Study
15 maitrāvaruṇirvasiṣṭha:| viśve devā:| triṣṭup |
śaṃ na̍ indrā̱gnī bha̍vatā̱mavo̍bhi̱: śaṃ na̱ indrā̱varu̍ṇā rā̱taha̍vyā |
śamindrā̱somā̍ suvi̱tāya̱ śaṃ yoḥ śaṃ na̱ indrā̍pū̱ṣaṇā̱ vāja̍sātau ॥7.35.1॥
शं न॑ इन्द्रा॒ग्नी भ॑वता॒मवो॑भि॒: शं न॒ इन्द्रा॒वरु॑णा रा॒तह॑व्या ।
शमिन्द्रा॒सोमा॑ सुवि॒ताय॒ शं योः शं न॒ इन्द्रा॑पू॒षणा॒ वाज॑सातौ
śaṃ no̱ bhaga̱: śamu̍ na̱: śaṃso̍ astu̱ śaṃ na̱: pura̍ṃdhi̱: śamu̍ santu̱ rāya̍: |
śaṃ na̍: sa̱tyasya̍ su̱yama̍sya̱ śaṃsa̱: śaṃ no̍ arya̱mā pu̍rujā̱to a̍stu ॥7.35.2॥
शं नो॒ भग॒: शमु॑ न॒: शंसो॑ अस्तु॒ शं न॒: पुरं॑धि॒: शमु॑ सन्तु॒ राय॑: ।
शं न॑: स॒त्यस्य॑ सु॒यम॑स्य॒ शंस॒: शं नो॑ अर्य॒मा पु॑रुजा॒तो अ॑स्तु
śaṃ no̍ dhā̱tā śamu̍ dha̱rtā no̍ astu̱ śaṃ na̍ urū̱cī bha̍vatu sva̱dhābhi̍: |
śaṃ roda̍sī bṛha̱tī śaṃ no̱ adri̱: śaṃ no̍ de̱vānā̍ṃ su̱havā̍ni santu ॥7.35.3॥
शं नो॑ धा॒ता शमु॑ ध॒र्ता नो॑ अस्तु॒ शं न॑ उरू॒ची भ॑वतु स्व॒धाभि॑: ।
शं रोद॑सी बृह॒ती शं नो॒ अद्रि॒: शं नो॑ दे॒वानां॑ सु॒हवा॑नि सन्तु
śaṃ no̍ a̱gnirjyoti̍ranīko astu̱ śaṃ no̍ mi̱trāvaru̍ṇāva̱śvinā̱ śam |
śaṃ na̍: su̱kṛtā̍ṃ sukṛ̱tāni̍ santu̱ śaṃ na̍ iṣi̱ro a̱bhi vā̍tu̱ vāta̍: ॥7.35.4॥
शं नो॑ अ॒ग्निर्ज्योति॑रनीको अस्तु॒ शं नो॑ मि॒त्रावरु॑णाव॒श्विना॒ शम् ।
शं न॑: सु॒कृतां॑ सुकृ॒तानि॑ सन्तु॒ शं न॑ इषि॒रो अ॒भि वा॑तु॒ वात॑:
śaṃ no̱ dyāvā̍pṛthi̱vī pū̱rvahū̍tau̱ śama̱ntari̍kṣaṃ dṛ̱śaye̍ no astu |
śaṃ na̱ oṣa̍dhīrva̱nino̍ bhavantu̱ śaṃ no̱ raja̍sa̱spati̍rastu ji̱ṣṇuḥ ॥7.35.5॥
शं नो॒ द्यावा॑पृथि॒वी पू॒र्वहू॑तौ॒ शम॒न्तरि॑क्षं दृ॒शये॑ नो अस्तु ।
शं न॒ ओष॑धीर्व॒निनो॑ भवन्तु॒ शं नो॒ रज॑स॒स्पति॑रस्तु जि॒ष्णुः
śaṃ na̱ indro̱ vasu̍bhirde̱vo a̍stu̱ śamā̍di̱tyebhi̱rvaru̍ṇaḥ su̱śaṃsa̍: |
śaṃ no̍ ru̱dro ru̱drebhi̱rjalā̍ṣa̱: śaṃ na̱stvaṣṭā̱ gnābhi̍ri̱ha śṛ̍ṇotu ॥7.35.6॥
शं न॒ इन्द्रो॒ वसु॑भिर्दे॒वो अ॑स्तु॒ शमा॑दि॒त्येभि॒र्वरु॑णः सु॒शंस॑: ।
शं नो॑ रु॒द्रो रु॒द्रेभि॒र्जला॑ष॒: शं न॒स्त्वष्टा॒ ग्नाभि॑रि॒ह शृ॑णोतु
śaṃ na̱ somo̍ bhavatu̱ brahma̱ śaṃ na̱: śaṃ no̱ grāvā̍ṇa̱: śamu̍ santu ya̱jñāḥ |
śaṃ na̱: svarū̍ṇāṃ mi̱tayo̍ bhavantu̱ śaṃ na̍: pra̱sva1: śamva̍stu̱ vedi̍: ॥7.35.7॥
शं न॒ सोमो॑ भवतु॒ ब्रह्म॒ शं न॒: शं नो॒ ग्रावा॑ण॒: शमु॑ सन्तु य॒ज्ञाः ।
शं न॒: स्वरू॑णां मि॒तयो॑ भवन्तु॒ शं न॑: प्र॒स्व१: शम्व॑स्तु॒ वेदि॑:
śaṃ na̱: sūrya̍ uru̱cakṣā̱ ude̍tu̱ śaṃ na̱ścata̍sraḥ pra̱diśo̍ bhavantu |
śaṃ na̱: parva̍tā dhru̱vayo̍ bhavantu̱ śaṃ na̱: sindha̍va̱: śamu̍ sa̱ntvāpa̍: ॥7.35.8॥
शं न॒: सूर्य॑ उरु॒चक्षा॒ उदे॑तु॒ शं न॒श्चत॑स्रः प्र॒दिशो॑ भवन्तु ।
शं न॒: पर्व॑ता ध्रु॒वयो॑ भवन्तु॒ शं न॒: सिन्ध॑व॒: शमु॑ स॒न्त्वाप॑:
śaṃ no̱ adi̍tirbhavatu vra̱tebhi̱: śaṃ no̍ bhavantu ma̱ruta̍: sva̱rkāḥ |
śaṃ no̱ viṣṇu̱: śamu̍ pū̱ṣā no̍ astu̱ śaṃ no̍ bha̱vitra̱ṃ śamva̍stu vā̱yuḥ ॥7.35.9॥
शं नो॒ अदि॑तिर्भवतु व्र॒तेभि॒: शं नो॑ भवन्तु म॒रुत॑: स्व॒र्काः ।
शं नो॒ विष्णु॒: शमु॑ पू॒षा नो॑ अस्तु॒ शं नो॑ भ॒वित्रं॒ शम्व॑स्तु वा॒युः
śaṃ no̍ de̱vaḥ sa̍vi̱tā trāya̍māṇa̱: śaṃ no̍ bhavantū̱ṣaso̍ vibhā̱tīḥ |
śaṃ na̍: pa̱rjanyo̍ bhavatu pra̱jābhya̱: śaṃ na̱: kṣetra̍sya̱ pati̍rastu śa̱mbhuḥ ॥7.35.10॥
शं नो॑ दे॒वः स॑वि॒ता त्राय॑माण॒: शं नो॑ भवन्तू॒षसो॑ विभा॒तीः ।
शं न॑: प॒र्जन्यो॑ भवतु प्र॒जाभ्य॒: शं न॒: क्षेत्र॑स्य॒ पति॑रस्तु श॒म्भुः
śaṃ no̍ de̱vā vi̱śvade̍vā bhavantu̱ śaṃ sara̍svatī sa̱ha dhī̱bhira̍stu |
śama̍bhi̱ṣāca̱: śamu̍ rāti̱ṣāca̱: śaṃ no̍ di̱vyāḥ pārthi̍vā̱: śaṃ no̱ apyā̍: ॥7.35.11॥
शं नो॑ दे॒वा वि॒श्वदे॑वा भवन्तु॒ शं सर॑स्वती स॒ह धी॒भिर॑स्तु ।
शम॑भि॒षाच॒: शमु॑ राति॒षाच॒: शं नो॑ दि॒व्याः पार्थि॑वा॒: शं नो॒ अप्या॑:
śaṃ na̍: sa̱tyasya̱ pata̍yo bhavantu̱ śaṃ no̱ arva̍nta̱: śamu̍ santu̱ gāva̍: |
śaṃ na̍ ṛ̱bhava̍: su̱kṛta̍: su̱hastā̱: śaṃ no̍ bhavantu pi̱taro̱ have̍ṣu ॥7.35.12॥
शं न॑: स॒त्यस्य॒ पत॑यो भवन्तु॒ शं नो॒ अर्व॑न्त॒: शमु॑ सन्तु॒ गाव॑: ।
शं न॑ ऋ॒भव॑: सु॒कृत॑: सु॒हस्ता॒: शं नो॑ भवन्तु पि॒तरो॒ हवे॑षु
śaṃ no̍ a̱ja eka̍pādde̱vo a̍stu̱ śaṃ no'hi̍rbu̱dhnya1: śaṃ sa̍mu̱draḥ |
śaṃ no̍ a̱pāṃ napā̍tpe̱rura̍stu̱ śaṃ na̱: pṛśni̍rbhavatu de̱vago̍pā ॥7.35.13॥
शं नो॑ अ॒ज एक॑पाद्दे॒वो अ॑स्तु॒ शं नोऽहि॑र्बु॒ध्न्य१: शं स॑मु॒द्रः ।
शं नो॑ अ॒पां नपा॑त्पे॒रुर॑स्तु॒ शं न॒: पृश्नि॑र्भवतु दे॒वगो॑पा
ā̱di̱tyā ru̱drā vasa̍vo juṣante̱daṃ brahma̍ kri̱yamā̍ṇa̱ṃ navī̍yaḥ |
śṛ̱ṇvantu̍ no di̱vyāḥ pārthi̍vāso̱ gojā̍tā u̱ta ye ya̱jñiyā̍saḥ ॥7.35.14॥
आ॒दि॒त्या रु॒द्रा वस॑वो जुषन्ते॒दं ब्रह्म॑ क्रि॒यमा॑णं॒ नवी॑यः ।
शृ॒ण्वन्तु॑ नो दि॒व्याः पार्थि॑वासो॒ गोजा॑ता उ॒त ये य॒ज्ञिया॑सः
ye de̱vānā̍ṃ ya̱jñiyā̍ ya̱jñiyā̍nā̱ṃ mano̱ryaja̍trā a̱mṛtā̍ ṛta̱jñāḥ |
te no̍ rāsantāmurugā̱yama̱dya yū̱yaṃ pā̍ta sva̱stibhi̱: sadā̍ naḥ ॥7.35.15॥
ये दे॒वानां॑ य॒ज्ञिया॑ य॒ज्ञिया॑नां॒ मनो॒र्यज॑त्रा अ॒मृता॑ ऋत॒ज्ञाः ।
ते नो॑ रासन्तामुरुगा॒यम॒द्य यू॒यं पा॑त स्व॒स्तिभि॒: सदा॑ नः