Study
16 gṛtsamada(āṅgirasaḥ śaunahotraḥ paścād) bhārgavaḥ śaunakaḥ| agniḥ|jagatī|
tvama̍gne̱ dyubhi̱stvamā̍śuśu̱kṣaṇi̱stvama̱dbhyastvamaśma̍na̱spari̍ |
tvaṃ vane̍bhya̱stvamoṣa̍dhībhya̱stvaṃ nṛ̱ṇāṃ nṛ̍pate jāyase̱ śuci̍: ॥2.1.1॥
त्वम॑ग्ने॒ द्युभि॒स्त्वमा॑शुशु॒क्षणि॒स्त्वम॒द्भ्यस्त्वमश्म॑न॒स्परि॑ ।
त्वं वने॑भ्य॒स्त्वमोष॑धीभ्य॒स्त्वं नृ॒णां नृ॑पते जायसे॒ शुचि॑:
tavā̍gne ho̱traṃ tava̍ po̱tramṛ̱tviya̱ṃ tava̍ ne̱ṣṭraṃ tvama̱gnidṛ̍tāya̱taḥ |
tava̍ praśā̱straṃ tvama̍dhvarīyasi bra̱hmā cāsi̍ gṛ̱hapa̍tiśca no̱ dame̍ ॥2.1.2॥
तवा॑ग्ने हो॒त्रं तव॑ पो॒त्रमृ॒त्वियं॒ तव॑ ने॒ष्ट्रं त्वम॒ग्निदृ॑ताय॒तः ।
तव॑ प्रशा॒स्त्रं त्वम॑ध्वरीयसि ब्र॒ह्मा चासि॑ गृ॒हप॑तिश्च नो॒ दमे॑
tvama̍gna̱ indro̍ vṛṣa̱bhaḥ sa̱tāma̍si̱ tvaṃ viṣṇu̍rurugā̱yo na̍ma̱sya̍: |
tvaṃ bra̱hmā ra̍yi̱vid bra̍hmaṇaspate̱ tvaṃ vi̍dhartaḥ sacase̱ pura̍ṃdhyā ॥2.1.3॥
त्वम॑ग्न॒ इन्द्रो॑ वृष॒भः स॒ताम॑सि॒ त्वं विष्णु॑रुरुगा॒यो न॑म॒स्य॑: ।
त्वं ब्र॒ह्मा र॑यि॒विद् ब्र॑ह्मणस्पते॒ त्वं वि॑धर्तः सचसे॒ पुरं॑ध्या
tvama̍gne̱ rājā̱ varu̍ṇo dhṛ̱tavra̍ta̱stvaṃ mi̱tro bha̍vasi da̱sma īḍya̍: |
tvama̍rya̱mā satpa̍ti̱ryasya̍ sa̱ṃbhuja̱ṃ tvamaṃśo̍ vi̱dathe̍ deva bhāja̱yuḥ ॥2.1.4॥
त्वम॑ग्ने॒ राजा॒ वरु॑णो धृ॒तव्र॑त॒स्त्वं मि॒त्रो भ॑वसि द॒स्म ईड्य॑: ।
त्वम॑र्य॒मा सत्प॑ति॒र्यस्य॑ सं॒भुजं॒ त्वमंशो॑ वि॒दथे॑ देव भाज॒युः
tvama̍gne̱ tvaṣṭā̍ vidha̱te su̱vīrya̱ṃ tava̱ gnāvo̍ mitramahaḥ sajā̱tya̍m |
tvamā̍śu̱hemā̍ rariṣe̱ svaśvya̱ṃ tvaṃ na̱rāṃ śardho̍ asi purū̱vasu̍: ॥2.1.5॥
त्वम॑ग्ने॒ त्वष्टा॑ विध॒ते सु॒वीर्यं॒ तव॒ ग्नावो॑ मित्रमहः सजा॒त्य॑म् ।
त्वमा॑शु॒हेमा॑ ररिषे॒ स्वश्व्यं॒ त्वं न॒रां शर्धो॑ असि पुरू॒वसु॑:
tvama̍gne ru̱dro asu̍ro ma̱ho di̱vastvaṃ śardho̱ māru̍taṃ pṛ̱kṣa ī̍śiṣe |
tvaṃ vātai̍raru̱ṇairyā̍si śaṃga̱yastvaṃ pū̱ṣā vi̍dha̱taḥ pā̍si̱ nu tmanā̍ ॥2.1.6॥
त्वम॑ग्ने रु॒द्रो असु॑रो म॒हो दि॒वस्त्वं शर्धो॒ मारु॑तं पृ॒क्ष ई॑शिषे ।
त्वं वातै॑ररु॒णैर्या॑सि शंग॒यस्त्वं पू॒षा वि॑ध॒तः पा॑सि॒ नु त्मना॑
tvama̍gne draviṇo̱dā a̍ra̱ṃkṛte̱ tvaṃ de̱vaḥ sa̍vi̱tā ra̍tna̱dhā a̍si |
tvaṃ bhago̍ nṛpate̱ vasva̍ īśiṣe̱ tvaṃ pā̱yurdame̱ yaste'vi̍dhat ॥2.1.7॥
त्वम॑ग्ने द्रविणो॒दा अ॑रं॒कृते॒ त्वं दे॒वः स॑वि॒ता र॑त्न॒धा अ॑सि ।
त्वं भगो॑ नृपते॒ वस्व॑ ईशिषे॒ त्वं पा॒युर्दमे॒ यस्तेऽवि॑धत्
tvāma̍gne̱ dama̱ ā vi̱śpati̱ṃ viśa̱stvāṃ rājā̍naṃ suvi̱datra̍mṛñjate |
tvaṃ viśvā̍ni svanīka patyase̱ tvaṃ sa̱hasrā̍ṇi śa̱tā daśa̱ prati̍ ॥2.1.8॥
त्वाम॑ग्ने॒ दम॒ आ वि॒श्पतिं॒ विश॒स्त्वां राजा॑नं सुवि॒दत्र॑मृञ्जते ।
त्वं विश्वा॑नि स्वनीक पत्यसे॒ त्वं स॒हस्रा॑णि श॒ता दश॒ प्रति॑
tvāma̍gne pi̱tara̍mi̱ṣṭibhi̱rnara̱stvāṃ bhrā̱trāya̱ śamyā̍ tanū̱ruca̍m |
tvaṃ pu̱tro bha̍vasi̱ yaste'vi̍dha̱ttvaṃ sakhā̍ su̱śeva̍: pāsyā̱dhṛṣa̍: ॥2.1.9॥
त्वाम॑ग्ने पि॒तर॑मि॒ष्टिभि॒र्नर॒स्त्वां भ्रा॒त्राय॒ शम्या॑ तनू॒रुच॑म् ।
त्वं पु॒त्रो भ॑वसि॒ यस्तेऽवि॑ध॒त्त्वं सखा॑ सु॒शेव॑: पास्या॒धृष॑:
tvama̍gna ṛ̱bhurā̱ke na̍ma̱sya1stvaṃ vāja̍sya kṣu̱mato̍ rā̱ya ī̍śiṣe |
tvaṃ vi bhā̱syanu̍ dakṣi dā̱vane̱ tvaṃ vi̱śikṣu̍rasi ya̱jñamā̱tani̍: ॥2.1.10॥
त्वम॑ग्न ऋ॒भुरा॒के न॑म॒स्य१स्त्वं वाज॑स्य क्षु॒मतो॑ रा॒य ई॑शिषे ।
त्वं वि भा॒स्यनु॑ दक्षि दा॒वने॒ त्वं वि॒शिक्षु॑रसि य॒ज्ञमा॒तनि॑:
tvama̍gne̱ adi̍tirdeva dā̱śuṣe̱ tvaṃ hotrā̱ bhāra̍tī vardhase gi̱rā |
tvamil̤ā̍ śa̱tahi̍māsi̱ dakṣa̍se̱ tvaṃ vṛ̍tra̱hā va̍supate̱ sara̍svatī ॥2.1.11॥
त्वम॑ग्ने॒ अदि॑तिर्देव दा॒शुषे॒ त्वं होत्रा॒ भार॑ती वर्धसे गि॒रा ।
त्वमिळा॑ श॒तहि॑मासि॒ दक्ष॑से॒ त्वं वृ॑त्र॒हा व॑सुपते॒ सर॑स्वती
tvama̍gne̱ subhṛ̍ta utta̱maṃ vaya̱stava̍ spā̱rhe varṇa̱ ā sa̱ṃdṛśi̱ śriya̍: |
tvaṃ vāja̍: pra̱tara̍ṇo bṛ̱hanna̍si̱ tvaṃ ra̱yirba̍hu̱lo vi̱śvata̍spṛ̱thuḥ ॥2.1.12॥
त्वम॑ग्ने॒ सुभृ॑त उत्त॒मं वय॒स्तव॑ स्पा॒र्हे वर्ण॒ आ सं॒दृशि॒ श्रिय॑: ।
त्वं वाज॑: प्र॒तर॑णो बृ॒हन्न॑सि॒ त्वं र॒यिर्ब॑हु॒लो वि॒श्वत॑स्पृ॒थुः
tvāma̍gna ādi̱tyāsa̍ ā̱syaṃ1 tvāṃ ji̱hvāṃ śuca̍yaścakrire kave |
tvāṃ rā̍ti̱ṣāco̍ adhva̱reṣu̍ saścire̱ tve de̱vā ha̱vira̍da̱ntyāhu̍tam ॥2.1.13॥
त्वाम॑ग्न आदि॒त्यास॑ आ॒स्यं१ त्वां जि॒ह्वां शुच॑यश्चक्रिरे कवे ।
त्वां रा॑ति॒षाचो॑ अध्व॒रेषु॑ सश्चिरे॒ त्वे दे॒वा ह॒विर॑द॒न्त्याहु॑तम्
tve a̍gne̱ viśve̍ a̱mṛtā̍so a̱druha̍ ā̱sā de̱vā ha̱vira̍da̱ntyāhu̍tam |
tvayā̱ martā̍saḥ svadanta āsu̱tiṃ tvaṃ garbho̍ vī̱rudhā̍ṃ jajñiṣe̱ śuci̍: ॥2.1.14॥
त्वे अ॑ग्ने॒ विश्वे॑ अ॒मृता॑सो अ॒द्रुह॑ आ॒सा दे॒वा ह॒विर॑द॒न्त्याहु॑तम् ।
त्वया॒ मर्ता॑सः स्वदन्त आसु॒तिं त्वं गर्भो॑ वी॒रुधां॑ जज्ञिषे॒ शुचि॑:
tvaṃ tān tsaṃ ca̱ prati̍ cāsi ma̱jmanā 'gne̍ sujāta̱ pra ca̍ deva ricyase |
pṛ̱kṣo yadatra̍ mahi̱nā vi te̱ bhuva̱danu̱ dyāvā̍pṛthi̱vī roda̍sī u̱bhe ॥2.1.15॥
त्वं तान् त्सं च॒ प्रति॑ चासि म॒ज्मना ऽग्ने॑ सुजात॒ प्र च॑ देव रिच्यसे ।
पृ॒क्षो यदत्र॑ महि॒ना वि ते॒ भुव॒दनु॒ द्यावा॑पृथि॒वी रोद॑सी उ॒भे
ye sto̱tṛbhyo̱ goa̍grā̱maśva̍peśasa̱magne̍ rā̱timu̍pasṛ̱janti̍ sū̱raya̍: |
a̱smāñca̱ tāṃśca̱ pra hi neṣi̱ vasya̱ ā bṛ̱had va̍dema vi̱dathe̍ su̱vīrā̍: ॥2.1.16॥
ये स्तो॒तृभ्यो॒ गोअ॑ग्रा॒मश्व॑पेशस॒मग्ने॑ रा॒तिमु॑पसृ॒जन्ति॑ सू॒रय॑: ।
अ॒स्माञ्च॒ तांश्च॒ प्र हि नेषि॒ वस्य॒ आ बृ॒हद् व॑देम वि॒दथे॑ सु॒वीरा॑: