजे॒ न्यु१स्रो मा॒यया॑ दधे॒ स विश्वं॒ परि॑ दर्श॒तः ।

तस्य॒ वेनी॒रनु॑ व्र॒तमु॒षस्ति॒स्रो अ॑वर्धय॒न्नभ॑न्तामन्य॒के स॑मे

yaḥ ka̱kubho̍ nidhāra̱yaḥ pṛ̍thi̱vyāmadhi̍ darśa̱taḥ |

sa mātā̍ pū̱rvyaṃ pa̱daṃ tadvaru̍ṇasya̱ saptya̱ṃ sa hi go̱pā i̱veryo̱ nabha̍ntāmanya̱ke sa̍me ॥8.41.4॥

यः क॒कुभो॑ निधार॒यः पृ॑थि॒व्यामधि॑ दर्श॒तः ।

स माता॑ पू॒र्व्यं प॒दं तद्वरु॑णस्य॒ सप्त्यं॒ स हि गो॒पा इ॒वेर्यो॒ नभ॑न्तामन्य॒के स॑मे

yo dha̱rtā bhuva̍nānā̱ṃ ya u̱srāṇā̍mapī̱cyā̱3 veda̱ nāmā̍ni̱ guhyā̍ |

sa ka̱viḥ kāvyā̍ pu̱ru rū̱paṃ dyauri̍va puṣyati̱ nabha̍ntāmanya̱ke sa̍me ॥8.41.5॥

यो ध॒र्ता भुव॑नानां॒ य उ॒स्राणा॑मपी॒च्या॒३ वेद॒ नामा॑नि॒ गुह्या॑ ।

स क॒विः काव्या॑ पु॒रु रू॒पं द्यौरि॑व पुष्यति॒ नभ॑न्तामन्य॒के स॑मे

yasmi̱nviśvā̍ni̱ kāvyā̍ ca̱kre nābhi̍riva śri̱tā |

tri̱taṃ jū̱tī sa̍paryata vra̱je gāvo̱ na sa̱ṃyuje̍ yu̱je aśvā̍m̐ ayukṣata̱ nabha̍ntāmanya̱ke sa̍me ॥8.41.6॥

यस्मि॒न्विश्वा॑नि॒ काव्या॑ च॒क्रे नाभि॑रिव श्रि॒ता ।

त्रि॒तं जू॒ती स॑पर्यत व्र॒जे गावो॒ न सं॒युजे॑ यु॒जे अश्वाँ॑ अयुक्षत॒ नभ॑न्तामन्य॒के स॑मे

ya ā̱svatka̍ ā̱śaye̱ viśvā̍ jā̱tānye̍ṣām |

pari̱ dhāmā̍ni̱ marmṛ̍śa̱dvaru̍ṇasya pu̱ro gaye̱ viśve̍ de̱vā anu̍ vra̱taṃ nabha̍ntāmanya̱ke sa̍me ॥8.41.7॥

य आ॒स्वत्क॑ आ॒शये॒ विश्वा॑ जा॒तान्ये॑षाम् ।

परि॒ धामा॑नि॒ मर्मृ॑श॒द्वरु॑णस्य पु॒रो गये॒ विश्वे॑ दे॒वा अनु॑ व्र॒तं नभ॑न्तामन्य॒के स॑मे

sa sa̍mu̱dro a̍pī̱cya̍stu̱ro dyāmi̍va rohati̱ ni yadā̍su̱ yaju̍rda̱dhe |

sa mā̱yā a̱rcinā̍ pa̱dā'stṛ̍ṇā̱nnāka̱māru̍ha̱nnabha̍ntāmanya̱ke sa̍me ॥8.41.8॥

स स॑मु॒द्रो अ॑पी॒च्य॑स्तु॒रो द्यामि॑व रोहति॒ नि यदा॑सु॒ यजु॑र्द॒धे ।

स मा॒या अ॒र्चिना॑ प॒दाऽस्तृ॑णा॒न्नाक॒मारु॑ह॒न्नभ॑न्तामन्य॒के स॑मे

yasya̍ śve̱tā vi̍cakṣa̱ṇā ti̱sro bhūmī̍radhikṣi̱taḥ |

trirutta̍rāṇi pa̱pratu̱rvaru̍ṇasya dhru̱vaṃ sada̱: sa sa̍ptā̱nāmi̍rajyati̱ nabha̍ntāmanya̱ke sa̍me ॥8.41.9॥

यस्य॑ श्वे॒ता वि॑चक्ष॒णा ति॒स्रो भूमी॑रधिक्षि॒तः ।

त्रिरुत्त॑राणि प॒प्रतु॒र्वरु॑णस्य ध्रु॒वं सद॒: स स॑प्ता॒नामि॑रज्यति॒ नभ॑न्तामन्य॒के स॑मे

yaḥ śve̱tām̐ adhi̍nirṇijaśca̱kre kṛ̱ṣṇām̐ anu̍ vra̱tā |

sa dhāma̍ pū̱rvyaṃ ma̍me̱ yaḥ ska̱mbhena̱ vi roda̍sī a̱jo na dyāmadhā̍raya̱nnabha̍ntāmanya̱ke sa̍me ॥8.41.10॥

यः श्वे॒ताँ अधि॑निर्णिजश्च॒क्रे कृ॒ष्णाँ अनु॑ व्र॒ता ।

स धाम॑ पू॒र्व्यं म॑मे॒ यः स्क॒म्भेन॒ वि रोद॑सी अ॒जो न द्यामधा॑रय॒न्नभ॑न्तामन्य॒के स॑मे

asta̍bhnā̱ddyāmasu̍ro vi̱śvave̍dā̱ ami̍mīta vari̱māṇa̍ṃ pṛthi̱vyāḥ |

āsī̍da̱dviśvā̱ bhuva̍nāni sa̱mrāḍviśvettāni̱ varu̍ṇasya vra̱tāni̍ ॥8.42.1॥

अस्त॑भ्ना॒द्द्यामसु॑रो वि॒श्ववे॑दा॒ अमि॑मीत वरि॒माणं॑ पृथि॒व्याः ।

आसी॑द॒द्विश्वा॒ भुव॑नानि स॒म्राड्विश्वेत्तानि॒ वरु॑णस्य व्र॒तानि॑

e̱vā va̍ndasva̱ varu̍ṇaṃ bṛ̱hanta̍ṃ nama̱syā dhīra̍ma̱mṛta̍sya go̱pām |

sa na̱: śarma̍ tri̱varū̍tha̱ṃ vi ya̍ṃsatpā̱taṃ no̍ dyāvāpṛthivī u̱pasthe̍ ॥8.42.2॥

ए॒वा व॑न्दस्व॒ वरु॑णं बृ॒हन्तं॑ नम॒स्या धीर॑म॒मृत॑स्य गो॒पाम् ।

स न॒: शर्म॑ त्रि॒वरू॑थं॒ वि यं॑सत्पा॒तं नो॑ द्यावापृथिवी उ॒पस्थे॑

i̱māṃ dhiya̱ṃ śikṣa̍māṇasya deva̱ kratu̱ṃ dakṣa̍ṃ varuṇa̱ saṃ śi̍śādhi |

yayāti̱ viśvā̍ duri̱tā tare̍ma su̱tarmā̍ṇa̱madhi̱ nāva̍ṃ ruhema ॥8.42.3॥

इ॒मां धियं॒ शिक्ष॑माणस्य देव॒ क्रतुं॒ दक्षं॑ वरुण॒ सं शि॑शाधि ।

ययाति॒ विश्वा॑ दुरि॒ता तरे॑म सु॒तर्मा॑ण॒मधि॒ नावं॑ रुहेम

ā vā̱ṃ grāvā̍ṇo aśvinā dhī̱bhirviprā̍ acucyavuḥ | nāsa̍tyā̱ soma̍pītaye̱ nabha̍ntāmanya̱ke sa̍me ॥8.42.4॥

आ वां॒ ग्रावा॑णो अश्विना धी॒भिर्विप्रा॑ अचुच्यवुः । नास॑त्या॒ सोम॑पीतये॒ नभ॑न्तामन्य॒के स॑मे

yathā̍ vā̱matri̍raśvinā gī̱rbhirvipro̱ ajo̍havīt | nāsa̍tyā̱ soma̍pītaye̱ nabha̍ntāmanya̱ke sa̍me ॥8.42.5॥

यथा॑ वा॒मत्रि॑रश्विना गी॒र्भिर्विप्रो॒ अजो॑हवीत् । नास॑त्या॒ सोम॑पीतये॒ नभ॑न्तामन्य॒के स॑मे

e̱vā vā̍mahva ū̱taye̱ yathāhu̍vanta̱ medhi̍rāḥ | nāsa̍tyā̱ soma̍pītaye̱ nabha̍ntāmanya̱ke sa̍me ॥8.42.6॥

ए॒वा वा॑मह्व ऊ॒तये॒ यथाहु॑वन्त॒ मेधि॑राः । नास॑त्या॒ सोम॑पीतये॒ नभ॑न्तामन्य॒के स॑मे