Navama Maṇḍala

svādi̍ṣṭhayā̱ madi̍ṣṭhayā̱ pava̍sva soma̱ dhāra̍yā | indrā̍ya̱ pāta̍ve su̱taḥ

||1||

ra̱kṣo̱hā vi̱śvaca̍rṣaṇira̱bhi yoni̱mayo̍hatam | druṇā̍ sa̱dhastha̱māsa̍dat

||2||

va̱ri̱vo̱dhāta̍mo bhava̱ maṃhi̍ṣṭho vṛtra̱hanta̍maḥ | parṣi̱ rādho̍ ma̱ghonā̍m

||3||

a̱bhya̍rṣa ma̱hānā̍ṃ de̱vānā̍ṃ vī̱timandha̍sā | a̱bhi vāja̍mu̱ta śrava̍:

||4||

tvāmacchā̍ carāmasi̱ tadidartha̍ṃ di̱vedi̍ve | indo̱ tve na̍ ā̱śasa̍:

||5||

pu̱nāti̍ te pari̱sruta̱ṃ soma̱ṃ sūrya̍sya duhi̱tā | vāre̍ṇa̱ śaśva̍tā̱ tanā̍

||6||

tamī̱maṇvī̍: sama̱rya ā gṛ̱bhṇanti̱ yoṣa̍ṇo̱ daśa̍ | svasā̍ra̱: pārye̍ di̱vi

||7||

tamī̍ṃ hinvantya̱gruvo̱ dhama̍nti bāku̱raṃ dṛti̍m | tri̱dhātu̍ vāra̱ṇaṃ madhu̍

||8||

a̱bhī̱3mamaghnyā̍ u̱ta śrī̱ṇanti̍ dhe̱nava̱: śiśu̍m | soma̱mindrā̍ya̱ pāta̍ve

||9||

a̱syedindro̱ made̱ṣvā viśvā̍ vṛ̱trāṇi̍ jighnate | śūro̍ ma̱ghā ca̍ maṃhate

||10||

pava̍sva deva̱vīrati̍ pa̱vitra̍ṃ soma̱ raṃhyā̍ | indra̍mindo̱ vṛṣā vi̍śa

||1||

ā va̍cyasva̱ mahi̱ psaro̱ vṛṣe̍ndo dyu̱mnava̍ttamaḥ | ā yoni̍ṃ dharṇa̱siḥ sa̍daḥ

||2||

adhu̍kṣata pri̱yaṃ madhu̱ dhārā̍ su̱tasya̍ ve̱dhasa̍: | a̱po va̍siṣṭa su̱kratu̍:

||3||

ma̱hānta̍ṃ tvā ma̱hīranvāpo̍ arṣanti̱ sindha̍vaḥ | yadgobhi̍rvāsayi̱ṣyase̍

||4||

sa̱mu̱dro a̱psu mā̍mṛje viṣṭa̱mbho dha̱ruṇo̍ di̱vaḥ | soma̍: pa̱vitre̍ asma̱yuḥ

||5||

aci̍krada̱dvṛṣā̱ hari̍rma̱hānmi̱tro na da̍rśa̱taḥ | saṃ sūrye̍ṇa rocate

||6||

gira̍sta inda̱ oja̍sā marmṛ̱jyante̍ apa̱syuva̍: | yābhi̱rmadā̍ya̱ śumbha̍se

||7||

taṃ tvā̱ madā̍ya̱ ghṛṣva̍ya u lokakṛ̱tnumī̍mahe | tava̱ praśa̍stayo ma̱hīḥ

||8||

a̱smabhya̍mindavindra̱yurmadhva̍: pavasva̱ dhāra̍yā | pa̱rjanyo̍ vṛṣṭi̱mām̐ i̍va

||9||

go̱ṣā i̍ndo nṛ̱ṣā a̍syaśva̱sā vā̍ja̱sā u̱ta | ā̱tmā ya̱jñasya̍ pū̱rvyaḥ

||10||

e̱ṣa de̱vo ama̍rtyaḥ parṇa̱vīri̍va dīyati | a̱bhi droṇā̍nyā̱sada̍m

||1||

e̱ṣa de̱vo vi̱pā kṛ̱to'ti̱ hvarā̍ṃsi dhāvati | pava̍māno̱ adā̍bhyaḥ

||2||

e̱ṣa de̱vo vi̍pa̱nyubhi̱: pava̍māna ṛtā̱yubhi̍: | hari̱rvājā̍ya mṛjyate

||3||

e̱ṣa viśvā̍ni̱ vāryā̱ śūro̱ yanni̍va̱ satva̍bhiḥ | pava̍mānaḥ siṣāsati

||4||

e̱ṣa de̱vo ra̍tharyati̱ pava̍māno daśasyati | ā̱viṣkṛ̍ṇoti vagva̱num

||5||

e̱ṣa viprai̍ra̱bhiṣṭu̍to̱'po de̱vo vi gā̍hate | dadha̱dratnā̍ni dā̱śuṣe̍

||6||

e̱ṣa diva̱ṃ vi dhā̍vati ti̱ro rajā̍ṃsi̱ dhāra̍yā | pava̍māna̱: kani̍kradat

||7||

e̱ṣa diva̱ṃ vyāsa̍ratti̱ro rajā̱ṃsyaspṛ̍taḥ | pava̍mānaḥ svadhva̱raḥ

||8||

e̱ṣa pra̱tnena̱ janma̍nā de̱vo de̱vebhya̍: su̱taḥ | hari̍: pa̱vitre̍ arṣati

||9||

e̱ṣa u̱ sya pu̍ruvra̱to ja̍jñā̱no ja̱naya̱nniṣa̍: | dhāra̍yā pavate su̱taḥ

||10||

sanā̍ ca soma̱ jeṣi̍ ca̱ pava̍māna̱ mahi̱ śrava̍: | athā̍ no̱ vasya̍saskṛdhi

||1||

sanā̱ jyoti̱: sanā̱ sva1rviśvā̍ ca soma̱ saubha̍gā | athā̍ no̱ vasya̍saskṛdhi

||2||

sanā̱ dakṣa̍mu̱ta kratu̱mapa̍ soma̱ mṛdho̍ jahi | athā̍ no̱ vasya̍saskṛdhi

||3||

pavī̍tāraḥ punī̱tana̱ soma̱mindrā̍ya̱ pāta̍ve | athā̍ no̱ vasya̍saskṛdhi

||4||

tvaṃ sūrye̍ na̱ ā bha̍ja̱ tava̱ kratvā̱ tavo̱tibhi̍: | athā̍ no̱ vasya̍saskṛdhi

||5||

tava̱ kratvā̱ tavo̱tibhi̱rjyokpa̍śyema̱ sūrya̍m | athā̍ no̱ vasya̍saskṛdhi

||6||

a̱bhya̍rṣa svāyudha̱ soma̍ dvi̱barha̍saṃ ra̱yim | athā̍ no̱ vasya̍saskṛdhi

||7||

a̱bhya1rṣāna̍pacyuto ra̱yiṃ sa̱matsu̍ sāsa̱hiḥ | athā̍ no̱ vasya̍saskṛdhi

||8||

tvāṃ ya̱jñaira̍vīvṛdha̱npava̍māna̱ vidha̍rmaṇi | athā̍ no̱ vasya̍saskṛdhi

||9||

ra̱yiṃ na̍ści̱trama̱śvina̱mindo̍ vi̱śvāyu̱mā bha̍ra | athā̍ no̱ vasya̍saskṛdhi

||10||

sami̍ddho vi̱śvata̱spati̱: pava̍māno̱ vi rā̍jati | prī̱ṇanvṛṣā̱ kani̍kradat

||1||

tanū̱napā̱tpava̍māna̱: śṛṅge̱ śiśā̍no arṣati | a̱ntari̍kṣeṇa̱ rāra̍jat

||2||

ī̱l̤enya̱: pava̍māno ra̱yirvi rā̍jati dyu̱mān | madho̱rdhārā̍bhi̱roja̍sā

||3||

ba̱rhiḥ prā̱cīna̱moja̍sā̱ pava̍mānaḥ stṛ̱ṇanhari̍: | de̱veṣu̍ de̱va ī̍yate

||4||

udātai̍rjihate bṛ̱haddvāro̍ de̱vīrhi̍ra̱ṇyayī̍: | pava̍mānena̱ suṣṭu̍tāḥ

||5||

su̱śi̱lpe bṛ̍ha̱tī ma̱hī pava̍māno vṛṣaṇyati | nakto̱ṣāsā̱ na da̍rśa̱te

||6||

u̱bhā de̱vā nṛ̱cakṣa̍sā̱ hotā̍rā̱ daivyā̍ huve | pava̍māna̱ indro̱ vṛṣā̍

||7||

bhāra̍tī̱ pava̍mānasya̱ sara̍sva̱tīl̤ā̍ ma̱hī | i̱maṃ no̍ ya̱jñamā ga̍manti̱sro de̱vīḥ su̱peśa̍saḥ

||8||

tvaṣṭā̍ramagra̱jāṃ go̱pāṃ pu̍ro̱yāvā̍na̱mā hu̍ve | indu̱rindro̱ vṛṣā̱ hari̱: pava̍mānaḥ pra̱jāpa̍tiḥ

||9||

vana̱spati̍ṃ pavamāna̱ madhvā̱ sama̍ṅgdhi̱ dhāra̍yā | sa̱hasra̍valśa̱ṃ hari̍ta̱ṃ bhrāja̍mānaṃ hira̱ṇyaya̍m

||10||

viśve̍ devā̱: svāhā̍kṛti̱ṃ pava̍māna̱syā ga̍ta | vā̱yurbṛha̱spati̱: sūryo̱'gnirindra̍: sa̱joṣa̍saḥ

||11||

ma̱ndrayā̍ soma̱ dhāra̍yā̱ vṛṣā̍ pavasva deva̱yuḥ | avyo̱ vāre̍ṣvasma̱yuḥ

||1||

a̱bhi tyaṃ madya̱ṃ mada̱minda̱vindra̱ iti̍ kṣara | a̱bhi vā̱jino̱ arva̍taḥ

||2||

a̱bhi tyaṃ pū̱rvyaṃ mada̍ṃ suvā̱no a̍rṣa pa̱vitra̱ ā | a̱bhi vāja̍mu̱ta śrava̍:

||3||

anu̍ dra̱psāsa̱ inda̍va̱ āpo̱ na pra̱vatā̍saran | pu̱nā̱nā indra̍māśata

||4||

yamatya̍miva vā̱jina̍ṃ mṛ̱janti̱ yoṣa̍ṇo̱ daśa̍ | vane̱ krīl̤a̍nta̱matya̍vim

||5||

taṃ gobhi̱rvṛṣa̍ṇa̱ṃ rasa̱ṃ madā̍ya de̱vavī̍taye | su̱taṃ bharā̍ya̱ saṃ sṛ̍ja

||6||

de̱vo de̱vāya̱ dhāra̱yendrā̍ya pavate su̱taḥ | payo̱ yada̍sya pī̱paya̍t

||7||

ā̱tmā ya̱jñasya̱ raṃhyā̍ suṣvā̱ṇaḥ pa̍vate su̱taḥ | pra̱tnaṃ ni pā̍ti̱ kāvya̍m

||8||

e̱vā pu̍nā̱na i̍ndra̱yurmada̍ṃ madiṣṭha vī̱taye̍ | guhā̍ ciddadhiṣe̱ gira̍:

||9||

asṛ̍gra̱minda̍vaḥ pa̱thā dharma̍nnṛ̱tasya̍ su̱śriya̍: | vi̱dā̱nā a̍sya̱ yoja̍nam

||1||

pra dhārā̱ madhvo̍ agri̱yo ma̱hīra̱po vi gā̍hate | ha̱virha̱viṣṣu̱ vandya̍:

||2||

pra yu̱jo vā̱co a̍gri̱yo vṛṣāva̍ cakrada̱dvane̍ | sadmā̱bhi sa̱tyo a̍dhva̱raḥ

||3||

pari̱ yatkāvyā̍ ka̱virnṛ̱mṇā vasā̍no̱ arṣa̍ti | sva̍rvā̱jī si̍ṣāsati

||4||

pava̍māno a̱bhi spṛdho̱ viśo̱ rāje̍va sīdati | yadī̍mṛ̱ṇvanti̍ ve̱dhasa̍:

||5||

avyo̱ vāre̱ pari̍ pri̱yo hari̱rvane̍ṣu sīdati | re̱bho va̍nuṣyate ma̱tī

||6||

sa vā̱yumindra̍ma̱śvinā̍ sā̱kaṃ made̍na gacchati | raṇā̱ yo a̍sya̱ dharma̍bhiḥ

||7||

ā mi̱trāvaru̍ṇā̱ bhaga̱ṃ madhva̍: pavanta ū̱rmaya̍: | vi̱dā̱nā a̍sya̱ śakma̍bhiḥ

||8||

a̱smabhya̍ṃ rodasī ra̱yiṃ madhvo̱ vāja̍sya sā̱taye̍ | śravo̱ vasū̍ni̱ saṃ ji̍tam

||9||

e̱te somā̍ a̱bhi pri̱yamindra̍sya̱ kāma̍makṣaran | vardha̍nto asya vī̱rya̍m

||1||

pu̱nā̱nāsa̍ścamū̱ṣado̱ gaccha̍nto vā̱yuma̱śvinā̍ | te no̍ dhāntu su̱vīrya̍m

||2||

indra̍sya soma̱ rādha̍se punā̱no hārdi̍ codaya | ṛ̱tasya̱ yoni̍mā̱sada̍m

||3||

mṛ̱janti̍ tvā̱ daśa̱ kṣipo̍ hi̱nvanti̍ sa̱pta dhī̱taya̍: | anu̱ viprā̍ amādiṣuḥ

||4||

de̱vebhya̍stvā̱ madā̍ya̱ kaṃ sṛ̍jā̱namati̍ me̱ṣya̍: | saṃ gobhi̍rvāsayāmasi

||5||

pu̱nā̱naḥ ka̱laśe̱ṣvā vastrā̍ṇyaru̱ṣo hari̍: | pari̱ gavyā̍nyavyata

||6||

ma̱ghona̱ ā pa̍vasva no ja̱hi viśvā̱ apa̱ dviṣa̍: | indo̱ sakhā̍ya̱mā vi̍śa

||7||

vṛ̱ṣṭiṃ di̱vaḥ pari̍ srava dyu̱mnaṃ pṛ̍thi̱vyā adhi̍ | saho̍ naḥ soma pṛ̱tsu dhā̍:

||8||

nṛ̱cakṣa̍saṃ tvā va̱yamindra̍pītaṃ sva̱rvida̍m | bha̱kṣī̱mahi̍ pra̱jāmiṣa̍m

||9||

pari̍ pri̱yā di̱vaḥ ka̱virvayā̍ṃsi na̱ptyo̍rhi̱taḥ | su̱vā̱no yā̍ti ka̱vikra̍tuḥ

||1||

prapra̱ kṣayā̍ya̱ panya̍se̱ janā̍ya̱ juṣṭo̍ a̱druhe̍ | vī̱tya̍rṣa̱ cani̍ṣṭhayā

||2||

sa sū̱nurmā̱tarā̱ śuci̍rjā̱to jā̱te a̍rocayat | ma̱hānma̱hī ṛ̍tā̱vṛdhā̍

||3||

sa sa̱pta dhī̱tibhi̍rhi̱to na̱dyo̍ ajinvada̱druha̍: | yā eka̱makṣi̍ vāvṛ̱dhuḥ

||4||

tā a̱bhi santa̱mastṛ̍taṃ ma̱he yuvā̍na̱mā da̍dhuḥ | indu̍mindra̱ tava̍ vra̱te

||5||

a̱bhi vahni̱rama̍rtyaḥ sa̱pta pa̍śyati̱ vāva̍hiḥ | krivi̍rde̱vīra̍tarpayat

||6||

avā̱ kalpe̍ṣu naḥ puma̱stamā̍ṃsi soma̱ yodhyā̍ | tāni̍ punāna jaṅghanaḥ

||7||

nū navya̍se̱ navī̍yase sū̱ktāya̍ sādhayā pa̱thaḥ | pra̱tna̱vadro̍cayā̱ ruca̍:

||8||

pava̍māna̱ mahi̱ śravo̱ gāmaśva̍ṃ rāsi vī̱rava̍t | sanā̍ me̱dhāṃ sanā̱ sva̍:

||9||

pra svā̱nāso̱ rathā̍ i̱vā'rva̍nto̱ na śra̍va̱syava̍: | somā̍so rā̱ye a̍kramuḥ

||1||

hi̱nvā̱nāso̱ rathā̍ iva dadhanvi̱re gabha̍styoḥ | bharā̍saḥ kā̱riṇā̍miva

||2||

rājā̍no̱ na praśa̍stibhi̱: somā̍so̱ gobhi̍rañjate | ya̱jño na sa̱pta dhā̱tṛbhi̍:

||3||

pari̍ suvā̱nāsa̱ inda̍vo̱ madā̍ya ba̱rhaṇā̍ gi̱rā | su̱tā a̍rṣanti̱ dhāra̍yā

||4||

ā̱pā̱nāso̍ vi̱vasva̍to̱ jana̍nta u̱ṣaso̱ bhaga̍m | sūrā̱ aṇva̱ṃ vi ta̍nvate

||5||

apa̱ dvārā̍ matī̱nāṃ pra̱tnā ṛ̍ṇvanti kā̱rava̍: | vṛṣṇo̱ hara̍sa ā̱yava̍:

||6||

sa̱mī̱cī̱nāsa̍ āsate̱ hotā̍raḥ sa̱ptajā̍mayaḥ | pa̱dameka̍sya̱ pipra̍taḥ

||7||

nābhā̱ nābhi̍ṃ na̱ ā da̍de̱ cakṣu̍ści̱tsūrye̱ sacā̍ | ka̱verapa̍tya̱mā du̍he

||8||

a̱bhi pri̱yā di̱vaspa̱dama̍dhva̱ryubhi̱rguhā̍ hi̱tam | sūra̍: paśyati̱ cakṣa̍sā

||9||

upā̍smai gāyatā nara̱: pava̍mānā̱yenda̍ve | a̱bhi de̱vām̐ iya̍kṣate

||1||

a̱bhi te̱ madhu̍nā̱ payo'tha̍rvāṇo aśiśrayuḥ | de̱vaṃ de̱vāya̍ deva̱yu

||2||

sa na̍: pavasva̱ śaṃ gave̱ śaṃ janā̍ya̱ śamarva̍te | śaṃ rā̍ja̱nnoṣa̍dhībhyaḥ

||3||

ba̱bhrave̱ nu svata̍vase'ru̱ṇāya̍ divi̱spṛśe̍ | somā̍ya gā̱thama̍rcata

||4||

hasta̍cyutebhi̱radri̍bhiḥ su̱taṃ soma̍ṃ punītana | madhā̱vā dhā̍vatā̱ madhu̍

||5||

nama̱sedupa̍ sīdata da̱dhneda̱bhi śrī̍ṇītana | indu̱mindre̍ dadhātana

||6||

a̱mi̱tra̱hā vica̍rṣaṇi̱: pava̍sva soma̱ śaṃ gave̍ | de̱vebhyo̍ anukāma̱kṛt

||7||

indrā̍ya soma̱ pāta̍ve̱ madā̍ya̱ pari̍ ṣicyase | ma̱na̱ścinmana̍sa̱spati̍:

||8||

pava̍māna su̱vīrya̍ṃ ra̱yiṃ so̍ma rirīhi naḥ | inda̱vindre̍ṇa no yu̱jā

||9||

somā̍ asṛgra̱minda̍vaḥ su̱tā ṛ̱tasya̱ sāda̍ne | indrā̍ya̱ madhu̍mattamāḥ

||1||

a̱bhi viprā̍ anūṣata̱ gāvo̍ va̱tsaṃ na mā̱tara̍: | indra̱ṃ soma̍sya pī̱taye̍

||2||

ma̱da̱cyutkṣe̍ti̱ sāda̍ne̱ sindho̍rū̱rmā vi̍pa̱ścit | somo̍ gau̱rī adhi̍ śri̱taḥ

||3||

di̱vo nābhā̍ vicakṣa̱ṇo'vyo̱ vāre̍ mahīyate | somo̱ yaḥ su̱kratu̍: ka̱viḥ

||4||

yaḥ soma̍: ka̱laśe̱ṣvām̐ a̱ntaḥ pa̱vitra̱ āhi̍taḥ | tamindu̱: pari̍ ṣasvaje

||5||

pra vāca̱mindu̍riṣyati samu̱drasyādhi̍ vi̱ṣṭapi̍ | jinva̱nkośa̍ṃ madhu̱ścuta̍m

||6||

nitya̍stotro̱ vana̱spati̍rdhī̱nāma̱ntaḥ sa̍ba̱rdugha̍: | hi̱nvā̱no mānu̍ṣā yu̱gā

||7||

a̱bhi pri̱yā di̱vaspa̱dā somo̍ hinvā̱no a̍rṣati | vipra̍sya̱ dhāra̍yā ka̱viḥ

||8||

ā pa̍vamāna dhāraya ra̱yiṃ sa̱hasra̍varcasam | a̱sme i̍ndo svā̱bhuva̍m

||9||

soma̍: punā̱no a̍rṣati sa̱hasra̍dhāro̱ atya̍viḥ | vā̱yorindra̍sya niṣkṛ̱tam

||1||

pava̍mānamavasyavo̱ vipra̍ma̱bhi pra gā̍yata | su̱ṣvā̱ṇaṃ de̱vavī̍taye

||2||

pava̍nte̱ vāja̍sātaye̱ somā̍: sa̱hasra̍pājasaḥ | gṛ̱ṇā̱nā de̱vavī̍taye

||3||

u̱ta no̱ vāja̍sātaye̱ pava̍sva bṛha̱tīriṣa̍: | dyu̱madi̍ndo su̱vīrya̍m

||4||

te na̍: saha̱sriṇa̍ṃ ra̱yiṃ pava̍ntā̱mā su̱vīrya̍m | su̱vā̱nā de̱vāsa̱ inda̍vaḥ

||5||

atyā̍ hiyā̱nā na he̱tṛbhi̱rasṛ̍gra̱ṃ vāja̍sātaye | vi vāra̱mavya̍mā̱śava̍:

||6||

vā̱śrā a̍rṣa̱ntīnda̍vo̱'bhi va̱tsaṃ na dhe̱nava̍: | da̱dha̱nvi̱re gabha̍styoḥ

||7||

juṣṭa̱ indrā̍ya matsa̱raḥ pava̍māna̱ kani̍kradat | viśvā̱ apa̱ dviṣo̍ jahi

||8||

a̱pa̱ghnanto̱ arā̍vṇa̱: pava̍mānāḥ sva̱rdṛśa̍: | yonā̍vṛ̱tasya̍ sīdata

||9||

pari̱ prāsi̍ṣyadatka̱viḥ sindho̍rū̱rmāvadhi̍ śri̱taḥ | kā̱raṃ bibhra̍tpuru̱spṛha̍m

||1||

gi̱rā yadī̱ saba̍ndhava̱: pañca̱ vrātā̍ apa̱syava̍: | pa̱ri̱ṣkṛ̱ṇvanti̍ dharṇa̱sim

||2||

āda̍sya śu̱ṣmiṇo̱ rase̱ viśve̍ de̱vā a̍matsata | yadī̱ gobhi̍rvasā̱yate̍

||3||

ni̱ri̱ṇā̱no vi dhā̍vati̱ jaha̱ccharyā̍ṇi̱ tānvā̍ | atrā̱ saṃ ji̍ghnate yu̱jā

||4||

na̱ptībhi̱ryo vi̱vasva̍taḥ śu̱bhro na mā̍mṛ̱je yuvā̍ | gāḥ kṛ̍ṇvā̱no na ni̱rṇija̍m

||5||

ati̍ śri̱tī ti̍ra̱ścatā̍ ga̱vyā ji̍gā̱tyaṇvyā̍ | va̱gnumi̍yarti̱ yaṃ vi̱de

||6||

a̱bhi kṣipa̱: sama̍gmata ma̱rjaya̍ntīri̱ṣaspati̍m | pṛ̱ṣṭhā gṛ̍bhṇata vā̱jina̍:

||7||

pari̍ di̱vyāni̱ marmṛ̍śa̱dviśvā̍ni soma̱ pārthi̍vā | vasū̍ni yāhyasma̱yuḥ

||8||

e̱ṣa dhi̱yā yā̱tyaṇvyā̱ śūro̱ rathe̍bhirā̱śubhi̍: | gaccha̱nnindra̍sya niṣkṛ̱tam

||1||

||

e̱ṣa pu̱rū dhi̍yāyate bṛha̱te de̱vatā̍taye | yatrā̱mṛtā̍sa̱ āsa̍te

||2||

e̱ṣa hi̱to vi nī̍yate̱'ntaḥ śu̱bhrāva̍tā pa̱thā | yadī̍ tu̱ñjanti̱ bhūrṇa̍yaḥ

||3||

e̱ṣa śṛṅgā̍ṇi̱ dodhu̍va̱cchiśī̍te yū̱thyo̱3 vṛṣā̍ | nṛ̱mṇā dadhā̍na̱ oja̍sā

||4||

e̱ṣa ru̱kmibhi̍rīyate vā̱jī śu̱bhrebhi̍ra̱ṃśubhi̍: | pati̱: sindhū̍nā̱ṃ bhava̍n

||5||

e̱ṣa vasū̍ni pibda̱nā paru̍ṣā yayi̱vām̐ ati̍ | ava̱ śāde̍ṣu gacchati

||6||

e̱taṃ mṛ̍janti̱ marjya̱mupa̱ droṇe̍ṣvā̱yava̍: | pra̱ca̱krā̱ṇaṃ ma̱hīriṣa̍:

||7||

e̱tamu̱ tyaṃ daśa̱ kṣipo̍ mṛ̱janti̍ sa̱pta dhī̱taya̍: | svā̱yu̱dhaṃ ma̱dinta̍mam

||8||

pra te̍ so̱tāra̍ o̱ṇyo̱3 rasa̱ṃ madā̍ya̱ ghṛṣva̍ye | sargo̱ na ta̱ktyeta̍śaḥ

||1||

kratvā̱ dakṣa̍sya ra̱thya̍ma̱po vasā̍na̱mandha̍sā | go̱ṣāmaṇve̍ṣu saścima

||2||

ana̍ptama̱psu du̱ṣṭara̱ṃ soma̍ṃ pa̱vitra̱ ā sṛ̍ja | pu̱nī̱hīndrā̍ya̱ pāta̍ve

||3||

pra pu̍nā̱nasya̱ ceta̍sā̱ soma̍: pa̱vitre̍ arṣati | kratvā̍ sa̱dhastha̱māsa̍dat

||4||

pra tvā̱ namo̍bhi̱rinda̍va̱ indra̱ somā̍ asṛkṣata | ma̱he bharā̍ya kā̱riṇa̍:

||5||

pu̱nā̱no rū̱pe a̱vyaye̱ viśvā̱ arṣa̍nna̱bhi śriya̍: | śūro̱ na goṣu̍ tiṣṭhati

||6||

di̱vo na sānu̍ pi̱pyuṣī̱ dhārā̍ su̱tasya̍ ve̱dhasa̍: | vṛthā̍ pa̱vitre̍ arṣati

||7||

tvaṃ so̍ma vipa̱ścita̱ṃ tanā̍ punā̱na ā̱yuṣu̍ | avyo̱ vāra̱ṃ vi dhā̍vasi

||8||

pra ni̱mnene̍va̱ sindha̍vo̱ ghnanto̍ vṛ̱trāṇi̱ bhūrṇa̍yaḥ | somā̍ asṛgramā̱śava̍:

||1||

a̱bhi su̍vā̱nāsa̱ inda̍vo vṛ̱ṣṭaya̍: pṛthi̱vīmi̍va | indra̱ṃ somā̍so akṣaran

||2||

atyū̍rmirmatsa̱ro mada̱: soma̍: pa̱vitre̍ arṣati | vi̱ghnanrakṣā̍ṃsi deva̱yuḥ

||3||

ā ka̱laśe̍ṣu dhāvati pa̱vitre̱ pari̍ ṣicyate | u̱kthairya̱jñeṣu̍ vardhate

||4||

ati̱ trī so̍ma roca̱nā roha̱nna bhrā̍jase̱ diva̍m | i̱ṣṇantsūrya̱ṃ na co̍dayaḥ

||5||

a̱bhi viprā̍ anūṣata mū̱rdhanya̱jñasya̍ kā̱rava̍: | dadhā̍nā̱ścakṣa̍si pri̱yam

||6||

tamu̍ tvā vā̱jina̱ṃ naro̍ dhī̱bhirviprā̍ ava̱syava̍: | mṛ̱janti̍ de̱vatā̍taye

||7||

madho̱rdhārā̱manu̍ kṣara tī̱vraḥ sa̱dhastha̱māsa̍daḥ | cāru̍ṝ̱tāya̍ pī̱taye̍

||8||

pari̍ suvā̱no gi̍ri̱ṣṭhāḥ pa̱vitre̱ somo̍ akṣāḥ | made̍ṣu sarva̱dhā a̍si

||1||

tvaṃ vipra̱stvaṃ ka̱virmadhu̱ pra jā̱tamandha̍saḥ | made̍ṣu sarva̱dhā a̍si

||2||

tava̱ viśve̍ sa̱joṣa̍so de̱vāsa̍: pī̱timā̍śata | made̍ṣu sarva̱dhā a̍si

||3||

ā yo viśvā̍ni̱ vāryā̱ vasū̍ni̱ hasta̍yorda̱dhe | made̍ṣu sarva̱dhā a̍si

||4||

ya i̱me roda̍sī ma̱hī saṃ mā̱tare̍va̱ doha̍te | made̍ṣu sarva̱dhā a̍si

||5||

pari̱ yo roda̍sī u̱bhe sa̱dyo vāje̍bhi̱rarṣa̍ti | made̍ṣu sarva̱dhā a̍si

||6||

sa śu̱ṣmī ka̱laśe̱ṣvā pu̍nā̱no a̍cikradat | made̍ṣu sarva̱dhā a̍si

||7||

yatso̍ma ci̱tramu̱kthya̍ṃ di̱vyaṃ pārthi̍va̱ṃ vasu̍ | tanna̍: punā̱na ā bha̍ra

||1||

yu̱vaṃ hi sthaḥ sva̍rpatī̱ indra̍śca soma̱ gopa̍tī | ī̱śā̱nā pi̍pyata̱ṃ dhiya̍:

||2||

vṛṣā̍ punā̱na ā̱yuṣu̍ sta̱naya̱nnadhi̍ ba̱rhiṣi̍ | hari̱: sanyoni̱māsa̍dat

||3||

avā̍vaśanta dhī̱tayo̍ vṛṣa̱bhasyādhi̱ reta̍si | sū̱norva̱tsasya̍ mā̱tara̍:

||4||

ku̱vidvṛ̍ṣa̱ṇyantī̍bhyaḥ punā̱no garbha̍mā̱dadha̍t | yāḥ śu̱kraṃ du̍ha̱te paya̍:

||5||

upa̍ śikṣāpata̱sthuṣo̍ bhi̱yasa̱mā dhe̍hi̱ śatru̍ṣu | pava̍māna vi̱dā ra̱yim

||6||

ni śatro̍: soma̱ vṛṣṇya̱ṃ ni śuṣma̱ṃ ni vaya̍stira | dū̱re vā̍ sa̱to anti̍ vā

||7||

pra ka̱virde̱vavī̍ta̱ye'vyo̱ vāre̍bhirarṣati | sā̱hvānviśvā̍ a̱bhi spṛdha̍:

||1||

sa hi ṣmā̍ jari̱tṛbhya̱ ā vāja̱ṃ goma̍nta̱minva̍ti | pava̍mānaḥ saha̱sriṇa̍m

||2||

pari̱ viśvā̍ni̱ ceta̍sā mṛ̱śase̱ pava̍se ma̱tī | sa na̍: soma̱ śravo̍ vidaḥ

||3||

a̱bhya̍rṣa bṛ̱hadyaśo̍ ma̱ghava̍dbhyo dhru̱vaṃ ra̱yim | iṣa̍ṃ sto̱tṛbhya̱ ā bha̍ra

||4||

tvaṃ rāje̍va suvra̱to gira̍: so̱mā vi̍veśitha | pu̱nā̱no va̍hne adbhuta

||5||

sa vahni̍ra̱psu du̱ṣṭaro̍ mṛ̱jyamā̍no̱ gabha̍styoḥ | soma̍śca̱mūṣu̍ sīdati

||6||

krī̱l̤urma̱kho na ma̍ṃha̱yuḥ pa̱vitra̍ṃ soma gacchasi | dadha̍tsto̱tre su̱vīrya̍m

||7||

e̱te dhā̍va̱ntīnda̍va̱: somā̱ indrā̍ya̱ ghṛṣva̍yaḥ | ma̱tsa̱rāsa̍: sva̱rvida̍:

||1||

pra̱vṛ̱ṇvanto̍ abhi̱yuja̱: suṣva̍ye varivo̱vida̍: | sva̱yaṃ sto̱tre va̍ya̱skṛta̍:

||2||

vṛthā̱ krīl̤a̍nta̱ inda̍vaḥ sa̱dhastha̍ma̱bhyeka̱mit | sindho̍rū̱rmā vya̍kṣaran

||3||

e̱te viśvā̍ni̱ vāryā̱ pava̍mānāsa āśata | hi̱tā na sapta̍yo̱ rathe̍

||4||

āsmi̍npi̱śaṅga̍mindavo̱ dadhā̍tā ve̱namā̱diśe̍ | yo a̱smabhya̱marā̍vā

||5||

ṛ̱bhurna rathya̱ṃ nava̱ṃ dadhā̍tā̱ keta̍mā̱diśe̍ | śu̱krāḥ pa̍vadhva̱marṇa̍sā

||6||

e̱ta u̱ tye a̍vīvaśa̱nkāṣṭhā̍ṃ vā̱jino̍ akrata | sa̱taḥ prāsā̍viṣurma̱tim

||7||

e̱te somā̍sa ā̱śavo̱ rathā̍ iva̱ pra vā̱jina̍: | sargā̍: sṛ̱ṣṭā a̍heṣata

||1||

e̱te vātā̍ ivo̱rava̍: pa̱rjanya̍syeva vṛ̱ṣṭaya̍: | a̱gneri̍va bhra̱mā vṛthā̍

||2||

e̱te pū̱tā vi̍pa̱ścita̱: somā̍so̱ dadhyā̍śiraḥ | vi̱pā vyā̍naśu̱rdhiya̍:

||3||

e̱te mṛ̱ṣṭā ama̍rtyāḥ sasṛ̱vāṃso̱ na śa̍śramuḥ | iya̍kṣantaḥ pa̱tho raja̍:

||4||

e̱te pṛ̱ṣṭhāni̱ roda̍sorvipra̱yanto̱ vyā̍naśuḥ | u̱tedamu̍tta̱maṃ raja̍:

||5||

tantu̍ṃ tanvā̱namu̍tta̱mamanu̍ pra̱vata̍ āśata | u̱tedamu̍tta̱māyya̍m

||6||

tvaṃ so̍ma pa̱ṇibhya̱ ā vasu̱ gavyā̍ni dhārayaḥ | ta̱taṃ tantu̍macikradaḥ

||7||

somā̍ asṛgramā̱śavo̱ madho̱rmada̍sya̱ dhāra̍yā | a̱bhi viśvā̍ni̱ kāvyā̍

||1||

anu̍ pra̱tnāsa̍ ā̱yava̍: pa̱daṃ navī̍yo akramuḥ | ru̱ce ja̍nanta̱ sūrya̍m

||2||

ā pa̍vamāna no bharā̱'ryo adā̍śuṣo̱ gaya̍m | kṛ̱dhi pra̱jāva̍tī̱riṣa̍:

||3||

a̱bhi somā̍sa ā̱yava̱: pava̍nte̱ madya̱ṃ mada̍m | a̱bhi kośa̍ṃ madhu̱ścuta̍m

||4||

somo̍ arṣati dharṇa̱sirdadhā̍na indri̱yaṃ rasa̍m | su̱vīro̍ abhiśasti̱pāḥ

||5||

indrā̍ya soma pavase de̱vebhya̍: sadha̱mādya̍: | indo̱ vāja̍ṃ siṣāsasi

||6||

a̱sya pī̱tvā madā̍nā̱mindro̍ vṛ̱trāṇya̍pra̱ti | ja̱ghāna̍ ja̱ghana̍cca̱ nu

||7||

pra somā̍so adhanviṣu̱: pava̍mānāsa̱ inda̍vaḥ | śrī̱ṇā̱nā a̱psu mṛ̍ñjata

||1||

a̱bhi gāvo̍ adhanviṣu̱rāpo̱ na pra̱vatā̍ ya̱tīḥ | pu̱nā̱nā indra̍māśata

||2||

pra pa̍vamāna dhanvasi̱ somendrā̍ya̱ pāta̍ve | nṛbhi̍rya̱to vi nī̍yase

||3||

tvaṃ so̍ma nṛ̱māda̍na̱: pava̍sva carṣaṇī̱sahe̍ | sasni̱ryo a̍nu̱mādya̍:

||4||

indo̱ yadadri̍bhiḥ su̱taḥ pa̱vitra̍ṃ pari̱dhāva̍si | ara̱mindra̍sya̱ dhāmne̍

||5||

pava̍sva vṛtrahantamo̱kthebhi̍ranu̱mādya̍: | śuci̍: pāva̱ko adbhu̍taḥ

||6||

śuci̍: pāva̱ka u̍cyate̱ soma̍: su̱tasya̱ madhva̍: | de̱vā̱vīra̍ghaśaṃsa̱hā

||7||

pava̍sva dakṣa̱sādha̍no de̱vebhya̍: pī̱taye̍ hare | ma̱rudbhyo̍ vā̱yave̱ mada̍:

||1||

pava̍māna dhi̱yā hi̱to̱3'bhi yoni̱ṃ kani̍kradat | dharma̍ṇā vā̱yumā vi̍śa

||2||

saṃ de̱vaiḥ śo̍bhate̱ vṛṣā̍ ka̱viryonā̱vadhi̍ pri̱yaḥ | vṛ̱tra̱hā de̍va̱vīta̍maḥ

||3||

viśvā̍ rū̱pāṇyā̍vi̱śanpu̍nā̱no yā̍ti harya̱taḥ | yatrā̱mṛtā̍sa̱ āsa̍te

||4||

a̱ru̱ṣo ja̱naya̱ngira̱: soma̍: pavata āyu̱ṣak | indra̱ṃ gaccha̍nka̱vikra̍tuḥ

||5||

ā pa̍vasva madintama pa̱vitra̱ṃ dhāra̍yā kave | a̱rkasya̱ yoni̍mā̱sada̍m

||6||

tama̍mṛkṣanta vā̱jina̍mu̱pasthe̱ adi̍te̱radhi̍ | viprā̍so̱ aṇvyā̍ dhi̱yā

||1||

taṃ gāvo̍ a̱bhya̍nūṣata sa̱hasra̍dhāra̱makṣi̍tam | indu̍ṃ dha̱rtāra̱mā di̱vaḥ

||2||

taṃ ve̱dhāṃ me̱dhayā̍hya̱npava̍māna̱madhi̱ dyavi̍ | dha̱rṇa̱siṃ bhūri̍dhāyasam

||3||

tama̍hyanbhu̱rijo̍rdhi̱yā sa̱ṃvasā̍naṃ vi̱vasva̍taḥ | pati̍ṃ vā̱co adā̍bhyam

||4||

taṃ sānā̱vadhi̍ jā̱mayo̱ hari̍ṃ hinva̱ntyadri̍bhiḥ | ha̱rya̱taṃ bhūri̍cakṣasam

||5||

taṃ tvā̍ hinvanti ve̱dhasa̱: pava̍māna girā̱vṛdha̍m | inda̱vindrā̍ya matsa̱ram

||6||

e̱ṣa ka̱vira̱bhiṣṭu̍taḥ pa̱vitre̱ adhi̍ tośate | pu̱nā̱no ghnannapa̱ sridha̍:

||1||

e̱ṣa indrā̍ya vā̱yave̍ sva̱rjitpari̍ ṣicyate | pa̱vitre̍ dakṣa̱sādha̍naḥ

||2||

e̱ṣa nṛbhi̱rvi nī̍yate di̱vo mū̱rdhā vṛṣā̍ su̱taḥ | somo̱ vane̍ṣu viśva̱vit

||3||

e̱ṣa ga̱vyura̍cikrada̱tpava̍māno hiraṇya̱yuḥ | indu̍: satrā̱jidastṛ̍taḥ

||4||

e̱ṣa sūrye̍ṇa hāsate̱ pava̍māno̱ adhi̱ dyavi̍ | pa̱vitre̍ matsa̱ro mada̍:

||5||

e̱ṣa śu̱ṣmya̍siṣyadada̱ntari̍kṣe̱ vṛṣā̱ hari̍: | pu̱nā̱na indu̱rindra̱mā

||6||

e̱ṣa vā̱jī hi̱to nṛbhi̍rviśva̱vinmana̍sa̱spati̍: | avyo̱ vāra̱ṃ vi dhā̍vati

||1||

e̱ṣa pa̱vitre̍ akṣara̱tsomo̍ de̱vebhya̍: su̱taḥ | viśvā̱ dhāmā̍nyāvi̱śan

||2||

e̱ṣa de̱vaḥ śu̍bhāya̱te'dhi̱ yonā̱vama̍rtyaḥ | vṛ̱tra̱hā de̍va̱vīta̍maḥ

||3||

e̱ṣa vṛṣā̱ kani̍kradadda̱śabhi̍rjā̱mibhi̍rya̱taḥ | a̱bhi droṇā̍ni dhāvati

||4||

e̱ṣa sūrya̍marocaya̱tpava̍māno̱ vica̍rṣaṇiḥ | viśvā̱ dhāmā̍ni viśva̱vit

||5||

e̱ṣa śu̱ṣmyadā̍bhya̱: soma̍: punā̱no a̍rṣati | de̱vā̱vīra̍ghaśaṃsa̱hā

||6||

prāsya̱ dhārā̍ akṣara̱nvṛṣṇa̍: su̱tasyauja̍sā | de̱vām̐ anu̍ pra̱bhūṣa̍taḥ

||1||

sapti̍ṃ mṛjanti ve̱dhaso̍ gṛ̱ṇanta̍: kā̱ravo̍ gi̱rā | jyoti̍rjajñā̱namu̱kthya̍m

||2||

su̱ṣahā̍ soma̱ tāni̍ te punā̱nāya̍ prabhūvaso | vardhā̍ samu̱dramu̱kthya̍m

||3||

viśvā̱ vasū̍ni sa̱ṃjaya̱npava̍sva soma̱ dhāra̍yā | i̱nu dveṣā̍ṃsi sa̱dhrya̍k

||4||

rakṣā̱ su no̱ ara̍ruṣaḥ sva̱nātsa̍masya̱ kasya̍ cit | ni̱do yatra̍ mumu̱cmahe̍

||5||

endo̱ pārthi̍vaṃ ra̱yiṃ di̱vyaṃ pa̍vasva̱ dhāra̍yā | dyu̱manta̱ṃ śuṣma̱mā bha̍ra

||6||

pra dhārā̍ asya śu̱ṣmiṇo̱ vṛthā̍ pa̱vitre̍ akṣaran | pu̱nā̱no vāca̍miṣyati

||1||

indu̍rhiyā̱naḥ so̱tṛbhi̍rmṛ̱jyamā̍na̱: kani̍kradat | iya̍rti va̱gnumi̍ndri̱yam

||2||

ā na̱: śuṣma̍ṃ nṛ̱ṣāhya̍ṃ vī̱rava̍ntaṃ puru̱spṛha̍m | pava̍sva soma̱ dhāra̍yā

||3||

pra somo̱ ati̱ dhāra̍yā̱ pava̍māno asiṣyadat | a̱bhi droṇā̍nyā̱sada̍m

||4||

a̱psu tvā̱ madhu̍mattama̱ṃ hari̍ṃ hinva̱ntyadri̍bhiḥ | inda̱vindrā̍ya pī̱taye̍

||5||

su̱notā̱ madhu̍mattama̱ṃ soma̱mindrā̍ya va̱jriṇe̍ | cāru̱ṃ śardhā̍ya matsa̱ram

||6||

pra somā̍saḥ svā̱dhya1: pava̍mānāso akramuḥ | ra̱yiṃ kṛ̍ṇvanti̱ ceta̍nam

||1||

di̱vaspṛ̍thi̱vyā adhi̱ bhave̍ndo dyumna̱vardha̍naḥ | bhavā̱ vājā̍nā̱ṃ pati̍:

||2||

tubhya̱ṃ vātā̍ abhi̱priya̱stubhya̍marṣanti̱ sindha̍vaḥ | soma̱ vardha̍nti te̱ maha̍:

||3||

ā pyā̍yasva̱ same̍tu te vi̱śvata̍: soma̱ vṛṣṇya̍m | bhavā̱ vāja̍sya saṃga̱the

||4||

tubhya̱ṃ gāvo̍ ghṛ̱taṃ payo̱ babhro̍ dudu̱hre akṣi̍tam | varṣi̍ṣṭhe̱ adhi̱ sāna̍vi

||5||

svā̱yu̱dhasya̍ te sa̱to bhuva̍nasya pate va̱yam | indo̍ sakhi̱tvamu̍śmasi

||6||

pra somā̍so mada̱cyuta̱: śrava̍se no ma̱ghona̍: | su̱tā vi̱dathe̍ akramuḥ

||1||

ādī̍ṃ tri̱tasya̱ yoṣa̍ṇo̱ hari̍ṃ hinva̱ntyadri̍bhiḥ | indu̱mindrā̍ya pī̱taye̍

||2||

ādī̍ṃ ha̱ṃso yathā̍ ga̱ṇaṃ viśva̍syāvīvaśanma̱tim | atyo̱ na gobhi̍rajyate

||3||

u̱bhe so̍māva̱cāka̍śanmṛ̱go na ta̱kto a̍rṣasi | sīda̍nnṛ̱tasya̱ yoni̱mā

||4||

a̱bhi gāvo̍ anūṣata̱ yoṣā̍ jā̱rami̍va pri̱yam | aga̍nnā̱jiṃ yathā̍ hi̱tam

||5||

a̱sme dhe̍hi dyu̱madyaśo̍ ma̱ghava̍dbhyaśca̱ mahya̍ṃ ca | sa̱niṃ me̱dhāmu̱ta śrava̍:

||6||

pra somā̍so vipa̱ścito̱'pāṃ na ya̍ntyū̱rmaya̍: | vanā̍ni mahi̱ṣā i̍va

||1||

a̱bhi droṇā̍ni ba̱bhrava̍: śu̱krā ṛ̱tasya̱ dhāra̍yā | vāja̱ṃ goma̍ntamakṣaran

||2||

su̱tā indrā̍ya vā̱yave̱ varu̍ṇāya ma̱rudbhya̍: | somā̍ arṣanti̱ viṣṇa̍ve

||3||

ti̱sro vāca̱ udī̍rate̱ gāvo̍ mimanti dhe̱nava̍: | hari̍reti̱ kani̍kradat

||4||

a̱bhi brahmī̍ranūṣata ya̱hvīṝ̱tasya̍ mā̱tara̍: | ma̱rmṛ̱jyante̍ di̱vaḥ śiśu̍m

||5||

rā̱yaḥ sa̍mu̱drām̐śca̱turo̱'smabhya̍ṃ soma vi̱śvata̍: | ā pa̍vasva saha̱sriṇa̍:

||6||

pra su̍vā̱no dhāra̍yā̱ tanendu̍rhinvā̱no a̍rṣati | ru̱jaddṛ̱l̤hā vyoja̍sā

||1||

su̱ta indrā̍ya vā̱yave̱ varu̍ṇāya ma̱rudbhya̍: | somo̍ arṣati̱ viṣṇa̍ve

||2||

vṛṣā̍ṇa̱ṃ vṛṣa̍bhirya̱taṃ su̱nvanti̱ soma̱madri̍bhiḥ | du̱hanti̱ śakma̍nā̱ paya̍:

||3||

bhuva̍ttri̱tasya̱ marjyo̱ bhuva̱dindrā̍ya matsa̱raḥ | saṃ rū̱paira̍jyate̱ hari̍:

||4||

a̱bhīmṛ̱tasya̍ vi̱ṣṭapa̍ṃ duha̱te pṛśni̍mātaraḥ | cāru̍ pri̱yata̍maṃ ha̱viḥ

||5||

same̍na̱mahru̍tā i̱mā giro̍ arṣanti sa̱sruta̍: | dhe̱nūrvā̱śro a̍vīvaśat

||6||

ā na̍: pavasva̱ dhāra̍yā̱ pava̍māna ra̱yiṃ pṛ̱thum | yayā̱ jyoti̍rvi̱dāsi̍ naḥ

||1||

indo̍ samudramīṅkhaya̱ pava̍sva viśvamejaya | rā̱yo dha̱rtā na̱ oja̍sā

||2||

tvayā̍ vī̱reṇa̍ vīravo̱'bhi ṣyā̍ma pṛtanya̱taḥ | kṣarā̍ ṇo a̱bhi vārya̍m

||3||

pra vāja̱mindu̍riṣyati̱ siṣā̍sanvāja̱sā ṛṣi̍: | vra̱tā vi̍dā̱na āyu̍dhā

||4||

taṃ gī̱rbhirvā̍camīṅkha̱yaṃ pu̍nā̱naṃ vā̍sayāmasi | soma̱ jana̍sya̱ gopa̍tim

||5||

viśvo̱ yasya̍ vra̱te jano̍ dā̱dhāra̱ dharma̍ṇa̱spate̍: | pu̱nā̱nasya̍ pra̱bhūva̍soḥ

||6||

asa̍rji̱ rathyo̍ yathā pa̱vitre̍ ca̱mvo̍: su̱taḥ | kārṣma̍nvā̱jī nya̍kramīt

||1||

sa vahni̍: soma̱ jāgṛ̍vi̱: pava̍sva deva̱vīrati̍ | a̱bhi kośa̍ṃ madhu̱ścuta̍m

||2||

sa no̱ jyotī̍ṃṣi pūrvya̱ pava̍māna̱ vi ro̍caya | kratve̱ dakṣā̍ya no hinu

||3||

śu̱mbhamā̍na ṛtā̱yubhi̍rmṛ̱jyamā̍no̱ gabha̍styoḥ | pava̍te̱ vāre̍ a̱vyaye̍

||4||

sa viśvā̍ dā̱śuṣe̱ vasu̱ somo̍ di̱vyāni̱ pārthi̍vā | pava̍tā̱māntari̍kṣyā

||5||

ā di̱vaspṛ̱ṣṭhama̍śva̱yurga̍vya̱yuḥ so̍ma rohasi | vī̱ra̱yuḥ śa̍vasaspate

||6||

sa su̱taḥ pī̱taye̱ vṛṣā̱ soma̍: pa̱vitre̍ arṣati | vi̱ghnanrakṣā̍ṃsi deva̱yuḥ

||1||

sa pa̱vitre̍ vicakṣa̱ṇo hari̍rarṣati dharṇa̱siḥ | a̱bhi yoni̱ṃ kani̍kradat

||2||

sa vā̱jī ro̍ca̱nā di̱vaḥ pava̍māno̱ vi dhā̍vati | ra̱kṣo̱hā vāra̍ma̱vyaya̍m

||3||

sa tri̱tasyādhi̱ sāna̍vi̱ pava̍māno arocayat | jā̱mibhi̱: sūrya̍ṃ sa̱ha

||4||

sa vṛ̍tra̱hā vṛṣā̍ su̱to va̍rivo̱vidadā̍bhyaḥ | somo̱ vāja̍mivāsarat

||5||

sa de̱vaḥ ka̱vine̍ṣi̱to̱3'bhi droṇā̍ni dhāvati | indu̱rindrā̍ya ma̱ṃhanā̍

||6||

e̱ṣa u̱ sya vṛṣā̱ ratho'vyo̱ vāre̍bhirarṣati | gaccha̱nvāja̍ṃ saha̱sriṇa̍m

||1||

e̱taṃ tri̱tasya̱ yoṣa̍ṇo̱ hari̍ṃ hinva̱ntyadri̍bhiḥ | indu̱mindrā̍ya pī̱taye̍

||2||

e̱taṃ tyaṃ ha̱rito̱ daśa̍ marmṛ̱jyante̍ apa̱syuva̍: | yābhi̱rmadā̍ya̱ śumbha̍te

||3||

e̱ṣa sya mānu̍ṣī̱ṣvā śye̱no na vi̱kṣu sī̍dati | gaccha̍ñjā̱ro na yo̱ṣita̍m

||4||

e̱ṣa sya madyo̱ raso'va̍ caṣṭe di̱vaḥ śiśu̍: | ya indu̱rvāra̱māvi̍śat

||5||

e̱ṣa sya pī̱taye̍ su̱to hari̍rarṣati dharṇa̱siḥ | kranda̱nyoni̍ma̱bhi pri̱yam

||6||

ā̱śura̍rṣa bṛhanmate̱ pari̍ pri̱yeṇa̱ dhāmnā̍ | yatra̍ de̱vā iti̱ brava̍n

||1||

pa̱ri̱ṣkṛ̱ṇvannani̍ṣkṛta̱ṃ janā̍ya yā̱taya̱nniṣa̍: | vṛ̱ṣṭiṃ di̱vaḥ pari̍ srava

||2||

su̱ta e̍ti pa̱vitra̱ ā tviṣi̱ṃ dadhā̍na̱ oja̍sā | vi̱cakṣā̍ṇo viro̱caya̍n

||3||

a̱yaṃ sa yo di̱vaspari̍ raghu̱yāmā̍ pa̱vitra̱ ā | sindho̍rū̱rmā vyakṣa̍rat

||4||

ā̱vivā̍sanparā̱vato̱ atho̍ arvā̱vata̍: su̱taḥ | indrā̍ya sicyate̱ madhu̍

||5||

sa̱mī̱cī̱nā a̍nūṣata̱ hari̍ṃ hinva̱ntyadri̍bhiḥ | yonā̍vṛ̱tasya̍ sīdata

||6||

pu̱nā̱no a̍kramīda̱bhi viśvā̱ mṛdho̱ vica̍rṣaṇiḥ | śu̱mbhanti̱ vipra̍ṃ dhī̱tibhi̍:

||1||

ā yoni̍maru̱ṇo ru̍ha̱dgama̱dindra̱ṃ vṛṣā̍ su̱taḥ | dhru̱ve sada̍si sīdati

||2||

nū no̍ ra̱yiṃ ma̱hāmi̍ndo̱'smabhya̍ṃ soma vi̱śvata̍: | ā pa̍vasva saha̱sriṇa̍m

||3||

viśvā̍ soma pavamāna dyu̱mnānī̍nda̱vā bha̍ra | vi̱dāḥ sa̍ha̱sriṇī̱riṣa̍:

||4||

sa na̍: punā̱na ā bha̍ra ra̱yiṃ sto̱tre su̱vīrya̍m | ja̱ri̱turva̍rdhayā̱ gira̍:

||5||

pu̱nā̱na i̍nda̱vā bha̍ra̱ soma̍ dvi̱barha̍saṃ ra̱yim | vṛṣa̍nnindo na u̱kthya̍m

||6||

pra ye gāvo̱ na bhūrṇa̍yastve̱ṣā a̱yāso̱ akra̍muḥ | ghnanta̍: kṛ̱ṣṇāmapa̱ tvaca̍m

||1||

su̱vi̱tasya̍ manāma̱he'ti̱ setu̍ṃ durā̱vya̍m | sā̱hvāṃso̱ dasyu̍mavra̱tam

||2||

śṛ̱ṇve vṛ̱ṣṭeri̍va sva̱naḥ pava̍mānasya śu̱ṣmiṇa̍: | cara̍nti vi̱dyuto̍ di̱vi

||3||

ā pa̍vasva ma̱hīmiṣa̱ṃ goma̍dindo̱ hira̍ṇyavat | aśvā̍va̱dvāja̍vatsu̱taḥ

||4||

sa pa̍vasva vicarṣaṇa̱ ā ma̱hī roda̍sī pṛṇa | u̱ṣāḥ sūryo̱ na ra̱śmibhi̍:

||5||

pari̍ ṇaḥ śarma̱yantyā̱ dhāra̍yā soma vi̱śvata̍: | sarā̍ ra̱seva̍ vi̱ṣṭapa̍m

||6||

ja̱naya̍nroca̱nā di̱vo ja̱naya̍nna̱psu sūrya̍m | vasā̍no̱ gā a̱po hari̍:

||1||

e̱ṣa pra̱tnena̱ manma̍nā de̱vo de̱vebhya̱spari̍ | dhāra̍yā pavate su̱taḥ

||2||

vā̱vṛ̱dhā̱nāya̱ tūrva̍ye̱ pava̍nte̱ vāja̍sātaye | somā̍: sa̱hasra̍pājasaḥ

||3||

du̱hā̱naḥ pra̱tnamitpaya̍: pa̱vitre̱ pari̍ ṣicyate | kranda̍nde̱vām̐ a̍jījanat

||4||

a̱bhi viśvā̍ni̱ vāryā̱bhi de̱vām̐ ṛ̍tā̱vṛdha̍: | soma̍: punā̱no a̍rṣati

||5||

goma̍nnaḥ soma vī̱rava̱daśvā̍va̱dvāja̍vatsu̱taḥ | pava̍sva bṛha̱tīriṣa̍:

||6||

yo atya̍ iva mṛ̱jyate̱ gobhi̱rmadā̍ya harya̱taḥ | taṃ gī̱rbhirvā̍sayāmasi

||1||

taṃ no̱ viśvā̍ ava̱syuvo̱ gira̍: śumbhanti pū̱rvathā̍ | indu̱mindrā̍ya pī̱taye̍

||2||

pu̱nā̱no yā̍ti harya̱taḥ somo̍ gī̱rbhiḥ pari̍ṣkṛtaḥ | vipra̍sya̱ medhyā̍titheḥ

||3||

pava̍māna vi̱dā ra̱yima̱smabhya̍ṃ soma su̱śriya̍m | indo̍ sa̱hasra̍varcasam

||4||

indu̱ratyo̱ na vā̍ja̱sṛtkani̍kranti pa̱vitra̱ ā | yadakṣā̱rati̍ deva̱yuḥ

||5||

pava̍sva̱ vāja̍sātaye̱ vipra̍sya gṛṇa̱to vṛ̱dhe | soma̱ rāsva̍ su̱vīrya̍m

||6||

pra ṇa̍ indo ma̱he tana̍ ū̱rmiṃ na bibhra̍darṣasi | a̱bhi de̱vām̐ a̱yāsya̍:

||1||

ma̱tī ju̱ṣṭo dhi̱yā hi̱taḥ somo̍ hinve parā̱vati̍ | vipra̍sya̱ dhāra̍yā ka̱viḥ

||2||

a̱yaṃ de̱veṣu̱ jāgṛ̍viḥ su̱ta e̍ti pa̱vitra̱ ā | somo̍ yāti̱ vica̍rṣaṇiḥ

||3||

sa na̍: pavasva vāja̱yuśca̍krā̱ṇaścāru̍madhva̱ram | ba̱rhiṣmā̱m̐ ā vi̍vāsati

||4||

sa no̱ bhagā̍ya vā̱yave̱ vipra̍vīraḥ sa̱dāvṛ̍dhaḥ | somo̍ de̱veṣvā ya̍mat

||5||

sa no̍ a̱dya vasu̍ttaye kratu̱vidgā̍tu̱vitta̍maḥ | vāja̍ṃ jeṣi̱ śravo̍ bṛ̱hat

||6||

sa pa̍vasva̱ madā̍ya̱ kaṃ nṛ̱cakṣā̍ de̱vavī̍taye | inda̱vindrā̍ya pī̱taye̍

||1||

sa no̍ arṣā̱bhi dū̱tyaṃ1 tvamindrā̍ya tośase | de̱vāntsakhi̍bhya̱ ā vara̍m

||2||

u̱ta tvāma̍ru̱ṇaṃ va̱yaṃ gobhi̍rañjmo̱ madā̍ya̱ kam | vi no̍ rā̱ye duro̍ vṛdhi

||3||

atyū̍ pa̱vitra̍makramīdvā̱jī dhura̱ṃ na yāma̍ni | indu̍rde̱veṣu̍ patyate

||4||

samī̱ sakhā̍yo asvara̱nvane̱ krīl̤a̍nta̱matya̍vim | indu̍ṃ nā̱vā a̍nūṣata

||5||

tayā̍ pavasva̱ dhāra̍yā̱ yayā̍ pī̱to vi̱cakṣa̍se | indo̍ sto̱tre su̱vīrya̍m

||6||

asṛ̍grande̱vavī̍ta̱ye'tyā̍sa̱: kṛtvyā̍ iva | kṣara̍ntaḥ parvatā̱vṛdha̍:

||1||

pari̍ṣkṛtāsa̱ inda̍vo̱ yoṣe̍va̱ pitryā̍vatī | vā̱yuṃ somā̍ asṛkṣata

||2||

e̱te somā̍sa̱ inda̍va̱: praya̍svantaśca̱mū su̱tāḥ | indra̍ṃ vardhanti̱ karma̍bhiḥ

||3||

ā dhā̍vatā suhastyaḥ śu̱krā gṛ̍bhṇīta ma̱nthinā̍ | gobhi̍: śrīṇīta matsa̱ram

||4||

sa pa̍vasva dhanaṃjaya praya̱ntā rādha̍so ma̱haḥ | a̱smabhya̍ṃ soma gātu̱vit

||5||

e̱taṃ mṛ̍janti̱ marjya̱ṃ pava̍māna̱ṃ daśa̱ kṣipa̍: | indrā̍ya matsa̱raṃ mada̍m

||6||

a̱yā soma̍: sukṛ̱tyayā̍ ma̱haści̍da̱bhya̍vardhata | ma̱ndā̱na udvṛ̍ṣāyate

||1||

kṛ̱tānīda̍sya̱ kartvā̱ ceta̍nte dasyu̱tarha̍ṇā | ṛ̱ṇā ca̍ dhṛ̱ṣṇuśca̍yate

||2||

ātsoma̍ indri̱yo raso̱ vajra̍: sahasra̱sā bhu̍vat | u̱kthaṃ yada̍sya̱ jāya̍te

||3||

sva̱yaṃ ka̱virvi̍dha̱rtari̱ viprā̍ya̱ ratna̍micchati | yadī̍ marmṛ̱jyate̱ dhiya̍:

||4||

si̱ṣā̱satū̍ rayī̱ṇāṃ vāje̱ṣvarva̍tāmiva | bhare̍ṣu ji̱gyuṣā̍masi

||5||

taṃ tvā̍ nṛ̱mṇāni̱ bibhra̍taṃ sa̱dhasthe̍ṣu ma̱ho di̱vaḥ | cāru̍ṃ sukṛ̱tyaye̍mahe

||1||

saṃvṛ̍ktadhṛṣṇumu̱kthya̍ṃ ma̱hāma̍hivrata̱ṃ mada̍m | śa̱taṃ puro̍ ruru̱kṣaṇi̍m

||2||

ata̍stvā ra̱yima̱bhi rājā̍naṃ sukrato di̱vaḥ | su̱pa̱rṇo a̍vya̱thirbha̍rat

||3||

viśva̍smā̱ itsva̍rdṛ̱śe sādhā̍raṇaṃ raja̱stura̍m | go̱pāmṛ̱tasya̱ virbha̍rat

||4||

adhā̍ hinvā̱na i̍ndri̱yaṃ jyāyo̍ mahi̱tvamā̍naśe | a̱bhi̱ṣṭi̱kṛdvica̍rṣaṇiḥ

||5||

pava̍sva vṛ̱ṣṭimā su no̱'pāmū̱rmiṃ di̱vaspari̍ | a̱ya̱kṣmā bṛ̍ha̱tīriṣa̍:

||1||

tayā̍ pavasva̱ dhāra̍yā̱ yayā̱ gāva̍ i̱hāgama̍n | janyā̍sa̱ upa̍ no gṛ̱ham

||2||

ghṛ̱taṃ pa̍vasva̱ dhāra̍yā ya̱jñeṣu̍ deva̱vīta̍maḥ | a̱smabhya̍ṃ vṛ̱ṣṭimā pa̍va

||3||

sa na̍ ū̱rje vya1vyaya̍ṃ pa̱vitra̍ṃ dhāva̱ dhāra̍yā | de̱vāsa̍: śṛ̱ṇava̱nhi ka̍m

||4||

pava̍māno asiṣyada̱drakṣā̍ṃsyapa̱jaṅgha̍nat | pra̱tna̱vadro̱caya̱nruca̍:

||5||

utte̱ śuṣmā̍sa īrate̱ sindho̍rū̱rmeri̍va sva̱naḥ | vā̱ṇasya̍ codayā pa̱vim

||1||

pra̱sa̱ve ta̱ udī̍rate ti̱sro vāco̍ makha̱syuva̍: | yadavya̱ eṣi̱ sāna̍vi

||2||

avyo̱ vāre̱ pari̍ pri̱yaṃ hari̍ṃ hinva̱ntyadri̍bhiḥ | pava̍mānaṃ madhu̱ścuta̍m

||3||

ā pa̍vasva madintama pa̱vitra̱ṃ dhāra̍yā kave | a̱rkasya̱ yoni̍mā̱sada̍m

||4||

sa pa̍vasva madintama̱ gobhi̍rañjā̱no a̱ktubhi̍: | inda̱vindrā̍ya pī̱taye̍

||5||

adhva̍ryo̱ adri̍bhiḥ su̱taṃ soma̍ṃ pa̱vitra̱ ā sṛ̍ja | pu̱nī̱hīndrā̍ya̱ pāta̍ve

||1||

di̱vaḥ pī̱yūṣa̍mutta̱maṃ soma̱mindrā̍ya va̱jriṇe̍ | su̱notā̱ madhu̍mattamam

||2||

tava̱ tya i̍ndo̱ andha̍so de̱vā madho̱rvya̍śnate | pava̍mānasya ma̱ruta̍:

||3||

tvaṃ hi so̍ma va̱rdhaya̍ntsu̱to madā̍ya̱ bhūrṇa̍ye | vṛṣa̍ntsto̱tāra̍mū̱taye̍

||4||

a̱bhya̍rṣa vicakṣaṇa pa̱vitra̱ṃ dhāra̍yā su̱taḥ | a̱bhi vāja̍mu̱ta śrava̍:

||5||

pari̍ dyu̱kṣaḥ sa̱nadra̍yi̱rbhara̱dvāja̍ṃ no̱ andha̍sā | su̱vā̱no a̍rṣa pa̱vitra̱ ā

||1||

tava̍ pra̱tnebhi̱radhva̍bhi̱ravyo̱ vāre̱ pari̍ pri̱yaḥ | sa̱hasra̍dhāro yā̱ttanā̍

||2||

ca̱rurna yastamī̍ṅkha̱yendo̱ na dāna̍mīṅkhaya | va̱dhairva̍dhasnavīṅkhaya

||3||

ni śuṣma̍mindaveṣā̱ṃ puru̍hūta̱ janā̍nām | yo a̱smām̐ ā̱dide̍śati

||4||

śa̱taṃ na̍ inda ū̱tibhi̍: sa̱hasra̍ṃ vā̱ śucī̍nām | pava̍sva maṃha̱yadra̍yiḥ

||5||

utte̱ śuṣmā̍so asthū̱ rakṣo̍ bhi̱ndanto̍ adrivaḥ | nu̱dasva̱ yāḥ pa̍ri̱spṛdha̍:

||1||

a̱yā ni̍ja̱ghniroja̍sā rathasa̱ṃge dhane̍ hi̱te | stavā̱ abi̍bhyuṣā hṛ̱dā

||2||

asya̍ vra̱tāni̱ nādhṛṣe̱ pava̍mānasya dū̱ḍhyā̍ | ru̱ja yastvā̍ pṛta̱nyati̍

||3||

taṃ hi̍nvanti mada̱cyuta̱ṃ hari̍ṃ na̱dīṣu̍ vā̱jina̍m | indu̱mindrā̍ya matsa̱ram

||4||

a̱sya pra̱tnāmanu̱ dyuta̍ṃ śu̱kraṃ du̍duhre̱ ahra̍yaḥ | paya̍: sahasra̱sāmṛṣi̍m

||1||

a̱yaṃ sūrya̍ ivopa̱dṛga̱yaṃ sarā̍ṃsi dhāvati | sa̱pta pra̱vata̱ ā diva̍m

||2||

a̱yaṃ viśvā̍ni tiṣṭhati punā̱no bhuva̍no̱pari̍ | somo̍ de̱vo na sūrya̍:

||3||

pari̍ ṇo de̱vavī̍taye̱ vājā̍m̐ arṣasi̱ goma̍taḥ | pu̱nā̱na i̍ndavindra̱yuḥ

||4||

yava̍ṃyavaṃ no̱ andha̍sā pu̱ṣṭampu̍ṣṭa̱ṃ pari̍ srava | soma̱ viśvā̍ ca̱ saubha̍gā

||1||

indo̱ yathā̱ tava̱ stavo̱ yathā̍ te jā̱tamandha̍saḥ | ni ba̱rhiṣi̍ pri̱ye sa̍daḥ

||2||

u̱ta no̍ go̱vida̍śva̱vitpava̍sva so̱māndha̍sā | ma̱kṣūta̍mebhi̱raha̍bhiḥ

||3||

yo ji̱nāti̱ na jīya̍te̱ hanti̱ śatru̍ma̱bhītya̍ | sa pa̍vasva sahasrajit

||4||

pari̱ soma̍ ṛ̱taṃ bṛ̱hadā̱śuḥ pa̱vitre̍ arṣati | vi̱ghnanrakṣā̍ṃsi deva̱yuḥ

||1||

yatsomo̱ vāja̱marṣa̍ti śa̱taṃ dhārā̍ apa̱syuva̍: | indra̍sya sa̱khyamā̍vi̱śan

||2||

a̱bhi tvā̱ yoṣa̍ṇo̱ daśa̍ jā̱raṃ na ka̱nyā̍nūṣata | mṛ̱jyase̍ soma sā̱taye̍

||3||

tvamindrā̍ya̱ viṣṇa̍ve svā̱duri̍ndo̱ pari̍ srava | nṝntsto̱tṝnpā̱hyaṃha̍saḥ

||4||

pra te̱ dhārā̍ asa̱ścato̍ di̱vo na ya̍nti vṛ̱ṣṭaya̍: | acchā̱ vāja̍ṃ saha̱sriṇa̍m

||1||

a̱bhi pri̱yāṇi̱ kāvyā̱ viśvā̱ cakṣā̍ṇo arṣati | hari̍stuñjā̱na āyu̍dhā

||2||

sa ma̍rmṛjā̱na ā̱yubhi̱ribho̱ rāje̍va suvra̱taḥ | śye̱no na vaṃsu̍ ṣīdati

||3||

sa no̱ viśvā̍ di̱vo vasū̱to pṛ̍thi̱vyā adhi̍ | pu̱nā̱na i̍nda̱vā bha̍ra

||4||

tara̱tsa ma̱ndī dhā̍vati̱ dhārā̍ su̱tasyāndha̍saḥ | tara̱tsa ma̱ndī dhā̍vati

||1||

u̱srā ve̍da̱ vasū̍nā̱ṃ marta̍sya de̱vyava̍saḥ | tara̱tsa ma̱ndī dhā̍vati

||2||

dhva̱srayo̍: puru̱ṣantyo̱rā sa̱hasrā̍ṇi dadmahe | tara̱tsa ma̱ndī dhā̍vati

||3||

ā yayo̍stri̱ṃśata̱ṃ tanā̍ sa̱hasrā̍ṇi ca̱ dadma̍he | tara̱tsa ma̱ndī dhā̍vati

||4||

pava̍sva go̱jida̍śva̱jidvi̍śva̱jitso̍ma raṇya̱jit | pra̱jāva̱dratna̱mā bha̍ra

||1||

||

pava̍svā̱dbhyo adā̍bhya̱: pava̱svauṣa̍dhībhyaḥ | pava̍sva dhi̱ṣaṇā̍bhyaḥ

||2||

tvaṃ so̍ma̱ pava̍māno̱ viśvā̍ni duri̱tā ta̍ra | ka̱viḥ sī̍da̱ ni ba̱rhiṣi̍

||3||

pava̍māna̱ sva̍rvido̱ jāya̍māno'bhavo ma̱hān | indo̱ viśvā̍m̐ a̱bhīda̍si

||4||

pra gā̍ya̱treṇa̍ gāyata̱ pava̍māna̱ṃ vica̍rṣaṇim | indu̍ṃ sa̱hasra̍cakṣasam

||1||

taṃ tvā̍ sa̱hasra̍cakṣasa̱matho̍ sa̱hasra̍bharṇasam | ati̱ vāra̍mapāviṣuḥ

||2||

ati̱ vārā̱npava̍māno asiṣyadatka̱laśā̍m̐ a̱bhi dhā̍vati | indra̍sya̱ hārdyā̍vi̱śan

||3||

indra̍sya soma̱ rādha̍se̱ śaṃ pa̍vasva vicarṣaṇe | pra̱jāva̱dreta̱ ā bha̍ra

||4||

a̱yā vī̱tī pari̍ srava̱ yasta̍ indo̱ made̱ṣvā | a̱vāha̍nnava̱tīrnava̍

||1||

pura̍: sa̱dya i̱tthādhi̍ye̱ divo̍dāsāya̱ śamba̍ram | adha̱ tyaṃ tu̱rvaśa̱ṃ yadu̍m

||2||

pari̍ ṇo̱ aśva̍maśva̱vidgoma̍dindo̱ hira̍ṇyavat | kṣarā̍ saha̱sriṇī̱riṣa̍:

||3||

pava̍mānasya te va̱yaṃ pa̱vitra̍mabhyunda̱taḥ | sa̱khi̱tvamā vṛ̍ṇīmahe

||4||

ye te̍ pa̱vitra̍mū̱rmayo̍'bhi̱kṣara̍nti̱ dhāra̍yā | tebhi̍rnaḥ soma mṛl̤aya

||5||

sa na̍: punā̱na ā bha̍ra ra̱yiṃ vī̱rava̍tī̱miṣa̍m | īśā̍naḥ soma vi̱śvata̍:

||6||

e̱tamu̱ tyaṃ daśa̱ kṣipo̍ mṛ̱janti̱ sindhu̍mātaram | samā̍di̱tyebhi̍rakhyata

||7||

samindre̍ṇo̱ta vā̱yunā̍ su̱ta e̍ti pa̱vitra̱ ā | saṃ sūrya̍sya ra̱śmibhi̍:

||8||

sa no̱ bhagā̍ya vā̱yave̍ pū̱ṣṇe pa̍vasva̱ madhu̍mān | cāru̍rmi̱tre varu̍ṇe ca

||9||

u̱ccā te̍ jā̱tamandha̍so di̱vi ṣadbhūmyā da̍de | u̱graṃ śarma̱ mahi̱ śrava̍:

||10||

e̱nā viśvā̍nya̱rya ā dyu̱mnāni̱ mānu̍ṣāṇām | siṣā̍santo vanāmahe

||11||

sa na̱ indrā̍ya̱ yajya̍ve̱ varu̍ṇāya ma̱rudbhya̍: | va̱ri̱vo̱vitpari̍ srava

||12||

upo̱ ṣu jā̱tama̱ptura̱ṃ gobhi̍rbha̱ṅgaṃ pari̍ṣkṛtam | indu̍ṃ de̱vā a̍yāsiṣuḥ

||13||

tamidva̍rdhantu no̱ giro̍ va̱tsaṃ sa̱ṃśiśva̍rīriva | ya indra̍sya hṛda̱ṃsani̍:

||14||

arṣā̍ ṇaḥ soma̱ śaṃ gave̍ dhu̱kṣasva̍ pi̱pyuṣī̱miṣa̍m | vardhā̍ samu̱dramu̱kthya̍m

||15||

pava̍māno ajījanaddi̱vaści̱traṃ na ta̍nya̱tum | jyoti̍rvaiśvāna̱raṃ bṛ̱hat

||16||

pava̍mānasya te̱ raso̱ mado̍ rājannaducchu̱naḥ | vi vāra̱mavya̍marṣati

||17||

pava̍māna̱ rasa̱stava̱ dakṣo̱ vi rā̍jati dyu̱mān | jyoti̱rviśva̱ṃ sva̍rdṛ̱śe

||18||

yaste̱ mado̱ vare̍ṇya̱stenā̍ pava̱svāndha̍sā | de̱vā̱vīra̍ghaśaṃsa̱hā

||19||

jaghni̍rvṛ̱trama̍mi̱triya̱ṃ sasni̱rvāja̍ṃ di̱vedi̍ve | go̱ṣā u̍ aśva̱sā a̍si

||20||

sammi̍ślo aru̱ṣo bha̍va sūpa̱sthābhi̱rna dhe̱nubhi̍: | sīda̍ñchye̱no na yoni̱mā

||21||

sa pa̍vasva̱ ya āvi̱thendra̍ṃ vṛ̱trāya̱ hanta̍ve | va̱vri̱vāṃsa̍ṃ ma̱hīra̱paḥ

||22||

su̱vīrā̍so va̱yaṃ dhanā̱ jaye̍ma soma mīḍhvaḥ | pu̱nā̱no va̍rdha no̱ gira̍:

||23||

tvotā̍sa̱stavāva̍sā̱ syāma̍ va̱nvanta̍ ā̱mura̍: | soma̍ vra̱teṣu̍ jāgṛhi

||24||

a̱pa̱ghnanpa̍vate̱ mṛdho'pa̱ somo̱ arā̍vṇaḥ | gaccha̱nnindra̍sya niṣkṛ̱tam

||25||

ma̱ho no̍ rā̱ya ā bha̍ra̱ pava̍māna ja̱hī mṛdha̍: | rāsve̍ndo vī̱rava̱dyaśa̍:

||26||

na tvā̍ śa̱taṃ ca̱na hruto̱ rādho̱ ditsa̍nta̱mā mi̍nan | yatpu̍nā̱no ma̍kha̱syase̍

||27||

pava̍svendo̱ vṛṣā̍ su̱taḥ kṛ̱dhī no̍ ya̱śaso̱ jane̍ | viśvā̱ apa̱ dviṣo̍ jahi

||28||

asya̍ te sa̱khye va̱yaṃ tave̍ndo dyu̱mna u̍tta̱me | sā̱sa̱hyāma̍ pṛtanya̱taḥ

||29||

yā te̍ bhī̱mānyāyu̍dhā ti̱gmāni̱ santi̱ dhūrva̍ṇe | rakṣā̍ samasya no ni̱daḥ

||30||

e̱te a̍sṛgra̱minda̍vasti̱raḥ pa̱vitra̍mā̱śava̍: | viśvā̍nya̱bhi saubha̍gā

||1||

vi̱ghnanto̍ duri̱tā pu̱ru su̱gā to̱kāya̍ vā̱jina̍: | tanā̍ kṛ̱ṇvanto̱ arva̍te

||2||

kṛ̱ṇvanto̱ vari̍vo̱ gave̱'bhya̍rṣanti suṣṭu̱tim | il̤ā̍ma̱smabhya̍ṃ sa̱ṃyata̍m

||3||

asā̍vya̱ṃśurmadā̍yā̱'psu dakṣo̍ giri̱ṣṭhāḥ | śye̱no na yoni̱māsa̍dat

||4||

śu̱bhramandho̍ de̱vavā̍tama̱psu dhū̱to nṛbhi̍: su̱taḥ | svada̍nti̱ gāva̱: payo̍bhiḥ

||5||

ādī̱maśva̱ṃ na hetā̱ro'śū̍śubhanna̱mṛtā̍ya | madhvo̱ rasa̍ṃ sadha̱māde̍

||6||

yāste̱ dhārā̍ madhu̱ścuto'sṛ̍graminda ū̱taye̍ | tābhi̍: pa̱vitra̱māsa̍daḥ

||7||

so a̱rṣendrā̍ya pī̱taye̍ ti̱ro romā̍ṇya̱vyayā̍ | sīda̱nyonā̱ vane̱ṣvā

||8||

tvami̍ndo̱ pari̍ srava̱ svādi̍ṣṭho̱ aṅgi̍robhyaḥ | va̱ri̱vo̱vidghṛ̱taṃ paya̍:

||9||

a̱yaṃ vica̍rṣaṇirhi̱taḥ pava̍māna̱: sa ce̍tati | hi̱nvā̱na āpya̍ṃ bṛ̱hat

||10||

e̱ṣa vṛṣā̱ vṛṣa̍vrata̱: pava̍māno aśasti̱hā | kara̱dvasū̍ni dā̱śuṣe̍

||11||

ā pa̍vasva saha̱sriṇa̍ṃ ra̱yiṃ goma̍ntama̱śvina̍m | pu̱ru̱śca̱ndraṃ pu̍ru̱spṛha̍m

||12||

e̱ṣa sya pari̍ ṣicyate marmṛ̱jyamā̍na ā̱yubhi̍: | u̱ru̱gā̱yaḥ ka̱vikra̍tuḥ

||13||

sa̱hasro̍tiḥ śa̱tāma̍gho vi̱māno̱ raja̍saḥ ka̱viḥ | indrā̍ya pavate̱ mada̍:

||14||

gi̱rā jā̱ta i̱ha stu̱ta indu̱rindrā̍ya dhīyate | viryonā̍ vasa̱tāvi̍va

||15||

pava̍mānaḥ su̱to nṛbhi̱: somo̱ vāja̍mivāsarat | ca̱mūṣu̱ śakma̍nā̱sada̍m

||16||

taṃ tri̍pṛ̱ṣṭhe tri̍vandhu̱re rathe̍ yuñjanti̱ yāta̍ve | ṛṣī̍ṇāṃ sa̱pta dhī̱tibhi̍:

||17||

taṃ so̍tāro dhana̱spṛta̍mā̱śuṃ vājā̍ya̱ yāta̍ve | hari̍ṃ hinota vā̱jina̍m

||18||

ā̱vi̱śanka̱laśa̍ṃ su̱to viśvā̱ arṣa̍nna̱bhi śriya̍: | śūro̱ na goṣu̍ tiṣṭhati

||19||

ā ta̍ indo̱ madā̍ya̱ kaṃ payo̍ duhantyā̱yava̍: | de̱vā de̱vebhyo̱ madhu̍

||20||

ā na̱: soma̍ṃ pa̱vitra̱ ā sṛ̱jatā̱ madhu̍mattamam | de̱vebhyo̍ deva̱śrutta̍mam

||21||

e̱te somā̍ asṛkṣata gṛṇā̱nāḥ śrava̍se ma̱he | ma̱dinta̍masya̱ dhāra̍yā

||22||

a̱bhi gavyā̍ni vī̱taye̍ nṛ̱mṇā pu̍nā̱no a̍rṣasi | sa̱nadvā̍ja̱: pari̍ srava

||23||

u̱ta no̱ goma̍tī̱riṣo̱ viśvā̍ arṣa pari̱ṣṭubha̍: | gṛ̱ṇā̱no ja̱mada̍gninā

||24||

pava̍sva vā̱co a̍gri̱yaḥ soma̍ ci̱trābhi̍rū̱tibhi̍: | a̱bhi viśvā̍ni̱ kāvyā̍

||25||

tvaṃ sa̍mu̱driyā̍ a̱po̍'gri̱yo vāca̍ ī̱raya̍n | pava̍sva viśvamejaya

||26||

tubhye̱mā bhuva̍nā kave mahi̱mne so̍ma tasthire | tubhya̍marṣanti̱ sindha̍vaḥ

||27||

pra te̍ di̱vo na vṛ̱ṣṭayo̱ dhārā̍ yantyasa̱ścata̍: | a̱bhi śu̱krāmu̍pa̱stira̍m

||28||

indrā̱yendu̍ṃ punītano̱graṃ dakṣā̍ya̱ sādha̍nam | ī̱śā̱naṃ vī̱tirā̍dhasam

||29||

pava̍māna ṛ̱taḥ ka̱viḥ soma̍: pa̱vitra̱māsa̍dat | dadha̍tsto̱tre su̱vīrya̍m

||30||

ā pa̍vasva saha̱sriṇa̍ṃ ra̱yiṃ so̍ma su̱vīrya̍m | a̱sme śravā̍ṃsi dhāraya

||1||

iṣa̱mūrja̍ṃ ca pinvasa̱ indrā̍ya matsa̱rinta̍maḥ | ca̱mūṣvā ni ṣī̍dasi

||2||

su̱ta indrā̍ya̱ viṣṇa̍ve̱ soma̍: ka̱laśe̍ akṣarat | madhu̍mām̐ astu vā̱yave̍

||3||

e̱te a̍sṛgramā̱śavo'ti̱ hvarā̍ṃsi ba̱bhrava̍: | somā̍ ṛ̱tasya̱ dhāra̍yā

||4||

indra̱ṃ vardha̍nto a̱ptura̍: kṛ̱ṇvanto̱ viśva̱mārya̍m | a̱pa̱ghnanto̱ arā̍vṇaḥ

||5||

su̱tā anu̱ svamā rajo̱'bhya̍rṣanti ba̱bhrava̍: | indra̱ṃ gaccha̍nta̱ inda̍vaḥ

||6||

a̱yā pa̍vasva̱ dhāra̍yā̱ yayā̱ sūrya̱maro̍cayaḥ | hi̱nvā̱no mānu̍ṣīra̱paḥ

||7||

ayu̍kta̱ sūra̱ eta̍śa̱ṃ pava̍māno ma̱nāvadhi̍ | a̱ntari̍kṣeṇa̱ yāta̍ve

||8||

u̱ta tyā ha̱rito̱ daśa̱ sūro̍ ayukta̱ yāta̍ve | indu̱rindra̱ iti̍ bru̱van

||9||

parī̱to vā̱yave̍ su̱taṃ gira̱ indrā̍ya matsa̱ram | avyo̱ vāre̍ṣu siñcata

||10||

pava̍māna vi̱dā ra̱yima̱smabhya̍ṃ soma du̱ṣṭara̍m | yo dū̱ṇāśo̍ vanuṣya̱tā

||11||

a̱bhya̍rṣa saha̱sriṇa̍ṃ ra̱yiṃ goma̍ntama̱śvina̍m | a̱bhi vāja̍mu̱ta śrava̍:

||12||

somo̍ de̱vo na sūryo'dri̍bhiḥ pavate su̱taḥ | dadhā̍naḥ ka̱laśe̱ rasa̍m

||13||

e̱te dhāmā̱nyāryā̍ śu̱krā ṛ̱tasya̱ dhāra̍yā | vāja̱ṃ goma̍ntamakṣaran

||14||

su̱tā indrā̍ya va̱jriṇe̱ somā̍so̱ dadhyā̍śiraḥ | pa̱vitra̱matya̍kṣaran

||15||

pra so̍ma̱ madhu̍mattamo rā̱ye a̍rṣa pa̱vitra̱ ā | mado̱ yo de̍va̱vīta̍maḥ

||16||

tamī̍ mṛjantyā̱yavo̱ hari̍ṃ na̱dīṣu̍ vā̱jina̍m | indu̱mindrā̍ya matsa̱ram

||17||

ā pa̍vasva̱ hira̍ṇyava̱daśvā̍vatsoma vī̱rava̍t | vāja̱ṃ goma̍nta̱mā bha̍ra

||18||

pari̱ vāje̱ na vā̍ja̱yumavyo̱ vāre̍ṣu siñcata | indrā̍ya̱ madhu̍mattamam

||19||

ka̱viṃ mṛ̍janti̱ marjya̍ṃ dhī̱bhirviprā̍ ava̱syava̍: | vṛṣā̱ kani̍kradarṣati

||20||

vṛṣa̍ṇaṃ dhī̱bhira̱ptura̱ṃ soma̍mṛ̱tasya̱ dhāra̍yā | ma̱tī viprā̱: sama̍svaran

||21||

pava̍sva devāyu̱ṣagindra̍ṃ gacchatu te̱ mada̍: | vā̱yumā ro̍ha̱ dharma̍ṇā

||22||

pava̍māna̱ ni to̍śase ra̱yiṃ so̍ma śra̱vāyya̍m | pri̱yaḥ sa̍mu̱dramā vi̍śa

||23||

a̱pa̱ghnanpa̍vase̱ mṛdha̍: kratu̱vitso̍ma matsa̱raḥ | nu̱dasvāde̍vayu̱ṃ jana̍m

||24||

pava̍mānā asṛkṣata̱ somā̍: śu̱krāsa̱ inda̍vaḥ | a̱bhi viśvā̍ni̱ kāvyā̍

||25||

pava̍mānāsa ā̱śava̍: śu̱bhrā a̍sṛgra̱minda̍vaḥ | ghnanto̱ viśvā̱ apa̱ dviṣa̍:

||26||

pava̍mānā di̱vasparya̱ntari̍kṣādasṛkṣata | pṛ̱thi̱vyā adhi̱ sāna̍vi

||27||

pu̱nā̱naḥ so̍ma̱ dhāra̱yendo̱ viśvā̱ apa̱ sridha̍: | ja̱hi rakṣā̍ṃsi sukrato

||28||

a̱pa̱ghnantso̍ma ra̱kṣaso̱'bhya̍rṣa̱ kani̍kradat | dyu̱manta̱ṃ śuṣma̍mutta̱mam

||29||

a̱sme vasū̍ni dhāraya̱ soma̍ di̱vyāni̱ pārthi̍vā | indo̱ viśvā̍ni̱ vāryā̍

||30||

vṛṣā̍ soma dyu̱mām̐ a̍si̱ vṛṣā̍ deva̱ vṛṣa̍vrataḥ | vṛṣā̱ dharmā̍ṇi dadhiṣe

||1||

vṛṣṇa̍ste̱ vṛṣṇya̱ṃ śavo̱ vṛṣā̱ vana̱ṃ vṛṣā̱ mada̍: | sa̱tyaṃ vṛ̍ṣa̱nvṛṣeda̍si

||2||

aśvo̱ na ca̍krado̱ vṛṣā̱ saṃ gā i̍ndo̱ samarva̍taḥ | vi no̍ rā̱ye duro̍ vṛdhi

||3||

asṛ̍kṣata̱ pra vā̱jino̍ ga̱vyā somā̍so aśva̱yā | śu̱krāso̍ vīra̱yāśava̍:

||4||

śu̱mbhamā̍nā ṛtā̱yubhi̍rmṛ̱jyamā̍nā̱ gabha̍styoḥ | pava̍nte̱ vāre̍ a̱vyaye̍

||5||

te viśvā̍ dā̱śuṣe̱ vasu̱ somā̍ di̱vyāni̱ pārthi̍vā | pava̍ntā̱māntari̍kṣyā

||6||

pava̍mānasya viśvavi̱tpra te̱ sargā̍ asṛkṣata | sūrya̍syeva̱ na ra̱śmaya̍:

||7||

ke̱tuṃ kṛ̱ṇvandi̱vaspari̱ viśvā̍ rū̱pābhya̍rṣasi | sa̱mu̱draḥ so̍ma pinvase

||8||

hi̱nvā̱no vāca̍miṣyasi̱ pava̍māna̱ vidha̍rmaṇi | akrā̍nde̱vo na sūrya̍:

||9||

indu̍: paviṣṭa̱ ceta̍naḥ pri̱yaḥ ka̍vī̱nāṃ ma̱tī | sṛ̱jadaśva̍ṃ ra̱thīri̍va

||10||

ū̱rmiryaste̍ pa̱vitra̱ ā de̍vā̱vīḥ pa̱ryakṣa̍rat | sīda̍nnṛ̱tasya̱ yoni̱mā

||11||

sa no̍ arṣa pa̱vitra̱ ā mado̱ yo de̍va̱vīta̍maḥ | inda̱vindrā̍ya pī̱taye̍

||12||

i̱ṣe pa̍vasva̱ dhāra̍yā mṛ̱jyamā̍no manī̱ṣibhi̍: | indo̍ ru̱cābhi gā i̍hi

||13||

pu̱nā̱no vari̍vaskṛ̱dhyūrja̱ṃ janā̍ya girvaṇaḥ | hare̍ sṛjā̱na ā̱śira̍m

||14||

pu̱nā̱no de̱vavī̍taya̱ indra̍sya yāhi niṣkṛ̱tam | dyu̱tā̱no vā̱jibhi̍rya̱taḥ

||15||

pra hi̍nvā̱nāsa̱ inda̱vo'cchā̍ samu̱dramā̱śava̍: | dhi̱yā jū̱tā a̍sṛkṣata

||16||

ma̱rmṛ̱jā̱nāsa̍ ā̱yavo̱ vṛthā̍ samu̱draminda̍vaḥ | agma̍nnṛ̱tasya̱ yoni̱mā

||17||

pari̍ ṇo yāhyasma̱yurviśvā̱ vasū̱nyoja̍sā | pā̱hi na̱: śarma̍ vī̱rava̍t

||18||

mimā̍ti̱ vahni̱reta̍śaḥ pa̱daṃ yu̍jā̱na ṛkva̍bhiḥ | pra yatsa̍mu̱dra āhi̍taḥ

||19||

ā yadyoni̍ṃ hira̱ṇyaya̍mā̱śuṝ̱tasya̱ sīda̍ti | jahā̱tyapra̍cetasaḥ

||20||

a̱bhi ve̱nā a̍nūṣa̱teya̍kṣanti̱ prace̍tasaḥ | majja̱ntyavi̍cetasaḥ

||21||

indrā̍yendo ma̱rutva̍te̱ pava̍sva̱ madhu̍mattamaḥ | ṛ̱tasya̱ yoni̍mā̱sada̍m

||22||

taṃ tvā̱ viprā̍ vaco̱vida̱: pari̍ ṣkṛṇvanti ve̱dhasa̍: | saṃ tvā̍ mṛjantyā̱yava̍:

||23||

rasa̍ṃ te mi̱tro a̍rya̱mā piba̍nti̱ varu̍ṇaḥ kave | pava̍mānasya ma̱ruta̍:

||24||

tvaṃ so̍ma vipa̱ścita̍ṃ punā̱no vāca̍miṣyasi | indo̍ sa̱hasra̍bharṇasam

||25||

u̱to sa̱hasra̍bharṇasa̱ṃ vāca̍ṃ soma makha̱syuva̍m | pu̱nā̱na i̍nda̱vā bha̍ra

||26||

pu̱nā̱na i̍ndaveṣā̱ṃ puru̍hūta̱ janā̍nām | pri̱yaḥ sa̍mu̱dramā vi̍śa

||27||

davi̍dyutatyā ru̱cā pa̍ri̱ṣṭobha̍ntyā kṛ̱pā | somā̍: śu̱krā gavā̍śiraḥ

||28||

hi̱nvā̱no he̱tṛbhi̍rya̱ta ā vāja̍ṃ vā̱jya̍kramīt | sīda̍nto va̱nuṣo̍ yathā

||29||

ṛ̱dhakso̍ma sva̱staye̍ saṃjagmā̱no di̱vaḥ ka̱viḥ | pava̍sva̱ sūryo̍ dṛ̱śe

||30||

hi̱nvanti̱ sūra̱musra̍ya̱: svasā̍ro jā̱maya̱spati̍m | ma̱hāmindu̍ṃ mahī̱yuva̍:

||1||

pava̍māna ru̱cāru̍cā de̱vo de̱vebhya̱spari̍ | viśvā̱ vasū̱nyā vi̍śa

||2||

ā pa̍vamāna suṣṭu̱tiṃ vṛ̱ṣṭiṃ de̱vebhyo̱ duva̍: | i̱ṣe pa̍vasva sa̱ṃyata̍m

||3||

vṛṣā̱ hyasi̍ bhā̱nunā̍ dyu̱manta̍ṃ tvā havāmahe | pava̍māna svā̱dhya̍:

||4||

ā pa̍vasva su̱vīrya̱ṃ manda̍mānaḥ svāyudha | i̱ho ṣvi̍nda̱vā ga̍hi

||5||

yada̱dbhiḥ pa̍riṣi̱cyase̍ mṛ̱jyamā̍no̱ gabha̍styoḥ | druṇā̍ sa̱dhastha̍maśnuṣe

||6||

pra somā̍ya vyaśva̱vatpava̍mānāya gāyata | ma̱he sa̱hasra̍cakṣase

||7||

yasya̱ varṇa̍ṃ madhu̱ścuta̱ṃ hari̍ṃ hi̱nvantyadri̍bhiḥ | indu̱mindrā̍ya pī̱taye̍

||8||

tasya̍ te vā̱jino̍ va̱yaṃ viśvā̱ dhanā̍ni ji̱gyuṣa̍: | sa̱khi̱tvamā vṛ̍ṇīmahe

||9||

vṛṣā̍ pavasva̱ dhāra̍yā ma̱rutva̍te ca matsa̱raḥ | viśvā̱ dadhā̍na̱ oja̍sā

||10||

taṃ tvā̍ dha̱rtāra̍mo̱ṇyo̱3: pava̍māna sva̱rdṛśa̍m | hi̱nve vāje̍ṣu vā̱jina̍m

||11||

a̱yā ci̱tto vi̱pānayā̱ hari̍: pavasva̱ dhāra̍yā | yuja̱ṃ vāje̍ṣu codaya

||12||

ā na̍ indo ma̱hīmiṣa̱ṃ pava̍sva vi̱śvada̍rśataḥ | a̱smabhya̍ṃ soma gātu̱vit

||13||

ā ka̱laśā̍ anūṣa̱tendo̱ dhārā̍bhi̱roja̍sā | endra̍sya pī̱taye̍ viśa

||14||

yasya̍ te̱ madya̱ṃ rasa̍ṃ tī̱vraṃ du̱hantyadri̍bhiḥ | sa pa̍vasvābhimāti̱hā

||15||

rājā̍ me̱dhābhi̍rīyate̱ pava̍māno ma̱nāvadhi̍ | a̱ntari̍kṣeṇa̱ yāta̍ve

||16||

ā na̍ indo śata̱gvina̱ṃ gavā̱ṃ poṣa̱ṃ svaśvya̍m | vahā̱ bhaga̍ttimū̱taye̍

||17||

ā na̍: soma̱ saho̱ juvo̍ rū̱paṃ na varca̍se bhara | su̱ṣvā̱ṇo de̱vavī̍taye

||18||

arṣā̍ soma dyu̱matta̍mo̱'bhi droṇā̍ni̱ roru̍vat | sīda̍ñchye̱no na yoni̱mā

||19||

a̱psā indrā̍ya vā̱yave̱ varu̍ṇāya ma̱rudbhya̍: | somo̍ arṣati̱ viṣṇa̍ve

||20||

iṣa̍ṃ to̱kāya̍ no̱ dadha̍da̱smabhya̍ṃ soma vi̱śvata̍: | ā pa̍vasva saha̱sriṇa̍m

||21||

ye somā̍saḥ parā̱vati̱ ye a̍rvā̱vati̍ sunvi̱re | ye vā̱daḥ śa̍rya̱ṇāva̍ti

||22||

ya ā̍rjī̱keṣu̱ kṛtva̍su̱ ye madhye̍ pa̱styā̍nām | ye vā̱ jane̍ṣu pa̱ñcasu̍

||23||

te no̍ vṛ̱ṣṭiṃ di̱vaspari̱ pava̍ntā̱mā su̱vīrya̍m | su̱vā̱nā de̱vāsa̱ inda̍vaḥ

||24||

pava̍te harya̱to hari̍rgṛṇā̱no ja̱mada̍gninā | hi̱nvā̱no goradhi̍ tva̱ci

||25||

pra śu̱krāso̍ vayo̱juvo̍ hinvā̱nāso̱ na sapta̍yaḥ | śrī̱ṇā̱nā a̱psu mṛ̍ñjata

||26||

taṃ tvā̍ su̱teṣvā̱bhuvo̍ hinvi̱re de̱vatā̍taye | sa pa̍vasvā̱nayā̍ ru̱cā

||27||

ā te̱ dakṣa̍ṃ mayo̱bhuva̱ṃ vahni̍ma̱dyā vṛ̍ṇīmahe | pānta̱mā pu̍ru̱spṛha̍m

||28||

ā ma̱ndramā vare̍ṇya̱mā vipra̱mā ma̍nī̱ṣiṇa̍m | pānta̱mā pu̍ru̱spṛha̍m

||29||

ā ra̱yimā su̍ce̱tuna̱mā su̍krato ta̱nūṣvā | pānta̱mā pu̍ru̱spṛha̍m

||30||

pava̍sva viśvacarṣaṇe̱'bhi viśvā̍ni̱ kāvyā̍ | sakhā̱ sakhi̍bhya̱ īḍya̍:

||1||

tābhyā̱ṃ viśva̍sya rājasi̱ ye pa̍vamāna̱ dhāma̍nī | pra̱tī̱cī so̍ma ta̱sthatu̍:

||2||

pari̱ dhāmā̍ni̱ yāni̍ te̱ tvaṃ so̍māsi vi̱śvata̍: | pava̍māna ṛ̱tubhi̍: kave

||3||

pava̍sva ja̱naya̱nniṣo̱'bhi viśvā̍ni̱ vāryā̍ | sakhā̱ sakhi̍bhya ū̱taye̍

||4||

tava̍ śu̱krāso̍ a̱rcayo̍ di̱vaspṛ̱ṣṭhe vi ta̍nvate | pa̱vitra̍ṃ soma̱ dhāma̍bhiḥ

||5||

tave̱me sa̱pta sindha̍vaḥ pra̱śiṣa̍ṃ soma sisrate | tubhya̍ṃ dhāvanti dhe̱nava̍:

||6||

pra so̍ma yāhi̱ dhāra̍yā su̱ta indrā̍ya matsa̱raḥ | dadhā̍no̱ akṣi̍ti̱ śrava̍:

||7||

samu̍ tvā dhī̱bhira̍svaranhinva̱tīḥ sa̱pta jā̱maya̍: | vipra̍mā̱jā vi̱vasva̍taḥ

||8||

mṛ̱janti̍ tvā̱ sama̱gruvo'vye̍ jī̱rāvadhi̱ ṣvaṇi̍ | re̱bho yada̱jyase̱ vane̍

||9||

pava̍mānasya te kave̱ vāji̱ntsargā̍ asṛkṣata | arva̍nto̱ na śra̍va̱syava̍:

||10||

acchā̱ kośa̍ṃ madhu̱ścuta̱masṛ̍gra̱ṃ vāre̍ a̱vyaye̍ | avā̍vaśanta dhī̱taya̍:

||11||

acchā̍ samu̱draminda̱vo'sta̱ṃ gāvo̱ na dhe̱nava̍: | agma̍nnṛ̱tasya̱ yoni̱mā

||12||

pra ṇa̍ indo ma̱he raṇa̱ āpo̍ arṣanti̱ sindha̍vaḥ | yadgobhi̍rvāsayi̱ṣyase̍

||13||

asya̍ te sa̱khye va̱yamiya̍kṣanta̱stvota̍yaḥ | indo̍ sakhi̱tvamu̍śmasi

||14||

ā pa̍vasva̱ gavi̍ṣṭaye ma̱he so̍ma nṛ̱cakṣa̍se | endra̍sya ja̱ṭhare̍ viśa

||15||

ma̱hām̐ a̍si soma̱ jyeṣṭha̍ u̱grāṇā̍minda̱ oji̍ṣṭhaḥ | yudhvā̱ sañchaśva̍jjigetha

||16||

ya u̱grebhya̍ści̱dojī̍yā̱ñchūre̍bhyaści̱cchūra̍taraḥ | bhū̱ri̱dābhya̍ści̱nmaṃhī̍yān

||17||

tvaṃ so̍ma̱ sūra̱ eṣa̍sto̱kasya̍ sā̱tā ta̱nūnā̍m | vṛ̱ṇī̱mahe̍ sa̱khyāya̍ vṛṇī̱mahe̱ yujyā̍ya

||18||

agna̱ āyū̍ṃṣi pavasa̱ ā su̱vorja̱miṣa̍ṃ ca naḥ | ā̱re bā̍dhasva du̱cchunā̍m

||19||

a̱gniṝṣi̱: pava̍māna̱: pāñca̍janyaḥ pu̱rohi̍taḥ | tamī̍mahe mahāga̱yam

||20||

agne̱ pava̍sva̱ svapā̍ a̱sme varca̍: su̱vīrya̍m | dadha̍dra̱yiṃ mayi̱ poṣa̍m

||21||

pava̍māno̱ ati̱ sridho̱'bhya̍rṣati suṣṭu̱tim | sūro̱ na vi̱śvada̍rśataḥ

||22||

sa ma̍rmṛjā̱na ā̱yubhi̱: praya̍svā̱npraya̍se hi̱taḥ | indu̱ratyo̍ vicakṣa̱ṇaḥ

||23||

pava̍māna ṛ̱taṃ bṛ̱hacchu̱kraṃ jyoti̍rajījanat | kṛ̱ṣṇā tamā̍ṃsi̱ jaṅgha̍nat

||24||

pava̍mānasya̱ jaṅghna̍to̱ hare̍śca̱ndrā a̍sṛkṣata | jī̱rā a̍ji̱raśo̍ciṣaḥ

||25||

pava̍māno ra̱thīta̍maḥ śu̱bhrebhi̍: śu̱bhraśa̍stamaḥ | hari̍ścandro ma̱rudga̍ṇaḥ

||26||

pava̍māno̱ vya̍śnavadra̱śmibhi̍rvāja̱sāta̍maḥ | dadha̍tsto̱tre su̱vīrya̍m

||27||

pra su̍vā̱na indu̍rakṣāḥ pa̱vitra̱matya̱vyaya̍m | pu̱nā̱na indu̱rindra̱mā

||28||

e̱ṣa somo̱ adhi̍ tva̱ci gavā̍ṃ krīl̤a̱tyadri̍bhiḥ | indra̱ṃ madā̍ya̱ johu̍vat

||29||

yasya̍ te dyu̱mnava̱tpaya̱: pava̍mā̱nābhṛ̍taṃ di̱vaḥ | tena̍ no mṛl̤a jī̱vase̍

||30||

Sūkta 67

(1-32) 1-3 bharadvājo bārhaspatya:, 4-6 kaśyapo mārīca:, 7-9 gotamo rāhūgaṇa:, 10-12 atrirbhauma:, 13-15 viśvāmitro gāthina:, 16-18 jamadagnirbhārgava:, 19-21 vasiṣṭho maitrāvaruṇi:,22-32 pavitra āṅgiraso vā vasiṣṭho vā ubhau vā | pavamānaḥ soma:, 10-12 pavamānaḥ pūṣā vā, 23-27 pavamāno'gni:, 25 pavamānaḥ savitā vā, 26 pavamānāgnisavitāra:, 27 viśve devā vā , 31-32 pavamānyadhyetā |gāyatrī, 16 -18 nityadvipadā gāyatrī , 30 purauṣṇik; 27 ,31 ,32, anuṣṭup |

tvaṃ so̍māsi dhāra̱yurma̱ndra oji̍ṣṭho adhva̱re | pava̍sva maṃha̱yadra̍yiḥ

||1||

tvaṃ su̱to nṛ̱māda̍no dadha̱nvānma̍tsa̱rinta̍maḥ | indrā̍ya sū̱rirandha̍sā

||2||

tvaṃ su̍ṣvā̱ṇo adri̍bhira̱bhya̍rṣa̱ kani̍kradat | dyu̱manta̱ṃ śuṣma̍mutta̱mam

||3||

indu̍rhinvā̱no a̍rṣati ti̱ro vārā̍ṇya̱vyayā̍ | hari̱rvāja̍macikradat

||4||

indo̱ vyavya̍marṣasi̱ vi śravā̍ṃsi̱ vi saubha̍gā | vi vājā̍ntsoma̱ goma̍taḥ

||5||

ā na̍ indo śata̱gvina̍ṃ ra̱yiṃ goma̍ntama̱śvina̍m | bharā̍ soma saha̱sriṇa̍m

||6||

pava̍mānāsa̱ inda̍vasti̱raḥ pa̱vitra̍mā̱śava̍: | indra̱ṃ yāme̍bhirāśata

||7||

ka̱ku̱haḥ so̱myo rasa̱ indu̱rindrā̍ya pū̱rvyaḥ | ā̱yuḥ pa̍vata ā̱yave̍

||8||

hi̱nvanti̱ sūra̱musra̍ya̱: pava̍mānaṃ madhu̱ścuta̍m | a̱bhi gi̱rā sama̍svaran

||9||

a̱vi̱tā no̍ a̱jāśva̍: pū̱ṣā yāma̍niyāmani | ā bha̍kṣatka̱nyā̍su naḥ

||10||

a̱yaṃ soma̍: kapa̱rdine̍ ghṛ̱taṃ na pa̍vate̱ madhu̍ | ā bha̍kṣatka̱nyā̍su naḥ

||11||

a̱yaṃ ta̍ āghṛṇe su̱to ghṛ̱taṃ na pa̍vate̱ śuci̍ | ā bha̍kṣatka̱nyā̍su naḥ

||12||

vā̱co ja̱ntuḥ ka̍vī̱nāṃ pava̍sva soma̱ dhāra̍yā | de̱veṣu̍ ratna̱dhā a̍si

||13||

ā ka̱laśe̍ṣu dhāvati śye̱no varma̱ vi gā̍hate | a̱bhi droṇā̱ kani̍kradat

||14||

pari̱ pra so̍ma te̱ raso'sa̍rji ka̱laśe̍ su̱taḥ | śye̱no na ta̱kto a̍rṣati

||15||

pava̍sva soma ma̱ndaya̱nnindrā̍ya̱ madhu̍mattamaḥ

||16||

asṛ̍grande̱vavī̍taye vāja̱yanto̱ rathā̍ iva

||17||

te su̱tāso̍ ma̱dinta̍māḥ śu̱krā vā̱yuma̍sṛkṣata

||18||

grāvṇā̍ tu̱nno a̱bhiṣṭu̍taḥ pa̱vitra̍ṃ soma gacchasi | dadha̍tsto̱tre su̱vīrya̍m

||19||

e̱ṣa tu̱nno a̱bhiṣṭu̍taḥ pa̱vitra̱mati̍ gāhate | ra̱kṣo̱hā vāra̍ma̱vyaya̍m

||20||

yadanti̱ yacca̍ dūra̱ke bha̱yaṃ vi̱ndati̱ māmi̱ha | pava̍māna̱ vi tajja̍hi

||21||

pava̍māna̱: so a̱dya na̍: pa̱vitre̍ṇa̱ vica̍rṣaṇiḥ | yaḥ po̱tā sa pu̍nātu naḥ

||22||

yatte̍ pa̱vitra̍ma̱rciṣyagne̱ vita̍tama̱ntarā | brahma̱ tena̍ punīhi naḥ

||23||

yatte̍ pa̱vitra̍marci̱vadagne̱ tena̍ punīhi naḥ | bra̱hma̱sa̱vaiḥ pu̍nīhi naḥ

||24||

u̱bhābhyā̍ṃ deva savitaḥ pa̱vitre̍ṇa sa̱vena̍ ca | māṃ pu̍nīhi vi̱śvata̍:

||25||

tri̱bhiṣṭvaṃ de̍va savita̱rvarṣi̍ṣṭhaiḥ soma̱ dhāma̍bhiḥ | agne̱ dakṣai̍: punīhi naḥ

||26||

pu̱nantu̱ māṃ de̍vaja̱nāḥ pu̱nantu̱ vasa̍vo dhi̱yā | viśve̍ devāḥ punī̱ta mā̱ jāta̍vedaḥ punī̱hi mā̍

||27||

pra pyā̍yasva̱ pra sya̍ndasva̱ soma̱ viśve̍bhira̱ṃśubhi̍: | de̱vebhya̍ utta̱maṃ ha̱viḥ

||28||

upa̍ pri̱yaṃ pani̍pnata̱ṃ yuvā̍namāhutī̱vṛdha̍m | aga̍nma̱ bibhra̍to̱ nama̍:

||29||

a̱lāyya̍sya para̱śurna̍nāśa̱ tamā pa̍vasva deva soma | ā̱khuṃ ci̍de̱va de̍va soma

||30||

yaḥ pā̍vamā̱nīra̱dhyetyṛṣi̍bhi̱: sambhṛ̍ta̱ṃ rasa̍m | sarva̱ṃ sa pū̱tama̍śnāti svadi̱taṃ mā̍ta̱riśva̍nā

||31||

pā̱va̱mā̱nīryo a̱dhyetyṛṣi̍bhi̱: sambhṛ̍ta̱ṃ rasa̍m | tasmai̱ sara̍svatī duhe kṣī̱raṃ sa̱rpirmadhū̍da̱kam

||32||

pra de̱vamacchā̱ madhu̍manta̱ inda̱vo'si̍ṣyadanta̱ gāva̱ ā na dhe̱nava̍: |

ba̱rhi̱ṣado̍ vaca̱nāva̍nta̱ ūdha̍bhiḥ pari̱sruta̍mu̱sriyā̍ ni̱rṇija̍ṃ dhire

||1||

sa roru̍vada̱bhi pūrvā̍ acikradadupā̱ruha̍: śra̱thaya̍ntsvādate̱ hari̍: |

ti̱raḥ pa̱vitra̍ṃ pari̱yannu̱ru jrayo̱ ni śaryā̍ṇi dadhate de̱va ā vara̍m

||2||

vi yo ma̱me ya̱myā̍ saṃya̱tī mada̍: sāka̱ṃvṛdhā̱ paya̍sā pinva̱dakṣi̍tā |

ma̱hī a̍pā̱re raja̍sī vi̱vevi̍dadabhi̱vraja̱nnakṣi̍ta̱ṃ pāja̱ ā da̍de

||3||

sa mā̱tarā̍ vi̱cara̍nvā̱jaya̍nna̱paḥ pra medhi̍raḥ sva̱dhayā̍ pinvate pa̱dam |

a̱ṃśuryave̍na pipiśe ya̱to nṛbhi̱: saṃ jā̱mibhi̱rnasa̍te̱ rakṣa̍te̱ śira̍:

||4||

saṃ dakṣe̍ṇa̱ mana̍sā jāyate ka̱viṝ̱tasya̱ garbho̱ nihi̍to ya̱mā pa̱raḥ |

yūnā̍ ha̱ santā̍ pratha̱maṃ vi ja̍jñatu̱rguhā̍ hi̱taṃ jani̍ma̱ nema̱mudya̍tam

||5||

ma̱ndrasya̍ rū̱paṃ vi̍vidurmanī̱ṣiṇa̍: śye̱no yadandho̱ abha̍ratparā̱vata̍: |

taṃ ma̍rjayanta su̱vṛdha̍ṃ na̱dīṣvām̐ u̱śanta̍ma̱ṃśuṃ pa̍ri̱yanta̍mṛ̱gmiya̍m

||6||

tvāṃ mṛ̍janti̱ daśa̱ yoṣa̍ṇaḥ su̱taṃ soma̱ ṛṣi̍bhirma̱tibhi̍rdhī̱tibhi̍rhi̱tam |

avyo̱ vāre̍bhiru̱ta de̱vahū̍tibhi̱rnṛbhi̍rya̱to vāja̱mā da̍rṣi sā̱taye̍

||7||

pa̱ri̱pra̱yanta̍ṃ va̱yya̍ṃ suṣa̱ṃsada̱ṃ soma̍ṃ manī̱ṣā a̱bhya̍nūṣata̱ stubha̍: |

yo dhāra̍yā̱ madhu̍mām̐ ū̱rmiṇā̍ di̱va iya̍rti̱ vāca̍ṃ rayi̱ṣāl̤ama̍rtyaḥ

||8||

a̱yaṃ di̱va i̍yarti̱ viśva̱mā raja̱: soma̍: punā̱naḥ ka̱laśe̍ṣu sīdati |

a̱dbhirgobhi̍rmṛjyate̱ adri̍bhiḥ su̱taḥ pu̍nā̱na indu̱rvari̍vo vidatpri̱yam

||9||

e̱vā na̍: soma pariṣi̱cyamā̍no̱ vayo̱ dadha̍cci̱trata̍maṃ pavasva |

a̱dve̱ṣe dyāvā̍pṛthi̱vī hu̍vema̱ devā̍ dha̱tta ra̱yima̱sme su̱vīra̍m

||10||

iṣu̱rna dhanva̱nprati̍ dhīyate ma̱tirva̱tso na mā̱turupa̍ sa̱rjyūdha̍ni |

u̱rudhā̍reva duhe̱ agra̍ āya̱tyasya̍ vra̱teṣvapi̱ soma̍ iṣyate

||1||

upo̍ ma̱tiḥ pṛ̱cyate̍ si̱cyate̱ madhu̍ ma̱ndrāja̍nī codate a̱ntarā̱sani̍ |

pava̍mānaḥ saṃta̱niḥ pra̍ghna̱tāmi̍va̱ madhu̍māndra̱psaḥ pari̱ vāra̍marṣati

||2||

avye̍ vadhū̱yuḥ pa̍vate̱ pari̍ tva̱ci śra̍thnī̱te na̱ptīradi̍teṝ̱taṃ ya̱te |

hari̍rakrānyaja̱taḥ sa̍ṃya̱to mado̍ nṛ̱mṇā śiśā̍no mahi̱ṣo na śo̍bhate

||3||

u̱kṣā mi̍māti̱ prati̍ yanti dhe̱navo̍ de̱vasya̍ de̱vīrupa̍ yanti niṣkṛ̱tam |

atya̍kramī̱darju̍na̱ṃ vāra̍ma̱vyaya̱matka̱ṃ na ni̱ktaṃ pari̱ somo̍ avyata

||4||

amṛ̍ktena̱ ruśa̍tā̱ vāsa̍sā̱ hari̱rama̍rtyo nirṇijā̱naḥ pari̍ vyata |

di̱vaspṛ̱ṣṭhaṃ ba̱rhaṇā̍ ni̱rṇije̍ kṛtopa̱stara̍ṇaṃ ca̱mvo̍rnabha̱smaya̍m

||5||

sūrya̍syeva ra̱śmayo̍ drāvayi̱tnavo̍ matsa̱rāsa̍: pra̱supa̍: sā̱kamī̍rate |

tantu̍ṃ ta̱taṃ pari̱ sargā̍sa ā̱śavo̱ nendrā̍dṛ̱te pa̍vate̱ dhāma̱ kiṃ ca̱na

||6||

sindho̍riva prava̱ṇe ni̱mna ā̱śavo̱ vṛṣa̍cyutā̱ madā̍so gā̱tumā̍śata |

śaṃ no̍ nive̱śe dvi̱pade̱ catu̍ṣpade̱'sme vājā̍: soma tiṣṭhantu kṛ̱ṣṭaya̍:

||7||

ā na̍: pavasva̱ vasu̍ma̱ddhira̍ṇyava̱daśvā̍va̱dgoma̱dyava̍matsu̱vīrya̍m |

yū̱yaṃ hi so̍ma pi̱taro̱ mama̱ sthana̍ di̱vo mū̱rdhāna̱: prasthi̍tā vaya̱skṛta̍:

||8||

e̱te somā̱: pava̍mānāsa̱ indra̱ṃ rathā̍ iva̱ pra ya̍yuḥ sā̱timaccha̍ |

su̱tāḥ pa̱vitra̱mati̍ ya̱ntyavya̍ṃ hi̱tvī va̱vriṃ ha̱rito̍ vṛ̱ṣṭimaccha̍

||9||

inda̱vindrā̍ya bṛha̱te pa̍vasva sumṛl̤ī̱ko a̍nava̱dyo ri̱śādā̍: |

bharā̍ ca̱ndrāṇi̍ gṛṇa̱te vasū̍ni de̱vairdyā̍vāpṛthivī̱ prāva̍taṃ naḥ

||10||

trira̍smai sa̱pta dhe̱navo̍ duduhre sa̱tyāmā̱śira̍ṃ pū̱rvye vyo̍mani |

ca̱tvārya̱nyā bhuva̍nāni ni̱rṇije̱ cārū̍ṇi cakre̱ yadṛ̱tairava̍rdhata

||1||

sa bhikṣa̍māṇo a̱mṛta̍sya̱ cāru̍ṇa u̱bhe dyāvā̱ kāvye̍nā̱ vi śa̍śrathe |

teji̍ṣṭhā a̱po ma̱ṃhanā̱ pari̍ vyata̱ yadī̍ de̱vasya̱ śrava̍sā̱ sado̍ vi̱duḥ

||2||

te a̍sya santu ke̱tavo'mṛ̍tya̱vo'dā̍bhyāso ja̱nuṣī̍ u̱bhe anu̍ |

yebhi̍rnṛ̱mṇā ca̍ de̱vyā̍ ca puna̱ta ādidrājā̍naṃ ma̱nanā̍ agṛbhṇata

||3||

sa mṛ̱jyamā̍no da̱śabhi̍: su̱karma̍bhi̱: pra ma̍dhya̱māsu̍ mā̱tṛṣu̍ pra̱me sacā̍ |

vra̱tāni̍ pā̱no a̱mṛta̍sya̱ cāru̍ṇa u̱bhe nṛ̱cakṣā̱ anu̍ paśyate̱ viśau̍

||4||

sa ma̍rmṛjā̱na i̍ndri̱yāya̱ dhāya̍sa̱ obhe a̱ntā roda̍sī harṣate hi̱taḥ |

vṛṣā̱ śuṣme̍ṇa bādhate̱ vi du̍rma̱tīrā̱dedi̍śānaḥ śarya̱heva̍ śu̱rudha̍:

||5||

sa mā̱tarā̱ na dadṛ̍śāna u̱sriyo̱ nāna̍dadeti ma̱rutā̍miva sva̱naḥ |

jā̱nannṛ̱taṃ pra̍tha̱maṃ yatsva̍rṇara̱ṃ praśa̍staye̱ kama̍vṛṇīta su̱kratu̍:

||6||

ru̱vati̍ bhī̱mo vṛ̍ṣa̱bhasta̍vi̱ṣyayā̱ śṛṅge̱ śiśā̍no̱ hari̍ṇī vicakṣa̱ṇaḥ |

ā yoni̱ṃ soma̱: sukṛ̍ta̱ṃ ni ṣī̍dati ga̱vyayī̱ tvagbha̍vati ni̱rṇiga̱vyayī̍

||7||

śuci̍: punā̱nasta̱nva̍mare̱pasa̱mavye̱ hari̱rnya̍dhāviṣṭa̱ sāna̍vi |

juṣṭo̍ mi̱trāya̱ varu̍ṇāya vā̱yave̍ tri̱dhātu̱ madhu̍ kriyate su̱karma̍bhiḥ

||8||

pava̍sva soma de̱vavī̍taye̱ vṛṣendra̍sya̱ hārdi̍ soma̱dhāna̱mā vi̍śa |

pu̱rā no̍ bā̱dhāddu̍ri̱tāti̍ pāraya kṣetra̱viddhi diśa̱ āhā̍ vipṛccha̱te

||9||

hi̱to na sapti̍ra̱bhi vāja̍ma̱rṣendra̍syendo ja̱ṭhara̱mā pa̍vasva |

nā̱vā na sindhu̱mati̍ parṣi vi̱dvāñchūro̱ na yudhya̱nnava̍ no ni̱daḥ spa̍:

||10||

ā dakṣi̍ṇā sṛjyate śu̱ṣmyā̱3sada̱ṃ veti̍ dru̱ho ra̱kṣasa̍: pāti̱ jāgṛ̍viḥ |

hari̍ropa̱śaṃ kṛ̍ṇute̱ nabha̱spaya̍ upa̱stire̍ ca̱mvo̱3rbrahma̍ ni̱rṇije̍

||1||

pra kṛ̍ṣṭi̱heva̍ śū̱ṣa e̍ti̱ roru̍vadasu̱ryaṃ1 varṇa̱ṃ ni ri̍ṇīte asya̱ tam |

jahā̍ti va̱vriṃ pi̱ture̍ti niṣkṛ̱tamu̍pa̱pruta̍ṃ kṛṇute ni̱rṇija̱ṃ tanā̍

||2||

adri̍bhiḥ su̱taḥ pa̍vate̱ gabha̍styorvṛṣā̱yate̱ nabha̍sā̱ vepa̍te ma̱tī |

sa mo̍date̱ nasa̍te̱ sādha̍te gi̱rā ne̍ni̱kte a̱psu yaja̍te̱ parī̍maṇi

||3||

pari̍ dyu̱kṣaṃ saha̍saḥ parvatā̱vṛdha̱ṃ madhva̍: siñcanti ha̱rmyasya̍ sa̱kṣaṇi̍m |

ā yasmi̱ngāva̍: suhu̱tāda̱ ūdha̍ni mū̱rdhañchrī̱ṇantya̍gri̱yaṃ varī̍mabhiḥ

||4||

samī̱ ratha̱ṃ na bhu̱rijo̍raheṣata̱ daśa̱ svasā̍ro̱ adi̍teru̱pastha̱ ā |

jigā̱dupa̍ jrayati̱ gora̍pī̱cya̍ṃ pa̱daṃ yada̍sya ma̱tuthā̱ ajī̍janan

||5||

śye̱no na yoni̱ṃ sada̍naṃ dhi̱yā kṛ̱taṃ hi̍ra̱ṇyaya̍mā̱sada̍ṃ de̱va eṣa̍ti |

e ri̍ṇanti ba̱rhiṣi̍ pri̱yaṃ gi̱rā'śvo̱ na de̱vām̐ apye̍ti ya̱jñiya̍:

||6||

parā̱ vya̍kto aru̱ṣo di̱vaḥ ka̱virvṛṣā̍ tripṛ̱ṣṭho a̍naviṣṭa̱ gā a̱bhi |

sa̱hasra̍ṇīti̱ryati̍: parā̱yatī̍ re̱bho na pū̱rvīru̱ṣaso̱ vi rā̍jati

||7||

tve̱ṣaṃ rū̱paṃ kṛ̍ṇute̱ varṇo̍ asya̱ sa yatrāśa̍ya̱tsamṛ̍tā̱ sedha̍ti sri̱dhaḥ |

a̱psā yā̍ti sva̱dhayā̱ daivya̱ṃ jana̱ṃ saṃ su̍ṣṭu̱tī nasa̍te̱ saṃ goa̍grayā

||8||

u̱kṣeva̍ yū̱thā pa̍ri̱yanna̍rāvī̱dadhi̱ tviṣī̍radhita̱ sūrya̍sya |

di̱vyaḥ su̍pa̱rṇo'va̍ cakṣata̱ kṣāṃ soma̱: pari̱ kratu̍nā paśyate̱ jāḥ

||9||

hari̍ṃ mṛjantyaru̱ṣo na yu̍jyate̱ saṃ dhe̱nubhi̍: ka̱laśe̱ somo̍ ajyate |

udvāca̍mī̱raya̍ti hi̱nvate̍ ma̱tī pu̍ruṣṭu̱tasya̱ kati̍ citpari̱priya̍:

||1||

sā̱kaṃ va̍danti ba̱havo̍ manī̱ṣiṇa̱ indra̍sya̱ soma̍ṃ ja̱ṭhare̱ yadā̍du̱huḥ |

yadī̍ mṛ̱janti̱ suga̍bhastayo̱ nara̱: sanī̍l̤ābhirda̱śabhi̱: kāmya̱ṃ madhu̍

||2||

ara̍mamāṇo̱ atye̍ti̱ gā a̱bhi sūrya̍sya pri̱yaṃ du̍hi̱tusti̱ro rava̍m |

anva̍smai̱ joṣa̍mabharadvinaṃgṛ̱saḥ saṃ dva̱yībhi̱: svasṛ̍bhiḥ kṣeti jā̱mibhi̍:

||3||

nṛdhū̍to̱ adri̍ṣuto ba̱rhiṣi̍ pri̱yaḥ pati̱rgavā̍ṃ pra̱diva̱ indu̍ṝ̱tviya̍: |

pura̍ṃdhivā̱nmanu̍ṣo yajña̱sādha̍na̱: śuci̍rdhi̱yā pa̍vate̱ soma̍ indra te

||4||

nṛbā̱hubhyā̍ṃ codi̱to dhāra̍yā su̱to̍'nuṣva̱dhaṃ pa̍vate̱ soma̍ indra te |

āprā̱: kratū̱ntsama̍jairadhva̱re ma̱tīrverna dru̱ṣacca̱mvo̱3rāsa̍da̱ddhari̍:

||5||

a̱ṃśuṃ du̍hanti sta̱naya̍nta̱makṣi̍taṃ ka̱viṃ ka̱vayo̱'paso̍ manī̱ṣiṇa̍: |

samī̱ gāvo̍ ma̱tayo̍ yanti sa̱ṃyata̍ ṛ̱tasya̱ yonā̱ sada̍ne puna̱rbhuva̍:

||6||

nābhā̍ pṛthi̱vyā dha̱ruṇo̍ ma̱ho di̱vo̱3'pāmū̱rmau sindhu̍ṣva̱ntaru̍kṣi̱taḥ |

indra̍sya̱ vajro̍ vṛṣa̱bho vi̱bhūva̍su̱: somo̍ hṛ̱de pa̍vate̱ cāru̍ matsa̱raḥ

||7||

sa tū pa̍vasva̱ pari̱ pārthi̍va̱ṃ raja̍: sto̱tre śikṣa̍nnādhūnva̱te ca̍ sukrato |

mā no̱ nirbhā̱gvasu̍naḥ sādana̱spṛśo̍ ra̱yiṃ pi̱śaṅga̍ṃ bahu̱laṃ va̍sīmahi

||8||

ā tū na̍ indo śa̱tadā̱tvaśvya̍ṃ sa̱hasra̍dātu paśu̱maddhira̍ṇyavat |

upa̍ māsva bṛha̱tī re̱vatī̱riṣo'dhi̍ sto̱trasya̍ pavamāna no gahi

||9||

srakve̍ dra̱psasya̱ dhama̍ta̱: sama̍svarannṛ̱tasya̱ yonā̱ sama̍ranta̱ nābha̍yaḥ |

trīntsa mū̱rdhno asu̍raścakra ā̱rabhe̍ sa̱tyasya̱ nāva̍: su̱kṛta̍mapīparan

||1||

sa̱myaksa̱myañco̍ mahi̱ṣā a̍heṣata̱ sindho̍rū̱rmāvadhi̍ ve̱nā a̍vīvipan |

madho̱rdhārā̍bhirja̱naya̍nto a̱rkamitpri̱yāmindra̍sya ta̱nva̍mavīvṛdhan

||2||

pa̱vitra̍vanta̱: pari̱ vāca̍māsate pi̱taiṣā̍ṃ pra̱tno a̱bhi ra̍kṣati vra̱tam |

ma̱haḥ sa̍mu̱draṃ varu̍ṇasti̱ro da̍dhe̱ dhīrā̱ icche̍kurdha̱ruṇe̍ṣvā̱rabha̍m

||3||

sa̱hasra̍dhā̱re'va̱ te sama̍svarandi̱vo nāke̱ madhu̍jihvā asa̱ścata̍: |

asya̱ spaśo̱ na ni mi̍ṣanti̱ bhūrṇa̍yaḥ pa̱depa̍de pā̱śina̍: santi̱ seta̍vaḥ

||4||

pi̱turmā̱turadhyā ye sa̱masva̍rannṛ̱cā śoca̍ntaḥ sa̱ṃdaha̍nto avra̱tān |

indra̍dviṣṭā̱mapa̍ dhamanti mā̱yayā̱ tvaca̱masi̍knī̱ṃ bhūma̍no di̱vaspari̍

||5||

pra̱tnānmānā̱dadhyā ye sa̱masva̍ra̱ñchloka̍yantrāso rabha̱sasya̱ manta̍vaḥ |

apā̍na̱kṣāso̍ badhi̱rā a̍hāsata ṛ̱tasya̱ panthā̱ṃ na ta̍ranti du̱ṣkṛta̍:

||6||

sa̱hasra̍dhāre̱ vita̍te pa̱vitra̱ ā vāca̍ṃ punanti ka̱vayo̍ manī̱ṣiṇa̍: |

ru̱drāsa̍ eṣāmiṣi̱rāso̍ a̱druha̱: spaśa̱: svañca̍: su̱dṛśo̍ nṛ̱cakṣa̍saḥ

||7||

ṛ̱tasya̍ go̱pā na dabhā̍ya su̱kratu̱strī ṣa pa̱vitrā̍ hṛ̱dya1ntarā da̍dhe |

vi̱dvāntsa viśvā̱ bhuva̍nā̱bhi pa̍śya̱tyavāju̍ṣṭānvidhyati ka̱rte a̍vra̱tān

||8||

ṛ̱tasya̱ tantu̱rvita̍taḥ pa̱vitra̱ ā ji̱hvāyā̱ agre̱ varu̍ṇasya mā̱yayā̍ |

dhīrā̍ści̱ttatsa̱mina̍kṣanta āśa̱tā'trā̍ ka̱rtamava̍ padā̱tyapra̍bhuḥ

||9||

śiśu̱rna jā̱to'va̍ cakrada̱dvane̱ sva1ryadvā̱jya̍ru̱ṣaḥ siṣā̍sati |

di̱vo reta̍sā sacate payo̱vṛdhā̱ tamī̍mahe suma̱tī śarma̍ sa̱pratha̍:

||1||

di̱vo yaḥ ska̱mbho dha̱ruṇa̱: svā̍tata̱ āpū̍rṇo a̱ṃśuḥ pa̱ryeti̍ vi̱śvata̍: |

seme ma̱hī roda̍sī yakṣadā̱vṛtā̍ samīcī̱ne dā̍dhāra̱ samiṣa̍: ka̱viḥ

||2||

mahi̱ psara̱: sukṛ̍taṃ so̱myaṃ madhū̱rvī gavyū̍ti̱radi̍teṝ̱taṃ ya̱te |

īśe̱ yo vṛ̱ṣṭeri̱ta u̱sriyo̱ vṛṣā̱'pāṃ ne̱tā ya i̱taū̍tiṝ̱gmiya̍:

||3||

ā̱tma̱nvannabho̍ duhyate ghṛ̱taṃ paya̍ ṛ̱tasya̱ nābhi̍ra̱mṛta̱ṃ vi jā̍yate |

sa̱mī̱cī̱nāḥ su̱dāna̍vaḥ prīṇanti̱ taṃ naro̍ hi̱tamava̍ mehanti̱ pera̍vaḥ

||4||

arā̍vīda̱ṃśuḥ saca̍māna ū̱rmiṇā̍ devā̱vyaṃ1 manu̍ṣe pinvati̱ tvaca̍m |

dadhā̍ti̱ garbha̱madi̍teru̱pastha̱ ā yena̍ to̱kaṃ ca̱ tana̍yaṃ ca̱ dhāma̍he

||5||

sa̱hasra̍dhā̱re'va̱ tā a̍sa̱ścata̍stṛ̱tīye̍ santu̱ raja̍si pra̱jāva̍tīḥ |

cata̍sro̱ nābho̱ nihi̍tā a̱vo di̱vo ha̱virbha̍rantya̱mṛta̍ṃ ghṛta̱ścuta̍:

||6||

śve̱taṃ rū̱paṃ kṛ̍ṇute̱ yatsiṣā̍sati̱ somo̍ mī̱ḍhvām̐ asu̍ro veda̱ bhūma̍naḥ |

dhi̱yā śamī̍ sacate̱ sema̱bhi pra̱vaddi̱vaskava̍ndha̱mava̍ darṣadu̱driṇa̍m

||7||

adha̍ śve̱taṃ ka̱laśa̱ṃ gobhi̍ra̱ktaṃ kārṣma̱nnā vā̱jya̍kramītsasa̱vān |

ā hi̍nvire̱ mana̍sā deva̱yanta̍: ka̱kṣīva̍te śa̱tahi̍māya̱ gonā̍m

||8||

a̱dbhiḥ so̍ma papṛcā̱nasya̍ te̱ raso'vyo̱ vāra̱ṃ vi pa̍vamāna dhāvati |

sa mṛ̱jyamā̍naḥ ka̱vibhi̍rmadintama̱ svada̱svendrā̍ya pavamāna pī̱taye̍

||9||

a̱bhi pri̱yāṇi̍ pavate̱ cano̍hito̱ nāmā̍ni ya̱hvo adhi̱ yeṣu̱ vardha̍te |

ā sūrya̍sya bṛha̱to bṛ̱hannadhi̱ ratha̱ṃ viṣva̍ñcamaruhadvicakṣa̱ṇaḥ

||1||

ṛ̱tasya̍ ji̱hvā pa̍vate̱ madhu̍ pri̱yaṃ va̱ktā pati̍rdhi̱yo a̱syā adā̍bhyaḥ |

dadhā̍ti pu̱traḥ pi̱trora̍pī̱cyaṃ1 nāma̍ tṛ̱tīya̱madhi̍ roca̱ne di̱vaḥ

||2||

ava̍ dyutā̱naḥ ka̱laśā̍m̐ acikrada̱nnṛbhi̍ryemā̱naḥ kośa̱ ā hi̍ra̱ṇyaye̍ |

a̱bhīmṛ̱tasya̍ do̱hanā̍ anūṣa̱tā'dhi̍ tripṛ̱ṣṭha u̱ṣaso̱ vi rā̍jati

||3||

adri̍bhiḥ su̱to ma̱tibhi̱ścano̍hitaḥ praro̱caya̱nroda̍sī mā̱tarā̱ śuci̍: |

romā̱ṇyavyā̍ sa̱mayā̱ vi dhā̍vati̱ madho̱rdhārā̱ pinva̍mānā di̱vedi̍ve

||4||

pari̍ soma̱ pra dha̍nvā sva̱staye̱ nṛbhi̍: punā̱no a̱bhi vā̍sayā̱śira̍m |

ye te̱ madā̍ āha̱naso̱ vihā̍yasa̱stebhi̱rindra̍ṃ codaya̱ dāta̍ve ma̱gham

||5||

dha̱rtā di̱vaḥ pa̍vate̱ kṛtvyo̱ raso̱ dakṣo̍ de̱vānā̍manu̱mādyo̱ nṛbhi̍: |

hari̍: sṛjā̱no atyo̱ na satva̍bhi̱rvṛthā̱ pājā̍ṃsi kṛṇute na̱dīṣvā

||1||

śūro̱ na dha̍tta̱ āyu̍dhā̱ gabha̍styo̱: sva1: siṣā̍sanrathi̱ro gavi̍ṣṭiṣu |

indra̍sya̱ śuṣma̍mī̱raya̍nnapa̱syubhi̱rindu̍rhinvā̱no a̍jyate manī̱ṣibhi̍:

||2||

indra̍sya soma̱ pava̍māna ū̱rmiṇā̍ tavi̱ṣyamā̍ṇo ja̱ṭhare̱ṣvā vi̍śa |

pra ṇa̍: pinva vi̱dyuda̱bhreva̱ roda̍sī dhi̱yā na vājā̱m̐ upa̍ māsi̱ śaśva̍taḥ

||3||

viśva̍sya̱ rājā̍ pavate sva̱rdṛśa̍ ṛ̱tasya̍ dhī̱timṛ̍ṣi̱ṣāl̤a̍vīvaśat |

yaḥ sūrya̱syāsi̍reṇa mṛ̱jyate̍ pi̱tā ma̍tī̱nāmasa̍maṣṭakāvyaḥ

||4||

vṛṣe̍va yū̱thā pari̱ kośa̍marṣasya̱pāmu̱pasthe̍ vṛṣa̱bhaḥ kani̍kradat |

sa indrā̍ya pavase matsa̱rinta̍mo̱ yathā̱ jeṣā̍ma sami̱the tvota̍yaḥ

||5||

e̱ṣa pra kośe̱ madhu̍mām̐ acikrada̱dindra̍sya̱ vajro̱ vapu̍ṣo̱ vapu̍ṣṭaraḥ |

a̱bhīmṛ̱tasya̍ su̱dughā̍ ghṛta̱ścuto̍ vā̱śrā a̍rṣanti̱ paya̍seva dhe̱nava̍:

||1||

sa pū̱rvyaḥ pa̍vate̱ yaṃ di̱vaspari̍ śye̱no ma̍thā̱yadi̍ṣi̱tasti̱ro raja̍: |

sa madhva̱ ā yu̍vate̱ vevi̍jāna̱ itkṛ̱śāno̱rastu̱rmana̱sāha̍ bi̱bhyuṣā̍

||2||

te na̱: pūrvā̍sa̱ upa̍rāsa̱ inda̍vo ma̱he vājā̍ya dhanvantu̱ goma̍te |

ī̱kṣe̱ṇyā̍so a̱hyo̱3 na cāra̍vo̱ brahma̍brahma̱ ye ju̍ju̱ṣurha̱virha̍viḥ

||3||

a̱yaṃ no̍ vi̱dvānva̍navadvanuṣya̱ta indu̍: sa̱trācā̱ mana̍sā puruṣṭu̱taḥ |

i̱nasya̱ yaḥ sada̍ne̱ garbha̍māda̱dhe gavā̍muru̱bjama̱bhyarṣa̍ti vra̱jam

||4||

cakri̍rdi̱vaḥ pa̍vate̱ kṛtvyo̱ raso̍ ma̱hām̐ ada̍bdho̱ varu̍ṇo hu̱rugya̱te |

asā̍vi mi̱tro vṛ̱jane̍ṣu ya̱jñiyo'tyo̱ na yū̱the vṛ̍ṣa̱yuḥ kani̍kradat

||5||

pra rājā̱ vāca̍ṃ ja̱naya̍nnasiṣyadada̱po vasā̍no a̱bhi gā i̍yakṣati |

gṛ̱bhṇāti̍ ri̱pramavi̍rasya̱ tānvā̍ śu̱ddho de̱vānā̱mupa̍ yāti niṣkṛ̱tam

||1||

indrā̍ya soma̱ pari̍ ṣicyase̱ nṛbhi̍rnṛ̱cakṣā̍ ū̱rmiḥ ka̱vira̍jyase̱ vane̍ |

pū̱rvīrhi te̍ sru̱taya̱: santi̱ yāta̍ve sa̱hasra̱maśvā̱ hara̍yaścamū̱ṣada̍:

||2||

sa̱mu̱driyā̍ apsa̱raso̍ manī̱ṣiṇa̱māsī̍nā a̱ntara̱bhi soma̍makṣaran |

tā ī̍ṃ hinvanti ha̱rmyasya̍ sa̱kṣaṇi̱ṃ yāca̍nte su̱mnaṃ pava̍māna̱makṣi̍tam

||3||

go̱jinna̱: somo̍ ratha̱jiddhi̍raṇya̱jitsva̱rjida̱bjitpa̍vate sahasra̱jit |

yaṃ de̱vāsa̍ścakri̱re pī̱taye̱ mada̱ṃ svādi̍ṣṭhaṃ dra̱psama̍ru̱ṇaṃ ma̍yo̱bhuva̍m

||4||

e̱tāni̍ soma̱ pava̍māno asma̱yuḥ sa̱tyāni̍ kṛ̱ṇvandravi̍ṇānyarṣasi |

ja̱hi śatru̍manti̱ke dū̍ra̱ke ca̱ ya u̱rvīṃ gavyū̍ti̱mabha̍yaṃ ca naskṛdhi

||5||

a̱co̱daso̍ no dhanva̱ntvinda̍va̱: pra su̍vā̱nāso̍ bṛ̱haddi̍veṣu̱ hara̍yaḥ |

vi ca̱ naśa̍nna i̱ṣo arā̍tayo̱'ryo na̍śanta̱ sani̍ṣanta no̱ dhiya̍:

||1||

pra ṇo̍ dhanva̱ntvinda̍vo mada̱cyuto̱ dhanā̍ vā̱ yebhi̱rarva̍to junī̱masi̍ |

ti̱ro marta̍sya̱ kasya̍ ci̱tpari̍hvṛtiṃ va̱yaṃ dhanā̍ni vi̱śvadhā̍ bharemahi

||2||

u̱ta svasyā̱ arā̍tyā a̱rirhi ṣa u̱tānyasyā̱ arā̍tyā̱ vṛko̱ hi ṣaḥ |

dhanva̱nna tṛṣṇā̱ sama̍rīta̱ tām̐ a̱bhi soma̍ ja̱hi pa̍vamāna durā̱dhya̍:

||3||

di̱vi te̱ nābhā̍ para̱mo ya ā̍da̱de pṛ̍thi̱vyāste̍ ruruhu̱: sāna̍vi̱ kṣipa̍: |

adra̍yastvā bapsati̱ goradhi̍ tva̱cya1psu tvā̱ hastai̍rduduhurmanī̱ṣiṇa̍:

||4||

e̱vā ta̍ indo su̱bhva̍ṃ su̱peśa̍sa̱ṃ rasa̍ṃ tuñjanti pratha̱mā a̍bhi̱śriya̍: |

nida̍ṃnidaṃ pavamāna̱ ni tā̍riṣa ā̱viste̱ śuṣmo̍ bhavatu pri̱yo mada̍:

||5||

soma̍sya̱ dhārā̍ pavate nṛ̱cakṣa̍sa ṛ̱tena̍ de̱vānha̍vate di̱vaspari̍ |

bṛha̱spate̍ ra̱vathe̍nā̱ vi di̍dyute samu̱drāso̱ na sava̍nāni vivyacuḥ

||1||

yaṃ tvā̍ vājinna̱ghnyā a̱bhyanū̍ṣa̱tā'yo̍hata̱ṃ yoni̱mā ro̍hasi dyu̱mān |

ma̱ghonā̱māyu̍: prati̱ranmahi̱ śrava̱ indrā̍ya soma pavase̱ vṛṣā̱ mada̍:

||2||

endra̍sya ku̱kṣā pa̍vate ma̱dinta̍ma̱ ūrja̱ṃ vasā̍na̱: śrava̍se suma̱ṅgala̍: |

pra̱tyaṅsa viśvā̱ bhuva̍nā̱bhi pa̍prathe̱ krīl̤a̱nhari̱ratya̍: syandate̱ vṛṣā̍

||3||

taṃ tvā̍ de̱vebhyo̱ madhu̍mattama̱ṃ nara̍: sa̱hasra̍dhāraṃ duhate̱ daśa̱ kṣipa̍: |

nṛbhi̍: soma̱ pracyu̍to̱ grāva̍bhiḥ su̱to viśvā̍nde̱vām̐ ā pa̍vasvā sahasrajit

||4||

taṃ tvā̍ ha̱stino̱ madhu̍manta̱madri̍bhirdu̱hantya̱psu vṛ̍ṣa̱bhaṃ daśa̱ kṣipa̍: |

indra̍ṃ soma mā̱daya̱ndaivya̱ṃ jana̱ṃ sindho̍rivo̱rmiḥ pava̍māno arṣasi

||5||

pra soma̍sya̱ pava̍mānasyo̱rmaya̱ indra̍sya yanti ja̱ṭhara̍ṃ su̱peśa̍saḥ |

da̱dhnā yadī̱munnī̍tā ya̱śasā̱ gavā̍ṃ dā̱nāya̱ śūra̍mu̱dama̍ndiṣuḥ su̱tāḥ

||1||

acchā̱ hi soma̍: ka̱laśā̱m̐ asi̍ṣyada̱datyo̱ na vol̤hā̍ ra̱ghuva̍rtani̱rvṛṣā̍ |

athā̍ de̱vānā̍mu̱bhaya̍sya̱ janma̍no vi̱dvām̐ a̍śnotya̱muta̍ i̱taśca̱ yat

||2||

ā na̍: soma̱ pava̍mānaḥ kirā̱ vasvindo̱ bhava̍ ma̱ghavā̱ rādha̍so ma̱haḥ |

śikṣā̍ vayodho̱ vasa̍ve̱ su ce̱tunā̱ mā no̱ gaya̍mā̱re a̱smatparā̍ sicaḥ

||3||

ā na̍: pū̱ṣā pava̍mānaḥ surā̱tayo̍ mi̱tro ga̍cchantu̱ varu̍ṇaḥ sa̱joṣa̍saḥ |

bṛha̱spati̍rma̱ruto̍ vā̱yura̱śvinā̱ tvaṣṭā̍ savi̱tā su̱yamā̱ sara̍svatī

||4||

u̱bhe dyāvā̍pṛthi̱vī vi̍śvami̱nve a̍rya̱mā de̱vo adi̍tirvidhā̱tā |

bhago̱ nṛśaṃsa̍ u̱rva1ntari̍kṣa̱ṃ viśve̍ de̱vāḥ pava̍mānaṃ juṣanta

||5||

asā̍vi̱ somo̍ aru̱ṣo vṛṣā̱ harī̱ rāje̍va da̱smo a̱bhi gā a̍cikradat |

pu̱nā̱no vāra̱ṃ parye̍tya̱vyaya̍ṃ śye̱no na yoni̍ṃ ghṛ̱tava̍ntamā̱sada̍m

||1||

ka̱virve̍dha̱syā parye̍ṣi̱ māhi̍na̱matyo̱ na mṛ̱ṣṭo a̱bhi vāja̍marṣasi |

a̱pa̱sedha̍nduri̱tā so̍ma mṛl̤aya ghṛ̱taṃ vasā̍na̱: pari̍ yāsi ni̱rṇija̍m

||2||

pa̱rjanya̍: pi̱tā ma̍hi̱ṣasya̍ pa̱rṇino̱ nābhā̍ pṛthi̱vyā gi̱riṣu̱ kṣaya̍ṃ dadhe |

svasā̍ra̱ āpo̍ a̱bhi gā u̱tāsa̍ra̱ntsaṃ grāva̍bhirnasate vī̱te a̍dhva̱re

||3||

jā̱yeva̱ patyā̱vadhi̱ śeva̍ maṃhase̱ pajrā̍yā garbha śṛṇu̱hi bravī̍mi te |

a̱ntarvāṇī̍ṣu̱ pra ca̍rā̱ su jī̱vase̍'ni̱ndyo vṛ̱jane̍ soma jāgṛhi

||4||

yathā̱ pūrve̍bhyaḥ śata̱sā amṛ̍dhraḥ sahasra̱sāḥ pa̱ryayā̱ vāja̍mindo |

e̱vā pa̍vasva suvi̱tāya̱ navya̍se̱ tava̍ vra̱tamanvāpa̍: sacante

||5||

pa̱vitra̍ṃ te̱ vita̍taṃ brahmaṇaspate pra̱bhurgātrā̍ṇi̱ parye̍ṣi vi̱śvata̍: |

ata̍ptatanū̱rna tadā̱mo a̍śnute śṛ̱tāsa̱ idvaha̍nta̱statsamā̍śata

||1||

tapo̍ṣpa̱vitra̱ṃ vita̍taṃ di̱vaspa̱de śoca̍nto asya̱ tanta̍vo̱ vya̍sthiran |

ava̍ntyasya pavī̱tāra̍mā̱śavo̍ di̱vaspṛ̱ṣṭhamadhi̍ tiṣṭhanti̱ ceta̍sā

||2||

arū̍rucadu̱ṣasa̱: pṛśni̍ragri̱ya u̱kṣā bi̍bharti̱ bhuva̍nāni vāja̱yuḥ |

mā̱yā̱vino̍ mamire asya mā̱yayā̍ nṛ̱cakṣa̍saḥ pi̱taro̱ garbha̱mā da̍dhuḥ

||3||

ga̱ndha̱rva i̱tthā pa̱dama̍sya rakṣati̱ pāti̍ de̱vānā̱ṃ jani̍mā̱nyadbhu̍taḥ |

gṛ̱bhṇāti̍ ri̱puṃ ni̱dhayā̍ ni̱dhāpa̍tiḥ su̱kṛtta̍mā̱ madhu̍no bha̱kṣamā̍śata

||4||

ha̱virha̍viṣmo̱ mahi̱ sadma̱ daivya̱ṃ nabho̱ vasā̍na̱: pari̍ yāsyadhva̱ram |

rājā̍ pa̱vitra̍ratho̱ vāja̱māru̍haḥ sa̱hasra̍bhṛṣṭirjayasi̱ śravo̍ bṛ̱hat

||5||

pava̍sva deva̱māda̍no̱ vica̍rṣaṇira̱psā indrā̍ya̱ varu̍ṇāya vā̱yave̍ |

kṛ̱dhī no̍ a̱dya vari̍vaḥ svasti̱madu̍rukṣi̱tau gṛ̍ṇīhi̱ daivya̱ṃ jana̍m

||1||

ā yasta̱sthau bhuva̍nā̱nyama̍rtyo̱ viśvā̍ni̱ soma̱: pari̱ tānya̍rṣati |

kṛ̱ṇvantsa̱ṃcṛta̍ṃ vi̱cṛta̍ma̱bhiṣṭa̍ya̱ indu̍: siṣaktyu̱ṣasa̱ṃ na sūrya̍:

||2||

ā yo gobhi̍: sṛ̱jyata̱ oṣa̍dhī̱ṣvā de̱vānā̍ṃ su̱mna i̱ṣaya̱nnupā̍vasuḥ |

ā vi̱dyutā̍ pavate̱ dhāra̍yā su̱ta indra̱ṃ somo̍ mā̱daya̱ndaivya̱ṃ jana̍m

||3||

e̱ṣa sya soma̍: pavate sahasra̱jiddhi̍nvā̱no vāca̍miṣi̱rāmu̍ṣa̱rbudha̍m |

indu̍: samu̱dramudi̍yarti vā̱yubhi̱rendra̍sya̱ hārdi̍ ka̱laśe̍ṣu sīdati

||4||

a̱bhi tyaṃ gāva̱: paya̍sā payo̱vṛdha̱ṃ soma̍ṃ śrīṇanti ma̱tibhi̍: sva̱rvida̍m |

dha̱na̱ṃja̱yaḥ pa̍vate̱ kṛtvyo̱ raso̱ vipra̍: ka̱viḥ kāvye̍nā̱ sva̍rcanāḥ

||5||

indrā̍ya soma̱ suṣu̍ta̱: pari̍ sra̱vā'pāmī̍vā bhavatu̱ rakṣa̍sā sa̱ha |

mā te̱ rasa̍sya matsata dvayā̱vino̱ dravi̍ṇasvanta i̱ha sa̱ntvinda̍vaḥ

||1||

a̱smāntsa̍ma̱rye pa̍vamāna codaya̱ dakṣo̍ de̱vānā̱masi̱ hi pri̱yo mada̍: |

ja̱hi śatrū̍m̐ra̱bhyā bha̍ndanāya̱taḥ pibe̍ndra̱ soma̱mava̍ no̱ mṛdho̍ jahi

||2||

ada̍bdha indo pavase ma̱dinta̍ma ā̱tmendra̍sya bhavasi dhā̱siru̍tta̱maḥ |

a̱bhi sva̍ranti ba̱havo̍ manī̱ṣiṇo̱ rājā̍nama̱sya bhuva̍nasya niṃsate

||3||

sa̱hasra̍ṇīthaḥ śa̱tadhā̍ro̱ adbhu̍ta̱ indrā̱yendu̍: pavate̱ kāmya̱ṃ madhu̍ |

jaya̱nkṣetra̍ma̱bhya̍rṣā̱ jaya̍nna̱pa u̱ruṃ no̍ gā̱tuṃ kṛ̍ṇu soma mīḍhvaḥ

||4||

kani̍kradatka̱laśe̱ gobhi̍rajyase̱ vya1vyaya̍ṃ sa̱mayā̱ vāra̍marṣasi |

ma̱rmṛ̱jyamā̍no̱ atyo̱ na sā̍na̱sirindra̍sya soma ja̱ṭhare̱ sama̍kṣaraḥ

||5||

svā̱duḥ pa̍vasva di̱vyāya̱ janma̍ne svā̱durindrā̍ya su̱havī̍tunāmne |

svā̱durmi̱trāya̱ varu̍ṇāya vā̱yave̱ bṛha̱spata̍ye̱ madhu̍mā̱m̐ adā̍bhyaḥ

||6||

atya̍ṃ mṛjanti ka̱laśe̱ daśa̱ kṣipa̱: pra viprā̍ṇāṃ ma̱tayo̱ vāca̍ īrate |

pava̍mānā a̱bhya̍rṣanti suṣṭu̱timendra̍ṃ viśanti madi̱rāsa̱ inda̍vaḥ

||7||

pava̍māno a̱bhya̍rṣā su̱vīrya̍mu̱rvīṃ gavyū̍ti̱ṃ mahi̱ śarma̍ sa̱pratha̍: |

māki̍rno a̱sya pari̍ṣūtirīśa̱tendo̱ jaye̍ma̱ tvayā̱ dhana̍ṃdhanam

||8||

adhi̱ dyāma̍sthādvṛṣa̱bho vi̍cakṣa̱ṇo'rū̍ruca̱dvi di̱vo ro̍ca̱nā ka̱viḥ |

rājā̍ pa̱vitra̱matye̍ti̱ roru̍vaddi̱vaḥ pī̱yūṣa̍ṃ duhate nṛ̱cakṣa̍saḥ

||9||

di̱vo nāke̱ madhu̍jihvā asa̱ścato̍ ve̱nā du̍hantyu̱kṣaṇa̍ṃ giri̱ṣṭhām |

a̱psu dra̱psaṃ vā̍vṛdhā̱naṃ sa̍mu̱dra ā sindho̍rū̱rmā madhu̍mantaṃ pa̱vitra̱ ā

||10||

nāke̍ supa̱rṇamu̍papapti̱vāṃsa̱ṃ giro̍ ve̱nānā̍makṛpanta pū̱rvīḥ |

śiśu̍ṃ rihanti ma̱taya̱: pani̍pnataṃ hira̱ṇyaya̍ṃ śaku̱naṃ kṣāma̍ṇi̱ sthām

||11||

ū̱rdhvo ga̍ndha̱rvo adhi̱ nāke̍ asthā̱dviśvā̍ rū̱pā pra̍ti̱cakṣā̍ṇo asya |

bhā̱nuḥ śu̱kreṇa̍ śo̱ciṣā̱ vya̍dyau̱tprārū̍ruca̱droda̍sī mā̱tarā̱ śuci̍:

||12||

pra ta̍ ā̱śava̍: pavamāna dhī̱javo̱ madā̍ arṣanti raghu̱jā i̍va̱ tmanā̍ |

di̱vyāḥ su̍pa̱rṇā madhu̍manta̱ inda̍vo ma̱dinta̍māsa̱: pari̱ kośa̍māsate

||1||

pra te̱ madā̍so madi̱rāsa̍ ā̱śavo'sṛ̍kṣata̱ rathyā̍so̱ yathā̱ pṛtha̍k |

dhe̱nurna va̱tsaṃ paya̍sā̱bhi va̱jriṇa̱mindra̱minda̍vo̱ madhu̍manta ū̱rmaya̍:

||2||

atyo̱ na hi̍yā̱no a̱bhi vāja̍marṣa sva̱rvitkośa̍ṃ di̱vo adri̍mātaram |

vṛṣā̍ pa̱vitre̱ adhi̱ sāno̍ a̱vyaye̱ soma̍: punā̱na i̍ndri̱yāya̱ dhāya̍se

||3||

pra ta̱ āśvi̍nīḥ pavamāna dhī̱juvo̍ di̱vyā a̍sṛgra̱npaya̍sā̱ dharī̍maṇi |

prāntaṝṣa̍ya̱: sthāvi̍rīrasṛkṣata̱ ye tvā̍ mṛ̱jantyṛ̍ṣiṣāṇa ve̱dhasa̍:

||4||

viśvā̱ dhāmā̍ni viśvacakṣa̱ ṛbhva̍saḥ pra̱bhoste̍ sa̱taḥ pari̍ yanti ke̱tava̍: |

vyā̱na̱śiḥ pa̍vase soma̱ dharma̍bhi̱: pati̱rviśva̍sya̱ bhuva̍nasya rājasi

||5||

u̱bha̱yata̱: pava̍mānasya ra̱śmayo̍ dhru̱vasya̍ sa̱taḥ pari̍ yanti ke̱tava̍: |

yadī̍ pa̱vitre̱ adhi̍ mṛ̱jyate̱ hari̱: sattā̱ ni yonā̍ ka̱laśe̍ṣu sīdati

||6||

ya̱jñasya̍ ke̱tuḥ pa̍vate svadhva̱raḥ somo̍ de̱vānā̱mupa̍ yāti niṣkṛ̱tam |

sa̱hasra̍dhāra̱: pari̱ kośa̍marṣati̱ vṛṣā̍ pa̱vitra̱matye̍ti̱ roru̍vat

||7||

rājā̍ samu̱draṃ na̱dyo̱3 vi gā̍hate̱'pāmū̱rmiṃ sa̍cate̱ sindhu̍ṣu śri̱taḥ |

adhya̍sthā̱tsānu̱ pava̍māno a̱vyaya̱ṃ nābhā̍ pṛthi̱vyā dha̱ruṇo̍ ma̱ho di̱vaḥ

||8||

di̱vo na sānu̍ sta̱naya̍nnacikrada̱ddyauśca̱ yasya̍ pṛthi̱vī ca̱ dharma̍bhiḥ |

indra̍sya sa̱khyaṃ pa̍vate vi̱vevi̍da̱tsoma̍: punā̱naḥ ka̱laśe̍ṣu sīdati

||9||

jyoti̍rya̱jñasya̍ pavate̱ madhu̍ pri̱yaṃ pi̱tā de̱vānā̍ṃ jani̱tā vi̱bhūva̍suḥ |

dadhā̍ti̱ ratna̍ṃ sva̱dhayo̍rapī̱cya̍ṃ ma̱dinta̍mo matsa̱ra i̍ndri̱yo rasa̍:

||10||

a̱bhi̱kranda̍nka̱laśa̍ṃ vā̱jya̍rṣati̱ pati̍rdi̱vaḥ śa̱tadhā̍ro vicakṣa̱ṇaḥ |

hari̍rmi̱trasya̱ sada̍neṣu sīdati marmṛjā̱no'vi̍bhi̱: sindhu̍bhi̱rvṛṣā̍

||11||

agre̱ sindhū̍nā̱ṃ pava̍māno arṣa̱tyagre̍ vā̱co a̍gri̱yo goṣu̍ gacchati |

agre̱ vāja̍sya bhajate mahādha̱naṃ svā̍yu̱dhaḥ so̱tṛbhi̍: pūyate̱ vṛṣā̍

||12||

a̱yaṃ ma̱tavā̍ñchaku̱no yathā̍ hi̱to'vye̍ sasāra̱ pava̍māna ū̱rmiṇā̍ |

tava̱ kratvā̱ roda̍sī anta̱rā ka̍ve̱ śuci̍rdhi̱yā pa̍vate̱ soma̍ indra te

||13||

drā̱piṃ vasā̍no yaja̱to di̍vi̱spṛśa̍mantarikṣa̱prā bhuva̍ne̱ṣvarpi̍taḥ |

sva̍rjajñā̱no nabha̍sā̱bhya̍kramītpra̱tnama̍sya pi̱tara̱mā vi̍vāsati

||14||

so a̍sya vi̱śe mahi̱ śarma̍ yacchati̱ yo a̍sya̱ dhāma̍ pratha̱maṃ vyā̍na̱śe |

pa̱daṃ yada̍sya para̱me vyo̍ma̱nyato̱ viśvā̍ a̱bhi saṃ yā̍ti sa̱ṃyata̍:

||15||

pro a̍yāsī̱dindu̱rindra̍sya niṣkṛ̱taṃ sakhā̱ sakhyu̱rna pra mi̍nāti sa̱ṃgira̍m |

marya̍ iva yuva̱tibhi̱: sama̍rṣati̱ soma̍: ka̱laśe̍ śa̱tayā̍mnā pa̱thā

||16||

pra vo̱ dhiyo̍ mandra̱yuvo̍ vipa̱nyuva̍: pana̱syuva̍: sa̱ṃvasa̍neṣvakramuḥ |

soma̍ṃ manī̱ṣā a̱bhya̍nūṣata̱ stubho̱'bhi dhe̱nava̱: paya̍semaśiśrayuḥ

||17||

ā na̍: soma sa̱ṃyata̍ṃ pi̱pyuṣī̱miṣa̱mindo̱ pava̍sva̱ pava̍māno a̱sridha̍m |

yā no̱ doha̍te̱ triraha̱nnasa̍ścuṣī kṣu̱madvāja̍va̱nmadhu̍matsu̱vīrya̍m

||18||

vṛṣā̍ matī̱nāṃ pa̍vate vicakṣa̱ṇaḥ somo̱ ahna̍: pratarī̱toṣaso̍ di̱vaḥ |

krā̱ṇā sindhū̍nāṃ ka̱laśā̍m̐ avīvaśa̱dindra̍sya̱ hārdyā̍vi̱śanma̍nī̱ṣibhi̍:

||19||

ma̱nī̱ṣibhi̍: pavate pū̱rvyaḥ ka̱virnṛbhi̍rya̱taḥ pari̱ kośā̍m̐ acikradat |

tri̱tasya̱ nāma̍ ja̱naya̱nmadhu̍ kṣara̱dindra̍sya vā̱yoḥ sa̱khyāya̱ karta̍ve

||20||

a̱yaṃ pu̍nā̱na u̱ṣaso̱ vi ro̍cayada̱yaṃ sindhu̍bhyo abhavadu loka̱kṛt |

a̱yaṃ triḥ sa̱pta du̍duhā̱na ā̱śira̱ṃ somo̍ hṛ̱de pa̍vate̱ cāru̍ matsa̱raḥ

||21||

pava̍sva soma di̱vyeṣu̱ dhāma̍su sṛjā̱na i̍ndo ka̱laśe̍ pa̱vitra̱ ā |

sīda̱nnindra̍sya ja̱ṭhare̱ kani̍krada̱nnṛbhi̍rya̱taḥ sūrya̱māro̍hayo di̱vi

||22||

adri̍bhiḥ su̱taḥ pa̍vase pa̱vitra̱ ām̐ inda̱vindra̍sya ja̱ṭhare̍ṣvāvi̱śan |

tvaṃ nṛ̱cakṣā̍ abhavo vicakṣaṇa̱ soma̍ go̱tramaṅgi̍robhyo'vṛṇo̱rapa̍

||23||

tvāṃ so̍ma̱ pava̍mānaṃ svā̱dhyo'nu̱ viprā̍so amadannava̱syava̍: |

tvāṃ su̍pa̱rṇa ābha̍raddi̱vasparīndo̱ viśvā̍bhirma̱tibhi̱: pari̍ṣkṛtam

||24||

avye̍ punā̱naṃ pari̱ vāra̍ ū̱rmiṇā̱ hari̍ṃ navante a̱bhi sa̱pta dhe̱nava̍: |

a̱pāmu̱pasthe̱ adhyā̱yava̍: ka̱vimṛ̱tasya̱ yonā̍ mahi̱ṣā a̍heṣata

||25||

indu̍: punā̱no ati̍ gāhate̱ mṛdho̱ viśvā̍ni kṛ̱ṇvantsu̱pathā̍ni̱ yajya̍ve |

gāḥ kṛ̍ṇvā̱no ni̱rṇija̍ṃ harya̱taḥ ka̱viratyo̱ na krīl̤a̱npari̱ vāra̍marṣati

||26||

a̱sa̱ścata̍: śa̱tadhā̍rā abhi̱śriyo̱ hari̍ṃ nava̱nte'va̱ tā u̍da̱nyuva̍: |

kṣipo̍ mṛjanti̱ pari̱ gobhi̱rāvṛ̍taṃ tṛ̱tīye̍ pṛ̱ṣṭhe adhi̍ roca̱ne di̱vaḥ

||27||

tave̱māḥ pra̱jā di̱vyasya̱ reta̍sa̱stvaṃ viśva̍sya̱ bhuva̍nasya rājasi |

athe̱daṃ viśva̍ṃ pavamāna te̱ vaśe̱ tvami̍ndo pratha̱mo dhā̍ma̱dhā a̍si

||28||

tvaṃ sa̍mu̱dro a̍si viśva̱vitka̍ve̱ tave̱māḥ pañca̍ pra̱diśo̱ vidha̍rmaṇi |

tvaṃ dyāṃ ca̍ pṛthi̱vīṃ cāti̍ jabhriṣe̱ tava̱ jyotī̍ṃṣi pavamāna̱ sūrya̍:

||29||

tvaṃ pa̱vitre̱ raja̍so̱ vidha̍rmaṇi de̱vebhya̍: soma pavamāna pūyase |

tvāmu̱śija̍: pratha̱mā a̍gṛbhṇata̱ tubhye̱mā viśvā̱ bhuva̍nāni yemire

||30||

pra re̱bha e̱tyati̱ vāra̍ma̱vyaya̱ṃ vṛṣā̱ vane̱ṣvava̍ cakrada̱ddhari̍: |

saṃ dhī̱tayo̍ vāvaśā̱nā a̍nūṣata̱ śiśu̍ṃ rihanti ma̱taya̱: pani̍pnatam

||31||

sa sūrya̍sya ra̱śmibhi̱: pari̍ vyata̱ tantu̍ṃ tanvā̱nastri̱vṛta̱ṃ yathā̍ vi̱de |

naya̍nnṛ̱tasya̍ pra̱śiṣo̱ navī̍yasī̱: pati̱rjanī̍nā̱mupa̍ yāti niṣkṛ̱tam

||32||

rājā̱ sindhū̍nāṃ pavate̱ pati̍rdi̱va ṛ̱tasya̍ yāti pa̱thibhi̱: kani̍kradat |

sa̱hasra̍dhāra̱: pari̍ ṣicyate̱ hari̍: punā̱no vāca̍ṃ ja̱naya̱nnupā̍vasuḥ

||33||

pava̍māna̱ mahyarṇo̱ vi dhā̍vasi̱ sūro̱ na ci̱tro avya̍yāni̱ pavya̍yā |

gabha̍stipūto̱ nṛbhi̱radri̍bhiḥ su̱to ma̱he vājā̍ya̱ dhanyā̍ya dhanvasi

||34||

iṣa̱mūrja̍ṃ pavamānā̱bhya̍rṣasi śye̱no na vaṃsu̍ ka̱laśe̍ṣu sīdasi |

indrā̍ya̱ madvā̱ madyo̱ mada̍: su̱to di̱vo vi̍ṣṭa̱mbha u̍pa̱mo vi̍cakṣa̱ṇaḥ

||35||

sa̱pta svasā̍ro a̱bhi mā̱tara̱: śiśu̱ṃ nava̍ṃ jajñā̱naṃ jenya̍ṃ vipa̱ścita̍m |

a̱pāṃ ga̍ndha̱rvaṃ di̱vyaṃ nṛ̱cakṣa̍sa̱ṃ soma̱ṃ viśva̍sya̱ bhuva̍nasya rā̱jase̍

||36||

ī̱śā̱na i̱mā bhuva̍nāni̱ vīya̍se yujā̱na i̍ndo ha̱rita̍: supa̱rṇya̍: |

tāste̍ kṣarantu̱ madhu̍madghṛ̱taṃ paya̱stava̍ vra̱te so̍ma tiṣṭhantu kṛ̱ṣṭaya̍:

||37||

tvaṃ nṛ̱cakṣā̍ asi soma vi̱śvata̱: pava̍māna vṛṣabha̱ tā vi dhā̍vasi |

sa na̍: pavasva̱ vasu̍ma̱ddhira̍ṇyavadva̱yaṃ syā̍ma̱ bhuva̍neṣu jī̱vase̍

||38||

go̱vitpa̍vasva vasu̱viddhi̍raṇya̱vidre̍to̱dhā i̍ndo̱ bhuva̍ne̱ṣvarpi̍taḥ |

tvaṃ su̱vīro̍ asi soma viśva̱vittaṃ tvā̱ viprā̱ upa̍ gi̱rema ā̍sate

||39||

unmadhva̍ ū̱rmirva̱nanā̍ atiṣṭhipada̱po vasā̍no mahi̱ṣo vi gā̍hate |

rājā̍ pa̱vitra̍ratho̱ vāja̱māru̍hatsa̱hasra̍bhṛṣṭirjayati̱ śravo̍ bṛ̱hat

||40||

sa bha̱ndanā̱ udi̍yarti pra̱jāva̍tīrvi̱śvāyu̱rviśvā̍: su̱bharā̱ aha̍rdivi |

brahma̍ pra̱jāva̍dra̱yimaśva̍pastyaṃ pī̱ta i̍nda̱vindra̍ma̱smabhya̍ṃ yācatāt

||41||

so agre̱ ahnā̱ṃ hari̍rharya̱to mada̱: pra ceta̍sā cetayata̱ta anu̱ dyubhi̍: |

dvā janā̍ yā̱taya̍nna̱ntarī̍yate̱ narā̍ ca̱ śaṃsa̱ṃ daivya̍ṃ ca dha̱rtari̍

||42||

a̱ñjate̱ vya̍ñjate̱ sama̍ñjate̱ kratu̍ṃ rihanti̱ madhu̍nā̱bhya̍ñjate |

sindho̍rucchvā̱se pa̱taya̍ntamu̱kṣaṇa̍ṃ hiraṇyapā̱vāḥ pa̱śumā̍su gṛbhṇate

||43||

vi̱pa̱ścite̱ pava̍mānāya gāyata ma̱hī na dhārātyandho̍ arṣati |

ahi̱rna jū̱rṇāmati̍ sarpati̱ tvaca̱matyo̱ na krīl̤a̍nnasara̱dvṛṣā̱ hari̍:

||44||

a̱gre̱go rājāpya̍staviṣyate vi̱māno̱ ahnā̱ṃ bhuva̍ne̱ṣvarpi̍taḥ |

hari̍rghṛ̱tasnu̍: su̱dṛśī̍ko arṇa̱vo jyo̱tīra̍thaḥ pavate rā̱ya o̱kya̍:

||45||

asa̍rji ska̱mbho di̱va udya̍to̱ mada̱: pari̍ tri̱dhātu̱rbhuva̍nānyarṣati |

a̱ṃśuṃ ri̍hanti ma̱taya̱: pani̍pnataṃ gi̱rā yadi̍ ni̱rṇija̍mṛ̱gmiṇo̍ ya̱yuḥ

||46||

pra te̱ dhārā̱ atyaṇvā̍ni me̱ṣya̍: punā̱nasya̍ sa̱ṃyato̍ yanti̱ raṃha̍yaḥ |

yadgobhi̍rindo ca̱mvo̍: sama̱jyasa̱ ā su̍vā̱naḥ so̍ma ka̱laśe̍ṣu sīdasi

||47||

pava̍sva soma kratu̱vinna̍ u̱kthyo'vyo̱ vāre̱ pari̍ dhāva̱ madhu̍ pri̱yam |

ja̱hi viśvā̍nra̱kṣasa̍ indo a̱triṇo̍ bṛ̱hadva̍dema vi̱dathe̍ su̱vīrā̍:

||48||

pra tu dra̍va̱ pari̱ kośa̱ṃ ni ṣī̍da̱ nṛbhi̍: punā̱no a̱bhi vāja̍marṣa |

aśva̱ṃ na tvā̍ vā̱jina̍ṃ ma̱rjaya̱nto'cchā̍ ba̱rhī ra̍śa̱nābhi̍rnayanti

||1||

svā̱yu̱dhaḥ pa̍vate de̱va indu̍raśasti̱hā vṛ̱jana̱ṃ rakṣa̍māṇaḥ |

pi̱tā de̱vānā̍ṃ jani̱tā su̱dakṣo̍ viṣṭa̱mbho di̱vo dha̱ruṇa̍: pṛthi̱vyāḥ

||2||

ṛṣi̱rvipra̍: purae̱tā janā̍nāmṛ̱bhurdhīra̍ u̱śanā̱ kāvye̍na |

sa ci̍dviveda̱ nihi̍ta̱ṃ yadā̍sāmapī̱cyaṃ1 guhya̱ṃ nāma̱ gonā̍m

||3||

e̱ṣa sya te̱ madhu̍mām̐ indra̱ somo̱ vṛṣā̱ vṛṣṇe̱ pari̍ pa̱vitre̍ akṣāḥ |

sa̱ha̱sra̱sāḥ śa̍ta̱sā bhū̍ri̱dāvā̍ śaśvatta̱maṃ ba̱rhirā vā̱jya̍sthāt

||4||

e̱te somā̍ a̱bhi ga̱vyā sa̱hasrā̍ ma̱he vājā̍yā̱mṛtā̍ya̱ śravā̍ṃsi |

pa̱vitre̍bhi̱: pava̍mānā asṛgrañchrava̱syavo̱ na pṛ̍ta̱nājo̱ atyā̍:

||5||

pari̱ hi ṣmā̍ puruhū̱to janā̍nā̱ṃ viśvāsa̍ra̱dbhoja̍nā pū̱yamā̍naḥ |

athā bha̍ra śyenabhṛta̱ prayā̍ṃsi ra̱yiṃ tuñjā̍no a̱bhi vāja̍marṣa

||6||

e̱ṣa su̍vā̱naḥ pari̱ soma̍: pa̱vitre̱ sargo̱ na sṛ̱ṣṭo a̍dadhāva̱darvā̍ |

ti̱gme śiśā̍no mahi̱ṣo na śṛṅge̱ gā ga̱vyanna̱bhi śūro̱ na satvā̍

||7||

e̱ṣā ya̍yau para̱māda̱ntaradre̱: kūci̍tsa̱tīrū̱rve gā vi̍veda |

di̱vo na vi̱dyutsta̱naya̍ntya̱bhraiḥ soma̍sya te pavata indra̱ dhārā̍

||8||

u̱ta sma̍ rā̱śiṃ pari̍ yāsi̱ gonā̱mindre̍ṇa soma sa̱ratha̍ṃ punā̱naḥ |

pū̱rvīriṣo̍ bṛha̱tīrjī̍radāno̱ śikṣā̍ śacīva̱stava̱ tā u̍pa̱ṣṭut

||9||

a̱yaṃ soma̍ indra̱ tubhya̍ṃ sunve̱ tubhya̍ṃ pavate̱ tvama̍sya pāhi |

tvaṃ ha̱ yaṃ ca̍kṛ̱ṣe tvaṃ va̍vṛ̱ṣa indu̱ṃ madā̍ya̱ yujyā̍ya̱ soma̍m

||1||

sa ī̱ṃ ratho̱ na bhu̍ri̱ṣāl̤a̍yoji ma̱haḥ pu̱rūṇi̍ sā̱taye̱ vasū̍ni |

ādī̱ṃ viśvā̍ nahu̱ṣyā̍ṇi jā̱tā sva̍rṣātā̱ vana̍ ū̱rdhvā na̍vanta

||2||

vā̱yurna yo ni̱yutvā̍m̐ i̱ṣṭayā̍mā̱ nāsa̍tyeva̱ hava̱ ā śambha̍viṣṭhaḥ |

vi̱śvavā̍ro draviṇo̱dā i̍va̱ tmanpū̱ṣeva̍ dhī̱java̍no'si soma

||3||

indro̱ na yo ma̱hā karmā̍ṇi̱ cakri̍rha̱ntā vṛ̱trāṇā̍masi soma pū̱rbhit |

pai̱dvo na hi tvamahi̍nāmnāṃ ha̱ntā viśva̍syāsi soma̱ dasyo̍:

||4||

a̱gnirna yo vana̱ ā sṛ̱jyamā̍no̱ vṛthā̱ pājā̍ṃsi kṛṇute na̱dīṣu̍ |

jano̱ na yudhvā̍ maha̱ta u̍pa̱bdiriya̍rti̱ soma̱: pava̍māna ū̱rmim

||5||

e̱te somā̱ ati̱ vārā̱ṇyavyā̍ di̱vyā na kośā̍so a̱bhrava̍rṣāḥ |

vṛthā̍ samu̱draṃ sindha̍vo̱ na nīcī̍: su̱tāso̍ a̱bhi ka̱laśā̍m̐ asṛgran

||6||

śu̱ṣmī śardho̱ na māru̍taṃ pava̱svāna̍bhiśastā di̱vyā yathā̱ viṭ |

āpo̱ na ma̱kṣū su̍ma̱tirbha̍vā naḥ sa̱hasrā̍psāḥ pṛtanā̱ṣāṇna ya̱jñaḥ

||7||

rājño̱ nu te̱ varu̍ṇasya vra̱tāni̍ bṛ̱hadga̍bhī̱raṃ tava̍ soma̱ dhāma̍ |

śuci̱ṣṭvama̍si pri̱yo na mi̱tro da̱kṣāyyo̍ arya̱mevā̍si soma

||8||

pro sya vahni̍: pa̱thyā̍bhirasyāndi̱vo na vṛ̱ṣṭiḥ pava̍māno akṣāḥ |

sa̱hasra̍dhāro asada̱nnya1sme mā̱turu̱pasthe̱ vana̱ ā ca̱ soma̍:

||1||

rājā̱ sindhū̍nāmavasiṣṭa̱ vāsa̍ ṛ̱tasya̱ nāva̱māru̍ha̱draji̍ṣṭhām |

a̱psu dra̱pso vā̍vṛdhe śye̱najū̍to du̱ha ī̍ṃ pi̱tā du̱ha ī̍ṃ pi̱turjām

||2||

si̱ṃhaṃ na̍santa̱ madhvo̍ a̱yāsa̱ṃ hari̍maru̱ṣaṃ di̱vo a̱sya pati̍m |

śūro̍ yu̱tsu pra̍tha̱maḥ pṛ̍cchate̱ gā asya̱ cakṣa̍sā̱ pari̍ pātyu̱kṣā

||3||

madhu̍pṛṣṭhaṃ gho̱rama̱yāsa̱maśva̱ṃ rathe̍ yuñjantyuruca̱kra ṛ̱ṣvam |

svasā̍ra īṃ jā̱mayo̍ marjayanti̱ sanā̍bhayo vā̱jina̍mūrjayanti

||4||

cata̍sra īṃ ghṛta̱duha̍: sacante samā̱ne a̱ntardha̱ruṇe̱ niṣa̍ttāḥ |

tā ī̍marṣanti̱ nama̍sā punā̱nāstā ī̍ṃ vi̱śvata̱: pari̍ ṣanti pū̱rvīḥ

||5||

vi̱ṣṭa̱mbho di̱vo dha̱ruṇa̍: pṛthi̱vyā viśvā̍ u̱ta kṣi̱tayo̱ haste̍ asya |

asa̍tta̱ utso̍ gṛṇa̱te ni̱yutvā̱nmadhvo̍ a̱ṃśuḥ pa̍vata indri̱yāya̍

||6||

va̱nvannavā̍to a̱bhi de̱vavī̍ti̱mindrā̍ya soma vṛtra̱hā pa̍vasva |

śa̱gdhi ma̱haḥ pu̍ruśca̱ndrasya̍ rā̱yaḥ su̱vīrya̍sya̱ pata̍yaḥ syāma

||7||

pra hi̍nvā̱no ja̍ni̱tā roda̍syo̱ ratho̱ na vāja̍ṃ sani̱ṣyanna̍yāsīt |

indra̱ṃ gaccha̱nnāyu̍dhā sa̱ṃśiśā̍no̱ viśvā̱ vasu̱ hasta̍yorā̱dadhā̍naḥ

||1||

a̱bhi tri̍pṛ̱ṣṭhaṃ vṛṣa̍ṇaṃ vayo̱dhāmā̍ṅgū̱ṣāṇā̍mavāvaśanta̱ vāṇī̍: |

vanā̱ vasā̍no̱ varu̍ṇo̱ na sindhū̱nvi ra̍tna̱dhā da̍yate̱ vāryā̍ṇi

||2||

śūra̍grāma̱: sarva̍vīra̱: sahā̍vā̱ñjetā̍ pavasva̱ sani̍tā̱ dhanā̍ni |

ti̱gmāyu̍dhaḥ kṣi̱pradha̍nvā sa̱matsvaṣā̍l̤haḥ sā̱hvānpṛta̍nāsu̱ śatrū̍n

||3||

u̱ruga̍vyūti̱rabha̍yāni kṛ̱ṇvantsa̍mīcī̱ne ā pa̍vasvā̱ pura̍ṃdhī |

a̱paḥ siṣā̍sannu̱ṣasa̱: sva1rgāḥ saṃ ci̍krado ma̱ho a̱smabhya̱ṃ vājā̍n

||4||

matsi̍ soma̱ varu̍ṇa̱ṃ matsi̍ mi̱traṃ matsīndra̍mindo pavamāna̱ viṣṇu̍m |

matsi̱ śardho̱ māru̍ta̱ṃ matsi̍ de̱vānmatsi̍ ma̱hāmindra̍mindo̱ madā̍ya

||5||

e̱vā rāje̍va̱ kratu̍mā̱m̐ ame̍na̱ viśvā̱ ghani̍ghnadduri̱tā pa̍vasva |

indo̍ sū̱ktāya̱ vaca̍se̱ vayo̍ dhā yū̱yaṃ pā̍ta sva̱stibhi̱: sadā̍ naḥ

||6||

asa̍rji̱ vakvā̱ rathye̱ yathā̱jau dhi̱yā ma̱notā̍ pratha̱mo ma̍nī̱ṣī |

daśa̱ svasā̍ro̱ adhi̱ sāno̱ avye'ja̍nti̱ vahni̱ṃ sada̍nā̱nyaccha̍

||1||

vī̱tī jana̍sya di̱vyasya̍ ka̱vyairadhi̍ suvā̱no na̍hu̱ṣye̍bhi̱rindu̍: |

pra yo nṛbhi̍ra̱mṛto̱ martye̍bhirmarmṛjā̱no'vi̍bhi̱rgobhi̍ra̱dbhiḥ

||2||

vṛṣā̱ vṛṣṇe̱ roru̍vada̱ṃśura̍smai̱ pava̍māno̱ ruśa̍dīrte̱ payo̱ goḥ |

sa̱hasra̱mṛkvā̍ pa̱thibhi̍rvaco̱vida̍dhva̱smabhi̱: sūro̱ aṇva̱ṃ vi yā̍ti

||3||

ru̱jā dṛ̱l̤hā ci̍dra̱kṣasa̱: sadā̍ṃsi punā̱na i̍nda ūrṇuhi̱ vi vājā̍n |

vṛ̱ścopari̍ṣṭāttuja̱tā va̱dhena̱ ye anti̍ dū̱rādu̍panā̱yame̍ṣām

||4||

sa pra̍tna̱vannavya̍se viśvavāra sū̱ktāya̍ pa̱thaḥ kṛ̍ṇuhi̱ prāca̍: |

ye du̱:ṣahā̍so va̱nuṣā̍ bṛ̱hanta̱stām̐ste̍ aśyāma purukṛtpurukṣo

||5||

e̱vā pu̍nā̱no a̱paḥ sva1rgā a̱smabhya̍ṃ to̱kā tana̍yāni̱ bhūri̍ |

śaṃ na̱: kṣetra̍mu̱ru jyotī̍ṃṣi soma̱ jyoṅna̱: sūrya̍ṃ dṛ̱śaye̍ rirīhi

||6||

pari̍ suvā̱no hari̍ra̱ṃśuḥ pa̱vitre̱ ratho̱ na sa̍rji sa̱naye̍ hiyā̱naḥ |

āpa̱cchloka̍mindri̱yaṃ pū̱yamā̍na̱: prati̍ de̱vām̐ a̍juṣata̱ prayo̍bhiḥ

||1||

acchā̍ nṛ̱cakṣā̍ asaratpa̱vitre̱ nāma̱ dadhā̍naḥ ka̱vira̍sya̱ yonau̍ |

sīda̱nhote̍va̱ sada̍ne ca̱mūṣūpe̍magma̱nnṛṣa̍yaḥ sa̱pta viprā̍:

||2||

pra su̍me̱dhā gā̍tu̱vidvi̱śvade̍va̱: soma̍: punā̱naḥ sada̍ eti̱ nitya̍m |

bhuva̱dviśve̍ṣu̱ kāvye̍ṣu̱ rantā'nu̱ janā̍nyatate̱ pañca̱ dhīra̍:

||3||

tava̱ tye so̍ma pavamāna ni̱ṇye viśve̍ de̱vāstraya̍ ekāda̱śāsa̍: |

daśa̍ sva̱dhābhi̱radhi̱ sāno̱ avye̍ mṛ̱janti̍ tvā na̱dya̍: sa̱pta ya̱hvīḥ

||4||

tannu sa̱tyaṃ pava̍mānasyāstu̱ yatra̱ viśve̍ kā̱rava̍: sa̱ṃnasa̍nta |

jyoti̱ryadahne̱ akṛ̍ṇodu lo̱kaṃ prāva̱nmanu̱ṃ dasya̍ve kara̱bhīka̍m

||5||

pari̱ sadme̍va paśu̱mānti̱ hotā̱ rājā̱ na sa̱tyaḥ sami̍tīriyā̱naḥ |

soma̍: punā̱naḥ ka̱laśā̍m̐ ayāsī̱tsīda̍nmṛ̱go na ma̍hi̱ṣo vane̍ṣu

||6||

sā̱ka̱mukṣo̍ marjayanta̱ svasā̍ro̱ daśa̱ dhīra̍sya dhī̱tayo̱ dhanu̍trīḥ |

hari̱: parya̍drava̱jjāḥ sūrya̍sya̱ droṇa̍ṃ nanakṣe̱ atyo̱ na vā̱jī

||1||

saṃ mā̱tṛbhi̱rna śiśu̍rvāvaśā̱no vṛṣā̍ dadhanve puru̱vāro̍ a̱dbhiḥ |

maryo̱ na yoṣā̍ma̱bhi ni̍ṣkṛ̱taṃ yantsaṃ ga̍cchate ka̱laśa̍ u̱sriyā̍bhiḥ

||2||

u̱ta pra pi̍pya̱ ūdha̱raghnyā̍yā̱ indu̱rdhārā̍bhiḥ sacate sume̱dhāḥ |

mū̱rdhāna̱ṃ gāva̱: paya̍sā ca̱mūṣva̱bhi śrī̍ṇanti̱ vasu̍bhi̱rna ni̱ktaiḥ

||3||

sa no̍ de̱vebhi̍: pavamāna ra̱dendo̍ ra̱yima̱śvina̍ṃ vāvaśā̱naḥ |

ra̱thi̱rā̱yatā̍muśa̱tī pura̍ṃdhirasma̱drya1gā dā̱vane̱ vasū̍nām

||4||

nū no̍ ra̱yimupa̍ māsva nṛ̱vanta̍ṃ punā̱no vā̱tāpya̍ṃ vi̱śvaśca̍ndram |

pra va̍ndi̱turi̍ndo tā̱ryāyu̍: prā̱tarma̱kṣū dhi̱yāva̍surjagamyāt

||5||

adhi̱ yada̍sminvā̱jinī̍va̱ śubha̱: spardha̍nte̱ dhiya̱: sūrye̱ na viśa̍: |

a̱po vṛ̍ṇā̱naḥ pa̍vate kavī̱yanvra̱jaṃ na pa̍śu̱vardha̍nāya̱ manma̍

||1||

dvi̱tā vyū̱rṇvanna̱mṛta̍sya̱ dhāma̍ sva̱rvide̱ bhuva̍nāni prathanta |

dhiya̍: pinvā̱nāḥ svasa̍re̱ na gāva̍ ṛtā̱yantī̍ra̱bhi vā̍vaśra̱ indu̍m

||2||

pari̱ yatka̱viḥ kāvyā̱ bhara̍te̱ śūro̱ na ratho̱ bhuva̍nāni̱ viśvā̍ |

de̱veṣu̱ yaśo̱ martā̍ya̱ bhūṣa̱ndakṣā̍ya rā̱yaḥ pu̍ru̱bhūṣu̱ navya̍:

||3||

śri̱ye jā̱taḥ śri̱ya ā niri̍yāya̱ śriya̱ṃ vayo̍ jari̱tṛbhyo̍ dadhāti |

śriya̱ṃ vasā̍nā amṛta̱tvamā̍ya̱nbhava̍nti sa̱tyā sa̍mi̱thā mi̱tadrau̍

||4||

iṣa̱mūrja̍ma̱bhya1rṣāśva̱ṃ gāmu̱ru jyoti̍: kṛṇuhi̱ matsi̍ de̱vān |

viśvā̍ni̱ hi su̱ṣahā̱ tāni̱ tubhya̱ṃ pava̍māna̱ bādha̍se soma̱ śatrū̍n

||5||

kani̍kranti̱ hari̱rā sṛ̱jyamā̍na̱: sīda̱nvana̍sya ja̱ṭhare̍ punā̱naḥ |

nṛbhi̍rya̱taḥ kṛ̍ṇute ni̱rṇija̱ṃ gā ato̍ ma̱tīrja̍nayata sva̱dhābhi̍:

||1||

hari̍: sṛjā̱naḥ pa̱thyā̍mṛ̱tasyeya̍rti̱ vāca̍mari̱teva̱ nāva̍m |

de̱vo de̱vānā̱ṃ guhyā̍ni̱ nāmā̱''viṣkṛ̍ṇoti ba̱rhiṣi̍ pra̱vāce̍

||2||

a̱pāmi̱vedū̱rmaya̱startu̍rāṇā̱: pra ma̍nī̱ṣā ī̍rate̱ soma̱maccha̍ |

na̱ma̱syantī̱rupa̍ ca̱ yanti̱ saṃ cā ''ca̍ viśantyuśa̱tīru̱śanta̍m

||3||

taṃ ma̍rmṛjā̱naṃ ma̍hi̱ṣaṃ na sānā̍va̱ṃśuṃ du̍hantyu̱kṣaṇa̍ṃ giri̱ṣṭhām |

taṃ vā̍vaśā̱naṃ ma̱taya̍: sacante tri̱to bi̍bharti̱ varu̍ṇaṃ samu̱dre

||4||

iṣya̱nvāca̍mupava̱kteva̱ hotu̍: punā̱na i̍ndo̱ vi ṣyā̍ manī̱ṣām |

indra̍śca̱ yatkṣaya̍tha̱: saubha̍gāya su̱vīrya̍sya̱ pata̍yaḥ syāma

||5||

pra se̍nā̱nīḥ śūro̱ agre̱ rathā̍nāṃ ga̱vyanne̍ti̱ harṣa̍te asya̱ senā̍ |

bha̱drānkṛ̱ṇvanni̍ndraha̱vāntsakhi̍bhya̱ ā somo̱ vastrā̍ rabha̱sāni̍ datte

||1||

sama̍sya̱ hari̱ṃ hara̍yo mṛjantyaśvaha̱yairani̍śita̱ṃ namo̍bhiḥ |

ā ti̍ṣṭhati̱ ratha̱mindra̍sya̱ sakhā̍ vi̱dvām̐ e̍nā suma̱tiṃ yā̱tyaccha̍

||2||

sa no̍ deva de̱vatā̍te pavasva ma̱he so̍ma̱ psara̍sa indra̱pāna̍: |

kṛ̱ṇvanna̱po va̱rṣaya̱ndyāmu̱temāmu̱rorā no̍ varivasyā punā̱naḥ

||3||

ajī̍ta̱ye'ha̍taye pavasva sva̱staye̍ sa̱rvatā̍taye bṛha̱te |

tadu̍śanti̱ viśva̍ i̱me sakhā̍ya̱stada̱haṃ va̍śmi pavamāna soma

||4||

soma̍: pavate jani̱tā ma̍tī̱nāṃ ja̍ni̱tā di̱vo ja̍ni̱tā pṛ̍thi̱vyāḥ |

ja̱ni̱tāgnerja̍ni̱tā sūrya̍sya jani̱tendra̍sya jani̱tota viṣṇo̍:

||5||

bra̱hmā de̱vānā̍ṃ pada̱vīḥ ka̍vī̱nāmṛṣi̱rviprā̍ṇāṃ mahi̱ṣo mṛ̱gāṇā̍m |

śye̱no gṛdhrā̍ṇā̱ṃ svadhi̍ti̱rvanā̍nā̱ṃ soma̍: pa̱vitra̱matye̍ti̱ rebha̍n

||6||

prāvī̍vipadvā̱ca ū̱rmiṃ na sindhu̱rgira̱: soma̱: pava̍māno manī̱ṣāḥ |

a̱ntaḥ paśya̍nvṛ̱jane̱māva̍rā̱ṇyā ti̍ṣṭhati vṛṣa̱bho goṣu̍ jā̱nan

||7||

sa ma̍tsa̱raḥ pṛ̱tsu va̱nvannavā̍taḥ sa̱hasra̍retā a̱bhi vāja̍marṣa |

indrā̍yendo̱ pava̍māno manī̱ṣyaṃ1śorū̱rmimī̍raya̱ gā i̍ṣa̱ṇyan

||8||

pari̍ pri̱yaḥ ka̱laśe̍ de̱vavā̍ta̱ indrā̍ya̱ somo̱ raṇyo̱ madā̍ya |

sa̱hasra̍dhāraḥ śa̱tavā̍ja̱ indu̍rvā̱jī na sapti̱: sama̍nā jigāti

||9||

sa pū̱rvyo va̍su̱vijjāya̍māno mṛjā̱no a̱psu du̍duhā̱no adrau̍ |

a̱bhi̱śa̱sti̱pā bhuva̍nasya̱ rājā̍ vi̱dadgā̱tuṃ brahma̍ṇe pū̱yamā̍naḥ

||10||

tvayā̱ hi na̍: pi̱tara̍: soma̱ pūrve̱ karmā̍ṇi ca̱kruḥ pa̍vamāna̱ dhīrā̍: |

va̱nvannavā̍taḥ pari̱dhīm̐rapo̍rṇu vī̱rebhi̱raśvai̍rma̱ghavā̍ bhavā naḥ

||11||

yathāpa̍vathā̱ mana̍ve vayo̱dhā a̍mitra̱hā va̍rivo̱viddha̱viṣmā̍n |

e̱vā pa̍vasva̱ dravi̍ṇa̱ṃ dadhā̍na̱ indre̱ saṃ ti̍ṣṭha ja̱nayāyu̍dhāni

||12||

pava̍sva soma̱ madhu̍mām̐ ṛ̱tāvā̱'po vasā̍no̱ adhi̱ sāno̱ avye̍ |

ava̱ droṇā̍ni ghṛ̱tavā̍nti sīda ma̱dinta̍mo matsa̱ra i̍ndra̱pāna̍:

||13||

vṛ̱ṣṭiṃ di̱vaḥ śa̱tadhā̍raḥ pavasva sahasra̱sā vā̍ja̱yurde̱vavī̍tau |

saṃ sindhu̍bhiḥ ka̱laśe̍ vāvaśā̱naḥ samu̱sriyā̍bhiḥ prati̱ranna̱ āyu̍:

||14||

e̱ṣa sya somo̍ ma̱tibhi̍: punā̱no'tyo̱ na vā̱jī tara̱tīdarā̍tīḥ |

payo̱ na du̱gdhamadi̍teriṣi̱ramu̱rvi̍va gā̱tuḥ su̱yamo̱ na vol̤hā̍

||15||

svā̱yu̱dhaḥ so̱tṛbhi̍: pū̱yamā̍no̱'bhya̍rṣa̱ guhya̱ṃ cāru̱ nāma̍ |

a̱bhi vāja̱ṃ sapti̍riva śrava̱syā'bhi vā̱yuma̱bhi gā de̍va soma

||16||

śiśu̍ṃ jajñā̱naṃ ha̍rya̱taṃ mṛ̍janti śu̱mbhanti̱ vahni̍ṃ ma̱ruto̍ ga̱ṇena̍ |

ka̱virgī̱rbhiḥ kāvye̍nā ka̱viḥ santsoma̍: pa̱vitra̱matye̍ti̱ rebha̍n

||17||

ṛṣi̍manā̱ ya ṛ̍ṣi̱kṛtsva̱rṣāḥ sa̱hasra̍ṇīthaḥ pada̱vīḥ ka̍vī̱nām |

tṛ̱tīya̱ṃ dhāma̍ mahi̱ṣaḥ siṣā̍sa̱ntsomo̍ vi̱rāja̱manu̍ rājati̱ ṣṭup

||18||

ca̱mū̱ṣacchye̱naḥ śa̍ku̱no vi̱bhṛtvā̍ govi̱ndurdra̱psa āyu̍dhāni̱ bibhra̍t |

a̱pāmū̱rmiṃ saca̍mānaḥ samu̱draṃ tu̱rīya̱ṃ dhāma̍ mahi̱ṣo vi̍vakti

||19||

maryo̱ na śu̱bhrasta̱nva̍ṃ mṛjā̱no'tyo̱ na sṛtvā̍ sa̱naye̱ dhanā̍nām |

vṛṣe̍va yū̱thā pari̱ kośa̱marṣa̱nkani̍kradacca̱mvo̱3rā vi̍veśa

||20||

pava̍svendo̱ pava̍māno̱ maho̍bhi̱: kani̍krada̱tpari̱ vārā̍ṇyarṣa |

krīl̤a̍ñca̱mvo̱3rā vi̍śa pū̱yamā̍na̱ indra̍ṃ te̱ raso̍ madi̱ro ma̍mattu

||21||

prāsya̱ dhārā̍ bṛha̱tīra̍sṛgranna̱kto gobhi̍: ka̱laśā̱m̐ ā

vi̍veśa | sāma̍ kṛ̱ṇvantsā̍ma̱nyo̍ vipa̱ścitkranda̍nnetya̱bhi sakhyu̱rna jā̱mim

||22||

a̱pa̱ghnanne̍ṣi pavamāna̱ śatrū̍npri̱yāṃ na jā̱ro a̱bhigī̍ta̱ indu̍: |

sīda̱nvane̍ṣu śaku̱no na patvā̱ soma̍: punā̱naḥ ka̱laśe̍ṣu̱ sattā̍

||23||

ā te̱ ruca̱: pava̍mānasya soma̱ yoṣe̍va yanti su̱dughā̍: sudhā̱rāḥ |

hari̱rānī̍taḥ puru̱vāro̍ a̱psvaci̍kradatka̱laśe̍ devayū̱nām

||24||

a̱sya pre̱ṣā he̱manā̍ pū̱yamā̍no de̱vo de̱vebhi̱: sama̍pṛkta̱ rasa̍m |

su̱taḥ pa̱vitra̱ṃ parye̍ti̱ rebha̍nmi̱teva̱ sadma̍ paśu̱mānti̱ hotā̍

||1||

bha̱drā vastrā̍ sama̱nyā̱3 vasā̍no ma̱hānka̱virni̱vaca̍nāni̱ śaṃsa̍n |

ā va̍cyasva ca̱mvo̍: pū̱yamā̍no vicakṣa̱ṇo jāgṛ̍virde̱vavī̍tau

||2||

samu̍ pri̱yo mṛ̍jyate̱ sāno̱ avye̍ ya̱śasta̍ro ya̱śasā̱ṃ kṣaito̍ a̱sme |

a̱bhi sva̍ra̱ dhanvā̍ pū̱yamā̍no yū̱yaṃ pā̍ta sva̱stibhi̱: sadā̍ naḥ

||3||

pra gā̍yatā̱bhya̍rcāma de̱vāntsoma̍ṃ hinota maha̱te dhanā̍ya |

svā̱duḥ pa̍vāte̱ ati̱ vāra̱mavya̱mā sī̍dāti ka̱laśa̍ṃ deva̱yurna̍:

||4||

indu̍rde̱vānā̱mupa̍ sa̱khyamā̱yantsa̱hasra̍dhāraḥ pavate̱ madā̍ya |

nṛbhi̱: stavā̍no̱ anu̱ dhāma̱ pūrva̱maga̱nnindra̍ṃ maha̱te saubha̍gāya

||5||

sto̱tre rā̱ye hari̍rarṣā punā̱na indra̱ṃ mado̍ gacchatu te̱ bharā̍ya |

de̱vairyā̍hi sa̱ratha̱ṃ rādho̱ acchā̍ yū̱yaṃ pā̍ta sva̱stibhi̱: sadā̍ naḥ

||6||

pra kāvya̍mu̱śane̍va bruvā̱ṇo de̱vo de̱vānā̱ṃ jani̍mā vivakti |

mahi̍vrata̱: śuci̍bandhuḥ pāva̱kaḥ pa̱dā va̍rā̱ho a̱bhye̍ti̱ rebha̍n

||7||

pra ha̱ṃsāsa̍stṛ̱pala̍ṃ ma̱nyumacchā̱mādasta̱ṃ vṛṣa̍gaṇā ayāsuḥ |

ā̱ṅgū̱ṣyaṃ1 pava̍māna̱ṃ sakhā̍yo du̱rmarṣa̍ṃ sā̱kaṃ pra va̍danti vā̱ṇam

||8||

sa ra̍ṃhata urugā̱yasya̍ jū̱tiṃ vṛthā̱ krīl̤a̍ntaṃ mimate̱ na gāva̍: |

pa̱rī̱ṇa̱saṃ kṛ̍ṇute ti̱gmaśṛ̍ṅgo̱ divā̱ hari̱rdadṛ̍śe̱ nakta̍mṛ̱jraḥ

||9||

indu̍rvā̱jī pa̍vate̱ gonyo̍ghā̱ indre̱ soma̱: saha̱ inva̱nmadā̍ya |

hanti̱ rakṣo̱ bādha̍te̱ paryarā̍tī̱rvari̍vaḥ kṛ̱ṇvanvṛ̱jana̍sya̱ rājā̍

||10||

adha̱ dhāra̍yā̱ madhvā̍ pṛcā̱nasti̱ro roma̍ pavate̱ adri̍dugdhaḥ |

indu̱rindra̍sya sa̱khyaṃ ju̍ṣā̱ṇo de̱vo de̱vasya̍ matsa̱ro madā̍ya

||11||

a̱bhi pri̱yāṇi̍ pavate punā̱no de̱vo de̱vāntsvena̱ rase̍na pṛ̱ñcan |

indu̱rdharmā̍ṇyṛtu̱thā vasā̍no̱ daśa̱ kṣipo̍ avyata̱ sāno̱ avye̍

||12||

vṛṣā̱ śoṇo̍ abhi̱kani̍krada̱dgā na̱daya̍nneti pṛthi̱vīmu̱ta dyām |

indra̍syeva va̱gnurā śṛ̍ṇva ā̱jau pra̍ce̱taya̍nnarṣati̱ vāca̱memām

||13||

ra̱sāyya̱: paya̍sā̱ pinva̍māna ī̱raya̍nneṣi̱ madhu̍mantama̱ṃśum |

pava̍mānaḥ saṃta̱nime̍ṣi kṛ̱ṇvannindrā̍ya soma pariṣi̱cyamā̍naḥ

||14||

e̱vā pa̍vasva madi̱ro madā̍yodagrā̱bhasya̍ na̱maya̍nvadha̱snaiḥ |

pari̱ varṇa̱ṃ bhara̍māṇo̱ ruśa̍ntaṃ ga̱vyurno̍ arṣa̱ pari̍ soma si̱ktaḥ

||15||

ju̱ṣṭvī na̍ indo su̱pathā̍ su̱gānyu̱rau pa̍vasva̱ vari̍vāṃsi kṛ̱ṇvan |

gha̱neva̱ viṣva̍gduri̱tāni̍ vi̱ghnannadhi̱ ṣṇunā̍ dhanva̱ sāno̱ avye̍

||16||

vṛ̱ṣṭiṃ no̍ arṣa di̱vyāṃ ji̍ga̱tnumil̤ā̍vatīṃ śa̱ṃgayī̍ṃ jī̱radā̍num |

stuke̍va vī̱tā dha̍nvā vici̱nvanbandhū̍m̐ri̱mām̐ ava̍rām̐ indo vā̱yūn

||17||

gra̱nthiṃ na vi ṣya̍ grathi̱taṃ pu̍nā̱na ṛ̱juṃ ca̍ gā̱tuṃ vṛ̍ji̱naṃ ca̍ soma |

atyo̱ na kra̍do̱ hari̱rā sṛ̍jā̱no maryo̍ deva dhanva pa̱styā̍vān

||18||

juṣṭo̱ madā̍ya de̱vatā̍ta indo̱ pari̱ ṣṇunā̍ dhanva̱ sāno̱ avye̍ |

sa̱hasra̍dhāraḥ sura̱bhirada̍bdha̱: pari̍ srava̱ vāja̍sātau nṛ̱ṣahye̍

||19||

a̱ra̱śmāno̱ ye̍'ra̱thā ayu̍ktā̱ atyā̍so̱ na sa̍sṛjā̱nāsa̍ ā̱jau |

e̱te śu̱krāso̍ dhanvanti̱ somā̱ devā̍sa̱stām̐ upa̍ yātā̱ piba̍dhyai

||20||

e̱vā na̍ indo a̱bhi de̱vavī̍ti̱ṃ pari̍ srava̱ nabho̱ arṇa̍śca̱mūṣu̍ |

somo̍ a̱smabhya̱ṃ kāmya̍ṃ bṛ̱hanta̍ṃ ra̱yiṃ da̍dātu vī̱rava̍ntamu̱gram

||21||

takṣa̱dyadī̱ mana̍so̱ vena̍to̱ vāgjyeṣṭha̍sya vā̱ dharma̍ṇi̱ kṣoranī̍ke |

ādī̍māya̱nvara̱mā vā̍vaśā̱nā juṣṭa̱ṃ pati̍ṃ ka̱laśe̱ gāva̱ indu̍m

||22||

pra dā̍nu̱do di̱vyo dā̍nupi̱nva ṛ̱tamṛ̱tāya̍ pavate sume̱dhāḥ |

dha̱rmā bhu̍vadvṛja̱nya̍sya̱ rājā̱ pra ra̱śmibhi̍rda̱śabhi̍rbhāri̱ bhūma̍

||23||

pa̱vitre̍bhi̱: pava̍māno nṛ̱cakṣā̱ rājā̍ de̱vānā̍mu̱ta martyā̍nām |

dvi̱tā bhu̍vadrayi̱patī̍ rayī̱ṇāmṛ̱taṃ bha̍ra̱tsubhṛ̍ta̱ṃ cārvindu̍:

||24||

arvā̍m̐ iva̱ śrava̍se sā̱timacchendra̍sya vā̱yora̱bhi vī̱tima̍rṣa |

sa na̍: sa̱hasrā̍ bṛha̱tīriṣo̍ dā̱ bhavā̍ soma draviṇo̱vitpu̍nā̱naḥ

||25||

de̱vā̱vyo̍ naḥ pariṣi̱cyamā̍nā̱: kṣaya̍ṃ su̱vīra̍ṃ dhanvanta̱ somā̍: |

ā̱ya̱jyava̍: suma̱tiṃ vi̱śvavā̍rā̱ hotā̍ro̱ na di̍vi̱yajo̍ ma̱ndrata̍māḥ

||26||

e̱vā de̍va de̱vatā̍te pavasva ma̱he so̍ma̱ psara̍se deva̱pāna̍: |

ma̱haści̱ddhi ṣmasi̍ hi̱tāḥ sa̍ma̱rye kṛ̱dhi su̍ṣṭhā̱ne roda̍sī punā̱naḥ

||27||

aśvo̱ no kra̍do̱ vṛṣa̍bhiryujā̱naḥ si̱ṃho na bhī̱mo mana̍so̱ javī̍yān |

a̱rvā̱cīnai̍: pa̱thibhi̱rye raji̍ṣṭhā̱ ā pa̍vasva saumana̱saṃ na̍ indo

||28||

śa̱taṃ dhārā̍ de̱vajā̍tā asṛgrantsa̱hasra̍menāḥ ka̱vayo̍ mṛjanti |

indo̍ sa̱nitra̍ṃ di̱va ā pa̍vasva purae̱tāsi̍ maha̱to dhana̍sya

||29||

di̱vo na sargā̍ asasṛgra̱mahnā̱ṃ rājā̱ na mi̱traṃ pra mi̍nāti̱ dhīra̍: |

pi̱turna pu̱traḥ kratu̍bhiryatā̱na ā pa̍vasva vi̱śe a̱syā ajī̍tim

||30||

pra te̱ dhārā̱ madhu̍matīrasṛgra̱nvārā̱nyatpū̱to a̱tyeṣyavyā̍n |

pava̍māna̱ pava̍se̱ dhāma̱ gonā̍ṃ jajñā̱naḥ sūrya̍mapinvo a̱rkaiḥ

||31||

kani̍krada̱danu̱ panthā̍mṛ̱tasya̍ śu̱kro vi bhā̍sya̱mṛta̍sya̱ dhāma̍ |

sa indrā̍ya pavase matsa̱ravā̍nhinvā̱no vāca̍ṃ ma̱tibhi̍: kavī̱nām

||32||

di̱vyaḥ su̍pa̱rṇo'va̍ cakṣi soma̱ pinva̱ndhārā̱: karma̍ṇā de̱vavī̍tau |

endo̍ viśa ka̱laśa̍ṃ soma̱dhāna̱ṃ kranda̍nnihi̱ sūrya̱syopa̍ ra̱śmim

||33||

ti̱sro vāca̍ īrayati̱ pra vahni̍ṝ̱tasya̍ dhī̱tiṃ brahma̍ṇo manī̱ṣām |

gāvo̍ yanti̱ gopa̍tiṃ pṛ̱cchamā̍nā̱: soma̍ṃ yanti ma̱tayo̍ vāvaśā̱nāḥ

||34||

soma̱ṃ gāvo̍ dhe̱navo̍ vāvaśā̱nāḥ soma̱ṃ viprā̍ ma̱tibhi̍: pṛ̱cchamā̍nāḥ |

soma̍: su̱taḥ pū̍yate a̱jyamā̍na̱: some̍ a̱rkāstri̱ṣṭubha̱: saṃ na̍vante

||35||

e̱vā na̍: soma pariṣi̱cyamā̍na̱ ā pa̍vasva pū̱yamā̍naḥ sva̱sti |

indra̱mā vi̍śa bṛha̱tā rave̍ṇa va̱rdhayā̱ vāca̍ṃ ja̱nayā̱ pura̍ṃdhim

||36||

ā jāgṛ̍vi̱rvipra̍ ṛ̱tā ma̍tī̱nāṃ soma̍: punā̱no a̍sadacca̱mūṣu̍ |

sapa̍nti̱ yaṃ mi̍thu̱nāso̱ nikā̍mā adhva̱ryavo̍ rathi̱rāsa̍: su̱hastā̍:

||37||

sa pu̍nā̱na upa̱ sūre̱ na dhātobhe a̍prā̱ roda̍sī̱ vi ṣa ā̍vaḥ |

pri̱yā ci̱dyasya̍ priya̱sāsa̍ ū̱tī sa tū dhana̍ṃ kā̱riṇe̱ na pra ya̍ṃsat

||38||

sa va̍rdhi̱tā vardha̍naḥ pū̱yamā̍na̱: somo̍ mī̱ḍhvām̐ a̱bhi no̱ jyoti̍ṣāvīt |

yenā̍ na̱: pūrve̍ pi̱tara̍: pada̱jñāḥ sva̱rvido̍ a̱bhi gā adri̍mu̱ṣṇan

||39||

akrā̍ntsamu̱draḥ pra̍tha̱me vidha̍rmañja̱naya̍npra̱jā bhuva̍nasya̱ rājā̍ |

vṛṣā̍ pa̱vitre̱ adhi̱ sāno̱ avye̍ bṛ̱hatsomo̍ vāvṛdhe suvā̱na indu̍:

||40||

ma̱hattatsomo̍ mahi̱ṣaśca̍kārā̱'pāṃ yadgarbho'vṛ̍ṇīta de̱vān |

ada̍dhā̱dindre̱ pava̍māna̱ ojo'ja̍naya̱tsūrye̱ jyoti̱rindu̍:

||41||

matsi̍ vā̱yumi̱ṣṭaye̱ rādha̍se ca̱ matsi̍ mi̱trāvaru̍ṇā pū̱yamā̍naḥ |

matsi̱ śardho̱ māru̍ta̱ṃ matsi̍ de̱vānmatsi̱ dyāvā̍pṛthi̱vī de̍va soma

||42||

ṛ̱juḥ pa̍vasva vṛji̱nasya̍ ha̱ntā'pāmī̍vā̱ṃ bādha̍māno̱ mṛdha̍śca |

a̱bhi̱śrī̱ṇanpaya̱: paya̍sā̱bhi gonā̱mindra̍sya̱ tvaṃ tava̍ va̱yaṃ sakhā̍yaḥ

||43||

madhva̱: sūda̍ṃ pavasva̱ vasva̱ utsa̍ṃ vī̱raṃ ca̍ na̱ ā pa̍vasvā̱ bhaga̍ṃ ca |

svada̱svendrā̍ya̱ pava̍māna indo ra̱yiṃ ca̍ na̱ ā pa̍vasvā samu̱drāt

||44||

soma̍: su̱to dhāra̱yātyo̱ na hitvā̱ sindhu̱rna ni̱mnama̱bhi vā̱jya̍kṣāḥ |

ā yoni̱ṃ vanya̍masadatpunā̱naḥ samindu̱rgobhi̍rasara̱tsama̱dbhiḥ

||45||

e̱ṣa sya te̍ pavata indra̱ soma̍śca̱mūṣu̱ dhīra̍ uśa̱te tava̍svān |

sva̍rcakṣā rathi̱raḥ sa̱tyaśu̍ṣma̱: kāmo̱ na yo de̍vaya̱tāmasa̍rji

||46||

e̱ṣa pra̱tnena̱ vaya̍sā punā̱nasti̱ro varpā̍ṃsi duhi̱turdadhā̍naḥ |

vasā̍na̱: śarma̍ tri̱varū̍thama̱psu hote̍va yāti̱ sama̍neṣu̱ rebha̍n

||47||

nū na̱stvaṃ ra̍thi̱ro de̍va soma̱ pari̍ srava ca̱mvo̍: pū̱yamā̍naḥ |

a̱psu svādi̍ṣṭho̱ madhu̍mām̐ ṛ̱tāvā̍ de̱vo na yaḥ sa̍vi̱tā sa̱tyama̍nmā

||48||

a̱bhi vā̱yuṃ vī̱tya̍rṣā gṛṇā̱no̱3'bhi mi̱trāvaru̍ṇā pū̱yamā̍naḥ |

a̱bhī nara̍ṃ dhī̱java̍naṃ rathe̱ṣṭhāma̱bhīndra̱ṃ vṛṣa̍ṇa̱ṃ vajra̍bāhum

||49||

a̱bhi vastrā̍ suvasa̱nānya̍rṣā̱'bhi dhe̱nūḥ su̱dughā̍: pū̱yamā̍naḥ |

a̱bhi ca̱ndrā bharta̍ve no̱ hira̍ṇyā̱'bhyaśvā̍nra̱thino̍ deva soma

||50||

a̱bhī no̍ arṣa di̱vyā vasū̍nya̱bhi viśvā̱ pārthi̍vā pū̱yamā̍naḥ |

a̱bhi yena̱ dravi̍ṇama̱śnavā̍mā̱'bhyā̍rṣe̱yaṃ ja̍madagni̱vanna̍:

||51||

a̱yā pa̱vā pa̍vasvai̱nā vasū̍ni mām̐śca̱tva i̍ndo̱ sara̍si̱ pra dha̍nva |

bra̱dhnaści̱datra̱ vāto̱ na jū̱taḥ pu̍ru̱medha̍ści̱ttaka̍ve̱ nara̍ṃ dāt

||52||

u̱ta na̍ e̱nā pa̍va̱yā pa̍va̱svā'dhi̍ śru̱te śra̱vāyya̍sya tī̱rthe |

ṣa̱ṣṭiṃ sa̱hasrā̍ naigu̱to vasū̍ni vṛ̱kṣaṃ na pa̱kvaṃ dhū̍nava̱draṇā̍ya

||53||

mahī̱me a̍sya̱ vṛṣa̱nāma̍ śū̱ṣe mām̐śca̍tve vā̱ pṛśa̍ne vā̱ vadha̍tre |

asvā̍payanni̱guta̍: sne̱haya̱ccā'pā̱mitrā̱m̐ apā̱cito̍ ace̱taḥ

||54||

saṃ trī pa̱vitrā̱ vita̍tānye̱ṣyanveka̍ṃ dhāvasi pū̱yamā̍naḥ |

asi̱ bhago̱ asi̍ dā̱trasya̍ dā̱tā'si̍ ma̱ghavā̍ ma̱ghava̍dbhya indo

||55||

e̱ṣa vi̍śva̱vitpa̍vate manī̱ṣī somo̱ viśva̍sya̱ bhuva̍nasya̱ rājā̍ |

dra̱psām̐ ī̱raya̍nvi̱dathe̱ṣvindu̱rvi vāra̱mavya̍ṃ sa̱mayāti̍ yāti

||56||

indu̍ṃ rihanti mahi̱ṣā ada̍bdhāḥ pa̱de re̍bhanti ka̱vayo̱ na gṛdhrā̍: |

hi̱nvanti̱ dhīrā̍ da̱śabhi̱: kṣipā̍bhi̱: sama̍ñjate rū̱pama̱pāṃ rase̍na

||57||

tvayā̍ va̱yaṃ pava̍mānena soma̱ bhare̍ kṛ̱taṃ vi ci̍nuyāma̱ śaśva̍t |

tanno̍ mi̱tro varu̍ṇo māmahantā̱madi̍ti̱: sindhu̍: pṛthi̱vī u̱ta dyauḥ

||58||

a̱bhi no̍ vāja̱sāta̍maṃ ra̱yima̍rṣa puru̱spṛha̍m | indo̍ sa̱hasra̍bharṇasaṃ tuvidyu̱mnaṃ vi̍bhvā̱saha̍m

||1||

pari̱ ṣya su̍vā̱no a̱vyaya̱ṃ rathe̱ na varmā̍vyata | indu̍ra̱bhi druṇā̍ hi̱to hi̍yā̱no dhārā̍bhirakṣāḥ

||2||

pari̱ ṣya su̍vā̱no a̍kṣā̱ indu̱ravye̱ mada̍cyutaḥ | dhārā̱ ya ū̱rdhvo a̍dhva̱re bhrā̱jā naiti̍ gavya̱yuḥ

||3||

sa hi tvaṃ de̍va̱ śaśva̍te̱ vasu̱ martā̍ya dā̱śuṣe̍ | indo̍ saha̱sriṇa̍ṃ ra̱yiṃ śa̱tātmā̍naṃ vivāsasi

||4||

va̱yaṃ te̍ a̱sya vṛ̍traha̱nvaso̱ vasva̍: puru̱spṛha̍: | ni nedi̍ṣṭhatamā i̱ṣaḥ syāma̍ su̱mnasyā̍dhrigo

||5||

dviryaṃ pañca̱ svaya̍śasa̱ṃ svasā̍ro̱ adri̍saṃhatam | pri̱yamindra̍sya̱ kāmya̍ṃ prasnā̱paya̍ntyū̱rmiṇa̍m

||6||

pari̱ tyaṃ ha̍rya̱taṃ hari̍ṃ ba̱bhruṃ pu̍nanti̱ vāre̍ṇa | yo de̱vānviśvā̱m̐ itpari̱ made̍na sa̱ha gaccha̍ti

||7||

a̱sya vo̱ hyava̍sā̱ pānto̍ dakṣa̱sādha̍nam | yaḥ sū̱riṣu̱ śravo̍ bṛ̱hadda̱dhe sva1rṇa ha̍rya̱taḥ

||8||

sa vā̍ṃ ya̱jñeṣu̍ mānavī̱ indu̍rjaniṣṭa rodasī | de̱vo de̍vī giri̱ṣṭhā asre̍dha̱ntaṃ tu̍vi̱ṣvaṇi̍

||9||

indrā̍ya soma̱ pāta̍ve vṛtra̱ghne pari̍ ṣicyase | nare̍ ca̱ dakṣi̍ṇāvate de̱vāya̍ sadanā̱sade̍

||10||

te pra̱tnāso̱ vyu̍ṣṭiṣu̱ somā̍: pa̱vitre̍ akṣaran |

a̱pa̱protha̍ntaḥ sanu̱tarhu̍ra̱ścita̍: prā̱tastām̐ apra̍cetasaḥ

||11||

taṃ sa̍khāyaḥ puro̱ruca̍ṃ yū̱yaṃ va̱yaṃ ca̍ sū̱raya̍: | a̱śyāma̱ vāja̍gandhyaṃ sa̱nema̱ vāja̍pastyam

||12||

ā ha̍rya̱tāya̍ dhṛ̱ṣṇave̱ dhanu̍stanvanti̱ pauṃsya̍m |

śu̱krāṃ va̍ya̱ntyasu̍rāya ni̱rṇija̍ṃ vi̱pāmagre̍ mahī̱yuva̍:

||1||

adha̍ kṣa̱pā pari̍ṣkṛto̱ vājā̍m̐ a̱bhi pra gā̍hate | yadī̍ vi̱vasva̍to̱ dhiyo̱ hari̍ṃ hi̱nvanti̱ yāta̍ve

||2||

tama̍sya marjayāmasi̱ mado̱ ya i̍ndra̱pāta̍maḥ | yaṃ gāva̍ ā̱sabhi̍rda̱dhuḥ pu̱rā nū̱naṃ ca̍ sū̱raya̍:

||3||

taṃ gātha̍yā purā̱ṇyā pu̍nā̱nama̱bhya̍nūṣata | u̱to kṛ̍panta dhī̱tayo̍ de̱vānā̱ṃ nāma̱ bibhra̍tīḥ

||4||

tamu̱kṣamā̍ṇama̱vyaye̱ vāre̍ punanti dharṇa̱sim | dū̱taṃ na pū̱rvaci̍ttaya̱ ā śā̍sate manī̱ṣiṇa̍:

||5||

sa pu̍nā̱no ma̱dinta̍ma̱: soma̍śca̱mūṣu̍ sīdati | pa̱śau na reta̍ ā̱dadha̱tpati̍rvacasyate dhi̱yaḥ

||6||

sa mṛ̍jyate su̱karma̍bhirde̱vo de̱vebhya̍: su̱taḥ | vi̱de yadā̍su saṃda̱dirma̱hīra̱po vi gā̍hate

||7||

su̱ta i̍ndo pa̱vitra̱ ā nṛbhi̍rya̱to vi nī̍yase | indrā̍ya matsa̱rinta̍maśca̱mūṣvā ni ṣī̍dasi

||8||

a̱bhī na̍vante a̱druha̍: pri̱yamindra̍sya̱ kāmya̍m | va̱tsaṃ na pūrva̱ āyu̍ni jā̱taṃ ri̍hanti mā̱tara̍:

||1||

pu̱nā̱na i̍nda̱vā bha̍ra̱ soma̍ dvi̱barha̍saṃ ra̱yim | tvaṃ vasū̍ni puṣyasi̱ viśvā̍ni dā̱śuṣo̍ gṛ̱he

||2||

tvaṃ dhiya̍ṃ mano̱yuja̍ṃ sṛ̱jā vṛ̱ṣṭiṃ na ta̍nya̱tuḥ | tvaṃ vasū̍ni̱ pārthi̍vā di̱vyā ca̍ soma puṣyasi

||3||

pari̍ te ji̱gyuṣo̍ yathā̱ dhārā̍ su̱tasya̍ dhāvati | raṃha̍māṇā̱ vya1vyaya̱ṃ vāra̍ṃ vā̱jīva̍ sāna̱siḥ

||4||

kratve̱ dakṣā̍ya naḥ kave̱ pava̍sva soma̱ dhāra̍yā | indrā̍ya̱ pāta̍ve su̱to mi̱trāya̱ varu̍ṇāya ca

||5||

pava̍sva vāja̱sāta̍maḥ pa̱vitre̱ dhāra̍yā su̱taḥ | indrā̍ya soma̱ viṣṇa̍ve de̱vebhyo̱ madhu̍mattamaḥ

||6||

tvāṃ ri̍hanti mā̱taro̱ hari̍ṃ pa̱vitre̍ a̱druha̍: | va̱tsaṃ jā̱taṃ na dhe̱nava̱: pava̍māna̱ vidha̍rmaṇi

||7||

pava̍māna̱ mahi̱ śrava̍ści̱trebhi̍ryāsi ra̱śmibhi̍: | śardha̱ntamā̍ṃsi jighnase̱ viśvā̍ni dā̱śuṣo̍ gṛ̱he

||8||

tvaṃ dyāṃ ca̍ mahivrata pṛthi̱vīṃ cāti̍ jabhriṣe | prati̍ drā̱pima̍muñcathā̱: pava̍māna mahitva̱nā

||9||

pu̱roji̍tī vo̱ andha̍saḥ su̱tāya̍ mādayi̱tnave̍ | apa̱ śvāna̍ṃ śnathiṣṭana̱ sakhā̍yo dīrghaji̱hvya̍m

||1||

yo dhāra̍yā pāva̱kayā̍ paripra̱syanda̍te su̱taḥ | indu̱raśvo̱ na kṛtvya̍:

||2||

taṃ du̱roṣa̍ma̱bhī nara̱: soma̍ṃ vi̱śvācyā̍ dhi̱yā | ya̱jñaṃ hi̍nva̱ntyadri̍bhiḥ

||3||

su̱tāso̱ madhu̍mattamā̱: somā̱ indrā̍ya ma̱ndina̍: | pa̱vitra̍vanto akṣarande̱vānga̍cchantu vo̱ madā̍:

||4||

indu̱rindrā̍ya pavata̱ iti̍ de̱vāso̍ abruvan | vā̱caspati̍rmakhasyate̱ viśva̱syeśā̍na̱ oja̍sā

||5||

sa̱hasra̍dhāraḥ pavate samu̱dro vā̍camīṅkha̱yaḥ | soma̱: patī̍ rayī̱ṇāṃ sakhendra̍sya di̱vedi̍ve

||6||

a̱yaṃ pū̱ṣā ra̱yirbhaga̱: soma̍: punā̱no a̍rṣati | pati̱rviśva̍sya̱ bhūma̍no̱ vya̍khya̱droda̍sī u̱bhe

||7||

samu̍ pri̱yā a̍nūṣata̱ gāvo̱ madā̍ya̱ ghṛṣva̍yaḥ | somā̍saḥ kṛṇvate pa̱thaḥ pava̍mānāsa̱ inda̍vaḥ

||8||

ya oji̍ṣṭha̱stamā bha̍ra̱ pava̍māna śra̱vāyya̍m | yaḥ pañca̍ carṣa̱ṇīra̱bhi ra̱yiṃ yena̱ vanā̍mahai

||9||

somā̍: pavanta̱ inda̍vo̱'smabhya̍ṃ gātu̱vitta̍māḥ | mi̱trāḥ su̍vā̱nā a̍re̱pasa̍: svā̱dhya̍: sva̱rvida̍:

||10||

su̱ṣvā̱ṇāso̱ vyadri̍bhi̱ścitā̍nā̱ goradhi̍ tva̱ci | iṣa̍ma̱smabhya̍ma̱bhita̱: sama̍svaranvasu̱vida̍:

||11||

e̱te pū̱tā vi̍pa̱ścita̱: somā̍so̱ dadhyā̍śiraḥ | sūryā̍so̱ na da̍rśa̱tāso̍ jiga̱tnavo̍ dhru̱vā ghṛ̱te

||12||

pra su̍nvā̱nasyāndha̍so̱ marto̱ na vṛ̍ta̱ tadvaca̍: | apa̱ śvāna̍marā̱dhasa̍ṃ ha̱tā ma̱khaṃ na bhṛga̍vaḥ

||13||

ā jā̱miratke̍ avyata bhu̱je na pu̱tra o̱ṇyo̍: | sara̍jjā̱ro na yoṣa̍ṇāṃ va̱ro na yoni̍mā̱sada̍m

||14||

sa vī̱ro da̍kṣa̱sādha̍no̱ vi yasta̱stambha̱ roda̍sī | hari̍: pa̱vitre̍ avyata ve̱dhā na yoni̍mā̱sada̍m

||15||

avyo̱ vāre̍bhiḥ pavate̱ somo̱ gavye̱ adhi̍ tva̱ci | kani̍krada̱dvṛṣā̱ hari̱rindra̍syā̱bhye̍ti niṣkṛ̱tam

||16||

krā̱ṇā śiśu̍rma̱hīnā̍ṃ hi̱nvannṛ̱tasya̱ dīdhi̍tim | viśvā̱ pari̍ pri̱yā bhu̍va̱dadha̍ dvi̱tā

||1||

upa̍ tri̱tasya̍ pā̱ṣyo̱3rabha̍kta̱ yadguhā̍ pa̱dam | ya̱jñasya̍ sa̱pta dhāma̍bhi̱radha̍ pri̱yam

||2||

trīṇi̍ tri̱tasya̱ dhāra̍yā pṛ̱ṣṭheṣvera̍yā ra̱yim | mimī̍te asya̱ yoja̍nā̱ vi su̱kratu̍:

||3||

ja̱jñā̱naṃ sa̱pta mā̱taro̍ ve̱dhāma̍śāsata śri̱ye | a̱yaṃ dhru̱vo ra̍yī̱ṇāṃ cike̍ta̱ yat

||4||

a̱sya vra̱te sa̱joṣa̍so̱ viśve̍ de̱vāso̍ a̱druha̍: | spā̱rhā bha̍vanti̱ ranta̍yo ju̱ṣanta̱ yat

||5||

yamī̱ garbha̍mṛtā̱vṛdho̍ dṛ̱śe cāru̱majī̍janan | ka̱viṃ maṃhi̍ṣṭhamadhva̱re pu̍ru̱spṛha̍m

||6||

sa̱mī̱cī̱ne a̱bhi tmanā̍ ya̱hvī ṛ̱tasya̍ mā̱tarā̍ | ta̱nvā̱nā ya̱jñamā̍nu̱ṣagyada̍ñja̱te

||7||

kratvā̍ śu̱krebhi̍ra̱kṣabhi̍ṝ̱ṇorapa̍ vra̱jaṃ di̱vaḥ | hi̱nvannṛ̱tasya̱ dīdhi̍ti̱ṃ prādhva̱re

||8||

pra pu̍nā̱nāya̍ ve̱dhase̱ somā̍ya̱ vaca̱ udya̍tam | bhṛ̱tiṃ na bha̍rā ma̱tibhi̱rjujo̍ṣate

||1||

pari̱ vārā̍ṇya̱vyayā̱ gobhi̍rañjā̱no a̍rṣati | trī ṣa̱dhasthā̍ punā̱naḥ kṛ̍ṇute̱ hari̍:

||2||

pari̱ kośa̍ṃ madhu̱ścuta̍ma̱vyaye̱ vāre̍ arṣati | a̱bhi vāṇī̱ṝṣī̍ṇāṃ sa̱pta nū̍ṣata

||3||

pari̍ ṇe̱tā ma̍tī̱nāṃ vi̱śvade̍vo̱ adā̍bhyaḥ | soma̍: punā̱naśca̱mvo̍rviśa̱ddhari̍:

||4||

pari̱ daivī̱ranu̍ sva̱dhā indre̍ṇa yāhi sa̱ratha̍m | pu̱nā̱no vā̱ghadvā̱ghadbhi̱rama̍rtyaḥ

||5||

pari̱ sapti̱rna vā̍ja̱yurde̱vo de̱vebhya̍: su̱taḥ | vyā̱na̱śiḥ pava̍māno̱ vi dhā̍vati

||6||

sakhā̍ya̱ ā ni ṣī̍data punā̱nāya̱ pra gā̍yata | śiśu̱ṃ na ya̱jñaiḥ pari̍ bhūṣata śri̱ye

||1||

samī̍ va̱tsaṃ na mā̱tṛbhi̍: sṛ̱jatā̍ gaya̱sādha̍nam | de̱vā̱vyaṃ1 mada̍ma̱bhi dviśa̍vasam

||2||

pu̱nātā̍ dakṣa̱sādha̍na̱ṃ yathā̱ śardhā̍ya vī̱taye̍ | yathā̍ mi̱trāya̱ varu̍ṇāya̱ śaṃta̍maḥ

||3||

a̱smabhya̍ṃ tvā vasu̱vida̍ma̱bhi vāṇī̍ranūṣata | gobhi̍ṣṭe̱ varṇa̍ma̱bhi vā̍sayāmasi

||4||

sa no̍ madānāṃ pata̱ indo̍ de̱vapsa̍rā asi | sakhe̍va̱ sakhye̍ gātu̱vitta̍mo bhava

||5||

sane̍mi kṛ̱dhya1smadā ra̱kṣasa̱ṃ kaṃ ci̍da̱triṇa̍m | apāde̍vaṃ dva̱yumaṃho̍ yuyodhi naḥ

||6||

taṃ va̍: sakhāyo̱ madā̍ya punā̱nama̱bhi gā̍yata | śiśu̱ṃ na ya̱jñaiḥ sva̍dayanta gū̱rtibhi̍:

||1||

saṃ va̱tsa i̍va mā̱tṛbhi̱rindu̍rhinvā̱no a̍jyate | de̱vā̱vīrmado̍ ma̱tibhi̱: pari̍ṣkṛtaḥ

||2||

a̱yaṃ dakṣā̍ya̱ sādha̍no̱'yaṃ śardhā̍ya vī̱taye̍ | a̱yaṃ de̱vebhyo̱ madhu̍mattamaḥ su̱taḥ

||3||

goma̍nna indo̱ aśva̍vatsu̱taḥ su̍dakṣa dhanva | śuci̍ṃ te̱ varṇa̱madhi̱ goṣu̍ dīdharam

||4||

sa no̍ harīṇāṃ pata̱ indo̍ de̱vapsa̍rastamaḥ | sakhe̍va̱ sakhye̱ naryo̍ ru̱ce bha̍va

||5||

sane̍mi̱ tvama̱smadām̐ ade̍va̱ṃ kaṃ ci̍da̱triṇa̍m | sā̱hvām̐ i̍ndo̱ pari̱ bādho̱ apa̍ dva̱yum

||6||

indra̱maccha̍ su̱tā i̱me vṛṣa̍ṇaṃ yantu̱ hara̍yaḥ | śru̱ṣṭī jā̱tāsa̱ inda̍vaḥ sva̱rvida̍:

||1||

a̱yaṃ bharā̍ya sāna̱sirindrā̍ya pavate su̱taḥ | somo̱ jaitra̍sya cetati̱ yathā̍ vi̱de

||2||

a̱syedindro̱ made̱ṣvā grā̱bhaṃ gṛ̍bhṇīta sāna̱sim | vajra̍ṃ ca̱ vṛṣa̍ṇaṃ bhara̱tsama̍psu̱jit

||3||

pra dha̍nvā soma̱ jāgṛ̍vi̱rindrā̍yendo̱ pari̍ srava | dyu̱manta̱ṃ śuṣma̱mā bha̍rā sva̱rvida̍m

||4||

indrā̍ya̱ vṛṣa̍ṇa̱ṃ mada̱ṃ pava̍sva vi̱śvada̍rśataḥ | sa̱hasra̍yāmā pathi̱kṛdvi̍cakṣa̱ṇaḥ

||5||

a̱smabhya̍ṃ gātu̱vitta̍mo de̱vebhyo̱ madhu̍mattamaḥ | sa̱hasra̍ṃ yāhi pa̱thibhi̱: kani̍kradat

||6||

pava̍sva de̱vavī̍taya̱ indo̱ dhārā̍bhi̱roja̍sā | ā ka̱laśa̱ṃ madhu̍māntsoma naḥ sadaḥ

||7||

tava̍ dra̱psā u̍da̱pruta̱ indra̱ṃ madā̍ya vāvṛdhuḥ | tvāṃ de̱vāso̍ a̱mṛtā̍ya̱ kaṃ pa̍puḥ

||8||

ā na̍: sutāsa indavaḥ punā̱nā dhā̍vatā ra̱yim | vṛ̱ṣṭidyā̍vo rītyāpaḥ sva̱rvida̍:

||9||

soma̍: punā̱na ū̱rmiṇā'vyo̱ vāra̱ṃ vi dhā̍vati | agre̍ vā̱caḥ pava̍māna̱: kani̍kradat

||10||

dhī̱bhirhi̍nvanti vā̱jina̱ṃ vane̱ krīl̤a̍nta̱matya̍vim | a̱bhi tri̍pṛ̱ṣṭhaṃ ma̱taya̱: sama̍svaran

||11||

asa̍rji ka̱laśā̍m̐ a̱bhi mī̱l̤he sapti̱rna vā̍ja̱yuḥ | pu̱nā̱no vāca̍ṃ ja̱naya̍nnasiṣyadat

||12||

pava̍te harya̱to hari̱rati̱ hvarā̍ṃsi̱ raṃhyā̍ | a̱bhyarṣa̍ntsto̱tṛbhyo̍ vī̱rava̱dyaśa̍:

||13||

a̱yā pa̍vasva deva̱yurmadho̱rdhārā̍ asṛkṣata | rebha̍npa̱vitra̱ṃ parye̍ṣi vi̱śvata̍:

||14||

parī̱to ṣi̍ñcatā su̱taṃ somo̱ ya u̍tta̱maṃ ha̱viḥ |

da̱dha̱nvām̐ yo naryo̍ a̱psva1ntarā su̱ṣāva̱ soma̱madri̍bhiḥ

||1||

nū̱naṃ pu̍nā̱no'vi̍bhi̱: pari̍ sra̱vā'da̍bdhaḥ sura̱bhinta̍raḥ |

su̱te ci̍ttvā̱psu ma̍dāmo̱ andha̍sā śrī̱ṇanto̱ gobhi̱rutta̍ram

||2||

pari̍ suvā̱naścakṣa̍se deva̱māda̍na̱: kratu̱rindu̍rvicakṣa̱ṇaḥ

||3||

pu̱nā̱naḥ so̍ma̱ dhāra̍yā̱'po vasā̍no arṣasi |

ā ra̍tna̱dhā yoni̍mṛ̱tasya̍ sīda̱syutso̍ deva hira̱ṇyaya̍:

||4||

du̱hā̱na ūdha̍rdi̱vyaṃ madhu̍ pri̱yaṃ pra̱tnaṃ sa̱dhastha̱māsa̍dat |

ā̱pṛcchya̍ṃ dha̱ruṇa̍ṃ vā̱jya̍rṣati̱ nṛbhi̍rdhū̱to vi̍cakṣa̱ṇaḥ

||5||

pu̱nā̱naḥ so̍ma̱ jāgṛ̍vi̱ravyo̱ vāre̱ pari̍ pri̱yaḥ |

tvaṃ vipro̍ abha̱vo'ṅgi̍rastamo̱ madhvā̍ ya̱jñaṃ mi̍mikṣa naḥ

||6||

somo̍ mī̱ḍhvānpa̍vate gātu̱vitta̍ma̱ ṛṣi̱rvipro̍ vicakṣa̱ṇaḥ |

tvaṃ ka̱vira̍bhavo deva̱vīta̍ma̱ ā sūrya̍ṃ rohayo di̱vi

||7||

soma̍ u ṣuvā̱ṇaḥ so̱tṛbhi̱radhi̱ ṣṇubhi̱ravī̍nām |

aśva̍yeva ha̱ritā̍ yāti̱ dhāra̍yā ma̱ndrayā̍ yāti̱ dhāra̍yā

||8||

a̱nū̱pe gomā̱ngobhi̍rakṣā̱: somo̍ du̱gdhābhi̍rakṣāḥ |

sa̱mu̱draṃ na sa̱ṃvara̍ṇānyagmanma̱ndī madā̍ya tośate

||9||

ā so̍ma suvā̱no adri̍bhisti̱ro vārā̍ṇya̱vyayā̍ |

jano̱ na pu̱ri ca̱mvo̍rviśa̱ddhari̱: sado̱ vane̍ṣu dadhiṣe

||10||

sa mā̍mṛje ti̱ro aṇvā̍ni me̱ṣyo̍ mī̱l̤he sapti̱rna vā̍ja̱yuḥ |

a̱nu̱mādya̱: pava̍māno manī̱ṣibhi̱: somo̱ vipre̍bhi̱ṝkva̍bhiḥ

||11||

pra so̍ma de̱vavī̍taye̱ sindhu̱rna pi̍pye̱ arṇa̍sā |

a̱ṃśoḥ paya̍sā madi̱ro na jāgṛ̍vi̱racchā̱ kośa̍ṃ madhu̱ścuta̍m

||12||

ā ha̍rya̱to arju̍ne̱ atke̍ avyata pri̱yaḥ sū̱nurna marjya̍: |

tamī̍ṃ hinvantya̱paso̱ yathā̱ ratha̍ṃ na̱dīṣvā gabha̍styoḥ

||13||

a̱bhi somā̍sa ā̱yava̱: pava̍nte̱ madya̱ṃ mada̍m |

sa̱mu̱drasyādhi̍ vi̱ṣṭapi̍ manī̱ṣiṇo̍ matsa̱rāsa̍: sva̱rvida̍:

||14||

tara̍tsamu̱draṃ pava̍māna ū̱rmiṇā̱ rājā̍ de̱va ṛ̱taṃ bṛ̱hat |

arṣa̍nmi̱trasya̱ varu̍ṇasya̱ dharma̍ṇā̱ pra hi̍nvā̱na ṛ̱taṃ bṛ̱hat

||15||

nṛbhi̍ryemā̱no ha̍rya̱to vi̍cakṣa̱ṇo rājā̍ de̱vaḥ sa̍mu̱driya̍:

||16||

indrā̍ya pavate̱ mada̱: somo̍ ma̱rutva̍te su̱taḥ | sa̱hasra̍dhāro̱ atyavya̍marṣati̱ tamī̍ mṛjantyā̱yava̍:

||17||

pu̱nā̱naśca̱mū ja̱naya̍nma̱tiṃ ka̱viḥ somo̍ de̱veṣu̍ raṇyati |

a̱po vasā̍na̱: pari̱ gobhi̱rutta̍ra̱: sīda̱nvane̍ṣvavyata

||18||

tavā̱haṃ so̍ma rāraṇa sa̱khya i̍ndo di̱vedi̍ve |

pu̱rūṇi̍ babhro̱ ni ca̍ranti̱ māmava̍ pari̱dhīm̐rati̱ tām̐ i̍hi

||19||

u̱tāhaṃ nakta̍mu̱ta so̍ma te̱ divā̍ sa̱khyāya̍ babhra̱ ūdha̍ni |

ghṛ̱ṇā tapa̍nta̱mati̱ sūrya̍ṃ pa̱raḥ śa̍ku̱nā i̍va paptima

||20||

mṛ̱jyamā̍naḥ suhastya samu̱dre vāca̍minvasi |

ra̱yiṃ pi̱śaṅga̍ṃ bahu̱laṃ pu̍ru̱spṛha̱ṃ pava̍mānā̱bhya̍rṣasi

||21||

mṛ̱jā̱no vāre̱ pava̍māno a̱vyaye̱ vṛṣāva̍ cakrado̱ vane̍ |

de̱vānā̍ṃ soma pavamāna niṣkṛ̱taṃ gobhi̍rañjā̱no a̍rṣasi

||22||

pava̍sva̱ vāja̍sātaye̱'bhi viśvā̍ni̱ kāvyā̍ |

tvaṃ sa̍mu̱draṃ pra̍tha̱mo vi dhā̍rayo de̱vebhya̍: soma matsa̱raḥ

||23||

sa tū pa̍vasva̱ pari̱ pārthi̍va̱ṃ rajo̍ di̱vyā ca̍ soma̱ dharma̍bhiḥ |

tvāṃ viprā̍so ma̱tibhi̍rvicakṣaṇa śu̱bhraṃ hi̍nvanti dhī̱tibhi̍:

||24||

pava̍mānā asṛkṣata pa̱vitra̱mati̱ dhāra̍yā |

ma̱rutva̍nto matsa̱rā i̍ndri̱yā hayā̍ me̱dhāma̱bhi prayā̍ṃsi ca

||25||

a̱po vasā̍na̱: pari̱ kośa̍marṣa̱tīndu̍rhiyā̱naḥ so̱tṛbhi̍: |

ja̱naya̱ñjyoti̍rma̱ndanā̍ avīvaśa̱dgāḥ kṛ̍ṇvā̱no na ni̱rṇija̍m

||26||

pava̍sva̱ madhu̍mattama̱ indrā̍ya soma kratu̱vitta̍mo̱ mada̍: | mahi̍ dyu̱kṣata̍mo̱ mada̍:

||1||

yasya̍ te pī̱tvā vṛ̍ṣa̱bho vṛ̍ṣā̱yate̱'sya pī̱tā sva̱rvida̍: |

sa su̱prake̍to a̱bhya̍kramī̱diṣo'cchā̱ vāja̱ṃ naita̍śaḥ

||2||

tvaṃ hya1ṅga daivyā̱ pava̍māna̱ jani̍māni dyu̱matta̍maḥ | a̱mṛ̱ta̱tvāya̍ gho̱ṣaya̍:

||3||

yenā̱ nava̍gvo da̱dhyaṅṅa̍porṇu̱te yena̱ viprā̍sa āpi̱re |

de̱vānā̍ṃ su̱mne a̱mṛta̍sya̱ cāru̍ṇo̱ yena̱ śravā̍ṃsyāna̱śuḥ

||4||

e̱ṣa sya dhāra̍yā su̱to'vyo̱ vāre̍bhiḥ pavate ma̱dinta̍maḥ | krīl̤a̍nnū̱rmira̱pāmi̍va

||5||

ya u̱sriyā̱ apyā̍ a̱ntaraśma̍no̱ nirgā akṛ̍nta̱doja̍sā |

a̱bhi vra̱jaṃ ta̍tniṣe̱ gavya̱maśvya̍ṃ va̱rmīva̍ dhṛṣṇa̱vā ru̍ja

||6||

ā so̍tā̱ pari̍ ṣiñca̱tā'śva̱ṃ na stoma̍ma̱ptura̍ṃ raja̱stura̍m | va̱na̱kra̱kṣamu̍da̱pruta̍m

||7||

sa̱hasra̍dhāraṃ vṛṣa̱bhaṃ pa̍yo̱vṛdha̍ṃ pri̱yaṃ de̱vāya̱ janma̍ne |

ṛ̱tena̱ ya ṛ̱tajā̍to vivāvṛ̱dhe rājā̍ de̱va ṛ̱taṃ bṛ̱hat

||8||

a̱bhi dyu̱mnaṃ bṛ̱hadyaśa̱ iṣa̍spate didī̱hi de̍va deva̱yuḥ | vi kośa̍ṃ madhya̱maṃ yu̍va

||9||

ā va̍cyasva sudakṣa ca̱mvo̍: su̱to vi̱śāṃ vahni̱rna vi̱śpati̍: |

vṛ̱ṣṭiṃ di̱vaḥ pa̍vasva rī̱tima̱pāṃ jinvā̱ gavi̍ṣṭaye̱ dhiya̍:

||10||

e̱tamu̱ tyaṃ ma̍da̱cyuta̍ṃ sa̱hasra̍dhāraṃ vṛṣa̱bhaṃ divo̍ duhuḥ | viśvā̱ vasū̍ni̱ bibhra̍tam

||11||

vṛṣā̱ vi ja̍jñe ja̱naya̱nnama̍rtyaḥ pra̱tapa̱ñjyoti̍ṣā̱ tama̍: |

sa suṣṭu̍taḥ ka̱vibhi̍rni̱rṇija̍ṃ dadhe tri̱dhātva̍sya̱ daṃsa̍sā

||12||

sa su̍nve̱ yo vasū̍nā̱ṃ yo rā̱yāmā̍ne̱tā ya il̤ā̍nām | somo̱ yaḥ su̍kṣitī̱nām

||13||

yasya̍ na̱ indra̱: pibā̱dyasya̍ ma̱ruto̱ yasya̍ vārya̱maṇā̱ bhaga̍: |

ā yena̍ mi̱trāvaru̍ṇā̱ karā̍maha̱ endra̱mava̍se ma̱he

||14||

indrā̍ya soma̱ pāta̍ve̱ nṛbhi̍rya̱taḥ svā̍yu̱dho ma̱dinta̍maḥ | pava̍sva̱ madhu̍mattamaḥ

||15||

indra̍sya̱ hārdi̍ soma̱dhāna̱mā vi̍śa samu̱drami̍va̱ sindha̍vaḥ |

juṣṭo̍ mi̱trāya̱ varu̍ṇāya vā̱yave̍ di̱vo vi̍ṣṭa̱mbha u̍tta̱maḥ

||16||

pari̱ pra dha̱nvendrā̍ya soma svā̱durmi̱trāya̍ pū̱ṣṇe bhagā̍ya| 1

indra̍ste soma su̱tasya̍ peyā̱: kratve̱ dakṣā̍ya̱ viśve̍ ca de̱vāḥ

||1||

2

e̱vāmṛtā̍ya ma̱he kṣayā̍ya̱ sa śu̱kro a̍rṣa di̱vyaḥ pī̱yūṣa̍:| 3

pava̍sva soma ma̱hāntsa̍mu̱draḥ pi̱tā de̱vānā̱ṃ viśvā̱bhi dhāma̍

||2||

4

śu̱kraḥ pa̍vasva de̱vebhya̍: soma di̱ve pṛ̍thi̱vyai śaṃ ca̍ pra̱jāyai̍| 5

di̱vo dha̱rtāsi̍ śu̱kraḥ pī̱yūṣa̍: sa̱tye vidha̍rmanvā̱jī pa̍vasva

||3||

6

pava̍sva soma dyu̱mnī su̍dhā̱ro ma̱hāmavī̍nā̱manu̍ pū̱rvyaḥ| 7

nṛbhi̍ryemā̱no ja̍jñā̱naḥ pū̱taḥ kṣara̱dviśvā̍ni ma̱ndraḥ sva̱rvit

||4||

8

indu̍: punā̱naḥ pra̱jāmu̍rā̱ṇaḥ kara̱dviśvā̍ni̱ dravi̍ṇāni naḥ| 9

pava̍sva soma̱ kratve̱ dakṣā̱yā'śvo̱ na ni̱kto vā̱jī dhanā̍ya

||5||

10

taṃ te̍ so̱tāro̱ rasa̱ṃ madā̍ya pu̱nanti̱ soma̍ṃ ma̱he dyu̱mnāya̍ | 11

śiśu̍ṃ jajñā̱naṃ hari̍ṃ mṛjanti pa̱vitre̱ soma̍ṃ de̱vebhya̱ indu̍m

||6||

12

indu̍: paviṣṭa̱ cāru̱rmadā̍yā̱'pāmu̱pasthe̍ ka̱virbhagā̍ya 13

bibha̍rti̱ cārvindra̍sya̱ nāma̱ yena̱ viśvā̍ni vṛ̱trā ja̱ghāna̍

||7||

14

piba̍ntyasya̱ viśve̍ de̱vāso̱ gobhi̍: śrī̱tasya̱ nṛbhi̍: su̱tasya̍ | 15

pra su̍vā̱no a̍kṣāḥ sa̱hasra̍dhārasti̱raḥ pa̱vitra̱ṃ vi vāra̱mavya̍m

||8||

16

sa vā̱jya̍kṣāḥ sa̱hasra̍retā a̱dbhirmṛ̍jā̱no gobhi̍: śrīṇā̱naḥ | 17

pra so̍ma yā̱hīndra̍sya ku̱kṣā nṛbhi̍ryemā̱no adri̍bhiḥ su̱taḥ

||9||

18

asa̍rji vā̱jī ti̱raḥ pa̱vitra̱mindrā̍ya̱ soma̍: sa̱hasra̍dhāraḥ | 19

a̱ñjantye̍na̱ṃ madhvo̱ rase̱nendrā̍ya̱ vṛṣṇa̱ indu̱ṃ madā̍ya

||10||

20

de̱vebhya̍stvā̱ vṛthā̱ pāja̍se̱'po vasā̍na̱ṃ hari̍ṃ mṛjanti | 21

indu̱rindrā̍ya tośate̱ ni to̍śate śrī̱ṇannu̱gro ri̱ṇanna̱paḥ

||11||

paryū̱ ṣu pra dha̍nva̱ vāja̍sātaye̱ pari̍ vṛ̱trāṇi̍ sa̱kṣaṇi̍: | dvi̱ṣasta̱radhyā̍ ṛṇa̱yā na̍ īyase

||1||

anu̱ hi tvā̍ su̱taṃ so̍ma̱ madā̍masi ma̱he sa̍marya̱rājye̍ | vājā̍m̐ a̱bhi pa̍vamāna̱ pra gā̍hase

||2||

ajī̍jano̱ hi pa̍vamāna̱ sūrya̍ṃ vi̱dhāre̱ śakma̍nā̱ paya̍: | gojī̍rayā̱ raṃha̍māṇa̱: pura̍ṃdhyā

||3||

ajī̍jano amṛta̱ martye̱ṣvām̐ ṛ̱tasya̱ dharma̍nna̱mṛta̍sya̱ cāru̍ṇaḥ | sadā̍saro̱ vāja̱macchā̱ sani̍ṣyadat

||4||

a̱bhya̍bhi̱ hi śrava̍sā ta̱tardi̱thotsa̱ṃ na kaṃ ci̍jjana̱pāna̱makṣi̍tam | śaryā̍bhi̱rna bhara̍māṇo̱ gabha̍styoḥ

||5||

ādī̱ṃ ke ci̱tpaśya̍mānāsa̱ āpya̍ṃ vasu̱ruco̍ di̱vyā a̱bhya̍nūṣata | vāra̱ṃ na de̱vaḥ sa̍vi̱tā vyū̍rṇute

||6||

tve so̍ma pratha̱mā vṛ̱ktaba̍rhiṣo ma̱he vājā̍ya̱ śrava̍se̱ dhiya̍ṃ dadhuḥ | sa tvaṃ no̍ vīra vī̱ryā̍ya codaya

||7||

di̱vaḥ pī̱yūṣa̍ṃ pū̱rvyaṃ yadu̱kthya̍ṃ ma̱ho gā̱hāddi̱va ā nira̍dhukṣata | indra̍ma̱bhi jāya̍māna̱ṃ sama̍svaran

||8||

adha̱ yadi̱me pa̍vamāna̱ roda̍sī i̱mā ca̱ viśvā̱ bhuva̍nā̱bhi ma̱jmanā̍ |

yū̱the na ni̱:ṣṭhā vṛ̍ṣa̱bho vi ti̍ṣṭhase

||9||

soma̍: punā̱no a̱vyaye̱ vāre̱ śiśu̱rna krīl̤a̱npava̍māno akṣāḥ | sa̱hasra̍dhāraḥ śa̱tavā̍ja̱ indu̍:

||10||

e̱ṣa pu̍nā̱no madhu̍mām̐ ṛ̱tāvendrā̱yendu̍: pavate svā̱durū̱rmiḥ | vā̱ja̱sani̍rvarivo̱vidva̍yo̱dhāḥ

||11||

sa pa̍vasva̱ saha̍mānaḥ pṛta̱nyūntsedha̱nrakṣā̱ṃsyapa̍ du̱rgahā̍ṇi | svā̱yu̱dhaḥ sā̍sa̱hvāntso̍ma̱ śatrū̍n

||12||

a̱yā ru̱cā hari̍ṇyā punā̱no viśvā̱ dveṣā̍ṃsi tarati sva̱yugva̍bhi̱: sūro̱ na sva̱yugva̍bhiḥ |

dhārā̍ su̱tasya̍ rocate punā̱no a̍ru̱ṣo hari̍: | viśvā̱ yadrū̱pā pa̍ri̱yātyṛkva̍bhiḥ sa̱ptāsye̍bhi̱ṝkva̍bhiḥ

||1||

tvaṃ tyatpa̍ṇī̱nāṃ vi̍do̱ vasu̱ saṃ mā̱tṛbhi̍rmarjayasi̱ sva ā dama̍ ṛ̱tasya̍ dhī̱tibhi̱rdame̍ |

pa̱rā̱vato̱ na sāma̱ tadyatrā̱ raṇa̍nti dhī̱taya̍: | tri̱dhātu̍bhi̱raru̍ṣībhi̱rvayo̍ dadhe̱ roca̍māno̱ vayo̍ dadhe

||2||

pūrvā̱manu̍ pra̱diśa̍ṃ yāti̱ ceki̍ta̱tsaṃ ra̱śmibhi̍ryatate darśa̱to ratho̱ daivyo̍ darśa̱to ratha̍: |

agma̍nnu̱kthāni̱ pauṃsyendra̱ṃ jaitrā̍ya harṣayan | vajra̍śca̱ yadbhava̍tho̱ ana̍pacyutā sa̱matsvana̍pacyutā

||3||

nā̱nā̱naṃ vā u̍ no̱ dhiyo̱ vi vra̱tāni̱ janā̍nām |

takṣā̍ ri̱ṣṭaṃ ru̱taṃ bhi̱ṣagbra̱hmā su̱nvanta̍miccha̱tīndrā̍yendo̱ pari̍ srava

||1||

jara̍tībhi̱roṣa̍dhībhiḥ pa̱rṇebhi̍: śaku̱nānā̍m |

kā̱rmā̱ro aśma̍bhi̱rdyubhi̱rhira̍ṇyavantamiccha̱tīndrā̍yendo̱ pari̍ srava

||2||

kā̱rura̱haṃ ta̱to bhi̱ṣagu̍palapra̱kṣiṇī̍ na̱nā |

nānā̍dhiyo vasū̱yavo'nu̱ gā i̍va tasthi̱mendrā̍yendo̱ pari̍ srava

||3||

aśvo̱ vol̤hā̍ su̱khaṃ ratha̍ṃ hasa̱nāmu̍pama̱ntriṇa̍: |

śepo̱ roma̍ṇvantau bhe̱dau vārinma̱ṇḍūka̍ iccha̱tīndrā̍yendo̱ pari̍ srava

||4||

śa̱rya̱ṇāva̍ti̱ soma̱mindra̍: pibatu vṛtra̱hā |

bala̱ṃ dadhā̍na ā̱tmani̍ kari̱ṣyanvī̱rya̍ṃ ma̱hadindrā̍yendo̱ pari̍ srava

||1||

ā pa̍vasva diśāṃ pata ārjī̱kātso̍ma mīḍhvaḥ |

ṛ̱ta̱vā̱kena̍ sa̱tyena̍ śra̱ddhayā̱ tapa̍sā su̱ta indrā̍yendo̱ pari̍ srava

||2||

pa̱rjanya̍vṛddhaṃ mahi̱ṣaṃ taṃ sūrya̍sya duhi̱tābha̍rat |

taṃ ga̍ndha̱rvāḥ pratya̍gṛbhṇa̱ntaṃ some̱ rasa̱māda̍dhu̱rindrā̍yendo̱ pari̍ srava

||3||

ṛ̱taṃ vada̍nnṛtadyumna sa̱tyaṃ vada̍ntsatyakarman |

śra̱ddhāṃ vada̍ntsoma rājandhā̱trā so̍ma̱ pari̍ṣkṛta̱ indrā̍yendo̱ pari̍ srava

||4||

sa̱tyamu̍grasya bṛha̱taḥ saṃ sra̍vanti saṃsra̱vāḥ |

saṃ ya̍nti ra̱sino̱ rasā̍: punā̱no brahma̍ṇā hara̱ indrā̍yendo̱ pari̍ srava

||5||

yatra̍ bra̱hmā pa̍vamāna chanda̱syā̱ṃ3 vāca̱ṃ vada̍n |

grāvṇā̱ some̍ mahī̱yate̱ some̍nāna̱ndaṃ ja̱naya̱nnindrā̍yendo̱ pari̍ srava

||6||

yatra̱ jyoti̱raja̍sra̱ṃ yasmi̍m̐llo̱ke sva̍rhi̱tam |

tasmi̱nmāṃ dhe̍hi pavamānā̱'mṛte̍ lo̱ke akṣi̍ta̱ indrā̍yendo̱ pari̍ srava

||7||

yatra̱ rājā̍ vaivasva̱to yatrā̍va̱rodha̍naṃ di̱vaḥ |

yatrā̱mūrya̱hvatī̱rāpa̱statra̱ māma̱mṛta̍ṃ kṛ̱dhīndrā̍yendo̱ pari̍ srava

||8||

yatrā̍nukā̱maṃ cara̍ṇaṃ trinā̱ke tri̍di̱ve di̱vaḥ |

lo̱kā yatra̱ jyoti̍ṣmanta̱statra̱ māma̱mṛta̍ṃ kṛ̱dhīndrā̍yendo̱ pari̍ srava

||9||

yatra̱ kāmā̍ nikā̱māśca̱ yatra̍ bra̱dhnasya̍ vi̱ṣṭapa̍m |

sva̱dhā ca̱ yatra̱ tṛpti̍śca̱ tatra̱ māma̱mṛta̍ṃ kṛ̱dhīndrā̍yendo̱ pari̍ srava

||10||

yatrā̍na̱ndāśca̱ modā̍śca̱ muda̍: pra̱muda̱ āsa̍te |

kāma̍sya̱ yatrā̱ptāḥ kāmā̱statra̱ māma̱mṛta̍ṃ kṛ̱dhīndrā̍yendo̱ pari̍ srava

||11||

ya indo̱: pava̍māna̱syā'nu̱ dhāmā̱nyakra̍mīt |

tamā̍huḥ supra̱jā iti̱ yaste̍ so̱māvi̍dha̱nmana̱ indrā̍yendo̱ pari̍ srava

||1||

ṛṣe̍ mantra̱kṛtā̱ṃ stomai̱: kaśya̍podva̱rdhaya̱ngira̍: |

soma̍ṃ namasya̱ rājā̍na̱ṃ yo ja̱jñe vī̱rudhā̱ṃ pati̱rindrā̍yendo̱ pari̍ srava

||2||

sa̱pta diśo̱ nānā̍sūryāḥ sa̱pta hotā̍ra ṛ̱tvija̍: |

de̱vā ā̍di̱tyā ye sa̱pta tebhi̍: somā̱bhi ra̍kṣa na̱ indrā̍yendo̱ pari̍ srava

||3||

yatte̍ rājañchṛ̱taṃ ha̱vistena̍ somā̱bhi ra̍kṣa naḥ |

a̱rā̱tī̱vā mā na̍stārī̱nmo ca̍ na̱: kiṃ ca̱nāma̍ma̱dindrā̍yendo̱ pari̍ srava

||4||