7 saucīko'gnirvaiśvānaro vā, saptirvājaṃbharo vā| agniḥ| triṣṭup|
a̱gniḥ sapti̍ṃ vājambha̱raṃ da̍dātya̱gnirvī̱raṃ śrutya̍ṃ karmani̱ṣṭhām |
a̱gnī roda̍sī̱ vi ca̍ratsama̱ñjanna̱gnirnārī̍ṃ vī̱raku̍kṣi̱ṃ pura̍ṃdhim ॥10.80.1॥
अ॒ग्निः सप्तिं॑ वाजम्भ॒रं द॑दात्य॒ग्निर्वी॒रं श्रुत्यं॑ कर्मनि॒ष्ठाम् ।
अ॒ग्नी रोद॑सी॒ वि च॑रत्सम॒ञ्जन्न॒ग्निर्नारीं॑ वी॒रकु॑क्षिं॒ पुरं॑धिम्
a̱gnerapna̍saḥ sa̱mida̍stu bha̱drā'gnirma̱hī roda̍sī̱ ā vi̍veśa |
a̱gnireka̍ṃ codayatsa̱matsva̱gnirvṛ̱trāṇi̍ dayate pu̱rūṇi̍ ॥10.80.2॥
अ॒ग्नेरप्न॑सः स॒मिद॑स्तु भ॒द्राऽग्निर्म॒ही रोद॑सी॒ आ वि॑वेश ।
अ॒ग्निरेकं॑ चोदयत्स॒मत्स्व॒ग्निर्वृ॒त्राणि॑ दयते पु॒रूणि॑
a̱gnirha̱ tyaṃ jara̍ta̱: karṇa̍māvā̱'gnira̱dbhyo nira̍daha̱jjarū̍tham |
a̱gniratri̍ṃ gha̱rma u̍ruṣyada̱ntara̱gnirnṛ̱medha̍ṃ pra̱jayā̍sṛja̱tsam ॥10.80.3॥
अ॒ग्निर्ह॒ त्यं जर॑त॒: कर्ण॑मावा॒ऽग्निर॒द्भ्यो निर॑दह॒ज्जरू॑थम् ।
अ॒ग्निरत्रिं॑ घ॒र्म उ॑रुष्यद॒न्तर॒ग्निर्नृ॒मेधं॑ प्र॒जया॑सृज॒त्सम्
a̱gnirdā̱ddravi̍ṇaṃ vī̱rape̍śā a̱gniṝṣi̱ṃ yaḥ sa̱hasrā̍ sa̱noti̍ |
a̱gnirdi̱vi ha̱vyamā ta̍tānā̱'gnerdhāmā̍ni̱ vibhṛ̍tā puru̱trā ॥10.80.4॥
अ॒ग्निर्दा॒द्द्रवि॑णं वी॒रपे॑शा अ॒ग्निॠषिं॒ यः स॒हस्रा॑ स॒नोति॑ ।
अ॒ग्निर्दि॒वि ह॒व्यमा त॑ताना॒ऽग्नेर्धामा॑नि॒ विभृ॑ता पुरु॒त्रा
a̱gnimu̱kthaiṝṣa̍yo̱ vi hva̍yante̱'gniṃ naro̱ yāma̍ni bādhi̱tāsa̍: |
a̱gniṃ vayo̍ a̱ntari̍kṣe̱ pata̍nto̱'gniḥ sa̱hasrā̱ pari̍ yāti̱ gonā̍m ॥10.80.5॥
अ॒ग्निमु॒क्थैॠष॑यो॒ वि ह्व॑यन्ते॒ऽग्निं नरो॒ याम॑नि बाधि॒तास॑: ।
अ॒ग्निं वयो॑ अ॒न्तरि॑क्षे॒ पत॑न्तो॒ऽग्निः स॒हस्रा॒ परि॑ याति॒ गोना॑म्
a̱gniṃ viśa̍ īl̤ate̱ mānu̍ṣī̱ryā a̱gniṃ manu̍ṣo̱ nahu̍ṣo̱ vi jā̱tāḥ |
a̱gnirgāndha̍rvīṃ pa̱thyā̍mṛ̱tasyā̱'gnergavyū̍tirghṛ̱ta ā niṣa̍ttā ॥10.80.6॥
अ॒ग्निं विश॑ ईळते॒ मानु॑षी॒र्या अ॒ग्निं मनु॑षो॒ नहु॑षो॒ वि जा॒ताः ।
अ॒ग्निर्गान्ध॑र्वीं प॒थ्या॑मृ॒तस्या॒ऽग्नेर्गव्यू॑तिर्घृ॒त आ निष॑त्ता
a̱gnaye̱ brahma̍ ṛ̱bhava̍statakṣura̱gniṃ ma̱hāma̍vocāmā suvṛ̱ktim |
agne̱ prāva̍ jari̱tāra̍ṃ yavi̱ṣṭhā'gne̱ mahi̱ dravi̍ṇa̱mā ya̍jasva ॥10.80.7॥
अ॒ग्नये॒ ब्रह्म॑ ऋ॒भव॑स्ततक्षुर॒ग्निं म॒हाम॑वोचामा सुवृ॒क्तिम् ।
अग्ने॒ प्राव॑ जरि॒तारं॑ यवि॒ष्ठाऽग्ने॒ महि॒ द्रवि॑ण॒मा य॑जस्व