Study
- Anukramaṇī
- Also in this saṅgraha
- Source
13 praskaṇvaḥ kāṇvaḥ| sūryaḥ (11-13 rogaghnya upaniṣadaḥ, 13 antyo'rdharcaḥ dviṣad ghnaśca)| gāyatrī, 10-13 anuṣṭup|
udu̱ tyaṃ jā̱tave̍dasaṃ de̱vaṃ va̍hanti ke̱tava̍: | dṛ̱śe viśvā̍ya̱ sūrya̍m ॥1.50.1॥
उदु॒ त्यं जा॒तवे॑दसं दे॒वं व॑हन्ति के॒तव॑: । दृ॒शे विश्वा॑य॒ सूर्य॑म्
apa̱ tye tā̱yavo̍ yathā̱ nakṣa̍trā yantya̱ktubhi̍: | sūrā̍ya vi̱śvaca̍kṣase ॥1.50.2॥
अप॒ त्ये ता॒यवो॑ यथा॒ नक्ष॑त्रा यन्त्य॒क्तुभि॑: । सूरा॑य वि॒श्वच॑क्षसे
adṛ̍śramasya ke̱tavo̱ vi ra̱śmayo̱ janā̱m̐ anu̍ | bhrāja̍nto a̱gnayo̍ yathā ॥1.50.3॥
अदृ॑श्रमस्य के॒तवो॒ वि र॒श्मयो॒ जनाँ॒ अनु॑ । भ्राज॑न्तो अ॒ग्नयो॑ यथा
ta̱raṇi̍rvi̱śvada̍rśato jyoti̱ṣkṛda̍si sūrya | viśva̱mā bhā̍si roca̱nam ॥1.50.4॥
त॒रणि॑र्वि॒श्वद॑र्शतो ज्योति॒ष्कृद॑सि सूर्य । विश्व॒मा भा॑सि रोच॒नम्
pra̱tyaṅ de̱vānā̱ṃ viśa̍: pra̱tyaṅṅude̍ṣi̱ mānu̍ṣān | pra̱tyaṅ viśva̱ṃ sva̍rdṛ̱śe ॥1.50.5॥
प्र॒त्यङ् दे॒वानां॒ विश॑: प्र॒त्यङ्ङुदे॑षि॒ मानु॑षान् । प्र॒त्यङ् विश्वं॒ स्व॑र्दृ॒शे
yenā̍ pāvaka̱ cakṣa̍sā bhura̱ṇyanta̱ṃ janā̱m̐ anu̍ | tvaṃ va̍ruṇa̱ paśya̍si ॥1.50.6॥
येना॑ पावक॒ चक्ष॑सा भुर॒ण्यन्तं॒ जनाँ॒ अनु॑ । त्वं व॑रुण॒ पश्य॑सि
vi dyāme̍ṣi̱ raja̍spṛ̱thvahā̱ mimā̍no a̱ktubhi̍: | paśya̱ñjanmā̍ni sūrya ॥1.50.7॥
वि द्यामे॑षि॒ रज॑स्पृ॒थ्वहा॒ मिमा॑नो अ॒क्तुभि॑: । पश्य॒ञ्जन्मा॑नि सूर्य
sa̱pta tvā̍ ha̱rito̱ rathe̱ vaha̍nti deva sūrya | śo̱ciṣke̍śaṃ vicakṣaṇa ॥1.50.8॥
स॒प्त त्वा॑ ह॒रितो॒ रथे॒ वह॑न्ति देव सूर्य । शो॒चिष्के॑शं विचक्षण
ayu̍kta sa̱pta śu̱ndhyuva̱: sūro̱ ratha̍sya na̱ptya̍: | tābhi̍ryāti̱ svayu̍ktibhiḥ ॥1.50.9॥
अयु॑क्त स॒प्त शु॒न्ध्युव॒: सूरो॒ रथ॑स्य न॒प्त्य॑: । ताभि॑र्याति॒ स्वयु॑क्तिभिः
udva̱yaṃ tama̍sa̱spari̱ jyoti̱ṣpaśya̍nta̱ utta̍ram | de̱vaṃ de̍va̱trā sūrya̱maga̍nma̱ jyoti̍rutta̱mam ॥1.50.10॥
उद्व॒यं तम॑स॒स्परि॒ ज्योति॒ष्पश्य॑न्त॒ उत्त॑रम् । दे॒वं दे॑व॒त्रा सूर्य॒मग॑न्म॒ ज्योति॑रुत्त॒मम्
u̱dyanna̱dya mi̍tramaha ā̱roha̱nnutta̍rā̱ṃ diva̍m | hṛ̱dro̱gaṃ mama̍ sūrya hari̱māṇa̍ṃ ca nāśaya ॥1.50.11॥
उ॒द्यन्न॒द्य मि॑त्रमह आ॒रोह॒न्नुत्त॑रां॒ दिव॑म् । हृ॒द्रो॒गं मम॑ सूर्य हरि॒माणं॑ च नाशय
śuke̍ṣu me hari̱māṇa̍ṃ ropa̱ṇākā̍su dadhmasi | atho̍ hāridra̱veṣu̍ me hari̱māṇa̱ṃ ni da̍dhmasi ॥1.50.12॥
शुके॑षु मे हरि॒माणं॑ रोप॒णाका॑सु दध्मसि । अथो॑ हारिद्र॒वेषु॑ मे हरि॒माणं॒ नि द॑ध्मसि
uda̍gāda̱yamā̍di̱tyo viśve̍na̱ saha̍sā sa̱ha | dvi̱ṣanta̱ṃ mahya̍ṃ ra̱ndhaya̱n mo a̱haṃ dvi̍ṣa̱te ra̍dham ॥1.50.13॥
उद॑गाद॒यमा॑दि॒त्यो विश्वे॑न॒ सह॑सा स॒ह । द्वि॒षन्तं॒ मह्यं॑ र॒न्धय॒न् मो अ॒हं द्वि॑ष॒ते र॑धम्